#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا4"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
"نخش نشوفها قبل بعدين نادي عليكم"
خديجه وهي شاده ضحكتها:باهي..هي خش..
خدي نفس وساوى "البيبيونه" وجاكيت البدله..
بعدين فتح الباب وخش..
لما شافها واقفه تراجي..ابتسم بذهول وسكر الباب..
بعدين قدملها وهو يحرك في ايديه ويقول:واك عليا واك واك عليا واك واك واك..شن هذا!!؟
قلداته وهي تقول:ووه عليا ووه ووه عليا ووه ووه ووه شن هالطرف هدا!؟
عقد حواجبه وقال بضحكه:قولي الله يبارك!
حطت ايديها في نصها وقالت بتعجب:وخيرك ماقلتها انت!؟
نضال بإبتسامه؛ماناخدش بالعين يابستاشيو..
اريج:ع الاساس اني ناخد بالعين..هو انت فيك ماياخدوه بالعين..لولاطشة الحاجات الحلوة اللي فيك مارضيت بيك..
حط ايديه في جيوبه وقال بإبتسامه؛اني قبل نحسابك رضيتي بيا بش تكسبي اجري طلعت عاجبك يابستاشيو!
ضحكت وقالت؛ وواك منك كيف تقلب الدوة لصالحك..
قعد يتأمل فيها وهو ساكت..
هي تحشمت هلبه ووجهها احمر وقالت بإنزعاج:معاش تشبحلي هكي تفركس فيا..
ضحك وقدملها خطوة تانيه وشد راسه وباس جبينها..
هي حطت ايديها ع بعض من الخجل وابتسمت..
وخرعنها وشبح للقفطان من لوطا:خير كبير هكي هدا!؟
اريج:ذوق السلطانه خديجه .
شبحلها وقال بضحكه؛بش قلتي عادي التغيير!؟
اريج؛مش هكي عاد!؟ ترا تعالى اوقف جنبي ..
مشي وقف جنبها..
اريج:ترا هات ذراعك..
وتعنقت ذراعه بعدين شبحت للقفطان وقال:ماشي الحال.
ضحك وقال:دجدج..
اريج:شن تبي فيها!؟
نضال؛جايبه مصورة تصورنا..
اريج:اها..ايه قالت ماتجيبوش اني بنجيب نص الحفله مشت من غير تصوير .
نضال؛المهم مازال ماجتش..
شبحتلها وهي مبتسمه بحماس..
انفتح الباب وخشت خديجه ومعاها ايناس المصورة..
المصورة؛مبارك عليكم..
الزوز مع بعض:الله يبارك فيك..
ابتسمت وقالت؛هي خل نبدوا..
خديجه:لما تكملي خبريني..
:تمام..
طلعت خديجه بش تخليهم ع راحتهم..
وبدت المصورة تعطي فيهم تعليماتها وهما ينفذوا ومرات تريح منهم الخريطه ويتلخبطوا ويتسهوكوا ع بعض..
والمصورة تضحك عليهم..
🍀بعد ماكملت.
نادت ع خديجه اللي كانت معاها نسرين..
فتحولهم الباب ع مصرعيه..
وطلعوا هما الزوز..
هي متوترة ومتحمسه في نفس الوقت..
وهو فرحان باينه في عيونه الفرحه..
قعدوا يمشوا لين وصلوا لمدخل القاعه..
وقتها القاعه كانت مظلمه..
اشتغلت بداية أغنيه "الله يباركلي فيك"..
المصورة جت قدامهم بالكاميرا متاعها..
وخديجه قالت:هي خشوا وبالشويه بالشويه نضال..
نضال؛تمام..
وبدوا يمشوا هما الزوز..
وع وجوههم ابتسامه حلوة..
اللي يشوفوهم يقول..
"الله قداش طالعين ع بعض"
فردوس كانت تشوفلهم ودموعها يجروا ع خدودها..
وسدره جنبها تمسح ظهرها وهي تشوفلهم بإبتسامة حب..
آلاء برغم اللي صار معاها..لما شافتهم مع بعض حبتهم هلبه..
وفرحت للفرحه اللي تشوف فيها في عيون اختها.
حبتهم غرفه..
ومطيره تدعي وتقول؛ومن شر حاسد إذا حسد الله يكفيهم شر العيون اللي تشوفهم وماتذكرش ربي..
☘مغليه زيها ع قد ماخشوا خاطرها وحابتهم لبعض خافت عليهم من العين..
وخواتها قعدوا يتغزلوا بنضال ويشكروا فيه..
اما..
طوبى...كانت تشوف لفرحة اريج وهي تتفكر في فرحتها يوم زواجها من الجالي..
تسلسل الخوف لقلبها ع بنت اختها..
زعمه شن يراجي فيها مع نضال!؟
زعمه في شي مدرق في حياة نضال حيبانلها بعدين بعد طاح الفاس بالراس..!؟
زعمه في طباع سيئة مخفيه عند نظال حتطلع للسطح بعدين زي ماصار لأميمه مع عمر...
اميمه..
وين اميمه!؟
قعدت طوبى دور عليها بعيونها بس ماقدرتش تشوف كويس لأن الصاله مظلمه..
لما قربوا اريج ونضال من الكوشه..
بدت ضوي شويه شويه..
وهني طوبى شافت اميمه..
مقعمزه بعيد ع طاوله فاضيه بروحها..
عيونها ع اريج ونضال..بس ملامحها ماكانوش واضحات كويس..
🍃ملامح الجمود..
مافيش اي تعبير ع وجهها..
اللي يشوف وجهها مش حيفهم هي شن تحس توا ولاشن وضعها..
حتى الدموع تحجروا في عيونها..
وكل شي بهت فجأة...
مشاعرها وقلبها..وكأت لون قلبها تحول من الاحمر للرمادي..
تشوف لنضال واريج كيف وصلوا للكوشه..
ويبانوا فرحانين هلبه..
ركزت ع ملامح الفرح اللي باديه ع وجه اريج..
تفكرت روحها كيف كانت فرحانه يوم بيانها..
تخيلت للحظه انها ناضت من مكانها ومشتلهم وخدت اريج من نضال وطلعت بيها من المكان كله..
خوف عليها من الجاي..
من اللي حتشوفه..
مش ساد اللي جاها هي..
مش ساده طيحة خالتها السودا..
حتكون حتى هي ضحية جديده لهالعيله المتجبره!؟
وهي تفكر في مستقبل اريج مع عيلة شنيبه..
امها كانت تشوف فيها وهي مقعمزة بعيد بروحها..
استغربت فيها وانتابها القلق في نفس الوقت..
🍃من جهة تانيه..
كانوا صابرين ونجاه بعيونهم مع البنت اللي تحمل
سرهم الخطير اللي حيوديهم في داهيه..
والزوز يفكروا..
كيف عترت عليها خديجه وين لقتها!؟
ماكانوش متفكرين ايناس كان هدا عرفوا الجواب طول..
☘☘☘
مشت نسرين لمغليه كلمتها بعدين ناضت معاها ومشوا للعرسان..
وصلوا فيهم...
مغليه بإبتسامه:اللهم صل ع النبي..الله يبارك الله يبارك..
نضال قرب منها وباسها ع راسها وهو يقول:يطول في عمرك ياشيخة العرب..
ضحكت مغليه..
نضال لأريج:عزوزتك تموت في المسلسلات البدويه..
اريج بضحكه غنت:اهلا بهالطله اهلا اهلا بهالعين الكحلا..
ضحكوا ومغليه قالت؛عطيك الهني..متفرجه ع راس غليص؟
اريج؛نحب القديم هلبه وعند في البدوي شويه سميرة توفيق والاردنيين وهكي..
نضال:خلاص حصلتي من يكسد معاك عليهم..
اريج "هدا شن قصده يانهاري المعكرش!"
نسرين بإبتسامه؛ فوتوا المسلسلات توا وخلونا في المهم..
مغليه:صدقتي..
قربت منهم فردوس وهي تتفرج عليهم..
عطت مغليه السوليتير لنضال..
خداه منها وقال؛هاتي اليسار..
اريج:يسار شنو!؟
نسرين:نضال في العرس هداكا..
نضال؛لاهي توا مراة متزوجه ومتسميه علي راجل تلبسه في اليسار..
فردوس بإبتسامه؛عنده الحق بنتي..
نضال بإبتسامه؛ربي يخليلي نسيبتي..
ضحكت فردوس..
مغليه بإبتسامه؛خلاص بنتي سايريه..
مدت يدها اليسار وقالت:هاك..
خداها وهو يضحك ولبسها الخاتم..
بعدين قبل يدها..
هي ضحكت بخجل..
وتعالت اصوات الزغاريد في الصاله وصياح البنات...
نسرين قالت لخوها ؛تريس ع روحك نضال..
ضحك وقال؛حاضر..
فردوس وهي تضحك مدت لأريج الدبله متاع نضال وهي تقول؛خودي اريج..
خدت اريج الدبله الفضه اللي كان شكلها مميز وقالت؛هات يدك ترا..
مد يده هي شدتها ولبساته الدبله متاعه..
وهو شد يدها وقبلها مرة تانيه..
🍃سدرة:يبيني نركبله..
ضحكت طوبى..
والقاعه كذلك انقلبت صياح وزغاريد وشغلوا اغنيه ليبيه مشهورة وقتها...
ناوي هالعام..
اول ماسمعها نضال بدي يغني معاها وشد اريج وقعد يرقص ويرقص فيها..
نضال..
ناوي هالعام ياصحابي ناوي هالعام..
ناوي هالعام نهيج ومعاي المدام...
وقعدت ترقص معاه وهي تضحك..
والمصورة تصور فيهم فيديو وجوهم عاجبها ع الاخر..
والقاعة كلها بدت تصفق..
جتهم خديجه ونزلتهم للمسرح بش ياخدوا راحتهم..
وهما انطلقوا ع الاخر..ونسوا ارواحهم..
نضال..
ناوي وبجد نهيج والدبله في اليد..
رفعوا الزوز ايديهم اليسار..
وهو مكمل وعيونه ع اريج..
ومعاي هاللي مكبد وجو يهبل ياسلام..
ياصحابي
واريج تحمست في الرقيص وقامت فستانها شويه وهي تحرك فيه يمين ويسار
ونضال يشوفلها وهو يرقص بإيديه شاف لوطا فنص عيونه بضحكه وقدملها وشد ايديها وهو يقول:شن لابسه في رجليك!؟
اريج بصدمه؛قصدك بان !.. حركت عيونها للحاضرين وهي تقول..حي ع الحشمه بعدين شبحتله وقالت..لبسته بش نتحرك ع راحتي شويه هلبه عليا قفطان كبير وكندرة كعبها سبعه ميترو!
هو قعد يضحك من قلبه وباس راسها وهي تضحك
☘آلاء:حي ع المتخلفه لابسة سبيدروا
طوبى وهي تضحك؛من بكري وهي تأفف من الكعب ومش عاجبها قفطانهم حسيتها بدير حاجه بس باهي جت في الريش
آلاء:ااخ منها اختي هادي لازم دير لقطه تحشمنا..
عقدت طوبى حواجبها وهي تشوفلها قالت؛مادارت شي يحشم ريحي روحك..
آلاء:تو تسمعي التعليقات..
شبحت طوبى لأريج ونضال وقالت:مش ساكتتلهم..
🍃🍃🍃🍃🍃🍃
وبعد عن اجواء الفرح..
في شارع القهوة اللي ساد عليه جو الحزن بموت مشتده ام فايزة..
الجارات عبوا شقتها..
وع راسهم عائشه وامها ونجمه وبناويتها ونبيله وباقي الجارات..
كانت فايزة حزينه حزن عادي اقوى من حزن الجيران بشويه..
اما بناتها حزنهم كان شديد بالذات تاله اللي انهارت لأن متعلقه بحناها وموتها صار قدامها..
طول الوقت امها حاضنتها ومابتش تخليها..
وجثة مشتده الهامده موجوده في دارها ع سريرها..
تراجي ولادها امتى يوصلوا وياخدوها..
بعد ساعه بالزبط من وفاتها كانوا واصلين التلاته..
مافي حد من سكان شارع القهوة عزاهم..
لسبب معروف...
ركبوا لشقة اختهم..
لاقتهم دخلتهم لحوشها..عزوا بعض عزي بارد ولاكأنهم خوت واللي ماتت امهم..
بعدين خشولها داخل..
في دارها..
لقوها راقده ع سريرها الرقده الاخيره..
تأسفوا لحالها لما شافوها..بس الضمير مانوجعش هلبه..
اصلا اللي يرمي امها في دار العجزة وينساها بعد ماتعبت عليه عمر بحاله لايمكن يكون عنده ضمير..
لفوها بالبطانيه..ورفعوها الثلاته وطلعوا بيها من الدار..
وفايزة وراهم وهي تشوف للبطانيه بألم ودموعها تنزل..
طلعوا من الشقه ونزلوا بيها لوطا..
وهي سكرت الباب وراهم..
بعدين مشت وقفت في الروشن وهي تراجي امتى يوصلوا لوطا..
وشافتهم..
دخلوها لسيارة واحد فيهم من الخلف...
بعدين ركبوا سيارتهم وتحركوا..
وهي قعدت تبكي...
🍃قدام مطعم ربيع..
عبد القيوم بأسف:وانا اللي كان في بالي ان ماعندها كان هالبنت ...طلع عندها ثلاثه رجاله...ثلاثه...مافي واحد جي نهار طل عليها ولاخداها باتت عنده يومين..!
ربيع تنهد وقال:هادي الدنيا ياتارقي هكي ولت ياجاري..
تنهد عبد القيوم وقال:اللهم جيرنا..
☘☘☘☘☘
في الصاله..
كانوا العرسان ياخدوا في صور مع عائلاتهم..
صوروا في الاول نساوين عيلة الواعر معاهم..
قبل ياخدوا فقدوا اميمه..وقعدوا يدوروا عليها..
قالتلهم وحده من العاملات..
"شفتها خاشة الحمام"
مطيره:تصور بعدين مع متاعينها..هيا صفيه..
هزت صفيه راسها ومشت مع مطيره بش يصوروا والقلق ياكل في قلبها ع بنتها..
🍃وهي كانت في الحمام..واقفه ع مرايه تساوي في مكياجها اللي خرب بعد مافسدوه شويه الدموع اللي نزلت..
بعد ماكملت شبحت للمرايه وقعدت تتصنع في ملامح القوة..
شن تبي خديجه من اللي داراته فيها غير انها تخليها مكسورة ومنهانه...
وهي مش حتعطيها هالفرصه زي ماعطيتها لغيرها زمان..
خديي شنطتها وطلعت وهي شاده عبايتها ..
لما وصلت للقاعه وخشتلها رسمت ع وجهها ابتسامه ثقة.
ومشت ناحية العرسان..
شافتها طوبى وهي جايه..
قعدت معاها بعيونها لين قربت منهم..
سألتهم:صورتوا.؟
سدرة:ايه..انتي لحقي صوري مع متاعينك..
هزت راسها ومشتلهم..
شافت مغليه واقفه بين اريج ونضال..
حدا نضال خديجه..وحدا اريج نسرين مشت اميمه وقفت جنب نسرين..
شبحتلها خديجه بطرف عينها وهي مستغربه ردة فعلها..
شويه جو البنات الصغار جوري وسدرة بعد مانادتهم حناهم..
وقفوا قدامهم..
خديجه غيرت عيونها لنجاة وصابرين لقتهم يشبحولها ابتسمت واشرتلهم بيدها يجوا..
هما الزوز شبحوا لبعض ..
نجاة؛نوضي صابرين..
صابرين خدت نفس وناضت..
ومشوا هما الزوز وهما رافعين عباياتهم شويه بإتجاه الكوشه..
وصلوا فيهم..
نضال كان يشوف لنجاة بطرف عينه وهو مش طايقها..
فجأة..
"صابرين"
غمضت صابرين عيونها بعدين ابتسمت وفتحتهم والتفتت وقفت جنب العيله واشرت بيدها ع البنت اللي نادتها.
ضحكت البنت وقالت:قداش الدنيا صغيره ماتوقعتش نشوفك بكل بعد هالسنين!
نسرين وهي تشوف لصابرين بإبتسامه مصطنعه؛تعرفوا بعض..
كيف جت صابرين بترد..
ردت البنت وقالت:كنا نخدموا مع بعض في مصحة قبل الاحداث وكنا اعز صاحبات واسرارنا عندي بعض..صح صابرينه!؟
صابرين "الله ياخدك" بإبتسامه مزيفه قالت:صح..
ونجاة تشوف لخديجه بطرف عينها لقتها تشبح للبنت وهي مبتسمه ابتسامه ماريحتهاش..
واضح انها عارفه كل شي..
نضال؛باهي اجلو الهدرزة لبعدين هيا خوديلنا هالصورة وخليني نتسقد ع حالي..
تنهدت اريج وقالت:حتى اني مليت واني واقفه هيا معليشي..
المصورة فنصت في قريبتها وقالت؛سامحونا معليشي..
شبحلتهم وحطت الكاميرا ع عينها بعدين خدتلهم صوره..
وخرت وقالت:ربي يهينكم..
نزلت مغليه وهي تقول:هي خلاص هداكا 11بتضرب..
خديجه:تمام تو نكلمهم..
ومشوا للطاولات كلهم ماعدا نسرين اللي قعدت واقفه تشوف للعرسان..
نضال:نهدرزوا بعدين..وغمز بعينه..
اريج غمزت بضحكه وقالت..اوكين..
ضحك وهو عاقد حواجبه:اوكين!..تشن هالبنت هادي..
وشاد راسها وباسه..بعدين قال..تشاويتو..
اريج بضحكه:سلام..
ومشي بسرعه بيطلع وخديجه شافاته ماشي مشت معاه..
نسرين بضحكه؛يابختك بنضال..
اريج وهي ترمش في عيونها بغرور مصطنع:ويابخته بيا..
ضحكت نسرين..
جتهم طوبى وقالت وهي مبتسمه؛هيا اريج..
اريج؛هيا هي سخنت نبي نغيره..
ونزلت اريج مع طوبى..
نسرين؛بتروحي لحوش اختك؟
طوبى:لالا لحوشي..
هزت راسها وقالت؛تمام..
ابتسمت طوبى وخدت اريج ومشت هي وياها..
ونسرين معاهم بعيونها بعدين غيرتهم لأميمه..
مشت ناحيتها ووقفت عليها وقالت؛شن جو؟
اميمه ابتسمت بتصنع وقالت:تمام..
نسرين بإبتسامه؛كليتي الجو كله اليوم..
رفعت حواجبها ونزلتهم وهي مبتسمه بعدين قالت؛اختيارك السبب..
نسرين؛لاياعمري قالب غالب..
هزت راسها وهي توزع في نظرها ع المكان بإبتسامه وقالت:شكرا..
حست نسرين ان اميمه مش ع بعضها..بس مابتش دقق..
غيرت عيونها عنها ووزعتها ع الحضور لين جو ع البنت وهي واقفه ع صابرين وتهدرز عليها..
🍃صابرين؛اطلقت..
؛ان شاء الله مايكونش هداكا السبب!؟
بإستغراب قالت:من هداكا؟
:هداكا اللي كان صاحبك زمان ولد عيلة شنيبه..
تنفست صابرين بقوة وقالت؛لاهديكا قصة قديمه ومشت ع حالها..حتى تزوج هو ويحب مرته هلبه..واتي توا متعرفه ع واحد تاني يجنن..
:اها..ربي يعوضك بيه خير..
صابرين:آمين..
ناضت نجاة وقالت:هيا صابرين بدوا يطلعوا..
صابرين وهي مبتسمع غصب قالت؛صدفة حلوة نتلاقوا مرة تانيه..
وهربت منها هروب مشت خدت جوري ومشت...
ونجاة مشت وراها..
وهي معاهم بعيونها تشوفلهم بنظرات متهكمه..
🍃وهما ماشيات..
صابرين:نجاة انتي ماكنتيش في الصورة..يعني انتي ماتعرفي وماتندري ع شي تمام..
نجاة:وكان سألت علاش درتي هكي!.
صابرين:خلي الموضوع عليا اني بس وخليك عاديه ماتعرفي شي ولاتندري ع شي..
تنهدت بخوف وهزت راسها وهي تقول؛حاضر..
☘☘☘
وطلعوا نساوين عيلة شنيبه للسيارات..
في سيارة المهدي..
المهدي وهو يسوق:يام..خالتي مشتده توفت..
مغليه بفجعه؛لاحول ولاقوة الا بالله! امتى؟
المهدي:والله ماني عارف بالزبط..
مغليه بأسف:الله يرحمها ويغفرلها مسكينه..
وقامت تليفونها بتتصل بخديجه تخبرها..
🍃وخديجه في سيارة نسرين..
تفكر في ردة فعل اميمه الغريبه...
المراة تبان عاديه جدا ولاكأن صارت حاجه تهدرز وجوها مليح..
اميمه:ايه زبطتها بنتها تشبه عمتك هلبه..
نسرين؛ايه واللي معاها هادي بنت عمي متزوجه في الزاويه..
اميمه:ماشفتهاش في العرس..
نسرين:كانت عندها حالة وفاة في عيلة راجلها..
اميمه؛اها..
فرح:امي بطنك بدت تبان..
نسرين وهي تحاول تخفي ضيقها؛حسيت بيها.
راما؛حامل خالتي!؟
نسرين:ايه حبيبتي.
راما:مبروك..
بمسايرة ردت:الله يبارك فيك..
راما:حتى مرت خالي المهدي نحس فيها حامل..
شبحتلها اميمه..
نسرين:كيف حسيتي؟
راما:ترجع هلبه..وتنقرف لما تشم ريحة الماكله..
خديجه:واضح اصلا وهي دسدس..
نسرين؛وعلاش بدس؟
خديجه؛وين نندري عليها ياحنه بالك خايفه ناخدوها بالعين اللي حملت بعد هالسنين..
فرح:ايه صح خالتو مرت خالو المهدي دس ديما زي مرة لما خدوا فلوس المنحه وماقالتش عليهم لين قال خالي..
خديجه بتهكم:مسكينه..اللي نصرف فيه ع روحي في شهر يساوي فلوس المنحه اللي دس فيهم...جو الجعانات هدا سنين عاشت في العز وماتغير فيها شي..
نسرين:تمام خديجه خلاص غيري الموضوع..
خديجه:لامانيش مغيراته بنطلع اللي في خاطري خير مانتبلغم...من اللي جابها عيشه هادي من اللي خلاها تعيش عيشه عمرها ماتحلم بيها غيري اني.. بعد وصلت في خوي واول من ولت عليه اني..لكن اني الغالطه نستاهل..هادي اخرت مناسبة الجرب الفقريات..
اميمه بكل قوتها كانت تحاول تتحكم في اعصابها ماتبيش تعطي فرصه لخديجه تستفزها وطلعها عن طورها.
وباهي لرن تليفونها بش سكتها..
طلعاته من الشنطه وقالت؛اكيد محي..
نسرين:حضر العشي؟
خديجه:ايه..وشافت للتليفون وقالت بإستغراب:امي..
فتحت الخط وردت:ايوه يام.....ايه......بأسف وصدمه قالت..لاحول ولاقوة الابالله!..
شبحولها اميمه ونسرين اللي قالت:شن في!؟
خديجه:تمام يام تمام...وسكرت وهي تقول...خالتي مشتده توفت..
اميمه بفجعه:لاإله إلا الله!
نسرين بألم:الله يرحمها ويغفرلها..ارتاحت..
🍃🍃🍃🍃🍃
وفي طريق تانيه..
سدرة بصدمه:امتى!؟
لطفي وهو يسوق قال بضيق:بعدا اذان العشاء بساعه..
مطيرة حطت يدها ع فمها وقعدت تقول ببكي:ياروحي عليها..الله يرحمها مسكينه..
سدرة ودموعها في عيونها:بوي بنروحوا الليله غادي..
لطفي:اكيد..غير نبيكم تروحوا لحوش فردوس تغيروا ونروح بيكم طول..
سدره هزت راسها وقالت:ايه ايه صح..
☘وروحوا ع حوش فردوس..
سدرة ومطيره اللي جو مع لطفي.
وصفيه وفردوس وبناتها اللي ركبوا مع حسين..
اما طوبى وغرفه روحوا مع رجالتهم...
🍀الجالي:مش عارف اتصل ربيع خبرنا..
طوبى ودموعها ينزلوا:الله يرحمها ويصبر فايزة وبناتها يارب..
الجالي:آمين يارب..تي هي تريحت مسكينه الزهايمر عذبها..
طوبى بنبرة باكيه:ان شاء الله تكفير ذنوب..
الجالي هز راسه بعدين قال؛تبي نروحوا لحوشنا ونرفعك غدوة ولا نروح بيك ع شارع القهوة؟
طوبى:روح بيا ع شارع القهوة مانقدرش نعطل ع فايزة..
الجالي:تمام..
🍃🍃🍃
وفي حوش فردوس..
الكل مسحوا مكياجهم وغيروا لبسهم..
بعدين تسقدوا لطرابلس مع لطفي وحسين..
اما طوبى وغرفه..
بعد روحوا اللي ع حوشها واللي ع حوش شيابينها..
غيروا هيئتهم وتوجهوا لشقة فايزة..
طبعا طوبى مشت مع اميمه وحمواتها غادي..
🍃🍃🍃🍃
وصلوا سدرة واللي معاها بعدهم بوقت..
وين خشوا للشقه..
سدرة نادت؛فايزة!..
فايزة لما سمعت صوتها ناضت طول ومشت تلقتها..
حضنتها وقعدت تبكي..
وسدره ضمتها وهي تبكي وتقول:عظم الله اجرك..
فايزة ببكي:اجرنا واجرك يارب..
مطيرة ببكي:الله يرحمها مسكينه ان من حفرتها لجنتها..
تباعدت فايزة عن سدره وجت لمطيره وضمتها..
ومطيره حضنتها وهي تقول؛كلنا ليها بنتي كلنا ليها ماقاعد كان وجه ربك..
فايزة بنبرة باكيه:لاإله إلا الله...
🍃ومرت هديكا الليله طويله ع شارع القهوة..
مشتده من نساء شارع القهوة القدم واللي صار فيها مع موتها اكيد حيأثر في ناس شارع القهوة..
بدات النساوين اللي من جيلها..
زي مطيره ومغليه وصفيه ونجمه وعتيقه وغيرهم..
وهديكا الليله خطرت ع اغلبهم موتة وردة احسن نساوين شارع القهوة في زمانها..
سدرة المنتهى تفكرتها وكأنها صارت اليوم...
وانهارت بالبكي...
مغليه وهي تبكي:خيرك ياسدرة شن جاك اهي صاحبتك جنبك صابره!؟
سدرة ببكي:تفكرت امي ياخالتي تفكرت كيف ماتت..اني كنت حدا امي في اخرلحظاتها..شبحت لطوبى وقالت..ومعاي طوبى.
وطوبى تشوفلها بألم ودموعها ينزلوا..
سدرة وهي تبكي:اخر من قالت اسمها...طوبى..
غمضت عيونها طوبى عيونها بألم..
سدرة ببكي:وهي طلع في الروح وصتني عليها...اااه..حسبي الله ونعم الوكيل في اللي كان السبب والله ماني مسامحاته لين نموت..
وغرفه كانت منزله راسها وهي تبكي وقلبها واجعها.
ونبيله تشوفلها بحزن..
وفردوس تبكي بالعبره..
والعروسه اللي كانت قبل شويه ترقص توا تذرف في الدموع بألم
وكل الموجودات كانوا متأثرات لأبعد حد..
مطيرة رشفت وقالت؛الله يرحمها ويرحم مشتده ويجعل مكانهم الجنه يارب..
كلهم باصوات متقطعه قالوا؛آمين...
🍃ووصل الليل لأخر ساعاته..
ماقعدش في حوش فايزة غير سدرة ومطيره وصفيه ..
والباقي روحوا...
وباقي هالساعات عدوا ع طوبى وهي تصلي في القيام وتدعي لأمها وهي تبكي..
صوت بكاها مافيقش الجالي اللي كان غارق في نوم عميق..
لكنه مع سكون الليل..وصل لمسامع التارقي
اللي كان مقعمز في الدار اللي يمارس فيها في هوايته..
خشلها بش بياخد منها الدفايه..
بس لما سمع صوت بكاها قاعد واقف في مكانه ورا السيرانتي وهو يسمع فيه..
هو نفسه مش عارف علاش قعد واقف يسمع...
صوت بكاها كان مؤلم وموجع..
بكي حد كان دافن حزن عميق في داخله وطلعه الليله..
تنهد بحزن وقال:الله يكون في عون عباده..
وخدي الدفايه ومشي طلع من الدار...
🍃🍃🍃🍃🍃
تاني يوم..
كانت الجنازة بعد صلاة الظهر..
واغلب رجال شارع القهوة حضروها..
وطبعا كانوا غادي ولادها والاقارب..
الصدمه تلقوها جيران فايزة.
ان خوتها مخبرين الاقارب انهم عانوا امهم وهما يتبادلوا عليها لين توفت..
وين وصل هالكلام لمسامع علي الواعر ثار غضبه وهو يقول..
هالكذابين البصطارديه..امهم لما جاها الزهامير لوحها في دار العجزة خدتها بنت من غادي وعانتها لين ماتت..المراة ماتت في حوش بنتها وهما سمعوا بموتها زي البرانيه..
:معقوله!؟
محمد شنيبه:مزبوط كلام الحاج علي..
لطفي؛كان مش من بنتها راهو ماتت في دار العجزه ومافي حد يندري عليها..
🍃وهالكلام انتشر بين الرجاله..
وتحاصروا خوت فايزة بنظرات الازدراء والكره طول الجنازة..
هدا علاش بعد مادفنوها خدوا بعضهم وروحوا طول...
وموقفهم هدا..
خلا الناس تتوجه لحوش فايزة بش تعزي..
يعني عزي مشتده دارته بنتها..
وولادها ماصدقوا وتنصلوا من كل شي..
مستخسرين يصرفوا حتى ع عزاها...
🍃🍃🍃🍃
بعد العصر..
ولأن شقة فايزة كانت صغيره..
استقبلت المعزين في حوش لطفي الواعر اللي كان ديما مفتوح لفايزة في كل الظروف...
وبناتها مع بنات عيلة الواعر كانوا يعولوا..
ومعاهم عائشه اللي ماقعمزتش بكل...
وفي عز الهم والحزن..
خديجه تراقب في اميمه ودمها محروق من برود اميمه ماتوقعتش تكون هادي ردة فعلها بكل...
🍃واميمه اللي كان يد بيد مع العواله..
وقفها شويه الاتصال اللي جاها..
طلعت تليفونها من جيبها وشافت المتصل...
Capitan يتصل بيك..
قعدت تشبح للشاشه لين فصل..
حطاته صامت ورداته لجيبها..
بعدين خدت سفرة القهوة ومشت طلعت..
ع جية فايزة ووقفتها وقالت:شفتي تاله..
اميمه:لا..
فايزة بخوف:وين مشت!؟
اميمه خافت حتى هي ومشت بسرعه بالقهوة بش تفرقها..
وفايزة خشت للكوجينه لقت طوبى واريج فوسطها يعولوا..
فايزة:يابنات ماشفتوش تاله؟
شبحوا لبعضهم وقالوا:لا..
فايزة بخوف شديد:ياحليلي البنت وين مشت!؟..
ومشت طلعت للجنان وهما سيبوا اللي في ايديهم وطلعوا يدوروا معاها..
فايزة:تاله...تاله بنتي!..
وطوبى واريج يدوروا في كل تركينه مالقوهاش..
رجعوا تلاقوا مع فايزة لما لفوا ع الحوش..
فايزة وهي بتبكي:يانهاري الاسود البنت وين!..
ع طلعة صفاء ومروة وهما قالقات..
صفاء:مالقيتوهاش..
فايزة ودموعها ينزلوا:لايايامي السود..البنت ركبتها حاله نفسيه..
طوبى وهي تفكر قالت؛اكيد روحت للشقه..
مروة:ايه صح..
ومشت فايزة تجري طلعت من الحوش وبناتها وراها..
اريج بألم:يقعطوا القلب..
طوبى بحزن:بالذات تاله صغيره هلبه هالموقف اللي صار معاها حتقعد عمرها كله وهو مأثر فيها بقوة..
🍃وفي الشقه...
خشوا البنات وامهم..
ومشوا طول لدار مشتده...
وين خشولها..
شافوا تاله راقده ع سريرها وهي شاده خاتمها اللي كان اخر مالبست حناها..
وفي جنبها مشطها وعطرها وحداديها اللي كانوا ديما في ايديها ماتحولش فيهم الا وين تجي دوش..
وهديكا الليله حولتهم ومعاش لبستهم..
فايزة ودموعها ينزلوا بألم:تاله بنتي.
وتاله تشبح في الفراغ ودموعها ينزلوا..
وخواتها متأثرات ع الآخر..
مشت فايزة خشت للسرير..وضمت بنتها من الخلف وباست راسها.
تاله بنبرة باكيه:ماما مش قادرة ننسى عيونها لما شبحتلي ياماما قاعده نشوف فيهم..
ضمتها امها بقوة وهي تقول:ياعمري..
صفاء قدمت وقعمزت حداها وهي تقول:تولي...حنينه ماتت احلى موته وهي تشوفلك وتسمع في القرآن عارفتيها قداش تحبك..
تاله:واني نحبها هلبه..ياريت اللي نحبوهم مايموتوش بكل..
صفاء قعدت تبكي..
ومروة معاها..
وفايزة تفكرت كيف مات احد..
تفكرت روحها كيف كانت تحاول تنقذه من الموت..
بس امر الله نفذ وساعة احمد ماتأخرتش دقيقه زياده..
دفنت وجهها في رقبة بنتها وقعدت تبكي بالصوت..
تاله؛ماما!..
لفت عليها وحضنتها..
وفايزة ضمت بنتها وقعدت تبكي بكل جهدها..
بعدين هدي شويه بكاها لما حست بدفي حضن بناتها..
االلي ضموها مع بعض...
حن البنات وعطفهم اللي مايتعوضش واللي يملكه ملك اغلى النعم في الدنيا..
في هديكا اللحظه دعت فايزة في قلبها ومن قلبها..
"يارب ماتحرمني منهم ولاتخلي عيني تبكي عليهم كان دموع الفرح"
☘☘☘☘☘
الساعه7:30مساءا..
خشت نسرين ع اميمه الكوجينه وهي تغسل في الماعين مع بنات الجيران قالت:اميمه..
التفتت شبجتلها..
اشرتلها تجي..
سيبت اميمه اللي في يدها بعدين مسحتهم في فوطه ومشتلها..
طلعت نسرين برا..
واميمه طلعت وراها..
نسرين:اميمه وين تليفونك؟
اميمه ببرود:في جيبي..
نسرين بتعجب:في جيبك!؟ حطتيه ع الصامت!؟..
اميمه:حطيته بعد ماعمر اتصل..
ضيقت عيونها وقالت:علاش..
اميمه:مش فاضيه بعد نكمل تو نكلمه..
نسرين بإستنكار:شن تقولي اميمه راجلك مروح من سفر ويبيك تروحي سيبي اللي عندك وروحيله..
اميمه:واني قلت..بعد نفضى تو نكلمه..
عقدت نسرين حواجبها وشبحتلها من فوق لتحت وقالت:خيرك تتكلمي هكي!؟
اميمه؛خيرني كيف نتكلم!؟
نسرين؛اسلوبك سوقي وتافه..
رفعت اميمه حاجبها وقالت:خليني ساكته..ماتخلنيش نطلع اللي عندي ونهر الشكاره..
نسرين بصدمه؛شن تقولي انتي!؟
اميمه:نسرين بتزيدي كلمة تانيه نديرلكم فضيحه هكي كبرها..
ورفعت ايديها وهي موسعتهم عن بعض..
قعدت نسرين تشبحلها بصدمه..
وهي رمقتها بنظرة حاده بعدين مشت خشت للكوجينه..
قعدت نسرين واقفه في مكانها للحظات وهي مصدومه..
بعدين مشت بعصبيه..
وقفت في الصاله اشرت لخديجه بعيونها ومشت..
خديجه طول ناضت وطلعت وراها..
لقتها ماشيه لفم الباب تلبس في حذائها وهي معصبه..
جتها وهي تقول:خيرك..
نسرين بغضب:نروحوا ونقولك..
لبست خديجه في رجليها والزوز مشوا طلعوا من حوش لطفي..
قصوا الطريق ..
وصلوا في حوش بوهم وخشوله..
الجالي كان مقعمز في الجنان يكلم في نجاة..
لما خشوا عليه سكر عليها..وقعد معاهم بعيونه وهو يشوف فيهم كيف يبانوا مش ع بعضهم..
خشوا داخل الحوش..
خش وراهم..
خديجه؛خيرك شن صار!؟.
نسرين وهي تحول في وشاحها بعصبيه:انتي اللي نبيك تقوليلي شن صار..
وخشت الصاله ووراها خديجه والجالي..
لقوا عمر مقعمز داخل حاط رجل ع رجل وهو يهز فيها بعصبيه..
الجالي:خيركم شن في!؟
نسرين شبحت لخديجه وقالت؛اميمه من امس من عند لما تمت الحفله حسيت جوها تلخبط شن قولتيلها بش طلعتيها عن طورها وخلتيها تكلمني بأسلوب زفت وقالت...خلي ساكته خير مانهر الشكاره ونديرلكم فضيحه..
خديجه:شن قصدها!؟
ناض عمر وقف وهو يقول بصدمه؛هي هكي قالت!؟
نسرين:ايه عاودتيهالي مرتين..
الجالي بعصبيه وتوتر:شن تعرف هادي!؟
عمر بإستغراب:كيف شن تعرف!؟
سكتوا التلاته وهما يشبحوا لبعض..
عمر:واحد فيكم يرد عليا..
الجالي:انت مش حاكيلها شي!..
عمر:مستحيل..
الجالي شبح لخديجه بخوف..
عمر هز راسه وهو معصب:توا نخليها تجي هني بروحها وطلع اللي عندها..
اتصل بأمها...
نادي مرتين وفتحت الخط..
عمر:ايوه عمتي صفيه..الحمد لله الحمد لله..عمتي قولي لاميمه تروح توا...توا نبيها في الحوش..تمام نراجي فيها...
🍃سكر عمر من صفيه اللي خلاها ترعش مع بعضها..
ومشت طول لأميمه في الكوجينه..
وقفت في الفم وقالت:اميمه تعالي..
شافت اميمه لأمها لاحظت ان وجهها شاحب..
طلعتلها وهي تقول:نعم..
صفيه:وين ملوحه تليفونك..! راجلك اتصل بيا وقالي قوليلها تروح توا..
خدت نفس بعدين هزت راسها وقالت:باهي..
ومشت وامها وراها تقول:شن صاير يابنت قولي من امس واني حاساتك مش مزبوطه..
وصلت اميمه في الشماعه.
خدت بالطوها ولبساته وسكراته كله وهي تقول:مافي شي يام..
ومشت لبست كندرتها وطلعت..
صفيه بقلق:لا في حاجه كبيره صايره! يارب سترك..
🍃وطلعت اميمه من حوش عمها لحوش شنيبه..
وهي عارفه لشن ماشيه..
ماشيه تكتب اخر سطر في تجربة زواجها الفاشله المريره...
#اواخر_الشتا
#طوبى
...يتبع....
(اللي يقولوا ان الاحداث عاديه وقاعده تمشي ببطء العادي هدا مهم جدا لو اختصرته الحدث المهم مايبداش ليه معنى بعدين ومش حتحسوه نهائي ولاحتفهموه كويس.
رجاءا ماتستعجلوش)
