(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الرابع_والثلاثين" بداية قصه2" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ ولبست غرفه دبلة عبد الرؤوف.. وكانت عايشه حالة من الفرح يصعب وصفها.. فرحة ماليهاش مثيل ولاليها منغص.. واخيرا ارتبطت رسمي بشخص فيه كل المواصفات اللي تتمناها..وخلاص حتتزوج يعني مش حيفوتها قطار الزواج.. ونبيله تلبس فيها التعليقه.. كانت تتفرج عليها اميمه وهي مبتسمه وتراجي فاليوم اللي تكون فيه هي مكان غرفه ويلبسوها دبله عمر ويفرح قلبها ويرتاح.. قلبها اللي قعد سنين ملهوف ع رجعة حبيبه والارتباط بيه.. برغم ان اميمه من عمر غرفه بس ماكانش تفكيره محصور في فكرة الزواج.. كل اللي تبيه ان الله سبحانه وتعالى يجمعها بحبيبها في الحلال ويكملوا العمر مع بعض.. بس عيون سدرة وهما يشوفوا لفرحة غرفه كان فيهم شعور الغبطه..تمنت لو كانت في مكانها وعاشت فرحة الارتباط بشخص تتمناه وتبيه من قلبها.. بس ربي مش كاتب..وراح عمرها وهي قاعده تستنى في معجزة تصير يوم من الايام.. بدوا يعيشوا الفرحه مع غرفه ويغنوا ويصفقوا ويرقصوا.. ونبيله تتفرج ع خطيبه خوها وهي سعيده بيها ع الآخر.. ☘اما خوها.. فكان مع الرجاله في حوش الحاج الواعر.. هو من داخل كان فرحان...لابل حتى من برا.. فرحان انه ولى نسيب العيله وثبت جذوره اكثر في شارع القهوة اللي حب السكنه فيه هلبه وحس نفسه موجوده وسط عيلة كبيره مش بس جيران.. الفضانيه حضروها اعيان الشارع محمد شنيبه الصيد وزوز تانيين يعتبروا من اقدم سكان الشارع والدكتور اياد كذلك.. ومعاهم المهدي.. اللي كانوا عيونه ع علي الواعر اللي كان مش متقبله ورافضه لسدره..يشوف فيه كيف فرحان بعبد الرؤوف وعيلته.. واللي خلاه محتار فيه هو رفضه لعمر حتى هو مش عارف علاش هالراجل مش مقتنع بيهم!... ☘☘☘☘☘ "يعطوا للناس اللي ماعرفوهم الا اول امس وحني ماكرين فينا مش عارفه علاش" خديجه؛يام هي نصيبات في الأخر.. مغليه:وخوك مسكين اللي قداش ليه يجري في جرتهم هالشيباني الاحرف واقفه زي عظم بوغصاص مش عارفه شن شايف عليه ولاشن ناقصه وليدي.. نجاة تسمع في النقاش بصمت بعدين قالت:هو اللي الموضوع كله واقف ع الشيباني؟ خديجه شبحتلها بكبر وقالت؛ايه.. نجاة؛اني في بالي حاجه لو تقولوا عليها لسلفي عمر يديرها ممكن يحلها معاه.. مغليه بإنتباه:شن هي؟ نجاة؛لازم يدور ورا معارفه صحابه ناس يعزوا عليه ويتحشم منهم..يمشولهم هو وعمي ويكلموهم بش يخشوا واسطه والاحسن هكي يكونوا هلبه يش يعني يكونوا جاهه مايقدرش يردهم.. مغليه قعدت تفكر في كلام نجاه.. وخديجه شبحتلها من فوق لتحت بعدين شبحت لأمها وقالت:اظني قالت حاجه باهيه.. شبحتلها نجاه بحده.. ناضت مغليه وقالت؛خل نمشي نقول لبوك.. ومشت طلعت من حداهم.. نجاة بإبتسامه؛تبي تفرح بيه بسرعه.. خديجه؛وانتي؟ شبحتلها نجاة بإستغراب.. خديجه؛ماعندكش مخططات مستقبليه يعني..ورفعت حاجبها.. خدت نفس وجاوبت بثقه؛اكيد عندي في مجال شغلي وبإذن الله حنصمم ونفد هلبه مشاريع ومش حنكون بحاجه حد.. خديجه؛شن قصدك؟ نجاة؛خلينا واضحين مع بعض مادامنا بروحنا ديجا..اني هني ع خاطر عمي وبس..ماندور ورا شي تاني..لو نبي شي صدقيني حنكون واضحه وصريحه واني نطلب فيه.. قعدت تشبحلها خديجه بإبتسامه مكر ونظرات شك بعدين قالت؛اممم...حلو..حتى اني قلت هكي..لأن لو في بالك مش حيخليك حد توصيله..كوني ع ثقه..وناضت.. ومشت وطلعت من حداها.. وهي تبع فيها بعيونها بنظرات حاده..بعدين غمضت عيونها وقعدت تحرك في رقبتها يمين ويسار بعدين فتحتهم وحست روحها هدت شويه.. ☘في المربوعه... محمد:والله فكرة مش خاطيه.. عمر:تتوقع دير معاه نتيجه.؟ محمد؛الحاج علي يعز صحابه هلبه لتوا وحني الفضانيه كان يحكي عليهم بتقدير وود..حني نجربوا ونشوفوا.. عمر:قولي لمرت خوي كان صار من موضوعي ليها مني هديه كبيره.. ضحكوا مغليه ومحمد.. ومغليه قالت:إن شاء الله يارب... ☘☘☘☘☘☘ "تفضل ياسيدي هدا رقمها" عبد الرؤوف:مشكورة جدا جدا يامليحه.. نبيله بإبتسامه؛فرحان!؟ ابتسم وقال:الحمد لله..هي تصبحي ع خير توا..ومشي بإتجاه داره.. وهي تشبحله وتضحك بعدين تنهدت وحطت ايديها ورا ظهرها ومشت لدارها وهي تفكر.. ☘في حوش الواعر.. في دار البنات.. غرفه؛ذوقهم حلو.. آلاء:متت ع القفطان اني بالله خويله نقيسه.. غرفه؛قيسي حبيبتي.. خشت طوبى بسفرة العشي وهي تقول:وسع وسع اهو جي عشانا ماشاء الله عليه.. اريج كانت تمسح في المكياج لما شافت الكسكسي والعصبان لوحت اللي فيدها وجت جري تاكل ووجهها قعد نص بنص.. اميمه:لااني خلاص كليت بكري.. طوبى؛انتي ماكلتك زي العصافير اميمه تاكل شويه شويه وتشبع.. اريج بضحكه؛لمصلحه عمر توفر عليه الدنيا غاليه.. ضحكوا.. وبدوا ياكلوا.. وغرفه كانت تاكل وهي فرحانه.. ركزت طوبى ع الاء كيف تاكل في العصبان بالكاشيك.. طوبى:هكي يتاكل العصبان هكي هاه وخدت طرف وقعدت تاكل فيه.. اريج:مافيه بنه كان هكي. الاء قاعده تاكل بطريقتها ومطنشتهم.. وهما يشبحولها وشادين ضحكتهم.. اميمه؛ترا وسعوا سهفتوني.. وسعت اريج وجت جنبها اميمه وقعدت تاكل.. شويه رن تليفون غرفه.. كلهم شبحوله.. غرفه التفتت وخداته من ع السرير.. كان رقم غريب بس الكاشف طلع الاسم.. (عبد الرؤوف بن موسى) غرفه:هو هو يابنات هو.. الاء:جري لدار المعيشه.. ناضت وهي مبتسمه ومشت طلعت من حداهم.. طوبى:ربي يهنيها يارب.. هما بأصوات متقطعه:آمين.. ☘في دار المعيشه.. غرفه؛آلو... هو لما سمع صوتها ع التليفون جي الماضي كله بين عيونه..كيف كان يكلم فيها بحب ولهفه وهي كانت تحكي معاه بالسيف من فوق نفسها.. "آلو" ☘عبد الرؤوف؛كيف تردي ع رقم ماتعرفيشي.. "دايرة كاشف ارقام" عبد الرؤوف؛اووو طلعتي خطيره.. ضحكت وقالت.. "شن جو" عبد الرؤوف:بيك حلو يافله عجبك كل شي ولا؟ "ايه بصراحه كله حلو" هو قال:ذوقي يامياسه.. "مياسه!؟" هوضحك وقال:ايه مياسه الاسم هدا يمشي معاك اكثر.. "علاش شن معناه" هو قال؛معناها يابنت الواعر..المتمايلة في مشيتها المتبختره..يعني بالليبي جكتورة. ضحكت وقالت.. "قصدك هكي نمشي اني" هو:يس..المهم مبارك علينا حني الزوز.. "الله يبارك فيك" هو قال:وصلولوكم ع شن اتفقنا.. "ايه العرس في الربيع" هو قال:شهر 3ياقنينه شهر 3عندكم تلاته شهور بالوسع ابدوا وتوا رواحكم اكيد وصلوك فلوسك.. "اي وصلوني" رشف وقال؛باهي يافله توا اني بنبعتلك صور لأثات وانتي اختاري ضروري في ظرف اسبوع بش نبعت عليهم يجوا من برا.. "تمام" رفع عيونه فوق وقعد يفكر وهو يقول:امم..امم..شن تاني شن تاني..امم..ايه شهر العسل ياعسل..وين خاطرك يكون اختاري بين الاقواس.. تركيا..قبرص..شرم الشيخ في مصر.. "خاطري في تركيا هلبه" هو قال:تمام تركيا..اهم شي جوازك مش طايح.. "لالامش طايح جديد" عبد الرؤوف:كويس كويس..تنهد وقال..ايه..خبرينا عنك يافله شن درتي في حياتك لتوا هل سبق وكان عندك ماضي ولالا هدرزي.. "ماضي شني ماعنديش بكل واكيد سألت وعارف" هو قال؛صح بس عندك في جو الاختلاط والزماله واني نكره جد اصله الجو هدا تبي تكملي ماجستير انسيه.. "حاضر" قاللها؛باهي توا بتقنعيني انك ماحبتيش قبل في حياتك.. "نحس الدوة هادي مالهاش لزوم صح مش مهمه" هو قال؛لا ياعيوني مهمه نبي نعرف قلب المراة اللي بناخدها بكر ولا في من سكن فيه قبلي.. وبدي المبروك يلعب بأعصابها ويخلي فيها تتوتر وتخاف.. عبد الرؤوف؛وين رحتي.. "معاك..بس يعني الماضي مانبيكش تسألني عنه ولااني حنسألك عن ماضيك." عبد الرؤوف؛ماتسأليش لكن اني نقولك..زمان هلبه كبدت في وحده وانخدعت فيها..وجهها كان زي الملايكه لكن داخليتها شيطان رجيم..طلعت حقيرة حقارة نذله نذاله سافله سفاله.. واطيه واطيه للمليون.. "شن دراتلك هادي" هو سكت شويه وقال:مانبيش ندوي بس ساد ماقلت عليها هالتافهه.. "اهو قتلك بلاش منها الدوة في البعض مش حلو اول مكالمه بينك وبيني تكون هكي..الحق حتى فرحتي طارت" هو نفسه"مازال ماريتي شي" خدي نفس وقال:عندك حق اني اسف..خل نحكوا في حاجه تانيه...ايه قولي العشي انتم درتوه ولامن برا.. ☘ومجرد ماتغير الموضوع تغير الجو معاه وولى حلو وضحك عبد الرؤوف غرفه هلبه.. ولما جو بينهوا المكالمه.. "ااه يعطيك الهني..بس مش عارفه علاش جاني احساس وكأني مهدرزة معاك قبل..وضحكتك سامعه زيها" عبدالرؤوف:ماهو قلنا كيف عرفنا بعضنا قبل.. ضحكت وقالت.. "صح..باهي توا تصبح ع خير" عبد الرؤوف:الله الله في اللبس غدوة زي ماتفاهمنا.. ضحكت وقالت.. "حاضر حاضر.." عبد الرؤوف:هي تصبحي ع الفل يافله.. بضحكه قالت.. "وانت من اهله".. سكر وشبح للتليفون بحده وهز راسه بالوعيد.. ☘☘☘☘☘ "حلو هلبه اقتراح مني هدا" عمر:نجاة مرت طاهر. الجالي عقد حواجبه وقال؛الله يرحمه..تمام جرب وان شاء الله يمشي معاك.. عمر:يارب..المشكله الشيباني معاندي هلبه خايف يزيد يسكر راسه.. الجالي بضحكه؛وقتها عليك وع وحده من الميلشيات يطبوه ويديروله حل.. عمر بضحكه؛لاهو هدا معاش فيها.. ناض وقال؛هي تصبح ع خير.. الجالي؛وانت من اهله.. ومشي عمر طلع من دار خوه.. وهو قام تليفونه وشبح للشاشه شاف الساعه.. بعدين تنهد... وناض للباب سكره... وفي الدور اللي تحت داره..جناح نجاة.. كانوا صغارها راقدين.. وهي سهرانه تفكر... ومافيش غيره قادرة تفكر فيه.. اكثر شي مستغربتله هو هروبه من الحوش وهي مش فيه.. ..علاش يدير هكي!؟... رقدت ع جنبه وقعدت تفكر في كلام خديجه وتلميحاتها.. معقوله تكون لاحظت حاجه..! نجاة؛مستحيل هو مايقعدش واني موجوده شن بتكون شافت!؟ تنهدت وغمضت عيونها وقالت؛ارقدي يانجاة ارقدي خلاص.. ☘وجي اليوم اللي بعده.. بكري بكري..جهزت نفسها وطلعت من الحوش قبله.. وهو فهاليوم كان ناوي يمشي متأخر ويخش ع اجتماع دايره في االشرطه طول.. مرت الساعات.. وهو ناض مع العشره.. دوش..وصلى.. ولبس...بدله لونها قهوي غامق تحتها فانيليه رقبه سودا.. وعليهم بالطو اسود وشال لونه اسود.. حط من عطره..بعدين خدي شنطة اللاب توب وطلع من داره.. ونزل لوطا يجري.. خش للكوجينه.. لقي مغليه تفطر ومعاها الصغار.. الجالي:صباح الخير يام. مغليه؛صباح النور شني اليوم متأخر!. الجالي:ماعندي شي مهم بكري.. مغليه؛نجاة طالعه من الفجر.. حاول يدير روحه عادي ع قد مايقدر وقال:اها..المهم وين المق متاعي.. مغليه:ع المدخل.. مشي طول للمدخل.. لقي مق ستيل مسكر فيه قهوة يراجي فيه.. لبس كندرته وخداه وطلع.. ☘فهالوقت.. كانت طوبى مقعمزة في سيارة سدرة اللي كانت واقفه في الباب تراجي فيها.. وهي تشبح للمهدي كيف يهدرز مع نضال وعمر.. وعقله يفكر فيه هو وسدرة..وذكريات خطرت ع بالها هديكا اللحظه مش عارفه علاش.. شويه لقت الجالي طالع من الحوش... ومشي وقف عليهم.. هدرزوا شويه بعدين مشي لسيارة عمر بيركبها.. شاف طوبى تشبحله.. حب يتبرد عليها ع الصبح.. حط الشنطه داخل وقال؛صباح الخير يابينكا.. شبحوله خوته.. وطوبى شبحت القدام وهي تحاول تشد روحك.. الجالي:شن حالها بالله وشن حال ضراريها قاعد ماكرة فيهم.. خوته يشبحوا لطوبى وهما مبتسمين.. الجالي:ايه حقه قطعتي قيادهم..كان مازال مادرتيهاش الحفله عليا.. شبحتلها بنظرة امتعاض.. حط ايديه الزوز ع صدره وقال:كله كله مني راهو..تمام.. وهي تشوفله بنفس النظره.. عمر ونضال يضحكوا.. والمهدي حاط ايديه ورا ظهره وهو مبتسم.. وخديجه تتفرج عليهم من روشن شقتها وهي تضحك.. ع طلعة سدرة من الحوش.. وين شافها المهدي ساوا ياقة سوريته اللي لابسها تحت البالطو.. الجالي:سدرة صباح الخير.. ابتسمت ورفعت يدها وقالت:صباح النور.. الجالي:شن حال العيله اللي عندكم بالله القطوسه وصغارها.. ضحكت وقاالت؛قريب نطلعوا حني ويخشوا هما.. الجالي ضحك وقال:قلتلها كان قطعتي قيدهم الحفله عليا.. سدرة؛خلاص شورك انت..تو نقولك اول مايبدوا يمشوا.. الجالي؛خلاص تم.. ضحكت سدرة وحياته بيدها وركبت.. طوبى:بارد.. وسدرة تضحك.. الجالي:ان شاء الله ماتروحيش تلقيها واكلتهم بس.. طوبى شبحتله بحده.. وهو يشبح لردة فعلها والضحكه تغلب فيه وخوته يضحكوا.. تحركت سدرة بالسيارة وهي تضحك.. طوبى:شن يضحك فيك بارد هدا.. سدرة بضحكه:انتي شاده ضحكتك بالسيف! طوبى ضحكت وقالت؛مني اني. سدرة:لاجدي.. وقعدوا يضحكوا الزوز.. عند الشباب.. عمر:نموت ونعرف شن السر اللي مخلي سدرة اللي مش طايقه ولا واحد فينا تضحك معاك انت وتهدرز عادي.. رفع كتافه واشر بسبابته فوق بعدين فرد يده وقال:من ربي المحبه من الله.. ومشي بيركب السيارة ونضال يغنيله. كل البنات بتحبك كل البنات حلوين طبعا ياسيدي يابختك وانت اللي زيك مين.. ركب وهو يضحك.. المهدي:تسقد القهوة انت...وانت كان ماعندك شي تعالى نبيك. مشي نضال من جنب المهدي وهو يغني:حبيبي ولا ع بالو شوقي اليه.. والمهدي معاه بعيونه وهو يشوفله بإمتعاض. تحرك الجالي.. وعمر قال للمهدي وهو يضحك؛فوته وقولي في شن تبيني.. شبحله وقال:بنقولك ع اكثر ناس يعزهم علي الواعر بوي نفسه مايعرفهمش تو نعطيك اسمائهم ومكان السكن.. قام تليفونه وخش المذكره وقال:مني؟ المهدي:الحاج جمعه رمضان الاسطي من سكان المنشيه بالزبط***** عمر سجل وقال:من تاني.. المهدي:الحاج بشر عطيه النفاتي في تاجورا تحديدا****** عمر:غيرهم.. المهدي:هادوا اكثر زوز يقدرهم ومستحيل يردكم معاهم..تنهد وقالت..ياريت اللي خطر ع بال نجاة خطر ع بالنا زمان راهو هلبه حاجات تغيرت.. عمر شبح لخوه بأسف.. وخديجه اللي كانت تشوفلهم من فوق ومش سامعه في شن يهدرزوا قدرت تستنتج بروحها على شني كان كلامهم... بعدين خشت داخل وسكرت الروشن.. ☘☘☘☘☘ في الشركه.. كانوا مقعمزين في قاعة الاجتماعات يراجو فيه.. واكثر نجاة.. خش عليهم وهو لابس البدله بس..كان محول البالطو والشاب.. قال؛السلام عليكم..وقعمز ع كرسيه وقال؛شن حالكم..وقعد يشوف في الملف قدامه.. هما ردوا بأصوات متقطعه:الحمد لله.. مرر نظره عليهم وقال:نبدوا... وبدوا بالاجتماع وكانوا يتناقشوا في امور مهمه تخص مشاريع الشركه.. وكانت نجاة تعطي في رايها ورايها كان محط اعجاب الجميع بالذات الجالي.. وكل ماله يزيد ينجذبلها اكثر واكثر.. في نهاية الاجتماع.. وقفوا ع خريطه تصميم لمهندسه مبتدئه.. الجالي وايديه في نصه:شخصيا عجبني تصميم بس فيه مشكلتين من يطلعهم.. واحد منهم قال:موقع الباب الرئيسي.. نجاة؛بالعكس موقعه مناسب هلبه..بس لاحظ مخرج الطوارئ مش مكانه ومايقدروش الناس يوصلوا فيه في وقت واحد فلو تغيريه غادي افضل يوسع حتى المكان..تاني حاجه المسافه بين حجر او محلات الدور التاني بسيطه زيدي وسعي بحيث تكون هكي.. وقعدت تخطط عليهم..والجالي يشوفلها وبس.. نجاه؛وغير هكي هو تصميم كويس جدا زي ماقال البش مهندس.. ابتسم الجالي.. المهندسه؛يعني هادوا بس عيوبه.. الجالي هز راسه بآيجاب.. نجاة:كلنا كانت هكي بدايتنا ياما صلحوا ورانا..اني نفسي اول تصميم ليا...ضحكت وقالت..ماكانتش فيه ولاحاجه صح.. ضحكوا.. الجالي بضحكه؛مع الوقت تتمكنوا وتصاميمكم تكون اكثر اتقان..وتوا تقدروا تتفضلوا.. هما مشوا بيطلعوا وهو قال:بش مهندسه نجاة خليك.. قلبها بدي يدق بقوة وبدت تتوتر.. وهو واقف ع اللاب توب متاعه يشوف فيه.. الجالي:تسعي بش توفقي راسين بالحلال.. وشبحلها. هي ابتسمت وقالت؛حبيت نساعد.. وقف ع حيله وقال:وتسعي بش تاخدي مكاني.. نجاه؛قتلك قبل مش بالي بس كان جاني مش حنرفضه.. قدملها.. وقلبها بيطلع من مكانه.. وقف قدامه وقال:ماتقدريش.. نجاة قعدت تشبحله وهي ساكته.. ابتسم وقال؛السفر السبوع الجاي..نبي نروح نلقى حاجات تبهرني..اكثر مااني مبهور.. نجاة بلعت ريقها وقالت؛حاضر.. تنهد ومشي ولى لمكانه وقعمز ع الكرسي.. نجاة:نمشي.. الجالي بدون مايشوفلها:كان قلت لا..؟ نجاه قعدت ساكته حاسه لسانها رزن مش قادرة ترد.. ضحك وقال؛بري بري.. هي بلعت ريقها ومشت بسرعه.. وهو تنهد من اعماق قلبه.. وشبك ايديه في بعض وحطهم ع راسه وقعد يفكر وملامح الضيق باديه ع وجهه.. 🍀🍀🍀🍀🍀 وتجي العطله.. وتمشي نسرين تاخد الصغار من امهم بش يسافروا معاها ومع عمهم.. ونجاة مشت بولدها قعدت عند اختها مروة.. طول هالايام كانت تكلم في صغارها من تليفون نسرين وماشافتش الجالي ولاسمعت صوته بس الصغار كانوا يهدرزوا عليه.. في غيابه حست انها استاحشاته هلبه.. لدرجة انها خشت ع حسابه ع الفيس وقعدت تتفرج ع فيديوهاته وصوره.. تمكن منها ومن مشاعرها... وحست انها قبلها عمرها ماحبت ولاعرفت رجاله.. بس في نفس الوقت كانت ماشيه في تحديها ليه تخدم ع التصميم بكل جهدها واغلب وقتها ليه لين شارفت ع نهايته.. ☘اماغرفه..او مياسه..فكان عبد الرؤوف معيشها في حلم حلو بالمرة..دلال كلام حلو هدايا.. بتاتها كانت تطلع تشري فيه ليه ليه.. واثات الحوش اختارته كله ع ذوقها وكانت تراجي امتى تسكن فيه وتعيش مع الراجل اللي بدت فعلا تحبه.. ☘لكن بنت عمها... واخيرا...لانلهم جدها...ووافق بعد ماجابوله جاهه من صحابه.. علي:شوفي جاي اني وافقت لأني حسيت انه غير عن خوه المهدي.المهدي لما رديناه دار تصرفات رعناء عكسه هو عرف كيف يتصرف شغل دماغه وجابها صح..لكن كان جيتي يوم ولمحت في عيونك دمعه ورب البنت يااميمه معاد توليله لو روحك فيه.. اميمه وهي متحشمه ع الآخر:اللي تبيه يصير جدي.. علي هز راسه وقال؛ربي يقدم اللي فيه الخير...ومشي طلع من حداها.. وهي بعد طلع ضحكت من الفرح.. ومشت خشت لأمها... ☘وتتعالى الزغاريد في حوش شنيبه واخيرا تحققت امنيه مغليه.. لكن في حوش جيرانهم.. عواطف:اللطف الراجل كيف سكر شهرين وهما يزغرطوا! نجمه:ايييه يابنتي كانهو ضناها راهي حزنت عليه العمر كله.. نجاح؛ع خاطر راجلها باهي! نجمه: وشن تشبحي في محمد شنيبه شاد تركينه ويبكي ماهو عايش حياته عادي اللي مات يموت ع روحه.. عواطف:ايه والله... ☘☘☘☘☘ الساعه 5:30عصرا.. كان الجو مغيم وباين عليها بتمطر.. واريج وقتها كيف طالعه من العياده.. وماعندهاش علم بالعيون اللي تراقب فيها.. عيون صاحب الكيا.. ليه مده وهو ع هالحاله من لما حكتله صاحبتها ع نمط حياتها فضوله تحرك بقوة وخلاه يبي يشوف كل شي بعيونه.. وقعد يوم عن يوم يلقى طالع وراها بدون اراده.. وممكن لله حكمه بالغه في الامر هدا... ركبت سيارتها ... والدكتور اللي تخدم عنده يراقب فيها من الروشن ويتكلم بالتليفون.. :البنت صاغ سليم وزي الفل.. "تمام تمام حني وراها توا نشوفوا وضعها ونتفاهموا بعدين.." :تم توصلوا لكلمه بين بعضكم كلموني.. وسكر.. شاف لأريج لقاها تحركت ولحقتها سيارة سودا لجماعته اللي كان يكلم فيهم.. خش داخل. في اللحظه اللي تحركت فيها سيارة نضال وراهم.. كان عاقد حواجبه وهو يقول:طلعوا وراها هي بالزبط الكلاب.. وقعدوا ورا بعض.. وكل ماتوقف اريج بتاخد حاجه يوقفوا.. وقعدوا وراها لين وصلت سانية حوش جدها.. هي خشت وهما فاتوا طول.. لكن نضال درس حدا السانيه وفي داخله كان قلق ع اريج للغايه..
#بداية_قصه2 #طوبى
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
