#طوبى "جنة طوبى"
#جمان_فريد
#الجزء_السبعون"فوق الطاوله"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الحوقله
وقال ابن القيم عن الحوقلة : ” تحمل بها الأثقال ، وتقتحم بها الأهوال ويدخل بها على من تخافه ”
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "كل شيء مكتوب و كل ما مضى كان محاولة يائسة لي الهروب من المكتوب حياتنا هكذا يوم لك و يوم عليك "🍃
--------------------------------------------------------------------------
وفي ليلة الخميس...
كانوا هلبه من عشاق الراديو وتحديدا برنامج مهند مستائين من إلغاء حلقة الليله اللي كانوا يستنوا فيها بفارغ الصبر..
صاحب البرنامج كان هارب من كل البشر للبحر..
هارب بضعفه..ووجعه..هارب بدموعه اللي مايقدر يذرفهم قدام قريب يكدره..ولاقدام بعيد يهزا عليه...
🍃حب آلاء كان متمكن من قلبه لدرجة كبيره حب سنين مش يوم ولايومين حب كبر قدامه زي ماكبرت هي..
حبها بكل شي فيها...
جرحاته..طعناته طعنة قاتله...
كرهاته في حبه ليها..كرهاته في قلبه اللي مش قادر يحيد عن حبها للحظه...
الرجوع ليها مستحيلة من المستحيلات زي نسيان حبها وتجاوزه...
بإختصار...عذاب...
🍃وحتى هي قاعده تتعذب معاه قهرها باللي داره معاها بس اللي قهرها اكثر كيف يطلع منه هو هدا كله..
معقوله لهالدرجه آذاته باللي داراته معاه؟!...
☘ياآلاء كسرة القلب الطيب واعره..تعرفي علاش؟
لأنه يحب بزياده..
يعطي بزياده..
يتأمل الخير في اللي معاه بزياده..
يحسن الظن بزياده...
وع قد هدا كله يكون ألمه ووجعه..تكون قوة رد فعل صاحبه.. الخذلان والخيبه اللي تعرضلهم خلوه يكره نفسه وينقم عليها اكثر من الشخص اللي آذاه..
حيتخبط هلبه..ويدير تصرفات مش ليه ماتشبهاش...وقسوته حتكون مخيفه...وهدا كله من قوة الألم اللي سكن في داخله وقاعد يحس بيه...
اكيد جربتوا قبل شعور الألم الطبيعي من جرح سكين او حرق بالنار اوالم ولاده...وماإلى ذلك...تعبيركم عن الالم غالبا يكون عنيف بالحركه او بالقول...في من يقول كلمه سيئة مش متعود يقولها وفي من يهيج ويقعد يضرب ويكسر...
هو نفسه..نفس ردة الفعل...الفرق ان جرح الروح اقوى واصعب من جرح البدن...☘
🍃واللي صاير مع طوبى مش بعيد عن اللي صار في مهند..
بس طوبى الآذى اللي صابها طال غيرها وحيكون عليها تشوف بعيونها وجع قلوب الناس اللي تحبهم عليها...
حتشوف بعيونها كسرتهم زي ماشافت كسرتها...
ليالي طوبى طويله..ليالي ماتشوفش فيهم النوم الا ساعه او ساعتين..
التفكير المستمر...القلق المستمر..الخوف المستمر...
عايشه في جحيم مستعر...
بس كانت تحاول تقوى وتخفف ع نفسها..
بصلاتها..بمناجاتها...بالذكر..بقراءة القرآن تارة وسماعه تارة أخرى..
في هديكا الليله وكل اهل الحوش نيام..
كانت مقعمزه تحت روشن الصاله اللي يدخل عليها في النسمه البارده..
وفي يدها تليفونها تقلب في صفحات "الفيس بوك"
وقفت عند منشور كان مكتوب فيه..
(ومن قال هذه الكلمه أي..
'لاحول ولاقوة إلا بالله'
محققا مادلت عليه من توكل والتفويض وحسن الإلتجاء،
هدي ووقي وكفي وكان من اقوى الناس قلبا وأحسنهم حالا ومالا)
عاودت قرت هالكلمات مرة تانيه..حست ان المنشور هدا ماجاش قدامها صدفه..
هي عارفه كويس هالكلام من قبل...بس توا حست انها عرفاته لأول مرة..وكانت مازال تبي تعرف اكثر واكثر كانت تبي تملأ شي في داخلها حساته بدي يفرغ...
دارت بحث عن الحوقله او الحولقه...
وقعدت تقرا في كل المناشير اللي تتكلم عنها..
غاصت في بحور معانيها..هامت مع التفسيرات العظيمه لهالكلمه اللي قال عنها خير الخلق..
كنز من كنوز الجنه..
يعني حاجه من الجنه بين ايدينا وحني غافلين عنها ومش عارفين قيمتها...!
غيرت عيونها عن تليفونها للروشن وقعدت تتأمل في السمي اللي مغطيها السواد..ركزت بنظرها ع النجوم اللي فيها
وبدت تردد...
لاحول ولاقوة إلا بالله
قعدت تردد فيها وهي تشوف في مخاوفها قدامها
في كل حد خايفه منه
وكل ماتقول
لاحول ولاقوة الابالله...الخوف يتبدد وتحس روحها اقوى من كل حد خافت منه من كل شي مخوفها..
وتكررها ويزيد هالشعور في داخلها..
لدرجة انها استشعرت ان الله يشوفها ويسمع فيها ويرد عليها...
[من أستعان بحولي وقوتي..ألنت له الحديد]
ياااه ع عظمة الشعور اللي يعيشه البني آدم لما يحس بمعية خالقه..
وهالشعور حست بيه طوبى في هديكا اللحظه لدرجة دمعوا عيونها...
جي في بالها وقتها كل مرة توصل فيها لذروة التعب وتكون فيها ع حافة الانهيار..
يجي قدامها شي يخليها تستجمع نفسها وترجع تتماسك وتقوى وتكمل مقاومه..
عرفت ان هادي معية الله...
ووقتها بس فهمت كيف الانسان يقدر يكون قوي من داخل قوة دائمه مهما نقصت حترجع تزيد وماتنتهيش..
لاحول ولاقوة إلا بالله خلت طوبى في هديكا الليله تعرف ان قوة البني آدم الحقيقيه اللي تطلع من داخله هي قوة ايمانه وارتباطه بخالقه...
🍃🍃🍃🍃🍃🍃
ويطل اليوم اللي بعده..
يوم الجمعه...
اول يوم في حياة نسرين الجديده..
نسرين في هاليوم فاقت بروح جديده ونفسها مفتوحه ع الحياة..
وهي تشوف لروحها في المرايه حست انها صغرت في العمر عشرين سنه..ربيع لنسرين..كان فعلا ربيع حياتها اللي جاها بعد عقود شتاء قاسي..
طلعت من دار النوم وهي تسمع فيه يغني في اغنيه كلماتها غريبه..
وصلت في الكوجينه وخشت عليه وهي تقول..
نسرين بضحكه:شن تغني؟
هو التفت شافها وقال..
/Come here
جاته وهي تضحك..
قربها لقلبه وطبع قبله ع راسها وهو يقول..
/صباح الورد نسرينتي..عندك علم نسرين ان معنى اسمك وردة بيضا..
رفعت راسها وشبحتله وهي تقول..
/جديات؟
ربيع:قصدك جديات ماتعرفيش؟
هزت راسها وهي تضحك..
ربيع:امم مش مشكله تو نخليك تعرفي هلبه حاجات عنك..
قبلها مرة تانيه ع راسها وقال..بري قعمزي جنب يويو..
نسرين مشت وهي تقول بضحكه..
/يويو..وقعمزت جنت القعماز اللي فيه ولدها وكان محطوط ع الطاوله..
شبحتله وقالت..عجبك دلع عمك ربيع؟
التفت ربيع وهو يحرك في الكابتشينو ويشوف ليحيى بإبتسامه..
نسرين:ياوخيتي نجيلي هالابتسامه العسل ياربي..
خدي ربيع كواب الكابتشينو وهو يسمع فيها كيف تلعب في ولدها..وحطهم في سفرة الفطور ورفعها وهو يقول...
/وين تبي تفطري؟
نسرين:زمان في عندكم لقطه في جنانكم حلوة فيها شجره كبيره مظلله لما كنا نجوا لخواتك في الصيف نفرشوا حصيره ونقعمزوا تحتها قداش كانت تهبل..مستحيل تكون قاعده لتوا..
ابتسم وقال؛لاقاعده لتوا..
نسرين وهي متفاجئه:بالله!؟
هو بآبتسامه؛الشجره هديكا معمره ولقت اهتمام خلاها تقعد زي ماهي الدكتور اياد كان مهتم بيها هلبه شكله..
نسرين بآبتسامه حماس:معناها نفرشوا تحتها ونفطروا غادي
هو شبح ليحيى وقال...
/ويويو يتشمس وياخد فيتامين د..
نسرين وهي مبتسمه قالت..
/خلاص فرشلنا برا..
هو حط السفره وقال بتفكير..
/هو مافيش بس مش مشكله تو ندير حل..
ومشي بيطلع..لما فات من جنبها حط يده ع شعرها ونكشه..
نسرين بضحكه وهي تساوي فيه..
/يابارد..
🌸وفرشلهم تحت الشجره في الجنان وحطوا فطورهم وقعدوا يفطروا وجنبهم يحيى يسمع في صوت هدرزتهم وضحكاتهم ومستمتع بأجواء الصباح الصيفي المميز ...
🍃وبعيد عنهم بشويه في كان هالصبح مختلف بأجوائه وروحه في حوش اهلها..
طلعت نجاة بصغارها من الجناح وهي تقول..
/ردي بالك ع خوك جوري..
جوري:حاضر..
وخدت خوها من يده ومشت بيه ومعاهم حمزة للمربوعه بش يتصبحوا ع جدهم...
اما هي توجهت للكوجينه..
وقبل لتوصل فيها وقفت وين سمعت اسم غريمتها..
🍃حطت مغليه الفنجان بقوة وهي تقول بغضب..
/فوتلها هلبه ومشيت هلبه لكن لهني وخلاص..
خديجه:يام بالله عليك صل ع النبي واسمعيني.
مغليه:شن تبي تقولي شني!؟ عاجبك تلقيح العقارب عماتك امس.
خديجه؛هادوا هكي من يومهم طنشيهم ماديرلهمش راس مال..اما كنتك هادي اللي ينقاللها طوبى خليها عليا اني..
مغليه:مانبيكش تخشي في الموضوع..
خديجه؛عارفه علاش يام لكن المرة هادي اطمني عارفه شن حندير كويس..
مغليه قعدت تشبحلها وهي تفكر..
خديجه؛يام معاش تفكري..خلي الموضوع عليا اني واني نعرف نتصرف معاها ومع ولدك اللي راخيلها الحبل..
رفعت سبابتها وهي تحرك فيه وهي تقول..
/وكان جاني بيعارك عليها بالله لما نمسح بيه وبيها الوطا..
خديجه؛حقك يام حقك غير عطيني فرصه نتصرف بطريقتي
☘اصرار خديجه وراه خوف ان امها تعرف باللي مدرقينه عنها من طوبى لهدا خططت لشي في راسها وتبي تنفده بش توصل لهدفها☘
مغليه تنهدت بشي من العصبيه وخدت الفنجان وقعدت ترشف من القهوة..
ع خشة نجاه وهي تقول..
/صباح الخير..
خديجه مطت شواربها بإزدراء..
وامها وهي تشوف لنجاه ابتسمت مجامله وقالت..
/صباح الخير بنيتي..
نجاة؛درتوا فطور ولاندير..
مغليه:لامادرناش ديري بنتي ديري..
نجاه؛حاضر..
وبدت تحوس ع الفطور وعيون خديجه تراقب فيها..
نجاة:توقعت خواتك يباتوا عمتي؟
مغليه:قبل بيباتوا بعدين ماصارش..
نجاة؛علاش؟
خديجه؛قداش تحبي القصقصه..
مغليه فنصت في خديجه..
ونجاه شبحت لخديجه ببرود وقالت..
/نهدرز عادي..
خديجه؛هدرزي في مواضيع تانيه..وخدت فنجانها وقعدت تشرب منه..
مغليه وهي تحاول تغيير الجو..
/الله يبارك ع معاذ بدي يدوي في كلمات واضحه..
نجاه وهي مبتسمه بمجامله..
/ايه..
🍃وقعدت نجاه تهدرز مع مغليه..
وخديجه تسمع وهي تشرب في قهوتها بصمت...
ع خشة محمد شنيبه وهو رافع في حضنه حفيده معاذ..
ووراه المهدي وسدرة وحمزة وجوري..
محمد شنيبه:شوفي يانجاه شوفي..
وجهت نظرهم كلهم لمعاذ اللي كان لابس نظارات جده وطالع منظره فيها لذيذ..
ابتسمت نجاه..
ومغليه قالت:الدكتور معاذ.
نجاه:ان شاء الله..
قعمزت المهدي جنب خديجه وهو يقول..
/ملاحظك تشربي فيها هلبه..
خديجه؛وليت مخرومه قهوة
المهدي:نقصي منها مش باهيه..انتم النساوين بالذات مفروض تردوا بالكم من الحاجات هادي
مغليه:وعلاش النساوين بالذات..
نجاه:ممكن قصده ع امراض المعده تصيب النساوين اكثر من الرجاله..
هز راسه وقال:مزبوط..
محمد شنيبه:ردوا بالكم..
ومشي قعمز جنب مرته..
خديجه:حاضر تو نقص منها ان شاء الله..
المهدي مرر نظره قدامه وقال:وين فطورنا..
نجاة:هاني ندير فيه..
المهدي:لا فطوري اني بروحه..
مغليه:بالله بنتي ديرله زميته وسخنيله الشاهي الاخضر..
نجاه هزت راسها وقالت؛حاضر..
☘وقعمزوا كلهم حوالين الطاوله وقعدوا يناشبوا وينكتوا ع معاذ ونجاة تسمع فيهم وهي تضحك ومرة مرة تشاركهم..
وبعد كملت تجهيز الفطور..
نجاه:وهادوا الزميته والشاهي..
المهدي:صحيتي..
وبدي ياكل..
وهي مشت قعمزت حدا صغارها وقالت..
/شن تبوا ماما..
جوري؛شاميه..
حمزة:طن..
نجاه شافت لسدرة وقالت..
/تبي نديرلك سدرة؟
المهدي شاف لبنته..
سدرة هزت راسها وقالت بشي من الخجل..
/طن..
نجاة:باهي..
وبدت ديرلهم في السندويتشات..
وعيون خديجه تراقب فيها...مش هي بس..حتى بوها كان يراقب فيهم...
🍃🍃🍃🍃🍃
"هيا هيا ياعيوني انتي وياها شمروا سراويلكم وتحركوا"
اريج:والله يوم راحتي ياناس اليوم مانصدق يجي يوم الجمعه بش نرتاح..
مطيره:نوضي نوضي سلم بنتي الراحه في الجنه...
اريج؛لا اني بإذن الله خاشتها..
وناضت ومشت بإتجاه الكوجينه بش تغسل ايديها..
مطيره وهي تشوف لآلاء كيف مقعمزة سرحانه..
/عليك الكلام حتى انتي غزيله..
الاء:اني مكتئبه..
مطيره؛كلناا مكتئبين ومايغير جونا كان اللهيد والضمان هيا نوضي ياغزيله نوضي..
الاء بإقتناع؛صح عندك حق..
وناضت طول للكوجينه حتى هي..
وجهت مطيره نظرها لغرفه وطوبى..
الزوز قالوا مع بعض..
/اني حامل..
طلعت ضحكه مضحكه من فردوس..
مطيره:الله يرحمها امكم..ومرت عمكم صفيه لين يخشوا التاسع وهما قايمين حياش وصغار فوق روسهم..طوبى نوضي اغسلي ماعين الفطور وضمي الكوجينه...غرفه لمعي المكتبه..
غرفه بضيق:تبي وقوف عمتي..
مطيره:تو اني نطلعلك اللي فيها ونحطه كله ع الطاوله واني امسحي وحطي واني بعدين نرده واني تمسحيها من برا .
غرفه بعدم رضا:باهي..
مطيره:هيا هيا نوضوا قبل لنحطوا الغدي لازم نكونوا مكملين..
🍃وبعد توزعت المهام كل وحده شده حاجه دارتها..
طلعوا البساطات..
وسيقوا الحوش كله..بعدين ركبوا فوق السطوح غسلوا الفرش...
وطوبى تحت بعد ماكملت الكوجينه طلعت للحمامات وسيقتهم..بعدين قعمزت حدا اختها وقعدت تساعد فيها وهي اللي ردت ماعين المكتبه لمكانهم..
ووين جت بتخش الكوجينه بش طيب الغدي جاها بوها اللي قضر ساعات الصبح الاولى في حوش جدها...
لطفي:كملت مطيره الحمله متاعها؟
طوبى بإبتسامه؛شبه خلاص..
لطفي؛باهي ربي يعطيكم الصحه..
طوبى:سلمك بابا..
لطفي:شن غدانا؟
طوبى:انت في شن خاطرك؟
لطفي:اني خاطري في الكسيكسو متاعك..
تعكرت ابتسامتها لما سمعت طلب بوها بعدين هزت راسها وقالت؛حاضر..
وهو لاحظ انها ضايقت وقال..
/كان تبي حاجه تانيه ديرها..
طوبى حركت راسها بالنفي وقالت :هدا اللي كان خاطري فيه اصلا..
لطفي هز راسه وقال:باهي..بنطلب منك حويجه تانيه..
طوبى:امر بابا..
ابتسم وقال:نبيك ضمي داري..
تجمعوا الدموع في عيون طوبى ومنعتهم بقوه من النزول وهي تقول..
/حاضر بابا..
لطفي:يحضرلك الخير بنتي..نقدر نخش نوتي روحي للصلاه..
طوبى بضحكه:تقدر..
لطفي هز راسه بإبتسامه وقال؛باهي..ومشي خش داخل..
بعد طلع نزلت طوبى دموعها ودعت من قلبها وهي تقول..
"يارب ردهالنا يارب"
🍃🍃🍃🍃🍃
وهي تكوي في لبسه العربي كانت تسمع فيه شن يقوللها في حديث دام بينهم من الصبح لهاللحظه عن الماضي البعيد..
ربيع:تحشمت نسأله وانتي تعرفي خوك كتوم هلبه وقعد في خاطري نعرف السبب..
حطت نسرين المكواه ع جنب وتنهدت بعدين قالت..
/المهدي خطب سدرة قريب تلاته مرات ولااربعه وبوها وجدها يردوا فيه وكانوا دايرين سبلتهم قرايتها..بوي كان يقول للمهدي راهم مايبوكش مايبوش يعطوك بنتهم و المهدي سكر راسه عليها يحبها هلبه ومايشوفش في غيرها لكن يشوف فيها هي زي اللي راخيه ومش شاده فيه طارتله منها ودار معاها مشكله وسيبوا بعض وبعدين ولوا واتفقوا يراجيها لين تكمل وكملت سدرة قرايتها وربي يقدر ان امها تموت وتخلي اختها الصغيره طوبى كان عمرها وقتها قريب عامين تقريبا وامها في اخر لحظاتها وصتها عليها وبسبب الوصيه هادي سدره سيبت المهدي..
ربيع:وعلاش ماهو تزوجوا وربوا اختها مع بعض نعرفه المهدي مستحيل يقول لا..
نسرين:لسدره نظره تانيه للموضوع والصراحه عندها حق فيها بوها مش حيرضى بنته تتربى في حوش النسيب وع هالحال بتقعد سدره اغلب وقتها في حوش ماليها ع خاطر اختها ومافي حد حيرضى بالوضع هدا..
ربيع:تقصدي ماليك؟
نسرين:حتى المهدي بروحه..خوي ونعرفه يبي من تكرسله حياتها تخدمه وتقعد في شقته زي ماكانت دايره عيشه رحمة الله عليها..
ربيع:الله يرحمها..توا اني هادي هي اللي محيرتني كيف خداها المهدي وكلنا نعرفوا ان عيشه وسدره كانوا راسين في شاشيه؟
نسرين بحزن؛المهدي لما سيباته سدره ياما صار فيه حرقاته كيف فرطت فيه وهو قعد يحارب ع
خاطرها وبش يوجعها زي ماهي وجعاته خطب عيشه..
ربيع؛وعيشه كيف رضت؟
نسرين:غابي ف الشيخ جويده وخوتها !ماكانتش تقدر تقوللهم لا..رغم انها جربت تعارض داروا فيها الويل وجبروها عليه وراهو حتى سدرة ترجتها تاخده..
ربيع وهو متفاجئ:ترجتها؟
نسرين:ايه..كانت تبي المهدي ياخد عيشه لأنها تعرفه كويس وتعرف ان عيشه بطبعها وطبيعة الحياة اللي كانت عايشتها هي الوحيده اللي تقدر تريح المهدي سدرة فكرت في ابعد من هكي كان في بالها ان المهدي حيحب عيشه وينساها لأن شخصيه عيشه كانت خير من شخصيتها وهي اللي تمشي مع راجل زي خوي المهدي...
ربيع؛وصار العكس..
نسرين؛كان مازاد تعلق بيها حبها حب جنوني لين مرض قلبه في جرتها..كان تشوف شن صار فيه لما انخطبت وانقرت فاتحتها ع راجلها الفاندي الله يرحمه قريب راح فيها..
ربيع بأسف:لاحول ولاقوة الا بالله..
نسرين بحسره:ياريته قعد عليها وماخداش غيرها وقعد يراجي لين ربي يفرجها بالك يكتبلهم في بعض النصيب ولا عذب روحه وعذب عيشه الله يرحمها معاه وعذب سدرة حتى هي..
ربيع:ماتوقعتش يصير فيهم هكي بكل..تصدقي اول مرة جيت هني لما روحت من السويد وين شفت محمد ولده وقالي هدا ولدي شبهته بسدره نحسابه واخدها..يعني دماغي ماكانش مستوعب ان المهدي ياخد غير سدره..
نسرين بحزن:نصيبات..
ربيع وهو يفكر:لكن تعرفي..مش عارف علاش حاس هكي قصتهم مازال ماتمتش مازال فيها مازال..
نسرين بألم؛غير تفيق سدره بس..
ربيع هز راسه وقال:ان شاء الله ان شاء الله..ربك على كل شي قدير..
نسرين:ونعم بالله..
ربيع؛هيا نويسه هيا سقدي معاش في وقت..
ابتسمت وقالت:حاضر..
ورجعت تكوي في لبسه..وهو يتأمل فيها بإبتسامة حب..
🍃🍃🍃🍃🍃
"حي ع الكل.بات"
هادي راما تتكلم بالتليفون في دار امها وخالتها...
"تو يشوفوا والله ماهم مفوتينه وهادي نجاح ومعاها كريمه كان ماطيرتهمش من المدرسه مانبداش اني اسما بنت*****"
راما بصدمه:هييه اسما عمتي فوتيها مادخلكش بيها..
سكتت اسماء..
راما؛عمتي تخدم في خدمتها بس يااسما..
"باهي خلاص فوتي.."
راما بحده؛ لامش حنفوو الا عمتي نجاح يااسما..
"ياودي باهي خلاص كلمة طلعت مني واني معصبه وخلاص.."
راما؛حاسبي ثويبه واكرام هما اللي تسببولك في الفصل ..
"قتلك تو تشوفي شن ندير فيهم..خلاص تول بنكسر عندي ماندير بعدين نهدرزوا"
راما؛باهي..سلام..
وسكرت عليها وهي خايفه منها على عمتها..
مشت طلعت من الدار بطريقها لدار المعيشه.
شافت محمد جاي من الجهة التانيه وفي يده سوريه عربيه.
راما؛تبي حاجه محمد..
محمد وهو عاقد حواجبه؛امك وين؟
راما؛دير في الغدي..تبيها تحددلك السوريه..
محمد؛ايه..تو نقول لحناي وخلاص..
راما قدمتله؛لانهاري بتوحل حناي فيها واني قاعده! هاتها نحددهالك..
محمد:تعرفي!؟
راما:شن تشوف فيا قدامك بيبي؟
محمد رفع حواجبه ونزلهم بدون مايشوفلها بعدين مدلها السوريه وقال..
/حدديها بسرعه..
خدتها منها وهي تقول..
/حاضر..
ومشي طول من قدامها...
هي تنهدت بإبتسامه بعدين مشت طول لدار الكوي..
🍃🍃🍃🍃
طلعت من الكوجينه بعد ماحطت الغدي ع النار قابلتها بنتها الكبيره..
فايزة؛وين مروة؟
صفاء؛في الدار..
فايزه مشت طول للدار تشوفها..
وصفاء تنهدت ومشت خشت للكوجينه..
☘خشت فايزة لدار مروة وتاله..
لقت مروة مقعمزه ع سريرها وهي لابسه ملاية الصلاة وتقرا في القرآن..
تنفست براحه بعدين طلعت وخلتها مع مصحفها بروحهم🌸
🍃🍃🍃🍃🍃
طلعت خديجه من الكوجينه ومشت لدار المعيشه
كانوا فيها امها ونجاة والصغار يتفرجوا ع التلفزيون..
لاحظت ان راما مش معاهم قالت..
/امي راما وين؟
جوري:في دار الكوي تحدد لمحمد في سوريته..
سدره قعدت تشبحلها..
خديجه؛محمد ولدي اني؟
مغليه:ولد المهدي..
خديجه هزت راسها ومشت من حداهم للحمام..
وسدرة قعدت تفكر..
نجاة:ويزن يعرف يكوي حوايجه بروحه؟.
مغليه؛يزن زي عمر ونضال يعتمدوا ع رواحهم..لكن محمد جايب من طبايع الجالي والمهدي مايديروا شي برواحهم يبوا من يديرلهم كل شي..
الدموع لمعوا في عيون نجاه وهي تهز في راسها وتقول..
/سلامتهم وخلاص..
مغليه:ايه..حميزة بيمشي للصلاة ولا؟.
نجاه بإبتسامه:ايه..
مغليه:نحس في ايديته خير من قبل..
نجاه:ايه الحمد لله متحسنه عن قبل ..
مغليه؛ربي يزيده من الشفي..
نجاة:آمين...
🍃🍃🍃🍃🍃
وتغدت نجاه في حوش شيبانيها وبعد الغدي ع طول روحت بصغارها...
وبعد العصر مباشره..روحت خديجه ومعاها راما لشقتها...
خدت دوش وجهزت نفسها بش تنزل لحوش العيله تبي تعرف انطباعهم ع عزومة عقد القران واللي دار فيها...
☘خديجه؛تنزلي معاي لحوش جدك؟
راما؛لاوالله مافيها كيف عندي قرايه ياقرايه..
خديجه هزت راسها وطلعت من دار بنتها وسكرت الباب..
ومشت طلعت من شقتها لحوش شيابينها..
وتتفاجئ لما ماتلقى منهم حد!
ولت ركبت لشقتها واتصلت براجلها تسأله عنهم..
🍃"نسمع في نجاح تقول بيمشوا لفايزة"
خديجه؛قصدك نجاح جت حتى الجمعه هادي؟
"ايه تغدت في حوش العيله هي وراجلها"
خديجه:تمام تمام..سلام توا..
"ماتبي شي"
خديجه؛لاسلامتك..سلام..
"سلام"..
وسكرت منه وهي تفكر شن سبب زيارة عزوزتها وحمواتها لحوش فايزة!؟
🍃🍃🍃🍃🍃
وفي مطعم لأحد مراكز التسوق في العاصمه..
كانوا مقعمزين مالك واسماء ..
هي تهدرز وهو يسمع..
اسماء بغيظ؛اني يديروا فيا هكي اني!؟..لكن باهي كان ماخليتهم عبره هما ونجاح هادي مانبداش اني اسما بنت*****
مالك كان حاط يده ع فمه وهو متكي بمرفقه ع الطاوله ويشوفلها بإمتعاض..
هي ركزت عليه وقالت:خيرك تشبحلي هكي!؟
نزل يده وقال؛لأمتى؟..
هي قالت بإستغراب:شنو؟!
هو قال:هالحال لأمتى!؟..ملاحظه ان الفترة الاخيره كل ماتلاقينا ماتفتحيش معاي الا في المواضيع هادوا..فلانه دارتلي علانه قالتلي هديكا صفتها التانيه نعتها..تو نوريهم تو نربيهم..ودخلتيني حتى اني في هالمواضيع البايخه..اسما اني سايرت هلبه لين بديت نمل راهو..
اسماء بضيق؛كان ماشكيتلكش انت لمن تشكي..
هو قال:اشكي لخواتك صاحباتك قريباتك..اما اني لما تشوفيني فوتي النكد ارجوك الحكايه مش ناقصه وانتي تزيدي في امها..
اسماء بخوف؛باهي اهدا خيرك؟!
مالك؛فديت خلاص كبدي درهت قبل ماكنتيش هكي الزفت جوك كان مليح ووين نتلاقوا الوقت كله يمشي ضحك وهدرزة حلوة لكن توا وليتي اخي عليك بجديات..
اسماء وهي تفكر بقلق وخوف ان مالك يسيبها قالت..
/صراحه عندك حق..باهي خلاص بيبي اسفه من اليوم معاش نفتح معاك مواضيع درهلك كبدك وتنكد عليك..
مالك؛حتى انتي فوتي النكد ودراه الكبد وعيشي حياتك عادي من غير مشاكل ترتاحي صدقيني..
اسماء قعدت تشوفله بنظرات تعجب..
هو حرك راسه متسائل بمعنى..
"خيرك!؟"
اسماء:فيك حاجه متغيره؟
مالك:صابغ ومنقي..
اسماء بضحكه؛يابارد نحكي جد..
مالك:شن بيتغير فيا زي ماني ..
اسماء:لالا فيك شي متغير اني متأكده..
هو قعد يغني..
سألوني سألوني سألوني..انا شو مغير فيي
صوتي وشي لما جفوني او نظره عيني..
انا فيي لا ماتغير شي قلبي عاشق
هدا الشي يلي بس تغير فيي..
ضحكت وهي تقول..
/محلاك وانت رايق .
مالك بإبتسامه؛حتى انتي تجنني وانتي رايقه..ع خاطري قلبي فوتي المشاكل وخلي جونا مع بعض مليح..راني مكبد فيك يابنت ماتفرطيش فيا..
هي بإبتسامه:مستحيل...
طلع من جيبه سلسال ذهب ناعم ومدهولها..
اسماء؛خاطري مرة دير زي الناس وتجيبلي هديه مغلفه..
رفع حواجبه وقال:اني مش زي الناس ياعمري..
خدت اسماء السلسال وقالت؛-هدا علاش حبيتك..
مالك؛عجبك؟
اسماء وهي تشوف للسلسال؛يجنن..
حاطاته تحت وشاحها وقعدت تلبس فيه...
وهو يشوفلها بإبتسامه..
بعدين نزلت شويه من الوشاح وقالت.
/حلو؟
هو هز راسه وقال وهو يقلد فيها؛يجنن..
وهي قعدت تضحك...
🍃🍃🍃🍃🍃🍃
"الحمد لله يام درجاتي كلهم مسكرات نحس في روحي بنجيبها من الاوائل ع طرابلس"
محمد بإبتسامه:بإذن الله..
يزن رفع عيونه فيه بإبتسامه بعدين رجع نظره لقبر امه وهو يقول..
/سدرة حتى قرايتها كويسه ودرجاتها قويه..وماتخافيش عليها قويه حتى هي راهو..
محمد:يزن خلاص وقت..
يزن؛غير اصبر شويه بس..
محمد سكت وخلاه يكمل كلامه معاها..
كان مضايق ع خوه اللي بعد كل زيارة لقبر امهم نفسيته تتعب بزياده...
🍃بعيد عنهم كان مدرس عمهم نضال ويكلم في مرته..
"كل عظمه فيا متكيه ع التانيه حاسه روحي منتهيه"
نضال بضحكه؛انتقمت منكم عمتك..
"والله صح انتقام"
نضال؛باهي غدوة نبي نشوفك..
"تجيب هديه تانيه نوريك"
نضال؛شن المراة المخالفه اللي باليني بيها ربي النساوين التانيات يديروا مناحه بش يحصلوا وردة مش هديه راهو هدا اسمه بطر..
"اولا اني مش زي النساوين التانيات اني مراة قنوعه نحب الاهتمام لكن مانحبش الدلال الزايد لأنه يفسد..تانيا اني ديما نشكر في ربي ونحمد فيه اللي عطاني واحد طرشوق زيك فاهمني وفاهماته وروحي وروحه متوالفين"
نضال بهيام:قلبي ولى زي السكر في الشاهي ..
"لا والله اني السكر وانت الشاهي"
نضال؛ناعليا منك..
"استغفر الله عليك هدرزة حدا المقبره"
هو كيف جي بيرد..
شاف محمد طالع بيزن اللي كان يبكي..
بدت ع وجهه ملامح الضيق وهو يقول..
/حبيبي بعدين نكلمك باهي..
" okحبيبي سلام"
سكر نضال وقعد بعيونه مع ولاد خوه..
وصلوا في السيارة..
ركب محمد يزن من الخلف..
وهو ركب من القدام..
شغل نضال السيارة وهو يسمع في يزن يرشف..
تنهد بحزن وتحرك طول بالسيارة..
🍃🍃🍃🍃🍃
الساعه 7:00مساءا..
في صالون حوش الصيد..
عواطف؛فرق العمر كبير هلبه يام..
نجمه؛بيني وبين بوك 16عام..
عواطف؛الوقت تغير يام..
نجمه؛تي هما توا ولوا ماياخدوا كان في الصغيرات..
عواطف ضايقها كلام امها وقالت..
/صدقتي هدا الواقع..ناضت وهي تقول..خل نمشي نبدل حوايجي..ومشت طلعت من حداها..
نجمه بندم؛عطيني قصة في لساني..استغفر الله العظيم..
🍃🍃🍃🍃🍃
وفي صالة حوش لطفي ..
فايزة؛فاجئوني هلبه الحق..
فردوس؛باهي انتي شن رايك..
فايزة؛انتي ماعنديش مشكله بكل كان وافقت صفاء اني موافقه..
صفيه؛هو هدا كان جي الراجل الباهي ماترديشي..
مطيره؛اهم شي تكون هي راضيه ماتغصبيش عليها..
فايزة؛اكيد بعد هي توافق كان قالت لا تقعد لين يجيها نصيبها وخلاص..
☘وفي الكوجينه..
أميمه:نعرفهم مستحيل يعدوها بالذات الشيطانه خديجه حاشى اسمها..
طوبى:حتى اني متوقعتها دير شي..
اميمه ببغض:وهو؟
طوبى بإزدراء؛مسافر..
اميمه؛معاش كلمك؟
طوبى حركت راسها بالنفي...
اميمه تنهدت بقلق وقالت..
/ربي يكفيك شرهم ويخلصك منهم ع أهون سبب..
طوبى بقلق ورجاء...
"يارب"
🍃وبعد ماروحوا فايزة وعيلة عبد المطلب..
خشت طوبى لدار نوم بوها امها..
وين سكرت الباب حست بشعور غريب..
قليل النادر ماكانوا يخشولها لما يبيهم بوهم يضموها...
وفي كل مرة يخشولها فيها كان يجيهم نفس الشعور..
مشت للدولاب وبدت بيه هو الاول..
رتبت ملابس بوها وحاجاته...
بعدين فتحت دولاب امها فاحت عليها ريحة الياسمين..
وين شمتها دموعها نزلوا..
قعدت طلع في حوايج امها بالحاجه ودموعها زي السيل..
فضت الدولاب..وخدت شيشة عطر الياسمين العتيق المحطوطه في الدولاب وعطرت بيه الحوايج..
بعدين مسحت الدولاب ورجعت ردت حاجات امها وسكرت عليهم الدولاب..
وكملت ترتيب باقي الدار..
شويه حست بشي من التعب..قعمز ع السرير جنب الكامدينو بش تريح شويه..
جو عيونها ع بكلة شعر تخش في الشعر زي المشط محطوطه عليه..
تعرفها كانت لأمها بس استغربت المكان اللي انحطت فيه..
وبعد فكرت شويه فهمت ان بوها كان يسترجع في ذكرياته ومش عارفه علاش وقتها حست بشي غم ع صدرها...
طوبى بضيق وخوف..
/أعوذ بالله من الشيطان الرجيم..
بعدين ناضت وهي تقول...
استغفر الله العظيم واتوب اليه..
ومشت طول طلعت من الدار وسكرت الباب وراها...
🍃🍃🍃🍃🍃
وتعدي باقي ساعات اليوم وتلحقها ساعات النهار الأولى لليوم اللي بعده في هدوء..حياة ماشيه زي كل يوم بروتينها المعتاد...
ومع الساعه السادسه مساءا..
كانت الاء طالعه مع مطيره رافعتها لمحل الراجل اللي ياخد منها في الهريسه..
وأريج في خدمتها...
ولطفي طالع يقضي مشوار...
وماقعد حد في الحوش غيرهم الثلاثه..
غرفه وفردوس وطوبى...
فردوس وغرفه في الصاله يتفرجوا ع التلفزيون..
وطوبى في الدار تقرا في القرآن...
وفجأه..
يدق باب الحوش..
🍃فردوس:باب الحوش يطق ولا؟
غرفه:ايه حتى اني سمعته..زعمه نبيله؟
فردوس:ايه صح شكلها هي امس ماجتش..
وناضت فردوس ومشت طلعت للشماعه خدت الملايه لبستها..
وطلعت لباب الحوش..
وقفت ع الباب وقالت..
/مني؟
"افتحي يافردوس"
رفعت فردوس حاجبها..
بعدين فتحت الباب...
خديجه:السلام عليكم..
فردوس:وعليكم السلام..
خديجه بضحكه استغراب:قصدك ينقعدوا واقفين في الفم هكي؟
فردوس زادت فتحت الباب وهي تقول..
/خشي..
خشت خديجه وهي تقول..
/شن حالك اليوم..
سكرت فردوس الباب وهي تقول..
/الحمد لله..خشي داخل خشي..
مشت خديجه وهي تخطخط بكعب شبشبها ..
وفردوس تشوفلها من فوق لتحت..
وصلوا في الباب..
حولت خديجه الشبشب وخشت وهي تقول..
/بسم الله..
خشت وراها فردوس وهي تفكر في اللي بيصير بعد شويه..
وصلوا في الصاله..
خشت خديجه وهي تقول..
/غرفه كيف حالك؟
غرفه وهي مستغربه:اهلا خديجه..
وصلت فيها خديجه سلمت عليها بعدين قعمزت وهي تقول..
/شن حالك شن دايره مع الحمل؟
غرفه:الحمد لله كله تمام..مبروك ع نسرين..
خديجه؛الله يبارك فيك..سمعناها منكم كلكم ماعدا كنتنا..
غرفه شبحت لفردوس..
وفردوس قالت..
/غرفه ترا تعالي شويه..
حست غرفه ان في شي مش طبيعي..
ناضت بصعوبه ومشت لأختها..
فردوس:شويه وجايتك..
خديجه بإبتسامه مصطنعه:
/خودوا راحتكم..
وقعدت معاهم بعيونها لين طلعوا..
تبدلت ملامح الابتسامه ع وجهها لملامح الامتعاض..
🍃في دار المعيشه..
غرفه بقلق:شن في ؟
فردوس:خليك هني ماتطلعيش..
غرفه:الستر ياربي!علاش هدا كله؟
فردوس:ربي يهديك اسمعي الكلام وقعمزي هني..
غرفه تنهدت بقلق وقعمزت..
وفردوس مشت طول للدار اللي فيها طوبى..
فتحت الباب عليها وقالت...
/طوبى..
رفعت عيونها عن المصحف وشبحتلها..
فردوس بضيق..
/خديجه جت
تنفست طوبى بقوة وهزت راسها وهي تقول..
/شويه وجايه..
فردوس؛باهي..
وطلعت وسكرت الباب..
سكرت طوبى المصحف وناضت حطاته في مكانه..
حولت ملاية الصلاة ومشت علقتها ع الشماعه..
وولت وقفت ع المرايه..ساوت شعرها بس..
بعدين مشت طلعت من الدار وهي تتفكر في قول ابن القيم..
《لاحول ولاقوة إلا بالله تحمل بها الأثقال ، وتقتحم بها الأهوال ويدخل بها على من تخافه 》
وقعدت تردد لين قربت من الصاله..
🍃وفي الصاله..
فردوس:هي تحب الخدمه هلبه ماتقدرش تستغنى عنها..
خديجه؛غير تجينا تو تستغنى عنها وتخدم خدمه تناسبها وتناسبنا..
فردوس رفعت حاجبها وهي تقول في نفسها..
"لما تشوفي حلمة وذنك ياحق.يرة"
وتخش طوبى عليهم وهي تقول..
/السلام عليكم..
خديجه تهكما..
/وعليكم السلام والاكرام..واخيرا زرقت الشمس..عاش من شافك للا طوبى وشك ولاضي القمر ياكنتنا..
طوبى مشت قعمز في صدر الصاله ومدت رجليها وقعدت تشوف لخديجه بنظرات تعالي مقصوده مع حركه دايرتها بحواجبها تعبر عن التعجب الساخر..
خديجه:خيرك ياحنه؟شن اللي قالبك هالقلبه؟لاتتصلي،ولاتجي، ولاحتى تقول نبارك برساله اللطف!
طوبى قاعده تشوفلها بنفس النظرات..
هي ضيقت عيونها ومررت نظرها عليهم بعدين ثبتتهم ع طوبى وهي تقول..
/شن في؟
طوبى:والله انتي ادرى؟
خديجه:بشني؟
طوبى؛بكل شي..
خديجه؛فكينا من الكلام بالألغاز وخشي في الموضوع طول..
طوبى:حاضر..تبي نخش في الموضوع طول..نخش في الموضوع طول..نجاه والجالي..
مررت نظرها عليهم وهي تضحك بتهكم وقالت..
/ ايه خيرهم مافهمتش..
طوبى عقدت حواجبها وقالت بغضب:فكينا منه جو الاستغباء هدا انتي اكثر وحده تعرف شن في بين نجاة والجالي..
الجالي اللي لما عرفتوه يبيها ماطابش عليكم وجبرتوه يتزوج غيرها بش يفوتها بس مع الاسف مافلحتوش..لأنه مانساهاش وقعد يخون فيا معايا..ضحك عليا واستغفلني زي مادرتوا كلكم من صغيركم لكبيركم لكبار عيلتنا،غشيتوهم وخليتوهم يحطوا ايديهم في ايديكم وقبلها كانوا حاطين فيكم الثقه ومأمنين فيكم وعطوكم بنتهم..مساكين يحسابوا رواحهم عطوها لناس تسوا..
خديجه بحده؛طوبى تكلمي كويس..
فردوس بإبتسامه ساخره؛اما انتي مصح وجهك وخلاص..
خديجه؛شن الاسلوب هدا وطريقه الكلام السفيهه..وانتي شن تقطعي وتحذفي من عندك مضروبه ع راسك ولاشي؟
شن جاب نجاه للجالي!؟ لايتحابوا ولايتقابلوا وياما صاير بينهم مشاكل يكون في علمك..مالقتيش غير نجاة تكذبي عليها هالكذبه!؟
طوبى ابتسمت بسخريه وقالت..
/والله مااستغربت وتوقعت ردودك هادي لأني حفظتك خلاص..
خديجه بغضب:اسمعي اني لتوا قاعده مانبيش نغلط..
فردوس بإنفعال:شن انتي هاه شني!!؟شن قوة العين اللي عينك هادي انتي مفروض تنزلي عيونك لوطا وماتفتحيش فمك بعدالعار اللي درتيه..
خديجه بإنفعال:هييه الزمي حدك واعرفي شن طلعي فمك العار حني مانديروشي ومش لينا العار ليه ناسه من يوم يومهم..
طوبى بغضب وبصوت عالي:سكري فمك..
انتفضت خديجه وشبحت لطوبى بحده..
طوبى كملت كلامها بغضب وهي تقول:تعرفي كويس اني شن نعرف عليكم تعرفي كويس ماتخلنيش نطلع عن طوري وربي نفضحكم في الدنيا كلها..
فردوس بغضب:ساده غير عملتك السودا اللي درتيها في أميمه يامجرمه..
وجه خديجه شحب لونه بس قعدت محافظه ع ملامح وجهها الحاده ونظراتها الحاده القويه..
طوبى:اشبحيلي هني..
غيرت نظرها لطوبى وهي تشوفلها بنظرات وقحه مخيفه..
طوبى:زي ماقنعتي خوك ياخدني بتقنعيه يطلقني بهدوء خير من العار والشهدرة اللي ع قولتك مش واخدين عليهم..
فردوس:وخوك التاني حتى هو من بعد اليوم بنتي يحلم بيها ماتقعدش ع ذمته اكثر ماقعدت ساد ماتوسخنا بيكم .
شبحتلها خديجه وقالت:طلعنا حني اللي موسخينكم!؟ والله ماشرفكم كان نسبنا اللي يتمنوه الناس وانتم تاريخكم معروف مافيش داعي نجدد الماضي..
فردوس:ورب العزه كان ماسكرتي خ.رارتك نوض ندفنك في مكانك..
طوبى:فوتيها يافردوس حتى كلامنا معاها هلبه فيها وحده زي هادي..
خديجه بإبتسامه تهكم: ياما تحت السواهي دواهي..هادي انتي العاقله المحترمه!
طوبى اشرت عليها وهي تقول بقوة:خليتول فيهم عقل واحترام انتم!؟انتم ماتبوش العاقل والمحترم انتم تبوا من يحطلكم حد ويوريكم حجمكم عيله متغطرسه جبارة ناس ماتخافش ربي..
خديجه؛اللي قلتيه كله..كله ياطوبى لما ندمك عليه حرف حرف..
طوبى هزت راسها وهي تقول؛تو نشوفوا مني يندم التاني..وتوا نوضي اطلعي من هني تمشي لأمك طول وتوصليلها لو ماخليتوش ولدكم يطلق من كيفه اني نخليه يطلق بعد مانفضحه ونطلع عاره يكون في علمك في من شاهد ع وساخة خوك وهو اللي فتحلي عيوني عليها حد براني ماتعرفوشي بكل..
خديجه هني خافت اكثر وماقدرتش ترد..
حدها هزت راسها وهي تتوعد بعدين ناضت ومشت بتطلع وهي تقول..
/باهي ياطوبى باهي...
ناضوا وراها فردوس وطوبى وقعدوا يلحقوا فيها ..
لين طلعت من الحوش كله وخبطت الباب وراها بقوة..
فردوس:قربع راسك..
طوبى بحقد:ماريتش اح.قر منها في حياتي..
التفتت فردوس لطوبى وهي تقول؛خشي قعمزي خشي..
حطت يدها ع بطنها من تحت وهي حاسه بوجع من لما كانت تتناقش مع خديجه بسبب الانفعال..
مشت خشت ومعاها فردوس..
وفجأه..
وقفوا في مكانهم لما شافوا غرفه واقفه تشوفلهم بصدمه..
بس مش اكبر من صدمة اريج اللي كانت واقفه جنبها وهي تشوف لطوبى بعيون مغرقتهم الدموع...
#فوق_الطاوله
#طوبى
....يتبع....
