#طوبى "أقحوان وفلة وياسمينه"
#جمان_فريد
#الجزء_الثالث_والخمسين"اواخر الشتا1"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
واقف يشبح للقطوسه وهي ميته محطوطه فوق الركابه..
يسمع في خوه وهو يسأل فيه..
المهدي:بالك كانت مريضه وانتم مش حاسين بيها!؟
الجالي بألم؛لا..مش مريضه ماكان فيها شي..
بوه وهو مقعمز يشوفله قال:خود مرتك طلعها دير بيها دوره خليها تهدا..
الجالي تنهد من قلبه بضيق وقال؛مش حتطلع معاي يابوي نعرفها...
دق الباب..
شبحولها.
محمد شنيبه؛مش وقته اللي جاي توا..
مشي المهدي للباب وفتحه..
لقي سدرة قدامه ومعاها مطيره..
سدرة خشت طول بدون ماتكلمه..
جو عيونها ع بينكا وهي متمدده وميته..
وقفت وقعدت تشبحلها والدموع نزلوا من عيونها..
والمهدي يشوفلها بألم..
سكر الباب بعد ماخشت مطيرة اللي لما شافت بينكا قالت بألم؛ياروحي ..ياناري عليها طوبى شافتها هكي!
سدرة؛كيف ماتت!؟
الجالي؛مش معروف ياسدرة..
محمد؛خشي لأختك بنتي خشي شوفيها..
مشت طول سدرة خشت وعيون المهدي معاها..
ووراها مطيره..
🍃سدرة وهي خاشه داخل سمعت صوت بكي طوبى..
تبعاته..
جاي من دار المعيشه..
وصلت فيها وخشت عليهم..
لقت اميمه حاضنه طوبى وتحاول تهديها وهي تبكي معاها..
وحواليها باقي نساوين العيله واجعهم حالها..
ماعدا وحده...اللي خططت ونفذت الجريمه..
سدرة:طوبى..
طوبى لما سمعت صوت سدرة..
بعدت عن اميمه وشافتها..بعدين ناضتلها طول ومشت ارتمت في حضنها وهي تبكي وتقول؛ماتت بينكا ياسدرة..
ضمتها سدره بقوة قريب دخلتها لقلبها اللي قاعد يتقطع وهي تسمع في صوت عبراتها..
صوت عبراتها اللي كان يطرب في نجاة اللي قاعده تتصنع في الحزن..
وخديجه عيونها عليها..
☘☘☘☘☘
بعد العصر..
هدت طوبى هدوء الحزن المعروف اللي يجي بعد الصدمه الاولى والجزع بسبب الفقد..
تشبح في الفراغ وهي ساكته ودموعها ينزلوا..
وسدرة مقعمزة جنبها وتشوف لحالتها بقلق..
كانوا مقعمزات بروحهم في صالة حوش شنيبه..
شويه تكلمت طوبى وقالت..
نبي ندفنها في جنان حوشنا..
سدرة بصوت مبحوح:باهي..
شبحتلها وقالت؛وبنزرع فوقها اقحوان..
نزلوا دموع سدرة مسحتهم وقالت:ديري اللي تبيه..
طوبى؛نبي بابا..وينه هو؟..عرف باللي صار لبينكا؟
سدرة هزت راسها بحزن وهي ساكته..
طوبى:نبي نمشي لحوشنا سدرة..
سدرة؛باهي..نوضي نمشوا توا..
ناضت طوبى وجت لسدرة وشدت فيدها بقوة..
شبحت سدرة ليدها ودموع نزلوا من جديد..
محستهم وقالت؛هي تعالي..
ومشوا الزوز مع بعض طلعوا من الصاله لدار المعيشه.
خشوا عليهم..
سدرة قالت:بناخد اذنك خالتي مغليه بنروح بطوبى لحوشنا هي هكي تبي..
مغليه بحزن؛اللي تبيه ديره بنتي..
هزت سدرة راسها وقالت:هيا عمتي..
ناضت مطيره وهي تقول بحزن؛هيا..بالسلامه..
سدرة؛السلام عليكم..
وهما ردوا عليهم؛بالسلامه..وعليكم السلام..
ومشوا طلعوا من حداهم...
تنهدت نجاة وقالت:هي صح قطوسه بس والله توجع مسكينه منظرها يقطع القلب..
خديجه رفعت حاجبها وقالت في نفسها تهكما"ياروحي عليك ياحساسه"
عائشه بحزن؛مافي حد يوجع قد طوبى مسكينه..كلا اللي مات بنادم ولاحيوان تريح..
مغليه ونسرين وخديجه شبحوا لعائشه وهما يفكروا في قصدها من كلامها..
اما نجاة قالت؛عندك حق..اني بكري قلتلها اللي صار في الورد من العين وحتى القطوسه لحقتهم ديما تنزل عليهم في الفيس ستوري وبوستات توقعت تصير فيهم حاجه..
مغليه؛صدقتي..حتى امس في العرس العيون عليها بس يشوفوا فيها كيف سامنه وباينه فيها الراحه..عطوهالها ياناري..
نجاه بأسف مصطنع:معاش يخلوا حد في حاله..
اميمه تنهدت وقالت؛ربي يكفينا شرهم..
شبحتلها نجاه لقتها تشوفلها بنظرات مش مريحه..
غيرت عيونها عنها وناضت وهي تقول:ان شاء الله هدا حد سوء ومانشوفوا في حد مكروه..بعد اذنك عمتي اني مروحه توا هداكا هو..
ومشتلها سلمت عليها وباست راسها..
مغليه:مش تغطسي.
ابتسمت نجاة وقالت:حاضر..
مررت نظرها عليهم وقالت:هي بالسلامه ياعيله..
ردت عليها نسرين بس:بالسلامه..
هي مشت طول وقالت:جوري سلمي وتعالي..
جوري:حاضر..
طلعت نجاة..
وجوري سلمت ع الكل بعدين قالت لسدرة؛كان جتكم بيبو مرة تانيه قوليلها قالتلك جوري ماتزعليش بينكا في الجنه..
اثرت فيهم كلماتها كلهم ابتسموا بحزن..
سدرة ودموعها في عيونها:باهي..
جوري:باي..
سدرة:سلام..
ومشت جوري طول طلعت..
🍃برا..
روحوا الرجاله من صلاة العصر..
وهما خاشين لشارع القهوة..
المهدي:تطلع مريضه وهما مايندروش عليها..
عبد القيوم؛مرات متسممه..
عقد حواجبه وقال:مسممه!؟
عبد القيوم وهو يشوف لنجاه طالعه بالسيارة من حوش شنيبه:واكله حاجه فاسده..
المهدي سكت وهو يفكر في كلامه..
وعبد القيوم عيونه يشوفوا لنجاة وهي في سيارة بكره..
🍃من جهة تانيه..
لطفي بضيق:كان تخليها تبات عندنا الليله..
الجالي:تبات ياعمي لأمتى ماتبي المهم تهدا وترتاح نفسيتها..
لطفي:بارك الله فيك..
مشوا هو وياه لحوش شنيبه ع بالهم طوبى قاعده غادي..
عبد القيوم مشي للحوش .
والمهدي لحق لطفي والجالي وخشوا للحوش..
☘ونضال خش لشارع القهوة..
ومعاه زوز نساوين لابسات جلابيب وشاربات كبار..
وصل بيهم قدام حوش سدرة وقال:هو هدا..
الزوز قالوله؛بارك الله فيك..
نضال حط يده ع صدره وهز راسه بعدين مشي للقهوة بش يفتحها..
جاه محمد وهو يشوف للنساوين اللي خاشات لحوش سدرة وقال..
محمد:نضال..
وقف نضال وشبحله..
هو وقف قدامه وقال:ماعرفتش من يكونوا؟
نضال؛لا والله قالوا يبوا حوش فايزة وخلاص..
محمد هز راسه وهو يشوف لشقة فايزة..
نضال:بنفتح القهوة تجي معاي.
محمد شبحله وقال؛قدام..
مشي نضال ومحمد معاه وعقله مشغول..
☘وفي شقة فايزة..
كانت مروة مقعمزة في الصاله ولاب توبها قدامها وتكتب..
وجدتها مشتده كالعاده راقده وهي تسمع في القرآن من القناة السعوديه للقرآن..
باديه مشتده تضعف أكثر ومعاش تتكلم هلبه اغلب وقتها راقده او تسمع في قرآن..
وحالها هدا مخلي بنتها وحفيداتها قلقات عليها جدا..
دق باب الشقه..
سيبت مروة اللي في يدها وناضت بتفتح الباب..
وصلت فيه..وقالت:منو..
"افتحي"
صوت مراة..
طول فتحتلها..
لقتهم زوز..
لما شافوها ابتسموا..
وحده منهم قالت؛مروة ولاصفاء..
ابتسمت بإستغراب وقالت؛مروة..بس معليشي من تكونوا؟
"مروة "
مروة؛تعالي ماما..
النساوين الزوز شبحوا لبعض بتوتر..
ع جية فايزة وين شافتهم قعدت واقفه في مكانها تشبحلهم بنظرات كره..
وحده فيهم قالت:كيف حالك فايزة..
وهي تشوفلهم بنفس النظرات وماتبيش ترد عليهم..
مروة بإستغراب:مني هادم ماما؟
رفعت فايزة حاجبها وقالت؛ماعرفتيهمش!..ايه حقه نسيت كيف بتعرفيهم..هادم عماتك ماما..
شبحتلهم مروة وملامح وجهها تبدلوا للكره..
وحده فيهم دموعها نزلوا وهي تقول؛جيناك لحاجه ضروريه يافايزة بالله عليك ماتردينا..
مر قدام فايزة شريط الذكريات السيئه اللي خلوها حمواتها في حياتها..وتفكرت الكلام اللي قالوا عنها كله..
كانت حتلزهم بس تراجعت في اخر لحظه وقالت:خشوا..
فرحوا هما الزوز وقالت وحده فيهم:بارك الله فيك..
وخشوا الزوز..
ومروة سكرت الباب وهي تشوفلهم بكره..
☘☘☘☘☘
حاضن بنته وهو يقوللها؛الموت علي كل مخلوق نبات حيوان بنادم كلنا اخرتنا الموت يابنتي..ماقاعد كان الحي القيوم..
طوبى وهي في حضنه قالت:لاإله إلا الله..بابا نبي ندفنها في الجنان..
لطفي بعد عنها وقال:وينها؟.
طوبى خنقتها العبره وقالت؛برا في الصندوق متاعها.
نزلوا دموعها..
بوها مسحهم وهو متألم بعدين مشي طلع من الكوجينه..
وهي لحقاته..
لطفي التفت وقاللها؛خشي داخل..
طوبى:لا نبي ندفنها بإيديا..
لطفي تنهد بألم وهز راسه وهو ساكت...
🍃وبدي يحفر في مكان من ارض الجنان حفرة عمقها مناسب..
وبعد كمل .
طوبى طلعت بينكا من البوكس متاعها..
وقلبها معصور من الألم..
حطتها بكل لطف في الحفره خافت عليها تتأذى وخاشة لمكانها الأخير...
بعد ماحطتها قعدت تبكي بالعبرة..
لطفي وهو يشوفلها بألم:سدرة ياسدرة..
شويه وطلعت سدرة بعد ماسمعت بوها ينادي..
جتهم وشافت حالة طوبى..
لطفي:دخليها داخل..
جتها سدرة وهي موجوعه عليها..
نهضتها وهي تقول:تعالي ياعمري تعالي..
ضمتها ومشت خشت بيها داخل..
وبوهم حط التراب ع بينكا وهو في قمة الحزن وعيونه غارقات بالدموع...
☘☘☘☘☘
خشت لدار الكوي وهو خش بعدها..
سكرت الباب وقال؛عندك شك ان المصيبه اللي بليت بيها روحك ورا اللي صار اليوم..
الجالي:مش لهالدرجه..
خديجه ؛طبعا بدافع عنها ومش حترضى فيها كان نعرف شن دايرتلك بس..
الجالي؛عارفها مغلوله والغيرة ممكن تعمي عيونها ودير أي شي الا الحاجه هادي..
خديجه؛تو انت مصدقه اللي تقول فيه هدا!؟..
غير عيونه عنها وهو مضايق..
خديجه:تعرف هادي كان قعدت ع ذمتك حتوصل بيها تقتل حتى القتل..
شبحلها وقال؛ولو طلعتها من ذمتي متخيله شن دير!؟
خديجه؛انت غير انوى الطلاق والباقي خليه عليا اني..
شبحلها شويه.
بعدين مشي فتح الباب وطلع..
غمضت خديجه عيونها بأسف وغيظ..
بعدين فتحتهم ومشت طلعت وهي معصبه وجبدت الباب وراها..
☘☘☘☘
"حني يافايزة مش طالبين منك تسامحنا..حني نبوك تسامحي عزوز كبيره معاش قعدلها عمر تبي تقابل وجه ربها وهي مطيحه هالوزر عن كتافها"
فايزة قعدت تشبحلهم وهي تفكر بعدين قالت:باهي..
فرحوا الزوز ووحده منهم قالت:خلاص امشي معانا انتي والبنات توا..
فايزة:توا؟
:ايه تبي تشوفكم اليوم...
تنهدت وقالت:باهي..ناضت وهي تقول..استنوا شويه..
ومشت طلعت من حداهم..
~~~~~~~~
في جنان حوش لطفي..
فايزة بحزن:ياروحي عليها ربي يصبرها..
سدرة تنهدت بضيق وقالت:آمين..ماقلتيش وين بتمشوا انتي والبنات؟
فايزة ابتسمت تهكما وقالت:حمواتي سابقا جوني بكري شويه..
سدرة وهي متفاجئه:شن جابهم؟
فايزة:امهم شكلها حاسه ساعتها قربت..تطلب في السماح.
ابتسمت سدرة تهكما وقالت:يعيش عمر البنادم يتجبر ويظلم ويأذي ومايستاقظش لروحه الا بعد مايطيح..
هزت فايزة راسها وهي مبتسمه بتهكم..
ع جية مطيره وهي تلف في الوشاح ع راسها قالت:طوبى رقدت..
سدرة:بالسلامه توا فايزة.
فايزة:بالسلامه..
ومشت خشت سدرة..
ومطيره وهي تحشي وشاحها في الجلابيه:هيا فايزة..
طلعت فايزة وطلعت بعدها مطيره وسكرت الباب..
🍃وانفتح باب حوش فردوس..
واللي فتحه معتز لما شاف من جاهم ابتسم بدهشه وقال:عمي..
ابتسم عمه ومسح ع راسه وقال؛شن جو عزو..
معتز وهو فرحان:تمام..خش عمي..
خش عمه وهو سكر الباب..
:امك وخواتك قاعدات؟
معتز؛ايه..
:باهي ترا نادي عليهم..
معتز:خشي عمي للمربوعه وتو ناديلك عليهم..
ابتسم وقال:نخشوا للمربوعه..
ومشي بيه معتز للمربوعه فتح بابها الخارجي ودخله..
بعدين خش لأمه اللي كانت مقعمزة في وسط الحوش تطبق في الدبش وخبرها..
فردوس بإستغراب:ليه فوق تلاته سنين ماجانا..شن عنده جاي توا!؟..إن شاء الله خير..
ونادت..
أريج...آلاء..
~~~~~~~
بووليد:شن حالكم وشن اموركم..
ردوا عليهم وهما يشبحولها بريبه واستغراب:الحمدلله..ماشيه..
هز راسه وقال:الحمد لله..الحمد لله..بنتي اريج الفاتحه يوم الخميس..
اريج:خبروك عمامي اكيد..
:ايه قالولي وسامحيني اللي غبت يوم طلبوك كنت مسافر تعرفي..
اريج؛عادي مش مشكله..
هز راسه وقال:المهم...هدرزت اني وامي وقالت بيجيبولك بيانك وبديريه في حوش جدك..
اريج:ايه..
:بنتي..البيان ان شاء الله بيندار في الصاله وكل شي يخصه ويخص الفاتحه عليا اني..
تفاجئوا..
وفردوس قالت؛لالاصحيت ماتعبش روحك ولاتكلف ع نفسك..
:شوفي فردوس انتي مرت خوي ع عيني وع راسي سايرتك هلبه السنين اللي فاتوا بس لعند هني وياسر..بناتك وعطتيهم ودرتي نسابه بطليها الخدمه خلاص معاش عندك بيها عازة..ومصاريفك ومصاريف من اليوم عليا اني..
معتز قريب طار من الفرحه..
فردوس:شوف انت ياحاج..
قاطعها وقال؛هي كلمه مش حتثنى خلاص..قعمزي في حوشك معززة مكرمه سادك بهدله وتمرميد..حتى الناس كلت وجوهنا راهو..
اريج:امي مادارت شي يحشم..
:مش هدا القصد..بس انتي العيله اللي ناسبتوها من تكون!..مش حلوة في حقك انتي يابنتي امك تقعد دور من حوش لحوش وطيب للناس في العراس افهمي عليا..
فردوس:قبل كانت حلوة في حقهم عادي..
:اها..انتي اللي سكرتي راسك وقلتي بنصرف ع صغاري بروحي..ومصطفى هكي يبي ومش عارف شني..وصغارك شاهدين..
سكتت وهي تشوفله وبناتها يشبحولها..
معتز؛امي..
شبحوله..
معتز:امي بالله عليك ياسر والله بديت نخاف الولاد في المدرسه يعرفوا انتي شن تخدمي ويقعدوا يعزروا فيا..
انصدمت فردوس..
آلاء؛اني من زمان طحت في هالموقف وياما سمعت..
اريج:وشن اللي وكلك وشربك ولبسك السنين اللي فاتوا..بالك عمي..
:اريج..علاش الغلط توا!..
اريج؛قلت الحق عمي..لو تبوا تكفونا حق وتصرفوا علينا راهو جيتك هادي مفروض كانت من سنين مش توا بعد ماناسبونا عيلة شنيبه..!
فردوس:خلاص اريج اسكتي..
اريج؛لامعليشي يام سامحيني مش ساكته..عمي شكر الله سعيك مانبي منك شي..
:ماشاء الله ماشاء الله..ربيتي صغارك صح يافردوس!..
قالها تهكما..
وخلا فردوس تعصب من اريج وتقوللها؛تحشمي ع وجهك وسكري فمك..
اريج قعدت تشبح لأمها وعيونها معبيات دموع..
فردوس:اللي يبيه عمك يمشي عليك..
غيرت عيونها عنها وشبحتله..بعدين ناضت وطلعت من حداهم..
فردوس بغضب:اريج.
:خليها خليها يافردوس عاذرها جزء من كلامها عندها فيه حق..
شبحتله فردوس بنظره فيها كره وهي ساكته..
:المهم اني جيت بس نبلغكم اني غدوة ان شاء الله نبعت وليد يحجز في صالة كويسه وكل شي تبوه وناقصكم بلغوني بيه واني نوفره كله.
هزت فردوس راسها وهي شاده دموعها بالسيف..
ومعتز وآلاء فرحانين ع الآخر..
☘☘☘☘☘
راقده ع سرير..
وهي في اسوأ حالاتها واضعفها..
زي الخرقه الباليه..قاعد منها بقايا انسان..
بنات ولدها يشبحولها بشي من الشفقه ع حالها..
ماكانوش حاسين بشعور غير شعور الشفقه اتجاهها..
هي اللي كانت تاخد في انفاسها بصعوبه قالت بصوت يدوب طالع؛اقربوا خيركم بعاد..
عمتهم:سلموا ع حناكم..
البنات شبحوا لأمهم..
فايزة شافتلهم وهزت راسها بالموافقه..
قدموا البنات بالوحده..
صفاء..وبعدين مروة..وتاله..
باسوا راسها..
ووخروا..
وهي تشوفلهم بألم وندم ودموعها تنزل ع وجهها المجعد المجهد من مرور الزمن وتعاقب العقوبات..
قالت بصوت متعب:سامحوني يابنيات ولدي سامحوني..رشفت وهي تقول..ياريت الزمان يولي..ياريت..
وقعدت تبكي..
وبنتها تشوفلها وهي تبكي..
والبنات متأثرات..
هدت بكي وقعدت ترشف وتمسح بيدها الضعيفه في دموعها وهي تقول؛قولوا مسامحينك ياحناي..
صفاء ودموعها في عيونها؛مسامحاتك حناي..
مروة بحزن؛مسامحاتك..
تاله وهي تشوف لخواتها قالت:حتى اني..
ابتسمت عمتهم وهي تشوفلهم..
فتحيه:الحمد لله..الحمد لله...ربي يرضى عليكم ..شبحت لفايزة وقالت..وانتي يافايزة..نبي نموت مرتاحه بنيتي..
شبحت فايزة لبناتها وقالت:ماما ترا اطلعوا راجوني برا..
شبحولها شويه..
بعدين صفاء قالت؛حاضر..
ومشوا طلعوا البنات..
وحماتها تشوفلها بقلق..
مشوا البنات طلعوا وسكروا الباب..
فايزة شبحت لفتحيه وقالت؛طول السنين اللي فاتت هادي كلها مافكرتيش تطلبي السماح كان توا!؟..
اللي درتيه ماكانش يستاهل تطلبي قبل هكي وانتي بصحتك وقوتك!؟
حماتها:فايزة اتقي الله!..
شبحتلها وقالت؛وخيركم انتم ماخفتوش منه لما طلعتونا اني وبناتكم من الشقه..خيركم ماخفتوش منه لما سعيتوا بش تاكلوا حقهم في ورث بوهم..ماخفتوش منه لما اتهمتوني اني كنت ورا موت احمد..ماخفتوش منه لما طعنتوا في شرفي..
لما خليتوني نتمرمد ونتبهدل اني وبناتكم سنين طويله مافيش يوم تفكرتوا تسألوا عنهم..!؟
فتحيه تسمع فيها ودموعها تنزل سيل..
وحماتها قالت:مسود قلبك..
ابتسمت تهكما وقالت؛اني الل قلبي اسود صار!...ضحكت بسخريه وقالت..الظلمه اللي زيكم مايستحقوش السماح..
فتحيه بصوت باكي؛لايابنتي حرام عليك ارحمي حالي ساولتك بالله..
فايزة ودموعها ينزلوا:اني مظلومه واللي شفته ظلم حار وكبير ماينتسى..وربي عطاني حقين..حق العفو..واني ناخد منكم حقي يوم القيامه..
واني نبي ناخده يوم القيامه..يوم اللي نوقف فيه قدامكم وربي القاضي بينا ونقوله..
"خود حقي منهم يارب"
حماتها:مش سادك اللي صار فينا!؟
فايزة؛وشويه في امثالكم..شن اللي خلا الظلمه يزيدوا..غير انهم متأملين لما طيح بيهم ولا تقرب ساعتهم وين يطلبوا السماح يلقوه..
واللي زيكم حرام عليهم السماح..
"تحملوا نتيجه افعالكم..تحملوا غفلتكم عن يوم زي هدا لما طغيتوا وتجبرتوا..
ومازال..مازال يوم غدوة"
ولفت ومشت فتحت الباب وطلعت وقالت لبناتها:بروا اطلعوا..
وفتحيه تنادي فيها وتقول بصوت مجهد:فايزة..فايزة..
وحماتها طلعت وراها وهي تقول:حسبي الله ونعم الوكيل فيك يامسمه ياشيطانه..
البنات شبحوا لعمتهم بحده..
فايزة:ماتشبحولهاش اطلعوا..
مشوا طلعوا من الحوش..
وفايزة وهي طالعه شافت لحماتها التانيه اللي كانت واقفه في الممر وتشوفلها بألم..
جبدت الباب بقوة وقالت..
"الله لايسامحكم دنيا وآخرة"
☘☘☘☘☘
الساعه 10:00ليلا..
واقف ع اخته قدام المدخل وهويعطي فيها في ظرف فيه مبلغ..
نسرين؛متعاركين!؟
عمر بضيق:مالهاش لزوم الاسئله هادي..المهم خوديلها بيها حاجه باهيه قفطان ولااللي هو بش تلبسه في بيان نضال..لبسها ماينفعش بكل..
نسرين:مرات تحرج..
عمر؛اعرفي كيف تجيبهالها انتي مانبيهاش تحشمني..
نسرين هزت راسها وقالت:تو نتصرف..امتى الرحله متاعك؟
عمر:بعد نص ساعه...شن يصير معاك بلغيني..سلام..
نسرين؛في أمان الله..
~~~~~~~~
نسرين:شكله سمع دوتنا اليوم الصبح في دار الغسيل..
خديجه:احسن بش تصرف..
مغلية:هدا الحق لبسها ماينفعش بكل مش واخد شي باهي كان دبش الكسوة بس الباقي كله هرابيد.
خديجه؛فرق كبير بين بتاتها وبتات طوبى..شفتوا لبس طوبى واناقتها ولاقفاطينها..
نسرين:مفصلتهم برا..
مغليه:بنت فقر اميمه..كان مش من جدها راحت عليها ليل..
خديجه بغيظ؛ااخ يامرارتي..تتفكري لما درتنا يام شن قالت..عمر مايناسبنيش..عمر دار جناية في عمره اللي خدي وحده جربه وشايفه روحها ع الفاضي..
نسرين:مش شايفه روحها..تحسيها عندها احساس بالنقص تتحسس من ابسط تصرف ولاكلمة تسمعها..
مغليه:صح بالذات بعد فضيحتهم في الشارع..
خديجه:ندعي ربي هالفضيحه ماتوصل لوذان عماتي وسلفاتك يام..
مغليه:حي وحي بعدين الشماته ع اصولها...
نسرين؛يمشوا يملحوا..ع اساس هما فكروا فينا وين زوجوا ولادهم وحني بحداهم مادورناش..
خديجه:صدقتي..هذه بتلك..
مغليه تنهدت وقالت؛خل نوض نتوضا وندير مرقيه ونحط فيها ورق سدر ونبخبخ الحوش..
عيون الناس علينا المده الاخيره..الله يكفينا شرهم..
الزوز قالوا:آمين..
مشت مغليه طلعت من حداهم..
خديجه جبدت الفلوس من اختها وقالت:اني تو ناخدلها..
نسرين بخوف:لاخديجه بالله عليك وصاني اني هو فكينا من المشاكل..
خديجه بضحكه؛يابنتي بناخدلها ونعطيك انتي تعطيهولها..
نسرين:ديري عكس اللي قلتيه معاش تكلميني بكل ياخديجه..
خديجه بضحكه:خوفتيني!
نسرين فنصت وقالت:خديجه!..
ضحكت وقالت:نبصر عليك..بعدين تعالي هني امتى بتروحي انتي؟
نسرين:غدوة الصبح..
خديجه:خيرهم الصغار معاش يجوا معاك؟
نسرين:فوسي البنزينه شادتهم..
خديجه؛اعوذ بالله منها هالشوومه امتى تموت وتفتكي منها..
نسرين:ان شاء الله هي وولدها في يوم واحد يارب..
ضحكت خديجه وناضت وهي تقول:هي خل بنروح لزوزي مايرقدش لين نروح..
نسرين:من الحب!؟
خديجه بضحكه؛لا من الخوف يخاف يرقد بروحه..
قعدوا يضحكوا هما الزوز..
خديجه:تصبحي ع خير..
نسرين ناضت وهي تقول:بنسقدك.
ومشوا طلعوا الزوز مع بعض..
☘☘☘☘☘
"حي اريج شوفي!"
شبحتلها وهي تحت الغطا وقالت:شن في؟.
آلاء وهي مصدومه؛بينكا قطوسه بيبو ماتت..
حولت الغطا ونزلت من السرير وجتها بسرعه وقعدت تشوف معاها في التليفون..
كانت طوبى منزلة بوست فيه صورة لبينكا من اول يوم ليها معاها لعند قبل يومين..
وكتبت فوقها..
الوداع يارفيقة عمري...(بنكوشه)
نزلوا دموع اريج وهي تقول:كيف ماتت..
الاء :خل نكلمها نفهم منها ..
اريج:افتحي المايك..
اتصلت آلاء بطوبى..
نادى مرتين..وردت..
"أيوه"
الاء:ايوه بيبو شن البوست الاخير اللي نزلتيه هدا!..
قعدت تبكي..
اريج بألم؛بيبو...
"ماتت بينكا يابنات ماتت وهي حامل"
الاء بألم:ياروحي..
اريج حطت يدها ع فمها وقعد تبكي بصمت..
🍃موت بينكا خلف الحزن في قلب سدرة المهدي اللي رقدت في حضن بوها وهي تبكي..
والمهدي متأثر ع الآخر..
عائشه:غريب والله غريب..كيف يموتوا الورد والقطوسه في يوم واحد..
المهدي بإستغراب:شن قصدك؟
عائشه بحيرة؛مش عارفه يامهدي..بس حسيت ورا اللي صار في إن..
سكت المهدي وهو يفكر في كلامها..
وهي تشوفله كيف سرح بتفكيره وتقول في نفسها.
"حنخليك توقف عند هلبه حاجات غافل عنها يامهدي لين تعرف كل شي بروحك"
🍃🍃🍃🍃🍃
واللي يعرف كل شي.
ليلته ماقدرش يرقدها وبين عيونها اللي صار كله قاعد يتكرر..
مقهور قهر..لأنه عجز يدير شي..
عاجز يوقف اصحاب الشر عند حدهم..
مافيش في يده حيله..
غير انه ينشر اللي يحس بيه للناس وهي تشاطره شعوره بالحزن بدون مايعرفوا السبب..
وكان اخر منشور نزل بيت واحد من قصيده ألفها زمان...
" ماعاد فيه حنان...
ولا عاد حياة الناس كيف الزمان.."
🍃🍃🍃🍃
وتعدي الساعات..
بعد نص الليل..
المطر تنزل خيط من السمي..
في اللي غارق في النوم مايجيب نباها..
وفي اللي جفي عيونه النوم..
وقعدت تصب دموع حتى هي..
🍃عيون طوبى..
اللي كانت مقعمزة ع الصلايه وهي لابسه ملايه الصلاة..
ولابسه خاتم التسبيح وتردد..
"الله ربي لاأشرك به شيئا"
وتتفكر كيف كانت بينكا تحب تحوم حواليها وهي تصلي ولما تقرا قرآن ترقد عند رجلها..
بصوت باكي هامس قعدت تردد بألم..
"الله ربي لاأشرك به شيئا"
🍃واختها في دار المعيشه..
النوم مجافيها وهي تسمع في صوت المطر..
وكانت تدعي في سرها..
"يارب هون عليها فراقي لوكتبته علينا..ماليها حد غيرك"
🍃وبعد عنهم شوي..
كانت صاحبتها مقعمزه حدا امها اللي كانت راقده..
وهي تتفكر في اللي صار اليوم..
تنهدت ودعت في سرها..
"يارب اني مظلومه ومش ظالمه..من حقي اني مانسامحش وناخد حقي من الناس اللي قهرتني بظلمهم يوم القيامه وانت شاهد ع اللي ريته واللي عشته مافي شي خافي عنك..بندعيك بدعاء سيدنا نوح ياربي ...
"لاتزد الظالمين الاتبارا"
🍃وصاحبتها البعيده عنها..
كانت مقعمزة بروحها في الكوجينه..
تتفرج ع المطر وهي تصب من الروشن دعت في سرها..
نسرين..
"يارب قويني اللي جاي صعب عليا نبيك تكون معاي يارب وتخلصني من هالراجل الفاسق وتعوضني خير يارب"
🍃ورابعة صاحبات العمر..
كانت في دار نومها..
مقعمزة في مصلاها بعد ماصلت القيام..
وهي تعقد ع صوابعها وتستغفر..
وقفت استغفار وبدت تناجي الله في نفسها..
"يارب ماتخلي سكوتي..سكوت ع الحق..يارب افضحهم من عندك وخلص هالمسكينه منهم يارب"
🍃وجارتهم...
اللي كانت مقعمزة حتى هي مصلاها..
تقرا في وردها بعد ماصلت القيام..
كملت..
سكرت المصحف..
وغمضت عيونها ودعت من قلبها دعاء واحد بس..
نجاح...
ياذا الجلال والإكرام اكرمني بعطاء ليس له ولاند...
☘☘☘☘☘☘
تاني يوم..
السبت..
الساعه 10:30صباحا..
طلع من مكتبه ومشي بطريقه لمكتبها..
فتح الباب وخش..
لقاها مقعمزة ورا مكتبها ولاهيه باللاب توب..
قعدت ع حالها حتى بعد ماهو خش..
سكر الباب وجاها وقف قريب عليها وقال:لوين تبي توصلي انتي!؟
نجاه وهي تشوف للاب؛مافهمتش..
الجالي؛فوتيهم طروحك هادم..عارف ان انتي ورا اللي صار امس..
شبحتله وقالت ببرود؛علاش شن بينا امس..شفتك شفتني..كلمتك كلمتني!؟...لا..
الجالي خبط بيده ع الطاوله وقربلها وهو يقول من تحت سنونه؛انتي ورا اللي صار للقطوسه الورد..
ضحكت وقالت:اوو..لاياباش مهندس هلبه هكي ظلم..ايه صح اني نتمنى نقتل طوبى بطوبتها..بس يعني تقعد مجرد امنيات..ماتوصلش بيا اني نديرها ع ارض الواقع لاليها ولالغيرها..
الجالي:لو تحلفي ع المصحف مش مصدقك..
نجاة بضحكه:شكلي مخوفاتك هلبه..
شبحلها من فوق لتحت بإزدراء..
بعدين لف بيطلع..
بس لما وصل في الباب وقف لما سمعها قالت..
"تعرف لو طلعت اني اللي درتها حق مفروض تخاف مني"
التفت وشبحلها..
نجاة:لو هاه..لو...لو طلعت اني اللي دايرتها توقع اني ندير اكبر منها..يقولوا المراة لما تحب هلبه تولي مخلوق خطير مايقدر حد يتنبأ بأي شي ديره..
ضيق عيونه وقال:تهددي انتي!
نجاة بضحكه:قلنا لو حبيبي..لو ياروحي لو...فرضيات يعني..
رمقها بنظرات حاده..
بعدين لف وحط يده ع مقبض الباب بيفتحه..
وهي قبل مايفتحه قالت..
حول الحظر حياتي باهي...
فتح الباب بعصبيه وطلع وجبده وراه بقوة..
وهي تلاشت ابتسامتها وحلت محلها ملامح اللؤم..
وعيونها ع اللاب توب ورجعت لشغلها...
#اواخر_الشتا
#طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
