(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الحادي_والخمسين"اهرجو يناير4" 《معظم أحداث هذه الرواية حقيقيه》 لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ فتح الباب وخش للجناح وهي خشت بعده وسكرت الباب.. التفتت وقعدت واقفه في الباب وهي تشوفله.. وهو قعد يلم في حاجاته في الشنطه وقال:بعد ماتروحي من حوش عمك نروحوا طول غير ماطوليش غادي.. هي جاته وقالت:خيرك جالي جوك اليوم مش عاجبني.. شبحلها وقال:بالعكس عادي جدا..مانبيكش تحطي الكلام اللي سمعتيه لوطا في راسك تمام؟ طوبى:هو اكيد مش حنحطه في راسي بس بنعلق ع كلمة وحده لما قلت البنادم اللي يبان كويس اكثر من اللازم مش صافي..انت فكرتك هادي معممها ع كل الناس الكويسه حتلقى روحك تقصد حد قريب منك هلبه.. هو فهم تلميحها طول..يعني ممكن الكلام ينطبق عليه حتى هو..بس رده عليها صدمها.. ضحك وقال:اها يعني انتي حسيتي الكلام عليك علاش فكرتي هكي يعني انتي هكي حق؟ طوبى قعدت تشبحله وهي مصدومه بعدين قالت بربكه:لامش هدا قصدي..بشي من الانفعال قالت..مانشوفش في روحي كويسه زياده عن اللزوم اني عاديه جدا.. الجالي:مالا مني تقصدي.. قعدت تشبحله للحظات وهو يشوفلها بنظرات ثقة مصطنعه بس من داخل كان مرتبك للغايه.. هي هزت راسها وقالت؛خلاص انسى موضوع مايستاهلش نتناقشوا فيه من اصله.. الجالي:احسن.. ومشي لدولابه بيطلع البالطو متاعه.. وهي شافتله شويه بعدين قالت:ماشيه.. هو هز راسه بدون مايعلق.. وهي لفت ومشت فتحت الباب وطلعت من الدار وسكرتها وراها.. بعد ماطلعت لوح البالطو متاعه ع الكرسي.. ومشي للطاوله خدي تليفونه وحط ع سجل المكالمات.. وقف عند رقم "احمد حميدا".. قعد يفكر للحظات..بعد قرر يتصل..في الاخير تراجع.. طلع من السجل وخدي البالطو ومشي طلع من الدار.. 🍃ولوطا.. اميمه بعد ماجابت العشي محمد شنيبه طلعت بسرعه من الصاله ومعاش ولت . عائشه استغلت انشغال العيله بالهدرزة عن اللي صار لراجل خديجه.. مشت طلعت من حداهم.. ☘خشت للكوجينه مالقتهاش.. لكن وين شافت للباب الخارجي لقاته مردود.. عرفتها قاعده برا.. مشت طلعت للجنان وردت الباب . وقعدت دور عليها.. سمعت صوت بكي..قعدت تبع فيه لين لقتها مقعمزة ورا الحوش وتبكي.. عائشه:اميمه!؟ اميمه وقفت بكي طول ومسحت دموعها.. جتها قعمزت جنبها وقالت:من اولها هكي يااميمه؟ اميمه قعدت تشبحلها بحزن ومش قادره تتكلم.. عائشه:اللي قاعدة تمري بيه مريت بيه حتى اني صدقيني كله يهون ويعدي مادام راجلك يحبك ياأميمه.. اميمه بألم:حب شني ياعيشه اما حب هدا..اني مش شايفاته الحب من عمر بكل وحتى الاحترام مش محصلاته.. تصدقي ياعيشه..اني نادمه.. عائشه:راك سكرتي شهرين بس! اميمه:وخلاني نندم فيهم اشد الندم...تبي الحق برغم اني نحبه بس ماعنديش ثقه فيه..بس الحب غلب كل شي وخلاني نوافق نتزوجه ونقول اللي داره ع خاطري مش شويه..بس توا قعدت نقول لروحي علاش هو شن دار ع خاطرك يااميمه..طلع قري برا وجاب احسن الشهادات وولى عنده اسم ومكانه في مجاله ماهو كله ليه هو في النهايه اني شن حصلت من هدا كله شي ولاشي.. عائشه:ماتستعجليش اميمه في الحكم عليه راهو اول سنه صعبه هلبه حتى ع اللي يتزوجوا عن حب...عليك بالصبر وحسن التصرف وحاولي تخلي راجلك في صفك ماتعطيش لحد فرصه يخليه يجي ضدك ياأميمه.. اميمه وهي نمسح في دموعها قالت:اني نفسيتي تعبانه ومش متحمله شي اللي صار مش شويه ياعائشه. عائشه:عندك حق..استعيني بالله وادعي في سجودك واقري قرآن ديما.. اميمه:هدا اللي قاعده ندير فيه برغم اني وضعي قاعد يتآزم بزياده بس موكله امري لله.. عائشه:ونعم الوكيل.. "اميمه" اميمه:طوبى تنادي.. ناضت وعائشه ناضت معاها ومشوا جهة باب الكوجينه.. طوبى هي واقفه قدامه لاحظت ان اميمه كانت تبكي بس مابتش تسألها:تمشي اميمه.. اميمه:خل نقول لعمر.. طوبى هزت راسها.. مشت اميمه خشت داخل وطوبى معاها بعيونها.. عائشه؛شن حال سدرة طوبى؟. شبحتلها وقالت؛زي قبل .. عائشه:خلوها ديما ترقي روحها. طوبى بقلق:شن فيها بالزبط عيشه اني معاش فهمت شي وخايفه هلبه.. عائشه:نحس فيها عين قويه جتها في العرس لانها من بعده مرضت.. طوبى:عمتي قالتلي نفس الشي.. عائشه:العين مش ساهله ياما دير تحافظ ع الرقيه والأذكار وبإذن الله حتشفى منها شويه شويه.. طوبى بقلق:ان شاءالله.. ع جية اميمه وهي تقول؛هيا طوبى.. طوبى:هيا..تصبحي على خير عيشه.. اميمه:تصبحي ع خير عائشه:قدامكم كل خير.. ومشوا الزوز طلعوا من الكوجينه.. وعائشه سكرت الباب.. ☘وفي حوش جيرانهم... كانت بنت نجمه نجاح راقده في سريرها وهي تتألم.. نجمه بقلق:اول مرة يصير معاها هكي. خديجه:نجاح.. نجاح وهي تتألم ماكانش لسانها يردد غير تاج الذكر.. وهما يسمعوا فيها ويزيد خوفهم عليها.. ع خشة عواطف قالت؛اهي اليبرة واتيه نجاح هي شويه بس.. ضربتلها يبرة تخفف الألم.. ونجاح حطت يدها ع مكان الألم وقعدت تقرا في سورة الفاتحه تقرا فيها وتزيد تتوجع.. نجمه بخوف:حي عليا هادي تبي مستشفى! عواطف بتوتر:غير راجي خلي اليبرة تاخد مفعولها.. نجاح بألم:اااه ياربي..اياك نعبد واياك نستعين..ااه..واياك نستعين.. خديجه بقلق قالت؛ربي يلطف بيها.. واستمرت نجاح رغم الوجع وقوة الالم مرة تقرا الفاتحه ومرة تردد في تاج الذكر..لين خف الألم شويه وراحت في نوم عميق.. طلعوا من حداها وخديجه تقول؛لازم تعاين لاقدر الله تطلع عندها حاجه في الرحم ولا حاجه!؟ عواطف:خلي هالليله تعدي ع خير وغدوة بإذن الله كان حالها باهي نرفعها.. خديجه هزت راسها بعدين قالت؛ان شاء الله لاباس عليها..تصبحوا ع خير.. نجمه وعواطف:قدامك كل خير.. مشت خديجه.. ونجمه ولت خشت للدار مرة تانيه.. وعواطف لحقتها وهي تحرك في راسها يمين ويسار.. ☘☘☘☘ مقعمزين في الدار يهدرزوا ع الكورة.. بل يتناقشوا.. يتعاركوا..يتعاركوا واصواتهم مغطيه ع صوت المولد متاع ربيع.. هالجلسه كان فيها تلاته بس.. ربيع المهدي نضال.. اما في الكوجينه.. التارقي عبد القيوم يوتي في العشي وحداه حسين واقف ع التلاجه يسمع فيه.. عبد القيوم؛مانعرفش قداش تميت دقيقه مصبي والله نسيت المكان والزمان وكل شي.. حسين بإبتسامه:باهي والخطوة الجايه.. عبد القيوم؛بنفتح معاها الموضوع دغري.. حسين:لا رد بالك.. شبحله وهو بنظرات تساؤل.. حسين؛لازم تعرف قبلها اذا كانت مرتبطه ولا لا..مرات تطلع متزوجه.. تنهد عبد القيوم بضيق وقال:خليتني نفرح اليوم واجلت النكد لبكرا!.. حسين بإبتسامه:نبي نجنبك الصدمه المباشره وانت في حالتك هادي ومشيت كلمتها وقالتلك اني متزوجه متخيل شن يصير فيك وقتها!.. عبد القيوم؛هو كلامك حق وواقعي ماعندي مانقول فيه بس انا توا مانبي نفكر في شي غير فرحتي بشوفتها اليوم بس. انا ياحسين مقتنع ومؤمن ان ربي ماجمعني بيها في حياتي الا وكاتبها نصيبي صدقني ياحسين احساسي عمره ماخاب.. حسين بإبتسامه؛ربي يعطيك ماتتمنى . عبد القيوم:ويعوضك خير.. "تي برا ياراجل برا وربي ماتفهم في حاجه ولاك عارف حاجه" عبد القيوم؛تو هضا كله في س.بة الكورة؟ فجأة سمعوا حاجه انهبدت بقوة.. حسين:يتهابكوا.. وطلع يجري وعبد القيوم يشوف في طنجرة المكرونه وهو يضحك.. خش عليهم حسين لقي ربيع ونضال يض.اربوا.. ماكانش جدي عراكهم.. بس وهما يض.اربوا ناشوا الكانون تنطرت منه ج.مره طاحت عالبساط.. المهدي؛شن درتوا ياج.حش انت وياه! نضال بصدمه؛حي ع امها!!.. وربيع من الارتباك شد الجمره بيده بش يردها ان.ح.رقوا صوابعه.. بوجع عيط وهو يقول:وووه.. وطلع يجري للكوجينه.. خش ع عبد القيوم فتح فريز الثلاجه وحط صوابعه ع الثلج.. عبد القيوم:كنك!؟. ربيع استاقظ وشبحله بعدين قال بإرتباك؛نو.. عبد القيوم:شنو!؟ ربيع وهو يتوجع:تي انح.رق.ت ياراجل.. عبد القيوم:شن ح.رقك!؟ ع خشة نضال وهومبتسم بإرتباك قال:تارقي سامحنا كنا نتناقشوا عادي مش عارف كيف نشنا الكانون وطاحت منه ج.مرة شكله كان ع سبله هو! عبد القيوم:تبي تقول ان الفرشه انح.رقت! الزوز هزو رووسهم وقالوا:اها.. هو هز راسه وقال:اها صار..تمام..اشرعليهم بسبابته وهو يقول..واحد فيكم يجيب وحده غيرها ونبيها بكرا ولا والله نردها لكم في حاجه ماتخطرش ع بالكم وراهو مش كلام بس!.. نضال؛بإذن الله غدوة تكون عندك وحده خير منها.. ربيع:واني شن نجيب!؟ عبد القيوم:شكلك بتجيب تلاجه جديد.. استاقظ لفريز الثلاجه اللي قاعد مفتوح وصوابعه فوسطه.. طول طلع يده وسكر الفريز. ☘☘ وطاب العشي.. مكرونه جاريه بلحم الخروف صبوها في سفره.. وصورها عبد القيوم بش بينزلها بعدين.. والتموا ع هديكا السفرة وكلوا مع بعضهم عيش وملح وتشاركوا الاحاديث الممتعه اللي نست كل واحد فيهم همه.. ماعدا عبد القيوم اللي قاعد عايش في عز فرحته.. 🍃ومن الفرح.. للهم... اللي عايشه فيه اميمه وهي عروسه.. العروسه اللي مفروض تعيش احلى ايامها توا... تهربت من شوفة جدها.. اما بوها مابتش تشوفه بكل.. محملاته مسؤوليه كل اللي قاعده تعيشه من طفولتها لعند هاللحظه ومش حتسامحه ع اللي داره فيها... 🍃وطوبى كانت تفكر فيها هلبه وتشاركت هالتفكير هي واقرب الناس ليها.. سدرة:خليها هي دافع عن نفسها وتعرف تواجههم وتعيش بيناتهم وهي نفس الشي مفروض ماتدخلش فيك مهما يصير معاك اعتبروا رواحكم برانيات عن بعض الا في حالة لو وصلوا في الكرامه والشرف هني يطيح كل شي.. طوبى هزت راسها وهي مضايقه وقالت:فهمتك.. سدرة:قوليلي مازال مافي شي؟ طوبى:لا..الحق اتفقنا نأجلوا موضوع الصغار لين نكمل السنه هادي.. سدرة ضايقت من اجابتها كانت تبي طوبى تحمل بش تزيد تطمن عليها من هالناحيه.. بس ماتقدرش تفرض عليها شي وتدخل في خصوصياتها.. 🍃🍃🍃🍃 "مش عارف الحق نحس في روحي مانقدرش نعيش من غيرهم هما الزوز.." حكيم:باهي فرضنا مرته التانيه عرفت انك متزوج قبلها وخيراتك بينها وبين الاولى انت من تختار.. حط الجالي يده ع جبهته وقعد يفرك فيها وهو يفكر بضيق.. حكيم؛ماتقدرش تختار.. الجالي نزل يده وقال؛نبيهم الزوز مع بعض لااني اول ولااخر راجل يكونوا عنده زوز نساوين.. حكيم:التانيه مش حتكمل معاك.. حس بقبضة خوف قويه في قلبه.. حكيم:تعرف علاش..لأنها انخدعت وانضحك عليها المسأله همي مسألة كرامه ومراة خلاتك تخاف لهالدرجه انك تخسرها واضح ان كرامتها عندها فوق كل شي.. الجالي:مش حنخسر..الخساره عمري ماعرفتها ولاحنعرفها في حياتي.. حكيم قعد يشوفله وهو ساكت لاحظ انه عصب وتوتر في نفس الوقت وبدي يعرق.. خاف تنوض عليه حاله قاله:لو خليتها تحبك ماتقدرش تخليك لو شن يصير.. هدي شويه وقعد يفكر ي كلامه.. وحكيم يفكر فيه وفي حالته وشن اللي ممكن يصير القدام.. ☘☘☘☘☘ "بجديات اني مستغرباتك ومعاش قادره نفهمك بكل..لااني قاعده ننصدم فيك اكثر كل يوم اكثر من اليوم اللي قبله" عمر:علاش هدا كله شن اللي صار بش تقولي هكي!..اني مش جديد عليك اميمه تعرفي طبعي كويس.. اميمه؛ايه نعرفه ونحسابه تغير بس كالعاده اني اميمه العبيطه كله يمشي وبإرادتي.. عمر وهو يشبحلها بضيق قال:تعرفي اللي صار زمان قاعد واقف بيني وبينك.. اميمه:الف حاجه واقفه بيني وبينك عمر..هدا علاش نقولك فكرة الصغار هادي حولها من راسك توا.. قلبه بدي يدق بقوة وبلع ريقه بعدين قالت؛لهالدرجه راخيه بيا.. اميمه:انتي اللي راخي بيا ياعمر للأسف..مانقدرش نتكا عليك لأني ثقتي فيك ولت معدومه.. قعد يشوفلها وعيونه تعبوا دموع.. وهي نشوفله بنظرات جاده وحاده.. هز راسه وقال:تمام.. مشي خدي مخده وبطانيه من الدولاب وطلع من الدار.. هي مشت سكرت الباب ودموعها طول نزلوا.. مشت خشت السرير وتغطت بالورغان شمت ريحة عطره فيه.. غمضت عيونها بشده وقعدت تبكي بصمت.. 🍃اما هو.. ماقدرش يرقد وهو يفكر في كلامها... وخاف من فكرة الفراق اللي قاعده تلمح بيها اميمه.. وهما كيف تعدوا اول شهرين من زواجهم... ☘اما بنت عمها.. كانت في حوشها.. تحديدا في دار النوم.. مقعمزة ع الصلايه بملايتها وفي يدها المصحف تقرا منه كملت الجزء29 من القرآن..وسكراته.. وبدت تسبح ع المسبح وهي تردد في تاج الذكر.. شويه جتها بينكا القطوسه رقدت قدامها.. هي ابتسمت وقعدت تسمح عليها وتردد في الذكر.. وراجلها غارق في النوم.. ☘وفي اللي النوم مجافيه بسببها.. مش قادر يحولها من مخيلته لحظه وحده.. طول الليل وهو يحاول يوصف في ابيات الشعر اللي يحس بيه.. بس وين يخطر كلام حسين تريح منه الكلمات والخوف يرجع يسكن قلبه.. 🍀ويجي تاني يوم... كان عند طوبى امتحان نهائي للفصل الحالي.. قعدت داخل في مبنى الكليه تراجع مع صاحباتها.. وهو قعد برا قعد ساعه وهو يراجي فيها.. بس تمت الساعه ولقي روحه مجبور يولي للخدمه.. ☘وفي كلية تانيه.. طلعت بنت اختها من الامتحان.. وهي فرحانه... "جاوبتي".. التفتت وهي تمشي قالت بإبتسامه:ايه.. نضال بإبتسامه؛سهلته شويه ع خاطرك يافستق.. التفتت القدام وقالت بضحكه؛مشكور ياسيدي.. جي جنبها وقال بإبتسامه؛كلمتكم امي؟ اريج:يس.. نضال:جاينكم غدوة.. اريج؛ايه عارفه امي قالتلي كل شي مافيش داعي تعاود يعني.. نضال؛اسمعي حسني اسلوبك ايوه بتكلميني هكي بعد قراية الفاتحه نلطك بالقفا والله مانعرف.. اريج وهي تحرك في ايديها؛واني نلطك بالزوز واحد يرسل والتاني يستقبل.. نضال بضحكه:حي ع امها هادي تدوي من جدها!.. اريج:بابا خلي من توا يكون عندك علم اني مش رقيقه ولاحساسه ومن جماعة اللي يكشخوا عليهم يشدوا تركينه ويبكوا ايوه..خلي من توا يكون عندك علم.. نضال؛عارف والله عارف راني حافظك حفظ ياشمطاء كبرتي قدامي لكن ماطولتيش للأسف الطول خداه لسانك .. اريج؛بش ناخد حقي بيه تالت ومثلث...اللهم لك الحمد نضال بضحكه؛غير شن درت في روحي بس.. شبحتله ع جنب وقالت:قاعدين ع البر راهو.. نضال:وين ع البر خشينا للبحر خلاص.. ابتسمت وقالت:سلام.. ومشت في طريق تانيه.. وهو قعد معاها بعيونه لين درقت من قدامهم.. بعدين مشي كمل طريقه وهو طاير من الفرح... ☘واختها في مكان تاني في نفس الجامعه.. كانت مقعمزة بروحها تراجع في اجوبة الامتحان.. قطع عليها المراجعه لما وقف عليها وهويقول.. "الاء" قامت راسها شبحاته.. ناضت بتمشي.. هو جي قدامها وقال:مش مخليك تمشي قبل لتسمعيني. الاء:اني توا مخطوبه افهم مانبيش نخون خطيبي حتى من غير قصد.. وليد:ماتكذبيش ع روحك راهو اني اكثر واحد يعرفك في الدنيا انتي درتي هكي بلعاني فيا اني خطيبك هدا لاتبيه ولاك حاسه جيهته بأي حاجه.. نزلوا دموعها وقالت:هدة انت مش اني.. وليد:اني وياك درنا نفس االغلط.. الاء:وكله من مني مش منك انت..! وليد بصدمه:مني اني ياآلاء ولامنك انتي..اني قريب بست رجليك ياآلاء خلتيني نجري في جرتك من تركينه لتركينه وانت تصدي فيا وتقولي معاش نبيك نسيتي شن قلتي اخر مرة!؟ الاء ودموعها زي السيل:كله من امك.. وليد بصدمه:امي!؟ آلاء وهي تبكي:امك خلتني نسيبك بعد ماهددتني ياتخلي ولدي في حاله يانتفاهم مع امك وانت تعرف امك قداش امي وتعزها..! وليد بصدمه وانفعال:علاش ماقلتيش من الاول علاش ياآلاء!؟ آلاء؛خلاص توا معاش ينفع في شي كلامنا هدا.. ومشت بسرعه وخلاته وهي تبكي.. وهو واقف في مكانه ومازال مصدوم وفي قلبه ول.عت ن.ارالغضب ع امه.. ☘☘☘☘☘ وفي ن.ار غضب تانيه ليها شهور وهي ش.اع.له في قلب يحب بجنون ومستعد يدير اي شي بش يستحوذ ع معشوقه ويخليه ليه هو وبس.. نجاه... اللي خشت ع مكتب الجالي بعد مااستغلت غياب السكرتيرة.. واستغلت غيابه هو لمانزل للكافتيريا يشرب قهوة.. طول خدت شنطة اللاب توب متاعه.. فتحتها... بعدين فتحت الجيب الدخلاني متاعها وقعدت دور فيه.. ماكانش فيه غير شريط الدوا النفسي متاعه.. خداته وسكرت الجيب بعدين شنطته ودستها في مكانها.. ومشت طلعت من المكتب بهدوء.. وولت لمكتبها بدون ماتلقت النظر... ☘☘☘☘☘ "الاعراض اللي قلتي عليها دل ع اكثر من حاجه" نجاح؛زي شني يادكتورة؟ الدكتورة:خلينا نديروا بعض التحاليل ووالفحوصات بعدين نحددوا.. خدت ورقة..وكتبت فيها التحاليل الفحوصات اللي تبيهم وقالت..كلهم موجودات عندنا هني.. مدتلها الورقه خدتها نجاح وهي تقول:نقدر نديره كله اليوم اليوم؟ الدكتورة:ايه..ولو كملتي بعد نهاية دوامي ارجعي يوم السبت ان شاء الله نكون موجوده.. عواطف:ان شاء الله دكتورة بارك الله فيك.. الدكتورة:واجبنا.. عواطف:هي نوض نجاح.. ناضت نجاح وهي متعبه.. مشت مع اختها.... ودارت كل اللي طلباته الدكتورة من تحاليل.. ووين كملوا وولوا للدكتورة لقوا دوامها تم وليها فترة مروحه.. ☘عواطف:نولوا السبت ان شاء الله وخلاص.. نجاح:ان شاء الله.. وركبوا سيارة عواطف وتحركت طول متوجهين للحوش.. وطول الطريق ونجاح حط يدها مكان الألم وهي تقرا في سورة الفاتحه همسا.. ☘☘☘☘ "تعال بعد ساعتين خودهم" ؛ان شاء الله.. ناض المريض اللي خدت منه عينات د.م وقعدت تكتب ع الانابيب في اسماء التحاليل متاعه وحطتهم في المكان المخصص.. شويه جي حد قعمز ع الكرسي وقال.. "CBC..وظائف الكبد..الغده الدرقيه..الكالسيوم... B12" هي قالت:لحظه بس.. ابتسم ع جنب وهو يشوفلها كيف منسجمه مع شغلها.. خدت العينات ومشت دارت بيهم الللازم لتحليلهم.. بعدين مشت للشخص اللي قاعده يستنى فيها.. وصلتها رساله ع تليفونها طالعاته من جيب البالطو وهي تشوف فيها وتقول:وين الورقه لوسمحت.. مافيش رد.. حطت التليفون في جيب البالطو وشبحت للشخص اللي مقعمز ع الكرسي.. توسعوا عيونها ع الأخر... ووجهها شيئا فيشئا بدي يحمر.. وقلبها قعد يدق بسرعه.. هو قال:عندك غادي..واشر بعيونه ع الورقه.. هي استاقظت.. وشافت للورقه وقالت بتوتر:تمام.. مشتلها خدتها ويدها ترجف وهو مركز عليها.. وع وجهه ابتسامه خفيفه.. هي شبحتله وقالت:تمام.. ناض وقف وحول البالطو متاعه ومشي حطه ع طاوله جنبه.. وهي تشوفله وقلبها مازالت نبضاته متسارعه.. ولى قعمز وقامم الماليه متاعه.. هي جاته خدت الحزام ولفاته ع ذراعه وشدت عليه وهي متوتره لأبعد حد.. بعدين ركب الابره.. وجت تشوف الوريد.. اللي تعلماته كله نساته معاش عرفت حتى كيف يسحبوا في ال.د.م.. قعدت ملخبطه وحايسه.. هو قال:عروقي مش مدفونه ولاضعيفه.. قامت عيونها جو في عيونه.. زادت توترت اكثر.. فكت الحزام ووقفت ع حيلها وقالت:اسفه..تقدر تولي بعدين.. ابتسم ونزل كمه.. وناض وقدم خطوه وجي قدامها وقالت؛الوقت اللي خصصتهولك مانقدرش نزيد عليه...نولي يوم تاني... هي بسرعه قالت؛باهي خلاص قعمز تو نسحبلك.. ابتسم ع جنب وقال:فرصة وحده بس. ابتسمت وقالت:باهي.. ولى قعمز ورفع كمه مره تانيه.. وهي خف تورتها شويه.. رجعت ربطت الحزام ووجهزت الابرة.. ودورت العرق ولقاته وبدت تسحب في الدم... هو قال:كم عمرك..؟ شبحتله بنظره فهمها.. ضحك وقال؛Okمواليدك؟ فكت الحزام مشت الابرة بش تفضي اللي فيها في انبوبه وهي تقول:؛وعلاش تسأل؟ هو نزل كمه ووقف حيله وقال:مواليد 89..خريجه تقنية مختبرات كنتي ممرضه زمان وبعد تخرجتي سيبتي التمريض.. تزوجتي مرة وحده وقعدتي سنتين متزوجه واطلقتي من اسبوع فات.. هي قعدت تشبحله بصدمه.. هو ابتسم ولف ومشي لبالطو خداه ولبسه وهو يقول:اني ناوي نفتح مختبر تحاليل ع مستوى ونبيله مدير يقدس الخدمه ومتقن ويحترم المواعيد..وهدا كله لقيته فيك انتي.. هي بدهشة قالت:اني!؟. هو قدملها وقال:ايه انتي..عندك فرصه من يوم الاربعاء هدا للإربعاء اللي بعدها حنجيك في نفس الموعد وناخد منك قرارك نهائي..تشاو.. ومشي طلع من حداها وهي معاه بعيونها تشوفله بنظرات عدم استيعاب للي صار كله... ☘☘☘☘ الساعه11:00ليلا.. مقعمزة ع السرير وهو واقف مقابلها يقول:قالي كله يومين العرس.. طوبى:في الحوش ولافي الصاله.. الجالي:في الصاله. هي بضحكه قالت؛استاحشت العراس برغم اني مانحبش عراس الشتي.. الجالي بإبتسامه:انتي ماتحبيش الشتي بكبره.. طوبى:صح..باهي اطفي الضي بنرقد وراي امتحان غدوة.. الجالي؛ماشي للمكتب شويه وجاي.. طوبى:باهي.. و مشي سكر الضي بعدين طلع للمكتب... خشله ومشي لشنطة اللاب.. خداها وفتحها وقعد يدور ع الدوا.. مالقي شي. عاود دور مرة تانية ومالقي شي.. الجالي بصدمه:وينه!!؟..قعد يفكر شويه بعدين قال..حطيته في السيارة ونسيته!؟..مش متفكر روحي طلعته من الشنطه بكل..! "جالي" انفجع وشبح الباب.. طوبى بنظرات رجاء:تعال ارقد .. قعد يشبحلها وهو مش قادر يتكلم.. طوبى بإحراج وانزعاج:عاد جالي عارفني نخاف في الليل مش ضروري نقولك كل مرة.. هو هز راسه بعدين سيب الشنطه وقال:حاضر.. قدم كم خطوه وهو يقول:راجي ننزل للسيارة تقريبا ناسي فيها ورقه مهمه.. طوبى:باهي نستنى فيك في الدار.. ومشت بإتجاه دار النوم.. وهو طلع وراها وقعد يشوفلها وهي ماشيه لين خشت للدار.. بعدين مشي بسرعه ونزل يجري.. طلع برا الفيلا للقراج طول.. خشله..وجي للسيارة فتحها.. وفتح الدرج متاعها وقعد يدور مافي شي.. قريب انجن..قلب السيارة قلب دور في اماكن مش منطقي يدور فيها.. دوا لو ماخداشي قبل ليرقد حتجيه كوابيس وتفيقه وهو في حالة نوبه مش معروف شن يدير فيها.. صيدليات قريبه مافيش بيضطر يقطع مسافه لاباس فيها.. وهكي حيخلي طوبى بروحها في الليل..صعب جدا يطلع.. الجالي بخوف وصدمه:شن ندير توا اني شن ندير..! وسكر باب السيارة بقوة.. بعدين لف بيمشي وقف.. مسح بأيديه الزوز ع شعره وهو يوخر فيه للخلف بعصبيه خايف هلبه لينكشف مرضه لطوبى.. البنت من غير قاعد فيها خوف منه.. يابال لو شافاته في حالة مش طبيعيه شن حدير!؟ نزلوا دموعه وكان حيبكي.. بس بعدين تماسك وقال:اهدا اهدا جالي اهدا.. مافيش غير انك تقعد فايق طول الليل وخلاص..هو هدا نقعد فايق..نقعد فايق.. طلع من القراج . ومشي بسرعه للحوش وهو يمسح في دموعه.. ركب بسرعه للدور التاني.. وتوجه لدار النوم.. لقي طوبى مقعمز وفي يدها المسبحه وتمتم بالذكر.. الجالي؛اهو جيت ارقدي هي.. طوبى:لقيتها الورقه.. ا نسي شن قاللها:ورقة شني! هي بإستغراب؛الورقه اللي قلت.. قاطعها وقال:ايه ايه..لالا مالقتيتهاش شكلي نسيتها في المكتب ماتشغليش بالك ارقدي وراك امتحان بكري.. طوبى حولت المسبحه وحطتها ع الكامدينو وقالت:اطفي الضي.. الجالي وهو يحاول بكل قوة يخفي توتره:باهي.. هي تمددت وتغطت وغمضت عيونها وبدت تهمس بالأذكار.. وهو مشي طفي الضي.. بعدين مشي خش حداها في السرير.. قعمز مقعمز والخوف مسيطر عليه.. 🍃عدت عليه ساعه وهو فايق..وين شاف ساعة تليفونه لقاها 12..مازال الليل في اوله.. شبح لطوبى بقلق شديد.. بعدين شاف للتليفون وقال في نفسه.. "خل نفوتهم في النت" وقعد كل مرة خاش في حاجه طلع من حاجه وكل مرة يشوف للساعه يلقى إن الوقت يمر ببطء.. اللي هو فيه ماخلاشي يفكر في الدوا وين راح فجأة.. كله تفكيره في خوفه من معرفة طوبى بمرضه.. 🍃واللي عيشاته هالحاله كانت راقده براحه وهي مطمنه لأول ليله من بعد اللي صار بيناتهم.. مطمنه لانها ضامنه رجوعه ليها بعد ماطوبى تعرف بمرضه وتنفر منه وفي النهايه حتطلب الطلاق..وينتهي زواجهم اللي قعد زي الكابوس اللي جاثم ع صدرها من شهرين... 🍃وجت الساعه 3صباحا.. وطاح التليفون من يد الجالي بعد من غلبه النوم ورقد وهو مقعمز... ☘☘☘ وفي من فنومها المنامات المزعجه والمخيفه مابتش تفارقها.. نجاح.. اللي تشوف توا في نومها.. ان في ثعبان كبير ومخيف لاف روحه حوالين خصرها وقاعد يعصر فيها بقوة.. وهي تشوفله بخوف وتقول.. "لاإله إلا الله وحده لاشريك له..له الملك وله الحمد وهو على كل شي قدير.." وهي تردد وهو يزيد يعصر في خصرها بقوة وهي تتألم... فجأة.. فاقت من النوم.. وشعور خ.وف رهيب مسيطر عليها.. والألم في نفس المكان ناض عليها.. حطت يدها عليه..وبدت تردد في الفاتحه بهمس.. وكل ماله يزيد..وهي تقول بكل قوتها وتقرا في السورة.. لعند ماهدي شويه.. شبحت يمينها لقت عواطف غارقه في النوم.. نجاح بهمس ودموعها ينزلوا:سعدودها مرتاحه.. بعدين بسرعه قالت..استغفر الله..كله بأجره يانجاح كله بأجره..مسح ذنوب يانجاح مسح ذنوب.. بلعت ريقها وغمضت عيونها بعدين قعدت تردد في تاج الذكر لين رجع جاها النوم ورقدت... ☘وهي رقدت.. وغيرها جاته الكوابيس ....
#اهرجو_يناير #طوبى
.....يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
