#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا(البيان)"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
في احدى صالات الافراح بمدينه تاجوراء..
كانوا نساوين عيت الواعر وعيت التاجوري اول الحاضرين..
ثريا سلفة فردوس كانت ضمن الموجودات..
تتفحص بنظرها في الصاله..في كل شي موجود فيها..
ومقهورة ان اللي صارف على هدا كله راجلها..
عيونها يجوا لآلاء تتبدل نظرات عيونها من القهرة للحقد ..
محمله آلاء ذنب فسخ ولدها خطوبته وناقمه عليها شر نقمه وناويلتها هالليله ع نيه..
وآلاء تدهور في الصاله وهي تمشي بغرور عاجبتها روحها..
وكل شويه توقف في تركينه وتصور..
من جهة تانيه..
كانت سدرة ماسكه الاشراف ع كل شي..
ماحد كلفها بشي بس روح القياده عندها هي اللي تحرك فيها
وهي تتحرك والعيون معاها تتحرك..
كانت مميزة..طلتها مبهرة بالجمبسوت اللي كان ع ذوق ع طوبى..
مع تسريحة الشعر والزينه ع الوجه والحنه المزينه اليد اليمين..
وهدا كله كوم..وكاريزمتها الطاغيه كوم بروحه..
وغرفة اختها ماتقلش عنها جمال بفستانها الاخضر اللي فيه شيء من الجرأة...
كانت مقعمزة تهدرز هي ووحده من بناويت عيلة التاجوري وجوها حلو ورايق..
كذلك طلة مطيرة كانت مميزة...المراة الخمسينيه اللي بروحها الحلوة ماتكبرش بكل..
تمشي وتجي وتهدرز وتنكت ومدايرة جو حلو..
بس اللي كان البؤس غالب عليهم مهما يحاولوا يطلعوا بهيئة حسنة..
صفيه وفردوس..
فردوس اللي من بعد مصطفى ابتعدت كل البعد عن الاهتمام بنفسها او التفكير فيها.
☘☘☘
وصل الجالي بطوبى وأريج للصاله..
كلمت سدرة تستقبلهم وسدرة قعدت في الباب تراجي..
لين خشوا عليها الزوز.
طول خدتهم وخشت بيهم لدار العروسه..
☘☘☘☘☘
آلاء:ياربي مش مصدقة عيوني هادي اختي اني..
أريج:للأسف..
ضحكت طوبى..
سدرة وهي حاطه ايديها في جيوب الجمبسوت وتشوفلها بإبتسامه:الله يبارك..القفطان طلع عليك تحفه..
اريج:حتى هو ذوق طباطب..اني اصلا نحب هكي وحاسة عيت السلاطين بيجيبوا قفطان كبير ومنفوخ مانعرفش نتحرك بيه.
طوبى بضحكه:بتلبسيه في الاخير قفطانهم..
اريج:ايوه هكي خير خل نهيج في الحفله..وقعدت تحرك في ايديها القدام وهي ترقص..
آلاء بضحكه:باهي امتى بتطلعي.
سدرة:خل يجوا عربها قبل..
طوبى:اكيد ع الوصول وين جانا الجالي قال كيف طلعوا من غادي..
سدرة:تمام..ومشت طلعت من الدار وخلتهم..
سكرتها آلاء كويس وقالت:خل ناخدوا صور..
طوبى:في التليفون لا..
الاء:لامش تليفون كاميرا عاديه..ورفعتها وورتهالها..
طوبى:تمام..
ومشوا الزوز حدا آلاء وقعدوا يصوروا معاها..
في الاول الصور عاديه...بعدين قعدوا ياخدوا في لقطات هبله اهم حاجه فيها مدة الشوارب...
☘وفهالوقت..
الجالي بعد ماحطهم مشي للعمارة اللي يسكنوا فيها نجاة وصابرين..
هما كانوا في السيارة يراجوا فيه ومعاهم حمزة وجوري..
معاذ خلوه لأختهم الكبيره مروة..
لما وصل..
تحركت نجاة بالسيارة.
وهو طلع وراهم...
🍃وصلوا في الصاله..
مع وصلة موكب عيت شنيبه..
خشوا بالسيارة داخل..
ونزلوا كلهم..
حمزة مشي لعمامه..
وهما خشوا مع العيله...
واستقبلوهم بالزغاريد..
لعند ماحطوا السوابيت وسط الصاله...
وبدت الشتاوات...
هادوا يقولوا..وهدوكا يردوا عليهم...
لين انحزت في الاخير ب...
"الف الصلاة والسلام عليك ياحبيب الله محمد"
وصدحت اصوات الزغاريد في الصاله كلها...
☘☘☘☘☘☘☘☘☘
وطلعت أريج بفستانها الناعم بلونه الأرزق الملكي وقعدت تدرج ع كلمات نشيد سامي يوسف للأسماء الحسنى.
والعيون عليها.
عيلتها انبهروا بيها..مش متعودين بأريج تبالغ في حط المكياج او تلبس حاجات ملفته هلبه حتى في المناسبات لهالسبب بانت متغيره هلبه وبرز جزء كبير كان مخفي من جمالها
عجبت مغليه ع الآخر..
وحتى خواتها عجبتهم...
خديجه تقبلت طلتها نوعا ما..ونسرين حبتها هلبه.
بس مافيش وحده من الحاضرات قدرت بطلتها تتغلب ع جمال طلة الأميرة..
في مشيتها وتصرفاتها...
اميمه..
غلبت حتى طوبى اللي غالبا ماكانت تخطف الاضواء بأناقتها..
وهي ماشيه بطريقها لأريج العيون مانزلتش من عليها..
وأمها كانت فرحانه بيها هلبه..
وصلت في اريج وسلمت عليها بالخد من بعيد لبعيد وهي تقول؛مبارك روجه..
اريج؛الله يبارك فيك..نبي نعرف علاش جيتي معاش بيدورني حد معاك..
ضحكت اميمه وهي تقول:مافي حد يقدر يغطي عليك اليوم..
طوبى:لاوين ميمو..بصراحه اني مبهورة شن القفطان هدا جلطه..ولاالمكياج..اني نعرفه كويس مشيتي لفايزة..
اميمه هزت راسها وهي مبتسمه..
ع جية غرفه:ميمو شن هدا شن هدا يابنتي ارض جو..
ضحكت اميمه...
طوبى بضحكه:الله يبارك..
وتجيهم مطيره وهي تقول:اللهم صل ع النبي..الله يبارك ع بنياتنا..لو كنت مكان مغليه كل يوم نصلي الشكر ع هالنعمه اللي ربي عطهالي كل وحده احلى من الثانيه..
ابتسموا كناين عيلة شنيبه واميمه قالت:سلمك عمتي..
مطيرة:سلمها ياربي..بري سلم بنتي لأمك تبيك..
شبحت اميمه لأمها وابتسمت بعدين مشتلها..
🍃صابرين:عطيها دعوة اميمه هادي نبي نعرف شن دير بش يقعد جسمها هكي حتى بعد تزوجت ماسمنتش بكل.
نجاة:تعجب فيا اكثر من بنت عمها..
صابرين بضحكه:بالك بتعجبك بنت عمها !؟
شبحتلها نجاة بطرف عينها..
🍃وخديجه تبع في اميمه بعيونها وتشوف فيها كيف تبان حابة روحها بطلتها الليله..
وشافت كيف لفتت انظار الحاضرات ليها..
وهدا كله كان عاجب خديجه ع الأخر لأنه حيوصلها لهدفها بسهوله الليله..
🍃🍃🍃
من بين الحضور..
زوز من عمات اياد ووالد مهند خطيب آلاء وخالته السوريه اللي كانت تقول..
:شفتوها هي اللي لابسه ابيض وكمامها مفتوحين وطوال كثير..
:هادي سدرة المنتهى؟
:ايه هي..
:الله يبارك عليك زين..!معقوله هادي تقعد من غير زواج شن الرجاله معاش يشبحوا!؟
:تقدملا اشكال الوان واياد اولهن بس هي كانت ترفض مشان اخواتا كان بدا ظل عليهم لتربيهن..مرة وحده بس انكتب كتابها ع شب رفيق اخوها..وتوفى قبل العرس بسنه ومن بعدا سكرت سيرة الزواج بالمرة..
:لابتفتحها بالسيف عليها خواتها كبروا وتزوجوا مفروض تشوف حياتها ..
:واياد ياروحي بعد يتزوج مهند بيقعد بروحه يبي مراة تونسه..
:ماهو مشان هيك مهند بدو يطمن عليه بالأول..
:اني بنفتح معاها الموضوع توا..
؛لالا مش معاها هي..مع اختها فردوس .
:انا من رأيي تفاتحوا عمتها بالموضوع بتمون عليها وبتأثر كثير كمان..
شافوا لخالة اياد وين تشبح وشبحوا لمطيره..
؛هادي اللي لابسه قفطان زيتي؟.
:ايه هي..
:تمام...
☘☘☘☘☘
وفي سانية جد اريج ..
كانت خيمة كبيره ..
مليانه بالمعازيم..
دايرين عشي للرجاله..
الحضور بس للعيلة والأصدقاء..
كانوا متوزعين ع الطاولات الموجوده في الخيمه..
وعيون لطفي مرة مرة تشوف لولده مختار اللي كان مقعمز حاط رجل ع الرجل واللي معاه ع نفس الطاوله منهم عم اريج باين عليهم يتوددوله وهما يحكوا..
وهو مقعمز بكبر..مبتسم بكبر...واللبسه الطرابلسيه خلاته بي بمعنى الكلمه..
تنهد وقال؛مش عارف شن في فراسه..
بوه شبحله وقال؛مش باين عليه يعني واضح وضوح الشمس يالطفي..
شبح لطفي لبوه..
علي:يبيك تشوف وضعه كيف ولى ولوين وصل..
لطفي ابتسم تهكما وقال؛مهما دار ولوين مايوصل يوصل مش حيرقى في عيني..
🍃وهو في عز الهدرزة مع اللي معاه ع الطاوله غير عيونه وشبح لبوه لقاه يهدرز هو وجده..
غير عيونه عنه ورجع لهي باللي معاه وهو يجامل فيهم..
والمهدي من بعيد يشوفله وجنبه الجالي يقول..
باين عليه مولي حاجه كبيره..
المهدي؛فوق ماتتصور..فلوس وعلاقات ع جميع الاصعده في كل مكان عنده حبايب..
الجالي بإستغراب:طوبى ماجبتش سيرته بكل..
المهدي:شكلها ماتعرفش انه روح..
الجالي وهو يفكر؛ماأعتقدش..
المهدي:حتى لو تعرف اكيد ماتبيش تعرفه..
الجالي:علاش!؟
المهدي:واخده منه موقف زي ماعيلته كلها واخده منه موقف..نسيت اللي صار!؟
الجالي:لامانسيتش لكن هدا ماضي وراح ع حاله..بعدين اني بعيوني شفت لوحه راسمتها طوبى لخوها..
المهدي قعد يشبح لمختار بضيق..
ناض الجالي وهو يقول؛خل نمشي نتعرف عليه..
ومشي ناحيه..
وعبد الرؤوف يتبع فيه بعيونه لين وقف ع مختار ومختار ناضله وسلموا ع بعض تاني.
هدرزوا شويه ع الواقف بعدين مختار خدي الجالي لطاولة تانيه فاضيه وقعمزوا يهدرزوا..
☘مختار؛لاماتلاقيتش معاها شفت خواتي كلهم الا هي..
الجالي:غريبه..
مختار:ماعندهاش علم..متأكد..
الجالي هز راسه وقال:نعطيها علم حتفرح فرحه لما تعرف ماصارتش..تعرف هي عندها الرسم هوايه ومش أي رسم..احترافي..راسمتلك حتى انت لوحه..
تفاجئ مختار وهو يقول:اني!؟
الجالي؛ايه..وانت في عمر صغير..الباين عندها ليك صورة..
بدت ابتسامه فرح ممزوجه بالدهشه خفيفه ع وجهه..
الجالي بإبتسامه؛بصراحه فكرت نعزمك للحوش ونديرها مفاجآه..
مختار:لالا..خبرها واقترح عليها العزومه ولو رفضت رد بالك تضغط عليها..
الجالي بإبتسامه؛مش حترفض صدقني..
ابتسم وقال؛في حال رفضت ماتجبرهاش ع العكس..
الجالي هز راسه وقال:تمام تمام...فيها كيف ناخد رقمك يعني
كان صار ووافقت نلقى كيف نوصل فيك..
مختار:اكيد...سجل عندك...
🍃ولطفي يشوفلهم وين ماهما وقلبه مقبوض..
☘☘☘☘☘
وفي الصاله..
اريج كانت ترقص وحواليها بنات العيله وخالاتها طوبى وغرفه واختها آلاء وصديقتها الوحيده في الجامعه..
كلهم يصفقولها ويدوروا عليها وهي منطلقه..
واميمه مقعمزة حدا امها وتتفرج عليهم..
صفيه؛نوضي حتى انتي..
اميمه؛والله ماخاطري..
صفيه؛شوفي طوبى كيف ترقص ومغليه فرحانه بيها نوضي ياهمي.
اميمه؛تبيني نوض ع خاطر هكي!..
صفيه وهي تشوف لنجاه وصابرين كيف ناضوا بيرقصوا قالت:هاه شوفي حتى هادي ناضت..نوضي ياهمي تحركي..
استلسمت اميمه للإلحاح امها وناضت..
وصفيه تشبح لمغليه تراجيها تشوف اميمه وهي ترقص..
🍃والمسرح مقلوب قلب..
بالذات لما بدت صابرين ترقص..
كلهم وخروا حتى اريج عطتها مكانها ..
وخديجه تتفرج عليها وهي مبتسمه ابتسامه
