(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_السادس_والثلاثين"خفايا"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"لاااالاااا"
مروة؛والله هو قالي نبيك تكلمهالي..
طوبى واريج قعدوا يشبحوا لآلاء اللي كان تشبح لمروة وهي متنحه..
ولاجي في بالها ولافي خيالها ان الاشعار اللي يقول فيهم مهند في برنامجه والاغاني اللي يهدي فيهم نهاية كل حلقه لحبيبته كانت ليها هي..
مروة:شن نقوله!
آلاء وهي مصدومه:مش عارفه!
طوبى:تمام ميرو حبيبتي توا بري لماما بش ترقدي قبل لتعصب عليك..
مروة هزت راسها وقالت:منورة ع التوزيعه..ومشت..
وهما ضحكوا..
بعدين شبحت طوبى لآلاء وقالت:شوفي آلو لو حاسه ان قلبك قاعد مايل لولد عمك مادخليش روحك في قصص تانيه..
اريج:مزبوط..
آلاء:اني اصلا معاش نبي نفكر في حد بكل هكي احسن..
طوبى:ايه والله احسن بهلبه..
اريج:بس خسارة مهند يهبل وخير من وليد بألف مرة..
طوبى:ولأن مهند كويس مايستاهلش يكون الشخص اللي ينسوه بيه غيره..
آلاء:بيبو خيرك اللي يسمع يقول قلت باهي..
طوبى:نعرفك من عيونك عاد هو مذيع ومشهور فرصه وحصلتيها بش تحرقي وليد صح..
الاء:بيبو كلامك واعر..
اريج:صح واعر بس حتى اني فكرت هكي..
الاء ودموعها في عيونها:مش حقيرة اني بش تفكروا فيا هكي..
ومشت من حداهم وهي زعلانه منهم وبتبكي...
طوبى:تحسابيها بتعدل ع كلامنا كان في حاجه زنت في راسها حديرها.
اريج:ومابيتعب حد غيرها هي في النهايه..
طوبى تنهدت وقالت:ربي يهديها وخلاص..
ع طلعة اميمه للجنان..
اميمه:الجو حلو الليله..
الزوز شبحولها وقالوا بإبتسامه:ايه..
قدمت اميمه لشجرة الفل وقطفت منه فله وشبحت لطوبى وقالت:طوبى نبيك في موضوع..
اريج شبحت لطوبى وقالت:اني خاشه بيبو..
ومشت طول خشت.
وطوبى ابتسمت بعدين قالت:موضوع شنو ميمو..
اميمه وهي تلعب بوردة الفل:هو بيبدا بسؤال جريء شويه..
طوبى:اللي هو..
اميمه:امم..انتي في حد في حياتك يعني تبي حد وتراجي فيه مثلا..
ابتسمت طوبى وقالت:نهائي..
اميمه:باهي..مش مفكرة تنخطبي حاليا..
طوبى:لاعادي خطوبه او زواج مش مشكله المهم شخص مناسب..
بإبتسامه وهي عاقده حواجبها سألتها:شن مواصفاته الشخص المناسب هدا..
طوبى وهي تفكر:امم..اول شي يكون ملتزم بالدين ويخاف ربي..تاني شي اخلاقه تكون عاليه لأن الراجل راس ماله اخلاقه..يكون هادي..رزين..يتصرف بحكمه في كل وقت حد يحترمني ويقدرني ويعطيني حقوقي في القرايه والخدمه وممارسة اهم هوايه عندي وانتي تعرفيها..
اميمه:حلو..والماديات..
طوبى:نكذب عليك لو نقولك مش مهمه..لامهمه وهلبه لأن الحالة الماديه تعكس ع العلاقه بين المتزوجين..يعني اني مش ناخد واحد يخدم في خدمه مش مضمونه عايش في حوش ايجار يوم عنده فلوس يوم لا..حياتي اني وياه حيكون اغلبها هموم ومشاكل وضغط نفسي..
كل اللي يهمني يكون عنده خدمه في الدوله حوش بروحه ملك..والباقي يجي بعدين..
اميمه؛حلو بكل كلام منطقي ومقبول..باهي فرق العمر..
طوبى:مانبيش نقولك مش مهم بس يعني قريب من عمري لا وبعيد عنه هلبه لا يعني فوق 15 سنه لا..
اميمه بإبتسامه اكبر:باهي تفضلي تاخدي شخص تعرفيه ولالا..
طوبى:نبيه يكون بعيد عني بش نتكشفه كل شويه وكل مانتكشف فيه حاجه حلوة ولامش حلوة نحبه في الحالتين.
خفت ابتسامة اميمه وقالت؛بس الوحده احسنلها تاخد شخص تعرفه مش شرط يكون في بينهم علاقه بس تعرف اخلاقه وتربيته وقدامها كتاب مفتوح مافيه شي مدرق.
ابتسمت طوبى وقالت:هي قناعات في النهايه وكل واحد وشن يحب..
اميمه قعدت تشبح لشجرة الفل بنظرة ضيق..
وطوبى تشبحلها وتقول في نفسها..
"إن شاء الله يكون وصلك القصد يااميمه"
واميمه تقول في نفسها..
"واضح نصيب بينهم مافيش البنت مش مقتنعه بيه نهائي"
طوبى:هو هدا الموضوع ولاالمدخل متاعه؟
اميمه ضحكت وشبحتلها وهي تقول:مفرداتك تهبل..
طوبى بإبتسامه؛ماجاوبتنيش..
اميمه وهي محافظه ع ابتسامتها:لاهو هدا الموضوع..شبحت للطاوله والكراسي...تقعمزي..
طوبى شبحتلهم وقالت:ليش لا..
ومشوا الزوز قعمزوا ع الكراسي مقابلات بعض..
☘☘☘☘☘
مقعمزين ع الشط..
هو يسمع فيها..وهي حاطه راسها ع كتفه وتحكيله..
نجاة:ممكن هادي حاجات اول مرة نحكيهالك. واول مرة تعرفها عني..اني عشت حياة صعبه هلبه هلبه وتعبت هلبه ومعاي خواتي..
الجالي وهو متأثر؛معقوله لاعمام ولاخوال دوروكم؟
نجاه وعيونها معبيات دموع:من عمامي ومن خوالي! مانعرفهمش كان في المناسبات بس فرح ولاعزي..حتى في الاعياد مايتفكروش فيا..
الجالي:سامحيني فيها ناس ماعندهاش نخوة ولارجالتهم عندهم رجوليه..معقوله يخلوا تلاته بنات يواجهوا الحياة برواحهم!
تنهدت نجاة وقعدت ساكته...
الجالي:باهي مرت بوك وخوتك؟
نجاة؛مرت بوي همها الفلوس وب واللي يتقاللهم خوتي احقر منها..ساكنين تحتهم ومايدروش فينا بكل..الا بعد تزوجت خطرت عليهم ع خاطر الفلوس..بس اني سكرت عليهم..
عندك علم قبل يبوا يجوا يقعدوا معاي في الشقه ويكرهوني حياتي!
الجالي:توا مافي حد يقدر جيهتك ولانخليهم يفكروا..
شدت فيه بقوة وقالت:واني معاك مرتاحه وامان الدنيا كلها عندي..
الجالي ابتسم وقال:تنوضي..
نجاة:لا مازال خلينا شويه ماينشبعش من البحر..
هوقعد ساكت وع وجهه ابتسامه...
شويه وبدت نجاة تغني في اغنيه غربيه..
وهو يسمع فيها ومنسجم ع الآخر..
كان يعرف الاغنيه وفي نصها بدي يغني معاها..
هي ضحكت وزادت شدت فيه وكملت غني هي وياه..
والزوز كانوا عايشين مشاعر واحاسيس نستهم الواقع متاعهم تماما..
☘☘☘☘☘☘
"مرات نقول اني باهي اللي صار بين سدرة والمهدي هكي"
اميمه:علاش!؟
طوبى:يعني ع اللي سمعته وعرفته وشفته بعدين..يعني ع طباع وصفات شخصياتهم والمواقف اللي صارت ممكن لو تزوجوا هداكا الوقت مااستمروش مع بعض..وزواجهم يكون القبر متاع حبهم..مرات يطلقوا بعدين وهما كارهين بعض وكل واحد يندم انه حس اتجاه التاني بالحب..
عكس توا حبهم كل ماله يكبر..غير فيهم هلبه حاجات..صح عذبهم بس ياما علمهم..
اميمه وهي تفكر في كلامها:عمري مافكرت فيها هكي..
طوبى ابتسمت بحسرة وقالت:اكثر شي في حياتي نفكر فيه هما المهدي وسدرة اللي حاسه وكأني حامله ذنبهم في رقبتي
مرات نبرر لنفسي بش نحول هالذنب زي توا..ومرات نقعد عايشه بعذابه وقاهرني..
اميمه:ماليك ذنب في اي شي..نصيبهم ياطوبى بيك ولابلاك كان حيصير فيهم هكي..
شدت طوبى دموعها وهي ساكته..
اميمه تنهدت وقالت:من قلبي نتمنى نشوفكم الزوز مرتاحات الزوز تستاهلوا احسن شي..
ابتسمت طوبى وقالت:حتى انتي ميمو ربي عطاك ع قيس نيتك البيضا..
ابتسمت اميمه وقالت:الحمد لله..
☘وهو كل واحد في هالحياة حياخد ع قيس نيته عاجلا او اجلا..غير حني مشكلتنا ننسوا يطول بيا الزمان وننسوا..لين تجينا ع غفله وبالقاضيه..نازلة العدل الرباني☘
🥀🥀🥀🥀🥀
الساعه 8:00صباحا...
كانت راقده في دار فاضيه من كل شي ماعدا فراش طويل راقده عليه وهي متكمشه في بعضها ومتغطيه بشرشاف مايتقي من شي..
جنبها الفيلو والطرحه محطوطات..
فجأة..
فتحت عيونها شويه..
كانت ناسيه كل شي مش متفكره شي..
ركزت ع الفراش كويس..بعدين مررت نظرها قدامها..شافت الفيلو..
تفكرت كل شي..
غرقوا عيونها بالدموع وفاضوا..
وهي تتفكر في تفاصيل الليله اللي فاتت..
بعدين ضيقت عيونها لمااستغربت في حاجه..
دفي..
الدار دافيه..
زادت مررت نظرها ع الدار كلها لين جو عيونها ع الدفايه..
ماكانتش هني امس..
هو حطها اكيد...
نزلوا من عيونها الدموع وهي تذكر..
《 خلتيني نكرهه خلتيني نشوفه كيف ماانتي شفتيه طلعته من حياتي زي ماانتي طلعتيه من حياتك وعشتي بعدين عادي وكأنك مادرتي شي...
وكأن كسر القلوب عند منحطه زيك هوايه تتسلى بيها وقت فضوتها..》
مر بين عيونها ايام علاقتها معاه وكيف كان..
طيب هلبه..حنون هلبه..ويرعش عليها...
وهي تذكر..
"هيي انتي"
فزت من الخوف وناضت قعمزت..
عبد الرؤوف وهو يشوفلها بنظرة كبر وكره:تنوضي توا ضمي داري..وتلقي سفرة فطور داخل افطري....
هي قعدت تشبحله بنظرات خوف..
عبد الرؤوف:راك تفهمي ان هادي حنيه مني..لو عليا نخليك محبوسه هني جيعانه صقعانه وتقعدي هكي لين تموتي..لكن اني مانبيكش تموتي بش ترتاحي لا..اني نبيك دوري الموت وماتوصلي فيه..
نزلوا دموعها..
وهو قال:بعدين...بتاخدي بقاجك وتنزلي لوطا بديروا جوكم انتم النساوين مانفهمش فيه..لكن كل شي بيكون لوطا فاهمه..
هي بصوت نبرة مرتعشه؛باهي كان نبيله ولا اهلي سألوني..
قاطعها وقال:دبري راسك..اكذبي انتي فالحة في الكذب مش صعب عليك...
نزلت عيونها وقعدت ساكته..
عبد الرؤوف:بنطلع ساعه نولي نلقى الدار انظف من نيتك..
ومشي طلع من حداها.
لحظات وسمعت باب الشقه تسكر..
كانت جعانه بتموت..
لوحت الشرشاف وناضت تجري لدار النوم..
لما خشتلها انصدمت..
لقتها كلها دبشه هو ع السرير ع الارض ع الكراسي..
غمضت عيونها وهي تحاول تهدي نفسها بعدين فتحتهم وشافت للسفره اللي ع الطاوله..
جتها تجري...
وقفت عليها وهي مصدومه..
كان واكل من كل شي ومخليلها شويه..
هي عافت تاكل الفضله عمرها ماكلت فضله في حياتها..
مابتش تاكل..
وخرت وشبحت للحوايج وتفكرت نظراته المخيفه..
بدت بسرعه ضم فيهم وطبق وتعلق..
وبطنها تصدر في اصوات من الجوع ماكلت شي من المزين..
وقفت في نص الترتيب ومشت للكوجينه لعل وعسى تلقى فيها حاجه تتاكل ..
خشتلها وطول جت للثلاجه لقتها مسكرة بالقفل..
غرفه؛لاياربي!..
بعدين التفتت ع الدواليب فتشت فيهم كلهم مالقتش ولاحاجه كلهم ماعين بس..
مشت قعمزت ع الطاوله وبدت تبكي وبطنها مابطلتش طلع في صوت الجوع..
استسلمت وسلمت..ومشت لدار النوم..
خشتلها وقعدت تشبح للسفره.
بعدين قعمزت خدت الخبزة وبدت تاكل..
تاكل وهي تبكي...
☘☘☘☘
"اني مش فاهمه ع اي اساس مازال تخش عليهم وتطلع"
عائشه:عمي يام هو اللي شاد فيها..
عتيقه:ربي يهديه عمك وخلاص مراة غريبه هي توا تخش ع الحوش وتطلع وتبات الحوش مليان رجاله..
عائشه:واني شن دخلي بيهم عليا في راجلي وصغاري بس..
عتيقه:ردي بالك ياحنه ع راجلك مرات تقنصل عليه..
ضحكت عائشه..
عتيقه:شن يضحك في اللي قلته..
عائشه:لأنه مستحيل يام..المهدي!..وقعدت تضحك تاني..
عتيقه:باهي اضحكي علي كلامي اضحكي لين تحصلي كف..
هدت عائشه ضحك وابتسمت وهي ساكته.
مدتلها امها سندويتش تن..
عائشه:بالهريسه يام..
عتيقه:لا..
خداته عائشه وبدت تاكل بعدين نادت؛سدرة ماما تعالي افطري..
عتيقه وهي متنرفزة:كان معاش تناديها بهالاسم وانتي عندي..
ع خشة سدرة:وينه ماما..
عتيقه:تعالي بنتي تعالي..
ومشت سدرة لحناها بش ديرلها فطور..
وعائشه تفكر في كلام امها..
☘☘☘
فهالوقت..
خش المهدي لحوش بوه بش بيفطر معاهم عصيده دايرتها نسرين..
وين جي بيخش الكوجينه..سمعهم قالوا..
"سدرة"
مغليه؛واني اللي نحسابه سمن ماكله.!
نسرين بحزن:قلبي نقطع..ورتني الصور والتحاليل وهي تبكي..صح هو مش مرض خطير ومع العلاج تمشي اموره بس سدرة متحطمه هلبه..سدرة القويه االلي واجهت ماهو اصعب انهارت قدام المرض..
خش عليهم وقال:مرض شني!!
خواته وامه شبحوله وهما متفاجئات..
مغليه بخوف:اهدا سلم ولدي مش مرض خطير راهو..
المهدي بإنفعال؛شن هو باهي تكلموا الزفت!؟
خديجه بقلق:كسل في الغده ياالمهدي..
المهدي:لامش مرض خطير!
نسرين:قاعده تتعالج والله العظيم وتحسن وضعها..
المهدي غير عيونه عنهم وقعد يشبح في الفراغ وهو مصدوم وخايف موت ع سدرة المنتهى..
مغليه:قعمز افطر درتهالك بزيت الزيتون متاعك..
شبحله شويه بعدين مشي طلع من حداهم...
مغليه:حي عليا كان ماتصير فيه حاجه..بري الحقيه يانسرين تحركي..
مشت نسرين تجري وهي خايفه..
خديجه بحزن:الله يسامحك ياسدرة درتيها فيك وفيه..
☘☘☘☘☘
خشت للكوجينه بش تاخد دواها وهي مستغله ان الكل ملتمين ع سفرة الفطور..
حطاته ع الطاوله ومشت بتصب ميه بش تاخده..
ع خشة اميمه بتجيب خبزة..
وقفت لما شافت الدوا..
قدمت وخداته من ع الطاوله..
وسدرة فهاللحظه تلتفت وفي يدها طاسه الميه تشوفها..
اميمه وهي تشوف الدوا؛عندك كسل في الغده سدرة؟
سدرة جتها وخداته وهي تقول:ايه.
اميمه؛من امتى..
سدرة خدت الدوا ومابتش تجاوب..
اميمه؛شكيت فيك وفي وزنك اللي قاعد يزيد وانتي شبه ماتاكليش..
سدرة؛باهي اسكتي مانبي حد يعرف..
اميمه؛تراجعي عند دكتور..
سدرة:اخصائي والحمد لله تحسنت عن قبل..خودي شن تبي من الكوجينه واطلعي..
تنهدت اميمه بضيق وهزت راسها..بعدين مشت خدت خبزة وطلعت..
وسدرة خدت نفس عميق وزفرت..ومشت طلعت من الكوجينه بالدوا...
☘☘☘☘☘
بعد صلاة الجمعه...
ركب عبد الرؤوف للشقه بسفرة غدي مدايراته اخته ليه ولعروسه..
فتح باب الشقه وخش..
وسكر الباب برجله..
ومشي وهو يغني..
ناويلك على نيه..بس انت اصبر شويه..
وفات من قدام الدار اللي هي فيها..
هي كانت جعانه هلبه وتشم في ريحة الغدي اللي جايبه وتبلع في ريقها وخلاص..
فكرت تمشي تسأله عن حاجه بالك يتحشم شويه ويخليها تاكل معاه..
ناضت ومشت بخطوات متردده..
لين وصلت في دار النوم..
وقفت في الباب..
شافاته كيف مقعمز وقايم الكاط الطويل فوق شويه وياكل بشويه..
زادت تسهفت..
دقت الباب..
هو :كان فضلت..تو نعطيك تاكلي..
غرفه؛مش جايه ع خاطر هكي..
شبحله وابتسم بمكر وقال:اهممم على بابا ياماما..نعرفك اني وكاله موليه زي برميل النافطه...
غرفه بلعت ريقها وقالت:امتى بننزل لوطا..
ضحك وقال؛بش تحصلي فرصه وتاكلي ياهايشه..
غرفه معاش قدرت تتحمل بجرأة قالت:مش حاس روحك انك زودتها هلبه!
اختفت ضحكته وحلت محلها ملامح مرعبه..
قعدت ترعش وهي تقول:اسفه اسفه..مش قصدي..
ناضلها..
هي قعدت توخر وترعش وتقول؛خلاص خلاص معاش نتكلم.
وحطت ايديها الزوز ع فمها وهي بتموت من الخوف..
وقاعده توخر وهو يقدملها..
لين عترت في شبشبها االلي كان قدام دار النوم..
كانت حطيح بس هو شدها..
عبد الرؤوف بنبرة مخيفه؛تقوليلي زودتها اها..زودتها..تي اني قاعد مادرت شي..وانتي مش مقصرة تشجع فيا ع اللي بنديره..
غرفه وهي تبكي:خلاص والله خلاص معاش تسمع صوتي بكل..
شد ذراعها بقوة..
وجبدها ومشي بيها لدارها دفها داخل..
وسكر الباب وقال..
"تطلعي منها قبل لنقولك نقتلك سامعه..نقتلك"
ومشي ولى للدار وهو يقول:كلبه..
وهي في الدار المصقعه قعدت تبكي بعبرتها...
☘☘☘☘
"زعمه امتى تسافر غرفه"
مطيره؛اكيد غدوة..
سدرة حطت يدها ع قلبها وقالت؛من امس واني قلبي قابضني والله قريب اتصلت بيها..
مطيرة؛سدرة خلي خواتك يعتمدوا على رواحهم ويفكوا عنك شويه..
سدرة؛والله نبي مش قادره..تو لو طوبى مش حنخمم فيها زي غرفه..غرفه مرخيه ولسانها طويل خايفه تقلل ادبها عليه يقتلها كان مليشاوي هدا.
مطيرة بضحكه:يعطيك الهني مش لهالدرجه عاد..نقولك حاجه بعدين العشيه نمشوا وتشوفي بعيونك كيف مرتاحه وفرحانه..
سدرة تنهدت وقالت؛غير امتى تجي العشيه..
☘☘☘☘☘
"كيف يعني مافهمتش"
اميمه وهي تحاول تخفي ارتباكها:يعني راجي لين تتخرج وخلاص..
حسين بنفاد صبر:لاإله إلاالله..ومازال يقولول راجي..
اميمه؛انت صبرت اكثر من 10سنوات جت ع هالسنتين..
حسين؛تضمنيلي فهالسنتين انها تقعد يااميمه..
اميمه؛ايه نضمنلك لإني قتلك هي تبي تكمل قرايتها قبل..
تنهد وقال؛تو نشوفوا شن اخرتها...
☘☘☘☘☘
بعد العصر..
واقفه عليه وهي منزله راسها..
وهو يملي عليها في الاوامر وايديه ورا ظهره:نشبح منك حركه هكي ولاهكي ياويلك..حتى بنظرة العين..انتي توا لماتنزلي بتباني قدام اختي قبل ماليك انك اسعد من خلق ربي...رفع يده وهو ضام السبابه والابهام يقول..قسما بالله قسما بالله..اختي تجيني تقول خيرها..ندمك ع اليوم اللي جاباتك فيه امك..فاهمه..
غرفه بخوف:حاضر حاضر..بس لو سألوني شن نقول بالله عليك..لو يبوا يركبوا هني شن نقوللهم..
شبحلها بإزدراء وقال؛خايبه..مانعرفش ياخايبه مانيش واخد ماجستير في الكذب زيك انتي...طلعي المخزون متاعك تصرفي دبري راسك..
هزت راسها وهي تبكي..
عبد الرؤوف؛تعرفي تبكي نعطيك بوني نرقدك هني..
هي قالت بخوف؛مش باكيه خلاص..
شبحلها من فوق لتحت بعدين قال:افتحي الباب..
هي مشت فتحت الباب..
هو طبس قام بوكس كبير فيه قفطان وكندره وعدة مكياج..
ومشي طلع..
وهي طلعت وراه وسكرت الباب..
قعدوا ينزلوا هما الزوز لين وصلوا لوطا..
هو قال؛افتحي الباب..
مشت فتحت الباب الفاصل..
عبد الرؤوف:ابتسمي..ابتسمي..
رسمت ع وجهها ابتسامه..
هو قعد يشوف لإبتسامتهاقال؛ارزيني في الهم ...
ومشي طلع..
وهي طلعت وراها وكانت تاخد في انفاسها بصعوبه..
عبد الرؤوف؛بلبله...
وتجيهم نبيله وهي تزغرد..
وهي يشوفلها بإبتسامه ويقول من تحت سنونه؛ابتسمي..ابتسمي..
وغرفه وجهها بينشرك خلاص..
وصلت فيهم جت لغرفه سلمت عليها بالأحضان وهي تقول؛مبروك ياعروسه مبروك..
غرفه وهي تسلم عليها قالت: الله يبارك فيك..
عبد الرؤوف جي من وراها وهو ياشر ع فمه وهو مبتسم..
بمعني ابتسمي ابتسمي..
وهي مسكينه لين خدودها وجعوها من الابتسامه..
نبيله بعدت وهي تقول؛شن جوك..
غرفه وهي تشوف لعبدالرؤوف كيف يرقص في كتافه تعبيرا عن السعاده..
بمعني بيني انك سعيده وجوك مليح..
شدت ضحكتها وقالت:الحمد لله..
التفتت نبيله لخوها..
عبد الرؤوف رفع حواجبه وقال:وين نحطهم؟
نبيله وهي مبتسمه؛في داري..
هو قال؛تمام..ومشي لدارها..
وهي خدت غرفه وقالت:تعالي حبيبتي خل نوريك الدور الاول بالتفصيل...
ورتها الحوش كله بعدين قعمزتها في الصالون..
وهو جاهم بعدين وقال:طالع..ماتبوا شي..
نبيله:اني مانبي شي بالك عروستك تبي..
غرفه؛ايه نبي شاورما وبيتزا خضرة وشكلاطه باونتي.
شبحتلها نبيله وقالت؛شكله تطيبي مش حلو..
غرفه؛بالعكس زي العسل غير ريحته ساده بس اني وكاله هلبه..وشبحتله لقاته يفنص فيه..
وفيسع مارخي عيونه لما شبحتله اخته وقالت:خلاص جيبلها اللي تبيه ماتخلي شي في خاطرها..
هو بإبتسامه مصطنعه ومن داخل كان يغز في الملح ع غرفه؛طلباتها اوامر..هي سلام..
ولف ومشي وهو يقول في نفسه"تو نطلعه من عيونك"
☘نبيله؛هاه شن جوك مع مبروك اكيد تعرفيه اسمه التاني..
حست غرفه بوجع في قلبها لما سمعت الاسم وقالت:ايه قالي..جوي تمام معاه هو كويس هلبه..
نبيله؛ايه صح..مرات هكي لما ينوض عليه البوري يولي يخوف بس قلبه قلب اطفال طيب وحنين ع الآخر..
غرفه هزت راسها وهي مبتسمه مجامله...
☘وجوها اهلها..
عمتها وخواتها وبنات اختها..
استغربوا لما لقوها لوطا...كان خاطرهم يشوفوا شقتها اللي ماشافها حد كان مطيره وفردوس لما رفعوا حوايجها..
طوبى:هي وين بضاعتك فوق..
نبيله بإبتسامه:لا بتلبس هني بدل ماتقعد راكبه نازله..تعالوا معاي ترا..
ناضت غرفه..
ومشوا الزوز ورا نبيله..
بعد ماتباعدوا..
سدرة:نبي نشوف شقتها..
فردوس:تو وين نجو مروحين تشوفيها.
مطيرة:باينه فيها العرسه وجهها ناير..
أريج؛ايه صح..
سدرة:اني ماشفت شي ماحسيتهاش فرحانه بكل..
فردوس:اللطف خيرك سدرة مش لهالدرجه..
اريج:خويله كان تلقى تسكنهم معاها..
مطيره؛صدقتي ماني عارفه لما نعطوا طوبى كيف بدير..
سكتت سدرة ومعاش بتتكلم لما هزوا ع كلامها..وفي داخلها ماكانتش مرتاحه ع غرفه بكل...
ولتلهم نبيله وهي تقول:شن حالكم بعد ليلة امس..
☘وفي دارها..
طوبى:يعني امورك تمام..
غرفه وهي مبتسمه بفرح مصطنع:ايه..تمام التمام..
طوبى ابتسمت وقالت:الحمد لله..هي خل نبدوا بالاستشوار الاول..
وجبدت طوبى لغرفه شعرها..
بعدين ساعدتها في لبس القفطان الكبير..
بعدين بدتلها بالمكياج.
طريقه طوبى وهي تمكيج كانت حلوة..
وكأنها ترسم في لوحه..بإتقان تام..
بعد ماكملت مكياج..بدت في التسريحه..كان زي ماطلبت غرفه بالزبط..
وفي النهايه لبستها طقم ذهب...وبختلها عطر..
طوبى:شن رايك..
غرفه:شن بنقولك انتي فنانه يافرخه..
ضحكت طوبى وقالت؛ ان شاء الله بالصحه عليك...خل نلم الحاجات بعدين نطلعوا..
ولمت طوبى الحاجات وغرفه تشوفلها كانت تبي تشكيلها بس ماتقدرش شدت روحها بقوة وبينت ع قد ماتقدر انها عاديه..
طوبى:هي نطلعوا..
غرفه:هيا..
وسعدتها في لبس الكندره..بعدين طلعوا الزوز للصالون..
ولما بانت عليهم قعدوا يزغردوا ويقولوا في الشتاوات...
وبعد كملوا قعمزت في وسطهم..
نبيله:معليشي صبايا تساعدوني شويه..
فردوس:هي نوضوا..
ناضوا البنات ومشوا مع نبيله..
واللي يجيبوه في الضيافه تاخد منه غرفه وتاكل.
وعيون سدرة عليها..
قعدوا عندها لعند اذان المغرب ع قد ماشدت فيهم نبيله يقعدوا للعشي هما رفضوا..
وسقدتهم وروحوا بدون ماتلقى سدرة فرصه تشوف شقة اختها..
وغرفه ارتاحت حتى هي..
نبيله؛شويه نمشي نصلي ..
غرفه؛باهي..
مشت نبيله..
وغرفه قالت؛حتى اني نبي نصلي..بس خل نقعد شويه بالك يروح توا نبيه يشوفني بيه..تنهدت وقالت..لو كنت نعرف انك بتولي هكي والله ماخليتك لين غيرت من روحك...ياوخيتي يهبل حتى وهو يهزب ويكشخ..ضحكت وقالت..حي عليك ياغرفه حبيتيه بالرسمي..بيكو..وضحكت تاني..
سمعت باب الحوش انفتح رعشت مع بعضها..
هو قعد ينادي:بلبله..
لين خش عليها قالتله:تصلي..
هو قعد يمرر في نظره عليها بإعجاب شديد غير ظاهر الظاهر كان لامبالاة..
غير عيونه عنها وقال؛روحوا ماليك..
غرفه؛ايه..
وعيونها ع الكيسه اللي في يده.
قدم وحط الكيسه ع الطاوله وقعمز حط رجل ع رجل وقال:ماشيه صح ولا؟
هزت راسها وهي ساكته..
ع جية نبيله قالت بإبتسامه؛روحت..وين مشيت..وقعمزت..
هو قال:كنت في قهوة عيت شنيبه قعمزت هدرزت ع عمي لطفي والمهدي لين اذن المغرب مشينا صلينا المغرب بعدين طلعت خدت للسنيورة اللي تبيه وين جيتها بيه قالت مانبيش ماعنديش نيه بطني تعبت..
فتحت غرفه عيونها ع وسعهم بصدمه..
نبيله؛ممكن الحلو قنعها..
هو ناض وخدي الكيسه وقال:ناكله اني وخلاص..هي نوضي..
هي ناضت بالسيف ودموعها ع حافة عيونها..
عبد الرؤوف:تو بعدين نجي ناخد حاجتها..
نبيله بإبتسامه؛تمام..تصبحوا ع خير..
هما الزوز قالوا؛وانتي من اهله..قدامك كل خير..
مشي وهي وراه تعاند في قفطانها
ركبت بصعوبه الدروج وعثرت فيهم وهو ولا عبرها..
وصلوا الشقه.
فتح الباب وخش..
هي خشت وراه..
سكر الباب ومشي طول لدار النوم..
لحقاته وهي تقول؛نبي حوايج..
ماباش يرد عليها..
خش الدار وهي قعدت في الباب:نخش ناخد حوايج..
هو اشرلها بيده تخش..
خشت وهو يتأمل فيها..وعيونه تعبوا دموع..
خدت حوايج من الدولاب..
بعدين مشت طلعت..
وهو طول مشي سكر وراها الباب بالمفتاح..
هي تنهدت بألم..بعدين مشت لدارها..
مررت نظرها عليها..
دموعها نزلوا..وخشت وسكرت الباب..
🍀🍀🍀🍀🍀
استمر هالحال اسبوع كامل..
وغرفه عايشه في عذاب نفسي..والاهانات تنصب عليها ليل نهار..
سألوها شن صار في شهر العسل..
قالت ماصارش منه عبد الرؤوف جاته خدمه مفاجئه ماقدرش يخليها..
ماحد وقف عند الموضوع غير سدرة اللي كانت مصره ان اختها مش مرتاحه بس معاش فضفضت عنه لحد..
☘ومن جهة تانيه..
كانوا في عرسان عايشين جوهم ومش حارمين رواحهم من شي..
في اخر ليله ليهم في تونس..
كانوا دايرين في الشاليه اللي قاعدين فيه ليله خاصه...
طاوله رومانسيه..ورد وشموع وعشي..
هو كان لابس ومتأنق..
وهي كانت تجهز في نفسها..
الجالي:نجاة هيا عاد وينك..بنرقد..
"ترقد عينك هاني جايه"
الجالي:من بكري تقولي هاني جايه..
شويه وبانت عليه وهي تقول؛جيت جيت..
هو قعد يشوفلها بإبتسامة انبهار..
وهي كانت ماشيه للمنظومه دخلت فيها CD..
شغلاته...كانت فيه اغنيه ايطاليه..
شبحتله وقالت؛تعرف ترقص..
الجالي بإبتسامه؛جربيني وشوفي..
ضحكت ومشتله وهي تغني مع الاغنيه..
لين وصلت فيه وهي تغنيله..
وهو كمل معاها..
عيطت وقالت؛مستحيل تعرفها!
الجالي:ذوقي الاغاني هادي..
نجاة وهي تضحك بفرح؛ياربي مفروض بعتهولي مم زمان الراجل هدا ميته فيه..
هو ضحك بصوت عالي بعدين شد ايديه وقعد يرقص هو وياها...وهما يغنوا مع الاغنيه..
☘الجالي كانت عاجباته هلبه الحاله اللي هو عايشها لقي في نجاه كل شي يتمناه في المراة اللي يبي يرتبط بيها..راكبه ع جوه وتشبهه في هلبه حاجات..
بس ياهل ترى الحب محتاج تشابه الطرفين فيه..ام يحتاج يكون كل واحد فيهم مكمل للتاني..
اللي ناقص عند هدا يكمله هدا!؟
نجاة حست ان الجالي كمل فيها كل شي ناقص مالقتاش في طاهر اللي بدون بريق ولالمعان..ولاكان فيه الشي اللي يخليها مبهورة بيه ع الدوام...
الجالي خدي عقل وقلب نجاه...سحرها بالمرة وهي منصاعه ليه انصياع تام☘
🍀🍀🍀🍀🍀🍀
مقعمزين في الصالون مع بعض يشربوا في القهوة..
شويه هو قال..
عبد الرؤوف:بلبله..
نبيله:نعم..
عبد الرؤوف:من اليوم غدانا وعشانا عندك.
ابتسمت غرفه بفرح..
نبيله بفرحه؛يوم المنى عييت من القعده بروحي..
عبد الرؤوف:حلو..المهم ياستي بكري اني وغرفه هدرزنا في الموضوع هدا..وهي اللي اقترحت هالاقتراح..
غرفه كانت ترشف في القهوة وهي تفنص..
وهو كمل يقول بعد رفع سبابته فوق وقال:وحلفت...
شبحتله غرفه..
عبد الرؤوف:حلفت معاد تحطي فيها طنجرة ع نار..
غرفه صقعت مع بعضها من الصدمه..
نبيله؛لاعاد مش لهالدرجه البنت قاعده عروسه..
هو شبحلها وقال:هي قالت مش اني..ولا..قوليلها قولي كيف قعدتي تحلفي..قولي..
هي ابتسمت بخوف وقالت:ايه صح صح..شبحت لنبيله وقالت..خل نريحوك شويه..
نبيله:لاحبيبتي اني هكي مرتاحه...
ضحك عبد الرؤوف..
غرفه فهمت الضحكه وقالت:والله والله العظيم نشد عنك الكوجينه..
رفع حاجبه وقال:بتنحثي مرتي يانبيله!
نبيله بضحكه:خلاص اني يوم وهي يوم والله ماهي مغيره كلامي..
غرفه بإبتسامه:كلامك يمشي علينا كلنا..
عبد الرؤوف في نفسه"شيطانه":سمعتي مرتي شن قالت سمعتي..
نبيله بإبتسامه؛سلمها ياربي..باهي ع هكي اكيد بتبدي قرايه..
كيف جت بتجاوب سبقها وقال:تصدقي اليوم فاجئتني في الموضوع هدا قالت مانيش مكمله..
انصمتت غرفه..
ونبيله بإستغراب شديد؛كيف!؟ هدا كان شرطك الوحيد ياغرفه انك تكملي ماجستير..
حك لحيته وقال:حتى اني حاولت فيها لكن سكرت راسها..
نبيله:علاش ياغرفه!؟
شبحتله..
وهو يشوفلها بنظرات ظاهرها عادي بس هي قادرة تقرا اللي في داخلهم..
بلعت ريقها وشبحت لنبيله وقالت:هكي احسن..اصلا اني القدام مش حنقدر نكمل يعني تعرفي حيكون في صغار وهكي مش حنلهى بيها..
عبد الرؤوف؛هادي المراة اللي تعرف تفكر صح..هي نهايتها الحوش والصغار ماعندها مادير بالماجستير سادها البكالوريوس ولا يافله!؟
غرفة وهي مبتسمه بإرتباك وحابسه دموعها في عيونها:صح كلامك..
نبيله ابتسمت وقالت:باهي غرفه حبيبتي نبي نذوق قهوتك ممكن..
عبد الرؤوف:نوضي فيسع..
ناضت غرفه وقالت؛حاضر..
ومشت طول للكوجينه..
نبيله شبحتله..
هو ابتسم وقال:مطيعه ومؤدبه..
ابتسمت نبيله وقالت؛نسيت انها ماتعرف شي في المطبخ خل نمشي نوريها الحاجات وين..
وناضت مشت لحقت غرفه..
وهو قعد يلحق فيها بعيونه..
☘خشت نبيله ع غرفه لقتها دور وحايسه..
نبيله؛الدولاب اللي فوق راسك فيه البكارج..
غرفه مسحت دموعها وقالت:اها..
وفتحت الدولاب..
قربت منها نبيله وقالت:غرفه حبيبتي تاني مرة نسألك شن داير معاك مبروك..
هي نزلت القهوة وقالت؛كويس..
نبيله؛هو اللي خلاك تبطلي قرايه صح..قولي وماتخافيش اني نعرف نتصرف معاه..
تنهدت غرفه بعدين شبحت لنبيله بحزن فجأة تبدلت لنظره عاديه وهي تقول بنبره فرح؛لاوالله هو مادخلاش اني مانبيش..
نبيله شبحتلها شويه بعدين التفتت وشافت للباب..
لقت خوها واقف عليه وهو مربع ايديه ومبتسم.
ابتسمت بعدين رجعت شافت لغرفه؛كملي الباقي..
ومشت بتطلع هو وسعلها طلعت..
غرفه بعد ماكانت تشبحلها شبحتله هو..
لقاته يشوفلها بنظرة وعيد بعدين لف ومشي..
هي غيرت عيونها عن الباب وبدت دير في القهوة بدموع عيونها...
☘☘☘☘☘
وللشارع..
خشت سيارة الجالي بعد ماروح من مهمه الخدمه...او مش شهر العسل..
خش بالسيارة للقراج..
بعدين نزل ونزل شنطته ومشي خش للحوش..
مشي طول للصاله لقي امه مقعمزة بروحها تتفرج ع التلفزيون..
الجالي:امي..
هي بفرحه؛وليدي حمد لله ع سلامتك..
حط شنطته ومشالها طبس عليها وباس راسها وايديها وهو يقول:الله يسلمك..كيف حالك..
مغليه:الحمد لله ولدي انت شن حالك؟
الجالي:الحمد لله..بوي مهناش؟
مغليه؛بوك في زليطن من امس بايت في حوش عمك..
الجالي؛امم..مافي حد شكله؟
مغليه:المهدي ماشي مع ولاده يحضر مباراة ومرته واخده بنتها وزي العاده عند امها..وخوتك الولاد واحد في للقهوة والتاني مسافر في رحله.
الجالي:واني ياسمح بنركب ندوش ونرقد نوضيني لما تجوا تتعشوا..
مغليه؛حاضر ولدي..برا ارتاح برا..
ابتسم ومشي خدي شنطته وطلع من حداها..
ركب الدروج ووصل فوق وتوجه لداره..
اول ماخشلها جاته رساله..
طلع التليفون من الجاكيت وفتحها طول..
(وصلت حبيبي)
ابتسم وكتبلها..
(كيف خشيت داري شن جوك توا)
ردت عليه..
(استاحشتك)
ضحك وبعتلها..
(اني اكثر).
وحط التليفون ع الطاوله ومشي للدولاب فتحه وقعد يدور في حوايج..
☘☘☘☘☘
وخوه المهدي..
كيف روح من النادي وخلا ولاده مع صحابهم بيعطلوا في المرواح..
نزل من السيارة ومشي خش للمطحن طول..
ومقابله مطحن الجيران واقف فيه حسين ع العمال يشوف في القهوة..
ع طلعة سدرة من الحوش ماشيه للمطحن تشوفه ماتحسابش حسين فيه..
شافها المهدي طالعه..
طول طلع من المطحن وقدم كم خطوه وهو يشوفلها بلهفه وخوف..
هي وقفت ع المطحن وشافت حسين قالت:حسين انت هني.
حسين؛عاود ارحيها مرة تانيه..بعدين مشي طلع لأخته..سدرو قداش ليك مادرتيها.
سدرة:حسيت خلوقي ضايقه قلت نجي نشوفه شويه المدرسه خدتني منه بكل..
حسين؛خلاص ماعندك ماديري بيه سادك المدرسه ومسؤوليتها..
تنهدت وقعدت ساكته..
"هاه ياحشاني شن حالك"
شبح حسين للمهدي بإستغراب كان يحكي في التليفون بصوت عالي..
المهدي:والله الحمد لله انت شن حالك وشن صار فيك.........عادي ياراجل كسل الغده مش مرض خطير المهم خود العلاج صح وامشي عليه..كول الماكله اللي فيها الاوميغا 3..
سدرة تسمع وهي تشوف لحسين..
المهدي:الحوت المكسرات..الدجاج لحم البقر الفراوله...والحليب ومشتقاته كلهم.....ايه نظام غذائي كويس امشي عليه وتو تمشي امورك بإذن الله..
ولف ورجع للمطحن ع اساس قاعد يتكلم بالتليفون..
حسين؛المهدي مولي اكبر من بوك تصرفاته تصرفات شيابين..
شبحتله وقالت؛مافيش اخبار عن خوك ؟
حسين شبحلها وقال؛بعدين نحكيلك برا خشي توا..
سدرة هزت راسها وقالت:حاضر..
ومشت خشت للحوش وهي تتفكر في اللي داره المهدي ضحكت ببؤس..ودموعها في عيونها..
وهو يشوفلها من المطحن وقلبه يغلي من الخوف عليها...
~~~~~
سدرة بصدمه:غبارته السودا!
حسين:ليه لتوا قريب شهر..
سدرة؛خير بلاه هدا خير شن جاه مرة وحده! حي عليه كان تندري امه ياناري عليها ولاجدي..
حسين:هدا اللي نفكر فيه ليا مده مش عارف نقول ولانقعد ساكت.
سدرة:ماتقول شي انتي ارفعني لحوشه نتفاهم معاه..
حسين؛كيف بتتفاهمي معاه..
سدرة:نعرفوا كيف نخبروا العيله وفي نفس الوقت نديروله عرس نهار واحد ع الاقل قدام الناس..ناقصنا غير يقعدوا يحكوا بينا ويألفوا في القصص.
حسين:تمام امتى تبي تمشي؟
سدرة:الليله..
~~~~~~~~
يوسف:كان جايه تهزبي نقولك روحي ووفري ع روحك.
سدرة؛وشن بينفعك التهزيب خلاص شرك وجي في الحجر..انت توا لازم تشهر زواجك قدام الناس..
يوسف:وكيف بندير هكي قولي من اللي بيرضى..
سدرة؛يرضوا بش يدسوا العار اللي درتيه..
يوسف:سدرة ردي بالك من كلامك اني متزوج بشرع الله مادرتش حرام..
سدرة:شرع الله يبي اشهار ياافندي..
سكت وماعرفش شن يرد..
سدرة:اني تو نكلم جدي بس انت لما تجي وتطلب السماح شن ماسمعت بتسكت..
هوقال؛يوصلوا فيا اني زي مايبوا لكن ريما لا مش حنرضى..
سدرة:ماحد واصل فيها اصلا الغلط غلطك انت من البدايه..
وريمه واقفه ورا حيط الصالون تسمع فيهم وهي خايفه...
🍀وبلغت سدرة العيله بكل شي..
عبد المطلب مااهتمش قال حياته وحر فيها..
لكن علي الواعر عصب هلبه..وصفيه قريب هبلت..وحطت اللوم كله ع ريمه اللي بجيتها المفاجأه حرمتها تفرح بولدها زي الناس..
صفيه ببكي؛خسارة يااول فرحتي مانحساب كسرتي تجيني منك..
يوسف:شن درت يام كفرت! راني تزوجت ع سنة الله ورسوله..
علي؛الدين معاه عرف وانت تخطيته ربك قال وامر بالعرف..
معقوله هكي معقوله دير هكي ولا حسبت حساب عيلتك ولاسمعتك..
يوسف:زواجي شوه سمعتنا!
صفيه ببكي:الطريقه اللي خديت بيها هي اللي تشوه السمعه..
لطفي بضيق:خلاص يامرت خوي اللي صار صار المهم توا نلموا الموضوع قدام الناس..بعد اذنك يابوي فكرت نديروا يوم واحد عشي ويكون يوم الدخول وكان الله ويبقى الله..
علي هز راسه وهو يقول:خزي...خزي..
ومشي من حداهم خش وهو معصب..
صفيه:اللي بديروه ديروه لكن اني مانعرفهاش تخشلي حوش..سمعت!..
وخشت داخل حتى هي..
يوسف مرر نظره ع خوه حسين وعمه لطفي وقالت:كفرت بالمله ياناس بس يتعاملوا معاي هكي..!؟
لطفي:ليهم حق يزعلوا ماليكش حق تعترض..جهز نفسك اخر الشهر هدا...
وحسين يشوفله بأسف وهو مش راضي نهائي ع اللي قاعد يصير..
☘☘☘☘☘
يوم أخر..
في جامعة طرابلس قاطع ب..
كلية الاقتصاد..
اريج:تفضل هدا كرت المجمع تقدر تتصل وتستفسر..
:تمام لكن عندك لينا واسطه مع دكتورة الاسنان..
اريج ابتسمت وهي مستغربه.
ع جية نضال اللي كان يدور فيها كعادته كل يوم يبي يشوفها وبس..
لكن هالمرة شافها بشكل ماعجباش بكل..
مشي جيهتهم ووصل فيهم جبد الكرت من الولد وقاله:خير ياغالي..
فنصت اريج وهي مصدومه..
الطالب:شي استاذ سمعتني نحكي ع جرس العقل قلت بنحوله كلمتني ع المجمع اللي تخدم فيه.
التفت نضال شبحلها بحده وهي مازال مصدومه..
بعدين شبحله وقال:قتلي تبي تحول جرس العقل عندي بينسا في السيارة احسن شي للقلع تقلع الجرس من جذوره.
الطالب ضحك بآرتباك وقال:لاخلاص ماصارليش نستأذن..
ومشي هرب..
التفت نضال لأريج وقال:انتي غبيه ماتشفعيش معاش تتعاملي مع اللي يجي ياهبله..
اريج؛معناها معاش نتعامل معاك حتى انت..
نضال:تمام ياستي حتى اني معاش تتعاملي معاي المهم ردي بالك من روحك عييت واني نجري وراك من تركينه تركينه خوف ديري حاجه عبيطه وضيعي روحك..
اريج:ماقتلكش اجري وراي انت مشقي روحك..
ابتسم وقال؛صدقتي لكن مش بيدي..
ضيقت عيونها وقالت؛اللي في راسك انساه تشد نجمه من نجوم السمي ولاطوله...
ومشت عنه وخلاته..
وهو يشوفلها بإبتسامه وقال؛تو نشوفوا...
☘☘☘☘☘
خش لحوشه وهو شاد في يده ظرف جديد وهو يقول..
اياد؛الحكايه زادت عن حدها..
ع طلعة مهند من الحمام قاله:اهلا..مروح طايرتلك..
مدله الظرف وقال:من هالحال..
هو خدي الظرف وفتحه وقري الكلام اللي فيه ضحك وقال:هدا اللي مضايقك انت مفروض تفرح .
وخشله داخل..
لقاه مقعمز ع كرسي وحاط رجليه ع الطاوله وهو يقول:شن اللي يفرح في حاجه زي هادي لاقدر الله البنت اللي تحط في الرسايل يشدها حد مش بتصير مشكله ليها اول ماليهاش اخر..
مهند:صح مافكرتش فيها..
اياد:لازم نعرف من هي بش نحطلها حد...
مهند:في بالي حاجه خلي يوسا يراقب السيارة وهو كان شاف حاجه يخبرك..
اياد قعد يفكر شويه بعدين:تو نقوله..
☘☘☘☘☘
"إن شاء الله بصحه عليك"
:شكرا مدام فايزة..
طلعت الزبونه من مركز تجميل فايزة وهي راضيه تمام رضا..
بعد ماطلعت فايزة قال:خلاص يابنات شطبوا بنسكروا..
وقعدوا العاملات يضموا ويرتبوا في المركز لين كملوا كلهم وطلعوا روحوا..
وهي طلعت الاخيره..
سكرت المركز ومشت ركبت سيارتها وروحت لحوشها..
☘☘في الحوش..
خشت تشوف بناتها لقت مروة وتاله يكتبوا في الواجبات..
سلمت عليهم بعدين مشت لدار صفاء..
لقتها راقده ع الطاوله قالت؛ياروحي!..
ومشتلها بتنوضها شافت الكراسه متاعها..
عقدت حواجبها بإستغراب قربت منها وقعدت تشوف..
لقتها راسمه قلوب ع هيئة اسم اياد..
المراة حتى عقلها ماباش يفكر ان بنتها تقصد الدكتور قالت في بالها انه مراهق زيها ليه نفس الاسم.
~~~~~~~
فايزة بقلق:كيف بندير معاها قوليلي المشكله السنه هادي شهاده خايفتها تسقط ياسدرة.
سدرة:اسمعي خليك هاديه وتعاملي مع الموضوع بحكمه هدرزي معاها بهدوء واعرفي من يكون وقداش ليها تعرفه بعدين نتصرفوا مع بعض..
فايزة:كل اللي عرفته ان اسمه اياد مامخليه وين كاتبه اسمه..
سدرة هني عقلها جابلها كل موقف جمعها بصفاء كان فيه البنت تتعامل بكره واضح..
قالت في نفسها"مستحيل"
فايزة:سدرة خيرك تنحتي هكي.!؟ ماتخوفنيش..
بلعت سدرة ريقها وقالت؛لالاماتخافيش مافي شي يخوف نقولك حاجه انتي ماتتكلميش معاها..
اني تو نبعتلها طوبى اقربلها مني ومنك وتو تعرف كيف تكلمها..
فايزة ودموعها في عيونها:حاسه روحي هملت بناتي هلبه..بس مش بيدي ياسدرة غصب عني..
سدرة:ماتغششيش روحك حني معاك وبإذن الله مش حيصير الا كل خير..
فايزة من وسط قلبها:يارب...
~~~~~~~~~
طوبى بصدمه:متأكده سدرة!؟
سدرة؛مافيش غير هالتفسير..مسكينه فايزة مافكرتش فيها بكل..عندها الحق حاجه مستحيله في نظر اي حد..
طوبى:ياخوفي لو يكون وضع صفاء صعب وقتها مش حترضى تسمع من حد..
سدرة:انتي غدوة بعد تروحي من الجامعه بريلها طول..
تنهدت طوبى وقالت:حاضر..
☘☘☘☘☘☘
ويجي اليوم اللي بعده..
ومع نهاية الدوام المدرسي..
كان يوسا يخدم في الورشه ويراقب في سيارة اياد..
ع خشة صفاء ومعاها مروة للشارع..
صفاء:مروة اسبقيني للحوش وافتحيه..خودي المفتاح..
خدت مروة المفتاح ومشت تجري..
وهي قعدت تمرر في نظرها حواليها بعدين مشت لسيارة اياد..
يوسا لما شافها تفاجئ..
كانت تحط في الظرف في وسط السياره من الروشن..
فهاللحظه...
فتح اياد الباب وطلع وكان يبي يداهم صاحبة الرسائل..
اللي لما عرفها جاته صدمه مابعدها صدمه..
وهي قعدت تشوفله بنظرات فجعه وجسمها جمد تماما...
#خفايا
#طوبى
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
