#طوبى "جنة طوبى"
#جمان_فريد
#الجزء_الرابع_والستين"رسالة أخيرة3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "ربما كان الفتى باسماً, وكان كلُّ الهمِّ في قلبه."🍃
__________________________________________
"شن جابك"
سكينه وهي رافعه حاجبها:خليني نخش بش تعرفي..
قعدت تشوفلها نجاة بنظرات كره..
وسكينه قالتلها؛شني!؟
بعدت نجاة عن الباب..
وخشت سكينه وهي تقلب عيونها في الشقه..
سكرت نجاه والباب وعيونها تلاحق فيها بنظرات حقد..
سكينه تنهدت بسخريه وقالت؛ايه شن حال وليدك اللي درتي بيه الحادث..
ولفت وشبحتلها..
نجاه:قولي علاش جايه وتوكلي بسرعه..
ابتسمت سكينه بسخريه..
ع طلعة صابرين من دارها...لما شافتها انصدمت وقالت..
انتي شن جابك هني!؟
شبحتلها وقالت:صبريه!؟ شن حالك ياصبريه..
نادتها بإسم جدتها ام بوها اللي كان بوها متمني يسميها عليها لكن امها رفضت..وبرغم رفض امها وتسجيلها بإسم صابرين قعد بوها ينادي فيها صبريه وهي تكره هالإسم..
قدمتلها صابرين وشدتها من مرفقها وقالت:امشي اقلبي وجهك اطلعي برا..
ضحكت سكينه يتعجب وهي تشوفلها من فوق لتحت..
ونجاه قالت لصابرين:خليها صابرين خل نعرفوا منها شن تبي بعدين تتسقد..
طلقتها صابرين بقوة وهي تشوفلها بحده..
وسكينه ساوت عبايتها وقالت؛شني الصغويره راقدين؟
نجاه بحده؛صغاري مالكش علاقه بيهم..
سكينه؛عيب عليك يانجوته اني جايه نطير في السو ع ولدك وعليك حتى انتي هكي تقابليني..
صابرين بنرفزة:قولي شن عندك وانتلفي من غير نفخ..
رمقتها بنظرة استهزاء بعدين قالت:السيارة السودا اللي خشت للعمارة بكري شويه جايباتك انتي ولا؟
انصدمت صابرين..ولون وجهها انخطف..
ونجاه تشبحلها بخوف..
سكينه؛ايه جايباتك انتي والله اعلم من وين..
صابرين:شن تفتفتي ياوس.خه انتي اما سيارة هادي!؟
سكينه؛الطروح هادي ماديرهاش عليا اني اللي نعرفكم كويس وخابزتكم وعاجنتكم...فاج.رات..
نجاه بصوت عالي:هييه الزمي حدك احسنلك..
شافتلها بسخريه وقالت؛اهدي والعبي ارضي مانكش خير منها حتى اني ياما دايره..
صابرين؛قسما بالله كان ماطلعتيش من هني توا نطلعك من شعرك!؟
حطت يدها ع صدرها وقالت؛ووك عليا يما رعشتيني جيبولي ميه وسكر..رفعت حاجبها واشرتلها بسبابتها وقالت..من هي اللي تجبديها من شعرها ياصايعه..اني نحطك تحتي نعفس في بطنك نطلع مصارينك..
نجاة:اقصري الشر يابنادمه انتي وقولي شن تبي؟
شافتلها وهي رافعه حاجبها وقالت..
اللي نبيه عند اختك..
صابرين؛لو ينوض بوي حي توا ويجي قدامي ماك طايله مني حاجه..
شبحتلها وقالت..مادام انتي هكي خلاص تبعت خوتك بروحهم للكابو اللي مصاحبتيه بش يمشيلهم امورهم..حطت يدها ع ذقنها وهي تقول..لكن كان مشوله شن بيقولوله جايين من طرف اختي اللي مصاحبها..تخيلي خوتك جوهم فري هكي..وقعدت تضحك...
جسم صابرين كله يرجف من الخوف وهي تسمع في تهديد مرت بوها المبطن..
ونجاة تشوفلها بخوف..
سكينه؛هو اني قلتلهم اختكم عندها صاحبتها ماليها ناس واصلين تو نقوللها تمشيلكم موضوعكم بس عاد كان انتي تبيهم يعرفوا انك مصاحبه الواصل هدا ماعنديش مشكله..
تعبوا عيون صابرين بالدموع وهي تشوفلها بحقد..
ونجاة قالت:شن هو اللي تبيه بالزبط..
سكينه؛شويه بس..وفتحت شنطتها وطلعت منها ورقها ومدتها لصابرين وقالت..خوك يبيك توقيعه وحده ع الورقه هادي..
صابرين مابتش تاخده..
جت نجاه بتاخدها عنها..
بعدت سكينه الورقه وقالت:هي تاخدها..
نجاه شافت لصابرين وقالت..
صابرين..
شبحت صابرين لأختها..
شافت في عيونها نظرات رجاء بش تاخدها منها..
غيرت عيونها عن اختها وشافت لسكينه بحقد وقالت..
جيبيها..
سكينه؛ايوه سلم صبريه خليك ديما عاقله هكي ..
ومدتلها الورقه..
خدت صابرين وهي تشوفلها بغل..
سكينه؛بنجيكم مرة تانيه ونشوف شن صار بديري جو المماطله.ماتلومي الا نفسك ع اللي بنديره اني بعدين ايوه..
شبحت لنجاه وقالت..
عقلي اختك يانجوته واعقلي حتى اني..
وتوا بالسلامه يابناويت حمامه..
حمامه لقب كان معروف بيه بوهم في حيهم الشعبي القديم...
وتوجهت سكينه للباب وهي تتمخطر..لين وصلت فيه..
فتحاته وطلعت..وقبل لتسكره..
شافتلهم بإبتسامه مستفزة بعدين سكرت الباب..
وخلتهم الزوز يحرقوا ويسحنوا عليها..
ونجاة اللي حاولت ضبط نفسها قدامها بقوة..
فقدت السيطره ع اعصابها ومشت للطاوله خدت المترد المحطوط فوقها وطيحاته وكسراته لإجزاء..
وصابرين تشوفلها ودموعها في عيونها..
الصغار اللي كانوا راقدين فيق واحد منهم الصوت وناداها..
"أمي"
صابرين؛حمزة..
مسحت نجاة بآيديها ع وجهها بعدين مشت للدار الصغار..
وصابرين شافت بعيونها للورقه بحقد بعدين قالت..
جايك يوم ياسكينه...
🍃🍃🍃🍃🍃
مقعمزه ع السرير جنبه تراجع...
وهو حداها راقد..
مرة مرة تشوفله في حرارته اللي قعدت تنزل شويه شويه..
لعند مارن تليفونها ع الهزاز وهو في جيب سروالها..
طلعاته وشافت المتصل..
بعدين شافتله هو..وناضت ومشت طلعت برا الدار وردتها وراها..
تباعدت عنها وردت وهي تقول..
..ايوه عبير السلام عليكم..
"وعليكم السلام بيبو شن الجو"
طوبى:الحمد لله ع كل حال..
"خيرك قلتيها هكي صايره حاجه"
طوبى؛الجالي مريض شويه..
"اها لاباس عليه"
طوبى:لايوريك باس..
"معناها اتصالي ماجاش في وقته"
طوبى:لاعادي حبيبتي هو توا راقد..
"Ok...بيبو بنسألك شن صار في موضوعنا"
طوبى:اما موضوع؟!
"بيبو..موضوعي اني وعبدو نسيتي"
حكت طوبى مابين عيونها وقالت..
اسفه عبورة والله انشغلت ونسيت..
"واني اللي عابيه عليك ونراجي منك في خبر يفرح"
طوبى بضيق؛اسفه اسفه هلبه عبورة خلاص بنسكر منك ونكلم صفيه طول..
"تمام سكري توا وبعد ماتكلميها طمنيني مش تنسي"
طوبى هزت راسها وقالت بضحكه؛تمام..سلام..
"سلام بيبتي"..
سكرت طوبى وهي تضحك..
بعدين قالت..
تو شن بنقول للمراة كيف بنفتح معاها الموضوع بس!؟..
نفخت خدودها وهي تتأفف..
بعدين حطت ع رقم صفيه واتصلت بيها...
حطت التليفون ع وذنها..
وقعد الخط ينادي لين انفتح..
وجاها صوت صفيه وهي تقول..
"من اللي خطرت عليها واتصلت بيا من..طوبى الواعر بجلالة قدرها!"
قعدت تضحك طوبى..
"باهي اللي تواضعتي ياحنه وكلمتينا"
طوبى:حرام عليك صفيه قريب كل يوم نهدرزوا ع الماسنجر..
"مش كيف ياسمحه مش كيف..مش كيف مانشوف حروفك كيف مانسمع صوتك.."
ضحكت طوبى وقالت؛باهي شن حالك وحال وليد وخالتي سليمه والعيله كلها..
"كلهم في خيار الخير الحمد لله انتي شنو حالك وحال هلك"
طوبى:الحمد لله..
"الحمد لله..شن داير في القرايه والخدمه"
طوبى؛اهو نجروا هني وندفوا غادي وماشيين..
"ربي يعاونك"
طوبى:اجمعين ان شاء الله..صفيه..
"نعم"
طوبى:نبي ندوي معاك في موضوع..
ومشت للمرسم خشتله وقعمزت ع الكرسي..
وصفيه تسأل ..
"موضوع شني حبوبه"
طوبى؛ريتي الموضوع متاع ولد خالك..
"اين موضوع"
طوبى؛موضوع البنت اللي يبيها..
سكتت شويه وقالت..
"ايه كملي"
طوبى حطت خصلة شعرها ورا وذنها وقالت..
البنت هادي صاحبتي صفيه..
"كملي"
طوبى؛واكيد يعني هو حكالكم انه خطبها وهي رداته صح؟
"اها صح"
طوبى بشي من الربكه؛البنت توا غيرت رايها وحست اتجاهها بقبول وبعني عرفت انها غلطت لما رفضاته طول من غير ماتقعمز معاه وتسمعه..فا..زي ماتعرفي ان الموضوع هكي حساس شويه..ومرات يكون هو واخد موقف...
قاطعتها وقالت..
"ايه يعني طوبى هي شن تبي توا"
طوبى بإرتباك؛تبي الموضوع يرجع ينفتح من اول وجديد يعني..
قعدت صفيه ساكته..
طوبى:صفيه فهمتي عليا؟
"ايه فهمت عليك..شوفي طوبى الموضوع هذى تسكر خلاص وعبد القيوم موضوع يسكره لايمكن يرجع يفتحه مرة تانيه قولي لصاحبتك بينكم مافيش نصيب"
طوبى:صفيه علاش تسكري فيها طول هكي انتي كلميه وشوفيه الموضوع يخصه هو بس ماتنسيش انه يحبها..
"حتى لو كانت روحها فيها ياطوبى عبدالقيوم خويا مش بس ولد خالي ياطوبى تربيت معاه ونعرفه كويس نعرف شخصيته نعرف تفكيره"
طوبى:انتي ماتخسري شي لو قلتيله ياصفيه وحاولي تقنعيه صدقيني مافيش احلى من انه الواحد يكمل عمره مع اللي يحبه ماتحرميش ولد خالك من الحاجه هادي..
🍃صفيه سكتت وهي نفسها كانت تقول..
"عليك غبينه ياربي..غبينه"
تنهدت وقالت:باهي تو نكمله ونحاول فيه واللي فيها الخيره يحيبها ربك..
"إن شاء الله..بالله صفو ردي عليا بسرعه شن ماكان رده باهي"
صفيه بضيق:إن شاء الله إن شاء الله..
"تمام مالا مانعطلش عليك سلمي ع خالتي سليمه "
صفيه:يوصل وانتي سلمي عمتك وخواتك..بالسلامه..
"بالسلامه"
وسكرت صفيه وهي مضايقه قالت...
ياربي عليك غبينه...
🍃🍃🍃🍃
"فوت الحركات هذين وعدي لخوها وافتح معاه الموضوع"
ربيع:المهدي تحسه قاعد في عالم تاني وبعدين بايخه نمشيله هو نفتح معاه الموضوع هدا..
عبد القيوم وهو يفكر:عندك حق..باهي شوف خوتها الاخرين..
ربيع:الجالي مافيش بيني وبينه خلطه وهو اصلا مايخالط في حد من الشارع ديما خشمه في السمي..
عبد القيوم بإمتعاض:باهي اللي في حد غيري شايفه صح..
ربيع؛ملاحظك مش طايقه بكل..
عبد القيوم؛ولاهو..
ربيع؛علاش شن صاير بينكم!؟
عقد حواجبه وقال؛من ربي هكي المخلوق هذى مانقبله..المهم خلينا من سيرته توا وخود كلامي وعدي كلم نضال احسن شي...
ربيع وهو يفكر؛تقول هكي!؟
عبد القيوم:ومانقولش غير هكي..
هز ربيع راسه وقال:إن شاء الله خير..
وخدي طاسة الشاهي الأخضر وشربها وهو يفكر...
وعبد القيوم حتى هو شرب من طاسته بعدين قام تليفونه وخش الفيس يشوف التعليقات ع ببت شعر جديد الفه ونزله..
بس جي قدامه منشور مشاركه دايره صفيه لأطفال..
بنت وولد لابسين الزي التارقي..
ومكتوب فوق صورهم...
(لالئ سمراء جميله...
صغار مدرستي القمامير)
ركز ع اسم صاحبة المنشور ويشوف اسمها..
يحس وكأنه في حد شاد قلبه بيده وقاعد يعصر فيه...
هو معاش تحمل اكثر من هكي..
خش ع حساب بنت عمته وحدفها من الاصدقاء وهو مضايق لأبعد حد..
"تارقي"
حط تليفونه حداه وقال؛نعم..
ربيع؛شفت حاجه ضايقاتك؟
حرك راسه بالنفي وقال؛لانهائي..المهم توا قولي شن ف موضوع خوك؟
🍃🍃🍃🍃🍃
ومنهم للحوش اللي مجاورهم..
كانت مغليه كعادتها شادة تلفزيونها وتتفرج..
وفي دار المعيشه..
كانوا نسرين وسدرة مقعمزات مع بعض ويحي حداهم..
نسرين:اهم شي تحفظي التاريخ وتكوني قبله بكم يوم واخده احتياطك باهي..
سدرة؛باهي..
نسرين؛حبيبتي اي حاجه تصير معاك تجي طول تقوليلي اني مهناش تتصلي بعمتك خديجه..
سدرة:حاضر..عمتي..
نسرين وهي مبتسمه:اممم..
سدره:حلمت بماما الله يرحمها
عيون نسرين طول دموعوا...
سدرة:حلمت بيها جتني وقالتلي البسي شاربتي الزرقا..
نسرين وهي تفكر:هادي اللي كانت تلبس فيها هلبه لما تنزل هني..
سدرة: ايه حلمت بيها امس وقاعده نفكر فيها هلبه ونبي نعرف شن معناها..
نسرين:بنت جيرانا بوها يفسر...
التفتت وتلاحقت تليفونها اللي كان محطوط بعيد عنها..
خداته وقعد دور ع رقم بنت جيرانهم لين لقاته..
واتصلت بيها..
🍃فالوقت..
اللي جي فيه اتصال لأمها...
خدت تليفونها من ع الطاوله..
وين شافت المتصل..
رعشت مع بعضها من الخوف..
بعدين فتحت الخط وردت..
مغليه؛السلام عليكم..
"لاسلام ولاكلام ولاعاد نبي نعرفك من اليوم لأخر يوم في عمري يااختي الكبيره ياللي دايرك امي غشتيني وضحكتي عليا وخليتي بنتي تنكسر مرة تانيه"
مغليه وهي ترعش؛وخي ماتقولش هكي الله لو نمشيله وين ماهو ونخليه غصب عنه يستسمح منكم..
"بعد شني..بعد مابعتلها ورقه طلاقها مع المحامي متاعه"
انصدمت مغليه..وكاد قلبها يوقف..
"حسبي الله ونعم الوكيل فيك وفيه والله ماني مسامحك لين نموت"
وسكر عليها الخط..
دموع مغليه نزلوا وهي تقول:ماتقولش هكي ياوخيي حرام عليك.....الو....الو..
نزلت تليفونها وشافت الشاشه لقاته مسكر الخط..
مغليه وهي تبكي؛شن درت فيا ياولدي شن درت فيا ياعمر علاش هكي علاش...
وقعدت تنادي..
نسرين...يانسرين تعاليلي..
🍃ونسرين في الدار تكلم في الجارة..
لما سمعت امها كيف تنادي..
بخوف قالت؛امل اسمعي بنسكر توا نكلمك بعدين..
وسكرت عليها وناضت وطلعت تجري لأمها..
اما سدرة من الخوف قعدت مقعمزة في مكانها..
طريقة مناداة جداها وبينتلها انها صايرة فيها حاجه..
خافت تموت..
🍃وفعلا هدا اللي شافاته نسرين لما خشت ع امها الصاله..
شافت حاطه يدها ع راسها وطايحه ع كنبه وتتنفس بتعب..
نسرين بعياط؛يما خيرك..خيرك..
وهي مغليه فهاللحظه فقدت الوعي...
🍃🍃🍃🍃🍃
وفي فيلا الجالي..
كانت طوبى لاهيه بقرايتها..
وفي عز انسجامها...حست بحركة راجلها..
شبحتله لقاته بادي يفيق..
قعدت مركزه عليه كيف يشبح لجهه وحده..
قاعد يستعيد وعيه وذاكرته...
واستعادهم تماما..
ناض قعمز وشافلها..
هي قالتله؛ها شني أحسن توا؟
هو هز راسه بإيجاب..بعدين نزل من السرير..
طوبى:بالشويه عليك..
هو كمل طريقه للحمام بصمت..
معاش شافاته وسمعت الحمام تسكر..
تنهدت بضيق..بعدين رجعت لشيتاتها..
🍃🍃🍃🍃🍃
وفي مصحة القدس الموجوده في منطقه شارع القهوة..
كانوا نضال ونسرين جايبين امهم بش يسعفوها..
جتهم دكتوره جميله المظهر وجذابه ولطيفه..
وقفت عليهم وهي مبتسمه ابتسامه مطمئنه قالت
اطمنوا وهدوا بالكم الوالده حالها وتقدروا بعد ساعه تانيه تروحوا بيها..
نسرين بقلق:شن اللي صارلها بالزبط يادكتورة؟
الدكتورة:ضغطها ارتفع شويه وتوا الحمد لله ولى في معدله الطبيعي..
نضال تنفس براحه وقال:الحمد لله..
نسرين:عادي نخشلها دكتورة؟
هي بإبتسامه؛ايه عادي مافيش مشكله..
نسرين؛صحيتي دكتورة..
الدكتورة بإيتسامه:واجبي...
ومشت نسرين طول لحجرة امها ونضال معاها..
والدكتورة اللي تحمل اسم "هناء"...
كملت طريقها..
بس وهي ماشية تلاقت مع زميل ليها..
اول ماشافاته ملامح وجهها تغيرت للضيق..تعمدت تتجاهله وتفوت من جنبه وكأنها ماشافاته..
اما هو كمل طريقه وتجاهله تفوق ع محاولة تجاهلها اليائسه..
مش لأنها ماتعنيله شي لا...بل لأنه يتقن التمثيل أكثر منها..
🍃🍃🍃🍃🍃
وتحت الدوش..
كان الجالي سرحان ويفكر في نجاه...
ويتفكر في كلام امه عنها...وحركة انها تجي وتروح من غير ماتحاول تشوفها ولاتخليه عمدا يشوفها زي ماتعود منها قبل مجنناته...
وبفارغ الصبر يراجي في أي خبر يوصله عن قصة شغلها
الجديد بش يفهم هي شن قاعده دير توا...
🍃كمل الدوش متاعه..
وطلع من الحمام وهو لابس الديشمبر..
وين خش للدار لقاها دافيه..
شاف للدفايه لقاها مفتوحه..
وشاف لباقي الدار مالقهاش..لقي بس شيتاتها اللي كانوا ع الطاوله..
تنهد بعدين مشي للدولاب بيطلع حوايجه..
وقف لما شاف ع الكنبه حوايجه اللي مطلعتهم..
مشالهم طول...
الامر ولى اعتيادي مافيشي شي ملفت للنظر..
هي هكي ديما دير..حتى لو قصرت شويه ترجع تهتم اكثر مم الاول وتعوض تقصيرها..
ولما تقصر مايكونش ليها عذر..
لكن لما دير واجبها وزياده معاش تحصل كلمة شكر ولاعاد ينشاف اللي دير فيه انه حاجه كبيره..كله عادي واقل من العادي..هدا واجبها...
🍃واجبها اللي قاعده دير فيه ع اكمل وجه وهي توتيله في العشي ومش مجرد تجهيز عادي..
كانت تنسق فيه بطريقه حلوة بس تفتحله نفسه ع الماكله..
بعد ماكلمت..
مشت بتطلع بش تركب تناديه..
لقاته نازل..
وين شافها قال..
العشي واتي..
هي قالت؛ايه..
وصل فيها فات من جنبها وخش للكوجينه وهي خشت وراه..
قعدت تشوفله كيف قعمز وبدي ياكل طول..
كان ياكل وعقله مشغول..
وهي دارت روحها ضم في الكوجينه لكن تراقب فيه..
بعدين قعمزت حداها صبت لروحها طاسة عصير وقعدت تشرب..
هو كمل وجي بينوض..
قالتله؛جالي..
شبحلها..
طوبى؛صايره معاك مضايقاتك في الخدمه مثلا..
هو غير عيونه عنها وقال؛ايه..تو تنحل..
طوبى:باهي ماتقدرش تحكيلي بالك ترتاح شويه..
هو مشي وقف ع اللاوندينو وقالت..
مانبيش نشغل بالك...
طوبى:اني هكي بالي مشغول..
هو فتح الشيشمه وقال؛طوبى دماغي مشوش وقاعد تاعب مانبيش زيادة ضغط وتوتر ارجوك اني نبي لما نروح نلقى الهدوء..المهدوء وبس لو سمحتي..
حست بضيق شديد وقالت؛باهي براحتك..
غسل ايديه..
بعدين مشي طلع من حداها..
وخلاها في حالة ضيق كتمت ع انفاسها..
خدت نفس..بعدين طلعاته..وقالت..
لاإله إلا انت سبحانك اني كنت من الظالمين..
وناضت وبدت ضم في الكوجينه...
🍃🍃🍃🍃🍃
الساعه 12:00منتصف الليل..
في دار نوم مغليه ومحمد شنيبه..
كانت مغليه مقعمزه ع السرير...
وحواليها راجلها وصغارها..
المهدي..نضال..نسرين..
محمد بصدمه؛كيف يدير هكي هدا كيف مش داير لحد حساب هالكلب!
المهدي بنظرة امتعاض:غلطتكم يام ولازم تتحملوا نتجيتها..
نسرين شبحتله بنظرة وكأنها تقول..
"هدا وقته!"
ومغليه قعدت تشبح للمهدي وهي تبكي بدون ماترد..
نضال؛المهدي عنده حق في كلامه واهي جاتك مع خوك المرة هادي..
شبحله بوه...
وكلهم فهموا قصده من كلامه اللي قاله..
مغليه ببكي:تبوا تقتلوني انتم!؟ اطلعوا من حداي اطلعوا..
محمد بضيق:خلاص اطلعوا..
المهدي مشي طلع بدون ماينطق بكلمه..
اما نضال ونسرين قالوا..
تصبحوا ع خير..
رد بوهم:خير خير..
ومشوا طلعوا من حداهم..
نضال؛تعرفي لما شفتها مغمى عليها بكري نحسابها سمعت ببوي واخد عليها..
نسرين فنصت وقالت؛قصدك بوي واخد عليها!
نضال:تي لاياغبو قتلك نحساب نحساب..
نسرين تنهدت بضيق وقالت؛خوك هدا مش عارفه شن جاه علاش ولى هكي!؟
نضال؛ماجاه شي هو من قبل هكي وانتم ساعدتوه..
ومشي وخلاها..
ونسرين تلحق فيه بعيونها وهي تفكر في كلامه وفي نفسها قالت..
"صح حني ساعدناه ومش غير هو بس"
🍃🍃🍃🍃🍃
"ماتقوليش خيرك قالب وجهك "
محي الدين؛لاقالبه لا مساويه ارقدي..
خديجه بضحكه:مستاحش يحيى؟
شبحلها وقال؛يعني هي خلاص خداته معاش بترده؟
خديجه؛محي خيرك الولد ولدها راهو!
عقد حواجبه بضيق وقال:نقولهالك خديجه من الاخير كان بتقعدي مسكرة راسك ع حكايه الصغار بناخد عليك..
ضحكت ضحكه عاليه ساخره..
هو قعد يشحبلها برفعة حواجب وقال:تحسابيني نقول في كلام وخلاص..
هدت ضحك وقالت:اللي يسمعك يقول ماعندكش بكل..
محي ؛وشن هما اللي عندي زوز بس راهو!
خديجه؛غيرك مش محصل ظفر عيل..
محي:مادخليش بغيري عليا في نفسي بس.
ضحكت وقالت؛باهي تمام لكن بشرط تسفري لتركيا كلهم مشولها الا اني..
هو بإبتسامه؛شن تركيا متاعك مقدمها..نرفعك للمالديف..
هي بعدم تصديق:بلابراده محي اني طلبت تركيا راهو ولت زي تونس..
محي بضحكه؛واني هدا علاش قتلك بنرفعك للمالديف مني جد..
هي بدهشه:احلف..
هو بضحكه قال:والله..
وبحركه تلقائيه منها بفرح ضماته وهي تقول..
ياسلم راجلي..
بعدين بعدت عنه وقعدت تغني وترقص بإيديها..
حتى راجلي يدلع فيا..حتى راجلي يسفر فيا..
ومحي يضحك عليها ..
🍃ومن فرحتها..
تاني يوم مع الساعه عشره الصبح مشت لحوش ماليها بش تخبر امها..
لكن امها سبقتها بالخبر المفجع..
خديجه بصدمه؛عليك عملة سودا..
مغليه ببكي؛دارها فيا خوك وفرق بيني وبين خوي تو تشوفي كيف خوالك تانيين بيجوا معاه ويزعلوا ع زعله هو كبيرهم...
خديجه قعدت ساكته وهي تشوف لأمها بقلق ع حالها..
شويه ويرن تليفون خديجه..
قاماته تشوف من المتصل..
شافت لأمها وقالت؛مرت خالي.
وقفت مغليه بكي وقالت؛ترا ردي شوفيها..
شافت خديجه شويه للشاشه بعدين فتحت الخط وردت..
خديجه؛ايوه مرت خالي..
"خليتوا فيها خال ومرت خال..الله ليوم الدين ماني مسامحتكم تلقوه وتتلقوه..اللي داره خوك في بنتي تلقي في بنيتك ايه والله..حسبي الله ونعم الوكيل فيكم"
وسكرت عليها..
قعدت خديجه جامده بلاحركه وباديه ع وجهها ملامح الصدمه..
وامها تشوفلها بخوف وقالت..
شن قالتلك..تكلمي!..
نزلت تليفونها وشافت لأمها..
بلعت ريقها بعدين قالت..
زي كلام راجلها يام..
مغليه ولت تبكي وهي تقول..
الله يسامحك ياعمر ياولدي الله يسامحك..
🍀🍀🍀🍀🍀🍀
وتمر من هداكا اليوم..
ايام...
وحال مغليه كان بالويل من اللي داره عمر..
واللي توقعاته فعلا صار..وخوتها الرجاله خدوا موقف مع خوهم..
عكس خواتها اللي كانوا يحاولوا يصلحوا بيناتهم...
🍃وصل اللي داره عمر للجالي بس..
ومااهتمش نهائي لأن عقله وتفكيره كله في نجاه اللي عرف تفاصيل شغلها وعرف ان في رجل اعمال ليبي كبير يدعم في المكتب اللي تخدم فيه بس ماقدرش يعرف هويته..
وزاد انقهر..لكن ماقدرش يتنازل ويكلم نجاه...وفي المقابل اهمل طوبى تماما..ولى عايش معاها جثه بس..واغلب يومه مش معاها نهائي..
والفجوة زادت كبرت..وطوبى بدت تحس ان في حواجز عاليه قاعده تنبنى بينها وبين راجلها ماعندهاش قدرة تخليها تهدها...
وفي نفس الوقت في شي في داخلها قاعد يمنع فيها انها تبادر هالمبادره..زي ماقاعد يمنع فيها انها تخبره بحملها..
وهالموضوع مداير لطوبى حالة من الخوف والقلق...
وفي يوم...
29مارس من سنة 2018...
كانت حفلة زفاف اخت المدرسه اللي تخدم عندها في المدرسه..
طوبى ماكانش عندها رغبه في المشي واعتذرت من الابله..
لكن قالتلها انها هي اللي حترفع اختها للمركز اللي تخدم فيه فايزة..
ودارت اللي قالاته..ورفعتها وقعدت معاها..
وفايزة في هداكا اليوم كانت تخدم في العروسه من كل قلبها لأنها خدمة جبر خاطر وجبر الخواطر عند ربي عمل عظيم مايتقدرش بثمن..
جبر الخاطر العمل اللي كانت دور عليه طوبى بش ديره..
زي مادارت مع العروسه توا..
وام الصغار اللي ساعدتهم يوم عيد الام..
دبرتلها خدمه مع فايزة وليها فترة تخدم معاها..
وفايزة عاجبها شغلها ومرتاحتلها هلبه وحست ان في شبه بينهم....
طوبى وهي مقعمزة في المركز..
كانت تمرر في نظرها ع العروسه..وع الام المكافحه..
وتشوف في مسحة ابتسامه سعاده ع وجوهم خلتها تحس بشعور حلو يصعب وصفه..
شعور امتننان عظيم لله اللي قاعد يستعمل فيها لجبر قلوب العباد..
☘اللهم استعملنا ولاتستبدلنا☘
🍀وتعدي الساعات..
وتجهز العروسه...
طوبى بإبتسامه اعجاب:الله يبارك عليك ملكه..
العروس بفرح؛والله اكثر حاجه مفرحتني ان اللي دارتلي مكياج عرسي فايزة الخويلدي..
ضحكت فايزة وقالت:والله اني اللي فرحانه اكثر منك..
وطوبى تمرر في نظرها عليهم وهي مبتسمه..
شويه وانفتح باب المركز..
وخشت ابله زهره وهي تقول السلام عليكم.
وين شافت اختها تفاجئت وضحكت من الفرحه..
واختها قعدت تضحك..
حطت ايديها ع خدودها وقالت بإنبهار:الله يبارك..
اختها:حلوة!؟
نزلت ايديها ومشتلها وقالت؛شن حلوة هادي تهبلي..
وصلت فيها وضمتها..
وفايزة قالت؛بالله عليكم من غير دموع..
بعدت زهره وهي تمسح في دموعها..
وطوبى تشوفلها وهي متأثرة..
اما العروسه قالت بضحكه:مستحيل نبكي ونخرب مكياجك نبيهم كلهم يشوفوه بالذات المنجوه..
ضحكوا كلهم..
فايزة بضحكه:ربي يسعدكم ويهنيكم انتي ومنجوهك..
وتزغرد اختها.
وكل من في المركز ابتهج وفرح معاهم..
بعدين لبست زهره لأختها الكاب..
وبمساعده وحده من العاملات طلعوا العروسه لسيارة وحده من اقاربهم...
طوبى:ربي يهنيها يارب وتفرح دوم مش يوم..
قالت طوبى الجمله هادي بنبره فيها شي من الحسرة لاحظتها فايزة بس..
فجأة تخش عليهم زهره..
وتجي لطوبى وتحضنها بقوة وهي تقول..
ربي يجبر بخاطرك يارب ربي يفرحك كيف مافرحتينا ياربي..
طوبى ماقدرتش تتمالك نفسها قعدت تبكي..
والام المكافحه قعدت تشوفلها وهي متأثره بيها هلبه..
والموقف كان مؤثر حتى لفايزة اللي كانت تشوف لطوبى بإبتسامه ودموعها في عيونها..
بعدت زهرة وقالت؛امي تسلم عليك وقالتلك بنقعد ندعيلك لين ربي ياخد أمانته
طوبى بنبرة باكيه؛بعد عمر طويل يارب..
زهرة وهي ترشف؛يارب..بارك الله فيك اختي فايزة..
فايزة:ع شني درت واجبي بس راهو..ربي يسعدها ويهنيها يارب..
زهره؛يارب..هي بالسلامه..
كلهم قالوا؛بالسلامه..
ومشت زهره طلعت وهي مستعجله..
مسحت طوبى دموعها وقالت؛ابله فايزة بندير عندك مكياجي
الاربعا الجايه باهي من توا حجرت..
فايزة بضحكه:نفضالك ياسمح.
ابتسمت طوبى وقالت؛نجيهالي يارب..هي بتروحي..
فايزة؛لالا مازال شويه..
طوبى:تمام اني مروحه لحوش بوي بايته غادي الليله..
فايزة:خلاص نتلاقوا..
طوبى:ان شاء الله..سلام..
فايزة:سلام..
ومشت فاتت من جنب المراة وقالتلها:تصبحي ع خير..
ابتسمتلها وقالت؛قدامك كل خير..
وطلعت من المركز..
بعد ماطلعت..
وحده من الزباين قالت؛معليشي هي صاحبة العروسه ولاقريبتها؟
فايزة؛اخت العروسه تخدم عندها في المدرسه..
:قصدك مساعدتها؟
هزت فايزة راسها بآيجاب..
المراة قالت؛بالله بنسألك قداش عمرها؟
فايزة:مواليد 97..
:الله يبارك عليها افعالها مش لعمرها ندادها تلقيهم لاهيات في الدبش والدهوير والعلاقات..
فايزة؛هي متزوجه..
الزبونه؛واضح عليها..
المراة؛الحق اني ماريتش بنات في عمرها هكي في اللي اكبر منها ومش هكي بكل...
ناضت الزبونه بعد مارن تليفونها وقالت؛عندك الحق نادرات اللي زيها..هي تصبحوا ع خير..بالسلامه فايزة..
فايزة؛بالسلامه...
ومشت الزبونه طلعت..
والمراة بعدين قدمت لفايزة وقالت؛بالله تعرفي امها طوبى؟
ابتسمت فايزة وقالت؛متوفيه الله يرحمها..
المراة بحزن:الله يرحمها..في بالي قلت اكيد طالعه لأمها دارتلي حركه لين نموت ماننساها..وين جتني لحوشي وجبتلي البضاعه متاع المساعده جابت حاجه صغارها كانوا يحبوها هلبه بعدين انحرموا منها "التشيز كيك" تعرفي وين شافوه يومها شفت في عيونهم فرحه ليا وقت ماريتها..
اني الناس اللي تساعدني كان بيجيبوا حاجه مايجيبوا شي فوق الاساسيات لكن هي دارت حاجه مادارهاش حد قبلها جبرت بخاطر الصغار وفرحتهم..الله يرحم من رباها..
فايزة ودموعها نزلوا:صدقتي لما قلتي طالعه لأمها..امها اللي ربتها اختها الكبيره..
المراة؛يقولوا الاخت الكبيره ام تانيه..
فايزة؛ادعيلها بالله ليها توا شهرين في غيبوبه..
المراة بوجع؛لاحول ولاقوة الا بالله..
فايزة وهي دمع؛من نهار خشت في الغيبوبه وهالبنيه مكسور جناحها..
المراة:ياروحي..يااالله ياربي كيف ماتجبر بخواطر الناس تجبر خاطرها بنوضة وخيتها يارب..
فايزة وقلبها يفر فران من الدعاء اللي سمعاته قالت..
آمين يارب العالمين..
🍃🍃🍃🍃🍃🍃
تاني يوم..
صبح يوم الجمعه..
مطيره وهي منفعله؛تي لايابوي لا..
علي وهو عاقد حواجبه؛وطي حسك احسنلك..
شدوا ضحكاتهم وهما ياكلوا في العصيده..
مطيره:تفرجي عليه يادكتورة تفرجي تفرج انت ياولده المدلل قدامكم يصب في السمن ياكل وانتم تضحكوا..
حسين؛وسعي بالك جدي اصح منا كلنا الله يبارك..
علي:ايوه عطيهالي وتريح..
حسين؛فوق ماندافع عليك ياغالي..!
قعدوا يضحكوا..
ومطيره مشت خدت شيشة السمن وقالت؛انتي يافرخه ياصفرا وانت يامدلل الله ماني مسامحتكم كان مرض اليوم..
ومشت للكوجينه..
لطفي؛تي غير وسعي بالك يامطيره مش هكي..
ونطق اسمها باللغه العربيه الفصحى من باب الاستفزاز..
وهما يضحكوا..
وطوبى وهي تضحك كان تشوفله بحب..
علي؛ماتعدلوش عليها كولوا كولوا..
اميمه:تو بتقعد قالبه وجهها عليا اليوم كله..
علي وهو ياكل اشرلها بيدها بمعنى مادوريهاش..
"شفتك راهو"
فنصوا اميمه وجدها..
والباقي يضحكوا...
☘ومر نهار هداكا اليوم وكل من في الحوش كان يتعمد التنكيت والفرفشه بش يخففوا ع ارواحهم ثقل هالأيام اللي عايشينها..
بس هالدنيا مخلوق فيها الانسان بش بعيش في كبد..
يرتاح شويه ويتعب هلبه..
🍃عشية هاليوم..
وهما متجمعين ع عالة الشاهي في جنان الكوجينه..
دق باب الحوش..
واللي فتحه حسين..
ولقي قدامه..
شيباني فردوس وولده بشير ومرت بشير ثريا وعزوزة فردوس وحماتها الصغيره..
الزيارة كانت غير متوقعه وفاجئت الجميع..
لكن خوفت آلاء..
🍃في الصاله..
ام مصطفى؛اهوا يابنتي جيتك بروحي وجبتلك ثريا تستسمح منك ومن بنتك قدامي..
فردوس:عمتي اني مانبي حد يستسمح مني..وسامحيني للحوش هداكا معاش مروحه خلاص...
ثريا:فردوس تعوذي من الشيطان واسمعيني..
قاطعتها فردوس وقالت؛مانبي نسمع منك شي ياثريا خلاص..
سكتت ثريا وهي تشوف لعزوزتها وحماتها اللي قالت..
خلاص براحتك الحوش قاعد حوشك وحوش صغار وامتى ماتبي روحي..وحني الحق جايين اساسا بش نشكروكم ..
هما استغربوا..وبالذات آلاء..
فردوس :على شني؟
ام مصطفى:ع اللي داره خوك مختار..
كلهم تفاجئوا..وآلاء بدت تتوتر..
حماتها:لما عرف باللي صاير وقف مع بشير وقفه خوت..وهو اللي طلع وليد...
ام مصطفى:ولولاك انتي من بعد ربي يافردوس ماصار هدا كله..هو قال وصلتوله اللي صار وهو طول ماوخرش..
فردوس طول شبحت لآلاء..
وهي تجنبت تشوفلها قعدت تمثل انها مصدومه زيهم..
🍃🍃🍃🍃🍃
في المربوعه..
بشير:والله وقف معاي وقفه الخوت مايديروها..
اب مصطفى:اني الحق متحشم منك ومش قادر نحط عيني في عينك بعد اللي صار بيني وبينك هداكا النهار جاي نستسمح منك ياخوي ومستعد نكب ع راسك بش ترضى..
لطفي وع وجهه باديه ملامح الضيق:لاياحسن مانبي حد يكب ع راسي..اني مش حاط في قلبي منك شي مسامح وربي يسامحك ويسامحنا جميعا..امابنتي من حوشي مش طالعه وبناتها احرار يبوا يقعدوا هني نحطهم في عيوني..يبوا يروحوا معاكم انتم ماليهم..
علي قعد مركز ع ملامح وجه ولده وهو مضايق لأنه مضايق..
اب مصطفى:اللي يريحك يالطفي ويريحهم لطفي المهم نقعدوا عيلة وصحاب..
هز لطفي راسه وقال:اكيد قاعدين صحاب وعيله..
وبشير وهو يشوفلهم كان يراجي امتى يطلع..
زي مرته ثريا بالزبط..
وفعلا..ماطولوش اكثر..وطلعوا بعد ماشربوا الشاهي..
~~~~~~~~~
فردوس وهي شاده آلاء من مرفقها بقوة:انتي مافيش غيرك انتي..
طوبى بضيق:خلاص يافردوس خليها..
فردوس بغضب؛كيف تبيني نخليها لين تجلطني تبي تفرق بيني وبين بوي !..
جبدت الاء يدها وهي تقول ودموع في عيونها؛والله ياماما ماقلته حاجه..ايه صح مانكذبش عليك قاعده نواصل فيه لكن ماقتله شي هو عرف بروحه..
فردوس بإنفعال:وتقول فيها عادي نتواصل معاه! يابه.يمه انتي ماتحسيش ماتفهميش ماكنتيش معانا يومها وسمعتي جدك شن قال!؟
طوبى بقلق:بالله عليك اهدي يافردوس بوي تو يسمعك وتصير مشكله..اطلعي انتي اطلعي وانتي تو نتفاهم معاها..
فردوس قعدت تشبح لبنتها بنظرات غل..
بعدين مشت فتحت باب الدار وطلعت..
طوبى سكرت وراها والتفتت لآلاء وقال بحده وحزم..
احكيلي اللي صار بالتفصيل وردبالك تكذبي..
الاء؛طوبى اني..
قاطعتها وقالت؛من غير كذب الاء..
غمضت عيونها وتأففت بعدين فتحتهم وقالت؛بنحكيلك لكن بالله عليك ياطوبى ماتقولي لحد بالله عليك..
طوبى عقدت حواجبها وهي تقول:احكي..
🍃🍃🍃🍃
وفي المربوعه..
لطفي وهو يشوف في الفراغ كان يقول..
في من وراها شي الحركه هادي..في شي يابوي..
علي:اكيد يبيك يكبر في عينك يبي يلين قلبك بس..
شبحلها بعدين قال..
بوي علاش تقول في كلام انت مش مقتنع بيه..
علي:لا مقتنع بيه وميه في الميه ولدك قاعد يدور في رضاك وخلاص..
لطفي هز راسه وقال؛باهي..راجي شويه راجي..وتو تعرف ان اللي في بالي وهو نفسه اللي في بالك وقاعد تقول في عكسه هو اللي قاعد يصير..
علي حرك راسه رفضا لكلامه وقال..
لا..لا..خودها مني من بوك..مافيش غير اللي قتلك عليه..
ابتسم لطفي تهكما وهو يشوف لبوه وقعد ساكت..
🍃🍃🍃🍃🍃
"يعني هو اللي خطف وليد ودار روحه طلعه"
الاء هزت راسها بضيق وهي ساكته..
طوبى سكتت وهي تفكر بصدمه وخوف في كلام آلاء...
وجت في بالها كلمه توا بس خدتها ع محمل الجد..
》 انت جايه تحذري فينا ولا..《
الاء وين شافت طوبى طولت في سكوتها قالت..
طوبى..
شبحتلها وقالت؛ماتقولي شي من اللي حكيتهولي توا لحد..مانبيش الدوة هادي توصل لبابا..
الاء بخوف:اني اصلا مانبيكش تحكي..
طوبى هزت راسها وقالت؛باهي..واسمعي ردي بالك مرة تانيه تتصرفي من راسك اي شي تبي ديريه قوليلي عليه بالله عليك ياآلاء..
الاء بضيق؛لاخلاص بعد اللي صار معاش بنفكر ندير هكي مرة تانيه..
طوبى:اين كان..اللي يخطر في بالك قوليلي عليه شن ماكان ياالاء ولو تلاقيتي انتي ومختار الكلام اللي يصير بينكم عاودهولي..
الاء هزت راسها وقالت:باهي..لكن انتي هكي زدتي خوفتيني..
طوبى وهي تشوفلها بتوتر قالت:ماتخافيش مافي شي يخوف...
🍃🍃🍃🍃🍃
"تراهن ع شني"
:الارض اللي في ****** حلال عليك..
مختار؛اووبااا خلاص كلمه راهو بنشدك منها والجماعه شاهدين..
فجأة رن تليفونه..
قامه وشاف المتصل صمت الصوت وشبح لجماعته وقال..
خلاص خلال 48 ساعة نجيبلكم المعلومات كامله بالصوت وبالصورة وبعدها كلكم تتأكدوا اني مانقولش في أي كلام.
؛تعرف لو طلع كلامك صح فضيحه كبيره للراجل..
مختار؛اني مانبيش نفضحه لكن هو لعب معاي واللي يلعب معاي يتحمل مايجيه..اه ع فكره مش هو بس اللي خلا مرته مقابل بش يمشي اموره..عندي قائمة طويله عريضه داسهم لليوم الاسود..وقعد يضحك..
واللي حواليه ضحكوا معاه وهما مرتابين منه..
هدا ضحك لما جاته رساله..
قام تليفونه وشافها..
عقد حواجبه بعدين رفعهم وقعد يكتب في الرد..
وبعته..بعد بعته حط تليفونه في جيبه وقال..
ايه وين كنا...
🍃🍃🍃🍃🍃
ووين خليت عقل طوبى يامختار..
اللي قعدت مع اللي حواليها جثه بس..وعقلها يفكر في تصرفاتك..
حتى بعد ماجي راجلها وروح بيها ماقدرتش تفكر فيه وفي حاله اللي منقلب 180 درجه..
وهو اصلا ماكانش شايفها من الاساس..
عقله محصور تفكيره في نجاة وبس..
قعد يتبع فيها وين ماتمشي ومش قادر ياخد خطوه اتجاهها ويطلب تسامحه وترجعله.
مادارهاش معاها قبل..مش متعود..ومايقدرش يديرها..
بس يقعد السؤال لعند امتى بيقعد ع هالحال؟
🍀🍀🍀🍀🍀🍀
ويعدوا الايام..
يوم ورا يوم...لين جي يوم الأربعاء..
4من شهر ابريل...سنة 2018..
يوم حفل زواج المحجوب ونبيله..
هو ماكانش حفل كبير..كان بسيط وعائلي ولولا حالة وفاة عائشه..
كانوا داروه في الحوش...
☘هداكا اليوم..
اريج والاء مع اميمه
مشوا لصالون تجميل معرفة أميمه كيف فاتح جديد ومش غالي..
مابوش يمشوا لفايزة ويحرجوها وتخلوها تخفض في اسعارها..
اما مطيره وفردوس وصفيه كانوا مكتفيات بطلة بسيطه اساسا اي مناسبه يخشوها توا بدون حماس لأن غصة سدرة اللي في قلوبهم لايمكن تخليهم يفرحوا من جدهم..
🍃من جهة تانيه..
كانت طوبى في هاليوم واخده قرار نهائي انها بتخبر الجالي عن حملها خلاص..
بس اختارت يكون بطريقه حلوة ..
تذوب جبال الجليد اللي قاعده بيناتهم..
وتجدد في حياتهم الزوجيه...
جهزت كل شي كيف مايكون بش يعيشوا ليله حلوة تشبه ليالي شهر العسل..
حتى انها شرتله هديه من غير مناسبه وفكرت ديرلها مناسبه بش تزيد قيمتها عنده...
وقداش كانت متحمسه لكل شي تبي ديره برغم القلق والخوف من ردة فعله بعد مايعرف بحملها وهي فالشهر الرابع. اللي شارف ع الانتهاء..
☘في مركز فايزة...
كانت وحده من العاملات تجهز في شعرها بش تغسلها..
وفايزه واقفه حداها تشوفلها وهي تهدرز ع طوبى..
فايزة؛لالا هديكا بكل لسانها ملوي ع رقبتها.
طوبى بضحكه:نجيها تاله العسل واكل من قلبي حته هالفرخه.
ضحكت فايزة وقالت؛سلمك يارب..
وشافت لشعر طوبى بعد مافكت العامله المساكه اللي كانت شداته..
انصدمت...
واللي صدمها الشيب اللي كان متوسط الراس من الخلف وكان واضح..
هذا غير وضع شعرها اللي كان تاعب هلبه..
شبحتلها وقالت؛طوبى شكلك ليك هلبه ع الحنه؟
طوبى؛ليا هلبه ع هلبه حاجات معاش حصلت فضوة لروحي بكل...كثر الله خيري كان مشطت شعري مرة في اليوم..
اللي دار في بال فايزة لحظتها..
سؤال واحد..يعني معقوله يكون راجلها شايف حاجه زي هادي وساكت مستحيل..هي تعرف طبع الجالي من كلام نسرين عنه..
دار في بالها بعدين سؤال تاني..
معقوله طوبى مالاحظتش الشيب اللي في شعرها!؟
شويه وجت للعامله وقالت:بري اني تو نكمللها..
هي هزت راسها وقالت:حاضر..
وقربت فايزه من طوبى وقالت..
طوبى شعرك فيه شيب..
فتحت عيونها ع وسعهم وقالت..
شني!؟
فايزة؛هني من الجهه الهادي..وفي كم شعره هني معقوله ماشفتيهمش!؟
طوبى شبحتلها بصدمه وقالت؛فايزة اني اصلا شعرتي لونها اصفر ولا نسيتي اكيد هدا لون شعري الاصلي مش شيب ركزي شكلك دايخه..
فايزة معاش عرفت شن تقول..
وطوبى وهي تشوف للمرايه عيونها دمعوا وقالت..
منين بيجيني..!؟ بالله عليك زيدي ركزي..
فايزة قلبها وجعها ومعاش عرفت تتكلم..
طوبى بلعت ريقها ومسحت دموعها قبل لينزلوا وقالت..
باهي عندك صبغه نفس درجة لون الحنه؟
فايزة وهي شاده دموعها بقوة؛اللون هدا يبي سحب..
طوبى؛باهي اي لون اي لون من غير سحب..
فايزة هزت راسها وقالت:باهي راهي شويه..
ومشت من حداها وقلبها موجوع..
وطوبى تشوف للمرايه وهي مازال مش مستوعبه..
حطت يدها ع رقبتها..حست بروحها مخنوقه..
بعدين نزلتها وقعدت تحاول تتماسك بش ماتنهارش..
🍃البنت الجميله اللي ديما واقفه لروحها ومهتمه بكل تفاصيلها وصلت لمرحله شعرها فيها يبدا يشيب وهي مش حاسه بيه..موعرها ع بنت مازال عمرها مافاتش 21 عام🍃
شويه وجتها فايزة بصبغه بعد ماخلطتها ..
وين جت بتحطها..
طوبى بفزع قالت؛راجي..
فايزة؛خيرك!..
شبحتلها وعيونها معبيات دموع قالت..
"تمشي مع الحامل"
انصدمت فايزة وقالت..
انتي حامل!؟
نزلت عيونها وهي تهز في راسها..
شافتلها فايزة شويه بعدين قالت..
تو نبعتلك ع حنه..
ومشت طول من حداها..
وطوبى وقتها كانت حاسه وكإن في يد قاعده تضغط ع رقبتها وتزيد تخنق فيها..
بعتت فايزة عامله بش تجيب الحنه.
بعدين قالت لطوبى:حبيبتي نوضي وتعالي معاي..
ناضت وهي مضايقه ع الاخر..
لمت شعرها المبلول..
ومشت مع فايزة اللي حطت يدها ظهرها وهي ماشيه معاها لحجره تخص فايزة في المركز موجوده داخل..
🍃🍃🍃🍃🍃
فهالوقت..
في قاعه لأحد الفنادق الشهيره..
كان مقام مؤتمر معروف ليه علاقه بالبناء والعمارة..
بعني يخص المهندسين المعماريين..
اكيد حاضره الجالي بإعتباره مترأس لشركه تابعه للدوله..
كانت في احدى القنوات دايره معاها لقاء قبل بداية المؤتمر..
وتخش نجاه للقاعه وهي بكامل اناقتها وبطله حلوة جذابه..
لفتت الانظار ليها..
كانت تمشي مع زملائها في المكتب وهي تتناقش معاهم..
وعيونها رغم عنها كانوا يدوروا في الجالي..
لين وصلوا لمرادهم..
لما شافتها..قلبها فر...واجتاحتها مشاعر الشوق اجتياح..
هو كمل اللقاء وجي بيمشي لواحد يعرفه..
جو عيونه عليها..
غيرت عيونها طول وكملت طريقها مع زملائها..
وهو قعد معاها بعيونه...
كمل طريقه ومشي للشخص اللي قاصده..
وحاول يتجاهلها...
اما هي قعدت تسرقله في النظر..
وشوقها ليه غالبها...
شويه وبدي المؤتمر...
الزوز كانوا فيه يحاولوا يركزوا ع مجرياته..
بس كل واحد منهم قاعد يسرق في النظر للثاني بدون مايشوفه..
لعند ماجت لحظه طلبوها فيها من الجالي يركب ع المسرح ويقعمز مع الضيوف الموجودين بش يشاركهم..
ومشي الجالي وقعمز معاهم..
وخدي المايك وقعدت تتوجهله الاسئله وهو يجاوب بثقه زايده كعادته..
وهي مش قادره تحول عيونها عنه..
بتموت عليه..ومشتاقتله لأبعد حد..
بس لازم تتجاهل مشاعرها وتعفس ع قلبها بش توصل لمبتغاها.
🍃🍃🍃🍃🍃🍃
"كيف هكي ياطوبى كيف"
طوبى وهي تبكي:مش عارفه كيف يافايزة درقت في الاول ع خاطر المدرسه بس بعدين خفت نقول..
فايزة بصدمه؛علاش!؟
طوبى سكتت شويه بعدين قالت؛في حاجه كانت تمنع فيا يافايزة في حاجات تصير توقف فيا مش عارفه كيف نشرحلك بش تفهميني...بس خلاص اني الليله ناويه نقوله خلاص..
فايزة؛ومعاش تأجلي لو شن يصير..فكري توا شن يخلصك من لسانات عزوزتك وحمواتك بنت عمك لتوا مش مصدقات انها ماتعرفش بحملها قبل لتجهض وطلعوا عليها دوة تنوضي انتي ديري هكي!؟ طلعتي غبيه هلبه ياطوبى غبيه..
حطت طوبى يدها ع وجهها وقعدت تبكي..
وهي تقول في نفسها..
"ااه يافايزة لو تعرفي اللي اني عايشه فيه..ياريت نقدر نحكي ياريت"
فايزة وجعتها طوبى وندمت ع ردة فعلها القاسيه..
ضمتها في حضنها وقالت..
اسفه حبيبتي مش قصدي من خوفي عليك قلت هكي..
طوبى شدت فيها وحست روحها في هديكا اللحظه انها في حضن سدرة..
مابتش تتكلم..قعدت ساكته وهي تتخيل في روحها في حضن اختها...
🍃🍃🍃🍃🍃
مقعمز قدام طاوله عليها رقعة شطرنج..
وقاعد يلعب مع خصم غير مرئي..
وهو يدندن بصوت منخفض..
"سواح..وماشي في البلاد..سواح"
قطع عليه باب المكتب وهو يدق..
قال بالفصحى وبنبرة صوت منغمه..
ادخل..
انفتح الباب وخش واحد وسكره وراه..
كان واحد من رجاله..
شبحلها برفعة حواجب وقاله..
ايه شن تخبرنا؟..
:طلعوا من الفندق وهو وراها بسيارته وصلها للعمارة وماقعدش...
ابتسم سخريه وقال؛وغد..
باهي اطلع..
طلع الراجل وسكر الباب..
وهو رجع شاف لرقعة الشطرنج وقال..
ياوغد ياخرتيت شكالك ماتمشيش معاهم الا من نمرة هديكا المعتوهه مش اختي اني..ااه لو تفيقي ياام العريف وتشوفي اختياراتك العظيمه انتي وبوك..
سكت شويه بعدين قال..
لكن معليشي تحملي ياطوبى شويه بش تعرفي بعدين من اللي يبي مصلحتك حق ومني اللي لوحك للنار بإيديه..
لازم تنكوي بالنار بش تعرفيها..معليش..
وخدي واحد من الجنود وقدم بيه القدام...
#رسالة_أخيرة
#طوبى
....يتبع....
