(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_السابع_والثلاثين"أقحوانه2" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ درس سيارة قدام حوشه وهو يتكلم بالتليفون.. محمد شنيبه:لاخلاص غدوة بإذن الله تعالى يكونوا عندك.....في اي وقت في اي وقت.....بارك الله فيك..السلام عليكم... سكر..بعدين فتح الباب ونزل من السيارة وهو يقول:ياالله فاتت من قدامه سيارة نبيله.. قعد يتبع فيها بعيونه لين درسه قدام حوشها.. بعدين هي نزلت منها ومشت بتخش الحوش.. ارتسمت ع وجهه نفس ابتسامه الاعجاب..بعدين رفع حواجبه ونزلهم بتنهيده ولف بيخش الحوش.. انخلع لما شاف حفيده واقف وراه بمسافه وهو يشبحله بإبتسامه غريبه.. محمد شنيبه وهو يحاول يبان غادي:شن دير برا انت؟ محمد المهدي:كنت في المطحن شفتك جاي ياغالي طلعتلك.. محمد شنيبه؛بوك وين؟ محمد المهدي:بوي لتوا ماروحش ع الاغلب هكي ماشي لزليطن زي اليوم لازم يمشي غادي.. جده قال:ايه صح..هي برا خش داخل توا وقت غدي.. محمد بإبتسامه؛حاضر ياكينج.. ومشي للمطحن يكلم الشباب اللي فيه.. بعدين مشي لجده لقاه سبقه وخش.. ضحك ولحقه خش وراه... ☘☘☘☘☘☘ نبيله؛سامحيني ياعمتي بس والله اليوم كانوا عندي ثلاثه جلسات نطلع من وحده نخش للثانيه.. ريسه:ربي يعطيك الصحه.. فدوى:الطلاق كاثر في البلاد.. نبيله بأسف:مع الاسف وكل مالها نسبته في ازياد بالذات مع زواج الصغار اللي انتشر هلبه السنين الاخيره.. ريسه:ربك يفرج ع عباده ويجيرنا..المهم توا تعاليلي هني خيرها الكنه مرخيه هكي ومذهوبه شيرة.. ابتسمت نبيله وقالت:لا مش هكي بكل بس هي يعني ارتبكت طبيعي اول مرة تشوفوها وتشوفكم.. لميس:من بكري وهي مسكرة باب الكوجينه علينا وع الصغار من بكري وهما يقولوا نبوا ميه وحني نسكتوا فيهم مابيناش نخشوا عليها.. نبيله:لاكان طقيتوا شن المشكله هي بس تحب لما تعول في الكوجينه تسكرها عليها هي هادي.. ريسه:تو نشوفوا شن يطلع معاها بعد تسكيرة هالباب.. نبيله ناضت وهي نقول:نخليكم شويه اني ندوش ونصلي ونجي.. ريسه:بري بنية خوي بري.. ابتسمت نبيله ومشت.. وبنت عمتها راجتها لين مشت بعدين قالت.. فدوى:مش راضيه فيها شي.. ريسه؛ماهو هي اللي جابتهاله.. ☘☘☘ ودوشت وصلت نبيله..ومشت طول للكوجينه.. فتحتها وخشت لقت غرفه تستف وتوتي.. ابتسمت وقالت:ماشاء الله ماشاء الله المنظر والريحه ابداع.. غرفه وهي مبتسمه:تسلمي.. نبيله؛علاش مسكرة الكوجينه!؟ غرفه بآرتباك؛ماكنتش نبي حد يدوش عليا الحق.. نبيله:معاش تعاوديها عمتها وبناتها يحبوا يفسروا كل حركه ع مزاجهم.. غرفه؛قصدك اضايقوا منها؟ نبيله؛طبعا...مررت نظرها ع الكوجينه وقالت:شن درتي؟ غرفه؛كسكسي ومبطن وسويرول وبيتزا وسلاطه.. نبيله:عطيك الصحه عطيك الصحه..خلاص بري انتي اركبي شقتك دوشي والبسي حاجه حلوة ومكيجي راك عروسه.. غرفه بإبتسامه:حاضر..الحاجات تلقيهم في الكوشه.. نبيله:تمام.. مشت غرفه طلعت متوجهه لشقتها.. ونبيله كملت عنها.. ع مرواحة عبد الرؤوف وهو حامل ومحمل حلو ع فواكه.. شم روايح التطييب ابتسم.. بعدين مشي خش الكوجينه تفاجئ لما شاف نبيله فيها.. عبدالرؤوف:السلام عليكم. نبيله :وعليكم السلام.. حط الحاجات ع الطاوله وقال:ان شاء الله انتي طيبتي؟ نبيله وهي مشغوله؛ريح روحك عارفني بنروح الساعه 3 امتى بنلحق ندير هدا كله!.. رخي ملامح وجهه وقال:باهي وينها الهانم.؟ نبيله:قلتلها تركب تبدل حوايجها.. تنهد ومرر نظرها ع الصواني بعدين مشي طلع لعمته وبناتها.. مرر نظره ع الحوش لقاه كله فوضى.. خش عليهم الصالون ابتسم وقال:عمتي.. شبحوله بنات عمته بالذات لميس اللي كانت مركزه فيه.. ريسه:وليد خوي الغالي.. جاها طبس عليها وسلم..وكب ع راسها وهو يسأل عن الاحوال.. بعدين صافحه بناتها ومشي للصغار اللي كانوا يتفرجوا ناشبهم. بعدها مشي قعمز حدا عمته وقعد يهدرز.. نزلت غرفه من فوق وهي بكامل اناقتها وريحه عطر جميله تفوح منها.. مشت للكوجينه وخشت ع نبيله.. غرفه؛كملتي.. شبحتلها وابتسمت؛ايه خلاص ياقمر انتي بس اطلعي ديري دوري ع الحوش وبخري الوشقه.. غرفه بآبتسامه؛حاضر.. حطت الكربونه ع النار.. بعدين رتبت الفوضى ع السريع وخدت البخارة وخشت للكوجينه حطت فيها الكربونه.. وطلعت برا وحطت البخور وقعدت دور وتبخر في الحوش.. هو طلع من الصالون بش يشوف الغدي.. لمحها دور .. ثبت عليها نظره.. كانت لابسه قفطان مغربي لونه سكري فيه طريزة ذهبيه.. رافعه شعرها فوق.. من الظهر شافها بس..وكان مبهور.. مشالها وهو يقول تهكما؛فالحه اليوم؟ هي انتفضت من الخلعه والتفتت شبحتله وحطت يدها ع قلبها.. كانت مدايرة مكياج بسيط بس محليها هلبه يالذات الآيلانير اللي ابرز جمال عيونها.. والقلب يخبط خبط.. غرفه:امتى جيت؟ بظاهري اللامبالي بتصنع؛امس..! غرفه سكتت وقعدت تبخر.. عبد الرؤوف:ياويلك لو يطلع غداك يحشم.. غرفه؛حتاكل صوابعك وراه.. عبد الرؤوف: العبد الواثق.. شبحتله ورفعت حواجبها ونزلتهم بمعنى ايه.. عبد الرؤوف قدم خطوة وقال:مش اني المهم..المهم ضيوفك هانم.. غرفه بضحكه؛لاهادو ياكلونا حتى حني عادي.. جاها وشد ذراعها بقوة.. هي شبحتله بخوف.. وهو بغضب قال:الكلام اللي قلتيه مازال تعاوديه..شد حناكها بقوة وقال..نكسرهم... هي من الرعب هزت راسها ع قد ماتقدر وقالت بتلعثم:باهي باهي.. هو طلقها..وبعدين عطاها نظرة تخوف..ولف ومشي للكوجينه.. هي شدت حناكها وكانت تتوجع وتقول؛عطيني قصة في لساني حنى اني... قدمت شويه لقاته طالع بالسفره من الكوجينه.. نبيله طلعت وهي تنادي:غرفه.. جتها وحطت البخاره ع الطاوله.. نبيله:هي تعالي للغدي.. ومشوا الزوز مع بعض لدار المعيشه.. هالمرة قعدوا ياكلوا ع الأرض.. مع بعض.. ماعجبتش غرفه تقعميزة عبد الرؤوف معاهم خصوصا انها لحظات نظرات من بنت عمته العزبا ليه ماحبتهاش.. عبد الرؤوف مد لغرفه صونيه سلاطه وقال:خودي.. كلهم شبحولهم.. وهي بآستغراب خدتها.. هو ضحك وقال؛هدا ماتاكل هي سلاطه بس تبي تنقص.. انصدمت غرفه.. ونبيله تشبح لخوها.. لميس؛ايه صح تبيلها تنقص شويه.. غرفه شبحت للميس.. ريسه؛لكن غداها الله يبارك.. عبد الرؤوف:صحتين عمتي صحتين..وكلي الصغار يافدوى.. فدوى بإبتسامه؛اهم ياكلوا.لميس خدت صونية السلاطه اللي قدامها ومدتهاله وهي تقول؛خودها بيكا.. شبح للميس.. وغرفه تشوفلها بغيظ.. لميس بضحكه:سامحني مش قادرة نتأقلم مع اسمك التاني مبروك احلى بهلبه.. هو خدي منها الصونيه وقال:صحيتي. فدوى:الحق الحق مبروك احلى في كل شي مش غير اسمه ياحسرة ايام زمان كيف كنت طلع فينا كل جمعه نتزردوا وتقيمها انت خوتي جو ودربوكه.. ريسه:ايه عليك ايام.. لميس:ايام زمان كنت فرفوش اكثر من توا.. غرفه كانت تشبحله كيف ياكل ويسمع فيه وع وجهه ابتسامه حسرة وفي عيونه واضحه لمعه الدموع.. نبيله؛خلاص ياجماعه اقلبوا الصفحه وهدرزوا في حاجه تانيه..ايه فدوى شن حالك وحال متاعينك.. وفتحوا موضوع تاني وانشغلوا بيه.. بس غرفه مازال تشبحله وقلبها موجوع.. جت في بالها ذكري من ايامها معاه.. كان يحكيلها عن حبه للطلعات والزرادي والجو اللي يدير فيه.. وقتها كانت هازيه عليه..بس توا هزت ع نفسها واستحقرتها.. كيف انها استغلت نية صافيه لشخص طيب زيه ودمراته من الداخل.. هو رفع عيونه وشبحلها.. نظرتها ليها كانت نظره واحد يقول.. "شفتي شن درتي فيا ووين وصلتيني" نزلت عيونها هربا من كلام عيونه.. وخدت كاشيك وبدت تاكل في السلاطه.. وهو غير عيونه عنها وقعدت يشبح في الفراغ. لميس:كول بيكا.. شبحلها وقال بإبتسامه؛ناكل.. وغرفه تاكل وتشوفلهم بغل.. ☘☘☘☘☘ وفي حوش شنيبه.. بعد الغدي... في المربوعه.. عمر:هاه شن رايك بوي.. محمد شنيبه؛ماعنديش مشكله تو نشوف الحاج علي وعبد المطلب في الجامع وقت الصلاة ونفتح معاهم الموضوع.. المهدي:علاش بتقرا فاتحه توا كان العرس اخر السنه؟ عمر:نبي ناخد راحتي في الكلام مع البنت عن الشقه عن الاثات عن امور معينه نبيها منها.. المهدي:نصيحه اجلها للعرس خيرلك.. محمد؛وعلاش يأجلها للعرس! وبعدين هما قبل قبلوا تنقرا فاتحه سدرة قبل العرس بعامين.. المهدي ضايق وغير عيونه للتلفزيون.. محمد؛يوافقوا بإذن الله يوافقوا.. عمر ابتسم وهز راسه.. ☘وفي دار المعيشه.. كانت مغليه مع نجاة وعائشه وخديجه اللي مابتش تروح لحوشها فهاليوم عن قصد.. عائشه:شكلها التهابات.. نجاة؛عاينتي.. عائشه:ماعنديش خلوق للمعاينه تو كل واحد يقعد يقول كلام شكل ونقعد غير نبلع في المضادات اللي ضررها اكثر من فايدتها..قلت خليني نحافظ ع الماكله ونشرب اعشاب خيرلي.. خديجه؛من هالناحيه عندك حق التشخيص عندنا زيرو تبدا فيك مرارة يقولولك بكتيريا في المعده ويهبعوا بيك.. مغليه؛صدقتي.. نجاة؛الطب عند التوانسه وجماعة الاردن المشكله في الاردن انها غاليه بس.. مغليه:في حد عندك يعالج غادي؟ نجاه:عزوزة اختي مروة فيها الخبيث ياناري.. مغليه:اللهم عافينا..وين جايها؟ نجاة؛في الدماغ.. مغليه؛بعيد وبر بعيد وبر... "يام" رفعت عائشه شاربتها ع راسها.. خديجه:هي البسي انتي.. نجاة للمرة التانيه تنسى نفسها لين يوقضوها لبست ع راسها طول. مغليه؛خش ولدي.. وقف الجالي في الباب وقال:السلام عليكم.. كلهم ردوا عليه السلام.. الجالي:معليشي نجاة الملف اللي بكري قتلك روحي بيه جبتيه معاك؟ نجاة:ايه.. الجالي:ترا بالله طلعيه.. ناضت ومشت طلعت..وهو مشي وراها.. مغليه؛ايه ياعويشه شن حال عمك بالله.. عائشه؛اهو مصلح ماشي حاله بالجهاز وخلاص.. خديجه ناضت وقالت؛خل بنمشي نروح اني اكيد محي روح توا.. مغليه؛ولي العشيه كان هدا.. خديجه:تو نشوف..بالسلامه... ومشت طلعت من داى المعيشه.. وقعدت تمشي بإتجاه الكوجينه... وكانت دور فيهم... فجأة سمعت اصوات الهدرزة جايه من الصاله.. لفت ومشت بخطوات خفيفه ووقفت ع الباب.. وقعدت تتصنت.. ☘نجاة:علاش شن تبي فيه؟ الجالي:كلمني صاحب المشروع وحددنا موعد بعد العصر بش نتلاقوا.. نجاة؛قولتك يعجبه.. الجالي ضربها بالملف ع راسها وقال؛شن السؤال هدا بيعجبه ونص.. ضحكت.. الجالي:هيا ماشي اني.. نجاة؛وين؟ الجالي:مولي للشركه..سلام.. ومشي طلع من الصاله... ونجاة بعدين مشت طلعت من الصاله لدار المعيشه.. وخديجه واقفه حدا باب الكوجينه كانت تراقب فيهم.. وعقلها بادي يفكر بجديه في شكوكها... ☘☘☘☘☘ "تي وين الشاهي ياهووو" نبيله وهي تغسل في الماعين بعصبيه قالت:طلعيهوله طلعي.. غرفه وهي مرتبكه:هيا هي.. وخدت السفرة ومشت طول طلعت بيها للصالون . اللي كانوا الصغار يجروا ورا بعضهم فيه.. هي خشت.. لقاته متمدد ع الكنبه وحاط يده تحت راسه ويتفرج ع التلفزيون.. وهما حداه يتفرجوا معاه.. فدوى وهي تهزب في صغارها:قعمزوا انت وياه.. ريسه:طيب فينا اللي جانا الشاهي.. شبحلها بحده وهي خاشه بالسفره.. ارتبكت ومشت للعزوز طول بتعطيها.. يجي واحد من الصغار يجري ينوش السفره.. تنكفى بكل شي فيها ع غرفه.. بالذات برداها اللي فيه الشاهي ساخن.. وعبد الروؤف اللي كان متمدد في لحظه جي واقف وجاها يجري شدها وقعد يقول بخوف:غرفه! وغرفه تعيط بألم وهي تقول:انحرقت انحرقت. ع جية نبيله تجري.. نبيله:خيرها غرفه! شافت البراد المكفي والشاهي المتبزع عليها جهة البطن قالت:الشاهي كان يغلي غلي يانهاري! عبد الرؤوف خلاص معاش فكر في شي رفعها وطلع بيها يجري..ونبيله لحقاته وهي تقول:راجيني.. مشت تجري لدارها خدت عبايه وزوز اوشحه بعدين طلعت منها ولحقت خوها برا.. اما عمتهم وبناتها.. ريسه؛المفرخ الغبر.. وفدوى ناضت شدتهم وطاحت فيهم ضرب وهي تقول حشمتوني يامصايب.. ☘برا.. طلع يجري عبد الرؤوف بالسياره.. شافتهم سدرة اللي كانت فوق السطح تشوف في البساط المنشور كان جف ولالا.. قلبها قبضها.. طول نزلت تجري بش تتصل بغرفه.. وصلت وين مافي تليفونها اتصلت بيها طول.. وع قد مانادى الخط ماردتش لين فصل.. ولع في قلب سدرة النار.. مشت طول للدار تنادي؛طوبى ياطوبى.. طلعت طوبى من الدار وهي تقول:خيرك؟ سدرة بخوف؛توا شفت عبد الرؤوف طالع بالسيارة من حوشهم يجري..حسيت في شي اتصلت بأختك ماتردش.. طوبى وهي تحاول تخفي خوفها عن سدرة:اهدي حبيبتي اهدي مرات حاجه ليها علاقه بخدمته ولاحاجه.. سدرة:اتصلي بأخته توا وشوفيها رقمها مش عندي.. طوبى:باهي باهي. ومشت خشت للدار وسدرة وراها.. قامت التليفون وطلعت رقم نبيله واتصلت بيها.. كذلك كان ينادي وماتردش.. طوبى:ماتردش! سدرة خبطت بإيديها ع رجليها:ياحليلي اختك اشبح شن صايرلها.. طوبى:غير بالشويه ياسدرة.. سدرة:ياربي من بنكلم ياربي..ماتعرفيش رقمه انتي؟ طوبى:لاعندي مرة كلماته غرفه تليفوني.. سدرة:وشن تراجي اتصلي بيه.. طوبى:اني!؟ سدرة؛حطي ع رقمه حطي واني نكلمه.. طوبى هي مرتبكه:حاضر حاضر..وقعدت دور في الرقم لين لقاته وعطت التليفون لسدره وهي تقول:هو هدا.. اتصلت بيه سدرة طول.. نادى مرتين انفتح الخط.. سدرة:ايوه.. "هاه من معاي" سدرة؛اني سدرة اخت غرفه اختي شن فيها.. ماجاهاش رد سمعت دوشه وبعدها سمعت صوت نبيله تقول.. "ايوه سدره" سدرة:انتي معاه معناها اختي معاكم واشبح شن صاير فيها.. "اهدي ياسدرة شويه خل نعرف نكلمك" سدرة:اني هاديه تكلمي . "ناشها براد الشاهي" سدرة:كيف ناشها براد الشاهي؟ "قصدي ناشوا براد الشاهي تبزع عليها" سدرة بفجعه:غبارتي السودا!.. رعشت طوبى.. "اهدي ياسدرة اهدي شويه: سدرة:انتم وين توا وين وين رافعينها.. عطتها نبيله اسم العياده اللي خشلها عبد الرؤوف. سكرت الخط سدرة ومشت طول تجري بش تلبس وتلحقهم وطبعا طوبى مش حتخليها بروحها.. ☘درس عبد الرؤوف وفتح الدرج وطلع منه مسدس.. بعدين مشي خش داخل وهو رافع السلاح ويقول بصوت عالي غاضبة:عندي حالة اسعاف..اسعاف.. هما شافوا المسدس طلعوها بالباريلا يجروا.. هو مشي طول فتح الباب وطلع غرفه وهو رافعها بين ايديه وهي تتوجع.. وهو يقول:بسيطه بسيطه.. وحطها عليها..وخشوا ليها داخل طول..ونبيله وراهم.. ☘اسعفوا غرفه بسرعه.. الحرق كان جاي في بطنها وجزء من رجلها اليسار.. وهي تتألم بقوة وتأن.. وعبد الرؤوف وهو ماشي جاي برا يسمع في صوتها وقلبه بيتقطع بيخشلها ومش قادر... بعد ماداووا غرفه عطوها مسكنات تهدي الوجع... طلعت نبيله لخوها وقالت:باهيه توا احسن.. عبد الرؤوف بلهفه وخوف:وين جايها الحرق؟ نبيله:في بطنها ورجلها من هني..واشرتله ع منطقه فوق الركبه. بدت ع وجهه ملامح الالم.. ع جية سدرة وطوبى يجروا.. جاته سدرة وهي تقول بغضب:شن درتلها قول انت اللي بزعت عليها الشاهي ولا؟ نبيله:اللطف ياسدرة علاش بيدير هكي هبل! طوبى قعدت تشبح لعبدالرؤوف وهي عاقده حواجبها خوف عرفه منه خلاها ماتستبعد شي عليه.. سدرة؛كيف تبزع عليها ترا فهمهالي.. طوبى:غير شويه ياسدرة..شن حالها هي توا؟ نبيله:الحمد لله داووها..هني قاعده.. الزوز خشولها طول.. نبيله شبحت لعبدالرؤوف وقالت:شفت الفكرة اللي واخدينها عنك اكيد بان عليها انها مش مرتاحه.. هو بضيق قال:بالله خليني في حالي يانبيله تربحي.. ومشي وخلاها.. وهي قعدت معاه بعيونها وهي تشوفله بأسف بعدين مشت خشت داخل.. ☘☘☘☘☘ الساعه 7:30مساءا.. طلع من الحمام وخش للدار لقاها مقعمزة وتبان سرحانه. محي:وين وصلتي.. خديجه ماردتش.. محي:هوو..خديجه.. شبحتله.. محي:في شن تفكري!؟ تنهدت وقالت:شي.. محي:غريبه مامشتيش لحوش ماليك.. خديجه:كنت عندهم من الصبح.. محي:عارف بس توقعتك تولي بعد العصر.. خديجه:هديكا اللي اسمها نجاة قاعده غادي وماخاطريش فيها بكل.. هو شبحلها شويه بعدين قال:خديجه . خديجه:اممم.. محي؛ماتردوهاش.. خديجه:من هي؟ محي:هي نجاه بدال ماقاعده نخش عليكم وتطلع من غير اي صفه حتى قدام الناس غلط.. خديجه:معاك في هادي بس بوي وامي هكي يبوا شن بنديروا.. محي:ردوها وخلاص.. خديجه:من بيردها المهدي! محي:الجالي.. خديجه؛مستحيل..نهاري قاعد عزري ياخد واخد اكبر منه وعندها صغار لالالا.. محي:علاش وين المشكله ياما منهم داروها.. خديجه:حني مانديروهاش وفي عيلنا ممنوع الحاجه هادي وبوي لايمكن يرضى بيها..انت ماتعرفاش في القوانين متاع العيله مايرحمش..هدا غير امي اللي لو تطبق السمي ع الوطا حاجة زي هادي لايمكن ترضى بيها.. محي:اني تكلمت ع خاطركم..كلان الناس بيوصلكم خديجه حيطلع الكلام عن حوش شنيبه اللي يدخلوا في مراة غريبه في حوش مليانه عزارى.. تنهدت خديجه وقعدت ساكته.. اما هو قال:طالع ماتبي شي.. خديجه:لاصحيت.. مشي محي طلع من حداها وفضل انه انه يحتفظ باللي شافه لنفسه ومايطلعش سر الجالي لحد.. اما خديجه فكانت تفكر في وجود سر في حياة خوها الجالي ولأنها قويه ملاحظه ماعدتش عليها تفاصيل صغيره هلبه من اللي حواليها مايركزوش عليها... ☘☘☘☘ روحت غرفه هديكا الليله من العياده.. وحطها عبد الرؤوف في دار اخته نبيله كيف ماطلبت منه هي.. ولما روحوا مالقوش العمه وبناتها.. نبيله:تحشموا من الموقف اللي صار.. عبد الرؤوف وهو يشوف لغرفه كيف راقده بتعب:فوتيهم توا وقوليلي شن قالولك ع الدوا بالزبط.. ~~~~~~ مطيره؛ياناري بنيتي! سدرة وهي تمسح ع وجهها:والله قريب روحت بيها.. طوبى:ماتخافيش عليها ماشفتيهمش كيف يرعشوا عليها الزوز زيه هو زي اخته.. سدرة سكتت وهي مضايقه ومش قادره تقتنع بعبدالرؤوف.. مطيره:مفروض كلمتوني راني جيتكم غادي.. طوبى:حصل خير والحمد لله حروقها مش عميقه.. ع خشة لطفي للحوش.. لطفي:السلام عليكم.. كلهم ردوا؛وعليكم السلام.. قعمز وقال:اه يارجليا الوقفه في طابور المصرف خلتني من مش قادر نمشي عليهم.. طوبى:نديرلك ميه وملح بابا.. هز راسه وقال:ديري يابنتي ديري.. ناضت بسرعه.. هو ركز ع وجوههم حس ان في شي. لطفي:خيركم؟ الزوز قالوا:شي.. لطفي؛مش باين.. سدرة:لاغير كنا نحكوا ع الدكتور جارنا معاش بانوا هو ولده.. لطفي:ايه حقه فكرتيني..شافهم الحاج خليفه طالعين الصبح بشناطيهم من الحوش.. مطيره:كيف يعني سافروا؟ لطفي:ماعنديش فكره.. وهني سدرة تأكدت من اللي كان في بالها لما سمعت بإنه خدي اجازة من شغله.. بدت ع وجهها ملامح الاسف وعرف ان الدكتور اياد خلاص.. قرر يغادر شارع القهوة لغير رجعه... ☘☘☘☘☘ وطول الليل وعبد الرؤوف سهران في الصاله وباله مشغول ع غرفه... مارقدش لآذان الفجر.. مشي صلاه في الجامع وروح بسرعه.. ولقي اخته فايقه.. عبد الرؤوف:هاه شن حالها توا.. نبيله:برا خش شوفها.. عبد الرؤوف عقد حواجبه وقال:راقده؟ نبيله:ايه.. هو تنهد بعدين حط ايديه ورا ظهره ومشي للدار.. نبيله وهي تشوفله حركت راسها يمين ويسار ومشت للكوجينه.. هو خش عليها.. وقف في الباب قعد يشوفلها من بعيد بس يتأكد انها راقده.. بعدين قدم كم خطوه لين وصل فيها وشافها كيف مستغرقه في النوم.. قال بصوت يكاد يكون هامس:حاجتين ماتستغناش عنهم النوم والماكله.. فجأة طلع صوتها وهي تتألم.. طلع بسرعه ومشي لنبيله قاللها:فاقت وشكله في حاجه توجع فيها.. مشت نبيله وهي تقول:شوف القهوة.. عبد الرؤوف:باهي غير بري بسرعه.. طلعت نبيله وهو قعد معاها بعيونه لين شافها خشت الدار.. فجأة..سمع صوت فوجة القهوه.. فنص عيونه وجاها يجري.. ☘☘☘☘ الساعه 8:30 صباحا.. في جنان حوش شنيبه.. نضال:هو يكون في مكتبه الساعه 12 نقولك يمشيلك قبله.. الجالي:ياودي كان صاحبك اني نمشيله لعنده.. نضال بضحكه:قدر ياسلمان خان قدر.. ضحك الجالي وقال:باهي خليني نطلع.. وسع نضال وقاله:تفضل.. مشي الجالي ركب سيارته.. بعدين طلع من الحوش بكل.. ☘وبرا محي شافه وهو طلع بروحه وراجى سيارة نجاة تطلع وراه بس ماطلعتش.. محي:شكلهم روحوا..يسترك ربي يالجالي وخلاص.. ومشي ركب السيارة حتى هو وتحرك لحال سبيله.. ☘☘☘☘☘ الساعه 10:00صباحا.. نبيله:زي ماقتلك دير بالزبط.. عبد الرؤوف:تمام..فهمنا..غير تسقدي انتي وشوفي حالك.. نبيله:اسمع ردبالك ع المراة ايوه.. عبد الرؤوف بنفاد صبر:لاإله الاالله.. هي ضحكت ومشت بتطلع وهي تقول :سلام.. طلع وراها وسقدها..ولما تأكد انها طلعت من الشارع. سكر الباب بسرعه وخش دار اتصال ونهاه بسرعه.. لحظات ورن هاتفه. طول مش طلع لباب الحوش الخلفي.. فتح الباب.. خشوا عمال قاللهم:تعالوا.. مشي بيهم لدار خزين كبيره ومسكرة بالمفتاح.. فتحها وقال: خشوا طلعوا الفرش الاول بعدين الحاجات التانيه.. وخشوا الرجاله.. وقعدوا يطلعوا في فرش الشقه ويركبوا بيه فوق من الدروج اللي ع برا.. بعد ركبوه كله.. قعد يفرش هو وياهم... بعدين نزلوا وهو معاهم... ركبوا قطع المكتبه والمدخل وديكورات تانيه.. وكله عاودوا ركبوه من اول وجديد فالشقه.. عبد الرؤوف ؛عطيكم الصحه ياجدعان. وعطهم حق تعبهم وكان كريم معاهم.. سقدهم.. ورجع للدور الاول.. خش دار اخته.. لقي غرفه نايضه وكانت سرحانه.. لما شافاته خاش قعدت تشبحله.. وهو جاها رفعها من السرير.. غرفه وهي خايفه:وين ماشي بيا!؟ حي عليا وين بتحطني. عبد الرؤوف:كلمه تانيه نسحب ايديها.. سكتت وهي خايفه.. وهو كمل طريقه بيها لين خش الباب الفاصل.. وركب بيها من الدروج.. هي قعدت تشبحله..وفجأة دقات قلبها تغيرت من الخوف لشعور تاني جميل.. هو شبحلها لقاها تشوفله:خير شن عندك في خليقتي!.. هي غيرت عيونها عنه ووجهها ولى احمر.. خش بيها الشقه... انصدمت وين شافتها مفرشه.. وهو كمل بيها لدار النوم.. خشلها وحطها ع السرير.. بعدين مشي فتح روشن الدار.. غرفه؛علاش درت هكي! التفت وهو رافع حاجبه وقال:شن متوقعه نجاوبك.. قعدت ساكته.. فجأة رن جرس الحوش.. عبد الرؤوف اشر بسبابته ع مصدر الصوت وقال:هادي اجابة سؤال.. ومشي بيطلع بعدين وقف وقال:كان قالولك علا المكتبه فاضيه قولليهم كنت نظف فيها تمام.. غرفه؛من هما عمتك وبناتها؟ عبد الرؤوف:طيشتيهم عمتي وبناتها.. ومشي طلع من حداها وخلاها مش فاهمه شي.. حوالي خمسه دقايق.. وخشوا سدرة ومطيره للشقه.. سدرة؛وين دار النوم.. مطيره:القدام.. مشوا الزوز وخشوا عليها... مطيره؛غريفه بنيتي.. غرفه،سدرة..عميمه..!.. جتها سدرة شدت وجهها بآيديها وقالت:شن حالك توا؟. غرفه؛احسن.. سدرة؛داووك.. غرفه:ايه داوتني نبيله قبل لتطلع.. سدرة؛اسمعي بنقعد معاك هاليومين مش عاجبه راجلك يخبط راسه في الحيط.. ضحكت غرفه...ومطيره تمسح ع شعرها وهي تقول؛عين وطارت.. ☘☘☘☘☘ في الشركه.. كان الجالي ماشي بيطلع من الشركه متوجهه للجامعه.. اتصلت بيه نجاه تبي تعرف وين ماشي.. الجالي ركبت السيارة وقال؛صديق نضال هو نمشيله مافيها شي.. "تمام..بس ورانا اجتماع راك تنساه" الجالي:وبعد الاجتماع بنرفعك نوريك المفاجأة . "معاش تزيد تحمسني خلاص" ضحك وقال؛بري اخدمي ع حالك سلام.. "نحبك" الجالي:اني اكثر.. وسكر عليها..بعدين شغل السيارة وتحرك وطلع من الشركه.. ☘☘☘☘☘ طالعه من الكليه وهي تمشي ع رجليها بطريقها لكلية بنات اختها... وماكانتش تندري ع السيارة المتعمه العاليه اللي كانت تلحق فيها.. :خليها تخش مكان فاضي شويه.. :تم.. وطوبى تمشي في امان الله ومش حاسه بأي شي.. ☘الجالي:علمني حبك أن احزن.. وانا محتاج منذ عصور لإمرأة تجعلني احزن.. لأمرأة ابكي فوق ذراعيها مثل العصفور.. لإمرأة تجمع أجزائي كشظايا البلور المكسور... ~~~~~~~ طوبى وهي ماشيه في الطريق تردد.. "لاإله إلا الله وحده لاشريك له بيده الخير وهو على كل شي قدير" ~~~~~~ الجالي.. علمني حبك سيدتي أسوء عادات.. علمني اخرج من بيتي.. في الليله آلاف المرات.. وأجرب طب العطارين.. واطرق باب العرافات.. علمني اخرج من بيتي .. لأمشط ارصفة الطرقات.. واطارد وجهك.. في الأمطار.. وفي اضواء السيارات.. وأطارد ثوبك في أثواب المجهولات واطارد طيفك.. حتى..حتى.. في أوراق الإعلانات.. علمني حبك كيف أهيم على وجهي..ساعات.. بحثا عن شعر غجري.. تحسده كل الغجريات.. بحثا عن وجه..عن صوت.. هو كل الأوجه والأصوات.. ادخلني حبك سيدتي مدن الاحزان.. وانا من قبلك لم ادخل كل الأحزان.. لم اعرف ابدا ان الدمع هو الانسان.. وان الانسان بلاحزن.. ذكرى انسان... ☘سكت لما لمح من بعيد وحده يعرفها.. ارتسمت ع وجهه ابتسامه لما عرفها وقال:طوبى.. شويه خفتت ابتسامته لما شاف سيارة سودا مظلمه وقفت جنبها.. ونزل منها واحد شدها وقعد يجبد فيها وهي بدت تعيط.. طوبى بعياط وهي تضرب فيه؛حول ياحقير حول.. :تعالي هني تعالي.. وطوبى تعيط عياط وقاعده تنجبد معاه برغم مقاومتها... درس الجالي.. ونزل يجري من السيارة وجاها شدها جبدها منه وحطها وراه وهويقول:ياكلب ياولد الكلب.. وطوبى وراه شدت في كم بالطوه وهي ترعش.. صاحب الولد قاله؛اركب اركب.. الولد زاد انغل طلع مسدس من خصره.. طوبى شافاته صرخت بأعلى صوتها:لا.. والجالي كان قاعد يدرق في طوبى وراه وهو خايف.. الولد سحب وضرب ع رجل الجالي.. وطوبى تعيط ع طول حسها.. ركب طول.. وهربت السيارة.. والجالي شد رجله وهو يتألم بقوة.. وطوبى تبكي وتعيط وهي تقول:جالي جالي حي عليا كلمني بالله عليك.. هو قعمز ع الرصيف بصعوبه وقعد يقول بألم ؛ماتخافيش..وقفي..حد وقفي.. هي هزت راسها بسرعه وقفت في الكياس وقعدت تأشر للناس وتعيط وتقول:تعالوا..تعالوا ياناس تشبحوا فينا.. الجالي بألم:آااه.. التفتت شبحتله وجاته تجري.. حولت حزام بالطوها وطبست ع رجله وربطت مكان الاصابه كويس.. وهو يتألم.. طوبى ببكي:آسفه آسفه بنوقف النزيف.. جو رجاله يجروا واحد منهم قال:حولي اختي. ناضت طوبى بعدت وهما رفعوا الجالي وركبوا وحده من السيارات.. وطوبى تشبحله وهي تبكي.. هو شبحلها وقال؛بري خشي بري.. وسكروا الباب ومشت السيارة.. وهي انهارت بالبكي.. ع جية اريج تجري وهي تقول بخوف:طوبى شن في صار شن هالدم.!.. خدتها طوبى وقالت:تعالي.. ومشت خشت ليها داخل خوف يولي نفس الولد من جديد ويضرب عليهم....
#أقحوانه #طوبى
...يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
