# طوبى "شارع القهوة" #جمان_فريد #الجزء_التاسع_والعشرين" عاصفه فبراير الاخير" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ لحساسية الوضع وخطورته انذاك.. طلعوا خبر ان المهدي مات في تونس بسبب المرض بش قدروا يديروا عزاه..وينصبوله الخيمه.. جيبوا عقل لسدرة يستوعب ان هالخيمه منصوبه لعزي المهدي..! المهدي حبيب قلبها وروحها مات قبلها!.. كيف بيكون شكل الحياة عند سدرة والمهدي مش فيها.. صح متفارقين..بس حسه في الدنيا هو اللي كان مصبرها ع هالفراق.. مش مهم عندها يكون معاها ع قد مامهم عندها انه يكون مرتاح ومتهني.. بس انه يموت قبلها هادي حاجه عقلها ماباش يستوعبها.. حزن امه وبوه وخوته وخواته ومرته وصغاره كوم.. وحزن سدرة كوم تاني.. حزن عيلته كله في قلب سدرة اللي ماقدرتش تكون موجوده في العزي.. عارفه روحها مش حتقدر تتحكم في نفسها وخافت تنفضح قدام الناس وفي نفس الوقت ماتبيش تحرج صاحبتها... سادها ماجاها اول ماسمعوا الخبر... قعدت سدرة في حوشهم.. حبست روحها في دارهم.. كانت مقعمزة ع السرير حاضنه مخدتها.. ومسكرة بالمخدة فمها..وتعيط وصوتها مكتوم مش مسموع.. تبكي بالعبرة ودموعها نهر جاري.. طوبى بس اللي قعدت معاها في الحوش. كانت واقفه فم الباب تسمع فيها كيف تبكي وتبكي معاها وقلبها بيتقطع عليها... ☘ومن جهة تانيه.. وبرغم كل شي.. صفيه مشت للعزي..في النهايه هادي موت تسقط كل المبادئ والاعتبارات قدامه... وجع قلبها حال الصغار..ووجعتها عائشه... بس مغليه وين شافتها جن جنونها ناضتلها وقالت:تقتلوا القتيل وتمشوا في جنازته.. صفيه وهي متوتره ومرتبكه:مغليه المهدي مربياته مع صغاري.. عيطت عليها وقالت؛ماتجيبيش اسم ولدي ع لسانك.. وقعدت دف فيها وهي تقول؛اطلعي اقلبي وجهك امشي..انتي واشكالك مانبيهمش يدنسوا حوشي..الله ينتقم منكم كلكم.. الله ينتقم منه.. جتها تجري اختها سدتلها فمها بإيديها.. وخديجه وهي تبكي قعدت تقول؛اطلعي هيا اطلعي.. لفت ومشت صفيه بتطلع وهي ترعش..جو عيونها في عيون مطيره.. مطيره طول غيرت عيونها عنها.. وهي طبست راسها وطلعت بسرعه.. ☘عائشه ببكي:نلبس فيكم وحده وحده لبس الحداد ومانحساب بيجي عليا الدور.. فايزة وهي تبكي؛ربي يبرد نارك ياوخيتي ويصبرك.. عائشه وهي تبكي:كل نار نقدر نتحملها ونصبر عليها الا ناره..راضيه منه بكل شي المهم يقعد قدام عيوني حي نتنفس النفس متاعه..نسمعه حسه..نشوفه نملي عيوني منه.. اني الحقيره اني اللي حرجت وخليته وحرمت روحي منه اني... وقعدت تخبط ع وجهها..لين شدتها فايزة وضمتها وهي تقول:شن جاك ياعيشه انتي اكثرنا ايمان وقرب من ربي اكثر صبر مفروض تكوني.. عائشه وهي تعيط؛مش قادره ياربي مش قادره نار تاكل فيا من داخل..كيف بندير بلاه..شن بيصير في صغاري..اااه ياربي ااه الصبر يارب الصبر.. وحال نسرين كان بالويل حزنا ع خوها الكبير ماتحملتش هلبه وهي تبكي..فقدت وعيها ورفعوها لأقرب مصحه... ☘اما خوته.. طاهر قلبه كان متقطع ع صغار خوه ضمهم ليه والزوز كانوا يبكوا.. اما الجالي ونضال حزنهم ع خوهم خلا قلوبهم تتعبا حقد ع النظام الحاكم... لكن بوهم تعبه هلبه خبر المهدي..كان يبان صابر.. بس من داخل في حسرة كبيره... ☘☘☘☘☘ "سدرة..سدرة" اميمه ودموعها في عيونها؛بنفتح الباب.. طوبى بقلق:افتحي.. فتحت اميمه الباب.. خشوا عليها.. لقوها مقعمزة ع سريرها بالطول سندها ظهرها ع الحيط.. وسرحانه في صورة في يدها تشوفلها.. اميمه؛سدرة.. وسدرة ع حالها مابتش ترد.. قدمتلها طوبى تبي تشوف لشن تشبح.. نزلت سدرة الصورة قبل لتوصل فيها بعدين قالت بصوت متعب؛خلوني بالله عليكم.. طوبى: سدرة خايفه بابا يسأل عليك شن نقوله سدرة؛قولوا مريضه.. طوبى مشت قعمزت حداها وقالت؛بدال ماديري هكي صلي وادعيله بالرحمه كان تحبيه حق.. بدت ع وجهها ملامح البكاء وهي تقول؛ندعيله بالرحمه!...يعني حقه مات طوبى! طوبى شدت ع قبضة يدها وشد بكاها بقوة.. اميمه ودموعها ينزلوا؛عارفه اللي تحسي بيه واعر هلبه..ويقولوا مايحس بالنار كان اللي عافسها..بس فاهمه عليك وفاهمه شن تحسي..مبشعه الفراق ومشناه..مشناه للقلوب اللي مازال تحب بعضها.. سدرة وهي تبكي:ااه ياوخيتي حطيتي ايدك ع الجرح ياأميمه..بس حالك اهون من حالي بوين..قاعد حي يرزق عمر ومصير الحي يتلاقى يقولوا..لكن اني..اني اللي كان سادني بس انه يكون موجود كيف ندير بعد...غمضت عيونها بشده وقالت..والله ماقادره نقولها... شدت طوبى يدها بقوة وقالت ببكي:ياعمري قطعتي قلبي.. سدرة:سلامته قلبك ياعمري ربي مايذوقك اللي ذقناه ان شاء الله ماتشوفيه ياربي... والثلاته قعدوا يبكوا من وسط قلوبهم.. وكل وحده فيهم في قلبها وجع كبير... ☘☘☘☘☘ بس في وسط هاللحظات المأساويه.. عقل نجاة مابطلش تفكير في مصير عائشه.. الناس تبكي ع المهدي.. وهي تبكي ع روحها خوف من ان اللي قالت عليه اختها يصير.. اما عقل محي الانتهازي.. بعد ماشاف الاوضاع لشن آلت.. وعرف الكفه لمن بترجح.. قال خل نلحق نفسي مادام خديجه لتوا ماقالتش لأهلها انه طلقها.. ووقف في عزي المهدي مع عديله زي خوته واكثر. اللي يشوف نسابات محمد شنيبه يحسده عليهم.. ومافي حد منهم عارف المدرق ورا هالمظاهر الخداعه.. 🍀🍀🍀🍀🍀 عدوا ع وفاة المهدي.. 15 يوم.. مافيش نار بردت مازالت في عزها... زي نار نجاة اللي مابتش تخمد وهي تفكر في الوسواس اللي في راسها خصوصا وان عائشه قاعده تقضي في عدتها في الشقه متاعها... ☘في الطريق.. نجاه:معقوله مرتبك كله بيمشي عليهم اللي يسمع يقول خصيصين.. طاهر:نجاة ردي بالك اعرفي كيف تتكلمي هادوا صغار خوي يعني صغاري حتى لو كان عندهم مش مخليهم.. نجاه:صغارك!..ياسلام سلم.. طاهر:ماتقولليش خير بلاك انتي موليه هكي! هي جت بتقول اللي عندها بس في اخر لحظه اداركت نفسها خافت لوكانت الفكره مش موجوده في راسه هي تحطها فيه.. هدت شويه وقالت؛اسفه سامحني بس اعصابي تاعبه شويه.. هو سكت وقعد لاهي بالسواقه.. اما هي قعدت طول الطريق تفكر.. لين وصلوا في حوش العيله... ☘☘☘☘ وفي الحوش اللي مقابلهم.. "علاش يامصطفى علاش علاش هكي دير فينا حرام عليك" مطيرة وهي متوتره:اهدي يافردوس بنات يشوفوا فيك. فردوس وهي تبكي؛عطاني وعد قالي خلاص معاش بنخش فيها الدوشه..ضحك عليا ودار مافي راسه خلانا وراه اني وصغاره برواحنا.. لطفي:برواحكم كيف يابنتي واني وين متت؟! مطيرة؛بعيد السو عليك.. فردوس وهي تبكي؛اني وصغاره بحاجته هو اكثر من اي حد يابوي مافي شي يغني الصغار عن بوهم..كان صارت فيه حاجه كيف بنديروا بيولي مصيرهم زي مصير صغار المهدي.. مطيرة؛بعيد السو بعيد السو..ربي ينجيه ويرده سالم يابنتي ان شاء الله مايخسره حد.. لطفي شبح لأحفاده لقاهم يبكوا قال؛شوفي لبناتك يابنتي وماتسبقيش بالشر..تفائلي خير وقولي يارب رده سالم معافى.. وفردوس قعدت تقول..يارب...وهي تبكي..وعمتها حضنتها وقعدت تهدي فيها.. اما الصغار خداهم جدهم وطلعهم معاه هدرز عليهم وغير جوهم.. وسدرة وسط هالاحداث اللي صايره.. كانت في عالم بروحها..مازالت غارقه في حزنها.. منعزله قليله الكلام...كان طلعت من الدار تطلع بش تقضي حاجات بوها وماتبانش قدامه بموقف بايخ.. وفي العشيه ديما تقعمز قدام شجرة الفل وهي تفكر بس في المهدي.. وطوبى تحوم حواليها..خافت عليها من الحزن.. خافت تصيرلها حاجه وتلحق المهدي..وتفقد امها للمرة التانيه.. ☘☘☘☘☘ "شن مافيش مباريات ع رمضان" محمد؛في لكن مش لاعب مانقدرش.. طاهر؛علاش! محمد؛قبل بوي يحضر فيهم وتوا ماعندي حد يحضر.. طاهر:اني نمشي نحضر.. محمد؛مش حتكون زي بوي.. طاهر بإبتسامه؛صح مش حنجي زيه لكن انت جربني وشوف.. شبحله محمد شويه بعدين قال؛نفكر.. ضحك طاهر ومسح ع راسه وعيونه مليانات دموع... ☘ومن المربوعه للصاله.. كانت نجاة مقعمزة مع عزوزتها وحمواتها يهدرزوا عن موضوع مهم جدا بالنسبه لنجاه.. نجاة:هو الشرع يقول هكي ان عدتها تكملها في حوشها..لكن المشكله في لسانات شن يسكتها.. خديجه؛حتى اني وصلتني دوه... نجاة:اللي وصلني اني انكم ناويين تخلوا واحد من الولاد يردها.. مغليه حركت راسها بالنفي وقالت؛لالاالا مستحيل في عايلاتنا مافيش الكلام هدا بكل لاعيلتي ولاعيلة عمك اللي تترمل تكمل عدتها وتشوف نصيبها كان جاها نصيب والصغار ماتقدرش تاخدهم معاها.. وحني هدا اللي بنديروه مع عيشه..في النهايه حني في شارع واحد وصغارنا بيتربوا تحت عيونا.. نجاه؛مرات عمي ليه راي تاني.. رفعت نسرين حاجبها وهي تشوفلها.. اما خديجه قالت؛تريحي هدا راي عمك حتى هو لانظلموا بنات الناس ولاولادنا معاهم... نجاه:وعلاش نتريح اني شن دخلي مجرد كلام سمعته وقلته بس.. مغليه قعدت تشبحلها ع جنب وهي ساكته.. والبنات الزوز يشبحولها بحده.. ~~~~~~ نجاة بضحكه؛قريب قتلوني بشبحاتهم..لكن طز فيهم المهم طمنت ع مستقبلي.. صابرين:اهو لولايا اني راك قعدتي ع عماك.. نجاه ضربتها بمداليا التليفون وقالت؛انتي حطيتي في راسي وسواس خلتيني نكد ع روحي وع الراجل معاي.. صابرين بضحكه؛باهي مافيش زرده بهالمناسبه! نجاة؛بايته ماعندي من وين نجيبلك زرده.. فجأة هرب الضي.. الزوز قالوا؛اييييه.. نجاه؛مش عارفه شن قصته الضي.. صابرين؛شن مش عارفه شن قصته في جرة هالحرب ضاربين محطات شورهم.. نجاه بتذمر؛ياعليك قصه معاش بت تم امتى بينهوها ويريحونا كبودنا درهت.. صابرين؛ادعي وقولي ان شاء الله تم ع خير.. شويه عيط حمزه.. خدت المرضعه وهي تقول؛الحكايه نو وهم مش ناقصتك انت التاني..ومشت للكوجينه بديرله رضعه.. واخته خداته تلعب فيه لين تجيه امه.. 🍀🍀🍀🍀🍀 واستمر حال انقطاع الكهرباء.. مع ازمه نقص الوقود..والخبزة حتى هي.. والشعب الليبي تعرف ع الطوابير اللي حتبدا بينه وبينهم قصه عشق لاتنتهي في السنوات الضياع القادمه... ويخش رمضان... وكان اصعب رمضان يفوت ع الليبين من السبعينات. برغم انه شهر عباده ومفروض يفصل تماما عن الوضع اللي يعيشه الانسان بس اللي صار وقتها خلا الليبين مش حاسين بيه نهائي.. وسط..ريحة الدم...والموت واصوات الحرب اللي تجي من كل مكان.. شح الرزق..انقطاع الكهرباء... والاخبار اللي كانت تتوالى وتحبس الأنفاس... واللي عنده غايب مش عارف كان يرجع ولالا... واللي قاعد يودع في احبابه بالحياة خوف عليهم من المصير اللي حيلاقوه لو قعدوا معاهم... (مجبور نطلع ونخلي كل شي وراي ع خاطركم انتم اول شي..وجودي معاكم لو صار وهما خدوها حيضركم وحيضرني هلبه..هدا علاش اخترت نبعد عليكم ونبيكم تطمنوا عليا اني في أمان...استودعكم الله الذي لاتضيع ودائعه) كانت اميمه تقرالهم في الرساله وهي تبكي.. وامها تسمع وهي تبكي بقوة... علي بأسف:هكي خيرله ياهو هكي خيرله.. عبد المطلب؛زعمه مايلحقنا شي بعدين.. صفيه وهي تبكي بإنفعال؛هدا اللي هامك انت همك نفسك بس مش هامك ولدك اللي الله اعلم امتى مازال تشوفه مرة تانيه! عبد المطلب:وطي صوتك خيرلك ماتخلنيش نبدا فيك.. اميمه بضيق وملل:خلاص ياناس خلاص مش ناقصين رانا.. عبد المطلب:قوليه لأمك الكلام هدا.. علي قعد يأشر عليه بعكوزه وهو يقول:خلاص اطلع وخليهم اطلع.. سمع عبد المطلب كلام بوه وطلع وهو معصب.. وعلي اشر لأميمه ع امها بش تهديها.. هزت اميمه راسها وهي في قمة الحزن.. وهو قال:يفرج الله...ومشي طلع وخلاهم برواحهم... ☘يوسف؛الله اعلم وين وجهته.. سدرة ودموعها في عيونها:معناها خلاص.. يوسف:خلاص ياسدرة بيوصلوا في الزاويه... تنهدت وقالت:ربي يلطف بينا... يوسف:آمين..سدرة..ردي بالك من صحتك.. قال هكي لأن سدرة بعد موت المهدي المزعوم تراجعت صحتها ونقص وزنها وذبل جمالها.. هزت راسها مسايرة هي يدوب مبتسمه.. 🍀🍀🍀🍀🍀 وسط ساعات الترقب المتتاليه... مدن الغرب الليبي كلها طلعت عن سيطرة النظام اللي شبه انهار تماما.. وقعدت بس طرابلس... في من قعد يترقب وهو قدام شاشات التلفزيون.. وفي من مكان يراجي في ساعة الصفر مع جماعته.. منهم نضال والجالي... وحانت ساعة الصفر.. وطرابلس كلها انقلبت في يوم 17رمضان..الموافق 17 هانيبال اغسطس... في مناطق انتفضت.. وفي مناطق بدت فيها مواجهات مع من قعد من قوات النظام... ☘فردوس:توا كلمت حماتي قالت خلاص تاجورا تحررت والناس طالعه تحتفل.. مطيره:ياربي سبحانك مش مصدقه..من قال ينتهي حكم القذافي سبحانه مادايم كان وجهه... جتهم طوبى تجري قالت:قالوا خلاص بيخشوا لطرابلس داخل.. غرفه:كتيبه امحمد المقريف انشقت وسلمت هدا علاش خشوا بسرعه سدرة؛الحمد لله ربي حقن الدماء اريج:يعني توا بابا بيروح ولا كلهم شبحوا لأريج بعدين قالوا بأصوات متقطعه:ان شاء الله ان شاء الله.. اما فردوس قعدت تمرر في نظرها ع صغارها وقلبها مقبوض ☘☘☘☘ ماقعدش في طرابلس الا منطقه وحده دور فيها معارك.. خديجه؛واضح فيها كابو كبير يبوا يطلعوه نسرين؛يقولوا سيف.. نجاة:وفي ناس قالوا محمد مغليه:الله جعنها سحيقه تسحقهم كلهم.. خديجه:ايه والله... ع خشة نضال وهو شاد العلم ويحرك فيه وهو يغني: تعلى بالعالي تعلى بالعالي تعلى بن نجمه وهلال.. وخلاص خلاص..طرابلس كلها تحررت.. هما ضحكوا بفرح.. مغليه:المهم هداكا شن صار فيه! نضال؛كتح والله اعلم وين دياره توا.. مغليه:الله ينتقم منه ويبرد قلوبنا ويرتد ثار ولدي يارب.. كلهم قالوا:آمين... 🍀🍀🍀🍀🍀 يوم 27 من شهر رمضان... الساعه 11:00ليلا... خشت ع اختها الكوجينه وقالت؛وصلك الرصيد سدرة؟ سدرة وهي ضم في الكوجينه:ايه بري خودي منه ماعندي ماندير بيه هدا كله.. غرفه بضحكه:احلى سدرة.. ومشت تجري.. هي تنهدت وقالت؛ياريتني زيك ياغرفه... ع خشة فردوس سكرت الباب وقالت؛سمعتي سدرة! سدرة بخوف:ان شاء الله خير! فردوس:الشامس طليق عمتي..توفى .. سدرة بصدمه:لاإله الا الله..من شني !؟ فردوس:قالوا جاته رصاصه طايشه سدرة؛عمتي عرفت! فردوس؛بوي توا بيخبرها..نزلوا دموع فردوس وهي تقول...ياخوفي يجي يوم ويجيبولي خبر مصطفى. سدرة ودموعها ينزلوا:حتى هو ربي يهديه مفروض روح طول ماله ومال بني وليد هو! فردوس:قال حالف مانروح لين البلاد كلها تتحرر سدرة؛لاحول ولاقوة الا بالله.. فجأة سمعوا صوت بكي عمتهم طول طلعولها الزوز يجروا ☘☘☘☘☘☘ يوسف:قالك نقزوا لحياش الكابوات ولهتوا اللي فيهم كله.. علي الواعر؛متوقع يديروا هكي. صفيه تهكما:هادي ثورة التكبير المباركه! اميمه:خليهم اهي البلاد قعدتلهم خل نشوفوا شن بيديروا.. صفيه:كان دارو ثمره..مسحت بيدها ع ذقنها وقالت..هذا وجهي 🍀🍀🍀🍀🍀 ويعدي رمضان وبعده العيد. وبعد معارك حاميه.. سقطت اكبر مدينه مؤيده للنظام والناس المناصرة لفبراير طلعت للشوارع بش تحتفل.. ومنهم الجالي ونضال بس قبل ليطلعوا 🌻"ايوه" "ايوه الو...تسمع فيا" مغليه بفرح ودموعها ينزلوا:وليدي "امي..يام...شن حالك يام" مغليه؛انت اللي شن حالك يابوي شن صار فيك ياولدي؟ "اموري تمام يام...راهو اني قاعد في جنوب افريقيا ليا فتره" الجالي؛مش ع اساس بتمشي لأوكرانيا.. "لالا ماصارش اني ومجموعه معاي جينا هنا وسجلنا وقاعد ندرب هني خلاص" مغليه:كيف قصدك مش مروح!؟ "كان سخرربي يام..بوي وين..المهدي وين" سكتوا امه وخوته شويه و قعدت مغليه تبكي.. "يام...يام شن في..ماتقولوش بوي!" نضال شبح للجالي.. الجالي بألم:المهدي ياعمر.. "كيف!! شن تقول انت!؟" خنقت الجالي العبره وهو يقول.. "قتلوه الكلاب ياعمر" "لااله الا الله..تي شن تقولوا ياناس بس..لاإله الاالله!" ومغليه انهارت بالبكي.. ع جية خديجه تجري وين سمعت بكاها:يام..يما خلاص اهدي يام.. الجالي بقلق:بنسكر عمر..وسكر ع خوه.. وقعدوا محاوطين امهم وهما يهدوا فيها خافوا تصيرلها حاجه.. وبوهم في مربوعته مقعمز بروحه.. شاد السبحه ويسبح وشاد دموعه بالقوة.. ☘الدموع اللي تذرف فيهم سدرة وهي مقعمزة في الجنان.. السمي مغيمه غيوم معبيه تنبأ بقدوم مطرة قويه... بدت قطرات المطر تنزل وحده ورا التانيه... كان مطر خفيف... كانت تتفرج عليه وهي تبكي بصمت.. وتتفكر في اللقاء اللي جمعها بيه في الفروسيه.. تتفكر في كلامه وقلبها يزيد ينحرق.. شن بينسيها...شن بيطلعها منه..وهي في كل ثانيه تفكر فيه... ومازالت مش مستوعبه انه خلاص..معاش موجود في الدنيا!.. سدرة غمضت عيونها بألم وقالت:آه ياربي.. فجأة.. قلبها قعد يدق بقوة..دقات متسارعه مسموعه.. حطت يدها عليه وقعدت مستغربه وخايفه وهي تقول:شكله ضغطي هبط.. ناضت وخشت داخل بش تاخد حاجه ترقي ضغطها... كلت جبنه وقعدت مستغربه وهي تقول:قلبي يدق بقوة لكن مش حاسه بدوخه وواقفه عادي ع رجليا!.. وبينما كانت سدرة قعدت تحلل في سبب ارتفاع نبضات قلبها المفاجئ.. ☘درست قدام حوش شنيبه سيارة عسكريه... انفتح بابها..ونزل منها واحد كان لابس سروال صاعقه فوقه تيشرت اسود..وعليه توب اسود كان حاط برنوسه ع راسه.. ولاف ع يده عمامه لونها ازرق..ملتحي وشعره طويل وكثيف.. التفت وشاف لحوش لطفي الواعر.. رسم ع وجهه ابتسامه جانبيه..بعدين شبح للجهه اللي كان فيها العلم لقاه مش موجود. ضحك نص ضحكه بعدين شبح للحوش اللي قدامه.. خدي نفس عميق..وغمض عيونه... وكأنه يبي يشبع من ريحة القهوة اللي اشتاقلها... في نفس الوقت.. طلع فيه خوه نضال وهو حاط العلم ع كتافه ويقول:والله لما نقلبها قلب اليوم..يقول فيها بنبرة بغض والم واضحات.. فتح باب الحوش وشبح قدامه وقال..نفكر ناخد مكبر بش نغني... سكت مرة وحده.. قعد يشوف للي واقف قدامه بمسافه بسيطه وهو يمرر في نظره عليه بدهشه ...مش قادر يصدق عيونه.. واللي قدامه كان يشوفله بنفس الابتسامه الجانبيه وهو رافع حواجبه وقال:شكلي متغير لهالدرجه! ارتسمت ع وجه نضال ملامح الفرح شيئا فشيئا.. بعدين عيط وهو يقول:المهدي!.. وفاته وخش داخل يجري وهو يصيح ويقول:المهدي.. المهدي.. جاه الجالي وقال بفجعه:خيرك شن جاك!. نضال وهو مش عارف كيف يخبر:المهدي المهدي..المهدي برا المهدي... وخش لامه يجري:يام المهدي يام... مغليه قعدت تشبحله وهي مقعمزه في مكانها وجامده. خديجه بفجعه:خيرك نضال شن جاك وخيي حي عليا! نضال:والله ماهبلت والله برا المهدي..تي اطلعوا بروحكم شوفوه.. ومشي طلع يجري.. لين وصل برا.. لقي الجالي حاضنه وشاد عليه بقوة وهو يبكي.. والمهدي حاضنه وهو يقول:جالي ..جالي خليك تريس خيرنا! ع طلعة نضال يجري:اهوا يام اهوا.. طلعت مغليه تجري ووراها خديجه.. بعد عنه الجالي وهو شبح لامه بنظرات شوق عارم.. هي عيطت وحطت ايديها ع فمها بعدين رفعتهم فوق وهي تقول:ولدي ولدي..ولدي مامتش.. هو جاها ضمها بقوة.. وهي قعدت تحضن فيه وعيونها مغمضات وتقول؛يارب مانحلم..يارب علم ماهو حلم..ياربي يكون وليدي في حضني توا بالحق.. المهدي:صدقي يام صدقي المهدي يام روحت والحمد لله زي مامشيت.. خديجه معاش قدرت تتمالك نفسها طلقتها زغروده وسط الشارع.. سمعها الشارع كله.. اللي طلع من حوشه..واللي طلعوا من الرواشن.. اما سدرة وعمتها وخواتها مشوا يجروا للباب فتحوه وطلعوا.. في نفس الوقت اللي طلع فيه من حوش جدها.. علي..ولطفي وعبد المطلب ويوسف... كلهم قعدوا يشبحوا في المشهد قدامهم وهما مش مصدقين. بس سدره عيونها كانوا عليه وهو عاطي بالظهر وامه تحضن فيه.. قعدت تشبحله بنظرات عدم استيعاب.. حطت يدها ع قلبها اللي قاعد يدق بقوة...توا بس عرفت خيره.. ع طلعة عائشه والصغار... حطت ايديها ع فمها وهي تضحك وتبكي وقالت؛مهدي.. بعدت عنه امه..وطول هي جاته نست نفسها نست كل شي تفكرت ان الراجل هدا حبيبها وراجلها وبو صغارها.. طول ضماته بقوة...وقعدت تبكي.. وهو ضمها وقعد يقول؛عيب الناس تتفرج.. عائشه وهي تبكي:عيب ع اللي يدير العيب.. سمعوا امه واخته شن قالت ضحكوا.. وخوته تحشموا وتباعدوا.. وصغارهم يتفرجوا عليهم وهما بيطيروا من الفرح.. هني.. سدرة نزلت يدها عن قلبها..وانسحبت وخشت داخل.. والباقي قاعد يتفرجوا ما عدا طوبى اللي خشت ورا سدرة وهي تشوف لردة فعلها... كانت سدرة برغم فرحتها الا انها ضايقت هلبه.. غارت..وماقدرتش تتحمل... لكن.. مسحت دموعها وقالت:مش جديد عليك ياسدرة مش جديد عليك..مش مهم..مش مهم هدا كله..المهم ان هو حي المهم انه بخير ومافيه شي. وشويه وقوت المطر..وبدت السمي ترعد.. شبحت للسمي وابتسمت بإستبشار .. وطوبى وهي تشبحلها ابتسمت لإبتسامتها... ☘وفي جنان حوش شنيبه تحت القرميد الاحمر.. كان المهدي واقف ع بوه يبوس في راس..وطبس ع ايديه وكب عليهم..ومحمد وهو يضحك ويبكي باس ع راسه حتى هو وقال؛الحمد لله ..الحمد لله اللي ردلي ولدي من الموت... ~~~~~~~~ في المربوعه.. المهدي:نهائي ماعنديش علم ولانعرف من باعته مرات يكون تشابه اسماء.. الجالي؛ومرات في جماعه يموهوا عنك.. المهدي:مش عارف..بس اني متأكد لو نشوفه هدا اللي جابلكم هالخبر وعيشكم هالحاله مش حيصيرله طيب.. محمد؛خليه ماعليكش فيه المهم انك حي مافيك سو مانبوش غير هكي.. لطفي:احكيلنا يامهدي كيف طلعت من هني وشن درت بالزبط وكيف وليت؟! المهدي:شن بنحكي لنحكي ياعمي لطفي ياما عندي من قصص بس توا اعذروني بنمشي بنركب شقتي ندير لوادجو كامل.. ضحكوا... لطفي:خود راحتك... ناض المهدي وطلع من حداهم.. وهو ماشي بطريقه للباب الفاصل.. نداته نسرين.. التفت شبحلها لقاته جايته تجري.. ابتسم وقدملها لين وصل فيها.. خداها في حضنه وهي شدت فيه وقعدت تبكي بالعبره.. المهدي:نسرين! نسرين ببكي:قالولنا مات جعنه في راسه اللي فاول عليك الله يحرق قلبه كيف ماحرق قلوبنا بالكذب.. ابتسم وقال:خلاص صار اللي صار هاني قدامك تشبحي فيا مافيا شي.. نسرين بعدت وهي شداته وقالت؛ياعمري قداش صار ع خاطرك حرام عليك علاش درت فينا هكي.. هو ابتسم وعيونه لمعوا لما سألها؛هي شن دارت؟! نسرين ابتسمت وقال؛عزاك مابتش تحضره..حسبت روحها في حوشهم وياما صار فيها هكي قالتلي بنت عمها.. تنهد بعدين هز راسه وقال؛بنركب للشقه شويه وتوننزل.. نسرين بإبتسامه؛خود راحتك حبيبي.. ابتسم المهدي ومشي... وهي تنهدت براحه بعدين مشت لوين مافي امها واختها... 🍃وماهي الا ساعات.. وحوش شنيبه تعبا بالناس. اللي جاي يبارك ويهني حتى اللي تخلوا عنهم في محنتهم جوهم وبدوا يركبوا في الموجه.. زي ماصايرلوضع الساسه في البلاد بالزبط... ومن ضمن المتسلقين وابرزهم محي الدين.. اللي كان قاعد يتملق بطريقه مثيرة للإشمئزاز.. ☘في الجنان.. واقفه هي وياه يتكلموا.. خديجه بإبتسامة نصر:شن قتلك اني يامحي..شن قلت..مش قتلك حتندم اشد الندم..مش قتلك حتجي تبوس الايدين بش نرضى نوليلك.. محي الدين:خلاص عاد ماتخليش قلبك اسود انتي غلطتي واني غلطت متصافيين.. خديجه؛هئه مش متصافيين بكل ياباشا..ولو طلع الروح قدامي توا ماني موليه..وراك تنسى ياخوي راهو طلقتك عدا عليها تلاته شهور يعني..لو..لو هاه ركز..لو فكرت نولي حنشرط عليك شروط جديده وحترجع تخطبني من اول جديد.. قعد يشبحلها وهو مبتسم بصدمه.. خديجه:الصغار بيقعدوا عندي لين نفكر كويس وننظر في وضعك بعدين نقرر.. ولفت ومشت مشيتها المتكبره اللي تستفز فيه بعدين قال.. محي بضحكه:لكن والله تستاهل وحده زيها نترجى ونبوس الايادي..غير شن قاعد نقول بس..ضحك ع روحه ومشي ولى المربوعه.. ☘☘☘☘☘ ومستحيل يعدي هاليوم ونضال مايديرش فيه شي يعبر فيه عن فرحته برجعة خوه... جاب نوبه قامتها بيه في شارع القهوة.. ونسوا معاها اهل الشارع الايام المريرة اللي عاشوها فهالعشرة شهور... حضرها وهو لابس عربي وبكامل اناقته. لما حلق بانت في وجهه ملامح جروح..ومافي خفي من اثار الحرب في جسده كان اعظم.. بس مع ذلك غنى ورقص مع نوبه وهو في قمة الفرح... وهي تتفرج عليه من روشن المخزن اللي فوق السطوح... نظراته ليه كانت نظرات..حب وفرح وشوق مغرقتهم الدموع.. وقاعده تردد في نفسها.."المهم قاعد في الدنيا..المهم موجود..الحمد لله" وهو لوطا يغني مع خوته واصحابه وجماعة الشارع اللي كانوا منهم حتى إياد ومهند... ليبيا بلاد الثوار..يعيشوا ويموتوا فيها احرار.. حتعيش ليبيا..حتعيش ليبيا..حتعيش ليبيا.. ليبيا..ليبيا..ليبيا..ليبيا..وبس... ~~~~~~~~~~ "ميه حالة عيشتوني فيها ياراجل اقسم بالله!" المهدي بضحكه:المهم امورك تمام غادي.. "الحمد لله كلها تمام..اهو نحاول نروح كان حصلت كيف" المهدي:ع مهلك وبراحتك ماتضغطش ع روحك اهو نكلموا فيك وتكلم فينا ونشوفوا وتشوف فينا..سيورنا نتلاقوا وجه لوجه.. "اني ع خاطر امي وبوي بس" المهدي:دير اللي يريحك ياعمر.. "تمام..تنهد وقال...عليك جو ياراجل في النهار ميت وفي الليل حي" المهدي قعد يضحك... ☘ومن ناس رجعت لأحبابها وعاشت فرحة اللقاء بعد شهور فراق... لناس مازال دورع احبابها ومش لاقيتلهم اثر... عدت حرب سرت وانتهت...مات القذافي.. اعلنوا سقوط حكمه نهائي... ومازال مافيش أي خبر عن مصطفى.. ☘☘☘☘☘ "مافيش غير انا نزلوا اسمه في قائمة المفقودين" فردوس بصدمه وبإنفعال شديد ودموعها ينزلوا:مفقودين شنو كيف مفقودين كيف...خوكم وينه خوكم كيف تروحوا من غيره..كيف خليتوه بروحه كيف...كله منكم انتم كله منكم انتم اللي سايرتوه انتم اللي شجعتوه انتم اللي خليتوه يخش لهالحرب الغبره.. :مقدر ومكتوب يامرت خوي مافيش منه مهرب.. فردوس:كيف ياربي كيف..بنته شهاده اعداديه تراجي فيه يروح بالساعه والدقيقه كيف بتقرا كيف..ولده اللي كل شويه يسأل فيا وين بابا..الاء اللي كل ليله تنوض مفجوعه من نومها تقول حلمت ببابا ياماما.. علاش يامصطفى علاش علاش درت فينا هكي..غير شن بنحصلوا منها..شن حصلت منها انت يامصطفى..الله يلعنها من ثورة الله يلعنها من ثورة..ياريتها ماكانت ياريتها ماصارت.. ماقدروش سلافها يقولوا شي هما برواحهم مقهورين اكثر منها ع خوهم اللي فقدوه في الحرب وهو كاين معاهم... صوت بكاها نبرة الحرقه كانت تقطع في قلوبهم.. وكلامها عن الصغار زاد ع وجعهم وجع.. امه..بوه..خواته...الألم واحد والعزي واحد.. ووالله فراق الحي اصعب من فراق الميت بوين.. ☘☘☘☘☘ خبطوا باب الحوش بقوه لين فتحوه.. خشوله وانتشروا في كل مكان وقعدوا يفتشوا.. اميمه وهي مفجوعه وحاطه شرشاف سريرها ع راسها:من انتم!؟ :ضمي فمك.. قلبوا دارها فوقاني تحتاني وطلعوا.. وفي دار امها.. صفيه:حول من يدك حول ..لامي هادي حول.. فتح الصندوق قلبه قلب مالقي فيه شي.. من المربوعه.. علي الواعر وهو ماشي وراهم بالعكوز؛معقوله هكي تنتهكوا حرمة الحوش..عندكم عادي هكي تربيتوا..! وقف واحد فيهم وقال:زي ماربيتوا ولدكم ع انه يكون قاتل يعذب ويهين ويقتل... صفيه:مستحيل ولدي مش هكي.. :ولدك قاتل تحت راية الطاغيه ماتستبعدي عليه شي.. :مالقينا شي.. اشرلهم وقال:اطلعوا.. مشي طلع ولحقوه جماعته.. وركبوا سيارتهم وتحركوا... صفيه:هادوا هما اللي بيعمروا الخارب ياعمي! اميمه؛مافيش فرق زي امس زي اليوم.. علي الواعر هز راسه وقال بحسرة.. "ليك الله ياليبيا" 🍃وايه..قداش تأملنا وقداش حلمنا بالخير اللي جاي . وكل عام نقولوا العام يجي الخير اللي نراجو فيه.. وكان كل عام قاحل عجف اكثر من العام اللي قبله... لاهم سنه لاهم تنين... 2012...2013..2014..2015...2016 🍃شهر سبتمبر 2016....
#عاصفة_فبراير #طوبى
....يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
