(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السابع_والثلاثين"أقحوانه 4"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
نسرين:لما خشت عليهم وشفتهم ماركزتشش انهم فيهم حد نعرفه لين جبت عند العزايز قولي من شفت...
عائشه:ياستبر مني؟
نسرين يألم:خالتي مشتده..ام فايزة
عائشه بأسف:إنا لله وإنا إليه راجعون..تصدقي كلنا كنا متوقعين يصير هكي من اللي داروه في اختهم..
نسرين بحزن؛وجعتني هلبه هلبه بالذات لما قالولي فيها زهايمر..
عائشه:إنا لله وإنا إليه راجعون إنا لله وإنا إليه راجعون..
نسرين بضيق:نبي فايزة تعرف..
عائشه:اكيد لازم تعرف..بس اني لتوا نبي نعرف شن اللي صار بيناتكم بش تقعدوا متقاطعين السنين هادي كلها..نانسي والله مافي حاجه فهالدنيا تستاهلوا نقاطعوا احبابنا ع خاطرها..
نسرين تنهدت وقالت:خليها للوقت ياعيشه..اني بنكلم سدرة ونخبرها بش تقوللها..
عائشه:خليني اني نكلم سدرة..
نسرين شبحتلها شويه بعدين قالت:باهي..
☘☘☘☘☘
في شارع القهوة..
كان المهدي داير كرسي ومقعمز قدام المطحن..وشاد تليفونه يشوف في سعر الذهب اليوم..بعد ماشافه قعد يراسل في تجار يعرفهم عن امور تخص هالموضوع لأن عنده تجارة ذهب في مسقط رأسه..
ع جية سيارة سدرة درست قدام الحوش..
وقعدت تشبحله بنظرات امتعاض..
هو يزبط حس سيارتها..طول شبحلها..
جو عيونهم في بعض..
هي ماحولتش عيونها طولت في نظرتها عرف شن قصدها منها..
رفع حاجبه ورد عيونه للتليفون..
هي حركت راسها يمين ويسار..بعدين نزلت من السيارة ومشت للحوش..
هو رفع عيونه شافها خشت ولما جت بتسكر الباب شبحتله طول نزل عيونه..
استفزها..خبطت الباب بقوة..
وهو طول ضحك..
☘داخل..
سدرة:كأنه مادار شي هالمتخلف..
وصلت في الباب حولت من رجليها وخشت..
شمت ريحة مطهر مخلطه بريحة الوشق..
والحوش كله يبرق برق..
وين قربت من الكوجينه..
خشت عليها لقتها واقفه لابسه المريول ودير في حاجه..
طوبى بدون ماتشوفلها:شن صار؟
سدرة قدمت وقالت:مشكله عاديه وحليتها..شن ديري..
طوبى:بندير مبروشه نرفعوها لغرفه عارفتيها تحبها..
سدرة بإبتسامه؛مش غرفه بس ع فكرة..
ضحكت طوبى وقالت:حاضر تو ندير زوز لينا وليها..
سدرة:منورة...مررت نظرها ع الكوجينه وقالت..عمتي ماروحتش من حوش جدي؟
طوبى:لا..
سدرة؛مشيتي شفتي جدي..
طوبى:وين جيت بنمشي لقيته في الجنان يتمشى هدرزت اني وياه شويه..تحسيه مش مريض مرض هكي عضوي..لالا نفسيته تعبانه..
سدرة؛نفسيته تعبانه؟
طوبى بضحكه؛مش هاين عليه يعطي اميمه ولعمر بالذات..
عكرشت سدرة وجهها وقالت؛بيني وبينك حتى اني مانبيش..
طوبى؛بس هو يحبها بصدق ونحس فيه كويس..
سدرة:تمام يحبها وكويس بس مش لأميمه الصراحه اميمه تستاهل خير منه بوين خسارة فيه..
طوبى بضحكه؛انتي وجدي كان تلقوا ماتعطوناش بكل..
سدرة:بالعكس بس نبولكم رجالة نطمنوا عليكم معاهم مش نزيدوا نخافوا..
طوبى؛صدقيني عبد الرؤوف يحب غرفه..
سدرة؛ايه يحبها ماقلنا شي..لكن يابنتي الحب مش كل شي..
في اللي أهم منه الأمان..ويخي الأمان لازم يجي قبل الحب..
لما تكوني مع راجل انتي مرتاحه وتحسي روحك مطمنه ع نفسك معاه هذا هو اللي يستاهل ترتبطي بيه الرباط المقدس لإنه مش حيخلف ميثاقه الغليظ معاك..حيخاف عليك من نفسه..يخاف يجرحك ولايكسرك..يخاف يديرلك اي حاجه توجعك مراعي ربي فيك...
مرات الوحده طيح في راجل يحبها..لكن يعذبها..ساهل عليه يجرحها ويكسرها ومايخافش ربي فيها...
طوبى قعدت تسمع في كلام اختها وهي تفكر فيه..
سدرة:هدا علاش ياحلوتي نقولك الأمان اهم الف مرة من الحب..
شبحتلها طوبى وابتسامه..
هي شدتها من ذقنها وقالت:ربي يطيحك في اللي يستاهل هالجوهرة اللي ربيتها وكبرتها وخليتها احلى بنيه في كل شي..
طوبى قربت منها وباستها من خدها..
سدرة:يييه ياوخيتي سلمها..وحتى هي باستها من خدها..بعدين قالت..هي بنيتي كملي المبروشه بسرعه بنمشي نشوف جدي بعدين بنمشي لغرفه...
ومشت طلعت من حداها..
وطوبى وهي مبتسمه ولت للي دير فيه ورجعت تفكر في كلام اختها..
☘☘☘☘☘
تراقب فيه وهو يديرلها في ساندويتش دحي مطبوخ بالطن..
بعد كمله مدهولها..
هي خداته وقال:يسلموا
ماردش عليها وقعد يصبلها في طاسة عصير..
بعدين مدهالها..
خدتها وقالت؛ماتحرمش..
ولاعبرها..
قعد يشبح للسفره جبد شريحة خيارة وكلاها..
وهي قعدت تاكل وتشوفله بإبتسامه..
بعدين حطت طاسه العصير وخدت شريحة طماطم مدتهاله..
عبد الرؤوف:مانحباش..
وخدي قطعة شريحة جبنه وكلاها..
هي ردت الطماطم وخدت شريحة خيارة ومدتهاله..
عبد الرؤوف:ترا افطري وخليني نعرف نفطر زي الناس..
غرفه:باهي خودي هادي مني هادي بس..
خداها وردها في مكانها..
غرفه؛علاش باهي!
عبد الرؤوف:مانحباش..
غرفه؛توا شفتك كليت وحده..
عبد الرؤوف:كنت نحبه وتوا لا..
غرفه :ياسلام بسرعه هكي!
حط سبابته ع صدغ راسه وهو ياكل قال:مزاج..
غرفه عكرشت وجهها وقالت:باهي امضغ زين..
عبد الرؤوف:حاضر انتي تأمري أمر..وخدي كم شريحه خيار كلاهم في مرة وقعد يمضغ ويمتق..
وغرفه مغمضه عيونها بشده وهي تضحك..
وهي يشوف في ضحكتها وشاد ابتسامته..
وخفاها طول لما فتحت عيونها وقالت؛باهي خلاص افكر معاش بنكلمك بكل..
عبد الرؤوف؛ماهو من الاول..
ضحكت ورجعت تاكل..
وهو ياكل عادي..
شويه وقالت؛ديرلي نص تاني جيته ومعاها طماطم وخيار..
شبحلها شويه وقال:ع فكرة انت فاهمه اللي ندير فيه معاك غلط راهو..اللي ندير فيه توا من باب الواجب..
رفع الغنصر متاعه وقال..هدا اولا..
رفع بعد البنصر وقال..وتانيا بش ترضى علينا اختك سدرة اللي دايرتني وحش عديم احساس..
نزل يده وقال..مسكينه مش عارفه من فينا يخوف اكثر من التاني...
هي سكتت وخدت طاسة العصير وشربت منها..
وهو شبحلها بنظرات حاده..بعدين رجع ياكل..
نزلت الطاسه وقالت؛ديرلي نص جنبه..
فنص عيونه وهو يشبحلها..
وهي رمشت عيونها تتصخفله..
وهو يشوف فيها هكي باردة وتستفز فيه ببرودها..
عبد الرؤوف:تعرفي انتي هم وجبته اني لروحي..ورفع ايديه وهو موسع صوابعه عن بعض وقال...بإيديا هما وحطيته ع قلبي..وحط ايديه الزوز ع قلبه..
غرفه ابتسمت بشقاوة وقالت:هم زي العسل ع قلبك..واشرت عليه بسبابتها وهي تحرك فيها وهي تقول..ولا..ولا..ماتقدرش تنكر..
هو كان مصدوم في برادتها..غير وجهه عنها وكان يقاوم في ضحكته وهو يقول:لاحول ولاقوة الا بالله!..
وهي تضحك عليه..
شبحلها شويه..بعدين خدي السفره وقال..هي اقعدي جعانه..
ومشي طلع وهي تقوله..لا نبي الجبنه حرام عليك خاطري فيها!!..
وهو طلع من الشقه وهو يقاوم في ضحكته ويحرك في راسه يمين ويسار..
☘☘☘☘☘☘
"لا الحمد لله وجهك اليوم احسن من امس"
الجالي:الحمد لله..ضيق عيونه وقال..باهي دكتور امتى نطلع من هني..
الدكتور؛ بعد اسبوع
الجالي:لا شني اسبوع وراي خدمه يادكتور!
الدكتور:حرصا ع صحتك لازم تطلع من هني ووضع الجرح يكون كويس..
الجالي تنهد بإستسلام وقعد ساكت..
الدكتور؛سيورك تطلع المهم تكون صحتك تمام..
الجالي هز راسه وهو ساكت..
الدكتور ابتسم وقال:لاباس عليك..
الجالي؛لايوريك باس..
مشي الدكتور طلع..
والجالي تأفف وشبح لللاب توب متاعه اللي كان موجود ع الكنبه في حجرته الخاصه..
ع خشة محمد المهدي وهو يغني ويرقص بكتافه يرفع وينزل فيهم..
عمي ياعمي ياعمي..
ياوين نشوفه ننسى همي..
قعد يشبحله الجالي وهو يضحك..
وصل فيه..وباس ع راسه وقال؛شن جو اليوم..
الجالي؛زفت..
محمد:علاش خيرك!
الجالي؛مش متحمل قعدتي هكي..
محمد:قول الحمد لله اللي جاتك ع هكي..
الجالي بضيق:الحمد لله..بس في وراي خدمه واجتماع مهم واقفه عليه هلبه حاجات مهمه..
محمد قعد يشبحله وهو يفكر بعدين التفت شبح حواليه جو عيونه ع اللاب توب..
رفع حاجبه وشبح لعمه وقال؛علاش ماديراش عن بعد بالنت..
الجالي عقد حواجبه وشبح للاب توب..
محمد؛فيها كيف!
الجالي قعد يفكر وهي يقول؛ترا جيب اللاب توب وهات التليفون..
محمد؛هي..
ومشي خدي اللاب توب بعدين جابله التليفون من ع الكامدينو..
عطاه التليفون خداه..
وحطله اللاب توب ع رجليه..
الجالي:دماغك مليح ياولد انت..
محمد بضحكه؛طالع لعمي..
الجالي ابتسم وهو يتصل بالنائب متاعه؛ايوه مازن...
☘☘☘☘☘
طلعت من الدار وهي تلبس في عبايتها..
خشت عليها الكوجينه وقالت:لكن لاحظتي حاجه..
طوبى وهي تنظف في الكوجينه؛شن هي؟
سدرة؛الجالي شكله ماجابش سيرتك بكل..
طوبى وقفت وقال؛ايه صح لاحظت..كان هدا راهو قداش ليها خالتي مغليه هاده علينا وهي تردح بنات الواعر يبوا يقتلوا ولادي..
ضحكت سدرة وهي تقول؛عطيك الهني يافرخه..
وطوبى رجعت تمسح في الرخامه وهي تقول؛بس نبي نعرف هو شن حاله توا..
سدرة:شوفي كان طلع الموضوع بنمشولهم وتو نفهموا شن صاير..
فجأة رن تليفون سدرة..
مشت تجري للدار..
وطوبى كملت ضمان الكوجينه..
شويه سمعت سدرة تقول..
"ياهلا بعويشه عاش من سمع صوتك"
طوبى وهي تسمع ؛اكيد بتخبرها...
☘وفعلا انتشر الخبر في شارع القهوة كله..والاتصالات بدت تهل ع مغليه ومحمد شنيبه
فهالوقت...
كان الجالي يرأس في الاجتماع متاع الشركه عن بعد..
الاجتماع اللي كانت حاضراته نجاه وهي تشوفله ع طريق شاشه العرض وقلبها متسارعه نبضاته..
كل ماله يزيد يعجبها اكثر واكثر..
ويملكها اكثر واكثر..
ويتمكن حبه من كل شي فيها اكثر واكثر..
☘☘☘☘☘☘
ومع العشيه...
نساوين شارع القهوة ورجالتهم كانوا في حوش شنيبه ع خاطر اللي صار للجالي..
ومن حوش الواعر..طبعا مشت صفيه ومعاها مطيرة وسدرة..
وكانوا في صالة الحوش مع الحاضرات يسمعوا في رواية مغليه للقصه..
مغليه:تعرفوه انتم الجالي دمه حامي وفزاع مع اللي يعرفه واللي مايعرفاش ماتحملش اللي شافه فكر يخلص البنت من ايديهم ومافكرش في اللي بيصيرله..
وحده من الجارات؛اللي صارله مع بنات حوش السعدواي لما هجموا عليهم جماعة ***** يشهدله..طيب فيك اللي ربه سلمه حتى هالمرة هادي..
مغليه:ايه
مطيرة؛اي والله..الحمد لله رب العالمين..والله ديما ندير في الرقيه ونقرا عليهم ونشرب فيهم ميه مرقيه بش ربي يحفظهم..الحمد لله ياربي الحمد لله..
مطيره؛لكن والله البلاد ولت تخوف معاش ينعاش فيها..
نجمه؛صدقتي ياوخيتي..كل يوم نسمعوا بمصيبه شكل شي يكشش منك لحمك..
وحده من الجارات؛ربي يجيرنا..
الحاضرات بأصوات متقطعه؛يارب..ان شاء الله..
وكملوا هدرزتهم..
والصاحبات الاربعه موجودات وسط الجلسه..
نسرين تسرق في النظر لفايزة..
وفايزة متجاهلتها..
وعائشه تشوف لفايزة بحزن..
اما سدرة كانت تشبح لنسرين تراجي تشبحلها..
شبحتلها نسرين واخيرا..
اشرتلها بعيون تطلع برا تبيها..
نسرين فهمت عليها..وزعت النظر ع الحاضرات بعدين شبحت شويه لعزوزتها لقتها لاهيه بالهدرزة..
ناضت ومشت طلعت من الصاله..
لحظات وناضت سدرة طلعت وراها...
وعيون خديجه معاها..
☘برا..
سدرة شدت نسرين من يدها ومشوا الزوز لدار خديجه ونسرين زمان..
سدرة:افتحي الباب..
نسرين:خيرك شن في...
سدرة:غير افتحي خل نخشوا داخل قبل..
نسرين وهي قلقه:باهي..
فتحت الباب وخشت..
وسدرة بعدها وسكرت الباب..
نسرين:حكتلك عيشه؟
سدرة:ع شن بتحكيلي ع هبال راجلها!؟
نسرين بإستغراب:المهدي!
سدرة؛خوك دارلي العار مع واحد من اولياء الامور..
نسرين:قصدك مشالك المدرسه!؟
سدرة؛لا..لكن خاش على صفحتي شاف واحد من اولياء الامور معلق يشكر في الاداره حضرته خشله خاص هزبه..
نسرين حطت يدها ع فمها وهي مندهشه..
سدرة؛قوليله يدير عقل وياسر هبال راجل ولده ولى اطول منه يدير حركات زي هادي ولده يتحشم يديرها..
نزلت نسرين يدها وقالت؛لاحول ولاقوة بالله عجزت فيه الصراحه عجزت نخاف كان ندوي معاه عليك ينفعل وقلبه يوجعه..
سدرة هدت نبرتها في الكلام وقالت؛حاولي تكلميه بهدوء وتقوليله انت هكي تجيبلها في الدوة والمشاكل..
ابتسمت نسرين لما حست ان سدرة خافت عليه:حاضر تو نتفاهم معاه..
تنهدت سدرة بعدين قالت؛ايه حقه تعالي هني شن بتقولي عيشه!!؟
نسرين تنهدت بضيق وقالت؛ع ام فايزة..
سدرة عقدت حواجبها وقالت:خيرها!؟
نسرين؛يومها كانت في حفله خيريه في دار المسنين مشيت نحضرها...لقيتها غادي..
ابتسمت سدرة تهكما وحركت راسها يمين ويسار..
نسرين؛راهو فيها الزهايمر شافتني ماعرفتنيش..
بدت ع وجه سدرة ملامح الشفقه..
نسرين؛نبيك تحكيلها..
سدرة:لاحول ولاقوة الا بالله..من وين بتلقاها لتلقاها بس..اللهم لااعتراض...
نسرين؛علاش شن صاير معاها تاني!؟
سدرة؛ماتعرفيش قداش ليها..
نسرين فهمت ان سدره ماتبيش تحكي وقالت:ليها 5شهور..
هزت سدرة راسها وقالت؛ان شاء الله خير وخلاص....
☘ونسرين تهدرز مع سدرة في الدار..
وعزوزتها تهدرز عليها وسط مجمع النساوين مستغله غياب خديجه ومغليه..
:والله تقعد باليومين والتلاته ماتحط فيها طنجرة ع نار ولادور صغار ولاعزوز ولاراجل..عطيها دور بالسيارة من تركينه لتركينه بس..اهي سدرة بنتها كان ماخلصتش اني شعرها قبل لتمشي المدرسه تقعد مسكينه مشفشفه..
والنساوين يسمعوا وهما متعجبات..
:كان مش مني ومن الشغاله راحت ليل..
فايزة؛معليشي خالتي بس يعني كان راجلها عاجبه الوضع وهما هكي متريحين في حياتهم مافي حد ليه حق يدخل فيهم..
؛وين متريحين وين..مالا ولدي مرتاح!
فايزة؛والله مادام فيها هالعيوب هادي كلها ع حسب كلامك وقاعد معاها لتوا معناها مرتاح معاها..
:قاعد معاها ع خاطر هالصغار..
فايزة؛مافيش راجل يقعد مع مراة ع خاطر الصغار معليشي..
عواطف:والله صادقه..
وعزوز نسرين قريب تنفجر من الغيظ..
ع خشة نسرين ومعاها سدرة..
قعدوا الموجودات كلهم يشبحوا لنسرين بنظرات غريبه..
وفايزة تشوفلها كيف مشت قعمزت..
قعمزت سدرة في مكانها جنب عمتها..
مطيرة؛من بكري وعزوزة نسرين حاطتها ع القرمه.
سدرة:علاش شن تقول..
مطيرة:ماخلت ماقالت طلعتها ماتسوا بارا..
سدرة بكره؛عزوز الستوت..
ع خشت عائشه ووراها خديجه بضيافه ومعاهم فرح وراما بنات نسرين وخديجه يفرقوا..
☘برا..
كانت نبيله ماشيه لحوش شنيبه وهي شاده في يدها علبة شكولاته راقيه..
وقفت في الباب ودقاته..
ونضال شبحها وهي جايه طلع من القهوة ومشالها..
نضال بإبتسامه؛تفضلي خالتي..
نبيله ابتسمت وقال؛يزيد فضلك ولدي..انتي ولد الحوش هدا..
ضحك وقال:ايه ولد حوشنا..
فتح الباب وقال؛تفضلي..
ضحكت نبيله وقالت:ربي يحفظك..
وخشت.
ونضال سكر الباب وهو يقول:تسلمي..والله ماني عارفه اني شن وضعي بالزبط توا نبي بوي ياخدها!؟ عمالة مزدوجه هادي يانضوله رد بالك..
ومشي ولى للقهوة...
☘☘☘☘☘
"إذا وقعت الواقعه○ليس لوقعتها كاذبه"
اريج؛يام شويه بس..
سكرت فردوس المصحف وقالت؛خيرك؟
اريج؛بنمشي نوصل طلبيات لآلاء ماتبي شي من برا..
فردوس:ردي بالك ع روحك وروحي بكري..
اريج؛مشاوير قريبه هني في تاجورا بالسلامه توا..
فردوس:في امان الله..
مشت اريج طلعت من الحوش..
وامها قالت؛ياربي افتحها عليهم وعليا يارب..
ورجعت فتحت المصحف ع سورة الواقعه وبدت تقرا فيها..
☘واريج برا
ركبت سيارتها وبدت تقرا في اذكار في المساء..
بعدين خطر عليها كلام خالتها طوبى يوم المشكله..
تحركت بالسيارة وبدت تردد...
"لاإله إله إلا الله وحده لاشريك له له الملك وله الحمد وهو على كل شي قدير"
طلعت من الحوش ومن سانية حوش جدها..
وبدت دور بالسيارة ع الحياش اللي يبوا طلبيات الكيك..
وتريحت في مشاويرها وكملتها بسرعه وماتعرضتش لأي مشكله..
وقبل لتروح وقفت ع مقهى خدت منه سندويتشات طعميه بس يتعشوا بيهم وتريح امها من موال العشي..
~~~~~~~~
"ع اقل جبتي حتى برغر"
اريج؛شريتيها بفلوسك.
الاء تجاهلتها وقعدت تاكل..
جتهم امهم بصفره فيها حكاك مشروب حطتها في النص..
معتز:بيبسي يام..
فردوس:خود ياولدي قدامك..
خدي معتز اللي يبيه وقال:يام نبي لاب توب..
فنصت فيه اريج وقالت:شن تبيه فيه اللاب توب انت!؟
معتز:صحابي كلهم عندهم علاش اني الوحيد اللي ماعنديش..
آلاء:عنده حق..
اريج:انتي سكري فمك..
فردوس:ناخدلك ياولدي كان لقيت واحد مستعمل بسعر باهي..
معتز؛عادي حتى مستعمل راضي بيها لكن مش اي كلام نبي حاجه باهي..
اريج؛وتتشرط فوقها..
فردوس:خلاص يااريج اسكتي..حاضر ولدي تو نجيبلك حاجه باهيه..تعشوا..
قعدوا ياكلوا واريج يدوب تاكل وهي تشوف لأمها الهم ولى جزء من تقاسيم وجهها قاعده تتحمل فوق طاقتها وتساير في صغارها..
واستمر وجع قلبها عليها وحزنها ع حالهم وشعورها بالوحشه فهالحياة من غير بوها اللي لو كان موجود كان خفف عنهم هلب حاجات..
حست ان دمعتها بتغلبها قالت؛خل نمشي نكلم الدكتورة نشوف امتى تجي غدوة..
خلت عشاها ومشت للدار..
خشتلها وسكرت الباب عليها..
حطت يدها ع فمها وانهارت ببكي مكتوم..
☘☘☘☘☘
"الجيران كلهم جو"
محمد شنيبه؛ماغاب منهم واحد..
مغليه؛حتى النساوين واخيرا شرفت الجارة الجديده..
نسرين:مراة ذوق يام..
محمد شنيبه وجهه بدي يتلون وهو يقول:ع من تحكوا؟
مغليه؛ع اخت نسيب عيت لطفي الواعر...
محمد؛اها..
مغليه؛رافعه خشيمها وماحاسبه في روحها.
نسرين بضحكه:والله كويسه المراة يام مش عارفه علاش مش طايقتيها.
مغليه:ماخشتش راسي..
محمد في نفسه"وانتي مني يخش راسك!؟"
ع خشة المهدي:السلام عليكم..
ردوا عليه السلام ونسرين مركزة عليه..
قعد واقف وهو يقول:شنجو نسرين..
نسرين:الحمد لله..نبيك في مويضيع..
هز راسه وقال:شويه...بوي كلمني الحاج صميده قالك كل شي تمام..
محمد:باهي الحمد لله..
المهدي:قالي قوله يعادولي بنفهمه بعض الحاجات..
محمد هز راسه وهو ساكت..
طلع المهدي وهو يقول؛نسرين..
هي ناضت ومشت طلعت وراه..
نسرين؛ترا برا للكوجينه..
رفع حاجبه ونزله ومشي للكوجينه..
وهي خشت وراه وسكرت الباب..
هو جي للطاوله خدي من صونيه الفواكه تفاحه وقال:ياستير!..
نسرين وهي ترفع في ايديها وتنزل:يعني لأمتى يامهدي لأمتى يعني..
هو كلي من التفاحه وحرك راسه بمعنى متسائل بمعنى
"شن في"
نسرين؛سدرة يالمهدي انتم بنخلصوا منه هالموال..
المهدي قعد ياكل من التفاحه وماباش يعلق..
نسرين؛انت جبت حسابها من صفحتي ولا..
والمهدي ياكل ومايبيش يرد..
نسرين؛درتلها مشكله في المدرسه وجبتلها دوة معقوله حد يحب حد يجيبله المشاكل..
بلع وقال بحده؛التافه خاش يناشب فيها لاكان يسأل فيها عن المدرسه ولا ع واحد من صغاره..قاللها مديرة متألقه..اللي يعلق تعليق زي هدا شن تتوقعي يبي منها!
نسرين:وانت شن دخلك؟
المهدي بإنفعال؛عن جد شن دخلك!؟..نسرين..قعد يحرك من الخلف للقدام وهو بيقول..اطلعي خير مانفش غلي فيك...
نسرين بضحكه؛لاحول ولاقوة الا بالله..باهي اهدا واسمعني مافكرتش في الراجل هدا شن قاللها وهو جاي يسأل فيها من هو هدا..وهي معروفه عزبا!؟
سكت المهدي وكلي من التفاح بغل..
نسرين:شوف التصرفات هادي تكره سدره فيك بدال ماتقعد في قلبها بمكانتك تخليها طلعك منه ومرات تكرهك..
مشي وين مافي دولاب جردل الكناسه فتح وحط فيه باقي التفاحه ومشي بيطلع وهو يقول:قوليلها قالك اسف..
وطلع..
ضحكت نسرين بقلة حيله وحركت راسها يمين يسار..
☘☘☘☘☘☘
تاني يوم ..
الساعه 8:00صباحا..
طلعت لحقت ع بوها قبل ليطلع وهي تقول..
طوبى:بابا راجي شويه..
وقف لطفي وقال:نعم؟
طوبى مدله مق ستيل مسكر وحافظه صغيره وقالت:بالله بابا خطمهم ع يوسا..
لطفي ابتسم وخداهم وقال:في ميزان حسناتك بنتي..
طوبى:يارب وميزان حسناتك ياغالي..
لطفي بإبتسامه؛ماتبي شي؟
طوبى:سلامتك بس..
مشي لطفي طلع من الحوش..
وطوبى خشت داخل...
حتى اليوم قعدت تنفيدا لأوامر عبد الرؤوف اللي قاللها معاش تمشي للجامعه لين يشدوا الولد اللي كان ناوي يخطفها..
☘وبوها اللي خلوه مايعلم بشي..
خطم ع يوسا وعطاه القهوة والحافظه وقال:من طوبى..
يوسا وهو مبتسم بفكر:شكرا جزيل..
ابتسمله لطفي وقال؛ربي يعاونك..السلام عليكم..
وتحرك بالسيارة..
ويوسا معاه بعيونه وهو يقول:وعليك سلام..
وقعمز..فتح مق القهوة والحافظه لقي فيها قطعه من كيكه المبروشه وتحتها زوز تست طن ودحي مغلفات بالسلفر النايلو..
فرح بيهم هلبه هلبه..
طلع سلسله اللي فيها الصليب وكعادتهم لازم يشدوها ويدعوا قبل ياكلوا..
بس هالمرة كان يشوفلها وهو يتفكر كيف كان عايش وسط ناس من ملته لكن عاملوه أسوأ معامله..وكيف لما جي لليبيا واستقر في شارع القهوة خاف المسلمين يعاملوه اسوأ من معاملة ابناء ملته..بس شاف العكس تماما...
وبدي يشوف لهلبه حاجات بنظرة مختلفه...
وحس بشي تغير في داخله اتجاهه دينه..والسبب في هدا سكان شارع القهوة اللي قاعدين هما نفسهم الليبين الاولين اللي قلوبهم نظيفه ويحنوا ع القريب والغريب..
وصاحبة اكبر تأثير ع يوسا من بين سكان الشارع كلهم كانت هي...طوبى...
☘☘☘☘☘☘
الساعه 11:30صباحا..
كانت فايزة في المركز متاعها كيف فاتحين وبادين يخدموا لعروسه..
وبدون سابق معرفه..
جوها سدرة وعائشه للمركز..
تفاجئت لما قالولها عليهم...
دارت الماسك للعروسه وقال:بعد 20دقيقه نوليلك..
العروسه؛تمام..
طلعت فايزة لصاحباتها..
سلمت عليهم وبعتت بش ضيفهم..
سدرة؛فايزة حني جينا بنحكوا معاك في موضوع ضروري.
فايزة بقلق:واضح من جيتكم في وقت زي هدا...شن في..
تنهدت عائشه وقالت:يومها نسرين....
~~~~~~~~~~
:ابله نسرين يبوك لوطا..
نسرين هزت راسها..
طلعت الابله اللي كلمتها..
ونسرين خدت شنطتها وقالت؛خلاص بنات الحصة شبه تمت االلي اشرتلكم عليه اقروه..
ومشت طلعت من الفصل بسرعه وهي تفكر زعما من جاها..
نزلت لوطا بسرعه..
وين وصلت تحت مشت كم خطوه بعدين وقفت في مكانها لما شافت فايزة واقفه قدامها بمسافه ومعاها سدرة وعائشه..
فايزة ودموعها في عيونها:ارفعيني لأمي...
🍃🍃🍃🍃
ركبوا الاربعه سيارة سدرة..
سدرة تسوق وفايزة جنبها..
وعائشه ونسرين من الخلف..
كانت تليفون فايزة طول الطريق يرن ومابتش ترد..
لين تعصبت وردت..
فايزة بعصبيه؛شن تبي..
"مدام فايزة عندنا عروسه راهو وين مشيتي وخليتيها بدير مشكله"
فايزة،خليها تنحرق...وسكرت في وجهها.
سدرة؛يكلموا فيك من المزين..
فايزة وهي في قمة التوتر:ايه عندي عروسه اليوم ويبوني نوليلها اني خلاص بعد اللي عرفته عقلي وقف مش حنقدر ندير شي..
عائشه:ياريتنا كلمناك قبل لنجوا..
سدرة:بالله نسرين اتصلي بطوبى وافتحي المايك..
نسرين:باهي..
واتصلت نسرين بطوبى وفتحت المايك..
نادى مرتين وانفتح الخط..
"السلام عليكم ابله نسرين كيف حالك"
نسرين:وعليكم السلام حبيبتي..طوبى معاك سدرة"
سدرة:طوبى..
"نعم ان شاء الله خير!"
سدرة؛فايزة صارت معاها مشكله اضطرت تسيب المزين وعندها عروسه ومعاش تقدر تخدم عليها خلاص واضح شكل الموقف؟
"ايه واضح فهمت عليك..تبيني نمشي في مكانها؟"
سدرة؛ايه وحاولي تقنعيها بيك..قدها بنتي ولا..
"بعون الله قدها ونص..بس ابله فايزة خيرها شن صاير معاها.."
سدرة:بعدين نقولك..توا شوفي اميمه ولا اريج يرفعوك للمركز وبلغيني طول شن يصير معاك..
"تمام..سلام"
سكرت طوبى..
نسرين؛خاشه ع عرايس من قبل..
سدرة:ايه بس عرايس بيان ومحضر..ربي يسترها معاها توا..
عائشه:ان شاء الله تقتنع بيها الزبونه..
سدرة:ان شاء الله..
فايزة؛هيا امتى نوصلوا؟
سدرة:قعد شويه بس..اهو خشينا للشارع اللي يرفعله...
وصلت سدرة في الدار..
درست..
ونزل طول فايزة..
وهما نزلوا بسرعه وراها..
لما خشوا داخل..
سألتهم نسرين عن مشتده..
الموظفه رفعتهم لمكانها...
وين وصلوا فيها..
:هديكا اللي مقعمزة غادي..
فايزة لما شافتها انصدمت..
كبرت هلبه بزياده...جسمها كان نحيل جدا..باين فيها العجز..
مشتده اللي كانت فاخمه وصحتها حديد..
من لما مات راجلها بدت تنهار وحده وحده..
لين وصلت لهني..
ومش هي وبس اللي صدمها حال امها..
حتى عائشه وسدرة صدمهم وانوجعوا عليها هلبه..
بدت فايزة تقدم لأمها وهي مازال مش مستوعبه ان هادي امها..
وصاحباتها قعدوا يمشوا وراها..
فايزة مع كل خطوة كانت تتفكر في حياتها مع امها من صغرها..
ماكانتش حنينه عليه..وديما شديده معاها..مبعدتها مش مقربتها..ومفضله عليها خوتها وكانت ديما محسستها انها ماتبيهاش..
بس هدا كله ينمحي قدام كلمة "أمي"
تقعد في النهايه امها واكيد تحبها حتى وان مابانش عليها هالحب..
وصلت فيها...
قعمزت ع روس صوابعها وقعدت تشبحلها..
دموعها طول نزلوا..
بنبرة ألم مرتعشه قالت؛يما..!
شبحتلها مشتده وعقدت حواجبها استغرابا وقالت:انتي منو؟
سؤال كان وكأنه سيف شق قلب فايزة نصين..
وصاحباتها تأتروا هلبه وبدوا يدمعوا..
وعائشه رفعت الخمار وقعدت تمسح في دموعها..
هي شبحتلهم..
وهما قعدوا يشبحولها بألم..
رجعت شافت لأمها وقالت:اني فايزة يما..
مشتده شهقت وقالت؛حي عليك مني يافايزة يامغضوبه وينك هدا كله مش قتلك تطلعي من المدرسه تجي للحوش طول ماتقعديش تنسرفي مع نسرين شنيبه..
شبحت فايزة لنسرين والزوز دموعهم سيل..
رجعت فايزة شافت لأمها وقالت:حاضر تو نروح للحوش طول..
بتعجب قالت؛غريبه شن جاك..قبل تنطي فيا بعشرة لسانات كبف نزل العقل توا.؟
نزلت فايزة راسها وهي تحاول تشد بكاها.
وصاحباتها يبكوا بصمت..
مشتده؛ايوه اقعدي ابكي لين بوك يروح يشوفك ويعاركني ع خاطرك..
شدت روحها بقوة..بعدين مسحت دموعها ورفعت راسها شافت لأمها..
فايزة؛حاضر معاش نبكي..ناضت وقفت..
مشتده ؛وين ماشيه..
فايزة؛تو نجيك شويه بس..
مشتده:تو بتريجي نعرفك..
فايزة وهي تحاول تتمالك نفسها بقوة؛لاوالله موليه يام..
مشتده؛تو نشوفوك..
التفتت للبنات ودموعها ينزلوا قالت:قولولهم بناخدها معاي.
نسرين وهي تمسح في دموعها:حاضر...
☘وجهزوا مشتده وطلعوها مع بنتها..
ركبوها سيارة سدرة..
وماقعدش مكان فيها لنسرين..
نسرين؛تو ناخد تاكسي تولي بيا للمدرسه..
سدرة:طمنيني لما توصلي غادي..
نسرين:حاضر..
وتحركت سدرة بالسيارة..
اما نسرين بعد ماخدت نفس مشي طلعت للطريق بش توقف تاكسي..
☘☘☘☘
وفي مركز التجميل..
:قسما بالله نسكرها المزين متاعها اني جايتها هي ودافعه قلبي بش تخليني لهادي..
طوبى غمضت عيونها وهي تتمالك في نفسها بعدين فتحتهم وقالت:نوريك شغلي تشوفيه بعيونك..
:مانبي نشوف شي..
طوبى:اسمعي انتي توا مافيش ليك حل غير انك تكملي معاي مش حتستفيدي شي من تسكير الراس..
:قعدت تشبحلها وقال بكبر:هاتي وريني شغلك..
طوبى ابتسمت ابتسامه ثقه وحطت الصور ومدتلها التليفون..
خداته وقعدت تشوف في الصور وتحرك فيهم بظفرها بتكبر..
طوبى كانت تحاول تتغاظى وتهدي اعصابها وتكون مرنه..
:متأكده ان هدا شغلك..
ضحكت وقالت؛زي مانشوف فيك..
مدتلها التليفون وقالت؛قسما بربي لو طلعت مضحكه وربي لما نسكره المكان هدا ونمرمدك ونمرمدها فايزة هادي..
طوبى بإبتسامه هاديه عكس داخلها تماما قالت:باهي اول حاجه استرخي انتي عروسه لازم يكون مزاجك رايق..فيك بابونج يابنات؟
:ايه في..
طوبى:خلاص طاسه بابونج حلوها بالعسل وحيبوها للعروسه بش يولي يومها كله عسل..
ضحكوا البنات..
والعروسه قاعده متشنجه بس شاده لسانها..
طلبوا البابونج وجاها..
وبدت تشرب فيه...
لين بدت تسترخي شويه..
وبدت طوبى شغلها ع الشعر وهي تجبد فيه وتهدرز ع العروسه وتعطي فيها نصائح للإهتمام بيه..
بعد ماكملت الشعر رفعاته فوق وشداته كويس..
ولبستها كارونه استيك بش غطت مقدمة الشعر..
جابولها عده المكياج كامله جنبها..
طوبى:اني مانركبش رموش باهي لأنهم في حكم الوصل ويركبونا ذنب اني وياك..بس حنطلعلك عيونه احلى ميه مرة من وهما برموش صناعيه..
:اسمعي كان ماعجبنيش تركبهملي غيرك ان الله غفور رحيم..
مابتش تناقشها طوبى وقالت؛حاضر..
وبدت شغلها وهي تقول:بسم الله توكلت على الله..
وقعدت تزين في العروسه بطريقه خوفت العروسه..
حستها وكأنها ترسم ع لوحه مش دير في مكياج لوجهها..
تخيلت منظرها يطلع يخوف..
طوبى:حب ولاتقليدي..
العروسه؛تقليدي..
طوبى:احلى واحلى بش تحبوا بعض بعد الزواج..بعد الزواج الحب طعمته غير..
العروسه:متزوجه انتي..
طوبى بضحكه:لا بس اني هكي قناعتي بعد الزواج حتكتشفي راجلك وتحبيه وتعيش مشاعركم بدون اي محضورات وربي يبارك فيكم..
:مش كل من تزوجت تقليدي حياتها كانت حلوة..
طوبى:ولا كل من تزوجت عن علاقه..اهم شي الاختيار الصح..ان شاء الله تعيشي احلى قصة حب..
العروسه ابتسمت وقالت:ان شاء الله..
وتغير جو العروسه تماما وقعدت تاخد وتعطي مع طوبى وخشت خاطرها..
بعد ماكملت طوبى مكياج..
طوبى:مش حتشوفي شي لبعد تلبسي الفيلو..
العروسه ناضت وهي قلقه شبحت لزباين..
لقتهم يشوفولها بإعجاب وانبهار..تحمست تشوف شكلها وارناحت في نفس الوقت..
دخلوها لبست الفيلو بعدين طلعوها...
وقعمزوها قدام المرايه بش بدير طوبى التسريحه..
وين شافتها شكلها في المرايه ماصدقتش عيونها..
كانت جدا جميله..ماعرفتش روحها..
طوبى:هاه شن رايك..
العروسه بدهشه:واوو وااوو مش عارفه شن نقول.
طوبى بضحكه:قولي الله يبارك..
العروسه ضحكت وهي فرحانه وقالت:الله يبارك..
طوبى بإبتسامه:في فراسك تسريحه معينه..
:هو كان في بس توا نبيك ديري ع ذوقك..
طوبى:تمام..
وفكتلها شعرها ومشت عليه باللاسترا في الاول..
بعدين بدت بالتسريحه..
☘☘☘☘☘
واقفات في باب الدار متاع امهم..
يشبحوا لحناهم اللي كانت تتعامل مع امهم وكأنها طفله..
صفاء تفكرت هديكا الليله بكل تفاصيلها وكلام حناها لأمها قاعد في ذاكرتها مش قادرة تنساه..
فايزة؛حاضر يما زي ماتبي..بس المغرب قريب تبي تصلي..
مشتده:العصر صليته؟
فايزة:ايه يام..
مشتده؛باهي باهي..تو وين يأذن المغرب قولي خليني توا واطلعي..
فايزة؛حاضر..
ومشت طلعت وقالت لبناتها؛اطلعوا ماما..
وسكرت الباب..
صفاء؛ماما كيف بديري توا؟
فايزة،بندبر في ممرضه ثقه تقعد معاها واني مهناش..
مروة؛مريضه هي؟
فايزة هزت راسها وهي ساكته..
تاله؛تخوف ماما..
فايزة فنصت فيها وقالت:اسكتي..
سكتت تاله بزعل..
فايزة؛صفاء بري جيبي تليفوني تلقيه في الشنطه ع الشماعه..
صفاء:حاضر..
ومشت بتجيب تليفون امها...
☘☘☘☘☘
العروسه؛بجديات مش عارفه كيف نتأسفلك..
طوبى بإبتسامه؛انتي اللي سامحينا حرقنا دمك اليوم..
العروسه؛الحمد لله اللي صار هكي..الحق اني شفت شغل مدام فايزة ع صاحبتي وعجبني..بس شغلك انتي طلعني بشكل تاني وكأني مش اهي بكل رغم مافيش هلبه الوات ومش غامق هلبه..بس غيرتيني مش عارفه كيف...
ع خشة اخت العروسه جايين يروحوا بيها..
وين شافتها انذهلت وقالت:OMG!!!.مش اختي ولا؟
ضحكت طوبى..
والعروسه قالت؛مش قتلك..
قعدت اختها تزغرد...
وتليفون طوبى رن..
طلعت من جيبها وشافت المتصل ردت طول..
~~~~~~~
قدام شقة فايزة..
طوبى؛هادي غلة اليوم.
فايزة بإبتسامه؛ربي يسترها معاك كيف ماسترتيني..
طوبى:حني خوات رانا ولبعضنا..
فايزة:ربي يحفظك ياطوبى ويسعد قلبك دنيا وآخره..
طوبى بإبتسامه:اجمعين..هي تصبحي ع خير..
فايزة؛قدامك كل خير..
مشت طوبى نزلت..
وفايزة قدمت ووقفت فالدروج تشوف فيها وهي نازله لين سمعتها طلعت من الباب الفاصل..
خشت للشقه..
وسكرت الباب ومشت للروشن وقفت فيه بش تشوفها وهي مروحه وتطمن عليها..
طلعت طوبى من حوش اختها.
لقاها عبد الرؤوف نداها:طوبى..
هي طول قصت الطريق ومشتله..
ع مرواحة حسين درس السيارة قدام الباب وقعد يشبحلهم..
عبد الرؤوف:جبناه هداكا وتوا قاعد في ضيافتنا فترة لين نتأكدوا انه تربى..
طوبى برجاء:بالله عليك من غير قتل..
عبد الرؤوف:لالا ماتخافيش..وتوا روحي فيسع..
طوبى:نمشي غدوة للجامعه..
عبد الرؤوف:ايه بري خلاص معاش عندك شي تخاف منه..
طوبى:صحيت عبدالرؤوف..
عبد الرؤوف:باهي بري روحي..تصبحي ع خير..
طوبى بإبتسامه:قدامك حل خير..
مشت طوبى قصت الطريق..
وحسين يشبحلها فكر ينزل يكلمها بس بعدين قال لنفسه..
"خليها ياحسين ماتضغطش عليها ماتنفرهاش منك اكثر من هكي"
قعد يشبحلها من المرايه لين خشت للحوش..
بعدين هو خش بسيارته لحوشهم..
🍀🍀🍀🍀🍀🍀🍀
وتمر الأيام..
ويعدي اسبوع...
فيه فايزة قعدت مع امها اغلب ايامه..وفي ايام انجبرت فيها تمشي للخدمه فقعدت معاها مطيره اللي كانت تساير فيها مسايرة مافيش زيها...
اما بناتها فكانوا خايفات من جدتهم لأنها في حالة مش طبيعيه بالذات تاله...
وصفاء فوق هكي بدي احساس الفقد في قلبها يكبر في غياب اياد اللي توا مش عارفه عنه شي..
والمد والجزر اللي عايش بيه عبد الرؤوف او مبروك مالاش نهايه حاليا..مخلي غرفه تحاول تجاري امواجه المتقلب حالها..وقاعده تتبع معاه في اسلوب مختلف بش تخليه يسامحها ويعيشوا حياة طبيعيه..بس مش ساهل هالشي ياغرفه مش ساهل ابدا...
🌸من جهة تانيه كانت التجهيزات قائمه ليوم حفل زواج يوسف وعقد قران اميمه وعمر...اللي حيكون بدايه الاسبوع القادم..
بعد مااستنوا طلعة الجالي من المستشفى..
وطلع الجالي من المصحه وباقي علاجه بيكمله في الحوش..
ومع طلعته عاودوا الجيران جو لحوش شنيبه..
رجاله ونساوين..
هو في هداكا اليوم كان مقعمز في جنان حوشهم..
يخدم حتى الرجاله قعد معاهم شويه واستأذن..
ونجاه داخل مع النساوين وعقله عنده تبي تطلعله ومش عارفه كيف عيون خديجه عليها مافارقوهاش بكل..
مغليه:عوينه والله عوينه في عرسها طلعت الله يبارك..
مطيرة:الحمد لله ربي لطف..وان شاء الله لما يولي حالها باهي تجي..
مغليه:والله ماني لايمه عليها بكل خلوا المراة ترتاح...
نبيله ابتسمت وهي تسمع في كلام مغليه..
وفي وسط هالجلسه..
كانت مقعمزة طوبى معاهم وعيونها ع نسرين.
ونسرين لاهيه بالهدرزة مع عائشه وسدرة...
نسرين؛قالولي ماخلت ماقالت عليك والوحيده اللي سكتتها شراده..
سدرة:جدعه هالمراة وعز ماتخاوي..
عائشه:شن صاير فيها مع امها..
سدرة:اهو قاعده تعاني...المهم حصلت ممرضه تقعد معاها وهي مهناش..
عائشه:كويس.
ونسرين هزت راسها...
سدرة؛خلاص قالوا الدكتور اياد حول رسمي..
عائشه:اني مافهمتش علاش حول فجأة وهو اللي كان يقول مش مخليه لاخر عمره..
نسرين:اشبح شن صار معاه..
وسدرة قعدت ساكته وفي داخلها كانت عارفه السبب كويس...
🍃🍃🍃🍃🍃🍃🍃🍃🍃🍃🍃
ومن اول شارع القهوه..
درست سيارة نوع كيا اوبتيما رماديه اللون..
صاحبها نزل منها وع وجهه ابتسامه واسعه..
يشوف قدام من ورا نظاراته السود للشارع اللي يحمل في داخله احلى ذكريات اجمل ايام عمره..
سكر الباب..
وحط ايديه في جيوب جاكيته..
وقال:الله..نشم في ريحة القهوة من هني..
ضحك..ومشي خش للشارع...
ومع كل خطوه يخطيها كانت تجي بين عيونه ذكري حلوة..
قعد يمرر في نظره ع معالمه وهو يقول في نفسه..
"هدا حوش عمي السعداوي..وهدا حوش عمي خليفه..هدا محل جديد ماكانش موجود قبل...وهادي ورشه ماكانش في ورشه في الشارع الزمان...ضحك وقال..وهدا حوشنا.."
كمل طريقه وهو يمشي والذكريات تمشي معاه..
لين جي قدام مطحن حوش شنيبه..حول ايديه من جيوبه وحول نظاراته وقعد يشبح للمطحن والقهوة ويقول في نفسه..
"حوش شنيبه دارو حتى قهوة!؟ زعمه من شادها..اكيد المهدي"..
بعدين التفت وشبح لمطحن حوش الواعر..
"اياه حتى المطحن متاعهم هما تغير..زعمه مختار شده توا ولا دار مافي راسه وسافر...قداش حرضته ع السفر..واني سافرت ومش عارف كان هو سافر ولاقعد"
فجأة
التفت لما سمع صوت المهدي يدوي..
لقاه واقف ع راجل قدام الحوش اللي جنب القهوة ويتناقش هو وياه..
ابتسم وقال في نفسه"ياااه يامهدي كبرت كبرت"
ع جية محمد وهو يقول:بوي..ومشاله..
هو يشوفلهم قال في نفسه"الله يبارك المهدي ولى عنده عزري..اشقر زي عيب الواعر..وفيه من سدرة..ياقداش تقاتلنا ع خاطرها.."
المهدي انتبه لشخص واقف يشبحله ووجهه جديد عليه..
نهي مع الراجل النقاش ومشي في حاله.. بعدين محمد ولى للقهوة..
والمهدي قعد يمشي بإتجاه الراجل وقاله:السلام عليكم..تبي حاجه خوي تفضل..
قعد يضحك..
المهدي عقد حواجبه بإستغراب وقال:لاباس!
هو هدا ضحك وقال:بالله ماعرفتنيش جديات لهالدرجة اني متغير!
المهدي قعد يركز فيه بعدين قال:الحق وجهك مار عليا بس ماعرفتش من تكون بالزبط..
قدم سنونه القدام وقال:سنان ياتوم سوير..
فتح المهدي عيونه ع وسعهم وقال بدهشه:ربيع الباني..
ربيع بضحكه؛ربي الباني..
المهدي طول فتح ايديه وقال:يااااه ياراجل يااااه..
وحضنه..وربيع حضن المهدي وهو يضحك...
☘داخل..
ناضت نسرين طلعت من الصاله بس تشوف الجالي..
ونجاه بعيونها معاها..
شويه ناضت طوبى وطلعت وراها..
وهني نجاة استغربت في طلعتها ورا نسرين بالزبط..!
🌸طوبى:ابله نسرين..
وقفت نسرين والتفتت وقالت؛نعم حبيبتي..
طوبى وهي محرجه؛نبيك تطلعي معاي للجالي..
عقدت نسرين حواجبها بإستغراب..
طوبى نزلت راسها وقالت؛البنت اللي صار فيه هكي ع الجالي ع خاطرها..شبحتلها وقالت..اني..
تفاجئت نسرين ع الآخر..
طوبى وهي محرجه؛يعلم الله باللي عشته الايام اللي فاتوا..
نسرين؛اللي بيخطفك شن يبي منك..
طوبى بحقد:واحد حقير بعتلي اكثر من مرة ورديته وهددني بس مادورتاش لعند ماصار اللي صار..
تبدلت ملامحها للحزن:نبي نطلع ونتأسف منه ونشوفه كيف ولا بش نرتاح..صورته وهو مضروب بالرصاصه ماتحولتش من بالي والله لين نحلم بيه..
نسرين:باهي حبيبتي..باهي..
طوبى؛لحظه نلبس وشاحي بس..
ومشت وقفت ع المرايه ونسرين تشوفلها بابتسامه..
لبست وشاحها كويس..بعدين جت لنسرين..
شدتها من يدها وقالت:هي تعالي..
ومشوا الزوز طلعوا من الكوجينه..
شافاته طوبى كيف مقعمز وقدامه ع الطاوله لاب توب..
نسرين؛جللو..
شبحلهم..وشاف طوبى وكيف يشوفلها بس..
نسرين؛طوبى جايه بتقولك كلمتين..
الجالي:ان شاء الله خير!
طوبى:اسفه..
شبح لنسرين..
نسرين:نعرف حكتلي..
ابتسم وشبح لطوبى وقال؛من قالك قولي؟
طوبى:فهمت انك ماتبيش اسمي يطلع بش اني اصريت نشوفك ونطمن بس..
الجالي بإبتسامه:اموري تمام مافي شي يخوف..
طوبى:باهي الحمد لله..وشكرا هلبه هلبه..ايه وسألت وقالولي الجالي يحب المبروشه درتها في الحوش وجبتها معاي..
ضحكوا نسرين والجالي..
طوبى؛مافي شي يضحك..عربون شكر هدا!
نسرين بضحكه؛ولعت.
الجالي:مش زي سدره لما تعصب غير هي ع الأكيت ضحكك ماتخوفكش زي سدرة..
ضحكت نسرين..
طوبى:شوف بنحول المعروف اللي درته فيا ع تركينه ونروح بالللي جبته..
والجالي ميت ضحك طول من يدغدغ فيه..
طوبى:خل نخش احسن..
الجالي هدا ضحك وقال:خلاص خلاص..ياستي صحيتي..وانسي اللي صار ومعاش تحكي بيه لحد..ديل..
طوبى بإبتسامه:ديل..لاباس عليك وان شاء الله ترجع رجلك زي قبل واحسن..
الجالي:استني شويه شن صار فيهم اللي جايين بيخطفوك؟
طوبى:راجل اختي تصرف معاهم..
الجالي:عبد الرؤوف احسن شي..
طوبى:تمام نستأذن..
الجالي ونسرين:اذنك معاك..اذنك معاك حبيبتي..
مشت طوبى خشت..
والجالي قال؛مايطلع منك شي نسرين فاهمه..
نسرين دارت حركه بيدها ع فمها وكأنها تسرت فيه..
الجالي رجع شاف لللاب توب..
نسرين؛انت امورك تمام ماتبي شي..
الجالي:لالا ولاحاجه خشي..
نسرين هزت راسها ومشت خشت داخل..
هي خشت للصاله..
ونجاه طلعت من دار نوم شيبانها وعزوزتها..
ومشت وهي تشوف وراها لين خشت للكوجينه بعدين طلعت منها للجنان..
نجاة؛جالي..
هو لما شافها انصدم وقال:شن ديري هني انتي خشي بسرعه قبل مايطلع حد..
نجاه:مش قبل مانعرف علاش طلعتلك بنت جيرانكم..
الجالي بغضب؛نجاة خشي ماتخليش جنوني يطلع عليك..
نجاة وهي رافعه حاجبها قالت؛باهي بنخش بس بعدين حتجاوبني ع سؤالي..
الجالي بنفاد صبر؛باهي باهي..خشي توا بس..
خشت نجاة والغيرة تاكل فيها ماكله..
وهو برا يسمح ع شعره للخلف وهو ياخد في النفس خاف ينكشفوا...خاف هلبه..
اما هي ماخافتش ومادورت شي من غيرتها..
لين جت طالعه من الكوجينه..
وتلقى في وجهها..
خديجه...
#اقحوانه4
#طوبى
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
