(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الحادي_والخمسين"اهرجو يناير5" 《معظم أحداث هذه الرواية حقيقيه》 لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ دار مسكرة..شبه مظلمه.. مافيهاش اي منفذ يخش منه ضي الشمس. الا فتحه في في اعلى واحد من الحيوط دخل في الهوا.. هو كان مرمي ع الارض متكمش في بعضه من الصقع.. وعليه اثار ض.رب وتع.ذيب. راقد من الانهاك...التع.ذيب انهكه تماما.. فجأه.. ينفتح الباب ويخشوا مجموعه مج.رم.ين يترنحوا في خطواتهم كيف خدوا ج.رعة مخ.د.ر.ا.ت واصلين مرحلة النشوة.. كانوا يضحكوا وهما يشبحوله.. ويتلفظوا بألفاظ ب.ذ.يئة.. بعدين فيقوه.. وهما ير.كلوا فيه برجليهم.. فاق مفجوع وهو يرعش..يرتعد.. عيونها جاحظات من الخ.وف الشديد.. قعد يحاول يتقي نفسه بس ماقدرش.. قعدوا يض.ربوا فيه بدون وعي ض.رب وح.شي بعدين خش واحد فيهم وفي يده شيشة خ.مر.. فتحها وصبها ع راسه.. وهما يضحكوا عليه ويسمعوا فيه الالفاظ النا.ب.يه والكلام الب.ذ.يئ... 🍃اللي يشوف فيه في المنام كاب.وس.. عاشه بحذافيرة ع ارض الواقع لمده شهر كامل.. خلف فيه اثار ج.س.يمه صعب يمحيها مرور الزمن.. هي فاقت من النوم ع صوته وهو يهتري ويقول في كلام مش مفهوم.. التفتت شافاته.. لقاته راقد وهو مقعمز... نزلت من السرير وهي مفجوعه ومشت فتحت الضي.. شافت وجهه يتصبب عرق.. ملامح البكاء باديه ع وجهه.. منظره فجعها..بس خوفها عليه اكثر.. قدمتله بخطوات مرتعشه.. لين وصلت فيه.. حطت يدها ع كتفها وقالت:جالي.. هو هني فاق مفجوع.. لما شافها قعد يرعش من الخوف وزحف بسرعه من فوق السرير ونزل منه وهو يقول بصوت عالي:انتي مني مني..شن تبي مني!....شن تبي.. هي كانت مصدومه صدمه شديده.. قالت بنبرة صوت كلها صدمه:جالي.. هو وين يسمع فيها تنادي فيه يخاف خوف جنوني.. قعد يجري في الدار وهي يقول بعياط وخوف:بري غادي بري غادي خليني...وين امي وين امي وين امي نبي امي.. وفتح الدولاب بيخش فيه هربا منها ماقدرش.. قعد ينقز في مكانه وهو يقول بعياط نبي:امي امي.. جيبولي امي.. ودموع عيونها تصب زي السيل وهي تتفرج عليه والصدمه شلت اركانها عن الحركه.. مش مصدقه عيونها..حست روحها هي اللي تشوف في كابوس.. بس كابوش يقظه!... قعمز ع الارض وتكمش في بعضه وبدي يعيط ببكي وهو يقول:جيبولي امي تقرا عليا جيبولي امي.. وعبراته تطلع منه ورا بعضها وهو يردد في نفس الجمله.. "جيبولي امي تقرا عليا" برغم انها في حالة صدمه شديده من اللي شافاته.. بس صوت بكاه بالعبرة قطعلها قلبها.. بدت تبكي..ولقت روحها ماشيتله وهي ماتفكر في شي غير فشفقتها ع حالته.. جاته وقعمزت جنبه وضماته.. وهو يبكي ويقول ويردد في نفس الجمله.. "جيبولي امي تقرا عليا" هي هدت بكي وبدت تقرا عليه وهو يبكي بالعبره.. وقلبها يتقطع عليه. تشد في بكاها بقوة وتقرا بصوت عالي.. وهو ولأول مرة يستسلم لحد غير امه في حالته هادي ويبدا يستكين.. 🍃فهالوقت.. كان عبد القيوم سهران يكتب في لوحه جديده طلبها منه لطفي..كانت في الاصل طلب طوبى لراجلها.. هو يكتب فيها بدون مايعرف انها للجالي يحساب بنت الحاج لطفي طلبت وحده تانيه ليها هي.. وين وصل في كلمة.. "طوبى".. جي في باله يغير لون الحبر اللي يكتب بيه.. وغيره فعلا وكتبها بطريقه مميزة.. مافيش سبب خلاه يدير هكي... فكرة خطرت في باله ونفدها.. بعد ماكمل كتابتها.. خطرت عليه ام العيون الحايرة.. ابتسم قلبه قبل وجهه...تنهد وقال...يارب يكون لي نصيب في شوفتها بكرا..يارب مايخيب رجاي... تنهد مرة تانيه ورجع كمل باقي الآيه... 🍃وهي.. كانت مقعمزة جنب راجلها ضامه ركابه وتشبحله بحزن.. وهو رجع لوعيه.. اللي صار مش متفكر منه ولا حاجه.. بس الوضع اللي لقي روحه هو وطوبى كفيل يبينله هو شن دار قبل لحظات.. كان يشبح في الفراغ وهو ساكت ودموعه ينزلوا. وهي تشوفله بنظرات كلها حزن وقالت بنبرة كلها ألم:علاش صار فيك هكي؟! شد ع قبضة يده بقوة وقطرات دموعها تنزل ع الأرض... غمض عيونه بشده وقال بنبرة مخن.وقه:ماكنتش هكي والله ماكنت هكي..الا بعد ماشدوني وحب.سوني شهر في ***** شهر..شفت فيه اللي عقلك مايقدرش يتخيله..عذ.بو.ني نفسيا وجسديا.. خلوني نتمنى الموت ومانطوله... حبسوني في دار مسكرة مافيهاش روشن معاش عرفت الليل من النهار..كانوا وين يكسدوا..يجوني يتسلوا بيا... كل ليله لازم يدخلوا عليا مدمنين مش واعيين لرواحهم... يديروا اللي مانقدرش..نقوله.. وقعدت يبكي بقهر.. وهي قلبها يتقطع ودموعها زي السيل.. كمل يقول..كان كبيرهم يذل فيا في ذل عمرك ماسمعتي عنه.. انت.قم مني انت.قام بش.ع ع الض.ربه اللي عطيتهاله.. وكان ناوي يق.ت.لني ببطئ.. لولا المهدي والناس اللي يعرفهم..خدوني من تحت ايديه.. لكن..ياريتهم خلوني نم.وت غادي ياريت.. ورجع يبكي مرة تانيه.. مدت يدها وحطتها ع شعره وقعدت تمسح عليه.. هو فتح عيونه وشبحلها.. وهي تشوفله..شافت في عيونها نظرة فيها مزيج من المشاعر.. خوف..ضعف..توسل..خجل.. رسمت ع وجهها ابتسامه بش طمنه بيها.. هو لما شافها سألها سؤال كان فيه طفل صغير.. سؤال يسأله طفل لأمه... "بتخليني!؟" وهي ردت عليه بدون ماتتكلم.. لما احتواته.. احتواته بكل شعور فيه.. بحالته هادي.. هو تفاجئ هلبه..هلبه.. ماتوقعش ردة فعلها هادي بكل. ضمها بكل قوته وقعد يبكي.. وهي تمسح ع ظهره ودموعها ينزلوا بألم... 🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃 "تعرفي تسوقي" طوبى بإبتسامه؛تو تشوف بعيونك هيا اركب.. تنهد وركب السيارة.. وهي ركبت.. حطت المفتاح مكانه وشغلتها.. وهو متكي ع الكرسي ويتأمل فيها.. حطت يدها ع الدومان وقالت بإبتسامه:نبيك دلني ع الطريق بس. وحركت السيارة وتوجهت للباب... ظاهرها يبان هادي شوي..بس داخلها كان مليان خوف..ومازال الصدمه موجوده بس مخفيه داخل.. وجعتها روحها اكيد. بس هو وجعها اكثر... اللي هو فيه مش بيده..طاح في ايدين ناس ماتخافش ربي هما اللي وصلوه لهالحاله.. لكن.. اكيد قعد يدور في بالها هداكا السؤال.. اهله علاش اختاروها هي!؟ علاش هي من دون بنات الدنيا كلها.!؟ علاش اختاروا عيلة الواعر جيرانهم عمر كامل بش يغشوهم!؟ مافي اجابه لهالسؤال في عقلها.. بس جانب الرحمه الكبير في شخصيتها خلاها ماتوقفش هلبه عند هالسؤال.. تفكيرها اغلبه محصور في الجالي اللي في نظره مايستاهلش شي من اللي صار معاه.. طوبى:نكمل القدام.. الجالي بصوت متعب:ايه.. وقعد يشوفلها وهو يفكر.. في شن هي قاعده تفكر..وشن قاعده تقول بينها وبينها وبين نفسها... يعني توا هي قاعده تحس اتجاهه بشعور شفقه لااكثر.. حتى اعجابه باهي اكيد راح.. شن اللي بيقعد عاجبها في راجل مريض نفسيا مايقدرش يعيش من غير الأدويه..! حس روحك ناقص قدامها بزياده.. من غير شي هو في قرارة نفسه يشوف انه مايستاهلهاش.. كيف بعد اللي صار الليله!...بعد ماشافاته وهو في أسوأ حالاته واضعفها...!؟ والمعروف ان الراجل ديما يحب يبان كبير في عين مرته.. هو توا حاس روحه بلا قيمة في عيون مرته طوبى.. طوبى المميزة في كل شي اللي ماعادش في زيها في وقتنا هدا الا قلة نادرة...! طوبى:وين نمشي توا نلف يمين ولايسار.. الجالي؛يمين.. طوبى وهي تسوق في الليل وتشوف للطريق الفاضيه زادت رعب ع الرعب اللي عاشاته.. ومستغربه في روحها منين جتها الجرأة والشجاعه اللي خلتها تسوق سيارة وفي عز الليل.. الجالي:ماتخافيش اني معاك.. ضحكت بتوتر وقالت:الحق خايفه هلبه..بس كويس هدا اقوى تحدي نديره بش نكسر حاجز الخوف ع قولتك.. يدوب ابتسم وهو يشوفلها..بعدين شبح للطريق.. هي قعدت تمتم.. شبحلها تاني وركز في اللي تقول فيه.. تاج الذكر.. تنهد بعدين قال:توا طول.. طوبى:تمام.. وكملت القدام.. فاتت جنبهم سيارة خافت منها طوبى.. بس بعد فاتت خدت نفس وقالت لروحها.. "اهو ماصار شي ياطوبى خلي عندك ثقه في نفسك ومعاش تخافي" الجالي:اهيا اللي ع اليمين.. طوبى:تمام.. ولفت ومشت للصيدليه.. درست قدامها.. الجالي فتح الدرج متاعها وطلع شنطه صغيره رجاليه.. فتحها طلع منها ورقه الوصفه ومدها لطوبى.. هي خدتها وقالت:شويه بس.. ونزلت سكرت الباب ومشت خشت للصيدليه وهو معاها بعيونه.. اللي كان يشوف فيها مش جريئه ومعقده بعض الشي.. اللي عرفاته المعنى الحقاني لجرأة وشجاعة المراة.. 🌼هي داخل عطت الوصفه للصيدلاني. شافها بعدين قال:لحظه بس.. ومشي بيجيبه.. وهي تلعب بالمفتاح بيدها من التوتر وكانت خايفه بس تحاول ماتبينش.. جاها الصيدلي وقال:هو هدا.. هي طلعت الفلوس من جيت البالطو وقالت؛بكم.. قاللها السعر.. هي قعدت تعد في الفلوس لين وصلت في سعر الدوا.. عطاته الفلوس وهو حط الدوا في كيسه ومدهولها.. وهي خدت الوصفه والكيسه ومشت طول طلعت من الصيدليه.. شافت يمينها لقت محل غذائيه مفتوح.. خدت نفس عميق ومشتله... وكأنها كانت في تحدي مع نفسها تخدي لخوفها .. وكأنها تبي تثبت للجالي انها مراة قويه وشجاعه وقد المسؤوليه يقدر يعتمد عليها ومايخافش منها ترخي بيه وهو بأمس الحاجه ليها.. خشت لمحل الغذائيه شرت منه ميه وعصير.. بعدين مشت بسرعه ركبت السيارة.. طوبى:وهدا الدوا وهادي الميه.. حطت الكيسه وطلعت الدوا منها وهي تقول بضحكه:بجديات اليوم عشت الFear Factor بمعنى الكلمه.. تصدق! ماعرفتش روحي..!. وحطت حبة الدوا في يده.. هو طول حطها في فمه.. فتحت شيشة الميه وهي تقول:اصبر شويه بس..عطاته الشيشه وقالت..اشرب.. هو تنهد وخداها منها وشرب شويه.. طوبى خدت علبة العصير فتحتها وعطتهاله وهي تقول:وجهك اصفر اشرب شويه.. حرك راسه بالنفي وقال:مانبيش.. طوبى:شويه بس..جغيمه ع خاطري.. شبحلها شويه..بعدين قال:هاتي.. خداها وشرب شويه بعدين قال :هيا نروحوا.. طوبى:هي.. وشغلت السيارة.. ولفت بيها ومشت طول.. حفظت الطريق في عقلها لهدا المرواح كان ساهل عليها.. وصلوا الفيلا متاعهم دخلت السيارة للقراج.. هو نزل وهي نزلت بعده.. وقعدت تمشي وراه وهي تشوفله من غير ماتكلمه... لما خشوا داخل لاقاتهم بينكا.. جت لرجل طوبى.. طبست ورفعتها وهي تقول:شن ديري هني بنيتي شن طلعك من السلة متاعك.!؟ الجالي:فقداتك..حتى هي ماتقدرش ع فراقك.. قعدت تشبحله وهو يتكلم.. قال كلامه بنبرة حزن ونظرات عيونه كانت حزينه.. جاها وقف قدامها وقال:عارف شن قلتي في عقلك..متأكد قلتي غشونا عيت شنيبه وضحكوا علينا..بس صدقيني ماليا يحسابوني بريت..مايحسابونيش قاعد ماشي بالدوا..مافي حد كان يعرف غير طاهر ومرته.. طوبى نزلت بينكا من يدها وهي مركزة ع جزء من كلامه اللي يخص نجاة.. الجالي:هدا علاش تشوفي في علاقتي مع نجاة قويه شويه لانها تعرف كل شي وتساعد فيا.. طوبى:باهي علاش ماخبرنيش بعد الخطوبه علاش ماحكتليش؟ الجالي:عارفك بتسبيني طول ياطوبى.. طوبى:من قالك!؟...مرات نوقف معاك نكمل معاك ونساعدك تشفى ومعاش تحتاج الدوا بكل.. ضحك بعدم اقتناع وقال:مستحيل! طوبى:يعني متوقعني توا نطلب الطلاق ولا؟ قعد يشوفلها بخوف وهو ساكت.. طوبى:جالي اني عطيتك وعد قبل ولا؟..نكون معاك ع الحلوة والمرة ونتحمل معاك كل شي.. يعني فرضنا لو صارلك اللي صار بعد ماتزوجنا متوقع نرخي بيك ونخليك!!؟..مانديرهاش ياجالي..انت توا راجلي واني مرتك يعني حني الزوز واحد اللي تحسه انت اني نحسه مش مخلياتك بكل لو شن يصير فيك ياجالي ومش خسارة فيك تستاهل نضحي ع خاطرك زي ماانت درت معاي قبل حاميت عليا وقريب متت ع خاطري ياجالي الموقف درته معاي وقت ومافيش بيني وبينك رابط غير اني جارتك كيف توا واني مرتك شن نتوقع منك دير معاي لو صار فيا شي!؟ خداها لقلبه وهو يقول:تعرفي مرات نحسك مش زينا بكل نحس هالوقت مش وقتك ولاالزمان زمانك..نحس فيك مش حقيقيه زينا حني كأنك خيال.. ضحكت وقالت؛هلبه عليا الكلام مانحسش في روحي درت حاجه مستاهله الكلام هدا كله..هدا المفروض ياجالي مش بطوله ولاحاجه فوق العاده.. عمتي مطيره زمان كان مفهمها راجلها انه عقيم وهي مافيها اختارت تكمل معاه وضحي بحقها ان يكون عندها صغار.. ولولا الخيانه ماكانتش سيباته..الخيانه ذنب ماينغفرش اصلا.. غمض الجالي عيونه بشده بعدين فتحهم وبعدها وايديه محاوطات وجهها وهو يشوف لعيونها قال:ربي مايحرمني منك ياعمري..اخر طلب طوبى..نبي اللي صار يقعد بيني وبينك ماطلعيشي حتى لروحك.. طوبى:من غير ماتطلب جالي..اني سترك وانت ستري.. وسرك مني مستحيل يطلع حتى لو تفارقنا.. خداها لقلبه وهو يقول:فكينا منها سيرة الفراق ارجوك.. ابتسمت بألم وقالت:حاضر.. الجالي:ربي مايفرقني عنك لين نموت.. هي شده فيه بدون ماتتكلم.. وهو قال:روحي ... ☘ركبوا لدارهم.. الجالي خدي دوش سخون..بعدين رقد.. اما طوبى معاش قدرت ترقد.. حاولت تلهي روحها بالقرايه ماقدرتش.. طلعت من حداه بعد ماتأكدت انه رقد.. ومشت لدار الرسم.. خشتلها وسكرت عليها.. حطت يدها ع فمها وانهارت بالبكي.. بكت بكي اول مرة تبكيه في حياتها.. ولبكائها هدا اسباب.. اولهم الدافع اللي خلاها تنزوج بكري والجالي تحديدا.. لعند اللي صار اليوم.. قداش كانت متمنيه تعيش الحب ودير عيلة حلوة وتعوض اللي ناقصها فيهم.. بس الباين ان الامنيه هادي مش ساهل تتحقق.. والخوف توا انها ماتتحققش بكل.. اكثر شي كان معذب طوبى من هدا كله.. انها ماتقدر تحكي لحد ولاتفضفض.. ماتقدرش تحكي للانسانه اللي ربتها وعلمتها بش توريه كيف لازم تتصرف وشن تقدر دير... مافي شي قدامها غير الله سبحانه وتعالى. هو الاعلم بحالها والادرى بكل شي قاعد يصير فيها.. بمعيته عاشت اللي تقدم من عمرها وحتكمل بيها الباقي منه... ☘مشت توضت وصلت القيام.. ودعت بكل شي.. فضفضت وطلعت كل شي في داخلها.. بعد ماطلعت منها حست بالقوة والراحه اللي خلتها تشوف نفسها قادره تتحمل..وحتكمل وحتدعم راجلها وتوقف معاه لين يشفى من المرض نهائي.. قعدت ع صلايتها تستغفر لين آذن الفجر... بعد ماصلت الفجر رجعت تقرا من جديد بذهن صافي.. لكن قلبها مليان اوجاع... 🍃🍃🍃 ويطلع الصبح.. وينوض الجالي بش بيوصلها للكليه ويمشي لعمله.. الزوز كانوا في حالة صمت وهما يجهزوا في انفسهم.. لعند ماتلاقوا ع الفطور.. هي كانت تبيه يحس ان الوضع طبيعي وكأن ماصار شي.. طوبى:مدعبل بالله خبزة من حداك.. ابتسم ومدلها الخبزة.. وقعدت تاكل عادي.. وهو يشوف فيها كيف تتصرف ويرتاح داخليا ويزيد يصدق وعدها ليه.. ناضت وهي تقول:هيا جولي وقت عليا.. وقعدت ضم في الطاوله.. الجالي بضحكه؛باهي ديريلي نص.. طوبى:حاضر بس بسرعه اطلع سخن السيارة.. هو بإبتسامه:قال طالع.. ناض ومشي بيطلع.. ولما وصل فم الباب وقف لما سمعها قالت.. "خديت دواك؟" التفت شبحلها.. وهي تشوفله وتراجي في اجابته.. هو يدوب ابتسم وهز راسه بإيجاب بعدين مشي.. بعد مشي ولت ضم في الكوجينه.. نزلوا منها دموعها مسحتهم طول.. بعدين خدت نفس عميق وقالت.. "لاإله الا الله وحده له شريك له..له الملك وله الحمد وهو على كل شي قدير..." ☘☘☘ طلعوا الزوز من الحوش.. كان الصمت سائد طول الطريق.... وكل واحد فيهم عقله مشغول بشي.. لين وصلوا للكليه.. الجالي:امتى تكملي؟ طوبى:الساعه 12.. الجالي:12غير ربع تلقيني واقف هني.. طوبى:تمام..هي سلام جولي.. الجالي:سلام ياروح قلب جولي.. ضحكت ضحكه خفيفه ونزلت .. وهو قعد واقف يشوفلها لين خشت للكليه.. تنهد بعدين تحرك وكمل طريقه طول للشركه... ☘☘☘☘☘ ونجاه في الشركه. كانت بكامل اناقتها وملفته بزياده فهاليوم.. فرحانه هلبه.. وواثقه هلبه من نتيجة اللي داراته.. مش حاطه في بالها انها حتشوف الجالي اليوم نهائي لأنه حيكون مشغول بالمصيبه اللي طاح فيها.. بس جيته للشركه وهو بحال كويس.. صدمها.. نجاة وهي مقعمزة ورا مكتبها وتشوف في ستوري طوبى اللي كانت تطلب فيه يدعولها تتوفق في امتحانها.. تسألت بصوت عالي وهي تقول:شكله عنده غيرهم اكيد دار احتياطه بعد المرة هديكا يانجاة..ماغباني ماغنباني.. فجأة رن تليفونها.. كان هو المتصل.. اندهشت.. فتحت الخط وردت وهي تقول:ايوه صباح الخير.. "صباح الورد روحي..نجاة نبيك تسيبي كل شي توا وتمشي لشقتنا..مستاحشك ياعمري مش قادر نصبر عليك اكثر من هكي خلاص" نجاة:كل مرة تقول في نفس الكلام ياجالي..سادها كرامتي اهانات اكثر من هكي.. "قصدك خلاص تبي تنهي كل شي بيني وبينك!؟" غمضت عيونها بشده وشدت ع قبضة يدها بعدين قالت فتحتهم وقالت:جالي..انت مش عارف اني بشن حسيت اخر مرة اللي درته قهرني ووجعني هلبه.. "عارف ياقلبي عارف..واني نعترف اني كنت ح.مار وقتها ح.مار كبير..سامحيني روحي ارجوك والله محتاجك هلبه" معاش قدرت تقسى عليه اكثر من هكي ..تنهدت وقالت:باهي طالعه توا.. "ياعمري..نم.وت فيك..عشرة دقايق ونطلع وراك" نجاة:تمام..سلام توا.. "نتلاقوا" سكر وهي ناضت خدت شنطتها ونظاراتها مشت طلعت من المكتب.. وبعدين من الشركه بكل وتوجهت لشقتها.. وصلت غادي وقعدت تستنى فيه ربع ساعه.. بعد مافاتت الربع ساعه وهو خش للشقه. هي طلعت من الكوجينه وجاته وهي تقول بشي م الزعل:اهلا.. الجالي بضحكه:خيره حبي زعلان.. جاها قدامها وقرص خدها وهو يقول:خيره العسل زعلان.. هي منزلها عيونها بزعل ماتبي تجاوبه.. طلق خدها وهو يقول:تبيني نراضيك ياقمر.. حاضر.. قرص خدها وقال:كان اني مارضتيش عيوني من يرضيها.. طلق خدها.. ورجع حط يده عليه لكن..بصفعه.. من قوتها قريب خلعت فكها.. مالحقتش تستافظ من الاول يجيها التاني.. عيطت.. جبدها من شعرها وقال بغضب شديد:اخفي حسك ياوس.خه مانبيش نسمعه.. نجاة وهي ترعش من الفجعه:علاش ياجالي شن درت! هو بغضب:عارفه روحك شن درتي ياوا.طيه...بعملتك هادي انتي اللي حكمتي ع روحك يانجاة..انتي اللي خسرتي الجالي بكل يانجاة.. نجاة وهي تبكي:والله ماك لاقي مراة في الدنيا تحبك زيي اني يالجالي ودير اللي بديره يالجالي مرجوعك لنجاه.. طلقها وهو يشوفلها بغضب.. بعدين مشي طلع من الشقه.. وخلاها تبكي بح.رقه وق.هر وقلبها كل ماله يزيد سواد ع طوبى..
#اهرجو_يناير #طوبى
....يتبع.... (رجاءا حاولوا ماتستعجلوش في الحكم وماتسبقوش الاحداث...)
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
