#طوبى "جنة طوبى"
#جمان_فريد
#الجزء_الحادي_والستين"رسايل_وداع"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃وبعيد عنهم...
في بلد المنشأ...
مشي خوه الجالي يزور مرته وولده في المصحه...
بعد ماشاف حمزة واطمن عليه..
مشي لحجرة امه...
اللي قدرت في هاليوم تقعمز وهي منسنده ع وسادة السرير...
وهو شاد يدها ويشوفلها قال:اليوم خير من أمس..
هي ودموعها ينزلوا؛اني حاسه بروحي مش باهيه..
هو قال:علاش تقولي هكي شن تحسي؟!
نجاه بألم؛حاسه انك حتسيبني اللي يربطك بيا راح خلاص ومش عارفه كان مازال نقدر نعوضك تاني عنه..
هو وجعه قلبه عليها لأنها مازال مش عارفه حقيقة وضعها...
وهي مكمله تقول:اني كبيره..قربت ع الاربعين خلاص معاش فيا امل...وهديكا صغيره..صغيره هلبه..تجيبلك تنين وتلاته وعشره..
وقعدت تبكي...ومكان الجرح وجعها...حطت يدها عليه وهي تقول..
"آاه"
بوجع..
هو شد يدها اللي حاطتها ع بطنها وقال...
"اني بنطلقها خلاص"
وقفت بكي وشبحتله بصدمه..
هو هز راسه وقال:ايه بنطلقها وبنخليها تمشي في حالها..اني مانبيش غيرك ومانقدرش نعيش الا معاك انتي معاش نبي نظلمها معاي خلاص..
هي بعدم استيعاب؛شن تقول انت!؟..تمشي فيا ع خاطر حالتي تكذب عليا ولا؟!
هو قال:لا اقسم بالله لا....
هي مازالت في حالة عدم الاستيعاب تقول؛كيف!؟..وبوك..وامك...وخواتك..خديجه!...
هو قال؛خديجه توا تبي هكي اكثر مني ومنك..
زادت انصدمت وهي تقول؛خديجه!؟
هو قال:ايه خديجه..
حركت راسها يمين ويسار وهي مش مصدقه قالت؛مش مستوعبه..زي الكذب زي الحلم..شبحتله شويه وقالت..باهي انت عندك عادي..قصدي كان ربي ماكتبش يجوك مني صغار عادي..
ابتسم وقال؛صغار خوي صغاري واني وبوهم..
هي دموعها تبدلوا لدموع فرح مع ابتسامه حب وامتنان وهي تقول؛نحبك والله نحبك ونموت فيك وعمري ماحبيت غيرك في حياتي..تعالى جالي تعالى حبيبي..
هو ناضلها وخداها لقلبها بحذر..
وهي قعدت شاده فيه وتقول؛ياعمري قداش نحبك...
وهو برغم انه كان يبان واثق من نفسه وفي القرار اللي خداه..
بس كان حاس بضيق شديد..مش مرتاح نهائي..
🍃اما هي..
زهرة الذهب...
مشت بعد الفطور لحوش اختها غرفه وهي رافعتلها المبروشه اللي تحبها..
☘غرفه؛غريبه ما خدتيش موقف حتى انتي..
رفعت طوبى حاجبها وقالت؛من شني انتي شن درتي بش ناخد منك موقف؟
غرفه:تستغبي..
طوبى؛معناها عارفه روحك دايره حاجه تكسر الرقبه زي عادتك..
غرفه بمكابرة:لا مادرت شي انتم اللي ديما متحاملين عليا وماتقبلوا مني في شي..
هزت طوبى راسها وقالت؛تمام تمام..اني مش جايك نتعارك معاك..جايه نسأل عنك وبنروح..
بملامح زعل قالت؛جيتي من راسك ولا في حد قالك..
طوبى:والله من راسي..
هي وعيونها معبيات دموع؛يعني مافي حد يسأل عليا حتى بابا!؟
طوبى؛بابا ديما ينشد عليك وقتله بكري بنمشي لغرفه قالي سلمي عليها..
غرفه:كذابه..
طوبى بنفاد صبر:اللهم طولك ياروح..والله العظيم هدا اللي صار بالحرف..
غرفه؛باهي هدي ووطي صوتك..ماتنسيش اني اكبر منك راهو...
مطت شواربها للأسفل بآزدراء وقعدت تضحك.
وغرفه غلبتها الضحكه وهي تقول؛تنوضي ديري كاكاو مع المبروشه وسفرة فطور؟
طوبى بإبتسامه؛باهي نوضي معاي للكوجينه بش توريني حاجاتكم وين..
غرفه؛باهي..
ناضت طوبى بالحافظه..
وغرفه نزلت من السرير جبدت منها الحافظه ومشت طلعت..
طوبى غمضت عيونها وهي تضحك..بعدين حركت راسها يمين ويسار..
فتحت عيونها وين رن تليفونها..
طلعاته من جيب البالطو..لما شافت الرقم ردت..
طوبى:ايوه..
"وصلناها مدام"
ابتسمت وقالت؛مشكورين..السلام عليكم..
"وعليكم السلام"..
سكرت..بعدين مشت طلعت من الدار...
🍃🍃🍃🍃🍃
وعند بنت العم..
اللي كانت واقفه ع خطيبه خوها في احد الممرات..
اميمه؛قالي لازم تكون واخد ادن ماليها..
حسناء بضحكه؛نكلملك بابا بش تتأكدي؟
ضحكت وقالت؛هو يبي يتأكد مش اني..
ابتسمت وخدودها احمروا وهي تقول..
قوليله ماندير شي من وراهم..
اميمه بإبتسامه؛تمام ياعقوله بعد يروح من مصراته بيجي هني طول..
هي قلبها دق بقوة وقالت؛امتى بالزبط؟
اميمه؛هو قال الاربعه ان شاء الله يكون هني..
هزت راسها وقالت؛تمام..
اميمه؛هي نخليك توا نشوفك بعدين..
حسناء بإبتسامه؛Ok
وكل وحده فيهم مشت لطريق...
🍃وصلت اميمه في الحجرة متاع الدكاتره.
لقت فيها واحد يعبي في بياناته..وزميلتها امل تكتب..
هي اتكت بيدها ع الطاوله وفتحت ملف حاله قدامها وقعدت تشوف فيه..
ع خشة وسام لما شافها قال مصطلح طبي معناه...
حالة البواسير؟
اميمه قامت راسها وقالت:ايه..الحاله عمرها 20سنه..
هو قال؛بعد المغرب العمليه..
هزت راسها ورجعت تشوف في الملف..
وامل تراقب فيهم..
شافاته كيف مبتسم بإعجاب وهو يشوف لأميمه بعدين قال كذلك مصطلح معناه...الزماله قدمتي عليها؟
شافتله وقالت؛بنقدم ان شاء الله بس نبي تزكيه من زوز اخصائين خدمت معاهم..كلمت دكتور قصي وقال باهي قعد خالد..
"كلمة دكتور تجي قصي وماتجيش ع خالد"
هي فنصت عيونها بصدمه..
ووسام ضحك بإرتباك وشافله وهو يقول:سقطت سهوا دكتور..
خالد وهو شاد ورقه بيانات حالة سجلتها امل؛كلمتها هي خليها هي ترد..
رفع وسام حواجبه ونزلهمو وهو محرج...
وامل تشوف لأميمه من فوق لتحت وهي مبتسمه بشماته..
اميمه بلعت ريقها من الارتباك والخوف وقالت:اسفه دكتور مش قصدي...
شبحلها وقال:لابالك قصدك..!
اميمه انحرجت ومعاش عرفت بشن ترد قدام زملائها والراجل الموجود..
اما هو غير عيونه للراجل؛وقال؛راجي اتصال حبيبنا..
هو قال:مطوله دكتور؟
رد عليه بهدوء وقال؛زي ماتعرف بالدور واللي يبوا يديروا العمليه هلبه بتراجو شهرين تلاته..
الراجل مرر نظره عليهم بضيق بعدين هز راسه وقال؛ع الله...السلام عليكم..
هما ردوا عليه؛وعليكم السلام..
واميمه قالت بعدها؛كان عنده واسطه يديروها غدوة..
شبحولها..
هي شافت خالد وقالت بجرأة:ماكذبتش..
هو حط الورقه ع الطاوله بعدين مشي طلع..
وهي لحقاته طول..
امل وهي تبع فيها بعيونها:مش عارفه من تحساب روحها..
وسام بإعجاب؛تبي الحق حاجه تسوا..
امل بغيره؛وانت طبعا اللي تجي تحط عليها عينك..
هو بإيتسامه قال؛شهاده من دينك مش حاجه تسوا؟
شافتله بغيظ بعدين خدت الورقه ومشت طلعت من حداه..
وخلاته يفكر في اميمه...
🍃وهي طالعه..
فاتت من جنبها هي والدكتور خالد وهي تشوفلها بغل..
☘خالد؛اني ماشفت منك شي يخليني نزكيك..
هي حست بالضيق والاستفزاز فكرت للحظات بعدين قالت؛مش عارفه علاش دكتور نحس فيك تحارب فيا..
هو ضحك بتعجب في جرأتها وقال متسائل بسخريه:نحارب فيك!..قداش معيشه روحك في وهم وعندك غرور فايت الحد..شايفه روحك وصلتي لمرحلة تتحاربي فيها! راك قاعده في اول الطريق..قاعده في KG1 انتي راهو...
هي ماتحملتش اسلوب الاستخفاف اللي يتكلم بيه وقالت وهي تحاول تضبط انفعالها؛ولإني في اول الطريق واجب ع الدكاترة الكبار اللي زيك انهم يدعموني ويعلموني يدفوني القدام مش يولوا بيا لتالي!..
هو قال؛اني مش دكتور اصلا في نظرة حضرتك بش نكون كبير وتراجي مني دعم..
وصلها لأقصى مراحل الغضب..
ولانها خافت تفقد اعصابها..اختارت تنسحب وتخليه..
وهو قعد معاها بعيونه لين خشت الحجره..
ابتسم نص ابتسامه بعدين لف ومشي...
🍃وهي لما خشت للحجرة..
لاحظ وسام ملامح الغضب والحزن في نفس الوقت ع وجهها..
قاللها:تعودي عليه..
اميمه ودموعها في عيونها؛باهي اني ندير امتحان زماله...
ابتسم وقال؛تو ديريه..
اميمه حركت راسها بتساؤل وقالت؛كيف ترا؟.
هو قال بإبتسامه؛خليها عليا ومعاش تفكري في شي..
قعدت تشبحله بإستغراب..
لاحظت في عيونها نظرات غير مريحه..
غيرت عيونها عنه وشافت للشباك لقت مراة كبيره في العمر واقفه قدامه مشتلها طول..
وهو معاها بعيونه..
🍃🍃🍃🍃🍃
"صباح الخير"
:صباح النور باش مهندس..
الجالي؛شن في اليوم؟
هي قالت؛عندك موعد مع مدير شركه **** الصينيه الساعه 12..
والاستاذ علي الحاسي قال بيجي الساعه 2..
هو هز راسه وقال؛تمام..
وين جي بيمشي وقفاته وقالت؛باش مهندس وصلاتك حاجه بكري شويه..
هو بإستغراب؛حاجه شني؟
هي قالت؛شي خاص زي الهديه..
هو زاد استغرابه..هز راسه ومشي للمكتب..
خش...
وشاف سله فيها ورد توليب لونه ابيض ملفوفه بشريط لونه بنفسجي...
سكر الباب وزاد قرب منها..
شاف في وسط السله حافظه بلاستيك انيق شفافه بانله منها المبروشه...
وفي جنبها مق قهوة مسكر صناعه عالميه مشهورة..
غير عيونه للكرت المحطوط في الورد..
خداه وقراه..
(صباح الخير..مش زعلانه منك)
هو غمض عيونه وبدت ع وجهه ملامح الضيق..
بعدين فتحهم..ورجع شاف للرساله..
تنهد بضيق وردها لمكانها..
بعدين مشي حط الشنطه ع الطاوله..وقعمز وعيونه ع السله...
وفي نفسه قال..
"مانستاهلكش"..
🍃🍃🍃🍃
وهي في كوجينه..
فطرت هي وياها وشربوا الكاكاو مع المبروشه..
وغرفه ركزت ع طوبى شهيتها مفتوحه هلبه مش زي قبل..
غرفه؛وليتي تاكلي هلبه وزدتي راهو..
طوبى بلعت لقمتها وقالت؛ماتبالغيش..
غرفه؛شن مش مركزة ع روحك؟!..ضيقت عيونها وقالت..حامل يادعوة!..
طوبى بنرفزة من الارتباك:درهتولي كبدي بهالكلمه حامل حامل..مش حامل مش حامل..وكان ع الماكله اها..حطت الخبزة وقالت..معاش نبي..
غرفه؛ولي كولي وريحي جمالك..
طوبى؛معاش نبي خلاص..
غرفه؛بلادراه كبد..كولي هيا..
طوبى تنهدت بضيق وهي ساكته..
غرفه شبحتلها شويه وقالت؛خاطرك تحملي ومايصيرش؟
شبحتلها بعدين قال؛مش هكي..بس قاعده نفكر في عيل نسرين وجعني هلبه تصدقي مامشتش شافاته بكل من لما طلعت!؟
غرفه بإستغراب؛لهالدرجه!؟
طوبى:مش هكي بس..قالت لخديجه لما يطلعوه تاخده هي..
غرفه؛وااك قلبها حجر هادي..
طوبى بألم؛والله عيلي مانخليه لو شن يدير بوه عيلي هدا كبر فيا وطلع مني معقوله نفرط فيه ونكرهه!!
غرفه؛ماتستغربيش في هلبه زيها .
طوبى:ربي مايخلينا زيهم..
غرفه:بعيد السو علينا ربي عاطينا رجاله مافيش زيهم..اني متأكده ان روفا حيكون اب حنين ويموت في صغاره من توا يفرفش عليه..
ابتسمت طوبى:ربي يخليكم لبعض..
غرفه:ويخليكم لبعض وتحملي قريب..
ابتسمت بالغصب وقعدت ساكته .
سمعوا باب الحوش انفتح وتسكر..
طوبى:عبد الرؤوف؟
غرفه:لا روفا مش هكي فتحته للباب هادي نبيله...
شافت طوبى لأختها بإبتسامه..
للحظه حست بالغيره منها..عايشه قصة حب حلوة مع راجلها..
تحبه لدرجة انها حافظه صوت لفة مفتاحه ع الباب..
استاقظت وشافت للباب لما سمعت صوت نبيله تقول..
طوبى عندنا..ياهلا ومية مرحبا..
ناضت طوبى وهي تضحك قالت؛هلا بيك..
وسلمت عليها..
وغرفه تشوفلهم بآبتسامه..
طوبى بضحكه:اليومين الجايات جاينكم راهو..
غرفه قعدت تغني .
خطابة خطابة..جيناكم خطابه.
ضحكت نبيله بخجل ..
طوبى بإبتسامه:عاد مافيش لوقت لتفكير وافقي طول ولدنا معاش عنده صبر..
غرفه؛ماصبر الا هلبه..
نبيله بضحكه؛خلاص تحشموا انتي وياها مش نداد راهو..
ومشت وخلتهم..
ضحكت غرفه..
اما طوبى لحقتها وقالت؛ابله نبيله..
وقفت نبيله والتفتت..
طوبى:نبيك شويه..
شبحتلها نبيله شويه بعدين قالت؛تعالي..ومشت..
و طوبى مشت وراها...
~~~~~~~~~
طوبى:اني لتوا ماواجهتاش قلت لين نجمع ادله..
نبيله؛كويس بكل..وتصرف سليم هلبه ونتمنى كل اللي ينحط في موقفك يدير زيك المواجهه طول هي بمثابة فرصه للطرف التاني تخليه يخفي كل دليل يثبت الفعل متاعه ويطلع منها زي الشعره من العجين...
تنهدت وقالت...تعرفي هلبه النساوين اللي يرفعوا في قضايا طلاق بسبب الخيانه ماعندهمش دليل واحد ع خيانة ازواجهم تقولك لما نواجهه ينكر..وكان اعترف يطلب منها السماح ويقول اخر مره وفعلا اخر مرة يخلي دليل عليه يثبت خيانته لكن مش اخر مرة يخونها..يخي في نساوين رجالتهم قلبوا عليهم الطاوله ودارهم هما الخاينات تصدقي!؟
عقدت طوبى حواجبها وهي تشوفلها..
نبيله؛هدا علاش ديما ننصح المراة اللي تلاحظ ع راجلها حاجات تخليها تشك انه يخون فيها ماتواجهاش تقعد لين تتأكد ويكون في يدها دليل ومايكونش عندها هي بس..
سكتت نبيله لما لاحظت ان طوبى معاش تكلمت وتبان سرحانه بتفكيرها..
نبيله؛طوبى..
استاقظت وشافتلها بعدين قالت؛مزبوط..ابتسمت وقالت..مشكورة هلبه ابله نبيله..
نبيله بإبتسامه؛العفو حبيبتي...
🍃🍃🍃🍃🍃
"سبحان الله رب ضارة نافعه"
نجاه وملامح الفرح باينه ع وجهها؛مش قلتلكم يحبني..صدقتي توا صابرين..
صابرين اللي باديه ع وجهها ملامح عدم الرضا؛نصدق لما يطلقها حق..
مروة؛ماتنكديش ع اختك..
سكتت صابرين وع وجهها ملامح الامتعاض..
ونجاه قالت؛مش مدورتها فوتيها..
ناضت صابرين ومشت طلعت من الحجره..
نجاه طنشتها وقالت؛هي وكليني مروة جعانه موت..
مروة بإبتسامه؛بعيد السو..
نجاه؛تغدا حمزة كويس ولا؟
مروة؛والله تغدا كويس وولاد عمه حداه غيروله جوه..
نجاة ابتسمت ومن داخلها كانت فرحانه ومرتاحه ع الاخر..
بعد ماعاشت ساعات من الخوف والترقب والقلق...
🍃🍃🍃🍃🍃
وجت الساعه اربعه...
والتوتر بدي يسيطر ع حسناء اللي كانت تمشي بطريقها لحديقه المستشفى وقلبها يدق بقوة..
وعيونها ع حسين..
اللي كان واقف يراجي فيها..وهو لابس بدله عكسريه ومدرق عيونه بنظارات شمسيه لونها عسلي غامق من لون شعرها اللي باينه منه خصلات متمرده ع الحجاب المغطي راسها..
وصلت فيه وقالت؛السلام عليكم..
وكلها خجل واحراج ويدوب تشوفله..
هو كان مركز ع شعرها وقال:وعليكم السلام..طلعي في شعرك من الوشاح انتي؟
شبحتله..لاحظت حواجبه معقوده..
تلقائيا قعدت دس في شعرها تحت الوشاح وهي تقول؛لالايطلع بروحه..
هو قال؛ديريله حل معاش نبي منه شعره تطلع برا..
هي قالت؛حاضر..
حول نظاراته وقالت؛من توا يابنت الناس بنقولك..اني طبعي واعر..ومانحبش العوج اخدمي ماعنديش مشكله لكن بتردي بالك من شكلك..المكياج هدا معاش نبيه..
اشرعليها بنظاراته وقال..اللبس هدا مايمشيش معاي..الريحه اللي شميتها عليك من قبل ماتوصلي فيا معاش ديريها حتى في الدين حرام راهو..جو دق الحنك مع الدكاترة والمرضى مانبيشي ويفضل تغيري نساء خير..
هي في داخلها..
"يامامي يهبل.حمش وخلوقه في راس خشمه يجنن"
هو قال؛كان مايمشيش معاك الكلام من توا قولي مايمشيش معاي وننهوها..
هي انفجعت وقالت؛علاش!؟..انت ماقلت شي غلط كلامك كله صح..
حسين؛اسمعي جو انك ديري روحك راضيه توا وتقولي بعدين نغيره لالا راهو..والله ماك مغيره فيا حاجه عمري35 سنه معاش نتغير خلاص..
هي في نفسها..
"من قالك تغير مني نبيك هكي اني"
حركت راسها بالنفي وقالت:لالا مافكرتش هكي بكل..
هو قال؛ مادام هكي معناها متفقين..
هي قالت:ايه..
هو قال؛غير راجي شويه..ماعندكش شروط ماعندكش شي تبي تقوليه..
هي ابتسمت وقالت؛حاجه وحده بس..الاحترام..
حسين؛ع عيني و ع راسي تحترميني نحطك فوق راسي..
بإبتسامة خجل قالت؛خلاص معناها..
حسين؛ميه ميه..غدوة بإذن الله نحكوا مع التريس في باقي التفاصيل...لبس نظاراته وقال...ري خشي..
هي قالت بإبتسامه خجوله؛باهي..سلام..
ولفت ومشت..
وهو معاها بعيونه وفي نفسه يقول..
"البنيه كويسه ياحسين حاول معاها وتو تنسى"
تنهد ..بعدين مشي طلع من الحديقه...
🍃🍃🍃🍃🍃
الساعه 6:00مساءا.
في شارع القهوة...
كانوا صغار الشارع يلعبوا بالكورة..
ومحمد واقف في القهوة يتفرج عليهم..
شويه طلع عمه وقف في الباب وهو يخاطب في اللي مقعمزين داخل وبرا..
عاد كاس العالم قرب مازال عليه شهرين بس من توا نقوللكم بإذن الله المباريات كلها تتفرجوا عليها هني..
قعدوا يصفروا ويصفقوا..
واللي يقول..
"نوارة نضال..منور ولد شارعنا.."
وهو رفع ايديه وضمهم لبعض وقعد يحي فيهم...
عبد القيوم قال بصوت عالي؛تنميرت..
ضحك نضال وقال؛يحفظتت مسينغ..
ابتسم عبد القيوم..
محمد قال؛غدوة عندي مباراة مهمه اللي فاضي يجي يحضرها ويشجعنا..
عبد القيوم؛الساعه قداش؟
محمد؛الساعه اربعه..
عبد القيوم؛كان ماعندي شي نجيك حاضر..
ربيع:الاربعه الا ربع غادي..
عبد القيوم شبحله ع جنب وابتسم بخبث..
محمد بإبتسامه؛منورين..
وفجأة بدون سابق انذار تحفه الكوره وتجي في نص الموجودين..
نضال؛عن شكلك انت وياه..نفلقها والله نفلقها..
واحد من ولاد الشارع؛فوته الشايبين واحدف الكورة..
نضال؛شن رايك مافيش كورة بكل وبرا روح لحوشكم انت وياه.!
ناض عبد القيوم ومشالها خداها وقال:امسحها في وجهي المرة هذي..
ومشي طلعلهم..
نضال؛ع خاطرك ياتارقي بس..
عبد القيوم؛يسلم خاطرك..
هي تعالوا انتم..ونزل الكورة وحدفها برجله..
جت طويله وقف عند اشرف اللي كان طالع من حوشهم..
عبد القيوم حط يده ع صدره وقال:سامحنا ياعم الناس..
ابتسم اشرف وضربهاله..
هو تلاقاها برجله وقال؛هي تعالوا خودوها..
وجوه الولاد وقعدوا يحاولوا..وهو دوخهم ولاقدروا ياخدوها منه..
والجماعه يتفرجوا..
اشرف تحمس وقاله:تارقي..
شافله..وعطاه الكورة..
وتلقاها ومشوله الولاد يجروا..
محمد بحماس؛الحكايه سخنت ياعيله..
ومشالهم..
وبدوا يلعبوا مع بعض..
وجماعة الشارع يتفرجوا بما فيهم فراس اللي كان واقف قدام محله يتفرج وهو مبتسم..
ويسخن ربيع حتى هو ويخش معاهم..
ونضال يلحقهم بس قبلها بعت رساله لمرته...
🍃اللي بعد ماقرتها طلعت بسرعه من الدار ومشت بتركب الدروج..
مطيره شافتها وهي ضم في الجنان قالت؛اللطف خيرك تجري.!؟
اريج؛نضال يلعب في الكوره..
وخشت لدار الدروج..
مطيره بإستغراب:كورة!؟..
☘وتوصل اريج فوق وتخش داى الخزين وتلقى الاء واقفه ورا البرسيانه تتفرج..
وقفت جنبها لقت نضال يجري بالكورة وقالت؛وخيتي سلمه..
الاء؛التارقي لعبه مليح..
🍃وفي الحوش اللي في جنبهم..
كانوا بنات فايزة واقفات ورا الروشن يتفرجوا..
مروة عيونها ع محمد..وصفاء ع اشرف..
اما تاله؛عمو عبدو يعرف يلعب شوفوا كيف يدوخ فيهم..
☘وهما لوطا كل واحد يحدف الكورة للتاني والولاد يحاولوا ياخدوها وماقدروش..
ربيع؛هني هني تارقي..
حدفهاله..
تلقاها ربيع وضربها بقوة بش يردهاله..
ولحسن حظه..الكورة تجي بعيده..
وطيح قدام الحاج علي اللي كان طالع من حوشه بيمشي للجامع..
كلهم جمدوا في مكاناتهم..
والولد صاحب الكورة حط ايديه ع راسه..
ربيع وهو مصدوم:مسلطينه عليا هدا!..
هو شبحلهم كلهم بعدين قال؛من حدفها...
كلهم وكأنهم كانوا متفقين ع الاجابه..
"التارقي".
وربيع اشر عليه بدون مايتكلم..
التارقي قعد يفنص وهو مصدوم...
علي شاف لعبد القيوم وقال:انت اللي حادفها حق!؟
الولد صاحب الكورة وقف وراه وقال بتوسل:بالله ياعمي قول ايه..
بلع عبد القيوم ريقه وعقد حواجبه وقال:اها..انا..سامحنا ياحاج..
علي طبس وخدي الكوره وحدفهاله..
تلقاها وشدها بيده وقال؛بارك الله فيك سامحنا..
والحاج علي هز راسه ومشي وهو يضرب في عكوزه ع الارض متوجه للجامع..
ولما تباعد التفتلهم عبد القيوم وقال؛شن وصل الطليان للكفره!..
ضحك نضال؛عارفينه يتحشم منك..
ربيع؛واني لايتحشم مني ولايطقيني كان عرفني اني اللي حادفها يفلقني اني وياها..
اشرف بضحكه؛جت سليمه..
ومشي لسيارته..
الولد صاحب الكورة:منور ياقدر يافزاع..
وخدي الكورة من يده ومشي..
قعد يشوفله بعدم استيعاب بعدين قال...
عبد القيوم؛وبالله وتالله معاد لاعب فيها كورة فهالشارع..
كلهم قعدوا يضحكوا...
هز راسه ومشي للخلف وهويقول؛اضحكوا اضحكوا تو نوريكم كان طلعتوها بر الجمعه هذي دقوهالي هنا خضرا..وحط يده ع ذقنه..بعدين لف وكمل طريقه للحوش..
هما انصدموا...وربيع قال..
تي تعالى هني..صل ع النبي..
وهو كان يضحك بصمت ومشي خش للحوش..
🍃🍃🍃🍃🍃
"اللهم احيني مسلمه وتوفني مسلمه والحقني بالصالحين"
هدا الدعاء كانت تردد فيه عائشه بعد ماانتهت من صلاة العشاء..
المهدي جاها وين مايصلوا النساوين لقاها قاعده بروحها وتدعي..
تباعد وقعد يراجي فيها لين تكمل...
وهي كملت دعاء...وناضت ومشت طلعت..
لقاته قدامها قالت؛قداش ليك هني؟
المهدي؛توا بس..
وخداها من يدها وقال:نمشوا نقعمزوا في مكان هادي ونتعشوا غادي بعدين نركبوا الباص بش يرفعنا لمكه ونقعدوا غادي لين نصلوا للفجر بعدين نمشوا للفندق..
هي بإبتسامه قالت؛باهي..
🍃وطلعوا من المسجد النبوي..
وركبوا تاكسي..رفعهم لمطعم خدي منه عشي..
وبعدها رفعهم لمكان هادي ونظيف..
ماكانش فيه هلبه ناس..
فرشوا فيه وقعمزوا يتعشوا..
المهدي؛ارفعيه ماتباني ع حد غيري..
رفعت خمارها..
وهو يقول؛الوجه السمح هدا ماتشوفاش عين غير عيني..
ابتسمت بخجل..بعدين خدت نفس عميق وقالت:ريحه الهوا ديما حلوة هني..يشرح الصدر يرد الروح..شبحتله وقالت..الراحه اللي نحس بيها هني مانحسش بيها في مكان تاني..
المهدي بإبتسامه؛اطهر واحسن بنادم في الدنيا مدفون فيها طبيعي ماترتاحي كان فيها..
عائشه بإبتسامه:اللهم صل وسلم عليه..
هو قال؛اللهم صل وسلم ع محمد..
وقعدوا ياكلوا بصمت وكل حد فيهم يفكر في حاجه..
شويه هي حطت اللي في يدها وشافتله وقالت؛مهدي..
هو شبحلها وقال:نعم؟
بلعت ريقها وقالت:سامحني..
هو استغرب ولمعة الدموع بانت في عينه..
عائشه؛حملتك فوق طاقتك...وتعبتك معاي وانت بروحك مش ناقص..
هو قال؛شن تقولي انتي راك مرتي!..
عبوا دموعها عيونها وهي تقول؛خايفه نخليك تواجه صغارنا بروحك..خايفه ياخدوا منك لأنك درقت عليهم..اني والله مادسيت مرضي الا ع خاطرهم هما مانبيش صغاري يشوفوني نطيح بالحاجه..مانبيهمش يشوفوا امهم بمنظر قبيح وبشع..نزلوا دموعها وهي تقول..نبيهم ديما يتفكروا امهم وهي قويه وفي احسن صورة..مانبيهمش يتعذبوا لما يتفكروني..
نزلت دمعته غصب عنه وماباش يسكتها..
وهي متابعه تقول؛صدمه الموت تبدا كبيره بعدين تصغر وهما سيورهم يتعودوا ويعيشوا حياتهم..عارفه حيتعذبوا في غيابي لكن مش قد عذابهم لو شافوا امهم كل يوم وهي تموت الف موته...
نزل عيونه وهو يشوف للفراغ وقلبه كان موجوع ع الآخر..
رشفت بعدين قالت؛اللي مريحني ان قاعدلهم اب مافيش منه..
شبحلها..
وهي تقول؛راجل بمعنى الكلمه واب حنين وقلبه كبير...
نزل عيونه وقال؛وظلم امهم هلبه معاه وجرحها وقسي عليها وكان اناني معاها..
هي قالت؛والله لا..لا..مش هكي والله ماهكي..اني يامهدي لو ماكنتش خديتك كنت حناخد واحد من صحاب خوتي ولاحد من طرف بوي او قريبي راجل زي بعقليتهم وتفكيرهم نعيش معاه بلاقدر ولااحترام خدامه ليه ولماليه ولو اعترضت ماليا هما اول من حيعفس عليها بش نخضع ونرضى باللي يجيني..لكن انت..درتلي شان وكان..خليتوا خوتي يهابوني ويحترموني لاني مرتك..حتى بين ماليك..خليتني نخدم ودرتلي سيارة وعاطيني حريتي ولافي عمرك نقصت عليا حاجه..اني يامهدي صح ماكسبتش حبك.لكن كسبت احترامك اللي بالنسبه ليا اهم من الحب بهلبه..
يسمع في كلامها وقلبه يزيد يوجعه اكثر واكثر..
هي قالت؛لايأنبك ضميرك ولاتحس بالذنب مسامحاتك دنيا وآخرة ياللي ماريت معاك في حياتي كان كل خير..يااول واخر راجل حبيته في حياتي..
هو ناض وجي قعمز جنبها وخداها في حضنه وقعد يضم فيها بقوة ودموعه تنزل بدون مايقول كلمه..
وهي ساكنه وساكته ومغمضه عيونها ومبتسمه براحه وقلبها ينبض بحبه...
🍃🍃🍃🍃🍃
"تجيك ومعاها فايزة وتلحق نسرين بعدين واني نوصل فيكم للمدرسه"
هدا يوسف يحكي لسدره ع ايام زمان...
وهي اللي قاعده غارقه في سبات عميق..مايشبهش للنوم اللي نعرفوه..
تسمع في كلامه...وكأنها مقعمزه في مكان مظلم وتتفرج ع ذكرياتها بعرض "داتا شو"
"لما كنتوا تضحكوا بصوت عالي تسكتكم عيشه وهي تهزب وتعطي فيكم محاضرة واني ناصر فيها"
سمعت صوت ضحكاته..وهي تشوف في الذكريات اللي يتكلم عنها قدامها..
🍃يوسف بحزن؛سبحان الله كنتي انتي وعيشه روح وحده كانت اقربلك حتى من خواتك..لكن فهالدنيا مافي شي يقعد ع حاله...
🌿وسدرة تشوف قدامها في صورة من ذكرياتها مع عائشه..
لما كانوا يرقدوا في فراش واحد وهما شادات في ايدين بعض...
🍃🍃🍃🍃🍃
ليلتها...
وصلت عائشه مع المهدي لمكه..
وقعدوا فيها لين آذن الفجر..
صلوا وبعدين روحوا للفندق...
حطوا روسهم ع المخده ورقدوا...
المهدي راح في النوم من تعب السفر...
لكن عائشه...
خلاته لين خداه النوم...
وناضت من جنبه...
مشت لشنطتها..فتحتها..
وطلعت منها مذكرة وبيرو..
ومشت طلعت من جنب..
قعمزت ع كنبه مقابلها كرسي..
وحطت عليه المذكره..
فتحتها...بعدين خدت نفس وطلعاته...
وبدت تكتب...
كتبت اربعه وراقي..
كتبت بقلبها ودموعها...
اربع رسايل وداع...زادت ع اوجاعها وجع...
بللت ليهم دموعها وهي تكتب فيهم...
كانت حاسه احساس قوي انها حتموت خلاص..
ورؤيه شافتها كان هدا تفسيرها..
لهدا سارعت بكتابة الرسايل..قبل ليسبقها الآجل...
بعد ماكملتهم...
وطوتهم...وخدتهم هما والمذكره ودستهم تحت ملابسها في الشنطه..بعدين سكرتها...ورجعت مرة تانيه خشت السرير..
ورقدت مقابلاته...حطت يدها ع خدها وقعدت تتأمل فيه لين خداها النوم ورقدت...
🍃
والجالي في الفيلا متاعه..
مارقدش غمضه للصبح...
متكي ع كنبة الصالون في الدور الاول..
علاش مش راقد في داره!؟
ببساطه..لأن طوبى مش معاه فيها..
من اول ماروح للفيلا..
وهو يشوف فيها في كل مكان..يسمع في صوتها يطلعله من كل تركينه..
كان جي يغمض عيونه يشوف عيونها..
مايتصلش بيها..لكن يقعد شاد تليفونه ويتفرج ع رقمها وخلاص..
قعد يفكر..لو طلعت طوبى من حياته..
كيف بيكون شكلها..
"جالي راجي ماتاخدش الدوا قبل لتشرب مية رقيه..
خيرك تشبحلي هكي!..اني مرتك راهو هيا خود دواك واشربها بعدين اطلع"
"تو انتي عندك دار حوايج وداعكي فيا في الدولاب
مكسله نمشي غادي نعلقها هني وخلاص..حي تعالى شوف جت جنب لبسه تشبه لبستك البسها غدوة باهي"
"جولي..ماديراش راجي خل اني نحطلك منه
ايه بش تبخي منه حتى انتي"
وصوت ضحكاتها يتردد لمسامعه..
صوتها وهي تقرا عليه..يدها وهي تحطه ع قلبه وتمسح عليه..
بنة ماكلتها..ريحة قهوتها..
ومبروشتها..
فنها ولوحاتها...
اللوحه اللي رسمتهاله..
صوتها وهي تغني لفيروز..
🍃عندي امل فيك..عندي ثقة فيك🍃
هدا كله...حيخسره..واكثر من هكي..
ولما يسخره هو..اكيد حيكسبه غيره ويولي كله ليه..
بدت انفاسه تتسارع وهو يتخيل في طوبى مع غيره ناض قعمز وهو يتنفس بقوة..ودموعه عبوا عيونه...
🍃وهي فهالوقت..
كانت مقعمزة برا..
لابسه في سبابتها خاتم التسبيح..وقاعده تردد في تاج الذكر بش تاخد الطاقه القوة اللي تخليها تكمل في هالحياة وتقاوم كل المنغصات اللي فيها...
وقفت فجأه..لما جو عيونها ع زهر الياسمين..
جي قدامها طيف سدرة وهي طالعه تقول..
"هيا سقدي روحك وقت"
ووقفت ع زهر الياسمين تشم فيه...
وتطلع عليها هي تلبس في شنطة المدرسه وهي تقول..
"هيا سديرة واتيه"
قطفت سدرة شويه من الياسمين وجتها بيه وقالت..
"خودي شمي بش تتنعنشي"
وصباته في ايديها..
ومشت وهي لحقتها وكانت تشم فيه..
🍃وقعد هاليوم ذكري..
تذكر فيها وصاحبتها مش بيناتهم..قعدت بس طيف ذكرى..
انسكبوا دموعها من عيونها..والقلب دموعه دم...
مهما حاولت تكتفي بنفسها في هالحياة تحس في روحها ناقصه هلبه من غيرها...
سمعت صوت حمحمة بوها..
وبعدين سمعاته قال...
"ياوكيل الضعفاء وهادي الحايرين يارب"
مسحت طول دموعها بقوة...ورسمت ع وجهها ابتسامه والتفتت شافاته يفتح في شيشمة الميه بش يسقي الزرع..
قالتله بصوت مسموع:صباح الفل..
التفت وشافها وابتسم ابتسامه يحبها قلبها وقال؛ ياصباح الورد والياسمين ع بنتي..
هي قالت بإبتسامه؛قهيوه مزهرة..
هو قال:فيسع فيسع..
ناضت ومشت خشت وهي تقول؛حاضر..
🍃🍃🍃🍃
وعدا هاليوم...
وهي فوتاته في الخدمه والقرايه وتحاول تتنسى شعورها بالضيق من تجاهل زوجها ليها...
☘وهالتجاهل كان لضرتها فيه نصيب..
حتى هي لاجاها ولااتصل بيها ولايرد ع اتصالاتها..
وخلاها مش مستوعبه شي من اللي يدير فيه ومعاش قادره تفهمه نهائي..
عكسه صابرين اللي فاهمته كويس..
🍃صابرين:مروة اني نعرف الجالي كويس اني نشوف في اللي انتي ماتشوفيش فيه واللي نجاة ماتبيش تشوفه..الجالي يحب طوبى بس..واختك عنده مجرد حاجه يملكها يبيها ومايبيش يستغنى عنها زيه زي هالرجاله المعددين تلقيه واخد 4 وفي قلبه وحده بس والباقي عنده زي سيارة ولااثاث حوش يبدلهم عادي..
مروة بضيق:لالا ياصابرين الراجل يرعش ع اختك شفتي شن دار اليومين اللي فاتوا؟
تنهدت صابرين بملل وقالت؛ماهو قتلك يامروة نجاة حاجه تخصه ويهمه امرها لكن مش حيخلي طوبى ويتمسك بيها هي..
غيرت مروة عيونها عن اختها وهي مش مقتنعه بكلامها..
صابرين فهمتها وقالت؛تو تولي لكلامي يامروة مع الأيام..
مروة؛بنمشي لحمزة..
ومشت وخلتها..
وصابرين معاها بعيونها بعدين حركت راسها يمين ويسار وهي مبتسمه بتهكم..
🍃مروة وهي ماشيه للقسم اللي فيه حمزة كانت تفكر في كلام صابرين بقلق..
وين وصلت لحجرة حمزة اللي لقتها مفتوحه..
جت بتخش بس وقفت قدامها لما شافت جداه لطفيه معاه في الحجرة مقعمزة حداه وهي تبكي وتقول..
ياروحي وليدي ياروحي..
وحمزة يرد عليها:مافيا شي جداي اني كويس..
وهي خدت يده وقعدت تبوس فيها..
انوجع قلب مروة عليها..وقررت تخليهم بروحهم وبراحتهم...
🍃🍃🍃🍃🍃
الساعه 6:30مساءا..
مشوا رجالة عيلة الواعر وخوت صفيه لحوش اهل حسناء بش بيفضوا فيها..
والعريس في هداكا اليوم كان في عمله ماروحش بكل.
وحوش لطفي الواعر..
ملتمات فيه النساوين...
فايزة وبناتهم عندهم..ونبيله جت مع غرفه ..
كلهم في صاله حوش لطفي وصفيه ام العريس دير في عالة الشاهي..
ووسط هالاجواء كانت طوبى تحاول تنسجم معاها بش ماتفكرش في أي شي ينغص عليها..
مطيره؛العشي الليله مقليات وبينوضوا الاء واريج يديروه..
الاء:لالالا انسوا طلعوني من روسكم..
اريج؛حتى اني ماتعبيش عليا..
مطيره:طيح والله سعد العدو يابايرة راك قريب تتزوجي بتمشي للراجل حتى دحيه ماتعرفي تقليها!؟
فردوس وهي شاده ضحكتها:لاتعرف دير فطيره بس..
اريج ضحكت..
مطيره:وانتي تضحكي ياعارك راهم بيحطوا اللوم عليك يقولوا العيب في امها اللي ماعلمتهاش..
حطت الاء يدها ع فمها وهي شاده ضحكتها..
واريج قعدت تشبح لامها وهي تضحك بكتمان..
فردوس؛بكل عمتي راك..
مطيره:شن اللي بكل عمتي!؟ شوفي فايزة حداك معلمه صفاء كل شي الله يبارك وبتلحق مروة توا..فايزة اللي زمان ماكانتش تعرف تطبخ دحيه...
بناتها فنصوا وشبحولها...
فايزة وهي تضحك بتفنيصه؛ستر الله باقي عمتي..
فردوس:مع عمتي مافيش سترة..
كلهم ضحكوا...
ومطيره مررت نظرها عليهم بعدين قلبت عيونها وقالت؛مازال طاستك ياصفيه؟
صفيه وهي مبتسمه؛شويه بس..
هزت مطيره راسها وهي ساكته..
وعم الصمت في الصاله للحظات..
بعدين مطيره بدت تغني ..
ستر الله باقي ديري عزم..
كلهم قعدوا يشبحولها..
وهي تغني بصوت حلو...
ستر الله باقي ديري عزم..
ستر الله باقي يانا يانا ديري عزم..
وشاركوها الغني كلهم حتى نبيله..
ستر الله باقي بعد فراق..
سيورك تلاقي ديري عزم..
ستر الله باقي يانا ديري عزم..
🍃سكتت طوبى...
وسرحت بذكرياتها مع الاغنيه هادي...
لما كان عمرها 16 سنه..
يومها كانت مروحه من المدرسه..بعد مابدلت حوايجها وصلت..
مشت خشت ع اختها الكوجينه...
لقتها توتي في الغدي وهي تغني..
ستر الله باقي يانايانا ديري عزم..
ستر الله باقي وبعد فراق سيورك تلاقي
ديري عزم..ستر الله باقي يانايانا ديري عزم..
وصوت سدرة كان حلو هلبه..
ماهانش ع طوبى تقطع عليها..
مشتلها ووقفت جنبها لقتها دير في السلاطه..
غنت معاها..
وايدي في السلاطه ماريتاش..
شبحتلها سدره وابتسمت وهي تغني..
بعدين رجعت شافت للسلاطه وهي تقرض فيها.
وكملوا الزوز غني..
وايدي في السلاطه ماريتاش..
ياشينك شماته وطق الباب..
وايدي في السلاطه يانا يانا طق الباب..
ستر الله باقي ديري عزم..
ستر الله باقي ديري عزم..
ستر الله باقي يانا يانا ديري عزم...
🍃وتنزل دموع طوبى وهي تذكر في الذكرى..
بس ماخلت حد يشوفهم قلبت وجهها عنهم بدون مايلاحظوا وقعدت تمسح فيهم..
فجأه..
سمعوا صوت الباب يدق..
سكتوا ومطيره قالت؛مني جي توا زعمه!؟
ناضت طوبى وقالت؛هادي ابله نجاح..
ومشت طلعت من حداهم وين وصلت في الشماعه لبست شاربتها وطلعت برا بش تفتح...
~~~~~~~
في دار بنات الواعر..
نجاح؛هاه شن رايكم؟
اميمه بإبتسامه اعجاب؛تحفه تحفه ذوقك خطير..
طوبى:حتى اني عجبني هلبه..
نجاح بضحكه:باهي طلعت نفهم في ذوق جيل هالوقت..
آلاء ؛اني خبره في الفاشن ونقولك الله يبارك كله بيرفيكت..
نجاح بضحكه؛باهي الحمد لله..
طوبى وهي مبتسمه؛خلاص توا قعدوا الشناطي نشروهم ونحطوا فيهم البتات والباقي شورك ميمو..
اميمه بإبتسامه؛ماعليك..
الاء:كان ديرولها استيكرات ع الشناطي مكتوب عليهم اسمها..
اريج؛اني ناخدهم خل نخش معاكم بحاجه بسيطه..
طوبى بإبتسامه؛تمام..
نجاح؛خلاص مادام كل شي تمام خل بنروح توا..
طوبى:لاوين تروحي اقعدي هدرزي!..
نجاح:كان بودي ياطوبى بس والله مانقدر عيت خالتي جايين مانقدرش نخلي عواطف تحصل بروحها في العشي..
طوبى:باهي تعالي مرة تانيه وجيبيها معاك..
نجاح بإبتسامه؛ان شاء الله حبيبتي هي بالسلامه يابنات تصبحوا ع خير..
كلهم ردوا؛قدامك كل خير..
وطوبى طلعت معاها بش تسقدها..
اريج شبحت للحوايج وقالت؛هما حلوات وذوقها حلو لكن كان عطوا للعروسه فلوس تشري بروحها مش خير.
الاء:حتى اني هكي فكرت..
اميمه؛لقطة الفلوس مش حلوة لما تمديلها فلوس وكأنك تصدقي عليها..بس هكي تجيها ع هيئة هديه وتكون لقطه حلوة..
اريج بتفكير:صح...
اميمه؛هي خل نضموهم في الدولاب..
ومشت خدت الكياس وقعدت دس فيهم في الدولاب..
والبنات يساعدوا فيها...
🍃وبعد روحت نجاح..
ولوا قعمزوا في الصاله وهما يهدرزوا ع موضوع عرس اخت الابله اللي تخدم في مدرسة سدرة..
وانتقل الحديث لموضوع خطبة نبيله والمحجوب..
مطيره:من حقك ديري عرس راك قاعده بنيه خيرك!
نبيله؛مش قصة بنت ولاكنت متزوجه..بس اني الجو هدا عرس ودوشه وهيلوله مانبيش نديرهم..نبي حفله عائليه بس..
غرفه؛لكن روفا قبل قالي كان جي نصيبها بنديرلها عرس كبير..
نبيله حركت راسها بالرفض وهي مبتسمه وقالت:لالا..حفله بسيطه ونهار واحد وكان الله ويبقى الله..
صفيه؛خلوها براحتها تفرح بروحها كيف ماتبي الفايده في الهني..
مطيره؛صدقتي..
الجمله الاخيره اللي قالتلهاصفيه...
خلت اميمه وطوبى يحسوا بضيق وحزن...
تفكروا عرسهم..وتفكروا فرحتهم كيف كانت...
وينها هديكا الفرحه..ووينهم هدوكا الايام...
خدوا وقتهم وعدوا...والواقع فرض روحه بقوة..
وخلاهم توا بس يفهموا شن معنى الجمله اللي يقولوا فيها امهاتنا ديمه...
🍃الفايده في الهني🍃
🍃🍃🍃🍃
وحسين اللي اختار يكمل حياته وينسى حبه الضايع..
اقبل خطوة مهمه ماكانش مرتاح وهو يدير فيها..
صعب هلبه ع الراجل اللي قلبه مسكون..
يعيش مع وحده غير اللي يحبها..بس مع هذا خلاها ع الله وقال لنفسه وهو يحاول يقنعها..
"اكيد مع الوقت حيتغير كل شي"
🍃
بس مش كل شي مع الوقت يتغير ياحسين..
لو كان الوقت يقدر يغير كل شي..
راهو حول من قلب المهدي حب سدرة..
وخلا عائشه تملكه وتعيش معاه وهي الوحيده الموجوده في قلبه..
عائشه اللي فكرت بنفس الطريقه واكتشفت..
ان مش ديما الوقت ينسي..وان في حب البعد وطول السنين يزيده ماينقصش منه ولو مقدار ذره...
🍃في الحرم المكي..
كانت واقفه جنب المهدي وهما الزوز يكلموا في محمد فيديو...
"شوفي يام شوفي الكاس يام"..
رفعت يدها المغطيه بقفاز اسود وهي مكورتها وقالت صح ليك ولدي راجل وجبتها..
"ربي يحفظك ياحبي ويحفظ الراجل الاسد اللي حداك"
المهدي بآبتسامه؛قصده ذاك الشبل من هدا الاسد..واشر ع روحه..
ضحكت عائشه..
"ايوه مزبوط ياكوند...يام"
عائشه؛نعم امي..
"ارفعي خمارك يام استاحشت نشوف وجهك"
ويااه ع الكلام اللي قلته يامحمد قداش دار في قلب امك..
وقلب بوك المتعب..
هي رفعت خمارها وقالت:هاه..وكانت مبتسمه..
وبان وجهها في عيون ولدها حلو بالمرة حلو بزياده عن قبل..
قال..
"الله يبارك..ربي يحفظ هالوجيه"
ضحكت وقالت؛ويحفظك حبيبي..
حس المهدي ان عائشه حتبكي قال بسرعه لمحمد؛هي خلاص بنسكر توا كان لقيت فرصه نعاودلك..
"حتى اني ماشي بنحتفل مع الاولاد..."
عائشه؛ردبالك امي..
المهدي:تريس ع روحك..
"حاجه حاج كونوا هانيين..سلام توا"
عائشه:في امان الله حبيبي..
المهدي؛سلم ع الجميع..سلام..
وسكر..
نزلت عائشه خمارها والمهدي حط يده ع راسها وقال:نروحوا..
هي هزت راسها وكانت تبكي بصمت..
وهو خداها ومشوا طلعوا من الحرم متوجهين مع بعض لفندق قريب عليه...
🍃🍃🍃🍃🍃
الساعه 4:00بعد منتصف الليل..
في عز الليل...في عز هدوئه وسكونه...
كانت هي فايقه..
في الصاله..تصلي في القيام...
وتدعي لسدره..لقت روحها تدعيلها هي وبس ولسان مش راضي ينطق بالدعاء لغيرها حتى لنفسها..
"ياصمد يامن لاصمد له..ردهالنا وماتحرمناش منها..ردها ع خاطر بوي ياربي..ع خاطر بوي اللي قاعد يتعب كل يوم اكثر من اللي قبله من غيرها..اني ياربي تشوف فيا وانت اللي عارفني لو نقدر نديرله شي مانقصرش..اصلا اني قاعده نحاول ياربي..لكن مانقدرش ع اللي كانت هي تقدر عليه..
ياربي حتى اني محتاجتها هلبه هلبه...ياربي ردهالنا يارب يامن على كل شي قدير"
ورفعت راسها بعد مابللت مكان السجود بدموعها..
ومازال تبكي بكتمان...لين كملت الصلاه..
وبعد ماكلمتها هدت شويه..وقعدت تستغفر في مكانها..
ودموعها ينزلوا دمعه ورا دمعه..
فجاه..سمعت صوت جاي من برا..
وقفت استغفار وناضت ومشت بهدوء للكوجينه..
خشتلها..ومشت وقفت ع الروشن وقعدت تشوف منه..
لقت بوها واخد كرسي بلاستك ومقعمز حدا شجرة الزيتون..
وهو مربع ايديه في بعضهم وسرحان والهم مولي من تقاسيم وجهه..
وخرت ع الروشن ومشت طلعت من الكوجينه وتوجهت للصاله وهي تبكي بدون صوت..
خشتلها..وقعمزت فيها وقعدت تبكي لين حست بالنوم جاها..
ع قد ماحاولت تقاومه في النهايه استلمتله ورقدت...
🍃🍃🍃🍃🍃
وفي جوار الحرم..
كان سلفها الكبير راقد بالنوم...
وجاه في نومه حلم...يشبه حلمين قدم شافهم قبل..
☄واقف وسط ضباب كثيف..
مايشوفش في شي حواليه...
شويه شويه..بدي يتبدد هالضباب..
وقعد ينزل ثلج..هو قعد يشوف للثلج اللي ينزل من فوق..كان ينزل حواليه وعليه...
فجأه..سمع صوت صهيل ..
نزل راسه وشاف للجهة اللي جي منها الصوت..
لقي فرس جاياته تجري..ووين وصلت فيه وقفت...
كانت في غاية الجمال...ووقفتها كلها هيبه...
هو قدملها...ورفع يده وحطها ع وجهها....
وهي ثور وتعصب وتصهل وترفع رجليها وتنزل..
هو مشي وقف جنبها وحط يده عليها مرة تانيه..
وهي قاعده ع حالها..
شويه..وركبها..وقعد يضرب عليها بخفه بإيديه الزوز..
وهي بدت تهدا شويه شويه...لين هدت تمام...
مسح علي شعرها بيده...طلعله منه خاتم فضه..
خداه وقعد يشوفله...بعدين لبسه...
بعد لبسه مسح ع ظهر الفرس...وهي قعدت تمشي بيه...
☄هو تحرك وفتح عيونه..
وقعد يرمش فيهم ببطء ويحاول يستوعب هو وين توا..
لما رجعله وعيه تماما واستاقظ..
ناض بنص جسمه وشاف جنبه مالقاش عائشه..
خاف..
نزل من السرير وقعد يشوف حواليه مالهاش اثر..
وين مشي للحمام بيشوفها..
هي فتحت الباب وطلعت...
لقاته قدامه..قالت..
عائشه:باهي اللي نضت بروحك..خلاص الفجر قريب سقد وتي روحك خل نلحقوا الصلاه..
ومشت فاتت من حداه..
وهو تنهد براحه..بعدين مشي خش للحمام...
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
وصلوا اخر صلاة ليهم في الحرم..
الفجر..
لأن طيارتهم بتوقيت البلاد اللي هما فيها الساعه عشرة صباحا...
بعد ماكملوا صلاة...مشوا بيديرواطواف الوداع..
كانت شاده في يده وهي متوجه معاه للكعبه...
وين قربت منها..
تفكرت الرؤيه اللي شافتها....
وكأن في نور نزل عليها وهي طوف حوالين الكعبه وقعد يرفع فيها فوق..وهي فرحانه هلبه...
هبت فجأة عليها نسمه وهي تتفكر في الحلم..
نسمه لطيفه عمرها مامرت عليها نسمه بهاللطافه..
خلتها تحس بشعور حلو هلبه..كله راحه..
طلقت يد المهدي وقعدوا يطوفوا هما الزوز..
وهي كأنها بروحها مافي حد معاها...
عايشه في حالة حلوة هلبه...مخليتها تحس وكأنها ولت خفيفه زي الريشه...
فجأه..
حست بروحها فقدت التوازن...
بس تماسكت وكملت...
هو شبحلها..شاف لوجهها لاحظ ملامح ابتسامه خفيفه...
ولاحظ مشيتها كانت مترنحه شويه..
هو قال؛عايشه..
وهي ماتسمعش فيه..
ركز على وجهها لاحظ ان ابتسامتها وسعت..ونظرها ارتفع شويه..
وكأنها تشوف في شي سرها وخلا ابتسامتها تبان حلوة هلبه ع وجهها..
هو قال بخوف:عايشه..
وعيون عائشه بدوا يتسكروا...وفقدت توازنها وطاحت..
ولأنه لحق عليها فيسع جت بين ايديه..
هو كان مفجوع وهو يقول:عايشه..عايشه..تسمعي فيا!؟؟
واللي حوالين الكعبه وقفوا وقعدوا يشبحولهم..
جوه يجروا جماعه الامن وقالوله ياخدها ويلحقهم..
وهو رفعها بين ايديه ومشي بيها يجري..
وهو يشوفلها يقول:عايشه..بالله عليك ردي عليا عايشه..
هي شافتله بعيونه اللي يدوب كانت مفتوحه..
ابتسمتله ابتسامه حزن...ونزلت دمعه من عينها اليمين..
رمشت عينها مره...بعدين غمضتها ومعاش فتحتها..
وثقلت بين ايديه..
هو بفجعه؛عايشه..لاعايشه...عايشه..
وخش بيها لمكان ومعاه نساوين بش يشوفوها..
حطها ع الارض وقعد يفيق فيها..وهو يضرب ع خدها بلطف..
عايشه بالله عليك فيقي ياعايشه..ارجوك..بالله عليك..عايشه..عايشه..
وحده من النساوين قالت؛دقيقه اخوي اني طبيبه خليني اشوفها..
هو اللي كان مفجوع ومش مستوعب:شوفيها شوفي...
هي طبست وخدت يد عائشه..حولت القفاز وشدت الرسغ بأصابعه..
وجهها بدت عليه ملامح الأسف..
طلقت يدها ورفعت حجاب عائشه..وحطت اصابعها ع مكان النبض..
المهدي والدموع في عيونه؛شنو يادكتورة؟
وخر المراة وقالت بأسف وحزن؛البقاء لله...
هو نزل عيونه وقعد يشوفلها..
يشوف لوجهها اللي كان يبان جميل هلبه...
وهو يشوفله..
يمر بين عيونه شريط حياته معاه...من لما خطبها لعند هاللحظه...
نزلوا دموعه...وقال بألم...
إنا لله وإنا إليه راجعون..الله يغفرلك ويرحمك..ويرضى عنك دنيا وآخره..راضي عنك ياللي ماريت منك كان كل خير..
وطبس ع جبينها وقال بنبره مخنوقه..
سامحيني...
وباس ع جبينها وطول وهو يبكي بصمت..
واللي حواليه تأثروا هلبه لين نزلت دموعهم...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃🌸"سكري الباب سكري"
عائشه سكرت الباب وقالت؛هاني سكرته خيرك؟..
جبدت سدره عائشه من يدها وقالت:قعمزي..
قعمزوا الزوز ع الفراش وقالت عائشه..
تي تكلمي هيا..
سدره قعدت تفرك ايديها في بعض بخجل وقالت؛بنقولك حاجه لكن ماتكشخيش عليا باهي تكشخي عليا نقتلك..
عائشه؛كان مش غلط حاضر..
سدرة بنرفزة؛اياااه علينا عاد..اسمعي واسكتي بالله عليك..
عائشه بمسايرة:باهي تكلمي..
سدرة بخجل:المهدي..
رفعت حواجبها وقالت؛خيره؟
سدرة نزلت راسها ويدوب قدرت تقول...
نحبه..
عائشه شهقت وقالت؛حب شني هدا حب شني استغفر الله! حرام يابنتي حي عليك!
سدرة بضيق؛والله عارفه..بس شن بندير والله مابيدي..حط ايديه الزوز ع قلبها وقالت..حاجه نحس بيها لما نشوفه..ولما يجي لمختار ونسمع فيه يهدرز معاه...ولما يجوا عيوني فس عيونه...
غمضت عيونها وقالت..اااه ياعويشه حاسه قلبي بيطير..
ضحكت عائشه وقالت؛لهالدرجه!
سدرة وهي مغمضه عيونها؛واكثر ياعويشه..طاح في قلبي داخلطياح وخداه مني ولد اللئيمه..
قعدت تضحك عائشه..
فتحت سدره عيونها وهي تضحك بعدين قالت:نحبه عويشه..
عائشه:باهي فهمنا قريب تخليني نحبه معاك..
فنصت فيها وقالت؛نذبحك بعدين..
عائشه بضحكه:مهبوله..
وسدره ضحكت بخجل وقعدت تلعب باطراف شعرها...
وعائشه تشوفلها بإبتسامه...
سدرة؛بيناتنا باهي..
هزت راسها بإبتسامه وقالت؛دفنته في بيرنا..
ضحكت سدره بعدين ضمتها وقالت؛نحبه...
وعائشه ضمتها وقالت؛واني نحبك انتي..
وضحكوا هما الزوز....
🌿🌿🌿🌿🌿
《سدرة
هيَ اٌختي قبل ان تصّبح صديقتي هي تلك الفتاه التي انجبتها لي الدنيا ولَم تنجبها امٌي.انتي قطعة من قلبي و رفيقة روحي و الجُزء الجميل من عمري و إن قلّ الكلام أنت أختي و صديقتي التي لا تعوّض ولا تستبدل🌹》
🍃جزء من رساله وداع عائشه لصديقة العمر سدرة المنتهى🍃
#رسايل_وداع
#طوبى
....يتبع.....
🖋ملاحظه جزئية الرساله مقتبسه🖋
