#طوبى "جنة طوبى"
#جمان_فريد
#الجزء_السادس_والخمسين"سبات طويل"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
🍃 رانك كل شي ...
زهاي ابعدك من بعدك اشوي ...
ان قلت اشهي غيرك ما اشهي ...
لا والله عقلي موش ليها
تقول قزين في غربة اربي ...
فاقد حن كل لحظة نزيها
عليم الله هالي فيك في ...
تراجي فيك من حنك ارويها
عندي العين داراتك ولي ...
تطلب فيك ف الضيقة اتجيها
إن ضاق العلم ولا صار شي ...
تفقد فيك يا غالي عليها
من لا شي تبغي دير شي ...
تفش غليل ف الماقي نبيها
بعدك شي رانك كل شي ...
و لاهي شي عيني يا عميها🍃
☘☘☘☘☘☘☘
"الدكتور قال عضلة زادت ضعفت"
عائشه بخوف؛يعني شن بيصير في بوك؟
محمد ودموعه في عيونه تنهد وقال:قالي راجل عمتي طلعوه لتونس خير يعرف دكتور متخصص غادي..
عائشه؛زعمه يرضى يمشي لتونس؟
محمد بشي من الانفعال؛غصب عنه مش برضاه..
عائشه بحزن؛من يقدر يجبر بوك ع حاجه مايبيهاش؟
محمد؛اني يام اني نجبره ونخليه يمشي غصب عنه ماتهزيش عليا يام..
ابتسمت وقالت؛عمري ماهزيت حبيبي اني نشوف فيك راجل من نهار جبتك..
ابتسم وقرص خدها بعدين قال؛خلاص نوضي ارقدي..
عائشه؛ مادام مافيش مرافق ماعندك علاش بايت غادي ولدي ..
محمد ناض وهو يقول:مانقدرش نخلي بوي بروحه يام..
ابتسمت بحب وقالت؛ربي مايحرمكم منه..
محمد طبس ع راسها وباسه وبعدين قال؛ولامنك ياغاليه..هي بري ارقدي يام واضح ع وجهك التعب..
عائشه هزت راسها وقالت؛حاضر..رد بالك ع روحك ولدي..
هز راسه وقال؛تصبحي ع خير..
ومشي من حداها وهي تقوله؛قدامك كل خير..
قعدت تشبح للجهة اللي طلع منها..وبعد ماسمعت باب الشقه انفتح وتسكر..
اطلقت العنان لدموعها...قعدت تبكي بكتمان بش ماتفيقش صغارها..
تبكي خوف..وحزن..
☘☘☘☘
وقدام باب صالة حوش شيابينها..
كان سلفها واقف ع عزوزتها وحماتها وهو يقول..
الجالي:غدوة بإذن الله يفيق وتوا نضال ماشي بيبات غادي..
خديجه؛وين بيبات مافيش مرافقه؟
الجالي:محمد مايبيش يخلي بوه ونضال ماشي غادي ع خاطره..
مغليه بحزن:ياروحي..
ومن الصاله..
كانت باينه نجاه ع الجالي وهي ترقد في ولدها..
تسرقله في النظر..وهو يسرقلها في النظر..
خديجه؛باهي سدرة شن صار فيها؟
حرك الجالي راسه يمين ويسار بيأس بعدين قال؛ياودي شكلها..
مغليه بخوف:شكلها شني؟
الجالي:مش عارف شن نقولك يام لكن وضعها مايطمنش..
خديجه بأسف؛لاحول ولاقوة الا بالله..
مغليه؛يارب مايصيرلها شي ع خاطر وليدي يارب..
تنهد الجالي وقال؛ربك يستر..ضيق عيونه وقال..العيله بايتين هني؟
خديجه؛خالاتي ومرت خالي وبناويتها..
هز راسه وقال؛راكب بنرقد..تصبحوا ع خير..
مغليه هزت راسها وخشت داخل..
وخديجه قالت:وانت من اهله..وبعد شافاته ركب لفت وخشت داخل..
وعيون نجاه تراقب فيها..
☘☘☘☘☘
"الناس خاشين طالعين والجيران بين الحوشين"
مروة"اخت نجاة":عليك قصة حب قصتهم نعرفها من ايام كنت نقرا مع طاهر الله يرحمه..
صابرين:حق قصة خياليه..تنهدت وقالت..خلاص عيوني بيتسكروا وغدوة عندي خدمه من الصبح..
ناضت مروة وقالت؛باهي..نخليك ترقدي..تصبحي ع خير..
صابرين؛وانتي من اهله..
ودارت روحها بترقد..
واختها طلعت من حداها وسكرت الباب..
لحظات..
ورجعت قعمزت مرة تانيه وهي شاده التليفون..
تراجي في مكالمه من مختار لأنه قال بيروح في الليل ويكلمها طول..
استنت ربع ساعه..
وهي تتفرج فيهم ع صوره وتتأمل فيهم بشوق..
لعند مااتصل..
قلبها فر فران..
طول ردت..
صابرين؛حبيبي..
"صابرينه روحي l miss you "
بضحكه قالت؛واني اكثر..
"كذابه"
صابرين:والله استاحشتك موت خي حياتي بلاك..
"اثبتيلي"
صابرين بضحكه متعجبه؛كيف بنثبتلك؟
"غدوة نتلاقوا ونقولك علاش ياحلوة وتوا اني تعبان وناعس بنحط راسي ونرقد"
صابرين؛تمام حبيبي نوم العوافي..
"بنشوفك غدوة ماتمشيش للخدمه طول"
هي ابتسمت بفرح بس ثقلت روحها وهي ترد عليه:تمام..
"تصبحي ع خير ياحلو"
صابرين؛وانت من اهله..
"تشاو"
وسكر..
هي غمضت عيونها وتنهدت من قلبها بعدين قالت:يهبل ياناس يهبل..
☘☘☘☘☘
وهو بعد ماسكر منها..
خش لسريره واتصل بغرفه..
نادى لين فصل..
هو استغرب متعود ترد عليه في أي وقت..
عاود اتصل وكذلك نفس الشي لين فصل ولاردت..
هو قال؛مرات رقدت بكري..
تنهد..وقال؛حتى غدوة..
حط التليفون ع الكامدينو..
بعدين حط راسه ع المخده وفيسع راح في النوم..
☘وهي كانت فايقه..
حابسه روحها في دار غير دار نومها..
راقده ومغطيه راسها بالمخده وتبكي بحرقه..
تسمع في تليفونها يرن وكأنها ماتسمعش فيه..
☘وراجلها..
ولى للمصحه شاف بوها وجدها وحاول يواسيهم شويه..
بعدين هو ويوسف قعدوا يقنعوا في الحاج علي يروح وهو سكر راسه..
بس بكلمة من لطفي طلب فيها منه انه يروح..
روح مع عبد الرؤوف..
وقعد يوسف مع عمه لطفي..
☘عبد الرؤوف وهو طالع مع الحاج علي..
شافهم نضال اللي كان واقف ع سيارته يتكلم في التليفون..
نضال:عيوني شكله جدك علي بيروح مع راجل خالتك..
"احسن هكي مش حمل قعاد في المصحات"
نضال:واضح عليه بالسيف مروح..
"ع خاطر جدو لطفي وخالتي سدره ربي يردهالنا يارب"
ومعاش قدرت تتكلم قعدت تبكي..
ونضال ارتبك معاش عرف شن يقوللها مايعرفش يتكلم في مواقف زي هادي؛اريج...تأفف وقال..لاحول ولاقوة الابالله..اريج..عويناتي خلاص بالله عليك قطعتي قلبي..
وهي ببكي قالت..
"قلبي اني معاش فيه مانلم..هادي خالتي سدره امي التانيه هي اللي ربتني مش امي..ااه ياربي معاش قادرة نتحمل..اني لتوا مش قادره نتخطى غيبة بوي...تنهدت بحرقه وقالت..ياريت نموت ونرتاح"
نضال رعشاته الدعوه وقال؛والله ماناقصك ياأريج سكري فمك خلاص..
واريج زادت بكي..
نضال تأفف بضيق وقال:خلاص ياعمري بالله عليك خلاص..اني معاك خيرك..اني بوك وخالتك وعيلتك كلها..
هي هدت شويه وقالت.
"بالله عليك رد بالك من روحك راهو كان صارت فيك حاجه نهبل"
ابتسم وسط ألمه وقال:ختشه..نحبك..
"واني..ربي مايحرمني منك يارب"
نضال:تي خلاص باهي بتبكي امي في الشارع الزفت..
ابتسم من قلبه..
لما صوت ضحكتها المبحوح من البكي..
نضال:ياروح روح روح روحي ياصمصومة قلبي من داخل..
☘وهادي رحمة ربي في عز الشدة والبلاء..
يبعت من يخفف ويهون شويه من الألم...
🍃مهند بألم:وضعه يبكي الحجر..سمعته يبكي وين فتت من قدام داره..واني عمري ماريته يبكي الا لما توفت حناي..
"ياروحي عليه والله عنده يبكي وماينلام.."
مهند؛تعرفي آلاء..شكله بوي ماعنداش نصيب مع خالتك..
"بصراحة حتى اني حاسه هكي..بعد اللي صار حسيت ان خالتي سدرة مالهاش نصيب في الدنيا..ولو كان ربي كاتبلها نصيب مش حيكون في راجل غير عمي مهدي هكي بدت نحس'
مهند؛الحق..حتى اني فكرت هكي..ومرات حتى بوي فكر هكي وهدا اكثر شي واجعه..
تنهدت وقالت..
"غير تنوض هي بس غير تنوض..خيي حوش جدي من غيره..خيي كل شي من غيرها خيي.."
وقعدت تبكي..
ومهند خلاها تبكي براحتها من غير مايكلمها يبيها طلع كل شي في قلبها...
☘وخالتها الصغيره..
اللي كانت راقده ع سرير خالتها الكبيره..
كانت ضامة ليها وشاح تحب تلبسه لما تطلع من اربع سنين..
ريحتها عالقه فيهم..
وهي ضاماته كأنها ضامه سدرة..
مغمضه عيونها والدموع مابطلوش نزول...
تليفونها جنبها كان يرن وهي حطاته ع الصمت ماتبيش تكلم حد ولاطايقه تشوف حد..
بس فجأة..
رن تليفون..
فتحت عيونها وقعدت دور فيه..
كان تليفون سدرة محطوط ع الزيانه..
ناضت ومشتله..
وين وصلت فيه وشافت المتصل لقاته..
خالي المحجوب..
تفكرت كلامها عنه قلبها زاد وجعها..
قامت التليفون وفتحت الخط وردت بصوت مرتجف..
"أيوه"
"ايوه السلام عليكم..سدرة؟"
سكتت طوبى وقلبها قعد يدق بقوة..
وهي تتفكر في سدرة لما قالت..
《 ساد انه من ريحة الغاليه الله يرحمها تي هادي بروحها تخليني نسامحهم كلهم ونستقبلهم بالأحضان..》
غمضت عيونها بألم ودموعها يقطروا منهم وقالت..
خالي..
"سدرة معاي؟!..مش سدرة مش صوتها..من انتي فردوس؟"
طوبى معاش قدرت تتكلم..
"غرفه!؟..الو معاي!؟"
فتحت عيونها وقالت..
طوبى..
"طوبى..اهلا بنتي اهلا..بنتي خيره صوتك؟تبكي!؟"
قعدت تبكي وهي تمسح بيدها ع الجهة اليمين من وجهها..
"ياستار !؟بنتي ردي عليا..شن صاير..'
طوبى ببكي:سدرة..
قاطعها وقال..
"يالطيف "
وطوبى حاولت تتماسك وبدت تحكيله في كل شي..
☘☘☘☘☘
وراجلها اتصل بيها لرابع مرة وماردتش..
تأفف..ولوح التليفون ع السرير..
بعدين مشي طلع من الجناح..
ونزل من فوق..
وصل تحت توجه للكوجينه ومنها طلع للجنان الخلفي..
قعمز ع رشاده كبير مقابله شلال ميه مدايرنه فيه..
كان مضايق لأبعد حد...
وهو في عز ضيقه..
حس بيده انحطت ع كتفه..
انفجع وشبح لصاحبها..
نجاه بصوت منخفض؛اني..
قعمزت جنبه وشدت يده بإيديها الزوز وقالت؛حبيبي خيرك قاعد متكدر اهو خوك دار العمليه وطلع منها مافيه شي..
الجالي بضيق:مش عارف كيف..بس اللي صار اليوم استغفر الله وخلاص مش عارف شن تقول..
نجاة؛ياما يصير ياجالي في كل تركينه واحرف من هكي..باهي ربي لطف بيكم انتم..
قعد ساكت وماباش يتكلم..
هو اللي مضايقه شي مايقدرش يقول عليه لنجاة..
نجاة:حياتي خلاص..انسى شويه..حاول تنسى..
تنهد وهو ساكت..
هي تعنقت ذراعه وقالت؛اني ع قد مايصير معاي..لما نتفكر انك في حياتي واقربلي من روحي..يهون عليا كل شي..
تنهدت وقالت..قداش نحبك ياقلبي..
هو ابتسم وخداها ليه وقال؛كيف تطلعي هكي؟
نجاة؛مافي حد في الحوش..
الجالي؛حتى لو..ماتطلعيش هكي مرة تانيه..
ضحكت وبعدت عنه شويه وهي تشوفله قالت؛باهي شن رايك نركبوا..
شبحلها بطرف عينه..
هي بضحكه قالت؛نغيرلك جوك ياقلبي انت..
الجالي:وكان شادتك خديجه؟
نجاه؛كان جت في كف ولاتهزيبه مايصير شي تعودت..
ضحك وقال؛باهي نوضي..
ناضوا الزوز..
وقفها وهو مشي خش لأول...وهي بعده..
طلع من الكوجينه وقعد يراقب في الوضع..
كان الطريق سالكه
شبح لنجاة واشرلها بعيونه تركب..
هي ركبت تجري..
وهو القى نظرة سريعه ع المكان بعدين لحقها..
☘☘☘☘☘
"مصحة القدس قلتيلي؟"
طوبى وهي ترشف؛ايه في منطقتنا..
"غدوة الصبح بإذن الله نكون غادي نشوفكم"
طوبى:ان شاء الله..
"بنتي شدي حيلك وخليك قويه زي أختك وان شاء الله مايصيرش الا كل خير"
طوبى بألم؛يارب يارب..
"سلم الأمر لله بنتي ارقدي وارتاحي وان شاء الله تصبحي غدوة تسمعي اخبار حلوة.."
رشفت وقالت؛إن شاء الله...
"هي السلام عليكم.."
طوبى؛وعليكم السلام..
نزلت التليفون وحطاته ع الزيانه وهي تتفكر فيه كيف كان يكلم فيها..
ماحستاش تأثر هلبه..كان يتكلم بنبرة بارده او هي هكي حست..
ولت مرة تانيه لسرير اختها..
رقدت عليه وشمت الوشاح وغمضت عيونها وبدت تقول..
"لاإله إلا الله وحده لاشريك له..له الملك وله الحمد وهو على كل شيء قدير"
☘☘☘☘
وبعيد عنها...
برا العاصمه...في مدينه تبعد عنها 122كم..
الخمس..
في وحده من مزارعها ..
مزرعه فرواله..
كلها خضرة وجمال...
فيها حوش لاهو كبير ولاهو صغير..
بس كان تفصيلته حلوة من داخل..
كان راقد ع كنبه فيه..
التارقي..
ع جنبه الأيمن..وايديه مربعهم..
وسرحان وع وجهه باديه ملامح القهر...
المكان اللي هو فيه توا مش ليه..
لصديق يخدم معاه..عرض عليه قبل انه يمشس يقعد فيها ويتمتع بجمال الطبيعه فيها..لأن عبد القيوم يحب الاجواء هادي..
مارفضش عرضه بس اجله مجامله..
لكن..لما ضاقت بيه الواسعه مشاله طول وخدي منه عنوانها ومفتاحها ووصله صديقه بناس غادي يساعدوه يش يوصل فيها..
عبد القيوم كان ناوي يروح للكفره الى غير رجعه..
لكن مجرد ماطلع من المنطقه اللي فيها شارع القهوة غير رايه طول..
واختار يبعد شويه..بش يختلي بنفسه ويفكر في كويس قبل لياخد اي قرار..
وفي الحقيقه هو واخد قراره ومنتهي الموضوع بس كان يبي يبعد شويه بش يستجمع نفسه ويعرف يفكر شن لازم يدير..
كلها عمايل القلب اللي يدف فيها فراس العقل وماشي...
ماقدرش يفارقها..
ماقدرش يخليها..
بالذات وهو عارف تفاصيل عن حياتها هي نفسها ماتعرفهمش..
تفاصيل كارثيه.
وفوقها المصيبه اللي نزلت ع رووسهم هي وعيلتها..
يعني هي توا في وضع صعب ع الآخر..
بس وين يتفكر انها ع ذمة راجل تاني..
يحس بالخجل من نفسه..ويخاف..
يخاف هلبه انه يرتكب ذنب يضيع دنيته و آخرته...
الحيره اللي طايح فيها عبد القيوم..
مايقدر حد يطلعه منه..غير العليم بكل شي والأدرى بالخيره وين وهو بس اللي يدله عليها..
ناض من مكانه..
ومشي توضا...
بعد ولى...
وقف بآتجاه القبله..
ورفع ايديه وكبر..
وبدي يصلي..
وهو يصلي...كان بقلبه يحكي في كل شي لربه..
اللي يعرف كل شي ومع هدا سمع لصوته الداخلي..
وسمعه وهو يهمس باللي فقلبه وهو ساجد..
في كل سجده..
واكثر دعاء كان يردد فيه..
"ربي آتني من لدنك رحمة وهيئ لي من امري رشدا"
بعد ماكمل الصلاة..
مسح بإيديه ع وجهه وهو يتنهد بحرقه..
بعدين ضمهم ع بعض وقال بألم..
"يارب..وانت عالم باللي في القلب.."
☘☘☘☘☘☘
"كابوس يانسرين كابوس حاسه روحي بنهبل"
نسرين بحزن؛اني خايفه هلبه خايفه بشكل يافايزة..صدري مغموم..
"شن اللي مخوفك؟ سامعه حاجه؟'
نسرين ودموعها ينزلوا:مش سامعه شي بس هكي يافايزة احساس..
"يارب سترك..زدتي خوفتيني..تعرفي نسرين لو سدرة تصير فيها حاجه مش عارفه كيف يصير فيا حاسه ظهري انكسر يانسرين"
قعدت نسرين تمسح في دموعها وهي ترشف وتسمع في صوت بكي فايزة..
بعدين هدت بكي وقالت..
"بنقولك ع حاجه قبل بنخبر بيها سدرة اليوم بس صار اللي صار"
نسرين:شن هي؟
"شريت شقه في ****** "
نسرين:قصدك بتحولي؟
"لامانقدرش..اني وبناتي مانقدروش نعيشوا برواحنا..بس بنخليها لبناتي ماتندريش ع الوقت خاطر ع بالنا اللي صار لسدرة اليوم"
ورجعت تبكي..
ونسرين قعدت تبكي معاها..
☘وفي حوش الجد علي..
كانت اميمه في داره دير عليه في طلة بش تطمن عليه..
لقاته راقد...
طلعت من حداه وسكرت الباب بهدوء..
بعدين مشت بتولي لدارها سمعت صوت بوها يكح..
وقفت وقعدت تشبح لباب داره..
بعدين مشت طول...
وعبد المطلب قاعد يكح..
وحسين راقد في داره ومش حاس بشي..
لحظات...
وولت اميمه وهي تمشي بسرعه..
فتحت باب الدار وخشت عليه..
لقاته متمدد وهو حاط يده ع صدره ويكح..
قعدت تشوفله وفي عيونها باين الصراع اللي بينها وبين مشاعر الكره اللي تحملهم اتجاه بوها..
غلبت هالمشاعر وجاته..
ساعداته يقعمز وقعدت تسأل فيه؛شرقت؟
هو هز راسه بإيجاب وقاعد يكح..
شافت جنبه لقت ميه ع الكامدينو..
صبتله منها في طاسه..
وقعدت تشرب فيه شويه شويه..
لين هو بعد الطاسه..
هي ردتها لمكانها وساعداته بش يرقد ع جنبه اليمين..
اميمه؛هكي كويس..
هو قال:اممم..
غطاته بالبطانيه زين..
بعدين شبحتله شويه ومشت بتطلع هو قال..
"شن صار..في لطفي؟"
التفتتله وقالت؛مانعرفش؟
هو عرفها مانبيش تاخد وتعطي معاه في الكلام..
غمض عيونه والتزم الصمت..
وهي لفت ومشت طلعت من الدار وخلت الباب مردود شويه..
وين جت بتتوجه لدارها..
وقفت في مكانها مفجوعه وقالت؛خلعتني جدي!..
علي:خيرك مارقدتيش لتوا..
تنهدت وقالت :من فينا قادر يرقد؟
اشرلها ع دار حسين وقال؛اسمعي..
ضحكت ضحكه خفيفه من وسط ملامح الألم..
علي:بري ارتاحي بري..
تنهدت وقالت؛ان شاء الله غدوة كلنا نرتاحوا..
هز راسه وقال:آمين..
اميمه:تصبح ع خير..
علي؛قدامك كل خير..
ومشت اميمه لدارها..
وعلي مشي بعدها لدار ولده فتحها وخش عليه..
لقاه راقد..
سكر الباب وقعمز فيها...
طلع نظاراته من جيب السوريه العربيه اللي ع الصدر لبسها..
وقام التليفون..وقعد يدور ع رقم يوسف..
لقاه..اتصل بيه...
رد عليه يوسف وهو يقول.
"ايوه جدي"
علي ؛هاه يوسف شن حال عمك توا؟
"نقول الحمد لله باهي باهي"
علي؛فايق هو؟
"ايه ياجدي فايق..حني في مصلى المصحه من بكري وهو يصلي"
تنهد علي بألم وقال:ربي يفرج عليه وعلينا..
"آمين"
علي؛عينك ع عمك ردبالك..
"كون هاني جدي"
علي:اي حاجه تصير كلمني طول..
"حاضر جدي..حاضر"
علي:باهي سكر..
ونزل التليفون وسكر عليه بسبابته..بعدين حول نظاراته وشبح لعبد المطلب لقاه يشبحله..
بدت ع وجهه ملامح الحزن...
وعبد المطلب رجع غمض عيونه مرة تانيه..
☘☘☘☘☘
ومازال هديكا الليله طويله...
اطول من ليالي الشتي المعروفه..
طوبى اللي كانت حاسه روحها قاعده في العراء بلا مأوى..
لجأت للي لايضعف ولايغيب ولايموت..
ربي..
اللي قعدت تصليله في صلاة القيام..
وهي تشكي وتدعي..
تحاول تشد في حبل الله..وتتكا عليه...
بش تتحمل أي صدمة مؤلمه ممكن تتلقاها مستقبلا..
وتسأله انه يرفع عن اختها ويردهالهم زي قبل وأحسن..
ودموعها بلوا الصلايه...
🍃اما عمتها..واختها وبنات اختها..
بصعوبه جاهم النوم ورقدوا وماكانوش مرتاحين في نومتهم..
☘اللي جرب يرقد وهو خايف يعرف معنى هالكلام...☘
🍃بس في عالم موازي..
"راجي هني شويه"
طلع الجالي وهو يمشي متسلل..
وصل في الدروج نزل كم درجه وشاف من فوق..
بعدين شبحلها واشرلها تنزل..
نزل..
وهي لحقاته..
وصل لوطا..
شاف الكوجينه واللي حواليها..
بعدين شبحلها واشرلها تنزل..
هي نزلت...
وقعدت تجري بدون مادير الصوت لين وصلت للجناح..
وهو رجع ركب مرة تانيه..
نجاه بعد ماخشت وسكر باب الجناح بهدوء..
انفتح باب دار حمواتها بهدوء.
وبانت منه خديجه اللي كانت تشبح لباب الجناح وهي رافعه حاجبها..بعدين رجعت سكرت الباب بهدوء..
🍃والجالي لما ركب للجناح..
رجع اتصل بطوبى مرة تانيه لقي تليفونها مقفل..
ضايق ع الأخر..
حدف التليفون جنبه ع السرير وتمدد ورقد وهو معصب...
☘☘☘☘☘
تاني يوم..
الخميس...
الساعه 9:00صباحا..
كانت طوبى في الجنان..
مقعمزة تشرب في القهوة...
وهي لابسه ع توته سدره شال سدرة الصوف اللي تلبس فيه هلبه في الشتي وع راسها وشاحها اللي فيه ريحته..
عيونها ثابتات ع زهر الياسمين ودموعها ينزلوا وهي تسمع في جوليا بطرس...
ليش الحب الأول مابيرضى يفارقنا
بيرجع مثل الاول ع الماضي يفيقنا
بيرجعنا صغار وبيصير يذكرنا
ويرمينا بالنار...
بيضلوا يحرقنا يحرقنا...
🍃وهي تسمع فيها كانت يجي بين عيونها بعض المشاهد لأختها وهي تبكي بروحها في الخفاء بعيد عنهم..
وتعاني عذاب حبها اللي ضاع..
ورجع الاحساس بالذنب لطوبى..وهالمرة سيطر عليها سيطرة تامه..
شايفه روحها هي السبب الاول والاخير في حرمان اختها من اجتماعها بحبيبها في الحلال..سبب فراقهم وعذابهم هما الزوز..
حطت الفنجان وقعدت تبكي بألم بدون صوت..
وقلبها موجوع وجع يصعب وصفه..
🍃واختها..
قاعده غارقه في النوم...نوم مايشبهش النوم المعروف..
نوم قطع صلتها عن العالم الخارجي تماما..
وخلاها وكأنها تسبح في فضاء مظلم خالي من الحياة....
🍃وهكي ولت الحياة بدونها في عيون احبابها..
واولهم هو...
فاق..ولما فاق...تفكر كل شي صار..
واستأنف حالة الصدمه اللي عاشها امس..
ولده وخوه بحداه..
يكلموا فيه..مايبيش يرد عليهم..
تعدوا الوقت المسموح لزيارته طلعوهم وخلوه بروحه..
محمد بقلق؛كيف هكي يادكتور يعني بوي بيقعد هدا حاله؟
:اهدا يامحمد اهدا ولدي..بوك توا كأنه عايش حالة صدمه لكن ماتخافوش حيطلع منها بسرعه..
نضال بقلق؛يعني وضعه بشكل عام توا شني يادكتور؟
:نقدروا نقولوا كويس مادام مافيش خطر ع حياته بيولوجيا بس نفسيا متأزم الوضع شويه...
محمد حط ايديه في نصه وتنهد بضيق..
ونضال هز راسه وهو مضايق..
الدكتور؛لازم يطلع من البلاد كلها بعد مايرجع صحته ضروري جدا يغير جو ويبعد عن اسباب التوتر والانفعال..
نضال؛ان شاء الله..
الدكتور؛شد حيلك محمد انت راجل الله يبارك يعتمد عليك ساعد بوك وسانده..
محمد بضيق:اكيد..بارك الله فيك دكتور..
الدكتور:فيك بارك الله...في حال صار شي اني موجود اليوم كله...ان شاء الله لاباس عليه..
الزوز قالوا:لايوريك باس..
مشي الدكتور..
ومحمد قال بتهكم؛يبعد عن جو التوتر والانفعال تو كل ماله يزيد يقرب منه.
نضال قعد يشبح لمحمد بصمت..
ومحمد مشي قعمز ع الكرسي وضم ايديه ع بعض وقعد يفكر..
نضال:ماشي نجيب قهوة وفطور..
هز محمد راسه وهوساكت..
ونضال مشي ..
لما طلع من الممر..
جي فايت من قدامه واحد..
هيئته كانت تحسس اللي يشوفه انه مش ليبي..
شكله..ولبسه الرسمي قعد يمشي لين وصل للمكان اللي قاصده..
شاف من بعيد راجل اخته ومعاه شاب في اواخر الثلاثين..
تنهد..ومشالهم..
لما وصل فيهم قال؛السلام عليكم..
شافوله الزوز..وواحد منهم قال..
لطفي:وعليكم السلام..وجي بينوض..
قاله:لا والله تقعد مقعمز..وصافحه بإيديه الزوز وهو يقول:ان شاء الله لاباس ع سدرة..طلق يده وقال..ماتخافش عليها بآذن الله نطلعها من هني ونسفرها لأحسن دولة تعالج فيها..
لطفي:بارك الله فيك..بنتي اني اللي نسفرها يامحجوب لو نبيع اللي فوقي واللي تحتي..
محجوب شبحله شويه بعدين هز راسه وقال مسايرة؛حاضر..حاضر..
ويوسف يشبحله بإستغراب..
شبحله وقال:المحجوب نسيب لطفي..
يوسف:الخال محجوب!!..ناضله وسلم عليه بالأحضان وهو يقوله..سبحان الله من قال نشوفك مرة تانيه!..
المحجوب:هاه لحظه..انت يوسف!
بعد يوسف وقال:ايه يوسف..
المحجوب؛توأم سدرة..
ابتسم يوسف بحزن..
المحجوب وهو مضيق عيونه تعجبا:ياااه ع السنين قداش تجري..
لطفي:تجري وماتراجي في حد واللي خليتوها وهي فالعشرين تربي في وخياتها بروحها ومتحمله مسؤوليه عيلة كامله برا وداخل.. وتفكرتوها بعد ماولى عمرها 40عام وطاحت...
الكلام اثر فيهم..
والمحجوب قال بضيق واحراج:شن ماقلت عندك حق واني مش حنبررلك لاعن نفسي ولاخوتي اي عذر نقوله حيكون اقبح من ذنب..
لطفي قعد ساكت ماعنداش رغبه يناقش وياخد ويعطي..
يوسف قعد يشبح لردة فعل عمه وماباش يخش في الكلام بينهم..
تنهد المحجوب وهز راسه لما فهم لطفي شن يبي بعدين قال ليوسف:نبي نعرف معلومات بإستفاضه عن حالة سدرة..
يوسف ؛الدكتور المسؤول عن حالتها يجي بعد المغرب بس الفريق اللي يخدم معاه موجودين هني..
المحجوب:لانبي الدكتور نفسه. تو نولي مع المغرب ونشوفه..ماتبوا شي..
يوسف؛بارك الله فيك..
شبح للطفي وقال:لطفي..مايردك الا لسانك يالطفي..
ولطفي ماباش يرد عليه ولايشبحله..
هو ابتسم مجامله بعدين قال:تمام..السلام عليكم..
يوسف:وعليكم السلام..
ولف ومشي المحجوب ويوسف ولى قعمز..
لكفي بتهكم؛تو هدا حال واحد واجعاته بنت اخته؟
يوسف شبح لعمه شويه بعدين غير عيونه عنه وشبح القدام وهو يفكر بضيق..
☘☘☘☘
في احدى المطاعم في العاصمه..
في مكان مغلق..
ركن خاص وطاوله خاصه بعاد عن الانظار..
كانوا يفطروا مختار وصابرين ورايقين هلبه..
صابرين بضحكه:الادارة هكي تبي بيبي..
مختار بإبتسامه؛يعجبني اللي عارف شن يبي..
ضحكت..
وخر واتكى ع مسند الكنبه وقال؛صابرينه تعالي جنبي..
هي شبحتله وقعدت ساكته..وقلبها يدق بقوة..
مختار؛تعالي..مستاحشك هلبه..نبي نملي عيوني منك..
وهي هايمه في حلاوة كلماته المعسوله..
ناضت ومشت قعمزت جنبه..
هو مد ذراعه وحطها وراها وقال؛ترا اشبحيلي..
قعدت تشبح لعيونه وهي مسحورة بنظراته..
هو عقد حواجبه وقال؛فيك شي غريب قاعد يشدني ليك بشكل من طبيعي..مش قادر نحولك من تفكيري..ولاننسى تفاصيلك..صوتك...كلامك..ضحكتك حركاتك..
وكان مفعول كلامها عليها زي مفعول المخدر بالزبط..
شد ذقنها بسبابة وابهام يده اليمين وقال:اني مسحور فيك..
وهي مستسلمتله تماما..
وهني صارت نتيجة من نتايج الخلوه اللي يكون فيها الشي.طان ثالث..
وفي الحقيقه في هالخلوه كانوا في زوز شيا.طين مش واحد..
وغواية البنادم للبنادم ممكن تكون اقوى من غواية الشيطان بمراحل..
☘وفي مكان بعيد عنهم..
كان محتويها زي مايحتوي الاب بنته..
يمسح ع شعرها وهو يقول؛زيدي..
غرفه بحزن وعيون دامعه:مانبيش خلاص..
باس راسها وقال؛باهي احكيلي شن صار؟
بعدت عنه وهي تشوفله قالت؛رؤوف بنسألك سؤال وجاوبني عليه بصراحه..
عبد الرؤوف:اللي هو؟
غرفه؛اني وحده كويسه ولامش كويسه؟
هو قعد يشبحله بتناحه الاجابه اصعب من السؤال..
نزلوا دموعها وقالت؛وصلتني الاجابه..لكن اني لاني كويسه ولامش كويسه..اني انسانه طبيعيه عندي عيوب وميزات ومانعرفش نافق ولانكذب...
عبد الرؤوف:تمام...
غرفه وهي بتبكي؛تساير فيا صح؟
عبد الرؤوف؛ياودي خليني من هدا كله وقوليلي شن اللي صار معاك في حوش اماليك امس..
بدت تبكي وهي تقول؛ديما يطلعوا فيها وحده لاقلب وانانيه مش حاجه جديده..واني اكثر وحده فيهم ع طبيعتي وماعنديش في النفاق والمثاليه الزايده..
عبد الرؤوف:غرفه احكي اللي صار بالزبط..
قعدت تشبحله وهي عاقده حواجبها ومترددة تتكلم..
عبد الرؤوف رفع حاجبه وقال:الموضوع فيه مختار صح؟
غرفه؛مالاش ذنب مختار ولاليه علاقه باللي صار لسدره وهما حطوها في راسه يالاش انه مشي لأريج بنت فردوس وقاللها اجمعيني بطوبى..
غمض عبد الرؤوف عيونه بشده وهو يحاول يكتم غضبه بعدين فتحهم وناض وهو يقول:ارفعي السفره..
ومشي طلع من حداه وتوجه لدار النوم..
وهي تأففت بضجر..ورفعت السفره وناضت طلعت بيها من الدار...
☘في الشارع...
درست سيارة سودا قدام حوش لطفي الواعر.
شافها محمد شنيبه اللي نزل من سيارته بعد ماروح من زليتن..
شبح واحد نازل منها حس انه شايفه من قبل..
وقف قدام باب حوش لطفي وقعد يدق...
هو غير عيونه عنه ولف ومشي خش لحوشه..
🍃"مني"
المحجوب:المحجوب ياطوبى..
فتحت طوبى الباب وين جو عيونها ع خالها..
رجعت تفكرت كلام سدرة..
"من ريحة الغاليه"
وزي مانقولوا نشموا عليه في الصنه..
طاحوا دموع عيونها وقالت:تفضل..
هو خش وسكر الباب..
شبحلها وقال؛فيك من اختي الله يرحمها برغم ان مافيش شبه كبير..بس فيك حاجه منها قويه..
طوبى قعدت تبكي..
وهو تنهد بألم وخداها في حضنه..
وطوبى ماصدقت..شدت فيه وبكت بقوة.
وهو انوجع ع الآخر..وقعد يطبطب عليها..
ع طلعة فردوس وصغار ووراهم مطيره..
مطيره:هدا منو اللي متغمراته طوبى؟
فردوس؛شايفاته قبل..
قدمت اكثر لين وصلت فيهم..
ركزت ع ملامحه وهو شبحلها..
هي اتفاجئت ع الآخر وقالت:خالي محجوب!
مطيره؛حي محجوب!..والله الا هو حق..
اريج؛خال امي يعني خو حناي الله يرحمها؟
آلاء؛لاولد عمها!؟ خوها ياأريج مالاشنو..
اريج؛مش مني نسيت ان امي عندها خوال اصلا..
☘المحجوب بإبتسامه؛فردوس..
بعدت عنه طوبى وهي تمسح في دموعها..
فردوس:قالتلي سدرة روحت لكن ماتوقعتش ديرها وتجينا..
المحجوب؛ماعندي باش نرد عليكم لاانتم ولابوكم..شن ماقلتوا عندكم حق يخي اني مهيأ نفسي نسمع الاسوأ ونستاهل..
فردوس:سؤال معليشي..شن خطرنا عليك توا شن جابنا لبالك..
المحجوب:والله ماغبتوا عن بالي..بعد وفاة اختي الله يرحمها قعدت نتصل ونسأل عليكم وماننكرش ان الدنيا بمشاكلها خدوني ونسيت الكل مش انتم بس..نسيت حتى نفسي..ولما جي وقت مرواحي اول من جي ع بالي انتم..
فردوس وهي مازال متهكمه:فيك الخير..
ابتسم وقال:قتلك شن ماقلتوا مش حندافع ع روحي ولانبرر..
طوبى:معليشي فردوس حبيبتي خلينا منها الدوة هادي توا..شبحتله وقالت..اني مش اقل منك في عتبي عليهم كلهم لكن زي ماقالت سدرة...
"ساد انه من ريحة الغاليه الله يرحمها هادي بروحها تخليني نسامحهم كلهم ونستقبلهم بالأحضان."
تأثر هلبه بالكلمات اللي سمعها...
ونزلوا الدموع من فردوس لما سمعتها بعدين رشفت وقالت:تفضل..
المحجوب؛بارك الله فيك..
مطيره خشت طول..
وهو مشي مع فردوس وطوبى بيخشوا..
لما شاف صغار فردوس قال؛من الجميلات والجنتل هادم؟
ابتسمت آلاء..
واريج تشوفله بعدم تقبل..
ومعتز عجبه شن قال عليه..
طوبى:صغار فردوس..
هو بإندهاش:الله يبارك الله يبارك..كيف حالكم..
هما بأصوات متقطعه:الحمدلله..
هو قال؛اني المحجوب خال امكم..ينادوا فيا بيجو اسمي كبير عليا..
هما شدوا ضحكتهم بقوة..
وطوبى تفكرت كلام سدرة عنه لما قالت..
《بس هدا وين تشوفيه يخش خاطرك طول》
بدت ع وجهه ابتسامه من بين ملامح الحزن اللي ملكاته..
هو قال بإبتسامه؛ربي يحفظكم..
فردوس:تفضل..
المحجوب:هي..
حول من رجليه ومشي خش للحوش وهما معاه...
☘☘☘☘☘
"قبل لنجي هني كنت عنده فايق وحاله باهي"
مغليه بلهفه:نبي نمشي نشوفه..
محمد؛العشيه وقت الزياره لكن مش اكثر من تلاته دقايق تشوفيه وتطلع..
مغليه بدموع في عيونها:عادي المهم نشوفه ولدي..
هو لبس الفانيليا متاعه وقال:مشيتوا لعيت لطفي الواعر..
مغليه؛شن نمشولهم هادي مش عارف المصيبه اللي نزلت علينا!
محمد:مصيبتهم هما اكبر وضع سدرة صعب هلبه يامراة..
مغليه؛لهالدرجه!؟.
محمد بأسف؛مسكينه والله مسكينه البنت هادي..ربي يكون مع بوها كان تشوفي حالته تبكي الحجر..
مغليه بأسف؛لاحول ولاقوة الابالله..
فتح الباب وقال؛خواتك بايتات هني؟.
مغليه:ايه هما وعيال خوي..
هز راسه ومشي طلع من الدار..وهي وراه...
مغليه وهي تمشي وراه قالت:تطلع من الحمام تلقى الفطور واتي.
محمد؛حطوه في المربوعه..
وقف فم باب الحمام وقال...بعدين تمشوا لحوش الواعر انتي وبناويتك..
هي هزت راسها بدون ماتتكلم..
وهوخش للحمام..
تأففت بضجر بعدين لفت ومشت للكوجينه..
☘☘☘☘☘
"كلمني لطفي وعزمني ع الفضانيه فرحت هلبه الحق واللي فرحني تقبلكم ليا من البدايه"
فردوس:صراحه ماتقبلك حد من البدايه غير سدره وقعدت تقنع فينا نتقبلوك زيها وماننلاموش..
ابتسم وهو ساكت..
طوبى: الناس وين كانوا ينشدوا فينا عليكم مانعرفوش شن نردوا..ومرات ننجبروا نكذبوا..كم مناسبه درناها انتم مش فيها وياما سمعنا دوة من هني وهني..متخيل شكل المواقف اللي حطتيونا فيها؟
هو بأسف قال؛ماعندي مانقول والله ماعندي مانقول كلامكم حق ويقولوا كلام الحق وجاع..
فردوس بحسرة؛معاش ينفع اللوم توا سنين فاتت خدينا فيها قلتكم..
مرر نظره عليهم الزوز بعدين قال؛حنى لو لزيتوني مش مخليكم..ايه صح اني جيت متأخر هلبه..لكني جيت في النهايه..جيت وحيد بروحي لامراة لاصغار ماعنديش عيلة..روحت لعيلتي ليكم انتم وخوتي وخواتي للحاجه اللي نقصتني في الغربه وماقدرتش نعوضها..
طوبى وهي تشوفله وتسمع فيه حست بنبرة حزن صادقه باينه في كلامه وأثر فيها..
وهو تابع يقول؛بناتي..سامحوني وحقكم عليا..بإذن الله نعوضكم ع اللي فات كله..واني وياكم ننسوه كأنه ماكان..تو همنا كله في سدرة وحالتها..قبل لنجيكم كنت في المصحه ولما سألت عن الدكتور المسؤول عن حالتها قالوا يجي اليوم بعد المغرب..
طوبى ؛بعد ماتعدي24ساعه..
كلهم قعدوا يفكروا بقلق في اللي بيصير بعد مايتم الوقت بعد احد ثانيه من 24 ساعه..
يا يرتاحوا..
ياحتبدا معاناة جديده في حياتهم..
خالهم مرر نظره عليهم وقال:خلوا أملكم بالله كبير..
نزلوا دموع فردوس وهي تقول؛ونعم بالله..
وطوبى قعدت تدعي في نفسها..
"ربي لاتحملني مالاطاقة لي به"
☘☘☘☘☘
"روح للحوش ارتاح شويه والعصر تعالى"
لطفي بضيق:روح انت يايوسيف وتعالى العصر مادورنيش..
يوسف؛عمي قعادك هني مافيش منه فايده..
لطفي بنفاد صبر:بالله عليك يايوسف خليني ع راحتي تربح..
تنهد يوسف بيأس وقعد ساكت..
ع جية عبد الرؤوف وصل فيهم وقال:السلام عليكم صباح الخير..
ردوا عليه الزوز؛وعليكم السلام..صباح الخير..
مشي قعمز جنب لطفي وقال:شن حالك اليوم عمي؟
لطفي هز راسه وقال:الحمد لله على كل حال.
عبد الرؤوف:الحمد لله..قولي فطرت..؟
يوسف؛ماباش يحط في فمه حاجه..
رفع حواجبه وهو يقول:لاعمي ربي يحفظك مايجيش هكي بكل..
لطفي بضيق:والله ماخاطري في حاجه ياولدي..مانبي شي..
شبحله شويه بعدين قال:عمي مايجيش هكي اللي دير فيه غلط..لازم تقوي روحك وتشد حيلك كلنا محتاجينك عمي بناتك يشبحولك راهو..
وناض وهو يقول..ماشي نجيب فطور وبنجي ونفطر اني وياك..
طبطت ع كتفه بعدين مشي..
وعيون لطفي معاه..
يوسف شبحله وقال؛كلامه مزبوط بناتك يشبحولك مافي حد يقدر يغنيهم عنك..
غير لطفي عيونه القدام وكانت نظراته في الفراغ نظرات هم..
الهم اللي سيطر ع ملامح وجهه من سنين طويله..
☘☘☘☘☘
وبناته يسقدوا في خالهم اللي بيروح..
لما فتح الباب قالتله فردوس:هداكا حوشها اللي حدا بابه شجرة
شبح المحجوب للحوش وقال:زبطه..ابتسم وشاف لفردوس وقال..ماشيلها..ماتبوا شي..
ابتسمت مجامله وقالت؛سلامتك..
المحجوب هز راسه وقال:نشوفكم بعدين السلام عليكم..
فردوس :وعليكم السلام..
هو مشي وهي سكرت الباب..
قص الطريق في الوقت اللي طلعوا مغليه ونسرين من الحوش متوجهين لحوش لطفي الواعر..
شافاته مغليه حست روحها تعرفه بس تجاهلت وكملت طريقها..
🍃وفي حوش عبد الرؤوف..
نبيله وهي تلبس في كبوطها ودخل في الوشاح داخله:عندي جلسه ومجبورة نعطل كان تقدري طيبي طيبي كان هدا وصي ع غدي من برا..
غرفه وهي تشرب في عصير برتقال طبيعي هزت راسها والضيق كان باين ع وجهها..
شبحتلها نبيله بنظرات اسف..
بعدين خدت شنطتها ومشت بتطلع..
وغرفه تنهدت بضيق..بعدين مشت قعمزت قدام التلفزيون وشغلاته..
🍃نبيله وهي ماشيه بسرعه للباب الخارجي..
سمعت الباب يدق..
وصلت فيه وفتحاته...
كانت مستعجله...
بس لما شافت الشخص اللي كان ورا الباب..
جمدت في مكانها..
نست القضيه ومايجي منها..
نست كل شي...
ومعاش فهمت ولااستوعبت شي..
🍃زي ماصارله هو..
ملامح الذهول كانت واضحه ع وجهه..
لاقدر يرمش عينه وهو يشوفلها..
وحس ان النفس مش طالع منه..رغم انه قاعد يتنفس طبيعي..
ولاهي قدرت تتكلم ولاهو..
الزوز ماكانوش مستوعبين اللحظه اللي هما..ولامستوعبين اللي قاعد يصير..
ثواني..
وهو نطق واخيرا..
المحجوب بإرتباك؛هدا حوش..ضيق عيونه وقال..غرفه الواعر..بنت اختي..
هي زاد انصدمت اكثر..
بلعت ريقها بعدين هزت راسها وقالت:ايه..
قعد يشبحلها وهي تشوفله...
ومازال في حالة عدم الاستيعاب..
هي غيرت عيونها عنه وكانت في قمة الارتباك:لحظه تو نبلغها..
ومشت بسرعه بتخش وقلبها يدق بقوة..
زي قلبه اللي كان يشوفلها وكله شوق..
وقفت في نص الطريق والتفتت وقالت:تفضل ماتقعدش واقف برا..
هو هز راسه وهو مرتبك وخش داخل..
لفت ومشت وهي مازال تفكر وتتسائل لو اللي شافاته احلام يقظه ولاواقع..
غرفه سمعت صوت خطواتها شافت للمكان اللي يدخل للصالون..
شافتها استغربت وقالت:خيرك وليتي؟
شافتلها شويه بعدين قالت؛غرفه..انتي عندك خال اسمه محجوب؟
بأستغراب غرفة ردت تقول:ايه..علاش تسألي؟!.
بلعت ريقها وملامح الصدمه باديه ع وجهها وقالت:واقف برا..
غرفه ناضت وهي متفاجئه قالت؛برا؟
حطت طاسة العصير ومشت طول طلعت..
وخلت نبيله واقفه في مكانها والصدمه مسيطرة عليها..
🍃غرفه وين طلعت شافاته..
هو لما شافها ابتسم وقال؛الله يبارك..
غرفه وهي مندهشه؛خالي محجوب!؟..
هو بإبتسامه قال؛متفكرتيني..
قدمتله وقالت:اصلا ماتغيرتش هلبه..امتى روحت وشن جابك هني؟
ضحك وقال؛اجلدوا اجلدوا بنات اختي حلال عليكم..
وصلت فيه ومدت يدها وقالت:حماتي لما قالتلي خالك برا استغربت الكلمه هلبه..خالي!.
شد يدها وقرب ليه وضمها وهو يقول:ايه خالك..
هي ماكانتش متقبلاته زي خواتها..وماقدرتش تبين عكس هكي..
بعد عنها وقال؛خليتك صغيره هلبه قبل لتخشي المدرسه..وتوا الله يبارك مراة متزوجه..
ع طلعة نبيله بدون ماتشبحله قالت؛طالعه غرفه..
وفاتت من جنبهم وهو تبعها بعيونه لين طلعت من الحوش..
استغربت فيه غرفه وقالت؛تعرفها؟
شبحلها..
غرفه؛لما خشت سألتني عندك خال اسمه محجوب؟انت قلتلها اسمك؟
ابتسم بعدين قال؛تعرفني قبل ماتعرفك..
غرفه بعدم فهم؛كيف؟
المحجوب بإبتسامه:كانت زميلتي في الكليه..
غرفه هزت راسها وقالت؛اها..باهي..تفضل..
المحجوب:راجلك قاعد؟
غرفه؛لا..
المحجوب؛امم..تمام نجيك مرة تانيه..
غرفه؛ع راحتك..
ضحك لأنها ماشدتش فيه وقال؛ان شاء الله لاباس ع سدره..
هزت راسها بدون ماترد..
وهو قال؛السلام عليكم..
ومشي فتح الباب وطلع وهي سكراته وراه وقالت:ع اساس هماتك سدره ولاحني هامينك..اشبح علاش تفكرنا بعد هالسنين..
🍃🍃🍃🍃🍃
"الارض اللي خلاها جدي لبناته ولا وحده فيهم باعت حصتها ولاخدتها ولاقسموها بيناتهم من الأصل"
مطيره؛وخيره خوالك التانيين مادورهاش!؟
اريج؛هو واضح انه معبي ومرتاح شكله مخطط لمشروع يبي يديره ع الارض هادي وناوي يخلي خواته وانتم ماما تبيعوله حصصكم..
فردوس وهي تفكر:ايه والله مافيش غير هكي..
مطيره؛مش عارفه لكن المحجوب مش هكي الحق نتفكر فيه كان حنين هلبه فيكم وفي امكم..
اريج؛هداكا زمان عمتي زمان..بالله عليك ماشفتيش شكله كيف وهو يدوي ع حالة خالتي سدرة بارد وملامح وجهه بارده مش باين انها واجعاته بكل..
آلاء؛بصراحه حتى اني لاحظت..
فردوس بحده ودموعها في عيونها؛مرة تانيه يجي من فم الباب نسقدوه حني ماعندناش خوال خوالنا ماتوا مع امنا...
🍃وفي الجنان..
كانت طوبى تكلم في راجلها مكالمه هاتفيه..
"شوفي كم مرة كلمتك وماردتيش"
طوبى بضيق:اني امس مانندري ع شي وعقلي ماكانش معاي بكل مش غابي في اللي صاير..
"اهو حتى اني خوي الكبير راقد في المصحه وحالته حاله ومع هدا ندور فيك ونكلم فيك لأنك اهم من اهم حد عندي في الدنيا كلها"
تنهدت بضيق وقالت؛اسفه جالي ..
"مانبيكش تتأسفي حبيبي..نبيك تردي عليا لما نتصل بيك بس"
رشفت وقالت:حاضر..بعدين قعدت تبكي..
"خلاص ياعمري..خلاص..بإذن الله بإذن الله حتسمعي عنها مايفرحك اليوم..
هدت بكي شويه وقال بنبرة مخنوقه؛يارب..
☘سكر منها بعد ماهدرز عليها شويه..
بعد جهز نفسه بش يحضر اجتماع..
خشت عليه نجاة وقالت؛وينك لتوا..
هو كان مقعمز ع رووس صباعه قدام الخزنه..فتحها وهو يقول:توا جاي..
وجاي بيطلع من الخزنه ملف مهم فيه تصميمه..
كان محطوط عليه صندوق لوح حوله..
شافاته نجاة واستغربت فيه..
هو حطه فوق الخزنه..
وبعد طلع من الملف رده لداخل بس قبل ليسكرها فتح الصندوق واطمن ع اللي فيه..
بعدين رجع سكره ووقف ع حيله وقال:تفضلي..
نجاة:هيا..
ومشت طلعت وهو وراها..
☘☘☘
بعد الاجتماع..
طلعوا الحاضرين من قاعة الاجتماعات..
وقعدوا هما الزوز بس..
نجاه بإستغراب؛جالي..
الجالي وهو لاهي باللاب توب؛اممم..
نجاه؛التصميم اللي شفته بكري يشبه للتصميم اللي اني درته وانت قلت ماقبلوشي..
قام عيونه وشبحلها بنظره..
دخلت الخوف لقلب نجاه وقالت؛هكي فيه منه حسيته..
الجالي؛مالاش علاقه هدا اولا..تانيا وهدا الاهم انتي مش ملاحظه انك قاعده تقلدي في اسلوبي في الشغل يعني تصماميك اللي شفتهم فيهم هلبه من شغل قديم ليا لهالسبب توقعت انهم يرفضوهم لأنهم شافوني داير زيه قبل هلبه وكويس هلبه انك لاحظتي حاجه زي هادي..شغلنا بدي يتشابه نجاة حاولي ديري لروحك بصمه وتتميزي تمام..
قعدت تشبحله وهي تسمع فيه شن يقول..
ولأنها تحبه هلبه و تأثيره عليها كبير بدون تفكير اقتنعت بكلامك وصدقاته بالحرف وقالت:زعمه هكي صاير معاي!؟
الجالي:اكيد مش زعمه..
ابتسمت وقالت: يقولوا اللي يحب يقلد حبيبه في كل شي..بش تعرف قداش نحبك..
ابتسم وبعتلها قبله طايره بعدين قال؛بري لمكتبك تحركي..
نجاة؛تعالالي اليوم باهي..
الجالي:لا اليوم لا..روحي لشقتك وابعدي عن خديجه ..
هي في نفسها قالت..
"ياربي امتى تفكني منها البلغمة هادي"
وقالتله..تمام...المهم لما نتصل بيك ترد..سلام حبيبي..
الجالي؛سلام..
لفت ومشت طلعت من حداه..
وهو قعد لاهي باللاب توب..
☘☘☘☘☘
الساعه 4:00عصرا..
في صالة شقة نجاة..
كانت تتغدا مع اختها وصغارها..
ياكلوا عادي وصابرين توكل في معاذ..
قعدت نجاة تشبحلهم وهي مبتسمه ولما رجعت بتشوف لصونيتها لمحت شي ثبت انظارها عليه..
قعدت تشبحله هلبه وملامح الامتعاض بانت ع وجهها..
كملوا غداهم..
هي غسلت لصغارها ودختلهم لديارهم..
وبعد مارقدت معاذ مشت للكوجينه..
خشت ع صابرين وهي تغسل في الماعين..
سكرت الشيشمه وقالت؛شن هدا اللي ع رقبتك؟.
صابرين انصدمت وقالت وهي تحاول تخفي خوفها؛مافيها شي رقبتي!..
شدتها من ذراعها بقوة وقالت؛صابرين ياحمارة شن قاعده ديري!؟
نفضت يدها وقالت؛ماندير في شي فوتيتي ترا..
وفتحت الشيشمه وتمت غسل الماعين..
حط يدها في نصها وقعدت تشبحلها من فوق لتحت..
وصابرين ع قد ماتقدر تحاول تبان عاديه وهي ميته من الخوف في داخلها..
تنهدت نجاة بخوف وقالت؛صابرين انتي كبيره مش صغيره ماتخليش مشاعرك تحكم فيك..ردي بالك ضيعي روحك ردي بالك...
شبحتلها بإزدراء وقالت:شن الدارما البايخه هادي!؟بري سلم وخيتي بري ارقدي واحلمي براجلك..
شبحتلها نجاة بضيق بعدين مشت طلعت وخلتها..
وبعد ماطلعت صابرين قالت؛مانديرش في غلط يحبني ونحبه ومصيرنا نتزوجوا..
وكملت شغلها عادي مش هامها شي غير مختار وبس..
☘مختار اللي واخيرا حصل غرفه...
وردت عليه..
"من امس نخبط عليك نادى وماردتيش استغربت"
غرفه بحزن:قصدك ماسمعتش باللي صار لسدره..
"خيرها!؟"
غرفه ودموعها في عيونها؛امس طاحت من الدروج ع راسها انفتح وصارلها نزيف...
"كيف!!؟"
نزلوا دموعها وقالت:دارولها عمليه ووقفوا النزيف وقالوا بعد24 ساعه يعرفوا شن بيصير فيها..خايفه تموت..
وقعدت تبكي..
ومختار يسمع فيها بدون مايعلق..
هدت بكي وقالت؛اليوم بعد المغرب يبان كل شي..
"تمام غرفه تمام معاش تبكي ان شاء الله خير ان شاء الله"
وغرفه رشفت وهي تقول:ان شاء الله...
🍃🍃🍃🍃🍃🍃
ومرت الساعات..
وجت الساعه اللي يراجوا فيها وكلهم ترقب وخوف..
في المصحه..بوها وخواتها وصغار عمها..
وفي الحوش عمتها ومرت عمها وجدها وصغار اختها...
وصاحباتها..
فايزة..ونسرين..وعائشه..
كل وحده فيهم شاده تليفونها وتستنى..
🍃في المصحه..
طوبى كانت شاده في يد فردوس بقوة وتردد في تاج الذكر في سرها..
وغرفه واقفه ورا عبد الرؤوف وحاطه جبهتها ع ظهره وهي تدعي بكلمة وحده بس..
"يارب يارب يارب"
ولطفي مقعمز ع الكرسي حاط ايديه الزوز ع ركابه وقلبه يدق بقوة من الخوف..
خالها المحجوب كان حاط ايديه ورا ظهره ويشوفله..
وحسين ويوسف كل واحد فيهم كان ع نار وقلبه مليان خوف..
واميمه واقفه وعاطيه ظهرها للحيط..وحاطه قبضة يدها في فمها وتعض فيها من التوتر والخوف..
🍃وفي غرفة العنايه..
بعد مافحص قصي سدره فحص شامل..
وخر عنها وهو يشوفلها بأسف..
بعدين شبح لإياد وقال؛للأسف..
غمض اياد عيونه بألم..
قصي؛ربي يفرج...
🍃وطلعوا الزوز من حجرة العنايه ومشوا وين ماكانوا موجودين اهل سدره..
ناض لطفي لما شافهم قدملهم وهو يقول برجاء:بالله عليكم قولوا حاجه تفرح بالله عليكم..
اياد كان متألم ع الآخر..
اما قصي قال بأسف؛والله كان بودي لكن مع الأسف..المريضه خشت غيبوبه..
فردوس بصدمه؛ووه عليا اختي!...
وغرفه شدت في ظهر عبد الرؤوف اللي موجوع ع الآخر وانهارت بالبكي..
والمحجوب تأسف جدا وقلبه وجعه..
يوسف كانت دمعته قريبه فيسع طاحت..
و حسين اللي دمعته كانت واعره بكي قلبه دم ع اخته الكبيره...
واميمه قعدت تبكي بصمت وألم..
زوز اللي نزل عليهم الخبر زي الصاعقه خلاهم مايعبروش بأي ردة فعل..
لطفي..وطوبى..
المحجوب بوجع؛باهي يادكتور لأمتى بتقعد فيها الغيبوبه هادي..
قصي:والله مش معروف..ممكن تفيق بعد اسبوع..بعد شهر..بعد تلاته..بعد سته..او بعد سنه..كله في علم الغيب..
بنبرة مخنوقه قال لطفي:ومرات ماتفيقش بكل..
قصي:مانبوش نتشائموا ياحاج..
المحجوب:نقدروا نطلعوها برا..
قصي:ديروا اللي يريحكم برغم ان النتيجه حتكون وحده هني ولافي أحسن مستشفيات العالم..
المحجوب؛سامحني لطفي لازم نطلعوها برا..مادورش الاجراءات واني نتصرف..
لطفي اللي كان في عالم غير العالم..
حس الدنيا لفت بيه فجأة..
كان حيطيح..
بس..
في حد شد من ظهره بقوة وهو يقول..
طوبى بخوف:بوي..بوي خيرك.!
والدكاترة اياد وقصي وولاد عمها وراجل اختها خدوه منها وقعمزوه ع الكرسي..
مشي اياد بسرعه بش يجيبله جهاز قياس الضغط..
وحواليه كل حد كان يقوله في كلمه يواسيه بيها يحاول يخفف عنه..
وهو مايسمع في شي..
كان اصوات بكي فردوس وغرفه واميمه..
وكلام قصي عن حالة سدرة..
《والله مش معروف..ممكن تفيق بعد اسبوع..بعد شهر..بعد تلاته..بعد سته..او بعد سنه..كله في علم الغيب..》
مسح بيده ع لحيته وهو يقول..
"خلتني بروحي"
عبد الرؤوف بألم؛لاحول ولاقوة الا بالله..
لطفي وهو مفجوع؛كسرتلي ظهري بنتي هادي كنت شاده بيها اني توا من غير ظهر خلاص..
حسين؛شن تقول ياعمي حني شن نديروا..
حرك راسه بالرفض وهو يقول؛مافيش زي سدرة مافيش..بنتي هادي مايجي مكانها حد..بنتي هادي بعد امها ولتلي كل حد..ومن بعدها هي ماقعدلي حد..
كان في ناس بين زوار للمستشفى وممرضين يتفرجوا ع اللي صاير ويسمعوا في كلام لطفي وهما متأثرين..
وقعدوا يحكوا عن سدرة وهما متسائلين شن اللي داراته البنت هادي لبوها بش يقول عليها كلام زي هدا!؟
شن تكون في عيلتها اللي صاير فيهم حال ع خاطرها من كبيرهم لصغيرهم!؟..
قعدت سدرة حديث الساعه في المصحه..
ومن المصحه للشارع اللي وصلاته اخر اخبارها لانهم كلهم كانوا يستنوا فيها...
وع راسهم جدها..
عمتها اللي ياما صار فيها بعد ماسمعت..
صفيه امها التانيه اللي كبدها ذابت حزن عليها..
صغار اختها اللي حاسبينها امهم التانيه انهاروا بمعنى الكلمه..
وجدها اللي كان موجوع عليها هلبه ووجعها كان مضاعف عليها وعلى ولده..
🍃وصاحبات عمرها..
فايزة اللي قعدت تبكي بالصوت..
تبكي في بكي مابكاتاش ع امها لما ماتت..
وبناتها حداها يبكوا معاها..
🍃نسرين اللي كانت وسط اهلها منهارة بالبكي..
وهما حواليها متأثرين..
امها وبوها..وخديجه وخوتها نضال والجالي..
🍃اما ردة فعل عائشه..
صدمت صغارها..
عائشه وصلت بيها انها تندب عليها نديب..
نست كل الثوابت والضوابط..
عقلها وكأن طار منها..
☘ردة فعل عائشه ماكانش مبالغ فيها..
عائشه..حست ان سببها الوحيد اللي يخليها تسيب الدنيا وهي مطمنه ع صغارها راح خلاص..☘
من قوة زعلها وانفعالها..تعبت..ولماجي ولدها يرفعها للمصحه رفضت رفض قاطع..وهربت للنوم..ومن صغارها..
اللي قعدوا حواليها وماقدروش يفارقوها.
🍃🍃🍃🍃
وروحوا كلهم من المصحه..
معاش ليه معنى ولافايده وجودهم غادي..
بعد ماروحوا..
حوشهم تعبا بالجيران..
ومربوعته كان مليانه برجال الشارع..
حتى من بلال وفراس كانوا موجودين..
🍃حوالين لطفي..
بوه وراجل بنته غرفه يحاولوا يهدوه..
وهو مقعمز حاط راسه بين ايديه وع قد ماكلموه ماباش يرد ع حد..
☘وحالته كانت حالة طوبى..
خاشه حالة صدمه وفي عالم تاني..
وخواتها وعمتها وبنات اختها وفايزة يبكوا وعبراتهم متلاحقه...
والجيران متأثرين بحالهم ع الآخر..
في وسط هدا كله..
كانت اميمه مش طايقه تكون في مكان واحد مع نساوين عيلة شنيبه..
وفي.من يراقب فيهم ويهدرز عليهم بالتهامس ولاهامهم اللي صاير ولامدورين هما علاش جايين...
🍃برا...
دق باب الحوش الخارجي..
مشي معتز وفتحه..
لما شاف اللي قدامه عرفه لأنه شايفه في فاتحه اخته..
وقاله؛خالي..
مختار مسح ع شعره وخش وكان باين عليه انه منفعل..
معتز سكر الباب ولحقه..
🍃هو وصل في باب المربوعه..
حول من رجليه وخش وهو يقول..
السلام عليكم..
الأنظار كلها توجهتله..
بوه حرر راسه من ايديه ورفعه..
وشبح للباب..
شافله..
كانت يبان ع وجه مختار الالم والقلق..
بس بوه مش قادر يشبح غير وجه واحد بس لولده ومش حيتغير..
قدم مختار لبوه وقف قدامه وقال؛الليله نطلعها بالإسعاف الطائر لألمانيا ماتقعدش هني دقيقة زياده..نوض معاي نتموا الاجراءات..
قعد يشبحله بإمتعاض ..
وكل الموجودين..
اللي منهم محمد شنيبه وولاده والصيد وولاده ينقلوا في نظرهم بين البو وولده..
وخاله المحجوب اللي قعد مركز عليه وع هيئته...
لطفي؛امشي اطلع برا..
مختار قعد يشبحله وهو يعد للميه بعدين قال؛مش طالع الا وانت معاي كان تهمك مصلحة بنتك انسى كل شي وفكر فيها هي وبس..
لطفي؛بنتي مانعالجهاش بفلوس حرام..
كانت صفعه صوتها اقوى من أي صفعه ماديه تنحس حصلها مختار ع مرأى ومسمع من الناس..
تبدلت ملامح وجهه للغضب وهو يقول؛مانسمح لحد يقولي اللي انت قلته..لاانت ولاغيرك نخليهم يقولوا عليا كلمة زي هادي..
محمد شنيبه؛راك تنسى هدا بوك يامختار..
لطفي؛وهدا مش ولدي ياحاج محمد وكلكم شاهدين ان تبريت منه هالعمل الغيرصالح..اني بو بناتي بس..لطفي علي الواعر عنده 4بنات بس...الكلام هدا قلته في مجمع زي هدا قبل واللي حضره قال للي ماجاش..لطفي الواعر عنده بنات بس وماجابش راجل..
محمد شنيبه اشر بعينه لولده الجالي..
الجالي فهمها ناضله وهو يقول؛تعالى يامختار..
مختار :خليكم بعيد..مالكمش علاقه..
وقف الجالي في مكانه وهو يشوفله..
وهو شبح لبوه بعدين هز راسه وكانت تبان الحركه وكأنها حركة وعيد..
لف ومشي بيطلع..
سمع بوه قال..
"معاش نبي نشوفك قريب عليا وع بناتي ماتخلنيش ندير حاجه نندم عليها..."
مشي طلع وهو يغلي غليان من بوه..
وفي داخله زات توقدت نار الكره والانتقام...
#سبات_طويل
#طوبى
.
