# طوبى "شارع القهوة"
#جمان_فريد
#الجزء_الثامن"على خاطري ياصاحبتي3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
يوم القفه "الكسوة"
هاليوم في هديكا سنين مازال يعتبر اهم يوم والتجهيز ليه يبدا من وقت مبكر..
فهاليوم نفسه حيتم عقد القران...
والرجاله اللي حيحضروا عالم من معارف عيلة شنيبه..
لهدا جابوا طباخين رجاله يجهزوا وجبة الفاتحه..
والنساوين يطيبوا وجبتهم بأرواحهم..
طبعا هدا كان ايام الغدي والعشي شبه يوميا في الفرح...
🌻ومازالت صامدة..
سدرة..ومازال تقاوم...وصلت في ايام حسم صعبه..قاتله..
بس مازالت جبل مايهده ريح..ظاهريا..
عكس صاحبتها عائشه اللي مش قادرة درق تعاستها..
عروس لابسه البودري لكن تعيسه ماتبيش تبتسم حتى شويه..
فهداكا اليوم قعدت عندها فايزة ومابتش تخليها واختارت تستقبل عرب الكسوة مع العيله....
وفي حوش شنيبه..
كانت نسرين لاصقه في سدرة طول الوقت تهدرز عليها وتضحك فيها وتغير في جوها ..
وسدرة كانت متجاوبه معاها..هي هكي تبي..
تبي من ينسيها ويساعدها تقعد واقفه ع رجليها..
نسرين بضحكه:مافيش عند صاحبتك بخت بكل تعرفي حاسه روحي بنقعد في رقبة بوي وامي زي خديجه..
ضحكت سدرة وقالت:حي كان تسمعك..
ونسرين تضحك...
فجأة..اختفت هالضحكات لما انسمعت اصوات الزغاريد...
نبضات قلب سدرة القويه الموجعه..تكاد تكون سمعتها نسرين..
مابتش تشبحلها ماقدرتش...
ولحقت الزغاريد الدربوكه..والغني...
"يامبروك على غالينا...هدا وين تسمت لينا"
نسرين هربت طول وطلعت من حدا سدرة..
اللي كانت تسمع فهالاصوات المتداخله وهي مش مستوعبه..
يعني خلاص..المهدي ولى لغيرها!؟
المهدي توا لعائشه صاحبتها...وصاحبتها عائشه توا ولت للمهدي!!؟
وهي الغريبه في وسطهم..
واللي وجودها بعد وقت متأكده انه حيكون غير مرغوب فيه...!
بس شن بدير..هذا الواقع..
هذا النصيب..
هذا المقدر والمكتوب...
ماعندها مادير غير انها تسلم وتقول...
فيها خيره...
غمضت عيونها بشده..وبدت تمتم..
ياالله ياالله ياالله...
خدت نفس عميق بعدين زفرت...رجعت خدت نفس عميق مرة تانيه بعدين زفرت...
بلعت ريقها...فتحت عيونها..
استجمعت نفسها...رسمت ع وجهها ابتسامه مكابرة وقوة مصطنعه ومشت طلعت...
وصلت في المجمع اللي دايرين الشوط..
وبدت تصفق معاهم وتغني...
سدرة..
اليوم قرينا الفاتحه
وبالذرية الصالحه..
كلهم قعدوا يشبحولها ويردوا وراها..
وفردوس اختها تصفق ودموعها في عيونها واجعها قلبها ع اختها...
خديجه وهي تشوفلها...
سجل ياشيخ قبيلتنا
الزينه ولت من عيلتنا...
وقعدوا يردوا وراها وسدرة معاهم وكأن العرس لخوها حتى هي عادي جدا..
مغليه
نور العين قري فاتحته..
والعقبه لخوته اللي تحته...
والنساوين يغنوا ويزغردوا في حوش شنيبه..
زي مافي حوش جويده الهادي...
بس كانت عائشه تسلم ع اللي يهنوا فيها بوجوه عبوس وكأنهم يعزوا فيها..
وامها تشوفلها بقهر وتمنت لو كانت تقدر دير شي ولاتعيش بنتها الوحيده فرحة عمرها بتعاسه...
بعد ماهنوها قعدوا يغنولها..
وهي واقفه في وسطهم وتمرر في نظرها عليهم وخلاص..
وفايزة وافقه في جنبها محاوطه ظهرها بيدها وتغني وتحاول تغير جو عائشه شوي بس بدون فايده...
☘اما هو..
فكان يجامل في الناس مجامله...
متحملهم بالسيف كان يلقى ياخد وجهه ويهج..
بس وين يجوا عيونه في عيون خوه طاهر ويتفكر في كلامه
يثبت ويقاوم..
فالنهايه زي مانقولوا دارها بإيديه...
🌻🌻🌻🌻🌻🌻🌻
وجي وقت رفوع الكسوة...
لهداكا الوقت..
كان من الكسوة مايمشولهاش الا النساوين الكبار والشبابات يعني المتزوجات..
بس بدت تنكسر هالقاعده مع تقدم السنوات..
وبدوا يمشوا حتى البنات عادي..
وفي كسوة المهدي...
مشت اخته خديجه...ومعاهم سدرة اللي حلت محل امها ومعاها اختها فردوس اللي كانت مصدرة...
وطبعا لايمكن سدرة تمشي من غير طوبى لأي مكان...
لبستها احلى قفطان ورفعتها معاها..
وباقي الصغار قعدوا مع نسرين في حوش شنيبه..
ولأنهم في شارع واحد..
فيسع وصلوا لحوش الشيخ جويده الهادي..
وبدوا ينزلوا في سوابيت الكسوة..
وسدرة وحده من اللي ينزلوا في السوابيت..
تنزل وهي تزغرد..وآلاف العبرات محبوسه وسط صدرها...
خشوا لحوش اهل العروسه..
وهما استقبلوهم بشوط دربوكه حلو....
بعدين خدوا السوابيت دخلوهم...وبدوا يضيفوا فيهم...
لحظات...
وطلعوا عائشه وهي مغمومه بحولي البدله الكبيرة...
وخلال الحوته متعلي ع مقدمة راسها...
وصدارة شداتها من اليمين وصدارة من اليسار..
وطلعوها وهما يلالوا عليها...
وهي مخنوقه من داخل ومن برا...
المنظر تتفرج عليه سدرة وهي راسمه ع وجهها نفس ابتسامة المكابرة..
بس من داخل كانت تبكي وتعيط عياط...
قعدوا يدوروا بيها ع الكرسي..
وعيون سدرة تلحق فيها...وتلحق فيها....
لين حست روحها بدوخ بس تماسكت زي عادتها..
وعيون فردوس معاها اللي دموعها كانت شادتهم بالسيف..
عارفه اختها شن تحس توا..
اما فايزة فكانت دور ورا عائشه ودموعها في عيونها.. مرة مرة تشوف لسدرة وقلبها يزيد يتوجع ع حال صاحباتها..
وتموا بيها الدورات..
بعدين قعمزوها بعد السبع قيمات..
وجوها اهل العريس واهل العروسه وبدوا يغنوا فوق راسها..
وسدرة منهم...
خديجه..
حصلتيه ولد متسمي..لاتبكي لاتقولي أمي..
قعدوا وراها..
بعدين ردوا عليها اهل العروسه
حصلها ياعليك ذهيبه..خير من الف جني في جيبه..
وقعدوا يردوا وراها..
وبعدين ردوا عليهم اهل العريس..
غير ويش قريتي من آيات..حصلتي سمح الصفات...
وقعدوا يردوا وراهم...
واهل العروسه ردوا..
هي الزينه والزين لهلها..مبرك يومه اللي حصلها..
ردوا وراهم..
بعدين ردت عليهم خديجه تقول..
انتي صليتي وبوك دعي..اللي حصلتي خويا اني..
فايزة قلبت عيونها...
والباقي يردوا وراها...
سدرة..
مع الزينين دير صواب
مربيها لاوي الشناب..
زغردت فايزة وقعدوا يزغردوا معاها..
واللي حواليهم يردوا وعيونهم ع سدرة..
اللي متابعه تغني وتصفق..
كانهو ع الزين وصل حده
والقدر يديروله مخده..
وفايزة تزغرد واهل عائشه تحمسوا مع سدرة..
سدرة..
وشرتع ياحب الزيتون
غريانيه شعر واللون..
وخديجه قريب تنفجر من سدرة اللي بحماسها في الغني ع صاحبتها غلبت اهل العريس..
ومغليه اضايقت منها هلبه لأنها جايه معاهم..
أما عائشه اللي كانت تسمع في هدا كله دموعها مابطلوش نزول وصوت سدرة هي تغني عليها يرن في وذانها..
خديجه..
المهدي وين قلناله سمي..
قال عويشه عسل في فمي..
وعرفت كالعاده خديجه تضرب في مقتل...
شتاوتها هادي ماضربتش سدرة بس حتى عائشه وكل من يحبهم هما الزوز وحاس باللي يمروا بيه....
قعدوا يغنوا ويردوا ورا خديجه..
وسدرة شبه انطفت..قعدت تصفق وترد وراهم وخلاص..
لين تم الشوط..
بعدين خدوا عائشه ودخلوها داخل..
وشويه وحطوا العشي ...
بعد العشي...
روحوا عرب الكسوة...
وفردوس روحت مع سدرة والصغار لحوشهم بش تغير..
🌻فردوس:خلاص معاش ماشيه..
سدرة بآستغراب:وعلاش!؟
فردوس:عييت وتعبت..هو مازال غدوة وخلاص نمشي غدوة نمد وجهي شويه..حتى انتي ارتاحي سادك..
سدرة:لالا مانقدرش..هي طوبى..وانتم بنات تبوا تمشوا؟
فردوس:لابناتي خليهم نبي نرقدهم..
سدرة:ع راحتك..هي طوبى..هيا غرفه..
غرفه:لالابنرقد معاش نبي نمشي..
سدرة؛باهي لكن قبل لترقدي اغسلي سنونك..
غرفه:حاضر..
سدرة:فردوس ديري دورة ع بوي..
هزت فردوس راسها وقالت:حاضر..
وخدت سدرة طوبى من يدها ومشت بتطلع بيها..
تنهدت فردوس من قلبها وقالت:ربي يهدي قلبك ياوخيتي...
🌻🌻🌻🌻🌻🌻
ومشوا سدرة وطوبى لحوش شنيبه..
وصلوا فيه لقوا الباب المردود..
دفاته سدرة وخشت..لقت الجالي واقف يشرب في مشروب..
لما ضحك وتحشم..
سدرة بضحكه:صحتين اشرب اشرب..
الجالي بضحكه:شن جو سدرة؟
سدرة بإبتسامه:الحمدلله..هاه القرايه قربت خلاص..
الجالي بضحكه:معاش لقيتي ع شن تدوي..
سدرة بضحكه؛نحب الدوة في النكد..
ضحك الجالي بعدين شبح لطوبى وقال:شن جو ياطوبى..
هي قعدت تشوفله وهي ساكته..
الجالي بإستغراب:ماتدويش؟
سدرة وهي تشبح لطوبى:مع اللي تعرفهم بس ماتعرفكش هلبه انت...
ابتسم وقال:ماشاء الله عليها تكبر بسرعه..
ابتسمت سدرة وقالت:صح..شبحتله وقالت..هي خلينا نخشوا يابابا وانت شديتنا في الباب..
رفع حواجبه وقال بضحكه:اني!
وسدرة مشت بطوبى وهي تضحك..
والجالي تبعهم بعيونه بعدين قال:خسارة والله خسارة..ورفع شيشة المشروب وشرب منها..
☘ورجعت سدرة تعول كالعاده وتخش ع الكوجينه وتطلع
وعيون خديجه عليها..
خديجه اللي تبي تشوفها مقهورة ماتبيهاش تقعد هكي واقفه ع رجليها ومش هامها شي..
شافت للناس حواليها بعدين ناضت خشت داخل..
بس في الخيمه..
نجمه:صرف ع الفاضي ماريتها دارت حاجه مقومه..
:هذا كله ومادراتش حاجه مقومه!؟ تي كله من احسن شي...
نجمه:والله اني نشوف فيه كله عادي مافيشي زياده ع الناس..قبل نحسابهم بيرفعوا القفه بالنوبه..
:في مكانها دارت هلبه حاجات تانيه ساد غدوة جايبه الزمزامات..
نجمه مطت شواربها بعدم رضا وقالت:من مازال مايجيبش فيهم الزمزامات توا...
من بعيد شويه..
كانوا عيون مغليه ع نجمه زابطتها تقرم فيها..
مغليه:اني والله منك انتي ياصفيه كل مانبي نقطع معاها تردينا..
صفيه؛معليشي جيران مالينا الا بعض..وبعدين اهي جت حضرت عرس ولدك وعطت نحيله..
مغليه؛بالناقص منها ومن نحيلتها هالمنتفه هادي..تو تشوفي الدوة اللي بطلعها بعد العرس.
صفيه:معليشي خليك انتي الكبيرة يامغليه..
مغليه تنهدت بنفاذ صبر:ع قولتك وربي يصبرني عليها..
~~~~~~~~
واقفه تصب في طواسي الروزاطه...
خشت عليها وشافتلها شويه بعدين بدت تغني..
بالله يامولى الجمل ركبني...طريقي طويله وصاحبي سيبني..
التفتت سدرة شبحتلها..
خديجه وهي تشوفلها:والله لايسامحه اللي خانك يابنيه..
ابتسمت سدرة تهكما وقعدت ساكته..
خديجه بإبتسامه جانبيه:تعرفي تعجبيني..كيف هكي شاده روحك ودايرة روحك قويه واني مايهزني من شي برغم انك عارفه زي مااني عارفه زي ماكل الحاضرين عارفين انك قاعده تموتي من غير موت...
سدرة بإبتسامه متهكمه:تصخفي..
رفعت خديجه حواجبها..
سدرة:بجديات ع مادرتي الشعور الوحيد اللي نحسه اتجاهك الشفقه..لأنك مش لاقيه حد يحبك مش لاقيه حد يديرلك قيمه ولايعطيك اهتمام هذا علاش وين تلقي هالشي عند غيرك مادابيك تخربي عليهم وخلاص..مسكينه..
قعدت خديجه تشبحلها وهي رافعه حواجبها وساكته..
سدرة؛ربي يشبح فيك..
ولفت وخدت السفرة ومشت طلعت من حداها بيها..
التفتت خديجه وقالت:سلمك عواله..عقبال ماتعولي في اسبوع وليده...
خشت الجمله في قلب سدرة زي الموس ومع هذا كملت طريقها عادي..
وخديجه ضحكت بعدين كملت تغني..
أني باهيه والناس قالوا عوجه...هما البحر وانا عليهم موجه..
ومشت طلعت تاني للخيمه...
🌻🌻🌻🌻🌻
الساعه 2:30ليلا..
فايزة ودموعها ينزلوا:عليك موقف واعر ياأحمد مش قادرة نطلع منه..
احمد وهو يمسح ع شعرها:معليشي حبيبتي معليشي..
فايزة:ماتمنيتش يصير هكي بينا تمنيت نقعدوا مع بعض لأخر العمر..كنا نقولوا نبوا رجالتنا يولوا صحاب بش مانتقاطعوش بكل..كل وحده فينا تشرط ع راجلها انها تقعد مع صاحباتها ومانتفارقوش بكل..لكن شوف كيف المكتوب لعب بينا شوف وين وصلنا..
احمد بأسف:كله من ربك يافايزة وكله فيه خيره ماحد عارف الحكمه من اللي صار غيره..
فايزة وهي ترشف قالت؛ونعم بالله..ان شاء الله عقابها خير ياربي وخلاص.
احمد:إن شاء الله..خلاص ارقدي وارتاحي سادك تعبتي هلبه اليوم..
فايزة:باهي قبل لنرقد بعد العرس نبيك ترفعني نشوف امي..
احمد:من عيوني امتى ماتبي نرفعك..
ابتسمت فايزة وقالت؛ربي مايحرمني ياأحمد والله العظيم نحبك نحبك هلبه انت احلى حاجه ربي عطهاني بيك انت عوضني عن كل شي..
ضحك احمد وقال:من قال فايزة اللي كانت طنش عليا وماتشوفش فيا بكل..
فايزة بضحكه:كنت هبله ومش عارفه مصلحتي..
واحمد يضحك عليها..
وورا باب دارهم كنت اخته حاطه ودنها وتتصنت..
بعدين بعدت وقالت:خزي لاتتحشم ولاتستحي...
ومشت للكوجينه بتشرب..
☘☘☘☘☘
في المطحن..
مقعمز وسط القهوة اكياس حبوب ومطحونه..
مغمض عيونه ورافع راسه وهو يشم في ريحة القهوة..
وعقله مابطلش تفكير..
فتح عيونه...ويجي بينهم اخر موقف جمعه بيها..
كيف تبان بايعه واخر همها...ولاكأنه كان يعنيلها حاجه..
وحده هكي دير فيه..لازم ياخد في حقها قرار سريع ونهائي..
لازم يطلعها من قلبه وحياته..لازم ينهي وجودها فيه..
لازم يسكر وراها بابه خلاص معاش يخليها تهمه ولاتعنيه..
اكثر من انها بنت شارعه وبس..
نزل راسه وشبح للرحايه قدامه..كان فيها حبوب قهوة..
فتحها..وخلاها ترحي..
وقعد يتفرج ع الحبوب كيف ينطحنوا في وسطها وكأنه قلبه بينهم..
بلع ريقه وقال:من اليوم يامهدي..من اليوم..سدرة المنتهى انتهت طلعت منك ومن كل شي فيك..معاش تعنيلك شي ولاعاد تهمك في شي...
وخدي مجموعه حبوب بيده وحطهم في وسط الرحايه بغل..
والدموع يمسح فيهم قبل لينزلوا...
🌻اما هي..
كانت راقده زي العاده وطوبى جنبها حاطه يدها ع شعرها وراقده حتى هي..
واختها فردوس ببناتها راقدين في الصاله تحت المكيف..
اما بوهم..
فكان مقعمز في الجنان زي عادته..
وين يرقدوا يكمل ليله سهر وهو يفكر في بناته والشوق لرفيقة العمر يرفع فيه ليها....
☘☘☘☘☘☘☘
"شويه تانيه وتجي المزينه ياعيشه كولي حتى شويه"
عائشه؛ماخاطريش في شي يام بالله عليك خليني..
عتيقه بقلق:مايجيش هكي بنتي تو دوخي بعدين..
عائشه مطت شواربها بلامبالاة..
عتيقه:باهي ع خاطري اني بنيتي ع خاطر امك بس..
شبحتلها عائشه بضيق..وجعتها امها..وجبرت روحها تاكل ع خاطرها..
عتيقه:ايوه بنيتي كولي كولي..صحتين..ربي يفتح عليك ويهنيك يارب..
وعائشه كل لقمه تنزل في زورها بالسيف..
شويه وجتها المزينه وقعدت هي وياها في الدار بروحهم..
🌻وفي حوش عيت الواعر..
كانت عندهم فايزة ومطيرة كانت موجوده..
مطيرة :وتحاسب فيا ليش ماجيتش امس تحسابني زيها عادي نسحن روحي ونحرق عصابي..
حطت سدرة سفرة القهوة والحلو قدام فايزة وقالت:مش نهينا الموضوع خلاص..
مطيرة؛اني نهدرز مع فايزة سكري فمك انتي..
ضحكوا فايزة وفردوس..
وسدرة حركت راسها يمين ويسار وقالت:كيف طلقوك هدوكا.
فايزة:طلعني احمد قدامهم..
مطيرة خدت فنجان قهوة وقالت؛قصدك بدوا حاطين راسهم براسك..
فايزة بتهكم؛قداش ليييهم..
فردوس:هي السكنه مع حوش العيله صعبه هلبه..
فايزة تنهدت وقالت:الله غالب مجبورة نتحمل لين يلقط احمد حق الشقه..
مطيرة:ربي يسيرله ويفتح عليكم ويفكك الله من شر فتحية وبناويتها..
فايزة؛يارب..
وسدرة مقعمزة معاهم وهما يهدرزوا جثه بس والعقل في عالم تاني..
في الليله هادي كيف بتفوتها وكيف بتعدي عليها..!؟
🍀🍀🍀🍀🍀
وبين عريس قاعد يتهيأ ويتزين ..
ساونه...وحلاقه.....
وعروس..
الزينه عبت وجهها وشعرها قاعده تتفنن فيه المزينه بأحلى تسريحه..
هي كانت تجري هني وهني.
تشغل في نفسها وخلاص..
اللي حواليها يوتوا في ارواحهم للحفله...
وهي دور بين مطحن وجنان وكوجينه...
الكل حاسين بيها بس ماحد قدر يجي يكلمها..
وهي تتقلب ع الجمر..وكل شويه تشوف لساعة يدها...
لعند مادقت ع الوقت..
اللي لبس في العريس العربي كاط طويل لونه عسلي زاده هيبه ع هيبته..
وتعطر بأحلى العطور...ولبسوه الشباب عقد فل كبير...
والعروس تزين شعرها بدبابيس لؤلؤيه..
كانت اخر ماانحط عليها من الزينه..
ع فستانها العسلي الكبير..اللي كان صدره بس مغطي بقماش ركام ابيض..
وعطتها المزينه باقة ورد في يدها وهي تسمي عليها وتبارك ع جمال طلتها..
اللي هي نفسها العروس تفاجئت بيها...
☘☘
"سدرة"
التفتت وشهقت بفجعه..
فردوس بصدمه؛خيرك!
سدرة بلعت ريقها وهي تشوفلها بعدين حركت راسها يمين ويسار وقالت؛شي..خيرك تبي حاجه؟
فردوس تنهدت بضيق وقالت؛نلبس طوبى..
سدرة برفض؛لالااالا طوبى تقعد معاي..
فردوس؛مش ماشيه..
شدت سدرة ع فمها بقوة وحركت راسها بالنفي..
عبوا الدموع عيون فردوس ومشت طول طلعت من حداها..
طاحوا من سدرة دموع فيسع مسحتهم..
ورجعت من جديد لهت باللي دير فيه..
وهي تسمع فيهم كيف يسقدوا في بعضهم بش يطلعوا..
شويه خشت فايزة ومعاها طوبى..
لما شافتها سدرة قالت:حي شن درتي فيها!؟
فايزة بضحكه:لصقت فيا وقعدت تزن عليا وتقول مكيجيني..
سدرة وهي تشوفي لطوبى:الوي ياليلى علوي..مكيجيني صار..
فايزة بضحكه؛انتي كانت تشوفيها كيف تسكر في عيونها وين نمكيج فيها وكيف تمد في شواربها ع خاطر الروج..
سدرة:حي عليا من توا؟
فايزة بضحكه:بتولي خليفتي البنت هادي وتفكري كلامي..
سدرة شدت طوبى ليها وحطتها ع رجلها وقالت:هي بري تول عطلتي..
ابتسمت فايزة بضيق وقالت؛سلام..
ولفت ومشت وطلعت من حداها وهي شاده دموعها..
وسدرة ضمت ليها طوبى وهي تقول:ع خاطرك ياعيوني عفست ع قلبي مرسته مرس..وغمضت عيونها والدموع ينزلوا منهم..
وطوبى قعدت طبطب ع ظهرها بضربات يدها الصغيره..
~~~~~~~~~~~~~~~~~~~~~~~~~~~~~
صلى الله وعليه...صلى الله وعليه
اللي دليل العقل والع بيه...صلى الله وعليه..
صلوا عليه الالوف...نوصل لمكة والحرم ونطوف
ونذبح فيه خروف...ايجيني السايل نطعمه ونسقيه..
وصلى الله وعليه...
🌻كانت هادي الأغنيه مسموعه في شارع القهوة كله بأصوات الزمزامات...
والخيمه داخل مليانه...اشكال والوان..
والكل طالع بأحلى ماعنده...
في اللي تتباهى...وفي اللي دور فالراجل..
وفي اللي عادي جايه عرس واكيد بتلبس وتتأنق..
عواصف واجتياح او عواطف ونجاح قاعده امهم دور بيهم وتعرف ع البرانيه اللي جو فهاليوم..بالك بالك تصدف ويصير منهم...وتتحقق امنيتها...
اما خديجه فكانت تتمختر بقفطانها اللي واخداته بميه ومعاها..هدا الوقت عاد مبلغ وقدره...
الناس لفتهم القفطان بس لكن خديجه مافيش من اهتم لزولها..
عكس نسرين اللي انفتحت عليها العيون وفي من كلم امها عنها...
وطبعا اعراسنا في كل زمان ماتكملش..
الا بالصغار ولبسهم..
غرفه وبنات اختها كانوا في قمة الجمال شكل ولبس..
عكس اميمه مسكينه اللي كان قفطانها عادي جدا ومش لمناسبه زي هادي...حاولت امها طلعها مرتبه ع قد ماتقدر..
بس يقعد جمالها غايب ومطفي وهي تشوف في بنات جيلها ولبسهم وكيف عايشات...خلاص بدت تكبر وكل شي يأثر عليها...
قعدت مسكينه شاده مكان امها وخلاص خوف من المسخره والتسهويك والمقارنات..
تتفرج ع البنات كيف يلعبوا ويرقصوا وخلاص...
🌻🌻🌻🌻🌻
عند الرجاله..
كانت الاجواء عاديه وهاديه..
هدرزة وشاهي وحلويات وخلاص...
المهدي فهاليوم كان مختلف عن الايام اللي فاتوا يبان عريس حق..وع وجهه في مسحة ابتسامة حلوة..
لاحظها فيه خوه طاهر اللي حسه بدي يتقبل الامر الواقع من اليوم...
☘☘☘☘
وتمر الساعات..
وسدرة ع نار قاعده وقلبها يدق بخوف وخلاص...
عشت اختها ورقدتها..
وقعدت هي مقعمزة في الكوجينه وسط الظلام مربعه ايديها ومغمضه عيونها وتسمع في اغاني الزمزامات ...
فجأه..
فتحت عيونها...وين سمعت اصوات كلاكسات السيارات...
خلاص..بيمشوا يجيبوا العروس..
ناضت من مكانها..قعدت تنفض في ايديها وتمشي وتجي في الكوجينه بعدين حطت يدها ع قلبها واليد التانيه ع الطاوله وقعدت واقفه وهي تقول ودموعها يصبوا:ياربي صبرني يارب...
🌻🌻🌻🌻🌻
وجابوا العروس..
عائشه..من حوش بوها لحوش عيت شنيبه اللي ولت كنتهم..
مرت ولدهم الكبير...
واستقبلوها الزمزامات...
مرحبا يالافيه مرحبا يالافيه ..
مرحبا يالافيه قدومك خير وعافيه..
كانت عائشه تتدرج بإتجاه الكوشه..
والكل مبهور فيها كيف طالعه عروس آيه من الجمال صح مش لابسه فيلو بس كانت جدا مميزة..
فايزة ونسرين ماعرفوش يفرحوا اللي شافوا صاحبتهم عروسه ولايبكوا عليها وع حال صاحبتهم التانيه..
مشاعرهم كانت قمة في التضارب...
هي وصلت للكوشه قعمزوها..
قعدت دور بعيونها في سدرة ولما مالقتهاش تنفست براحه وقالت في نفسها"باهي اللي مادرتيهاش ياسدرة"
~مرحبا بمرت خوي..مرحبا بمرت خوي..
مرحبا بمرت خوي يامعمرة حوش بوي...
وسدرة تسمع وهي مقعمزة وحاطه راسها بين ايديها وتبكي بألم شديد...
☘☘☘☘☘☘☘
مبروك عليكم مادرتوا...
عيلة ياعيلة..
ياللي شارعكم نورتوا..
عيلة ياعيله..
~ومازالوا الزمزامات قايمين الاجواء في الخيمه والناس نشطت معاهم...
والعروس حداها صاحباتها تهدزر معاهم..
عائشه:مانبي نسمع شي عن سدرة قسما بالله خايفه من روحي ..خايفه نطلع نجري توا ونسيبه ويصير اللي يصير..
فايزة:صلي ع النبي عويشه خلاص ماحد جايب سيرتها..
نسرين بضيق:عارفه كلامي صعب بس هذا الواقع ياعيشه ارضي بنصيبك صدقيني حتعيشي مع المهدي احلى عيشه..
شبحت عائشه لنسرين بنظرات متهكمه طويله وهي ساكته..
غيرت نسرين عيونها عنها وتباعدت وسكتت.
وفايزة تمرر في نظرها عليهم...
🌻🌻🌻🌻🌻
بعد ساعه..
خدوا عائشه وركبوها لشقتها....
وبدي برا...المولد...مولد العريس....
من بدايه شارع القهوة...
وقفوا الرجاله صفوف...يتقدمهم صف العريس ومعاه خوه وصحاب ليه..
وبدوا يدرجوا فيه ع انغام المولد واغاني الفرقه متاعه...
والمهدي كان مالي مكانه عريس مافيش زيه زي في شارع القهوة وقتها...
كان ملفت جدا للإنتباه...
بس...
كل ماكان يقرب..
كانت في قلوب ترتعش...
خوفا....وحسرة...
قلوب...عائشه...وسدرة...
تسمع سدرة في دقات المولد وقلبها مع كل دقاته يتقطع..
تحسه والع نار ماتبيش تهدا...
مفرشه سدرة الصلايه ومقعمزة عليها..
وتدعي وهي تقول..ياربي قلبي يارب...
لين وصل خلاص..
صوت المولد تسمع فيه قدام حوشهم..
حطت ايديها الزوز ع قلبها وهي تسمع فيهم كيف يقروا في الفاتحه...
وبعد ماكملوا....خلاص..العريس بيمشي لعروسه...
هني تطلع من سدرة آهه تشق حيوط دارها وهي تقول..
"آاااه ياربي..آاااه قلبي...قلبي ياربي"
وطوبى ناضت من نومها وقعدت تتفرج عليها ...
ناضتلها وضمتها من جديد وقالت؛انتي مريضه.!؟
خدتها سدرة وضمتها بقوة وقالت ببكي:مريضه ياعيوني مريضه..مرض مالاش دوا..جعنك لاتشوفيه ولاتحسيه يانور عيوني...
🌻🌻🌻🌻🌻
وصاحبتها في الدار..
ترعش مع بعضها..وكانت تجهز في نفسها كم كلمه بتحطهم للمهدي بش طلع جنونه وتخليه يعطيها طريحه من اول ليله..
تعرفه ماعنداش الريح وين دور..
فجأة..سمع صوت دقات خفيفه ع باب دار النوم..
قلبها انتفض..
ناضت وقفت..
شويه وخش عليها وقال:السلام عليكم..
عائشه وهي منزله راسها رفضت ترد..
هو ابتسم ع جنب وقدملها خطوة خطوه وهو يقول:ماشاء الله ماشاء الله..
لما وصل فيها..
طلعت اللي في قلبها كله مرة وحده...
عائشه بإنفعال؛واخدتك بالسيف عليا لاطايقاتك ولانبيك ولانبي نكون معاك في مكان واحد..ماتمنيتش لروحي واحد زيك بكل..ولايشرفني نكون ع ذمته..
وسكتت هي تراجي في كف..ضربه..اي شي..
بل قعدت الصمت سائد المكان..
استغربت هلبه...قامت عيونها شويه شويه..
لين جو في عيونه..
لقاته يشوفلها بإبتسامه وهو عاقد حواجبه..
وهي تشوفله تاهت في ملامحه..عمرها ماشافت شكله عن قرب..ولاعمرها شافت لشكل راجل غير بوها وخوتها..
بس اول مرة تشوف ملامح راجل تجذبها لهالدرجه..
رجل قمة في الوسامه والجاذبيه...
المهدي:عارف..وفاهم عليك..وتوقعت اني حنسمع كلام زي هدا واحرف منه...لكن..خدي يدها وقربها للسرير وقعمز هو وياها...
وهي تشوفله وخلاص..
المهدي؛مش فارض نفسي عليك..لان الطريقه اللي خديتك بيها تعباتك زي ماتعبتني..
ونعترف اني غلطت..واني اسف..قرب منها وباس راسها بعدين بعد وقال...آسف من قلبي....بس توا خلاص ياعايشه اني راجلك وانتي مرتي وهذا امر واقع..نصيب..مكتوب...
خلينا نجربوا نشوفوا نصيبنا ماتعرفيش شن داستلنا الايام..
عائشه بنظرات اعجاب وعيونها معبيات دموع:صعب هلبه هلبه..
المهدي:صعب مش مستحيل..حط يده ع صدره وقال..ليك مني نعاملك بمايرضي الله ونكون معاك راجل في كل لحظه..
اني عندي عيب العصبيه والتهور اهما كان عرفتي تتعاملي معاهم ياعايشه الامور كلها حتمشي تمام..
عائشه قعدت تشبحله وهي ساكته..
هو ابتسم وقال:توا فوتي خلينا نتعشوا وبعدين نكملوا هدرزة...
وناض من حداها..
خدي التوته المحطوطه ع الكرسي ومشي طلع من حداها..
وهي تبع فيه بعيونها لين طلع..
بعدين قالت بصوت هامس متألم...
"الله يسامحك ياسدرة"
#على_خاطري_ياصاحبتي
#طوبى
....يتبع..
