# طوبى "شارع القهوة" #جمان_فريد #الجزء_السابع_والعشرين"قطعة من جهنم" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ •••بعد مرور شهر••• "معقوله يابنتي تطلقي بعد هالعمر" مطيرة:لأن طلع مضحوك عليا طول هالعمر يابوي.. الشامس؛انتي علاش تفكري فيها من هالناحيه علاش ماتشوفيش في الدوافع اللي خلتني ندير هكي.. مطيرة شبحتله بحده وقالت:لاني معاش مصدقتها.. علي:مطيرة يابنتي الطلاق صعب هلبه.. مطيره:مش أصعب من اللي عيشتوهولي.. تنهد علي بيأس... مطيرة شبحت للشامس وقالت:اسمع ياولد الناس..لو تبي تصلح غلطك..برا رد ناديه وخلي صغاركم يتربوا معاكم..بطلوا انانيتكم مرة وحده بش تعيشوا مرتاحين من غير خوف وتأنيب ضمير..اما اني خلاص طلعني من حساباتك ومن حياتك كلها..صدقني ياشامس العيشه معاك من بعد اللي صار بالنسبه ليا مستحيله..خليها ع الأقل تنتهي بإحترام خير ماتنتهي بالقضايا والمحاكم.. هو شبحلها شويه بعدين قال:براحتك.. مطيرة؛ارمي عليا اليمين قدام بوي.. علي قعد منزل راسه وهو متألم.. والشامس كان حاس روحه مخنوق..قبل كان عنده امل في الحب اللي بيناتهم يخليها ترطاب وتنسى ومش عارف ان اللي داره مسح كل شي ليه علاقه بالحب.. تنهد بعدين قال "إنتي طالق" ناضت وقالت:ثبته في المحكمه في اقرب وقت..وياريت ماتوليش في كلامك..عن اذنك بوي.. ولفت ومشت طلعت من المربوعه وكانت عاديه جدا.. مش حاسه بشي اخطا الراحه ☘المراة ع قد ماتحب ع قد ماتكره...اللي داره الشامس خلا الحب يتحول لكره..وبعد وقت ماتت حتى مشاعر الكره ومعاش ولى في شي تجاهه..اللي داره الشامس خيانه من جميع النواحي والخيانه تقتل الحب☘ لهداكااليوم في شارع القهوة ماكان في حد عارف بقصة مطيرة بس كان في شكوك حواليها وبعد ماطلقت رسمي..طلعت القصه.. وفي من كان متشمت وفي من وجعه الحال.. واهل شارع القهوة التموا يومها في حوش الواعر للمواساة.. مطيرة:كله نصيب صارت مشكله وماتفهمناش وكل حد مشي في حاله.. عتيقه:ياودي غير كان صبرتي بس معقوله بعد هالعمر تطلقي يامطيرة!؟ مطيرة:والله ياعتيقه ربك ماحددش سن معينه للطلاق لما زوز مايتفاهموش وتبدا الحياة بينهم مستحيله لازم يطلقوا.. نجمه:جديات يامطيرة صحة ليك درتي اللي هلبه غيرك مايقدروش يديروه..تلقيها صغيرة وشايفه الويل تسكت وتتحمل المهم ماتطلقش.. مغليه؛ماهو حتى الطلاق مش ساهل يهتزله عرش الرحمن.. عائشه:مافيش منه الكلام هدا ياعمتي الاحاديث الضعيفه مفروض ماياخد بيها حد..الطلاق لو مكروه عند الله مايحللاش.. طارتلها مطيرة من عائشه اللي حستها واقفتلها ع الكلمه.. وعتيقه لاحظتها.. مطيرة:يسلم فمك ياعويشه.. نجاح تنهدت وقالت:اللي يخوف المراة من الطلاق كلام الناس ونظرتهم.. نسرين:صدقني الناس ماترحمش...بالذات وين تجي تطلب هي الطلاق يطلعوها مش متربيه وماتنفعش.. وحده من جاراتهم؛وكان طلق هو طول ماحد يعيب عليه ولايدوره.. سدرة:هذا المجتمع اللي حني عايشين فيه يبرر للراجل كل شي والمراة مهما كانت مظلومه لازم يطلعوها في الاخير ظالمه.. خديجه؛ممكن صح كلامكم..بس في حالات لو طلبت فيها المراة الطلاق واطلقت تطلع هي الخسرانه..بالذات اللي جابت صغار لانها ام مش حتقدر تفرط فيهم..هو يمشي يعيش حياته وهي تتمرمد مع الصغار وعمرها يريح ع الفاضي فايزة:صح زي وحده نعرفها مسكينه شايفه الويل وماليها مايبوش صغارها ولوجاها حد خطبها يقوللها مانربيش صغار راجل تاني سدرة؛وهي تربي صغار مراة تانيه عادي!!يمشوا جدري يفصلهم نسرين:هدا المجتمع متاعنا خودوا ولاخلوا..ذكوري بإمتياز.. مغليه:واك منكم ومن تفلسيفكم صدعتوا راسي وغميتوا ع قلبي ضحكوا الحاضرات... ☘☘☘☘☘☘ "حبيبي" مصطفى وهو يلبس في جاكيته:نعم عمري.. فردوس:اخطم ع محل حلويات وحني في الطريق جيب صفرتين مشكلات.. مصطفى:وحدة مشكله حبي هلبه زوز.. فردوس تنهدت وقالت؛باهي حتى وحده باهي.. مصطفى ابتسم وقال:هيا.. فردوس خدت شنطتها وقالت:هيا.. وطلعوا مع بعض من الدار.. فردوس:هيا يابنات.. جوهم البنات واريج شاده في يد خوها .. امهم لادت عليهم وتأكدت من لبسهم وشكلهم بعدين مشوا طلعوا مع بعض.. كانوا ماشيين لحوش سلف فردوس سلفتها دايرة لمة ع خشتها لحوشها الجديد... ☘بعد موت ايهاب فردوس تغيرت شويه.. وحست بقلق دائم على راجلها مصطفى وخافت تفقده حتى هو لأنه راجل طيب وكويس وفيه كل الصفات الكويسه.. وهو كان فرحان لهالتغيير اللي نساه كل شي عاشه معاها من مشاكل قبل..لأنه يحبها هلبه..☘ وصل بيهم لحوش خوه.. حطهم ومشي لعمله.. وهي خشت مع صغارها داخل فتحتلهم الباب الشغاله وين جو خاشين البريق متاع الفيلا خداها ماكانش حوش.. شي عمرها ماشافاته كان في التلفزيون.. كانت مبهورة لأبعد حد.. وآلاء بنتها مبهورة اكثر منها... تلقتهم سلفتها:اهلا اهلا اهلا فردوس.. فردوس ابتسمت مجامله وقالت:اهلا ثريا.. وسلموا ع بعض.. سلفتها شافت شن جايبه بنظرة تكبر وقالت:علاش متعبه روحك.. فردوس؛ مافي شي من قيمتك سلفتها:كميله..ياكميله... جت الخدامه وهي تقول؛نعم مدام.. :خودي منها وحطي في المطبخ.. خدت الخدامه سفرة الحلو.. وسلفتها شبحتلها وقالت؛تفضلي.. الاء:كيف حالك ابله ثريا.. :الوشه هلا حبيبتي.. اريج؛كيف حالك.. :الحمد لله..وجت للولد وقرصاته من خده وقالت:نجيه.. وهما ماشيين مازال يشوفوا للفيلا المبهره.. لين فاتوا قدام طاوله كبيره معبيه علب هدايا.. وين شافتها فردوس تحشمت هلبه وعرفت ان هادم هدايا الحاضرات..وهي جابتلها سفرة حلويات! وصلوا لصالة كبيرة.. :هات عبايتك. حولت فردوس عبايتها.. وين شافت سلفتها لبستها قالت:حي فردوس هدا شني؟ فردوس انفجعت وقالت:خيرك.. والبنات يشبحولها.. شبحت للبنات وقالت؛خشوا حبيباتي بروا العبوا مع بنات عمكم.. الاء خشت طول.. لكن اريج قعدت تشبح لمرت عمها بحده بعدين خشت.. :شن لبستك هادي فردوس بسيطه هلبه شن تحسابيها لمة عاديه! فردوس:مش عارفه انتي ماقلتيش انها كبيره.. :مادام اني دايرتها كيف بتكون يافردوس!؟ فردوس ارتبكت وتوترت وبدت تحرق في دمها.. :تعالي معاي تو نعطيك تلبسي من عندي.. مشت وفردوس وهي مجبورة بش تتجنب الاحراج قدام الناس مشت معاها.. وكانت كل ماتمشي تشوف الفيلا تزيد تنقهر اكثر واكثر.. لين وصلت لدار النوم اللي كانت حكاية تانيه.. رفعتها لدار الملابس.. اللي كانت حدوخ فردوس لما شافتها.. عطتها لبسه من عندها وكانت تبان جديده مش ملبوسه لبستها وبعدين ولت نزلت هي وياها لوطا... ☘مرت حفلة اللمه ع فردوس وهي تشوف وتتشوق.. وسلفتها كانت تتقصد تقهرها.. برغم كل اللي عندها كانت تغير من فردوس لسببين.. ان فردوس اجمل منها وياما قارنوا بينهم بعد جابوها... وحب مصطفى لفردوس اللي كان واضح للعيله كلها.. هالحاجتين اللي فقدتهم ثريا حازتهم فردوس وقعدت بكل الطرق تحاول تحسسها بالنقص وتحاول تخلق المشاكل بينها وبين مصطفى بش تخرب عليها.. وفردوس للأسف كانت تتجاوب معاها.. في آخر الحفله.. فردوس:ثريا بنركب فوق نبدل.. :لالاخليها عندك بش تحضري بيها لمة جارتك حطيحي بيها الكل والهرتش اللي رمتيهم انسيهم لوحتهم.. فردوس كانت حتبكي بس شدت روحها ويدوب ابتسمت وقالت:تمام..عبايتي.. :من عيوني. ومشت بتجيبها.. بعد ماجابت العبايه لبستها فردوس وطلعت هي وبناتها وسلفتها تسقد فيهم.. فردوس شافت لطاولة الهدايا وقالت:سامحيني نسيت نجيب معاي هديه نجيك مرة تانيه ونجيب.. :لالالا حبيبتي ولايهمك عارفه الظروف ومقدرة.. سكتت فردوس معاش قدرت تتكلم لين وصلتهم برا.. ركبوا السيارة.. مصطفى وين شاف وجه فردوس مقلوب عرف السبب بس طنش وقعد يدعي في نفسه ماترجع تنقلب مرة تانيه وتصير مشكله.. قعدت طول الطريق ساكته.. وهو يهدرز ع بنااته.. الاء مش عارفه كيف تحكي عن جمال فيلا عمها.. اما اريج فكانت تشبح لأمها وهي قلقه وخايفه.. وصلوا للحوش... وخشوا...البنات مشوا لدارهم وبوهم وراهم رافع معتز اللي كان راقد حطه في سريره.. بعدين طلع.. جاته اريج شداته من يده وقالت:بابا.. مصطفى:نعم بابا؟ اريج:بالله ساير ماما بالله عليك ماديروش مشكله.. وجعاته بنته هلبه..هز راسه وقال:حاضر بنتي.. وطلقها ومشي.. وهي مازال خايفه... ☘خش بوها لدار النوم.. شاف فردوس واقفه ع المرايه تمسح في المكياج.. هو ركز ع لبستها استغرب مش نفسها اللي مشت بيها وهادي تبان جديده وغاليه هلبه! أشر عليها وقال:ماطلعتيش باللبسه هادي صح؟ فردوس شبحتله وحطت يدها في نصها وقالت:ايه ولما وصلت غادي مرت خوك خافت نحشمها قدام المعازيم عطتني لبسة من عندها... مصطفى:اني والله البنادمه هادي مانبيك تواصليها.. هي مشت للدولاب وقالت:حتى اني مانبيش بش معاش نشوف قهرتي بعيوني.. وخدت قفطان حوش ومشت طول طلعت من الدار للحمام.. هو ضايق ع الآخر..لما حس ان فردوس مافيش منها امل وخاف هلبه من الجاي خاف لوترجع لعادتها القديمه ينجبر يدير شي هو مش راضي عنه.. تجنبا للمشاكل..غير وخش للسرير ودار روحه راقد.. اما هي بعد طلعت من الحمام خدت البدله معاها للكوجينه.. وخدت موس وقعدت تمزق فيها بيه وهي تبكي.. بعدين مشت لوحتها في الكناسه.. وقعدت مقعمزة في الجنان وتبكي وتتحسر ع عمرها وحظها... 🍀ومروا كم يوم بعد هاليوم.. وهي قالبه وجهها عن مصطفى ماتبيش تكلمه وهو مصبر روحه ع خاطر صغاره... وفي يوم طلبت منه يرفعها لحوش اماليها وهو لبى طلبها طول... ☘"هو قالي خوديه سلف وبعدين نرده" لطفي وهو يطلع في فلوس من الخزنه:سلف شني هدا اللي مازال نعطي بنتي سلف... فردوس بكذب:مرات هو يتحسس بوي.. لطفي؛مادوريشي اني نكلمه.. فردوس بخوف:لالالا بوي هو اصلا قالي خودي من بوك وماتقوليش اني قتلك تو يديرلي مشكله بعدين.. مدلها الفلوس وقال:باهي خودي.. خدتهم فردوس وهي فرحانه وقالت:ربي يطول في عمرك يارب.. ☘وطلعت هي وغرفه للسوق بش تشري لبسة.. وخدت اغلى حاجه وحطت فيها كل اللي معاها.. ~~~~~~~~ سدرة؛باين عليها غاليه هلبه.. غرفه:ب500.. سدرة بصدمه:نهار احرش ع راس اليهود! فردوس:مش خسارة فيا.. مطيرة:انتي بعقلك تحطي 500 بحالها ع بدله بتلبسيها مرة ولامرتين!؟. غرفه:خلوها دلع روحها شويه سادها فقر.. سدرة شبحت لغرفه بغضب.. ومطيرة ضربتها ع ذراعها.. غرفه وهي تتحسس في ذراعها:قلت الحق خلوا البنادم يتمتع بحياته شويه شن هدا..افف.. ومشت للدار.. سدرة:جايتها الضربه جايتها.. فردوس ودموعها ينزلوا قالت:عندها حق سادني من القهاير.. مطيرة:قهاير شني اللطف! سدرة؛صايرة معاك حاجه! فردوس وهي تبكي قعدت تحكي في اللي صار معاها في فيلا سلفتها.. مطيرة:اه كان نحصل عليها نقطعها تقطيع.. سدرة؛سلفتك الحقيرة هادي حاطه راسها من راسك من لما جيتيهم.. فردوس وهي تبكي:والله ليلتها قريب انجلطت والله.. مطيرة حضنتها وقالت:بعيد السو عليك ياريته فيها هي... وسدرة واقفه مربعه ايديها وتشوف لأختها بضيق.. ⚘وفي حوش فايزة.. كانوا موجودات البنات غادي.. فايزة مازال مابدتش شغل في المزين لأنها ماحصلتش عاملات كويسات وأمينات.. وقعد الشغل يجيها للحوش.. وين تجيها زبونه تبعت لطوبى كان فاضيه تجي تساعدها.. كانت طوبى تستشور للزبونات في شعرهم وكان استشوارها حلو بالمرة.. وين تكمل تقعد واقفه ع فايزة تراقب في شغلها في المكياج وفايزة تعلم فيها.. :عطيك الصحه والله ابداع.. فايزة بإبتسامه:تسلمي..حتى القالب غالب.. :ربي يحفظك.. :والله اول مرة نطلع هكي. فايزة:ممكن اللي قبلي ماعرفوش يبرزوا جمالك.. :صدقتي..تسلمي ياذوق ربي يحفظك.. :هادي اول مرة ومش الاخيرة ومش بروحنا حنجوا.. فايزة؛مرحبتين بيكم.. :سمعت انك دايرة مزين علاش ماتخدميش فيه.. فايزة:والله عاملات لتوا ماحصلتش.. :تمام اني نعرف بنيات ماشاء الله عليهم جيرانا تو نجيبهم معاي مرة تانيه تشوفيهم وتتفاهموا.. فايزة:ياريت والله.. :تمام..هي بالسلامه.. فايزة:بالسلامه.. ومشوا طلعوا الزوز من الحوش وفايزة سقدتهم.. بعدين ولت داخل.. لقت طوبى مقعمزة تتفرج ع انواع المكياج وكأنها تبي تحفظ اسمائهم.. فايزة:تبي تجربي؟ شبحتلها وضحكت بعدين قالت:نبي نجرب على حد.. شبحتلها شويه وقالت:ترا جربي عليا.. ابتسمت طوبى بحماس وقالت:ترا قعمزي.. قعمزت فايزة.. وبدت طوبى تجرب عليها.. ع جية اريج بعد مارقدت خوها.. شبحتهم..وقربت منهم وقعدت تشوف في طوبى كيف تشتغل وكأنها ترسم في لوحه.. وفايزة تفاجئت بيها وكأنها محترفه.. مابتش دير الوجه كله لانها مازال مش متمكنه.. دارت العيون بس.. بعد كملت قالت بتوتر:ترا شوفي.. ومدتلها المرايه.. خدت فايزة المرايه وشافت شكل عيونها انبهرت وهي تقول:ماشاء الله! طوبى وهي مبتسمه بتوتر:عجبك؟ فايزة؛ولاغلطه الله يبارك.. طوبى ابتسمت بفرح وشبحت لأريج واريج شبحتلها وضحكت بحماس.. فايزة نزلت المراية وقالت؛طوبى شن رايك في العطله تخدمي معاي.. طوبى:الراي لسدرة انتي تعرفي.. فايزة ابتسمت وقالت:تمام تو نكلمها.. ابتسمت طوبى وهي متحمسه دير شي تحبه وتبدع فيه.. 🌻زي بنت عمها اميمه.. اللي كانت مستغله وقت قليل من فراغها.. وتخيط لجدها في سوريه عربيه بتفصيله حلوة وجديده وصيفيه تبي دير لجدها اي شي بش تردله حاجه بسيطه من جمايله عليها.. وهي في عز شغلها.. دق باب دارها..ماسمعتاش.. انفتح.. وخش حسين وهو مستغرب.. ابتسم وقدملها وجي حداها.. هي حست بحد واقف قامت عيونها جيهته ضحكت بفجعه وحطت يدها ع قلبها . هو ضحك وقال:شن ديري!؟ طفت الماكينه وشبحتله وقالت:شن قلت؟ حسين:قتلك شن ديري.. اميمه بإبتسامه:لامعليشي سر مانقدر نقوله لحد.. حسين؛شكله مفاجاة.. غمضت عينها اليمين وقالت:تقدر تقول هكي.. ضحك وقال:تمام..المهم اني جايك نبي منك خدمه.. اميمه:ادلل.. تنهد وطلع من جيبه علبة مجوهرات صغيره ومدها لأميمه وقال:نبيك تمشي لحوش عمي نبيك تكلمي طوبى بطريقتك تشرحيلها اللي اني مانقدرش نشرحه..مش تقوللها اللي تعرفيه كله طبعا لا البنت مازال صغيره..بس اني قصدي نبيك تفهميها ان قيمتها عندي كبيره وانها عندي هي نفسها طوبى عند حسين وان اي تصرف نديره لو كان غلط من معزتها في قلبي..وعطيها هادي وقولليها حسين تعب بش لقي حاجه تناسبك.. تنهدت اميمه وشبحت للعلبه بعدين خدتها وقالت:نحاول معاها.. حسين بضيق:علاش تحكي بيأس هكي!؟. اميمه؛لانك لبزت هلبه ياحسين وخليتها تنفر منك البنت لما تجي سيرتك وجهها ينقلب ومعاش تحب تتكلم ولاتسأل عنك.. حسين وهو متفاجئ:لهالدرجة! اميمه؛تصرفاتك ياحسين اللي يغيب فيها العقل تخلي اي حد ينفر منك مش بس طوبى.. حسين؛باهي انتي حاولي معاها وقوليلها حسين يعطيك وعد معاش يعاود اللي داره غير انتي ولي معاه زي قبل بس.. اميمه:وسدرة؟ حسين؛خلي عليا سدرة مادوريهاش.. اميمه قعدت تشبح للعلبه وهي ساكته. حسين:اميمه فكيني من الاحباط..حاولي انتي حاولي بكل جهدك.. اميمه شبحتله بعدين ابتسمت وهزت راسها بإيجاب.. ☘☘☘☘☘☘☘ "يعني الامور كلها تمام" :خاطري نقول مش تمام لكن هي تمام . ابتسمت وقالت:كويس واخيرا رضيت عن شغلنا.. ؛اني ديما راضي..بس نبي نسألك انتي مواليد كم.. هي بإبتسامه؛مواليد80.. :والله مايبان عليك توقعتك اواخر الثمانينات.. هي بضحكه:لاوين اواخر الثمانينات كيف متخرجين.. :واني هدا اللي خلاني مستغرب بجديات ربي يحفظك.. هي ابتسمت وقالت:تسلم.. ع جية راجلها للمكتب شافها مقعمزة تهدرز مع العميل وتضحك وواخده راحتها.. رقي الدم لراسه وقال.. "نجاة" هي انفجعت وشبحتله.. والراجل اللي معاه قعد يشوفله بآستغراب. طاهر بحدة:الدوام تم.. هي بإرتباك شافت للساعه وقالت:ايه صح ماركزتش.. طاهر:هيا نوضي.. هي بربكه:حاضر.. طاهر:وانت استاذي سامحنا الدوام تم ولازم نطلعوا اني وزوجتي.. رفع الراجل حواجبه وقال:تمام ولايهمك.. ناض ومشي وهو يقول:السلام عليكم. ردوا عليه:وعليكم السلام.. تبعه طاهر بعيونه لين تباعد..بعدين شبح لنجاة وقال:حسابك في الحوش. ومشي.. وهي قعدت تقول بهمس متذمر: دراه الكبد المتخلف هو.. وخدت شنطتها ومشت.. طلعت من المكتب.. ☘في الطريق قعدوا ساكتين بطلب منه هو وهي قعدت ع اعصابها لين وصلوا فالعمارة ~~~~~~~~~ طاهر بعصبيه؛شن ياهانم مش حاسبتيني راجل ولاكيف!؟ نجاة:طاهر ارجوك تفهم ولو لمرة وحده هدا عميل لازم نتعامل معاه بأسلوب حلو ونبتسم في وجهه.. طاهر:الشي هدا ماريتاش الا عندك.. نجاة:بنتغاضى عن تلميحك ونقولك لأني احسن من يخدم غادي احسن حتى منك انت.. طاهر:تمام..تمام..مالا يااحسن مهندسه في التاريخ من اليوم وبرا غادي معاش في خدمه.. نجاة بلامبالاة:ترا فوتني طاهر وبرا فش غلك بعيد عني.. جبدها من ذراعها بقوة وقال:عليا الطلاق يانجاة معاد قصتها خطوه للخدمه.. نجاة بصدمه:طاهر خيرك هبلت!! مش تناقشنا في الموضوع هدا واقتنعت انت وقلت نتساعدوا ع المصروف!. طلقها وقال بعصبيه:ياستي اني مش راجل ماعنديش كلمه شن بديري هي!! نزلوا دموعها وقعدت تقوله بإنفعال؛خيرك انت خيرك ماتقوليش خيرك!! ليك فوق الشهر مش مزبوط ديما تكشخ وتعيط ومش عاجبك شي ومش مراعي اني حامل..وكأنك تفش في غلك فيا..تكلم ياطاهر قول شن ريت شن سمعت في حوش اهلك يومها.. طاهر دفها من قدامه ومشي وهو يقول:ماسمعت شي وماريت شي وخدمه مافيش خلاص انسي.. وخش الدار.. ونجاه قعدت تشبح للدار بغضب وهي بتبكي.. ☘☘☘☘☘☘ "هونا في الدار تصلي" اميمه ابتسمت وقالت:تمام سدرة.. ومشت اميمه للدار فتحتها.. لقت طوبى مقعمزة ع الصلايه وتسبح.. خشت ومشت قعدت ع سرير سدرة وتراجي فيها امتى تكمل.. كملت طوبى وناضت بالصلايه وهي تشوف لإميمه بإبتسامه وقالت؛ميمو شن جو. اميمه بإبتسامه:تمام حبيبتي شن جوك انتي.. حولت طوبى الملايه وقعدت تعلق فيها وهي تقول:تمام الحمد لله.. قعدت تساوي طوبى في شعرها والتوته متاعها وقعمزت جنبها وهي تقول:شن جو القرايه.. اميمه:ماتسألنيش عنها قريب نمد لساني.. ضحكت طوبى وقالت؛ربي يعاون.. اميمه:يارب..قرايتك امورها تمام؟ طوبى:ايه الحمد لله.. تنهدت اميمه بعدين حكت جبهتها وقالت؛بيبو انتي مازال زعلانه من حسين؟ خفت ابتسامة طوبى وغيرت عيونها عن اميمه.. غمضت اميمه عيونها وفتحتهم وحطت يدها ع يد طوبى وهي تقول:شوفي عندك حق تصرفاته غلط وتزعل ومش مقبوله بكل..بس نبيك تتفكري حسين زمان وحسين توا..زمان كان طيب وحنين هلبه..وتوا قاعد طيب وحنين بس في طباع خشت عليه جديده من ورا خدمته في الجيش ديما راهم جافين واعصابهم مشدوده هكي تعلموا يكونوا..وهو مع الاسف معاش قدر يفرق في المعامله بين خدمته وحياته العاديه.. طوبى:حسين هداكا اللي تحكي عليه زمان مشي ومعاش جي يااميمه..وحسين هدا اني مانعرفاش ومش قادرة نتقبله وديما خايفه منه.. اميمه:طبيعي كلنا نخافوا منه لما يعصب بس هو والله عسل لما يبدا رايق هو نفسه حسين زمان يخش يهدرز معاي ويبصر عليا.. طوبى ودموعها في عيونها:هو مرات مع الكل كويس الا اني..نحس فيه ولى يكرهني.. اميمه حركت سبابتها بالنفي سريعا وقالت:لالاحبيبتي نهائيا..شدت ايديها وقالت..تعرفي انتي قيمتك عند حسين وكلنا نعرفوها انتي زي بنته طوبى ومافي حد اغلى منك عنده هو بس يخاف عليك ومايعرفش يعبر عن خوفه الا بطريقه غلط.. طوبى:طريقته هادي تخلي فيا مش قادره نقبله.. اميمه؛شوفي هو بعتني ليك يبيك تسامحيه وقال وعد عليا اللي درته معاش نعاوده غير تسامحني وترجع معاي زي قبل.. طلعت من جيب ماليتها علبة المجوهرات ومدتها لطوبى وقالت..وهادي منه ليك قال تعبت على مالقيتها.. فتحتها اميمه وورتهولها.. كان خاتم ذهب ع هيئة فراشه...كان ناعم وحلو هلبه.. طوبى قلبها وجعها عليه وحست روحها تبي تسامحه قلبها طيب ماتقدرش تشد فيه على حد.. شبحت لأميمه بعدين ابتسمت وقالت:باهي سامحته بس الهديه مانقدرش ناخدها قبل توافق سدرة.. اميمه ابتسمت وهزت راسها بعدين قالت:ناديها.. طوبى خدت نفس ونادت؛سدرة ياسدرة... واميمه تشوفلها بإبتسامه... شويه خشت عليهم سدرة وقالت:نعم.. طوبى:ترا خشي وسكري الباب.. سكرت سدرة الباب.. وتسكيرة الباب سمعتها غرفه.. مشت للكوجينه شافت عمتها من الروشن لاهيه بالزيتون.. ولت بسرعه وقفت ع باب الدار بش تتصنت.. ••داخل•• سدرة؛ايه ويولي يتعامل معاها مرة تانيه زي الأهوج ويضربها! اميمه:لاوالله معاد تصير هو عطي وعد وانتي تعرفي حسين لما يعطي كلمه.. شبحت سدرة للخاتم بعدين قالت:نكلمه اني قبل.. اميمه هزت راسها وهي مبتسمه وقالت؛حاضر.. وطوبى تشبح لسدرة وبس.. ~~~~~~~~~ سدرة؛والله وبالله بكسر الهاء ياحسين لو مديت يدك عليها مرة تانيه وجهها مانخليكش تلمحه.. حسين:خلاص عاد اني قتلك عطيت وعد..قولي عليا مش راجل لو خلفته.. سدرة:اصلا لازم تحط في بالك ان اللي يمد يده ع بنت ولامراة مش راجل .. حسين غير عيونه عنها وهو مضايق ومنحرج.. سدرة :توا بناديها.. هو شبح لسدرة ويدوب بإبتسامه.. هي لفت وخشت داخل.. وهو قعد يستنى ع نار.. لين طلعت طوبى وهي لابسه مستور وحجاب.. وقفت قدامه وقالت؛السلام عليكم.. هو بإبتسامه؛وعليكم السلام..فكينا منه الوجه المقلوب.. طوبى:شوف حسين اني لتوا مش صافيه ناحيتك.. حسين؛من امتى ولى قلبك اسود هكي! طوبى:مش سواد قلب بس الشخص اللي تبدا عندي قيمته كبيرة وين يغلط فيا نزعل منه هلبه ياحسين.. ابتسم وقال:باهي اني اعترفت بغلطي وجيت تأسفت وجبت حتى هديه ماقلتيش شن رايك فيها ومافكراتك بشي.. ابتسمت وقالت؛تفكرت خاتم النايلو اللي كان ع هيئة فراشه حتى هو انت اللي جبته.. حسين بضحكه؛حلو باهي اللي قاعده تتفكري فيه.. طوبى:اصلا قاعد عندي لتوا.. ابتسم وقال:باهي هدا نبيك ماتحوليشي من يدك باهي؟ طوبى بإبتسامه؛تمام ونمشي بيه للمدرسه ونوريه للبنات ونقوللهم جابهولي خوي.. هو تعكرت ابتسامته وهو يشوف للفرحه واللمعه اللي في عيونها لما تقول خوي.. بعدين قال في عقله"طبيعي بنت صغيرة وتفكيرها ديما برييء..توا وين تكبر تفهم بروحها" ابتسم بلطف وقال:تمام..طالع توا شن تبيني نجيبلك في شن جاي خاطرك طوبى:لا مش لازم شكرا. حسين:شن يعني مازال مش متصافيين طوبى:لامش هكي بس يعني مانقدرش نقول جيبلي حاجه بروحي حسين بضحكه:لعيونك نجيب لشارع القهوة كله كان تبي.. ضحكت وقالت؛خاطري في شاورما.. حسين اشر ع عيونه بمعني..من عيوني.. هي ابتسمت بعدين قالت؛سدرة زيادة هريسه عارفها انت.. حسين رفع حاجبه اليسار وقال:ناقصة هريسه هي..! طوبى رفعت حواجبها وعضت ع شواربها وهي تضحك بمعنى.. "حي عليك!" وهو ضحك وقال:هي سلام توا.. طوبى بإبتسامه:سلام.. حسين:ماتنسيش الخاتم.. طوبى بضحكه:باهي.. ومشي حسين طلع من الحوش..وقف في الباب ابتسم وغمزلها.. وهي ضحكت واشرتله بيدها تحي فيه.. هو سكر الباب وهي خشت داخل.. خشت بدون ماتعرف ان غرفه كانت واقفه حدا روشن المربوعه تسمع فيهم وهي تبكي..وقلبها مليان قهر وحسد.. ☘☘☘☘☘☘ "لالا مش بلاش خوك قاطع الحوش ليه فوق الشهر" المهدي:حتى اني هكي نفكر.. محمد وهو مضايق ومعصب في نفس الوقت؛يعني شايف شي او سامع حاجه هني.. رفع المهدي حواجبه وهز راسه.. محمد:برا نادي خوتك.. المهدي:انت ارتاح اني تو نعرف منهم بروحي.. محمد:عابي عليك يامهدي.. المهدي:كون هاني.. ~~~~~~~ مقعمزين قدامه خوته وخواته في الصاله.. وهو واقف قدام يوزع في نظره عليهم ويسأل:من فيكم قال كلمه ولاتصرف تصرف خلا طاهر خوكم يقاطعنا.. قعدوا ساكتين شويه وهما يشبحوله.. بعدين خديجه قالت:صح اني مش طايقه مرته بس ع خاطره هو متحمله وساكته وع خاطر بوي.. عمر:عن نفسي مستحيل يسمع مني ولايشوف مني شي يضايقه اني بروحي نحاول نوصل فيه بش نفهم خيره لكن هو يتهرب.. نضال:عارفني انت مافيش داعي نحكي عن نفسي.. نسرين:تعرفه قداش غالي عليا وحتى اني حاولت نكلمه قبل بنعزمه لحوشي بس هو مسكر تليفونه..ومرته ماتردش.. حول المهدي عيونه وحركهم للجالي.. اللي كان مقعمز وحاط رجل ع رجل ويده ع وحده فيهم.. ويشوف للمهدي.. خوته كلهم شبحوله.. المهدي:ماعندك شي تقوله؟ الجالي:اني في وجهه ماقلت شي..وايه تصرفاتي معاه ولت واضحه..وممكن سمع كلام قلته من وراه.. المهدي عقد حواجبه.. نزل رجله وناض وقف وقدم للمهدي وقال:ممكن اول مرة تسمع الكلام هدا بس اني مش متقبله وديما شاك فيه..وشكوكي بدت تثبت وحده وحده..اولهم..لما مرته دوت عليا اني وفايزة وقعدت تعبي في راس امي والبنات عليا بش تشوهني في نظرهم والكلام يوصل لبوي وتصير مشكله كبيره هدا شي..تاني شي..تقدر تنكر ان اختها الصغيره حاولت ترسم عليك! انصدموا خديجه ونسرين والولاد تفاجئوا.. نسرين:شن تقول يالجالي! الجالي التفتلها وقال:سمعت الدوة اللي صارت بينها وبين المهدي..شبحله وقال..لما طلبت رقمك..رجع التفت لخواته وقال..يعني انتم مافهمتوش خشوش اختها وطلوعها من الحوش الايام اللي فاتوا..!؟ ضم صوابع يده لبعض وقعد يحرك فيها وهو يقول:مش قلتلكم هدا راسم ع كبير..مش قلتلكم هدا يبي يوصل لحاجه تانيه..غير انه يكون عنده عيله وعزوة.. عمر:تصرفات اخت مرته مرات هو ومرته مايندروش عليها.. نسرين؛وهي يومها حكت اللي سمعاته من الناس من باب الفضول..وبعدين سامحني فيها يالجالي انت تجيب في الكلام لروحك.. المهدي:مزبوط شبحله الجالي المهدي:انت ماتبيش تتقي الشبهات..وفوقها تسيء الظن في خوك..طاهر لو يبي يسيطر ع رزق بوه زي ماانت لمحت راهو مش حني اللي قعدنا نجروا فيه جر للعيله ونجروا وراه بش يقوي علاقته ببوي وبينا حني..حتى امي قعدت تحاول معاه..! اسمع ياجالي كونك ماتقبلتاش ماعندنا مابنديرولك في النهايه كل شي بالسيف الا حبني يابنادم..رفع سبابته وهو يقول..لكن..مش من حقك تخليه يقطع حوش بوه ومعاش يجيه..معاش تبيه تجنبه وبس خليك في حالك وهو في حاله.. وتجنب غضب بوك يالجالي..بوك ولى متحسس هلبه ناحية طاهر رد بالك ضيع مكانتك عنده وتوصله لمرحلة مافي حد فينا يبي يفكر فيها.. ابتسم تهكما وقال:اوكي..تمام..اني بنطلع منها..بس حنرجع ونفكركم باليوم هدا.. ومشي طلع من حداهم... المهدي كان يشبح ع الجنب للجهة اللي مشي منها.. وخديجه تشبحله وهي تفكر... ☘☘☘☘☘☘ في الكوجينه.. خديجه؛اني مرة سمعته بالتليفون يكلم في وحده ويضحك معاها ويقول ياحلوة.. نسرين بصدمه:المهدي! خديجه:والله العظيم..ويقول والله ماينشبع منك وياريتك خشيتي حياتي من زمان.. نسرين:كذابه مستحيل! خديجه:قسما بالله..نترزى في صغاري يانسرين كان كذبت في كلمه.. نسرين:حي غبارة سودا!! معناها كلام الجالي مزبوط! خديجه:من غير شك.. ☘فهالوقت.. كان المهدي يوتي في روحه.. وعائشه مقعمزة حداه تتفرج عليه كيف متأنق .. اخر شي غسل روحه غسل بالعطر.. عائشه:وين ماشي؟ المهدي:لطاهر..ماتبي شي.. عائشه:جيب معاك حاجات الفطور.. المهدي؛تم... ومشي طلع من حداها.. وهي تشوفله.. وصل في الباب.. رن تليفونه..فتح الخط ورد.. المهدي بإبتسامه؛طالع توا ياعسل..مسافة الطريق.. وفتح الباب وطلع... وعائشه واقفه في باب دار النوم وهي حاسة روحها بتبكي.. ☘☘☘☘☘☘ "الو ميدو وصلت" هادي صابرين راده ع تليفونها وهي طالعه تجري من العياده.. "ايه خشيت العياده هيا اطلعي" صابرين بإبتسامه:ثواني بس وتلقاني قدامك... وطلعت تجري من العياده... ☘☘☘☘☘ "وينه خوك لتوا العشي طاب" طاهر:قال عنده مشوار بيديره قبل بعدين يجي.. نجاة جاته وقالت:زعمه شن يبي جاي؟ طاهر:حلوة حتى هادي!خوي تبيه يجيني بسبب!؟ نجاة:مش قصدي بس قداش لينا ساكنين الشقه ولا واحد فيهم جانا استغربت..وبعدين انت خيرك هكي معاش متحمل مني كلمه.. طاهر:عارفه روحك شن دايرة.. نجاة بنرفزة:ايييه علينا عاد..خلاص قلنا انسى اللي صار حتى الخدمه سيبتها خلاص وبنقعمزلك هني شن مازال تبي تاني!؟ ناض وشد يدها وفنص فيها وهو يقول:صوتك تعليه مرة تانيه نقطعه.. هي خافت منه..غيرت عيونها عنه وقالت:باهي..اسفه..بعدين شبحتله وقالت..حتى انت اهدى وروق طاهر خلاص..استاحشت طاهر حبيبي الرايق البصايري الرومانسي خيرك هكي وليت؟ تنهد وقال:خليني انتي وماتستفزنيش تو نهدا ونرجع بروحي تعرفيني كويس يانجاة مش حنعرفك بيا توا بعد هالسنين! ابتسمت وقالت؛حاضر..وباست يده وقالت..اسفه مرة تانيه.. هو يدوب ابتسم ومسح بيده ع راسها.. فجأة دق الباب.. طاهر:بري البسي حجابك وتعالي سلمي.. نجاة:حاضر.. ومشت خشت بسرعه.. وهو فتح لخوه الباب.. المهدي؛طاهر افندي.. طاهر ضحك وقال:يااهلا.. خشش خوه وسلموا ع بعض بعدين مشي بيه للمربوعه.. شويه وخشت عليهم نجاة وقعدوا يهدرزوا شويه.. بعدين وزعها طاهر.. وهي زبطت ان يوزع فيها..طلعت ووقفت حدا الباب تتصنت.. ~~~~~~~~~ طاهر بضيق:كلامه مهين ويقهر..اقسم بالله صدمني فيه هلبه كان الاقرب لقلبي فيكم كلكم.. المهدي:الجالي قلبه طيب ياطاهر بس هو هالمرة فهم غلط.. طاهر:لينا سنين مع بعض يالمهدي واني وياه اقرب لبعض منكم كلكم..معقوله بعد هدا كله تطلع هادي نظرته فيا.. المهدي:شوف هو اللي وجعه شي تاني..قال مرتك دوت عليه هو وفايزة وانت عارف القصه اللي مطلعينها عليه هو وفايزة طاهر:نجاة! المهدي:هو وجعاته وحسها تشويه ليه قدام امه وخواته..وانت عارف بوي في الموضوع هدا كيف كانت ردة فعله قويه وشن اللي قاله لأمي عليه.. طاهر عصب من نجاة وقال:تو ناديها ونهزبها قدامك.. المهدي:لالالا..لاتناديها ولاتهزبها حتى هي فهمت الموضوع غلط اسمع ماديرش مشاكل مع المراة اني قتلك بش نوضحلك لاأكثر.. طاهر غمض عيونه وتنهد بعدين فتحهم وقال بأسف:لاحول ولاقوة الابالله.. ••نجاة بتوعد:صار هكي!...باهي... ☘ومشت وتت للمهدي عشاه.. وحطاته في المربوعه..تعشى وبعدين روح.. وطول خشلها طاهر للكوجينه.. طاهر:شن داويه عن الجالي وفايزة! هي بصدمه مصطنعه:اني! طاهر:نجاة قولي الحق.. نجاة:والله مادويت عليهم ولاشي..اني بس سمعت عليهم دوه وسألت عمتي مغليه لااكثر لادويت ولاشي..نترزى في صحتي كان دويت عليهم..ودموعها نزلوا..والله عرفتها والله مايبونيش..علاش هكي باهي..علاش..الواحد مكتوب عليه طول عمره يقعد منبوذ وماعنده حد.. وحطت يدها ع عيونها وانهارت ببكي مصطنع.. هو انوجع عليها..احتواها وقعد يهدي فيها ويقول:معاش تقولي هكي خلاص..خلاص.. وهي تزيد تبكي وتقول..ان شاء الله عند ربي خير.. وهو يسمع فيها وقلبه بيتقطع... ☘☘☘☘☘☘ تاني يوم... في جنان حوش الواعر.. ع طاولة الجنان قدام الكوجينه.. سدرة:مستحيل والله لو نشوفه بعيوني مانصدق.. عائشه ببكي؛وعلاش!؟ سدرة:المهدي مش خوان ياعيشه هادي خليك متأكده منها زي اسمك.. عائشه؛تحسابيه المهدي متاع زمان؟ راهو تغير هلبه ياسدرة انتي كان تشوفيه في المرتين اللي جت فيهم كيف يوقف عليها ويهدرز من امتى المهدي كاين هكي!؟. سدرة قعدت ساكته وهي مصدومه.. وحست بشي يحرق فيها من داخل.. بعدين قالت؛لالا صدقيني المهدي مش هكي مايخونش..لو حق يبيها يجيك ويقولك راهو بنتزوج.. عائشه فتحت عيونها وسعهم.. سدرة:اني بس نبي نفهمك ان المهدي مايديرش الخونه ولاعنده في اللبز..ومرات الفرخه هادي هي اللي تتلصق.. عائشه وهي تمسح في دموعها:باهي ومكالمات اخر الليل..والله مرة طاحت في وذني كلمة تهبلي ولسانك عسل يقطر.. سدرة بصدمه:مكالمات!... عائشه؛وكلها اخر الليل.. ~~~~~~~~ مطيرة وهي تقلي في الكرنب؛ماعبيطه انتي ياسدرة يابنتي معقوله ماتعلمتيش من اللي صارلي قدامك..راهو هادم الرجاله..كان شافوا فرخه صغيرة وحلوة تدلع وتتشخلع قدامهم ينسوا كل شي.. سدرة:بس يعني المهدي اني اللي نعرفه..مش هكي بكل.. مطيره:واني اللي عشت مع الشامس 25عام نحساب روحي نعرفه اكثر مانعرف روحي طلعت في الاخير مانعرف شي.. سدرة قعدت ساكته تفكر في كلام عمتها..ومش قادرة تصدق في المهدي..او ممكن ماتبيش تصدق .. ☘☘☘☘☘ وفي مكان تاني.. كانت مقعمزة في حوشها بروحها.. في دار النوم..خدت نفس عميق..وكأنها تهيء في نفسها لشي.. بعدين ضربت ع رقم كانت حاطه عليه وحطت التليفون ع وذنها.. نادى مرتين بعدين انفتح الخط... "ايوه" نجاة:الو..عمي كيف حالك.. "بنتي نجاة وينكم ووين راجلك علاش نتصل بيه مايردش عليا" تنهدت وقالت:والله ماعارفه شن نقولك ياعمي اني متصله بيك ع خاطر هكي.. "علاش شن صاير!" نجاة بدت عاد تبكي وتنزل في دموع التماسيح ... الراجل رعش وقال.. "خيرك يابنتي شن صاير تكلمي؟!" نجاة ببكي:بنقولك بس بالله عليك ياعمي ماتقول اني قتلك حاجه مرات ولدك يطلقني.. وحكتله نجاه كل شي بس من غير ذكر اسم الجالي.. الكلام كان مفهوم ومبهم في نفس الوقت بس كان كافي يخلي محمد شنيبه يوصل لأقصى مراحل الغضب.. ~~~~~~~~~ بغضب شديد:مازال مامتش ومن توا تحكوا عن الورث وتتحاربوا عليه وتبوا تحرموا بعض منه اني نعيب ع الناس ونلقى عيبهم في حوشي! بين ولادي!!..اني ربيتكم بش تكونوا ديمامع بعض سند لبعض وياما نبهت امكم ع الحاجه هادي ربيهم بش يكونوا ديما ع قلب واحد بنات وولاد.. حتى طاهر اللي مش شقيقكم..هدا بالذات طاهر نبي علاقتكم معاه تكون اقوى من علاقتكم ببعض.. وقسما بالله..قسما بالله..لو نسمع ان في حد وجعه ولاتعامل معاه ع انه براني..نطلعه من حوشي..ونتبرا منه مرة وحده وخليه يعرف من هو البراني.. الجالي كان ع اعصابه.. وخوته يسرقوله في النظر.. والمهدي يشبحله.. اما امه فكانت تشوف لمحمد وهي خايفه.. محمد:اللي عندي قلته...شبح لمغليه وقال..غدوة نببك تمشي انتي وبناويتك وكنتك لحوشه طيبي خاطره وخاطر مرته.. مغليه:انت كان تقولي شن عرفت اني بروحي نبي نحاسب اللي وجعهم.. محمد:مش محتاجه عرف يامغليه الولد مقاطعته لينا مش بلاش..وين قال امي مريضه يومها كان يكذب.. مغليه اتفاجئت فيه كيف عرف انه كذاب!؟ محمد:المهم اسمعي اللي قلت عليه وديريه.. وشبح لولاده وقال:اخر مرة ندوي.. ولف ومشي طلع من الصاله.. والجالي معاه بعيونه وهو يشوفله تهكما.. بعدين ضحك ضحكه ساخره.. ومشي طلع حتى هو.. وعيون المهدي معاه.. ☘☘☘☘☘☘ "انا عندي بغبغان غلباوي بنص لسان" هادي نجاه وهي ضم في حوشها وتقلب استعداد لجيه ضيوفها غدوة زي ماقاللها عمها محمد.. وقفت ع الروشن فتحاته.. عجبها الجو برا قعدت واقفه تتفرج.. وفي واحد واقف لوطا قعد يشوفلها كيف واقفه فالروشن من غير حجاب.. فجأة صفر..هي شبحتله.. اشرلها بحركه التليفون يعني الرقم.. هي غيرت عيونها عنه وقالت:برا طير.. وهو قاعد يصفرلها.. وهي عاجبها الجو ماتبيش تخش.. ع جية طاهر.. درس السيارة ونزل وهو يسمع في التصفير.. شبح للعمارة شبحها واقفه.. هي لما انتبهتله ارتبكت..حياته بحركة اليد.. اشرلها براسه تخش داخل.. هي طول خشت وسكرت الروشن وقعدت ترعش.. والتفتت تشوف لباب الشقه.. لما سمعت صوت خطواته..دارت روحها ضم وهي بتموت من خوفها.. خش وسكر الباب بقوة وقال؛خير امك انتي خيرك..فوق ماإنك واقفه ع الروشن مش لابسه ع راسك ياتافهه.. نجاة:حسيت النفس غم عليا قعدت ناخد في نفس بس! هو نزل السيرانتي وقال:هدا نشبحه مفتوح مرة تانيه ماتلومي الا نفسك فاهمه.. هي هزت راسها بخوف وقالت:حاضر.. وهو مشي بعصبيه للدار خشلها وسكر الباب بقوة.. وهي تأففت وقعدت ضم في باقي للحوش بعصبيه... ☘☘☘☘☘☘☘ الساعه 10:00ليلا.. روحت فردوس للحوش لمة جارتها.. خشت لدار النوم بسرعه وحولت عبايتها بسرعه تبي تغير قبل ليجي راجلها.. بس..خش عليها للدار كان جاي من الحمام.. هي انفجعت.. وهو قال:روحتي!بعدين سكت وقد يشبحلها بإستغراب..لحظه لحظه..هادي مش نفسها اللبسه اللي طلعتي بيها! هي ارتبكت وغيرت الموضوع تقول:خيرها سيارتك مش برا!؟ قدملها وقال؛حاطها في الورشه..ماتغيريش الموضوع..هادي مش ليك..وغاليه هلبه واضح..من وين خديتيها من مرت خوي!؟ هي قعدت تشبحله بإرتباك وقالت؛تسلفتها وخلاص.. هو هز راسه وقال؛تو نتفاهم مع راجلها اني.. جاته وشداته وقالت:لالا تكلمه لايكلمك.. جبد يده منها وقال..حولي غادي.. فردوس بخوف وانفعال؛مش منها مش منها.. مصطفى وهو يشوفلها بحده؛من مني!؟ فردوس وهي تشوفله بخوف:خديت حقها من بوي.. هو انصدم وقال:كيف!!؟ هي غيرت عيونها عنه وهي خايفه ومضايقه.. مصطفى:اني شن قتلك ع حاجه هادي شن قلت..مش قلت لو تموتي من الجوع ماليك ماتطلبي منهم شي! فردوس:كلام مرت خوك قهرني واستفزتني تحسابني بنت فقر ولاجعانه واليوم وريتها اني بنت مني.. مصطفى شدها من ذراعها بقوة وقال:قصدك قلتيلها بوك خداهالك! فردوس قعدت تشبحله وهي ساكته.. وهو يشوفلها بنظرات طويله.. فردوس:قلت لبوي انه سلف وتو ترده.. مصطفى رفع حواجبه وقال:كاذبه حتى علي بوك!! بلعت ريقها وقعدت تشبحله بخوف وهي ساكته.. مصطفى نزل حواجبه وقال؛لهني وخلاص..وصلنا اني وياك لاخر الطريق يافردوس خلاص.. فردوس وهي تبكي:مصطفى..مصطفى بالله عليك حاول تفهم عليا وحس باللي نحس بيه.. قاطعها وقال بنفاد صبر:بالله عليك اسكتي اسكتي ياساير خلاص والله حتى صوتك ماطايق نسمعه ولاوجهك نبي نشوفك..لمي شلالتيك..بروحك بطولك وغير يطلع الصبح طول نرفعك لحوش ماليك.. فردوس ببكي:لامصطفى بالله عليك لا.. هو مشي خدي مخدة وشرشاف من الدولاب وقال..خلاص معاش قادر نتحملك اكثر من سنين واني نمشيلك ونساير فيك ونسمع منك في الاهانات وساكت.. شبحلها ودموعه في عيونه وقال بعصبيه..ويشهد عليا الله اني حاولت معاك هلبه حاولت نرضيك بكل الطرق بس خلاص معاش عندي جهدي..كبرت قبل وقتي..صفا شعري الشيب ركبني الهم في جرتك..ومانبيش نموت ناقص عمر.. ومشي طلع من حداها.. وهي حطت ايديها ع جبهتها وقعدت تبكي بالعبرة... وبناتها اللي كانوا يسمعوا في العركه وهما في دراهم كانوا يبكوا هما الزوز...
قطعه_من_جهنم #طوبى
...يتبع.... سامحوني ع التأخير بس عارفين وضع الضي في البلاد والشحن مايقعدش مع الاسف... وبنقوللكم ع خبر..عمليتي تأجلت لبعد العيد يعني مستمرين ان شاء الله لهداكا الوقت بدون انقطاع لفترة طويله بعون الله ومشيئته..
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
