(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخامس_والأربعين"اهرجو2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه..
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
"تي شن الحلو هدا"
ضحكت اميمه ومشت خدت العبايه والوشاح من الدولاب..
عمر بإبتسامه:لامتى بتقعدوا لوطا؟
اميمه وهي تلبس في عبايتها:لبعد المغرب..
عمر:قداش بنستاحشك من هني للمغرب.
مشت وقفت ع المرايه وهي تلبس في وشاحها وع وجهها ابتسامه..
هو مشي اتكى ع الزيانه وربع ايديه وقعد يتأمل فيه..
ويتفكر في الماضي اول الايام اللي جمعاته بيه قداش كانت حلوة..
عمر:تعرفي لتوا مش مصدق انك وليتي مرتي..
اميمه كملت وشبحتله وهي تقول:علاش؟
عمر:وين تخطر عليا ايام زمان..ويخطر عليا اللي صار كله..بالذات قسوتك وجفاك..انت طيبه هلبه صح..بس ماريتش زي قسوتك..
اميمه بإبتسامه:لو ماكنتش نحبك ماقسيتش عليك...ماكنتش عبرتك نهائي..ع العموم مانبوش نحكوا في الماضي لأنه مش كله حلو..خلينا في الحاضر..
خدي يدها وقال:صدقتي قلبي..خلينا في الحاضر..
🌸وشويه ونزل هو وياها تحت..
وين شافوهم تعالت الزغاريد في الحوش..
غنوا عليهم كم شتاوة..
بعدين عمر مشي طلع للرجاله..
واميمه خشت الصاله مع النساوين..
خديجه كانت تراجي فيها امتى تحول عبايتها بش تشوفها شن لابسه..
كانت لابسه فستان لونه اخضر للكبه..ضابط..وكمه تلاته ارباع..
ودايره شعرها بطريقه حلوة..طلتها كانت كلاسكيه ملفته هلبه وطالعه عليها..
وخديجه عجبتها...المهم تبان قدام اقاربهم بأحسن صورة...
🌸اما طوبى..
كانت في الطريق هي والجالي...
وطول الطريق وهما يهدرزوا وجوهم حلو بالمرة..
☘"ليهم ساعه في الشقه"
عبد القيوم بإبتسامه:تي غير وين لقيتهم هاذوم نهار الجمعه!
المهدي:تلقاهم هلبه الناس اللي يبوا يخدموا ع روسهم ويطلعوا القرش في كل وقت..
هز عبد القيوم راسه وقال:مزبوط..هي مالا نقولك بارك الله فيك ع حسن الضيافه وان شاء الله ديما حوشكم عامر بالفرح..
المهدي:تمنيت قعدت تغديت اقل شي..بس مادام عزمك عمي لطفي مانقدروا نديروا شي..
عبد القيوم بإبتسامه:مرة اخرى ان شاء الله مانفوتها عزومة عيت شنيبه..
المهدي:مرحبتين بيك في أي وقت..
عبد القيوم:تسلم يالأمير...
المهدي:بارك الله فيك..بإذن الله غدوة نجيك الشقه ومعاي عقد الايجار نتموا باقي الاجراءات..
عبد القيوم:تم..مد يده وقال..هي نخليكم توا السلام عليكم..
صافحه المهدي وقال:وعليكم السلام..
ومشي عبد القيوم بشنطه بأتجاه حوش الواعر...
عدا الكياس...
ووقف قدام باب حوش شنيبه..
ع جية سيارة الجالي لحوش بوه ..
وهي خاشه طوبى شافت لحوش بوه وعيونها معبيات دموع شوق..
انتبهت ع الراجل اللي واقف ع الباب وفي يده شنطه..
كان عاطي بالظهر...استغربت فيه...
بعدين غير عيونه عنه لما خش راجلها بالسيارة داخل..
☘فهاللحظه انفتح باب حوش الواعر..
لطفي بإبتسامه:حللت أهلا ووطئت سهلا..تفضل..
عبد القيوم بضحكه:تسلم تسلم الله يعزك..
خش داخل وسلم ع لطفي..
بعدين لطفي سكر ع الباب ورفع عبد القيوم بإتجاه حوش بوه..
☘في كوجينه حوش لطفي..
سالمين وهي تحوس معاهم:ماعنده حد لابات ولاام ولاخوت ولاخوات..حتى جدته اللي رباته توفت من عامين فاتوا..
مطيرة:مقطوع من شجرة ياناري..
سالمين:لاعنده عمام وعمات وخوال وخالات..بس عاد مش كيف البات والأم..وهو الشاب هضا عنده عزة نفس عجيبه مايحب يثقل ع حد حتى هله..تصدقن حتى لما ندزله غدا ولاعشا محوتك يقبل ياخده وكان جانا يشرب قهوة ويسبقنا بالحلف انه مايقعد بيش مانحلفوا عليه فعزومه..
سدرة وهي ترد في كيسان الكريستال للصندوق متاعهم قالت:علاش ماتزوجش لتوا؟
سالمين:حاولنا فيه واجد وهو مسكر راسه ع الزيزة مش عارفين ليش..
مطيره:تلقيه خدي ع قعاده بروحه..
سدرة:ومرات ماعنداش بيش..
سالمين:لا والله عنده ربك عاطيه..بس هو نحس فيه يبي وحده هنا..
سدرة:كيف عرفتي..
سالمين؛كيف مسك في قصة الخدمه في طرابلس وقعد ورا جبريل لين دبرله فيها مع لطفي خلاني نقول في خاطري انه يبي يزوز ويستقر هنا...
مطيرة:مرات صح..مرات يبي وحده هني وجاي ع خاطرها..
ع خشة اريج وهي تقول:خالتي توا كلمتني بيبو وقالت جت لحوش متاعينها نبينا نبعتولها اللبس العربي متاعها..
مطيرة:ايه حقه كسوتها مازال قاعده هني..
ناضت سدرة وهي تقول:قالت خلوها عندكم لين نروح من شهر العسل..روجه وصليها انتي ومعتز..
اريج:حاضر..
سدرة:تعرفي وينها؟
اريج وهي طالعه:ايه..
سدرة:غير امتى تجي العشيه بس..
مطيرة وسالمين شبحولها وابتسموا
☘☘☘☘☘☘
"مبروك علينا مرت الغالي
يابدر منور في العالي...
هادم خوات الجالي وامه وخالاته استقبلوهم بالشتاوات وهما خاشين عليهم..
مغليه..
مبروك ع ضي عيوني..
ان شاء الله يدير صغار يجوني..
والجالي وطوبى يسمعولها وهما مبتسمين..
ونسرين مركزة ع الجالي كيف شاد يد طوبى وكأنه خايفها تهرب...
وخالاته وهما يشوفوا فيهم كانوا مقهورات اللي جالي طلع برا العيله وهما كانوا يتمنوه لبناتهم...وحده فيهم قالت شتاوة من بدايتها التانيات عرفوها وقعدوا يقولوا معاها..
هدا عريس وحصلتيه
تاج ع راسك حطيه..
شبحت طوبى للجالي وهو شبحلها..
ضحكوا الزوز ضحكه خفيفه ورجعوا يشوفوا لخالاته..
خديجه..
اجعنك كيف الغرسه ماطيحي..
وين تميح عزوزك ميحي..
طوبى شبحت لمغليه وابتسمت..
ومغليه ردت الابتسامه..
☘بعد كملوا الشوط..
مشي الجالي للمربوعه..
وطوبى دخلوها للصاله..
حولت عبايتها..
والكل لما شافها عجبتهم هلبه..
طلتها ديما راقيه ومميزة..
بس ماتعجبش خديجه لما تحب الشي المبهرج والملفت بزياده..
جت طوبى لأميمه وسلمت عليها..
اميمه:مبارك بيبو حبيبتي..
طوبى:الله يبارك فيك ميمو مبارك عليه حتى انتي..
اميمه:الله يبارك فيك..
قعمزوا حدا بعض..
واميمه قالت لطوبى:شن امورك ان شاء الله تمام؟
طوبى بإبتسامه:تمام الحمد لله وانتي..
ابتسمت وقالت:الحمد لله..
قعمزت حداهم خديجه وقالت:شن امورك طوبى؟
شبحتلها وقالت:تمام الحمد لله..
خديجه:عاد انتي ليلتك في الفندق من زيك..
ابتسمت طوبى مجامله..
خديجه:ترا يدك طوبى..اليسار..
مدت طوبى وهي تشوف لخديجه..
خدت يدها وشافت للإنسيال اللي فيها وقالت:انتي واخديتها..
طوبى:هديه من سدرة ..
خديجه:روعه..طلقت يدها وقالت..جبتي العربي متاعك..
طوبى:في حوش ماليا قالوا شويه وبيجبوه
خديجه:ايه مادا بيهم قبل الغدي المزينه بتجي قبل الغدي..
طوبى:لاقريب يجيبوه بس اني مانبيش مزينه مكياجي نديره بروحي كان بيلبسوني بس..
خديجه:تمام معناها يقعدوا داب هيا..شن سماك ربي..اشرت عليها وقالت..ايه اميمه..
طوبى عقدت حواجبها وهي تشوف لخديجه..
واميمه ابتسمت برفعة حاجب وغيرت عيونها عنها بدون ماتقول كلمه..
خديجه:المهم انتي تقدري ع مكياج الصدرة..
طوبى:ايه مش حاجه كبيره..
خديجه ابتسمت وقالت:الله يبارك الله يبارك ربي يحفظك ياطوبى..
ابتسمت طوبى مجامله وقالت:تسلمي..
مررت خديجه نظرها ع الصاله بعدين ناضت من حداهم..
طوبى شافت لأميمه..
اميمه شبحتلها وقالت بإبتسامه:امتى رحلتكم غدوة؟
طوبى بإبتسامه:9الصبح..
اميمه:حني 12..
وقعدوا يهدرزوا مع بعض لين جتهم عائشه سلمت عليهم وباركتلهم وقعمزت هدرزت معاهم شويه بعدين ناضت للكوجينه تعول..
☘☘☘☘☘
"انا من الكفرة واصلي تارقي"
علي الواعر:بالجوده...
عبد القيوم:بيك اجود..
علي:لكن اني عاتب ع بوك وامك في حاجه مفروض ماطلقوكش تسافر لين زوجوك
جبريل شبح لعبد القيوم..
لقاه ابتسم وقال:والله كانهم فرضوا عليا الزواج شرط بيش نسافر ماكنت ردتيهم غير يقعدوا من اهل من الدنيا..لكن ربك خدي امانته واني صغير واجد...
بدت ع وجه لطفي ملامح الضيق..
وعلي قال:اه..سامحني ياولدي والله ماكان عندي علم..
عبد القيوم بإبتسامه:اكيد ماعندكش علم ومعذور..وفي اللي قلته معاك العزابي ماينطلق بروحه..
جبريل:اللي يسمع يقول قاتل روحك ع زيجه وانت نفتحوا معاك هالموضوع تسكره طول..
لطفي:ليش؟
عبد القيوم بضحكه:مازال مازال..
علي:عندك خوت؟
عبد القيوم وهو مبتسم بحسره قال:وحداني..رفع سبابته وقال..والواحد الله..
علي ضحك بإستغراب وقال؛انت مفروض تتزوج توا بش دير عيله وصغار وتعوض اللي انحرمت منه..
عبد القيوم:لما يجي الوقت المناسب ان شاء الله وبعدين انا عمري 30عام بس مازال عندي وقت..
جبريل:تقعد تقول هكي لين تلقى روحك خاش الاربعين..
يوسف:وراك وراك لين يزوجوك صدقني..
عبد المطلب:خلوا الراجل يعيش حياته كيف مايبي لاحق ع الهم والغم..
كلهم شبحوله..
وعبد المطلب متابع يقول؛وكان تاخدها مني نصيحه تخط ع الزواج بكل..
جبريل؛غير تفكنا من نصايحك ياعبد المطلب..
علي:خدت من فمي..
ضحكوا..
عبد المطلب بضحكه؛خلاص ياحاج تو نقعد ساكت مانقول شي..
يوسف:المهم ياعبد القيوم نهار تفكر في الزواج قول وعلينا حني العروس..
عبد القيوم بضحكه:عليكم انتم تخطبوها ليا والاختيار خلوه عليا..
لطفي:تم..انت غير دلنا عليهم..
ع خشة حسين قال :السلام عليكم..
ناض عبد القيوم وهو يرد عليه مع الكل؛وعليكم السلام..
لطفي:هدا حسين ولد خوي مطلب خو يوسف..
تصافحوا وجبريل يقول؛عبد القيوم التارقي جاركم الجديد..
حسين وهو متفاجئ:تارقي.!.
طلق يده وحضنه وهويقول:والله احسن من عاشرت وعرفت.
ابتسم عبد القيوم وهو متفاجئ وطبطب ع ظهره وقال ؛بارك الله فيك..
تباعدوا عن بعض وحسين قال؛عرفت منهم ناس ايام كنت في مصر ليهم معاي مواقف لين نموت ماننساها..
جبريل:ماتعرف منهم واحد وتندم انك عرفته..
حسين؛صدقت ياعمي جبريل..مرحبتين بيك بين ناسك واهلك ياتارقي..
عبد القيوم وهو مبتسم بفرح:الله يعزك الله يعزك..
☘☘☘☘☘
راقده في سريرها..مريضه..وحاسه بآلام قويه في مناطق محدد في جسمها..
ظهرها..جنابها..وبطنها..
وراجلها كان مع اخته لوطا يحكيلها هي شن قاعده تحس..
نبيله بقلق:لازم ترفعها لمصحه ولاعياده ضروري تعاين..
عبد الرؤوف بخوف:قولي شن فهمتي يانبيله..
نبيله:ماتخافش ان شاء الله مش حاجه خطيره..
تونركب نلبسها ونزلها وانت اطلع اقعد في السيارة لين نطلعوا..
ومشت طول لدارها بش تبدل..
لكن هو ماهناشي قلبه..مشي طول ركب للشقه..
☘في دار النوم..
غرفه ووجهها شاحب:ظهري يارؤوف يوجع فيا هلبه..وحاسه جنابي وبطني تقول من يضرب فيا عليهم بموس.
عبد الرؤوف وهو شاد يدها وقلبه بيتقطع عليها:معليشي معليشي..ساهله ان شاء الله ساهله..
"مبروك"
عبد الرؤوف:تعالي يانبيله..
جت طول نبيله خشت عليهم شافت وجه غرفه زادت خافت:هيا حبيبتي ساعدي روحك...
وقعدت تنوض فيها بش توقف وتلبسها ملايتها..
لما نوضوها..
عبد الرؤوف بصدمه:نبيله هدا شني!!
غرفه بخوف:شن في!؟
نبيله شافت بقعة الدم الكبيره اللي ع السرير قالت وهي في قمة القلق:اطلع عبد الرؤوف اطلع..
هو بفجعه:خيرها قولي شن الدم هدا!..
غرفه بدت تبكي وهي تقول:حي عليا هدا شني..
نبيله:ماتخافيش حبيبتي بسيطه بسيطه ان شاء الله..وشبحت لخوها وقالت بعصبيه..اطلع عاد..!
عبد الرؤوف قعد يشبح لغرفه بعصبيه والم..
بعدين مشي طلع وهو خايف هلبه..
سكرت نبيله الباب ومشت قعمزت غرفه وهي تقول:تريحي لين ندورلك حوايج!
غرفه ببكي:معقوله نبيله كنت حامل واجهضت!؟
نبيله:ماتفكري في شي توا..
ومشت فتحت الدولاب بش دورلها حوايج..
☘دارت نبيله اللازم مع غرفه..بعدين طلعتها بعد لبسها الملايه.
لقت عبد الرؤوف برا..
نبيله:خودها نزلها بالشويه..
عبد الرؤوف حي لغرفه حاوطها وقعد يمشي فيها وهي تبكي..
باس راسها وقعد يقول:معليشي...
بعدين طلع بيها من الشقه..شبح للدروج شويه..
بعدها رفع غرفه وقعد ينزل بيها..
وهي شاده فيه وتبكي..
وهو يسمع في صوت بكاها وقلبه يتقطع.
وصل بيها في الباب الفاصل..
وطلع منه ومن الحوش بكل...وركبها السياره وركب..وقعد يراجي في نبيله..
وطلعت نبيله ركبت مع غرفه من الخلف وهو طول طلع بيهم من الحوش...
☘☘☘☘☘
الساعه 12:00قبل الظهر..
طلعت اريج بالسيارة مع خوها معتز من حوش جدها..
قصت الطريق ..وصلوا في حوش شنيبه ودرسوا قدامه..
نزلوا الزوز..
ونزلوا من السيارة صندوق الفجره..وصندوق البدله الكبيره وكيسة القفطان اللي بتلبسه بعد العربي..
وقفوا في الباب..
دق معتز..
☘داخل..
طلع نضال وهو يفرك في ايديه ببعض بعد ماحد فيهم الريحه..
سمع دقه الباب مشاله طول وفتحه بدون مايسأل مني..
عيونه تلاقوا بعيونها..هي طول هربت عنهم وشبحت لخوها..
معتز:السلام عليكم..شن جو نضال..
ابتسم نضال وقال:وعليكم السلام..جوي مليح وتمام التمام..هي تفضلوا..
خش معتز وخشت هي وراه وعيونه نضال معاها...
معتز:بالله قوللهم ينادوا خالتي طوبى..
نضال:شن ينادوها هادي قول لأختك تخش وانت اطلع معاي..
معتز شبح لأريج..
اريج هزت راسها بالموافقه..
ابتسم نضال:تفضلي..
اريج:تعالي معاي عزو حط الحاجات اللي عندك غادي..
ومشت هي معتز وقفوا حدا الباب.
ونضال معاهم وقف في الفم وقعد ينادي:نسرين..يانسرين..
شويه وجت نسرين وهي تقول:خيرك..
اشرلها عليهم براسه..
طلعت نسرين شافتهم ابتسمت وقالت:اهلا..
اريج بإبتسامه:اهلا بيك..هادم حاجات خالي طوبى..
شبحتهم نسرين وقالت:باهي خشوا ..
اريج:لاوالله مافيها كيف عندنا حوسه نبي نكملوها اليوم..
ونضال يشبحلها وبس وابتسامته ع وجهه.
نسرين بإبتسامه:باهي بتجي بعدين..
اريج بإبتسامه:ان شاء الله..سلام توا..
نسرين:سلام..
اريج مشت وهي تقول:هيا عزو..
مشت وخوها معاها وعيون نضال عليها..
نسرين:هيا قيم نضال..
لارد..
شبحتله..لقاها يشبح للباب اللي طلعت منه اريج..
رفعت حواجبها وقالت:نضال..
استاقظ وشبحلها قال:نعم..
ابتسمت تعجبا وقالت:هي ارفع..
نضال:باهي حولي..
بعدت نسرين وهو حط الحاجات فوق بعض وخش بيهم داخل..
نسرين وهي تضحك؛شورنا معاش بنطلعوا من حوش الواعر!
وخشت داخل وهي تضحك..
☘☘☘☘☘
"هي حلفتني مانخبر ماليها ع خاطر اختها"
عبد الرؤوف بضيق:ماهو لما ماتحضرش اليوم بيستغربوا ويسألوا عليها..
نبيله؛خليهم عليا اني تو نعرف شن نقوللهم..
تنهد عبد الرؤوف بضيق والدمعه لمعت في عيونه..
نبيله :يعوضكم ربي خير مازلتوا صغيرين وبإذن الله يجيكم بدال الواحد خمسه..
عبد الرؤوف بضيق:ماسمعتيش الدكتورة شن قالت..صعب هلبه عليها...لو صار وحملت مرة تانيه تقعد باليباري والرعايه الخاصه..
نبيله:مامنهم اللي عندهم نفس الحاله وجابوا بالثلاته بالاربعه ماتغشش روحك...صار هكي غير بش تعرف المشكله اللي عندها والقدام تتجنبها وترد بالها..
هز راسه وقال:الحمد لله ع كل حال..الحمد لله..
نبيله بشي من الحزن:الحمد لله..
☘☘☘☘☘
"اما سنه تقري راما"
راما:اولى اعدادي..
طوبى:ماشاء الله..وانتي فرح..
فرح؛تاني اعدادي..
اميمه:بيناتهم سنه..فرح انتي ومحمد ولد خديجه نداد..
فرح:صح..ومحمدخوي نداد هو وراما..
طوبى بإبتسامه:حلوة اللقطه كيف صارت..
اميمه بضحكه:ايه..
راما:ابله طوبى انتي متخرجه؟
طوبى:لا مازال سنتين..
فرح:معناها اميمه هي اللي متخرجه لأنك دكتورة توا..
اميمه بإبتسامه:صح..
فجأة..
جتهم جوري تجري وهي تشبح لأميمه وطوبى بنظرات شغوفه..
البنات اللي في عمرها يحبوا العرايس بالذات بعد يشوفوهم بفستان الزفاف ترسخ في عقولهم فكرة ان هدا حيقعدوا عرايس في نظرهم حتى اشعار اخر..
راما:جوي جيتوا.؟
جوري:ايه..شن حالكم ياعروسات..
قعدوا يضحكوا اميمه وطوبى..
بعدي قالوا الزوز...حالنا باهي..كويسين..
جوري شبحت لأميمه وقالت:انتي امس كنتي زي سندريلا لما مشت الحفله..
اميمه يسمعوا فيها وهما يضحكوا وطوبى قالت:عسولة تجنن..
ع خشة نجاة في حضنها ولدها..
شبحت لطوبى اول ماخشت..
لقتها تهدرز مع بنتها وتضحك معاها.
شكل طوبى وهي تضحك قهرها واستفزها..
مشن ناحيتهم..
وقفت عليهم وقالت:مبارك ياعرايس..
اميمه ناضتلها طول..وسلمت عليها.
اما طوبى قعدت مقعمزة في مكانها وهي تشوفلها وهداكا الشعور رجع خش لقلبها مرة تانيه..
شعور غير مريح...ويخوف..
بس ظاهريا كانت تبان عاديه..
بعد سلامها ع اميمه شبحت لطوبى وابتسمت ابتسامه عريضه..اللي يركز فيها يلاحظ شي من البغض مخالطها..
سلمت عليها بالخد وهي تقول؛مبارك عليك وربي يهنيك..
ع خشة خديجه للصاله لما عرفت انها جت..
لقتها تسلم ع طوبى قربت منهم ووقفت حداهم..
طوبى بإبتسامه:الله يبارك فيك..
بعدت نجاة وشد ولدها بإيديها الزوز وقالت؛شن اموركم..
الزوز قالوا بأصوات متقطعه:تمام..الحمد لله..
خديجه:شن حالك يانجاه..
نجاه شبحت لخديجه وقربتلها سلمت عليها بالخد وقالت:الحمد لله..شن حالك انتي..
خديجه وهي مبتسمه بتصنع:الحمد لله..
بعدتها وخدت منها معاذ وهي تقول:جيبيه حبيب عمته..
نجاة:بادي يتعلم في المشي..
خديجه:ايه لاحظته الايام اللي فاتوا..
نزلاته وخلاته يوقف وبدت تمشي فيه وهي تقول:ديدش..ديدش..ديدش حب الرمان..
وطوبى واميمه يشبحوله بإبتسامه..
طوبى كانت تشبحله بإبتسامة شغف وهو يمشي دبه دبه برجليه...
وعيون نجاة تسرقلها في النظر..
اميمه بإبتسامه:قريب يسكر السنه..
نجاة بإبتسامه:ايه..
اميمه:بطول عمره ان شاء الله..
نجاة:تسلمي نشوفوه عندك..
اميمه وهي مبتسمه:تسلمي..
طوبى:معليشي ناخده شويه..
خديجه ونجاة شبحولها..
بعدين رفعاته خديجه ومداته لطوبى وقالت:خودي..
ونجاة تشوف لخديجه بحده..
خدت طوبى معاذ وهي تقول:محلاهم محلاهم قنينهم قنينهم..
والولد يحط في يده ع وجهها..
ضحكت طوبى..
نجاة بضحكه؛ردي بالك راهو يخبش..
حطت صبعها السبابه في يده شدها..وقعدت تغنيله..
هالصيصان شو حلوين..عم بيدوروا حولا امن مبسوطين..
معاذ ابتسم طول اول ماغنت .
نجاة؛يموت فيها..
طوبى بضحكه:واضح..وكملت تغني..
وهما يشبحولها بإبتسامه..
بس ابتسامه نجاة كانت تخفي بيها حقد كبير...
☘برا..
كان الجالي جاي من المربوعه يبي يشوف طوبى..
وين قرب من الصاله قعد يسمع في صوت غناها بدون مايعرف ان هدا صوتها..
ابتسم بإستغراب ع جية امه..
حطت يدها ع ذراعه وقالت:شن دير هني.
شبح لأمه بضحكه وقال:شن جو يام..
مغليه بإبتسامه:ربيع وورد.
ضحك وقال:باهي مدامه هكي تخشي تناديلي الربيع والورد..
امه قعدت تضحك وهو يشوفلها بإبتسامه..
شويه وقال وهي مازال تضحك؛هي راجي شوي..
ومشت للصاله وخشت..
وهو حط ايديه في جيوبه وقعد يستنى..
☘مغليه:طويبه بنتي..
كل الموجودات شبحوا لمغليه..
طوبى:نعم عمتي..
مغليه بإبتسامه؛راجلك برا يبيك..
خديجه شبحت لنجاة لاحظت كيف ملامح وجهها تبدلت..
طوبى مدت معاذ لعمته خديجه وقالت:عبايتي ووشاحي وين..
خديجه:اطلعي هكي حد مافي حد..
مغليه:مايخش حد من غير مايستأذن بنتي اطلعي شوفي راجلك..
طوبى ابتسمت وقالت:حاضر..
مشت من حداهم وهما يشوفولها كيف تمشي ويشوفوا لشعرها المظفر اللي نازل ع ظهرها..
مغليه شبحت لخديجه وقالت:كان تسمعي شن قالي..قالي شن جو يما قتله ربيع وورد..قالي باهي خشي ناديلي الربيع والورد..
ضحكوا اميمه وخديجه..
خديجه بضحكه:ربيع وورد مالا شنو بنت ناس وجميله وصغيره شن بيشوفها كان ربيع حياته..
مغليه؛صدقتي..ربي يهنيهم ويبعد عنهم بنات وولادالحرام..
خديجه بتمديد الكلمه قالت:آمين..
ونجاة كانت شادة روحها بالسيف رسمت ع وجهها ابتسامه وقالت:شن حال صحتك عمتي اليوم .
مغليه:الحمدلله..علاش روحتي امس كان بتجي اليوم؟
نجاة؛الحوش كان زحمه ودوشه صغار قلت نريح ونخفف شويه..
مغليه؛صغارك ماريتلهم دوشه كان قعدتي امس وعاونتي..
خديجه بضحكه؛طالعه هاربه هروب يما..
اميمه قعدت تشبحلهم وتسمع فيهم كيف يكلموا فيها حست ان العلاقه بينهم فيها توتر.
نجاة:لاوالله ماهروب ياعمتي..بس حاضر الليله نبات ان شاء لله..
خديجه:لالا الليله كلهم بيروحوا خلوا الحوش يولي هادي شويه بش يرتاحوا بوي وامي اسبوع وهما في الحوسه والدوشه..
نجاة وهي تحاول تمالك اعصابها بالذات وان اميمه حاضرة:ع راحتكم..
مدتلها خديجه ولدها وقالت:خل نطلع نشوف الطباخه شن دارت..
خدت نجاح معاذ
ومغليه قالت:ايه تبي من يوقف عليها..
نجاة:وين عيشه؟
خديجه مشت وهي تقول: في الكوجينه هي ونسرين يطيبوا في الغدي..
نجاة:اها...
مغليه خدت معاذ وقالت؛بري عاوينهم..
نجاة؛حاضر..
ومشت طول طلعت..
اما مغليه قعمزت بالعيل وهي تقول؛قعمزي اميمه..
قعمزت اميمه وهي مبتسمه مجامله وعقلها يفكر في اسلوب معاملتهم لنجاة..
☘ونجاة لما طلعت برا تحساب روحها بتلقى الجالي وطوبى..لكن مالقتهمش..
كملت طريقها في الكوجينه وهي تشوف للدروج وقلبها والعه فيه النار...
🌸في جناح الجالي..
طوبى وهي تمشي في داره وتتفحص فيها:حلوة دارك مرتبه وليها هكي تقول جو خاص..
هو كان متكي ع المكتب ويتفرج عليها وهو مبتسم..
مشت للفيرندا فتحتها شويه وشافت برا ابتسمت..
بعدين التفتت وقالت؛اكيد تحب تقعمز فيها مرة مرة .
الجالي:ديمه حتى في الشتي..
قدمتله وهي تقول؛عندك حق منظرها حلو..بس في حوش مقابلها تقيد شويه..
الجالي:تؤ..عادي..من ايام كانوا فيه اصحابه الدار اللي تفتح ع داري ديما مسكره بالسيرناتي..
طوبى بإبتسامه:امم..باهي عندك علم حتحلى زياده لو درت فيها محبيسات غرس..وريدات..ع عطيرات..ع ودينات..
ضحك وقال؛حره ديري فيها اللي تبيه..
ضحكت وقالت؛يؤبرني ربه اللي بدي يفهم فيا ع الطائر..
الجالي وهو يضحك خداها لقلبه وقال:ان شاء الله يؤبرني قبلك يافرخة اني..
هي ابتسمت وقالت:بعيد السو..
ابتسم وقال:وتوا نبيك ديري اول مهمة ليك...
بعدت وقالت وهي تشبحله؛شن هي؟
الجالي:عندي بدله عربيه نبيك تحدديها بنمشي بيها للجامع..
طوبى بإبتسامه:من عيوني .
شد انفها وقال:نفداهم..
ضحكت..
وهومشي للدولاب فتحه وطلعها..
هي جاته وخدتها وقالت:محلاها هادي كيف تطلع عليك..
الجالي بضحكه:جديات؟
طوبى؛وهلبه..
ابتسم وقال:باهي انزلي بيها لوطا وقولي لوحده من البنات دلك ع دار الكوي..
طوبى:حاضر..
الجالي:اني خاش ندوش..
طوبى:واني ماشيه..
وهي ماشيه جبدها من ضفيرتها..
طوبى عقدت حواجبها وقالت:علاش البراده هادي توا!
هو ضحك عليها ومشي خش الحمام..
وهي طلعت من الدار تضحك..
مشت للدروج نزلت لوطا باللبسه..لاقت نسرين..
نسرين بضحكه؛من اولها عمك الجالي..
طوبى بضحكه:دار الكوي وين .
نسرين بإبابتسامه:تعالي..
فاتوا الزوز من قدام الكوجينه..
نجاة شافتهم وكل مالها تزيد تسحن..
عائشه:نجاة تعجني عجينة البازين..
شبحتلها وهزت راسها بالموافقه...
☘☘☘☘☘
الساعه 1:00ظهرا..
طلعوا علي الواعر وولاده واحفاده ومعاهم جبريل وعبد القيوم ماشيين للجامع..
ع طلعة محمد شنيبه وولاده ومعاهم ضيوفهم من العيله..
وين تلاقوا..جو لبعض وقعدوا يسلموا...
لطفي والجالي يسلم عليه:الحمد لله..شن حالك انت..
الجالي بإبتسامه:الحمد لله...
وعبد القيوم يشوفله عارفه واحد من العرسان بس اليوم عرف انه هو نسيب لطفي..
توجهوا كلهم للجامع ولطفي فاقد عبد الرؤوف اللي ماتفوتاش صلاة الفرض في الجامع شن خلاه يغيب عن صلاة الجمعه!؟
☘والجواب نفسه خداته سدرة بس ع سؤال تاني...
سدرة:ان شاء الله لاباس عليها..
"لايوريك بس"
سدرة؛باهي المدعيه غرفه وينها ناسيه تليفونها ولاكيف!؟
"ايه نساته عبد الرؤوف بعد سمع بعمتي مريضه ولع فينا النار..شورها تفلوشت ونساته.."
سدرة:باهي وينها هي توا حداك؟
"لاخشت الحمام وقبل لتخش قالت كلميها قوليلها مش جايه لحوش شنيبه"
سدرة هزت راسها وهي تقول:باهي مانعطلش عليك..المهم وين تطلع قوليلها تكلمني...بالسلامه توا..
"ان شاء الله بالسلامه"
سكرت سدرة وقلبها مش مرتاح في حاجات في كلام نبيله ماخشتش راسها...
فردوس طفت ع الطبيخه وقالت؛خلاص الطبيخه طابت..
شبحتلها سدرة وقالت:سادك انتي بري قعمزي اني تو نكمل..
فردوس:باهي..لكن قبلها قولي شن قالتلك نبيله؟
تنهدت وقالت:عمتها مرضت مرضة قويه شكلها مشولها..
فردوس:يعني مش جايه بعدين..
سدرة:ايه..
فردوس:يللا مش مشكله ان شاء الله يشفيها عمتها مسكينه..
سدرة؛امين...
ومشت فردوس طلعت من حداها..
وهي حطت تليفونها ع تركينه ومشت تشوف طنجرة البازين..
☘وروحوا الرجاله من الصلاة..
وتغدوا البازين...اللي كان ياكل فيه عبد القيوم براحه..
في حوش لطفي الواعر ماحسش انه مقيد..
وكأنه يعرفهم من زمان..وديما يمشي عليهم ويجي .
ارتاح للحوش..ارتاح للعيله...وتآلفت روحه مع ارواحهم..
زي ما تآلفت مع روح بنتهم..
اللي قاعده تتغدى مع اهل راجلها حتى هي البازين..
وعيون نجاة عليها كيف تهدرز مع خالات الجالي اللي كانوا قبل كم يوم مش طايقنها..بس فهاليوم الباين انهم غيروا فكرتهم عنها .
وهالشي كان يزيد في غيرة نجاة وحقدها...
☘صفقت خديجه بإيديها وهي تقول:عرايس هيا نوضوا المزينه جت..
ناضوا اميمه وطوبى عن السفره..
وكل وحده فيهم قايمه يدها ومشوا طلعوا من الصاله وخديجه لحقهم..
اخت مغليه قالت:محلاهم كنيناتك الجدد يامغليه...
مغليه بضحكه:يعطيك ربي خير منهم..
:سلمك..وعطيك الصحه ياعيشه ع هالبازين..
كيف جت بترد عائشه..
نجاة قالت بضحكه:اني عجنته وعصدته وكركبته..
عائشه عقدت حواجبها وهي تشوفلها من فوق لتحت..
ومغليه شحبتلها بنص عين..
اخت مغليه ضحكت مجامله وقالت:عطيكم الصحه انتم الزوز...
نجاة وهي مبتسمه ببلاده:سلمك وعطيك الصحه...
☘☘☘☘☘
"بترقد قصدك"
الجالي وهو راقد ع السرير:ايه عارفتيني مارقدتش بكل..
طوبى بإبتسامه؛ماتنساش تنوض قبل العصر..
ابتسم وهز راسه وعيونه بيتسكروا..
هي قعدت واقفه تشبحله..بعدين قربتله طبست عليه باست راسه بعدين قالت:نوم العوافي..
الجالي وهو بيرقد خلاص:طوبى..
طوبى بنبرة حنونه:نعم...
شويه غمض عيونه وراح في النوم..
هي ضحكت..
بعدين مشت خدت شنطة المكياج متاعها..
وطلعت من حداه..
☘وتمر الساعات..
والكل في حوش شنيبه والواعر بدوا يجهزوا في ارواحهم للمحضر..
آذن العصر..
مشي عبد القيوم صلاه مع رجال عيلة الواعر وجبريل..
وبعد الصلاة روح ع شقته...
عطاه المهدي خبر انهم تنظفت وولت في احسن الحال..
ولما خشلها شاف بعينه..
وحتى شم بأنفه ريحة المطهرات والوشق اللي معبيه الشقه.
دار فيها دورة ولاحظ الفرق الكبير..
عبد القيوم وهويدور في الشقه:شتان بين امس واليوم...زعمه الدار اللي بنرقد فيها وين؟
فتح وحده من الديار..
لقاها فاضيه تماما مافيها شي..استغرب..
فاتها ومشي لدار تانيه
فتحها وخش..
لقاها مفرشه ومنظرها مريح وفيها دولاب كبير..
ابتسم وقال:ايوه خل توا الواحد يرتب حاجاته ويحط راسه ع المخده ويرقد...
☘☘☘☘☘
فهالوقت...
وصلوا نساوين حوش الواعر لحوش شنيبه ومعاهم ضيفتهم سالمين..
دقت الباب مطيره..
واللي فتحه نضال..
اريج بهمس:شورهم حطوه غفير..
الاء وسدرة سمعوها وشدوا ضحكتهم بقوة..
وهو لاحظ انها قالت حاجه بس بإبتسامه قال:تفضلوا تفضلوا..
خشوا كلهم ومطيره وصفيه يقولوا:يزيد فضلك..
هو بعد خشوا..
شبح لاريج..
شاف حاجه تدلدل منها تحت الوشاح..
بعدين طاحت وهي ماحستش بيها..
خلاهم لين خشوا للحوش داخل..
ومشي طول شافها شن هي..
كانت توكه كبيره زي المسامه..لونها وردي ومزين اطارها فصوص لونهم زي المرش لونهم وردي..
عجباته هلبه....رفع الكاط الطويل متاعخ بالسوريه وحطها في جيب سرواله..
بعدين نزلهم وقعد يساوي في روحه وهو يضحك..ومشي طلع من الحوش..
☘استقبلوا خديجه ونسرين ووحده من عماتهم نساوين حوش الواعر..
وبعد السلام..حولوا عباياتهم وخدوهم منهم بش يعلقوهم في المكان المخصص..
آلاء:معليشي نبي مرايه..
خديجه:تعالي حبيبتي..
مشت الاء واريج معاها حتى هي..
خديجه:اهيا هني..
الاء واريج:شكرا..صحيتي..
خديجه بإبتسامه:سلمهم ياربي..
ومشت وخلتهم..
فتحت الاء شنطه المكياج وحطتها ع الطاوله وبدت تعدل في مكياجها..
اما اريج مان تبي تساوي شعرها..
كان ملموم وطلقانه وتبي ترفع منه شويه وتشده بالتوكه اللي مالقتهاش..
اريج:حي عليا وين مشت!؟
الاء:شن هي!
اريج؛التوكه متاعي ياهمي!؟
الاء قعدت تشبحلها وهي ماطة شواربها للأسفل بعدم معرفه..
اريج بتذمر:طاحت في الطريق شكلها..
الاء:قتلك قبل معاش تشريهم شعرك ناعم هلبه زي شعري مايقعدوش فيه..
تأففت وقالت:باهي كيف ندير توا؟
الاء:ترا اوقفي قدامي..
طول وقفت قدامها..
خدت الاء شعر اختها كله وحطاته ع جنب وقعدت تساوي فيه بعدين ابتسمت وقالت:هكي احلا بهلبه..
شافت اريج للمرايه عجبها شكلها وابتسمت برضا..
☘وفي مراية تانيه في نفس الحوش واقفه عليها نجاة في جناحها..
كانت بكامل اناقتها..واختارت تلبس ابيض فهاليوم قصدا.
وبذلت جهد وهي تزين في وجهها ع اخفاء ملامح تقدم السن...
بعد ماكملت..
نجاه وهي مبتسمه بمكر:وهادي حديدة حبيب قلبي..
ولفتها حوالين المعصم متاع يدها اليمين وسكرتها..
بعدين خدت خاتم ولبساته في نفس اليد وهي تقول:وهذا خاتم عمر..ضحكت وقالت..خل نحرقوا دم التانيه شويه..
وبدت تتكلم وهي تعجب ع كلام اخت مغليه..
محلاهم كنيناتك الجدد يامغليه...
كية وضربه ع الريه ليك وليهم..
شبحت للمرايه وساوت الطرف اللي فوق القفطان..
بعدين خدت العطر متاعها وبخت منه..
رداته لمكانه..وبعدها مشت لبست شبشب كعب لونه ذهبي..وطلعت من جناحها...
☘في الصاله..
كانوا موجودين مع الاقارب واهل العرايس..
الجيران..
مقعمزين ع صفوف كراسي ورا بعض داروهم فيها..
وقدامهم زوز كراسي كبار بش يقعمزوا عليهم العرايس..
خشت نجاة هي تمرر في نظرها ع المكان..
بعدين مشت قعمزت القدام بكل..
عيونها جو ع سدرة المهدي وهي شاده ولدها ديدش فيه ابتسمت.
بعدين شبحت لجوري لقتها واقفه عليهم وتتفرج..
غيرت عيونه عنهم وشافت جهة نساوين حوش الواعر..
مررت نظرها عليهم كلهم...رفعت حاجبها وغيرت عيونها عنهم لخديجه..
اللي كانت واقفه ع وحده من الجارات تهدرز..
قالت في نفسها"اما انتي اكثر من حياخد نصيبه من حرق الدم اليوم..."
وماهي الا دقايق...
وشغلوا اغنية لمحمد حسن...
شافوا كلهم لباب الصاله اللي كان مفتوح ع مصرعيه..
طلوا اميمه وطوبى وهما في احلى حلة..
لباسنا التقليدي اللي مالاش زيي...
البدله الكبيره اللي كانت مفتوحه ماتربطش العروسه الحولي الا لما تسكر السبوع...
الزوز كل وحده فيها اللي يشوفها ينسى الثانيه..
صفيه كانت تشوف لبنتها والدموع في عيونها وهي فرحانه بيها هلبه..
اما سدرة وهي تشوف لطوبى بإعجاب وعيونها غارقات بالدموع تقول:الله يبارك على بنتي الله يبارك عليها...ياربي احفظها بحفظك..
واختها فردوس وبناتها كانوا طايرات بيهم الزوز..
ومطيرة تردد:الله يبارك اللهم صل ع النبي ع بنيات خوتي...
🌸ياسلطان عطاك العالي
جبت عيون الريم الفالي..
☘والسلاطين الزوز كلهم واحد منهم قاعد يلبس في زبونه...
المميز في طلتهم انهم لبسوا فوق زبوناتهم كشابيه..
وختموا طلتهم بلبس الطاقيه السودا...
كانت طلتهم كلها هيبه وجمال...
زي طلة عرايسهم اللي كانوا واقفات قدام كراسيهم..
والمصورة تاخدلهم في صور...
وخديجه دور وتبخر حداهم..خافت عليهم من العين....
اللي زي عين نجاة اللي مافارقتش طوبى..
كانت تشوفلها بشرود..وتقارن في نفسها بيها..
كانت تتخيل في الجالي وين يكون معاها شن يقوللها..
شن يحس..شن هي مشاعره..!؟
بلعت ريقها وهي تفكر لما بيشوفها بالعربي كيف بتكون ردة فعله..
معاش قدرت تتحمل..ناضت وانسحبت من المكان والكل لاهي مع العرايس..
☘☘☘☘☘
"هذين وين بتعدي بيهن ياعبد القيوم..وين وين"
كان شاد في يده مجموعه لوحات..
بس ماكانوش لوحات رسم....كانوا لشي تاني لكن مش بعيد هلبه عن الرسم..
طلع من داره وهو يدور ويفكر..
لين خطرت عليه الدار الفاضيه..
مشالها فتحها..
وخش..
كانت باب الفيرندا متاعها مفتوح والستار نازل ومغطي باب الفيرندا..
وقف في نص الدار..وقعد يحك في شاربه التحتاني بسنونه وهو يمرر في نظره في الدار..
ثبتوا عيونه ع الفيرندا..
كان الستار يتحرك...
بانت عليه فيرندا الجيران...
وشاف فيها واحد لابس عربي بشكل مميز واقف يشوف لروحه في المريه ويحط في عطر العود ع رقبته..
ابتسم ومشي الفيرندا بش بيكلمه..
بس وقفت في نص الطريق..
لما شاف وحده خاشه عليه الدار وهو مش حاس عليها...
وجاته..
عبد القيوم طول لف ومشي طلع من الدار وسكر الباب وهو يقول:عليك قصه الدار هذي مقابله دار ولد شنيبه ومراته..
قعد ساكت وهو يفكر بعدين قال...بعدين نخش نسكر الفيرندا وخلها تقعد مسكرة هك ماعندي ماندير بيها..
☘وعند العريس..
اللي كان الجالي...
خشت عليه نجاة بهدوء من غير مايحس بيها وين شافت شكله ماتت عليه...وماحسش الا بحد شاده بقوة..
انصدم والتقت لقاها نجاه..
الجال بصدمه:تي خير عمك انتي تبي تقتليني ناقص عمر!
نجاة وهي تشوفله بهويام؛بعيد السو ع حبيبي..محلاك كيف طالع فيها تجنن..
الجالي:باهي شكرا اطلعي ترا..
شدت في الكشابيه وبدت تغني:يما يما انا غزالي وين نمشي بيه..يما يما انا غزالي وين نمشي بيه..
هو غلباته الضحكه شد ايديها وحولهم وقال:اطلعي يامتخلفه.
نجاة:غزالي نحطه في قلبه ونسكر بالقفل عليه..
ضحك وقال:مختشه اطلعي..
نجاة بضحكه:غزالي نحطه في صبعي ونسكر بالخاتم عليه..
الجالي قعد يضحك..
فجأة..
انفتح الباب بقوة..
الزوز انفجعوا وشبحوله وهو طلق ايديها..
وتجي خديجه خاشه...جبدت نجاة من ذراعها بقوة وجبدتها..
نجاه بخوف:ااه بالشويه بالشويه..
وصلت بيها للباب وهي شادتها من ذراعها بقوة والتفتت للجالي وقالت بغضب:تتحرك من الدار تشوف..
وطلعت..وسكرت الباب..
نجاة:حولي حولي...
خديجه وهي تكر فيها قالت:ضمي فمك ياحقيره..
وفتحت الحمام ودفتها داخل وخشت معاها وسكرت الباب..
نجاه وهي خايفه:شن بديريلي!؟
قعدت تشبحلها خديجه بنظرات تخوف..
وفي لحظه جبدتها ونزلها ع اللاوندينو ونزلت راسها ع الحافه متاعه وقعدت تقول:ماتبيش تتربي انتي..ماتبيش تتحشمي ياحقيره..تبيني توا نقربعها ع روسكم ..نشردك في الشوارع ونردك لمرت بوك وخوتك بش يخلوك كلبه عندهم..
نجاة وهي ترعش:شن درت اني مادرتش غلط راجلي هدا..
حطت خديجه يدها ع راسها ونزلاته اكثر ونجاه قريب تموت..
خديجه:ياكلبه معاش تستفزيني...والله ننهيك انتي وخواتك...ندمركم يانجاة ندمركم..وانتي تعرفيني كويس يانجاه مانقولش في كلام وخلاص..
نجاة قعدت ساكته وهي ترعش..
ورقبتها وظهرها وراسه بدوا يوجعوا فيها.
خديجه:هادي اخر مرة نحذرك فيها بعدين يانجاة ذنبك ع جنبك..وجبدتها وقفتها..
وجت للباب فتحاته ودفتها برا..
نجاة مشت تجري للدروج ونزلت بسرعه وهي ترعش ومصدومه..
اما خديجه مشت لدار الجالي فتحتها وخشت عليه وسكرت الباب وراها..
لقاها مقعمز ع السرير ورجليه لوطا وهو مشبك صوابع ايديه في بعض..ع وجهها باديه ملامح الغضب..
وقفت قدامه وقالت:عندك استعداد تخسر طوبى..
قام عيونه وشبحلها بحده..
خديجه:طوبى لو قعدت معاك وتحملت كل ظروفك صدقني ياجالي حاجه زي هادي مش حتتحملها مش حتكمل معاك حتخليك صدقني..
ناض وقف وهو يقول بغضب:الدوة هادي معاش تعاوديها..
خديجه:لابنعاودها ونعاودها يالجالي كان قعدت ورا الكلبه هادي حتخسر طوبى وحتكمل حياتك من غيرها...
لمعوا عيونه بالدموع وهو يشوفلها بنظرات حاده...
وهي كملت تقول...وانت اختار...طوبى... ولاهالعزوز الشارفه الشيطانه...
وبعد عطاته نظرة اخيرة واعره...
مشت طلعت من الدار...
وبعد ماطلعت نزلت من عينه اليسار دمعه حارة....
#اهرجو
#طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
