# طوبى "شارع القهوة"
#جمان_فريد
#الجزء_التاسع_والعشرين" عاصفه فبراير4"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
سمع صوت رصاصه طلعت..
قعد يشبح لسلف فايزة قدامه لاحظ انه نزل طول سلاحه..
بعدين سمعهم يقولوا..
"سيارة جيش جايه"
شبح اياد يمينه وين ماكانت عيون اهل الشارع الحاضرين..
شافوا سيارة كبيره عاليه تابعه للكتائب..
كان حسين مبين راسه منها ومطلع يده كان فيها مسدس ..
هو اللي طلعت منه رصاصه في الهواء قبل ليطلق سلف فايزة رصاصه من الكلاشن متاعه..
وخروا اللي جايين مع سلاف فايزة وركبوا سيارات الدبل قابينه...
درس حسين ونزل من السيارة..
ومشي بإتجاهم وشاف اللي صاير قدامه..
اياد والبنات وراه..
وتاله اللي كانت في حضن عمها كيف فاقت من صوت الرصاصه وقعدت تبكي..
عقد حسين حواجبه وقال:انتم بتولوا تريس!؟..امتى تولوا رجاله..حاطين راسكم من راس مراة لاحول لها ولاقوة!
واحد منهم وهو يحاول يخفي خوفه:جايين ناخدوا بناتنا..
حسين قدملهم بعصبيه وقال:بنات منو..ضربه ع كتفه بفوهة المسدس وقال..بنات منو..هادوا بناتها هي وحضاناتهم من حقها هي لافي شرع ولاقوة يسمحلكم تاخدوهم منها..وبعدين منين جتكم هالجرأة ولميتوا هالجرابيع معاكم وجيتوا بيهم هني تهدوا عليها في حوشها..شوركم تحسابوها سابت...
قعدوا ساكتين ولا كلمه مش قادرين يردوا عليه..
وخر خطوه وقعد يأشر بمسدسه عليهم وع اللي معاهم وهو يقول:توا تلموا ارواحكم انت وياه والجرابيع اللي معاكم وتتسقدوا من هني..
شبح واحد فيهم لبنات خوه بغل ..
جاه صوت حسين العالي فجعه وهويقول:هيا...
طول نزل واحد فيهم تاله وهي تعيط خداها حسين ورفعها وقعد يشبحلهم كيف تحركوا ومشوا ركبوا سيارتهم..
حسين بوعيد وتهديد؛قسما عظما..مازال نسمع بيكم خطمتوا خطوم من قدام الحوش هدا..ننهيكم..
تحركوا السيارات قدامه بسرعه..
وهو التفت شبح لفايزة وقال:شن دارولها..
التفت شافها اياد لقاها فاقده الوعي وراسها من الجنب ينزف..
البنات شافوا امهم عيطوا:ماما..ومشولها يجروا..
هني سدرة طلعت من الحوش ومشت لصاحبتها وهي تبكي وتقول:فايزة!..
وصلت فيها وطبست عليها وقعدت تخبط ع وجهها وتفيق فيها وهي تقول:فايزة..
شبه فاقت فايزة ويدوب فتحت عيونها وقالت..
"بناتي"
☘☘☘☘☘
"الحمد لله اللي شفت بخير ياأمي الحمد لله رب العالمين"
حسين وهو حاضن امه؛الله يسلمك ياغاليه..
وباس راسها وايديها وهويقول:معاش تبكي بالله عليك تشبحي فيا قدامك صاغ سليم مافيا شي..
صفيه بدموع:يعلم الله شن صار فيا الشهور اللي فاتوا بالذات وين نسمع القصف نموت ونحيا الف مرة..
باس راسها مرة تانيه بعدين قال:بعيد السو عليك..
اميمه وهي تشوفله ودموعها ينزلوا قالت بإبتسامه:حتى اني استاحشتك راهو..
بعد امه وجاها وهو يضحك..
هي طول ضماته بقوة وهو ضمها وقعد يمسح ع شعرها وهو يقول؛ضعفتي يابنت.
اميمه:من التخميم فيك قلوبنا ديما واكلتنا عليك ليل نهار..
بعد وباس راسها بعدين قال؛قتلكم قبل استودعوني الله وماتخافوا من شي..
مرر نظره حواليه وقال:وين يوسف ووين جدي؟
صفيه:يوسف في حوش صاحبه ولد السويح تعرفه ديما يسهر عنده..وجدك ماشي لحوش عبد الكريم يهدرز ع ولاده..
حسين بإستغراب؛ولاده؟
صفيه باسف:الحاج عبد الكريم توفى الله يرحمه..
حسين بأسف؛إنا لله وإنا إليه راجعون..الله يرحمه ويسامحه..
اميمه:وبوي في حوش صاحبه المشري..
حسين مااهتمش شن قالت اميمه عن بوه لانه اساسا ماسألش عنه بعدين قال؛خل نمشي نسلم ع عمتي ونجي..
اميمه شبحت لأمها.
وصفيه قالت؛باهي برا بسرعه وتعالى اكيد جاي جعان..
حسين؛جعان بنطيح .
صفيه؛بعيد السو عليك توا نديرلك احلى عشي..ومشت بسرعه للكوجينه..
حسين؛تمشي معاي..
فركت ايديها في بعض وقالت وهي مبتسمه بتوتر:برا بروحك..
هو استغرب بس ماباش يسأل اساسا مستاحش طوبى هلبه ويبي يشوفها ومعاش عنده عليها صبر..
هز راسه ومشي طول طلع من الحوش.
ولف عليه وطلع من الباب الفاصل وخش جنان عمه وهو ينادي..
حسين؛عمتي..
طلعتله مطيره تجري وضماته بقوة وهي تقول بنبرة باكيه؛باهي اللي شفتك طيب ولدي..
حسين؛كيف حالك عمتي شن دايره..
مطيره:اني كويسه ياعمتي مادام انتم كويسين..صغاري انتم..
باس راسها وايديها وقال:ربي يحفظك..
ع طلعة غرفه وهي تشوفله بعيون معبيه دموع:حمد لله ع السلامه حسين..
هو هز راسه ورد عليها بجديه:الله يسلمك...طوبى وين؟
ضايقت غرفه..
وعمته ردت عليه تقول؛تأثرت هلبه باللي صار وقعدت تبكي..وتوا خاشه داخل تغسل في وجهها..
ع طلعة طوبى شافاته قالت بإبتسامه فرح؛سونه..
قلبه طار وسط صدره لما سمع صوتها شبحلها وقال؛رتيله!
جاته وهي تقول بإبتسامه:حمد لله ع سلامتك..محلاه موقفك اللي درته لفايزة وبناويتها قداش فرحت بيه..
حسين بضحكه؛شن درت ياهبله هادي جارتنا وزي اختي واجب اللي درته مش جميل..
ابتسمت طوبى:المهم الحمد لله بناتها قعدولها وانت روحت كويس مافيك شي الحمد لله..
هو قال؛كان تعرفي قداش ختمة ختمتها واني غادي..
طوبى بإبتسامه:كلام ربي حتى هو..واكيد بيه ربي يحفظك وين ماتكون..
مطيرة عقدت حواجبها بإستغراب وهي تشوف لنظرات حسين هدا وين بس لاحظت وفهمت كل شي..
بينما غرفه برغم فقدانها الامل منه..الاانها مازال تغير عليه من طوبى ومش متحمله نظراته ليه..
وبعد عرف حقيقة مشاعرها معاش تقدر دير اي شي يخليه يكره اختها..
لذلك اثرت الانسحاب من المكان...
☘☘☘☘☘
وفي حوش فايزة...
كانت واقفه عليها عواطف تلف في الشاش ع راسها وهي تقول:عطيهم كسره ياربي اقطعهم واقطع مثايلهم..
سدرة مدت طاسة عصير عنب لفايزة وقالت:اشربيها كلها..
فايزة خدتها وقالت؛البنات ياسدرة..
سدرة:حطتيهم في مراقدهم وصفاء رقدت خواتها الزوز..
فايزة بألم:عيطتها في وسط قلبي حسيتها لما جو بيضربوا ع الدكتور ولاكيف قالت عادي نمشوا معاهم بش مايصيرله شي..حسيتها زي اللي خافت تفقد بوها مرة تانيه..
عواطف بحزن؛ايه مسكينه تأثرت هلبه وقعدت تبكي بالعبره..
سدرة تنهدت وقالت؛الحمد لله عدت ع خير وهالكلاب معاش مازال يفوتوا من هني مرة تانيه..
عواطف:ربي يقطعهم من الدنيا..
فايزة:يارب..وقعدت تشرب في العصير..
☘☘☘☘☘
"للحظه حسيت حياتي وقفت"
اياد؛شن الهبال هدا! علاش بتوقف حياتك!؟ لو صارت فيا حاجه نبيك تستمر في حياتك وانت اقوى من قبل..
مهند ودموعه في عيونه:ماليش غيرك انتي كل شي في حياتي انت بوي وامي وخوتي وخواتي..كان صارت فيك حاجه معاش نقدر نكمل والله مانقدر..
ضربه بوه ع ركبته وشد عليها وقال:ياريتني بعتك للجيش بدل ماخليتك تخش اعلام.
ضحك مهند نص ضحكه..
اياد:خليك راجل خلاص تعديت المرحله اللي تحتاجني فيها..فكر ديما انك ممكن تكمل حياتك وانت واني مش معاك مش شرط بموت..مرات ينفتحلك طريق تشوف فيه مستقبلك بعيد عني بتفوته وتقول بنقعد مع بوي!
سكت مهند وهو يشوفله..
اياد؛اني ربيت راجل مش طفل..يعتمد ع نفسه ويواجه الحياة بكل مافيها..جدك توفى واني في الثانوي زي وحداني ماعندي حد غير امي وكانت مريضه رحمة الله عليها قعدت نعاني فيها وهي من خوفها ننذر حياتي ليها زوجتني واني صغير وامك الله يرحمها كانت زي الملايكه ونعم الزوجه بس ربي امتحني فيها حتى هي وتوفت وخلتنا..
مانكذبش عليك جت فترات حسيت بالعجز وقلت لازمني زوجه تتحمل معاي المسؤوليه بس ربك راد نكمل فيها بروحي..
مهند؛بوي انت مازال تحب خالتي سدرة..
ابتسم اياد بإحراج وقعد ساكت ..
مهند ابتسم وهز راسها وقال:تمام وصلتني الاجابه..
خبطه بوه ع قفاه وقاله؛نوض ارقد نوض..
ناض مهند وهو يضحك قال:تصبح ع خير..ومشي لداره..
واياد قعد يتبع فيه بعيونه وهو مبتسم بعدين تنهد وقال:الحمد لله اللي عدت ع خير..
🍀🍀🍀🍀🍀
وبعد ماعدت ع خير...
قعدت فترة فايزة ماتخدمش وبناتها قعدت ترفع فيهم للمدرسه بروحها وقبل المرواح بنص ساعه توقف قدام المدرسه تراجيهم يطلعوا..
وكانت منبهه ع المدرسه ماتخليهم يطلعوا مع اي حد غيرها هي..
☘وفي يوم كانت واقفه تراجي فيهم..
ماتندريش الا وحامد واقف ع روشن السيارة..
انتفضت من الفجعه..
هو وخر وقال؛ماتخافيش ماتخافيش..
هي قعدت تقول بحده:اسمع امشي من قدامي خير ماقسما بالله نعيط ونلم عليك الناس..
حامد:فايزة خيرك ماتبيش تفهمي اني مستحيل نضرك اني نحبك يافايزة..
فايزة:بتمشي ولانعيط..
حامد؛بنطلق نسرين..
فتحت عيونها ع وسعهم وهي تشوفله بصدمه.
حامد:اني نحبك انتي ونبيك انتي قلبي وعقلي معاك انتي نسرين عايش معاها هكي وخلاص يافايزة صدقيني..
فايزة ودموعها في عيونها:ماريتش احقر منك في حياتي واحد وسخ..
وشغلت سيارتها وهو مازال يقنع فيها:بيك ولابلاك مطلقها خلاص معاش نبيها..فايزة..
تحركت بالسيارة وخشت بيها للمدرسه داخل..
وهو قعد واقف يشوفلها بعدين قال:والله لانمل ولانكل يافايزة وراك وراك لين تقولي باهي...
فجأة سمع صوت رزمه قويه..
شبح فوق وقال:يخلصنا الله منكم كلكم..
بعدين رجع شاف للمدرسه تنهد ومشي...
☘☘☘☘☘
"الواطي هدا شن مازال يبي!؟ والله قريب نخبر فيه حسين"
فايزة؛ياريت والله يفكنا اني ونسرين من وجهه المعفن..
سدرة؛غير يروح مرة تانيه تو نقوله..
شويه سمعوا صوت طيارة..
سدرة؛اهيا اهيا اهيا...
فايزة؛بوووم..
وفعلا طاحت قريبه عليهم..
فجأة سمعوا صوت زغاريد..
سدرة؛تو على شن يزغردوا هادم..
فايزة بحسرة؛ع الموت والدم..اللي يموتوا مز الطرفين ولاد هالبلاد ضيعتهم هالفتنه..
سدرة:حسبنا الله ونعم الوكيل في من كان السبب..
فايزة شبحتلها شويه وقالت؛ماتفكريش في المهدي؟
سدرة شبحتلها بمكابرة وقالت؛علاش بنفكر فيه؟
غيرت عيونها عنها وقالت:علاش يعني..رشفت ومسحت انفها بعدين دموعها طاحوا..حطت ايديها ع عيونها وقعدت تبكي..
وفايزة بدون ماتقول كلمه خدتها في حضنها وقعدت طبطب عليها...
☘☘☘☘☘
"طول هلبه بوي يام هلبه"
عائشه وهي مقعمزة مع ولادها في بالكونة شقتهم:ماهو يسافر زمان ويطول .
محمد؛مش زي توا يام..حتى رمضان بيجي وماروحش
شدت عائشه دموعها بقوة وهي تقول:ان شاء الله يروح قبل يجي رمضان..
يزن؛امي بوي في الحرب؟
سكتت وهي تشوفله..
