(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الثامن_والثلاثين"طوق الفل1" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 ☕☕☕☕☕☕☕☕☕☕☕☕☕☕☕☕☕ واقفه قدامها تشوفلها وهي جامده تماما.. حتى من لون وجهها انخطف.. خديجه كانت وجهها ابتسامه يشوفها أي حد يتوتر يابال نجاة اللي مدرقه سر خطير لأبعد حد.. رمشت عيونها وقالت بشي من الربكه:طلعت ورا نسرين نبي نكلمها..نحساب بنلقاها في الجنان بس ماطلعتش في الجنان.. رفعت خديجه حواجبها بطريقه زادت وترت نجاه ومازالت نفس الابتسامه ع وجهها ومابتش تتكلم بكل.. نجاه حكت رقبتها بعدين ضيقت عيونهاوقالت:شفتيها انتي؟ مررت نظرها عليها من فوق لتحت بعدين تنهدت وشبحتلها وهي تقول:بري للصاله اختك جت.. هزت راسها بسرعه وقالت؛باهي.. ومشت من حداها بسرعه وكان واضح انها هاربه.. تبدلت ملامح وجه خديجه للحده وهي رافعه حاجبها.. بعدين مشت لباب الكوجينه الخارجي.. وصلت فيه..وقفت قدامه وهي تشبح يمينها شافت الجالي مقعمز ولاهي باللاب توب متاعه.. ضيقت عيونها وهي تشوفله وتفكر.. بعدين ضمت شواربها القدام وحركتهم ع جنب شويه.. بعدها رختهم وهزت راسها.. ولفت ومشت ولت للصاله.. خشتلها.. شبحت جهة نجاه وصابرين.. لقت نجاه شاده ولدها وصابرين تهدرز عليها.. مشت ولت لمكانها وقعمزت حطت رجل ع رجل..وعيونها عليهم.. ☘نجاه؛اكيده تشبح هني عطيها سحيقه.. صابرين؛هالحرفه الصرفه تبيني من يدبرلها مصيبه يخليها تلهى في روحها. نجاة:لافكيني الجالي مش متحمل فيهم حاجه كان تصيرلها حاجه يزبطها مني عارفني مانحبهاش.. صابرين؛وانت حمارة تقوليله حاجه زي هادي! نجاة:جت بضحكه ولعبه طلعت مني وعينك ماتشوف الا النور.. صابرين:قوي روحك شويه نجاة مش لهالدرجه.. نجاة مابتش ترد عليها قعدت تلعب في ولدها وخلاص.. وصابرين تشوفلها بإستياء... ☘☘☘☘☘ فهالوقت.. في مقهى الزعيم.. ع وحده من الطاولات.. كانوا المهدي وربيع مقعمزين يهدرزوا هدرزة ذكريات منها الحلو ومنها المضحك ومنها الحزين.. ربيع بإبتسامه:ننسى شني شن تقول انت..والله في السويد مايفوتش عليا يوم الا وانتم خاطرين ع بالي ماليا الشارع ناسه...شبح جنبه وقعد يأشر بيده ع جهة معينه وهو يقول..لما كنا نلعبوا في كورة هني..اني وياك ومختار واحمد والحتره..وشرنقه وبسيط...قعد يضحك وقال..ومايحلى اللعب كان في القايله ويطلعلنا عمك ليالي الحلميه وفيده موس ذبح وياخد الكورة ويفلقها ع زوز.. المهدي وهو مبتسم؛وحني مايشبح كان غبرتنا.. ربيع بضحكه:بالله شن حاله قاعد حي؟ المهدي:ايه ياسيدي قاعد حي واصح مني ومنك الله يبارك.. ربيع ابتسم وقال:الله يبارك..بعدين ضحك وقال..تتفكر لما كنا نلتموا عند جمعه الحكيم اللي كان عنده جهاز فيديو بش نتفرجوا ع افلام بروسلي .. المهدي بضحكه؛نتفكر في محي الصيد وين نطلعوا من غادي يعيش الحاله.. ربيع بضحكه؛مختار الكلب مختار قداش كان يعلق عليه ومرات يقعد يدير زيه ويضاربوا ويعطيه طريحه صح.. المهدي قعد يضحك وهو يقول:مالا لما طلعتله خالتي نجمه وفي جرته بالشبشب.. ربيع وهو يقلد فيها:شدي في ولدك ياورده خيرلك وخيرله.. قعدوا يضحكوا الزوز.. بعدين هدا ربيع ضحك وقال؛ياااه عليك ايام..تتفكر قبل لما كنا نديروا في دوري ويطلعوا بنات الشارع يحضروا في الكورة مرات.. كل وحده تشجع في خوها...بنات الواعر وبنات الصيد..عواصف واجتياح..ضحك وقال..مافيش مرة طلعوا فيها يلعبوا ماداروش دعكه.. المهدي بضحكه؛تفكرت مرة سدرة جت بتحزهم عن بعض ضربوها قعدت تضرب فيهم هما الزوز.. ربيع بضحكه:زيك يابرو..وين تخش دعكه بتحز كان ناشك حد تخلطهم ع بعضهم.. ابتسم المهدي بحسرة.. ربيع بإبتسامه:الله يبارك ولدكم راجل توا..فيه من امه اكثر منك.. تلاشت ابتسامة المهدي.. ربيع بضحكه؛ياسيدي خلاص معاش ندوي عليها ونسحب كلامي.. المهدي بنبرة فيها الم:انت ع بالك هدا ولدي اني وسدره.. خفت ضحكة ربيع وضيق عيونه.. ابتسم المهدي تهكما وقال؛ماخديتش سدرة.. وجه ربيع تغير وانحرج شويه بعدين شبح لمحمد وقال بشي من الربكه؛شفته اشقر زيهم..حسبته يعني..وسكت.. المهدي بحسرة؛ماصارش نصيب بينا.. ربيع:عادي نسأل علاش؟ وفي هاللحظه طلعت طوبى من حوش شنيبه مروحه لحوشهم.. شافها ربيع قعد معاها بعيونه لين خشت حوشهم.. والمهدي كذلك كان يشبحلها.. ربيع:من هي هادي؟ المهدي تنهد وقال:هادي طوبى اصغر بنات عمي لطفي.. شبحله ربيع وقال:ماشاء الله..فردوس وسدرة وغرفه وهادي طوبى... المهدي:الجنه بكل مافيها.. ربيع:تزوجت سدرة؟ المهدي شبحله شويه وقال:انت احكي عنك شويه..تزوجت ودرت عيله.. ابتسم وقال؛جربنا حظنا ومانفعش. المهدي:اجنبيه؟ ربيع:اجنبيه عربيه..اردنيه مقيمه عادي ماطولناش ماسكرناش السنه.. المهدي:درت صغار.. ربيع:لا والحمد لله.. المهدي:كلمة مختار.. ربيع:وينه مختار؟ المهدي:بعد ماانت سافرت بعام حتى هو سافر ومعاش ولي الا اخر السنه اللي فاتت جي زيارة ورجع حتى هو صارله زيك تزوج وطلق ومادارش صغار. ربيع:قداش خاطري نشوفه ونهدرز عليه.. المهدي:معاش توصل فيه توا مولي حاجه كبيره.. ربيع:إياااه.. المهدي:هلبه ناس تغير حالها بالذات بعد2011.. ربيع:سمعت عنهم..باهي يعني ماجاوبتنيش علاش ماصاركش من سدرة.. المهدي:نصيب.. ربيع:خديت من الشارع ولابرا منه.. المهدي:بنت الشيخ جويده.. ربيع قعد يتفكر بعدين بصدمه قال:عيشه صاحبة سدرة!!؟ تنهد المهدي وقعد ساكت.. ربيع بصدمه:وسدرة من خداها؟ المهدي بحده:حد.. ربيع بصدمه اكبر:قصدك سدرة قاعده عزبا.. المهدي قعد ساكت وهو يشوف لربيع بنظرات فيها شي من الغضب. ربيع:باهي فايزة شن صار فيها؟ هدي المهدي لها ربيع غير الموضوع وقال:تزوجت احمد الله يرحمه.. ربيع بصدمه:احمد توفى!؟ المهدي:ليه قريب 10سنين لتوا.. ربيع بأسف:إنا لله وإنا اليه راجعون.. شويه شافوا لطفي ومعاه بوه ومعاهم حسين جايين على رجليهم.. ربيع ابتسم وقال:الله يبارك على ليالي الحلمه زي ماهو.. المهدي :اااخ الله يسامحه وخلاص.. ربيع شبح للمهدي وفهم ان علي الواعر ليه يد في فراق المهدي وسدرة.. بعدين رجع شافلهم وقال؛من الشاب اللي معاهم.. المهدي:مازبطتاش حسين.. ضحك وقال:لا الحق متغير هلبه..ناض وقال خل نمشي نسلم عليهم.. ومشي طلع من القهوة متوجه ليهم.. والمهدي يشوفلهم.. هما لما قربوا يوصلوا لحوش الحاج علي.. لحق عليهم ويقول؛حاج علي..عمي لطفي. وقفوا والتفتوله ومعاهم حسين. ربيع بإبتسامه:السلام عليكم.. كلهم ردوا السلام..ونظراتهم ليه نظرات استغراب.. ربيع بإبتسامه:مازبطونيش.. علي يشبحله وهو عاقد حواجبه.. وحسين ضيق عيونه وهو يشوفله يحاول يذكر.. لطفي بإبتسامه:لاوالله سامحني مش شايفك قبل.. ربيع بضحكه؛كيف ماشايفني قيل ياعمي لطفي..اني ولد شكري الباني ربيع.. اتفاجئ لطفي وقال:اووووو...ربيع.. وسلم عليه بالاحضان وربيع يحضن فيه وهو يضحك.. لطفي:الحمد لله ع السلامه..الحمد لله ع السلامه.. ربيع:الله يسلمك.. تباعدوا عن بعضهم ولطفي قال:شن حالك وشن حال العيله.. ربيع:الحمد لله كلهم بخير..انتم شن حالكم.. شبح لعلي الواعر وجاه مد يده وقال:تفكرتني ياحاج؟ علي صافحه وقال:ايه تفكرت بالاسم بس..سرافتك متغيره هلبه.. حسين شد دقنه بيده وهو يقاوم في ضحكته.. ولطفي يشوف لبوه وهو بيضحك.. ابتسم ربيع مجامله وقال:هلبه! طلق يده الحاج علي ومرره ع فمه وذقنه وهو يقول:هلبه.. ضحك ربيع وقال:لكن انت الله يبارك قاعد زي ماانت.. علي:الله يبارك.. ربيع"ليالي الحلميه قاعد زي ماهو" شبح لحسين وقال:حسين تتفكرني.. جاه حسين وسلم عليه وقال:مش هلبه الحق..حمد لله ع سلامتك.. ربيع سلم عليه وقال:الله يسلمك.. لطفي:جاي زياره.. ربيع:لا مروح.. لطفي ابتسم وقال:جديات؟ ربيع بإبتسامه:ايه خلاص سادنا غربه.. حسين:مولي لحوشكم هني؟ ربيع هز راسه بإيجاب... لطفي بتساؤل:شريته من الدكتور إياد.. ربيع وهو مبتسم؛إيه.. لطفي:نقولك تفضل عندنا ع العشي الليله وتو نزيدوا نهدرزوا.. ربيع:لابارك الله فيكم مانبي نشقي حد نجيكم نهار تاني نشربوا من الجنه ونهدرزوا .. لطفي:ترد عزومة عمك لطفي؟ ربيع ابتسم وقال:لا والله مش القصد بس عاد مش من اول جيه.. لطفي:اول جية ولاتاني جيه شن الفرق اللي نعرفه ان عشاك الليله وتم الكلام.. ربيع ضحك وقال:ياودي بارك الله فيك..خلاص ع العشي عندكم.. لطفي:مرحبتين بيك.. ربيع:وبيك عمي لطفي..هي نستأذن.. لطفي:اذنك معاك.. ولف ومشي للقهوة.. الحاج علي:قداش هالوقت يغير.. ومشي فتح الباب وخش لحوشه.. حسين:كان نعرف شن اللي خلا الدكتور يسيب الشارع من غير مايعطي حد علم.. لطفي:الله اعلم بظروفه.. حسين رفع حواجبه ونزلهم وقال:هي خش عمي.. لطفي:لاماشي للحوش..نتلاقوا المغرب.. حسين:إن شاء الله.. ومشي لطفي لحوشه.. وحسين خش لحوشهم... اما ربيع... المهدي:خلاص مالا عشاك عندنا.. ربيع بضحكه؛سبقوكم حوش الواعر.. المهدي:خلاص ياسيدي غدوة غداك عندنا.. ربيع:خليها ان شاء الله لما نسكن رسمي.. المهدي:امتى؟ ربيع:الخميس بإذن الله.. المهدي:ع خير ان شاء الله.. ربيع؛إن شاء الله...هي السلام عليكم.. المهدي:وعليكم السلام.. ومشي ربيع لحوشه.. والمهدي قعد معاه بعيونه لين اختفي.. شويه جاه ولده محمد وقال؛مني هدا؟ المهدي:واحد من جيرانا القدم ليا 25سنه ماشفتاش.. محمد:افف..! هز المهدي راسه وقال:برا كمل خدمه برا بش يروح عمك يلقاك مهنيه.. محمد بإبتسامه؛ديما نهني ياغالي.. ومشي من حداه.. والمهدي ابتسم ابتسامه جانبيه بعدين مشي طلع من القهوة بيخش للحوش بش يساير الرجاله اللي جايين لبوه ع خاطر الجالي... ☘☘☘☘☘ "نشوف فيك كويسه مش لازمك سرير" غرفه بضيق:مش من جدك رؤوف بتردي لهديكا الدار اللي ع الزليز! عبد الرؤوف؛مفرشه.. غرفه؛مفرشه ولاع الزليز اني هادي داري مش طالعه منها.. عبدالرؤوف:اسمعي ماتخلنيش ندير حاجه نندم عليها اطلعي بإراداتك احسنلك.. غرفه؛اللي قاعد يصير غلط وحرام عند ربي.. عبد الرؤوف:انتي بتعلميني الحلال والحرام! غرفه :وعلاش شن تشبح فيا نعبد في بقرة ولاساجده لتمثال.. عبدالرؤوف:البوذيين والهندوس خير منك.. غرفه بإنزعاج؛زودتها هلبه راك هلبه مش لهالدرجه علاش هدا كله..قولي..قدمتله وهي تقول..العلاقه بيني وبينك زمان كانت علاقة صداقه وقلت هالكلام من البدايه..لافي يوم قلت نحبك ولالمحت حتى التلميح..انت اللي انجرفت ورا مشاعرك اني ماليش علاقه..ولو ع الكلام اللي سمعته ومانيش عارفه من مني وصلك كلام انقال في الماضي وراح لحاله.. ايه كنت غالطه وع قولتك تافهه..بس يا رؤوف ولامرة قلت نحبك ولامرة وحتى لما جيت بتعترفلي بيها كنت نمنع فيك كنت نبيك تفهمها بروحك بس انت مافهمتش..وع فكره اني راعيت مشاعرك هلبه اللي ماقلتش الكلام في وجهك.. يعني اللي دير فيه هدا كله مالاش معنى ولامبرر... ☘اللي قالاته كله يزيد يفتح الجرح ويخليه يكبر ووجعه يزيد اكثر...يعني حتى توا ماحستش اتجاهه بأي مشاعر وقاعده تساير فيه بش تمشي امورها وخلاص... مافيش غريب ولاعجيب..هادي غرفه..مش حتقدر تحب حد غير نفسها..هكي كان يفكر عبد الرؤوف.. وبرغم من قسوة اللي سمعه بكل هدوء.. عكس ماكان يدور في داخله قال؛تبي تطلقي!؟ وجهه غرفه انخطف لونه والدمعه عبت عينها والقلب كان يدق بكل قوة من الخوف..بس الخوف هالمرة ماكانش من نظرة الناس والفضيحه..لا..الخوف كان..من فقده هو.. غرفه:هدا اللي فهمته من كلامي!؟ عبد الرؤوف:اللي فهمته انك بنادمه مش حتعرف تحب في حياتها غير نفسها لهدا حبك من عدمه مش مدوره بكل..جاوبيني توا..تبي تطلقي؟ غرفه وهي شاده دموعها بقوة قالت:لا.. ومشت طول طلعت من الدار وخشت الدار التانيه وسكرتها عليها وقعدت تبكي.. اما هو في كان واصل حده..مشي طول طلع من الشقه خوف من انه يفش غله فيها.. ☘☘☘☘☘ بعد المغرب.. فضي حوش شنيبه من الناس.. وقعدوا بس اهل الحوش ومعاهم صابرين اللي شدتها مغليه للعشي.. في الكوجينه.. عائشه حاصله جيب في العشي.. ومعاها بنت خديجه "راما"تعاون فيها.. راما؛خودي مرت خالي.. خدت منها عائشه الحرارات وقال:صحيتي بنتي.. ☘وفي الصاله.. صابرين؛ناسيه صغار ولدها بكل تقول ناكرتهم والله ع الحن اللي نشوف فيه منك عليهم تقول انتي حناهم مش هي.. رفعت خديجه حواجبها تهكما.. ومغليه عاد عاجبها الكلام؛حناهم مالا شني حناكم اني ياجويرة ولا مش حناكم.. جوري:ايه حنانا.. نسرين بإبتسامه؛ياوخيتي سلمها.. صابرين بإبتسامه:ربي مايحرمكم من بعض ولايحرم نجاة من هالعيله الباهيه.. نسرين ومغليه:آمين..تسلمي..بارك الله فيك. وخديجه تسمع وهي تشوف لخديجه بعيونها اللي كانت مضيقتهم بشك.. وصابرين ماتبيش تشبحلها نهائي.. ☘اما نجاه.. فكانت في جناحها تتكلم بالتليفون.. نجاة بدموع الغيرة؛قول الحق حاطه عينها عليك ولا.. قعد يضحك.. نجاة بعصبيه:جالي مافي شي يضحك.. "لا يضحك ياهبله اللي تقولي فيه يضحك..البنيه عادي زي اختي الصغيرة وهي تعامل فيا زي خوها وراهي بنت عاقله هلبه مش زي بنات هالوقت" نجاة:ماشاء الله! هدا كله ومش عاجباتك مال كان عاجباتك شن قلت عليها!؟ "نجاة..نوجه..حبيبي..بالطريقه هادي مايمشيش الحال راهو..لازم يكون عندك فيا ثقه وفي نفسك..لازم تعرفي ان اللي يعرفك ويحبك انتي تعبي عينه ومعاش يشوف لغيرك بكل..نجاة البنت اللي في عقلي وتمنيتها مواصفاتها كلهم فيك..يابنتي افهمي اني ماصدقت لقيتك.." نجاة كان مفرحها كلامه هلبه ذاب قلبها منه وقال:اني هكي من حبي ليك مش متحمله نشوف وحده تجي جيهتك في الخدمه ومتحملتهم بالسيف . "مشكله الغيرة متاعك هادي قلبي..لازم تنقصي منها شويه راهو كل شي يزيد عن حده ينقلب ضده" تنهد ومسحت نص وجعها بعدين هزت راسها وقالت:حاضر.حاضر.. "تمام توا خلينا في المفاجأة اللي تأجلت اسبوع كامل" ضحكت وقالت:ايه حقه شن هي؟ "بعدين ديري روحك طالعه تشوفي سيارتك في القراج.. بري لسيارتي افتحيها الكرسي اللي جنب كرسي السواق قدامه قجر افتحيه..تلقي ورقه بيضا ملفوفه لف ومشدوده بإستيك.. وحاجة تانيه مش قايلك عليها خوديهم الزوز.. نجاة بحماس:شوقتني نطلع توا.. "لاردي بالك بعد يروحوا البنات" ضحكت وقالت؛حاضر.... وبعد شويه نهت معاه المكالمه ومشت طلعت من الجناح.. وخشت للصاله.. قعمزت حدا صابرين وقالت:خالتي عاتكه تسلم عليك.. صابرين:سلمها.. خديجه بنبرة عدم تصديق:اها قصدك كنتي تكلمي في خالتك!؟ صابرين:ايه خالتي..بعيد عنكم ياخالتي مغليه ويابنات..راجل بنتها خان بنتها مع وحده اصغر منه بوين..وبعد كشفاته تزوجها... مغليه؛عطيه سكينه.. خديجه؛قولي عطيها موت بنت الحرام تلقيها هي اللي قعدت تجري في جرته..بنات الحرام توا يام يجروا في جرة المتزوجين بس.. نجاة وصابرين قعدوا يشبحولها بحده.. نسرين:صح..بالذات كان معبي بش يصرف عليها.. خديجه؛بنات شوارع.. صابرين كانت حتنفجر.. ونجاه كل مالها تنغل منها اكثر واكثر.. مغليه:الله يكفينا شرهم.. صابرين:آمين ياخالتي..بس معليشي في نساوين يجيبوا فيه لرواحهم..يعني تبدا هي الراجل في الحوش وتبي تتحكم في الراجل وتلغي شخصيته اكيد حينفر منها ويدور ع وحده يعيش معاها اللي انحرم منه.. نجاة:صح..يقول مافيش راجل يخون من كيف مرته هي اللي تسلم لغيرها ع طبق من ذهب.. نسرين:مش قاعده.. نجاة:مافيش قاعده في الموضوع هدا الحق .. صابرين؛مزبوط.. خديجه:صح مافيش قاعده..بس خطافات الرجاله كثروا اليومين هادم ردي بالك من راجلك ياصابرينه.. صابرين؛لا الحمد لله مايشوفش لغيرك.. خديجه:قالوها غيرك وطلعوا رجالتهم مركبين عيون ورا رووسهم . ضحكوا نسرين ومغليه.. وصابرين ونجاه يشبحوا لخديجه مبتسمه تخفي حجم الغل اللي في قلوبهم عليها.. ☘☘☘☘☘ "ربيع الباني سنان وينك يادوسه وينك" طوبى بضحكه؛شكله عندكم معاه هلبه ذكريات.. سدرة؛هلبه..كنا مسمينه سنان هداكا اللي في الرسوم المتحركه..سنونه كانوا مقدمات هلبه وكان ممصوص..يطربق بين ايديك زي مكرونه السبيقه.. مطيرة وهي تضحك:كان حاط عينه عليك..مرة كلمك اشبح شن قالك ياربي نسيت! سدرة بإبتسامه:قالي علاش انتي حلوة هكي! مطيره ؛وسمعه المهدي ويشده يمرجه طريحه باهيه لين قرب قتله ماحزه عنه كان رجالة الشارع.. سدرة؛بس من بعدها خلاص قعد مايقولي كان وخيتي سدرة.. طوبى بضحكه؛باهي ماقعد يقولك يابنيتي سدرة.. ضحكوا مطيرة وسدرة.. بعدين سدرة قالت؛هيا خفوا رواحكم وقت.. ☘☘☘☘ في المربوعه.. كان ربيع مقعمز مع لطفي وحسين وخوه عبد المطلب والحاج علي.. يحكيلهم عن طريقة رجوعه لشارع القهوة... ربيع؛والله تلاقيت اني وياه صدفه في المصحه اللي يخدم فيها رفعت الوالدة تراجع عنده..وهو جوه مليح وهدراز الكلام جاب كلام معاه وعرفت انه يسكن في الشارع وفي حوشنا حني تحديدا..المهم بعدين روحت بالوالده عادي... وقعت ندور كيف نحصل حوش في الشارع بأي وسيله لين سمعت ان واحد اسمه رجب التليسي بيبيع حوشه.. علي:هدا اللي جنب قهوة عيت شنيبه.. ربيع:ايوه..خلاص كنت بنشريه وصلني خبر بعدين انه انباع.. الحق بعدها خلاص قلت ندور اي مكان تاني وخلاص والشارع نقعد نمشي عليه ونجي..المهم في يوم جاني اتصال من رقم مانعرفاش رديت عليه الو مني..قالي اني الدكتور اياد بن زايد..وقال يبي يشوفني ضروري..مشيتله المصحه وعقلي قالي امك اشبح طلع فيها..في الاخير طلب مني نشري منه الحوش..من فرحتي مافكرتش نسأله عن السبب وافقت طول وتممنا البيعه.. لطفي:والله خسارة كبيرة الدكتور إياد.. علي:خسارة معاش تتعوض.. ربيع شبح للحاج علي وهو رافع حواجبه.. عبد المطلب وهو شاد ضحكته؛ربيع خير وبركه وجارنا الاول عشرة عمر.. علي الواعر قعد ساكت مش عاجبه الكلام.. وحسين مغير عيونه عنهم وهو شاد ضحكته.. لطفي؛ع العموم مرحبتين بيك في شارعك مرة تانيه وان شاء الله عتبة خير عليك.. ربيع ابتسم وقال:اللهم آمين.. ☘☘☘☘☘ بعد العشي.. روحوا صابرين ونسرين وخديجه.. ونجاه خشت للجناح رقدت صغارها فيه..وقعدت تراقب من باب جناحه كان مغليه خشت دارها ولالا.. وخشت مغليه دارها وسكرت عليها الباب.. هي طلعت وسكرت الباب بهدوء.. ومشت طلعت بهدوء كذلك..وطلعت من الحوش للقراج.. تمشي وتتلفت..لين وصلت في القراج.. فتحت الباب بهدوء وخشت داخل.. ولعت الفلاش دورت سيارة الجالي.. لقتها مشت طول فتحتها وخشتلها وفتحت الدرج.. طلعت من الورقه الملفوفه لقتها قدامها بعدين شافة علبة المجوهرات خدتها طول وهي بطير من الفرحه.. بس من الخوف نزلت بسرعه بدون ماتفتحها.. سكرت السيارة..ومشت طلعت من القراج.. وخشت داخل بنفس الهدوء لين وصلت في جناحها فتحت الباب وخشت وسكراته وراها... ع طلعة مغليه من دارها ماشيه للحمام.. ☘في الجناح.. قعمزت نجاة ع الصالون.. وفتحت علبة المجوهرات وشافت الحديده. طار عقلها من مكانه...طلعتها ولبستها وهي فرحانه بيها ع الآخر.. بعدين خدت الورقه حولت اليستيك..وفتحتها.. وقعدت تقرا.. ماصدقت عيونها وهي تقرا.. كان عقد شقة مكتوبه بإسمها بيع وشري... حست قلبها بيوقف من المفاجآة... طول ناضت ومشت تجري خدت تليفونها من ع الزيانه.. واتصلت بالجالي وهي ترعش من الفرح.. هو طول رد.. "هاه شن رايك؟" نجاة وهي تتكلم بصوت منخفض وبفرح؛مش مصدقه مش مصدقه! هو بضحكه.. "صدقي حبيبي صدقي بش تعرفي اللي في قلبي ليك بش تعرفي قيمتك عندي وماتقارني روحك بحد..غير اصبري بس شوية صبر نوجه وصدقيني حنوصلوا للي نبوه ونخلي بوي بروحه يقول خود نجاة" نجاة وهي فرحانه فرحة نزلت دموعها قالت:نحبك نحبك هلبه نموت فيك. "اني اكثر حبيبي" ☘☘☘☘☘☘ "لاإله إلاالله وحده لاشريك له له الملك وله الحمد بيده الخير وهو على كل شيء قدير" طوبى وهي تردد في الذكر الأحب لقلبها.. كانت في دار المعيشه بروحها.. مختليه بالله..ع سجادة الصلاة..وهي لابسه مصليه بيضاء فيها تطريز لونه بنى غامق في الازرق من الحواف.. جلستها هادي كل ليله كانت منتظمه عليها ماحد يعرف عنها شي غيرها وربي.. اللي تحس انه قريب عليها هلبه...اقرب من حبل الوريد.. برغم الحزن الكبير اللي ساكن قلبها.. والفراغ الكبير اللي كانت تحس بيه في داخلها.. الا ان علاقتها بالله خلتها غنيه عن اي احتياج... ايه الحزن قاعد ساكن قلبها بس أنسها بالله كان مهون عليها.. تربت هكي وعاشت هكي.. كبرت وهي تشوف في اختها الكبيرة كل ماتحس بضعف ولايحاصرها الهم تخش تسكر ع روحها الدار وتقعد تشكي لله وتبكي بس.. كبرت وهي تشوف في بوها برغم تعبه والحزن اللي ساكن عيونه...يقرا في القرآن في كل وقت وذكر الله مايطيحش من لسانه.. كبرت وهي تشوف في عمتها. كل ماتتحرك ولادير حاجه تقعد تستغفر وتحوقل... كبرت وهي تشوف في جدها.. ياخد في تركينه في الجنان ويشد عكوزه ويقعد يخطط بيه ع الارض وهو يسبح.. كبرت وهي تشوف في بنت عمها اميمه.. ديما وهي تابع في البرامج الدينيه وماتقعمزش قدام التلفزيون الا عليها.. من كل حد فيهم خدت حاجه..كل حد فيهم خلا فيها اثر قوي صنع شكل علاقتها بالله.. ومن سخر هادم كلهم بش يدلوها...الله... ¤وهو معكم اينما كنتم¤ ☘بس في اللي ماكانش زي طوبى يتأثر بكل ماهو صالح.. ممكن غياب المعلم والموجه في الحياة يخلينا ننحرف عن المسار الصحيح.. مشاعرنا نتحرف عن الطريق الصح لأنها مالقتش من يستقبلها ويوجهها صح.. وهدا كان حال صفاء اللي وهي مقعمزة تفطر مع خواتها ع اعصابها تبي تسأل امها عن الدكتور إياد.. وامها كانت عند حناها فطرتها...بعدين جتهم.. صفاء لما شافتها بلعت اللقمه وقال:ماما.. فايزة وهي تغسل في الماعين:نعم.. صفاء:ماما معاش في اخبار عن الدكتور إياد.. مروة؛ايه ماما معاش شفناهم بكل.. فايزة؛خلاص ياماما حولوا.. صفاء جمدت من الصدمه قعدت تشبح لأمها بعيون جاحظه.. حست وكأن حد دخل يده وسط ضلوعها وجبد قلبها .. مروة بأسف:خسارة.. تنهدت فايزة وهزت راسها وهي ساكته.. هني صفاء تحركت..ناضت ومشت طلعت بسرعه من الكوجينه.. ومروة وتاله ركزوا عليها.. لكن فايزة كانت سرحانه مش معاهم.. لعند ماسمعت صوت حاجه تكسرت.. فايزة بفجعه:هدا شني؟ طلعت تجري لدار امها خشت عليها لقتهامقعمزة وسرحانه.. سمعت مرة تانيه صوت حاجه انخبطت. الصوت جاي من دار صفاء.. "ماما صفاء" مشت فايزة بسرعه لدار صفاء.. فتحت الباب وخشت ووراها مرة وتاله.. لقوها تكسر في دارها وهي تبكي وتقول؛كله مني اني..اني اللي خليته يخليني.. فايزة بصدمه:صفاء! صفاء وهي تبكي:مني اني سيب الشارع ياماما.. فايزة؛من هو؟ صفاء ببكي:اياد ياماما اياد.. فايزة عقدت حواجبها وهي مصدومه ومش فاهمه شي.. بس علق في عقلها لما بنتها جردت اياد من اي صفه.. لاعمي..ولادكتور.. طول عقلها جابلها الاسم اللي شافاته في مذكرتها.. ارتفعوا حواجبها وتوسعوا عيونها ع الآخر وهي تشوفلها كيف تاخد في حاجاتها وتلوح.. شدتها من ايديها وقالت؛كيف انتي اللي خلتيه يطلع من الشارع! صفاء وهي في حالة نفسيه سيئة قالت وهي تبكي:عرف اني نحبه ياماما.. مروة:كيف تحبيه!؟ وفايزة تشبحلها وهي مستوعبه وتراجي في اجابتها.. صفاء ببكي:نحبه..نحبه..ومعاش عرفت كيف تشرح قعدت تبكي وخلاص.. بس امها فهمت كل شي.. دفتها ع السرير لين طاحت عليه وقالت؛شن درتي تكلمي! كان منظر فايزة يخوف هديكا اللحظه.. بناتها كلهم خافوا منها مش صفاء بس. اول مرة يشوفوها هكي.. صفاء وهي خايفه:حطيت..وسكتت.. نزلت عليها وقرصتها من ذراعها بقوة وقالت:تكلمي.. عيطت صفاء.. تاله طلعت بسرعه من الخوف.. ومروة تشوفلهم ودموعها ينزلوا.. فايزة بغل ودموعها في عيونها:تكلمي! صفاء وهي تتوجع:حطيتله رساله في السيارة شافني لما حطيتها.. طلقتها فايزة ووقفت ع حيلها وهي تشبحلها.. وقعدت تفكر للحظات.. بعدين مشت طلعت من الدار.. ومروةلحقتها.. شافتها مشت لدارها..خشتلها شويه بعدين طلعت وهي لابسه عبايه ووشاح..ومشت طلعت من الشقه وخبطت وراها الباب بقوة... وتوجهت لحوش لطفي الواعر. ~~~~~~~~ فايزة بغضب:كنتي تعرفي ماتكذبيش.. سدرة؛ماكذبتش وماقلتش مانعرفش.. فايزة:علاش ماقلتليش كيف درقي عليا حاجه زي هادي كيف! سدرة:فكرت فيه وفي وضعك مش ناقصك عمك جديد قلنا نحلوها حني.. فايزة:واني اخر من يعلم بطامة زي هادي! سدرة اني عندي بنات فاهمه شن معنى بنات!؟ انتي اللي فاهمه لانك ربيتي بنات وديما تقولي ان تربية البنات صعبه.. تحديت الناس كلها اللي يقولوا مش حتقدر تربيهم بروحها من غير راجل..اكبر همي ان مايجيش يوم يشمتوا فيا الناس ويقولوا قلنالك بنات ماتقدريش تربيهم بروحك..هدا غير عمامهم ياسدرة شن ممكن يديروا فيا لو وحده فيها طاحت في مصيبه.. سدرة؛فايزة هدا كله فكرت والله فكرت فيه.. فايزة قاطعتها وقالت:لا والله مافكرتي في حاجه لأنهم مايعنولك شي.. سدرة بصدمه:شن تقولي يافايزة هادوا بناتي! فايزة؛كان بناتك حق راهو خفتي عليهم زي ماخفتي ع طوبى..لكن اللوم مش عليك ياسدرة..اللوم كله عليا اني..هادوا بناتي مسؤوليتي اني مافي حد حيحسهم ويخاف عليهم زيي مفروض ماخليتهم لحد.. ومشت طلعت من حداها من دار المعيشه. وسدرة مشت وراها كم خطوة ووقفت في الباب وهي تشوفلها كيف طالعه.. دموعها طاحوا... وطوبى اللي طلعت من دارهم قعدت تشوف لأختها بحزن.. ع جية مطيره من الصاله؛خيرها فايزة والعه.. سدرة؛مني اني ياعمتي مني اني عطيني دي.. طوبى بفجعة:بعيد السو.. مطيرة:اللطف ياربي..علاش هدا كله.. سدرة خشت وسكرت عليها دار المعيشه.. وطوبى قعدوا دموعها ينزلوا.. مطيره:عارفه حاجه ياطوبى؟ طوبى حركت راسها بالنفي ومشت خشت للدار وسكرتها عليها.. خبطت مطيرة كفوفها ببعض وقالت؛لاحول ولاقوة الابالله.. ☘اما فايزة .. خشت لشقتها..مشت شافت امها لقتها قاعده ع نفس الحاله.. بعدين مشت لدار صفاء خشتلها.. صفاء لما شافتها ناضت وقفت وقالت؛ماما اسمعيني ارجوك.. فايزة بصرامه؛سكري فمك.. سكتت صفاء من الخوف.. فايزة:ضمي دارك كلها....بعدين توتي كتاباتك بنقعمز معاك نشوف قرايتك شن صاير فيها.. صفاء؛باهي ممكن بعدها تسمعيني.. فايزة:ولاكلمه..في الموضوع هدا مانبيش نسمع ولا كلمه.. ومشت وخلتها وهي تبكي.. وقعدت صفاء تنفد في اوامر امها من سكات... 🍀🍀🍀🍀🍀 وتعدي الايام.. وفايزة قعمزت في الحوش بعد ما خلت وحده تشد عنها لمده اسبوع... شدت لصفاء قرايتها وكانت شاده عليها مش مخليتها تحكي اي شي عن اياد.. وفي نفس الوقت كانت دور ع طبيبه نفسيه متمكنه تعرض عليها حالة بنتها..لأنه من غير شك صفاء محتاجه علاج لحالتها . وبسبب حالة صفاء..ولأول مرة يتقاطعوا فايزة وسدرة.. والموقف اللي خداته فايزة من سدرة كان قوي هلبه.. سدرة ظاهرها تجاهل وبرود بس داخلها اسف كبير وألم شديد ماتبي طلعهم لحد ولاتبوح بيهم لحد.. من جهة تانيه.. كانوا حوش شنيبه يجهزوا لفاتحه وبيان وعمر... والتجهيزات كذلك عند حوش عبد المطلب ع قدم وساق مع البيان حفل دخول يوسف... وجي يوم اليوم الاربعاء... بعد العصر.. في جامع المنطقه... كان الحاج شنيبه حاط يده في يد عبدالمطلب.. والشيخ يقول في الكلام.. ومرة محمد يردد وراه..بعدين عبدالمطلب قعد يردد وراه.. والجد علي يشبح لعمر بنظرات عدم تقبل.. وعمر مايبيش يشبح جيهته بكل مايبي شي يفسد عليه فرحته... ☘☘☘☘☘ صوت زغرودة صوتها صدح في حوش شنيبه والشارع كلها سمعها.. معاها اصوات زغاريد من طالعه من حوش علي الواعر.. خشوا ع اميمه دارها اللي كان معاها فيها طوبى تجهز فيها.. باركولها وبدوا بالشتاوات... وفي حوش شنيبه... بنات العيله مع امه العريس وخواته.. نور العين قري فاتحته..جاب العين اللي جارحته ... يامبروك على الحبيب..سجلناها في الكتيب.. .... نور العين قري فاتحته...والقلب الشاقي ريحته... ☘وجماعة الفاتحه مايروحوش من غير ماتكون معاهم النوبه... اللي قلبت الشارع قلب..هالمرة كانت غير.. لدرجة ان الشارع كله طلع يتفرج عليها.. 🌸آلاء:يضحك نضال.. طوبى بضحكه:خزي كيف يرقص.. اميمه:عموري وينه مانشبحش فيه؟ اريج:هونا عمورك قريب يجنح بالكاط الطويل.. الاء وهي تضحك؛ياربي نضال ووك.. طوبى وهي تضحك:خزي تافه..شوفوا محمد انتم.. اريج؛هو وعمه نفس الطارقه عندهم تخلف عقلي.. طوبى:اميمه هي تعالي معاش عندنا وقت.. اميمه القت اخر نظرة ع عمر بعدين مشت مع طوبى.. وقعدوا اريج وآلاء بس يتفرجوا ع الشباب اللي قالبينها برا.. "واضرب ياميم طاء...وعمورة جاب مراة" ☘☘☘☘☘ الساعه 9:00ليلا.. نبيله:هو قال اني نجي نرفعها بنمشي توا وتو هو يلحقك.. هزت غرفه راسها وقالت:تمام.. نبيله:سلام توا.. غرفه:سلام.. مشت نبيله طلعت من الحوش... وقعدت غرفه تراجي في عبد الرؤوف لين يجي... لحظات وخش للحوش.. وفي كانت مقعمزة في الصاله تراجي فيه.. وين خش عليها..ناضت وقفت وقالت.. غرفه:واتيه.. هو مرر نظره عليها وقال؛ان شاء الله بتمشي هكي!.. غرفه بضحكه؛شن هكي بنلبس عبابه.. عبد الرؤوف:تخففي في دمك!اللي لابستيه هدا مش حنبعتك بيه لو نموتي.. غرفه:علاش خيره عادي ومستور.. عبد الرؤوف؛كان هدا مستور عندك امالا المتعري كيف!؟اركبي غيريه تحركي والله بيه مانك طالعه من حوش.. غرفه بإنزعاج:انت خيرك هكي!؟خيره هكي تفكيرها راهو بنقعد قدام النساوين عبدالرؤوف:ماتقعدي قدام حد هدا..اركبي غيري امه ياغرفه خير مانحلف ع المشيه كله.. غرفه:لامش معقوله هكي مش معقوله..دافعه فيه دم قلبي بس ندسه! عبد الرؤوف:غرفه اتقي شري احسنلك.. نزلوا وهي تقول:مانيش ماشيه بكل.. حولت الكندرة ولوحتها وقعدت تمشي بإتجاه الباب الفاصل.. ماحستش الا وشعرها انجبد بقوة عيطت. هو جي عند وذنها وقال:حركة الكندرة تعاوديها مرة تانيه نكسرها رقبتك.. غرفه وهي تتوجع:باهي اطلقي شعري.. طلقها.. وهي مشت طول وصوت بكاها مسموع.. وهو وع وجهه باديه ملامح الالم والحده:تبي لحوش هداكا هكي وماتبيش جنوني يطلعوا عليها..! ☘☘☘☘☘ وفي حوش علي الواعر... في الجنان اللي كانت منصوبه فيه خيمه.. كانت طوبى دور ع الطاولات وتشوف في النظام متاعهم.. طوبى:لا الحمد لله كله تمام... ع جية اريج تجري وهي قايمه قفطانها:بيبو شوفي.. وورتها التليفون.. نزلوا صوت تنسيق الحفله وحصلوا عليه تفاعل كبير.. وكانت اريج مداير تاق لطوبى وكاتبه.. "تنسيق خالتي الجميله طوبى" طوبى:انت الجميل ياجميل..وقرصتها خدها.. ☘وفي حوش شنيبه طلعت نجاة من جناحها وهي لابسه العبايه اللي كانت ع هيئة كاب وفي يدها شنطه مناسبات صغيره وهي ماشيه لقاها نضال.. وخر وقال:بالله يانجاة مفتاح سيارته من الكوجينه.. نجاة:هي لحظه.. ومشت خشت للكوجينه خدت المفتاح.. وطلعت بيه لنضال.. مدتهوله.. هو بدون مايشبحلها خداه.. بس عيونه جو ع يده... تحديدا ع حديده متأكد ان شايف زيها بالزبط بش وين مش مذكر.. مشي وهو يقول:صحيتي.. وهي طلعت وراه.. مغليه:هيا يانجاه.. نجاة:هيا جيت.. ومشت ركبت معاهم في سيارة نضال... وطلع من الحوش مع باقي السيارات.. اللي طلعوا من شارع القهوة.. ولفوا ع المنطقه كلها.. بعدين رجعوا للشارع ودرسوا قدام حوش علي الواعر.. وبدت يطلقوا في الالعاب الناريه.. وخشوا اهل العريس بسوابيتهم.. واستقبلوهم اهل العروس بالشتاوات... ونبيله فهالوقت كانت مستغربه في غرفه اللي ماجتش لتوا.. بعتتلها رساله.. (وينك) شويه وبعتت.. (مرضت ماقدرتش نجي) نبيله زبطت ان خوها دايرلها حاجه.. ورجعت تشوفلهم وهي خايفه من سؤال سدره عن غرفه.. تموا الشتاوات وقعمزوا ع طاولاتهم.. المعازيم من الشارع لفتت انتباههم نجاة اللي جايه وهي في قمة الاناقه والمكياج الكامل وراجلها كيف سكر7شهور.. وكأنها ماصدقت.. وكل من يشوفها مايقولش هادي ارمله ليها 7شهور بس تبان ليها سنين... وخديجه.. مانزلتش عيونها عن طوبى عجبتها هلبه وكل مالها تزيد تفكر في موضوع ما في عقلهت ليه فترة معشش.. وهما باديين يقدموا في الضيافه كانت طوبى تشرف عليهم. ونجاة تشبحلها.. ومش قادره تعدي اللي صار يومها ع قد ماقاللها الجالي وبررلها ماخشش راسها.. وتفكيرها قادها لنتيجة ان طوبى حاطه عينها عليه وتبي طيحه زي مايقولوا.. بتد الروزاطه والعبمبر.. طلعوا اميمه بعد ماشغلوا اغنيه عليها في المنظومه.. درجوا الاء واريج لي وصلوها للكوشه وقعمزوها... كانت آية من الجمال...جمالها جدا خاص ومميز.. واللون الاحمر بدرجاته كان يزيد فيها بريق على بريقها... ناضوا حمواتها وعزوزتها ومشولها.. هي وقفت.. وصلت فيها مغليه الاولى.. سلمت عليها وباست راسها. بعدين سلمت ع نسرين وخديجه.. ونجاة تشبحلها بنظرات حسد.. خافت تاكل عليها الجو في العيله.. بدوا يشتوا عليها... سجل ياشيخ قبيليتنا..الزينه ولت من عيلتنا.. .... يامبروك على غالينا هدا وين تسمت لينا.. .... نور العين قري فاتحته...والعقبه لخوته اللي تحته.. ☘☘☘☘☘ وبدي الجو ينشط.. مع اغاني شعبيه ليبيه.. كانوا البنات يهيجوا عليها.. واميمه تشوفلهم وهي مبتسمه ومن داخل قلبها طاير من الفرح... وسدرة وهي تصفق مشت لنبيله سألتها عن غرفه.. نبيله:قالت مانقدرش نجي.. سدرة:احسن مازال حرقها مابراش كويس.. نبيله وهي مبتسمه بالغصب:اهمم.. ☘وعند البنات.. مشوا لأميمه ونزلوها بالسيف بش ترقص.. وهي في البدايه كانت متحشمه بعدين هما شجعوها بش ترقص معاهم... مغليه:الله يبارك عليها الله يبارك.. خديجه؛كلهم عينهم ماضرهم بالذات طوبى ياناس.. نسرين:زي النجمه وسطهم طلتها غير عنهم.. نجاة؛طوبى اللي لابسه قفطان سماوي؟. خديجه:ايه هديكا الغزيله ربي يحفظها.. قعدت تشبح نجاة لطوبى وهي تسمع في خديجه كيف تتكلم عليها وشعور الغيره ياكل فيها ماكله.. البنات وخروا كلهم.. وخلوا طوبى ترقص هي واميمه مع بعض.. كانوا حلوات هلبه مع بعض... خديجه؛يما تخايليهم سلفات ونديروا عرسهم في وقت واحد.. شبحتلها نجاة طول وحست قلبها انقبض.. مغليه؛ياااريييت.. نسرين؛كان عقل نضال ناخدوله طوبى.. خديجه:نضال..! وضحكت.. نسرين ماركزتش معاها هلبه قعدت تشبحلهم وهما يرقصوا.. اما نجاة فهمت تلميحها.. والتفتت وقعدت تشبح لطوبى... وقلبها ولعت نار تاكل فيه...وتاكل اي شي يجي قدامها...
#طوق_الفل1 #طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
