# طوبى "شارع القهوة"
#جمان_فريد
#الجزء_السابع_عشر"سدرة المهدي شنيبه"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
في مستشفى الجلاء..
كانوا يجروا بعائشه وهي راقدة عليها..
ومعاهم سدرة تجري وهي تبكي وميته خوف عليها وعلى عيلها..
لين وصلوا بيها للباب اللي حيخشوا منه لغرفة العمليات..
خشوا بعائشه وسكروا ع سدرة الباب..
وسدرة تبكي وتدعي وتقول:يارب..
"سدرة"
شبحت جنبها وهي متفاجئه لما شافت فايزة جايه تجري..
وصلت فيها وقالت بخوف:خيرها عيشه!؟
سدرة ببكي؛طاحت من الدروج في المدرسه..
شهقت فايزة وحطت يدها ع فمها..
سدرة ببكي؛يارب سترك يارب يارب نوضها سالمه هي وعيلها يارب..
طاحوا دموع فايزة وهي تقول:مازال ماكملتش السابع..!
سدرة ببكي:ربي يلطف بيها..حطت يدها ع قلبها وقالت..قلبي مسحون سحن يافايزة..قالتلي سامحيني بالله عليك واغمى عليها هني هني يافايزة طاح راسها عليا..
فايزة ودموعها ينزلوا ضمت صاحبتها..
وسدرة كانت محتاجه بقوة لهالحضن ضمتها وهي تبكي..
شويه وبعدتها وقالت بإستغراب:انتي من خبرك؟
فايزة وهي ترشف:ماهو حتى نسرين هني جابت..
سدرة يدوب ابتسمت بين عيونها وقالت؛شن حالها توا..
فايزة؛كويسه الحمد لله جابت طبيعي والبنيه ماشاء الله صحتها تمام..
سدرة؛جابت بنيه!؟
فايزة ابتسمت من بين دموعها وهزت راسها ايجابا..
سدرة شبحت لباب العمليات رجعت تبكي وقالت؛يارب لطفك يارب..
فايزة وعيونها يدمعوا؛يارب..
شبحت سدرة لعائشه شويه بعدين قالت:راجلها ضروري يعرف..
فايزة شبحتلها وهي تفكر بعدين قالت؛تو نخبر احمد يقوله..
هزت سدرة راسها وقالت:ايه ايه كلميه..
مشت فايزة بتتصل بأحمد..
وسدرة تشوفلها شويه وضيقت عيونها وقالت؛حي نسيت نخبر الفاندي..!
طلعت تليفونها من شنطتها..
وطول حطت ع رقم الفاندي واتصلت بيه...
☘☘☘☘☘
وصل احمد المعلومه من فايزة للمهدي اللي كان برا طرابلس..
تحديدا...مدينته زليتن...
والمهدي سيب كل شي وركب سيارته وتحرك طول بإتجاه طرابلس...
☘ومازالت عائشه في العمليات...
وفايزة وسدرة قلوبهم تغلي عليها...
شويه وطلعت الممرضه تجري وهي تقول لسدرة:شن فصيلة دمك؟!
سدرة؛تبوا دم..فصيلتي اني وياها وحده..
الممرضة:تعالي ناخدوا منك ع اللي عندنا..
فايزة بخوف:نزفت هلبه!؟
الممرضة بإستعجال:ايه لكن ماتخافوش عليها..هي انتي..
ومشت بسرعه هي وسدرة..
سدرة:والعيل سستر شن صار فيه؟!
الممرضة وهي تجري:اه ايه..جابت بنيه صحتها كويسه لكن رفعوها للحضانه..
هزت سدرة راسها وقعدت ساكته..
لين وصلت هي والممرضة لمكان سحب الدم..
سحبوا من سدرة دم...
وبعد ماخدوا منها الدم..عطوها تشرب عصير عنب..
شربت منه شويه وناضت ولت لمكان غرفة العمليات..
لقت فايزة قاعده واقفه وتراجي..
سدرة؛ها شن ماطلع عليك حد طمنك..
فايزة؛لالا..انتي شن حالك مش دايخه..
قامت باكو العصير وقالت:لاكويسه...نزلاته وقالت..سمعتي جابت بنيه..
فايزة ابتسمت وسط دموعها وقالت:ياروحي.
سدرة:ربي ينوضلها امها سالمه يارب..
فايزة؛آمين...
☘وقعدوا يراجوا للحظات لين طلع الدكتور من غرفة العمليات وهما جوه طول سألوه عن عائشه..
الدكتور:الحمد لله مافيش عليها خطر توا..بس صارلها كسر اسفل الظهر..حتقعد فترة اسبوعين اوتلاته اسابيع في المستشفى ع اقل تقدير..
فايزة بحزن؛لاحول ولاقوة الابالله..
سدرة؛قولي الحمد لله الحمدلله..المهم ربي نجاها لصغارها..
الدكتور:مزبوط..الحمد لله ع سلامتها..
الزوز قالوا:الله يسلمك...
ومشي الدكتور..
سدرة تنفست براحه وقالت:الحمد لله قدر ولطف..
فايزة:الحمد لله...فجأة رن تليفونها..
شافت المتصل لقتها نسرين..
فايزة؛هادي نسرين..تمشي معاي تشوفيها..
سدرة؛بري ولاحقاتك نبي نمشي نشوف بنت عيشه..
فايزة؛تمام حتى اني نشوف نسرين شن تبي بعدين نمشي نشوفها..
هزت سدرة راسها بإيجاب..
مشت فايزة من حداها..
وسدرة قعدت تراجي في حد يطلع يدلها ع مكان الحضانه..
شويه شافتهم مطلعين عائشه من غرفة العمليات..
مشتلها طول شافتها...
كانت غايبه عن الوعي..ووجهها شاحب هلبه..بعدت عنها وعيونها معاها....
قلب سدرة تقطع عليها وبدت تبكي..
جتها نفس الممرضة وقالت:ماتخافيش عليها تو تولي كويسه..
سدرة وهي تبكي؛يارب..رشفت وقالت..بالله عليك ارفعيني نشوف بنيتها..
الممرضه ابتسمت وقالت؛تعالي معاي..
مشت معاها وهي تقول:لكن بتشوفيها من برا راهو..
هزت سدرة راسها وقالت؛نعرف..
ومشوا الزوز لمكان الحضانه لين وصلوا فيها..
ومن ورا شباك المرش..
قعدت سدرة تشوف في ممرضة داخل اشرتلها ع بنت عائشه..
شبحتلها سدرة ابتسمت من قلبها وقعدت مبتسمه وتمسح في دموعها وتقول؛ياعمري مصغيرها...تهبل...
🌻فهالوقت..
كان المهدي واصل للمستشفى..
نزل من السيارة وهو يمشي بسرعه...
خش المستشفى...سأل عن حالة عائشة عطوه عنها كل المعلومات..
طول مشي للقسم اللي هي موجوده فيه..
وصل في الحجرة اللي هي فيها..
خشلها..
لما شاف حالتها قلبه وجعه عليها..
قرب منها..حط يده ع راسها..ركز على وجهها كيف شاحب وباين فيها التعب الشديد...طبس عليها باس جبينها..
وقعد يشوفلها بحزن وضميره قعد يأنب فيه لأنها اهمل هلبه الفترة اللي فاتت..
شويه اندق الباب وخر..
انفتح وخشت عليهم نفس الممرضة..
ابتسمت وقالت؛الحمد لله ع سلامة المدام ماتخافش عليها زي ماقالك الدكتور مافيش عليها خطر..
هو المهدي راسه وهو ساكت..
الممرضة:ماخاطركش تشوف بنتك..
ابتسم ع جنب وقال؛نقدر نشوفها؟
الممرضة بإبتسامه:ايه تعالى..
شبح المهدي لعائشه شويه..بعدين مشي طلع مع الممرضة..
وقعد يمشي معاها..
الممرضة؛حتقعد فترة في الحضانه بعدين تطلع..بس ياناري امها الفترة الجايه مش حتقدر ديريلها شي..لكن سلم وخيتها اكيد حترد بالها منها وتعانيها..
المهدي بإستغراب؛وخيتها!؟
فهاللحظه..
وصلوا هو والممرضه للممر اللي فيه غرفة الحضانه..
الممرضة؛ايه هونا واقفه غادي من بكري تشوف للبنيه..
هو قعد واقف يشبح لسدرة وهو مصدوم..
الممرضة؛هي الحمد لله ع سلامتهم نستأذن استاذ..
مشت الممرضة بدون مايرد عليها المهدي اللي كان يشبح لسدرة وبس..
وسدرة مازال تتفرج ع بنته وهي مبتسمه بحب..
فجأة رن تليفونها..
قاماته شافت المتصل ردت طول..
سدرة؛ايوه ايهاب..
"اني هني انتي وين؟!"
وخرت سدرة والتفتت بتقوله هي وين ..
بس سكتت وين جو عيونها ع المهدي وهو واقف يشبحلها..
" يا السدرة وينك"
استاقظت سدرة ونزلت عيونها وقالت؛جاياتك..
ومشت طول فاتت من جنب المهدي وعيونها لوطا..
وهو قعد بعيونه معاها لين لين ادرقت من قدامهم..
غير عيونه عنها وشبح لشباك الحضانه..
بعدين قعد يمشي بإتجاهه لين وصل فيه..
قعد واقف يشبح للاطفال وماعرفش بنته منهم..
شافاته الممرضة كيف واقف يدور بعيونه..
مشت طلعتله من الحجرة وجاته وقالت؛دور ع بنتك ولاولدك..
المهدي شبحلها بعدين تنحنح وقال؛بنتي مالهمش هلبه جايبينها هني..
ابتسمت وقالت؛عرفتها..ومشت ولت للحجرة..
مشت وين في البنت واشرتله عليها..
ارتسمت ع وجهه ابتسامه حلوة وهو يشوفلها..
وقعد يتأمل فيها ومستغرب..صغيرة هلبه..
طبيعي لأنها جت قبل موعدها بشهرين...
🌻🌻🌻🌻🌻
حدا الاستعلامات...
وصلت سدرة فالفاندي وقالت؛شن جو..
قعد يشبح لوجهها بقلق وقال:خيره وجهك اصفر هكي..
سدرة:من الرعشة مانحكيلكش والله قريب متت..رفعت ايديها قدامها وقعدت تقول..هاه شوف قاعده نرعش..
شبح لايديها بعدين شبحلها وقال:واضح شكله سكرك نازل..
نزلت ايديها وقالت؛حتى تبرعت بالدم ممكن هدا علاش!؟
الفاندي:كيف!!؟
سدرة:ماتخافش شربت عصير..
الفاندي:عصير شني مفروض تاكلي انتي!
سدرة:لالا ماخاطري في شي...
الفاندي وهو عاقد حواجبه:مش بخاطرك..ماشي نجيبلك حاجه تاكليها وانتي قعمزي غادي وماتتحركيش بكل..
ابتسمت سدرة وقالت:حاضر..بس قبل لتمشي لازم نقولك..راهو راجل صاحبتي فوق..
هز راسه وقال:شفت سيارته..المهم توا بري قعمزي..
سدرة:حاضر..
ومشت قعمزت في صالة الانتظار..
والفاندي مشي طلع من المستشفى..
درس ع اقرب قهوة جابلها نفاص كبدة خروف وطني..وعصير وفواكه وجاها طول..
سدرة:خل نطلعوا نقعمزوا برا خير من هني..
الفاندي:ع راحتك...هي تعالي..
مشي وهي معاه وطلعوا برا..
مشوا قعمزوا في تركينه..
طلعلها الفاندي ساندويتش وقال:نعرفك تاكليه كله .
سدرة وهي تشم في الريحه:اممم..لاناكله نحبها كبدة الخروف..وخدت منه وهو يشوفلها بأبتسامه..
بعدين فتح حكة عصير راوخ عنب وعطاهولها..
وهو خدي ساندويتش وقال:جبت بش نسايرك تاكلي براحتك وماتتحشميش..
ابتسمت سدرة وهي تاكل وتشوفله..
الفاندي:عجباته..
غمضت عيونها ورفعت حواجبها تعبيرا عن اعجابها بالكبده.
ضحك وقال:صحتين..وبدي ياكل..
🌻🌻🌻🌻🌻
"ياروحي عليها...قلبي وجعني عليها"
فايزة؛حتى اني..
نسرين:خوي عرف..
فايزة؛قلت لأحمد وخبره اكيد جاها توا..
نسرين ودموعها عبوا عيونها:مش عارفه شن بنقول عليها سدرة..
فايزة؛مش مستغربه فيها بكل هادي سدرة من يوم يومها..اللي يخسر سدرة معاش يكسب بكل يانسرين..
نسرين نزلت منها دمعه وقالت:صدقتي الصحبة الباهيه مايعوضها شي..
فايزة ابتسمت وقعدت ساكته..
نسرين؛وينها خيرها ماجتنيش؟
فايزة؛خلتها ماشيه تشوف بنت عويشه..
نسرين ابتسمت وقالت:ياعمري..بنتي وبنت خوي جو في يوم واحد..
فجأة دق الباب وانفتح..
خش راجل نسرين..
شبح فايزة...وكانت نظرته ليها نظرة اعجاب واضحه..
فايزة ناضت وقالت:نستأذن..
حامد بإبتسامه:لاخليك عادي مش مطول..
نسرين لاحظت نظراته ليها قعدت تشبحله بحده..
فايزة بدون ماتشوفله:لالا خودوا راحتكم..
ومشت طول من حداها وطلعت وسكرت الباب.
حامد بعد ماكان يشبح لفايزة التفت لمرته ابتسم وقال:حمد لله ع السلامه..سامحيني نانسي كان عندي اجتماع مهم وماخطرش في بالي انك متصله بيا لأنك بتجيبي نحسابك تبي نجيب حاجه واني مروح..
شاف سرير بنته مشالها وقالت:ماشاء الله...عسل زي امها..
وطلع من حيبه علبة مجوهرات فتحها وخلاها تشوفها..
وين شافت داخل لقت خاتم ذهب غالي وحلو..
خلاها تبتسم بفرح وتنسى شن دار....
☘☘☘☘
وخوها فهالوقت ..
كان مقعمز حدا مرته ف الحجرة..سرحان..
عقله وقلبه مع سدرة اللي شافها واقفه تشوف في بنته من روشن الحضانه..
ويتفكر في كلام الممرضه..
زايد كلام الدكاترة اللي قالوا جاية معاها زميله ليها في العمل..وانها هي اللي تبرعتلها بالدم...
هو ملاحظ وعارف ان العلاقه بين سدرة وعائشه منقطعه..
واكثر من حركة دارتهم عائشه قدامه بينوله انها ولت تكره سدرة ..
عكس سدرة اللي كانت تبانله في كل مرة انها واكله هم صاحبتها وبس..
باهي هو شن بيدير..!؟
هالانسانه هادي..كل مايفكر..او يحاول يفكر انه ينساها..
يزيدوا ينغرسوا جذورها في قلبه اكثر واكثر..
تزيد تتمكن منه وتملكه اكثر واكثر..
ويشوف ان العشق مايليقش الا بيها...
قلبه ماينفعش يعشق غيرها..
مراة لاتتبدل ولافي من يقدر ياخد مكانها...
قعد يتفكر في نظراتها ليه لما شافاته وهو واقف في الممر..
نظرات عيونها حسسوا قلبه بالوحشه..
كانوا متغيرات..فيهم شي غريب عليه..
هني بدي قلبه يقوله..ان في حد سكن عيونها غيرك..
اني وياك خلاص ولينا عنها غرب..
ماتحملش ماتحملش..
شعور قاتل لكن بدون موت...
عذاب مافيش منه راحه...
والله يعافينا من هالعذاب...!
حط يده في فمه وقعد يعض ع في صبعه السبابه بقوة..
قهرا..غيظا...غيرة...
فجأة..
"آه"
استاقظ وحول يده وشبح لعائشه..
كانت مغمضه عيونها لكن تحرك في راسها..وتأن..
المهدي:عايشه..
هي ردت عليه وقالت..
"سدرة"
هو انصدم..
فتحت عيونها شويه شويه...
وهو يشوفلها وبس..
بعد فتحت عيونها..قعدت تشبح للسقف وتتفكر في اللي صار..
قامت يدها بصعوبه وحطتها ع بطنها وقعدت تتحسس فيها..
المهدي طول قال:جبتي بنت..
عائشه حركت عيونها ناحيته وقالت:وينها؟
المهدي:حطوها في الحضانه جت في السابع ياعايشه..
عائشه غيرت عيونها عنه وبلعت ريقها بعدين قالت:سدرة..
المهدي قعد ساكت وهو يشوفلها..
عائشه:نبي سدرة..
المهدي:شن تبي فيها..
غمضت عيونها وقالت بتعب:نبيها..
المهدي ناض وقال:باهي تو نشوف صاحبتك فايزة..
عائشه فتحت عيونها وقالت:سدرة..
تنهد بعمق وقال:باهي..
بعدين مشي وطلع من الحجرة..
وقعد يمشي ويدور ع سدرة..مالقهاش..
لين قابلاته نفس الممرضة سألها عنها.
:ايه ريتها لوطا مع راجلها برا المستشفى..
المهدي لما سمع كلمة راجلها..غمض عيونه وفتحهم وهو يتمالك في اعصابه ومشي وخلا الممرضه وهي مستغربه..
توجه خارج المستشفى...
وقعد يدور لين لقاهم..
مقعمزين مع بعض..
سدرة عاطيه بالظهر والفاندي مقابله يهدرز ع سدرة وهو يشوفلها وع وجهه ابتسامه حب واضحه..
كل جزء فيه ولعت فيه النار..
☘سدرة وهي متفاجئه؛فاجئتني الحق!
الفاندي:عارفها ردة فعلك..لكن هكي احسن ليا وليك يالسدرة بش ناخدوا راحتنا اكثر....
سدرة:كيف ناخدوا راحتنا!!؟
ضحك وقال:لا مش زي مافهمتي..ابتسم وقال..قصدي نقدر في مرة نعزمك في مكان قنين..نقدر نجيك نروح بيك من المدرسه من غير ماحد يدوي..نقدر نجيبلك اللي تجي في خاطرك واللي نودك بيه..نقدر لاقدر الله لو صار ظرف نخش حوشكم من غير احراج..هذا قصدي..ايه وحاجه تانيه نعبر عن مشاعري..حط ايديه ع صدره بعدين وجههم ليها وقال..نطلع مافي خاطري بنتفجر من الكبت يابنت الناس راهو..قال كلامه بإنفعال وهو يضحك..
سدرة قعدت تضحك من جدها..
وهو يشبحلها ويضحك ويقول؛قسما بالله..مش ساد السنين راجيت فيهم ومازال قاعد نراجي!
سدرة هدت ضحك وقالت:باهي..لكن موضوع زي هدا اللي يحل واللي يربط فيه بوي..
الفاندي:انتي قولي باهي عمي لطفي نقدر عليه..
سدرة؛حتى الواعر الكبير راهو بوي يتأثر برأيه هلبه!
الفاندي بضحكه؛حبيبي الواعر الكبير اني وياه هكي..
حط اصابعه السبابه جنب بعض..
ضحكت سدرة وقالت:خلاص مالا برا لصحابك تفاهم انت وياهم..
الفاندي بإبتسامه:نفهم من كلامك انك راضيه .
ابتسمت وهزت راسها بإيجاب..
هو شبح القدام وضحك ومسح بيده ع شعره للخلف..
وسدرة تشوفله وهي مبتسمه .
وعيون المهدي اللي تقول يتنطر منها شرار عليهم..
رجع الفاندي بيشوف لسدرة جو عيونه ع المهدي..
عقد حواجبه واختفت ابتسامته..
هي لاحظت وقالت:خيرك!
المهدي اشرله بيده يجيه..
ومشي القدام..
التفتت سدرة بتشوف مالقت حد رجعت شافلته وقالت؛خيرك ايهاب!؟
ناض وهو يقول:شويه وجاي..
ومشي وهي قعدت بعيونها معاه مستغربه..
هو صل وين مافي..
جاه وحط ايديه ورا ظهره وقال وهو عاقد حواجبه:تفضل..
وخر مهدي بالطوه بيده وحطها في نصه وقال بدون مايشبحله:قوللها تركب للمراة تبيها..
الفاندي شبحله شويه..بعدين لف ومشي ولى لسدرة..
وصل فيها وقال:صاحبتك اللي جيتي معاها هني شكلها فاقت وتبيك..
ناضت سدرة وهي ملهوفه وقالت:الله!
الفاندي؛ايه هيا تعالي..
ناضت ومشت وهو معاها..
خشوا الزوز للمستشفى..
الفاندي:نراجي فيك هني..
سدرة:باهي..
ومشت طول..
والفاندي بعد مشت التفت..شاف المهدي برا مشي وقف حدا سيارته..
هو بعدين مشي قعمز في صالة الانتظار..
☘وسدرة وصلت في حجرة صاحبتها..
دقت الباب وخشت..
سكرت الباب وقعدت تقدم وهي تشوفلها وقلبها موجوع..
وصلت فيها وقالت بنبرة باكيه:عيشه!
فتحت عائشه عيونها وشبحتلها دمعت طول وقالت: سدرة..
ومدت يدها..
سدرة طول شدتها وقالت ودموعها ينزلوا:شن حالك توا..
عائشه ودموعها ينزلوا:سدرة سامحتيني ولا..
سدرة مسحت دموعها ورشفت وقالت:ع شنو؟!
عائشه غمضت عيونها وبدت تبكي وهي تتوجع..
سدرة:لالا عيشة خلاص...نطلع من حداك راهو..
فتحت عائشة عيونها وقالت بتعب:مافي شي..يستاهل..والله مافي..مافي شي يستاهل نخسر ع خاطره..وخية دنيتي.
سدرة قعدت تبكي بصمت..
عائشة ببكي وتعب؛في كل..مرة تثبتيلي..اني مانستاهلش صحبتك..
سدرة معاش قدرت تتحمل وقالتلها:باهي خلاص بالله عليك ااسكتي قلبي معاش يتحمل..ضحكت من بين دموعها وغيرت الموضوع وقالت..محلاها بنيتك زي العسل.
ابتسمت عائشه بتعب وقالت:حقه!
سدرة؛صغارك كلهم حلوين انتي عاد ماعندهمش من وين يجيبوه البو والام احلى من بعض..
ضحكت عائشه بتعب وتوجعت..
سدرة:هاه خلاص خلاص سكتنا..
ابتسمت عائشه وقعدت تشوفلها والدموع سيل..وقعدت تشد ع يد سدرة بقوة..
وسدرة تشوفلها بنفس الابتسامه..
فجأة..
دق الباب وانفتح..
شبحت سدرة للباب..
لقت فايزة خاشه وهي شادة نسرين..
سدرة بشهقه:نهارك احرف!؟ كيف خلوك تطلعي انتي!؟
نسرين بضحكه وشي من التعب:تي عادي..
فايزة بضحكه:تعرفيها باردة وماتعدلش..غير جت في مستشفى عام مش فالمصحه ..
ضحكت سدرة وهي تحرك في راسها يمين ويسار..
فايزة:ياصارت فيا حوسه واني نكلم في دكتورها بش تجي وتجيب ملفها..
نسرين:نعرفها تخدم حتى هني هدا علاش خليتك تجيبني لأقرب معاش قدرت نتحمل..
قربوا من عائشه وشافوها.
لقوها تسمع في كلامهم وهي مبتسمه..
نسرين وفايزة:عويشه!!
عائشه شبحتلهم بإبتسامه..
قعمزت نسرين ع الكرسي وقالت:شن حالك توا..
عائشة بصوت متعب:الحمد لله..
فايزة:ياعمري..تعذبتي هلبه..
عائشه غمضت عيونها وفتحهم وقالت:الحمد لله..
نسرين بضحكه:بنتي وبنتك جو في يوم واحد..
عائشه وهي متفاجئة:بنيه!
نسرين:ايه..
سدرة كانت مركزة مع عائشه حستها مازال تعبانه ومش واعيه زين قالت:خلاص بنات ارحم من زار وخفف..
عائشه بتعب:لااقعدوا..
سدرة:مرة تانيه حبيبتي وانتي احسن..
نسرين قعدت تشبح لسدرة بعيون معبيه دموع..
شبحتلها سدرة وقالت:وانتي نوضي لدارك من غير هبال..وانتي تسايري فيها وطلعي فيها من الدار!!؟
فايزة:حطوها مع حالات تانيه ماعجبهاش هدا علاش طلعت..
ضحكوا البنات..وعائشه ضحكت وهي تتوجع..
شافتها سدرة قالت:هي خلاص نوضوا نوضوا..
نسرين ابتسمت وقالت:باهي..
نوضتها فايزه..وقالوا الزوز:نشوفوك عويشه..
ابتسمت بتعب..
مشوا الزوز طلعوا..
عائشه شبحت لسدرة وقالت:بتروحي..
سدرة:اكيد..
عائشه:باهي تعالي غدوة..
ابتسمت سدرة وقالت:ان شاء الله..انتي ارقدي توا..
غمضت عائشة عيونها..
وسدرة طلقت يدها بالشويه..
بعدين مشت طلعت بهدوء ..
سكرت الباب..
ومشت وهي مبتسمه بحزن..
الموقف اللي صار كان محنه جايبه منحه..
بش وجعتها عائشة هلبه..
حستها آيست من المهدي تماما..
استنتجت الشي هدا من كلامه..
"مافي شي يستاهل نخسر ع خاطره وخية دنيتي."
نزلت من المصعد لتحت..
وطلعت منه ووصلت في صالة الانتظار..
شافت الفاندي وهو شافها ناض وجاها طول..
سدرة:بنروح..
الفاندي:تمام..
ومشوا هو وياها طلعوا من المستشفى وتوجهوا لسياراتهم..
وهما ماشيين المهدي كان جاي..
شافهم غير عيونه عنهم طول..
وهما الزوز كانوا يهدرزوا ومش مركزين عليه..
وين جي جنبهم سمع سدرة تقول..
"بننصبها اني وياك ع لبسك الخفيف شتي راهو شتي"
رد عليها هو وقال..
"حاضر ياودي حاضر تو نشروا الثقيل ونلبسوه"
المهدي كان يمشي وهو حاس روحه مخنوق..
لدرجة حط يده ع رقبته شويه بعدين نزلها وين خش في مجمع ناس..
وصل في المصعد خشله بروحه..
ومجرد ماتسكر عليه الباب..
غمض عيونه بقوة وقعد يخبط في بيده ع جبهته اكتر من مرة بعدين نزلها وفتح عيونه..
انفتح الباب...
طلع منه وتوجه لدار عائشه..
خشلها..لقاها راقده..مشي لحمام دارها خشله...
فتح الشيشمه وبدي يغسل في وجهه اكثر من مرة..
بعدين حط راسه تحت الشيشمه وقعدت الميه تصب عليه..
كان يبي يبرد شويه...
في عز الشتي والعه فيه نار عذاب العشق..
خلت فصول السنه كلها واحد عنده..
حول من تحت الشيشمه..
ومشي طلع من الحمام وجي قعمز حدا عائشه والميه تنزل عليه من راسه..
قعد يشوفلها بألم وفي داخله قال..
"ياريته ماكان هداكا اليوم"
☘☘☘☘☘☘
وعلمت اهل المهدي وعائشه باللي صار لها ..
وبجياب نسرين.
ومشوا جري لمستشفى الجلاء....
خشوا في الاول ع عائشه وشافوها..
وامها ياما بكت وين شافت حالة بنتها...
ومن جهة تانيه..
كان حامد راجل نسرين جايب امه لنسرين..
ام حامد؛مش قبل بتجيبي في المصحه اللي جبتي فيها محمد وفرح!؟
نسرين؛قدر الله وجبت هني ياعمتي..
ام حامد بإزدراء:واك نكرهم المستشفيات العامه ونكره زحمتهم ودوشتهم..
تنهدت نسرين وقعدت ساكته..
حامد:تطلعي غدوة ولا؟
نسرين:اكيد..
حامد:خلاص غدوة من الصبح نكون عندك..هيا يام..
ام حامد ماصدقت وقالت؛هيا هيا...بالسلامه توا..
نسرين وهي تشوفلهم ببرود وهما ماشيين:بالسلامه...
بعد ماطلعوا بكم دقيقة خشوا عليها امها واختها. طبست عليها امها وسلمت وهي تقول:مبروك المزيوده..
نسرين:الله يبارك فيك يام..
وخرت عنها وقالت؛خيرك جبتي هني!؟
نسرين:وخيره هني يام مستشفى كويسه وامكانياتهم ممتازة..
خديجه طبست وهي تسلم عليها وقالت:خدمات المصحه اللي تجيبي فيها قبل خير..خير من هالزحمه والدوشه..
نسرين:المهم جبت وحالي باهي وحال بنيتي باهي..شوفوها كيف تهبل...
امها واختها شافوا البنيه ابتسموا وقالوا باصوات متقطعه:ماشاء الله..ربي يبارك..
خديجه؛ها قررتي شن بتسميها..
نسرين ابتسمت ابتسامه عريضه وقالت؛سدرة المنتهى...
🌻🌻🌻🌻🌻🌻
"كان تشوفوها كيف صغيرة فلوسه ياروحي"
طوبى:ياروحي مفروض مازال تقعد في بطن امها..
سدرة:ايه ياعمري..قدر الله وماشاء فعل..
غرفه:باهي توا خلاص شكر الله سعيك وشدي رجلك..
سدرة بعدم فهم:شن قصدك!؟
غرفه؛قصدي ماتخليش اللي صار تفكري ان في حاجة رجعت زي قبل لا حبيبتي كله قاعد زي ماهو وهذا موقف وحيعدي ع حاله وينتسى بكل شي فيه..
طوبى بضيق:علاش تقولي هكي مرات ربي دار هكي بش يرد كل شي زي ماكان ..
ابتسمت سدرة وهي تشوف لطوبى..
غرفه؛بلا عبط زايد..اللي داراته هديكا في اختك مايخلنيش يصدق انها ممكن تتغير..صدقيني اللي زيها مايتغيروش بكل..
طوبى:عندك سوء ظن هلبه ياغرفه..
غرفه:تمام اني قلبي اسود ونيتي سودا باهي...لكن سيوركم تولوا لكلامي..
وفتحت شيتاتها وبدت تقرا..
طوبى شبحت لسدرة حستها من ملامح وجهها انها اقتنعت بكلام غرفه..
تنهدت طوبى وقعدت ساكته وولت تقرا حتى هي..
🌻🌻🌻🌻🌻🌻
هديكا الليله..
بات المهدي في السيارة وكان بادي عليه اعراض البردة..
كحه..وزكمه..وصدره يوجع فيه وراسه مصدع..
ماباش يعدل ع روحه...حس ان اللي هو فيه نفسيا اصعب من البردة..وتمنى لو كان اللي يحس بيه زيه زي البردة اعراضها يعيشها كم يوم وتمشي..
ماقدرش يرقد وهو يفكر..
يفكر في عائشه...
في سلطانة قلبه اللي باين عليها حتميل لغيره وتنساه..
كان قلبه مرعوب من الحاجه هادي..
ان سدرة قلبها يطلعه ويدخل غيره في مكانه...
نقم ع سدرة..اللي زاد تأكد انه لاليه قيمه ولامكان عندها..
ويرجع ينقم ع روحه لأنه هو اللي وصلها لهني..
الغلطه اللي ارتكبها قبل سبعه سنين دفعاته الثمن غالي..
غالي هلبه...
وياريت الصدمات اللي خداها قلبها وقفت لعند هني..
بل زادتها عائشه صدمة تانيه وقويه..
ليه هو ..وامه..وامها...
☘المهدي؛بنمشي نسجل البنت مازال مافكرتيش في اسم..
عتيقه وهي مبتسمه:قبل نحسابوه وليد كيف ماقالت الدكتورة وحتى اختارناله الاسم لكن ربي يبي شي تاني..
عائشه:صح..شبحتله وقالت...اخترته من امس الاسم..
المهدي قعد يشبحلها يراجي فيها تقوله..
شويه قعد يكح..
وكانت الكحه قويه..
مغليه:برا عاين ياولد خيرك هكي!؟
المهدي:غير باهي يام مش وقته توا هي قولي الاسم خل بنمشي..
تجمعوا الدموع في عيون عائشه بعدين قالت..
"سدرة المنتهى"
شبحلها بصدمه..
وامها ومغليه انطمسوا مرة وحده..
المهدي ضيق عيونه وقال:شنو؟
يحساب روحه بدي يهلوس بسدرة لدرجة انها سمع حاجه زي هادي عقله مااستوعبهاش..
لكن عائشه اكدتله انه مازال بعقله وقالت:سدرة المنتهى..
قعد يشبحلها وهو ساكت..
وامها ومغليه يشبحولها وهما مصدومات ع الآخر..
المهدي وقلبه يدق بقوة هز راسه وقال:تمام..السلام عليكم..
ومشي طلع بسرعه خاف عائشه تغير رايها.
وهي لاحظت هالشي..
مغليه ناضت وقالت:خل بنقوله يروح بيا العشيه نجيك..بالسلامه .
عائشه:بالسلامه..
وطلعت مغليه بسرعه حتى هي ورا ولدها..
بعد ماطلعت مغليه..
عتيقه قالت:خيرك دعوتك انتي هبلتي!؟؟
شبحتلها عائشه وقعدت ساكته..
عتيقه:تكلمي ماتجلطنيش شن اللي درته هدا!؟
عائشه:الصح..
عتيقه:كيف صح ياحمارة كيف!؟ تي مفروض انتي تكرهيه فيها مفروض بعد ولت لغيره تخليه يمسحها مسح من حياتها مش تزيدي تحطيها بيناتكم..
عائشه:نسألك بالله..قداش ليا سنه نحارب حرب بش نكسبه وبش نخليه يكرهها ويحبني..قداش حاجه درتها اني نفسي مش مصدقه روحي اني درتها بش نخليه ليا اني ونبعدها عن طريقي..
طعنت صاحبة عمري..واخت دنيتي ع خاطر راجلي مش شايفني ولاعمره حيشوفني...
جبتله احلا ولاد..قايماته ع راسي..ندور كان في راحته..ومع هذا كله مش شايفني يام..
مش شايف غيرها...سدرة مش قاعده في قلبه بس..
حتى في عيونه نشوف فيها..
في نبرة صوته..
في كلامه اللي يقول فيه..
في النفس اللي يتنفسه...
اني اكثر وحده شاهده ع حبهم..ومفروض فهمت كويس ان المهدي عمره ماحيحب في حياته غير سدرة..
سدرة اللي بعتها بالرخيص وهي شرتني بالغالي..
سدرة اللي ع قد مادرت فيها ولافكرت تأذيني.
خديت الراجل اللي تحبه ولامرة حسستتني ان عينها قاعده منه ولامازال دور فيه..
احترمتني صاحبتي وقدرتني فالوقت اللي فيه راجلي كان يهين فيا في كل وقت..
وختمها باللي داره في عرس ولدك..لاقدرني ولاقدر اني ام صغاره...
تعرفي يام..سدرة اختارت تتزوج ع خاطري اني..
انخطبت لواحد ماتبيشي لسبب واحد بش تخلب المهدي يكرهها ويلهى بيا وبصغاره..
اني اللي نعرف سدرة كويس يام..لكن هي ماتعرفش انها باللي زاد تعلق بيها اكثر من قبل..
وهملني وفاتني ومعاش يندري عليا كيف عايشه...
اني يام نهار طحت وشفت الموت وين عيطت وناديت مالقيتش غيرها يام سدرة...
تصوري يام تصوري..نقوللها سامحيني..تقولي على شني!؟
تصوري بش اني شن حسيت وقتها جنب الموت اللي نحسابه جاني وقتها!..
وفوقها لحقتني لهني..وعطتني من دمها..
وقعدت معاي لين طمنت عليا..
تصوري اني فضلت نخسر صاحبه زي هادي ع خاطر راجل..
مش شايفني!؟
كانت عائشه تحكي وهي متكيه ودموعها ينهمروا انهمار..
بنبرة الم وندم وبكاء..
خلت امها تبكي معاها...
وبكت عليها وعلى حظها...
عتيقه وهي تبكي:باهي انتي توا شن تبي!؟ الطلاق وعارفتيه مستحيل..
ابتسمت تهكما من بين دموعها وهي تقول:عارفه..وحتى لو مش مستحيل..اني مش حنقدر..مش بس ع خاطر صغاري..
اني بروحي..للأسف..مش قادرة نعيش من غيره..
كانت حتنهار عتيقه بالبكي بس تمالكت نفسها وشدت روحها وقعدت تبكي بصمت وفي داخلها تقول..
"الله لايسامح بوك وخوتك يابنتي"
☘☘☘☘☘☘
في نفس الوقت..
شدت مغليه ولدها المهدي في السيارة وهي تقول..
مغليه:ان شاء الله بتمشي سدرة حق انت!؟
المهدي شغل السيارة وقال:شن ماسمعتيهاش شن قالت..
مغليه:وانت ماصدقت عاد! ترا ياسر من العار والشهدرة وسمي البنيه اي اسم تاني..
المهدي قعد ساكت ماباش يناقش..
مغليه:في هلبه اسماء مقنينها احلى منه..وبعدين مش حلوة تسمي انت واختك نفس الاسم..
المهدي وهو متفاجئ:قصدك نسرين بتسميها سدرة المنتهى!؟
مغليه:سمتها وفات...هدا علاش نقولك تغير الاسم..
ابتسم المهدي..
مغليه:اهو اني نقترح عليك..سميها لميس..ولارفيف..ولانقولك سميها نور ولاغزل..شوف حتى نرمين قنين كانوا يخلوا عادي سميها نرمين..
وقعدت مغليه تهدرز طول الطريق..
والمهدي اللي يخش في ودنه اليمين يطلع من وذنه اليسار .
لين وصل بيها للحوش..
مغليه:سميها رفيف سلم ولدي..
المهدي قعد يهز في راسه ويقول:حاضر..
نزلت وهي تقول؛سلم ولدي اللي يسمع في كلام امه..
ومشت خشت للحوش..
هو ضحك بعدين شبح جهة حوش الواعر..
اختفت ضحكته وتنهد من قلبه وطلع طول بالسيارة...
🍀🍀🍀🍀🍀🍀
...بعد مرور خمسة أيام...
"تنشد عليك هلبه يا سدرة وكل يوم تقول خيرها معاش جت"
سدرة وهي مضايقه؛باهي نطلع من المدرسه ونمشيلها..
"تمام نتلاقوا غادي"
سدرة:باهي..سلام..
"سلام"
سكرت سدرة من نسرين واتصلت بالفاندي بش تخبره..
وطبعا هو ماعارضش نهائي..
بعدين خدت اذن بوها..وعطاها الإذن...
وبعد ماطلعت من الدوام مشت روحت بطوبى من المدرسه
حطتها في الحوش..ومشت طول للمستشفى...
تلاقت غادي مع فايزة ونسرين..
وهما التلاته يمشوا في الممر..
سدرة:اني نبي نفهم نافس شن مطلعك من الحوش!؟
نسرين:فكيني من تخاريف حناي والنافس ماتعسفش ع العتبه ومش عارفه شنو..
سدرة؛مش ع هكي يابقرة ع خاطر صحتك..
فايزة؛من يومها بليده وماتعدلش ماتحرقيش دمك عليها..
ضحكت نسرين وقعدت ساكته..
وسدرة تحرك في راسها يمين ويسار..
وصلوا لحجرة عائشه..
لقوها مردودة..
سمعوا صوت المهدي يقول..
"وهادي سدرة المنتهى المهدي شنيبه"
جمدت سدرة في مكانها..
وفايزة ونسرين شبحولها..عارفين طبعا بس ماقدروش يقولولها..
"ياروحي مازال صغيرة هلبه"
"تو تكبر ماتخافيش عليها"
قدمت نسرين ودقت الباب..
"تفضل"
نسرين؛هي تعالوا..
سدرة بهمس:هو يطلع قبل..
وبعدت عن الباب..
نسرين تنهدت وخشت ووراها فايزة..
وسدرة مشت بعدت لأخر الممر..
وين خشوا لقوا عائشه شادة كاميرا في يدها..
نسرين؛كيف حالكم..
المهدي وعائشه:الحمد لله..
عائشه:صورلي سدرة..
ابتسموا الزوز مجامله..
بعدين قالت نسرين؛مهدي احمد لوطا انزل هدرز عليه..
عائشه شبحتلها ولاحظت انها توزع فيه..
هو اساسا كان حيطلع مش حيقعد وفايزة معاهم..
حس بشي من الاحراج وقال؛تمام..تبوا حاجه اتصلوا..
ومشي طول طلع...
قعد يمشي لين طلع من الممر..
طلعت سدرة من ورا الحيط لقاته ماشي..
مسحت دموعها زين..
بعدين مشت بسرعه لحجرة عائشه..
وصلت فيها خدت نفس..ورسمت ع وجهها ابتسامه
بعدين خشت ..
سدرة؛عويشه..
عائشه بإبتسامه؛هدا غير قتلك تعالي من تاني يوم!؟
طبست عليها سدرة وسلمت وهي تقول:والله انشغلت بهلبه حاجات سامحيني..
بعدت عنها وقالت:شن حالك..
عائشه:الحمد لله..
سدرة:شن حال القنوشه..
عائشه ابتسمت وقالت:سميتها سدرة..
نزلوا طول دموع سدرة وقالت بصدمه؛علاش!؟ انتي هبله ولاحمارة كيف ديري هكي!؟
عائشة وهي مبتسمه وعيونها معبيات دموع؛كان مش منك انتي من بعد ربي رانا متنا الزوز..
نسرين وفايزة تأثروا..
سدرة ودموعها ينزلوا:قاعده مش مستوعبه!؟ اني فرحت هلبه هلبه لما سمت عليا نسرين..بس انتي صدمتيني هلبه..
عائشة ودموعها نزلوا:تتفكري سدرة لما ولينا اصحاب اني وياك. قبل ليولوا نسرين وفايزة معانا...زمان كنت نقولك ماعنديش نلعب معاهم زيك..وقتها كنتي انتي وفردوس بس..انتي قلتيلي خليني اني اختك وحتى اختي تولي اختك..
حطت سدره يدها ع فمها وقعدت تبكي..
عائشه؛فرحت هلبه وقتها ومعاش بيت نفارقكم بكل..ولفت الدنيا ودار الزمان وجي اليوم اللي داراته فارقتك بيه وبدلت خوة دنيتنا...براجل.
نسرين برغم انها مارضتش في خوها..بس.كلام عائشه كان صح ماتقدرش تعترض عليه..
عائشه؛اللي درته فيك ماديراش عدوة لعدوتها..بس حبه عماني بمعنى الكلمه ياسدرة..
سدرة وهي تبكي:باهي خلاص اني معاش نبي نسمع شي خلاص..اني نسيت كل شي اصلا ورميته ورا ظهري وربي عوضني احلا عوض..الفاندي يابنات نساني كل شي والله..حسيت روحي معاه بنادمه جديده..
نسرين ؛حبتيه!؟
سدرة حست صدرها ضاق هلبه..
بس فايزة انقذتها لما قالت؛محلها عاد..عجبها وخش خاطرها وبدت تتعود عليه واكيد مع الايام حتحبه..
شبحت سدرة لفايزة وابتسمت بعدين مررت نظرها عليهم وقالت؛فاتحتي بعد العيد الكبير..
التلاته اتفاجئوا ع الاخر.
فايزة؛حيي!؟ وماتقولليش..
سدرة بضحكه:والله امس بس حددوا..وطبعا بندير بيان بس اجلته..شبحت لعائشه وقالت:لين عويشه تشد صحتها.
عائشه:اني تبيلي شهرين تانيات ياسدرة..
سدرة بإبتسامه:ماناش هاربين اني وياه...
ضحكوا..
عائشه بإبتسامه؛ربي يكمل ع خير..
كلهم بأصوات متقطعه قالوا:آمين..
عائشه:عندك صورة ليه نبي نشوفه كويس.
سدرة؛ايه عندي..فتحتلها ع صورته في التليفون وعطاته لعائشه..
وقتها ماكانش في شاشات كبار زي توا..وصورة واضحه ..
لكن تأدي الغرض..
عائشه:عيونه ملونه..
طبسوا نسرين وفايزة يشوفوا معاها..
فايزة؛ايه اسمراني وعيونه ملونه...لكن مشيته مش عاديه..
ضربت سدرة فايزة ..
ضحكوا..
عائشه بضحكه؛تلامحته كذا مرة لكن في السيارة..
نسرين شفته مرة وحده؛عجبتني شخصيته يبان ولد بلاد..
ابتسمت سدرة..
عائشه مدت التليفون لعائشه وقالت؛ربي يهنيكم..
خدت التليفون سدرة وقالت:امين..تسلمي..
فايزة؛لكن يقعد زوزي هو التوب في كل شي..
سدرة:عينك وعين عينك..الفاندي بروحه ياماما زعيم في شارعه ع فكره..
فايزة بضحكه:باين من مشيته..
ضحكوا البنات..
وسدرة شحت وشاح فايزة..
زادوا ضحكوا..وعائشه تشد في مكان العمليه وهي تضحك..
فايزة وهي تساوي في الوشاح؛بري ملحي انتي والشاميه متاعك..
سدرة وهي ترقص في حواجبها؛وهو في احلا من الشاميه..
قعدوا يضحكوا..
وكملوا فايزة وسدرة مناقرة وخشت معاهم نسرين ع الخط..
وعائشه تسمع فيهم وتضحك وخلاص..
ايقنت عائشه تمام اليقين من بعد هاللمة الحلوة..
ان مافي شي يعوض عن الصحبه الطيبه الصادقه..اللي ندر وجودها فهالوقت..
صاحبه تكون اكثر من الاخت معاك..
ع الحلوة والمرة..
ومهما صار بينكم...وقت الشدة توقفوا لبعض وتنسوا كل شي..
ايقنت عائشة انها لازم تحافظ عليهم بكل مااوتيت من قوة وتحارب ع خاطرهم هما..
لأنها بيهم ومعاهم ديما حتكون كاسبه...
🌻🌻🌻🌻🌻🌻
في كلية الطب..
جامعة الفاتح....
في المدرج كانوا الطلبه مقعمزين يستنوا في الدكتور يخش ويعطيهم المحاضرة المسائيه..
وكالعاده اميمه كانت تستغل الوقت في القرايه..
بس في من كان مشغول بالحديث عنها..
داليا:شاطرة صح لامش صافيه..
:شن قصدك!؟
داليا؛هادي تكون بنت شارع عمر وجارتهم قالي مرة ان فيها الطقه..
:مش باين عليها بكل..
داليا:باهي خل نقوللكم مرة شن دارت..كنا مقعمزين اني وعمر قعدت مقعمزة مقابلاته تشبحله وتتبسم زي الهبله لدرجة انه تكنطى منها وحتى اني درهتلي كبدي...المهم قالي نوضي وغيرنا مكانا..
:لهالدرجه!
داليا:مش ملاحظين ان عندها تصرفات تبان فيهم مدقوقه..وهبله..
وحده من صاحباتها:زي لقطه لما طاحت يومها..
:بس خسارة كان كلامكم حق البنت دماغها مليح..
داليا:شن الفايده كان ماتعرفش تخلص بقوة من طين وختشه ياناري ع المرضى اللي بيطيحوا في ايديها كان ولت دكتورة..يخشوا للمستشفى ع رجليهم يطلعوا في توابيت..
ضحكوا صحباتها..
والبنات اللي معاهم قعدوا يشبحوا لأميمه بشفقه..
وفي من كان يسمع في حديثهم ويشوفلها وهو مش مصدق من كلامهم حرف..
اسامه..
بس الشي الوحيد اللي حرق دمه هو كلام عمر عليها..
واستنتج من كلام داليا ان عمر يتسلى بأميمه مافيش تفسير اللي سمعه وشافه غير هكي..
خش الدكتور..
وعطاهم المحاضرة..
اللي استمرت ساعتين ونصف..
وبعد تمت..طلع...وطلعوا وراه الطلبه..
واميمه وهي طالعه كان ماشي وراها اسامه..
لين طلعوا برا المبنى بكل..
سرع خطواته وجي قدامها وقال؛معليشي ناخد من وقتك شويه..
لما جي قدامها فجأة وكلمها انفجعت..
فنصت بعيونها الصغار الحلوات بان لونهم اشهب...
هو استغرب اللون هلبه..بس كان حلو بالمرة..
اسامه؛اسف فجعتك .
اميمه ارتخوا ملامح وجهها وقالت بجديه وهي تحاول تغلب ارتباكها؛مش مشكله تفضل..
اسامه بإبتسامه؛خيرك هكي واخديتها جديات زميلك اني راهو خليك عاديه..
عقدت حواجبها وقالت؛كيف عاديه..
☘وفي نفس اللحظه..
كان عمر جاي لداليا وقف عليها وقعد يهدرز هو وياها..
وفي نفس الوقت قعد يدور بعيونه في اميمه لين شافها واقفه مع اسامه..
عقد حواجبه وقال تلقائيا؛هادي شن دير!؟
التفتت داليا وشافتلهم بعدين ضحكت وقالت؛بنت جيرانكم الهبله حصلت معجب شكلها..
عمر لما سمع داليا شن قالت..حس بشي قاعد يحرق فيه من داخل..
🌻اسامه:قصدي عادي انتي تهدرزي ع شباب ولا..
اميمه توترت وعصبت وقالت :انت شن قصدك..قصدك اني متاع ولاد!؟
اسامه بضحكه:لاياعبيطه مش قصدي.
قاطعاته بنرفزة وقالت؛ماتقولش عبيطه..احترم نفسك..
اسامه لاحظت انها توترت هلبه وتنرفزت بزياده..
فهم من تصرفاتها هادم انها ياتتعامل مع عمر عادي لأنه جارهم وواخده عليه..او انها وهدا اللي مايبيشي تكون تحبه وهو يضحك عليها.
اسامه بإبتسامه؛باهي اني اسف اسف خلاص سامحيني معاش نزعجك مرة تانيه..
ومشي وخلاها وهو مضايق ع الآخر..
اما هي مررت نظرها ع المكان بربكه لين جوا ع عمر..
شافاته يهدرز مع داليا ويضحك..
اميمه قالت بخوف؛زعمه شافني!؟
عمر قعد يلهي في روحه فالهدرزة مع داليا غصب عنه..
كان يبي يشبح لأميمه بس عارف ان نظراته ليها حيفضحوه ويبان منه شي يبي يدرقه بأي شي..
واميمه مسكينه قلبها بدي يفر من خوف انه يكون شافها وفهمها غلط..ومرات ياخد عنها فكرة مش حلوة..
جي في بالها تمشيله توضحله..بس ماقدرتش ديرها..
الابعد مااتصلت باللي تحبها وقلبها عليها..
بنية عمها..اللي قالتلها بري طول وضحيله خير مايفهمك غلط..
سكرت منها طول ومشتلهم..
وين وصلت فيهم قالت بشي من الارتباك؛أ...معليشي..
شبحولها الزوز..
قلب عمر بدي يدق بقوة ..
وداليا شبحتلها من فوق لتحت..
اميمه شبحت لعمر وقالت؛ممكن شويه عمر..
هو مرر نظره قدامه بعدين قال؛شويه داليا..
مشي وهي مشت وراه..
وداليا تشوفلهم وهي رافعه حاجبها..
بعدوا شويه ووقفوا ع بعض..
عمر؛نعم..
حكت اميمه جبهتها وقالت بارتباك:عمر...اني..من بكري يعني لو شفتني واقفه ع واحد..هو جاني مش اني..وبعدين هو زميل عادي بس..
عمر:ايه شفتك..بس عادي يعني طبيعي زملائك وبتكلميهم..
عقدت حواجبها بإستغراب وقالت: عندك عادي يعني..
عمر"لامش عادي مش عادي بكل" ضحك بتهكم غرورا وقال:وشن فيها!؟
هي حست بشعور ضايقها هلبه بس اخفاته بإبتسامه مزيفه وقالت؛تمام..احمم..تمام..
عمر:معاش تعقدي روحك خلي روحك عاديه..
اميمه بلعت ريقها وهي مازال محتفظه بنفس الابتسامه:ان شاء الله..
فجأة رن تليفونها شافت المتصل قالت:يوسف..شافتله وقالت..سلام..ولفت بتمشي وهو يشوفلها بضيق..
فيسع بدل نظرته لما التفتت وقالت بإبتسامتها الحلوة:ايه حقه..كل عام وانت بخير..
عمر قعد ساكت شويه بعدين قال:كل سنه وانتي طيبه..
هي ابتسمت ابتسامه عمر لاحظ انها فيها مسحة خيبه..
ولون عيونها هني بان ازرق زي البحر..
بعدين لفت ومشت ...
قعد يشوفلها وهو حاس بحاجه تقلعت من جوفه ومشت معاها..
بعد مااختفت ومشت..
التفت بيمشي لصاحبته..شاف واحد يناشب فيها..
تخيله اسامه اللي كان يكلم في اميمه..
مشاله طول وشده من قفاه وجبده وطاح فيه ضرب..
داليا انفجعت اول مرة تشوف عمر فهالحاله..
قبل حتى لما يناشب فيها حد ويشوفه يكتفي بالكلام بس..
هادي اول مرة يتصرف هكي ويضرب..
والعركه فيسع انحزت...وعمر قال لداليا تروح وهو وبعدين
ركب سيارته وطلع برا الجامعه....
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
وجي عيد الاضحى..
اللي حضراته عائشه وهي في المستشفى..
والمهدي وامها مافارقوهاش بكل..
كان المهدي يحاول يخلص ضميره اتجاهها..
وهي حاسه بهالشي برغم انه واجعها بس خلاص تعودت عليه..
لكن قلب امها قعد محروق عليها...
☘وصاحبتها فايزة فات عليها هالعيد وهي تبلع وتغص من حمواتها وحتى سلافها اللي كانوا يستغلوا في فرصة غياب احمد ويقعدوا يلقحوا عليها..
وهي ساكته ولاكلمه ومتحمله في روحها وخلاص..
ونفس الشي داراته وين مشت عيدت ع امها في خوها..
كانت تسمع في الكلام حتى من امها اللي مش راضيه عن تفضيل عيلة الواعر ع خوتها لانها لما تجي تقعد ساعة وتروح..
اما في حوش الواعر كانت تبات حتى البيتان وهدا كان تالت يوم العيد..مر احلى يوم عليهم وهما يوتوا لفاتحة سدرة اللي حتكون خامس يوم العيد...
الفاتحه اللي يعلم بيها شارع القهوة كله..
ماعدا..المهدي...
🌻يوم الفاتحه..
#سدرة_المهدي_شنيبه..
#طوبى
....يتبع.....
حينزل تابع بسيط الساعه 1:00بإذن الله
