# طوبى "شارع القهوة"
#جمان_فريد
#الجزء_الثامن"على خاطري ياصاحبتي2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وتتوالى الأيام وتمر..
لين فات اسبوع من هداكا اليوم المر..
الصاحبات معاش تلاقوا...كل وحده شدت مكانها وشايله في قلبها كوم هم..
ومافيش من مهموم زيك ياعائشة..
اللي تعودت ديما على حاضر ونعم تجري ع لسانها لخوتها وبوها..
اول مرة في حياتها تعارض وتقاوم وتنضرب وتنحبس..
ومازالت ثابته ع موقفها لولا دموع امها المسكينه..
عتيقه ببكي؛راك راس بنيه عندي حرام عليك ماديريش فيا هكي..
عائشه ببكي:وانتم مش حرام عليكم حرام تفرضوا عليا راجل مانبيشي كيف بنعيش معاه يام قوليلي زي ماعايشه هني مع بوي وخوتي!؟ تي اني كنت ندعي ونرجى في ربي يبعتلي نصيب يعوضني عن هالعيشه كنت صابرة ومتأمله في الله خير علاش صار فيا هكي علاش؟؟!
غمضت عيونها بشدة والدموع تتقاطر منهم وهي تقول..استغفرك واتوب اليه ياربي استغفرك واتوب اليك..
عتيقه بألم:باهي هاك قلتيها انتي متأمله في ربك خير من قال مش هدا الخير اللي باعته!
عائشه وهي مصدومه:كيف خير يام وانتي تعرفي كويس المهدي من يبي ومن يبيه يام..
عتيقه:نصيبهم مش في بعض مش لبعض..رشفت وقالت..سلم بنتي اللي ديري فيه هدا كله مافيش منه فايده بوك وخوتك تموا مع الحاج شنيبه وولده خلاص وفضاينتك غدوة سلمي امرك لله وادعي لربك بس..
حطت عائشه يدها ع جبهتها بإحباط وانهارت بالبكي..
قعدت تبكي بالعبره..وامها تشوفلها وتبكي عليها وقلبها يتقطع تقطيع..
☘☘☘☘☘
وفي من هدا وين سمع بالموضوع من الجيران وجي يجري طول...
مطيرة..
اللي حطها الشامس قدام حوش خوها..
فالوقت اللي فيه كانت سدرة طالعه من مطحن بكيس قهوة
بتمشي بيه للحوش وطوبى في جرتها..
انفتح باب الحوش وخشت مطيرة بإندفاع وهي تقول..
مطيره:هالمعفن المسخ السفتول..
وسدرة وطوبى يشبحولها بفجعه ع خشتها هادي..
فجأة سكتت..
وكل شي سكت..ومعاش انسمع الا اصوات جايه من حوش شنيبه..
كانت اصوات زغاريد..
التفتت مطيرة طول شبحت لحوشهم..
وسدرة وهي شاده الكيسه في يدها اللي ترعش كانت تشبح للحوش ودموعها في عيونها..
وطوبى رافعه عيونها فيها وتشبحلها وبس..
هي مش فاهمه ولاواعيه لشي..بس تعلقها بسدرة خلاها تحس بيها وتركز ع تفاصيل وجهها في كل وقت..
التفتت مطيرة وشبحت لسدرة..
وسدرة طول مشت وخشت داخل ووراها طوبى..
ومطيرة لحقتهم...
☘في حوش عبد المطلب..
صفيه كانت تسمع في الزغاريد وهي ضم في وسط الحوش وهي مضايقه..
وعمها حداها نشدها..
علي:حس زغاريط؟
صفيه:شورهم من حوش شنيبه جايات ياعمي.
علي:معناها ولدهم هداكا تم في بنت جويده احسن..
شبحتله صفيه شويه وهو يتفرج ع التلفزيون وملامح وجهه مرتاحه..
تنهدت بعدين مشت للكوجينه..
🌻🌻🌻🌻🌻
"معاش ليا بيه دخل مهدي توا ولد جيرانا لاأكثر"
مطيرة:وعيشه؟
سدرة وهي دير فالقهوة وتظاهر بالثبات بقوة:تقعد صاحبتي..
مطيرة؛كيف انتي بتهبليني! قولي كلام يخش العقل!
شبحت لعمتها وقالت بقوة:عمتي اني اللي رديته المهدي اني اللي قتله معاش نبيك وهو من حقه يمشي يشوف نصيبه..
مطيرة:معاش لقي مع مني يشوفه كان مع صاحبتك!؟
سدرة:مش هو اللي اختارها ماليه..
مطيرة بغيظ:الشلولح مغليه...بعدين قالت..تفي ع هكي رجاله مخليين النساويين يسيروا حياتهم..
سدرة؛باهي عمتي بنطلب منك طلب...اكيد بيعزموك ع العرس نبيك تمشي..
مطيرة:شن هيا!!!!؟
سدرة؛غير اسمعيني حني جيران وعشرة عمر وياما بينا معروف وجمايل حرام نقطعوهم ع خاطر شي مش في ايدينا.
فتحت مطيرة عيونها ع الآخر وقالت:نفهم من هكي انك بتمشي تحضري العرس!!
بكل مااوتيت من قوة حبست انهار دموع مالهاش حد وهزت راسها بإيجاب..
مطيرة بصدمه؛ووك عليا كيف بتقدري!؟
سدرة التفتت لبكرج القهوة حطاته ع النار وهي تهز في راسها وتقول؛نقدر ياعمتي نقدر بعون الله نقدر...
وهالحديث كان يدور...
وطوبى مقعمزة وهي تاكل في بشكوطي وتسمع فيه مش فاهمه شي..بس تفاصيل سدرة بين عيونها...
بينما اميمه وغرفه في نفس الحوش لاهيات يتفرجوا ع التلفزيون اللي قاعده ع خاطره اميمه في حوش عمها ليل مع نهار ع خاطر الستلايت اللي عندهم تتفرج زي ماتبي ومافيش من يقطع عليها متعتها بنشرة ولاخطابات ولامؤتمرات...
☘☘☘☘☘
"هاه مش واخده دبش لعرس صاحبتك"
فايزة من فوق نفسها وهي طيب في الغدي:لا مش حاضراته اصلا..
عزوزتها:وعلاش!!؟
فايزة:مانبيش وماخاطريش..
:لاحبيبتي مش بخاطرك هو هدا عرس اهم الجيران في الشارع وبنمشي نحضره بكنتي محلاني واني ماشيه من غير كنتي!؟
تنهدت فايزة بضيق بعدين قالت برجاء:عمتي بالله عليك اعفيني اني العرس هذا بالذات مانبيش نحضره..
عزوزتها بصرامه:لابتحضريه وقولي لراجلك يطلعك ياخدلك حاجه وتم الكلام..
ومشت طلعت من حداها.
وفايزة قعدت تتحرك بعصبيه وهي تقول:مش سادني نفخ العمل تزيدني انتي...اني العرس هذا مش حاضراته يعني مش حاضراته..
☘☘☘☘☘
"مبروك عليه فرامله الشارع ماهو حامله"
حاطه يدها ع راسها اللي رابطاته بوشاح وهي تشوف لأختها اللي تغني بنظرات حاده..
خديجه رفعت حواجبها وهي تشوفلها من فوق لتحت وتقول:عليك بومه..افرحي ياوجه النكد هذا اول عرس راهو..
ونسرين تشبحلها وهي ساكته..
خديجه قعمزت ع السرير:تو انتي علاش حارقه دمك مدام صاحباتك بروحهم رضوا ..
ونسرين تشوفلها بنفس النظرات ورافضه الكلام..
خديجه ابتسمت وقالت:تعرفي مابنخلي مابناخد للعرس لما نخلي الناس اسبوع كامل حاله فمها..
وناضت وهي تقول:خل نوض نشوف قداش داسه فلوس..
ومشت فتحت دولابها..
ونسرين مازال تشوفلها بنفس النظرات...
☘☘☘☘☘
الساعه 5:30عصرا..
احمد:والله حتى اني زيك مش عاجبني الوضع بس في النهايه يافايزة نصيب وهما نصيبهم في بعض وانتي قلتي سدرة راضيه..
فايزة بدموع؛تعرف شن شكل رضاها سدرة زي رضي عيشه مسكينه الله لايسامحهم فرقوا بينا..
احمد طبطب ع ظهرها وقال:هدي روحك حبيبتي شن رايك نطلعوا للبحر نغيروا جو..
مسحت فايزة دموعها وقالت:ياريت...
ابتسم احمد وقال:خلاص نزيدوا ساعه تانيه ونطلعوا..
هزت راسها وهي ساكته...
🌻وفعلا زادوا ساعة تانيه وجهزوا ارواحهم وبيطلعوا.
تلقت احمد امه وخداته ع تركينه...
احمد:حتى يوم تاني يام..
:لاخلاص معاش في وقت هداكا هو..
احمد؛باهي مافيش واحد من الولاد فاضي غيري!.
:زي ماتشوف مافيش غيرك كلهم واخدين وجوههم..
تنهدت احمد بإستسلام وقال:باهي قوليلهم يوتوا رواحهم فيسع..
ومشي طلع...
وامه خشت تجري لبناويتها...
🌻فايزة:خيرها؟!
تنهد احمد وقال:قالت طلع البنات يشروا حوايج للعرس..
سكتت فايزة وهي مضايقه..
أحمد بضيق:سامحيني شراده ماقدرتش نرد امي..
شبحتله فايزة وابتسمت ابتسامة رضا من ورا قلبها وقالت:ولايهمك حبيبي...
وهو ردلها الابتسامه ومن داخله كان مضايق ع الآخر..
☘☘☘
وطبعا كانت اسوأ طلعة تطلعها فايزة...
خواته ماخلوا وين رفعوهم وكانوا يحطوا في عيونهم ع الغالي وخوه وفرضوا عليها تشري قفطان حتى هي..
وهي خداته بإستسلام تام...هادي حياتها ماعندها مادير..
هدا واقعها ومجبورة ترضى بيه...
🌻زي صاحبتها عائشه اللي ولت ع اسم راجل مش راغباته..
جاب جاهه وفضوا فيها وهي دموعها ماجفوا من عيونها..
فضانية المهدي...
حضروها علي ولطفي الواعر..والزوز كانوا يبانوا عاديين وحتى بانوا فرحانين اكثر من صحاب الشان وهذا اللي زاد حرق المهدي..
حسهم وكأنهم افتكوا منه وماصدقوا زاحوه من طريق بنتهم..
بس هو ماكانش هامه يشوف ردة فعل حد قد ردة فعلها هي
يبي يشوفها منهارة متحسرة تبكي نادمه..
من النار اللي في قلبه اللي ماتبيش تهدا لاليل ولانهار وهو يتفكر في تخليها عنه ورفضها ليه...
☘وهي في هداكا اليوم..
شدت روحها بكل قوة اليوم كله..
لين ليل عليها الليل..
والدنيا كلها سكتت..
فرشت صلايتها وبدت تصلي وتشكي وتبكي لله هو بس اللي يقدر يطبطب عليها ويخفف عنها مافيش اعلم منه بحالها ومافيش ارحم منه عليها..
وهو بس اللي يقدر بقوته يقويها ويسندها..
في عز مناجاتها ودعائها..
كتفتها ايدين صغيره وضمتها بقوة..
وطلعت منها كلمات بسيطه بنبرة طفوليه..
"معاش تبكي سدرة"
غمضت سدرة عيونها بشده..
وخدت طوبى وضمتها لحضنها بكل قوة وقعدت تبكي بصمت..
وطوبى تمسح ع ظهرها بيدها الصغيره وهي تقول:خلاص خلاص..
🌻هدت شويه سدرة..
بعدين دارت فراش ليها ولطوبى في جنبها وخلوا غرفه راقده ع السرير..
مشت ولعت الفرارة...
بعدين رقدوا تحتها هي وياها..
فردت سدرة شعرها ع طوله ع المخده وقالت بصوت مبحوح من البكي:طوبى العبي بشعري..
طوبى:باهي..
ومشت رقدت عند شعر سدرة وقعدت تمشي عليه بصوابعها الصغيره..
وشويه شويه خدي سدرة النوم وبين عيونها المليان دموع المهدي..
غمضتهم والدموع منهم طاحوا...
وطوبى مازال تمسح ع شعرتها لين رقدت حتى هي..
☘☘☘☘☘
وتاني يوم..
ناضت سدرة وحده تانيه مالهاش علاقه بسدرة متاع الليله اللي فاتت..
دارت دورة ع خواتها والحوش...
سقدت بوها لوحده من الضواحي عنده فيها خدمه..
بعدين مشت للمطحن وطوبى معاها...
وحسين ويوسف معاها في المطحن..
كان حسين مشغول بطوبى واللعب معاها ينسى الدنيا في وجودها...
اما يوسف فكان قلبه واكله ع اخته فاهم وعارف اللي الناس كلها تعرفه..
بس في مجتمعنا ضوابط تحول بين مواساة الأخ لأخته في مثل هالمواقف وهذا الطبيعي..
بس يوسف حاول يخفف عن سدرة ع قد مايقدر..
يوسف:سديرة..
سدرة وهي تصب في القهوة:امم..
يوسف:تطلعي معاي اليوم نتمشوا ع الكورنيش نمشوا للساحه الخضرا..البحر..اي مكان تبيه خلوقي ضايقات ونبي نطلع نفرهد ع روحي شويه..
شبحتله شويه بعدين ابتسمت ورجعت لهت بخدمتها وقالت:مانيش فاضيه اليوم..
يوسف:علاش شن عندك..
سدرة:شن مش عارف عرس جيرانا قريب يبدا وبيبدوا يوتوا من توا لازم نكون معاهم..
حسين اللي كان لاهي مع طوبى شبحلها بإستغراب..
ويوسف يشوفلها وهو متفاجئ..
وهي متابعه تقول:وكان امي حيه راني مافوتش هالطلعه لكن امي توا الله يرحمها بين ايدين ربي واني لازم نوب عنها في كل شي..
تتكلم وهي تشتغل وتبان قويه وثابته وكأن ما في شي يعنيها صاير..
ويوسف بعد ماكان يشبحلها شبح لحسين..
وحسين شبحله بنفس نظرة الاستغراب...
سدرة بحده:طوبى ياسر معاش تتحركي هلبه تو طيحي حاجه..
طوبى وقفت في مكانها وضمت ايديها لبعض وقالت:باهي..
ويوسف وحسين مازالوا يشبحولها..
وهي هروبا من نظراتهم كانت تقول:هي اخدم انت وياه شن واقفين هكي اخدموا..
الزوز رجعوا يخدموا وهما حاسين بالضيق لحالها..
وطوبى زي كل مرة مركزة ع ملامح وجهها وبس...
🌻🌻🌻🌻🌻
وجت العشية..
وبدوا الجيران يهلوا ع اهم حوش في شارع القهوة..
حوش عيت شنيبه...
وهي طلعت من حوشهم ومشت بإتجاه الحوش...
بش تبارك وتشارك في عرس الراجل اللي تحبه ع صاحبتها..
ياااه..مصعب اللي تمر بيه سدرة..يهد جبال لو حملاته..
وقفت قدام الباب ودقت..
وهي تبلع في ريقها..وقلبها من داخل يستغيث ويطلب في القوة من خالقه...
انفتح الباب...
نضال:اوووه سدره..
ابتسمت وهي عاقده حواجبها وقالت:شن جو نضال ماشي تلعب كورة..
نضال بآبتسامه:ايه..خشي خشي..
خشت سدرة..
ع جية عمر يجري لما شافها تحشم وقال:شن جو..
سدرة:الحمد لله..بروا..
طلعوا الزوز وهي مشت خشت داخل..
قعدت عمر واقف يشبحلها قبل لتختفي..
بعدين سكر الباب وقال:احسن حاجه خوك ماخداهاش هي وحده حرفه..
نضال؛باهي هيا برا قدامي عطلنا ع الاولاد..
🌻داخل...
خشت سدرة للحوش وهي تسمع في هدرزة النساوين..
اصواتهم كانت وكأنها دور في داخلها وتخنق في قلبها خنق..
الهدرزة ع العرس وتفاصيله..العرس اللي تمنت هي تكون العروس فيه..
وصلت في الصاله...
خدت نفس بعدين خشت وقالت:السلام عليكم...
سكتت الأصوات..والانظار كلها توجهت ليها...
سدرة وهي ماشيه لمغليه طبست عليها وبدت تسلم وتقول:مبروك ماتعولوا خالتي مغليه..
الكل يشبحولها وهما مش مصدقين..
مغليه بشي من التعجب:يبارك فيك بنتي..
سدرة بعد سلمت عليها قالت:ربي يتمم ع خير.
مغليه وهي تشوفلها:آمين..
مشت سدرة وقعدت تسلم ع الجارات..
والعيون تلحق فيها ومنهم عيون خديجه المصدومه ماتوقعتهاش تجي..
ونسرين ماتندريش عليها لأنها حابسه روحها في الدار..
كانت صفيه تشوف لسدرة بنظرات كلها شفقه مربيه سدرة مع وردة وراضعه حليبها مع يوسف بعد ماتعبت وردة وقت جيابها في سدرة..
هي اكثر وحده تعرف ان سدرة تتوجع من داخل وعمرها ماتحب تبان ضعيفه قدام اي حد..
قعمزت سدرة مع النساوين وقعدوا يهدرزوا كلهم شن بيديروا في العرس ..
والكل مستعجب في سدرة ولاكإن الأمر يعنيها ولاكأن كان في شي يربط بينها وبين المهدي نهائي...
بس هالشي خوف مغليه وخديجه...
🌻بعد كم ساعه روحوا الناس بما فيهم سدرة..
بس مغليه شدت صفيه...
وكانت عارفتها صفيه في شن تبيها...
صفيه؛اطمني يامغليه سدرة ماجتش بش تفسد سدرة جايه تحافظ ع رابط الود والجيره وعشرة العمر..
مغليه:زعمه ياصفيه؟!
صفيه؛مش زعمه يامغليه هادي خليك متأكدين منها كلنا عارفين ان سدرة هي اللي ردت المهدي علاش توا بتجي تفسد عليه...سدرة رباية وردة الله يرحمها واني وياك ربيناها معاها وتعرفيها زين زين..
تنهدت مغليه وقالت؛عارفتيني نبصم ع كلامك وماندورش وراه..لكن في نفس الوقت حاولي تكلميها وتشوفيها ماتعرفيش انتي..قصدي الموضوع مش ساهل راهو وماحد عارف شن يصير..
صفيه هزت راسها وقالت:ولو اني زي ماقتلك حافظه سدرة حفظ لكن بش نطمنك تو نهدرز عليها..
مغليه ابتسمت وقالت؛صحيتي سلم وخيتي..
~~~~~~~
"جت!!؟"
خديجه؛ايه وانتي راقده هني وعاصبه راسك تقول اشبح من ميتلك بعيد وبر..جت وقعمزت وهدرزت وقالت بدير هي المقروض مع عمتها واختها وجوها فوق الريح تقول العرس لخوها..
نسرين وهي مصدومه:تتسهوكي صح!؟
خديجه:وربي العالي مانزيد عليك كان في النفس..مش مصدقه هونا امي اطلعي انشديها..
قعدت نسرين ساكته وهي مش مستوعبه اللي سمعاته..
بعدين مشت طول اتصلت بفايزة تخبرها..
🌻"تصدقي توقعتها دير هكي"
نسرين:اني ماتوقعتهاش بكل..
"اسمعي مادام دارت هكي خلينا معاها في ظهرها سدرة توا تبي من يوقف معاها اكثر من قبل يانسرين"
هزت نسرين راسها وقالت بحزن:عندك حق بش تقعد واقفه ع رجليها وتتحمل..
☘اما في حوش جيران المغليه..
اللي حيوطهم جايه حدا بعض..
عواطف وهي مستعجبه:ريتها ياكبدي ريتيها جبارة!
نجاح؛رافعه خاشمه وحاسبه في روحها ولت حاجه كبيره بلعاني تكسر في خشومهم تقول رديته وجايه نعول لعرسه..
عواطف:تعرفي شكلها كانت لاتحبه لاشي..
نجاح؛كان تحبه تسلم فيه! هو المهدي يسلموا فيه!
عواطف:لكن حركته اخي الحق كيف خطب صاحبتها..
نجاح؛بش يحرقها..
عواطف:ايه..باهي توا زعمك يصيرلها من الدكتور..
نجاح:بالك ماتعرفيش مرات رداته بش تاخد دكتور حتى دكتور ياماما!
عواطف:لكن ارمل وعنده ولد خيي..
نجاح:بالله قعمزي وهفتي كان يبان عليك تطلعي بحوايجك اللي عليك...
عواطف بغضب:هديكا انتي ياخفيفه اللي ميته ع صنة الراجل..
نجاح شهقت بصدمه وقالت:اني ياللي قريب تهبلي عليهم..
وحدفت عليها المخده..
وعواطف ناضتلها بيها وهي نقول:اني ياحقيره!
وبركت عليها وهي ع السرير وطاحت فيها ضرب..
ونجاح تعيط وتريش فيها. وهالمرة يخش عليهم بوهم ووراه امهم وهي تقول..
نجمه:غير بالشويه ياراجل..
والراجل مايشبح في شي والسير في يده وقعد يعطي فيهم وهما يتعايطوا ويقوللهم:كل يوم حسهم طالع من دون بنات الناس كل يوم..
وهما الزوز يتعايطوا ويقولوا:لاخلاص خلاص يابوي معاش نعاودوها..
ونجمه تشبح فيهم بيأس وهي تقول:يارب ابعتلهم رجاله يريحوني منهم يارب...
🍀🍀🍀🍀🍀
وتمر الايام..
ويبدا الطلوع للسوق...
ولأن عيلة شنيبه ربي فاتحها عليهم كملوا كل شي فيسع فيسع...
اما عائشه بتاتها كله كان مفصل تفصيل ماطلعتش للسوق..
وطول هديكا الايام الصعبه كان عائشه عايشه فهالدنيا جثة تمشي ع الأرض بس الروح منها وكأنها منزوعه..
وكل ماله موعد الحكم عليها بالفناء يقرب اكثر واكثر..
في بالها قاعده تحس انها تقرب يوم عن يوم من الجحيم في الدنيا..
بتطلع من جهنم بوها وخوتها...لجحيم المهدي...
راجل فوق ماأنه قلبه مش معاها واخدها نكايه في غيرها..
راجل بالعقليه هادي كيف بيكون شكل عيشتها معاه!؟
مابعد عائشه من اللي حساته وهي تفكر فهالأفكار...
🌻اما صاحبتها فماكانتش خير منها حالا..
كانت تراجي في العرس وتعد في الايام.
زي مايدير المحكوم عليه بالإعدام وهو يراجي في يوم اعدامه...
وهو قاعد يفور ويغلي..وغضبه كل يوم يتجدد ويكبر..
ومع الأسف...العشق كان يزيد معاهم ماينقص...
☘☘☘☘☘
وخش اسبوع الحلويات..
وجنان حوش شنيبه تعبى بالجارات والاقارب..
اللي هادي شاده حاجه دير فيها...
ومنهم سدرة ومطيرة وفردوس..
والكل عيونه ع سدرة اللي كانت تنقش في المقروض ودير فيه بحرفيه وكأن امها اللي مقعمزة..
سدرة:غرفه حداك طوبى..
غرفه من الجهة التانيه من الجنان:باهي باهي..
وقعدت تلعب في" يستيك" مع اميمه وبنات الجيران..
وطوبى مقعمزة مع بنات اختها يتفرجوا عليهم..
ع خشة الاولاد للحوش..
نضال قعد يخرب عليهم:سبعه..تسعه..حداش..
غرفه:ياسر يابارد مبردك..
عمر قعد يشبح لأميمه شن لابسه مش زي باقي البنات توت حلوة صيفيه هي كانت لابسه شورت من جهه وفانيليه من جهه ومايبانش لبس بنات بكل..برغم انها نظيفه وشعرها مرتب..
ضحك وقال:اميمه ماريتش شينه زيها الا عواصف..
البنات شبحولها وهما يضحكوا..
وهي انحرجت وماعرفتش ترد..
عمر بضحكه؛نضال نضال وين شايفه الشورط اللي لابساته ترا!؟
نضال بضحكه؛خوه اللي لوحته الاسبوع اللي فات...
غرفه بضحكه:حوايجها من سوق الجمعه بوها يجيب فيهم..
عمر وهو يضحك؛ايه عمي طليبه القفاص ..
قعدوا يضحكوا..
هربت اميمه بدموعها عنهم..
وعمر يقوللها؛تي بري ياشينه..
ناضت اريج حامقه ومشت لعمر ودفاته بقوة وقالت بلغة طفوليه:كلب..
ومشت تجري ولحقت اميمه..
عمر قعد يضحك وخش داخل ونضال وراه..
والبنات رجعوا يلعبوا..
وطوبى آلاء رجعوا لهوا معاهم وهما يلعبوا..
🌻عند النساوين...
صفيه وهي ضامة اميمه اللي دافنه وجهها في صدر امها وهي تبكي بالعبره:غير خيرك يابنتي قولي تكلمي..
اريج وهي تحاول تشرح؛عمر قاللها شينه..
مغليه:هالفرخ هدا...
سدرة:قليل ادب ولسان طويل من يوم يومه..
شبحتلها خديجه ع جنب بحده..
مغليه؛بالله سامحيني ياوخيتي ..
صفيه هزت راسها وقعدت ساكته..
ناضت نسرين وخدت اميمه وقالت؛تعالي معاي لداري ميمو عندي حاجه حلوة بنعطيهالك..
سدرة؛هي نوضي ميمو معاش تبكي خليك مراة..
كلهم قعدوا يشبحوا لسدرة..
بعدت اميمه عن امها وهي تمسح في دموعها..
خدتها نسرين من يدها وقالت:هي تعالي..تعالي حتى انتي روجه..
فردوس:لالاخليها..
نسرين خدت اريج وطنشت فردوس..وفردوس ضحكت ..
ومشت نسرين بالبنات دخلتهم داخل..
والنساوين برا كملوا باقي شغلهم...
☘☘☘☘☘
"واخد وحده ماتبيهاش!؟"
تنهد من وسط قلبه وقال:اني قلتلهم يخطبوهالي..
طاهر:باهي مدام هكي علاش ضايقه بيك!
مرر نظره حواليه بعدين تنهد وقال:مش قادر نقول شي..
طاهر:باهي علاش جيتني..
حرك راسه يمين ويسار وقال:مش عارف..
طاهر:اني عارف جاي تبي حد يشجعك ياتكمل ياتوخر..
شبح المهدي لخوه وقعد ساكت.
طاهر:عارف شن فيك وعارف قصتك كامله..مانبيش نقولك اللي درته صح ولاغلط لأنه معاش ينفع الكلام هدا توا..لكن بنقولك طريق مشيت فيها كملها..ماقدرتش تحافظ ع بنيه اللي تبيها..احفظ صورتك وقدرك بين الناس..
قعد يشبح لخوه هلبه..عيونه تعبوا دموع بعدين ارتسمت ع وجهه ابتسامه اسف وألم ورجع شاف القدام وقال:زعمه امك ماديرلكش مشكله.
ابتسم طاهر وقال:قلتلها جاني وليد صاحبي بنوقف اني وياه تحت العمارة شويه..
هز المهدي راسه بدون مايعلق...
☘هديكا الليله روح من عند خوه في الليل متأخر...
بعد نص الليل..
وصل بالسيارة لقدام حوشهم..وعيونه علقهم في حوش سلطانة قلبه وهو يفكر زعمه شن دايرة توا..
وسدرة كيف باديه ترقد وقتها ودموعها ع خدها وطوبى راقده حداها تلعب بشعرها المفرود ع المخده..
وعائشه دموعها غسلوا مخدتها وقلبها قاعده يتقطع..
كل يوم تراجي ربي يدير معجزة ينهي بيها المصيبه بس ما يصيرش..
وكل مالها الأيام تزيد تقربها منه اكثر واكثر..
🍀🍀🍀🍀
وابرموا كسكسي عرس المهدي وعائشه يابرامات..
الله! من قال يادنيا...العرس اللي الشارع كله يراجي فيه سنين يجي..
بس مايكونش عرس المهدي وسدرة..
وسدرة تكون فيه من العواله...
ع النصيب..
ع قولت إياد...اللي تأمل في سدرة هلبه بعد انزاح المهدي عن طريقها تو يقدر يحاول معاها بدون كلل او ملل...
كان موجود في اول ليلة عزومه في العرس بين الحاضرين..
وكان فرحان بالعرس اكثر من المهدي بروحه..
اللي كان بين العواله حتى هو برغم انه العريس..
🌻عند النساوين..
كانت سدرة واقفه تسقي في القصع والعوالات يشبحولها..
:ماشاء الله عليك..
سدرة:تسلمي..هي حطوا في الصفر الاول الأول...
وقعدوا يوزعوا ع السفر...
وهي تمم عليهم..
ع طلعة مغليه وهي تشوف فالوضع..
مغليه:عطيك الصحه ياسدرة تقول امك بيناتنا..
سدرة وهي تشتغل:هذا علاش موجوده اني..
رفعت مغليه حواجبها وقعدت ساكته..
بعدها لفت وخشت تنادي ع البنات يمدوا السفر...
🍀وبعد ماكملوا تستيف..
بدوا يمدوا في السفر للرجاله..
كل مرة وحده..وعواطف ونجاح في المقدمه يقولوا لرواحهم بكل تصدف معاهم ويحصلوا حاجه...
سدرة:ماقعدش الا وحده تو نرفعها اني انتم بروا شوفوا جماعة الشاهي..
وقامت السفرة ومشت ونسرين وفايزة يشبحولها بحزن..
فايزة:كان تشوفي حال عائشه..
نسرين تنهدت بألم وقالت:ياقلبي اني وخلاص الله يسامح اللي كان السبب..
🌻عندالرجاله..
الجالي:قعدت قصعه وحده بس..
المهدي:بري قعمز تو نمشي نجيبها...
الجالي مشي قعمز..
والمهدي مشي بطريقه للمكان اللي بيجيب منه السفره..
وين وصل فيه..
سمعت سدرة الحركه وقالت:هي تفضل خوي..
هو جمد في مكانه...حس قلبه طلع من مكانه..
قعد واقف وخلاص..
سدرة وهي تراجي:مافي حد هني!؟
قامت عيونها..
هو بان عليها...
ولولا لطف الله وممده ليها بالقوة راهي طيحت السفره من ايديها...
بس هي مااكتفتش بثباتها المصطنع بس...
بل حتى رسمت ابتسامه ع وجهها وقالت:مبروك عليك..وقربت مدتله السفره..
استفزاته بكل قوة..
خلاته يحط ايديه ع ايديها ويشد عليهم بقوة ..
كان يبي يوجعها يشوف الألم في عيونها الحزن اللي في قلبه منه عالم يبي يشوفه عليها شوي..
يبيها دمع مش تبتسم..
يبيها تنقهر كيف ماهو مقهور ..مش تجي تعول في عرسه وتبتسم...
وهي كانت فاهماته بتوه السدرة عن مهديها كملت بإبتسامه:اخترت زينه البنات مش حتلقى خير منها حطها في عيونك والله لاتسامحك كان وجعتها..نعرفك راجل يامهدي..
معاش قدر يتحمل طلقها وخدي منها السفرة ومشي وهو شاد غضبه بقوة ودموعه في عيونه..
وهي لفت ومشت وقعدت تفرك في ايديها في بعض من كثر ماوجعوها...نزلوا دموعها بس ابتسامتها قاعده زي ماهي...
#على_خاطري_ياصاحبتي
