(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_التاسع_والأربعين"خوي2"
《معظم أحداث هذه رواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
بعدها عنه وشد وجهها بإيديه وقال ودموعه تنزل..
مختار:مش اني اللي حرمتكم ياغرفه مش مني..
وباس جبينها بعمق..
وفردوس تشوفله وهي تبكي..
ضم غرفه من جديده وباس راسها..بعدين شبح لفردوس..
لاحظ نظرات عيونها..
نظرات لو وعتاب واستنكار ومع هذا كانت تبكي..
قاللها بنبرة الم متسائل؛ماتبيش تسلمي عليا يافردوس؟
تباعدت غرفه وهي شاده في خوها والتفتت لفردوس..
فردوس حركت راسها يمين ويسار وقالت:مش عارفه..
مختار:كيف مش عارفه؟!
فردوس:مش عارفه اذا فرحتني جيتك ولاكدرتني..مش عارفه اذا كنت نبيك تولي..ولالا..مش عارفه..
هو شد غرفه من يدها ومشي بيها للكرسي..
قعمز غرفه وهوقعمز في النص وقعد شاد يدها..
بعدين شبح لفردوس وقال؛اني جاي نبي نسمع منكم ونبيكم تسمعوا مني طلعوا اللي في قلوبكم واني نطلع اللي في قلبي بس نصفوا لبعض..
فردوس؛قول اللي عندك..قول شن صار معاك السنين هادي بالك نقدر نحدد موقفي منك..
شبح ليدها وخداها شدها وهو يقول:شفت الويل والذل والهوان من لما طلعت من هني...
☘☘☘☘☘☘
واقف قدام المطعم يراجي امتي يشوف جاره وصاحبه طالع من القهوة..
طلع المهدي من القهوة..نادى عليه ربيع..
"مهدي"
التفت المهدي وشبحله..
جاه ربيع وقف عليه وهو يقول:نبيك في موضوع ضروري..
المهدي:ان شاء الله خير..
ربيع:تعالى وراي..
مشي ربيع..والمهدي مشي وراه بإبستغراب..
خش للمطعم اللي مان مليان زباين..
مشي لمكتبه ووراه المهدي..خشوله الزوز وربيع سكر الباب..
المهدي:شن في خيرك!؟
زفر ربيع وقال:ليا يومين هكي شايف حاجه وترددت نقولك عليها..وضميري ماريحنيش بكل واني داسها..
المهدي بقلق:تكلم طول ياربيع..
تنهد ربيع وقال:يومها شفت نسيبك راجل اختك نسرين...كان راكب مع وحده منظرها استغفر الله وخلاص..وضحك ع جو خيي..
لقيت روحي تلقائي لاحقهم...
مشي بيها لحي دمشق...بالزبط في.****** وخش بيها غادي..
المهدي سمعه للأخر بعدين قال:وعلاش انت طول فكرت انها وحده برانيه..مش قريبته..خالته عمته حاجة زي هكي علاش طول درتها صاحبته وفي بيناتهم شي غلط..
رد المهدي فاجئ ربيع معاش عرف يرد..
المهدي:هلبه حياش خربت من ورا سوء الظن وتقديمه ديما ع حسن الظن...بعدين ننصحك نصيحه ماتخشش في امور تجيبلك وجع راس..اني هدا اللي ماشي بيه في حياتي نلهى بنفسي وعيلتي بس ماليش علاقه بحياة غيري الخاصه لأني عارف شن بنجني بعدين...مشاكل الله اعلم شن يحلها واني اللي فيا سادني..
وصلت رسالة المهدي لربيع..
ابتسم وهز راسه وهو يقول:تمام تمام فهمت عليك..اللي معاه في السيارة خالته ماهو تشبه لأمه هلبه..بتسألني من وين نعرف امه نقولك شفتها معاه في جردينة زاوية الدهماني .
المهدي كان يحاول يبان عادي قدام ربيع بس من داخل يلعن في سنسافيل حامد..
قال لربيع؛ع العموم مشكور في النهايه انت تكلمت وتصرفت بحسن نيه بارك الله فيك..
بعدين مشي فتح الباب وطلع ..
وربيع ضحك نص ضحكة ساخره وحرك راسه يمين ويسار اسفا..
☘مش عارف ان عيلة شنيبه ولت سمعتهم اهم حاجه عندهم بالذات في السنين الاخيره..بعد ماعلي ذكرهم بين الناس وولت ليهم قيمه كبيره..ومعارفهم الواصلين في البلاد زادو...اي فضيحه مهما كانت صغيره ولاكبيره بالتأكيد حتشوهم وتزعزع مكانتهم بين الناس..
والمهدي بصفته كبير العيله بعد بوه وظيفته يحافظ عليها ع قد مايقدر ومايخلي حد يدوي عليهم ولايجيب سيرتهم☘
☘☘☘☘
"سدرة!؟"
مختار ودموعه ينزلوا:ايه سدرة اللي لعبت دور الاخت المضحيه..كنت نترجى فيها نبكي بكي..وهي ماتخلي ماتقولي وفي الاخير تسكر عليا..مرتين نتصل من الحبس وربي عالم بحالي وبوضعي غادي وهي زادتني علي مابيا دمرتني وهدت حيلي..خلتني نزيد ننذل وننهان..
غرفه كانت تسمع فيه وهي مصدومه..
اما فردوس كانت تفكر...علاش سدرة دارت هكي!؟.
مختار:حتى بعد روحت هني السنه اللي فاتت ومشيت لحوشنا..دارت معاي نفس الشي..حتى ان طوبى يومها روحت واني غادي..منعتني نشوفها طلعتني من حوشنا من الباب الخلفي وكأن مجرم وهي تهدد فيا وتقول لوجيت مرة نقتلك..حب السيطره والظهور خلوها هكي..خلوها تبي تمحي وجودي في العيله كلها بش تقعد هي البطله في عيون الكل..
فردوس:حرام عليك الكلام هدا يامختار ..اللي شافاته وعاناته سدرة اضعاف اللي انت عشته..سدرة اللي قعدوا في زوز بنات صغار وحده في الابتدائي والتانيه حتى الدوة ماتعرفيش تدوي..
ربتهم وكبرتهم وعلمتهم..وزوجتهم..
سدرة اللي ولت راجل الحوش..شدت المطحن مع بوي وقعدت تمشي في خدمته لما تعب بعد موت امي..
سدرة اللي ضاعوا احلى سنين عمرها وماقدرتش تتزوج وتعيش حياة طبيعيه زي البنات..
ماكانتش فرحانه بشكل حياتها كانوا القهرة والحسرة كل يوم باينات في عيونها ومع هدا كانت تعطي ومادورش..
ربت معاي بناتي بعد ماانفقد راجلي في 2011 ياما مدتلي وعاونتني وفتحتلي حوشها درتها معمل نطيب فيه للناس..
سدرة دارت كل شي مفروض انت ديره يامختار بس مش برضاها غصب عنها وفي الاخير كله ولى عليها وع صحتها..
وكله بسبب مني يامختار!؟
مختار كان يسمع فيها شن تقول ودموعه ينزلوا وهو شاد ع قبضة يده بقوة من الغضب..
بس فجأة رخاها لما سمع اخته التانيه تقول بغضب.
غرفه ودموعها ينزلوا:خلاص عاد ياسركم ياسر..لامتى بتقعدوا محملينه ذنوبه وذنوب غيره! وبعدين البنادم في هالدنيا كان غلط معاش ينعطى فرصة تانيه يصلح فيها غلطه!!لازم يتحمل نتيجه اللي داره لين يموت!؟...
سدرة اختي وع عيني وع راسي وجميلها في رقبتي لين نموت لكن الحق ينقال..
مالهاش اي حق تمنع خونا يشوفنا وتوقف بينا وبينه مالهاش اي حق توقف بين الولد وبوه...مفروض خلتنا حني ناخدوا القرار..مفروض خلت بوي ياخد القرار..!
وبعدين معاش تقولوا الكلام هدا متاع ضحت بسنين عمرها ومش عارفه شني..هي اللي اختارت ماحد قاللها تقعد من غير زواج...وبعدين كلنا عارفين هي علاش قعدت من غير زواج السبب الحقيقي كلنا عارفينه..
فردوس قعدت تسمع في كلام غرفه بصدمه..
ومختار يشوف لغرفه وهي تتكلم بإبتسامه..عاجبه كلامها هو هدا اللي يبي يسمعه...
غرفه؛هي ناقمه عليه ماتبيشي بينها وبينه..
اما حني تخلينا برواحنا نقرروا نردوه لحياتنا ولانطلعوه منها..
شدت ع يده وقالت..عن نفسي اني مسامحاتك مختار وفاتحتلك قلبي قبل حوشي..
ضمها مختار وهو يقول:حبيبتي..واني نعطيك وعد نعوضك عن حرمان السنين اللي فاتت كلها..
ابتسمت غرفه وهي شاده في خوها..
وعبد الرؤوف يشوف وهو مبتسم..
بس ابتسامه يشوبها القلق..مخوفاته تبعات هاللقاء وحاس انها مش حتمر على خير..
☘شبح مختار لفردوس وقال:وانتي فردوس ماعندك شي تقوليه؟
قعدت ساكته وهي تشبح في الفراغ وتذكر في ليله لايمكن تنساها..
🎥في وقت سابق..
منذ 22سنه...
كانوا في الجنان الثلاته مع بعض..
مختار ؛خلاص وتيت كل شي وبنمشي..
سدرة نزلوا دموعها..
وفردوس قالت برجاء:لابالله عليك لا ع خاطر امي يامختار..
مختار بإنزعاج؛ع خاطر امي ع خاطر بوي ع خاطر خواتك..واني من مدور خاطري من مفكر فيا!؟
سدرة؛مختار بالله عليك حول فكرة الهجرة من راسك بالله عليك انساها يامختار يقولوا اللي يطلع من داره يقل مقداره انت حتتعب اكثر منا بروحك في الغربه..
مختار:ياما منهم اللي هاجروا وتغربوا وعايشين توا احلى عيشه بعيد عن بلاد الفقر هادي..
سدرة؛مش كل الناس تصدف معاهم وينجحوا في الغربه يامختار..
مختار:اني من الناس اللي حتصدف معاهم وتو تشوفي..
فردوس بيأس:مافيش فايده..
شدت سدرة ايديه الزوز بقوة وقالت؛فكر في امي بالله عليك تعرف قداش تحبك من لما قلت بتهاجر وهي ليلها ونهارها تبكي..كان مشيت اشبح شن يصير فيها يامختار..
مختار بمكابرة:مايصيرلها شي..لما تفكر في مصلحتي مايصيرلها..
جبد يده من سدره وقال:ماتحاولوش ع الفاضي خلاص..يومين تانيات وبنطلع...قلت نعطيكم علم بس..
فردوس بدت تبكي..
وسدره ودموعها ينزلوا؛اخر سؤال باهي..حصلت فلوس دبر بيهم امورك..
شبحلها شويه بعدين هز راسه وقال:ايه...خلاص خشي انتي وياها داخل...
فردوس قعدت تشبحله وهي تبكي..
وسدرة طول خلتهم وخشت داخل وقعدت تبكي..
اما فردوس جاته ضماته..
وهو كان يقاوم في مشاعره بكل قوة..
بعدت عنه وخشت داخل..
الوقت الحاضر📽
فردوس بألم ونبرة متهكمه:قلت يومين وبنطلع لكن طلعت فجر نفس اليوم ومعاك الفلوس..
فهم ع شني تحكي..تبدلت ملامح وجهه لحزن مع غضب..
شبحتله بإبتسامة الم وهي تقول؛مش قادرة نسامح ولاننسى...
وناضت مكانها ومشت لسيارة عبد الرؤوف..
غرفه بعدت عن مختار وقالت:تو تسامح بعدين ماتضايقش منها..
ابتسم وحط يده ع خدها وقال:مزبوط..يكفيني اليوم الكلام اللي سمعته منك عمري كله..الوحيده اللي انصفتني وقالت الحق..نبي منك خدمه وحده بس..تحاولي مع بوي..وحتى مع سدرة بالك ربي يلم شملنا ع يدك..
غرفه بإبتسامه وعيونها معبيات دموع:حنحاول بكل جهدي..
☘فردوس وين وصلت السيارة وركبت للخلف..
عبد الرؤوف حس ان لقائها بخوف ماكانش موفق..عكس غرفه..
شويه شافهم جايين ناحيته الزوز..
ودع مختار غرفه..ومشت ركبت السيارة وهي بطير من الفرحه..
اما مختار صافح راجلها وهو يقول؛معروفك هدا معاي مش ناسيه لين نموت..بارك الله فيك يابونسيب..
عبد الرؤوف ابتسم مجامله وقال؛وفيك بارك الله وان شاء الله بداية لم الشمل...
مختار بإبتسامه؛ان شاء الله..إن شاء الله..
عبد الرؤوف:هي نتلاقوا ع خير السلام عليكم..
مختار:وعليكم السلام..
مشي عبد الرؤوف ركب في السيارة..
ومختار واقف يشوفلهم..
شبح غرفه تشوفله وهي مبتسمه بفرح..
هو ردلها الابتسامه..غير عيونه عنها لفردوس لقاها تشبح القدام وع وجهها ملامح الحزن..
تحركت السيارة ودرقوا عنه خواته..وقعد بعيونه يتبع في السيارة لين تباعدت...
☘طول الطريق غرفه تحكي ع مختار وذكرياتها البسيطه..
توصف في شكله كيف كان وكيف ولى ومتشوقه امتى يرجعوا يلتموا مرة .
عبد الرؤوف كان يسمع فيها كيف تتكلم وهو فرحان لفرحتها..
شعور السعاده اللي هي عايشه فيه عنده بالدنيا...
اما فردوس فرياح الماضي اللي هبت عليها خلتها تتفكر المؤلم من ذكرياتها..
وتفكيرها كله كان محصور بسدرة اللي عاتت طول 20عام بدون شكوى ولاكلت ولاملت تعطي للكل وعمرها مااستنت مقابل..
وكتمت اوجاعها في صدرها لين مرضتها..وخلتها تذبل شويه شويه...
☘وصلهم عبد الرؤوف لحوش بوهم..
خشوا الزوز..
وكل وحده فيهم كانت بحاله تختلف عن الثانيه..
وين خشوا لداخل استغربوا فيه كيف مظلم..
غرفه:الضي هارب؟!
فردوس: والضي اللي والع برا شني!؟
وصلوا في فتحة الصاله..
انفجعوا من اصوات الانفجارات اللي صارت..
فجاة انفتح الضي وشافت فردوس قدامها ماأبهرها..
والقصاصات الذهيبه تنزل عليها..
ماخطرش ع بالها انهم محتفلين بذكرى ميلادها اللي نساته بعد فقدت مصطفى..
هما قعدوا يغنوا..
سنه حلوة ياجميل...سنه حلوة ياجميل..
سنه حلوة يادوسه..سنه حلوة ياجميل..
حطت ايدها ع صدرها وهي تضحك بدهشه..
مش مصدقه ان في حد فكر فيها ودارلها هالمفاجأة الحلوة..
جوها بالوحده وهما يحضنوا ويهنوا..
فردوس بضحكه:والله نسيته بكل بكل..
اريج بضحكه؛عارفينك...
مطيره؛فكرة سديرة راهو.
شبحوا غرفه وفردوس لسدره..
اللي كانت راسمه ع وجهها ابتسامه وهي تقاوم في اللي تحس بيه...
جتها وفي يدها زوز علب..
فتحت الاول وقالت؛هدا من طوبى قبل كانت ناويه تشريلك ذهب بس الذهب غالي هلبه خدتلك هدا ع قد فلوسها..
كانت طقم فضة بسيط..
فتحت التاني وقال:هادي مني ذهب صح بس مش من قدرك كنت نتمنى لو نقدر ناخدلك تاكم قنين يمشي معاك لكن الله غالب..
فردوس خدت منها العلب وحطتهم ع جهه وجت لأختها وضمتها وانهارت بالبكي..
سدرة تفاجئت في ردة فعلها اللي ضايقت غرفه..
واثرت في مطيرة واريج وآلاء..
سدرة:خير دعوتك قلبتيها عزي!؟
بعدت فردوس وهي تشوف لأختها بنظرات امتنان وحب وهي تقول؛لين نموت ماننسى اللي درتيه معاي..
سدرة:خيرها المختشه هادي!؟ طلعة السوق هادي ضربت عقاب الفيوزات!؟
ضحكت من بين دموعها وقالت؛كلام جي في خاطري نقوله وقلته..
ابتسمت سدره وحطت يدها ع خد اختها وقالت:حني خوات ياهبله خوات مالينا غير بعض..
فردوس هزت راسها بإيجاب وهي ساكته..
مطيره وهي متأثرة:ربي يخليكم لبعض ومايفرق بينكم..
كلهم قالوا:آمين..
اريج:هي خل نغيروا جو شويه..وصلت تليفونها بالسبيكر وشغلت اغاني..وجو لفردوس خدوها وقعدوا يرقصوا فيها..
سدرة حست روحها معاش قادره تتحمل..
انسحبت بهدوء ومشت خشت للكوجينه..
بسرعه دارت ميه وسكر وملح..
ومشت طلعت بيهم للدار..وهي حاسه روحها حتفقد وعيها خلاص..
شربت من الميه..
بعدين رقدت ع السرير ورفعت رجليها وحطتهم ع الدولاب..
☘حالة هبوط الضغط كان سببها السحر..هبوط ضغط عادي يتعالج بالطرق التقليديه..بس مايصاحب الحاله هادي هو اللي مش عادي..الشعور بالخوف..وبالموت.. وكأنه القلب حيوقف في أي لحظه وفي الايام الاخيره بدت تحس برعشه في الجزء الايسر من جسمها..الاعراض هادي كلها تختفي بعد مايطلع وقت المغرب...وترجع تظهر تاني بعد نص الليل☘
وهي راقده عيونها كانوا يشوفوا لمية الرقيه..تبي تاخد منها بس في شي يمنع فيها بقوة وهي كانت تستلمله بكل سهوله..
☘☘☘☘☘
في دارهم مقعمزات
وحده لاهيه بتليفونها..
والتانيه كانت تردد في الذكر ع اصابعها..
شافتلها اختها لماسمعتها تقول..
نجاح:استغفر الله العظيم معاش عرفت قداش قلت..
عواطف:اشري خاتم ذكر وريحي روحك..
نجاح؛شكلي بنديرها في اذكار طويله وصعبه وليها عدد معين يهرب مني العدد لما نعقدهم ع صوابعي..
عواطف بإستغراب:ماتقوليليش شن جاك هالفتره..بتلتزمي؟
نجاح:ياريت والله..
عواطف:مالاشن قصه شدانك المصحف الفتره الاخيره والاذكار اللي التزمتي بيهم..؟ في حد قالك ع حاجات تلتزمي بيهم يجيك نصيبك..قالت كلامها متهكمه
نجاح تنهدت بإبتسامه وقالت:لا قالولي تجيك راحة البال...
رفعت عواطف حواجبها تعجبا..
نجاح:ليا توا اربعه ايام ياعواطف..من لما التزمت بيهم واني حاسه جوي رايق ديما معاش نتعصب بسرعه معاش في شي يحرقلي دمي..حتى التلقيحه نسمعها نطنش..نسمع كلام مستفز نلقى روحي نرد عليه بهدوء من غير انفعال رد يسكت اللي قدامي..حتى وين بديت نسمع بوحده انخطبت ولاتزوجت معاش ندور..بالعكس نلقى روحي فرحانه وندعيلهم ربي يهنيهم..
عواطف:علاش انتي مواضيع الزواج كانت ضايق فيك؟
نجاح:ايه وضايقك فيك حتى انتي عواطف مانضحكوش ع بعض..
عواطف:اني بالذات مفروض مانضايقش ياحلوة بعد اللي صارلي شعفه وتوبه..
تنهدت نجاح بضيق وقالت:عندك حق..لكن تعرفي.
اكتشفت ان حني البشر نشبحوا ديما للنص الفارغ من الطاسه..
في الفترة الاخيره بديت معاش ندور في العرايس وشن دارو ووين مشوا..بديت نسمع لمشاكل المتزوجات وشكل حياتهم..
قعدت نقول لروحي..مرات ربي ماكتبلناش نتزوجوا رحمة بينا..بش مانعانوش من رجاله يخونوا فينا اربعه وعشرين وساعه..اومن رجاله يضربونا ويهينونا ويمسحوا بينا الوطا..
او من رجاله تمرمدوا في جرتهم في المحاكم ع حقوق ونفقه وحضانه وغيره..
عواطف:حسستيني ان الزواج شر..
نجاح؛لا مش شر..هو سنة الحياة بس مش الحياة وفي اللي مرتاحات اكيد..بس في المقابل في هلبه يتمنوا حياتي وحياتك..نطلعوا ونخشوا نخدموا نصرفوا ع ارواحنا بمرتباتنا ماتقعديش تراجي في حد يمدلك..عايشين وسط عيله كل اللي فيها مقدرينا ومحترمينا..زي البو زي الام زي الخوت زي نساويهم..مافيش عندنا هموم كبيره..همومنا ديما ع قدنا..
تعرفي سمعت كلمه في عرس ولاد شنيبه ع بنات الواعر..
وحدة قارنت بيني وبين نسرين بنت شنيبه..قالت نبان اصغر منها بسنين لما عرفت مواليدي ومواليدها..
ابتسمت عواطف..
نجاح تنهدت وقالت:تعلمت نقول الحمد لله وين شفت الخير اللي مغرقني فيه ربي واني مش حاسه بيه..
ضحكت عواطف وقالت:ماعرفتكش نجاح ارسطو!
نجاح بضحكه:حتى اني ماعرفتش روحي..بس واني نسمع في كلامي اللي قلته زدت حسيت بالراحه تصدقي!
عواطف:باهي قوليلي شن البرنامج الماشيه بيه..
نجاح:قبلها قوليلي ماتعرفيش وين نلقاهم خواتم الذكر؟
عواطف:في العطريه اللي في اخر الشارع بس راهو مرة قريت منشور ان مايجوزش تعتمدي عليها هي بس وتفوتي العقد ع الصوابع..
نجاح:عارفه بس بنخليها هي للأذكار الطويله بس..
عواطف؛تمام..هي قوليلي شن برنامجك..!؟
☘وعطت نجاح البرنامج كامل لعواطف..
اللي كانت نيتها من اتباعها الزواج وبس اكثر موضوع مسيطر ع تفكير وحياة عواطف...☘
🍀🍀🍀🍀🍀
وعدت الايام ..
وهما الزوز ملتزمات بيه وكا وحده فيهم كانت نيتها تختلف ع التانيه...
وهدا باين ع عواطف اللي حطت في راسها راما...وخلت خديجه تلهى عن حوش ماليها..
بش تعيش اميمه يومين حلوين مع عمر قبل ليبدوا الزوز خدمه..
في الوقت اللي كان فيه نضال يحاول مع بوه بش يوافق ع زواجه..ومحمد شنيبه مازال مسكر راسه ورافض
زي ماربيع رافض يخلي نسرين بنت جيرانهم عايشه مستغفله ومنهانه وكان يبي يدبر في طريقه تخليها تعرف لوين وصل راجلها في مراحل دنائته معاها..
ومايعرفش انه خلا المهدي يفكر معاه حتى هو بطريقه تخلص اخته من راجلها بس تكون ذكيه وفي صالحها..
☘ع العموم مافي حد في الشارع عايش حالة سكون وهدوء زي التارقي..
لان ليه مده ماشافش الجالي ولاشاف اي شي من افعاله القبيحه...
قاعد وين مايفضى يقعمز يكتب اشعار او ينزل يهدرز ع ربيع..ولا المهدي..ولانضال..ولابلال اللي تقرب منه الفترة الاخيره..
بس قلبه كان في حالة عصف مستمر وهو مشتاق للحظه اللي حتجمعه بأم العيون الحايرة...
🍃من جهة تانيه...
اتفقوا فردوس وغرفه مايفتحوش موضوع مختار لبعد خطبة آلاء...
وجي يوم خطبة آلاء..
كانت فضانيه بالمرة...لأن الطرفين متفقين..
داروها في مربوعه حوش اهل مصطفى وحضروها لطفي وعلي الواعر وحسين...في وجود اياد وتلاته من رجالة عيلته...
اما نساوين حضروا خوات فردوس وحمواتها وعزوزتها..
وجو خالات اياد وعماته...
وتمت الفضانيه..
مهند كان فرحان هلبه..
بس آلاء ماكانتش حاسه بالفرحه..ع قد ماحست بأن غليلها انشفي وطول الوقت وهي تفكر في حالة وليد...
🍀🍀🍀🍀🍀
يوم الجمعه..
في حوش لطفي الواعر...
بعد العصر..
لطفي كان طالع مع بوه لحوش واحد من معارفهم..
العمه مطيرة ماشيه تزور في اميمه..
واريج وآلاء عندهم خدمه فهاليوم..
وعدم وجودهم استغلوه غرفه وفردوس بش يفتحوا مع سدرة موضوع مختار ..
🍃غرفه:نبيك تسمعينا بدون عصبيه وتكوني هادي وحاولي تتفهمينا.
مررت نظرها عليهم وهي مضيقه عيونها بعدين قالت:تمام..وحده فيكم تتكلم..
فردوس شافت لغرفه..
غرفه شافتلها بعدين شافت لسدرة وشجعت روحها وقالت:يوم الثلات اللي فات مامشيناش السوق..
سدرة:مالا وين مشيتوا؟
بلعت فردوس ريقها وهي متوترة..
غرفه عقدت حواجبها بتوتر وقالت..
"مشينا نشوفوا مختار"
ابتسمت تهكما..
هما الزوز قعدوا يشبحولها ويراجو في ردة فعل اشبه بالعاصفه...
بس اللي جاهم عكس اللي توقعوه..
سدرة:كنت عارفه يوم زي هدا حيجي من لما روح وجي للحوش السنه اللي فاتت..
غرفه؛وعلاش ماقلتيش..
رفعت سدرة حواجبها وهي تشوفلها..
غرفه:اظني من حقنا نعرفوا عن حاجه زي هادي..
سدرة:وهاك عرفيته..وهاك شفتيه..شن زاد فيك ولافي عمرك!؟
غرفه:سدرة هدا خونا حتى حني مش خوك بروحك لو قررتي تقاطعيه عمرك كلنا ماتشمليناش معاك كل وحده تقرر بروحها حتى بوي خليه يقرر بروحه وماتأثريش فيه..
ضحكت نص ضحكه وقالت؛نقدر نتوقع هو شن هدرز عليكم فهاللقاء..
غرفه:قال اللي انتي قعدتي درقي فيه السنين هادي كلها..طلعتي انتي اللي حارمتينا منه مش هو..
سدرة وهي تضحك؛مشحونه شحنه ياغرفه..
غرفه؛شن قصدك؟
سدرة تنهدت بإبتسامه وقالت؛سلامتك وخيتي.
