# طوبى "شارع القهوة"
#جمان_فريد
#الجزء_التاسع"تقلبات"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
مقعمزين يتعشوا هما الزوز...
او بالأحرى هو اللي يتعشى وهي تتفرج عليه..
قام عيونه فيها شبحلها بعدين ابتسم وقال:تعشي!
عائشة:كيف هكي!؟
عقد حواجبه بإستغراب..
عائشه؛كيف قادر تكون عادي هكي تاكل وتشرب وجوك حلو..بجديات اني مستغربه فيك..
حرك راسه بتساؤل وقال:في شني مستغربه؟
عائشه سكتت شويه بعدين قالت..
"وكأنك عمرك ماحبيت سدرة!"
قلبه قعد يدق بقوة بكل قوة..قريب طلع منه قريب طلع بروحه بش يجاوبه ويقول..
انه عمره ماحيحب غير سدرة..
وبرغم قوة المشاعر اللي حسها وقتها عرف لأول مرة في حياته يتمالك نفسه ويرد بإجابه مايكونش فيها جرح لمشاعر المراة اللي ولت مرته توا...
المهدي:بكري شن قتلك..قتلك خلينا نشوفوا نصيبنا ونشوفوا الوقت شن داسلنا..في حاضرنا توا اني وياك راجل ومرته..مراة وراجلها..الماضي هذا مفروض ينحط ورانا وينتسى..
عائشه؛صاحبة عمري مانقدرش نطلعها من حياتي وننساها..
المهدي:من قالك انسيها!؟ واصليها وخليها تواصلك بالعكس هكي احسن..بش كل حد فينا يقتنع بالواقع ويصدقه اكثر..
اشر ع نفسه وقال..اني توا راجل صاحبتها..اشر عليها وقال وانتي مرتي..وهي صاحبتك وبنت شارعي لاأكثر...
عائشه:مش ساهل يامهدي!
المهدي:ومش مستحيل ياعايشه..
قعدت تشبحله هلبه وهي ساكته..
هو ابتسملها بعدين خدي طرف مبطن وقربه لفمها...
هي شبحتله بعدين فتحت فمها وكلت منه...
هو بإبتسامه قال:صحتين..
هي يدوب ابتسمت وهزت راسها وخدت منه باقي الطرف وقعدت تاكل فيه...
☘وقعد يهدرز عليها شويه شويه لين كملوا عشاهم..
وعاشوا ليلتهم زي أي عرسان...كيف ماشرع الله وفرض...
الله..
اللي مش غافل عن آهات ودموع سدرة..
اللي ماقدرتش ترقد غمضه...
مقعمزة بروحها في الجنان ..
تحت كرمة العنب...اللي كانوا وراقها محاوطينها من كل تركينه..
بين ايديها رسايل المهدي..
تقرا فيهم رساله ورا رساله...كلمه بكلمة..حرف بحرف..
مش مصدقه ان كل اللي انكتب فيهم كان كذب وهي صدقاته كله..
لو يحبها هالحب الكبير يدير فيها هكي..!؟
يحرق قلبها هكي!؟
بس مع هذا مش قادرة..
رغم اللي داره فيها مش قادرة تخلي قلبها يكرهه...
هي قالتها قبل يجري في عروقها مجرى الدم كيف بتكرهه!؟
لقت روحها تلقائيا ضامه رسايله وهي تبكي بصمت وحرقه..
وتقول هامسه..
"الله يرحمك ياميمتي ..ولايسامح اللي كان السبب"
☘☘☘☘☘☘
ومع الساعه الخامسه فجرا...
كانت عائشه رايحه في النوم ع سريرها وراقده براحه ليها ايام مارقدت هكي...
وهو في جنبها متكي...
حاط ذراعه تحت راسه وهو يشبح لروشن الدار ودموعه يلمعوا في عيونه...
شويه وناض من مكانه...
ومشي وقف ورا روشن الدار وهو يشوف جهة حوش الواعر..
ملامح الحزن مسيطرة ع وجهه...
وهو يقول في نفسه..
"عارف روحي والله مانقدر ننساك ولانخلي قلبي يحب غيرك
عارف روحي بنكمل عمري في عذاب...
عارف روحي مش حنرتاح...مانقول غير ربي يصبرني..
ربي يصبرني"
بعدين التفت وشاف لعائشه..ابتسم بألم..وولى لسريره....
🌻🌻🌻🌻🌻🌻🌻
وطلع تاني يوم...
فهاليوم...
سدرة قعدت راقده ماحد بي ينوضها..
حاسوا ع الحوش عمتها واختها وطيبوا حتى الغدي وخلوها راقده..عارفين مابيها وعارفين كيف مرت عليها الليله اللي فاتت...
لكن في قلب صغيرون مايقدرش من غيرها..
يبي حسها..يبي يشوف عيونها...يبيها حواليه في كل وقت...
طوبى..
مقعمزة حداها..تخبط ع خدها بخبطات خفيفه وهي تقول بلغة طفوليه مع لذغه في حرف الراء:سدرة..سدرة..
فتحت عيونها شويه شويه..
مسحت طوبى ع وجهها وهي تقول:نوضي صبح بكري..
قعدت سدرة تشبحلها هلبه..
طوبى:فطرنا راهو..
ابتسمت سدرة وخدتها وضمتها وقعدت تبوس فيها وتقول:خليتولي فطور؟
طوبى:يديروا غدي..
فنصت سدرة وشافت طول لساعة يدها وانصدمت:حي اني رقدت هذا كله!؟
وناضت قعمزت وطوبى في جنبها..
سدرة:علاش مانوضتنيش بكري؟
طوبى:قالت عمتي مطيرة لا..
سدرة:عمتي ربي يهديها..
وناضت سدرة لدولابها فتحاته وطلعت منه حوايج ومشت تجري للحمام..
وطوبى مشت طلعت من الدار لوسط الحوش..
طوبى:ناضت سدرة..
مطيرة وهي تقرض في السلاطه؛نوضتيها يارتيله..
فردوس بضحكه:خلاص هداكا هو بوي قريب يروح من الجمعه..
طوبى مشت لأريج لقتها تلعب قعمزت جنبها وقالت:ترا عطيني..
عطتها اريج اللعبه..
وآلاء حداهم راقده ع رجلين امها..
وحداهم اميمه وغرفه يتفرجوا ع التلفزيون..
شويه وخش عليهم لطفي..
لطفي:السلام عليكم..
هما ردوا عليه السلام..
قعمز حد البنات وهما جوه يجروا قعمزوا في حجره حتى آلاء...
فردوس:بالشويه ع جدكم..
لطفي؛خليهم شن دارو...عسل ع قلبي هادم راهو..
طوبى:انت بابا متاعي..
غرفه التفتت وقالت:عينك هذا بونا كلنا..
لطفي:غرفه!
سكتت غرفه وهي مضايقه وشبحت للتلفزيون..
لطفي:اخر مرة نسمعك تعلي صوتك هكي وبعدين اختك صغيره شن تفهم من اللي تقول فيه..
غرفه اضايقت هلبه وشبحت لأميمه لقتها تشبحلها قالتلها بإنفعال:شن تشبحيلي؟! بري درقي وجهك روحي لحوشكم وانتي ديما في حوشنا..
مطيرة وفردوس:غرفه!؟
لطفي بعصبيه؛نوضي تحركي نوضي خشي داخل..
ناضت غرفه ومشت وهي تخبط في رجليها ع الارض بغضب..
لين قابلت سدرة واقفه قدامها لابسه قفطان صيفي ولافه الفوطه ع شعرها..
جمدت في مكانها سدرة..
سدرة بصرامه؛تخشي للدار مانعرفكش تطلعي منها لين اني نقولك..
نزلت غرفه راسها وقالت؛حاضر..
ومشت من حداها..وسدرة معاها بعيونها..
بعدين التفتت شبحتلهم ومشت خشت عليهم وهي تقول:كيف حالك بوي كيف حالكم اليوم..
كلهم بأصوات متقطعه:الحمد لله..
قعمزت حدا عمتها وقالت:سامحوني خداني النوم..
لطفي:المهم حالك باهي مش مريضه؟
ابتسمت وقالت؛لاوبيي الحمد لله مافيا شي..شن غدانا عمتي..
مطيرة؛كسكسي بالحوت ماذقتي زيه في حياتك..
سدرة بضحكه:كسكسيك لايعلى عليه..
لطفي بضحكه:جوعتونا..
ناضت مطيرة بسفرة السلاطه وهي تقول:هي شويه ويكون قدامك..
جت بتنوض سدرة..
مطيرة قالت:والله مانك نايضه...
سدرة:غير علاش تحلفي بس..
مشت مطيرة من غير ماترد عليها...
سدرة شبحت لفردوس وقالت؛نوضي عاونيها..
فردوس بهمس:ياسر عييت..
بوها خبطها ع ركبتها وقال بهمس:نوضي ..
ناضت غصب عنها وهي معصبه قالت:حاضر..
ومشت...
قعدوا يتبعوا فيها بعيونهم..
وسدرة تقول:تنباله درجة اولى..
ولطفي يحرك في راسه يمين ويسار أسفا..
أريج؛جدو ركبها تحولت..
خدي منها لطفي اللعبه وقعد يركب فيها..
سدرة مررت نظرها عليهم وهي مبتسمه بعدين شبحت لأميمه لقتها تشبحلهم..
سدرة؛ميمو..
شبحتلها..
فتحت سدرة ذراعها..ابتسمت اميمه ومشتلها خشت حضنها .
وسدرة صمتها وقعدت تبوس ع راسها..
☘☘☘☘☘☘
"شوف هيا هيا"
نضال؛ترا..
وقعد واقف يتفرج على خوه وهو ينقز من اول درجه لأخر درجه..
ع جية امهم شافت اللقطه حطت ايديها ع راسها وقالت:ووه عليا..
ضحك عمر وقال؛ماصار شي يام اهو شوفي..
مغليه؛انتم ديما ترعشوا فيا حشيشتكم...تبوا توقفوا قلبي. .
ع جية الجالي يجري؛خيرك يام!
مغليه؛خوتك المناجيه هادم هما ولعبهم المعفن..
الجالي:تي خلاص عاد انت وياه هنوا رواحكم..
عمر:شن درنا بس..ومشي وهو معصب...
ونضال في جرته..
مغليه:بيجلطوني هادم الزوز..
الجالي:بعيد السو عليك معاش تقولي هكي..
مغليه:ياريتهم كلهم زيك وليدي اني كان جبت جبتك انت والمهدي بس..
ضحك الجالي وقال؛وخديجه ونسرين!؟
مغليه بضحكه؛فكرتني خل نمشي نقول لنسرين ترفع غدي خوك ومرته..
الجالي بإبتسامه؛باهي اني راكب بنرقد..
هزت راسها ومشت..
وهو مشي ركب فوق...
🌻🌻🌻🌻🌻
فهالوقت..
كانت عائشه في الشقه بروحها..
مقعمزة تقرا في سورة الكهف...ومجرد ماكملتها...رن جرس الشقه..
حطت المصحف ومشت طلعت من الدار لباب الشقه..
عائشه:مني..
"افتحي اني"
عائشه ابتسمت وفتحت الباب..
خشت نسرين بالسفرة وهي تقول:حولي غادي ايديا طاحوا..
ضحكت عائشه وسكرت باب الشقه..
مشت طول نسرين للكوجينه حطت السفره ع الرخامه..
بعدين التفتت لصاحبتها وقالت:صباحيه امباركه ياعروسه..
وضمتها وسلموا ع بعض بالخد..
بعدين نسرين قالت:شن جوكم..
تنهدت عائشه وقالت؛تقدري تقولي تفاهمنا شويه..
نسرين:قتلك اني حترتاحي مع المهدي..
ومشت فتحت الثلاجه وقعدت تفتش فيها..
عائشه ماعجبتهاش الحركه بس تغاظت وقالت:وسدرة..
طلعت من الثلاجه زوز طروف شكولاته وقالت:خلاص طلعي من راسك سدرة..توا انتي مرته اعرفي كيف تكسبي راجلك وحافظي عليه..نفسها سدرة قالتلك الكلام هدا..خليه يحبك ونسيه فيا..
ومشت طلعت من الكوجينه..
وعائشه وراها وهي مستغربه؛لكن مش ساهل..
نسرين وهي تاكل في الشكولاته؛ساهل ساهل كله بعدين يولي ساهل..
وخشت لدار النوم وقالت؛حي قفطانك قاعد..
ومشت قعمزت ع السرير..
زادت عائشه ضايقت من تصرفات نسرين كيف تخش دار نومها وتقعمز ع السرير عادي ردت عليها وهي تقول:مش اجار هذا شريته..
نسرين وهي تاكل؛اممم...المهم وتي روحك للمحضر بيجلوك الليله..
هزت عائشه راسها وقالت؛عارفه..وكانت تبي تطلع نسرين من الدار لكن مش عارفه كيف..
ناضت نسرين وقالت؛عندك علم ماشفتش دبشك بكل..
نبي نشوفك شن واخده نبي ناخد زيك..من توا نوتي في بتاتي قبل ليجي عريس الغفله..
ومشت للدولاب بتفتحه واعصاب عائشه بينفلتوا..
المعروف ان هادي خصوصيات ودار النوم بالذات منطقه محرمه مايجيش يخشلها اي حد وياخد راحته فيها هكي..
هي تعرف ان نسرين بليده وصحيحة وجه لكن ماتوقعتهاش لهالدرجه...
لما جت نسرين بتفتح الدولاب..
انفتح باب الشقه...
عائشه:المهدي جي..
طول نسرين وخرت عن الدولاب ومشت جري طلعت من الدار..
وعائشه وراها وهي مضايقه..
تقابلوا مع المهدي...
نسرين بإبتسامه؛شن جو ياعريس..
المهدي وهو عاقد حواجبه:شن ديري هني؟
نسرين؛جبتلكم غداكم..
المهدي التفت جهة الكوجينه وقال:صحيتي..
نسرين؛بعد الغدي خلي مرتك تنزل لوطا جاية المزينه..
هز راسه بدون مايتكلم ومشي للكوجينه..
نسرين:بالسلامه توا..
ومشت...لحقتها عائشه وشدتها في الباب وقالت:كلمي سدرة نبيها تجي ضروري..
نسرين شبحتلها بعدين هزت راسها وقالت:باهي..سلام..
وفتحت الباب وطلعت..
سكرت عائشه وراها الباب..بعدين خدت نفس ومشت للكوجينه...
تقابلت هي وياه وانخبطت فيه..
هو ضحك وقال:ياساتر..
وهي شدت خشمها لين عيونها دمعوا..
مسح ع شعرها وقال:معليشي..ماشي نغير وجاي..حطي السفره في الصاله..
عائشه وهي شاده خشمها وتشوفله قالت:حاضر..
هو مشي لدار النوم..وهي قعدت معاه بعيونها ووجهها مكتسي باللون الأحمر..
بعدين طول مشت للكوجينه..
☘☘☘☘☘
"ايه جايه نندري بالمحضر اليوم"
نسرين؛تمام نستنوك معناها..
"اكيد"
نسرين؛تمام..سلام...
وسكرت السماعه....
شويه التفتت لما سمعت رنة نقال بوها ضحكت وقالت:امتى نديروه حتى حني بس..
ع جية خديجه؛والله حتى اني خاطري فيه...عندك علم حتى المهدي خدي واحد..
نسرين:حطوا فيه هداكا الحساب هو والشفره متاعه..
خديجه:مش اي حد ياخده النقال ياماما حنى اول ناس في الشارع يديروه..
نسرين:تو بعدين يديروه كلهم زي مادارو الارضيات..
خديجه:العبرة في من سبق ياعمري..
ضحكت نسرين..
خديجه:كنتي تكلمي في هديكا..
نسرين تنهدت وقالت؛قصدك سدرة..ايه كنت نكلم فيها تجي تحضر المحضر..
خديجه؛وقالت باهي؟
نسرين:ايه..
رفعت خديجه حاجبها وقالت:باهي وين ركبتي فوق شن حسيتي خوك ومرته..
نسرين:متغيرة عائشه عن امس تحسيها لاينه شوي..والمهدي يبان عادي..
ضحكت خديجه نص ضحكه وقالت:وتقوليلي حب وصحبه..طيح سعدك..
ومشت وختلها..
ونسرين تشوفلها وهي تفكر في كلامها..بعدين مشت وخشت للدار...
🌻🌻🌻🌻🌻
وقبل آذان العصر...
كانوا فردوس ومطيرة مروحين لحياشهم..
وسدرة جهزت نفسها وخواتها بش بيمشوا لحوش شنيبه..
بعد العصر بساعه ونص...
خدت خواتها من ايديهم ومشت هي ويام لحوش شنيبه..
دقت الباب...
فتحلها الجالي..
الجالي:اوووه..اهلا اهلا..
خشوا التلاته وقالت سدرة؛شن جوك..
الجالي:مليح..اهو لحسن الحظ عندي مانعطي الحلوات..
طلع من جيبه زوز طروف حلوة مصاصه ومدهم لغرفه وطوبى..
خدوهم...
سدرة بضحكه:مال مازال تاكل في حلوة مصاصه..
ضحك الجالي وقال؛لامش هكي..غير الواحد وين مايمشي يقابل صغار مش عارفه لما نشوفهم يبدا خاطري نعطيهم حاجه..
سدرة بإبتسامه:تحب الصغار هلبه..
الجالي:فوق ماتتصوري..
سدرة:ربي يحفظك يالجالي...وهي حول من قدامي وانت ديما شادنا في الباب..
ضحك الجالي ووخر..
وسدرة خشت بخواتها للحوش..
بعدين هو طلع...
🌻داخل..
خشت سدرة لقت الحوش قاعد زاحم...
طلقت السلام..
والانظار كلها توجهت ليها....
هي دارت روحها عاديه كالعاده...وسلمت عليهم وحده وحده..
وجت لمغليه سلمت عليها وباركتلها..
مغليه:الله يبارك فيك وعقبالك..
خديجه:وينك امس مغيبه ان شاء الله خير!
سدرة؛مرضت شويه امس..
خديجه برفعة حاجب:اها لاباس عليك..
سدرة :لايوريك باس..
ومشت خدت خواتها وقعمزت...
وعيون عتيقه ام عائشه عليها اللي كانت تشوفلها بنظرات اول مرة تشوفهم لسدرة..
🌻فهالوقت..
كانوا فايزة ونسرين في شقة عائشه والمزينه عندها تلبس فيها فالجلوة..
فايزة:الله يبارك عويشه طالعة تجنني..
عائشه بإبتسامه:تسلمي..
نسرين:عاد بيضاء حمرا انتي زادت طلعاتك..
المزينه:صح..ماشاء الله عليها..
عائشه:تسلموا..
فايزة:هي خلاص كملت ولا..
المزينه:ايه...
نسرين:خلاص هي تعالي عائشه..
وشدتها كل وحده فيهم من جهة..
وقعدوا يمشوا هما وياها...
لين وصلوا للباب...
فتحاته نسرين...
طلعت المزينه قبلهم...وهما طلعوا بعدها ...
🌻في الصاله لوطا..
كانت خديجه واقفه حدا المسجل وتراجي في خشتهم..
شويه وخشوا..وفتحت المسجل ع اغنيه للزمزامات...
وقعدت تزغرد...
وكلهم انظارهم توجهت ناحيه المكان اللي بتخش منه عائشه..
وسدرة منهم وقلبها والعه فيه النار...
قعدت تشوفلها كيف ناضولها وقعدوا يمشوا وبدوا يدوروا بيها..
صفيه؛سكروا المسجل..
مشت نسرين تجري..وطفاته...
ولت دور معاهم ...
والنساوين الكبار يغنوا ومنهم عتيقه..
دوروا ياقرابة دوروا كلكم وزغرتوا ع العروسه تتجلى بينكم..
ودوروا ياقرابه دوروا بالكمال وزغرتوا ع الجميلة ترباية الدلال...
وهما يزغردوا ...
بعدين كملوا...
نجليك ونجليك ونزغرت عليك يانور الحراير ماربيت فيك
ونجليك ونجلي ياوليفتي ياصغيرة السن وياكبيرتي..
🌻وجلوا العروس...
وكانوا يديروا في عادة يركبوا العروسه وهي لابسه الجلوة ع حاجه عاليه زي الصندوق مثلا...وترفع ايديها وع اساس تدعي...
ودارت عائشه هالعاده..
بعدين مشت قعمزت ع كرسي كبير متصدر الصاله...
وجهت عيونها ناحية سدرة ابتسمتلها..
وسدرة ردت الابتسامه وناضتلها ومشت بإتجاهها..
وعيون عتيقه عليها..
وصلت سدرة في عائشة وقالت؛مبروك حبيبتي..
وطبست سلمت عليها بالخد..
عائشه:شن حالك..
بعدت سدرة بعد السلام وقالت؛الحمد لله..
خدت عائشه يد صاحبتها وشدتها بقوة وقالت؛نبيك تركبي معاي فوق نبيك ضروري ضروري..
شبحتلها سدرة شويه بعدين هزت راسها بإيجاب..
وفايزة ونسرين يشبحولهم من بعيد..
نسرين:عائشه مفروض تبعد سدرة عن حياتها كان تبي تعيش مع المهدي..
شبحتلها فايزة باستغراب..
نسرين؛ماتشبحليش هكي يافايزة..بش الكل يعيش مرتاح وماتصيرش مشاكل بعدين تفرقنا للأبد..
فايزة خافت من كلام نسرين وشبحت جهة سدرة وعائشه وهي تفكر..
🌻🌻🌻🌻🌻
ومرت حفلة المحضر..
وكانت حلوة....طلعت عائشه وصورت مع المهدي بكاميرا واخدتها خديجه...
وكان يبان جو حلو هلبه ومنسجم مع عائشه ..
حاله هذا خلا امه تفرح وتتهنى عليه...
بعد ماصوروا هو طلع للرجاله...
وعائشه بتركبت لشقتها وهي راكبه طلبت من سدرة بس تركب معاها..
وماحد قدر يعارض..
لكن امها قعدت تسحن عليها وهي تقول في خاطرها..
"شن مازال تبي فيها سدرة هادي!؟"
☘☘☘☘☘
وسدرة هادي خشت لشقة مفروض تكون شقتها هي...
وكل شي فيها يكون ملكها هي..
لكن النصيب ليه كلمته اللي حالت دون تحقيق هالاحلام الورديه ..
كانت الشقه باردة..
المكيف مخليها ثلج...كانت حلوة بكل شي فيها..
وبالذات ريحتها...ريحة المهدي اللي معبيه الشقه كلها..
وصلوا الزوز للصاله..
ووقفوا مقابلات بعض..
سدرة:نعم..
عائشه بحزن؛سامحيني بالله عليك سامحيني حاسه روحي طعنتك وغدرت بيك ياصاحبتي..
ابتسمت سدرة بألم وقالت:علاش هذا كله علاش..ماكانش ليا بش خديتيه مني..وجاك لعندك انتي مامشتيله..نصيبك ياعيشه نصيبك..ربك كاتب المهدي لعائشه مش لسدرة..يعني من البدايه ليك انتي ماخديتي مني شي..
عائشة ودموعها في عيونها:قتله نبيها تقعد في حياتي قالي لازم بش نقتنعوا بالواقع...
بلعت سدرة ريقها وقالت؛عنده حق..
عائشه:يبي ينساك..
سدرة:واني هدا اللي نبيه وعارفاتك تقدري عليه صدقيني معاك حينساني بالمرة وحيحبك صدقيني..انتي تنحبي هلبه ياعيشه وانتي المراة الوحيده اللي حتمشي مع المهدي..
سرحت عائشه وقالت بإبتسامه:ينادي فيها عايشه مش عيشه...اول مرة حد ينادي اسمي هكي..
ركزت سدرة في نبرة صوت صاحبتها واللمعه اللي في عيونها
ضحكت بدون صوت ضحكة ألم..
زي ماتوقعت..مش حتصمد عائشه قدام المهدي ولو شويه..
ماصمدت هي!!...
عائشه استاقظت لروحها قامت عيونها وشبحتلها بعيون مليانات دموع..
سدرة بنبرة فيها كل الألم اللي فالدنيا قالت:ربي يهنيكم..
وقربت من صاحبتها وضمتها..
وعائشه ضمتها بقوة ودموعها ينزلوا...
شويه وبعدوا عن بعض..
سدرة قالت:نبيك بس تعطيني عهد نهار اللي تحسي فيه ان وجودي فحياتك معاش ولى مرغوب فيه قوليلي...
عائشه قعدت تشبحلها والدموع ينزلوا ورا بعض...
سدرة مسحت دموعها وقالت:خلاص لازم نروح..
هزت عائشه راسها وقعدت تمسح في دموعها..
لفت ومشت سدرة وهي وراها بش تسقدها..
سدرة:خليك ماتعبيش روحك..
وكيف جت بتفتح الباب..
انفتح بروحه....وكان هو المهدي....
وهذا اول اختبار....
وعائشه تشوف...
سدرة لما شافاته انخلعت ووخرت ونزلت راسها لوطا..
وهو عقد حواجبه ووخر ونزل راسه وقال..
"تفضلي اختي"
عائشة شبحتلها...
هي طول طلعت وهي منزله راسها بدون ماتقول كلمه..
وهو خش داخل شبح لعائشه وابتسم وسكر الباب وقال..
المهدي:ماشاء الله ماشاء الله عليك سماحه فيك يابنت الشيخ..
ضحكت عائشه من بين دموعها..
وهو جاها وخش بيها داخل وقعد يهدرز عليها...
☘☘☘☘☘☘
لوطا...
خدت سدرة ومشت بتطلع...
شدتها عتيقه ام عائشه...
سدرة:نعم خالتي..
عتيقه:معليشي بنيتي بنقولك كلمتين ومانبيكش تحرجي مني..
بلعت ريقها وقالت:تفضلي خالتي قولي ومش حنحرج..
عتيقه:بالله بنتي خلي عيشه في حالها كان تهمك وتبي حوشها يعمر..
سدرة غمضت عيونها وهزت راسها وقالت:حاضر..
عتيقه:ايوه سلم بنتي وانتي ربي يعوضك بخير منه..
ابتسمت سدرة بأسف ولفت ومشت مع خواتها من غير ماتحكي ولاكلمه..
ومشت طلعت من الحوش..اللي تلقت فيه جميع انواع التعذيب النفسي.. لدرجة الاختناق..
حتى لما وصلت لحوشهم كانت مش قادرة تتنفس...
مش عارفه كيف غيرت لخواتها وعشتهم...
بعدين طول توضت وقعدت تصلي..
وبدت تبكي وتشكي لأكثر من يفهمها...وهي ماتعودت تشكي ولاتبكي لغيره..
الشكوى لغيره مذله....ومافي حد غيره حينفعها ويعينها..
ويعطيها كل القوة من عنده...
تشكيله وهي عارفه انه مش حيتوجع عليها..ولافي شكواها ثقل عليه...
صمد..قوي...سند مابعده سند تتكأ عليه وتواجه هالحياة وهي متأكده من انتصارها فيها مهما بانت مهزومه...
☘☘☘☘☘☘
"تونس"
المهدي بإبتسامه:بنقعدوا شهر غادي لين تبدا القرايه تبدا القرايه تخشي الخدمه طول..
عائشه بدهشه:خدمه!
المهدي هز راسه وقال:حصلتلك تعيين في المدرسه اللي هني متاع البنات..
عائشه وهي مش مستوعبه:تعرف حاسه روحي نحلم..
ضحك وشد جمتها وقال:وتوا..
هي شدتها وقالت بوجع:ااي مش هكي عادي..
هو حول يده وخدي جمتها فردها ع جبهتها وقال:نبيك تصدقي بش..
وهي تشوفله وجهها محمر..
المهدي:خليها القصه ماتطوليهاش..
هي يدوب ابتسمت وهزت راسها بإيجاب...
🌻🌻🌻🌻🌻
تاني يوم الصبح...
كانت سدرة راكبه فوق السطوح تنزل في غلافات المنادير اللي كانت ناشرتهم...
سمعت صوت باب حوش شنيبه انفتح..
طول شبحت جهته..
شافت عائشه طالعه وماشيه طول لسيارة راجلها وركبت..
بعدين طلع الجالي وفي يده شنطه ومشي طول حطها في الكوفني..
وطلعوا بعده المهدي وامه وبوه..
بانوا يسلموا ع بعض...بعدين مشي المهدي ركب السيارة..
وشويه وتحرك...
امه بزعت وراه مالقي ميه بعدين هي وبوه خشوا للحوش...
وقعد الجالي اللي مشي للمطحن..
قام عيونه صدفه في حوش الواعر..شاف سدرة واقفه تبع في طريق السيارة بعيونها..
وجعاته هلبه..
هي غيرت عيونها عن الطريق وشبحت للجالي..
ابتسملها..
هي انحرجت لأنه شافها يدوب ردتله الابتسامه ومشت نزلت..
وهو تنهد ومشي خش للمطحن...
🍀🍀🍀🍀🍀🍀🍀
في باحة كلية الهندسه..
في جامعة الفاتح...
كانوا مقعمزين الزوز في مكان لقائهم المعتاد ويهدرزوا..
نجاة:تو مش حرام ياعامر خوتك عايشين في نعيم بوك وانت مامحصل شي!؟
طاهر:امي يانجاة مش جديده عليك..
نجاه:سامحني طاهر وماتزعلش مني امك انانيه هلبه...
طاهر بألم:عارف..
نجاة؛عارف ومخليها دير فيك ماتبي!
طاهر:امي هادي امي يانجاة لما بوي سيبني هي اللي ربتني وتعبت عليا..
نجاة:باهي تمام ماقلنا شي بس مش من حقها تحرمك من بوك ومن حقك عنده..
طاهر:بديتي تدوي في الماديات هلبه نجوته ركزي!
نجاة:مش هكي ياطاهر اني مقهورة عليك بس لأني نحبك مش راضيه ع حالك هدا..
طاهر تنهد وقال:فاهمك..
نجاة بزعل؛مالا علاش تقولي انتي ماديه وكلام خي!
طاهر بضحكه:ماقلتش هكي اني..بعدين خلاص ياستي ولاتزعلي عازمك اليوم ع الفطور..
هي بضحكه؛ع اساس عزمتك من قبل اني..
طاهر بإبتسامه:اني وانتي واحد ولا..
هي ضحكت وهزت راسها...
وهو تنهد وقال:ربي يقرب البعيد وتتخرجي ونتزوجوا..
هي بإبتسامه:آمين..
🍀🍀🍀🍀🍀🍀
الساعه 2:00الظهر..
حطها راجلها قدام الحوش مروحه من العمل..
خشت وهي تعبانه هلبه من الخدمه..
تلقتها حماتها وقالت:الماعين يراجو فيك..
فايزة برجاء:بالله عليك اغسليهم عليا تعبانه نبي نرقد شويه قبل لنمشي لأمي..
:لاياماما اليوم من الصبح نلهدوا وانتي برا تدهوري والله ماغاسل الماعين غيرك..
ومشت وهي تقول:حلوة حتى هادي..
فايزة وهي تشوفلها بغل قالت بهمس:حسبي الله ونعم الوكيل..
يدوب خشت بدلت وتوضت وصلت..
وطلعت للكوجينه تغسل في جبال الماعين..وبعدين سيقتها..
وبعد كملت طلعت بتكلم نسرين شويه تسألها عن الاوضاع..
ومجرد ماحطت يدها ع السماعه طبت عليها عزوزتها..
:ايوه تليفون ليل نهار وفواتير متلتله..
فايزة؛يدفع فيهم احمد..
؛شن قصدك تتجملي عليا بفلوس ولدي!!؟
فايزة تنهدت بملل وقالت:لاياعمتي مش هذا قصدي..
:لاهدا قصدك ونص..وكان احمد يدفع في حق مكالماتك ملزوم ياماما هو من يتكلم بالتليفون غيرك انتي!
فايزة بصدمه:اني بس!!؟
ع جية البنات.
:اسمعي حبيبتي راك قاعده في حوشنا راهو اللي نبوه يمشي عليك..بتدلعي هونا راجلك دلعي عليه...
فايزة خلاص معاش قدرت تتحمل:وشن ع اساس عايشه بلاش ماهو ندفع في مرتبي عليكم حق ماكله وشراب ويوم وحده تطلب مني نروحلها بتوكه ويوم نروح مش عارفه شنو..انتم مصيتوني واستهلكتوني وذليتوني ولأني ساكته قاعدين تتمادوا...
عزوزتها:حي ياحي سمعتوها شن قالت طلعت هي اللي تصرف علينا بنت السنفاز..
فايزة بعصبيه ودموعها بعيونها:هي سكري فمك واحترمي نفسك الابوي هاااه الابوي..
ومشت بسرعه وخلتهم وخشت للدار وقعدت تبكي..
والعزوز دارت روحها انصدمت واغمى عليها..وواحد من ولادها كان موجود في الحوش وسمع العراك..
وطلع لخوه وعاودله...اللي صار من ناحية فايزة بس..
~~~~~~~~
فايزة ببكي؛وصلت في بوي ياأحمد تبيني نسكتلها..
احمد بعصبيه:انتي استفزتيها ووصليتها لهني اللي عاودلي الدوة مش خواتي بش نقول يزيدوا من عندهم يافايزة..راك قللتي ادب هلبه وكثرتي دوة وهادي امي راهو..
فايزة معاش عرفت شن تقول قعدت تبكي وخلاص...
احمد:اسمعي يابنت الناس اني مستعد نوقف معاك في كل شي الا في التمادي ع ماليا وقلة الادب مش حنسمحلك بكل تبي تعيشي معاي عيشي بإحترامك وماليا تقدريهم فاهمه..
هي قعدت منزله راسها وتهز فيه وهي تبكي..
وهو طلع من حداها معصب وسكر باب الدار بقوة..
اللي قهر احمد ان خوه شهد ع فايزة وهي دير في الغلط وصعبه لما تجي من الأخ مش من الاخت بش يقول كيد نساوين في بعضهم..
ولأن فايزة ماشكتش قبل وديما ساكته هو ماتوقعش ان اهله هما اللي ظالمينها ومتماديين عليها..كان هكي كيف فايزة اللي عرفها ماتسكتش عن حقها بكل تفوت الاهانات والظلم..!؟
ماكانش فاهم وعارف انها دير هكي ع خاطره بش تحافظ عليه..
ولو كان عندها عزوة ماكانتش صبرت ع الضيم شهور وهي تبلع وتغص...
بعد ماطلع قعدت فايزة بعبرتها تبكي..
وتقول..
"آااه يابوي مافي حد يجي مكانك..ااه يابوي عوزتني من بعدك"
🌻🌻🌻🌻🌻
وهديكا الليله عدت ع فايزة بصعوبه..
احمد ماباش يخشلها بكل خلاها بروحها..ليل كامل وهي تبكي...
لين طلع اليوم التاني...
وتت روحها بش بتمشي للخدمه..
وفعلا هو كان يراجي فيها بش يوصلها...
طول الطريق...
وهما ساكتين..
لين حطها قدام خدمتها...ومشي..
هي راجت لين يتباعد...
طلبت بعدين تاكسي وطلبت منه يوصلها لحوش خوها....
☘☘☘☘☘☘
"وين الفطور يابنتي ناخد في دوا راني"
جتها كنتها وحطت قدامها سفرة الفطور بعصبيه وقالت:هاك افطري..وانتي ماعندك كان نق..
ومشت طلعت من حداها..
بذل قعدت مشتده تفطر...في مشهد يتكرر يوميا اكثر من مرة في اليوم...لشهور طويله...من جابوها وهي تتعامل اسوأ معامله..
وولدها مايندريش عليها..معاها في شقه ومرات يفوت يوم بطوله مايشوفهاش..
تعودت وتحملت...المهم عندها انها اطمنت ع بنتها الوحيده عنده راجل..
وماتندريش ان بنتها الوحيد جايه بتتحما بخوها من هالراجل اللي خدي منها موقف سلب الأمان اللي كان فيها من ناحيته..
سمعت جرس الشقه يرن...
قلبها قبضها..
شويه وسمعت الباب انفتح..
تناقل لمسامعها اصوات نقاش لمرت ولدها وصوت تاني تعرفه..
لعند ماخشت عليها الدار..
فايزة وهي تبكي:يام..
ومشتلها تجري ضمتها..
ومرت خوها واقفه في الفم...
مشتده:خيرك شن جابك.
وخرت فايزة وهي تشوف لأمها قالت بإستغراب:مااستاحشتنيش!؟
مشتده؛راك تقولي متعاركه انتي وراجلك! لاسلم بنتي لالا..بري روحي لحوشك وكبي ع راس راجلك واستسمحي منه المراة ماليها الا حوش راجلها..
قعدت فايزة تشبح لأمها وهي مصدومه..
مرت خوها:عندها الحق امك يافايزة ماليك الا حوشك وراجلك حبيبتي مانافعك حد ولاتراجي حاجه من حد..
التفتت فايزة وهي تشوفلها..
وامها تشوفلها بحزن...وعجز...
☘☘☘☘☘
طلعت فايزة مش شقة خوها..
وهي حاسه ان بيبان الدنيا تسكرت في وجهها....
مش لاقيتها من حد....ولالاقيه حد..
حاسه روحه بروحها في هالدنيا..
بروحها وكأنها مقطوعه من شجرة...
برغم ان عندها خوت كل واحد فيهم يضرب حيط يصرعه..
لكن ولاواحد فيهم مربوط بحبل وتقود فيه مرته نسوهم الام والأخت....
يامصعب شعورك يافايزة...وياقداش في منها فايزة في وقتنا هدا....
🌻🌻🌻🌻🌻🌻🌻
"طوبى معاش تلعبي باللبز"
طوبى:نلعبش..
سدرة:نشبح فيك اني..
طوبى حطت ايديها ورا ظهرها وقعدت دور بعيونها في المكان..
وسدرة وهي تنشر في الستاير كانت تشوفلها وهي شاده ضحكتها..
ع طلعة غرفه قالت:امتى بنطلعوا نشروا حوايج المدرسه..
سدرة؛الاسبوع الجاي ان شاء الله..
غرفه:اسمعي نبي هلبه توكات جدد..
سدرة تنهدت وقالت:باهي.
غرفه:ونبي سبيدروا وكندرة..
سدرة بملل:حاضر...
طوبى:واني نبي قفطان.
سدرة:علاش ان شاء الله..
طوبى رفعت ايديها جنبها وقالت؛هكي..
ضحكت سدرة ع حركاتها..
شويه انفتح باب المطحن وقال:ياالله..
سدرة:تعالى تعالى..
خش حسين وهو يقول:نسمع في وحده عسل قالت نبي قفطان كان ماخديتوشي اني ناخده راهو..
غارت غرفه وقالت؛اشريه لأختك بش معاش تاخد مني..
انصدم حسين في ردها..هو اصلا كان يمازح في طوبى لااكثر مش حيشري شي لكن رد غرفه صعقه...
وخلا سدرة تقدملها وتعطيها كف قريب طير وجهها..
حسين:علاش ياسدرة!
سدرة بعصبيه:خشي داخل ياقليلة الأدب خشي..
خشت غرفه وهي تبكي..
وحسين شبح لطوبى لقاها حاطه يدها ع خدها وتشبح لسدرة بخوف:خوفتي طوبى..
سدرة؛فرخة قليلة ادب تو نقص لسانها تو تشوف..
حسين شبحلها وقال:مادورتهاش اني ياسدرة طفله هادي..
سدرة:لا مش طفله عمرها 10سنين توا لازم تتربى وتعرف كيف تتكلم..
فجأة دق باب الحوش..
سدرة:ان شاء الله خير..
حسين:تو نشوف..
مشي للباب وفتحه...
لقي فايزة واقفه في الباب تشوفله وتقول:سدرة..
شافتها سدرة...
قدمتلها طول وقالت؛خيرك فايزة!
يدوب فايزة شبحت لسدرة...وبعدها طول طاحت ع كتفها...
سدرة بخوف:فايزة!
شدتها ودخلتها داخل وفايزة مغمى عليها..
سدرة؛برا ياحسين شوف احمد بسرعه..
طلع حسين يجري يدور في احمد في دكان..
لقي الدكان مسكر واحمد مهناش ..
ولى للحوش وبلغ سدرة..
وسدرة حاطه صاحبتها في الصاله وواقفه للباب تقول لحسين وهي تقول:ياربي كيف ندير حتى هاتفنا مافيشي حرارة بش نكلم الاسعاف..فكرت شويه بعدين قالت؛برا شوف الدكتور ؛اياد اقل شي يقيس ضغطها ع قدر مادرتلها مابتش تفيق..
حسين؛حاضر.
ومشي طلع يجري من حداها..
سدرة؛غرفه...فرخة غرفه...
طلعت غرفه تجري من الدار..
سدرة؛بري ضبحي ع مرت عمي صفيه تحركي..
غرفه:حاضر..
وطلعت تجري...
وسدرة مشت قعمزت حدا صاحبتها وقعدت تمسح ع وجهها وتقول:غير شن جاك ياشرادة بس!
وطوبى تشوفلهم وهي حاطه ايدها في فمها وخايفه....
#تقلبات
#طوبى
....يتبع...
