#طوبى "جنة طوبى"
#جمان_فريد
#الجزء_الثامن_والستين"رقعة شطرنج 1"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن أنس بن مالك رضي الله عنه قال: قال رسول الله ﷺ: قَالَ اللهُ تَعَالَى: {يَا ابْنَ آَدَمَ إِنَّكَ مَا دَعَوتَنِيْ وَرَجَوتَنِيْ غَفَرْتُ لَكَ عَلَى مَا كَانَ مِنْكَ وَلا أُبَالِيْ، يَا ابْنَ آَدَمَ لَو بَلَغَتْ ذُنُوبُكَ عَنَانَ السَّمَاءِ ثُمَّ استَغْفَرْتَنِيْ غَفَرْتُ لَكَ، يَا ابْنَ آَدَمَ إِنَّكَ لَو أَتَيْتَنِيْ بِقِرَابِ الأَرْضِ خَطَايَا ثُمَّ لقِيْتَنِيْ لاَتُشْرِك بِيْ شَيْئَاً لأَتَيْتُكَ بِقِرَابِهَا مَغفِرَةً}.
رَوَاهُ التِّرْمِذِيُّ.
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 نحنُ أعمق من أن ننطفئ.....نحنُ نجوم سرمدية الضياء.....🍃
-----------------------------------------------------------------------
في احد فنادق العاصمه المشهورة..
كانت الاء تتفاهم هي ومدير المطعم الموجود في الفندق ع الشغل اللي حيكون بينهم..
مقعمزين ع وحده من الطاولات ومعاهم موظفه في الفندق..
لاحظت آلاء ان مهتمين بيها..
وهالشي كبر في داخلها آمال لين قلب الحبيب ورجوعه ليها..
ياقداش كانت متمنيه تشوفه هديكا اللحظه...
🍃وهو كان خاش للمطعم وقتها مع زميلته الزوز مالاحظوش وجودها..
وقعمزوا ع وحده من الطاولات البعيده عليها بعض الشيء
مهند التفت لنادل وقاله..
نص نص..اكسبريسو..
الاء وين سمعت صوته خلت المدير يحكي..
وهي قعدت دور عليه بعيونها لين شافاته..
انطفت نظرات اللهفه اللي في عيونها وحل محلها الحزن وين شافاته مع آرام..
وحست وكأنه في من حاط قلبها في يده ويعصر فيه...
:انسه آلاء معاي؟
استاقظت آلاء وشافت للمدير بعدين هزت راسها بإرتباك..
🍃مهند؛الموضوع حلو وعاجبني بس لو تفوتي الفقرة هادي نحس فيها وسامحيني ارام تافهه..
ارام بضحكه؛غير شن عرفك انت خليني اني ندوي عليها وانت اسمع وبس..
مهند؛الله غالب جيت ديمقراطي مانقدرش نولي ديكتاتور
ضحكت آرام..
وجاهم النادل بطلباتهم وقعدوا يشربوا في قهوتهم وهما يتناقشوا في موضوع برنامج..
والاء مرة مرة تسرقلهم في النظر وتزيد من وجع قلبها..
لعند ماتمت اجتماعها معاهم واتفقوا ع كل شي..
بعدين ناضت تطلع..
ماكانتش تبي مهند يشوفها ولايحس بوجودها لأنها كانت متوقعه انه حيجرحها بتصرف او بنظرة..
برغم انها امالها مازال ماخابتش بس كانت في داخلها خوف من ردود افعاله..
سمعاته يضحك هو وياها..
وسمعتها هي تقول..
"فلساف درجه اولى"
وهادي كانت نظرتها حتى هي في مهند..
بس فلسفته هادي هي اكبر سبب لحبها في مهند...
من كثر ماكانت مضايقه ومقهورة..
ماانتبهتش ع قطعة ديكور موجوده جنب باب المطعم انضربت بيها وقريب طاحت..
لولا وحده من الزباين اللي جت بتخش وشدتها..
:لاباس لاباس..
ومدير المطعم والموظفه بسرعة البرق جو واقفين جنبها..
وهما يسألوا..
"صارتلك حاجه ياانسه..الاء انتي كويسه؟"
الاء وهي مرتبكه؛كويسه مافيا شي ماانتبهتش وين ماشيه عثرث..
الموقف خلا الانظار كلها تتوجهلها..
وطبعا هما الزوز ماكانوش استثناء..
مهند وهو يشوف لأهتمام المدير والموظفه بيها كان حاش بضيق شديد وفي نفس الوقت كان مزدري آلاء وبان هالشي ع وجهه..
ودورت ع ردت فعله بين الموجودين وشافت نظرته ليها..
مش عارفه علاش صدمتها رغم انها ماكانتش غريبه..
وزادت انصدمت اكثر لما شافاته غير عيونه عنها بلامبالاة وكمل كلام مع آرام اللي كانت هي التانيه تحاول دير روحها عاديه...
الاء تماسكت وقالت للي حواليها:شكرا..
ومشت طلعت من المطعم وهي تجر في اذيال الخيبه بعد ماتأكدت ان مهند مالاش علاقه بأي شي صار معاها مؤخرا...
🍃🍃🍃🍃🍃
الساعه 4:00قبل العصر..
روح عبد القيوم من العمل...
درس سيارته قدام الحوش ونزل..
لما سكر الباب شاف بنظرة عابرة للقهوة لمح فيها شي غريب..
وين ثبت نظره عليه اتفاجئ لأبعد حد..
مشالها وهو يقول بضحكه اندهاش؛طبه طبه..
ضحك راجل صفيه وقال:تعال تعال..
ومشي عبد القيوم خش داخل..
وعيون نضال معاهم وهو يشوفلهم بإبتسامه..
حضنوا بعض وعبد القيوم قال...
حمد لله ع السلامه ياسي..
معمر"راجل صفيه":الله يسلمك ياسي..
بعد عنه وقاله؛عادة الطبان اللي عندك كان تفوتها..
معمر بضحكه؛قعمز قعمز..
قعمز عبد القيوم وقال: لاباس ميغ،،مايجندك ماتكنا الصاهت "كيف حالك وكيف حال الصحه"
معمر: اخمادغ مسينغ.. "الحمد لله"
عبد القيوم؛شن الريح اللي عزقاتك علينا؟
معمر:شغل انا وجماعه هنا ..
عبد القيوم؛شور السيارات..
معمر بضحكه:اها.
عبد القيوم؛خديت ولامازال؟.
معمر:نبيك تعدي معايا بعدين تشوفها وتعطيني رايك..
عبد القيوم؛ايوه.."حاضر"..متغدي؟
معمر:ايه تغديت عزمني واحد معرفه..ننقاني توا نبي نرقد بس..
ناض عبد القيوم وهو يقول؛هي صبي معاي..
ناض معاه معمر..
وعبد القيوم جي بيدفع الحساب..
جاه صوت نضال وهو يقول..
"مدفوع تراهي مدفوع"
ضحك معمر..
وعبد القيوم شاف لنضال بإبتسامه وقاله..
نوارة ياقدر..
نضال ضحك..بعدين قعد معاهم بعيونه لين طلعوا من عنده..
وهما ماشيين للحوش تلاقوا مع ربيع اللي طلع وقف قدام المطعم متاعه..
قال بصوت مفحم..
عبدو..
عبد القيوم وهو يقلد فيه..
ربيع...
ابتسم ربيع وقال..
تنميرت يالاخ القايد..
ضحك معمر وقال؛بوجودك..
وكملوا طريقهم للحوش وخشوا...
ع طلعة المهدي من المطحن كان يبي يروح للحوش..
شاف سيارة نسرين جايه...
درست قدام الحوش وهو قعد واقف يشوفلهم..
نزلوا هي وخديجه من السيارة وكانوا منزلين معاهم كياس..
نسرين بنظرة عابرة شبحت لربيع بس طول غيرت عيونها عنه لما تفكرت المهدي..
المهدي طول التفت وشاف لربيع لقاه داير روحه مشغول بتليفونه..
رفع حاجبه وقعد مركز بنظره عليه..
نسرين جت لخديجه وقالت؛كاتم ع نفسه..
خديجه ضحكت بكتمان..
وبعدين وحده فيهم فتحت الحوش وخشوا..
والمهدي وهو يشوف لربيع..لف ومشي لحقهم..
ربيع شبح جيهته مالقاشي قال بإمتعاض..
عظم بوغصاص..
🍃🍃🍃🍃🍃
الساعه 6:00مساءا..
في حوش المحجوب..
كان جايه اسكندر بعد ماطلب منه يجي بش يحكي معاه عن قضية نسيبه عبد الرؤوف..
اسكندر؛لما نسأله يقولي مش عارف لكن متأكد انه يعرف..
المحجوب بإستغراب؛وعلاش بيدرق ع الشخص اللي كادله ولبسه تهمه كبيره زي هادي؟
مط اسكندر شواربه للأسفل بعدم معرفه..
المحجوب شد ذقنه وقعد يمسح عليه وهو يفكر..
اسكندر:عارف الموضوع كبير هلبه لين قاعدين نديروا في جهدنا بش نطلعوه بريء وتنظاف صورته اللي وسخوها..
المحجوب شبحله وهز راسه وعقله مشغول...
🍃بعد ماودع اسكندر...طلع بنبيله لحوش لطفي الواعر..
وغرفه لما شافت نبيله فرحت من قلبها بجيتها..
☘نبيله وهي تحاول تبان قويه قدام غرفه؛بعون الله حيطلع وقبل رمضان وقولي قالتها نبيله..
غرفه ودموعها ينزلوا؛يارب يارب مايخش علينا رمضان الا وهو معانا يارب..
ونبيله وهي تسمع فيها تدعي كانت حابسه دموعها ومن داخل تبكي وهي تأمن وراء دعائها...
🍃وفي الجامع..
بعد صلاة المغرب..
عبد القيوم قبل مايطلع من الجامع هو ونسيبه كان يسرق في النظر للطفي الواعر..
يراجي فيه يناديه ويوفقه..بس طلع التارقي مع قريبه من غير مايوقفه لطفي..
اللي كان لاهي بالكلام مع المحجوب بخصوص قضية عبد الرؤوف..
المحجوب:نكون معاك صريح القضايا اللي من النوع هدا طول بس حني نحاولوا ع قد مانقدروا نديروا حاجه قبل جلسة المحاكمه..
لطفي هز راسه وع وجهه باديه ملامح الهم وهو يقول..
يامفرج الكروب ياناصر المظلومين يارب..
طبطب المحجوب ع كتفه وقال..ونعم بالله انت وسع بالك ومعاش تاكل روحك..
لطفي بضيق:غصب عني يامحجوب..
المحجوب:عارف ومقدر...بس حرق الدم والتخميم الزايد مايديروش حل بالعكس يهلكوك...خليها ع ربي يالطفي..
لطفي؛يارب..
طلعوا من الجامع ولبسوا احذيتهم..
ولما كملوا طريقهم قال المحجوب للطفي متسائل..
ايه حقه!..خيره المطحن مسكر؟
تنهد لطفي بضيق وبدي يحكيله...
المحجوب بإستغراب؛من يكون الراجل اللي بتشاركه هدا؟
لطفي؛واحد نعرفه زي نفسي..
المحجوب؛نصيحه من خوك الصغير لو نويت تخليه يشاركك لازم كل شي يمشي بالقانون ويكون موثق فوت الجو متاع حسن النيه والثقه..
لطفي:اكيد من غير كلام..
المحجوب:علاش ماتبيش تقول من هو؟
لطفي؛الراجل طلب مني مانقولش..
المحجوب:الاسباب..
لطفي بضحكه؛تحقق معاي ولاكيف؟
المحجوب؛لاحاشى بس نبي نطمن يالطفي الوقت هدا بسبب ضعف سلطه القانون الناس بالفلاقي كلبت وبدوا يديروا اي شي ع خاطر الماده..
لطفي؛عندك حق بس من ناحية الراجل هدا كون هاني..
المحجوب رفع حواجبه ونزلهم وهو يقول..
إن شاء الله خير..
لطفي:إن شاء الله..
🍃🍃🍃🍃🍃
وفي شقة الشريك السري مجهول الهويه..
تحديدا الدار اللي يمارس فيها عبد القيوم في هوايته..
معمر؛تو هذين كلهن طلبات ناس؟
عبد القيوم هز راسه بإيجاب وهو يغلف في اللوحات..
معمر:وتخدم فيهن بلوشي؟
عبد القيوم؛تبيني ناخد عليهن فلوس حتى انت؟!
قاله؛حق تعبك..حتى لو كان عندك مال قارون اسمك تعبت فيهن..
عبد القيوم سكت وماباش يعلق وقعد لاهي باللي يدير فيه..
معمر؛اسمع..
عبد القيوم؛امم..
معمر:عمتك ناوياتك؟
عبد القيوم بضحكه؛ع شني؟
معمر؛ع الزيجه ياطيري وراهي رشحتلك العروس..
عبد القيوم بعدم تصديق؛تي عدي ياراجل..
معمر؛والله نحكي من جدي من الاخير صفيه دازتلك معاي تحذير..
رفع عيونه فيه وهو عاقد حواجبه قاله:قول الحق عطت كلمه؟
معمر:لامش للدرجة هذي بس ناويه وتبي تجبرك..الحق مش فاهم ليش؟عمرها ماجبراتك ع حاجه تافهه ولاكبيره تجبرك ع الزيجه!..
نزل عبد القيوم عيونه ورجع لتغليف اللوحات وهو معصب ومضايق..
معمر بضحكه؛شكلها خايفه عليك من الفتن..
التزم عبد القيوم الصمت..
معمر:نبصروا عليك ياراجل..
وقف عبد القيوم ع حيله وقاله؛نزل معاي نزل..
وخدي كم لوحه وطلع بيهم....
ومعمر لحقه بغيرهم وعقله يفكر في اللي صار مع عبد القيوم وهو مش عارفه..
🍃🍃🍃🍃🍃
"غرفه خالي المحجوب يبيك تلقيه واقف في الكوجينه"
غرفه:باهي..وناضت بالشويه عليها ومشت طلعت من دار المعيشه..
وعيون طوبى ونبيله معاها...
🍃وصلت غرفه في باب الكوجينه الخارجي وقالت..
خالي..
هو كان واقف قريب من الطاوله قاللها:غرفه..
طلعت وجاته صافحاته وهي تقول:كيف حالك اليوم؟
هو قال:الحمد لله...انتي شن حالك؟..وطلق يدها..
غرفه؛الحمد لله ع كل حال..
المحجوب:الحمد لله الحمد لله...بنتي حني قاعدين نسعوا وان شاء الله نوصلوا للي نبوه ويطلع في اقرب وقت..
غرفه برجاء:يارب العالمين..
المحجوب:غرفه بنتي انتي زوجة عبد الرؤوف يعني اقرب الناس ليه وتعرفيه اكثر من اخته نفسها واثقه فيه متأكده انه مايديرش حاجه زي هادي؟
غرفه بكل ثقه ودموعها في عيونها؛زي مانشوف فيك..
المحجوب؛باهي نبيك تعصري دماغك وتحاولي تتفكري كان مرة لاحظتي حاجات غريبه عليه زي مثلا تجيه مكالمات مايردش عليه..او يرد بعيد عليك ومايبيكش تسمعي..او في مرة لمحلك ان في حد يهدد فيه..
غرفه بإبتسامة الم؛خالي اني عارفه من ورا اللي صاير لعبد الرؤوف..
هو اتفاجئ وقال؛كيف!؟ عارفه من الاول قصدك؟
غرفه؛هما ع اساس درقوا عليا التهمه اللي شدوه ع خاطرها بس اني عرفتها بعدين من حسين..
المحجوب؛حسين؟
غرفه؛ايه حسين انجبرت نواجهه وهو قالي..
🔺️في وقت سابق..
كان حسين واقف في جنان الحوش يراجي في عمته بش بيرفعها للمحلات اللي تتعامل معاهم في بيع "الهريسه"
طلعت غرفه وشافاته وهو واقف لاهي بتليفونه..
ترددت هلبه قبل لتمشيله..
بس في الاخر حسمت امرها ومشتله..
وين قربت توصل فيه قالت..
حسين..
شبحلها..شافها واقفه قدامه بملايتها وخمارها..
سألها وهو يقول؛بتمشي معاها؟
غرفه؛لالا..جيتك في حاجه تانيه..
حسين؛حاجه شني؟
غرفه تنهدت وقالت؛عبد الرؤوف علاش محبوس؟
حسين سكت شويه بعدين قال:
مادام جيتي تسألي معناها تعرفي حاجه..
غرفه:انت قولي قبل في شن تاهمينه؟
حسين مرر نظره قدامه بعدين قال..
اختلاس من وزارة الداخليه..
غرفه قعدت ساكته..
هو شبحلها شويه وقال:خيرك سكتي!؟
غرفه؛شي...وجت بتمشي وقفها لما قال..
غرفه كان في حاجه تعرفيها قوليها..
غرفه؛مانعرف شي..
ومشت وخلاته وخشت للحوش...
🔺️في الوقت الحاضر...
المحجوب بشي من الانفعال:باهي قولي من هو؟
غمضت غرفه عيونها بألم بعدين فتحتهم وقالت بصوت مخنوق...
"مختار"
🍃🍃🍃🍃
والمحجوب من لما عرف اللي عرفه من غرفه وهو يفكر بصدمه من اللي ذكراته عن اسباب ودوافع خوها من اللي داره...
وختمت كلامها لما قالتله ان مختار مازال ناوي ع اكثر من هكي..
《تصدق ياخالي ان يوم بوي وجدي سكروا المطحن هو كان حاضر ويتفرج..جاي يتشمت راهو..كل اللي من شافه هداكا اليوم قال جاي يتشمت》
كلام غرفه هذا بالذات قعد يتردد هلبه في عقل المحجوب...
🍃🍃🍃🍃🍃
طلعت طوبى من الحمام بعد ماتوضت لصلاة العشاء..
مشت بطريقها لدار البنات..
خشتلها..
لقت الاء تصلي فيها وهي تبكي..
ولت طلعت وسكرت الباب..برغم قلقها عليها بس مابتش تخرب عليها لحظه المناجاة..
اللحظه هادي مش بالساهل يعيشها العبد لو انقطعت عليه من الصعب يرجع يخشع فيها من جديد..
مشت للشماعه وهي تفكر في حالتها وتتسائل..
ياترى شن صاير معاها جديد قالبها حالها اليوم كله؟
خدت ملاية غرفه من الشماعه وخشت للصاله تصلي...
🍃بعد ماكلمت الصلاة..
ناضت ومشت ردت الملايه لمكانها وتوجهت للكوجينه تشوف في اختها فردوس شن دير..
وين خشت عليها لقتها تتكلم بالتليفون..
فردوس؛خلاص ابعتيلي ارقامهم واني.نتفاهم معاهم..
"حاضر تو نبتعهملك...بنقولك حاجه فردوس"
فردوس شبحت للباب لقت الاء خاشه وكان واضح ع وجهها اثار البكي..
ردت علي حماتها وهي تقول..
قولي!..
"وليد ولد بشر هاجر برا البلاد"
فردوس وهي تشوف لآلاء كيف تشرب فالميه قالت..
وليد هاجر!؟
حطت الاء الطاسه بقوة ع الطاوله وقالت بكره وصوت منخفض بعض الشيء..
مشيه بلارجعه..
ومشت طلعت من الكوجينه وعيون طوبى وفردوس معاها..
بعدين ناضت طوبى ومشت لحقتها..
وفردوس كملت تقول..
"ربي يسخرله الحال ماعندي مانقول غير هكي"
🍃وفي الدار..
خشت طوبى ورا الاء وسكرت الباب وهي تقول..
خيرك الاء شن صاير معاك؟
الاء قعمزت ع السرير بهده وقعدت تبكي وهي تقول..
دمر حياتي الله يدمره حرقلي قلبي قهرني هو وامه وبوه ان شاء الله مايربحوا..
مشتلها طوبى وهي تقول؛باهي خلاص اهدي اهدي..وقعدت تمسح ع شعرها وهي تقول..
مش عديتي اللي صار وقاعده تعيشي حياتك ومافيش احلى منك شن صارلك فجأه؟
الاء ببكي؛مايغركش برودي اللي تشوفي فيه ربي بس عارف اللي نحس بيه..والله كنت نقوي في روحي بالسيف لعند ماصار اللي صار اليوم..باهي اني معترفه ان غلطي كبير والله ندمت عليه علاش هو مايسامحش!؟ مش يحبني علاش مايعديش!؟
طوبى قعمزت جنبها وقالت بنبرة ألم؛لأن مش كل غلط ينغفر ياالاء..بالذات الخيانه لاتتعدى ولاتتفوت مافيش معاها سماح..اللي يستغفلك ويستغل حسن نيتك اللي كنتي ماشيه بيه معاه مايستاهلش فرصه تانيه لو كانت روحه فيها..
مش مجربه ولاك عارفه بشن يحس البنادم اللي يكون ماشي مع الناس بحسن نيه وهما يضحكوا عليه من وراه ويطعنوا فيه من ظهره..تي مرات يكره روحه ويستصغر نفسه ويشوف انه مايسوى شي..وقعدت ترشف بعديت تنهدت بحرقه وقالت..مهما يدير معاك مهند ماتلوميشي..وردي بالك تكوني وق..حه لدرجه تطلبي فيها منه انه يسامحك لأنك خنتيه وضحكتي عليه..هو هكي حيزيد يكرهك ويقرف منك اكثر واكثر..
الاء وهي تشوف لطوبى بصدمه؛طوبى قوليلي شن صاير بيني وبين الجالي شن دايرلك..
طوبى بوجع وهي تبكي؛ماتجبيش سيرته بالله عليك معاش تقولي اسمه قدامي..وحطت ايديها ع وجهها وانهارت بالبكي..
وآلاء نست اللي هي فيه..وخدتها في حضنها وهي تقول بألم ممزوج بالقلق..خلاص حبيبتي..اني اسفه...
وطوبى استمرت في البكي وكأنها قاعده طلع شويه من اللي قاعده تكمد فيه طول الأيام اللي فاتت..
🍃🍃🍃🍃🍃🍃
بعد صلاة العشاء..
مشي لطفي لعبد القيوم اللي كان يهدرز هو ونسيبه ومعاهم ربيع وبلال...
وقف عليهم وقال؛السلام عليكم..
كلهم ردوا عليه السلام..
وعيون عبد القيوم كلها ترقب وهو يشوفله..
لطفي؛بناخد منكم التارقي شويه..
معمر؛خوده بكل وريحنا من هرجته..
ضحك لطفي..
وعبد القيوم ناض وهو متجاهل اللي قاله معمر عقله مش فاضي بيه توا..
جي للطفي وقال:تفضل ياحاج..
ابتسم لطفي ومشي هو مشي معاه...
ربيع؛المهم مودير امورك محلوله خلاص واني انت ندخل ع رمضان عرسان..
معمر بضحكه؛قريب نديرها وناخد التانيه..
ربيع:لاانت صديق تدخل ع القبر ع طول..
وبلال يشوف لربيع وهو يضحك..
☘اكيد مش حيتهنوا ناس الشارع لين يعوضوا بلال عن خسارته ويردوله فرحته اللي انسرقت☘
🍃وبرا الجامع..
كان قلب عبد القيوم وكأنه يرف من قوة الدق...
وكأنه نال مراد قلبه...هالمراد المستحيل...
لطفي:بإذن الله غدوة نتموا الاجراءات كلها لو كنت فاضي طبعا..
عبدالقيوم بإبتسامه فرح:نفضي روحي..
لطفي بإبتسامه استغراب:لهالدرجه كنت راغب الشراكه!؟
عبد القيوم انتبه لنفسه وضبط روحه شويه وقال وهو يحاول يخفي ارتباكه:قصدي بش بنبدوا الصيانه والشغل ع المطحن بدري لازم تفتحوا قبل رمضان..
وقال في نفسه ع روحه.."سلمك فتراش"..
لطفي بإبتسامه:قصدك نفتحوا..
عبد القيوم بنص ضحكه؛نفتحوا..
لطفي؛خلاص غدوة لينا لقاء إن شاء الله..
عبد القيوم؛ان شاء الله..
لطفي؛تو نزيد نكملك الصبح ونقولك شن بيصير بالزبط..
عبدالقيوم؛ان شاء الله..
لطفي هز راسه وقال؛إن شاء الله..ان شاء الله..ايه بالله جيب نسيبك وتفضلوا تعشوا..
عبد القيوم بآبتسامه؛بارك الله فيك لكن في من سبقك وعزمه..
لطفي:خلاص نكسبوه غدوة ع الغدي ان شاء الله كان مازال قاعد..
عبد القيوم:مرة تانيه ان شاء الله بكرا من الصبح مسقد..
لطفي:فيها خيرة وان شاء الله يروح سالم
تصبح ع خير..
عبد القيوم؛قدامك كل خير...
وقعد واقف يشوف للطفي وهو ماشي للمحجوب وعلي الواعر..
ولأنه بعدين خش للجامع طول مالاحظش نظرات المحجوب ليه...
🍃🍃🍃🍃🍃
تشبح بعيونها المدمعات في الفراغ...
وبنت اختها تشوفلها بنظرات حزن..تسائلت وهي تقول..
غير كان نعرف شن صايرلك بس!..
هي غيرت عيونها ليها وحركت راسها يمين ويسار وقالت:انسي خلاص فوتي..وردي بالك تقولي لأريج حاجه..
آلاء بقلق:انتي هكي زدتي خوفتيني!..
طوبى بنتبيه حاد؛الاء اريج ماتقوليلها شي..
الاء هزت راسها بالموافقه وهي في قمة القلق...
دق الباب..
مسحت طوبى دموعها بسرعه..
انفتح وخشت فردوس انتبهت لطوبى وهي تقول..
هي تعالوا تعشوا..
ناضت طوبى وهي تقول:هيا الاء نوضي.. ومشت بتطلع..
والاء ناضت وراها وهي تفكر بقلق..
ومشت طلعت حتى هي..
فردوس خلت طوبى تسبقهم وسألت بنتها بحركات الوجه..
"شن في"
الاء اشرتلها بسبابتها وهي تحرك فيها حركة دائريه..
"بعدين نقولك"..
ردت فردوس نظرها لطوبى وهي تشوفلها بضيق..
لين وصلوا للدار وخشولها..
وقعمزت ع سفرة العشي اللي شاركتهم فيه نبيله...
🍃بعد العشي..
المحجوب خش للحمام الخارجي بش يغسل ايديه..
وين طلع منه لقى لطفي قدامه كان بيخش حتى هو..
خش لطفي وهو يقول..
ماتروحش قبل الشاهي..
المحجوب:لامازال مش مروح..
وقعد واقف يراجي فيه لين طلع...
لطفي استغرب لما شافه قعد واقف قريب من الحمام سأله..
تبي حاجه محجوب؟
المحجوب:لطفي التارقي هو اللي بيشاركك ولا؟
لطفي سكت وماردش..
المحجوب قدمله خطوة وقال؛ضروري تقولي الحق يالطفي هو اللي بيشاركك وهو قالك ماتقولش..
لطفي مالقاش مفر من الاعتراف قال..
ايه هو وكان شرطه الوحيد انه مايطلعش في الصورة، صراحه هو قالي سبب ماخشش راسي حسيت ان في حاجه تانيه..
المحجوب:انتم امتى بتموا موضوع الشراكه؟
لطفي:غدوة إن شاء الله..
المحجوب:بنحضر معاكم..
لطفي:بتحطني في موقف مع الراجل..
المحجوب؛تو نتفاهم اني وياه مادورش..
لطفي سكت شويه وهو يفكر بعدين قال..
شن في يامحجوب؟
المحجوب:مافي شي نبي نطمن بس..
لطفي ماباش يسأله اكثر من هكي كل اللي قاله..
باهي تو نكلمك غدوة ان شاء الله..وحط يده ع ذراعه وقال..
خش خش..
مشي المحجوب بيخش للمربوعه ولطفي خش وراه...
🍃🍃🍃🍃🍃
الساعه 11:00ليلا..
في هالليله كان الجالي موجود في الفيلا متاعه..
سهران في مكتبه ع الخدمه وفي جنبه فنجان قهوة هو دايرها..
رشف منها بدت ع وجهها ملامح الضيق..
خطرت عليه قهوة طوبى قال بضيق...
مايعرف حد يديرها زيها..
حط الفنجان بعدين تنهد ..
حط يده تحت خده وهو مركز بعيونه ع اللاب توب..
فجأة..
رن تليفونه..
نزل يده وخداه..لما شاف المتصل استغرب..
فتح الخط ورد..
ياهلا باش مهندس عصمان..
"وبيك يامبدع"
الجالي وهو يجامل فيه ..
من بعدك حبيبي،شن خطرني عليك فهالوقت!؟
"جاني خبر نراجي فيه قداش ليا؛اول ماجاني كلمتك طول"
الجالي مط شواربه بملل وقاله..
شن هو؟
"تتفكر في اخر جاي لما وريتني التصميم اللي رسمته لملعب كورة"
الجالي بإنتباه؛ايه!
"وقتها قتلك التصميم مليح بكل وكان تطلع بيه برا ينفذوه طول..اني بعته وصار زي ماقتلك تصميمك اختاروه بين عشرات التصماميم لمهندسين اوربيين كبار"
الجالي؛اسمع عثمان مش رايقلك انت ومقالبك السخيفه..
ضحك وقاله..
"قسما بالله ندوي جديات..باهي نقولك حاجه بتصكر ونبعتلك الايميلات اللي وصلتني"
وسكر عليه..
الجالي كان مش مستوعب شي من اللي سمعه..
سمع نغمة الرساله اللي جاته ع ايميله..
نزل التليفون وبلهفه فتح الرساله ع اللاب توب وشاف الايميلات..
كانت مراسلات بينه وبين وحده من المؤسسات رياضيه لدولة اوروبيه..
قعد يقرا فيهم وهو مش مصدق عيونه...
يقرا ويعاود بش يستوعب حس روحه في حلم..
جاه اتصال تاني من صديقه..
رد عليه طول وهو يضحك قاله..
خيرك ماقلتش من الاول؟
"قلت نفاجئه بيها وفي نفس الوقت نثبتله اني نفهم اكثر منه" وضحك في نهاية كلامه..
الجالي بضحكه:طلعت تفهم حق كنت ظالمك..
"المهم اني بنوصلك بيهم تزيد تتفاهم انت وياهم كان تبيني نخدمك في اي حاجه بالخصوص اني حاضر"
الجالي:والله شن بنقولك ياراجل خليت دماغي يوقف مش عارف حتى شن نقول ولاشن ندير بارك الله فيك..شكرا بجد مشكور جدا..
"عفوا جدا..ضحك بعدين قال..تستاهل ياجالي"
الجالي؛ربي يحفظك عصمان باشا..
"ويحفظك..تصبح ع خير"
الجالي:وانت من اهله...
وسكر وحط التليفون قدامه وهو يضحك..
بعدين رفع ايديه وشبكهم في بعض وحطهم ورا راسه وهو يشوف لشاشة الاب توب بإبتسامه..
وترجع بيه الذكريات للشهور الاولى لزواجه من طوبى...
🔺️في وقت سابق..
مقعمزين الزوز قدام اللاب توب وهو يوريله في تصاميم لملاعب بتبنيها دولة قطر استعدادا لكأس العالم سنة 2022..
طوبى:كلهم لمهندسين اجانب يعني مش عرب..
الجالي؛تقريبا..
طوبى:مافكرتش تصمم ملعب من قبل؟
ضيق عيونه وقال؛حاولت كنت نبي نديره مشروع تخرج قبل لكن بعدين غيرت لحاجه تانيه..
طوبى:علاش!؟
الجالي؛مااقتنعتش بيه..
طوبى:باهي ماحاولتش مرة تانيه..
الجالي:لامافكرتش
..تعرفي قاعده لتوا عندي الرسمه متاع الصميم..
وناض من حداها ومش لدولابه..
وهي تشوفله بإبتسامه...
طلع مجموعه اوراق كبيره وقعد يدور فيهم بعدين قال..
هي هادي..
وجاها بيها ومدهالها..
هي خدتها وقعدت تشوفله بدت ع وجهها ملامح الانبهار وقالت..
روعه جالي يجنن؛معقوله هدا ماعجبكش؟!
الجالي؛مش عارف ماتحمستلاش حسيته ناقصه شي..
طوبى؛هو انت ادرى اكيد..بس كشكل حلو بالمرة..خسارة كان عندنا دوله زي الناس راك شفته في الواقع..
الجالي بإبتسامه؛لهالدرجه عجبك؟
طوبى:هلبه..وحسيته مش زي تصاميمك التانيه فيه حاجه خاصه...
قعد يشوفلها وهو يفكر في اخر جمله قالتها...
التصميم هدا الوحيد اللي كان ليه هو من جميع النواحي..لااستشار فيه حد ولاخدي فكرته من حد ولاقلد بيه حد..
طوبى مدتله الورقه وقالت؛ان شاء الله يجيك يوم وتشوفه ع ارض الواقع..
ابتسم ودارلها حركه بانفه خلاها تضحك..بعدين خدي منها الورقه وردها للدولاب...
🔺️في الوقت الحاضر..
طلعت منه تنهيده بضيق وهو يفكر في وضعهم توا..
وجه نظره لتليفونه وفكر يتصل بيها لكن سرعان ماتراجع عن هالفكره...
🍃🍃🍃🍃🍃
وفي حوش اهله..
تحديدا في دار مغليه ومحمد شنيبه..
كانوا مقعمزين ع السرير يهدرزوا ع موضوع الساعه بالنسبه ليهم..زواج نسرين..
مغليه بقلق؛اني خايفه كان يسمع بيها تزوجت يقول نبي ولدي..
محمد شنيبه:كان يبيه راهو جي خداه قداش ليه..
مغليه:هو خلاه بلعاني بش يقطع بنصيبها..
محمد؛ريحي بالك يامراة مايقدرش القانون مايخليشي بعد تزوجت انتي اولى بولدها..
مغليه:والله مانخليه ياخده لوشني..
هو قال؛صدقني لامدوره ولامعدل عليه..خلينا من سيرته وقوليلي ماتكلميش في عمر قاعده؟
مغليه بضيق؛قلبي ماصفاش من ناحيته.
قاللها؛خلاص عاد الراجل عرف غلطه واهو قاعد يتحمل في مسؤوليته..
مغليه بكبر:مازال مازال ياحاج خلي لين يطيب خاطري..
هو قال؛على كيفك..باهي قولي خيرني معاش نشوف في نجاة وبنت الواعر؟
مغليه؛ياسيدي نجاة قالت مش فاضيه الفترة هادي لاهيين بعرس قريبتها هذا علاش بعتت الصغار بس..اما بنت الواعر قاعده مريضه..
محمد شنيبه هز راسه وقال؛باهي..باهي..خلاص ارقدي وريحي راسك وسكري السهاره اللي جنبك..
وعطاها بالظهر ورقد..
وهي تنهدت بعدين طفت السهاره وحطت راسها ع المخده وقعدت تخمم...
🍃🍃🍃🍃🍃
وهديكا الليله..
كانت زي غيرها من الليالي اللي فاتوها ع طوبى...
اللي حواليها غمضت عيونهم...
وهي ساهره مع همومها بروحها..
☘اللي مر بحالتها يعرف قداش متعب ومؤرق التظاهر بالقوة والهدوء..قداش متعب اخفاء مشاكلك عن اللي حواليك ..قداش متعب لما تعيش يومك كله وانت متناسي وضعك ووين يجيك الليل يخطر عليك كل شي وتقعد تفكر ياترى شن بيصير بعدين..ياترى كيف حتكون نهاية اللي اني فيه!!؟
طوبى توا عايشه في دوامه مش عارفه كيف بتطلع منها..
تقعد تخمم وتفكر وتفكر لين تحس بخنقه رهيبه..
تخليها تنوض وتطلع للجنان وتقعمز فيه وهي تحاول تاخد انفاسها؛وهالشي تكرر معاها هلبه الفترة الاخيره..
بس هالمرة..
طلعت وفي يدها مذكرة وبيرو..
ومشت قعمزت ع الطاوله..
فتحت المذكرة وبدت تكتب...
(قررت نكتبلك..ندير زي ماكنتي ديري..دسيتي المعاناة متاعك علينا وحطتيها كلها ع الورق..
مش عارفه اذا كنتي ترتاحي بعد ماديري هكي ولالا..
بس اني حاسه ان هادي الطريقه الوحيده اللي ممكن تريحني من التفكير المستمر..
حاولت ندير زيك في هلبه حاجات..حتى في تصنع القوة قالت اميمه مرة انك قلتيلها تصنيعها ومثليها ومع الوقت حتولي قويه بجد..
بس اني ماصارش معاي هكي..اني توا زي اي شي ظاهره قاسي وداخله ضعيف ورخو...واني مانبيش نكون هكي بش ماننهارش..نبي نكون قويه من داخل ومن برا من غير تمثيل وتصنع..مانبي شي يهدني..تعرفي علاش؟ لأني بديت متوقعه يجيني من الدنيا ضربات اقوى لازم نكون اقوى منها حتى لو طيحتني ع ركابي نرجع نوقفلها من جديد...)
وقفت كتيبه وقعدت تقرا في الكلام اللي كتباته وهي تفكر فيه...
بعدين حطت البيرو ومسحت بإيديها ع وجهها ونزلتهم..
رفعت عيونها للسمي..
غمضتهم وقالت من وسط قلبها....
يارب...
🍃🍃🍃🍃🍃
ويطل صبح يوم جديد يحمل في جعبته الكثير...
يوم الأحد...22ابريل..سنه 2018..
☘☘☘
في حوش لطفي الواعر..
قدام المرايه في دار البنات..
كانت طوبى واقفه تتأمل في هيئتها الجديده لما شافتها اجتاح قلبها شعور حلو بالمرة...
عبايه واسعه لونها بترولي غامق..وشاربه لونها رمادي فاتح...
وشنطه من لون العبايه كانت عندها من زمان...
وبابتسامه خفيفه بانت ع الوجه..
طلعت من الدار وهي متحمسه لموعدها مع جنة قلبها...
وهي ماشيه قالت بصوت عالي شويه: فردوس اني طالعه؟
طلعت فردوس من الكوجينه وفي يدها طاسه ميه وهي تقول..
جاتك اميمه؟.
طوبى:قالت خشت للشارع..
عطتها الميه وقالت..اشربي مرقيه..
خدت طوبى الطاسه وشربتها..بعدين قال..
سلام...
ومشت وفردوس وراها وهي تقول..
بتمري ع المدرسه؟
طوبى:ايه...ولبست حذائها الارضي وقالت..ماتبي شي نجيبه في طريقي؟
فردوس؛قداش خاطري في مقروض كان تجيبي معاك
حتى حافظه صغيره..
طوبى بإبتسامه؛ان شاء الله..سلام..
ومشت...
وفردوس وقفت ع الباب وهي تشوفلها قالت..
بالسلامه...
🍃برا..
كانت اميمه مدرسه بسيارتها قدام حوش عمها ولهت بتليفونها شويه لين تطلع طوبى..
في جنبها بمسافه..
كانت مدرسه قدام حوش المهدي سيارة عبد القيوم اللي كان جاي من عمله بياخد حاجه من الشقه..
بعد ماخداها..طلع من الحوش متوجه للسياره..
عيونه شافوا لمطحن جنة..ارتسمت ع وجهه ابتسامه خفيفه..
وقبل مايوصل للسياره..
انفتح باب حوش الواعر اللي شافله طول..
وطلعت منه طوبى...
فاجئاته هيئتها...بدون مايحس بنفسه قعد واقف وهو مثبت نظره عليها..
هي وصلت في سيارة بنت عمها..
فتحت الباب وركبت..
وين اختفت من قدام عيونه استاقظ لنفسه..
عقد حواجبه وركب السيارة وهو مرتبك..
سمع صوت سيارة اميمه تحركت ومشت..
غمض عيونه بقوة وقال بتلقائيه..
سهيت ياربي..استغفر الله...
فتح عيونه وقعد يشوف قدامه..
جت بين عيونه مرة تانيه...
تنهدت بحسرة من وسط قلبه وقال..
الله غالب ياعبد القيوم..الله غالب..
وشغل السيارة ووخر بيها بعدين لف ومشي طلع من الشارع...
🍃🍃🍃🍃🍃
"انقهرت لما هزبني نحس في روحي طحت من عينه"
اسماء بضحكه؛يابنت الذين ياجي.فه سبقتيني ودرتي اللي نبيه منك من غير مانقولك؛طلعت ع نياتي قعدت تفكر كيف بنجيبهالك قلت اكيد بتقولي لامانقدرش ومانبيش نضرها ومش عارفه شني..
راما بغيظ:الحركات اللي دارتهم كرهوني فيها وزادها هو اللي يسأل فيا عليها..
اسماء بضحكه؛والله ماينخاف عليك يانصي..
راما؛خليني من الكلام هدا وقوليلي كيف ندير توا مش قادره ننسى كيف شافلي لما هزبني..
اسماء؛يييه انتي تبي هلبه ع ماتفهمي الشباب وحركاتهم انتي ماطحتيش من عينه انتي زهيتي في عينه بدي يركز عليك وهلبه ياغبيه..
راما قعدت تفكر في كلامها ..
اسماء؛غار عليك شكله..
بفرح قالت؛غار عليا!؟
اسماء؛ايه ياهبله ايه..توا ديري اللي قالك عليك وخليه يشوفك بنيه مؤدبه وزي الملايكه لأن حيبدا يشوف هديكا العكس..
راما وهي تفكر في اللي تسمع فيه؛صح..
اسماء؛وكلام عمتك حتى هو نفديه ومن اليوم اني وياك ماناش اصحاب في المدرسه بس فاهمه عليا؟
راما؛اصلا جيت بنقولك نفس الشي..
اسماء؛خلاها متفقين وتوا بري في حالك معاش تكلميني..
ضحكت راما وقالت؛كاشيك وصونيه دقيتك يابنيه..
ومشت وخلتها وهي تضحك..
واسماء تضحك عليها وهي تقول..تاعبه..
فجأة حست بتليفونها"البيلا" يهز طلعاته من جيبها..
شافت رساله جايتها من واحد من الشباب اللي تكلم فيهم..
قرتها وضحكت بعدين ردت عليه..
ع خشت ابلة الماده..دست تليفونها بسرعه وناضت وقفتلها مع باقي الطالبات...
🍃🍃🍃🍃🍃
مقعمزات الزوز ع كراسي الانتظار حدا حجرة الدكتورة..
اميمه:سمعت انه كان متزوج وعنده ولد وطليقته دكتورة هني كان ماخابش ظني هي نفسها اللي شفتها هني قبل..
طوبى شبحتلها بطرف عينها وقالت؛وانتي خيرك شاغله روحك بيه هكي؟!
اميمه بضحكه؛مش زي اللي في بالك ياأم عقل مسوس..بس عندي فضول جيهته هلبه وخاطري نعرف عنه هلبه حاجات.
طوبى:حي عليك الفضول اول حاجه راهو..
اميمه؛ريحي جمالك والله مافي حاجه تي راجل نديد عمي لطفي..
طوبى:لهالدرجه كبير!..
اميمه بتضييقة عيون:مش بالزبط بس يعني كبير عليا نحس الفرق بينا 20 سنه..
طوبى ضيقت عيونها وهي تقول: اووف..هلبه..
اميمه؛هدا علاش نبيك تحولي الافكار المسوسه من راسك..
طوبى بضحكه؛باهي قوليلي شن شكله بالك نخطبوه لميرو..
اميمه ضربت طوبى ع ذراعها وهي تضحك..
وطوبى تضحك معاها..
شويه الممرضه نادت..
"طوبى لطفي الواعر"
طوبى:اهيا..وناضت واميمه ناضت معاها وهي تقول..خل نمشي ندهور في المصحه لما تكملي رني عليا..
طوبى هزت راسها ومشت خشت للحجره..
واميمه مشت دير جولتها في المصحه...
🍃🍃🍃🍃🍃
في حجرة الدكتورة اللي تابع عندها طوبى..
الدكتورة؛هاه شن الاخبار شن حالكم انتي والبنبونه الصغيره؟
طوبى بإبتسامه:الحمد لله رب العالمين..
الدكتورة؛ماشيه ع الادويه والفيتامينات وملتزمه بالنصايح اللي عطتيهالك؟
طوبى هزت راسها وهي تقول:ايه..مابذلتش مجهود بكل طول الاسبوع اللي فات وماطلعتش نهائي..
الدكتورة؛كويس كويس..طوبى اشربي ميه هلبه بتضطري تخشي الحمام هلبه صح بس معليشي بتتحملي بش ماتزيدش نسبة البكتيريا في البول ولاقدر الله بعدين تصيرلك ولاده مبكره..
طوبى؛بديت نشرب هلبه نطلع من استيكا وحده بروحي..
الدكتورة:اكثر طوبى اكثر كل ماتزيدي كل مايكون افضل..
طوبى هزت راسها وقالت؛حاضر..
فجأة دق الباب..
الدكتورة؛تفضل..
انفتح الباب وخش منه شخص طوبى لما شافاته قلبها دق بسرعه من الخوف..
هو رسم ع وجهها ابتسامه لما شاف التغيير الواضح في هيئتها بعدين غير نظره للدكتورة وقال؛اسف عطلت الطريق زحمه الليبين كلهم في الشارع..
الدكتورة بإبتسامه؛مش مشكله توا كيف خشت المدام ..
سكر الباب ومشي قعمز مقابل طوبى وهو يقول..
مفاجأة ولا؟..ورقص حواجبه..
هي اجبرت ملامح وجهها ع الابتسامه وقالت..
ايه...
الدكتورة:كلمني امس وشرحلي الوضع وقال ليكم فترة بعاد عن بعض وقالي نبي نجي ونديرهالها مفاجأه..
الجالي بضحكه؛قلت للدكتورة تتوحم عليا راهو..
ضحكت وشافت لطوبى وقالت؛حلو لما يكون معاك زوجك في المراجعات ويتابع معاك اول بأول..
الجالي:بالله يادكتورة في حد دار هكي قبلي؟
الدكتورة بضحكه؛في الحالات اللي عندي لا والله..
شبح الجالي لطوبى وابتسم بثقه وهو يقول..
بش تعرفي بس..
استفزاز..استفزاز..استفزاز..
وطوبى مجبوره تكبت الغضب وتخفي عصبيتها وتبان طبيعيه قدام الدكتورة..
برغم تصارع ملامح الابتسامه مع ملامح الازدراء ع وجهها...
شبحت للدكتورة وقالت؛تمام دكتورة تبي تقوليلي حاجه تانيه؟
الدكتورة حست ان في شي مش طبيعي بس دارت روحها عاديه وهي تقول..
لاهدا هو...
الجالي؛معليشي دكتورة نبي نطلب منك طلب..
شبحتله طوبى وهي تغز ع سنونها المخفيه ورا فمها المسكر..
الدكتورة؛تفضل..
الجالي:نبي نشوف بنتي ونسمع نبضات قلبها..
الدكتورة شافت لطوبى وقالت بإبتسامه؛طوبى؟
ابتسمت طوبى بتصنع وقال؛مافيش مشكله..
الدكتورة:تمام تعالوا معاي..
جت طوبى بتنوض فزلها الجالي وهو يقول؛راجي راجي..
وجاها وقعد يساعد فيها توقف..
الدكتورة شبحتلهم بإبتسامه..
اما طوبى قامت عيونها فيه وهي تشوفله بحده..
وهو يقول بإبتسامه؛بالشويه عليك وحده وحده..
وقعد يمشي فيها..
الدكتورة بضحكه؛مازال قاعده في الخامس..
الجالي بضحكه؛مش بيدي نرعش عليها..
طوبى في نفسها "الصبر ياربي"..
الدكتورة بآبتسامه؛ربي يخليكم لبعض..
طوبى" والعياذ بالله"
الجالي:امين مشكورة..
ووصل بطوبى للسرير وبحركه جريئه قدام الدكتورة رفعها وقعمزها عليه..
وطوبى عيونها قريب يطلعوا من مكانهم وهي تفنص فيه..
والدكتورة شاده ضحكتها..
هو بعد عنها شويه وهو يشوفلها بإبتسامه مافارقتش وجهه نهائي..
الدكتورة بإبتسامه:تمددي مدام..
طوبى تمددت ع السرير وهي محرجه هلبه ومعصبيه في نفس الوقت..
وهو حاط ايديه في جيوبه وقعد يشوفلها بإبتسامه مكر وحاجبه مرفوع...
☘دارت الدكتورة اللازم لطوبى وبدت بالفحص..
الدكتورة؛خلي عيونك ع الشاشه استاذ..
الزوز قعدوا يشوفولها بنظرات كلها لهفه...
بالذات الجالي...
وبدت ملامح الجنين تبان...
ودقات قلب الجالي تتسارع وعيونه رقرقوا بالدموع...
الدكتورة:هادي هي بنتك..
ابتسم من قلبه...
شويه وبدوا يسمعوا في دقات قلبها..
طوبى ضحكت وعيونها دمعوا وقالت بتلقائيه..
ياروحي..
اما الجالي..حس جسمه كله نمل...وقلبه يرفرف بين طلوعه..
كانت الدمعه حتهرب من عينه وهو طول مسحها...
الدكتورة شبحتله وابتسمت بتعاطف..
هو ضحك بإحراج وقعد يمسح في عيونه وهو يقول..
تأثرت شويه..
طوبى خفت ابتسامتها وشبحتله...
لما شافت حالته تمنت في وقتها لو كان نفسه الجالي اللي عرفاته في بدايه ارتباطهم...
تمنت لوكان الجالي هداكا هو حقيقته،الشخصيه المثاليه الحنونه الكامله...
تمنت لو كان قدر جنة انها تعيش حياة مستقرة معاهم الزوز ومايكونش مصيرها الشتات...
وتمنت وتمنت وتمنت...والواقع كان غير هالأمنيات...
🍃🍃🍃🍃🍃
بس احيانا الانفصال يكون خير للأطفال من وجودهم في بيئه كلها مشاكل ومشاحنات ومافيهاش استقرار..
☘"ماما نبي نمشي لبابا"
هناء وهي تساويله في شعره؛باهي حبيبي باهي..اصبر شويه بس..
:والله ياماما مساوي غير خليني نمشي بس..
تباعدت عنه وقالت؛تتغدوا ويجيبك هني..
هو بملل قال:حاضر ياماما باهي ياماما والله حاضر وباهي..
عقدت حواجبها وقالت بإبتسامه:هششش وبرا..
وطول طلع من قدامها وهي طلعت وراه وقعدت تبع فيه لين وصلت في أخر الممر..
وقفت وقعدت تشوفله وهو ماشي وع وجهها ابتسامه حزن..
☘وهو اللي كان عارف بوه في أي قسم يخدم..
كانت يتسابق مع خطواته بش يوصل فيه..
وين وصل في القسم متاعه شافه واقف ع اميمه..
🍃اميمه:الوضع غادي مأساوي لكن مافيش خيارات حاليا..
خالد؛لا في..اميمه اني نبيك تكون في مجموعتي هني..
اميمه وهي متفاجئه:اني!؟
خالد؛في حد غيرك واقف قدامي؟
ضحكت وقالت؛تفاجئت..قصدي يعني انت شايفني ماننفع لشي..
خالد؛اني قلت هكي؟! اني قلت انتي ماتنفعي في شي!؟
اميمه؛ مش بالزبط..
خالد؛اني مسؤول ع الكلام اللي قلته مش عن فهمك ليه..المهم توا شن قلتي؟!
قالتله؛بصراحه فاجئتني دكتور اني الحق حاليا همي كله امتحان الزماله..
خالد؛خليك ع جنب هداكا وفكري في العرض متاعي..
"بوي"
شبح لمصدر الصوت رفع حواجبه وقال بضحكه..
اهلا اهلا اهلا..
وفتح ايديه وجاه ولده وضموا بعض قدام اميمه اللي زادت تفاجئت اكثر وهي تشوف للولد..
كان نسخه مصغره عن بوه اشقر ووسيم وليه نفس الملامح..
بعد عنه وهو شاده قاله؛شن جو؟
:تمام انت شن جوك..وغمزله بعينه بعدين اشر بحواجبه لأميمه..
هو ضرب ولده ضربه خفيفه ع راسه وقاله؛هادي اختي الصغيره..بعدين اللي زيي مايمشوش معاها..
ضحكت اميمه وهي محرجه وخجله جدا..
خالد شبحلها بإبتسامه وقال؛ولدي زين الدين..
اميمه بإبتسامه؛ربي يحفظه..
زين الدين؛ويحفظك..شبح لبوه وقال..دكتورة ولامريضه؟
خالد؛تبي تولي دكتورة..
فنصت اميمه وهي تشوف لخالد..
زين الدين؛انت مشرف عليها صح؟
خالد؛ايوه صح
ابتسمت اميمه..
:باهي بوي هيا نمشوا ماعنديش معاك هلبه وقت..
ابتسم بأسف وقال؛باهي..غير نظره لأميمه وقال..نشوفك غدوة ان شاء الله وفكري في عرضي عليك كويس..
وخدي ولده من يده وقال..سلام..
ومشوا الزوز وهما يهدرزوا..
واميمه معاهم بعيونها وهي تشوف لحالة خالد مع ولده كان جدا لطيف...
بس في نفس الوقت وجعها حال ولده..
بالذات لما قاله وهو يستعجل فيه..
"ماعنديش معاك هلبه وقت"
🍃ووقت لقاء جنة الاول ببوها تم..
هاللقاء اللي ياما دار في الجالي اثر فيه تأثير عميق...
وقعد من بعده يسمع في توصيات الدكتورة ليه بخصوص طوبى..
الدكتورة؛لازم تجي في الموعد اللي قلت عليه بعد مادير التحاليل بش نشوفهم ونطمن عليها..
الجالي:إن شاء الله..بارك الله فيك دكتورة..
؛فيك بارك الله..هدا واجبي..
طوبى:شكرا..
الدكتورة بإبتسامه؛العفو..
مشي الجالي فتح الباب..
خلا طوبى تطلع هي الأولى بعدين طلع وراها وسكر الباب..
🍃طوبى قعدت تمشي بسرعه وهي تتصل بأميمه..
الجالي جي جنبها وقال؛نبيك في موضوع..
طوبى:ايوه خلاص طلعت تعالي بسرعه..
"خيره صوتك هكي!؟"
طوبى بنرفزة؛مش وقته اميمه تعالي وخلاص..
"باهي جايه جايه"..
سكرت طوبى وهو قاللها..
مش خاطفك راهو نبي ندوي معاك شويه والله ماواخد من وقتك اكثر من عشر دقايق..
وطوبى تزيد تسرع في مشيتها..
وهو عصب منها وقال...
طوبى ماطلعنيش عن طوري...
هي لما سمعت الجمله هادي خافت..
وقفت وشبحتله بحده وقالت..القطاف متاع كل مرة مانبيش نسمعه..
الجالي:لا والله لا..كلام جديد..
طوبى بتهكم:معناها كذبه جديده..
الجالي تنهد وقال؛طوبى انتي اسمعيني قبل وبعدين قولي اللي بتقوليه..
ع جية اميمه وين شافاته معاها انصدمت.
وجت لطوبى وهي تقول؛هيا طوبى..
هو شاف لاميمه من فوق لتحت وحاجبه مرفوع..
وهي مابتش تشوفله نهائي عيونها عن بنت عمها وهي تقوللها..
طوبى..
الجالي؛بري استنيها في السياره لوسمحتي..
اميمه شبحتله بحده..
طوبى :بري اميمه تو نجيك..
اميمه شبحت لطوبى شويه بعدين هزت راسها وقالت؛اني مقعمزه غادي..
ومشت قعمزت ع كراسي انتظار موجودات في المستراح بين الاقسام..
الجالي غير عيونه عنها بعد ماكان يشوفلها بازدراء بعدين شاف لطوبى وقال؛تعالي قعمزي..
وجي بيشد يدها بعدتها ومشت قعمزت..
هو تنهد بعدين مشي قعمز جنبها..
طوبى:قول اللي عندك بسرعه..
الجالي ابتسم وقال؛تعرفي توا لما شفت جنه وسمعت دقات قلبها تفركست بكل..
طوبى رفعت حاجبها وقالت؛المهم..
هز راسه وقال؛حاضر..نخشوا في المهم..تتفكري في تصميم الملعب متاعي اللي وريتهولك زمان؟..اللي قتلك جيت بنديره مشروع تخرجي بعدين ماصارش..
طوبى بحده:المهم..
هو قال؛بااهي المهم..عندي صاحبي مقيم في تركيا اسمه عثمان هدا تواصل مع مؤسسة حكوميه خاصه بالرياضه في ****** وبعتلهم التصميم متاعي وكان ضمن مئات التصاميم وهو الوحيد اللي اختاروه من بيناتهم..
قعدت تشبحله بنظرات اربكاته حسها وكأنها مش مصدقاته..
قاللها؛تبي تتأكدي مستعد نكلمه قدامك ونفتحلك المايك..
هي قالت؛صاحبك عثمان اللي كان يقرا معاك زمان؟
الجالي بآبتسامه؛عليك نور هو هدا..
هي ضحكت نص ضحكه ساخرة بعدين قالت..
صدقت اختك لما قالت عليه عبيط..
هو اختفت ملامح الابتسامه من وجهه...
طوبى بإبتسامه متهكمه؛سبحان ربي الحكيم.. توا بس فهمت علاش انت وامثالك ربي يطيحهم في ناس ماشيه بنيتها..شبحتله بقوة وكملت تقول..بش يعاقبكم بيهم..
كلامها مستفز وقاسي بالنسبه ليه..اثار غضبه بس هو كبته وحاول يحافظ ع هدوئه الظاهر وقال..المهم..المشروع هدا حتينفد في سنوات وبهكي لازم نقعد في ***** لين يتم المشروع...وطبعا مش حنمشي بروحي..
ركز بنظره ع عيونها وقال..نبيك تلوحي كل شي وراك صفحه سودا نمزقوها ونلوحوها من حياتنا اني وياك..وتسافري معاي وبعيد عن كل شي نفتحوا صفحه جديده مع بعض،طوبى نبي بنتنا تتربى بيناتنا ماتخليهاش تتشرد وتعيش طفوله تركبها امراض وعقد نفسيه..
طوبى ضيقت عيونها وقالت؛واضح انك مازال معيش روحك فالاوهام..اني مستحيل نرجع نعيش مع واحد زيك؛انت لو يربطوك في رجلي نقصها؛وكانك ع بنتي بعيد عنكم حتعيش احسن عيشه في بيئة كويسه تخليها انسانه عندها احساس وضمير وتخاف ربي حق مش مظاهر..
قعد يشوفلها بنظرات غضب ممزوجه بالحزن..
وهي ناضت وقفت وقالتله؛وايه حقه كان ماتقدرش تسافر بروحك ارفع معاك حبيبتك لكن بعد ماتتزوجها بش تفتحوا مع بعض صفحه نظيفه..
ومشت وخلاته بعد مارماته بنظرة ازدراء خلاته يكره نفسه للحظات..
قعد معاها بعيونه وهي ماشيه لبنت عمها وبعد ماوصلت فيها ناضت اميمه ومشوا مع بعض وهما يسرعوا ف خطواتهم
اميمه بكره؛شن يبي التافه؟
طوبى بازدراء؛وقا.حه ودنا.ءة ع هيئة بني آدم...
🍃وكملوا طريقهم لين طلعوا من المصحه وهو وراهم بمسافه شافهم كيف ركبوا السياره ومشوا...
بعدين هو ركب سيارته ورجع لعمله وهو يفور ويغلي من الغضب..
🍃🍃🍃🍃
مقعمز ورا مكتبه يشرب في القهوة وهو يسمع في موسيقى كلاسكيه..
خش عليه رضا السواق متاعه وفي نفس الوقت رجل المهمات الخاصه عنده..
هو لما شافه قال..
هات اللي عندك؟
:وصلني انه طلع من المصحه بعد ماطلعوا منها اختك وبنت عمك استاذ
عقد مختار حواجبه وهو يفكر..
؛الغريب ان في الايام الاخيره اللي ولينا نراقبوا فيه فيهم ماكانش فيه اي لقاء بينه وبين نجاه ولاعاد يلحق فيها ولاهي تجيه..
رفع مختار حواجبه..
؛الباين الفتره اللي وقفنا فيها مراقبته صارت حاجه..
نزل حواجبه وقال؛غلطه مني..هز راسه وقال..غلطه مني اني ماتوقعتش يصير شي خلال فترة غيابي؛المده كانت قصيره هلبه..بس مع هدا كان مفروض نحسب حساب مفاجآت القدر..
:نقدروا نعرفولك شن صار استاذ
مختار؛تو نعرف بروحي..برا توا جيب صابرين..
:حاضر..
ومشي طول طلع من حداه..
غير مختار عيونه عنه للطاوله الموجود عليها رقعة الشطرنج وهو يشوفلها بنظرات حاده...
🍃🍃🍃🍃🍃
وقت انصراف الطلبه من المدارس..
ومحمد هالمرة مروح بروحه ووراه يزن وصحابه..
كان يراقب قدامه في مروة..
وصاحب السيارة اللي قعد هالمرة ماشي جاي...
خشوا البنات للشارع وهما يمشوا بسرعه..
والسيارة وقفت قريبه ع فتحه الشارع..
قدملها محمد بسرعه..
ووقف ع الباب وطبس وهو يشوف لصاحب السياره قاله.
خير ياغالي تبي حد هني ومش عارفه حوشه وين بالزبط اني ندلك؟
هو قاله؛اللي نبيه عارف وين يسكن..
قاله؛وخيرك ماتمشيلاش..
:وانت شن دخل عمك؟
محمد بحده؛البنات اللي خشوا توا وربي كان مازال نشوفك لاحقهم مايصيرش طيب..
ابتسم بسخريه وقاله؛برا الهى في قرايتك سلم ولدي برا..
محمد بغضب؛ماتخلنيش ندير حاجه نندم عليها..
:هاك دير فيها لما تدخل في حاجه ماتخصكش البنت هادي نبيها وفي بيني بينها علاقه نقولك اسمها..نسميلك رقمها نتصلك بيها توا بش تتأكد..
محمد كان يشوفله بغضب..
وقلبه والعه فيه النار..
:مازال مش مصدق...تمام..اسمها مروة وامها اسمها فايزة وتخدم في مزين..ورقمها 094591..
ومالحقش يكمل كلامه ويتلقى لكمه ع فمه قويه خلاته ينزف..
وانهال عليه محمد بعدها بالضربات..
وهو ينزله ويضاربوا..
ويلتموا عليهم الناس ويحزوهم عن بعض..
فكوا محمد عنه بألف ياويلاه...كان يبي يذبحه ويشرب من دمه..
🍃يزن بضيق:عاجبك منظرك شن دخلك بيهم هما عاجبهم وراضيهم شن دخلك بيهم انت..
وقف وهو يمسح في الدم من انفه ويقول :عاجبهم وراضيهم؟!
يزن؛ايه..امس سمعت عمتي تدوي عليها مروة هادي وقالت نجاح عمة راما مديره مدرستهم معاش تبي راما تخالطها لأن اخلاقها مش كويسه..
محمد حس بخيبه امل كبيره بعد اللي سمعه كان شاك في صحة كلام راما في البدايه..لكن بعد اللي قاله يزن زياده ع اللي قاله الولد نفسه خلا الشك عنده ينقطع باليقين ومروة طاحت من عينه بكل..
طلع محمود من المطحن وهو يشوف لحالة محمد قاله..
شن صاير فيك انت!؟ داير عركه مرة تانيه!؟
مشي بيخش للحوش من غير مايرد عليه..
ويزن وراه..
محمود ؛تحمل مايجيك من بوك..ياويلك منه..
ومشي خش للمطحن...
🍃🍃🍃🍃
خشت عليه وفكت وشاحها وجت بتمشيله وهي تقول..
حبيبي استاحشتك..
مد يده ووقفها..
وقفت في مكانها وهي مستغربه...
وهو اشرلها تقعمز..
قعمزت طول وقالت؛شن في مختار..
قدملها وقعمز جنبها بمسافه بسيطه بعدين قال..
اختك وراجل اختي..شن جوهم مع بعض؟
توترت وارتبكت وخرت شعرها ورا وذنها وقالت..
خلاص..اطلقوا..
مختار بتعجب؛طلاق مرة وحده! امتى صار!؟
هي قالت بتوتر؛ليهم سبوع..
مختار قعد يحسب فيها بصوت عالي..
اسبوع..واني مروح السبت اللي فات في الليل..وتلاقيتا الاحد..احد..اتنين..ثلات..اربعاء خميس جمعه..سبت..
امتى اطلقت بالزبط؟
بلعت صابرين ريقها بخوف وقالت..
الخميس..
مختار بضحكه:الخميس!..
واني هدا كله ومانعرفش!؟
صابرين؛انت ماسألتنيش..
مختار:اها...هز راسه وقال.. باهي شن اللي خلاه يطلقها..
صابرين؛مانعرفش..
مختار:صابرين..!
صابرين بخوف:والله مانعرف والله..اللي نعرفه ان الجالي اخر مرة رفع نجاه للفيلا اللي مسكن فيها طوبى وهما غادي جاه اتصال من طوبى خلاه يطلع بيها بسرعه من الفيلا ومن بعد هداكا اليوم علاقته بأختي فسدت بكل وطلقها...
مختار:كيف يعني طوبى كشفتهم!؟
صابرين؛مش عارفه في حاجه مش مفهمومه..اختك تبان علاقتها بيه عاديه واضح من البوستات اللي تنزل فيهم ع الفيس..
مش عارفه..بس يعني هي فيها سذاجه تخليها تصدقه شن مايقوللها ويضحك عليها بسهوله..
وتجيها صفعه ع غفله كادت تشلها..
رفع سبابته في وجهها وقال..اخر مرة نسمعك تعيبي في حد يخصني قدامي..اني نقول شن مانبي لأنهم يخصوني لكن غيري لا..وغير هكي جو اللف والدوران والكذب متاعك..
نوضي انتلفي من قدامي...اطلعي..
ناضت وهي تبكي وبدون ماتزيد حرف طلعت تجري من مكتبه في الشقة..
هو طول ناض لتليفونه..
خداه من فوق واتصل برضا وقاله..
ماتوصلهاش..
وسكر وحط التليفون ع طاولة المكتب وهو يشوفله بعصيبه..
بعدين خداه وحدفه ع الحيط وهو يصيح بغضب
🍃وصابرين..
مشت طلعت من بوابة العمارة تبكي بعد مامنع السواق يوصلها زي ماتعودت..
بس وين طلعت شافها شخص كان جاي لمختار...
وشوفته ليها وهي طالعه تبكي زادته حيره ع المفاجأة...
#رقعة_شطرنج
#طوبى
....يتبع
