#طوبى "جنة طوبى"
#جمان_فريد
#الجزء_السابع_والستين"مقاومه3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن شَدَّاد بْن أَوْسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قال : ( سَيِّدُ الِاسْتِغْفَارِ أَنْ تَقُولَ : اللَّهُمَّ أَنْتَ رَبِّي لَا إِلَهَ إِلَّا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ ، أَعُوذُ بِكَ مِنْ شَرِّ مَا صَنَعْتُ ، أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ ) ، قَالَ : ( وَمَنْ قَالَهَا مِنْ النَّهَارِ مُوقِنًا بِهَا فَمَاتَ مِنْ يَوْمِهِ قَبْلَ أَنْ يُمْسِيَ فَهُوَ مِنْ أَهْلِ الْجَنَّةِ ، وَمَنْ قَالَهَا مِنْ اللَّيْلِ وَهُوَ مُوقِنٌ بِهَا فَمَاتَ قَبْلَ أَنْ يُصْبِحَ فَهُوَ مِنْ أَهْلِ الْجَنَّةِ ) رواه البخاري
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃🍃🍃🍃
وعشوا فردوس واميمه طوبى وخلوها تاكل كل شي ...
فردوس؛معاش تبي شي حبيبتي؟
طوبى بملامح وجهه متعبه باديه عليها اثار البكي:خلاص حبيبتي اتكي..
فردوس مشت للسرير هي تقول؛باهي يسدنا اميمه..
ابتسمت اميمه..
وركبت فردوس السرير..حولت شاربتها وحطت راسها ع المخده..
طوبى:اميمه بالله افتحي الراديو من عندك وحطي ع برنامج مهند..
اميمه؛تمام..
فردوس:ايه حقه بكري سأل عليك دكتور اياد ووصلك معاي سلام..
طوبى؛سلمه وسلم من جاب سلامه..
واميمه علقت السماعات وفتحت الراديو حطت ع القناة..وفتحت المكبر..وحطت التليفون فوق الكامدينو..
اميمه:دعايات شويه ويبدا..وولت قعمزت ع الكرسي...
فردوس:طوبى تليفونك في شنطتي ..
طوبى:باهي..
☘وبدي برنامج مهند اللي كانوا اغلب سكان العاصمه يسمعوا فيه..☘
🍃وبعيد عن العاصمه..
جماعة رحلة البر...كانوا مقعمزين حوالين النار..
وهما يسمعوا في المهدي يغني..
مشيتي وين ماوصلك خبرنا..
كان صوت المهدي وهو يغني عكس صوته وهو يتكلم..
في الكلام صوته خشن بزياده وفي تفخيمه فصوته..
بس لما يغني صوته يلين ويكون هادي وهما منسجمين معاه...
المهدي..
ومشيتي وين...
وقعدوا يصفقوا ويصفروا..
وربيع يقول؛رديتني عشرين سنه لتالي..
المهدي:اياام معاش تولي..
عبد القيوم ابتسم وهو يمرر في نظره بيناتهم..
محمود؛خطرت عليا الزرده اللي طلعوها ولاد الشارع كلهم ايام ولد السعدواي وولد بلخير وولاد خليفه..
ربيع؛ومختار ومحي الدين وخوته..
المهدي:احلى ايام عمري..
نضال؛ كنت صغير هلبه وقتها لكن نتفكر في محي الدين لتوا بين عيوني بالسروال الازرق..
ربيع بضحكه؛قيسطو محي كان..
عمر بإبتسامه؛نتفكر امي هديكا الليله سهرت وهي طيبلكم..
المهدي:ربي يهديها نقوللها حني بنطيبوا وهي سكرت راسها.
عمر:كانت تقول نعرفه المهدي ماياكلش في التمزريط..
عبد القيوم بإبتسامه؛كنت تعاف؟
المهدي؛هلبه زمان كانت عندي طاسه ميه مايشرب منها حد غيري..
نضال بضحكه؛والله ماقعد واحد ماشرب منها..
قعد يضحك عمر..
المهدي ؛تعرفوا والله كنت زابط باهي..
ربيع:ماليكش دقيقه قايل مايشرب منها حد غيري..
المهدي؛نجر فيهم للإعتراف..
عبد القيوم بضحكه؛والله احسن مادارولك النوعيه هذي من الناس مستفزة واجد..
ربيع؛والله مافي واحد مستفز غيرك بتت عنده ليله خلاني نشعف نعاودها تي ياراجل وسواس نظافه وترتيب تركبه حاله نفسيه كان شاف حاجه مش فمكانها ولاحاجه ملوحه تي خلاني نسيق الحمام تخيلوا!.
المهدي؛اني اللي نعرفه كويس..
عبد القيوم بإبتسامه؛تمام حريص في حكاية النظافه والنظام لكن مش عياف ومش موسوس..حريص..وشدد ع الصاد وهو يقول فيها..
محمود؛ياحظ المراة بتاخدها ربي يحبها..
ربيع؛الحق الحق اللي بتكون من نصيب الراجل هدا دايره في عمرها شوق خير..
نضال؛خلاص انت وياه الراجل بيخش في حوايجه..
ضحكوا..
بعدين قال نضال:بالله غنيلنا الاغنيه اللي سمعناها في السيارة خاطري نسمعها بصوتك..
عبد القيوم:راهو ماهناك صوت نشاز صافي..
المهدي؛سمعنا ربيع يغني مانسمعوكش انت..
ربيع؛استغربت كيف ماعلقتش من بكري ..
ضحك المهدي نص ضحكه..
نضال؛غير هيا غني ياراجل..
هز راسه وهو يضحك..بعدين تحمحم وبدي يغني..
نك ليغ الزمن...ايلان ايويتيان " انا منذ زمن بعيد..ومنذ سنين"
نك ليغ الزمن...ايلان ايويتيان
نماغي ترهى "ابحث عن الحب"
هيغ اكالين...اي ميديوان..."في بلادي ياأصحابي"
وعاود المقطع وهما يصفقوله ومتحمسين معاه...
بعدين كمل يغني..
اوليهن ايملن...آيسان ترهى "قلبي ابيض يعرف الحب"
اوليهن ايملن...آيسان ترهى
يسان سيمغار..ناوا يرهى" يعرف التعظيم..للشي الذي يريده.."
جير تميديوين...هاكد يتمى..".بين الحبيبات..حتى الاخوه"
هييه..نك لغ الزمن...
وردوا وراه ربيع ونضال المقطع الأول لأنهم حفظوه خلاص..
والباقي يصفقوا بحماس..
وعبد القيوم كان يغني والسعاده باينه في عيونه وهو يمرر في نظره عليهم...
🍃بس كان الحزن معبي عيون معشوقته..
اللي كانت وحدها فايقه واللي حواليها راقدين بالنوم..
ومازال تسمع في برنامج مهند اللي وصل في حلقته للختام..
⭐وفي النهايه نبي نقول لكل حد استرخص قلوب غيره وباع وشري في مشاعرهم..داين تدان وربك مايخلي شي..
ونختم الحلقه بأغنيه كلماتها تعبر عن حال هلبه ناس عناهم موضوع حلقتنا الليله..
تصبحوا ع خير...
والاغنيه فعلا كانت كلماتها قويه وموجعه..
جربت في مرة..
وكل حد يسمعها ومعاشش وجع الخذلان والخداع وخيبة الأمل حيعيشه ويعرف قداش مؤلم...
وطوبى تسمع فيها وهي تبكي بصمت..بوجع..
🍃مهند نفسه ماطلعش من الاستديو طول وقعد مقعمز يسمع فيها ويحس بكل كلمه لأن عاش مرار الخداع وخيبة الأمل..
بس اللي تحس بيه الاء وهي تسمع فيها كان مختلف لأنها الجاني مش المجني عليه..
وياخد من عرف غلطه واعترف بيه وتعلم منه درس قاسي عمره كله مش حينساه..يكفي وجع الضمير اللي حيقعد عايش معاه..
لكن في تكبره وغروره..يخلوه يبرر لنفسه اخطائه مهما كانت جسيمه ولو صار وحسوا بتأنيب ضمير فيكون شعورهم مؤقت مش دائم..
وهدا اللي صاير مع الجالي وهو متكي ع كنبة وسط شقة خوه عمر..
يشوف بألم لمكان عضة طوبى في يده وهو يمسح عليها بإبهامه...
🍃🍃🍃🍃
وقعدت طوبى ليلها كله سهرانه..
مرة..تفكر..ومرة تصلي ع النبي..ومرة تستغفر..
واستقرت ع الاستغفار لوقت السحر..
وقرب الفجر يأذن..
تيممت..وبعد التيمم قعدت تدعي سرا ومن كل قلبها..
"اللهم قوة الظهر لاخفة الحمل..اللهم لاتكلني لنفسي طرفة عين..اللهم ادخلني مدخل صدق واخرجني مخرج صدق واجعل من لدنك سلطانا نصيرا"
🍃🍃🍃🍃
الساعه 8:30صباحا..
نزل من الشقه ومشي خش للحوش من باب الكوجينه..
لقي نسرين باديه دير في العصيده..
الجالي:صباح الخير..
نسرين؛صباح الخيرات وينك امس؟
الجالي بضيق:طوبى تعبت ورقدت في المصحه..
نسرين بفجعه؛خيرها!؟
الجالي؛حالها باهي توا..قولي لأمي ولخديجه بنرفعكم بعدين تشوفوها..
نسرين؛باهي باهي..خل نمشي نتصل بيها..
هز راسه ومشي طلع برا..
وهي طلعت من الكوجينه للدار..
🍃وفي المصحه..
كانت فردوس تفطر في طوبى..
خلتها تكمل اللي في السفرة كله..
طوبى:تو يقولوا شن الهايشه مسحت الدنيا كلها..
فردوس؛صحيحتين وبعدين ياقلبي تاكلي بفلوسك مش بلاش..
طوبى:ايه حقه من دفع حق الغرفه المنفرده ؟
فردوس:حسين واصر تكوني في منفرده..
طوبى بضيق:من كثر فلوسه يدير هكي! ربي يهديه وراه مصاريف وهم مايلتم..
فردوس:هو هكي يبي شن بديريله..
طوبى بكره؛مفروض كلمتوا هداكا دفع هو الملزوم..
فردوس بإزدراء:سحيقه
طوبى:لكن والله لما نطلعهم من عيونه
فردوس:كيف؟!
هزت راسها وهي تقول:يجي وقتها ونقولك..
ع خشة اميمه بفطور ليها هي وفردوس..
اميمه؛فطرتي كويس؟
طوبى:مسح..
ضحكوا اميمه وفردوس..
بعدين قالت اميمه:صحتين..هي تعالي دوسه نمسحوا حتى حني..
وقربت فردوس كرسيها لأميمه وبدوا يفطروا..
وطوبى انشغلت عنهم بقراية سورة الكهف..
فجأه رن تليفونها..
ناضت فردوس بتشوفه لأنه كان في الشحن بعيد عن طوبى..
شافت المتصل بعدين شبحت لاختها وقالت..
نسرين..
سكرت طوبى المصحف وقالت..جيبيه ترا..
جت فردوس بالتليفون لطوبى..
خداته..فتحت الخط وردت وهما يشبحولها..
طوبى:ايوه..
"ايوه طوبى كيف حالك"
طوبى:الحمد لله تمام..
"ان شاء الله لاباس عليك الجالي قال راقده في المصحه"
طوبى؛عادي مافي شي تعبني الوحم شويه زياده هي هادي..
"باهي ان شاء الله بعدين بنجوك الزيارة"
طوبى:تمام..
"امم..باهي ان شاء الله لاباس عليك مرة تانيه..سلام"
طوبى؛سلام..
وسكرت..
فردوس؛شن تبي الخاينه هادي؟
تنهدت طوبى وقالت؛بيجوا وقت الزياره..
اميمه بتهكم؛باهي اللي تنازلوا وبيجوا..
ابتسمت طوبى تهكما..
فردوس بجديه؛باهي طوبى توا شن بيصير شن بديري؟!
طوبى:شي الحال بيقعد كما هو عليه..
اميمه:وشن ضمنك ان هو مايقولش لماليه يدخلوا بينكم؟
طوبى:والله مايديرها نعرفه كويس حيجيب لروحه وجع الراس اللي مايبيشي..
فردوس؛باهي لعند امتى..حكاية عبد الرؤوف باين عليها مطوله..
طوبى بضيق:مش عارفه...اني همي كله عارفينه بابا..هلبه عليه اللي قاعد يصير هلبه مانبيش نزيده هم ع همومه..
فردوس بحزن؛عندك حق..خلي ع الاقل لين تنفرج علي غرفه..
اميمه؛يارب عاجلا غير آجل...
فردوس؛وماليه علاش انتي ماتقوليلهمش بالك يجوا في صفك..
ضحكت اميمه..
وطوبى ضحكت معاها..
فردوس؛لهالدرجه!..
اميمه؛واكثر يافردوس وأكثر..فردوس اني اللي ضربتني خديجه مش عمر..
فردوس؛كيف!؟
اميمه؛ضرب وحشي وهمجي بركت عليا يافردوس وقعدت تضرب لين فقدت الوعي وعلى عين نسرين اختها..
فردوس وهي مصدومه؛الحكايه وصلت للضرب هي!؟
اميمه:اييه يافردوس العيله هادي ياما وياما داروا ويديروا بش يحافظوا على مكانتهم وسمعتهم بين الناس..
طوبى؛حتى العار اللي داره عمر هديكا الليله داروله مبررات..
اني متوقعه منهم كل شي وعارفه روحي شن بنشوف منهم لكن والله مهما داروا حقي منهم ومن ولدهم لما ناخده..اصلا مخليتهم هكي مايعرفوا شي قصدا نبيهم يقعدوا حايرين ومش فاهمين شي خليهم يذوقوا شويه من اللي داروه فيا...
اميمه؛نرجع ننصحك ياطوبى تتنازلي عن كل شي وتطلقي وتفويتهم وتكسبي راحتك..
طوبى ودمعتها في عينها قالت؛والله معاد نرتاح بعدها ونقعد عمري كله واني مقهورة..حنطلق منه ولدهم ومش حنتنازل عن شي التنازل ياأميمه هو اللي فرعن الناس هادم وخلاهم يطغوا..
فردوس هزت راسها موافقة لكلام اختها..
واميمه قالت:باهي نقدر نسألك عن سبب اللي صار فيك امس..
طوبى بدت تبان ع وجهها ملامح الضيق بس حاولت تخفيهم وهي تقول بسخريه..
اتصلت بيا عشيقة الباش مهندس..
اميمه وفردوس انصدموا..
وفردوس قالت:شن قالتلك الحق.يره!؟
طوبى بضيق؛سامحيني فردوس مانبيش نقول توا مش قادره..
فردوس شبه عرفت محتوى المكالمه..
واميمه قالت بكره؛لولا ان حسناتي شويه وقاعده نلقط فيهم تلقيط راني قلت عليها اللي في خاطري كله..
طوبى؛مش مستاهله..
بعدين تنهدت..وحطت التليفون جنبها ورجعت فتحت المصحف وقعدت تقرا..
وهما يعد مايشبحولها بضيق ع حالها..رجعوا كملوا فطورهم..
🍃🍃🍃🍃🍃
وفي حوش لطفي الواعر..
كانت اريج تتفرج ع صور منشور نزله نضال عن فطورهم في الزرده...
وكاتب فوقه يحدث الآن..
اريج؛ياقلبي ياريتني معاهم شوفي الفطور شوفي..
ومدت التليفون لعمتها..
خداته مطيره وقعدت تتفرج ع الصور وهي تقول..
اشيه اشيه..دحي الشكشوكه يسهف..وطواسي الحليب والشاهي....
اريج؛مالا الصفرة المشكله شفتي كيف منسقينها..
مطيره وهي تشوف:ايه الله يبارك..ومع الطبيعه والهوا النظيف اللي يرد الروح..
شبحت لأريج وقالت..ياريت نحصلوا كيف نطلعوا زردة قداش ليا عليهم..
اريج طفت ع الشاهي وقالت؛ربي يفك اسر راجل روفي وبعدين نديروا احلى زردة..
تنهدت مطيره وقالت؛ان شاء الله..
🍃وفي دار البنات..
كانت الاء قاعده راقده بعد ماسهرت الليل كله وهي تبكي..
اما خوها في دار المعيشه كان يوتي في روحه بش يروح لجده ..
لكن سكر سوستة الشنطه متاعه اتصل بعمه..
"اني برا اطلع"
معتز بإستعجال:طالع..
وسكر..وخدي الشنطه متاعه ومن كثر ماكان مستعجل ماسلم ع حد طلع بدون مايدير صوت ولايلفت الانتباه..
🍃بعد ماكملت اخته تجهيز الفطور..
مشتله للدار بش تناديه..مالقتاش لاهو ولاشنطته..
اريج بإستغراب:وين مشي!؟..
مشت بتطلع للجنان وهي تنادي:عزو...معتز...
ووين طلعت للجنان مالقتاش..
ولت خشت داخل وهي تقول:هدا وينه!؟
وتخش للكوجينه بتاخد تليفونها بش تتصل بيه..
مطيره:شكله مشى ليزن..
اريج وهي تتصل بيه قالت؛ماأظنش...ايوه وينك انت!؟
"روحت"
رفع حواجبها وقالت؛روحت!..وهزت راسها بعدين سكرت عليه..
مطيره؛روح!؟
اريج وهي مضايقه:ايه..وردت التليفون لمكانه وهي تقول..افطري افطري..
وقعمزت ع الكرسي وبدت تفطر وكان باين انها معصبه..
ومطيره في نفسها كانت تشوفلها وهي تقول..
"لاحول ولاقوة إلا بالله"
🍃وفي حوش علي الواعر..
كان لطفي مقعمز مع بوه وخوه في الجنان يراجو في الفطور..
طلعاته صفيه وحطاته حداهم..
بعدين قالت:ماشيه لحوش لمطيره والبنات ماتبوا مني ندير شي قبل لنمشي عمي؟
علي؛لاصحيتي..بري..
ومشت صفيه متوجهه لحوش سلفها وخلتهم يفطروا..
🍃🍃🍃🍃🍃
"كيف يعني حرام ننسى ولامايجيش"
هدا حسين يكلم في خطيبته هاتفيا..
"ماقلتش هكي..قلت خبرني تفكرني وخبرني بس"
حسين؛واني نقولك دماغي ماكانش عليا مش قاصد نفوتك وننساك"
تنهدت وقال بصوت هادي..
"باهي اسفه سامحني لأني عاتبتك"
حسين بنرفزة:شوفي يابنت الناس ان الجو هدا نكره امه ومانحبش من يعاملني بيه كبري عقلك وفكيني من الطروح هادم الموضوع جدي ومش تسهويك..
"باهي حاضر..واسفه هلبه..معليشي بنمشي بنوتي روحي بنمشوا لحوش جدي"
حسين:حسنا انتي تبي تجيبهالي سفار منك ولاكيف اني شن قايل ع امه حوش جدك هدا مش قلت معاش تمشي..
"اسفه مانقدرش نسمع كلامك ماقريتش فيا فاتحه بش تلزمني بيه"
رفع حواجبه وقال..
اها..صار هكي!؟..مالا اسمعي..انتي من طريق واني من طريق..
وسكر عليها وهو يقول بعصبيه..طروح الفرخات...
🍃🍃🍃🍃🍃
"خيرها شن صارلها؟!"
مغليه؛قال تعبت ماتعبت المهم وتي روحك بعد الغدي بنمشوا..
"ع الحركات اللي دير فيهم ماتستاهلش من يعبرها لكن ع الخاطر خوي بنمشي"
مغليه؛هو هدا ع خاطر خوك وولده ولابنته..هي بالسلامه توا..
"بالسلامه"
وسكرت مغليه وحطت التليفون ع المخده..بعدين خدت المصحف من قدامه..فتحت ع سورة الكهف وبدت تقرا..
🍃وتمر الساعات..
وتفوت صلاة الجمعه..ويجي بعدها وقت الغدي..
وبعد الغدي يبدا وقت الزياره..
تجهزوا مغليه وبناتها نسرين وخديجه ورفعهم الجالي..
🍃طول الطريق وخديجه تراقب في خوها..
كان مسكت وهادي..نادر مايتكلم ويبان يحاول يركز في الطريق..
🍃🍃🍃
وفي المصحه..
دارت طوبى دورة ع روحها...لبست فستان الجالي اللي جابوه معاهم مطيره واريج وقت الزيارة..
ولبست عليه شاربه أنيقه...وفي يدها اليمين خاتم التعليقه اللي جابها الجالي..
كل شي باين طبيعي جدا قدام اريج ومطيره..
حتى طوبى كانت تبان طبيعيه وعاديه جدا...
فردوس؛مرتاحه هكي؟
طوبى؛ساوي المخده شويه معليشي..
وساوت فردوس المخده لأختها..
ومشت قعمزت ع السرير..
مطيره؛تسلم عليك فايزة وقالتلك لاباس..
طوبى؛ايه كلمتني بكري شويه..
اريج؛ايه حقه واتصلوا بيا صاحباتك عبير ووحده تانيه اسمها وئام قالوا نتصلوا بيها يعطي فينا مقفل..
طوبى:شكلهم امس اتصلوا كان مصكر وقتها..
وفجأه..دق الباب..
طوبى شبحتله..
مطيره؛شكلهم متاعينك..تفضلوا تفضلوا..
انفتح الباب وخشت نسرين..
وكان راسمه ع وجهها ابتسامه وهي تمرر في نظرها عليهم وقالت:السلام عليكم..
وامها وراها طلقت السلام حتى هي..
ماعدا خديجه اللي كان واضح عليها جايه بالسيف..
من ملامح وجهها ورفعت حاجبها..
وعيون طوبى معاها وهي خاشه..
تفكرت حاجتين وهي تشوفلها...
اولهم...
《 طوبى:خيرني!؟
خديجه؛وتسألي؟! شوفي لروحك في المرايه وتعرفي..معقوله تطلعي بالمنظر هدا في مناسبه لناس لبرانيه!؟
منظرك زي النافس بهالقفطان وهالمكياج..وفوقها مش لابسه ذهب!؟ علاش جيتي من اصله ياطوبى..
:اني جيت ع خاطر نجاح بس..
؛وحني طز فينا..مش هامك منظرنا قدام الناس ولامنظر راجلك وين يشوفوا مرته بهالمنظر تقول هجاله..
لو كنتي عارفه روحك ماخاطركش من البدايه علاش جايه قعدتي في الحوش ووفرتي علينا هالحشمه قداش الناس..وياريتهم غير لينا كلهم برانيه..》
وتانيهم..
اهم جمله قالتها نجاة في مكالمتها لطوبى..
《 اخته خديجه لما عرفت انه يحبني ويبيني دارت كل شي بش تفرق بينا..هدداته ببوه وخلاته غصب عنه ياخدك...》
قعدت معاها بعيونها لين شافتها قعمزت ع كرسي قربتهولها مطيره..وحطت رجل ع رجل..
وفردوس تشبحلها بإمتعاض..
وكذلك امها واختها قعمزوا ع باقي الكراسي
وقعدوا اريج ومطيره واقفات حدا سرير طوبى..
نسرين؛لاباس طوبى خيرك؟
مغليه وخديجه قعدوا يشبحوا لطوبى وهما يفصلوا فيها تفصيل..
وطوبى تجاوب:تعب حمل عادي مافيش حاجه كبيره..
خديجه ضيقت عيونها وهي مركزه ع بطن طوبى اللي زاد بينها الفستان وقالت؛طوبى انتي في أما شهر؟
شبحتلها طوبى وقالت بنبرة ثقه دون تردد ولاارتباك..
في الخامس..
تفاجئوا..
ومغليه وهي رافعه حواجبها قالت تعجبا؛في الخامس!؟ في الخامس وهدا وين تقولي؟
فردوس؛الجالي قاللها ماتقولش تصدقوا حتى حني درقت علينا..
شبحت طوبى لفردوس بعدين ردت نظرها ليهم..
خديجه؛قصدكم حتى انتم ماتعرفوش!؟
مطيره؛والله ماعرفنا الا معاكم..
فردوس:اني مرة سألتها قالتلي لا عاد حتى هو راجلها اللي قاللها ماتقوليش مفروض تسمع كلامه..
طوبى:قالي ماتقوليش ماقلتش قالي قولي قلت مانقدرش نخالفه ياعمتي تعرفي الجالي كويس يبي كلمته مسموعه..
رفعت خديجه حاجبها وضيقت عيونها وهي مركزه مع طوبى..
مغليه حطت رجل ع رجل وعقدت حواجبها وهي تقول..
وعلاش يبيك درقي علينا وعلي ماليك خايف نحسدوكم ولاشنو؟
فردوس:مش حسد ياخالتي عين عين..وطلع عنده حق..
خديجه؛كيف قصدك حني ولاانتم عطيناها عين!..
طوبى:حشاكم..لكن يقولوا العين الوداده اوعر من العين الحساده..وشبحت لمغليه وقالت..ولا ياعمتي؟
مطيره حست ان في شي غريب قعدت ساكته وهي تسمع وتراقب في ملامح الجميع
اما اريج لاحظت ان مغليه وخديجه زي اللي واخدات موقف من طوبى وعللت هالشي باللي صار يوم جو ومابتش تطلعلهم
ونسرين كانت تشوف لطوبى وتسمع فيها وهي مستغربه فيها صح تبان هاديه وعاديه وهي تتكلم بس اسلوب كلامها هو اللي كان غريب..
مغليه؛الجالي يابنتي عارفني نراجي فيك تحملي بالساعه وبالدقيقه معقوله يجحدها عليا!؟
طوبى:حتى اني فكرت في كلامك ياعمتي بس انتي تعرفي الجالي موسوس من حكايه العين وديما مية الرقيه معاه وين مايمشي..
سكتت مغليه وهي تشوف لطوبى..
المراة ملامحها عاديه..نبرة صوتها وطريقة الكلام عاديه..
بس اسلوب الكلام جديد عليهم...
خديجه؛لاعين لافري..انتي اللي متعبه روحك تمشي للمدرسه كل يوم وتمشي للجامعه وتمتي بالسيارة في كل تركينه باهي اللي مارمتيش..
مطيره استفزتها كيف تتكلم بعجرفه واسلوب متكبر..
سبقت طوبى وردت تقول بضحكه..
كان ماجتهاش العين قبل جتها توا قولي ماشاء الله ياكبدي 5شهور دير في هدا كله ماطرتلها حاجه ماتعبت كان بعد ماقالت راهو..
وجه خديجه تغير لونه..
فردوس؛طوبى نجمتها خفيفه والعيون ديما مفتوحه عليها سلامتها..الحمد لله ربي سلمها هي وبنيتها..
هني نسرين تكلمت بنبرة بهجه وقالت..
قصدك حامل ببنت؟
ابتسمت طوبى وقالت؛زي ماكان بوها متمني قال نبي اول ذريتي بنت وبنسميها جنه بش تكمل طاقم بنات الواعر..وضحكت.
وهما ضحكوا معاها ماعدا مغليه وخديجه..
فردوس بضحكه؛يعطيهاله..
في نفسها كملت تقول.."قاضيه تريحك منه ومنهم"
مغليه:ياحنه ان شاء الله ربي يحفظكم وتجيبها ع خير..
خديجه؛ابعتيلها مع الجالي مية مرقيه يام..
مغليه؛وخيرها هي ماتجينا استاحشناها واستاحشنا هدرزتها..
نسرين؛والله حتى سديره نشدتني عليك.
طوبى بإبتسامه؛حتى اني استاحشتها ابعتوها مع واحد مع خوتها ولاعمها..
فردوس؛تعرفوا وضعها توا الحركه هلبه مش باهيه ليها
مغليه؛حركة شنو اللطف قالولك نحرثوا عليها!؟
رفعت مطيره حواجبها وهي تشوف لمغليه..
وطوبى ردت تقول:قصدها المشي والجي وركوب الدروج نبي اسبوع وفوق نقعد فيهم في الحوش الحمد لله حتى الامتحانات كملتهم..
مغليه؛باهي براحتك..نزلت رجلها وقالت..لاباس عليك..
وناضت وقفت..
وبناتها ناضوا معاها..
نسرين بإيتسامه؛ردي بالك ع روحك وجنة ..
هزت طوبى راسها وهي تقول:إن شاء الله..
خديجه؛تو نكلموك ونسألوا عليك غير انتي ردي بس..
شبحوا اريج ومطيره لطوبى بإستغراب..
طوبى ابتسمت ابتسامه بارده بدون ماترد..
وخديجه حاولت تحافظ ع ابتسامتها المزيفه وبعدين غيرت عيونها عنها ومشت للباب..
مغليه؛بالسلامه..
نسرين؛السلام عليكم..
ومشوا طلعوا كلهم..ومطيره سكرت وراهم الباب..
🍃هما بعد ماطلعوا..
كانت امهم سابقتهم شويه وهي تمشي بعصبيه وتقول..
ريتوها ريتوا..ريتوا كيف تتكلم وتلقح..!لالاهادي اشبح من مقعمزلها ودايرلها غسيل مخ..
نسرين شبحت لخديجه
وخديجه شبحتلها وهزت براسها مرة وحده بمعنى..
"زي ماقتلك قبل"
🍃وفي الحجره..
بعد مامطيره سكرت الباب التفتت عليهم وقالت..
الله العظيم ماني مروحتها قبل لنعرف شن صاير..الكلام كله تلقيح وانتي بالذات اسلوبك ماهوش هكي معاهم قبل قولي شن في..
طوبى نزلت عيونها وهي مضايقه ومابتش تتكلم..
واريج تشوفلها بقلق..
غيرت مطيره عيونها لفردوس وقالت..
فردوس ادوي...
واضطرت فردوس تكذب مرة تانيه وقالت..
صايرة مشكله بين طوبى وخديجه في عرس نجاح.
رفعت طوبى عيونها في فردوس..
مطيره حطت ايديها في نصها وقالت؛على شني!؟
طوبى شافت لعمتها وقالت بضيق؛في عرس نجاح خديت من غرفه طاكم الفضه بش بنلبسه لكن تفلوشت ونسيته ومااستاقظتش الا واني في الصاله..وهي لما شافتني مش لابسه ذهب قعدت تعارك..
مطيره؛شن قالت!؟
طوبى بإنزعاج،اللي قالاته قالاته..
مطيره؛مايعرفوش انك بعتي ذهبك؟
طوبى:مش عارفه لو الجالي قاللهم ولالا لكن حاستهم مش عارفين..
واريج تسمع فيها ومركزه معاها ولاحظت انها مرتبكه بعض الشي..
فردوس:خلاص توا اللي صار صار فوتي عمتي مانبوش مشاكل..
تنهدت مطيرة بضيق: مش مدايره شي ماناش ناقصين..بعدين بوعيد قعدت تقول..لكن غير نطلعوا من الهم اللي حني فيه نوريها الملعونه خديجه مش سادها حوش خوها عمراللي خرباته بتكمل ع الجالي..
🍃وهني مطيره كانت تقصد المشكله اللي صارت ع فستان اميمه اللي شراته خديجه لبيان اريج🍃
وكملت تقول..لكن باهي اللي الجالي مش زي خوه شوره من راسه ومايدورش في طروح الآناثي..
حركت طوبى عيونها لفردوس..
وفردوس شبحتلها وابتسمت ابتسامة تهكم خفيفه..
اريج: قصدك خديجه سبب اللي صار فيك امس؟
شبحت طوبى لأريج..
نظرات عيون اريج كان واضح فيهم الخوف مع ملامح الضيق الباديه ع وجهها..
انوجع قلب طوبى عليها وهي تفكر في اليوم اللي حيجي حتما وتتفارق هي وحب حياتها...
جاوبتها وهي تقول:لالا مش منها ضغط نفسي وتوتر بس..
اريج؛هي السبب فيه ولا هدا علاش مابيتيش تطلعيلهم يومها..
طوبى ضيقت عيونها وقالت:حاجه زي هكي..خلاص فوتي ماتشغليش بالك..
مطيره قعدت تشوف لطوبى بعدين قالت؛ربي يصرفها عنك يابنتي..
طوبى هزت راسها وقالت وهي تحاول تخفي ضيقها..
آمين..
🍃🍃🍃🍃🍃
ووصل الجالي بأمه وخواته لفم الحوش وقال قبل لينزلوا..
الجالي؛بنروح للفيلا مادورنيش.
مغليه مابتش ترد عليه نزلت طول..
وخديجه لحقتها..
هو قال بإستغراب وقلق مخفي؛خيرهم طول الطريق ولاكلمه وتوا نزلت امي من غير ماترد عليا.
نسرين: امي كملت بيك القايمه السودا اللي دارتهالكم كيف درق عليها ان مرتك حامل المده هادي كلها..
شبح القدام وقال؛تبيني نقول بش تعرف هاديكا!؟
نسرين؛ايه حقه شن صار جاتك امس الشركه!؟
هو قال:ايه ورميت عليها اليمين..
نسرين؛احسن حاجه درتها..هي سلام..
ومست نزل من السيارة وسكرت الباب..
وهو تنفس بعصبية بعدين تحرك طول
~~~~~~~
"اها طلقها صار وامس!؟"
نسرين؛ايه امس ماحصلتش فرصه بش نسأله لإني ماشفتاش بكل ..
خديجه وهي تفكر..معناها للموضوع هدا علاقه باللي صاير لطوبى ومخليها متغيره هكي..
نسرين؛لو زي ماتفكري انتي ماكانتش علاقتهم حلوة مع بعض هدايا وكلام حلو وتهدرز عنه عادي..
خديجه؛نسرين شغلي دماغك شويه هو من فترة قريبه معاش ولى متحملها ونافر منها شن اللي قلبه هالقلبه!؟
اني اللي نعرف الرجاله كويس يانسرين مايديروش الحركات هادي فجأه الا بش يرقعوا عمايلهم
نسرين؛باهي شن تفسري وضعها معاه يبان عادي جدا..
خديجه وهي تفكر:هادي اللي محيرتني..يعني معقوله تكون عرفت وسامحاته وشرطت عليه يطلقها !؟
صحه ليها لو دارت هكي بش تحافظ ع راجلها وحوشها شكلها جت لكلامي وعرفت ان عندي حق..
نسرين بإستيعاب؛معقوله طوبى تعرف حاجه زي هادي وتكون ردة فعلها هكي!؟
خديجه؛طوبى عاقله مش متاع مشاكل زي بنت عمها هي صح باينه واخده موقف لكن من غير دوشه...
نسرين؛معناها هدا علاش تبي تقاطعنا!
خديجه حركت يدها من تحت لفوق وهي تقول بلامبالاه..
خل تقاطع المهم فكتنا من هديكا العوبه وهنتنا ع خوك..
نسرين بضيق:مادام هكي معناها لازم نكلمها ونشرحلها موفقي..
خديجه بفزع؛لاردي بالك!ردي بالك تخليها تعرف ان حني زبطنا اللي صاير ردي بالك..
نسرين؛علاش!؟
خديجه؛ماتكلميهاش وخلاص اسمعي الكلام..
غمضت نسرين عيونها وتأففت بضيق بعدين قالت..
الله لاتسامح هديكا الساعه اللي طاوعتكم فيها وخليتكم تاخدوها للجالي..
خديجه بإنزعاج؛اياااح..
ومشت طلعت من الدار وهي معصبه..
ناض يحيى من صوت الباب..
مشتله امه وهي تقول..انخلعت وليدي خلعاتك خالتك المهبوله...
ورفعاته وقعدت تهدي فيه لين رقداته...
🍃🍃🍃🍃🍃
وروحوا مطيره واريج من المصحه وكل وحده فيهم روحت بحال غير اللي جت بيه...
وقعدت فردوس لتاني ليله مع طوبى بس هالمرة بروحها....
🍃الساعه 10:30ليلا..
كل وحده فيهم كانت راقده ع سرير ومقابلات بعض وهما يهدرزوا..
فردوس بإبتسامه:كان قنين هلبه وحط عينه عليا فترة ايام كنت نقرا في المدرسه بعدين حولوا هو وماليه من الشارع ومعاش نندروا عليهم لليوم..
طوبى بضحكه:هدا علاش بطلتي من القرايه عقلك ماكانش معاها..
فردوس بضحكه؛بكل.
طوبى؛باهي وسدرة ماعجبها حد غير المهدي؟
فردوس:وهي كانت تشوف لغيره تقول ربي ماخلقش الاهو..
طوبى سرحت وهي تفكر والحزن باين عليها..
وفردوس طول غيرت الموضوع لما قالت..
خطرتي عليا زمان في بنت تسكن في الشارع اللي ورانا كانت نسخه من اماني الحكيم تزبطيها..
طوبى:ايه تهبل..
فردوس:ياستي هادي كانت مصاحبه بنات عيلة خليفه وتجيهم هلبه نص ولاد الشارع طاحوا فيها..عاد اماني الحكيم زمان كانت فتاة احلام الرجاله وقتها وطبس فيها واحد من ولاد الصيد وداروا علاقه قعدوا سنين مع بعض ووين جي بيخطبها خالتك نجمه وقفت فيها..
طوبى:علاش؟
فردوس؛كانت مش متحجبه..
طوبى:باهي خلاته ياخدها اكيد بعدين يغير رأيها ويخليها تلبسه..
فردوس؛سكرت راسها ياحنه وقالت ابدا ماتجيني كنه ..المهم كل حد مشي ع حاله وهو تزوج وهي تزوجت..
طوبى:نصيب..
فردوس:ع قولتك...
وكملوا هدرزتهم لين نعست فردوس وغلبها النوم ورقدت..
بس طوبى قعدت سهرانه تفكر وبعد نص الليل جاها النوم وغمضت عينها..
☘☘☘☘☘
ويجي اليوم اللي بعده...
جماعة رحلة البر لموا حاجاتهم ونظفوا المكان كله..بعدين تسقدوا لطرابلس..
🍃وطوبى دارولها خروج..
وجاهم حسين ومعاه اميمه بش روحوا بيهم هي وفردوس..
حسين؛هاه طوبى شن الجو..
طوبى بإبتسامه مجامله :الحمد لله تمام التمام..
هز راسه وهو ساكت..
وهي رجعت بصرها للروشن وغرقت في التفكير...
وطول الطريق كانت ساكته وهما يهدرزوا في مواضيع مختلفه..عن الوضع المعيشي..ووضع البلاد الأمني..وحتى السياسه تكلموا فيها...
لين وصلوا للشارع..
خشت سيارة حسين ووصلت لحوش لطفي..
شاف سيارات جماعة الرحله مدرسه قدام القهوة والمطحن وهما نازلين منها..
فردوس:روحوا من الرحله..
شبحتلهم طوبى..
جو عيونها ع عبد القيوم وهو واقف ع محمد المهدي ويهدرزوا..
غيرت عيونها عنهم القدام وهي تشوف في باب الحوش كيف فتحاته اميمه..
وخش حسين بالسيارة..
ردت بعدين اميمه الباب وين جت بتسكره جو عيونها في عيون عمر اللي فيسع غير عيونها عنها..
وهي سكرت الباب طول وكأنها ماشافت حد..
🍃محمد؛خلاص وعد ياتارقي من توا بنعد الايام وكل يوم بنفكرك..
عبد القيوم بضحكه:عطينا كلمه يااصفراني خلاص..
ضحك محمد..
المهدي وهو يشوفلهم بإبتسامه؛يزن في الحوش؟
محمد:ايه يقرا عنده اختبار غدوة..
المهدي؛وانت ماعندك شي!؟
محمد:لاراحاتي..ماشي لو التايب.
المهدي هز راسه وقال:تمام..كان فكرتوا ديروا دورة ولاتمشوا هني ولاهني دير آلو..
محمد؛حاضر...السلام عليكم..
ومشي..
عبد القيوم قعد معاه بعيونه بعدين شبح للمهدي وقال؛ربي يباركلك فيه..
المهدي:آمين...
☘وتوجه محمد بطريقه لحوش صديق ليه وزميل دراسة يسكن في الشارع اللي وراهم..
ليه فتره ماجاش للمدرسه مشي يسأل عنه ويطمن عليه..
وصل للحوش واستقبله صاحبه ودخله للمربوعه..
وبعد السلام والسؤال عن الحال والاحوال سأله محمد عن سبب غيابه..وهو جاوبه بإجابه صادمه بالنسبه لمحمد..
محمد بصدمه:غبي انت! معقوله واحد بمستوى دماغك انت يفوت القرايه..
بحرقه رد يقول:وشن بنحصل منها بعدين!؟ شن بديرلي قولي!؟ شوفي الواقع يامحمد شوف الناس كيف عايشه..شايف بعينك وضعنا تي بوي معاش طلع من الحوش بسبب الدين..الديانه داروا ع حوشنا طريق ياراجل نشبح فيه كيف مكسور ومضايق ومش قادر يرد عليهم وهما يهزبوا فيه..
محمد بضيق:لاحول ولاقوة الابالله..
:معاش نبي امها القرايه ولاعاد تلزمني في شي..
محمد بريبه:على شنو ناوي!؟
:بننضم ل*****
محمد بصدمه:كيف!!؟ عارف اخرها الطريق هادي انت!؟
:اخرها عز وهيبه وكلمة مسموعه...
محمد:عز وهيبه شني!؟ قول ضياع وانتحار ياراجل!
:والله الضياع والانتحار العيشه اللي اني عايشها.
محمد بقلق وخوف ع صديقه؛اسمع مني وفوته الموضوع هدا خيرلك..الرزق بيد ربي والفرج من عنده ولي للقرايه والله مستقبلك كله فيها اسمع مني بالله عليك..
؛عندك حق يامحمد ماتحسش بوضعي وكيف بتحس بيه وانت ولد عيلة شنيبه الفلوس والعز وشن ماتبي تلقى قدامك والبيبان كلها في وجهك مفتوحه..
تفاجئ محمد برد صاحبه عليه وصاحبه خاف يفهمه غلط فكمل يقوله..
رد بالك تقول حاسدني لاوالله يامحمد ربي يزيدكم ولايغير عليكم حال..لكن اني قلت هكي بش تحس فيا وتفهم علاش اني درت هكي...
🍃روح محمد من عند صاحبه وهو متكدر عليه ومضايق ع الاخر على حاله..
وتمنى لو كان بيده يخليه يتراجع عن قراره...
بس في نفس الوقت قعد يفكر في كلامه عنه وعن وضعه..
محمد وقف عند هالكلام اللي وقضه ع هلبه حاجات كان غافل عنهم...
والباين حيخليه حتى هو ياخد قرارات مهمه بالنسبه ليه...
🍃🍃🍃🍃🍃
ويمر هاليوم..
وطوبى مكانها في الحوش الدار راقده ع السرير وكل شي يجيها لعندها وماتنوضش لغير وقت الصلاه..
كملت هاليوم وهي تقرا في القرآن مرة..
وتستغفر مرة.....وتردد في تاج الذكر مرة...
ومابين هدا كله كانت تدعي من قلبها في دعاء لسانها مايبيش يقول غيره..
》اللهم ادخلني مدخل صدق واخرجني مخرج صدق واجعل لي من لدنك سلطانا نصيرا《
🍃من جهة تانيه..
كان الجالي شاغل نفسه بالخدمه نص اليوم يمشي في الشركه والنص التاني يكمل فيه الخدمه في الفيلا...
هالمرة ماكانتش عنده الجرأة الكافيه اللي تخليه يقابلها...
☘ومنه لخوه المهدي اللي فتح معاه بوه موضوع ربيع..
اتفاجئ هلبه..وفرح في نفس الوقت..
المهدي:والله ماعندي مانقول فيه نعرفه كيف ونعرف اخلاقه ونعطيه اختك واني مغمض عيوني لكن في حاجه ضروري نسرين تعرفها عنه هدا علاش نقول دير مقابله شرعيه ويحكوا فيه الزوز عن كل شي ويحطوا شروطهم..
محمد شنيبه:عارف شن هي اختك تعرف وماعندهاش مانع..
المهدي حط ايديه ع بعض وقال؛مايمنعش انهم يديروا مقابله ويدووا مع بعض نسرين مش صغيره وطالعه من تجربه صعبه مفروض تاخد خطوتها الجايه بتأني ماعندهاش علاش مستعجله حوش بوها وقاعده فيه معززة مكرمه..
بوه قال..كلامك ماعندي فيه مانقول..انت خوها الكبير والراجل صاحبك اللي تشوفه مناسب ديره...
🍃ومغليه بلغت ام ربيع بالموافقه المبدئيه واتفقوا الزوز ع يوم تجي فيه مع نساوين من العيله بش تخطب نسرين رسمي ويكون في نفس المقابله الشرعيه...
ويافرحة ربيع اللي مش عارف وين يحطها..
لما وصله الخبر لقي روحه ماشي طول لعبد القيوم بش يقوله
وعبد القيوم فرح فرحة مايفرحهاش الواحد الا لنفسه..
لأنه كان شاهد ع القصه كلها وعارف ربيع قداش كان متمني هالموضوع يصير منه..
عبد القيوم بإبتسامه؛عاد نبي الزرده..
ربيع بإستعباط؛زردة شني!؟
عبد القيوم؛والله مانعرفك ياحبيبي حق نفخ الراس ودراه الكبد اللي عيشتني فيه معاك الفتره اللي فاتت كلها بناخده..
ربيع بعد ماضحك ضحكته المميزة قال:ok شن رايك في تغدايه مليحه غدوة في الوليمه؟
عبد القيوم هز راسه وقال:الوليمه الوليمه خير من بلاش..
سكتوا شويه..
بعدين ربيع بانفعال حك كفوفه ببعض بحماس وصاح بصوت عالي..
وعبد القيوم يشوفله و هو يضحك..
🍃🍃🍃🍃🍃
"حددوا موعد يوم الثلاثاء ان شاء الله"
فايزة بإبتسامه؛ان شاء الله ربي يكملك ع خير نانسي..
"تعرفي فايزة..لما خطبني حامد قبل ماكنتش فرحانه كنت نبي نتزوج وخلاص بش ننسى فؤاد..لكن توا حاسه روحي مرتاحه هلبه ومقتنعه وملهوفه نعيش حياتي مع ربيع حاسه ربي بيجبرني بيه احلى جبر"
فايزة وهي مبتسمه بحب؛يارب..ربي يعوضك بيه خير وتنسي معاه اللي عشتيه قبله..
"يارب...لكن تعرفي فرحتي ناقصه..تمنيت لو عاشوها معاي سدرة وعيشه الله يرحمها..تصدقي يافايزة لما امي جتني وقالتلي وتي روحك نهار التلات بيجوا يخطبوك خطرتوا ع بالي كلكم..كنت نبي ندير زي ايام زمان نخبرك انتي بعدين سدره بعدين عيشه ونمشوا كلنا نتلاقوا في حوش عمي لطفي ونهدرزوا ع كل شي بالتفصيل..وعيشه تنصح من تركينه..وسدرة تتسهوك من تركينه وانتي تقوليلي شن نلبس وكيف ندير شعري ومكياجي..ياااه مستعده ندفع نص عمري ونرد يوم من ايامنا زمان..."
فايزة ودموعها ينزلوا قالت بألم؛لو دفعنا عمارنا معاش نقدروا نردوا ساعه من ايام زمان...شن بيرد عيشه يانسرين..وكيف بنردوا سدرة!؟...زمان راح مع زمان معاش يولي خلاص...
🍃زمان راح مع زمان معاش يرجع خلاص..مايقعد كان الحنين اللي يوجع قلوبنا ويعيشنا في حسرة...🍃
وبعيد عن فايزة بشويه..في دار بنتها صفاء..
كانوا فيها مروة وصفاء يحكوا ف موضوع مأرق تفكير مروة..
مروة بدموع؛قلبي مش مهنيني ياصفاء نحس في روحي صاحبه انانيه ومش كويسه واني مخليتها ضيع هكي..
صفاء بحزن؛باهي شن في يدك ديريلها يامروة نصحتيها وكلمتيها اللي عليك درتيه..
مسحت مروة دموعها وقالت؛لا في حاجه وحده قعدت مادرتهاش..وغدوة بإذن الله بنديرها..
🍃🍃🍃🍃
وفي مكان بعيد عن شارع القهوة كله...
في وحده من مناطق العاصمه اللي يكثروا في شوارعها المحلات..
كان محمد ولد خديجه مقعمزه مع صحابه اللي يفوتوه بالعمر بس مافاتوشي في الدهاء...
ومن ضمن صحابه كان ولد صاحب الورشه اللي يخدم فيها بلال..
محمد محي:حني بنخشوا من الباب الفاصل بين الورشه وحوش بلال...انت تقعد برا حد السيارة تراقب ورشتكم وانت واقف قدامها ماحد بيشك فيك اصلا كان لقيت حد وقتها يشوفك بش يشك فيك..
ولد صاحب الورشه؛بتمشطه وهو فيه كان فاق بيكم كيف الراي..
واحد منهم قال؛مافيش كيف طيروه هني ولاهني هديكا الليله؟
:انتوا تبوها في نصافات الليل وهو ماعنداش وين يبات غير في حوشه...
:وفي النهار من سابع المستحيلات..
واحد تاني قال؛كان فاق بينا ياكل ع راسه خبطه ترقده ليوم الدين..
ولد صاحب الورشه بفجعه::قتل لا ياولاد فكونا من القتل..
محمد؛وانت ماناش خايف عبد نجيري مافي وراه تحساب السفارة متاعهم بدوره كان مات..
:كيف يامحمد روح هادي!..
؛اسمع كان بترنب نفوتوا الموضوع لكن بعدين ماتقعدش تجري في جرتنا..
ولد صاحب الورشه سكت بضعف..هو مشارك معاهم في السرقه الاولى وحصته كان يشري بيها في مخدر الح.ش..يش يعني لمدمن زيه مافيش خيار تاني غير انه يسلملهم ويوافقهم في كل شي يديروه..
هز راسه وقال بضيق:خلاص اللي تبوه ديروه..
محمد محي؛مرات مانضطروش نقتلوه..وفي حالة قعد حي في بالي حاجه تنفعنا من وراه..
كلهم استغربوا..
وواحد فيهم قال؛شن في بالك يابرو طلع الجواهر طلع..
ضحك نص ضحكه بعدين شبح لولد صاحب الورشه وقاله..
ركز معاي زين..
🍃وقعد يحكي عن الخطه اللي رسمها في عقله بدقه اثارت اعجاب صحابه...
:قسم بالله دماغك سم شيطان رجيم..
ضحك..
ولد صاحب الورشه؛عجبتني حتى اني وان شاء الله يصير منها المهم يقعد حي..
:باهي مادام تفاهمنا ع كل شي امتى نضربوا ضربتنا؟
كبيرهم قال؛يوم الثلات في الليل شن رايك محمد..
محمد برفعة حاجب ؛مليح بكل...
#مقاومه
#طوبى.
......يتبع....
