#تكملة_الجزء_الخامس_عشر"ياغربتي في عيونك"
#جمان_فريد
#طوبى
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
🌻🌻🌻🌻🌻
وعدت هالليله..
وطلع تاني يوم....
كانوا مطيرة وفردوس وفايزة بايتات في الحوش..
ونايضين من الصبح يضموا في الحوسه..
اللي كملت الظهر..
بعدين قعمزوا مع بعض يشربوا في القهوة..
فجاة سمعوا اصوات زغاريد..
مطيرة:شكلهم قروا فاتحه ولد جويده..
صفيه:ايه قالوا ع الظهر..
وقعدوا يشربوا في قهوتهم ويهدرزوا وبعد حوالي ربع ساعه..
تفاجئوا لما سمعوا صوت النوبه..
مطيره:شكله عيت جويده طلقوا الشيوخيه بالثلاثه..
غرفه:الصوت هني مش بعيد..
فايزة:بنركب نتفرج..
غرفه:ارفعيني معاك..
وفي النهايه ركبوا كلهم يتفرجوا..وسدرة معاهم..
وين ركبوا..
شافوا فرقه النوبه واقف معاهم المهدي يصفق ويغني..
وخوته وجماعة الشارع ملتمين...
وامه تتفرج من الروشن..
اتصلت بيها خديجه..
مغليه:ايوه خديجه..
"يام هدا شنو"
مغليه:المهدي قال دايرها هديه لنسيبه لكن مامشتش عليا..
"حي ياحي حي ع العار.."
مغليه:قتلك خوك ونعرفه..
شويه وبدوا يسمعوا في اغاني فرقة النوبه..
كانت اغاني فرح عاديه جدا..
والدنيا تتفرج من الرواشن..
وعيت الواعر يتفرجوا وهما مش مرتاحين بالذات سدرة وهي تشوف في المهدي يغني ويصفق..
شويه وقفت النوبه الشويه..
والمهدي بدي يغني...
كيف تبوني ننساه..
كيف تبوني ننساه.
كيف تبوني ننساه بعد شاطن نيران غلاه..
اللي واقفات ع الرواشن..بين اللي تشهق واللي تخبط في خدها..
وسدرة حطت يدها ع عيونها وهي تشوفله بضيق..
هو بعد غنى رجعت دقت النوبه من جديد..
والشباب يردوا ورا المهدي بحماس ومنهم نضال وعمر.
اما الجالي فكان يشبح للمهدي بإبتسامة استسلام..
المهدي..
كيف تبوني نجفاه...كيف تبوني نجفاه.
كيف تبوني نجفاه اللي خايل بالحيل سماه...
اللي زوله لسع ريناه...الخاطر صايف من مطراه..
كيف تبوني ننساه..
والشباب يردوا وراه وقالبينها..
فايزة:هدا خلاص دماغه فلسع رسمي..
مطيرة:اني اصلا استغربت سكاته..
وطوبى واميمه وغرفه يشبحوا لسدرة اللي كانت تفرك في جبهتها ودموعها في عيونها..
المهدي..
كيف تبوني نخليه..كيف تبوني نخليه..
كيف تبوني تخليه واني قلبي متولع بيه..
من بالي ماني ناسيه..ان راد المولى الرفقه معاه..
وكيف تبوني ننساه..
عواطف:هدا فات قيس بن الملوح غادي..
نجاح؛شهدر بيها في الشارع مسكينه..كان يندري خطيبها يسيبها.. نجاح:وعيشه عيشه وين من هدا كله..
عواطف:راقده ع وذانها في عرس خوها..
..المهدي
كيف تبوني نسيبها كيف تبوني نسيبها
كيف تبوني نسيبها..ياناس الغية مصعبها
ونابعقلي وروحي..غير كيف تبوني ننساه..
وشبح لحوش الواعر..
والشباب يردوا..
وسدرة تشوفله بحده ودموعها في عيونها..
كيف تبوني ننساه..كيف تبوني ننساه..
كيف تبوني ننساه بعد شاطن نيران غلاه..
وكيف تبوني ننساه...
ووقفت النوبه الشوط بعد ماكملت مهمتها...
#ياغربتي_في عيونك
#طوبى
...يتبع....
