#طوبى "أقحوان وفلة وياسمينه" #جمان_فريد #الجزء_الحادي_والثلاثين" المواجهه1" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ جي وقت حطان العشي.. والكوجينه كانت وكأنها خلية النحل طوبى:القعد اللي بعده اريج.. اريج مدتلها القعد طول.. وطوبى تسقي في البصله ع الفتات.. وتاخد بعدين الصونيه فايزة وتحط في اللحم.. وبعدين تحطها في السفره... طوبى:المشروب صفاء.. صفاء:واتي في الصفر طوبى... طوبى:كويس..هاه خلاص كملنا. فايزة؛ايه.. مشت خدت تليفونها ورنت ع يوسف.. ويوسف فهم الرنه وناض من المربوعه.. وحسين لحقه.. برا.. حسين؛خيرك طلعت؟ يوسف بضحكه:العشي واتي.. لفوا ع الجنان وجو للكوجينه.. يوسف؛طوبى.. "هي شويه يوسف" ابتسم حسين وقلبه يرفرف وسط ضلوعه.. طلعت اريج بسفرة ومدتها ليوسف.. خداها ومشي طول.. حسين بضحكه؛هي جيبولي حتى اني.. اريج بضحكه؛مفروض قاعد مقعمز زي الباشا.. حسين بإبتسامه؛اني عسكري مش باشا.. ابتسمت اريج . "اريج" حسين؛شن ماتبيش تمديلنا يارتيله.. اريج بضحكه؛قاعده من غير حجاب.. حسين بإبتسامه:اها... خشت اريج جابت سفره ومدتها.. هو خداها ومشي ومازالت في نفسه رغبه شديده انه يشوفها مرة تانيه.. بس هي مابتش تطلع بكل... بعد ماكملوا... طوبى:بري شويه وجايين.. فايزة:باهي سقدوا رواحكم.. ومشت خشت داخل... طوبى وهي تغلف في صواني؛اطلعي مروة افتحي الباب كان لقيتي يزن نادي عليه.. مروة :حاضر . ومشت طلعت تجري... وصلت في الباب فتحاته وقعدت تشوف برا.. ومحمد مع صحابه في القهوة.. سمع الباب انفتح شاف جيهته لقاها واقفه دور.. طلع من القهوة ومشي للمطحن وقف قدامه وقال:شن ديري برا خشي داخل.. مروة؛وين يزن.. محمد؛شن تبي فيه! مروة؛تبيه ابله طوبى.. محمد:خشي تو نكلمه.. مروة؛باهي.. خشت وردت الباب.. هو ضحك وقال؛مطيعه هلبه الفرخه.. بعدين لف وخش للحوش نادى ع يزن خوه... طلع يزن ومشي لحوش لطفي.. ومحمد قعد واقف يراقب... يزن وصل في الباب ودق عليه.. طلعت طوبى وهي لابسه حجاب وقالت؛شن جو يزونه.. يزن:الحمد لله شن جوك انتي.. طوبى:تمام الحمد لله..بعد اذنك يزونه وصل الصفره هادي لحوش يوسا... ☘يوسا عامل افريقي يخدم في ورشه مفتوحه من مده في شارع القهوة اجر دار جنب الورشه وقاعد فيها وماعنده حد يعوله زيه زي هالعمال هو متحمل كل مسؤولياته" خدي يزن السفرة وقال؛حاضر.. طوبى؛بعدين ولي هني.. يزن؛حاضر..ومشي.. وطوبى ردت الباب.. مروة؛طوبى.. طوبى:نعم.. مروة؛يوسا مش مسلم زينا شفته يومها لابسه سلسله صليب في رقبته.. طوبى بإبتسامه؛ايه مش مسلم مسيحي.. مروة؛باهي انتي علاش تساعدي فيه؟ طوبى؛ماهو حني المسلمين هكي نساعدوا اي حد يبي مساعده..زي المسكين يوسا مش ديما يحصل في ماكله حلوة ياكلها ومرات يقعد من غير عشي..حني لما نتفكروه بعشي ولاغدي قنين ربي يكتبلنا اجر.. مروة؛اها يعني انتي توا ربي كتبلك اجر.. طوبى؛يارب يامروة... شويه ودق يزن الباب.. خدت طوبى حافظه مسلفرة وفتحت الباب وقالت:تفضل يزونه ليك انت ومحمد.. يزن؛صحيتي..وخدي منها.. وهي سكرت الباب وقالت؛هي خشي بسرعه زمانهم ياكلوا علينا في الملح.. وضحكوا الزوز ومشوا خشوا داخل.. ☘قدام المطحن.. قعمز يزن ونادى خوه قعمز معاه.. فتحوا الحافظه وفاحت عليهم الروائح.. محمد؛الله..كان يتبنوني لين تروح امي بس.. يزن بضحكه خبيثه؛يبرة سخونه لحناي.. محمد؛كول يامتاع اليباري كول... وهما ياكلوا... خشت سيارة عمهم الجالي الشارع.. وهو خاطم من قدام دار يوسا.. شافه مقعمز برا يتعشى.. وقف ونزل المرش وقال؛صحه صحه.. يوسا:سلمك.. الجالي:مبحبحه اليوم يوسا.. يوسا؛توبا توبا.. ابتسم الجالي وقال؛يابختك.. يوسا؛تفضل... الجالي بإبتسامه؛صحتين..تصبح ع خير.. رفع يده يوسا وحياه... والجالي كمل طريقه لين وصل في الحوش.. درس قدام صغار خوه..لقاهم مغطسين روسهم في الحافظه وياكلوا.. الجالي؛شن تاكلوا انت وياه!؟ يزن رفع راسه وقال؛عشي بعتتاته ابله طوبى.. ضحك الجالي ونزل ومشالهم بسرعه وهو يقول؛خلولي.. خدي منهم الحافظه وبعدهم عن بعض وقعمز في نصهم وقال:تعالوا.. وهما لصقوا فيه وقعدوا ياكلوا.. محمد:عمي عندي ليك اقتراح.. الجالي:اللي هو.. محمد؛علاش ماتاخدش من حوش عمي لطفي.. الجالي:شن ناخد؟ محمد؛خبزة فرن..شن تاخد ياعمي..بنت من بناته.. ضحك وقال:اها..بش تستفيد من وراي حضرتك غدوات وعشاوات.. محمد هز راسه وهو يضحك.. الجالي:لاحبيبي اني كان جيت بنتزوج بنطلع من هني بكل بكل.. محمد:انت الخاسر ع فكره..اللي يطلع من داره يقل مقداره.. ضربه الجالي ع قفاه.. ومحمد تحسس رقبته وهو يضحك.. ويزن طايح في الماكله ومش مدورهم.. ☘☘☘☘☘☘ في الكوجينه.. مطيره؛السفر ممسوحات مسح عطيك الصحه بنية خوي.. طوبى:الله يسلمكم.. فايزة؛خلاص اطلعي سادك انتي اليوم.. طوبى؛خل نوتي الشاهي.. اريج؛اطلعي انتي اني تو نوتيه. طوبى بضحكه:مش حنقول لا ربي يعاونكم.. كلهم بأصوات متقطعه؛سلمك.. ومشت طوبى طلعت من حداهم وتوجهت للحمام بش تتوضا وتصلي العشاء.. ☘وفي الصاله.. سالمين؛لاوالله مانفكروا نروحوا تو قلنا نرجوا لين نشوفوا الوضع.. سدرة؛ايه صح عندكم حق.. سالمين تنهدت وقالت؛خسارة البلاد راحت..انتي لو تشوفي الدمار اللي صار في بنغازي من هالحرب.. صفيه:قالها ستندمون يوم لاينفع الندم.. سالمين؛ايه نقولها وماني خايفه الله يرحمه وان شاء الله ربي يسامحنا في حقه.. وسدرة قعدت تسمع وهي ساكته.. ~~~~~~ جبريل:لا والله معاناة وحده كيف هنى كيف غادي غير نحنا زدنا عليكم بالحرب.. لطفي بضيق؛والله حال البلاد يبكي الناس معاش ملحقه ع شي وازمة الدولار هادي ضيقتها ع كل مواطن تاجر مافي حد سلم منها.. جبريل:يفرج الله يفرج الله.. فجأة...هرب الضي... كلهم باصوات متقطعه قالوا؛ايااه..ايوه.. اما حسين قال بضحكه ساخره؛فبراير حلو سكر.. ☘☘☘☘☘ وبدت سيمفونيه المولدات تعزف في الشارع كله.. وفي من قعد بايت في الظلام... وشهر تسعه معروف بقوة الرطوبه يعني اللي ماعنداش مولد يولع مكيف ربي يصبره.. ☘لكن في حوش الواعر.. كان يخدملهم مولد كبير يولع المطحن وتلاته حياش مع بعض.. الساعه 2:00صباحا.. كانت طوبى في الكوجينه توتي في سفرة سحور للضيفه.. كان فيها اكل خفيف ومعلب مع عصير وشاهي.. وطلعت بيها للصاله.. سالمين بإبتسامه؛تعبناك يابيبا.. طوبى:شويه من اللي ديرولنا فيه وين نجوكم.. سالمين بإبتسامه؛نجك نجك.. وعمتها وصفيه يشبحولها بإبتسامه.. وبين عيون صفيه نظرات حسين ليها.. طوبى:تصبحوا ع خير.. هما ردوا عليها:قدامك كل خير.. ☘مشت طوبى للدار.. خشت لقت غرفه والاء غارقات بالنوم.. واريج لاهيه بتليفونها.. واميمه راقده حداها.. اما سدرة رقدت في دار المعيشه مع فردوس.. جت طوبى جنب اريج وقالت:خيرك حسيتك مش مزبوطه اليوم.. اريج بإبتسامه:شي تعبانه من الخدمه بس اليوم جو هلبه حالات... طوبى:ربي يعاونك..لكن كيف بديري توا بتبدا القرايه. اريج:لازم نعود روحي ونرتب وقتي.. طوبى قعدت تشبحلها بإبتسامه..وهي تفكر فيها كيف تحاول تشيل الحمل مع امها وتوفر كل شي يبوه.. خلتها تفكر براحتها مابتش تشوش عليها وقالت:كويس..بلا خلاص اني شحني تم..تصبحي ع خير.. اريج؛وانتي من اهله.. رقدت الطوبى وعطتها بالظهر.. وهي رجعت خشت ع الآله الحاسبه وقعدت تحسب في المصاريف... مصاريف قرايتها..مصاريف قراية خوها ومتطلباته.. مصاريف آلاء اللي ماتمش.. مايلامش الحال..مع الغلاء والوضع المعيشي الصعب اللي عايشينه الليبين... حست روحها مخنوقه وتبي تاخد نفس.. ناضت ومشت طلعت من الدار... الحوش كله سكت وقتها..الضيفه حطت راسها ورقدت حتى هي.. مشت للصاله لقتها فاضيه عرفتهم مشوا رقدوا في دار المعيشه.. قعمزت في الصاله.. وبدت تبكي بصمت بش تفرج علي روحها شويه.. تبكي وتتفكر في بوها.. وتذكر كيف كان يعاني زمان ويقطع في روحه بش مايخليهم يحتاجوا شي وماكانش يرضى يخش عليهم قرش من اي حد وهدا اللي ماشيه بيه امها توا..وكأنها عطاته عهد وتبي تحافظ عليه.. اريج بهمس وصوت يرجف من البكي؛كان نعرف وينك يابابا..كان نعرف بس انت من اهل الدنيا ولاالا..غصه يابابا غصه..حاطه يدها ع رقبتها وهي تقول..مش قادره نستطعم شي فالدنيا من بعدك..نضحك ونلعب ونبصر ع خاطر امي اللي من بعدك ولت ميته وهي عايشه.. وحطت راحتي ايديها ع عيونها وقعدت تبكي بصمت.. بكت لين ارتاحت بعض شي..وخداها النوم.. رقدت في الصاله ساعتين..بعدين فاقت فجأة ع آذان الفجر.. ناضت..ومشت بتتوضا وتصلي.. وناضت معاها طوبى اللي قعدت دور فيها مالقتهاش لين شافتها طالعه من الحمام.. ابتسمت وقالت:صباح الفل.. اريج بضحكه:صباح الخيرات والليرات.. مشت طوبى للحمام.. وهي مشت خدت الملايه من الدار..وتوجهت للصاله وبدت تصلي... وفي كل سجده من صلاتها كانت طول.. كانت تدعي وتفضفض وطلع كل شي في داخلها.. وطوبى لاحظت هالشي وين خشت للصاله وشافتها كيف تصلي.. ☘☘☘☘ وناضوا بعدين اميمه وسدرة صلوا الفجر ونوضوا الباقي بس مع الاسف مافي حد ناض كلهم النوم سيطر عليهم.. شويه وولوا رقدوا طوبى وسدرة.. وقعدوا اميمه واريج لأن كل وحده فيهم وراها خدمه وقرايه بكري.. وهما يفطروا.. اميمه؛تحسي ان في عواقب قويه..مواقف العيلتين السياسيه امه وامي اللي قاعدين متقطعين لتوا..والاهم من هدا كله جدي..وكأنه عنده هاجس من حوش شنيبه مايبيش يعطيهم.. اريج:هو جدو عنده علم بعمر؟ اميمه؛طبعا لما بعت ماليه وخطبوني اني ماكنتش نعرف موقفه وقتها لكن بعدين عرفته قال مانعطوش عيت شنيبه.. مطت اريج شواربها لداخل بأسف بعدين قالت؛لاع هكي القصه معقده.. تنهدت اميمه وقالت؛كله واقف ع عمر..توا يبان كان يحبني حق.. اريج بضحكه؛هدا كله مابانش! اميمه:الاختبارات القويه هي اللي تبين يااريج وعمر لتوا ماانحطش في اختبار قوي.. اريج؛ربي يكون في عونه ع عيت الواعر .. ضحكت اميمه ضحكه خفيفه.. شويه ناضت اريج وقالت:خلاص وقت عليا يدوب نلحق نوتي روحي.. اميمه ؛حتى اني شويه ولحقاتك.. ☘جهزت اريج نفسها..وقبل لتطلع مشت لدار المعيشه شافت امها راقده بالنوم من التعب.. خشت بهدوء..طبست عليها وباست خدها بعدين مسحاته.. فتحت فردوس عيونها وشبحتها وهي شبه راقده.. اريج بصوت منخفض:طالعه يام.. فردوس بصوت ناعس؛ربي يفتح عليك..بعدين غمضت عيونها.. ابتسمت وناضت ومشت طلعت من حداهم.. وتوجهت لسيارتها ركبتها..وشغلتها.. بعدين نزلت فتحت الباب.. في نفس الوقت اللي طلع فيه نضال من حوشهم بسيارته. لما شافها ضحك.. وقال:ياصباح العزايز الحرف.. شغل اغنيه وعلا الصوت.. هي سمعتها وشافت لسيارته وقالت:اصبحنا واصبح الملك لله.. ركبت سيارتها وطلعت من الحوش.. بعدين نزلت وولت سكرت الباب.. وهو يشوفلها ويغني مع الاغنيه بالصوت غيظ فيها.. وهي تتجاهل فيه.. ركبت السيارة وتحركت.. وهو تحرك وقال:غير نفضى تو نلهى بيك ياشمطاء.. ☘☘☘☘☘ الساعه 10:00صباحا في دار عمر.. نسرين:انت لو تضمن اميمه كله يولي ساهل بعدين.. عمر وهو عاقد حواجبه بضيق:مفروض من البدايه خبرتيني بكل شي يانسرين بش عرفت كيف نتصرف.. نسرين؛ونلخبطك بش ضيع عليك فرصه عمرك. عمر:وفرصة عمري هادي نستغل فيها ع خاطر مني قوليلي!؟. نسرين؛هدي شويه هدي وحاول تحكي مع اميمه وتفاهم انت وياها لما تبدوا متفاهمين صدقني مافي حد يقدر يوقف في وجوهكم.. تنهد بعصبيه وقعد ساكت وهو يفكر في كلام اخته.. ☘☘☘☘☘ طالعه برا تقطف في الفل بش بتزين بيه سفرة فطور النساوين.. وهو كان جاي للكوجينه بس يكلمها.. والصدفه تخليه يشوفها في احلى مكان يشبهها.. كانت لابسه قفطان اخضر زيني فيها ورد ابيض.. وحاطه وشاح ابيض ع راسها.. لفت وجت بتخش شافاته كيف واقف يشبحلها.. خافت وتوترت.. وهو طول قدملها وقال؛صباح الخير ياهرابه.. طوبى:من شني بنهرب.. حسين بضحكه:نبصر عليك..شن جوك.. طوبى؛تمام..تبي حاجه.. هو استغرب وقال؛خيرك طوبى مضايقك في حاجه داير شي مزعلك مش عارف كيف حاسك زي اللي واخده مني موقف ان شاء الله مايكونش سياسي بس! طوبى وهي تحاول تبان عاديه؛سياسي شني!؟..اني اصلا مانحبهاش ولانحب نحكي فيها..وبعدين اني معاك عاديه زي مامع يوسف بالزبط ممكن مع السنين في حاجات تغيرت مش كل شي يقعد زي قبل.. هو قعد يشبحلها بتركيز.. وهي زادت توترت وقالت؛تبي حاجه!؟ حسين وع وجهه بدن ملامح الزعل:لاشكرا..خشي. ولف ومشي وهو معصب ومضايق.. وهي خشت طول للسفره وقعدت تزين فيها بالورد وهي مضايقه ع الآخر ودموعها في عيونها..بعدين رفعتها ومشت بيها للصاله... ☘☘☘☘☘ الساعه 5:00عصرا.. في دار بنات الواعر.. غرفه؛مادام الشراقه مروحين توا شن رايك مع السته نطلعوا للسوق.. آلاء؛ياريت..بالمرة ترفعيني نسجل في الكورس. غرفه:ok.. وبرا من الدار.. فم باب الحوش تحديدا.. سدرة؛والله ياريتكم قعدتوا حتى يوم زياده.. سالمين:نتمنى يامينه لكن والله مانقدروا مانبوا نطولوا هنى.. مطيره:والله كان البلاد متهنيه رانا ماطلقناك الابعد عشرة ايام.. سالمين:ربي يهنينا القدام ان شاء الله ونجوكم وتجونا.. كلهم قالوا؛ان شاء الله... وودعوها كلهم وسقدوها لفم الباب.. مشت ركبت في سيارة يوسف من الخلف وراجلها من القدام واقف عليه لطفي.. لطفي:توصلوا بالسلامه ان شاء الله.. جبريل:ان شاء الله..هي توكل يايوسف.. يوسف؛هي...وتحرك.. وجبريل قال:السلام عليكم.. لطفي؛وعليكم السلام.. وقعد مع السيارة بعيونه لين اختفت..بعدين تنهد ومشي للمطحن.. ☘تقاعد لطفي من خدمته في شركة الكهرباء وقعد يخدم في المطحن بس بعد ماسدرت فتحت مشروع مدرسه خاصه هي تولت ادارتها ليها عامين للآن...☘ خش لطفي للمطحن.. ع خشة سيارة فارهه لشارع القهوة... صاحبها درس مباشرة قدام حوش لطفي... وليد؛ايوه خالتي اني قدام الباب...تمام تمام.. سكر وقال؛هي انزل عزو.. نزل معتز من السيارة ومعاه شنطته..ونزل معاه وليد.. وقفوا في الباب ووليد دق عليه.. انفتح الباب واللي فتحه... آلاء؛عزو واخيرا ياافندي.. وليد قعد يشبحلها بإبتسامه وهو عاقد حواجبه.. معتز؛خالتي طوبى قاعده.. الاء؛ايه برالها جري.. معتز؛باي وليد.. وليد وهو يأشر بيده؛باي.. خش معتز يجري.. والاء سكرت الباب في وجه وليد.. غمض عيونه بشده وقعد يضحك بعدين فتحهم وقال؛مختشه.. ركب السيارة وقعد يتصل بيها ويعاود وهي تفصل لين سكرت التليفون بكل.. تنهد وليد وقال؛شن يرضيك ياهمي..نستاهل اني اللي نربش ع روحي.. وشغل السيارة وتحرك.. ☘ع طلعة حسين بسيارته من الحوش كان ناوي يدهور في البلاد ويشوف شن صاير فيها.. وطبعا طلع متخفي لدواعي امنيه... وهو يطلع شارع القهوة من هني... يدرسوا مجموعه سيارات تابعه لكتيبة ما في بداية شارع القهوة.. في سيارة واحد من قادتها.. "هاه عبروف" عبد الرؤوف وهو يشبح يمينه للشارع؛خشيت شارع القهوة توا...بنقعمز نهدرز عليه شويه في حوشه خير..الراجل متوصي عليه هلبه.. "مش مشكله المهم ماتطلعوش من غادي الا وانتم واخدين عنه انفور ميشن كامل.." عبد الرؤوف؛مادور شي..وسكر.. وحرك سيارته وخش لشارع القهوة ووراه مجموعة سيارات دبل قابينه.. درس قدام حوش عبد المطلب مباشرة.. نزلوا جماعته قبل.. وهونزل بعدهم ومشي لباب الحوش وعيونه يدوروا ع الشارع بكل شي فيه.. قهاويه محلاته حياشه.. بعدين دق ع باب حوش الواعر.. "مني" عبدالرؤوف:السلام عليكم ياحاجه شن حالك.. "الحمد لله..من تكون انت" عبد الرؤوف؛اني صاحب حسين جاي نشوفه.. "والله ياولدي حسين توا توا طلع من الحوش بالسيارة. عبدالرؤوف رفع حاجبه وقال:اها تمام تمام..باهي تو نجيه بعدين... ومشي من حدا جماعته وقعد يمشي ويشوف في شارع القهوة.. وقف حدا مطحن الجنه وهو يشوف فيه.. ع طلعة لطفي منه جاه وهو يقول:السلام عليكم.. عبد الرؤوف:وعليكم السلام. لطفي:انت جيت لحوش الواعر.. عبد الرؤوف:علاش تسأل؟ لطفي:حوش الوالد.. رفع عبد الرؤوف حواجبه وقال:اها..معناها انت ياإنك والد حسين ولاعمه.. لطفي:شن عندكم معاه حسين.. ابتسم عبد الرؤوف وقال:كل خير ان شاء الله..تفضل معاي نعزمك ع قهوة.. لطفي:اني اللي نعزمك.. عبدالرؤوف:تفضل يكون مكان بعيد..ياريت بالله.. لطفي شبحله شويه بعدين قال:لحظه بس.. ولى للمطحن.. وهو واقف وحاط ايديه ورا ظهره ويشبحله بإبتسامه وهو عاقد حواجبه.. لحظات وطلع لطفي.. اشر بيده عبد الرؤوف للمقهى وهو يقول:تفضل ياحاج.. مشي لطفي بإتجاه مقهى عيت شنيبه.. نضال وهما جايين استغرب .. لما وصلوا فيهم قعمز عبد الرؤوف لطفي ع طاوله وقال:لحظه ياحاج.. ومشي بش يطلب من المطحن نفسه نوع القهوة.. نضال؛كلهم يشربوا فيها زي بعض.. عبد الرؤوف:المهم حاجه في قهوة بش يعدلوا دماغاتهم.. نضال"هادم دماغاتهم تتكيف بحاجات تانيه مش قهوة..":حاضر استاذي لحظات ويوصلكم طلبكم.. عبد الرؤوف؛تمام يعطيك الصحه.. ولف بيمشي للمقهى... بس وقفوه عيونه وين شافوا لحوش الواعر اللي انفتحوا بيبانه.. اللي كانت تفتح في الباب مش غريبه عليه.. حاس روحها شايفها قبل... طلعت بسيارتها ونزلت وسكرت الباب.. وين رجعت بتركب السيارة شبحت بنظرة عابره اتجاه المطحن.. جو عيونها في عيونه وياريتهم ماجو.. ونبشوا ع جرح كان مدفون في قعر القلب.... جرح ليه سنين يحاول ينسى المه وقاعد يتعود ع وجوده.. جرح كرامه كبرياء..وقلب حب بصدق من العمق للشغاف.. ومالقاش مقابل غير الخيانه والغدر... غيرت عيونها عنه...ماعرفتاش.. اوممكن نساته بكل ومعاش تذكر فيه وهدا اللي كان فعلا.. وهدا اللي حسه...وحرك مشاعر حقد ليه سنين راكده وتوا بس تحركت ورجعت شوفتها احياته من جديد.. تحركت بسيارتها من قدام عيونه وهي تهدرز مع بنت اختها وتضحك معاها.. عايشه حياتها عادي جدا..ماخلفش فيها شي اللي داراته.. ماتعاقبتش ع اللي داراته.. وهدا اللي زاد حرق قلبه.. فاق من صدمته...والتفت شبح لوين مامقعمز لطفي.. لقاه يشبحله بنظرات استغراب.. هو طول غير ملامح الصدمه متاعه لملامح ابتسامه وقدم للقهوة وخشلها وقعمز ع نفس الطاوله وقال.. عبد الرؤوف بإبتسامه؛في زوز مطاحن قهوة مقابلات بعض هني.. لطفي وهو يشبحله بشك:هذا علاش سموه شارع القهوة.. عبد الرؤوف؛اها..صراحه اني اول مرة نسمع بيه وهادي المرة الاولى اللي نخشله فيها عجبني هلبه..وغير هكي..حط ع صدره وقال..زي اللي حسيت براحه هكي ماعرفتش كيف.. لطفي ابتسم ابتسامه خفيفه وقال؛كل من يخش شارعنا يقول نفس الكلام.. هز عبد الرؤوف راسه وهو مبتسم...ومن داخل كان صاير داخله ماأشبه بثورة بركان عظيم...حممه قاعده تحرق فيه حرق من داخل... 🍃ايه..هو نفسه..مبروك..اللي قبل سنين تعرف ع غرفه وحبها بصدق وهي طلعت تتسلى بيه..الآذى اللي خلفاته غرفه في نفسه أثر فيه هلبه.. خلاه ياخد هلبه قرارات ف حياته عمره مايتوقع انه ياخدها.. تفارق هو والماكله الاقليل مايقوت بيه نفس..كان مصر اصرار كبير ع انه ينقص وزنه اللي وقف عائق بينه وبين هلبه احلام يبي يحققها..بل وخلاه محط سخريه من الجميع.. ومش هكي بس...كان يبي يكون شخص تاني بكل معنى الكلمه..كان يبي يثبت لنفسه قبل أي حد انه يقدر يدير كل شي غيره مستبعده عنه استبعاد تام... في الثورة انضم للقتال ضد النظام....وع الجبهه لمسوا فيه روح القياده...لهدا انحط قائد لوحده من الكتائب... سنة 2014 شارك في حرب المطار وتعرض لإصابه لكن ماكانتش خطيره وطلع منها سالم..بس اللي صار انعكس ع امه سلبا وكان سبب في تعبها ووفاتها..اثر فيه وفاة امه هلبه وخلا اخته تتوسله انه يسيب اللي هو فيه..بس هو وعدها انه معاش يخش معارك لو صارت مرة تانيه ويقعد يمارس مهامه كقائد..اما الجزء العاطفي في حياته اهمله تماما...مايبيش حتى يفكر فيه بش مايذكرهاش... وتوا القدر جمعه بيها مرة تانيه...صدفه مرتبه من فوق هو مالهاش بيها أي دخل...وهاللقاء الغير متوقع صحى فيه مشاعر حقد دفين..ثار قديم وحس انه لازم ياخده☘ ☘☘☘☘☘ في السوق.. وهما يدوروا في واحد من المحلات.. آلاء:اني خلاص معاش نبيه معاش يعجب فيا.. غرفه؛كذابه عيونك يقولوا غير هكي.. وقفت آلاء وقالت؛علاش شن يقولوا!؟ بالله فكيني من الوهم مافيش لاحب ولاشي..اللي تشبحي فيه فعيوني قهرة بس.. غرفه عقدت حواجبها وقالت بإستغراب:قهرة! آلاء:ايه قهرة من هالأسعار شن هدا اللي عندي مايشري شي.. غرفه؛المحل هدا اسعاره مبالغ فيها..خل نشوفوا محلات BK80 قالوا اسعارهم حلوه وبضاعتهم احلى.. الاء بضحكه؛BK80! راهو يطلع معرض سيارات.. غرفه ضحكت وقالت؛حتى اني ضحكني الاسم بس في نفس الوقت حسيته مميز.. آلاء:تمام خل نمشوا نشوفوه.. غرفه؛هي تعالي.. ومشوا الزوز طلعوا من المحل... ☘☘☘☘☘ الساعه 7:30مساءا.. مازالوا عبد الرؤوف وجماعته متمركزين في شارع القهوة يراجو في حسين.. وعبد الرؤوف في قهوة حوش شنيبه بعد ماخلاه لطفي ومشي يشوف في المطحن..كل مرة يطلب حاجه شكله ويطلب لجماعته معاه منها... لحظات... وتخش سيارة حسين لشارع القهوة... وهو خاش شاف الجماعه متمركزين قريب من الحوش.. ابتسم تهكما... وصل قدام حوش عمه..درس ونزل... وعمه شافه طلع من المطحن ومشاله طول.. وعيون عبد الرؤوف وهو يشرب في المكياطه عليهم... فهالأثناء.. خشت سيارة غرفه للشارع... غرفه؛جماعة الكتيبه هادم قاعدين لتوا.. آلاء:انتي شفتي الراس متاعهم..حاجه واو.. غرفه:تؤ ماركزتش..وين كان؟ آلاء:في قهوة نضال.. غرفع؛اها..مالاحظتش... درست السيارة حدا المطحن وقالت؛هي انزلي بعدين ندخلها.. الاء؛نزل الحاجات.. غرفه:ايه نزليهم.. ونزلوا الزوز من السيارة.. هني حط عبد الرؤوف طاسه المكياطه ع الطاوله وقعد مركز معاها.. شاف تنزل في كياس من السيارة.. ركز ع العلامه متاعهم..عقد حواجبه وهو متفاجئ... هني وقف ع حيله.. ومشي طلع من القهوة ومشي بإتجاههم..وعيونه يسرقولها في النظر.. وصل في لطفي وحسين وقال بصوت عالي ملفت للإنتباه شويه؛السلام عليكم ياطيب.. هي سمعت الصوت طول التفتت.. وشبحتله... شافت واحد..طول بعرض...كارزيما طاغيه..ووسامه شديده..واسلوب جذاب في طريقه الكلام... واللبس اللي لابسه زايده جاذبيه..ع السلاح المحاوط ذراعاته الزوز.. آلاء؛خالتي غرفه.. هو سمع الاسم وشاف جيهتهم.. التفت عليهم حسين؛خشي الحوش انتي وياها.. غرفه وآلاء تخزرطوا وقالوا؛حاضر. مشوا الزوز للحوش.. فتحت غرفه الباب وخشوا الزوز.. سكرت الباب وقالت:حي عليه شن هدا !؟ والله ماركزت عليه.. آلاء؛اول مرة نشوف ميليشاوي منظره عليه القيمه.. غرفه بضحكه؛صدقتي.. ☘برا.. عبد الرؤوف؛تفضل معاي ياطيب للقهوة اللي غادي نهدرزوا شويه..هدرزة عاديه بس.. حسين رفع حاجبه بكبر وقال:تمام.. "بالله عليكم ماترفعوه ياولدي ماصدقت روحلي" حسين بعصبيه؛يام اسكتي وخشي داخل مش يالاك.. عبد الرؤوف حط يده ع ذراع حسين وقال؛بالشويه ياراجل مش هكي امك هادي..علا صوته وقال..مادوري شي ياخالتي مادوري شي هدرزة بس مش اكثر من هكي..هي تفضل ياخوي.. حسين مشي قدامه للقهوة.. وهو مشي وراه ويشوفله.. تفكر كلام غرفه عنه..فعلا شخصيته شخصية ضابط في الجيش.. مشي معاهم لطفي.. وخشوا التلاته للقهوة.. ونضال يشوفلهم وهو يقول؛ياما جايه من وجع راس حسين... ☘وهدرز عبد الرؤوف ع حسين وسأله كم سؤال وهو كان يجاوب بتكبر مستفز.. وعبدالرؤوف كان يكبر معاه في عقله ويساير فيه وخلاص.. وكان ليه هدف من وراه تعامله بالحسنى مع حسين... عبد الرؤوف؛تمام..وقف وقال..سامحونا اللي خدينا من وقتكم..وسامحونا ع الدوشه اللي درنهالكم في الشارع.. لطفي؛على شني...هدا واجبكم في النهايه.. ابتسم عبد الرؤوف وقال؛تسلم بارك الله فيك..هي السلام عليكم.. ومشي طلع من المقهى بإتجاه السيارة متاعه.. ركبها.. وجماعته ركبوا سياراتهم.. هو قبل ليتحرك شبح لحوش لطفي وهويفكر.. بعدين غير عيونه القدام وتحرك.. وتحركوا وراه جماعته... ☘وهو يسوق دار اتصال.. عبد الرؤوف؛نبيك تجيبلي معلومات تامه عن عيله لطفي الواعر عنده مطحن قهوة ويسكن في ******* تحديدا شارع القهوة....الليله يكونوا عندي..وسكر وحط التليفون قدامه.. ☘☘☘☘☘ الساعه 1:30 بعد منتصف الليل.. في احدي المقرات... :زوجته متوفيه من 99..عند ولد واربعه بنات.. الكبير مختار مواليد74 في بينه وبين ماليه مشاكل وليه 20سنه برا البلاد وقالوا محبوس .. اللي بعده بنت اسمها فردوس مواليد 77متزوجه عندها زوز بنات وولد..راجلها مفقود من 2011.. بعدها سدرة مواليد 79هادي كانت مدرسه في مدرسه عامه بعدين فتحت مدرسه خاصه وهي اللي ماسكتها مش متزوجه لكن كانت فاتحتها مقريه ع واحد من ولاد الفاندي.. عبد الرؤوف؛ماتقولش خو جلال ومهيمن.. ؛ايوه الكبير اللي توفى بحادث سيارة في 2009.. عبد الرؤوف؛ايه ايه..كمل.. :تجي بعدها غرفه مواليد 90متخرجه من كلية العلوم وتوا تقرا دراسات عليا. غمض عيونه وقال:لحظه لحظه لحظه..فتح عيونه وقال..شن اسمها.. :غرفه... سكت عبد الرؤوف وهو يشوف في الفراغ بنظرات كلها غضب يعني ضحكت عليه حتى في اسمها.. :نكمل.. اشرله بيده يطلع.. هو هز راسه ومشي طلع من حداه... وخلا عبد الرؤوف او مبروك يغلي من الغضب..لدرجه انه فش غله في اللوحه الموجود عليها اسمه فوق المكتب خداها.. وكسرها بين ايديه...
#المواجهه #طوبى
....يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
