# طوبى "شارع القهوة" #جمان_فريد #الجزء_الثامن_والعشرين" قبل العاصفه4" الله أكبر..الله أكبر..لاإله إلا الله الله أكبر الله أكبر ولله الحمد... أحيوا سنة التبكير في هذه العشر المباركه.. لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ نضال؛حي ياحي هدا المهدي محطوط ع وضع الغليان نعرفها مشيته هادي كويس! :ماهو انت دير في جو فروخ قلنالك رد للبنت حاجتها.. هو التفت لصاحبه وقال:هدي خونا هدي حبيبي.. :عنده الحق نضال.. نضال عكرش وجهه والتفت بيشوف خوه.. وتجي عيونهم في بعض.. نضال بخوف..طبس بيحط الحاجات وهو يقول بشي من البطئ:وتوا...ياولاد.. وقف ع حيله وقال..المنعه.. طلعوا يجروا وهو معاهم ومن الخوف لين سبقهم.. والمهدي جي بسرعه للمكان اللي كانوا فيه وقف وقعد يشبحله كيف يجري هو وصحابه لين درقوا.. المهدي:تو تحصل.. وشبح تحت...لقي شنطه اريج وكيسة الحذاء.. خداهم الزوز ومشي بإتجاه البنات.. ☘سدرة؛خلاص نروحوا وغدوة ان شاء الله نطلعوا تاني ناخدو باقي الحاجات. الاء ودموعها في عيونها:غدوة بابا بيروح بينا. سدرة؛تو نكلم امك تقوله يخليكم يوم زياده فايزة؛عطيه مايكسر ايديه ياربي خرب علينا الطلعه.. عائشه؛قدر الله وماشاء الله.. طوبى بآستبشار:عمو مهدي. اريج بفرح من بين دموعها:الشنطه! قعدوا كلهم يشبحوله. وعائشه تغير لون وجهها انحطت في موقف لاتحسد عليه.. هو وصل فيهم وعيونه بس في سدرة.. ونظراته ليها كانت حاده..مدلها الحاجات وقال بنبرة هاديه باين فيها الغضب:خودي.. هي شبحتله شويه..ودقات قلبها تحس فيهم مسموعات لكل اللي حواليها.. نزلت عيونها للحاجات وخدتهم.. وهو لف ومشي وهو يقول:هيا.. ولحقاته عائشه بدون ماتقول تصبحوا على خير.. غرفة برفعة حاجب:تو مش قالت ماشي يقرب السيارة!؟ كلهم شبحوا لسدرة.. وسدرة قامت عيونها وشبحت جيهتهم وهما ماشيين.. بعدين غمضت عيونها وفتحتهم وقالت؛اريج.. جتها وخدتها منها الحاجات.. سدرة:خلاص بنروح..ومشت.. وهما مشوا معاها وكلهم مضايقات.. ماعدا اريج اللي فرحت انها لقت حاجاتها... هما مشوا والراجل جي جايب معاه اكتر من كندره بش تقيسهم ع الاء وهي تختار ماتبي. بس مالقي حد.. :وين مشوا؟ طلعله العامل اللي عنده وقال:الراجل اللي كان معاهم جاب الحاجات اللي انخنبت منهم بعدين روحوا.. بانت ع وجهه ملامح الخيبه..هز راسه بعدين مشي بش يرد الاحذيه.. ☘☘☘☘☘ طول الطريق.. والصمت سائد في سيارة المهدي.. هو عقله قاعد يفكر في الموقف وقاعد قاهره كلام سدرة مايحبش يبان في عينها اقل من ماهي تشوف فيه.. ومش مفكر نهائي في مشاعر الانسانه اللي جنبه اللي قاعده تبكي من داخل وان حبست دموعها من الخوف.. خوف من شني!؟ خوف من المواجهه تخاف انها لو واجهت توصل لنهاية الطريق...وهي ماتبيش..ماتبيش تخليه.. لأنها صدقا تحبه... ••وصلوا للحوش.. نزلت من السيارة ببنتها.. وهو نزل وراها ونزل الحاجات... ركبوا لشقتهم.. وخشولها وهي طول مشت ببنتها للدار بش بتحطها في سريرها.. وهو خش وراها وحط الحاجات ع السرير.. حولت الجلابيه والشاربه وعلقتهم بعدين قالت:تبي تتسحر توا.. المهدي وهو يحول في قميصه؛ايه.. مشت طلعت من حداه من غير ماتشوفله.. خشت الحمام بش تتوضا..تبي تهدا.. بس مجرد ماسكرت عليها باب الحمام انهارت ببكي مكتوم.. ومكبوت... ☘فهالوقت.. خشوا محمد ويزن للحوش.. طلع المهدي من دار النوم وهو يلبس في تشريته:شن صار.. محمد؛عيب عاد ياقبضاي 3شي.. قرب لولده هو مبتسم وقعد ينكش في شعره الناعم وهو يقول:ولد بوك.. يزن؛واني ولد مني.. جبده من شعره المجعد وقال:ولد المهدي.. وخداهم الزوز ومشي معاهم لدارهم.. وهي طلعت من الحمام تمسح في وجهها بإيديها ماتبيش تمسح وضوئها بالمنشف...ومشت للكوجينه توتي السحور.. ☘☘☘☘☘ "من الجالي!" نجاة:ايه بكري جابه وحط لحمزة فلوس.. طاهر وهو يفكر:غريب هلبه خوي هدا.. نجاة؛رد بالك تمشي تشكره مرات يديرلك حركه ولاموقف يحرجك ولايقهرك..والله بعدين نمشي نحرش عمي واللي يصير يصير.. شبحلها :لاااا..ردي بالك..ردي بالك...ان شاء الله تشبحيه شاد على رقبتي موس ردي بالك تدخلي بوي بيناتنا...والله يانجاه بعدين اخر مايجمع بيني وبينك.. طول نزلت دموعها وقالت:اسفه..بس مش متحمله فيك شي مش متحمله..وحطت ايديها ع عيونها وقعدت تبكي.. وجعاته وخاف عليها.. جاها قعمز قدامها وخداها ليه وقال:خلاص هدي يامراة مش باهي ليك البكي.. هي شدت فيه وقعدت تقول:ماليش غيرك ياطاهر خايفه عليك ديما ومش متحمله فيك شي. طاهر بإبتسامه:ماتخافيش مش مخليك بإذن الله..ومشاكلي اني نحلها بروحي..ريحي عقلك الحلو هدا.. هي قعدت ترشف وتشبح القدام بنظرات حاقده.. "والله ماهو مفوت حاجه من اللي دارها الله" 🌻🌻🌻🌻🌻 قبل الفجر بربع ساعه... خش للحوش وهو خايف..ويشوف هني وهني.. الحوش كان مظلم تأكد ان مافي حد والكل راقدين. مشي طول للكوجينه بيلحق ياكل حاجه.. خشلها وفتح الكوشه لقي حصته ملفوفه.. نضال :ااه ياموغي ياحبي الوحيد.. وبدي ياكل بسرعه قبل ليأذن الفجر. وهو في عز ماكلته.. انفتح ضي الكوجينه.. شهق حصلت في رقبته لقمه قعد يكح.. جاته امه تجري..صبت ميه وقالت؛بالشويه ياهمي خيرك.. ومدتله الطاسه هو شربها كلها.. بعدين شبح لأمه وقال:معقوله تخشي هكي..طقيتي الباب درتي صوت.. مغليه:وعلاش ان شاء الله خاشة دارك!؟ نضال غمض عيونه وهز راسه وهو قاعد يتنفس بسرعه بعدين رجع ياكل ويشوف لساعه الكوجينه.. مغليه:وين كنت دور لتوا.. "كان يدير في العار " فنص لين عيونه قريب طلعوا.. وقلبه كاد يوقف.. مغليه:عار شني العفو! المهدي قدمله وهو يقول:خليه هو يقولك عار شني.. هو لما شاف المهدي جايه طول مشي درق ورا امه وهو يقول:عارشني ياراجل صل ع النبي...تغييرت جو وخلاص.. المهدي وقف وقال:اطلع من ورا امك.. مغليه؛قول شن داير.. المهدي بعصبيه:اطلع.. نضال بخوف:تمام تو نطلع تو نطلع بس بشرط نتفاهموا زي الناس العاقله..الكبار قصدي..فهمت عليا.. المهدي بالتشديد ع الحروف:اطلع.. مغليه:خلاص اطلع وهو مش ضاربك هيا. نضال؛وشن الضمانه ياحاجه! المهدي قدم وقال:سامحيني يام.. وجبد نضال من وراها وشده من قفاه.. نضال؛خليك حضاري يامهدي بالله عليك..والله يطلع عليك جو الراجل الحضاري بالله جربه وحتدعيلي.. وطلع بيه من الكوجينه.. مغليه تنهدت بيأس وقالت:مش حيكبر الولد هدا عمره مايكبر.. ☘المهدي:راجل بشناباته زيك يحط راسه براس طفله! نضال؛بصارة مقلب خفيف..وبعدين معاش نبي نسمع حد يقول عنها طفله..تي هادي ترفعك للبحر وتردك عطشان.. المهدي رفع حاجبه وقال:يتكرر تصرفك هدا مع اريج بالذات صدقني حيكون ليا معاك تصرف تاني..وطلقه.. نضال وهو يتحسس في رقبته:حاضر.. ويأذن الفجر.. نضال:والله مازال عطشان وجعان.. المهدي:برا توضا تحرك..بش تمشي معانا للجامع.. نضال؛حاضر.. ومشي طول للدروج وركب يجري وهو مازال يتحسس في رقبته.. وامه فاتت ومشت للحمام متاعها.. ع طلعة طاهر من جناحه وهو موتي روحه. طاهر:هيا.. المهدي:خل نركب نبدل وننزل اني ومحمد.. طاهر:تمام.. مشي المهدي.. ع نزلة الجالي من فوق.. قام عيونه طاهر وقعد يشبحله.. وهو نزل وفاته ومشي بإتجاه المربوعه يشوف بوه.. تنهد طاهر بضيق ومشي قعمز ع كرسي موجود في الممر.. 🌻🌻🌻🌻🌻🌻 تاني يوم... روح طاهر بنجاة وولدهم للحوش.. وولت قعدت عندها صابرين بش تساعدها في معاناة حمزة وتعول عليهم.. نجاه وهي خاشه الكوجينه؛طلعي مفروم..وكبده..ودبابيس دجاج.. صابرين: رز بالخلطه ومبطن وكنتاكي.. نجاة:وشريبه وصلى الله وبارك.. طلعت صابرين الحاجات. ونجاة قعمزت وهي تقول:صار قلتيلي مرت بوك تسأل عليا وتبي تجيني.. صابرين:ايه مرض يفتفتها. نجاة:كلبه شمت ريحه الفلوس.. صابرين؛ظلمتي الكلاب.. نجاة:الحقيرة نست اللي داراته كله وتحسابني حتى اني بننسى.. صابرين سكتت ورجعت بيها الذاكرة للخلف.. كيف كانت تعذب فيها مرت بوها وتخليها متبهدله في خدمه الحوش مقابل انها توكلها وتشربها.. كان معاش بوهم ينزل في يدها وبش تخليهم ياكلوا ويشربوا..لازم يخدموها هي وولادها.. نجاه كانت كبيرة وواعيه وقتها بس لانها كانت طالبه مصروفها مش في يدها اضطرت تخدم في محلات بيع الملابس بش تحصل ماتصرف بيه ع قرايتها.. ومروة اختهم بعد تزوجت قعدت تساعد فيهم ع قدر استطاعتها.. بس ظلم مرت بوهم ودناءة ولادها زاد عن حده.. خلتها تاخد اختها وتنزل تقعد في الدور الاول المكتوب بإسمهم وقعدت تصرف ع روحها هي واختها.. وكانت هادي بغية مرت بوها بش معاش تصرف عليهم قرش.. ياما انحرموا..وعاشوا ليالي الجوع فيها يقرص في بطونهم... ياما مرضوا وعانوا رواحهم برواحهم.. وهي فوقهم وكأنها ساكنه في بلاد تانيه لاتندري عليهم ولاتعرف شن صاير معاهم.. صابرين بحقد؛سرطان يفتفتها.. نجاة:آمين يارب العالمين.. شبحت صابرين لأختها وقالت؛خلينا من سيرتها الزفت وقوليلي..شن جديد حوش شنيبه.. نجاة:زي قبل.. صابرين:سلفتك شن دايره..مرت المهدي..قالتها تهكما.. نجاة ابتسمت سخريه وقال؛لاهادي خليها بروحها...كان ماخليتها تطلق من المهدي قبل يتم العام مانوليش اني.. صابرين؛ع شن ناويه!؟ نجاة؛خليها لوقتها..اهم شي توا عندي الواطي هداكا. صابرين برفعة حاجب قالت؛الجالي.. نجاة:الله جعنه ديما جالي..ماخلانيش نجيب طبيعي مافرحتش بجيبتي فولدي..والله لنخلي غروره هدا ينكسر.. صابرين؛قولي شن في فراسك توا؟ نجاه تنهدت وقالت؛بعد العيد..نبيك تشوفيلي وحده تعرفيها كويس...... وكملت نجاة تحكي لأختها عن مخططها.. وصابرين في الاول تسمع عادي..بعدين بدت تبان ع وجهها ملامح الذهول..وتبدلت طول لملامح الضحك.. وهي تقدم لأختها وطق في يدها... ونجاة تفهم فيها بالخطوه من اول وجديد بش يرسخ الكلام في راسها كويس.. والتنفيذ يكون بعد العيد.... ☘☘☘☘☘ الساعه 12:00ليلا.. طلعت غرفه لسدرة في الجنان.. كانت سدرة تكنس فيه.. غرفه:سديرة.. سدرة:نعم؟ غرفه:توا كنت نقيس في لبستك باهي.. سدرة؛حي عليك كان نلقاها تمزقت! غرفه بضيق؛عاد مش لهالدرجه بالعكس جي عليا خير منك انتي ضاعفه هلبه.. سدرة؛ماتعبيش ياعمري ماتعبيش مش حتاخديها.. غرفه؛شكرا..ع العموم مش ع خاطر هكي جايه.. سدرة؛مالا علاش جايه بتعاونيني!؟ غرفه:لا طبعا..جيت بنقولك ان هداكا صاحب المحل حاط رقم وكاتب ياريت نتعارفوا. سدرة بإزدراء:مثقل دمه..بري بري..بري لوحي الورقه في الكناسه . غرفه بضحكه:اصلا منظره مايشجعش دعبول وسمينه. ضحكت سدرة وقالت:استغفر الله..بس الحق قنين.. غرفه؛سمنه ضيع كل شي... سدرة؛بري خشي داخل وماضيعيش وقتي في الدوة الفاضيه يللا.. ضحكت غرفه وقالت:امتى بيروحوا عمتي والباقي من السوق. سدرة:اكيد الواحد ونص تنين يخشوا.. غرفه:اممم.. وخشت داخل ومشت بتلوح الرقم.. بس وقفت فجأة لما خطرلها شي.. ابتسمت بخبث ومشت طلعت من الكوجينه للدار.. وسكرتها عليها.. ومشت قعمزت ع السرير وقامت تليفونها وضربت ع الرقم وحطاته ع وذنها.. نادى مرتين بعدين انفتح الخط.. "ايوه" هي بصوت ناعم؛آلو.. "ايوه تفضلي اختي من معاي" غرفه؛انت اللي حطيت لأختي رقمك في الحوايج اللي خدتهم.. "اختك!؟" غرفه؛اللي ضربت علاقة الوشاحات وطيحتها.. "اها تفكرتها بس معليشي يعني اني عطيت الرقم لأختك" غرفه بضحكه:صح...بس اختي مخطوبه ولما شافت الرقم جت بتلوحه اني خديته منها..تبي الصراحه..استلطفتك امس وعجبني موقفك معانا.. "صار اختك مخطوبه...خسارة الحق عجبتي هلبه" غرفه:الله غالب نصيب..يللا مش مهم..اني صراحه اتصلت بيك وعندي رغبه نتعرف عليك ونولوا اصدقاء شن رايك؟ "ماعنديش مشكله بس نبي نعرف انتي مني فيهم..اكيد اللي لابسه قونه امريكيه" غرفه في نفسها"قونه امريكيه يعع":ايه اني صح كيف عرفت.. "فيك منها وحتى البنيه الصغيره هديكا اللي عيونها ملونه تشبهلكم اختكم؟" غرفه:ايه الصغيره.. "الله يبارك..شن اسمك ياحلوة" غرفه:ميسم.. "معاك مبروك" بعدت التليفون وغمضت عيونها بقوة وهي بتضحك.. بعدين قالت..ع قولت بنت عم علا عبد الصبور.. مشلفط من كل النواحي..وضحكت بصمت.. بعدها ردت التليفون لودنها وقالت:ايوه مبروك.. "حلو كيف قلتيه" ضحكت وقالت:شكرا.. وقعدت تهدرز عليه مشوار بعدين قال.. "والله الهدرزة معاك ماينمل منها دمك عسل " غرفه:شكرا..حتى انت ع فكره.. "تسلمي..بنصكر توا مشغول بعدين نكلمك تمام" غرفه:تمام..سلام... "سلامات.." سكرت غرفه وقالت؛خفيف السمينه..لكن يضحك..خل نكسدوا عليه ماعندي ماندير.. 🍀🍀🍀🍀🍀🍀 وينفرط عقد ايام الشهر الكريم.. ويودع اهل الدنيا ومش معروف كيف حيلقاهم العام الجاي... ويااه من العام الجاي واللي بيصير فيه... حاليا... اول ايام العيد.. كانت اللمه في حوش الواعر الصبح من احلى اللمات في العيد.. وفايزة اللي ولت من العيله..كانت بايته معاهم ليلتها مع بناتها.. ومن الفجر ناضت مع مطيرة وسدرة يطيبوا في السفنز ويوتوا في الحلو والقهوة.. بعدين ناضوا البنات...حممتهم..وجففت شعرهم..ولبستهم وزينتهم زينه تناسب عمرهم بدون ماتحطلهم ذرة مكياج.. بعدين خدوا معاهم شكولاته..وطلعوا من الحوش بش يفرقوها ويعيدوا ع اللي يشوفوه.. طوبى:اييه ياحسرة بالله.. سدرة؛اشي كيف قالتها زي العزايز.. مطيرة بضحكه:راك قاعده رتيله.. طوبى:معناها تخلوني نطلع معاهم عادي!؟ سدرة:قعمزي وهني جمالك.. طوبى:مالا خليني نتحسر براحتي. ضحكوا عليها.. ☘وفي الدار.. غرفه؛كل سنه وانت طيب.. "روحت من الجامع طول كلمتك..انتي اول من كلمت عندك علم" هي قلبت عيونها وقالت؛اممم..شكرا.. ضحك وقال.. "خل نمشي نعيد ع الناس قبل تذهبيلي شيرتي" غرفه:لابرا عيد حتى اني ماشيه نعيد..هي سلام.. "سلامات" سكرت وقال:وواك..شن هدا لصق لصوق ماصدق..بس يللا اهو محصله عليه جو ورصيد.. وضحكت بعدين طلعت من الدار.. 🌻🌻🌻🌻🌻 صفاء ومروة وتاله لما طلعوا اول من لاقوا.. لطفي والجد علي وعبدالمطلب وولاده.. عيدوا عليهم ومدولهم طروف شكولاته.. مطلب خدي طرف الشكولاته ومشي طول للحوش.. اما بوه وخوه وولاده عطوا البنات عيديتهم.. ومشوا البنات كملوا طريقهم..واللي يلاقوه يعطوه شكولاته.. وياخدوا عيديه.. لين تلاقوا مع محمد شنيبه وولاده واحفاه.. محمد شنيبه بضحكه:ماشاء الله ماشاء الله.. صفاء ومروة:كل عام وانت بخير جدو.. محمد:كل سنه وانتم طيبات.. والشباب يشبحولهم بإبتسامه.. عيدوا عليهم وفرقول عليهم شكولاته بعدين خدوا العيديه ومشوا.. محمد:مروة يابطه شن طاح منك. وقفت وشبحت لوطا مالقت شي.. صفاء بضحكه:يتبرد عليك البارد.. شبحتله مروة بنظرة غضب ومشت وهو يضحك.. وصفاء مشت بتاله معاها وهي تضحك.. وهما ماشيات لاقوهم مهند وإياد.. صفاء لما شافت اياد ضحكت من الفرح.. وقدمتله طول ومدت الشكولاته وهي تقول؛كل عام وانت بخير عمو.. اياد؛بناتي..كل سنه وانتم طيبات.. تي شن هالجمال والاناقه واللبس الحلو..ماشاء الله ماشاء الله.. وهما يسمعوا في كلامه الحلو وفرحانات بيه بالذات صفاء.. مهند قام تاله وقال:كل عام وانتي بخير ياحلوة.. تاله:كل عام وانت بخير.. مروة:تفضل عمو.. خدوا اياد ومهند شكولاته من البنات.. اياد غمض عينه اليسار وقال:استنوا ثواني بس.. ومشي بسرعه وخش داخل.. مهند:شن دايرة خالتكم سدرة.. مروة:سفنز بالدحي يهبل.. مهند:لالا عاد رمضان كله يبعتولنا والعيد يفتونا! ع طلعة اياد وفي يده كياس:خيرك تعيط! مهند؛دايرين سفنز بالدحي ياغالي.. اياد:اووووو..شن رايك نمشوا ندحنسوا عليهم..وضحك.. مهند:لااعادي ندحنس ع خاطر السفنز ماعنديش مشكله.. اياد بضحكه مد الاكياس للبنات وقال:تفضلوا ياحلوات حاجه بسيطه من عمو اياد.. هما خدوا الاكياس وقالوا:شكرا.. صفاء:صحيت هلبه عمو اياد ع اللبس جبتهولنا.. اياد:بناتي انتم بناتي..اني ربي ماعطانيش بنيات وعوضني بيكم.. دموع صفاء عبوا عيونها..كل كلمه منها كانت تحسس فيها بشعور كانت نحس بيه زمان وفقداته..وبعد فقداته ولى عندها فراغ كبير قاعد يعبي فيه اياد توا بإهتمامه وكلامه الحلو.. مروة:شكرا هلبه عمو هلبه.. اياد قرصها من خشمها وقال:عفوا هلبه ياحلوة هلبه.. مهند:بتروحوا توا.. صفاء:ايه عيدنا ع الشارع كله.. مهند:خلاص معناها الي الدحنسه.. ضحكوا.. اياد بإبتسامه؛خل نمشي نسكر الباب.. مهند سبق هو ومروة وتاله.. وصفاء قعدت تراجي في اياد.. لين جاها..ابتسملها ودار حركه بأنفه..وهي ضحكت.. بعدين مسح ع راسها.. ومشوا الزوز مع بعض لحوش لطفي.. وقدام حوش شنيبه الاولاد يستقبلوا في اقاربهم اللي جايين يعيدوا.. واولهم الولد الكبير..المهدي.. اللي شاف اياد كيف خاش هو وولده مع بنات فايزة للحوش.. حاول يحافظ ع ابتسامته اللي يقابل بيها الناس بالسيف ومن داخل كالعاده محروق بنار الغيره.. ☘☘☘☘☘ "العاب وفلوس" مطيره؛من لما عرفناه وهو كريم الراجل هدا.. فايزة؛بس هلبه لبس والعاب وفلوس.. سدرة:بناتك الشارع كلهم يحبهم دمهم عسل ويخشوا الخاطر.. ابتسمت فايزة بحزن بعدين قالت؛بس البنات بدوا يتعلقوا بإياد..بالذات صفاء..تدوي عليه هلبه.. مطيرة قعدت تشبح لفايزة وهي ساكته.. طوبى:حتى اني تعلقت بيه لما كنت صغيره هو حنون وديما يقول كان خاطري يكون عندي بنات.. مطيرة:ربي يحفظه ويحفظ ولده ان شاء الله ويفرحه بيه.. وقالت وهي تضحك..خل نطلع السفنز لمهند... ع خشة صفيه واميمه وفي ايديهم حوافظ حلويات.. عيدوا ع الكل وخشوا قعمزوا في الصاله.. وسدرة دارت سفرة فطور وحلو وقهوة وطلعت بيها للصاله.. وقعمزوا يهدرزوا.. الكل كانوا منسجمين ويهدرزوا ويضحكوا.. الا اميمه اللي كانت في عالم تاني.. 🌻🌻🌻🌻🌻🌻 "يام امي كل سنه وانتي طيبه....امي...يام ايااه علينا عاد..مغليه عيد راهو" مغليه ودموعها ينزلوا:كل عام وانت بخير حبيبي..شن داير غادي بروحك ياأمي فهالعيد.. "مش بروحي يام درت صحاب ليبين هاه حتى شوفي.. ووجه شاشه اللاب ع اللي مقعمزين معاه في نفس الطاوله.. حيوها وقعدوا يقولوا.. "كل سنه وانتي طيبه خالتي..كل عام وانتي بخير" رجع الشاشه ليه وقال. "هاه شفتي جو العيد عندي كيف" مغليه وهي تضحك من بين دموعها؛ربي يحفظكم كلكم ياربي.. "شن جوكم انتم غادي" مغليه:اهو زي كل عيد..قولي عيدت ع بوك؟ "ايه يام كلمته بالتليفون..شن اخبار شارع القهوة مافيش جديد" مغليه؛لااطمن كل شي زي ماهو..نهار 20رمضان روحت هي وجدها من العمره.. هو وجهه ولى احمر وقالت بضحكه:تمام يام تمام.. وهي قعدت تضحك عرفت روحها احرجاته قدام صحابه.. ☘☘☘ وهدرزت عليه شويه تانيه.. بعدين طلعت لكناينها.. لقتهم مقعمزات يهدرزوا مع بعض بإنسجام.. ماضيقهاش وضعهم بالعكس فرحتله.. هما كله تزيد تربط طاهر بيهم اكثر.. لأنها تعزه هلبه..بس في نفس الوقت تبي تربط بوه فيها اكثر بيه هو... 🌻🌻🌻🌻🌻🌻 بعد المغرب.. كان واقف في الجنان يراجي بنت عمه بش بيهدرز عليها قبل يولي لعمله.. بس طلعت في مكانها اختها ومشتله طول.. غرفه:حسين.. التفت وشبحلها بإستغراب وقال:غرفه اهلا.. غرفه بإبتسامه عتب:كأنك ماتحبش تشوف وجهي صح؟ حسين:شن تقولي!؟ غرفه؛مانبيش تشوف غير وجهها هي وخلاص ولا؟..واخده قلبك وعقله وتغير عليها حتى من الهوا.. حسين بشي من الارتباك قال:خيرك شن جاك..وع من تدوي بالزبط مش فاهم شي!.. غرفه :لافاهم ياحسين..وعارف على من ندوي كويس ع طوبى..هو اني مش عارفه كيف حبيت طفله صغيره مش حتفهمك ولاحتعرف شي من اللي انت تحس بيه..لأنها طفله تفكر تفكير اطفال.. حسين رفع حاجبه وقال:ماهو قبل كانت تتلصق ع الشباب وتهدرز عليهم! سكتت غرفه وهي تشوفله بنظرات حاده مليانه دموع.. حسين؛شوفي غرفه نكذب عليك لو نقولك مش فاهمك ومش عارف شن فيك..ومش عارف كيف تفكري..لهذا اني مانبيش نكون شديد معاك في كلامي مانبيش نجرحك...اني نشوف فيك زي اميمه بالزبط وزي سدرة اختي بس ولايمكن يوم نفكر فيك بغير هكي.. نزلوا دموع غرفه وهي تقول؛مصح وجهك..ماتفكرش فيا اني وتفكر في طفله صغيره قاعده ماطلعتش من الاعدادي! واض عقلك فيها حاجه مش مزبوطه.. حسين وهو يحاول يكتم غضبه وقال:تلميحك الخبيث الحقير بندير روحي ماسمعتاش..ومافيش داعي نفسرلك مشاعري تجاه طوبى شن شكلها لأن امثالك..اصحاب نية الخبيثه اللي تفكيرهم كله ماشي للغلط مش حيفهموا. غرفه ودموعها ينزلوا؛بارك الله فيك ياولد عمي..بس ب بنقولك حاجه اخيره...عمرها ماحتكون ليك..تعرف علاش لأن نظرتها فيك زي نظرتك فيا خوها وبس..مش حتشوفك غير هكي..شوف هي توا في سن مراهقه واللي في عمرها عيونهم انفتحت ويفهموا في كل شي في وقتنا هدا...بس هي ماقدرت تفهم منك شي ولاتحس بيك..بالعلامه..طلعت الخاتم من جيبها وقالت..شوف..تعرف هدا قداش ليه رايح منها..من لما روحوا جدي واختك من العمرة مع هدا لادوراته ولااهتمت بيه..وهدا تعاملها مع كل شي يخصك ياحسين تعامل اخوه وبس..طوبى عمرها ماحتكون ليك ووالله ماحيصير منكم.. هو بغضب قال:حتى لو ماصارش مني اني وياها..حنقعد طول عمري بروحي ولانظلم حد معاي لاني عارف مش حنقبل غيرها في حياتي لو شن يصير.. ابتسمت تهكما وخدت يده وحطت فيها الخاتم وقالت:بجديات توجع ربي يكون في عونك.. ولفت وخشت للحوش وهي تمسح في دموعها.. خشت بعد ولعت في قلبه النار وحسساته بشعور بشع هلبه.. شعور الخوف من فقدان الأمل من تحقيق حلم حياته.. شويه وطلعت طوبى وهي مبتسمه قالت؛حسين.. شبحلها وهو عاقد حواجبه بدون مايرد.. وقفت قدامه وقالت؛شن جو؟. حسين؛تمام خيرك مش لابسه اللبسه اللي جبتهالك.. طوبى:اسفه..بابا خدالي غيرها ماقدرتش نخليها نلبس غيرها..نلبسها غدوة وخلاص.. حسين؛بس اني غدوة مش حنكون هني.. طوبى بضحكه:ايه صح نسيت..خلاص في العيد الكبيره.. حسها تتكلم عادي وتضحك بلامبالاه قعد كلام غرفه يتردد في عقله.. شبح ليدها وقال؛وين الخاتم.. شبحت ليدها وقالت؛حي نسيته بكل..شبحتله..ليا مدة معاش قابلني.. هو شد ع قبضة يده اللي فيها الخاتم وقال:مش مشكله..ع العموم اني جيت نسلم عليك..نشوفك ع خير.. طوبى بإبتسامه:ان شاء الله.. مد يده بيسلم عليها... هي بإبتسامه قالت:اسفه حسين معاش نقدر نسلم عليك باليد..حرام.. بلع ريقه وهو يشوفلها بنفس النظرة وحواجبه مازالت معقود.. برغم اللي صاير داخله واللي يحس بيه بس بان منظره هادي وخر يده وقال:كويس..هز راسه وقال...السلام عليكم.. ولف ومشي بسرعه.. وهي تشوفله وتقول؛وعليكم السلام.. تبدلت ابتسامه البرود ع وجهها لإبتسامه حزن غرقوا عيونها بالدموع ونزلوا.. وقالت في نفسها" مانيش محتاجه غير يكون عندي اخ في حياتي بس...وانحرمت منه مرتين.." ☘كان هداكا اليوم تعيس هلبه بالنسبه ليها.. احتياج طوبى للأخ كان اضعاف احتياجها لأمها.. لأن اللي حواليها قدروا يعبوا ولو جزء بسيط من الفراغ اللي خلاته امها.. بس اللي خلاه مختار كان فراغ كبير مافيش من يسده.. لقت روحها خاشه دار بوها..ودارت شي عمرها ماداراته.. فتشت في دولابه لين طلعت صورة مختار.. قعدت شداتها في يدها وتشبحلها والدموع ينزلوا ورا بعض.. رشفت وقالت؛علاش درت فينا هكي!؟ علاش مشيت وخليتنا نحتاجوك!؟ اني بالذات اكثر نبيك من بينهم كلهم..هما مش عارفه كان زعلانين منك..اللي نعرفه اني لازعلانه منك ولاكارهتك..يريد نقدر نوصل فيك ونقولك روح ع خاطري ياريت... وقعدت تبكي بصمت بش ماحد يسمعها.. بعدين خدت الصورة ودستها في كمها..وسكرت الدولاب.. مسحت دموعها كويس..وخدت نفس عميق..ومشت طلعت من الدار وسكرتها وراها.. ☘ويعدي الليل ع طوبى ومازال عقلها يفكر في اللي صار وشعور التعاسه والخذلان مرافقينها.. عكس غرفه اللي ولا كأنه صارت حاجه...اللي بكاته في النهار رداته كله ضحك في الليل وهي قاعده بروحها في دار المعيشه تكلم في مبروك.. هو في نظرها شلافطي ومايتقارنش بحسين في اي شي.. بس كان دمه خفيف ويضحك فيها... والاهم من هدا كله...يعبيلها في الرصيد.. بس هو اعجب بيها وحس بقلبه بادي يتعلق بيها حتى اعجابه بسدرة انتهي بسرعه لأنه كان مجرد اعجاب عادي بالذات لما عرف انها اكبر منه.. ☘اكبر منه.. زي عواطف ومراد بس فرق السن بينهم كان بعض الشي مبالغ فيه..ياما سمعت من تلقيح وكلام بالذات من الاقارب انه طامع فيها وواخدها ع خاطر فلوسها... بس هي ماكانت مدور حد..وتقول بس..حاسديني..يحسدوا فيا... عكسها نجاح اللي جتها فرصه حلوة زي عبد الحفيظ ورداته.. رداته لانها مش متقبله ولامرتاحه اللي تشوف فيه قدامها مع اختها خلاها تاخد هالقرار بدون ماتندم عليه.. ☘"قتلك ردت عليا بنت وقالت من انتي" "قتلك بنت اختي خيرك" عواطف:لاصوت بنت اختك نزبطه هدا صوت بنت تانيه يامراد. "بشن نحلفلك انها بنت اختي ياعواطف..تبي نجيك نحط يدي ع مصحف قدامك!" عواطف؛لالا..لاتجيني ولانجيك شوف روحك انت شن عندك قبل بعدين كلمني وسكرت في وجهه التليفون... نجاح؛بالك بنت اخته حقه.. عواطف:تؤ..هي نفسها اللي مرة ردت عليا لما كلمته وقالي اختي..واني مشيتها..غلط مفروض مامشيتهاش من الاول.. نجاح قعدت تشوفلها وهي ساكته.. عواطف؛هالحوش اللي ماباش يكمل كان هدا رانا قداش لينا متزوجين وراني مستحيل نخليه يتنفس من غير اذني.. نجاح:ماتلوحيش روحك عليه عواطف.. عواطف:شن نلوح روحي عليه متاعك عادي..هدا راجلي واني مرته مافيش بينا الدوة هادي.. سكتت نجاح بيأس. عواطف؛نفكر نسحب فلوس من حسابي نساعده بيهم.. نجاح نطت وقالت؛لاردي بالك عواطف ساد القرض .. عواطف مسحت وجهها بإيديها بعدين قعدت تفرك فيهم ببعض ونزلتهم لرجليها بعدها ناضت ومشت طلعت من الدار.. نجاح بقلق:يستر الله من اخرها.. 🍀🍀🍀🍀🍀🍀🍀🍀🍀🍀🍀🍀🍀🍀 وانتهت ايام عطلة العيد... وبدت الدراسه... السنه هادي طوبى واريج شهاده اعداديه من توا متخوفات منها.. اما اميمه صفت كالعاده بإمتياز وبتخش السنه الثالثه اللي تعتبر اهم واصعب سنه .. وغرفه خاشه متحمسه السمستر هدا بعد صفت وكذلك بعد جدها وصالها ع سيارة بتجيها من برا... وفي نفس الوقت قاعده مستمرة في تسليتها الجديده.. مبروك.. اللي كان مقعمز ع الكراسي الرخاميه يراجي فيها وهو بكامل اناقته وماكانش جاي فاضي.. قعد يشوف للطريق اللي تجيب للمكان اللي هو فيه ويراجي في طلتها... وهي طلت عليه واخيرا.. بدي يشوفلها بنظره مختلفه..لأنها وقعت في قلبه.. كانت حلوة هلبه وجذباته هلبه واستغرب كيف شاف لسدرة وماانتبهلهاش هي.. وقف ع حيله.. هي لما شافاته انصدمت وقالت في نفسها.. "حي عليه زاد سمن شكله العيد مشاه كله وهو ياكل..ووك ياربي ع اللحلوحه غبارة..وزعيمته مداير لحيه مدرقها بيها طيح سعده" لما وصلت فيه رسمت ع وجهها ابتسامه مزيفه ومدت يدها وقالت؛اهلا بيكو.. هو مد يده وصافحها وكان قلبه يفر فران وقال:اهلا بيك شن جوك.. حولت يدها بقوة لأنه كان شادها ضحكت بإرتباك وقالت؛تمام.. ومشت قعمزت.. هو قعمز وقال؛شن جو القرايه.. غرفه:لاالاسبوع هدا تنزيل القرايه الاسبوع الجاي.. شافت للاكياس وقالت..شن جايب معاك.. هو ابتسم وخداهم وحطهم بيناتهم وقال:حاجه مش من قيمتك.. وطلع علبه لونها احمر وفتحتها.. كان انسيال فضه بالخاتم متاعه.. غرفه:WOW! هوضحك وقال:عجبك؟ غرفه؛يجنن خيال.. مبروك بإبتسامه:المهم انه عجبك.. ورده لمكانه وحطه في الكيسه ومدها. هي خداته وقالت:شكرا بيكو ياذوق انت.. هو ضحك بعدين دفلها الكيسه التانيه وقال:فيها حاجات تحبيها.. فتحتها لقتها معبيه شكولاته.. غرفه؛محلاك بيكو بجد..وطلعين طرفين شكولاته. مدتله وحده .. ابتسم وخداها.. غرفه"طبعا ماعندكش مانع" وهي خدت وحده وقعدت تاكل.. وبدوا يهدرزوا مع بعض.. وهالمرة صوت وصورة..ومبروك مركز عليها كان يحفظ في تفاصيلها.. غرفه كانت جميله..بس طباعها السيئة خفتت وهج ع الجمال وماخلاتاش محط اهتمام.. وهو توا قاعد يشوف انها مازال اجمل من خواتها وملامحها لطيفه وبريئة اكثر منهم.. من بعيد شويه.. صاحباتها واقفات مصدومات وهما يشبحولها.. :حي روفي شن جاها!؟ :شكلها دوشنت شن هدا اللي مقعمزة معاه.. :تخيلوه يطلع ولد عمها.. :لاالا ولد عمها شايفاته يطير العقل..وبعدين عمرك شفتي عسكري رايح زي الفقمه!؟ ؛مرات في القوات البحريه... ضحكوا.. وبعدين قعدوا واقفات يراجو في غرفه لين كملت لقائها.. جتهم وهي شاده كيس الشكولاته في يدها اما الهديه دستها في الشنطه.. :روفي هدا شنو!؟ ضحكت وقالت؛منظر وجوهكم يضحك..هدا واحد هكي تعرفت عليه كساد..وع خاطر الحاجات الحلوة هادي.. :وووه منك انتي.. ؛هاتي هاتي عطينا.. وقعمزوا مع وقعدوا ياكلوا في الشكولاته وهما يتمسخروا ويضحكوا ع اللي جابها... 🌻🌻🌻🌻🌻🌻 "مريت عليهم وشفت التجهيزات كله كامل من مجاميعه" نجاة؛كويس.. صابرين قعمزت وهي تحول في وشاحها وقالت:اليوم صاحبتي قالتلي تفاهمت هي واحد يدبرلها بنت دير اللي نبوه..بس يبي..وقعدت تفرك في ابهامها بسباتها.. نجاه:قبل وبعد حنعطيهم..اهم شي الولد هدا مايقابلكش انتي.. صابربن؛لا بيني وبينه صاحبتي..بعدين هما فاهمين اني نبي نجرب صاحبي..حاجه عاديه.. نجاة هزت راسها وقالت:تمام... صابرين؛شن جو ننوس خالته اليوم.. نجاة شبحت لولدها بإبتسامه؛استاحشتك خالتو.. جاته رفعاته في حضنها وقالت؛واني اكثر ياروح خالتو.. 🌻🌻🌻🌻🌻 وجي اليوم اللي بعده.. يوم اسبوع حمزة.. عزموا عليه الاقارب من الناحيتين وحتى الجيران.. هالمرة بيمشوا بنات الواعر كلهم بدون استثناء .. ايه سدرة بتمشي بسبب اصرار نسرين ومغليه عليها.. مغليه تبي تقهر بيها عائشه تبي تأدبها علي تمردها.. اما نسرين فكانت تبي تبين ان الوضع طبيعي قدام نجاه.. طبعا فايزة برغم العزومه مش حتمشي ومعروف السبب.. ☘☘☘☘☘ الساعه 9:00ليلا.. جت ام طاهر وكانت لابسه بدله رسميه ومقعمزه في مكانها ومعاها اختها ومرت خوها.. قعدت تتفحص في الصاله بعيونها حست ان ايجارها غالي هلبه.. وهي دور بعيونها فيها شافت مغليه خاشه.. كانت لابسه تركينه لونها تركواز..طالعه عليها حلوة هلبه.. وخشوا معاها بناتها وكنتها وكانوا انيقات في طلتهم.. دلت مروة ع طاولتهم وقعمزوا..وتعاملوا معاملة الضيوف.. خديجه قعدت دور بعيونها ع صابرين مالقتهاش. شويه وشافت.. بنات الواعر كلهم خاشات وفي مقدمتهم مطيرة.. مطيرة:ريتوا الصاله ريتوا.. فردوس:كبيرة معقوله المعازيم يعبوها.. مطيره:يعبوها ياحنه يعبوها معارف مغليه وراجلها هلبه.. كانت العيون كلها ع بنات الواعر.. بالذات اميمه وسدرة كانوا جدا جميلات وملفتات للنظر.. مغليه:اشرت عليهم.. هما مشوا ناحيتهم.. ناضت مغليه.. وجتها مطيرة:سلموا ع بعض بالأحضان مغليه:ليك وحشه يامطيرة. مطيرة؛تسلمي..ماشاء الله كيف طالعه اليوم.. مغليه بإبتسامه:ماشاء الله عليك حتى انتي ماتكبريش.. والبنات يسلموا ع الباقي.. وبعد السلام.. مغليه؛لالا والله تقعمزوا معانا.. صفيه:مايسدوش الكراسي. مغليه:جيبوا غيرهم الطاوله كبيره وواسعه.. مطيرة:مانبوش نضيقوا عليكم.. نسرين وهي شاده في سدرة:غير بالله عليكم قعمزوا معانا واني تو نجيبهم الكراسي.. ومشت بتجيبهم.. وسدرة مشت معاها وهي تقول:هو القفطان.. نسرين بإبتسامه؛ايه بسيط وحلو خير من لبسك الاوفر قبل.. ضحكت وقالت:هي جيبي الكراسي.. وبعدين قعمزوا كلهم ع طاوله وحده.. مغليه وهي تشوف لأميمه بإبتسامه؛شن حالك اميمه.. اميمه بإبتسامه:الحمد لله.. مغليه:شن دايرة في القرايه.. اميمه:اهو كيف بدينا وربي يسترها.. نسرين:موفقه يارب.. شبحت لنسرين وابتسمت بعدين قالت:امين..شكرا. مغليه:ربي ينجحك ونشوفوك دكتورة كبيرة. شبحتلها وقالت؛تسلمي خالتي.. هدا كله وخديجه تشبحلها بكبر ومش طايقتها.. مطيره:بالله شن حال عمر شن داير في سفره؟ فتحت اميمه عيونها وسعهم وقلبها قعد يرف رفان.. ونسرين وغرفه يشبحولها.. مغليه:الحمد لله..قاعد يكلم فيا من غادي ويبان عليه انسجم غادي ودار صحبه ليبين وعرب.. مطيره:وناووين ديروله عرس قبل ولابعد يكمل اميمه ضايق صدرها.. مغليه بضحكه؛غير نخطبوله الاول.. فردوس بإستغراب:كيف!؟ مش خاطب بنت****** مغليه:لالا مافيش منها الدوة هادي اشاعات وكلام فاضي.. عمر ولدي يبي بنيه من شارع القهوة ان شاء الله بعد يروح نخطبهاله وماتسألوش من هي مش حنقول..وقعدت تشوف لأميمه بإبتسامه.. كلهم فهموا تلميح مغليه.. واميمه تحشمت ع الاخر.. وسدرة لأن ماكانش عاجبها غيرت الموضوع؛وينها كنتكم وولدها كان عروسه راهو قداش ليها خاشه.. فجأة.. انطفي الضي كله ودار بقعة الضو ع المدخل متاع القاعه.. غرفه بضحكه:ياريتك طالبه مليون جني.. وكل من في القاعه ركز بنظره ع المدخل.. شغلوا نشيد سامي يوسف.."اللهم صل ع سيدنا محمد" شاوفوا كروسه خاشه..ونجاه خشت بعدها دف فيها وهي لابسه البدله الصغيره.. والمفاجأة اللي كانت للطفيه انها نفس لون تركيبة مغليه... قعدت تمرر في النظر عليهم وهي طايرتلها.. وشويه وانفتحت الاضواء شويه شويه.. وشافت خديجه صابرين جايه ورا اختها وكان كالعاده جريئه في لبسها والباين ان قفطانها غالي هلبه.. وصلت نجاة للكوشه . قامت صابرين حمزة وحطاته في السرير.. وهو كان رغم الدوشه متعمق في النوم.. قعمزت نجاة ع الكوشه.. وشويه وبدوا يشغلوا في اغاني ع السبوع واولهم اغنيه.. "يارب ياربنا يكبر ويبقى قدنا" المصريه.. وماصدقوا ناضوا يهيجوا عليه.. وصابرين حدا اختها كانت ترقص ع خفيف وين تجي عينها في عين خديجه كانت تتعمد تقهرها بنظراتها.. وخديجه متعجبه من وقاحتها وقوة عينها.. شويه وبدت المصورة تصور.. صورت في الاول نجاة مع ولدها كم صورة.. وبعدين نجاة بعتت مروة تجيب ام طاهر.. مغليه؛شوفوا الكنه الباهيه شوفوا..رغم انها مش مدورتها ولامعدله عليها.. مطيره:علاش علاقتها بيها مش كويسه؟ مغليه؛هي اللي ماتبيش ترادعها مع حد..ناقمه ع محمد ونقمت ع ولدها وتوا ع مرته..وهي مسكينه متحمله وتساير..وين تلقيها الكنه اللي هكي توا..كناين توا كان تعاركم العزوز لمصلحتهم ولا تنصحهم يقلبوا وجوهم ويشدوا حياشهم بالشهر والشهرين.. سدرة حست ان مغليه تلقح ع عائشه..شبحتلها.. لقتها تشبح للفنجان المحطوط قدامها ووجهها في لون تاني. ضايقت ع خاطرها. سدرة:خيرهم امك وعيشه؟ نسرين؛امي تعرفيها واعره بس عويشه حتى هي مش ساهله وانتي تعرفيها كويس.. تنهدت سدرة وشبحت لنجاه كيف تصور مع عزوزتها.. لاحظت ان نجاه تحاول تخلي الجو حلو معاها بس هي مش طايقتها..وخدت الصورة بدون ماتبتسم حتى نص ابتسامه.. لكن.. طوبى كانت تشبح لنجاه وهي تحس بنفس الشعور.. "ياربي المراة عاديه وشكلها حلو مش قبيح بس ننفر منها هكي ونضايق لما نشوفها..اعوذ بالله من الشيطان الرجيم..خلاص طوبى معاش تفكري فيه الشعور هدا.." نزلت لطفيه ومشت لطاولتها.. ونجاه نادت ع مغليه وحمواتها ومعاهم عائشه.. ركبولها..خدت معاهم كم لقطه .. بعدين نزلوا البنات والكنه وصورت معاها بروحهم.. وكانوا جدا حلوات مع بعض بالذات لما خدوا لقطه وهما شادين حمزة مع بعض.. لطفيه انقهرت هلبه.. واللي معاها كانوا مضايفين ع خاطرها بس ماقدروا يقولوا شي.. شويه نزلت مغليه... ومشت قعمزت ع طاولتها.. والحاضرات يتكلموا عنها بإعجاب.. ويشكروا في معاملتها لولد ربيبها.. ويذموا في امه اللي كانت تبان عليهم متكبرة وماطايقه حد.. ☘☘☘☘ ومشت حفلة اللمه وسط اجواء حلوة... برغم من بعض التوتر اللي يشوب جو بعض الحاضرات.. زي خديجه..وعائشه.. نسرين كانت تبي بكل الطرق تثبت لنجاة عكس اللي في بالها عن المهدي وسدرة.. لهدا مشت لعائشه وسدرة نوضتهم.. وقعدت ترقص هي وياهم.. بعدين خلتهم يرقصوا مع بعض بروحهم.. ونجاه وصابرين اللي كانت مقعمزة ع يد كنبة الكوشه جنبها يتفرجوا عليهم.. نجاة وهي مبتسمه؛تبينلي ان. الوضع طبيعي بين صاحباتها.. صابرين؛عيشه واضح عليها ترقص بالسيف.. نجاة؛نصدق كل شي ولانصدق ان في صحبه دوم بين زوز نساوين بيناتهم راجل.. صابرين؛ومش أي راجل.. نجاة؛ماهو من غبائك وتهورك ريحتيه من بين ايديك ياغبيه.. صابرين:خلاص معاش تفكريني.. شويه وقفوا سدرة وعائشه وولوا للطاوله.. مغليه؛الله يبارك عليك ياسدرة.. سدرة شبحت لعائشه وابتسمت مجامله وقالت؛تسلمي خالتي.. وعائشه دير في روحها عاديه وتوزع في نظرها هني وهني.. شافت عواطف ماشيه للمسرح ركبت وبدت ترقص.. خديجه قعدت تفرك في جبهتها بإحراج.. وباقي الحاضرات يتفرجوا وهما يضحكوا.. نجاة بضحكه؛حماة خديجه هادي نكته.. صابرين ضحكت وقالت؛مصدقه روحها مسكينه لكن شوفي شن بنديرلها.. نجاه قعدت تشبح بفضول لأختها وهي نازله من حداها.. ومشت لعواطف وقعدت ترقص وهي لابسه كعب.. انصدمت عواطف لما شافتها.. حاولت تجاريها بس ماقدرتش عليها.. انسحبت والانسحاب طيب.. وقعدت صابرين ترقص واختها تشوفلها وهي تضحك.. هني..ناضت خديجه..ومشت حتى للمسرح وركبت ووقفت بعيد شويه عن صابرين وبدت ترقص حتى هي بالكعب.. خفت ضحكة نجاة وهي تشوفلها.. وصابرين انصدمت..واندهشت في خديجه ماتحسبهاش تعرف ترقص هكي.. حست انها تتحدا فيها وهي قبلت التحدي.. مطيرة؛صقع عليهم بنت شارعنا.. ضحكوا الموجودات ع الطاوله ومنهم مغليه.. والقاعه كلها كانت منسجمه مع مباراة الرقص اللي كانت تدور بين خديجه وصابرين.. كل وحده كانت تبان احلى من التانيه.. بس خديجه كانت اقوى بهلبه.. الزوز وهما يرقصوا قعدوا يتحركوا وتبادلوا الاماكن.. وكملوا..والكل متحمس ومنسجم معاهم وقعدت القاعه كلها تصفق.. ونجاة تتفرج وعاجبها الجو.. جتها مروة وقالت؛حماتك مش عاديه.. نجاة وهي تشوف لخديجه؛ايه مش عاديه مش عاديه بكل.. وتمت الاغنيه.. والزوز وقفوا رقيص.. تبادلوا النظرات الحادة بعدين اللي هادي نزلت من المسرح وولت لمكانه.. مطيره؛عطيك الصحه خديج.. خديجه بإبتسامه؛تسلمي خالتي.. طوبى:فضيعه هلبه الله يبارك كان نتعلم نرقص زيك.. سدرة:ريحي جمالك وانتي كل شي تبي تتعلميه! ضحكوا.. اريج؛وشن فيها خويله هادي اهتمامات اي انثى.. سدرة شبحتلها بتعجب... وكيف جت بتتكلم هما قالوا.. "الوي ياليلى علوي" وقعدوا يضحكوا.. سدرة وهي توزع في نظرها عليهم قالت؛باهب شن رايكم ماجيتش بنقولها.. مطيرة بضحكه؛الايام هادي شاده كلمة العب يا... سدرة اشرت ع عمتها وقالت؛ايوه هي هادي اللي جيت بنقولها.. ضحكوا.. ☘☘☘☘☘ وجي وقت العشي.. وطلعوا للحاضرات الذ الاصناف وقعدوا يتعشوا.. ونجاة في هالوقت مشت بتغير وتلبس قفطان كبير ومشت معاها صابرين تساعدها.. واختهم مروة واقفه ع حمزة ترضع فيه بالمرضعه.. بعد ماشبه الحاضرات كملوا عشاهم.. خشت نجاة بقفطان كبيره فيه ذيل طويل ودايرة لشعرها تسريحه حلوه.. ووراها صابرين مغيرة حتى هي ولابسه لبسة سروال نازكه.. وقايمه ذيل قفطان اختها... وصلوا للكوشه وقعمزت نجاة.. وصابرين تساويلها في ذيل القفطان ومروة جتهم تساعد فيها... فردوس؛خيال قفطانها.. الاء؛هي واختها لبسهم حلو هلبه.. وطوبى تشوف لنجاة بعين قالت؛-لولا ميش شعرها.. خديجه؛الميش موضة.. طوبى:اقطعها من موضه.. نسرين بضحكه؛علاش.. طوبى؛ابله نسرين اني نتفكر في شعرك كيف كان وكيف ولى توا من ورا الميش وانتي كل مايتحول تعاودي ديريه.. نسرين:صح.. خديجه حطت مرفقها ع الطاوله ويدها تحت ذقنها وقالت بإبتسامه؛والصبغه طوبى؟ طوبى ابتسمت وقالت؛الصبغه اهون طبعا وحتى مفروض تختاروها صح نوعيه ممتازة مش اي كلام ولازم يكون شامبو بلسم خاص بالشعر المصبوغ.. عائشه:ع هكي لما تكبري مش حتصبغي.. طوبى؛لاعادي نصبغ..بس نفضل الحنه اكثر.. تفاجئوا.. وخديجه قالت:الحنه! طوبى:ايه مليانه فوائد طبيعيه للشعر وتعالجه وتعطيه لون حلو ولماع.. مغليه:والله كنت نحني فيه وكان ياسلام عليه خشيت ع سريب الصبغه تنتف وولى شعرتين.. طوبى بضحكه:ولي للحنه خالتي.. فردوس؛خدمة طوبى مع فايزة علمتها هلبه.. نسرين خفتت ابتسامتها.. طوبى؛صح تعلمت من ابله فايزة هلبه بس في حاجات تعلمتها من التلفزيون والمجلات.. خديجه؛ربي يبارك عليك.. ابتسمت طوبى.. وغرفه كالعاده تسمع فيهم وهي بتنفجر.. واميمه منصته اكثر ماتتكلم لان هدا طبعها غالبا.. الطبع اللي البعض يعتبروه انطوائيه او عرض من أعراض الرهاب الاجتماعي.. وهو في الحقيقه ميزة لنمط شخصيه معين .. الشخصيه الحكيمه والمتعقله والهاديه... 🌻وتمت حفلة السبوع.. وروحت نجاة وهي فرحانه ع الآخر دارت سبوع لولدها ماكانتش تحلم بيه حتى الحلم.. نجاة:ماشاء الله وليدي لم اليوم 2000..مع الفلوس اللي قبل قريب يسكر 5000.. طاهر بضحكه؛دار ثروة من اول يوم.. نجاه؛ماشاء الله عيلة بوك وعيلة مرت بوك ناس قمة الكرم غير الفلوس هدا..ليا اني وحمزة.. طاهر:حتى حني زليطنيه ياحلوة. نجاة سخرية؛تستور ياسيدي عبد السلام.. طاهر بضحكه؛أستغفر الله... ☘في الدار التانيه.. صابرين وهي تتكلم بالتليفون:ايه غدوة قبل المغرب بشوي.. في الفروسيه...تمام... المهم زي ماقتلك.....قبل المغرب بشويه.. ☘وياترى شن في تاني يوم قبل المغرب بشويه ؟! 🌻🌻🌻🌻🌻 تاني يوم.. قبل المغرب بنص ساعه.. عاده الجالي يوميا انه يمشي لمده نص ساعة في نادي الفروسيه... نجاه.. "زي ماتعرفي انتي الجالي الوحيد الرياضي بين خوته خاش صاله..وداير جو لروحه ماتشبحيش في جسمه كيف طول في عرض!...ياستي الافندي عنده عاده يوميه قبل المغرب حتى لو كانت عنده خدمه لازم ياخد اذن ويمشي للفروسيه. بش يتمشى فيها نص ساعه تقريبا ع حسب كلام اخته.. وطبعا الفروسيه زحمه وغادي انسب مكان يصير فيه اللي اني نبيه" خشت البنت المبعوته من طرف واحد يعرف صاحبة صابرين.. شايفه صورة للجالي وعارفه مواصفاته كويس.. قعدت دور عليه لين لقاته..كان يتمشى زي ماقالولها.. تفحصت المكان بنظرها كويس وهي تفكر كيف حتنفد مهمتها.. شبحاته هو وين قاعد.. مشت هي لمكان بعيد عليه مباشرة.. وقعد تشوفله..لما لاحظت انه بادي يقرب.. قعمزت بطريقه مش طبيعيه بانت وكانها طايحه.. وهي تشوف حواليها كان في حد مركز معاها لقت اللي هدا لاهي بعمره.. خلاص الجالي قرب.. هي طول بدت تبكي وتقول؛وووك عليا ياربي ووك.. هو وقف وحول نظاراته وقعد يشوفلها ويقول:خيرك اختي لاباس.. :انعكفت رجلي وطحت..حاستها انكسرت..ااه.. وهو طبعا تحرك فيه شعور البطوله.. قربلها وهو يقول؛حاولي توقفي ترا.. البنت كانت تحاول وهي تشوف حواليها وتشوف كان في حد مركز.. لاحظت في من شبحلها.. البنت:مش قادره نوقف..معليشي خوي خود يدي وانهضني والله ماقادرة نمدها نحس في روحي بندوخ.. هو؛تمام تمام.. وطبس عليها وخدي يدها وجي بينهضها.. وهي شبحتله شويه.. وهوقال؛خيرك.. البنت قعدت تبكي وتقول كمل كمل.. وهو قاعد يحاول معاها.. اللي يشوفله من بعيد يقول يجبد فيها بالغصب.. وهدا اللي صار...ولما الناس بدت تركز.. البنت بأعلي صوتها قعدت تعيط وتقول.. "زودولي ياناس فكونا منه المجرم هدا" هو انصدم بقوة.. الجالي بصدمه؛شن تقولي انتي!!.. وجي بيجبد يده وهي شدت فيها بقوة.. بان ع الناس وكأنه يكر فيها كران.. وهي تعيط ع طول رقبتها.. ويجوا الرجاله يجروا للجالي.. ويشدوه ويجبدوه عنها.. وهو يقول بفجعه؛كذابه اقسم بالله كذابه.. وطاحوا فيه ضرب وبوكسات.. والبنت تبكي وتعيط وتقول.. حسبي الله ونعم الوكيل فيك يامجرم.. هو حاول يقاوم اللي يضربوا فيه لكن ماقدرش عليهم مجموعه كبيره ويضربوا بغل.. ومافي شي خلاهم يوقفوا.. غير صوت منبه سيارات الشرطه.....
#قبل_العاصفه4 #طوبى
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
