#طوبى "جنة طوبى"
#جمان_فريد
#الجزء_الحادي_والستين"رسايل_انتقام☆☆☆☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
طالعه من محل تغليف وهي تتكلم بالتليفون..
طوبى:ايه خلاص بإذن الله غدوة العشيه يكونوا واتيات..
"خلاص تو نبعت حسين يمشي يجيبهم وان شاء الله يقول باهي"
طوبى؛شوفيه من اليوم كان قال لا نمشوا اني وياك...تمام؟
"تمام..انتي بتجي اليوم ولا"
طوبى:ايه وبنبات الجالي بكري شويه طلعت طيارته..
"تمام نشوفك سلام.."
طوبى :ان شاء الله..سلام...
ونزلت التليفون وسكرت..
بعدين فتحت باب سيارتها وركبت...شغلتها وتحركت بإتجاه شارع القهوة..
🍃وفي شارع القهوة..
قدام حوش لطفي كانت مدرسه سيارة فاتن..
اللي مقعمزة وسط صالة الحوش..
وحواليه مطيره وفردوس وبناتها وهما يشبحولها بإستغراب وتساؤل..
وهي كانت حاسه بربكه وطول الوقت حاجه ايديها في بعض وتفرك فيهم..
بعدين ابتسمت وهي تشوف لآلاء واريج وقالت؛من فيكم طوبى؟
فردوس:ولا وحده هادوا بناتي..
ركزت فيها وقالت:معناها انتي فردوس وهادم بناتك اريج والاء..
هما تعجبوا..
وفردوس هزت راسها وقالت:ايه..
شافت فاتن لمطيره وقالت؛وانتي مطيره صح؟
مطيره:صح..
هي ضحكت ضحكه خفيفه من التوتر بعدين قالت؛مختار حكالي عن عيلته كلها يعني شبه نعرفكم كلكم لكن زوز بس اللي شفت صور ليهم..عمتي وردة الله يرحمها وسدرة المنتهى..
فردوس؛مختار عنده صورة لسدرة؟
فاتن؛عنده صورة جماعيه لعمي لطفي وعمتي وردة كان هو معاهم فيها وسدرة..
شافت فردوس لمطيره بإستغراب..
مطيره؛بالك الصورة اللي خدوها لما مشوا للجبل انتي مابتيش تمشي وقتها وقعدتي عندي..
فردوس؛اها..ايه تفكرت..
مطيره شافت لفاتن وقالت؛امتى خداك ؟
فاتن بآبتسامه؛في 2010..
شافوا كلهم لبعض..
وفاتن استرسلت تقول؛بابا جابه وخدمه عنده مختار كان ناشط ودماغه مليح بابا اعجب وخلاها بعد فتره ذراعه اليمين زي مايقولوا..تعرفنا ع بعض وصار ميول واعجاب وتزوجنا..بس بعدين ماصارش نصيب وانفصلنا لكن قعدنا صحاب..
لاحظت نظراتهم ليها نظرات استهجان واستنكار..
ضحكت مرة تانيه من الارتباك وقالت؛نصيب..
فردوس؛مادرتوش صغار؟
حركت فاتن راسها بالنفي وهي مبتسمه..
هزت فردوس راسها وهي ساكته..
ورجع عم الصمت المكان..
وهي معاش عرفت كيف بتفتح الموضوع اللي جايه ع خاطره..
فردوس بصوت منخفض لأريج؛نوضي جيبي عصير..
شبحتلها وقالت؛لالا والله لا شكرا مانبي شي..
مطيره:مايجيش تخشي حوشنا وتقعمزي ومانديروش واجبك..
فاتن؛اعتبروا روحكم درتوه..اني بصراحه مش جايه نضيف اني جايه بش نحكي معاكم في موضوع وياريت يكون عمي لطفي حاضر..
هما حسوا بالقلق..
ومطيره قالت؛موضوع شنو؟
فاتن؛هو عمي لطفي قاعد؟
فردوس:لاطالع..عشية كل خميس يرفع في جدي لصحابه في المدينه القديمه...
فاتن؛وامتى يروح؟
مطيره؛مش معروف ع حسب جوهم..
مطت فاتن شواربها لداخل بضيق..
فردوس؛الحق خليتي قلبي مقبوض..
ابتسمت وقالت؛لالا مافي شي يخوف..
فجأه..
سمعوا باب الحوش انفتح..
الاء؛زعمه جدي؟..
ولأنها مقعمزة جنب فتحة الصاله..طلعت راسها وشافت...وجاهم صوتها وهي تقول..
خالتي طوبى..
ابتسمت فاتن وضيقت عيونها..
شافت الاء ناضت ومشت طلعت..
🍃تلقت طوبى وقالت؛شن جو..
وسلمت عليها بالخد..
طوبى؛تمام..في حد عندكم؟
الاء خدت منها الاكياس وقالت؛ايه..شن جايبه معاك..
طوبى:عشي..باهي قوليلي من في داخل؟
الاء؛خشي وبروحك تعرفي..
ولفت ومشت بالاكياس للكوجينه..
اما طوبى ولت لمراية المدخل..
طلعت العطر متاعها من الشنطه وحطت منه ع حوايجها..ورسغي ايديها..
بعدين رداته للشنطه..ومشت للصاله..
خشتلها وقالت..
السلام عليكم..
لما شافتها فاتن ناضت وقفت وقالت مع الباقي..
وعليكم السلام..
وهي مركزه بنظرها ع طوبى وملامحها..
وصلت فيها طوبى وصافحتها وهي تقول؛كيف الحال..
فاتن؛الحمد لله..كيف حالك انتي
طوبى:الحمد لله..
وطلقت يدها ومشت بتقعمز وهي تمرر في نظرها عليهم بإستغراب..
بعدين قعمزت مقابلتها...
فردوس؛هادي طوبى..
فاتن بإبتسامه؛فيها شبه منه ومن عمتي وردة الله يرحمها..
فردوس؛تجيب حتى من سدره..
فاتن؛صح..
وطوبى تشوفلهم بعدم فهم..
اريج؛هادي فاتن..طليقة خالي مختار..
فاتن ركزت ع طوبى ولاحظت ان ملامح وجهها تبدلت للضيق..
بس ابتسمت مجامله وقالت:اهلا..
فاتن بأبتسامه؛اهلا بيك..
ع جية آلاء ولت قعمزت في مكانها وهي تشوف لفاتن..
ويسمعوا صوت الباب الخارجي انفتح..
مطيره:هدا لطفي..
فاتن زادت توترت وبلعت ريقها..
وطوبى تشوفلها..
ناضت مطيره وطلعت من حداهم..
وهما قاعدين يشبحوا لفاتن ويزيدوا يوتروا فيها..
🍃برا..
تلقت مطيره خوها...
مطيره؛بكري اليوم؟
لطفي؛هداكا هو الساعه 6..
مطيره؛باهي اصبر بنقولك حاجه..
لطفي:ان شاء الله خير..
مطيره؛في عندنا ضيفه من بكري تراجي فيك..
هو بإستغراب:تراجي فيا اني!؟
مطيره؛ايه..طليقة مختار..
هو انصدم..
مطيره:اشبح شن عندها بتقول..
لطفي بشي من الانفعال:اشبح شن في عنده من مصيبة جديده الولد هدا مش حيرتاح لين يقتلني حتى اني..
هي قالت؛غير اهدا شويه وصبر بالك..راهو المراة ماتدوي عنه كان بالخير..
هوقعد يفكر بصمت بعدين قال؛وينها؟
مطيره؛في الصاله..
خدي نفس بعدين قال؛خشي قدامي..
مطيره؛حاضر..
ومشن قدامه وهو وراها..
وكانت باديه ع وجهه ملامح الضيق..
وصلت مطيره في الصاله وخشت بعدين قال:خشي لطفي..
ناضت فاتن وقفت..
وهو حط ايديه ورا ظهره وخش..
شاف لفاتن وقال؛السلام عليكم..وقعد واقف في مكانه..
في قدمتله وقالت؛وعليكم السلام..ومدت يدها..
هو شاف ليدها بعدين مد يده وصافحها..
فاتن؛كيف حالك عمي.
هو قال:الحمد لله..وطلق يدها ومشي قعمز حدا طوبى..
وهي ابتسمت ومشت ولت لمكانها..
شبحتله وقالت؛اول شي عمي نعرفك بنفسي فاتن ***** كنت متزوجه مختار لفترة كويسه وبعدين انفصلنا بس قاعد في بينا احترام وتقدير..وبصراحه في جيتي الاولى لليبيا في حياتي كلها كنت متشوقه نشوفكم ونتعرف عليكم حبيتكم من كلام مختار عنكم..
ابتسم لطفي بتهكم...
فاتن:ديما يحكيلي عنك ويقولي انسان مستقيم وقلبه طيب وحنين واللي فإيده مش ليه..قداش خلاني متشوقه نعرفك من كلامه عليك..
هو قال وع وجهه نفس الابتسامه؛وع من حكالك تاني؟
هما كانوا مركزين ومستمعين بس..
فاتن ابتسمت بتوتر وقالت؛وحكالي عن عمتي وردة..وعن خواته..فردوس وسدرة وغرفه وطوبى..اللي كان هو نفسه متشوق وملهوف ع شوفتها..
طوبى تنهدت ونزلت عيونها...
لطفي؛وع شن حكالك تاني؟
فاتن؛عنكم انتم..قداش عيله مترابطه وتحبوا بعض..
مط شواربه للأسفل تهكما بعدين قال..باهي ماحكالكش ع اللي داره هو في هالعيله في بوه وامه وخواته..
كلهم بدت ع وجوههم ملامح الضيق..
فاتن؛عارفه كل شي عمي..بس نبي نقولك ان حني بشر ونغلطوا..وهو والله نادم عاش سنين عمره نادم ويبي حاجه وحده بس..رضاك عليه..
لطفي:واني مانبيشي بكل..
فاتن؛عمي..متفقه معاك ان اللي داره مش ساهل بكل وصعب السماح عليه..بس حضرتك اب واني متأكده انك اب حنون ع الاخر وكريم في تعاملك مع الكل يبال ولدك..سامحه بس وخليه يخش عليكم ويطلع ويعوض اللي فاته..ياعمي الجفي مايولد كان الكره والحقد..عكس السماح ولما يقولوا المسامح كريم معناها كريم لما يعطي الفرصه ويسكر بيها باب شر كبير..
لطفي؛انت جايه تحذري فينا ولا..
كلهم انصدموا..واكثرهم فاتن..معاش عرفت كيف ترد..
ابتسم وقال:يابنتي انتي بارك الله فيك جيتي وناويه خير واني نقدرك ع الحاجه هادي ومنها عرفت علاش مانكش معاه لتوا..هدا شي..الشي التاني اللي بنقولهولك ان في ذنوب ماتنغفرش لو مهما حاول صاحبها يكفر عنها..حتى رب العالمين يغفر الذنوب كلها الا الشرك لأن ذنب مافيش معاه غفران وصاحبه مهما دار من خير مايشفعلاش عند ربي مع هالذنب..ولله المثل الأعلى..حني البشر مهما كانت قلوبنا بيضا وتسامح..في ذنوب يابنتي مفروض هاه..مفروض مانغفروهاش..لسبب واحد..ان صاحبها ماتجرأ ودارها الا وهو مستعد يدير غيرها هلبه...واني ياما مشيت وغفرت وسامحت ولقيت سماحي هدا يفرعن فيه لين وصله لمرحله ان يمد يده وياخد شي مش من حقه بش يوصل لغايته..ولافكر فيا وفي الفضيحه اللي تتسببلي فيها قدام الناس تي اني قريب انحبست حتى الحبس يابنتي..مافكرش في امه مسكينه اللي خلاها مكسورة ومقهورة قدام نساوين الشارع وقتها وهي المراة اللي عاشت عمرراسها مرفوع وينضرب بيها المثل في كل خير..مافكرش في سمعة خواته...فكر في نفسه بس يابنتي فكر في نفسه ولوحنا حني ورا ظهره..توا خطرنا عليه ويبينا ويبي يخش علينا ويطلع..!
كلام لطفي طلع بحرقه..اثر في اللي حواليه وخلا دموعهم تنزل..
واثر في فاتن هلبه..بس هي مازال مستمره في محاولة الاصلاح:سامحني ياعمي انت لو عطيته مجال وخليته يدير مايبي وساعدته راهو ماصارش هدا كله..
هو حط ايديه ع بعض وهز راسه وقال:باهي..وخدي الفلوس وسافر..شن دار؟!..
نزلت فاتن راسها وهي مضايقه..
هو قال؛كسرهم في السكير والقمار والعفن وقعد شحات في الشوارع غادي ولا..!؟..يابنتي مافيش اب وام يوقفوا في وجه مستقبل صغارهم لو عرفوهم قد المسؤوليه ويعرفوا يتصرفوا..واني عارف ولدي كويس وامه عارفاته كويس هدا علاش وقفنا في وجهه وقتها كنا نبوه يقعد حدانا قدام عيونا وان شاء الله مايغلطش...وهو للاسف كسرنا اني وامه وقعد يغلط الغلط ورا الغلط ور الغلط ورا الغلط..ودمعوا عيونه وهو يقول...لين قتل امه..خلاته تموت وهي غاضبه عليه..
رفعت فاتن عيونها في لطفي وهي تشوفله بصدمه..
وهما حواليه كانوا مصدومين اول مرة يعرفوا بالحاجه هادي!..
لطفي وهو شاد دموعه بقوة:سنه 99 وقدام الناس كلها تبريت منه والناس من بعد هداكا اليوم عرفت ان عندي 4بنات بس..فردوس سدرة غرفه..وطوبى.وانتهي الكلام عندي..
وناض ومشي طلع من حداهم..
مسحت فاتن دموعها ورشفت وهي تقول؛اني اسفه..اسفه هلبه..ماكنتش نحساب هكي بيصير..
وهما حواليها قاعدين يذرفوا في الدموع وقلوبهم موجوعه ع الاخر..
🍃وروحت فاتن وهي مستاءة ومضايقه وقلبها مازال مقبوض..وياقداش كانت متأمله تصلح بينهم بش تجنبهم شر اصبح قادم لامحاله...🍃
🍃🍃🍃🍃🍃🍃
"مش متحجبه وتبان من جماعة open mind بس حلوة الصراحه"
فردوس؛ايه حتى اني عجبني زينها واسلوبها راقيه هلبه..
اميمه؛باهي علاش جت شن تبي؟
مطيره؛تبي دير الصلح ع اساس..
صفيه؛وكيف صار بعدين؟
مطيره،جي لطفي وحاولت فيه وهو جابها من الاخير وقال اني متبري منه بكل..
آلاء؛نقول رأيي بصراحه..
مطيره؛قولي ياحنه..
الاء:هو صح غلط هلبه..بس والله هو كويس وحباب..
فردوس؛تتواصلي معاه انتي؟
الاء:شفته قبل وهدرزت معاه ولانسيتي؟
مطيره؛بالله سكروا ع سيرته وافتحوا سيرة تانيه..ايه قولولي بتمشوا لعرس نجاح ؟
صفيه:حني عارفين وضعنا..
فردوس:مابالي في عراس..بنمشيلها ع قرب العرس نبارك وخلاص..
مطيره:ولا اني خاطري..لكن لعيون نجمه بنمشي..
~~~~~~~
طوبى بصدمه:كيف ديري هكي!؟
اريج بضيق وخوف:غصب عني يابيبو انتي شفتي شن صار شفتي كيف معتز مشي وخلانا..
طوبى:باهي لكن مفروض تعطيه علم حي عليك كان يعرف من برا يااريج!
اريج دمعوا عيونها وسكتت..
وطوبى وهي تشوفلها بقلق قالت في نفسها..
"مش ساد اني ياأريج!؟"..
وزفرت وهي تحاول تهدي نفسها بعدين قالت:استغفر الله العظيم...
اريج ودموعها في عيونها؛هو اللي جبرني ياطوبى قتله نبي نخدم قالي باهي وقالي تو ندورلك واني قعدت نستنى ع الفاضي كان يماطل فيا..
طوبى:نضال مش هكي يااريج وبعدين انتي ع عينك الظروف اللي صارت نضال يتعب هلبه المده الاخيره ياأريج ومعاش يفضى بكل..
نزلت اريج عيونها ودموعها نزلوا..
طوبى بهدوء؛نضال راجل كويس ويحبك هلبه رد بالك تعاودي غلطة اختك وتقعدي تتحسفي بعدين..
اريج شبحتلها بخوف وقالت؛لالا بعيد السو والله نموت بعدين..
طوبى؛بعيد السو عليك..المهم توا لازم تخبريه لازم يعرف منك انتي وكانك ع الخدمه جارتي الجديده عندها بنتها دكتورة اسنان وتخدم في مركز تو نشوفهالك..
مسحت دموعها وقالت:مانقدرش نسيب توا طوبى في وحده عطتني فلوس شهر مقدم مانقدرش نخليها في نص الطريق..
طوبى:قداش عطاتك واني نعطيك ترديهم..
اريج:مش قصة فلوس..المراة عابيه عليا نوصلها مالقتني الابعد تعب وهي دور..خلي ع الاقل نكمل معاها هالشهر..
طوبى؛وبتقعدي داسه شهر القدام؟
اريج بضيق؛مافيش غير هكي ياطوبى..الله غالب..
تنهدت طوبى بضيق وقعدت ساكته..
اريج؛طوبى ردي بالك تقولي لحد اني نخدم من وراه..
طوبى:عارفتيني مانديرهاش بندعي ربي يستر عملتك ومايخليش نضال يعرف بيها بكل..
اريج بدموع؛يارب..
🍃🍃🍃🍃🍃
الساعه 8:00مساءا..
في جنان حوش لطفي الواعر..
حسين؛مش وقتك بكل..
اميمه؛حاجه ضروريه حسين راهو ومش ليا..
حسين؛مش ليك وتبيني نضرب مشوار لغادي بش نجيبها!؟ عقد حواجبه وقال..قصدك لصاحبتك؟
اميمه؛تي لاياودي مش لحسناء..القصه ومافيها اني وطوبى ونجاح بنت جيرانا تكفلنا ببتات عروسه محتاجه رفعنا بتاتها هدا بعد ماحطيناه في الشناطي للمحل اللي قتلك عليه بش يغلفهم
حسين هز راسه وقال؛تمام تمام..تو نمشي..شن العشي؟
اميمه؛وجبه من برا
حسين؛حشيشتكم عفن المطاعم..
ولف ومشي طلع من الحوش..
زفرت اميمه براحه وبعدين لفت ومشت خشت داخل
🍃🍃🍃🍃🍃
وحسين مشي لحوش المهدي..ومعروف وجهته لمني..
🌿التارقي..
اللي كان مداير عشاه بروحه..وهالمرة مش ماكله جاريه..
🍃طلع الطاجين من الكوجينه وهو يقول؛بنته دوخ..
حطه ع الرخامه وقال.. حرام ناكله بروحي الله يجيبلي حد يشاركني فيه...
دق باب الشقه..
ابتسم وقال؛يارب دعواتي كلهن يارب..
ومشي طلع من الكوجينه متوجه لباب الشقه..
فتحه طول وقال؛جابك ربي...عمتك تحبك..
خش حسين وقال؛الله ع الريحه..شن داير اليوم!؟
ومشي طول للكوجينه..
سكر عبد القيوم الباب ولحقه وهو يقول؛تمد يدك عليه نهارك..
وخش عليه الكوجينه..
حسين بإبتسامه:طاجين بطاطا..
عبدالقيوم؛واكله قبل؟
حسين؛مرتين تقريبا
عبد القيوم:وهذي احسن مرة تاكله فيها صدقني حتقعد طعمته في فمك طول عمرك..
حسين؛شو واثق بحالو..شو قلبو قوي..
قعد يضحك عبد القيوم وهو يقول؛حي عليك تميت تغني في الاغاني هذين!؟ راحت الهيبه..
حسين وهو مبتسم؛مش مني دايرتهالي بداله وين نتصل بيها وديره مشغول تخدم الاغنيه هادي..
عبد القيوم شبحله شويه وقال؛متريح معاها؟
حسين؛مافيش بيني وبينها هديكا الدوة نتصل بيها بش نعرف وينها وشن دير بس..
عبد القيوم؛ردبالك تظلمها..
حسين؛لا والله...تنهد بعدين قال..شوف اني وصلت لنتيجه ان الاستقرار اهم من الحب الف مره..اني نبي نستقر ونبي ندير عيله العمر قاعد يجري مش حنكمله في البكي ع الاطلال في النهايه ماحد مات ع حد ولافي حد حياته وقفت ع خاطر حد..
ابتسم عبد القيوم ابتسامه جانبيه تبان ابتسامة حسرة..
حسين؛لكن انت حظك حلو ع فكرة..
شبحله بإستغراب..
حسين؛البنت اللي عشت عمرك تحلم بيها شكله بيصيرلك منها..
زاد استغرابه..
حسين:من محاسن الصدف البنت طلعت صاحبة بنت عمي قالتلي رايها فيه تغير وبديت تعجبها ولو وليت خطبتها مرة تانيه الرد المرة هادي بيفرح قلبك...
قعد عبد القيوم يسمع في حسين وهو يحاول يشد ضحكته..
وحسين لاحظ واستغرب وهو يقول؛خيرك؟
وهني عبد القيوم قعد يضحك..
يضحك بشكل غريب..خلا حسين يتفاجئ فيه بس بعدين قال...
والله عندك حق..لو كنت مكانك نرقص رقيص مش بس نضحك..
ويزيد عبد القيوم في الضحكه..
واستفز حسين اللي قاله:خلاص ياسر عاد..
اشرله عبد القيوم وهو يضحك بيده وقال؛شويه بس..وحطها ع فمه وهو يحاول يهدي ضحك..
بعدين وقف..وتنهد تنهيده طالعه من وسط قلب محروق...
حسين:خيرك عبدو؟
ابتسم وحرك راسه بالنفي وقال:شي..وبالنسبه للكلام اللي حكيته توا نعتبره نكته ضحكت عليها مش اكثر..
حسين؛قصدك انت تحسابني نتسهوك؟
عبد القيوم؛لالا نهائي عارفك تحكي من جدك..بس ياصاحبي الموضوع هذى بالنسبه ليا انا منتهي مايعنيني في شي..
حسين؛حتى اني قلتها معرفتي بيك الشهور اللي فاتت خلتني نفهم عليك كويس ونعرف انت شنو..وبعدين انت تارقي ولد صحراء عزيز وشامخ لاترضى بنقص ولاتعدي اهانه...
عبد القيوم؛بارك الله فيك...يللا سكر ع هالسيرة الصامته..
وخل نشقوا بالحانط..
حسين وهو يشوف للطاجين:حانط ياتراهي حانط..
قعد يضحك عبد القيوم بعدين خدي الطاجين وقال؛جيب الخبزة تلقاها وراك وتعالى..
ومشي طلع..وحسين دور بعيونه لين شاف خبزة الفرن خداها ومشي لحقه...
🍃🍃🍃🍃
وخشت غرفه لحوش ماليها بش تتعشى عندهم هديكا الليله..
ع خشتها هي حطوا العشي..
حولت ملايتها وهي تقول؛ماتبدوش لين نغسل ايديا ونجي..
طوبى بضحكه؛ياعمري محلاها بطنك كيف طالعه..
كلهم قعدوا يشبحوا لغرفه بإبتسامه..
غرفه بضحكه؛برغم اني نحس في روحي تفشكلت لكن روفا عاجباته قالي لما بططتي زدتي حلاوة..
مطيره؛باهي سقدينا انتي وروفتك وبري اغسلي ايديك جعنا..
ضحكوا..
وهي قالت بضحكه؛هيا سريع سريع..
ومشت بسرعه للكوجينه..
فردوس:باهي اللي جي عبد الرؤوف بش بوي يتحشم منه ويتعشى معاه..
بدت ع وجوههم ملامح الضيق..
ع جية غرفه وهي تقول:البيبسي وين..
طوبى؛عينك مش بيبسي اهو العصير قدامك..
قعمزت غرفه ع مهلها واميمه ساعدتها..
وقالت..لا بالله ماديرولي هكي اني اكثر جيتي ع خاطر البيبسي..
مطيره؛عطيك جدري في صراحتك..
ضحكوا..
وطوبى قالت:بري روحي مالا..
غرفه بنرفزة:وواك منك..جيبي حكة العصير..
طوبى:اما واحد؟
غرفه:الزرقا الطويله هديكا..
ضحكوا..
وطوبى وهي تشبحلها بآمتعاض خدت حكة عصير عنب ومدتهالها..
خدتها غرفه وقالت؛لئيمه..
رفعت طوبى حاجبها استفزازا وهي تشوفلها وهما يشبحولهم بإبتسامه وضحك..
بعدين بدوا ياكلوا وهما ساكتين..
شويه صفيه قالت:نبيله قعدت بروحها؟
غرفه:عارفتيها توا خلاص معاش تقدر تجي هني..بس نقوللكم حاجه عمتها دراه الكبد يومها تلقح كيف ماجوش خواته خطبوها علاش جاب بنات اخته شن صاير بينه وبين خواته ومن هالأسئله اللي دره الكبد..
صفيه؛تبوا الصراحه عندها حق..
فردوس:تعرفي عيلة امي ياخالتي كل حد منهم في وادي جايفين بعض هلبه وديما بعاد عن بعض انتي ريتي في مرضة سدرة كيف جوا مرة وحده زي البرانيه..
صفيه؛بس هادي خطوبه يافردوس لازم يمشوا هما يخطبوها لخوهم..
مطيره:باهي نبيله شن تقول ياغرفه؟
غرفه؛الحق مش معبرتها بكل بكل..نبيله عقلها كبير وشخصيتها قويه كان اقتنعت بحاجه مايقدر حد يغير رايها..
اريج؛وخيتي حب سنين طويله وبعد فراق ربي جمعهم وكتبلهم نصيب في بعض من مازال بدور..
اميمه:ايه حقه هما علاش ماصارلهمش من بعض؟
غرفه؛ماليها ردوه ع خاطر كان ع قد حاله وقتها وماعنده شي..
اريج؛وقعد السنين هادي كلها مش متقبل غيرها ولاهي بت تنكتب ع راجل غيره..محلاه حب الناس القديمه تحسوه مغروس بجذوره في القلوب..
فردوس:باهي بالك تتحشمي شويه وانتي من بكري تفتفتي..
اريج انحرجت ونزلت راسها وهي تاكل..
وهما يشبحولها من تحت لتحت وشادين ضحكتهم..
مطيره قالت:الله يرحم ايامنا حتى ع فلانه تزوجت وفلان تزوج ماكناش نقدروا نقولها قدام بوي..
اميمه بضحكه؛تي يومها جدي حكالي عن قصة حبه هو وحناي..
ضحكوا وهما متفاجئات..
والبنات قالوا..
اووووووو..
طوبى بحماس:توا احكيها احكي..
اميمه ضحكت وقالت؛باهي..
🌸وقعدت اميمه تحكي في القصه وهما منسجمات..
بس اكثر من انسجم مع القصه طوبى اللي حست بحسره في قلبها..
غرفه؛الله محلاه جدي..وكان مسميها الهانم..
مطيره ودموعها في عيونها؛امي كانت زي فاتن حمامه وشاديه اكابر وانيقه وحلوة هلبه ماتقولش امي بكل..
ضحكواا..
مطيره:جوها عبد المطلب ولطفي واني جيت لحناي ام بوي من بختي..
وهما يضحكوا وخلاص..
طوبى يضحكه؛والله احلى منك مافي ياعسل من برا ومن داخل عروق الناس يجري فيهم دم وانتي عسل..
مطيره؛يانجيلي هالفرخه خودي هادي..
بعتتلها بوسه طايره..
وطوبى مدتلها خدها..
اميمه بإبتسامه؛جدي قال تشبهني حتى اني..
مطيره:طولك وقدك وحركاتك لكن في الشكل اقربلها سدرة..
كلهم سكتوا...وين جت سيرتها..
اللي مخليه مكان مايتعباش ولايقدر حد يسده..
سرحوا وهما يتفكروا في لمات زمان اللي هي زي عادتها متصدرتهم بكلامها وتعليقاتها الحاده المضحكه..
دموع طوبى طاحوا وبدوا بنهمروا انهمار..
وكلهم قعدوا يشبحولها بحزن..
مطيره ودموعها في عيونها؛يارب في هالليله المباركه اشفيها وعافيها ياربي وردهالنا عاجلا غير آجل..
كلهم بأصوات متقطعه قالوا..
آمين..
مسحت طوبى دموعها وقالت؛تعشوا تعشوا..
وخدت حاجه كلتها...وهما كلوا معاها..
🍃بعد العشي..
لموا الحوسه..وضموا الحوش..وصلوا العشاء..
بعدين دارو قهوة وكاكاو مع مبروشه ولويزة وبسبوسه..
وقعمزوا بيهم في الصاله يهدرزوا..
غرفه وهي مصدومه؛علاش ماكلمتونيش؟
فردوس:جت فجأه شن بنكلموا فيك؟
غرفه؛نبي نشوفها؟
مطيره؛باهي اللي ماجتيش اقسم بالله احرف موقف نعيشه في حياتي..
غرفه؛لهالدرجه؟
أريج؛لو شفتي جدي كيف كانت حالته وسمعتيه كيف يدوي قلبك ينحرق..
سكتت غرفه وهي مضايقه..
مطيره؛ربي يستر واللي صار اليوم مايوليش عليه..
اريج وفردوس قالوا؛ان شاء الله..
والباقي قعدوا ساكتين وهما يفكروا بقلق..
🍃وفي دار بنات الواعر..
اللي كانوا فيها طوبى وآلاء برواحهم..
الاء ببكي؛اني مانبي منه شي غير انه يسامحني بس مش طامعه فيه يوليلي والله بكل..نبيه يسامحني بس..
طوبى بحزن:ننصحك تفوتي اللي تفكري ديريه ياآلاء مش في صالحك صدقيني..
الاء بنبرة باكيه؛قصدك خايقه يسمعني كلام حار ويهزبني!؟..ياريته بش نرتاح شويه...
طوبى شدت ع يدها وهي حزينه ع حالها هلبه..
الاء بألم؛اني من بعد مهند ياطوبى خلاص..سكرت باب قلبي معاش نبي حد ولانبي نعرف حد..نبي نعيش حياتي كيف ماربي مقدرلي..معاش نبي نعيش دور مش ليا..معاش نحط روحي في مكانات مش ليا..معاش نبي نعيش في الوهم خلاص..اني هادي حياتي وربي هكي قاسملي فيها نحاول نعيشها واني راضيه..
طوبى:ياريت آلاء صدقيني حترتاحي والله العظيم..
الاء؛راحه!؟..زعما مازال نرتاح بعده يابيبو؟
طوبى؛اكيد حبيبتي كلها مسألة وقت ويولي اللي عشتيه كله ماضي تعلمتي منه وحتكملي باللي تعلمتيه حياتك..
الاء رشفت وهزت راسها موافقه ع كلامها..
ناضت طوبى وقالت؛نوضي اطلعي معاي؟
الاء بضيق:لالاماخاطريش..
مابتش تلح عليها لانها عارفتها علاش تبي تقعد في الدار بروحها..هزت راسها وقالت؛براحتك..
بعدين مشت طلعت من حداها..
وقبل لتسكر الباب التفت شافتها وهي حاطه السماعات في وذانها ودير في شي بتليفونها..
تنهدت بحزن وسكرت الباب..
وألاء اتكت ع السرير وهي تسمع في البرنامج ودموعها سيل ونازل ماباش يوقف..
🍃🍃🍃🍃🍃
"تعاليله من بكري يبكي"
خديجه بضحكه؛كويس ليه العياط راهو..
محي بوجع؛حرام عليك قاعد صغير خوديه بسرعه..
ضحكت عليها خديجه وجت لسرير يحيى وخداته وقالت؛ترا المرضعه..
هو دور عليها بعيونه..بعدين خداها ومدهالها..
خدتها منه وقعدت ترضع فيه..
وهو يشوفله كيف يرضع..قلبه تقطع عليه وقال..
في ناس تجري عليهم..وناس تلوح فيهم..سبحانك ياربي سبحانك..
خديجه بانت ع وجهها ملامح الحزن..
محي الدين:والله ماني مخليه يستحق حاجه ولايحس روحه ناقص..
شبحتله وقالت؛اهدى محي مرات امه بعد تهدا ونفسيتها تتحسن تاخده..
هو قال:اختك فرطت في اللي ربتهم وكبرتهم شن تقولي انتي..
خديجه؛ماتعرفش شن يصير القدام..
محي:اختك مصيرها تتزوج ووقتها حضانه الولد تمشي لامك وامك ياالله تقدر تعاني روحها وامه هو في قطع الدنيا مايصيرش منها...وهكي الحضانه تجيك انتي هدا اللي بإختصار اللي بيصير القدام..
خديجه؛وكان بوه روح وقال نبيه؟
محي:ياغبيه تقعدلك الحضانه انتي من حقك انتي وبس لين يكبر الولد وبعدين يقرر بروحه واني متأكد انه مش حيعترف بيه..
خديجه وهي تضحك؛والله معاد عارفه شن نقولك..
محي وهو يشوف ليحيى:رقد..
هي شافاته وابتسمت..
حولت منه المرضعه ورداته لسريره..
ومحي يتأمل فيه وهو مبتسم...
🍃🍃🍃🍃🍃
"حظ ماعنديش نعرف روحي"
عبد القيوم؛صل ع النبي..
مسح ربيع ع وجهه بعدين قال؛اللهم صل عليه..بس جديات ياعبد القيوم اني ديما هكي الحاجه اللي نتمناها ماعنديش فيها حظ والحاجه اللي مانبيهاش تجيني بروحها..اقسملك يالله مافي حاجه تأملت فيها وتمنيتها في حياتي وصارت..
عبد القيوم؛الكلام هذى معاش تقوله انت ماتعرفش الخيره وين..وبعدين لعند توا ماصار شي بش تفكر هكي..
ربيع ولمعة الدموع باينه في عيونه؛ومش حيصير..هي باين عليها مأيسه من حياتها كلها..
عبد القيوم؛مرات فترة وتعدي..
ربيع؛فرضنا عدت..العيل سلمت فيه لأختها..
عبد القيوم؛انت تبيها هي ولاتبي ولدها؟
ربيع؛الزوز..
عبد القيوم؛كان صارلك منها يجيك حتى هو..لما تحنن قلبها عليه..
ربيع قعد يشبحله وهو يفكر في كلامه..
عبد القيوم؛وحده وحده وماتستعجلش شويه صبر بس..
تنهد ربيع وقال:ان شاء الله خير..ترا بالله نصوله نتغطى بيها..
عبد القيوم بضحكه؛من راسك بتبات هنا؟.
ربيع؛والله ماعندي خلوق نمشي للحوش..احدفلي وحده.
عبد القيوم؛وجهك زينقو كلاانت..
وربيع تمدد ع الفراش..وعبد القيوم حدفله نصوله..
ربيع؛سكر الضي..
عبد القيوم سكر الضي وقال:تبي حاجه اخرى؟
ربيع ؛لااطلع بس..
ضحك وحرك راسه يمين ويسار ومشي طلع من حداه..
🍃🍃🍃🍃🍃
"هيا تصبحوا ع خير"
بأصوات متقطعه ردوا ع غرفه وهي طالعه..
قدامك كل خير..
طلعت غرفه من حداهم..
وطوبى شافت بنظرة عابره لمكانها لقت التليفون..
ناضت ومشت خداته وهي تقول؛نساته الهبله.
فردوس؛باهي اللي تفكرت روحها..
ومشت طلعت طوبى خدت من ع الشماعه شاربتها لبستها..
وطلعت برا الحوش تنادي غرفه..
شافتها واقفه ع عبد الرؤوف وهو يقول..
خديتي غايتك في البيبسي..
غرفه بضحكه؛لالا والله لا..حتى هما ماخلونيش..
عبد الرؤوف..
صار هنوني عليك..
غرفه؛خزي عليك والله خاطري فيه..
عبد الرؤوف..
اللي يجي في خاطرك مانخليشي يقعد في خاطرك الا في حاجه ضرك..
وخدي يدها ومشي بيها وهي تقول؛سلمهولي ياربي..
هو قال:وطي صوتك وتحشمي..
🍃شافتهم لين طلعوا..بعدين لفت وخشت داخل وهي مضايقه..
"مالقيتهاش"
طوبى قامت راسها وشافت لفردوس وهي تقول بشي من الارتباك؛ايه روحوا...
🍃🍃🍃🍃
وتعدي ساعه تانيه..
وكل من فالحوش رقدوا..
وهي قاعده فايقه..
صلت الوتر...بعدين طلعت للجنان وقعمزت..
كانت تتفكر اللي صار اليوم..وكلام بوها وملامح وجهه قاعد قدامها في سمعها وبصرها..
موجوع قلبها..وخاطرها تفضفض لحد يحس بيها ويطبطب عليها..
وطبعا المراة عادة تلجأ لراجلها شريك حياتها ورفيق دربها..
بش طلعله اللي في قلبها وهو يواسيها ويخفف عنها..
ماكانش في بين طوبى والجالي فضفضه نهائي..
بس هي توا حست روحها محتاجاته هلبه..
قامت تليفونها وخشت ع الماسنجر..
لقت حسابه نشط..
بعتتله طول..
(جالي فايق)
🍃وتقرا نجاة قبل الجالي الرساله..
راجت شويه بعدين ردت..
(نعم شن تبي)
تشوف فيها وهي تكتب..
نجاه بملل؛شورها جريده!
وتجي الرساله..
(حاسه روحي مخنوقه نبيك نهدرز معاك شويه)
نجاه:ان شاء الله تموتي...
وقعدت تفكر بشن ترد عليها بعدين بدت تكتب..
(تاعب وبنرقد ومش فايقلك بكل)
🍃طوبى صدمها الرد..
حست وكأنه في ضربه نزلت ع صدرها ووجعتها هلبه..
وايديها يرجفوا كتبت الرد وبعتتاته..
(خيرك جالي شن صاير معاك)
نجاه؛عطيك سحيقه وخلاص..
(قتلك بنرقد فوتي امي باش تفهمي)
طوبى كانت مصدومه هلبه..ومش مستوعبه معاملته..
قبل ليسافر كان كويس نوعا ما..
شن اللي خلاه هكي توا..
(باهي..اسفه..تصبح ع خير)
🍃نجاه؛ان ماتصبحي كان ع الشر وماتشوفي غيره في حياتك..
🍃وطوبى ماسكرت..
قعدت تشبح في الفراغ وهي تفكر ودموعها ينزلوا..
قلبت وجهها وغطاته بالجنب بيدها ومسحت دموعها لما حست بحد طالع من الحوش وجايها..
"طوبى مارقدتيش"
شبحتلها وقالت:ماجانيش نوم..
عقدت اميمه حواجبها وقالت؛تبكي؟
طوبى شبحت القدام وقالت؛كنت نفكر في اللي صار اليوم..
تنهدت اميمه وقالت؛غير شن جابها بس..
طوبى:بابا قال تحذر فينا..
اميمه؛تحذر فيكم؟
طوبى؛هكي قال..اني مافهمتش يعني من شن بتحذرنا!؟ معقوله مختار يضرنا؟
اميمه؛مستحيل كان يبي يضركم راهو دارها من اول ماروح..حاسه عمي بالغ شويه..
طوبى:بوي كاره يسمع اسمه بالذات بعد اللي صار لسدره مش قابله لافي سمي لافي وطى..
اميمه؛محمله المسؤوليه حتى في اللي صار لسدرة..
طوبى قعدت ساكته وهي تفكر...
شافتلها اميمه..بعدين نزلت عيونها ع حوايجها وقالت؛تلبسي في واسع بش ماتبانش..
طوبى شافت لبطنها..
اميمه؛بدت تطلع..
طوبى رفعت عيونها القدام ومازال ساكته..
اميمه؛كان الجالي لاحظ وعرف بروحه حتصير مشكله كبيره..
ابتسمت تهكما ودموعها عبوا عيونها وقالت بنبرة حسره..
الجالي قالي سمنتي جسمك معاش زي قبل..نبيك تولي زي قبل ولابتفسدي..هدا اللي شافه واللي ركز عليه..
اميمه قعدت تشوفلها بحزن وقلق في نفس الوقت..
وهي مكمله تقول؛معاش عاجباته...معاش يشوف فيا زي قبل..ضحكت بألم ودموعها نزلوا وهي تقول..شكلها سدره كانت تجامل فيا لما تقولي انتي حلوة كيف ماتكوني..هو صح راهو..اني لما وقفت ع المرايه وشفت شكلي حسيت اني متغيره هلبه مش زمان..سمينه ووجهي باهت..وعيوني ذابله..
بس..شافت لأميمه وهي تمسح في دموعها وقالت..غرفه سامنه اكثر مني..شفتي وجهها اليوم..شفتي خشمها كيف مولي..ومع هكي عبد الرؤوف بيموت عليها..غيرت عيونها عنها وهي محرجه وقالت..نتعرفلك بحاجه ونبيها تقعد بيني وبينك..غرت منها..غرت هلبه..ايه غرت..شبحتلها تاني..وغرت حتى من حناي الله يرحمها..وغرت من نبيله..وغرت من اريج..
غرت حتى منك انتي..
رفعت اميمه حواجبها تعجبا..
هي هزت راسها وقالت؛ايه غرت منك..غرت منكم لأنكم انحبيتوا وحبيتوا...واللي حبوكم حبوكم لذاتكم مش لشكلكم ولالبسكم ولالأنكم فالحات..حبوكم وتمسكوا بيكم وندموا عليكم اشد الندم لما خسروكم سعدودكم..تنحبوا لكن اني لا..
ونزلت راسها وهي تمسح في دموعها..
واميمه تشوفلها بألم وهي موجوعه..
لاحظت ان طوبى باديه تفقد الثقه بنفسها وتبان ضعيفه..ضعيفه هلبه..
وطوبى مازال تقول بألم؛ولا مرة حسيت ان الجالي يحبني ماجانيش منه احساس يدل ع الحب..هوتعود عليا وعاجبه كيف اني راده بالي منه ومن الحوش ومش منقصه عليه شي..اصلا الناس كلها تقول هكي كلها وين تمدح فيا تقول..عاقله هاديه فالحه انيقه حلوة..بس هدا كله شنو ياأميمه..كله مؤقت يريح مع الوقت ومع الظروف..مايخليش الراجل يحب المراة..نوعيتي اني يااميمه شكلهم ماينحبوش..
اميمه؛شن الكلام اللي تقولي فيه هدا!؟ انت اكثر وحده تعرفي انك انحبيتي وانحبيتي هلبه..
شبحتلها بعيونها الحمر اللي ينهمروا منهم الدموع وضحكت نص ضحكه ساخره وقالت..
قصدك خوك...!
غيرت عيونها عنها وتنهدت وقالت...
اميمه اني بالنسبه لحسين زي اللي حاجه ليه هو متاعه..رباني ع ايديه وكبرني وحس اني نخصه ولازم نكون ليه هو..ايه هو صح يحبني بس مش الحب اللي نحكي عنه..
حب تملك اكثر شي...اللي يحب صح ياأميمه يخاف ع اللي يحبه حتى من نفسه مايرضاش يجرحه بنظره وخوك يضرب حتى الضرب..
اميمه بدموع؛لو متملك حق راهو ماخلاكش تاخدي غيره..
طوبى:عرف بعد مافات الفوت
اميمه:يقدر يخرب عليك..
طوبى:نقعد بنت عمه مايديرهاشسكتوا الزوز وكل وحده فيهم دموعها تجري ع خدودها..
وفي قلبها هم وحزن بحجم الدنيا. .
شويه رشفت طوبى وقالت..
خايفه ع بابا هلبه..مرعوبه عليه..تعرفي ياأميمه لو لاقدر الله لاقدر الله تصير فيه حاجه..ننهار في مرة ندمر...
اميمه بألم وشي من العصبيه وهي تمسح في دموعها قالت..
خلاص ياسرك سوداويه وتشاؤم..من امتى انتي هكي..من امتى كنتي هكي!؟ وينها طوبى المؤمنه بالله القريبه لربي وينها..كيف وليتي هكي ياطوبى!..
وهي تبكي حطت ايديها الزوز ع قلبها وردت بصوت مخنوق تقول..
خايفه...خايفه..هلبه..
ورفعت يدها حطتها ع فمها وقعدت تبكي ومانبيش طلع الصوت...
واميمه لقت روحها ضامتها وهي تبوس في راسها..وتقول..
خلاص..خلاص...
🍃وبعيد عنهم شويه..
في الحوش المقابل حوشهم..
كان مقعمز في الدار بروحه..
ويكتب بخطه المميز ع لوحه أبيات شعر حفظها عن ظهر قلب...
وكنتُ أدعوكَ يا الله في صِغري
رزقًا من الأُنسِ أو قطعًا من الحلوى
