#جمان_فريد
#الجزء_التاسع_والستين"عابي على ربي2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#سورة_الفاتحه
عَنْ أَبِي سَعِيدِ بْنِ المُعَلَّى رَضِيَ اللَّهُ عَنْهُ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: أَلاَ أُعَلِّمُكَ أَعْظَمَ سُورَةٍ فِي القُرْآنِ قَبْلَ أَنْ أَخْرُجَ مِنَ المَسْجِدِ. فَذَهَبَ النَّبِيُّ صَلَّى اللهُ عَلَيْهِ وَسَلَّمَ لِيَخْرُجَ مِنَ المَسْجِدِ فَذَكَّرْتُهُ، فَقَالَ: ( الحَمْدُ لِلَّهِ رَبِّ العَالَمِينَ). هِيَ السَّبْعُ المَثَانِي، وَالقُرْآنُ العَظِيمُ الَّذِي أُوتِيتُهُ ) رَوَاه البُخَارِي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 .كلُّ قلبٍ و لهُ قلبٌ يليقُ به .. !
والقلوبُ على نواياها تلتقي ..🍃
-----------------------------------------------------------------------
اندق باب الحوش..
سمعاته نجمه مشتله طول وهي تقول..
/هي جايه..
وصلت فيه وفتحاته..
راما:كيف حالك حنينه..
نجمه:الحمد لله بنيتي خشي خشي..
خشت راما وهي تقول:لما كلمتيني سيبت غداي ونزلت ان شاء الله غير خلتيلي من غداكم..
نجمه بضحكه؛قاعد ماطابش ياشويطينه..
راما وهي تضحك؛احسن شي..
نجمه؛امك مش في الحوش؟
راما:ايه.طفت ع الغدي ومشت لحوش جدي شنيبه..
نجمه؛باهي بري لدار عماتك عمتك نجاح هني هي اللي تبيك..
راما وقفت في مكانها ولون وجهها انخطف وهي تقول..
/عمتي نجاح هني!؟
نجمه بإستغراب:ايه بريلها من بكري تراجي..
راما وهي تحاول تخفي توترها قالت:باهي..
ومشت بطريقها لدار عماتها وهي خايفه..
وجدتها خشت للكوجينه تشوف الغدي اللي دير فيه عواطف..
لقتها مقعمزه ع التليفون قالت..
/غير كان نعرف شن عندك فهالكصير شاداته طول النهار زي البيبي..
عواطف؛توا كيف نضت شفت الغدي توا مازال شويه..
نجمه حركت راسها يمين ويسار بأسف ومشت عرت ع الغدي بتشوفه..
🍃وفي دار بناتها..
راما:ماليش علاقه بيها ليا فترة مسيبتها..
نجاح؛السبب؟
راما بضيق:مانبيش نحكي في حاجه ماتخصنيش..
نجاح؛مروة حذراتك من اسما قبل ولا..
راما سكتت وهي مضايفه..
نجاح؛في بين اسما ومروة مشكله؟
راما بتوتر:قتلك معاش نكلم فيهم الزوز ومعاش دخلي بحد..
نجاح رفعت حاجبها وهي تقول...
/علاش قطعتي علاقتك بمروة؟
راما:تعاركنا..
نجاح؛على شني؟
راما بضيق:حاجه تافهه..
نجاح؛حاجه تافهه تخليك تقاطعيها؟
راما؛هي اللي قاطعتني..
نجاح؛راما كلامك متناقض هلبه راهو!.
راما من كثر الضغط معاش عرفت شن ترد غير بالكذب اللي تعودت عليه..
/هي تبي محمد ولد خالي وقالتلي كلميهولي واني قلت لا مانقدرش قالتلي مالا جيبي رقمه قلتلها مانقدرش نعطيه تعاركت معاي وقاطعتني..
نجاح قعدت تشوف لراما وهي تفكر بعدين قالت..
/يعني مروة عندها في جو الكلام مع الولاد..
راما قعدت ساكته وهي في قمة التوتر..
نجاح؛مش عارفه علاش مش قادره نصدق..
راما بشي من الانفعال..
/وعلاش ماتصدقيش!؟ هي اصلا تقلد في اختها صفاء اللي دايرة علاقه مع عمي اشرف..
نجاح بصدمه..
/شني!!؟
راما بضيق:ايه صفاء اختها تكلم في عمي اشرف وهي تبي دير زيها..
قعدت نجاح ساكته للحظات وهي مش مستوعبه اللي سمعاته بعدين قالت..
/بري اطلعي..
وراما ماصدقت طول مشت طلعت من الدار ومن غير ماتسلم ع حناها وعمتها الثانيه طلعت من الحوش بش تركب لشقتهم..
☘في نفس الوقت..
خش عمها اشرف للحوش وهو شاد في يده شنطه..
سكر الباب ومشي طول خش داخل..
شم ريحه الغدي ابتسم من قلبه..
حط الشنطه جنب فم الباب وتوجه للكوجينه..
🍃وفي الكوجينه..
نجمه حطت صونية الحوت ع الطاوله وهي تقول..
/الله يبارك ع الحويتات..
نجاح اللي كانت مقعمزة وين ماانحط الحوت..
دفاته بيدها وقالت..
/خيره ريحته هكي اللطف!؟
نجمه بإستغراب:خيرها تهبل!..
نجاح بقرف؛شميها زين يام..وغمت انفها..
واختها عواطف حولت عيونها عن التليفون وشبحتلها..
"بالعكس ريحته مش عاديه"
نجمه بفرح؛وليدي جيت؟
عواطف طول سكرت التليفون ونزلاته ع رجليها..
قدم اشرف لأمه وسلم عليها.
ونجاح تشوفله بعدم رضا بس لما شافلها رسمت ع وجهها ابتسامه مجامله وقالت؛الحمد لله ع السلامه..
مد يده وصافحها وهو يقول:الله يسلمك شن حالك وحال حفيظ؟
نجاح:الحمد لله..
بعدين صافح عواطف اللي تحمدتله بالسلامه..
نجمه؛برا سلم ولدي بدل ع السريع بش نحطلك تتغدا..
اشرف وهو طالع؛حاضر..كثري بطاطا وبتنجال..
نجمه:باهي باهي..
ونجاح قعدوا عيونها مع الباب اللي طلع منه وهي تفكر في كلام راما..
🍃🍃🍃🍃🍃
وفي مركز اميراتي للتجميل..
كانت صاحبته مقعمزة وسط الحطام ..
حطام المكان وحطامها الداخلي..
تشوف في الفراغ بملامح وجه متجهمه وملتزمه الصمت..
والعاملات يطلعوا وحده ورا التانيه بعد ماهي صرفتهم..
وماقعدش الا العامله المقربه ليها..
:بتقعدي بروحك؟
فايزة:شويه ونطلع..
بحزن قالت:ياريتك بلغتي..
فايزة؛مش حنحصل شي غير زياده الشوشرة..
مررت المراة نظرها ع المكان بعدين شبحتلها وقالت..
/تبيني نكلملك طوبى؟
فايزة؛لالا..روحي انتي توا وبينا تليفون..
:حاضر..براحتك..السلام عليكم..
فايزة؛وعليكم السلام..
وطلعت المراة من المزين وماقعد حد فيه غيرها..
نزلوا دموعها...
قامت تليفونها وحطت ع رقم محدد واتصلت بصاحبه..
🍃🍃🍃🍃🍃
"وعلاش مستغربين لاعندهم حسيب ولارقيب ياما يديروا"
نسرين بحده؛فايزة عرفت تربي بناتها احسن تربيه مش محتاجات رقيب وحسيب.
خديجه؛ باهي خليك مني ومن بنتي؛اللي حكتهولك سدرة توا كذب حتى هو؟!
نسرين؛في حاجه غلط في القصه في حلقة مفقودة..
مغليه:شن هي؟!
نسرين بإنزعاج؛مانعرفش اللي نعرفه ان بنات فايزة مربيات كويس..
ويجيها فهاللحظه اتصال..
رفعت تليفونها وشافت المتصل بعدين ناضت ومشت طلعت من حداهم..
مغليه؛شكلها تكلم فيه..
خديجه؛لايام قتلك لا لو كانت تكلم فيه تقولي مادسش عليا..
مغليه رفعت حواجبها ونزلتهم بعدم اقتناع بعدين قالت..
/بعد اللي طلع ع فايزة وبناويتها كان نلقى تخط فيها بكل..
خديجه؛حتى اني بعد اللي صار قعدت نقلب فيها فدماغي مش بعيد هي اللي كانت تلود ع حامد..
مغليه؛هدا قصدي واختك ذقن تو تلودلها حتى على هدا وتاخده وهي تقعد مادة وجهها..
خديجه:ربي يكفيها شرها...
~~~~~~~
نسرين بضيق:كيف هكي يافايزة فاتحتي مازال عليها يومين بس..
"سامحيني نسرين ظرفي مايسمحش"
نسرين؛ظرف شني يانسرين اللي يخليك ترخي بصاحبتك في يوم فرحها؟
سكتت فايزة..
نسرين:معقوله دسي عليا يافايزة!؟..راهو ماقعدلنا حد غير بعض يافايزة..
وتسمعها تبكي..
نسرين دموعها عبوا عيونها وهي تقول..
/وينك انتي توا؟
جاها صوتها الباكي وهي تقول..
"في المركز متاعي"
نسرين؛شويه وجايتك..
وسكرت منها ومشت خدت عبايتها لبستها ولبست وشاحها ومشت طلعت من الدار..
وصلت في الصاله وهي تقول..
/عندي مشوار للمزين مش معطله!؟
هما استغربوا..
ومغليه قالت؛توا!؟
نسرين بإستعجال؛ايه توا..
ومشت وخلتهم..
مغليه؛قولي لواحد من خوتك يرفعك..
ماسمعتش رد نسرين لكن سمعت صوت الباب تسكر..
خديجه بنرفزة؛اهو بدتلها في الجو من توا..
مغليه بضيق:اختك اللي تبغدد غير توا تو نقعمزلها..
🍃🍃🍃🍃🍃🍃
"احسنلك مدرسة جديده مافيهاش شكالات مقلبه"
مروة بحزن:لكن اني نبي صاحباتي نبي فصلنا نبي ساحتنا وجونا فيها وهدرزتنا وقرايتنا...
صفاء بضيق؛تو تتعودي ع المدرسه الجديده وديري صاحبات جدد وجو جديد..
سكتت مروة وعيونها يدمعوا..
صفاء بألم؛خلاص مريوة حبيبتي وجعتيلي قلبي..
مروة بحزن:باهي ماما ياصفاء لأمتى بتقعد مقاطعني..
صفاء:ماما هكي طبعها يامروة تاخد موقف قوي لكن فيسع ماتولي نسيتي شن صار بيني وبينها قبل؟
تنهدت مروة بألم وقالت..
/حسبي الله ونعم الوكيل فيهم دمروني..
صفاء؛لادمروك لاسو..ماتخليش شخصيتك ضعيفه يامروة انتي ماغلطتيش وعارفه روحك كويس وكلنا عارفينك معاش تخلي شي يهدك يامروة،حني لازم نقعدوا قويات ونواجهوا الحياة بكل شي فيها ونخلوا الناس يقولوا صحة ليهم بنات فايزة قويات عرفوا كيف يواجهوا الدنيا ويعيشوا فيها من غير مايكون معاهم راجل..
مروة وهي تشوفلها بعيونها المدمعات قالت..
/قصدك حولتي من راسك فكرة الزواج!
صفاء؛كان مالقيت حد يستاهل اكيد مش حنرضى باللي يجي وبنكمل حياتي ونحقق ذاتي..
مروة؛شكلك موليه تقري في كتب تطوير الذات؟
صفاء بضحكه؛صح شريت زوز يهبلوا غير صعبات شويه كان تبي نعطيك تقريهم واللي ماتفهميشي قوليلي عليه نشرحهولك..
مروة ابتسمت بحزن وقعدت ساكته..
صفاء بضيق:خلاص عاد ميرو..وخدتها في حضنها..
ومروة شدت فيها ودموعها ينزلوا..
🍃🍃🍃🍃🍃
"ماصدقت صفاء ولت كويسه وطلعت من الحاله اللي كانت فيها تنوض تجيبلي مروة مصيبه اكبر منها مش عارفه كيف ندير فيها!؟شوفي بعيونك يانسرين شوفي شن جاني من ورا هالمصيبه"
نسرين بضيق ودموعها في عيونها..
/من قالك قصة مروة ليها علاقه باللي صار!؟
فايزة بخوف..
/حي عليا..! قصدك في حد تاني حاطني في راسه ويبي يقطع برزقي!؟
سكتت نسرين معاش عرفت شن تقول زادت عقدتها اكثر بكلامها اللي قالاته..
غمضت فايزة عيونها بألم وقالت..
/ااه ياربي امتى بنرتاح امتى والله تعبت معاش عندي حيل..
نسرين بمواساة..
/فايزة خيرك مريتي بالأصعب من هكي ووقفتي ع رجليك انتي يافايزة مراة قويه مايقدر شي يهدك..
فايزة بألم..
/اني توا حاسه روحي مهدوده يانسرين اللي مرينا بيه خلاني متحطمه من داخل معاش عندي نتحمل بيه اللي قاعد يصير فيا توا..
نسرين:وكلي ربي شراده بإذن الله أزمه وتمر..
فايزة بمرارة..
/كل ازمه مريت بيها مرت عليا يانسرين وهادي عفست عليا عفس..اني عايشه وسط ناس تراجي فيا ع الغلطه يانسرين..
نسرين..
/طز فيهم الناس معاش دوريهم مافي حد منهم بيطلعك من الجنه ويدخلك النار..ع اساس هما عايشين حياة مثاليه كل حد عند ماساده من المصايب..
سكتت فايزة وهي تفكر بحزن بعدين قالت..
/تعرفي..شكلي بنزوجهم بش نرتاح..
نسرين بصدمه..
/كيف!؟
فايزة؛خلاص معاش صغيرات صفاء ماشيه في17 ومروة في 15 مامنهم اللي تزوجوا في اعمارهم وداروا حياش وصغار وعايشات احلى عيشه..
نسرين بصدمه؛فايزة شن جاك خيرك هبلتي!؟
فايزة بشي من الانفعال..
/هكي الوقت يبي يانسرين هالوقت اللي يخوف يانسرين تتعبي وتربي وتعلمي وفي لحظه يجيك حد يمسح اللي درتيه كله..هادم بنات نسرين ونعترف والله مانقدر عليهم بروحي نزوجهم خير الزواج ستره وحصانه ليهم..
نسرين مش مستوعبه اللي تسمع فيه بس عقلها قاللها ان فايزة تقول في الكلام هدا بسبب نفسيتها التاعبه من اللي صارلها لهدا سايرتها وهي تقول..
باهي نحكوا في الموضوع هدا بعدين نوضي توا نوضي روحي معاي..
ناضت فايزة بتعب ونسرين ناضت معاها..
فايزة؛مانبي حد يعرف باللي صار للمركز مانبيش الدوة توصل لعمي لطفي الراجل غدوة بيفتح المطحن متاعه مرة تانيه مانبيش نخرب عليهم ونشغلهم معاي..
نسرين هز راسه وقال..
/حاضر تو نوصي نضال مايقولش لمرته..
🍃ولمت فايزة حاجاتها ومشت طلعت من المركز سكراته كويس واستودعاته ربي..
بعدين مشت روحت بسيارتها ونضال ونسرين معاها..
نضال:خيرها فايزة؟
نسرين؛ماخيرها شي صايره معاهامشكله خدمه وتو تنحل ان شاء الله..
سكت شويه بعدين قال..
/نسرين..
نسرين؛امم..
نضال؛خيرها طوبى معاش جت لحوشنا بكل؟
نسرين؛مريضه شويه وتبي تقعد عند ماليها يعانوها..
نضال؛ع خاطر هكي بس مافيش حاجه تانيه؟
هي بريبه قالت؛
/حاجه تانيه زي شني؟
نضال:قصدي مش صاير شي بينها وبين خوك؟
نسرين شبحت القدام وقالت..
/لالا امورهم تمام ع الفيس ديما تنزل عليه وتشعرله وهو كل اسبوع يشريلها في هديه ويدلل فيها..
سكت نضال وهو يفكر..
نسرين:اريج قايلتلك شي؟
نضال:زي شني!؟
نسرين؛مش عارفه..سؤالك توا هو اللي خلاني نفكر هكي..
نضال:تؤ..ماقالتلي شي اني لاحظت انها معاش تجي سألتك هو هدا..
هزت نسرين راسها وقعدت ساكته...
🍃🍃🍃🍃🍃
"هاك خودي اقري عليها الفاتحه سبعه مرات"
خدت غرفه طاسه الميه من طوبى وبدت تقرا..
طوبى:علي صوتك شويه..
غرفه:الرحمن الرحيم ملك يوم الدين..
ومشت طوبى طلعت من حداها للكوجينه وهي تقول..
بالله فردوس طلعي كيسة ورق السدرة من الثلاجه..
فردوس؛شن بديري؟
طوبى؛بنسحنهم ونحطهم وسط الميه المرقيه ونعطيكم تشربوا منها وتغتسلوا..
فردوس بضحكه؛تي غير من بياخدنا بالعين بس ع ايامنا السود
طوبى بضيق؛قولي الحمد لله ع كل حال..بعدين هدا مش للعين بس الرقيه تشفي الامراض النفسيه والجسميه يافردوس تخلف راحه نفسيه..
فردوس:ااه..اني مانبي كان راحه النفسيه..حاضر تو نطلع الكيسه من الثلاجه..
هزت طوبى راسها ومشت طلعت وهي متوجهه للدار..
خشت ع بنات اختها..
لقتهم الزوز لاهيات يتفرجوا ع اللاب توب متاعها وهما منسجمات..
طوبى؛في شني منسجمات..
اريج:نتفرجوا ع فيديوهات عرسكم..قداش اميمه كانت تهبل في حفلتها زي الملكات ياخسارة وخلاص..
قعمزت طوبى ع سريرها وهي ساكته ومن داخلها كانت مضايقه لأبعد حد وآلاء تسرقلها في النظر..
اريج؛ياناس قداش مدرهتلي كبدي اللي ينقاللها نجاه..
الاء؛مبوزمه شفتيها...
ناضت طوبى ومشت لآلاء طبست ع اللاب توب وقعدت تشوف معاهم..
ركزت ع نجاة كيف الكاميرا كانت جايه عليها وهي واقفه تصفق وملامح وجهها متجهمه..
الاء:حي!!
الزوز شبحولها واريج قالت..
/خيرك!
الاء؛والله هي نفسها!
طوبى وهي عاقده حواجبها بإستغراب..
/من هي!؟
الاء وهي تأشر ع الشاشه..
/هادي اخت نجاه..اخر مرة مشيت فيها لخالي لقتيها طالعه من العمارة اللي هو يسكن فيها وكان باين عليها تبكي..
وقفت طوبى ع حيلها وقالت..
/صابرين؟!
آلاء؛ايوه اسمها صابرين..
اريج؛مرات جايه لحد تاني..
الاء؛العمارة اللي يسكن فيها خالي مش موجود فيها حد غيره هو..
اريج وطوبى قعدوا ساكتات وهما يفكروا..
آلاء؛اني لما شفتها عرفتها بس بعدين قلت مرات وحده تشبهها لين شفتها توا في الفيديو هي نفسها..
اريج شبحت لطوبى وقالت..
/شن علاقته بيها اللي جاياته لحوشه؟
طوبى مشت قعمزت ع سريرها وهي تفكر بصمت..
والاء واريج يشبحولها..
الاء:بيبو في شني تفكري؟
وجهت طوبى نظرها لآلاء وقالت..
/ردي بالك تسأليه عليها ولاتقوليله انك شفتي وحده طالعه من عنده..
اريج؛علاش!؟
آلاء:مستحيل نسأله مانقدرش..
اريج بإشمئزاز؛مش عارفه علاش مصرة تحافظي ع علاقتك بيه..
آلاء؛حياته الشخصيه ماليش علاقه بيها..
اريج؛حياة مغبره ع راسه واحد زيه مايشرفنيش يكون خالي ولايقربلي حتى من بعيد.
الاء بضيق:ايه صح هو عنده هلبه عيوب لكن يعامل فيا احلى معامله حنين هلبه وديما يسأل عليا وعليكم ..
اريج سكتت ومابتش تناقش اختها حاستها تعلقت بمختار اللي بدي يعبي فراغ كبير في داخلها..
وطوبى كذلك كانت ملاحظه هالشي وهدا اكبر سبب خلاها ماتمنعش آلاء من مواصلة مختار...
بس توا عقلها بيبدا مشغول بمسأله جديده محيره هلبه..
"شن علاقة صابرين بمختار وكيف عرفوا بعض اساسا!؟"
🍃🍃🍃🍃🍃
الساعه 4:00عصرا..
في حوش الصيد..
كانوا البنات وامهم مقعمزات يشربوا في الشاهي..
نجمه:مرة مرة يوجع فيا لكن عادي ماشي حالي..
نجاح؛ماك هملتي العلاج الطبيعي يام غلط هكي راهو كأنك مادرتي شي.
نجمه؛زايد ناقص مانفعني بشي..
نجاح؛مانفعك بشي..ربي يهديك يام وخلاص..
ع خشة أشرف قال..
/نجاح هيا..
ناضت نجاح وهي تقول..
/ردي بالك ع روحك يام معاش تعبي روحي..
كبت ع راسها..
نجمه؛حاضر بنيتي حتى انتي ردي بالك ع روحك..
نجاح؛ان شاء الله..بالسلامه..
نجمه؛بالسلامه..
ومشت نجاح طلعت من الصاله وهي تقول بصوت عالي..
/بالسلامه ياعواطف..
"بالسلامه بالسلامه."
ومشت نجاح ورا اشرف...
طلعت برا..
لقاته بيركب سيارته مشتله وقفت عليه وقالت..
/بتركب لشقتي تشرب قهوة مادخليش بيك..
اشرف:خليها نهار تاني مروح تاعب ونبي نرتاح..
نجاح؛نبيك في موضوع ضروري..
هو استغرب..
نجاح؛خل نمشي نركب سيارتي..
ومشت وخلاته يفكر في الموضوع الضروري اللي تبيه فيه..
ركب سيارته وهو يشوفلها كيف ركبت سيارتها..
بعدين طلعت وهو طلع وراها...
🍃🍃🍃🍃🍃
"ناسيه كراستها عند البنت وعطتهالي نوصلهالها"
المهدي؛باهي بري لكن ماتعطليش..
سدرة:بابا نبي نمشي لأبله طوبى..
تنهد المهدي وقال:باهي بري لكن قبل المغرب يروح بيك يزن..
سدرة بإبتسامه:حاضر..
ومشت سدره طلعت من الحوش وبوها وراها..
وصلها للكياس وخلاها بروحها قصت الطريق ومشت لحوش سدرة..
ع جية محمد خوها وهويشوفلها وين ماشيه وقف ع بوه وقال..
/وين ماشيه سدره؟
المهدي:بتعطي كراسه لبنت احمد محجوب..
محمد بضيق:ان شاء الله غير مش بتقعد عندهم بس..
المهدي:بتعطيها الكراسه بس وبعدين كان قعدت عندهم شن فيها ؟
محمد معاش عرف شن يقول لبوه هز راسه وقال بضيق..
مافيها شي..
ومشي بيخش للحوش..
بوه التفتله وقاله..
/بتمشي لحوش الواعر..
محمد شبحله وقال..
/كويس..
المهدي؛خيرك مروح توا؟
محمد؛غدوة عندي اختبار مهم خديت اذن وروحت بش نقرا..
المهدي:باهي برا خش..
ومشي محمد خش للحوش وهو مضايق ع الآخر..
استغرب بوه لحاله االمتغير الفترة الأخيره وقعد يفكر فيه وهو ماشي بإتجاه المطحن متاعه..
🍃🍃🍃🍃🍃
"لا والله مافي بيني وبينها حاجه"
نجاح:ارجوك صارحني اشرف مانبيكش تخش في مشاكل انت في غنى عنها..
اشرف؛نجاح خيرك! قاعد نحلفلك..ايه صح البنيه نبيها وحاطها في بالي لكن وربي شاهد مافي بيني وبينها حاجه..وشاهد ع اني ماريت من البنت شي يعيبها بنت ناس محترمه وامها عرفت تربيها..
نجاح ضايقت لما عرفت ان راما كذبت عليها وزادت شكت ان اللي صار لمروة هي ليها يد فيه او على الأقل تعرف من
وراه...
اشرف وهو عاقد حواجبه قال..
/نجاح انتي شن سامعه بالزبط؟
نجاح؛ان في بينك وبينها شي هو هدا..
اشرف؛راما قالتلك؟
نجاح:شن دخل راما؟
اشرف؛ماتلفيش ودوري هي الوحيده اللي تعرف بعتلها معاهااكثر من مرة وردتني..
نجاح:من جدك اشرف؟ البنيه صغيره عليك..
اشرف؛وحده بعقلها وبأخلاقها مش صغيره يانجاح..
نجاح؛مكلمها انت؟
اشرف:ايه كلمتها اقسم بالله فاجئتني فايته جيلها في تفكيرها واهم من هدا كله محافظه ع سمعتها ماخلتنيش نكلمها اكثر من مرة وحده تفاهمت اني وياها فيها ع انها بعد تاخد الشهاده بنخطبها طول..
نجاح سكتت وهي تفكر..
هو رفع حاجبه وقال:شن في يانجاح ؟
شبحتله شويه وهي تفكر انه لو ناوي الارتباط الرسمي بصفاء لازم يعرف كل شي يخصها من توا بش يحدد موقفه قبل ليصير أي شي..
نجاح:في مشكله صارت اليومين اللي فاتوا لأختها عندي في المدرسه..
🍃🍃🍃🍃🍃
"يااااه يابيبي بردت ع قلبي"
مالك:خلاص توا تمتلهم كان مازال حد جاهم دقيهالي خضرا..
"حبيبي انت حبيبي..قول شن تبي مني قول واني نديره طول"
مالك:نبيك تكوني فرحانه بس..لكن كان في خاطرك بتاخديلي حاجه خودي مانقولش لا..
"من عيوني بيبي احلى حاجه لعيونك"
مالك؛تمام قلبي بنسكر الولاد جو تو نكلمك بعدين..
"تمام ملوكي بايات"
مالك:باي..
وسكر وحط التليفون قدامه ع الطاوله..
ع جية جماعته سلموا عليه وقعزوا معاه ع نفس الطاوله وبدوا يهدرزوا..
طول الوقت وهما منسجمين مع بعض يطلعوا من موضوع ويخشوا في موضوع يتناقشوا ويضحكوا ويبصروا ماعداه هو اللي كان يساير فيهم مسايره ومرات عقله يشرد بعيد عنهم وواحد من اصدقائه المقربين ركز معاه..
قعدوا مع بعض لين قرب المغرب يأذن وطلعوا..
وقعد مالك مع صاحبه..
:شني مني ياغالي
مالك حرك راسه بمعني..
"شني؟"
:مش معانا بكل دماغك مش عليك..
تنهد بعدين عقد حواجبه وحرك راسه بالنفي وهو يقول..
/مافي شي عادي..
:عليا اني ياغالي راني نعرفك زي نفسي ان شاء الله مش صاير فيك هكي ع خاطر الفرخه هادي اللي اسمها اسما..
ضحك نص ضحكه متهكمه وحرك راسه بالنفي..
:طولت معاك هلبه قلت اكيد كبد..
حرك راسه بالنفي مرة تانيه..
:تي كلمني ياراجل وفكتي من هزان الراس متاعك..
مالك حرك راسه بالرفض..
:تي بالله حتى اني فاضي اللي قاعد معاك..
مالك هز راسه بإيجاب..
:تافه..وناض ومشي وهو يقول..مادورنيش..
مالك قعد يضحك..
ومشي صاحبه طلع..
تبددت الابتسامه ع اللي كانت مرسومه ع وجهه ورجع سرح بتفكيره مرة تانيه..
🍃🍃🍃🍃🍃
"نبي نقعد "
قالت الجمله هادي سدرة لطوبى بعد ماجاها خوها يزن بش يروح بيها طوبى:خلاص حبيبتي تو نطلع اني نكلمه خشي للبنات..
سدرة هزت راسها بفرح وولت خشت داخل..
اما طوبى مش للشماعه خدت منها ملاية الصلاه لبستها ومشت طلعت للباب..
لقت يزن واقف برا يراجي..
طوبى بإبتسامه؛شن حالك يزن..
يزن وهو متحشم؛الحمد لله..شن حالك انتي..
طوبى:الحمد لله..شن داير في قرايتك؟
يزن:ميه ميه الحمد لله..
طوبى:الحمد لله..يزونه برا روح توا وتعالى بعد اذان العشي..
يزن؛بوي قالي روح بيها توا..
طوبى:قوله قالتلك طوبى خليها لبعد اذان العشي قاعده عند اماليها هي
يزن انحرج منها وماباش يناقشها قال:باهي..السلام عليكم..
طوبى:وعليكم السلام..
هو مشي...وهي سكرت الباب وولت خشت داخل..
🍃وفي الحوش داخل..
كانوا فايزة وبناتها مع العيله يساعدوا فيهم وهما يجهزوا لحفلة افتتاح المطحن..
فايزة كانت معاهم وهما يوتوا في متارد الحلويات الكبار بالغصب تبتسم وتساير واكثر من مركز معاها فردوس..
وفي الصاله..
تاله مع سدره لاهيات مع بعض يهدرزوا..
سدرة:عارفاته كذب ماصدقت شي بكل..
تاله؛باهي شن يقولوا البنات في المدرسه؟
سدرة:بناويت فصلنا ماتكلموش عليكم بكل..
تاله؛ماتكذبيش عليا سدرة..
سدرة:والله العظيم ماقالوا حاجه..
تاله بضيق:باهي وخوك؟
سدره مطت شفايفها للأسفل بعدم معرفه وقالت..
/مانعرفش..
تاله بحزن:كان يصدق خزي عليه..
سدرة؛اني والله مانعرف وهو مايتكلمش في الحاجات هادي..
تاله:كان تكلم قوليلي باهي..
سدرة؛باهي..
سكتوا الزوز شويه بعدين سدره قالت..
/خي المدرسه من غيركم صح ماتقريش معاي لكن ماعنديش صاحبه زيك كيف بندير مش عارفه..
تاله بحزن؛حتى اني بنقرا في مدرسه مانعرف فيها حد
سدرة؛تو ديري صاحبات وتفوتيني
تاله:عينك..انتي اللي ردي بالك تفوتيني بعد اللي صار..
سدرة؛مانديرهاش..
ارتسمت ع وجه تاله ابتسامه وسط ملامح الحزن..
🍃وفي دار البنات..
آلاء وصفاء كانوا مقعمزات مع بعض يشوفوا لتليفون آلاء..
صفاء:ابداع صراحه خاطري يجيني هكي..
الاء:تو نقولك شن ديريله بش يجيك هكي..
☘وحداهم مروة واريج اللي كانوا يحكوا عن مشاعر مشتركه بيناتهم..
اريج؛قداش مرينا بمواقف كنا محتاجين فيها لبابا هلبه لكن عديناها برواحنا تعبنا هلبه صح بس قوينا هلبه بعدين..
مروة بحزن؛تعرفي بنقولك حاجه اول مرة نقولها لحد
اريج؛شن هي؟
مروة؛ديما نكتب لبابا في رسايل نحكيله ع اللي يصير معانا كله بس اللي صار معاي اخر مرة تحشمت نحكيه..
ونزلت من عينها دمعه مسحتها طول..
اريج ودموعها في عيونها؛مادرتي شي تتحشمي منه مروة ياسرك معاش تحملي روحك الذنب..
مروة بألم؛الحياة من غير اب صعبه هلبه يااريج..
اريج بحزن؛تعرفي مروة مفروض تحمدي ربي ع الاقل انتم ماعشتوش معاه هلبه ماكانش ليكم معاه هلبه ذكريات ومواقف..عارفين ومتأكدين انه ميت..لكن حني..
وانهارت اريج بالبكي..
وصفاء والاء قعدوا يشبحولها..
مروة حطت يدها ع ذراع اريج وقعدت تمسح عليه وهي تقول..
/اسفه اريج والله ماقصدي نوض عليك المواجع..
اريج وهي تبكي:ديما نايضه مواجعي يامروة غير ندرق فيهم بالضحك والبصارة..
الاء ودموعها في عيونها..
/خلاص سادكم نكد يامنكدات تموتوا في النكد..
خدت اريج مخدة وحدفتها عليها..
الاء ردتها طول جت ع وجهها..
اريج؛حيوانه وجهي..
الاء؛ياروحي جمالك تشرتع.!
اريج؛ع اساس وجهك معبي جمال تي وجهك كله شدوق بري يامشدقه..
الاء بغرور:شدوق يهبلوا وفيهم غمازات عندك منهم؟
اريج؛طيح سعدك انتي وغمازاتك ياوجه السفنزة..
الاء؛موتي موتي قهر والله ماني معدله عليك..
وصفاء ومروة يشوفوا ويسمعوا وهما يضحكوا..
قطع عليهم.حربهم الكلاميه تليفون الاء وهو يرن..
قاماته وشافت المتصل قالت..
/سكري سكري واسكتي جاني تليفون خدمه مش فاضيتلك..
اريج؛مصدقه روحها بحبوحه..
قعدوا يضحكوا صفاء ومروة من جدهم..
قلبت الاء عيونها بعدين رسمت ع وجهها ملامح الجديه وردت..
/ايوه السلام عليكم..
"وعليكم السلام انسه آلاء سامحيني اللي كلمتك في هالوقت بس الامر ضروري"
الاء؛لا مازال الوقت بكري استاذ..
"تمام..الاء في عندنا نزيله في الفندق تبي دير لولدها مفاجأه هي كانت برا البلاد وجت بش تحتفل بنجاحه وقالت تبي ديرله حفله في الفندق وطبعا لازم من الطورطه لحفله النجاح..
الاء:اها فهمت عليك ندير فيهم الطورطات والحمد شغلي ديما يشكروا فيه..
اريج؛حني بس ومجامله ياريت حقه..وقعدت تضحك..
والبنات يضحكوا بكتمان..
"معناها نعبوا عليك"
الاء:ايه استاذ بس معليشي نبي نعرف امتى تبيها؟
"الخميس"
الاء:تمام..باهي هو ناجح في شني بالزبط؟
"ع حسب مافهمت منها ولدها خدي الماستر"
الاء:تمام تمام بكل بإذن الله نديرلك حاجه حلوة ونشرفك قدامها..
"هدا اللي متوقعه منك وطبعا هادي حسابها بروحها"
آلاء بإبتسامه:تمام..خلاص ان شاء الله يوم الخميس نجيبها بروحي..
"في انتظارك..السلام عليكم"
الاء؛وعليكم السلام..
وسكرت وهي تقول..حيي عليا يبي طورطه حفلة نجاح لمراة كانت عايشه برا شن نديرلها هادي بش يعجبها!؟
اريج وهي تقلد في آلاء..
/ندير فيهم الطورطات والحمد شغلي ديما يشكروا فيه..ع شن عابيه وانتي تستفي في الكذب..
الاء؛مش وقتك توا..قوليلي شن ندير..
اريج؛اني مانفهمش في الحلو نفهم في الكوارث للي يديرها الحلو في السنون بس.
الاء بقرف؛ماتجي منك تضحك..
صفاء؛شوفي بيبو تفتلك في الحلو حتى هي..
الاء:ايه صح جبتيها خل نمشي نشوفها..
وناضت ومشت طلعت من الدار..
صفاء بإبتسامه؛حلو لما الوحده تخدم في حاجه تحبها وطلع منها فلوس..
اريج:ايه..الخدمه بشكل عام حلوة وتعلمك هلبه حاجات..
صفاء:بإذن الله بعد نخش الجامعه بنخدم..
اريج؛اهم شي تكون امك راضيه..
صفاء:هي بروحها تخدم مش حتمانع..
ومروة تسمع فيهم وهما يهدرزوا ع امها وخاطرها موجوع..
🍃🍃🍃🍃🍃
وبرا من حوش الواعر..
لشارع القهوة اللي كانت انظار ناسه متوجهة لمطحن جنه واللافته الجديده متاعه تتعلق عليه..
الفرحه اللي فيها المهدي ماعاشهاش من مدة طويله وكأن المطحن ليه هو...
وفرحة التارقي ماكانتش اقل منها في داخله شعور حلو غريب مخالط هالفرحه ماعرفش بشن يفسره بس كان حابه هلبه ومتمنيه يطول معاه ويكبر..
علي:خير من اللي فاتت..
لطفي بإبتسامه؛حتى اني عجبتني هلبه..
عبد القيوم؛باهي الحمد لله الحق كنت خايف ماتكونش كيف ماتبوا..
حسين؛انت ديما فوق التوقعات..
ربيع:ماتشكراش هلبه قالك الشكران في الوجه ذميمه..
علي:انت شن تبي جاي هني؟
شدوا ضحكتهم بالغصب وهما يشبحوا لربيع.
ربيع بإبتسامه ارتباك؛جيت نشارككم افراحكم ياحاج ونبيكم تشاركوني افراحي بعد يومين ان شاء الله..
علي:تو اني مش عارفه كيف انت تتزوج وعبد القيوم قاعد عزابي..
ربيع؛لا عبد القيوم خاش ع مشروع ترهبين فوته..
علي؛شن يقول هدا!؟
عبد القيوم وهو يحرك في يده حركه دائريه جنب راسه قاله..
فوته..
ربيع قعد يضحك لما شاف علي يفنص فيه تلاشت ضحكته وقال..
/مبروك عليكم المطحن ياحاج..
وحسين يضحك بكتمان..
"هاه حاج لطفي هكي باهي"
كلهم توجهت انظارهم للافته..
ارتسمت ع وجوه ملامح اعجاب..
والمهدي وهو واقف قدام المطحن كان يتأمل في اللافته بعيون باينه فيهم لمعة الدمعه..
☘لطفي رفع ابهامه وقال؛ميه ميه يعطيكم الصحه..
ع جية الصيد وهو يشوف للافته قال..
/ع بركه يالطفي..
لطفي التفتله وقاله بإبتسامه..
/ ان شاء الله..بارك الله فيك..
🍃وشويه وجي المحجوب جايب نبيله شاف اخر التحضيرات اللي اندارت لحفلة الافتتاح غدوة وقعد يبان قدام الموجودين وكأنه صاحب المكان مع نساباته..
🍃🍃🍃🍃🍃
"منظرها حلو ومميزة هلبه اكثر من الاولى"
طوبى بحماس؛تشوقت نشوفها..
اريج؛غدوة عطله مش حنشوفوها حتى غدوة..
اميمه:تو يصوروها في البث المباشر ونشوفوها..
طوبى:علمي حسين يصور كويس ياميمو بالله عليك..
اريج بضحكه؛تو يلوح التليفون ع تركينه ويلهى..
مطيرة:نلف روحي في عبايتي وناخد خمار غرفه ونطلع نصور بروحي وخلاص..
قعدوا يضحكوا..
نبيله بإبتسامه:قولوله يعطي تليفونه لحد تاني يعرف يصور..
صفيه:هو هدا حتى اني نعرف ولدي باله مش واسع يصور شويه بعدين يدس هاتفه في جيبه..
قعدوا يضحكوا..
وكملوا هدرزتهم وسط اجواء حلوة مشبعة بالدفء العائلي اللي يحسه كل من يعاشر عيلة الواعر او يولي واحد منهم..
كل منهم عنده هموم زي الجبال حبسها في داخله في هديكا الجمعه الحلوة وتنساها بش يعيش شوية سعاده..
السعاده اللي ولت غاليه هلبه هالايام زي ماكل شي قعد غالي في حياتنا..ماعدا الكدر والاحزان ولت يابلاش...
🍃🍃🍃🍃🍃🍃
بعد صلاة العشاء..
"هادي كندرتك سدرة؟"
سدرة؛ايه هادي..ولبستها في رجليها ومروة تشوفلها وهي تفكر تقوللها حاجه بس كانت مترددة فيها..
سدرة؛خلاص خشي مروة تو نطلع بروحي..
مروة:لالا خليني نسقدك للباب..
ومشت بيها للباب الخارجي..
قبل لتفتحه مروة قالت..
/سدرة بنقولك حاجه..
سدرة؛قولي..
عقدت مروة حواجبها وحركت راسها بالنفي وقالت..
/لالا خلاص..
وفتحتلها الباب...
وتلقى قدامها محمد هو اللي جاي ياخد في سدرة..
لما شاف مروة تفاجئ هلبه وارتبك وقلبه قوت نبضاته لدرجة انه خاف تسمعه..
اما هي طول عيونها اللي كلهم حزن تعبوا دموع..
وسدرة تمرر في نظرها بيناتهم..
هو عقد حواجبه وغير عيونه لأخته وقال بحده..
/اطلعي هيا
مروة في هديكا اللحظه بدون ماتفكر قالت..
/محمد بنقولك حاجه..
محمد بعصبيه؛هيا اطلعي..
طلعت سدره وهي خايفه اول مرة تشوف خوها هكي..
وهو جبدها من يدها وخداها ومشب بدون مايغلط ويشوف لمروة او يرد عليها بحرف..
مروة حست بخيبة..خيبه قويه...
سكرت الباب ودموعها تنزل..
جنب شعور الخيبه اللي سيطر عليها زادت كرهت نفسها اللي خلت اعز اتنين ع قلبها ياخدوا منها هالموقف...
خشت بخيبتها ووجعها للحوش ورجعت قعمزت وسطهم...
كانت معاهم جثه بس..وعقلها في عالم تاني..
🍃اما امها..
كانت مستفرده فيها فردوس في دار امها وبوها..
🍃فايزة بدموع ألم:حاسه روحي مخنوقه بنموت مش مقدرلي في هالحياة نعيش مرتاحه بكل شاقيه من يومي..
فردوس؛ومني مش شاقي في حياته يافايزة..
فايزة وهي تبكي؛ماشاقي كان اللي عنده بنات يافردوس الله يرحمها امي كان عندها حق ان شاء الله تسامحني توا بس وقفت ع كلامها..
فردوس وهي عاقده حواجبها بإستنكار..
/ع شني وقفتي قوليلي!؟ امك اللي كانت تفكر ان جيبة الولاد خير من البنات وين كبرت وولت في عازة لوحوها ولادها في دار العجزةوطلعتيها انتي وعانتيها لين ماتت..
شوفي قدامك بوي اللي ماجاب كان ولد واحد ع اربعه بنات..
هالولد هو اللي وطاله راسه ودخله المراكز وركبه الحشمه والعار ونهار تسكر المطحن كان اول الشامتين فيه لكن البنات شن داروا..سدرة قاماته سنداته مسحت عار الولد وخلت بوي يرفع راسه ببناته..وين طاحت بيه وسكر المطحن لقانا حني حواليه كل وحده فينا كانت مستعده تعطيه روحها المهم يرتاح المهم نشوفوا وجهه يضحك..اشبحيلي اني شوفيلي عندي ولد واحد بس مش طايق يقعد معاي متحشم مني يقولي انتي تحشمي فيا لإني نخدم عليهم ومانبيهم يقعدوا في عازة حد..وفي المقابل شوفي خواته شن يديروا بش يعاونوني..حتى الاء اللي كانت مش عاجبتها عيشتنا حست بيا وحنت عليا وقعدت تعاون فيا..احمدي ربك عندك بنيات حنينات فيك تلقيهم بعدين يافايزة خير ماجبتي ولاد يطلعوا لخوالهم ويكون مصيرك زي مصير امك..
كلام فردوس كان في الصميم..خش لقلب فايزة وأثر فيه هلبه...
بس مع هذا ماقدرش يبدد خوفها اللي قاعد يكبر يوم عن يوم ع بناتها..
رشفت فردوس ومسحت دموعها اللي كانوا نازلات ع ذقنها وقالت..
/البنات حناين يافايزة حناين ربي يحبه هلبه اللي يرزقه ببنات ماتخليهمش يحسوا رواحهم حمل عليك راهو الحاجه توجع هلبه تخليهم مرات يضحوا هلبه يش يريحوك يضحوا بعمر كامل...
وهني فردوس كانت تقصد طوبى..
فايزة تنهدت بألم وقالت..
/حسبي الله ونعم الوكيل في من كان السبب حسبي الله..
فردوس:ايه والله حسبنا الله في كل ظالم يظلم بنات الناس ويجني عليهم..
فايزة بإستغراب..
/فردوس في حاجه صايره مع طوبى صح؟
فردوس رشفت ومسحت انفها وهي تقول..
/مافي شي..هي تعالي نطلعولهم..
ومشت طلعت طول...
فايزة وهي معاها بعيونها قالت بقلق..
/إن شاء الله خير وخلاص..
بعدين مسحت دموعها ومشت طلعت من الدار وسكرتها...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
تاني يوم..
الثلاثاء..الأول من مايو..سنة 2018..
🌼الساعه 11:16صباحا..
في احدى العيادات..
كانت غرفه في حجرة الكشف ومعاها نبيله..
جايين يطمنوا ع الاجنه ويعرفوا جنسهم..
الدكتورة بإبتسامه وهي تشوف لشاشه جهاز الإيكو..
/الله يبارك الله يبارك..
غرفه بحماس:شنو دكتورة؟
الدكتورة:ولاد الزوز ياغرفه..
نبيله ابتسمت بفرح وقالت..
/الله يبارك الله يبارك..
وغرفه عيونها دمعوا من الفرح وهي تقول..
ياعمري..هدا تفسير حلمتي حلمت بروحي لابسه زوز خواتم لولو..
نبيله بضحكه:الله يبارك تشوفيهم ع خير يارب..
غرفه بإبتسامه؛آمين يارب..وفي نفسها كملت دعائها وهي تقول.."وبوهم معانا"
الدكتورة:توا ياغرفه لازم ديري بالك ع روحك اكثر من قبل انتي في مرحلة مهمه من الحمل نبيك تكوني فيها حريصه ع نفسك وع البيبيات..وابتسمت..
غرفه هزت راسها وقالت؛إن شاء الله..
ونبيله تشوفلها بإبتسامه يشوبها شي من القلق..
🍃بعد ماانتهي موعد غرفه مع الدكتورة روحت بيها نبيله لحوش ماليها..
بشرتهم وزادت فرحتهم وخلت بعضهم يتفائل خير في الايام الجايه..
بس البعض الاخر كان فرحهم ظاهري وفي داخلهم عايشين حاله من القلق والخوف المستمرين..
حالة الفرح اللي هما فيها تزيد من خوفهم لأنهم عارفين مسبقا ان عمر هالفرح قصير والايام الجايه حتكون اصعب من اللي فاتت...طوبى...
🍃🍃🍃🍃🍃
الساعه 6:00مساءا..
شهر مايو بوابة الصيف..
وبدايته كانت بداية جديده لمطحن الجنه..
في مساء الثلاثاء بجوه المعتدل الجميل..
كانوا الاحباب والجيران واقفين قدام المطحن..
اللي كان قدامه شريط لونه ابيض ..
يراجوا فيه نساوين عيت الواعر امتى ينقص وهما ملتمات قدام لاب توب طوبى يتفرجوا ع البث المباشر..
اللي كان يصور فيه..نضال بتليفون حسين..
ماكانوش هما بس اللي يتفرجوا ع البث المباشر..
🍃برا حدود القارة السمراء للقارة العجوز..
كان يوسف مقعمز جنب سدرة المنتهى اللي قاعده في عايشه في عالم غير هالعالم..بس خوها يسعى ديما يربطها بعالمنا ع قد مايقدر بش يردها بمشيئه الله تعالى ليه..
🌼🌼🌼🌼
لطفي:لا بوي والله مايجي..
علي:قص قص وماتشيطليش ريقي..
ضحكوا الحاضرين..
وعبد المطلب اللي كان حاضر معاهم وهو واقف ع عكاز قال..
هيا..يالطفي..الدنيا ليلت..
ابتسم لطفي وخدي المقص..
وقال..بسم الله..وقص الشريط...
صفقوا الحاضرين..
☘والنساوين في الحوش كان تصفيقهم حار وكله حماس
ومن كثر الحماس زغردت مطيره وخلتهم يضحكوا وهما مصدومات..
🌼يوسف وهو مبتسم..
/عمي لطفي قص الشريط بعد ماتعازموا عليه هو جدي..
خشوا توا للمطحن..الله يبارك الله يبارك..كان نقولك ياسدرة شن قاعده نشوف..
مطاحن كبار جدد قريب تلاته..لالا اربعه كل وحده فيهم لقهوة شكل...ماشاء الله ماشاء الله..الكياس جدد..اياااه داروا حتى اقراص للقهوة..ضحك وقال..هادي حاجه جديده بكل..
صفر صفر فيهم سزوات قهوة وفناجين اشكال والألوان..
بسيسة..ومكسرات...وحتى شاميه وحلقوم..الله
يبارك المطحن ولى حاجه تانيه ياسدره..
☄وهو يحكيلها وهي تسمع وجزء الذاكرة اللي في عقلها تنشط وقعد يصورلها في ايام زمان لما جددت في المطحن وطورت فيه واخر مشهد تصور قدام لما رفعوا لافتة المطحن الجديده وقتها..
🌼يوسف:تعرفي المطحن توا ناقصك انتي بس تكون توقفي في وسطه توجهي وتشري وتبيعي..
☄وعقلها بدي يصورلها اللي قاله يوسف بالكلمه...
🍃🍃🍃🍃🍃🍃
وهما يتفرجوا البث من شاشة اللاب توب..
صفيه؛الجيران كلهم حاضرين حتى المهدي جي لكن بوه مهناش..
مطيره بمزح؛ماهو المحجوب حاضر..
نبيله شبحت لمطيره بطرف عينها..
واللي حواليهم قعدوا يضحكوا..
غرفه؛حسين نقز ع الشاميه طول..
طوبى بضحكه؛عيونه..
اريج؛قعد نضال يصور فيهم وخلاص ماقال واحد فيهم نمدله فنجيل قهوة..
صفاء:اهو عبد القيوم عطاه اهوا..
"منور تارقي منور"
اريج:ياوخيتي سلمه هالتارقي..
الاء:نعترفلكم اعتراف اني وليت معجبه بيه ياعيله..
فردوس:راك تتحشمي..
ضحكوا..
آلاء؛لا والله حق،عليك شخصيه هو والالوان الرماديه اللي يلبس فيها خيال ياناس..
اريج؛بنتك تبي تهيج في لاند كروزر يام هي هادي..
فردوس؛بنتي هادي بنوضلها اللي لاتستحي لاتتحشم..
سدرة بنت المهدي قالت بضحكه..
/بابا قاله حاجزلك سدرة لين تكبر ع خاطر السيارة..
كلهم قعدوا يضحكوا..
مطيره؛ماطامعين فيه مسكين..
صفيه:حسين قريب كل ليله عنده يقولي عشاي عند التارقي..
سدره؛حتى بابا يفوت في عشي جداي وياكل عنده..
مطيره:كلا بوك يابنتي..الله يلوم اللي يلومه ع قولت حياة الفهد..
صفيه قرصت مطيره وفنصت فيها..
مطيره فنصت وهي تقول؛ووك عليا خيرك تقرصي!؟
واللي حواليهم يضحكوا لين عيونهم دمعت..
☘ "وجَلسةُ أُنسٍ في اِجتماع أحبةٍ
بهم تبسمُ الأفراح يا لذّة السَعدِ."☘
☘☘☘☘☘
والتموا بعدين عالة مطيره اللي كان فيها الخير كله..
وكله صوروه البنات ونزلوه في ستورياتهم وطوبى وحده منهم...وركبت عليهم كلمات اغنيه جميله لأحد المنشدين.
حبايبنا حوالينا..نسم يانسيم علينا..
🍃والستوريات هادم..
كانت تتفرج عليهم مغليه من تليفون بنتها خديجه طلب الاضافه اللي باعتاته لطوبى بحسابها الجديد قاعد معلق..
مغليه:ويقولوا عليهم متنكدين حني المتنكدين مش هما..
خديجه؛معناها بتحضر فاتحة نسرين..
مغليه؛ومحلاها وهي مش حاضره هدا اللي مازال ناقصنا الناس تدوي علينا..
خديجه؛قولي لسبع البرومبه يشحط روحه ويحمرلها العين تمقرست هادي خلاص..
مغليه وهي رافعه حاجبها؛تو نقوله وكان ماتصرفش هو اني نتصرف..
🍃وسبع البرومبه ع قولة اخته..
في البلاد اللي هو فيها تفرج ع البث المباشر بعدين شاف ستوريات مرته..
وهو يتفرج عليهم كان حاس بضيق شديد..
طوبى من غيره عايشه ومرتاحه وفرحانه ولامعتبراته موجود ولاهامها وجوده من عدمه اساسا...
وهالشي مخليه بينجن مش عارف كيف يردها ليه ويخليها ترضى عنه...
🍃ومش عارف اللي قاعده توتيتله فيه المراة اللي مجننها بعده هو عنها وتجاهله لوجودها..
صابرين؛اسمعي..
نجاه سيبت المخطط اللي كانت ترسم وقالت لأختها بلهفه..
/شن صار!؟
صابرين؛الاسبوع هدا قاعده في المغرب الاسبوع الجاي تولي لليبيا خديتلك معاها موعد نهار الاثنين الجاي..
نجاة رفعت حاجبها اليسار ووجهت نظرها للمخطط بعدين قالت..
/تمام..
صابرين؛تعالي تعشي..
نجاه؛مانبيش..
صابرين؛براحتك...ومشت طلعت من حداها..
ونجاه ترسم ع المخطط بالمسطره وع وجهها ملامح الحقد وعيونها مليانات دموع...
🍃🍃🍃🍃🍃
الساعه 11:00ليلا..
كانت أريج مقعمزة ع سريرها وهي تتفرج ع الصور اللي نزلهم المصور متاع حفل الافتتاح..
وقفت عند صورة لنضال وهي تتأمل بإبتسامه وتقول..
/نجيهولي ياربي هو وطرحاته ونظاراته..
وحداها ع سرير تاني طوبى حتى هي دايرة روحها لاهية بتليفونها وتشوف في نفس الصور وهي تسمع فيها..
كانت طوبى تحدث في نفسها بحزن
"كل يوم تتعلق بيه اكثر من اليوم اللي قبله..كيف بيصير فيها بعدين بس!..ياربي هونها من عندك يارب"
ع خشة آلاء عليهم وهي تقول..
/بنات شفتوا البوست اللي نازل في قروب ******
الزوز شبحولها وقالوا..
"بوست شني!؟..شن هو؟"
الاء قعمزت ع سريرها وقالت..
/وحده قالت انها كانت في مركز اميراتي متاع فايزة..
شافت لتليفونها وقالت..قالت امس حصلنا رعشه في مزين اميراتي متاع فايزة الخويلدي خشوا علينا تلاته نساوين 4 في6 وقعدوا يضربوا في العاملات ويكسروا في المزين وحني قعدنا نتعايطوا وصارت فينا حاله وبعد ماكسروا المزين كله طلعوا منه وفايزة صارت فيها حاله مسكينه قعدت ترعش وتعيط ومعاش عرفت شن دير..
والله يابنات كان نحكي القصه لراجلي يحلف عليا معاد نخشها مزين..
قامت عيونها الاء ومررت نظرها عليهم وهي تقول..
/زعما هذا كذب ولاحق؟
طوبى وهي مصدومه..
/مش باين عليها شي بكل..
اريج؛نشبح فيها كيف تبان مهمومه لكن نحسابها ع مشكلة مروة بس..
طوبى بقلق؛كان حقه الدوة هادي معناها في حد حاط فايزة وبناويتها في راسه..
اريج؛لاحول ولاقوة الا بالله وخلاص
~~~~~~~~~
صفاء بصدمه؛حقه الدوة هادي ولاكذب؟
فايزة وهي ضم في الماعين في كوجينتها؛اطلعي من حداي صفاء..
صفاء:لامش طالعه قبل لتقوليلي حقه الدوة هادي ولالا؟
فايزة قعدت تحط الطواسي في الدولاب وهي ساكته..
وصفاء معاها بنظراتها المصدومه..
وحدا الباب كانت مروة تسمع وهي خايفه وتبكي بدون صوت..
صفاء هزت راسها وقالت؛هدا علاش مامشتيش للمزين اليوم ولا؟
غمضت فايزة عيونها بشده وبحركه مفاجئه حدفت الطاسه لوطا وكسرتها...
انفجعوا بناتها وزادت فجعتهم لما قعدت تقول بإنفعال..
/ايه.هدا علاش مامشيتش ومعاش بنمشي خلاص نندري عليهم شن مازال يديروا فيا بعدين..نندري عليهم شن يديروا فيكم واني مهناش!!
ديما نقول ديما..ديما نقول مادخلكم بحد ماليكم علاقه بحد
نتجدا فيكم تفكوني من المشاكل ماتعطوا لحد فرصة يتشمت فينا الناس عيونها مفتوحه علينا يراجوا فينا ع الغلط ماعندنا حد يتقينا شرهم ماعندنا حد..
صفاء ودموعها ينزلوا؛عندنا ربي ياماما..
فايزة انهدت بالبكي وهي تقول: تعبت والله تعبت معاش عندي حيل خلاص..خلاص نبي نرتاح ياربي نبي نرتاح..
قربت صفاء لأمها وضمتها وقعدت تبكي معاها..
اما مروى اللي كانت واقفه برا تسمع مشت طول لدارها..
خشت للسرير وغمت روحها وهي تقول بصوت باكي مكتوم..
"كله مني اني..كله مني.."
🍃🍃🍃🍃🍃
تاني يوم..
الساعه 7:46 صباحا..
بعد ماقعدت ليلها كله فايقه للفجر...بين قيام ليل وقراءة قرآن واستغفار..
فيقت بناتها بس توصلهم لمدارسهم..
صفاء وتاله فاقوا بالغصب ملامح التعاسه كانت باديه ع وجوههم وهما يفطروا ..
فايزة وهي تراقب فيهم قالت..
/خيرها مافاقتش لتوا؟
تاله؛نوضتها اكثر من مرة ماتبيش تنوض..
صفاء؛ماتبيش تمشي شكلها..
ناضت فايزة ومشت طلعت وهي معصبه تقول..
/مش بكيفها هو تمشي غصب عنها الدلع الزايد متاعها هدا..
ناضوا صفاء وتاله وهما خايفات ولحقوها..
🍃وصلت فايزة للدار وفتحت وخشت وهي تقول..
/مروة..مروة نوضي مش ناقصاتك..
صفاء ؛خلاص مروة نوضي وفكينا..
لارد..
فايزة بغضب مشتلها حولت من عليها الغطا وهي تقول..
/تحركي نوضي هيا ماتخلنيش نضربك..
صفاء بخوف..
/ماما خيرها راقده هكي؟!
تاله بخوف وهي ترعش..
/زي الميته..
دب الرعب في قلب فايزة لما ركزت على بنتها..
قربت منها وقعدت تفيق وهي تقول..
مروة..مروة...حط يدها عليها وقعدت تهز فيها وهي تقول..
/مروة..مروة نوضي..
وبدت تعيط وهي تقول..مروة..
خواتها الزوز قعدوا يصرخوا وهما يقولوا في اسمها..
وفايزة اللي كانت مرعوبه نهضت بنتها وهي تفيق فيها..
مروة ياماما نوضي مروة بالله عليك ياماما ماديريش فيا هكي..
ثبتت نظرها ع شريط دوا كان فاضي تماما محطوط تحت مخدتها..
طول حطت وذنها ع صدرها بش تسمع دقاته..
بعدين حطت يدها ع مكان في رقبتها وقالت بعياط..
صفاء بري كلمي طوبى كلميها قوليلي مروة بتموت ابعتولي حد يجي يرفعها معاي..
صفاء طلعت تجري وهي ميته من الخوف ع اختها..
اما تاله.قعدت تشوف لأختها.بصدمه وهي تتفكر في لحظه موت جدتها مشتده...
وفايزه كانت تحضن في بنتها وهي تقول بهلع..
/لا ياماما ماديرهاش فيا ياماما لا بالله عليك الموت قهرني بمافيه الكفايه يامروة يابنتي ماديرهاش في امك يامروة..
بالله عليك يابنتي...
#عابي_على_ربي
#طوبى
...يتبع...
