# طوبى "شارع القهوة"
#جمان_فريد
#الجزء_الثامن_والعشرين" قبل العاصفه 5"
الله أكبر..الله أكبر..لاإله إلا الله
الله أكبر الله أكبر ولله الحمد...
أحيوا سنة التبكير في هذه العشر المباركه..
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
الساعه 1:00بعد منتصف الليل..
انفتح باب الحوش..
وخشوا الثلاثه...
الأب وولاده الزوز..
وكان واحد منهم في حالة انفعال..
الجالي:اقسم بالله عمري ماشفتها..والله يابوي مانعرفها .
محمد بغضب:حطيتي في موقف لين نموت ماننساه..
غمض الجالي عيونه بنفاذ صبر وقال:لاإله إلاالله!
المهدي وهو عاقد حواجبه بإنزعاج؛خلاص برا انت اركب لدارك..
محمد:ومعاش تخليني نشوف وجهك..
ومشي من حداهم..
الجالي:والله يامهدي والله ومستعد نحلف ع مصحف عمري في حياتي ماريتها..والله القصه زي ماحكيتهالكم بالزبط والله مازدت ولانقصت منها حرف..
المهدي:مصدقك..وواضح ان الموضوع مدبر..
الجالي:وهدا اللي نبي نفهمه لبوي بس هو شي مش مقتنع تقول مش عارفني مش ولده اللي مربيه..!
المهدي:تو يهدا ويصدق..بس انت في نفس الوقت شوف اللي حواليك اعرف من فيهم يبي يشوه سمعتك اكيد في الخدمه..
الجالي قعد يفكر وهو يقول:وارد..
بعدين شبح للمهدي وقال..علاش جبت معاك هداكا؟
المهدي:طاهر خوك مش هداكا..
الجالي بتهكم:قالك خوي!..ماشفتش كيف يشبح بشماته..
المهدي:لاشفته كيف كان خايف عليك بس..الخبر وصلني من بوي وهو كان عندي وقتها الخوف اللي شفته منه عليك اكثر من بوي نفسه..
ابتسم تهكما وقعد ساكت..
المهدي:ع العموم مشت ع خير..واحمد ربي اللي مسخرلنا ناس في الدوله سكروا المحضر وتكتموا عليه..
الجالي:اللي يسمعك يقول اني دايرها حق!
المهدي؛خلاص خلاص..برا اركب لدارك برا..تصبح ع خير..
ومشي بإتجاه الباب الفاصل..
والجالي اللي كان منقهر ع الآخر مشي ركب لداره..
اول ماخشلها وقف ع المرايه وقعد يشوف لشكل وجهه كيف مولي من الضرب..
ويتفكر في اللي صار معاه..
الضرب اللي انضربه..
الكلام اللي سمعه من الناس وضباط الشرطه..
البنت اللي ماقدرش يكذب ادعائها..
هزايب بوه ليه وكيف صدق فيه بسرعه..
انقهر لأن لأول مرة يصير معاه هكي ويبان بصورة زي هادي في موقف زي هدا...
انقهر لأن نظرة بوه ليه حسها تغيرت بعد هالموقف وهو كان الافضل في نظره من بين كل خوته..
كانت نظراته كلها غضب وهو يشوف للمرايه..
تعبوا بالدموع عيونه..
وشويه وتبدلت ملامح الغضب اللي ع وجهه لملامح بكاء..
وبدي يبكي..يبكي بدون مايطلع صوت..
مش متحمل شعور العجز والهزيمه..
مش متحمل تتشوه صورته في عيونه حد.. قعمز ع الكرسي وغطا وجهه بإيديه وقعد يبكي بقهر بدون صوت...
بكي بكاء عمره مابكاه في حياته..
شويه وهدا بكي وقعدت يمسح في وجهه وعيونه بعنف..
وناض بعصبيه ومشي للدولاب وطلع منه حوايج..
بعدين خش للحمام وسكره بقوة...
☘☘☘☘☘☘☘
تاني يوم..
الساعه 10:00صباحا..
مقعمزات يشربوا في القهوة اللي من مطحن"الزعيم"..
ويهدرزوا في موضوع شيق بالنسبه ليهم..
نجاة؛متوقعه انه يطلع منه..اني ماكانش هدفي انه ينحبس..فهالفترة اللي عشت فيها مع طاهر وعيلته من بوه عرفت كل واحد فيهم كويس ومنهم الجالي..الجالي يحب ديما يبان بمظهر بيرفكت قدام اهله والناس..وزبطت الحاجه هادي من شكله الخارجي..وبعدين تصرفاته وامه ديما تقول هو احسن خوته طباع واخلاق واللي يعرفه يحبه طول..
واني ضربت المكان هدا فيه..وخليته ينحط في احقر موقف ينحط فيه أي حد..بس اثره عليه حيكون قوي..حيحرقه ويقهره ولين يموت مش حينساه..
صابرين برفعة حاجب؛يستاهل مكثر واحد زيه متعجرف متكبر واهو خشمه اللي رافعه انكسر..
نجاة؛اني اكثر حاجه فرحتني ان طاهر حضر الموقف واكيد بيحط في باله انه حكالي كل شي وهكي وين نشوف مرة تانيه نحط عيني في عينه ونزيد نقهره بالشماته..
صابرين:من حظك جاتك هادي..
شربت من فنجان القهوة وقعدت ترقص في حواجبها..
فجأة صوت حمزة يبكي..
حطت صابرين فنجانها وقالت؛تو نمشي نجيبه..
وناضت بسرعه لدار النوم..
ونجاة تشرب في قهوتها بمزاج رايق..
☘☘☘☘☘☘
"اني شفته ولدك مضروب شن صار امس قولي"
محمد بملل؛داير عركه هو واحد ضربه الراجل شكي فيه شدوه مشينا اني والمهدي وحليناها ودي وولدك انطلق..
مغليه:ولدي مش متاع مشاكل اكيد هو اللي استفزه..
محمد:اللي هو..هي اني طالع وماتحسبونيش في الغدي بنتغدا عند خوي في زليطن..
مغليه هزت راسها وقالت؛حاضر..
مشي محمد طلع من الحوش..
وهي تنهدت وقالت؛ياناري ع وليدي..
ولفت ومشت للكوجينه..
🌻🌻🌻🌻🌻🌻
في كلية العلوم..
واقفة هي وصاحبتها تصور في شيتات..
غرفه؛تهبل الاغنيه هادي ترا ابعتيهالي..
:تمام افتحي البلوتوت..
غرفه؛مفتوح..
فجأة رن تليفونها..
كان رقم مبروك..
غرفه بتذمر؛وواك ياربي شن هاللصقه كل شويه يتصل درهلي كبدي..
:شكله كبد المسكين.
غرفه بإزدراء:ااع....مانيش راده قاعده في المحاضرة..
وقعد يرن لين فصل..
غرفة:هي ابعتي الاغنيه..
بعتتلها صاحبتها الأغنيه..
:وصلاتك..
غرفه:Yes,thanks
:تفضلي ياأبله..
قدموا الزوز خدوا شيتاتهم وطلعوا..
بعد ماطلعوا وصلت رساله لغرفه..
شافتها..لقتها رساله تحويل رصيد خمسة دينار..
ضحكت وقالت:يحساب ماعنديش رصيد نعاود قداش اهبل..
:مكبد وطايح ع وجهه..
غرفه بضحكه؛خل نزيد نهبله..
وبدت تكتبله في رساله وبعتتها..
صاحبتها شافت شن كتبت قعدت تضحك..
☘هو كان مقعمز في الكوجينه ع البساط متاعه وقدامه سفره في طاجين دحي شكشوكه هو ياكل منه..
وصلاته الرساله..حط الخبزة..
وقام التليفون وقعد يفتح فيها بيده النظيفه وهو ياكل..
فتحها وبدي يقرا..
(شكرا هلبه بيكو ديما تصرفاتك ديما قمة الذوق تحرج فيا)
ابتسم وهو يتخيل فيها تقول في الكلام هدا..
وقلبه بيفر..تنهد بعدين مسح يده في الفوطه وبدي يكتب..
وبعتلها..
☘هي كانت ماشيه الكافتيريا مع صاحبتها جتها الرساله..
غرفه؛عشش..
ضحكت صاحبتها..
فتحت الرساله..
(لاتنحرجي لاشي مادرت شي قوليلي نجيك اليوم عادي؟)
غرفه:امممم...تعالى اهو نحصل من وراك حويجه نكسد عليها في الحوش..
ردت عليه طول..
☘هو جاه الرد فرح قريب طار..
حط التليفون ع تركينه..وطاح ياكل في الدحي كأنه عمره ماكلي..
ع خشة اخته شبحاته وقالت مبروك مش هكي عاد ياسر ماتشوفش في روحك كيف وليت..
مبروك وهو ياكل؛ترا زيدي طرفين جبنه شرايح..
؛مبروك!
ع خشة امه:قاعد وليدي؟
مبروك:بالله يام طرفين جبنة شرايح..
:حاضر وليد حاضر.
اخته:يام مش هكي عاد ماتساعديشي ع الخراب..
مبروك بلع وقال؛بالله بري شوفي كان عندك محكمه ولاقضيه والهي بيها وطلعيني من دماغك..
امه جاته بطروف الجبنه وقالت؛كول ولدي ماتعدلش عليها تبيك تولي زيها جلده ع عظام..
تنهدت بيأس بعدين مشت طلعت من حداهم...
☘☘☘☘☘
"خودي سديرة"
سدرة؛هذا شني؟
فايزة:حقك اجار الحوش ومعاهم اجار المزين اعطيه لإقبال ولاسعاد كان تشوفيهم...
سدرة:باهي هاتي اجار المزين وخودي الباقي اني مانبي شي ولاطلبت منك شي.
فايزة:تعرفي ياسدرة كان ماخدينهم نطلع منه اليوم اني وبناتي.
سدرة بآستغراب:خيرك شن جاك يامراة؟ سمعتي كلام من حد؟!
فايزة:لاوالله ماسمعت حاجه من بنادم..بس اني هكي نرتاح ياسدرة بالله عليك وخيتي خودي فلوسك..
سدرة:تمام..الحوش حوشي بنأجره باللي نبيه..
وقعدت تعد في الفلوس و وخدت منهم مية بس والباقي مدتهم لفايزة وقالت..نبي ميه بس كل شهر..وفلوس المزين عطيهم للبنات بروحك نهار الخميس بيجوا يسهروا عندنا..
فايزة تنهدت وهي تشوف لسدره بعدين خدت الفلوس وقالت؛
بترجعوا لسهريات كل خميس؟
سدرة بإبتسامه؛مافيش احلى منها تتفكري في هديكا الايام..
فايزة بإبتسامه؛ايه..تمام اني توا ماشيه للمزين غدي البنات عندكم سديرة..
سدرة؛وتو نبعتولك غدي للمزين..
فايزة:تسلمولي يارب..
ولفت ومشت وهي تقول..بالسلامه..
سدرة؛بالسلامه..
ومشت سقدتها...وبعد ماطلعت..
هي ولت خشت داخل..
لاقتها عمتها وقالت:طلعت فايزة؟
سدرة؛ايه طلعت..
مطيرة؛قبل بندوي معاها في هداكا الموضوع.
سدرة:فوتيه عمتي انسيه فايزة مش حتتزوج بعد احمد ع الاقل حاليا..
ومشت من حدا عمتها وهي تقول:بناتها بيروحوا يتغدوا هني..
وخشت دارها بش بتبدل وتمشي للمدرسه..
مطيرة:واني صكرت راسي وبنكلمها ..
ومشت بطريقها للكوجينه..
☘☘☘☘☘☘
في كلية العلوم..
تحديدا الكافتيريا..
في محل صغير يبيع في الاكسسورات..
غرفة وصاحبتها كانوا فيه..
غرفه:حلوة الساعه هادي عجبتني هلبه..
:اسألي ع حقها ترا..
شبحنت غرفه للشاب اللي يبيع وقالت:بكم هادي..واشرتله عليها..
هو قال:ب80
عقدت غرفه حواجبها وقالت:غاليه..
:واني فلوسي مايسدوش ان شاء الله تقعد لغدوة...
غرفه قعدت تشبحلها وهي ساكته..
رن تليفون صاحبتها شافاته وقال:ريفو جي سلام توا..
ومشت طلعت بسرعه..
وغرفه قعدت تشبح للساعه وخاطرها فيها..
والمصروف الشهري اللي تاخد فيه من بوها معاش قعد منه هلبه..
تنهدت بضيق ومشت طلعت من المحل ومن الكافتيريا بكل وعقلها عند الساعه..
فجأة رن تليفونها..
شافت المتصل..كان رقم مبروك..
قعدت تشبحله وهي تفكر..
بعدين ابتسمت ابتسامه خبيثه..
ومشت طول ...
☘وهو كان مقعمز يراجي فيها في نفس المكان..
وجايب معاه كيسة معبيه شكولاته بأنواع مختلفه..
قعد يشوف في الجهة اللي تجي منها لين بانت عليه..
لابسه ماليه حمرا خريفيه لعند الركبه وتحتها سروال جينز ووشاح مخربش احمر في الاسود..
وشنطه سودا وبوت اسود معب سميك..
كان يتأمل في طلتها الحلوة...عجباته هلبه...بش في نفس الوقت ضايق لأنه حس بالغيره عليها..
لما قربت توصل فيه ابتسمت الابتسامه اللطيفه البريئة زي ماهو يشوف فيها...
وبنبرة الطف قالت:اهلا بيكو..
ناض وقف وصافحها وهو يقول بإبتسامه وقلبه قريب يطلع من مكانه:هلا بيك..قعمزي..
قعمزت وهو قعمز معاها..
حطت الشنطه ع رجليها وقالتله بإبتسامه؛شن جوك؟
مبروك؛لما شفتك ولى حلو..
دارت روحها تحشمت..
وهو ابتسم وقالت؛شن جوك انتي؟
غرفه:جو التنزيل وتصوير الشيتات ناخدوا من الطلبه اللي قبلنا ونصوروا بش نبدوا قراية اول بأول..
مبروك بإبتسامه:ربي يفتح عليك.. غرفه بإبتسامه؛شكرا..انت شن جو خدمتك..
مبروك:الحمد لله كله ماشي تمام والامور متيسرة..
غرفه؛امم كويس..
سكتوا الزوز..
هي كانت تشبح للطريق وهو يشوفلها..
ويحدث في نفسه قائلا..
"وينك من زمان وينك..حتى شوفة وجهك ترد الروح..الوحيده اللي تعرفت عليها لاعمرها تكلمت ع وزني ولالمحت حتى التلميح..واضح عليها طيبه وقلبها نظيف وبريئة هلبه وكأنها بنيه صغيره..ااه بس كان تجيني شويه جرأة نقول اللي داسه داخل ليا قريب شهر"
وهي كانت تحدث في نفسها قائله..
"كيف بنفتحله موضوع الساعه؟!....ايوه خل ندير روحي باينه مهمومه هو حيسألني خيرك وهكي واني طول نقوله"
تنهدت من قلبها تنهيده هم..
هو عقد حواجبه وقال:لاباس..
غرفه بملامح وجهه كلها هم؛شي ماتشغلش بالك..
هو سوا تقعميزنه بحيث يجي مقابلها وقال بقلق:بالي انشغل وفات قولي خيرك..
غرفه:ماتخافش حاجه عاديه..جت في خاطري حاجه..ونبي ناخدها..
هو هز راسه وقال:ايه..
غرفه:هو هدا الباقي مش مهم فوت..
مبروك؛ميسم ماتحرقيش عصابي وقولي شن جي في خاطرك؟
شبحتله بنظرات توجع القلب وقالت؛ساعه..عجبتني هلبه وماعنديش حقها نفكر كيف نفتح مع بابا موضوع الفلوس واني مصروفي كملته بسرعه معاش قعد عندي الا20..
هو طلع تزدانه من جيبه..
هي شافتله وقريب طارت من فرحتها من داخل بس الظاهر:لالالاماتفكرش مبروك..
طلع فلوس ومدلها وهو يهز في راسه بمعني خودي..
غرفه:لالا..مش واخده شي اني قاعده نهدرز بس خليتني نندم..
مبروك؛ماتندمي على شي اللي يجي في خاطرك قولي عليه ماتهونيش عليا راك..
هي قعدت تشبحله بنظرات قاصده بيهم تغرقه في بحرها اكثر واكثر..
وهو اساسا غارق ومنتهي..
غرفه؛احرجتني..
مبروك وقلبه كأنه طاير وسط صدره؛لاتنحرجي ولاتندمي خودي..
هي تنهدت بضيق تصنعا..بعدين خدت الفلوس وهي منحرجه كذلك تصنعا..بعدين قالت:هادوا اكثر من حقها..
مبروك:والله ماك راده منهم قرش.
غرفه:بيكو علاش هكي؟
مبروك؛خلاص عاد..طيرتهالي..وضحك..
هي ضحكت بعدين قالت:شكرا هلبه..بجد مافيش منك بيكو..
وحطت الفلوس في الشنطه..
هو بلع ريقه وتشجع بعدين قال:في عندي كلمه حاصله داخل كان ماقلتهاش اشبح شن يصير فيا.. وضحك..
غرفه"ووك ان شاء الله مش كلمة نحبك":شن هي؟
ابتسم وقال بشي من التوتر:عندك علم ان حلوة هلبه..احلى وجه وجه نشوفه في حياتي..مانكذبش عليك عرفت بنات قبلك لكن مافيش وحده فيهم زيك..فيك براءة هكي زي البنيه الصغيره...وعقلك كبير..وقلبك نحسه اصفى من الحليب..ماتقوليش كيف عرفت واضح من عفويتك وتصرفاتك..جديات ياميسم انتي..
رن تليفونها..
وهو مكمل يقول..درتي فيا..
سكتاته لما قالت:لحظه شويه بس نرد..
وردت ع التليفون..
وهو ابتسم بضيق وسكت...وقعد يضرب بصوابعه ع المقعد الرخامي وهو ويشبحلهم..
غرفه؛علاش شن في .
"شني"
غرفه:تمام حبيبتي جاياتك اهدي وماتتوريش..
"شن تقولي انتي خيرك..الو روفي"
غرفه:هيا توا جايه..
وناضت وسكرت عليها وهي تقول؛اسفه مجبورة نمشي صاحبتي متفركسه شويه..يللا سلام...
هو ناض وقال:استني شويه بس..ومدلها كيس الشكولاته
هي ابتسمت مجامله وقالت:شكرا بيكو..وخداته ولفت ومشت بسرعه..
وهو يشوفلها بضيق ويقول:في امان الله..
☘هي قعدت تمشي بسرعه وع وجهها ملامح النجاة بعد ماكان حيخرب عليها كل شي..
وصلت لمكان صاحبتها..
شافتها وقالت:شن قعدتي تفتفتي!؟
جبدتها من يدها وقالت:غير تعالي معاي..
:وين رافعتيني!؟
~~~~~~~~
غرفه وهي مبتسمه تنهدت براحه وقالت:هدا وين ارتحت..
:من وين حصلتي فلوسها يافرخه؟
غرفه بضحكه:من الفقمه..
ضحكت صاحبتها وقالت:شكله عبيط واهبل ياروحي..
غرفه:للمليون رغم ان اول مرة شفته فيها ماكانش يبان هكي..كيف يمشي في المحل ويتعامل مع اللي يخدموا عنده هكي يبان شخصيه شويه..بس لما عرفته عن قرب اااعع..
لاوتوا بدالي في جو الرومانسيه..وانتي احلى وجه نشوفها..وانتي بريئه وانتي مش عارفه شنو..الكلام اللي يجيب القداد عرفتيه..
وصاحبتها تضحك..
غرفه؛بس انتي انقذتيني في اخر لحظه قريب قال نحبك..
:خليه يقولها ومشي معاه..
غرفه؛لالا بعدين نحصل فيه فكيني..خلينا هكي ع اساس اصدقاء خير بش مايشد عليا شي..
:واو يابنت انتي ماللي يقدرك يجي يحاسبني..
غرفه بضحكه:ياماما الحياة شني غير فرص اللي تطلع قدامك استغليها خير استغلال..
:ومنك نستفيد ياحنه...
🍀🍀🍀🍀🍀
وقعدت غرفه تستغل في فرصتها اكبر استغلال وهو مش حاس بشي خبثها في التعامل معاه مخليه يشوف في كل شي منها عادي ومافيشي اي حاجه غلط..
بس المشكله الاكبر..
ان مبروك كان وين يحس بالسعاده..يمشي ياكل..ووزنه كل ماله في زياده ومش مدور ع باله غرفه مش مهتمه لشكله الخارجي نهائي...
لكن اخته..
:حرام عليك نفسك وصحتك مش هكي معقوله برغر وبيتنزا وشاورما!
مبروك وهو ياكل:انتي شن تبي مني بالزبط!؟ وين تشبحي فيا جوي مليح تنكدي عليا!
:اها يعني مش خايفه عليك!؟.
هز راسه وقال:تمام خايفه عليا لكن كثرتي ع ماوصوك..
:حبيبي ركز انت توا عمرك 30عام يعني ع وجه زواج من هي اللي بترضي بواحد وزنه فوق الميه..
مبروك :في من ترضى ضيقت عيونها وقالت:اها معناها في وحده..
هو انحرج وقال:باهي نوضي نوضي..وانتي خديتي راحتك..
ضحكت وقالت:ماتبيش تحكيلي..
مبروك؛نوضي قتلك..
ناضت وخدت منه باكو البيتزا وقالت؛اقعد فيها..
هو بطل مضغ وقعد معاها بعيونه لين درقت..
بعدين قال وهو مصدوم..البيتزا!!
🌻🌻🌻🌻🌻🌻
وقرب عيد الأضحى..
وهالعام عيد الليبيين مع باقي الدول الاسلاميه..
وهدا اكثر شي كان مفرح وقتها..لأن اللي صار في العيد اللي قبله افقدهم نكهة العيد الكبير وضيعت سر جمال اجوائه..
#يوم_عرفه..
☘☘☘☘☘
السابع من ذي الحجه...
في حوش الواعر..
تحديدا الصاله..
ملتمات فايزة مع بنات الواعر وعمتهم...
كانت مطيره راقده ع رجل سدرة...
وطوبى راقده حدا غرفه اللي كانت مقعمزة تهدرز..
وفايزة متكيه..
والبنات يتفرجوا ع التليفزيون..
مطيرة؛تو هو عيد كبير دبخ وعواله وجري ودهاك..علاش الحنه والصبغه!؟
سدرة؛تقعد تستعرض بيها قدام سلافها لاحشم لاجعرة..
فايزة بضحكه؛والله تقول عرايس ياعمتي من كل شي دارو..
طوبى:هديكا اللي قالت تبي بادكير شكلها عندها خدم..
فايزة بضحكه؛حتى اني قلتها..
مطيرة:تلقي الخدم حمواتها هالمسردنه..
غرفه؛هلبه هكي تاكل وتوخر وتتسبل بصغارها بنشد حمودي يعيط بنوكل مسعودي جعان..
سدرة؛حي عليهم هادم كانوا طاحوا فيا حمي..سقمتهم خليتهم يمشوا هك..واشرت بيدها القدام..
ضحكوا..
غرفه:باهي ماعندنا خوت ولاد..
هالمرة ماكانتش قاصده..فعلا غرفه نست مختار بالمرة كأنه ماانولدش..
بس اللي تحاول تنساه عمرها مانساته ع رغم من بغضها ليه لكنه قاعد مدايرلها غصه موجعه..
واختهم الصغيرة ناض عليها جرحها وسرحت وهي تفكر فيه.
سكتوا بعد ماقالت غرفه كلمتها..
وفجأة..رن تليفون غرفه بنغمة رساله..
كانت من مبروك..فتحتها..
وين قرتها تلقائيا قالت..وااك من ثقل الدم..
سدرة:مني!؟
غرفه:وحده صاحبتي دمها رزين بعتتلي هادي..
الكبش يكشك للجديان..العيد توحد ياحبان..
ضحكوا..
طوبى وهي تضحك؛والله ضحك باهي..
مطيرة بضحكه:اني بعتتلي فردوس بكري
الكبش يكشك للنعجات..العيد توحد ياحلوات..
سدرة؛اما الليبين هادم...المشكله مش عارفين ان هادي شعائر مايجيش يديروا عليها جو النكت والضحك..
فايزة:الناس فرحانه اللي توحد العيد العام هدا نسيت العام اللي فات والله ماتبنناه..
مطيرة:اني قهرني يوم عرفه .
تعودت نفتح ع الخطبه ونعلي الصوت ونقعد نعول..
سدرة؛والحوش يصدح بلبيك اللهم لبيك..واني نقعد نقول معاهم ونتخيل في روحي غادي..
فايزة؛ونقعدوا كل شويه نجوا للتلفزيون ونشوفوا الحجاج شن يديروا..
طوبى:وتلوموني في العيد الكبير والله حتى بحوسته يهبل..
سدرة؛ايه والله ربي يبلغنا ويتقبل منا يارب..
كلهم بأصوات متقطعه قالوا:آمين..
🌻وقبل يوم عرفه اللي يكون فيه عطله رسميه..
الناس تطلع تاخد ماتبي من لوازم العيد..
خضرا...فحم...مشروب...حبال...يرفعوا المواس والشيتات بش يسننوهم....وغيره..
وفي نفس الوقت..الناس اللي فيها الخير..
توزع في الاضاحي ع المحتاجين..
زي شارع القهوة..
لطفي كان يوزع ومعاه ويوسف ولده في الاضاحي اللي لموا حقها من اهل الشارع..
اما فايزة..فشرت خروفها بروحها بعد لمت حقه..
كان خروف اسباني..
كانت تضايق من مقارنة بنات ضحيتهم بغيرهم..
بس في نفس تحاول تزهيها في عينهم..
فايزة؛خروفنا حني ياكل في العشب الاخضر النزيف وديما مهتمين بيه زي البقرة اللي في دعاية الزبده عرفتوها..
مروة بضحكه؛ايه لورباك..
فايزة:ايه..اما الخروف الكبير اللي عايش هني ياكل في الخبزة اليابسه والكواغط..
تاله:ييع..
مروة:خلاص ماما اشريلنا من هدا بس..
فايزة بإبتسامه؛ان شاء الله حبيبتي..
وصفاء تشوف لأمها بإبتسامه حزن:خلاص البنت بدت واعيه وفاهمه هلبه امور دور حواليها وقاعده تساند في امها ع قد ماتقدر..
بس في لاتعلمت لاتقدر ولاتحس..
المهم حاجتها اللي تبيها تاخدها..
فردوس:شن تحسابي بوك راقد ع بنك اللي تبيه يشريلك لبستين ومن جرابه!
الاء وهي تبكي؛مادخليش زيي زي بنات عمامي وعماتي..
اريج؛انتي ياتافهه بابا شري الخروف بالسيف راهو..
الاء:ايييه عليا منكم..باهي كان هو فقير وماعنداش فلوس علاش جابنا..
فردوس بصدمه:شن قلتي ياقليله الادب!؟
الاء وهي تبكي بعصبيه؛لامش قليلة ادب اني وانتي بروحك تقوليله في الكلام هدا توا بديري روحك طيبه!
انصدمت اريج في ردها ع امهم..
اما فردوس ضربتها كف وهي تقول:انتي تبي ربايه من اول وجديده..وقعدت تضرب فيها وهي تبكي وتعيط وتقول..لالالا..حولي..
واريج تشبحلها ومستحليه فيها الطريحه..
☘☘☘☘☘
واقفه في المطحن تشرف ع البيع..
وتشوف في الحسابات..
وهو يراقب فيها من المطحن متاعه...
عادته اللي ماسيبهاش بكل الا لما كانت ع ذمته راجل...
شويه وطلع من المطحن ووقف قدامه لما شاف غريمه جاي لمطحنهم ووقف قدامه..
اياد بإبتسامه؛ربي يعاون ابله سدرة..
سدرة بإبتسامه:تسلم دكتور هاه شن كملتوا؟
اياد:والحمد لله...وتوا جاي ناخد منك قهوتنا اني ومهند ..
سدرة؛حاضر..توا يطحنوا في القهوة اللي يحبها مهند نص تحميس..
اياد بإبتسامه؛تمام.. هي ردتله الابتسامه وولت تشوف للحسابات..
وهو يشوفلها بعدين قال:علاش ماطوروش في المطحن..
شبحتله وقالت:خيره ديكوره جديد ليه عامين..
ضحك وقال:مش هدا قصدي..نقصد انكم دخلوا حاجه جديده غير القهوة..زي المكسرات مثلا..
وديروا للقهوة انواع..زي البيضا والحمرا مثلا..
سدرة وهي تفكر:والله اقتراح حلو..
واحد من اللي يخدموا عندها قال: مليح بكل.
واحد تاني قال؛والله خطرت عليا ياأبله وماقدرتش نقولك قلت بالك مايبوش..
سدرة؛لافي الجديد اللي عنده اقتراح يقول اني مش ديكتاتوريه نسمع اقتراحاتكم وناخد رايكم..
اياد بمزح؛مادام عجبك كلامي خلاص..ناخد منك طلبي وفوقه زوز بلاش..
سدرة؛لالالا..الشغل الشغل..العروض المجانيه في رمضان فقط..
اياد بضحكه؛ياودي مش مشكله المهم فدناك بس..
سدرة:لابارك الله فيك ديما نافعنا دكتور..
ابتسم بإحراج وقال:شكرا..
والمهدي واقف يتفرج وهو يغلي ويفور..
وشاد روحه بالسيف..حاس انه هالمرة مش حيقدر يتحمل فكرة ارتباطها مرة تانيه...
فهالوقت..
درست سيارة نجاة قدام حوش شنيبه..
نزلت منها ومشت نزلت ولدها..
شافت القدام جو عيونها ع سلفها كيف واقف يشوف لسدرة واياد..
ابتسمت تهكما وقالت في نفسها"وتقول ماضي وراح العبيطه نسرين"
ومشت خشت للحوش بولدها بدون مايحس بيها المهدي...
#قبل_العاصفه5
#طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
