طوبى "أقحوان وفلة وياسمينه" #جمان_فريد #الجزء_الثلاثون" تفتحت ياورد" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ 🍃الثاني والعشرين..سبتمبر...2016.. الساعه 2:00ظهرا.. طالعه من احدي العيادات...بنت حلوة..بس مظهرها عملي... باديه عليها ملامح القوة...ووجهها ملامحه هاديه ولطيفه.. وصلت في سيارة صغيره مكركبه زي مانقولوا... فتحتها وركبت.. حطت شنطتها في الكرسي اللي في جنبها.. سكرت الباب..حطت المفتاح في مكانه وقالت:توكلت ع الله.. وشغلت سيارتها وتحركت طول.. تنهدت وقالت بتذمر؛ياربي شن هالرطوبه اكره جو عندي استغفر الله...نزلت المرش خشتلها نسمه قالت وهي مبتسمه:الله!... وقعدت تسوق وهي مركزة في الطريق.. مرة تتعارك مع اللي يعاكسها في الطريق..مرة تفوت ومادورش... لين وصلت لسوق الخضرة.. درست سيارتها وخدت الشنطه..ونزلت سكرتها.. ومشت للبراكه... وبدت كعادتها وهي تشري تفاصل... اريج:يامعلم اول امس كان الكيلو بخمسه! :حضرت عارفه الدولار بقى بكم النهارده.. اريج؛ايوه يامعلم حطوه في راس الدولار حطوا..يلا هات وامري لله... وشرت كل ماتبي من خضرة واغلبها فاصلت فيها لين غلبت الراجل وخدتها... ومن بعد سوق الخضره... مشت طول لواحد من محلات الحلويات المشهورة.. 🌻اريج بإبتسامه:عاد حني زباينكم وماناخدوا الا منكم انتم مافيش حاجه خاصه لينا حني..والله نديرلكم دعايه ماصارت.. ضحك صاحب المحل وقال:حاضر مادام قلتي بديري دعاية نعطوهالك بنص السعر.. اريج بضحكه:والله هدا احسن محل حلو فيك ياليبيا.... وخدت ماتبي..وطلعت من المحل... ومنه توجهت طول لمدرسة تعليم القياده... وقفت قدامه.. ودارت رنه بعدين سكرت... شويه وطلعت اختها بسرعه.. ركبت السيارة وقالت؛وين كنتي لتوا.. اشرتلها براسها للخلف.. التفتت شافت الكرسي الخلفي معبي بضاعه.. بعدين شبحتلها وقالت؛صرف ع الفاضي تو جدي يراجي فيك انتي تشري الخضرة! اريج؛ايوه كان عطيتهملك يولي صرف في المليان.. الاء:ايه اني اولى وراي جامعه ونبي لبس.. تحركت اريج بالسيارة بدون ماتتكلم.. وإلاء مازال تتكلم:كان هدا الفلوس اللي بتاخدهم امي اليوم اني بناخدهم..نبي دبش نبي كنادر..نبي حق كورس الحلو اللي نبي نخشله...اهو ع الاقل نتعلم صنعه نكسب منها فلوس خير مانقعد نطلب منكم.. اريج؛باهي اسكتي نفختي راسي خليني نعرف نسوق.. الاء؛طبعا هدا ماعندكم انتم وين نتكلم تسكتوني.. وقعدوا ساكتات الزوز.. بعدين آلاء ركزت في الطريق وقالت؛وين رافعتينا.. اريج؛بنمشي للحوش بناخد حوايج بنباتو غادي للسبت.. الاء:الله احلى شي وبالمرة نقولوا لجدي يطلعنا . ابتسمت اريج وقعدت ساكته.. ومشوا لتاجوراء.. اول ماخشوا لمنطقتهم .. الزوز شبحوا للافته كبيره.. عليها صورة بوهم...والخلفيه للصورة كانت علم البلاد.. ومكتوب تحتها اسمه...وجنبها مفقودمن 2011 في معركة تحرير سرت.. عيونهم غرقت بالدموع.. حولوها عنها..وكملت اريج طريقها للسانيه اللي فيها حوشهم... ☘بعد اللي صار مع مصطفى..مابتش فردوس تسيب حوشها واهل راجلها شدوا فيها تقعد فيها مع صغارها... حاولوا يساعدوها بس هي رفضت رفض قاطع وقالت.. مصطفى ماكانش يرضى صغاره ياخدوا صدقه من حد.. فردوس الانانيه المدللة المتطلبه اللي مايعجبها شي.. بدت تخدم في تطييب الوجبات للمناسبات بش تكفي نفسها وصغارها..برغم معارضة الجميع ليها بس هي اصرت بقوة وماسمحت لحد يمشي كلمته عليها.. لما نجح شغلها شاركتها عمتها مطيره وفتحوا معمل تطيب الآكلات الشعبيه مكانه حوش سدرة..ويعتبر ماشي حاله للآن☘ ☘☘☘☘☘☘ "ايه وشن دارتلها" هادي مغليه وهي واقفه في الكوجينه دير في الغدي وحداها حفيدتها سدرة تهدرز عليها.. سدرة وهي مقعمزة ع الكرسي:عواطف حذفت نجاح بالمشط متاع الاستشوار ردت عليه نجاح وحدفتها بالشبشب جي عليها..وجي بيضربوا بعضهم هكي طول..عمتي بعدتهم عن بعض..وحنينه نجمه داخت هكي ع الكرسي..وقلدتها.. ضحكت مغليه وهي تقول؛والله تسخف هالنجمه قعدوا في رقبتها تعاني في همهم.. سدرة؛حنينه.. مغليه؛نعم ياحنينه سدرة بضجر؛امتى بيروحوا بابا وماما مليت هلبه.. مغليه؛حي مليتي مني ياسديرة!؟ سدرة ضحكت وقالت:لاياحنينه لكن استاحشتهم.. ضحكت وقالت؛قريب بنتي قريب.. سدرة؛ديما تقولوا قريب قريب.. مغلية وهي تضحك؛لاقريب حق هالمرة يوم الجمعه.. سدرة بفرحه؛حقه! مغليه؛حقه حقه.. سدرة رفعت ايديها بفرح وقالت؛هيييه... ومغليه تضحك.. ع خشة محمد جاها وخدي منها طرف البريوش اللي تاكل فيه وكلاه في فم واحد.. سدرة؛علاااش ياحمودي! محمد؛حناي ماشي مع الاولاد خلولي غدي بنعطل.. مغليه؛قولي وين ماشي بالزبط.. محمد؛كلمت عمي الجالي وعطيته التفاصيل.. مغليه:باهي رد بالك ع روحك وفكك من رفقة السو.. ضحك وقال؛سلام ماغي.. ومشي طلع.. وهي ضحكت وقالت؛ربي يحفظك.. سدرة؛خدي بريوشتي.. مغليه؛خودي غيرها من الدولاب نوضي.. ☘☘☘☘☘ ومحمد ولد المهدي مشي طلع من الحوش.. لاقى صحابه فم الباب مشي هو وياهم وهما يهدرزوا.. وهما ماشيين لاقوا يزن خوه مع ولد عمته خديجه جايين من المحل... سلموا عليهم بعدين قال خوه... يزن:وين ماشي. محمد؛بنشوف النادي اللي حكيتلك عليه.. يزن هز راسه ومشي كمل طريقه مع ولد خديجه.. ومحمد حتى هو كمل طريقه مع صحابه.. وين جو طالعين من شارع القهوة.. خشت سيارة اريج للشارع... فاتت من قدام حوش الدكتور اياد اللي كان طالع منه مهند جو عيونه من ورا النظارات ع آلاء.. قعد يلحق في السيارة بعيونه لين درست قدام حوش لطفي الواعر.. نزلوا منها الزوز.. وهو عيونه بس مع آلاء اللي كانت عكس اريج.. مهتمه بنفسها..عاجبتها روحها هلبه..تصرفاتها الانثويه طاغيه.. مهند ماكانش معجب بآلاء.. مهند يحب آلاء..يحبها لصفاتها اللي تعتبر عيوب بس هو كانت عاجباته وهي اللي جذباته ليها بقوة... شافها وقفت ع المطحن سلمت ع جدها ومع اختها... بعدين مشوا للحوش. فتحت اريج الباب بالمفتاح... وخشوا هما الزوز.. هو ابتسم بعدين مشي ركب سيارته وتحرك متوجه للإذاعه.. ☘في حوش لطفي.. خشوا البنات وهما حاملات اكياس في ايديهم.. شافوا باب الكوجينه مفتوح مشوا بيخشوا منه.. فجأة وقفوا الزوز.. غمضوا عيونهم مع بعض وقعدوا يشموا.. اريج:الله الله الله...نتبنن في الريحه ياناس نتبنن فيها.. الاء:كل مانجي ندير رجيم تخربه عليا.. فتحوا عيونهم واريج مشت تجري وهي تقول:مادخليش فيها بندوق.. والاء لحقتها تجري وهي تقول؛مش حتخليك.. خشوا الزوز مع بعض للكوجينه.. فتحوا عيونهم ع وسعهم بدهشه.. وقعدوا يمرروا فيهم ع اصناف الأكل اللي من كل نوع... اريج:مش قادره اني.. آلاء؛بتاخدي توا تحسبه عليك. اريج:ياربي شن بيصبرني بس.. ع خشتها هي... كانت لابسه بلوزة ورديه في الابيض تحتها سروال جينز.. لابسه عليهم مريول لونه وردي في الازرق... رافعه شعرها فوق ذيل حصان ومزينه وذانها بأقراط لونهم ابيض اشبه بحبات اللؤلؤ... ومدايرة ع وجهها زينه بسيطه... رسمت ابتسامه ع وجهها وين شافت بنات اختها وقالت؛اهلا.. اريج حطت الحاجات وجتها وقعدت تبوس في خدودها وهي تقول:بيبو حبابه انتي ياعسل ذوقه بس.. طوبى وهي ماشيه تشوف في الكوشه؛كله محسوب العدد اللي بناخديه توا حصتك.. الاء:اقل حاجه الخبزة بيبو.. طلعت طاجين المبطن وقالت؛لاعادي الخبزة خودي منها بس يعني كان درتي بيها حاجه توا مش حتقدري تتغدي.. اريج؛قصدك درتولنا غدي.. طوبى وهي تتفحص في المبطن كان طاب ولالا:اكيد..في الكوشه الكهربائيه الزوز شبحولها شويه..بعدين مشوا يجروا للكوشه مع بعض. وطوبى تشوفلهم بإبتسامه.. فتحوه الزوز.. شافوا طاجين مكرونه بالبيشاميل منظره يشهي للغايه.. عيطوا الزوز... طوبى بضحكه؛مهبولات.. طلعت اريج الطاجين وقالت؛قاعد دافي بنبدا فيه طول.. خدت كاشيك ومشت حطاته ع الطاوله وبدت تاكل.. اما الاء خدت صونيه وكاشيك وموس ومشت للطاوله.. قصت طرف كبير وحطات في الصونيه... وقعمزت وبدت تاكل.. اريج؛بيبو مافيش حاجه تمسح.. طوبى:لافي.. ومشت جابت من التلاجه حكه مشروب وحكه عصير.. حطت قدام الاء العصير..وقدام اريج المشروب.. ومشت تكمل في شغلها.. اريج؛تصدقوا فرحانه هلبه..خالي حسين بيروح وبنديروا عرس خالي يوسف واخيرا.. الاء:واخيرت بنفرحوا عيينا من النكد... طوبى وهي مبتسمه؛الحمد لله على كل حال.. اريج:بيبو شن دايرة؟ طوبى؛مصارين..مبطن..كوردن بلو..كتف مشوي بش يذوقوا عيدنا..والوجبه الرئيسيه فتات.. الاء؛توقعتك ديري رز بالخلطه.. طوبى؛لاهما لما نمشولهم يديرولنا في ماكلتهم وحني نبوا نعرفوهم بماكلتنا في الغرب.. اريج بضحكه؛قداش خاطري نذوق الكسكسو بالتقليه.. الاء:هو نفسه الكسكسي متاعنا.. طوبى؛في شويه اختلاف بالذات رز مختلف هلبه.. الاء:باهي علاش اخترتي فتات.. طوبى:حاجه مميزة مايعرفوهاش هلبه.. ومشت شافت الكتف في الكوشه الكبيره وقالت؛خلاص طاب.. ومشت جابت صفرة كبيرة وقعدت طلع فيه.. والبنات يشبحولها.. بعد طلعاته حطاته ع الطاوله وجابت حاجات بش تزينه.. اريج وهي نتفرج عليها جو عيونها ع حافظه مسكره.. اريج وهي تاكل؛درتي فطاير؟ طوبى وهي تشتغل ع الكتف:ايه فطاير حلوة مع الشاهي.. الاء؛نضتي من الفجر متأكده. طوبى بضحكه؛ايه..مانلحقش كان مانضتش من الفجر.. اريج؛مانقول غير امه راضيه عليه اللي بياخدك.. ضحكت طوبى.. ☘☘☘☘☘ "بش مهندس" الجالي وهو يشوف للاب توب؛خش.. خش الموظف وهو يقول؛جبتلك الخرايط اللي تبي تراجعهم.. الجالي:حطهم.. حطهم الموظف ومشي طلع... ☘الجالي خلال هالسنوات برز بقوة في مجاله وخدم ع روحه هلبه لين وصل لمكان مرموق ومسك ادارة احدى الشركات اللي يخدم فيها خوه طاهر.. طبعا الحياة مامرتش سلسه وحلوة ع الجالي فهالسنين شاف فيها حاجات صعبه اثرها عليه مامنحماش☘ دق باب حجرته وسمع صوت يقول؛نخش.. شبح للباب وابتسم بعدين قال؛تفضل.. خش طاهر وهو مبتسم قال؛شكلك مشغول.. الجالي:في تصماميم مطلوب مني نسلمها اليوم..نبي منك تشوف الخرايط هادم وتراجعهم.. طاهر:حاضر..بس قبلها..نبي نطلب سلفه.. شبحله الجالي وهو ساكت.. طاهر بضحكه؛اول مرة نطلب سلفه طول هال16 سنه اللي خدمت فيهم .. الجالي:بنوافق عليها بس قبلها بنقول ربي يشفيك.. طاهر ضحك وخدي الخرايط ومشي طلع.. وهو حرك راسه يمين ويسار ورجع ركز ع اللاب توب.. ☘☘☘☘☘ في احدي المستشفيات.. اللي كانت تقرا فيها اميمه سنة الامتياز.. كانت في احدي الحجرات مع مجموعتها بحضور اخصائي والدكتور المسؤول عنهم يشرحوا ع وحده من الحالات.. كان موجود معاها اسامه في نفس المجموعه.. والدكتور كان قصي اللي تلاقت هي وياه مره لما رقدت في المصحه.. الاخصائي يسأل في الحاله وهي تجاوب وهو يشرح عليها.. والزوز مركزين معاها هي اكثر شي.. ☘اميمه في السنوات تغيرت تغيير كبير..طورت من نفسها..قوت شخصيتها ولت بارزة جدا المحيط متاعها.. وفوق هدا كله زادت جمال وجاذبيه..والخطابه مابطلوش يدقوا بابها وهي كانت ترفض وحجتها القرايه. بوها استاء منها هلبه وحتى امها مش عاجبها الوضع بس جدها كان واقفلهم بالمرصاد ومامخلي حد يدخل فيها☘ بعد دورة ع الحالات... جي وقت مرواحهم.. بس قبل يروحوا... اسامه؛يوصل سالم ان شاء الله.. اميمه وهي مبتسمه؛يارب..نستأذن توا اسامه نبي نلاقيه وهو جاي.. اسامه ضحك وقال؛تمام في امان الله.. اميمه؛سلام.. ومشت بسرعه.. وهو قعد واقف يشوفلها بإبتسامة حب وقلبه يدق بقوة.. 🌻وهي ماشيه.. لاقت الدكتور قصي جي بيوقفها.. اعتذرت منه بلباقه وقالت؛اسفه دكتور مستعجله عن اذنك . ومشت بسرعه.. هو قال؛تمام بينا تليفون.. هزت راسها بدون ماتشوفله وطلعت من الممر... وهو تنهد بعدين قالت بقلة حيله:مش عارف كيف بندير معاها.. ☘ماعندك مادير معاها يادكتور البنت قلبها مش معاها هي نفسها ماتقدر لروحها شي☘ طلعت برا المستشفى وهي مستعجله تفكر في خوها اللي واخيرا حتشوفه بعد سته سنين فراق... بس وهي ماشيه..وقفت فجأة.. وين جو عيونها اللي تبدل لونهم للأزرق ع واحد واقف بعيد شويه.. متكي ع راسه ولاهي بتليفونه.. لابس زي قائد الطائر.... للحظه حست قلبه بيطلع من مكانه... جسمها كله قعد يرجف..مش مصدقين عيونها اللي غرقوا بالدموع اللي يشوفوا فيه.. هو نزل تليفونه ومرر نظره قدامه بعدين شبح ايساره... ويتلاقوا عيونه بعيونه.. لف بكل جسمه جيهتها وقعد يشوفلها بنظرات كلها شوق.. وحتى هو يبان كأنه مش مصدق انه شافها... هي معاش قدرت تتحرك قعدت واقفه تشبحله وخلاص.. اما رسم ع وجهه ابتسامه حلوة.. وحط يده اليسار في جيبه ومشالها... كل شي فيها تلخبط..ارتبكت توترت.. حست روحها رجعت اميمه متاع زمان اللي ماتعرفش تتصرف ولاتقعد ع بعضها لما تشوفه.. وصل فيها وقف وقعد يمرر في نظره بين عيونها بعدين ابتسم وقال؛لونهم ازرق..معناها مافرحتكش شوفتي.. بلعت ريقها وهي تشوفله مش عارفه حتى شن تقول.. عمر:اول مانزلت من الطيار طلعت من المطار وجيتك طول..جيتك انت الاولى ..اول وجه نبي نشوفه وجه انتي اميمه..تصدقي ولاماتصدقيش مارحتيش عن بالي لحظه طول السبعه سنين اللي فاتوا..كانت توصلني اخبارك كلها واكيد اخبارك وصلاتك.. واميمه تشبحله وتسمع وهي ساكته..حاساته يسمع في دقات قلبها ع قد ماكانت قويه.. عمر عقد حواجبه وقال:اميمه تكلمي ماتقعديش ساكته..قولي فرحاتك شوفتي ولاالعكس؟ نزلت عيونها ليد الشنطه متاعه وهي تفرك فيها بصوابعها.. عمر؛اميمه.. رسمت ع وجهها ابتسامه وقامت عيونها وشبحتله وقالت:حمد لله ع سلامتك . ومشت طول فاتت من حداه وخلاته وهي تاخد في انفاسها بصعوبه وايدها ع قلبها اللي يفر فران.. اما هو التفت وقعد يشبحلها بإبتسامه حب.. صح ماقالتش غير.. "حمد ع سلامتك" بس في وسط هالجمله كلام ياكلام سمعه من غير ماتقوله... وزاد تأكد من كلام اخته نسرين عنها وعن حقيقة مشاعرها تجاهه... لبس نظاراته ومشي طلع من المستشفى وهو طاير من الفرح... ☘☘☘☘☘ "لااطمن ياعمي لطفي الامور هانيه بإذن الله يوصل فيكم سالم..بس زي ماقتلك بعد مايروح بيستدعوه بياخدوا منه معلومات بس وهدا الطبيعي عرفت كيف..فيعني زي ماقتلك ماتخاف من شي" لطفي:تمام يامهدي تمام بارك الله فيك ولدي.. "ماعنديش فيه جميل ياعمي اي خدمه اني حاضر نخدمك بعيوني" لطفي:تسلم ياولدي تسلم..هاه ياحاج امتى مروحين انت والحاجه؟" ضحك وقاله "يوم الجمعه بإذن الله" لطفي:ع خير ان شاء الله توصلوا طيبين..وحج مبرور وذنب مغفور.. "بارك الله فيك..السلام عليكم" لطفي:وعليكم السلام..سكر لطفي وقال..قال كونوا هانيين اموره طيبه ومش صايرله شي في طريق..غير كيف ماقال قبل بيستدعوه يهدرزوا عليه شويه وخلاص.. علي:باهي الحمد لله.. يوسف:هو اللي نفعاته انه ماعليشي شبهات لاتحريض ولاتخريب.. علي:صح هو كان في جيش القذافي لكن متربي صح واخلاقه عاليه حني مربينه وادري بيه.. لطفي هز راسه وقال:صدقت ياحاج.. عبد المطلب:باهي صاحبك الشرقاوي قداش ناوي يقعد هني.. علي؛يقعد لأمتى مايبي مش بايت في حوشك.. شبحوا لعبد المطلب اللي قال؛تو شن قلت يابوي اني نسأل بس.. علي هز راسه وقال:ايه تسأل بس.. ولطفي ويوسف يشبحوا لعبدالمطلب وهما شادين ضحكتهم.. ☘☘☘☘ وفي الحوش اللي جنبهم.. حوش سدرة اللي ولى على دورين.. الدور الاول كان معمل المأكولات الشعبيه اللي فاتحينه فردوس ومطيرة وكانت معاهم صفيه تعاون فيهم وتاخد ماكتب الله.. اما الدور التاني بناته فايزه ليها ولبناتها ع كبر الحوش.. ☘فايزة دارت مزين مشهور في منطقه راقيه..واسمها ولى معروف..اهم العائلات يطلبوا فيها الإسم..وعندها صفحه ع الفيس وحساب ع الانستقرام تعرض فيهم في شغلها لعند ماولت اشهر من نار ع علم...فايزة الخويلدي☘ هي حاليا موجوده في المزين.. وبناتها مشوا لحوش لطفي بعد عرفوا ان اريج والاء جو.. اما لوطا.. ☘فردوس:اني ماشيه نشوف البنات وجايه كانوا جو يرفعوا الطلبيه كلموني.. مطيره؛حاضر توكلي انتي.. هزت راسها ومشت طلعت من المعمل لحوش بوها فتحاته وخشت.. مقابل الحوش كان مفتوح مقهى الزعيم جنب المطحن كان واخد تركينه مستخطيه مش جاي ع الشارع.. كان يدير فيه نضال.. ومش معنى هدا ان نضال فشل في قرايته وعطوه القهوة بش يدير لروحه مستقبل ع العكس تماما.. ☘نضال:ياطيب الدولار طاير والدينار ممسوح بيه الارض واللي تشرب فيه نجيب فيه بالفلوس ياغالي.. :باهي عطينا هي وامرنا لله.. نضال ابتسم وقال؛عطيه طلبه يامحمود.. ☘☘☘☘☘ "ايه جبت للكل" فردوس؛باهي علاش ماروحتيش بخوك من حوش عمك.. اريج؛كلمته وقال مايبيش.. تنهدت بضيق وقالت:غير نفضى تو نروح بيه بروحي.. اريج قعدت ساكته وهي تشبحلها بحزن.. ع جية آلاء قالت؛ها شني ماما سلمتي واستلمتي.. شدتها اريج وقالت؛تعالي نعانوا بيبو الناس قريب يوصلوا.. فكت يدها من اختها وقالت:ماما نبي فلوس ضروري نبي دبش للجامعه ونبي حق كورس الحلو اللي قتلك عليه.. هزت راسها وقالت؛حاضر غير يجوا ياخدوا الطلبيه.. الاء:المهم اني قتلك.. ومشت للكوجينه.. اريج تبعتها بعيونها وهي تشوفلها بحده.. فردوس؛معليشي بنتي بنتعبك نبيك تجيبلي حرارات وعود لحم وقرفه توا.. اريج؛حاضر.. فردوس حطت يدها في جيبها بطلع فلوس قالتلها اريج:عندي عندي يام.. ومشت طول هربت من امها قبل لتصر عليها وتعطيها.. ارتسمت ع ملامح وجه فردوس ابتسامه بعدين مشت للكوجينه بتشوف اختها شن دارت. ☘وهي طول طلعت لسيارتها.. نضال وهو واقف في القهوة شبحها كيف طالعه.. ابتسم ع جنب وقال:شمطاء.. هي شبحتله بغلط لقاته يشبحلها قلبت عيونها ومشت ركبت السيارة.. شغلتها وتحركت.. وهو يشبحلها ويضحك.. ☘فردوس:الله يبارك عليك ياطوبى عيني ماضرك ياوخيتي.. وطوبى وهي مبتسمه؛شويه من اللي عندكم.. وقعدت تقطع في فطيرة الفتات وتحط في الصواني.. فردوس:هي شويه نكملوا اللي عندنا ونجو نعاونوا.. طوبى:لالالا تو يعاونوني البنات انتم بس روحوا دوشوا والبسوا وتأنقوا ومادخلكم بشي.. ضحكت فردوس وقالت؛حاضر... ومشت طلعت من حداهم.. صفاء:طوبى وتيت الصفر في الدار والفواكه غلفتهم مروة كلهم.. طوبى:تمام حبيبتي توا اضربي النسكافيه.. صفاء؛حاضر..بنسألك في مكسرات مرحيه وشكلاطه نبي ندير لقطات للنسكافيه.. طوبى بإبتسامه؛في كل شي.. آلاء؛بيبو شوفي كيف درت الكلينكس.. التفتت شافاته وقالت؛كويس بس الحلويات مازال يبوا ترتيب احلا من هكي.. الاء:باهي كيف نديرهم.. طوبى؛نو نقولك كيف.. ☘☘☘☘☘ فهالأثناء.. خشت غرفه شارع القهوة بسيارتها وهي والعه فيها اغاني صوتها ناقص ودندن معاها.. كانت مروحه من الكليه... ☘اميمه تخرجت سنه 2015..وتوا تقرا دراسات عليا.. كانت تنافس في اميمه بقوة ع قلب جدها وفعلا كل ماتنجح كان جدها يكرم فيها واللي تاخده اميمه تاخده غرفه.. ماتغير فيها شي قاعده زي ماهي ماعدا في حاجه وحده علاقتها بطوبى☘ دخلت السيارة للحوش.. ونزلت منها ومشت جهة الكوجينه.. خشت وقالت:OMG...ياربي مش حنصبر.. طوبى:حصتك.. غرفه:حصتي حصتي..وفتحت الحافظه وطلعت طرف فطاير كلتهم وهي تتلذذ وقالت؛اممم..ياربي شن هدا!؟..انتي يابنتي موهبه مدفونه.. طوبى:ولواه مدفونه ياكبدي هاكم تاكلوا وتتمعوا.. غرفه؛بيبو شن رايك في يوم ديريلي كذا نوع نرفعه معاي.. طوبى:شمري كمامك حبيبتي وتعلمي غدوة بعد تتزوجي وراجلك يطلع متاع عزايم تقعدي مادة وجهك.! غرفه؛وااك كلام سدرة.. طوبى:كلام الحق.. غرفه؛باهي يامتاع كلام الحق سدرة مازال ماروحتش. طوبى؛مازال .. غرفه؛بش قالت اليوم بتروح بكري.. طوبى؛طلع عندها اجتماع بأولياء الامور ماقدرتش تروح.. غرفه وهي تاكل:اممم.. ع خشة آلاء لما شافتها قالت؛خويله.. غرفه:حبيبتي.. جتها سلمت عليها بعدين قالت؛وتيلي روحك في طلعة للسوق الاسبوع الجاي.. غرفه؛من عيوني ياعيوني..ترا تعالي لولو..وشدتها من يدها وطلعوا مع بعض.. وطوبى تنهدت وحركت راسها يمين ويسار... 🍀وتعدي الساعات.. ويكملوا البنات التجهيزات..بعدين لبسوا وتأنقوا.. وقعدوا يراجو في جية حسين مع العيله الشرقاويه صحاب لطفي... وسدرة كانت تسابق في الوقت بش توصل قبل ليوصل حسين.. خشت للحوش بسيارتها... نزلت منها..لقت طوبى واقفه في الباب تراجي فيها.. مشتلها وهي تقول:خيرك واقفه هني؟ طوبى:شغلتيني عليك اتصلت بيك هلبه ماردتيش.. سدرة:قتلك قبل لما مانردش عليك معناها نسوق . طوبى؛غصب عني تعطيلتك شغلتني. سدرة؛باهي كل شي واتي؟ طوبى:قاعد ع الحط.. قرصت خدها وقالت؛عفارم ع بنتي ديما مهنيتني.. وخشت داخل.. وطوبى خشت وراها وهي تضحك... وطبعا دارت سدرة دورة ع كل شي بش تطمن وبعدها يدوب قدرت تاخد دوش وتلبس وطول طلعت.. ☘ومش بس حوش الواعر اللي كان زاحم فهاليوم.. حتى حوش شنيبه..تعبا بالاقارب اللي دارولهم عزومه ع مرواحة عمر من برا والطيارة اللي روح فيها هو بنفسه قادها. وقت خشته بسيارة التاكسي لشارع القهوة.. كانت النوبه قدام حوش بوه تراجي فيه... بدت تضرب اول مابانت عليهم السيارة واشر عليها نضال.. عمر وهو في السيارة قعد يضحك.. وعيونه ع خوته وصغار خوه وولادالشارع اللي يراجو فيه... وطبعا اهل الشارع كلهم كانوا يتفرجوا... وامه وخواته وقريباته واقفين فوق السطوح ويتفرجوا.. لما شافوه نزل من السيارة قعدوا يزغردوا... وامه تزغرد ودموعها تنزل.. نضال.. سالم ياسالم طولت الغيبه...سيوره الحبيب ياعيني يرجع لحبيبه.. وحضنه..والنوبه تضرب وجماعة الشارع يغنوا.. ☘في حوش لطفي.. مطيره؛شكله عمر روح... فردوس؛واضح طيب فيهم.. صفيه؛غير امتى يجي وليدي حتى اني.. مش طايقني صبر فايزة؛صبرتي سنين ياخالتي.. صفيه؛والله هالدقايق اطول من السنين اللي فاتت.. سدرة؛صح يقولوا دقايق الانتظار الاخيره اطول لحظات الانتظار.. هما يتكلموا.. واريج كانت سرحانه وهي تتخيل لو كان اليوم بوها اللي جاي... عاشت سنين تراجي فيه هاللحظه وياما أملوهم طول هالسنين برجعته بس مع الاسف كلها كانت آمال خايبه.. فجأة.. رن تليفون سدرة.. طول ردت عليه.. سدرة:ايوه بوي.......هيا هي...خلاص هي.. وسكرت وقالت..خشوا الشارع توا.. حطت صفيه ايديها ع قلبها اللي قعد يدق بقوة ودموعها عبوا عيونها وفاضوا.. ناضت هي ومطيرة ومعاهم فردوس وسدرة وطوبى بش يستقبلوهم.. ☘وسيارة التاكسي اللي جايبتهم كيف درست حتى هي قدام حوش الواعر.. نزلوا ونزل معاهم السواق ينزل في الشناطي.. لقوا في استقبالهم..رجال عيلة الواعر كلهم.. حسين لما شم هوا الشارع حس روح ردتله.. ولما شاف احبابه الحياة دبت فيه من جديد.. اول من سلم عليه كان جده.. قعد يحضن فيه وهو يبوس في ايديه وراسه.. وعلي الواعر كانوا دموعه في عيونه من كثر ماأثرت فيه لحظة اللقاء.. بعدين سلم على عمه اللي كان فرحان هلبه بشوفته وكأنه لقى واحد من ولاده.. وسلامه كان حار ع خوه...اللي قعدوا حاضنين بعض هلبه ودموع عيونهم غلبتهم... جبريل بإبتسامه؛طيب فيكم ..طيب فيكم اللي تلاقيتوا.. سلم لطفي عليه وقال:حمد لله ع سلامتك ياجبريل وبارك الله فيك من يوم عرفتك وجمايل مغرقتني.. جبريل؛جمايل شنو ياراجل مافيش بين الخوت جمايل انتم راكم كيف هلي ورانا عشرة عمر يالطفي مايجيش كلامك هذى.. علي الواعر بإبتسامه قال هو ولده؛ربي يحفظك..بارك الله فيك.. وبعد سلام حسين ع بوه اللي كان بارد وسلام جبريل على الجميع... خشوا داخل... ☘اما عند النساوين.. استقبلوا سالمين مرت جبريل استقبال حلو ودخلوها داخل.. سالمين:لاقوة الا بالله ع بنيتي لاقوة الابالله عليك ياطوبى عيني ماضرك يامينه الله يحفظك يابنتي..ودمعوا عيونها.. ابتسمت طوبى بالغصب وقالت:تسلمي خالتي سالمين..لحظه وجايه..ومشت خشت داخل.. واريج طول لحقتها.. سالمين وهي تمسح في دموعها:غصب عني وين نشوفها نذكر حياة المرحومه الله يرحمها قديش كانت غاليه عليا.. كلهم بأصوات متقطعه:الله يرحمها.. وبنات وردة قعدوا يمسحوا في دموعهم.. ☘في الكوجينه.. طوبى بحزن:ديما وين تشوفني تقول تخطري عليا في امك..شكلي جايبه منها هلبه... اريج:خلاص عمري امسحي دموعك.. خدت طوبى نفس ومسحت دموعها..بعدين مشت طلعت لمراية الممر شافت روحها فيها..ساوت شكلها وولت للكوجينه.. طوبى:هيا روجه خل نبدوا بالعصير.. اريج:اهو نستف في الطواسي.. ☘☘☘☘☘ "خلاص يام اطلقيه للرجاله" مغليه وهي في حضن ولدها عمر:اسكتي انتي.. نضال بضحكه:يام امة لااله الا الله في المربوعه اللي برا يراجو.. بعدت عن ولدها وقالت؛والله مفروض ماجي واحد اليوم مفروض غدوة يجوا..نبي نقعمز مع ولدي نهدرز عليه نعرف شن دار برا..مش هما.. عمر:اني ليهم اليوم هدا بس وليك انتي العمر كله ياغلاي ..وباس ع راسها وهو يقول..نشوفك بعدين..ومشي طلع من حداهم هو ونضال نجاة؛طيب فيك ياعمتي..طيب فيكم يابنات.. مغليه:سلمك بنتي.. خديجه؛ماتقوليليش خيرك شاده علينا حمزة وجوري وين تجي مايجوش معاك علاش! نجاة؛دوشتهم هلبه وشياطين ومش وقت جيانهم اليوم بالذات.. مغليه؛جيبيهم مرة تانيه عمك مستاحشتهم.. نجاه بإبتسامة مجامله؛حاضر.. خشت عليهم نسرين وهي تقول؛اطلعوا للناس شن كلكم قاعدين هني!؟ مغليه؛ايه حقه هيا اطلعوا..اطلعوا... ☘☘☘☘☘ وفي جنان حوش الواعر جهة الكوجينه.. كان اللقاء اللي جمع بين حسين وامه.. صفيه وهي تبكي؛في كل قيام ليل ندعي ربي يوصلني لهاليوم وربي استجابلي الحمد لله..الحمد لله حمدا كثيرا.. حسين باس راسها وهو حاضنها وقال؛سامحيني يام والله ماكنت نبي نوجعك عليك هكي.. صفيه:مش بيدك ولدي مش بيدك.. وكلهم يتفرجوا من الروشن ع هاللحظه وهما متأثرين.. اميمه ودموعها ينزلوا؛حبيبي حسين.. بعدوا هو وامه عن بعض وشبحولها بإبتسامه بعدين قال؛الله يبارك يابنت كبرتي وتغيرتي هلبه.. اميمه ضماته وقالت؛لكن انت قاعد زي ماانت.. ضحك وهو يمسح ع شعرها وقال؛دكتورنا..وباس راسها.. سدرة وهي تحرك في يدها حركه دائريه؛حسين.. بمعنى مقدمك.. هو ضحك وقال؛الناس وين يزيد عمرها تكبر الا انتي تصغري الزفت.. سدرة؛قل اعوذ برب الفلق..جاي طرشقني انت! جبدها وهو يضحك وضمها ليه وقال:استاحشت طول لسانك وتنرفيزك.. سدرة:ياهادي انت.. شويه طلعوا فردوس وبناتها... فردوس بإيتسامه؛حمد لله ع السلامه حسين.. حسين تباعد عن سدرة وقال وهو مبتسم :الله يسلمك فردوس.. اريج واآلاء؛حمد لله ع السلامه.. حسين:الله يبارك الله يبارك..كبرتوني ياودي.. ضحكوا الزوز.. وهو ابتسم وقال؛سبحان الله هالسنين ماتجري... سدرة؛ايه وكلها تريح من عمرنا.. سكتوا وهما يفكروا في كلمة سدرة... لعند ماطلعت عليهم طوبى وهي لابسه عبايه ووشاح.. لما شافت حسين ابتسمت بفرح من قلبها وقالت؛حمد لله ع السلامه.. هو قام عيونها وشبحلها... ملامح وجهه تبدلت للدهشه والانبهار... اهي طوبى كبرت ياحسين....وحتى فاتت 18سنه.. ورده وتفتحت..وزادت جمال ع جمالها.. والاحلى...انها مازال هي هي بنفس النظره البريئه والابتسامه اللي تقطر لطف... هي ارتبكت وانحرجت لما قعد مسهم فيها.. وكادت تذوب خجل لما حست ان الكل انتبه عليه.. في من هدا وين عرف.. زي امه..زي فردوس.. وفي من ليه وقت واعي وعارف.. زي اميمه وسدره واريج آلاء... صفيه ابتسمت وهي تشوفله قالت؛حسين بنت عمك تكلم فيك.. اشر عليها وقال؛قصدك هادي طوبى! ضحكت اميمه.. سدرة؛طوبى طوبى بنيتك.. ابتسم من قلبه وقال:الله يبارك..الله يبارك..ربي يحفظك ويحميك.. طوبى بإبتسامه ارتباك؛شكرا..حمدلله ع سلامتك مرة تانيه.. ومشت خشت.. حسين تنهد وقال وهو مازال مندهش؛الله يسلمك... ع طلعة غرفه قالت بإبتسامه؛حمد لله ع سلامة ولد عمي.. ضحك وقال؛نحساب بنلقاك دبه .. غرفه بضحكه؛لادا كان زمان انت اللي وليت دبه.. وجاته صافحاته وقالت؛شن امورك. حسين صافحها وقال؛ماشيه الحمد لله..شن جو القرايه تخرجتي ولاقاعده.. غرفه؛مقدمك نقرا دراسات عليا توا.. حسين؛كذب! سدرة بضحكه؛لاصدق صدق من عجائب الدنيا السبعه.. قعدوا يضحكوا.. وغرفه تعلق ع سدرة.. وعيون حسين ع الروشن وقلبه داخل يراجي امتى تجي قدامهم طوبى.. اللي خشت قعمزت داخل مع عمتها مطيره تساير في المراة.. ومن داخلها كانت مضايقه هلبه لأن مشاعر حسين فهالسنين قعدت زي ماهي وماتغيرتش...
#وتفتحت_ياورد #طوبى
...يتبع...
(بإذن الله في قسم ثاني في الليل)
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
