(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الثامن_والأربعين"في الداخل" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 🚫🚫ملاحظه🚫🚫 اي تعليق عنصري حيتم حظر صاحبه اي تعليق فيه سخريه ع ثقافه الطوارق حيتم حظر صاحبه واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم نتمنى تكونوا قريتوا هالملاحظه كويس..وشكرا ع تعاونكم مسبق🌸 ☕☕☕☕☕☕☕☕☕☕☕☕☕☕☕☕☕ "سدرة..سديرة" فتحت عيونها وهي مفجوعه.. بعدين شافت لعمتها.. عقدت حواجبها وغمضت عيونها وهي تقول:صباح الخير عمتي.. مطيرة؛صباح النور..علاش راقدة هني ومخليه التلفزيون مفتوح؟! فتحت عيونها وناضت قعمزت وهي تقول:نضت صليت الفجر وقعمزت تفرجت ع التلفزيون خداني النوم..الساعه قداش؟ مطيره:التسعه...رقدتي كويس ماصارلك شي؟ سدرة ناضت وقفت وهي تقول؛لالا ماصارلي شي..خليني نلحق نوتي روحي.. مطيرة؛وين ع خير!؟ سدرة ماشيه بتطلع من الصاله وهي تقول:بنمشي للمدرسه ساد امس غبت.. ناضت وراها مطيره وهي تقول؛تي قعمزي وهني روحك وخلي غيرك يشد عنك.. خشت سدرة من الحمام بدون ماترد.. ومطيره شدها خوها وقال:خيرها راقدة هني؟ شبحتله مطيره بحزن وقالت؛قالت صليت الفجر بعدين قعمزت نتفرج شويه خداني النوم.. لطفي بقلق؛كذابه..معاش بديت نصدق فيها ماتخليهاش تطلع من الحوش قبل لتفطر كويس وتاخد دواها.. مطيرة؛من غير ماتوصي وخيي.. لطفي:ماتبوا شي من برا؟ مطيره:الحاجات اللي قال عليهم الدكتور لسدرة بس.. هز راسه وقال:عارف..اي شي يصير معاها كلميني طول.. مطيرة؛وصي عليها جماعة المدرسه.. لطفي:ايه تو نكلمهم..السلام عليكم..ومشي طلع... مطيرة وهي تشوفله بضيق:وعليك السلام... ومشت خشت للكوجينه بش توتي فطور لبنت خوها... "خالتي مطيره" مطيره؛خشي يافايزة خشي.. شويه وخشت عليها فايزة وهي خايفه تقول:صباح الخير خالتي..وينها سدرة! مطيره:صباح النور..في الحمام.. فايزة؛كيف صار فيها بالزبط!؟ وعلاش ماتقولوش من الاول معقوله اني اخر من يعلم!؟ ع خشة سدرة عليهم شافت فايزة قالت:شراده!.. جتها فايزة تجري وضمتها بقوة وهي تقول:حبيبتي شن صارفيك؟! سدرة ضمتها وقالت:مافي شي يافايزة تشبحي فيها قدامك.. بعدت فايزة وهي شادتها تشوف لوجهها؛ايه نشوف في وجهك كيف رايح..وشن هدا اللي تحت عيونك؟! مطيرة:هدا من الترجيع حشاك قريب قذفت مصارينها.. فايزة بخوف:مناش هدا كله!؟ تاخدي فدواك انتي!؟ مطيرة بتعجب:قصدك عارفه انتي!؟معناها حتي بنت شنيبه وبنت جويده عارفات!؟ مش بعيد حتى المهدي يطلع عنده علم..! سدرة بإنزعاج:شن جاب سيرته هدا توا؟! مطيرة:شن تحسابني عميه مانشبحش..وحني طالعين امس لحوش غرفه..عيونه عليك وهو يشبحلك زي الخايف.. سدرة ووجهها احمر:مرات بوي ولاجدي قالوله حاجه هو ولابوه ماهم يتلاقوا في الجامع.. مطيرة:اني صدقت شوفي اللي بعدي.. سدرة؛شن قصدك!؟ اني بنقوله!؟ مطيرة:عارفه قصدي انتي بلاش منه جوك اللي ديري فيه.. فايزة:صلوا ع النبي وخلونا من سيرة المهدي واحكيلي شن اللي صار فيك بالزبط.. سدرة:قعمزي عندي نص ساعه نحكيلك فيها بعدين بنمشي للمدرسه.. فايزة؛وانتي مريضه!؟ سدرة:شن انتي معاش تشبحي ولاشني!؟ تو هدا منظر وحده مريضه!؟ مطيره:عنادها عناد حمير معاش تحاولي معاها.. سدرة:شكرا هلبه.. فايزة قعدت تضحك وهي تحرك في راسها يمين ويسار... ☘☘☘☘☘ واقفه حدا روشن الدار وهي تتكلم بالتليفون.. عائشه:قتلك فيتامين دال في الحضيض وتحاليل الغدة مايطمنوش.. "لاحظتها في العرس مش مزبوطه بس توقعتها ع خاطر اختها بتتزوج وتخليها" عائشه:مرات لهالسبب قعدت تهمل في روحها..المهم بعدين تعالي بش نمشولها.. "باهي..نتلاقوا العشيه سلام" عائشه:وعليك السلام... وسكرت ولفت بتمشي.. وقفت في مكانها مصدومه وين شافت المهدي واقف فم الدار وهو يشوفلها بنظرات خوف واضحه.. حواجبه معقوده..والعيون فيهم لمعة الدموع.. بلعت ريقها وقالت:خيرك وليت؟! تنحنح وغير عيونه عنها بعدين قال؛وليت بش ناخد ورقه مهمه نسيتها..رجع شافلها شويه بعدين قال..ع الزيانه جيبيها.. مشت عائشه وقلبها بدق بقوة وايديها يرجفوا.. خدت الورقه من ع الزيانه وجاته بيها مدتهاله.. مد يده وخداها..وهي يشوف ليده اليسار اللي حاجها في نصه كيف ترعش.. نزلها بعدين مشي وهو يقول:ماتبي شي.. عائشه:سلامتك بس.. اختفي من قدام عيونها..بعدين سمعت باب الشقه انفتح وتسكر.. نزلوا من عيونها الدموع وقعدت تمسح فيهم..بعدين طلعت من الدار بتمشي لدار بنتها سدرة بش تنوضها.. ☘☘☘☘☘ وعدت الساعات... لين جي وقت العصر.. كانت سدرة مقعمزة تتفرج مع عمتها ع التلفزيون.. وبادي معاها شعور الخوف اللي كانت تقاوم فيه.. كانت حاسه ان الحوش فاضي مافيه حد.. تبي اي حد يجيهم ويعبيه دوشه... شعورها هدا زاد كبر الخوف داخلها... الخوف من الموت اللي عمرها ماحست بيه في حياتها.. وماكانش الموت عندها مهم نهائي امتى مايجي يجي.. بس توا ولت خايفه منه خوف مش طبيعي.. وكأنه خوف لاإرادي مجبورة انها تخافه... فجأة.. دق باب الحوش.. مطيره؛مني زعمه؟! سدرة:بالك فردوس!..ضيقت عيونها وقالت..لافردوس عندها مفتاح.. مطيرة:مرات حد جاي لبوك.. سدرة؛مرات.. وولوا يتفرجوا ع التلفزيون وسدرة تبلع في ريقها اكثر من مرة بسبب الخوف.. "السلام عليكم..سدرة..خالتي مطيره" ابتسمت بفرح وقالت؛خشوا يابنات خشوا.. ومطيره تشبح لفتحة الصاله وتراجي في خشتهم.. بانوا عليهم الثلاته.. عائشه وهي ترفع في خمارها..ونسرين وفايزة.. لحقت مطيره بعيونها بنت خوها اللي ناضت استقبلت صاحباتها بفرحه...وقعدت تحضن فيهم بالوحده وهما يحضنوا فيها ويسألوا عنها.. استغربت فيها عمرها مابالغت في التعبير عن مشاعرها للهالدرجه! زاد في قلبها الخوف ع بنت خوها وحست انها ممكن تعبانه نفسيا في الاصل والتعب النفسي ولى ع صحتها... سلمت ع البنات بعدين مشت للكوجينه توتي الضيافه وخلتهم يقعدوا مع بعض برواحهم وياخدوا راحتهم... ☘☘☘☘ فهالوقت.. المهدي كان مقعمز في قهوة خوه بروحه وعيونه ع حوش الواعر.. وماركزش ع عبد القيوم اللي كان جي للقهوه وفي يده لوحه كبيره مغطيه.. خش داخل وهو يقول:السلام عليكم.. ردوا عليه الموجوين ومنهم العمال ونضال اللي جاه طول وهو يقول:يااهلا بالتارقي... عبد القيوم بإبتسامه: لاباس ميغ..ماتوليد...تجوضيد... مايجندك ماتكنا الصاهت...ماهينجيد...؟ نضال وهو يضحك بعدم استيعاب:اللهم ان كان هدا سحرا ابطله.. قعد يضحك عبد القيوم.. والعمال يتفرجوا عليهم بإبتسامه.. واحد منهم قال:دوي معاك امازيغي تقريبا يسأل عن حالك.. عبد القيوم:عيونك صفر وشعرك اشقر امازيغي جبالي.. ضحك وقال؛صح..من نالوت... عبد القيوم:بالجوده.. :بيك اكثر.. نضجال:ردوا بالكم تبدوا تدووا امازيغي مع بعض.. عبد القيوم بضحكه؛تختلف اللغه عن بعضها بينا وبينهم مش حيفهم مني الا كلمات بسيطه وانا نفس شي . نضال:قصدكم مش لغة وحده هي؟ عبد القيوم؛اصلها واحد بس الاختلافات واجد..شن رايك نحنا الطوارق اللغة عندنا تختلف من قبيله للتانيه. :حتى حني اللغه فيها اختلافات من مدينه للتانيه جماعة جادو يختلفوا عليا وحني نختلفوا عن جماعة يفرن وهكذا.. نضال:زينا حني العرب..الغرب دوتهم تختلف عن الشرق..والجنوب يختلفوا علينا... عبد القيوم:مزبوط..بس عاد مش اختلاف كبير كيفنا نحنا.. الشاب الجبالي:صح.. نضال:باهي قولي الكلام اللي قلته شن معناه.. عبد القيوم بإبتسامه وهو يحرك فراسه مرة يمين مرة يسار بحركه خفيفه ويقول:كيف حالك كيف حال صحتك شن داير.. نضال:الحمد لله كيف بالتارقي؟ عبد القيوم:اخمادغ مسينغ.. نضال:عاودها معليشي.. عبد القيوم بضحكه:اخمادغ..مسينغ.. نضال:ترا عاود اللي قلته قبل شويه.. عبد القيوم بإبتسامه:لاباس ميغ..ماتوليد...تجوضيد... مايجندك ماتكنا الصاهت...ماهينجيد...؟ نضال ابتسم ابتسامه عريضه:اخمادغ مسينغ.. ضحكوا العمال ومعاهم عبد القيوم.. بعدين حول غلاف اللوحه وقال:تراعطيني رايك في هذي؟ نضال وهو يشوف للوحه بإنبهار:وين لقتيتها هادي!؟ عبد القيوم بإبتسامه:عندي في الشقه. نضال:قصدك انت كاتبها؟ عبد القيوم:اها..وهادي اول حاجه نكتبها ع لوحه من لما جيت هنا... نضال:لا..لازم نولوا صحاب اني وياك..الوحيد في العالم اللي قدر نضال وعرف قيمته..اول مرة يقول انت حانط..واليوم جابلي الحاجه الحلوة عادي..اول حاجه يخطها بيده في شارع القهوة... عبد القيوم بضحكه:لامش اول حاجه نخطها قتلك اول حاجه نكتبها ع لوحه.. نضال:مشيتها ياراجل خيرك عاد توا كنا نشكروا فيك!.. قعدوا يضحكوا.. جاه وقال:ع العموم مشكور وبارك الله..خداها منه وقال وهو يمرر في نظره ع القهوة..لكن وين بنعلقها توا.. اشرله عبد القيوم ع الحيط المقابل وقال:غادي بيش تكون مقابله الزباين واللي يجي خاش يحقها.. نضال بإبتسامه:مزبوط..شويه بس.. ومشي خش داخل وكلم واحد من العمال اللي عنده يخش وراه.. اما عبد القيوم مشي طلع للجزء الخارجي من القهوة وقف وقعد يشبح للمهدي كيف مقعمز ويبان سرحان ومهموم.. التفت يشوف نضال لو طلع.. ونضال طلع وجاه طول وه يقول:قبل لنصكر اليوم نعلقها..وبنصحح وجهي ونطلع منك دير وحده زيها ع الحيط برا.. عبد القيوم؛من عيوني.. نضال:منور بالتارقي كيف؟ ابتسم وقال:تنميرت.. نضال بإبتسامه:هيagain....نبيك دير وحده زيها ع الحيط برا.. عبد القيوم بضحكه:من عيوني.. نضال بإبتسامه عريضه:تنميرت.. عبد القيوم بضحكه:بوجوك...المهم بننشدك ع المهدي كنه..نحس فيه مش كيف المهموم.. تنهد وقال؛ياسيدي المهدي مرض اول امس في الليل وصارت فيه حاله.. وهو متفاجئ قال:لاباس كنه؟ نضال:المهدي عنده مرض القلب ومرة مرة ينوض عليه.. عبد القيوم بأسف:لاحول ولاقوة الابالله..خل نعدي نشوفه.. ولف ومشي طلع.. ونضال تنهد..بعدين مرر نظره ع الزباين في القهوة.. ومنها مشي وقف ورا الروشن وقعد يتفرج ع عبد القيوم وهوماشي للمهدي.. ☘وصل عبد القيوم في طاولة المهدي ركز عليه كيف يشبح لحوش الواعر.. عبد القيوم:السلام عليكم.. غير عيونه عن حوش الواعر وشبحله وهو يقول:وعليكم السلام.. عبدالقيوم؛نقعمز عادي؟ المهدي:جيت في وقتك.. وخر عبد القيوم الكرسي وقعمز قدام المهدي وقال:لاباس عليك..توا بس عرفت من نضال والله ماكان عندي علم.. المهدي: لايوريك باس...مش مشكله.. عبد القيوم؛ان شاء الله خير!... المهدي تنهد وقال؛خير خير..بس نبيك تحكيلي كيف السكنه هني معاك والخدمه حتى هي.. حسه عبد القيوم في الاول كان يبي يقول شي بعدين غير رأيه.. ابتسم وقال:الحمد لله..كل شي ماشي كيف مانبي.. المهدي:يعني حتستقر هني خلاص!. عبد القيوم بإبتسامه:انا جاي بيش نستقر هنا من جميع النواحي.. عقد حواجبه وقاله:قصدك بتتزوج من هني..؟ ضحك بعدين قال:ماجابني هنا غير هالموضوع.. المهدي؛قصدك..تبي وحده من طرابلس.. اكتفي بالإبتسامه بدون كلام.. ابتسم المهدي ع جنب وقعد ساكت حتى هو.. ضيق عبد القيوم عيونه وقاله؛يقولوا ان فراستي قويه ونعرف البنادم من نظرة عينه..انا توا نبي ندير اختبار لروحي معاك.. المهدي ربع ايديه وهو يشوفله بدون مايتكلم.. عبد القيوم؛من اول تلاقينا فيها وحكينا مع بعضنا..لاحظت في عيونك حزن..حزن كبير وطاغي حتى وانت تضحك يبان.. ملامح وجه المهدي تلقائيا بدت تتحول للحزن.. عبد القيوم:الحزن هضا حزن..واحد عاشق.. تبدلت ملامح وجهه لشيء من المفاجأة ماكانش واضح هلبه.. عبد القيوم؛حال بينك وبين اللي عاشقها حايل كبير وقوي واجد..وهي مش بعيده عليك..قريبه..قريبه واجد لدرجة تخلي نسيانها مستحيل.. المهدي:تقاز انت!؟ عبد القيوم بضحكه؛لااعوذ بالله بس الفراسه القويه تخلي صاحبها يقرا ملامح اللي قدامه ويعرف حاجات عنه من خلالها..لاني عراف ولامنجم والعياذ بالله.. المهدي:في حد حاكيلك حاجه؟ عبد القيوم ضحك بعدين قال؛كان في من حكالي نجيك دغري ونقولك..سمعت كدا كدا كدا..مش ليا حركات اللف والدوران.. المهدي ابتسم وقال؛باهي شن شفت تاني!؟ عبد القيوم:انك تبحت يالا حوش الواعر واجد..الباين ان القلب غادي مكانه.. شبح المهدي لحوش لطفي وقال بحسره: ليه 37عام ولاقدرت نمشيله ولانرده..... وجعاته نبرة الحسرة اللي يحكي بيها المهدي وقاله:ازوجت؟. حرك راسه بالنفي.. عبد القيوم بدهشه:شن اللي حال بينك وبينها؟! المهدي:غبائي..رعونتي..قلة صبري... بدت ع وجه عبد القيوم ملامح التعاطف وهو يشوف للمهدي كيف يتكلم.. المهدي:مرات نقول وحده زيها خسارة في واحد زيي..لو كنت نحبها حق كنت صبرت وتحملت ووقفت معاها لين ربي يقدر ويجمع بينا...لكن اللي درته شي مش عارف كيف نوصفه.. واهو ربي جزاني عليه..خلاها بنت عمها واختها بعد هالسنين يوصلوا من نصيب خوتي..واني نقعد نشوفها من بعيد ونتحسر عليها لأخر يوم في عمري.. عبد القيوم:عنده الحق قلبك يتعب.. المهدي:ماتعب الا بعد فراقها..بس يقعد فراقها الحياة اهون عليا من فراقها بغيره..والله بديت ندعي لربي ياخدني قبلها.. عبد القيوم ابتسم وهو متأثر وقال؛لما سميت امير ماغلطت حتى في حبك امير... شبحله المهدي وفي عيونه لمعة الدموع... تنهدعبد القيوم وقال؛وانا اللي كنت نحساب روحي لاقبلي لابعدي في الحب... المهدي:علاش شن قصتك انت؟ ضحك وقال:مازال مافي قصة..بس الحب بدا قبل ماهي تبدا.. المهدي بإستغراب؛لغز؟ عبد القيوم بإبتسامه؛وصعب حله والله..يعني عمرك سمعت بواحد عشق وحده ماشافها كان مرتين بس في حياته وع شانها سيب بلاده وهله وناسه وصاحبه وجا لبلاد مايعرف فيها حد..بس عشان يدور عليها ويلقاها ويكمل عمره معاها.. المهدي وهو متفاجئ:مجنون رسمي!.. ضحك وقال:اها..مجنون وعارف..بس هو هك الحب...جنون.. جنون يخليك تكمل سنين عمرك وانت تحب بنت الجيران برغم ان عندك عيله وعويله كبار.. تبددت ملامح المفاجأة عن وجهه وابتسم بأسف وقال:عندك حق.. سكتوا الزوز وكل واحد فيهم يفكر في اللي قلبه عندها... قطع تفكير عبد القيوم صوت سيارة.. شبحلها.. والمهدي كذلك استاقظ والتفت يشوفلها.. درست قدام حوشهم.. بعدين نزل منها نجاة ومعاها صغارها... عبد القيوم لما شاف نجاه حس ان شايفها من قبل... وفي لحظه تفكرها..هي نفسها اللي شافها خاشه عالجالي في داره يوم المحضر.. قال في نفسه.. "معناها اخته مش مراته" حمزة ولد نجاة وين شاف عمه نضال خدي اذن امه ومشاله.. وهي خشت بجوري ومعاذ للحوش.. المهدي قعد يشوف لنضال وحمزة كيف سلموا ع بعض وقعدوا يهدرزوا.. بعدين جوه هما الزوز.. وعيون عبد القيوم معاهم وهو مبتسم.. وصلوا فيهم وحمزة سلم ع عمه وهو يقول:شن حالك عمي.. المهدي ضمه وقال:الحمد لله..شن حالك انت وخوتك.. حمزة قال:الحمد لله.. نضال؛جاي بيشد القهوة مع عمه زي محمد بالزبط.. خفت ابتسامة عبد القيوم لما سمع كلمة "عمه"... المهدي؛وعلاش لا حتى هو وولى راجل يعتمدوا عليه.. ابتسم حمزة بفرح.. المهدي مسح ع راسه وشبح لعبد القيوم وقال؛هدا ولدي خوي طاهر رحمة الله عليه.. عبد القيوم وهو يسمع في كلام المهدي جي بين عيونه الموقف اللي شاف فيه نجاة خاشه ع الجالي.. ويحاول يدورله اي تفسير تاني غير تفسيره الواضح الجلي... يدوب ابتسم وقال؛ربي يصون.. نضال والمهدي:يصون عرضك... بعدين قال نضال:هيا حمزة افندي ورانا خدمه.. حمزة؛بنمشي عمي توا بعدين نتلاقوا.. المهدي بضحكه:تم..ربي يعاونكم.. حمزة:سلمك.. نضال بإبتسامه؛هيا.. حمزة؛هيا.. ومشوا الزوز ونضال يهدرز ع ولد خوه.. المهدي بعد ماكان يشوفلهم شبح لعبد القيوم لقاها سرحان قاله:وين ديارك؟. شبح عبد القيوم للمهدي ابتسم مجامله وقال:قاعد هنا ماعندي وين نعدي.. "مهدي...عبدو" شبحوا الزوز للي ينادي فيهم بصوت مفخم عالي ضحكوا وقالوا مع بعض بنفس نبرة الصوت:ربيع.. ضحك ربيع وكمل طريقه لين خش للقهوة ومشالهم.. خدي كرسي وحطه في طاولتهم وقعمز وهو يقول:شن الاخبار شن الامور.. الزوز بأصوات متقطعه:الحمد لله... ☘☘☘☘☘ "حاسه ان فراق طوبى تعبلي نفسيتي هلبه" عائشه:تي انتي مفروض تحمدي ربك اللي عطيتيها لراجل مقوم زي الجالي.. نسرين نزلت عيونها وبدت تتوتر.. عائشه:مش لانه سلفي واخته حماتي قدامي..بس بجديات ياسدرة مش حتلقي راجل يحافظ ع طوبى زيه.. سدرة تنهدت بضيق وقالت:عارفه..اني ع قد ماكنت نبي نعطيها ونتريح عليها..ع قد ماندمت لأني عطيتها من اصله.. فايزة؛طبيعي ياسدرة بعدين تتعودي.. سدرة هزت راسها بضيق وهي ساكته.. شبحت نسرين لسدرة وقالت:سدرة انتي لازم تشوفي حياتك بعد عطيتيها لازم تتزوجي بالك تلحقي تجيبي عيل صدقيني حيغيرلك حياتك كلها.. عائشه قعدت تشبح لنسرين وهي مش فاهمه علاش نصحت سدرة نصيحه زي هادي هي مش لاقيه اثرها في حياتها.. سدرة؛لالالا زواج لا..مانبيشي ولانفكر فيه .. فايزة؛بلاش منه الزواج..سافري..ايه ماتشبحليش هكي سافري غيري جو ووجوه.. عائشه؛بري للعمرة صدقيني مش حترتاح نفسيتك الا اذا مشيتي غادي.. تنهدت سدرة وقالت؛صح..محتاجه نمشي عمره.. ☘☘☘☘ "تبهديل ياراجل قسما بالله" عبد القيوم؛كان الله في عونكم.. ربيع؛يارب..ايه قوللنا استاذ عبد القيوم..شن وضع الضي في امل انه يتحسن.. عبد القيوم؛لاامل لاام السعد تقبلوا اللي انتم فيه ومعاش تطمحوا لأكثر من هكي لين ربك يبدل هالوجوه بوجوه خير منها.. المهدي:ياودي ماظني مازال يصير منها البلاد وحني كل عامين قايمنيها حرب والحروب مافيش معاها عمار.. ربيع:متشائمين هلبه.. عبد القيوم:لاانا مش متشائم ومتأمل من ربي خير بس الواقع يخليك غصب عنك تحكي بياس. ربيع شبح للمهدي وقال:ع هكي انت نادم يامهدي!؟ المهدي؛نهائي..بس اني مش من النوعيه اللي تسكت عن الحق حتى لو جي ضدي..كنا متأملين البلاد تعيش من بعده لكن مع الاسف اندفنت.. عبد القيوم تنهد وقال؛يفرج الله.. المهدي:ويكفي طرابلس شر صراعاتهم عارف زي مانشوف فيكم ماحد واكلها زي طرابلس.. ربيع:العاصمه..والكل يبيها.. عبد القيوم؛فكرتوني بأبيات كتبتها ايام الحرب الاخيره اللي صارت من كم شهر في طرابلس.. قلت فيها... ايسلم الله طرابلس يحميها.. ويحفظ غوالي خاطري اللي فيها.. الله يرعاهم.. هلنا وغوالينا وكل ضناهم.. واليوووم مولانا ايزيح عناهم.. والحرب هاللي صايره ينهيها.. وايجيب ربي عن قريب هنااهم.. وهالمعمعه اللي صاايره يطفيها.. وهلنا يكون الله ديما معاهم.. والخوت ربي نفوسهم يهديها... المهدي وربيع باصوات متقطعه؛الله الله..سلمت... ربيع:شاعر انت عبد القيوم؟ عبد القيوم بإبتسامه؛شويعر... ابتسم المهدي.. ربيع؛لا بجديات اني نبي نتعرف عليك اكثر احكلينا ع روحك..عطينا نبده هكي.. ضحك عبد القيوم..والمهدي يشوفله بإبتسامه.. ☘وفي مكام بعيد.. في مرتفع مغطي ثلج.. كانوا الجالي وطوبى وهما لابسين حوايج ثقيله مقعمزين يهدرزوا مع بعض.. الجالي؛مش عارف علاش توقعتك في هلبه حاجات شي وطلعتي شي تاني.. طوبى بإبتسامه؛زي شني مثلا؟ الجالي؛توقعتك تحبي الشتي.. طوبى:لا اني نعشق الخريف.. ☘☘ عبد القيوم:نعشق الشتا ومانحبش الخريف كله كآبه مانتفائلش بيه.. .☘☘☘ طوبى؛يعني اني نطيب كل شي عادي..بس مش كل شي ناكله الماكله الجاريه ماناكل منها في شي ماعدا المبكبكه..ناكلها سباقيتي بس.. ☘☘☘☘ عبد القيوم:جو البيتزا والفركاسي ومش عارف شنو مانحبه ولانعبره..نحب الماكله الحانطه..والجاري الذات نرجى في الشتا ع خاطرهم.. ☘☘☘☘☘ طوبى؛اني نهاريه نحب نهار اكثر من الليل..اول مايحل الليل نلقى روحي خايفه مش عارفه علاش..حاجات معينه مخليتني نحب الليل مرات..زي الرسم.. ☘☘☘☘☘ طوبى:الليل..سكون هدوء..صفاء ذهن..الانعزال في البر وفي الليل..يخليك تعرف تفكر وترتب امورك وغالبا تاخد اكثر قرارات صح في حياتك.. المهدي؛ياريتني عرفتك من زمان.. فهموا عليه وضحكوا.. ☘☘☘☘ الجالي:والسماح..الصفح..شن وضعه معاك؟ طوبى؛امم..نسامح الناس اللي نعزهم بس لو وجيعتهم كانت قويه ماننسهاش.. الجالي:تحقدي.. طوبى:لا مش حقد..بس مكانتهم عندي تتغير..يعني مثلا يكونوا فوق نزلوا درجة ولادرجتين.. الجالي:مني اللي يطيح من عين طوبى..؟. طوبى:الانسان اللي نعطيه قيمه كبيره في حياتي ومايقدرنيش هدا يطيح من عيني و نمسحه من حياتي.. خدي يدها وشدها وهو يقول؛هو في حد تعطيه انتي قيمه ومايقدرهاش..حمار رسمي.. ضحكت وقالت؛ع العموم ماصارش معاي الشي هدا قبل وان شاء الله مايصيرش القدام.. خداها لقلبه وهو يقول:غنيلي.. ضحكت بعدين سكتت وهي تفكر وبدت تغني.. نسم علينا الهوا..من مفرق الوادي.. وياهوا دخل الهوا..خدني على بلادي.. ☘☘☘☘ المهدي:ترا اختبر فراستك مع ربيع.. ربيع بضحكه:فراسة شني..لالا فوتني.. المهدي ؛عندك حاجه ماتبيهاش تطلع.. عبد القيوم:شكله.. ربيع:ريحوا ارواحكم..هي اختبر فراستك اختبر.. عبد القيوم :من لما شفتك وحكيت معاك..حسيتك واحد بيره غريق..صعب حد يعرف عنك حاجه انت ماتبي طلعها.. بس انا شفت في عيونك كيف الهم..حاجه مضايقتك وتحاول ماتخليها تبان عليك.. وينفتح حوش لطفي الواعر.. ويطلعوا منه نسرين وعائشه.. تلقائيا ربيع شبح لنسرين.. عبد القيوم ركز عليه.. والمهدي كان يشبح لأخته ومرته..وبيموت ويعرف اخبار سدرة من نسرين... عبد القيوم ناض وهو يقول:خل بنعدي ندير خبزة تنور قبل المغرب.. شبحله المهدي وقال:احسبنا في فردة بالله.. عبد القيوم بضحكه:حاضر.. ربيع:تشقي في روحك اقسم بالله.. عبد القيوم:بالعكس نبعد عليها في الشقا...سلام ياجناتل.. ومشي وهما يقولوا:وعليكم السلام.. سلم ع نضال قبل ليطلع من القهوة. ومشي طول للحوش.. وعيون المهدي وربيع معاه لين درق من قدامهم.. ربيع:مريح الراجل هدا.. المهدي؛لأنه ع طبيعته..واضح هلبه.. ربيع:صح.. ☘وعبد القيوم خش للحوش.. ومشي ركب لشقته بش ياخد صونية العجينه وينزلها.. 🍃في الوقت.. اللي كانت فيه نجاة تتسحب ع الدروج راكبه لجناح الجالي.. وصلت فيه وفتحت الباب وخشتله.. سكرت الباب.. وهي تمرر في عيونها ع الجناح وتشوف في اللي فيه بقهر.. بعدين مشت للدولاب.. فتحاته فرده منه لقاته فاضي.. سكراته..سحبت الباب التاني لقت حوايج الجالي.. جت قدامها اللبسه الطرابلسيه اللي لبسها يوم المحضر.. قعدت تشوفلها بعشق وشوق.. ومش منتبهه لباب الفيرندا المفتوح.. اللي يطل ع فيرندا شقة عبد القيوم.. كان قايم سيرانتي وفاتح الفيرندا بش يهوي الدار. خش بش يرجع ينزله.. وهو ماشي بإتجاهه. وقف في مكانه لما شاف نجاه حاضنه لبسة الجالي.. وخر خطوة..ولف وطلع طول وسكر الباب وهو مصدوم.. عبد القيوم بصدمه؛معقوله!؟..سكت شويه وهو يفكر بعدين قال...شن اللي يخليه يزوج بنت لطفي الواعر دام يبي ارملة خوه وهي تبيه!؟ سكت مرة تانيه وهو يفكر بعدين قال...مافيش غير تفسير واحد..هله معارضين زواجهم..وزوجوه غيرها بيش يحولها من دماغه...لكن شن اللي ريته يومها!؟........الراجل بان عليك يبي بنت لطفي ياعبد القيوم...ابتسم تهكما وقال...هذى وانت تمدح في فراستك طاح سعدها...بعدين تنهد وبأسف وقال..والله مايستاهل عمي لطفي..ولابنته مسكينه يصير فيهم هك...لاحول ولاقوة الا بالله.. ومشي للكوجينه خدي صونيه العجينه ونزل لوطا.. ومشي لمكان التنور.. حط صونيه العجينه..وبدي يجهز في التنور.... ☘في شقة المهدي... كانت نسرين عند عائشه والزوز يهدرزوا ع سدرة.. نسرين؛اني نبيها تتزوج وتبعد بش هي ترتاح..وهو يرتاح..وانتي ترتاحي... ابتسمت عائشه تهكما وقالت؛تعرفي لما كلمتك اليوم نحكيلك ع اللي صارلها ماندريش عليه الا وهو وقف فم دار النوم وسامع الدوة كلها..صدقي اولاتصدقي..خفت عليه تصيرله..خفت عليه تصيرله حاجه بعد ماعرف انها تعبانه.. نسرين بحزن؛هدا علاش نبيها تشوف حياتها بش ترتاحوا كلكم... عائشه:باهي بتصدقي هادي..لما قلتليها تزوجي خفت تسمع كلامك وديرها شن يصير فيه هو بعدين.!؟..فرحت لما قتلك لا..فرحت..شفتي وين وصل الحال بصاحبتك...! ابتسمت نسرين بحسرة وقعدت ساكته.. وع وجه عائشه كانت موجوده نفس الابتسامه بس بزياده دموع غلبنها ونزلت وهي طول مسحتهم.. فجأة تبدلت ابتسامه نسرين المتحسرة لإبتسامه فيها شي من البهجه وقالت:الله..ريحة خبزة فرن!.. عائشه رشفت وقالت؛هدا جارنا التارقي..اول مرة دارها بعتلنا فردتين تعيشنا بيهم...واليوم قلت للمهدي يبعتلنا خاطري فيها.. نسرين:قصدك حامل!؟ ابتسمت بتهكم وقالت:حمل شني واني ناخد في مانع ليا سنين.. نسرين:مازبطش المهدي!؟ عائشه؛شوفي قداش عمر سدرة توا..ولامرة سأل ولادور ولاقال نبي صغار..واضح انه عارف وداير روحه مايعرفش.. نسرين بكره:قسما بالله كرهت الرجاله كلهم ومايجي منهم حتى خوتي..وبوي ع شعره.. ضحكت عائشه ودموعها تنزل... ☘☘☘☘ "والله ماعارفه شن نقولك يانجوته" نجاة؛ماتقولي شي بجميلي..مرة تانيه كان احتجتيني كلميني نجيك طول.. مغليه؛صحيتي بنتي.. نجاه:سلمك..هي تصبحي ع خير.. مغليه؛غير راجي شويه..خل نقول لنضال يروح وراك.. ابتسمت نجاة وقالت؛باهي.. ومشت مغليه بش تكلم نضال.. ونجاة تشوفلها وهي تقول في نفسها.. "نعرف طبها العزوز مش صعبه عليا..وخديج الباين دايرة مشكله مع المهدي ومعاش تجي..ان شاء الله معاد يولوا لبعض" جوري:هيا ماما نطلعوا.. نجاة؛باهي بروا قدامي.. وهي رافعه معاذ في غمرها طلعت ومعاها جوري للسيارة.. وقعمزوا فيها.. جوري؛وحمزة؟ نجاة؛تو يجيبه عمو نضال.. سمعت باب الحوش انفتح التفتت وشافتله.. لقت المهدي خاش بسرعه وماشي بإتجاه الدروج متاع شقته... حست ان في شي من الطريقه اللي خش بيها.. ☘هو وصل في دروج شقته قعد واقف قدامهم يراجي.. عرف من يزن ان عمته نسرين في شقته..لهالسبب جي بسرعه وقفلها في الدروج وقعد يستنى امتى تنزل.. سمع باب شقته انفتح وتسكر..بعدين سمع صوت خطواتها وهي نازله لين بانت عليه.. تفاجئت لما شافاته.. خففت سرعة خطواتها لين وصلت لوطا.. هو شدها من يدها ومشي بيها كم خطوة بعيد عن الدروج وقال:خيرها سدرة شن صارلها؟ نسرين بضيق؛مهدي ياسرك عاد! المهدي نسرين؛ماطلعيش جنوني عليك وتكلمي.. تنهدت نسرين وقالت؛تعبت شويه.. المهدي:من شني!؟ نسرين؛مخلطه.. المهدي بغضب مكتوم:نسرين! نسرين تأففت وقالت:عارف شن عندها يامهدي.. المهدي برفعة حواجب:معناها هامله روحها.. قعدت تشبحله بضيق وهي ساكته.. المهدي تفكر كلامها ليه قدام العيادة حس روحه بتطلع.. بلع ريقه وقال لنسرين: اتصلي بيها.. نسرين بصدمه؛مهدي بلاهبال! المهدي غمض عيونه وفتحهم محاوله منه لتهدئة اعصابه؛نسرين اتصلي بيها... نسرين برفض تام؛لا يامهدي لا... انقلبت نبرته الغاضبه للرجاء وقال:نسرين ارجوك نبي نكلمها شويه بس.. نسرين بضيق؛سامحني مهدي مانقدرش ساد تاخد في اخبارها مني والله ماراضيه ع روحي وانتم كل حد فيكم يجبر فيا نخون صحباتي جبر.. المهدي برجاء؛والله هالمره بس يانسرين..حط يده ع قلبه وقال..ريحي قلبي بالله عليك.. نسرين وجعها خوها هلبه.. وكالعاده قدماته على كل الاشخاص والاعتبارات.. غمضت عيونها بقلة حيله وهي تقول بنبرة الم وتذمر؛باهي ياهمي باهي.. فتحت عيونها اللي تعبوا دموع واتصلت بسدرة وفتحت المايك.. ردت سدرة... "ايوه نانسي" سكرت المايك..والمهدي خدي منها التليفون وبعد عنها وهي تشوفله بنظرات ضيق وحزن.. ☘"الو نسرين..الو" المهدي:ايوه!... "ايوه..من معاي...!؟" المهدي؛دايره روحك مش عارفه صوتي!؟ سكتت معاش تكلمت.. المهدي وهو يتكلم بسبابته؛قسما بالله ياسدرة تسكري قسما بالله نمشي لبوك نخطبك الليله..الليله..والله العظيم نديرها وانت تعرفيني كويس.. "ريح روحك بلا هبال..تحساب روحك صغير عامين تانيات تولي جد" المهدي؛ولوكنت من عمر جدك هداكا اللي وقف بيني وبينك الله يسامحك...نقعد في جرتك يابنت انتي.. "ربي يهدي من خلق.." المهدي؛اجمعين..تعالي هني خير بلا جدك هامله روحك تبي تموتي!؟ "رجاءا معاش تجيب سيرة جدي..تاني حاجه صحتي تخصني بروحي" المهدي؛باهي ياستي فوتيني اني ماتعبرنيش..فكري في عيلتك.. "والله كان جت ساعتي مابنردها" المهدي:كلمتك هادي قلتها للدكتور اول امس قالي اللي يهمل صحته بقصد ومات بعدين في حكم المنتحر.. "علاش شن صارلك تاني!؟" المهدي:مادخلكش بيا..فكري في روحك بس.. "لاوالله تقولي فكري في روحك وانت ماتفكرش في روحك!؟ امتى طبق نصيحتك ع روحك اني نسمعها منك..وياريت معاش تعاودها حركتك هادي مرة تانيه ماتخلنيش نكره روحي اكثر ماني كارهتها" وسكرت في وجهه.. غمض عيونه بأسف..بعدين نزل التليفون وفتحهم.. وخش ع الرسايل وبدي يكتب.. (خودي دواك في وقته..وكولي كويس واتقي الله في نفسك...وفيا) وبعتها... بعدين مشي لنسرين مدلها التليفون.. خداته وهي تشوفله بعدم رضا.. وهو لف بدون مايشوفلها ومشي ركب الدروج.. تنهدت نسرين بضيق..ومشت لفت ع الحوش.. وخشت لحوش بوها... ☘☘☘☘☘ وخش وقت المغرب.. وجت لسدره نفس الحاله..وعمتها اسعفتها بسرعه.. وخلتها بعدين راقده ومتغطيه بالبطانيه وهي تتفرج ع التلفزيون.. اول ماطلع وقت المغرب ولى حالها باهي... ناضت صلت المغرب.. وبدت تحس وقت الصلاه انها مش متحملتها وتبي تطلع منها بس قعدت تقاوم ع قد ماتقدر لين كملتها وهي مش راضيه عنها.. ☘☘☘☘ طلع عبد القيوم من الحوش وفي يده سله فيها شكاير خبزة فرن.. خطم ع حوش شنيبه عطاهم فردتين.. بعدين مشي لحوش لطفي الواعر وعطاهم فردتين.. ومنهم لحوش الجد... وحسين هو اللي فتحله الباب.. حسين:اووو تارقي..اهلا وسهلا.. عبد القيوم بإبتسامه؛اهلا بيك ياافندي..عاش من شافك.. حسين بضحكه:مشاغل والله.. عبد القيوم:ربي يعاونك المهم امورك تمام.. ابتسم حسين وقال؛الحمد لله.. عبد القيوم حس انه متكدر بس حاول يبان عادي قدامه..قال:الحمد لله...طلع شكاره وقال..وهذي قرعتكم.. حسين خداها وقال:بارك الله فيك..دير حسابك يوم من الايام بنطب عليك وناكل التجله.. عبد القيوم؛برغم ان طمعتها تطيب بخبزة الجمر بس عادي نديرها بخبزة التنور تجي سمحه. حسين:خلاص راجيني كل يوم.. ضحك وقال؛نقعمزلك في الشارع نلقاك نطبك ونرفعك للشقه تاكل التجله وتريح وترتاح.. حسين قعد يضحك.. عبد القيوم؛قال ارجاني كل يوم قال..ماعندك غيرك قالولك.. حسين وهويضحك؛تي باهي ياتارقي باهي.. ضحك وقال؛راك تزعل بصارة راهو.. حسين ابتسم وقال؛ولايهمك غالي..عارفك.. عبد القيوم بإبتسامه:تفضل في أي وقت مرحبتين بيك.. حسين:تسلم..تصبح ع خير.. عبد القيوم:قدامك كل خير..سلم ع الحاج علي.. حسين؛يوصل.. رفع عبد القيوم يده وحياه ومشي كمل طريقه.. وحسين خش وسكر الباب.. ☘عبد القيوم وهو ماشي فاتت من جنبه سيارة نضال.. وقف وقاله:تارقي.. عبد القيوم؛زعيم.. نضال؛شن صار في اللي وصيتك عليه.. اشر عبد القيوم ع حوشهم وقال:سبقك.. ضحك وقال:تنميرت تنميرت..تصبح ع خير عبد القيوم بضحكه:قدامك كل خير.. وكل واحد فيهم كمل طريقه لوجهته.. وصل عبد القيوم في مكان الحلاق.. وقف ودق الباب وقال:السلام عليكم.. طلعله فراس وهو يقول؛وعليكم السلام..تفضل.. عبد القيوم حط يده ع صدره وقال:خوك عبد القيوم عمران..ينادوا عليا عبد القيوم التارقي ساكن جديد في شارع القهوة..تعرفت ع اغلب اهل الشارع ومازال ماصارليش الشرف وتعرفت عليك.. فراس بآبتسامه؛فراس الطرابلسي وينادوا فيا فيا فراس التونسي ليا توا الخمسه شهور في شارع القهوة.. عبد القيوم؛تشرفت بيك..طلع شكارة ومدها وهو يقول..هذي بش يكون بينا عيش وملح.. خداها منه وقال:نحبها برشه خبزة التنور..كسر منها ومد لعبد القيوم وقاله..يش يكون بينا عيش وملح بالصح.. خدي منه عبد القيوم وهو مبتسم وكلاها.. والتونسي حتى هو كلي من الخبزة وقال رأيه فيها:عطيك الصحة بنينه.. عبد القيوم وهو ياكل؛صحتين... ☘☘☘☘ وفي نفس الوقت.. في حوش محمد شنيبه.. خش نضال بعد ماروح للصاله.. لقي فيها بوه وامه ومحمد وسدرة... قال:السلام عليكم.. كلهم ردوا:وعليكم السلام.. فات من جنب سدره ريشها بعدين قعمز حدا امه.. سدرة وهي تتوجع؛حارة هلبه.. مغليه ضرباته ع رجله وقالت؛معاش تمس شعرها.. محمد شنيبه قعد يشبحله وهو ياكل في البرتقال ويحرك في راسه يمين ويسار بعدين شبح للتلفزيون.. كلهم كانوا يتفرجوا ع برنامج الهادي الغناي.. او نقولوا مغليه فارضاته عليهم.. نضال عكرش وجهه بملل بعدين شبح لامه وقال؛يام.. مغليه وهي تشوف للتلفزيون؛هممم.. نضال؛اشبحيلي هني يام اني ولدك.... شبحتله وقالت؛شن تبي يانكبتي الكبيره.. شد محمد المهدي ضحكته.. نضال:نبي نتزوج.. شبحله بوه وضيق عيونه وهو يقول:شن تفضلت!؟ نضال؛نبي نتزوج ياحاج خيرك!؟ هو ضحك بسخريه وقال؛جابت ماعندها.. مغليه:علاش اللطف شن قال!؟ قال نبي تنزوج ماكفرش.. نضال؛قوليله.. محمد شنيبه:وانتي عاجبك ان شاء الله!...تو هدا بتمشي تحشمي روحك مع ناس وتخطيبله..!؟ مغليه؛وخيره وليدي شن تشبح فيه ناقصه يد ولارجل ولاعقله مش عليه!؟ نضال؛قوليله.. ومحمد المهدي وسدره يتفرجوا عليهم وهما يضحكوا.. محمد شنيبه:الاخيره..عقله مش عليه.. نضال في نفسه"حلال ع الجالي بس":الله يسامحك ياحاج.. مغليه؛اسمع معاش تقول ع ولدك هكي..وبعدين الله يبارك عليه ولدي معيد في الجامعه..وشاد قهوة الله يبارك صيتها واصل لأقصى طرابلس.. نضال؛قوليله... محمد؛سكر فمك واسكت..وانتي انهي الموضوع الولد هدا زواج مانيش مزوجه لين يحط عقله في راسه.. نضال؛شن تشبح فيا ياحاج نرقص في الشارع ونصفق بالشباشب..راني راجل ينعبى عليه.. محمد:في حاجات دون حاجات..الزواج مازال بكري عليك مازال.. نضال؛تي شني اللي مازال بكري راني ع بيبان الثلاتين ياغالي ندادي صغارهم خشوا المدرسه.. محمد شنيبه:هي كلمه زواج توا لا.. مغليه خبطت ايديها في بعض وقالت؛تي علاش اللطف!.. محمد بعصبيه:ولدك هدا....سكت فجأة لما شاف لصغار المهدي بعدين قال..شن بنقولك توا بس!...تو بعدين نفهمك.. نضال:لاياكوماندا قولي اني بعدين الموضوع يعنيني اني بالدرجه الاولى.. محمد بإنفعال:ماني قايلك حاجه ولاك سامع مني حاجه وموضوع الزواج هدا انساه.. والتفت ع التلفزيون خدي الريموت وعلا الصوت... مغليه حركت راسها يمين ويسار بعدم رضا.. ونضال قعد يشبح لبوه للحظات بعدين تنهد وقعد يغني.. ياليلي ياليله..وش بش نشكيلك يما... وقالولى ليلا..صغير وفي قلبي غمه.. مغليه:بعيد السو عليك من الغمه وليدي.. نضال وهو يشبح لبوه كمل يغني.. نحب نطير نطير لفوق يحبوا يقصولي جناحي . وانا وليدك راني مهموم ومنك طالب سماحي.. مغليه:يفرج الله ياوليدي.. ومحمد شنيبه ولا هو هنا.. نضال:ياعليك وحله ياعليك وحله.. ليله حرفه سودا نودا كحلا.. مغليه:اعوذ بالله من الشيطان الرجيم..نوض من حداي نوض.. التفت محمد شنيبه وشبحلها واشرعليه وقال:تفضلي هي.. نضال:منك انت ياحاج ديما مصكرها في وجهي.. غير بوه عيونه عنه وزاد على الصوت.. كانت فيه اغنيه جايه في برنامج الهادي الغناي.. "والله مانك خير من امي" تنهدت مغليه وقالت:الله غالب مالقينا من يقولها.. محمد تلاشت ضحكته لان فهم حناه من تقصد.. نضال؛كان تزوجوني يام نديرها نشيد قومي لمرتي لكن الله غالب..يحبوا يقصولي جناحي.. التفت عليه بوه ورفع يده اللي فيها الريموت وقال:نوض اطلع.. خاف نضال وناض وهو يقول:وسع بالك ياكوماندا خلاص معاش نبي نتزوج.. ومشي طلع من الصاله.. محمد:تي هدا كان ناخدله يبغدد بنت الناس.. مد راسه من الباب وقال:اللي نبيها تبغدد بلاد ماتخافش عليها ياحاج..وبسرعه حول راسه لما جي الريموت ع الباب كل جزء منه راح في تركينه... ☘☘☘☘☘ وبعيد هلبه عن البلاد كلها.. كانت طوبى مقعمزة في الجناح متاعها هي وراجلها اللي كان قدام البحر..ع المصليه وفي يدها مصحف تقرا منه في الختمه.. وراجلها.. كان يتمشي ع الشط.. وبعد عن الجناح وهو لاهي بتليفونه.. كان يكتب في رساله بعتها ماسنجر.. ☘وصلت لصاحبتها اللي كانت تتفرج ع فيلم آكشن في اللاب توب.. قامت التليفون شافت الرساله من مني فتحتها بلهفه.. (فايقه..نبي نكلمك فيديو) طارت من الفرحه ماصدقتش روحها... حولت اللاب توب ع جهه.. وناضت طلعت حوايج من الدولاب.. ع السريع بدلت.. بعدين قعمزت قدام الزيانه وحطت مكياج.. بعدها..طلقت شعرها ومشطاته..نزلت راسها كشكشاته بعدين رفعاته وقعدت تساوي فيه شويه ع المرايه.. ومشت جري قعمزت ع الكنبه واتصلت بيه فيديو.. ☘هو كان واقف يراجي في ردها.. اتصلت..ابتسم ع جنب ..وزاد بعد عن الشاليه ورد عليها.. لما شافها قال:شن جو.. "بشوفتك حلو غزالي" الجالي:استاحشتك هلبه عندك علم.. "وينها عروستك" الجالي:شوفوا اني في شن نحكي وهي في شن تحكي.. ضحكت وقالت.. "استغربت كيف مليت منها بسرعه لعبتك شكله مافيهاش جو" الجالي:تو نكلمك فيك انتي تجيبي في سيرتها علاش.. "تمام معاش ندوي عليها..خلينا في بعضنا..استاحشتك موت غير امتى تروح بس" الجالي؛مش اكثر من عشرة ايام.. "حي عليك..ضحكت وقالت..نذكر لما مشينا لتونس روحت بالسيف" الجالي؛المهم توا شن دايرين انتي والصغار.. "الحمد لله امورنا تمام..حتى اليوم مشيت لحوش ماليك وضميت لأمك الحوش" الجالي بضحكه؛مرتي الفالحه.. ضحكت بعدين قالت.. "لكن شكلها ديجا تاكتها مع حد في الحوش صح" الجالي:المهدي.. "توقعت..احسن خل نتنفسوا شويه" الجالي؛محلوة هلبه ولااني غير اني مستاحشك.. "الزوز" وضحكوا هما الزوز.. ☘وطوبى بعد كملت قراية قرآن.. ناضت حولت الملايه.. وطلعت لبسه شتويه لبستها.. حطت مكياج...بعدين لبست الوشاح وفوق الوشاح طاقيه صوف... مشت فتحت شنطتها طلعت دفتر الرسم وقلم.. وطلعت من الجناح.. قعدت دور ع الجالي مالقتاش.. قدمت للشط..وقعمزت ع الرمله..وهي دور ع الجالي لين شافاته من بعيد يتكلم بالتليفون مكالمه فيديو ويضحك.. ابتسمت وقالت؛شكله يكلم في ماليه.. خل نتصل بسدره حتى اني.. وخشت ع الماسنجر وجت بتتصل بسدره لقتها مسكره نت.. قال؛خسارة.. بعدين جربت تشوف غرفه وبنات اختها لقتهم مسكرين. طوبى:غريبه!.. تنهدت وحطت التليفون في جيب البالطوا.. بعدين فتحت دفتر الرسم.. وبدت ترسم.. ☘من بعيد الجالي وهو يتكلم بانت عليه طوبى مقعمزة ع الشط وهي رافعه راكبه اللي ثانيتهم وحاطه عليهم الدفتر وترسم.. حس روحه في هديكا اللحظه مش طايق نجاه.. الجالي؛تمام نوجا نكلمك وقت تاني.. "لعبتك استاقظت بيك" الجالي؛نوجا باي حبي...تصبحي ع خير..وسكر عليها.. بعدين حدف كله شي وحط التليفون صامت ودسه في جيبه ومشي لطوبى.. كل مايقرب منها يشوف قداش تبان حلوة وهي ترسم.. ابتسم من قلبه.. وصل فيها وقعمز جنبها.. طوبى شبحتله بإبتسامه وقالت؛من كنت تكلم؟ الجالي بإبتسامه؛امي تسلم عليك.. طوبى تفاجئت وقالت؛نحسابك تكلم في حد من خوتك..مرة تانيه لما تكلمها خليك حداي بش نكلمها معاك.. الجالي وهو مبتسم:حاضر..شن ترسمي؟ طوبى وراته الدفتر.. شافها باديه ترسم في اقحوانه.. الجالي؛عبي الجنان البلاكونه اقحوان كان حبيتيه لهالدرجه.. طوبى بضحكه:وهدا اللي بيصير.. الجالي بإبتسامه:عادي نشوف الباقي.. عطاته الدفتر وقالت:ايه عادي.. خداه وقعد يتصفح فيه.. شاف رسومات ليها عن الطبيعه بس.. وفي رسمه للقطوسه متاعها..ورسمه للسلاحف لما شافهم قعد يضحك.. وهي تضحك.. قلب الصفحه اللي بعده..جت قدامه رسمه لوردة امها.. الجالي؛الله يرحمها عمتي ورده..كانت طيبه وحنينه هلبه.. تعبوا عيونه طوبى دموع وهي نقول:كنت تشوف فيها هلبه وتهدرز معاها؟. الجالي:ايه...امك ماكانش في حد فالشارع مايحبهاش.. نزلوا دموعها وقالت؛يابختك.. قلبه وجعه عليها هلبه.. حط الدفتر ع جيهه.. ومسح دموعه بعدين خداها لقلبه وقال:اسف مش قصدي.. طوبى قعدت تبكي وهي شاده فيه.. وهو قعد يواسي فيها لين هداها.. بعدين خداها وقعدوا يتمشوا ع البحر وهما يهدرزوا لين نعسوا وولوا لجناحهم... 🍀🍀🍀🍀🍀 وقعدت الأيام تمر يوم ورا يوم... وسدرة ع حالها اللي بدت تتعود عليه.. مافي حد فكر نهائي ان في شي غريب في اللي صاير معاها.. اللي يقول نفسيتها تعبانه واللي يقول مش مهتمه بصحتها.. ومع قلوب عيلته اللي كانت خايفه عليها.. كان قلب الجارح التعبان مشغول حتى هو..وكل يوم يقعد حارس قدام المطحن يراجي امتى طل.. ومايهدا ويرتاح لين يشوفها.. وعبد القيوم خلاص تعود ع شارع القهوة وناسه.. وألفهم وارتاح معاهم.. بس في نفس الوقت كان قاعد يجري ورا السراب ... وفي كل يوم يرجع لشقته بخفي حنين.. وكل مايبدا اليأس يسيطر عليه.. شعور في داخله كان يقاوم بقوة ويقوله.. "عن قريب حتلقاها" 🌼وهي عايشه ايامها الحلوة مع راجلها.. اللي بنالها قصور سعاده في الهوا... ورسملها حياة حلوة ع الرمل... وعيشها في احلام ورديه ترفع فيها لعالم تاني.. بدت طوبى تحس اتجاهه بشي من التعلق.. وهو بدي يلاحظ عليها هالشي وفرحان بيه هلبه.. وطبعا عايش جوه مع نجاه اللي كان يكلم فيها لما طوبى تلهى ولاتنشغل.. كان حاس مستمتع جدا بالحاله اللي عايشها.. كانت ترضي في غروره اكثر من انها تسعده.. وخوه.. عاش مع عروسته احلا ايام حياته.. كلها حب..ورومانسيه.. بس يقعد شهر عسل..سيوره ينتهي طال ولاقصر.. وبعده حيرجعوه يعيشوا الواقع اللي حيحط هالحب في معترك اختبارات قويه وكبيره... ☘☘☘☘ يوم الاربعاء.. اليوم اللي يسبق يوم مرواح العرسان.. كانت فردوس قاعده عند ماليها من مده بعد ماسمعت اللي صار مع اختها.. من خوفها عليها معاش قدرت تروح للحوش.. خايفه من الفقد🍃.. وقعدت تعاون فهاليوم ع ضمان ماقعد من حاجات طوبى بش يرفعوهم لحوشها قبل ماتروح.. ☘سدرة:افتحي المخزن فردوس فيه لوحاتها نبي نطلعهم.. فردوس:هيا هي.. خشوا الزوز.. لقوا لوحاتها مغطيات جزء منهم محطوط فوق بعضه.. وجزء مسنداته ع الحيط.. بدوا ياخدوا ويطلعوا برا.. ع جية غرفه ووراها مطيره.. غرفه:سلام ياقوم.. الزوز ردوا؛وعليكم السلام.. سدرة؛ماتمسي شي.. غرفه ؛حاضر..شن حالك اليوم.. سدرة وهي تسند في اللوحات ع حيط:كويسه الحمد لله.. بعدين خشت داخل.. مطيره:بالشويه عليك ياسدرة.. وغرفه حداها تمرر في نظرها ع اللوحات.. ثبتوا ع لوحه غطاها قريب يطيح وباين شوين من الرسمع.. عين..خد..نص ابتسامه.. عقدت حواجبها وشبهت ع صاحب الرسمه.. قدمت كم خطوة وعرت اللوحه تماما.. وانصدمت بقوة لما شافت اللوحه كامله . ع طلعة فردوس وسدرة ووراهم مطيره.. شافوها كيف واقفه مصدومه.. شبحوا وين تشبح.. الصدمه لحقتها الثلاثه بس النصيب الاكبر منها كان لسدره.. ☘وفي مكان تاني.. كان عبد الرؤوف راجل غرفه مقعمز في احد المطاعم.. قدام فنجان قهوة..كان يشرب فيه وهو يراجي.. قعدوا عيونه ع باب المطعم.. لين شاف الشخص اللي يراجي فيه.. خش وحول نظاراته وقعد يدور بعيونه.. اشرله عبد الرؤوف.. لما شافه ابتسم وجي لطاولته طول.. ناضت عبد الرؤوف ومد يده وقال:اهلا وسهلا.. صافحه وقال:عبد الرؤوف بن موسى.. عبد الرؤوف بإبتسامه... "وراجل اختك غرفه"
#في_الداخل #طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
