#طوبى "جنة طوبى"
#جمان_فريد
#الجزء_الحادي_والستين"رسايل_غرام☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
غربت الشمس...والليل بدي يحل..
وزحمة العزي زادت..
وضيافة العزي حاليا ولت اهم من العزي نفسه..
واللي مات بعد يندفن ينتسى عند الناس وتولي هدرزتهم كلها عن اي شي في الحياة ماعدا الميت..
وهالشي اكيد يضايق اهل الميت واحبابه المفجوعين عليه..
🍃في الكوجينه..
خشت طوبى بسفرة فيها فناجين قهوة فاضيات وهي مضايقه..
حطت السفره ع الطاوله بعصبيه..
دنيا ووحده من كناين عتيقه اللي كانوا معاها في الكوجينه استغربوا..
هي لاحظتهم وقالت:نكره عوالة العزي..
مرت خو عائشه بضيق:حتى اني..اصلا شرعا غلط هدا كله..هو عزي..مصيبة موت وانتي متنكده وقلبك متقطع مجبوره ديري قهوة وشاهي وسفنز وفطيره وغدي وعشي وتسمعي هدرزتهم اللي نصها ضحك وكأنه اللي مات قطوس مش بنادم...
طوبى بضيق:هدا علاش اني نكرهها..تصدقي توا وحده قالتلي جبيلي فطيره مانحبش السفنز..
ابتسمت دنيا تهكما وقالت:اني في وحده سمعتها بوذني تعلق ع الفطيره قالت يابسه متاع شاورما وطعميه مش متاع شاهي..
مرت خو عائشه؛تلقيهم توا يفكروا في العشي..
ابتسمت طوبى بتهكم..
دنيا؛عمتي قالت كلمنا تشاركيه هما اللي بيديروا الوجبات متاع العزي..
طوبى سكتت وهي تفكر في اللي سمعاته من الدنيا..
عزوزتها ماتفوتش ولا فرصه تجيها تخليها تتباهى ع خلق الله حتى لو كانت موت...
🍃وعزوزتها توا واقفه قدام المربوعه الدخلانيه..
ومعاها خديجه ع المهدي..
مغليه بحزن:ياروحي ع وليداتي..
تنهد المهدي بهم وقال؛وين سدره نبي نشوفها..
خديجه بحزن؛راقده..
هو سكت شويه بعدين قال:خلوها راقده لكن عينكم عليها..
الزوز قالوا..
"حاضر..من غير ماتوصي"
هو هز راسه بعدين مشي من حداهم وهما الزوز معاه بعيونهم..
شويه قالت خديجه؛مولي جلد ع عظم..
مغليه بضيق؛ربي يفرج عليك وليدي..
بعدين التفتت لباب المربوعه ومشتله..وقفت قدامه..
ودقت..
"خش"..
فتحت الباب..
لقت محمد ياخد في حوايجه وحوايج خوه من ع الارض بعد مابدلوا..
ويزن لما شافهم وجهه تغير..
مغليه بحزن؛وليداتي..
التفتت محمد وشبحلهم بنظرات امتعاض ممزوجه بالحزن..
اما يزن وهو ماشي جيهتهم..
شداته حناه وضماته بعدين باست راسه..
وهو بعدها ..
هي انصدمت..
بعدين مشي من حداهم من غير مايشوفلهم وواضح علي وجهه ملامح الكره..
شافوا لبعض الزوز وهما مصدومات بعدين شافوا لمحمد..
مغليه؛محمد خيره خوك؟
قدملهم وهو يقول؛خيره؟!..وقف قدامهم وقال..ماخيره شي غير امه ماتت بس..
خديجه بإستغراب؛الله يرحمها ويغفرلها..اني وحناك جايين نشوفوكم معقوله هكي ديروا معانا وتكلمونا؟!
مرر نظره بعدين قال؛مهما درتوا مش حتقدروا تخففوا علينا حتى شويه..بالعكس حتزيدونا ع مابينا..
هما الزوز قعدوا يشبحوله بإستغراب وضيق في نفس الوقت..
هو قال:ترا شويه..
بعدت مغليه شويه وهو مشي من حداهم...
خديجه شافت لامها وقالت بحمقه؛الحق مش فيهم..
ومشت وهي معصبه..
اما مغليه اللي اغضبها تعامل احفادها معاهم كبتت غضبها..
بعدين سكرت باب المربوعه ومشت تقعمز حدا النساوين...
🍃برا الحوش..
تحديدا في الدور الثالث...
شقة عمر...
اللي كان مقعمز فيها وهو يدخن..
ومشاعر الشوق متحركه في داخله بقوة لدرجة ان دموعه نزلوا..
مازلت الشقه زي ماهي ع حطة ايديها..
ريحتها قاعده فيها..
وزاده على مابيه قربها منه..هو وياها في نفس المكان..
والمقصود هني الشارع..
ماكانش عارف ان اميمه موجوده في نفس الحوش...
🍃اميمه اللي خشت للكوجينه وهي تتكلم في التليفون وطلعت للجنان بش تاخد راحتها..
ودنيا وهي تعول في الكوجينه شافتها وكان صدرها ضايق ع الآخر..
🍃بعد اميمه ع الكوجينه ووقفت حدا الدروج وهي عاطيه بالظهر وتتكلم بالتليفون..
اميمه بحزن؛ايه ياحسنا هي نفسها..
"ياروحي..الله يرحمها ويغفرلها ويصبركم"
اميمه ودموعها في عيونها:آمين..
"المهم كلمي دكتور خالد واشرحيله ظرفك"
اميمه بضيق:بعدين نكلمه..
"باهي قوليلي حسين وين"
اميمه بقلق:اسكتي خايفه من ردة فعله هو وامي وجدي..
🍃وفي هاللحظه..
يجي عمر نازل من فوق..
سمع صوته قلبه فر..قعد يشوفلها وهي عاطيه بالظهر بنظرات كلها شوق ولهفه..
سرع خطواته وهو نازل...وسمعها تقول..
اميمه؛قتلك حسين مايندريش عليا حي عليا لو يعرف..
"نكلمه اني عادي"
اميمه بإمتعاض؛مبردك..
وحسناء تضحك..
اميمه بضيق:مش وقتك بكل راهو..سلام..
وسكرت..
بعدين لفت بتمشي..
جمدت في مكانها..
كان يشوفلها بملامح حاده وهو يقول..
من كنتي تكلمي؟.
هي عقدت حواجبها بإزدراء وجت بتمشي وتخليه..
هو اعترض طريقها وقال..
قولي من كنت تكلمي!؟
هي بتوتر وعصبيه؛حول من قدامي احسنلك..
عمر بإصرار:في من كنتي تكلمي؟
هي قالت؛ نكلم اللي نكلمه انت شن دخلك؟
هو ابتسم برفعة حاجب و قال:لادخلي حبيبتي..انتي قاعده في العده يعني قاعده ليا اني وتو ا قولي في من كنتي تكلمي..
هي قالت؛تعرف لو ماحولتش من قدامي نديرلك فضيحه..
هو قال؛بتلحقك حتى انتي ياقلبي..
هي وصلت لأقصى مراحل الغضب..
بكل قوة دفاته ومشت وهو جي بيلحق عليها يشد يدها..
وقفوا الزوز لما شافوا دنيا واقفه في الباب الكوجينه وهي تشوف لعمر بوجع ودموعها ينزلوا..
حست اميمه بالآحراج وكأنها دارت حاجه غلط..
نزلت راسها وطول مشت خشت داخل..
ودنيا قاعده تشوف لعمر بنفس النظرة..
هو تجاهل نظراتها..
ومشي وخلاها واقفه...
كسر قلبها وتجريحها عنده عادي لأنها ماتهمه في شي.
هي اللي تزوجها عن حب ماسلمتش منه..!
🍃واميمه من الاحراج..
خشت خدت شنطتها ومشت بسرعه طلعت من الحوش هاربه...
🍃وين جت طالعه من حوش شنيبه..
لاقت عمر والجالي حدا الباب..
هربت بعيونها عنهم ومشت طول لسيارتها ركبتها وشغلتها وتحركت بيها لحوشهم..
وعيون عمر عليها..
الجالي:حول عيونك عنها..
عمر:خدت راحتها ع الاخر ماراجتش العده تم قاعده تكلم في الرجاله..
الجالي:معاش ليك بيها دخل دير اللي ديره..
شبحله عمر وقال؛قاعده في العده يعني محسوبه عليا..
عقد حواجبه وقال؛شن قصدك!؟ شن في بالك انت؟!
عمر قعد ساكت وهو يشوف لحوش علي الواعر..
ضربه الجالي ضربات خفيفه ع ذراعه وقاله:طلع من راسك اللي قاعد تفكر خيرلك..
وهيا خش داخل..
ومشي خش للخيمه...
🍃وين جي خاش..
عيون مختار لحقوه لين وقف ع بوه محمد شنيبه كلمه..
بعدين مشي بيقعمز جنبه المهدي..شاف للطفي اللي كان مقعمز جنبه عبد الرؤوف..مشاله..
وقف عليه كلمه..بعدين قرب كرسي وقعمز حداه..
والزوز قعدوا يهدرزوا ع لطفي..
وعيون مختار تتحرك بيناتهم..
🍃وعيون عبد القيوم تشوف للجالي بإمتعاض واضح..
وفي حد من الموجودين في الخيمه ركز عليه كويس...
فجأة..
رن تليفون الجالي.
طلعه من جيب جاكيته لما شاف المتصل ناض وقف واستأذن من لطفي بعدين مشي طلع من الخيمه...
وعيون عبد القيوم تلحق فيه..
🍃برا..
الجالي بنرفزة؛خيرك عششتي..
"شن خيرني عششت متاعك هادي ملاحظ روحك ليك يومين معاش دورتني؟!"
الجالي:مش بعتلك رساله وقتلك بعد نفضا نكلمك..
"بعد تفضا!!؟ لاحبيبي..انت تفضي روحك وتكلمني فاهم"
هو عقد حواجبه وقال؛انتي كيف تكلميني هكي!؟
"منك انت اللي قاعد تلعب بيا وكل مرة معاي بشكل"
هو قال؛مانلعبش ياغبيه مانلعبش بيك..عيشه مرت المهدي توفت وقاعد في عزاها اني توا..
هي سكتت شويه بعدين قالت بهدوء..
"امتى توفت؟"
هو قال بعصبيه مكتومه؛اليوم الفجر وكانت برا البلاد وجابوها برا للمقبره طول تي اليوم كله ماحطيتش في فمي حاجه وحاس روحي بنطيح من طولي..وانتي تكلمي فيا بأسلوب زي وجهك وتقولي نلعب بيك ومش عارف شنو..
"باهي خلاص اسفه"
هو قال؛ماعندي ماندير بيه اسفك..
"جالي"
هو قال بنرفزة؛فوتي امي ترا..
وسكر عليها..ودارلها حظر مرة وحده..
ولف بيخش داخل..
وقف في مكانه وع وجهه بدت ملامح الخلعه..
وع ايقاع موسيقى باخ العالميه المعزوفه بألحان الرعب..
اللي قدامه بعد ماكان يشوفله بنظرات سببتله خوف وتوتر..
رسم ع وجهه ابتسامة عريضه وفمه مسكر..
زادت من توتره وخوفه وخلاته يبتسم بإرتباك وهو يقول؛مروح؟
هز مختار راسه بدون مايتكلم..
بعدين غير عيونه عنه ومشي بإتجاه سيارته..
هو تبعه بعيونه بعدين قال من ارتباكه؛خلينا نشوفوك..
وقف مختار وشبحله وهو رافع حواجبه..بعدين رجع ابتسم نفس الابتسامه وقال؛ان شاء الله..
هز راسه وكمل طريقه وهو يقول..ان شاء الله..
ووصل في سيارته وفتح الباب وركب..
سكره..وشغل السياره وهو يشوف للجالي من المرايه..
تحرك بالسيارة وعيونه ع المرايه..
والجالي قاعد واقف في مكان ماتحركش..
ضحك مختار وقال؛هرب لون وجهه مسكين..
بعدين شغل مسجل السيارة ع موسيقى باخ المرعبه..
وقعد يدندن معاها وهو يقول..
"ترا را..ترارا را را"..
وقعد يتخيل في وجه الجالي لما شافه وهو يضحك عليه...
🍃والجالي خش قعمز في الخيمه جنب لطفي وعظامه قاعدين يقصفوا من الخلعه..
مرر نظره ع الخيمه لين جو عيونه في عيون عبد القيوم..
عبد القيوم غيرهم عنه وهو عاقد حواجبه..
وهو شبح لعبد القيوم من فوق لتحت بعدين غير عيونه عنه لعبد الرؤوف اللي كان يهدرز قاعد يهدرز مع لطفي...
🍃🍃🍃🍃🍃
"شن مشاك غادي شن مشاك"
اميمه؛امي اني مشيت ع خاطر عيشه الله يرحمها..
صفيه بعصبيه:الله يرحمها كلنا وجعتنا لكن ماتمشيش تعزي فيها في حوش ناس ماخلوا ماداروا فيك وانتي مطلقه من ولدهم!
اميمه بنفاد صبر:خلاص ماما بالله خلاص هما كلهم هالساعات درت واجبي وروحت وتمت..
صفيه؛لاماتم شي يافالحه تو تسمعي الدوة اللي بتطلع..
اميمه:يقولوا اللي يقولوه..
ومشت خشت للحمام..
صفيه حركت راسها يمين ويسار بقلة حيله وعدم رضا وهي تقول؛مش عارفه كيف تفكر بنتي هادي مش عارفه...
🍃وجدها وخوها ماكانش عندهم علم من اصله وهدا من حسن حظها🍃
🍃🍃🍃🍃
وقعدوا مطيره وبنات خوها والحفيدات لبعد آذان العشي بعدين روحوا...
وطوبى قاعده تعول مع نساوين العيله ماقعمزتش بكل..
لين فاقت سدرة المهدي مرة تانيه..
وصارت فيها حاله..
ع قد ماحاولوا فيها عماتها وحناها ونساوين خوالها البنت ماقدروش يهدوها بكل..
وطوبى واقفه تشوفلها فم الباب وهي تبكي بصمت..
نسرين ببكي:ياحليلي البنت بتهبل..
وسدرة تبكي بالعبره وهي تقول..
ماما..نبي امي..امي نبيها توا..توا..
مغليه ودموعها ينزلوا؛لاحول ولاقوة الابالله..
والبنات يتفرجوا..
راما وجوري..وبنات فايزة اللي كانوا يبكوا معاها..
وسدرة تبكي بوجع وهي تقول..
وينك ياماما تعاليلي..ماتخلنيش من غير ام ياماما..ياماما..
فايزة ببكي؛وووك عليا كبدي انسحنت..
طوبى وهي تبكي قالت؛قولوا لعمي المهدي يخشلها..
مغليه:ايه صح بكري يبي يشوفها..كلموا خوكم يابنات فيسع..
سدرة شافت لطوبى وقالتلها ببكي..
ابله طوبى..
طوبى طول خشتلها وقعمزت جنبها وخدتها في حضنها..
والبنت قعدت شاده فيها بقوة وهي تشهق بعبراتها وتقول..
ماما...ماما..
وخديجه برا اتصلت بالمهدي وخبراته..
وهو قال..جاي..
ولت خديجه داخل وقالت؛بالله فوضوا الدار بوها بيخش..
وحده من خالاته قالت؛تعالوا..
ومشوا طلعوا كلهم وماقعد حد كان عماتها وحناها وطوبى..
لحظات..
وينادي المهدي..
"خديجه"
سدره:بابا!..
خديجه بنبرة باكيه؛خش يامهدي..
خش المهدي..
وين شافاته سدره طلقت طوبى وقالت؛بابا!..
المهدي ولمعة الدمعه بانت في عيونه؛روح بابا..
ناضت طوبى وتباعدت..
وهو قعمز جنب بنته وخداها في حضنه..
سدرة ببكي؛حقه ماما ماتت يابابا..
زاد ضمها المهدي من غير مايرد..
وطوبى شافت لعزوزها وحمواتها وقالت بصوت هامس واضح؛نطلعوا خير..
هزت نسرين راسها موافقه كلامها ومشت ولحقوها امها واختها وهي يشوفوا لسدرة بحزن..
وكان اخر من طلع طوبى اللي سكرت الباب وهي تشوفلهم بنظرة ألم..
والبنت تبكي وعبراتها متلاحقه وهي تقول:معاش..نشوف..ماما خلاص..خلاص يابابا!؟
المهدي قعد يضم فيها وهو يذرف في الدموع بصمت مش عارف شن يقوللها..
سدرة ببكي؛كيف بنعيش من غير بابا ياماما..
المهدي بصوا مخنوق:خلاص بنتي ياسر قطعتي قلبي..
وباسها ع راسها..
البنت لما سمعت كلام بوها خافت عليه..
تعرف مرضه كويس وقدامها ياما صار فيه بسببه..
للحظه تخيلت انها فقداته حتى هو زي مافقدت امها..
وبخوف طفله صغيره متعلقه بأهم سبب في الحياة بعد موت امها..
شدت في ظهر بوها وهي تقول:خلاص بابا خلاص..سكتت..
قالتلها بلهفه وخوف واضحات..
وهو لقي روحه تلقائيا يقول؛نحبك هلبه يابابا نحبك هلبه ياعمري..اني قاعد معاك يابنت بوك بابا معاك ياروح بابا..
وقعد المهدي يبكي بقوة بس بدون صوت يبكي ويضم في بنته بقوة بش يخفف حزنها..
وهي كانت دير معاه في نفس الشي بس تشبثا بيه وخوف من فقدانه..
🍃🍃🍃🍃
والخوف من الفقدان اشكال..
زي خوف نجاة اللي ملازمها ديما من فقدان الجالي اللي تحبه بجنون...
🍃"ضروري جدا تعرف وضعها بش نعطيها تعليمات معينه تمشي بيها غلط تخلوها غافله هكي"
صابرين بقلق:باهي دكتورة بالله عليك وصليهاله بالشويه..
الدكتورة؛ان شاء الله..
وفتحت باب الحجره وخشوا عليها..
لقوها مقعمزه ع السرير ومنزله رجليها لوطا وتليفونها في يدها وسرحانه..
بعدين انتبهتلهم الدكتورة؛هاه شن حالك اليوم يانجاة..
هزت راسها وقالت بصوت يدوب طالع:للحمد لله..
الدكتورة؛زي ماتعرفي نجاة بعد غدوة تطلعي..
هي قالت؛ايه..
صابرين مركزة ع اختها وهي خايفه عليها..
الدكتورة؛تمام..المهم نبي نوضحلك حقيقة وضحك..
عقدت حواجبها بإستغراب وهي تشوف للدكتورة..
الدكتورة:الاصابه اللي جاتك بسبب الحادث تسببتلك في اجهاض وفي مشاكل كبيره في الرحم مانبيش نشرحلك عنها مايهكمش من الشرح شي..المهم انك تعرفي بسبب هالمشاكل استئصلنا الرحم..
الجمله الاخير كانت زي السكين خشت في قلبها..
حست بوجع في صدرها..حطت يدها عليه..
صابرين بخوف:نجاه!
وشحب لون وجهها..وابيضوا شفايفها..
ووعيونها تسكروا وغابت عن الوعي....
🍃🍃🍃🍃🍃
"والله والله يام كان ماترضوا وديروا اللي نبيه قسما بالله نهبل نهبل بالله"
ثريا وهي ترعش؛شن بدير يانهاري الاحرف..
"اللي بنديره نديره والله ندمكم"
هي بخوف شديد؛لاولدي ردي بالك دير حاجه في روحك والله نريح وراك..
"ماتبيني ندير في روحي شي اقنعي راجل بش تخطبولي بنت عمي عندك الليله بس يام الليله"
وسكر في وجهها الخط..
ثريا بخوف:وليد..الو..وليد..نزلت التليفون وقالت..حي عليا ولدي بيريح مني..
ومشت تجري لمكتب راجلها..
تلاقت هي وبنتها قالتلها؛خيرك تجري ماما..
ماردتش عليها وقعدت تجري لين وصلت في المكتب..
فتحاته وقالت؛الولد بيريح ياراجل الولد بيريح من بين ايدينا حي عليا..
هو قال بلامبالاة؛بالله فكيني من جو اامفرخ اللي يدير فيه ولدك..
هي بخوف؛ولدك مايبصرش ياراجل يدوي من جده راهو..
هو بإنزعاج قال؛ثريا اطلعي من حداي عندي ماندير مش فاضيلك انتي وولدك المدلع..
قالتله؛ولدي بروحي ماهو!
هو قال:انتي اكتر وحده سعيتي بش مايصيرش منهم توا جايه تقنعي فيا نمشي نخطبهاله..
هي قالت:اني نبيك تسايره نديروا اللي هو يبيه وبعدين حني نديروا مانبوا..
هو برفض قاطع؛ابدا والله ماهي صاير..وهي اطلعي وسكري الباب وراك..
قعدت واقفه تشبحله بنظرات انفعال..
وهو رجع للأوراق اللي بين ايديه ولهي بيه..
قالتله بإنفعال؛بنطلع باهي..لكن بنقولهالك لو تصير في ولدي حاجه معاد قاعدتلك فيه..
ولفت ومشت طلعت وبنتها تشوف لبوها بخوف لين درق من قدام عيونها بعد ماأمها سكرت الباب بقوة..
🍃🍃🍃🍃🍃
ويقرب الليل يوصل في نصه..
وحوش شنيبه معاش خش عليهم حد..
فرشوا النساوين في دار المعيشه اللي كانت كبيره ورقدوا..
الانسرين وطوبى ودنيا..
دنيا بانت في دار عمر ونضال..
وطوبى في جناحها...ونسرين في دارهم ومعاها راما وجوري..
اما معاذ رقد مع عمته خديجه...
وسدرة المهدي خداها بوها للشقه وباتت حداه في دار النوم...
لكن خوتها رفضوا يركبوا الشقه اللي قاعده فيها ريحة امهم..
🍃مش مستوعبين انها خلت منها خلاص ومعاش ليها وجود فيها..
هديكا الليله بكي محمد بكي ساعات وهو مقعمز حدا الشلال الصناعي اللي ورا الحوش..
ماقدرش ع قد ماحاول يكتم صوت بكاه..
اللي كان يسمع فيه نضال...
🍃"محمد"
قام عيونه المحمرات والغارقات بالدموع فيه وقاله؛مش طايق نشوفك بكل بكل..
نضال ودموعه في عيونه؛مش بيدي اقسم بالله يامحمد حط نفسك مكاني..خوك يعطيك سره ويأمنك عليه طلعه يامحمد!
محمد قلب وجهه عنه وهو يرشف ويمسح في دموعه..
مشي قعمز جنبه وقال:تعرف لو تحط نفسك مكاني تعرف قداش عشت في ضغط نفسي الايام اللي فاتوا..قلتها لبوك والله قلتها..مالقيتش غيري يامهدي!..
صح كنت نضحك ونلعب وجوي مليح لكن ربك بس عالم باللي في القلوب يامحمد ياولد خوي..
شبحله محمد بالم وقاله؛تعبت هلبه؟
تنهد نضال بألم وقال:ماربتش حد ايمانه قوي زي امك يامحمد..مراة ملتزمه قريبه من ربي وكلت امرها لله ..
تعرف لما قعدت نواسي فيها شن قالتلي..قالت هنيني يانضال ربك يبي يطلعني منها نظيفه خفيفه لاليا ولاعليا..
نزل محمد راسه وقعد يبكي..
قربله نضال وضمه لحضنه وهو يقوله؛الله غالب هدا ماقدر الله والحمد لله ع كل شي..ادعيلها انت بس يامحمد..
ومحمد يبكي وهو حاط راسه ع صدر عمه..
ونضال يمسح ع شعره ورقبته وهو موجوع ودموعه غلباته...
🍃في هديكا الليله من هو اللي رقد!؟
نسرين اللي كانت مقهورة وضميرها يعذب فيها وشريط ذكرياتها مع صاحبتها قاعد يمر قدام عيونها...
🌿ولافايزة اللي دموعها بللوا وسادتها وقلبها وجعها من كثر البكي والخوف..
ع بنياتها بعد شافت حال صغار عائشه..وقعدت تدعي مرات ومرات انه يخليها لبناتها ومايحرمهم منها لين تكبرهم وتطمن ع مستقبلهم...
🌿اما طوبى...عقلها وقلبها عند سدرة..وقعدت تتخيل في ردة قعلها لو كانت موجوده بيناتهم في هاليوم الصعب...
والخوف غزي قلبها لما فكرت للحظه لو كانت هي في مكان عائشه..
وااه من هكي الليله شن يفوتها...
🍃فيها من اللي مسهرهم شي تاني..
زي دنيا اللي مش رايح من بالها الموقف اللي شافت راجلها فيه مع طليقته..وهو طول اليوم لادورها لاسأل عنها..
والمسكينه مجبوره تبلع وتكمد قدام اهلها..
صح ع اللي اطلقت مرة تتقبل فكرة فشل تجربه زواج تانيه..
وقتها مافيش حد حيرحمها..وحتكون هي بس في عيون اغلب محيطها المعيوبه...
🍃وياقداش صعب ع المراة فقدانها اهم قاعده ترتكز عليها انوثتها...
وضربه نجاه ماكانتش في الحاجه هادي بس..
نجاه...فقدت املها كله في بقاء ارتباطها بالجالي اللي اكيد مش حيضحي بالأبوه ع خاطرها..
اساسا الجالي عمره ماكان مضحي...
🍃والجنون بعينه هو اللي بيديره وليد في هاللحظه..
وهو متحرك بسيارته بسرعه كبيره وصدمها في جدار لاحد اسوار مبنى كبير تابع للدوله...
وتسبب في فجعه كبيره لعيلته..كادت امه بسببها تخسر حياتها من رعشتها عليه..
وكله ع خاطر عيون آلاء اللي عاميها الانتقام...
🍃🍃🍃🍃
تاني يوم..
الساعه 11:00صباحا..
في حوش عبد الرؤوف..
الدار اللي قاعده فيها غرفه..
الاء:ماصارله شي كدمات بسيطه اصلا مادارها الا وعارف روحه مش حيموت..
غرفه بإزدراء؛انتي كيف حبيتي واحد زي هدا بس!؟
هي دمعوا عيونها وردت تقول؛والله ولاعمري حبيته...
تنهدت غرفه بعدين قالت؛باهي شن بديري توا؟
هي مطت شواربها لداخل بعدين قالت:توا جي دور خالو مختار..
غرفه رفعت حواجبها بتساؤل وقالت؛بتمشيله؟
رفعت الاء حاجبها وقالت؛واليوم...
🍃🍃🍃🍃🍃
مدرس بسيارته في المستشفى..
كان مقعمز فيها..ويهيأ في نفسه لشي بيديره يبي جرأة كبيره
ومش حيعطيه جرأة ع ارتكاب حماقه كبيره غير شي يذهب شويه من عقله..
طلع شيشه خمر صغيره..
فتحها وشرب منها مرتين..بعدين سكرها ودسها...
وفتح باب السيارة ونزل..
سكرت..وتوجه باندفاع وبلا هواده لمدخل المبنى..
🍃وفي فهالوقت..
كانت واقفه برا مع زملائها من ضمنهم وسام وطبيبه تانيه..
كانوا يتناقشوا بخصوص حالة تبي عمليه اليوم..
وهو...
وصل في المكان اللي كانت فيه وشافها..
شافها كيف تتناقش هي ووسام..
وعيونها معاش شافت اللي معاهم من طبيبات واطباء..
طبعا وسام كان لازم يخفف دمه في النقاش ويضحك بروحه..
وهي تناقش فيه بجديه وحتى ابتسامة مجامله مابانتش عليها..
هو عقله خلاص..طار...
شد ع سنونه وقال؛هو هدا يااميمه هدا اللي بعتيني وبعتي عيلنا ع خاطره..
ومشالها وهو مايشوف في شي..
لين وصل فيها وشدها من مرفقها وجبدها..
هي عيطت بفجعه..
واللي معاها قعدوا يقولوا..
"شن هدا..خيره هو!!؟"
اميمه بصدمه؛شن ندير انت حول حول..
وقعدت تحاول تفك روحها منه..
وهو يجبد فيها ويقول؛توا بتمشي معاي نردك توا..
ووسام ماشي وراهم وهو يقول:هيي انت وين ماشي بيها..
وشده وفكها منه وحطها وراه وهو يقول؛مريض انت ولا خير بلاك..
عمر بغضب:تي حول...وبدي يسب ويشتم بأقبح الالفاظ وضرب وسام..
اميمه هربت وهي ترعش مع بعضها...
وحده من زميلاتها؛حي بيقتله..
وقفت والتفتت شافت وسام طايح وعمر فوق يضرب فيه..
والناس اجتمعوا وحاولوا يحزوا عنه..
وهدا كله وامن المستشفى مش موجود..
اميمه حطت ايديها الزوز ع وجهها وهي تقول بصدمه وعدم استيعاب..
حي عليا ياربي شن اللي قاعد يصيرلي!..
جبدوا عمر من وسام.
وهو شبح لأميمه بنظرة تخوف..خلص روحها من اللي شدوه ومشاله يجري..
هي لفت بسرعه وقعدت تجري بش تخش داخل..
والناس تتفرج ع اللي قاعد يصير وهما في حالة ذهول..
اميمه وين قربت توصل داخل..
جي في وجهها الدكتور خالد ومعاه امل ومعاهم دكتور تاني..
شافوه كيف وصل فيها وجبدها مع يدها قريب خلعها وهو يقول؛تعالي..
اميمه عيطت من الالم وقعدت تقول؛شن دير انت شن دير هبلت..!
عمر وهو في حالة من غياب العقل:مرتي..مرتي..وتوا بنردك..
امل؛نعرف هدا طليقها..
خالد حول البالطو وعطاه لأمل..خداته..
وقعد باليونيفورم ومشالهم طول بسرعه.
وصل فيهم وفك اميمه منه وقال:داخل فيسع..
هي طول هربت تجري وكانت تبكي ومنزله راسها وهي منحرجه من الفضيحه..
وخالد طول طاح في عمر ضرب ماعطاشي فرصه يرد عليه..
لين جو جماعة الامن يجروا..
وخدوا عمر وعطوه اللي فيه النصيب وطلعوه برا ..
🍃خالد؛شن وسام..
وسام وهو يمسح في انفه وفمه؛مش مهم اني برا شوف اميمه دكتور الموقف زي الزفت راهو شهدرة ليها هي..
خالد وهو منزعج حرك راسه يمين ويسار ومشي طول ولى خش داخل..
ووسام مشي للاسعاف وامل لحقاته تجري...
🍃🍃
خش خالد للمبنى وقعد يدور ع اميمه..
لقاها مقعمزه تبكي في مكان مستخطي ومعاها زميلاتها وممرض ودكتور..
مشالهم وقف عليهم وقال لأميمه؛خيره هدا شن يبي منك؟
اميمه وهي تبكي؛يبي يدمرني وخلاص هدا مايبي..
وحطت ايديها ع وجهها وقعدت تبكي..
هو حط ايديه في نصه وقعد يحرك في راسه يمين ويسار اسفا..بعدين قال لوحده من زميلاتها؛ايه بري جيبي ميه..
؛حاضر دكتور..
ومشت طول..
هو تباعد عنهم ومع الدكتور والممرض..
وخلوه زميلاتها يحاولوا يهدوها ويسكتوها..
خالد؛موليه زريبه اللي يجي يخش واضح انه مش طبيعي واخد حاجه..
الممرض:حتى اني لاحظته..
الدكتور التاني:موقف مش مزبوط لأميمه بكل ..
شبح خالد لأميمه بنظرة ضيق...
🍃🍃🍃🍃🍃🍃🍃
"والله مانعفسه الحوش هداكا لو يقولولي بوك غادي"
مطيره؛هادي موت ياصفيه وعيشه حتى انتي مربتيها..
صفيه بضيق:الله يرحمها ويغفرلها يعلم الله قداش نعزها..لكن مانيش معزيه فيها فهداك الحوش لو شن يصير..
مطيره حطت ايديها ع بعض وقالت:
:وعلاش هدا كله؟
صفيه بإستغراب:شن السؤال هدا معاش تعرفي توا علاش؟!
مطيره؛ماتبيش تخشي الحوش اللي انلزيتي منه..
صفيه ارتبكت وقالت؛انلزيت؟
مطيره؛ماتنكريش سمعت باللي درتيه قبل طلاق اميمه..
بدت ع وجهها ملامح الضيق والاحراج وغيرت عيونها عنها..
مطيره؛ندعي ربي ليل نهار ماتوصل لأميمه وتعرف ان امها طيحت من قدرها بش يردها هداكا العرة..
شبحتلها وقالت؛شن طيحت من قيمتها هادي! اني ماكنتش نبي لحوش بنتي الحرام..
مطيره:وخليتهم يدووا بيك ويقولوا ترجتنا بش نردوا بنتها..
نزلت صفيه راسها وهي تشوف لصوابعها اللي تفرك فيهم ببعض ودموعها نزلوا..
تنهدت مطيره وقالت:خلاص توا اللي صار وصار سيور الناس تعرف الباهي من المعيوب..
رفعت صفيه راسها وقالت بنبرة باكيه؛هي امس خشت حوشهم والناس شافوها وتويقولوا كانهم حق هما اللي مايصلحوش علاش مازال تخش لحوشهم!؟ لا وفوقها هداكا مروح لمرته تخيلي قداش بيألفوا ويزيدوا ويحطوا..
مطيره بضيق:المراة دارت واجبها وروحت اللي نيته صافيه يشكر فيها وفي اللي داراته ويتأكد انها بنت اصل طالعه من حوش ناس ربتها ع الاصول..اما اللي نيته سودا ياما بيقول وهادم لاندوروهم ولانديروا لكلامهم قيمه حني عارفين رواحنا كويس..
تنهدت صفيه من قلبها وهزت راسها مواقفة كلام مطيره...
🍃وفي حوش شنيبه..
وين مافي عزي عائشه..
حولت مغليه العزي لمناسبه تستعرض فيها الضيافه متاعها..
والناس مستمتعه بهالاستعراض المهم ياكلوا ويشربوا ويقرموا...
وطوبى ونسرين وفايزة ونساوين خوت عائشه مش عاجبهم اللي قاعده يصير..
:بالله زيدينا تلاته دحيات مطبوخات..
طوبى وهي تحاول تتمالك نفسها:حاضر..
...........
؛كان في عندي حليب النسيم جيبي جودي مانشربش فيه..
مغليه:جيبي تلاته باكوات يادنيا..
دنيا:حاضر عمتي..
...........
:خبيزات الفرن اللي جبتهم امس جيبوا منها فرده ..
طوبى:حاضر..
🍃وع هالحال..
مرات يطلبوا عصير..ومرة زبادي..والخ من الطلبات اللي تحسس اهل العزي انهم جايين يزردوا عندهم مش يعزوا..
وبعيد عن هدا كله..
كانت عتيقه شاده تركينه وراقده وطول الوقت شاردة..
وكان استاقظت تقعد تبكي بنتها وخلاص..
واحفادها ع نفس الحال..
غير ان سدرة اليوم التزمت الصمت..شاده مكان ومقعمزة فيه وماتحركتش بكل وع وجهها باديه ملامح الكآبه..
🍃🍃🍃🍃🍃🍃
في جنان العمارة اللي ساكن فيها مختار..
كان واقف ع شاب ثلاثيني انيق وجذاب..
وملامح وجهه توحي بأنه شخصية بارزة ومميزة...
يحمل اسم...عزيز..
وعزيز هدا يكون ولد صديق وشريك مهم جدا لمختار في كذا مشروع ليه برا البلاد..
مختار:الموضوع ساهل ياعزيز صدقني..
هو بضحكه قال؛حاجه فيها لف ودوران ماليش فيها وانت عارفني مانحبش نخش ونطلع..
مختار:عندك الحق شغلك كله برا طبيعي تكون مستقيم وماشي بالقانون..اما هني حني في غابه كان ماتلعبش وتخش وتطلع ماتحصل شي مع هالتماسيح اللي مش مخليه لااخضر لايابس..
ابتسم بأسف وقال:عندك حق..
فجأه..
باب العماره..وخشت منه آلاء اللي كانت تمشي وهي تشوف لخالها واقف ع واحد عاطيها بالظهر..
وقفت في مكانها وقالت:خل يمشي اللي معاه قبل..
🍃ومختار وهو يهدرز عيونه جو عليها واقفه تشوفله..
ابتسم بمفاجأة واشرلها تجيه..
عزيز التفت طول..
ومن ورا نظراته البنيه..
شافت بنت انيقه..جذابه جدا..جميله جدا..قاعده تقرب بخطوات خجوله بعض الشي..
وصلت فيهم..وهو مش محول نظره عنها..لدرجة ان مختار لاحظه واستغرب فيه لأنها مش عوايده الحركات هادي..
الاء بخجل:السلام عليكم..
مختار: وعليكم السلام..شن المفاجأة الحلوة هادي؟
ابتسمت بخجل وقالت؛تسلم يارب..شن حالك..
هو قال:الحمد لله..شن حالك انتي وحال ماما وخوتك؟.
هي قالت:الحمد لله كلنا كويسين..
شاف مختار لعزيز لقاه ع حاله..
عقد حواجبه بإبتسامه وقال:عزيز..
استاقظ وشبحله..
مختار:نعرفك..بنت اختي الاء طالبه في كلية اللغات قسم انجليزي...
هو بإبتسامه قال:فرصه سعيده..
نزلت عيونها وقالت؛شكرا..
مختار؛وهدا عزيز ياالاء..صديقي وولد صديقي وشريكي في نفس الوقت..
الاء يدوب شبحتله وقال:اهلا..
هو هز راسه وع وجهه ابتسامه اعجاب واضحه..
مختار:خشي خالو شويه ولاحقك..
هي قالت:حاضر..
ومشت..
وعيون عزيز المدرقه ورا النظارات معاها..
شبحله مختار بعدين شد ذراعه وقاله؛ايه خليك معاي...
شبحله عزيز وابتسم بإرتباك..
مختار:ايه كمل كلامك..
عزيز هز راسه وقال؛ايه..عقد حواجبه وسأل..حني ع شني كنا نحكوا بالزبط..وضحك..
مختار بإبتسامه؛ع ازمة الدولار...
🍃🍃🍃🍃🍃
"والله حرام عليك اللي درته فينا"
وليد وراسه ملفوف بشاش وهو مقعمز ع السرير؛قتلك يام لكن ماخديتوهاش بجديات وبوي اخر همه ولده شن يصير فيه..
بوه تنهد بضيق وقال؛خلاص خلاص..تو نتفاهم اني وجدك في الموضوع..
وليد؛جو المسايرة مانبيشي الخميس هدا اني نبيكم تخطبوهالي..
ثريا؛خلاص الخميس..وشبحت لراجلها .
هو هز راسه بإستسلام وقال؛باهي..باهي..
ووليد يمرر في نظره عليهم ومن داخل داير مهرجان من فرحته بوصوله لمبتغاه او هكي كان يظن...
🍃🍃🍃🍃🍃
الساعه1:00ظهرا..
ماشيه لدارها وهي هاربه بعيونها عن امها..
صفيه:مش قلتي اليوم بتروحي 4؟
اميمه؛ماصارش..
وخشت لدارها..
امها قالت؛بترقدي ولاتتغدي!؟
اميمه وهي ماتبيش امها تشوف لوجهها؛بنصلي ونرقد..
وسكرت الباب..
امها استغربت حالتها وحست ان في شي صاير معاها..
وماكانش خاطر ع بالها اللي صار لبنتها اليوم ولاتخيلاته..
🍃🍃🍃🍃
وتمر الساعات..
واميمه حابسه روحها في دارها ماتطلعش منها كان لما تبي تتوضا للصلاه..
🍃وعمر ماجاش بكل للعزي..
وبوه وخوته فقدوه واستغربوا غيابه..
ومرته داخل تعول وتجري تبي تكسب رضا عمتها لعل وعسى برضاها يرضى عمر..
وهدا كان حال طوبى..اللي حرصت ع انها دير كل شي ع اكمل وجه وماتخلي حد يشد عليها حاجه بعد موقف عتيقه..
تبي اهل راجلها يكونوا راضيين عنها وبس بالذات مغليه...
والزوز رجالتهم لادوروهم ولاكلموهم..
دنيا عارفه داء راجلها..
لكن طوبى كانت تخلقله في الاعذار ولكل تصرفاته كانت حاضرة المبررات...
🍃ويعدي هاليوم..
ويجي ليله ويتناصف...
والدنيا سكنت...والهدوء ساد الاجواء..
لبعد نص الليل...
بعد نص الليل ينكسر حاجز الصمت....
ويخترق هدوء الليل..
صوت واحد واقف قدام حوش علي الواعر وهو يغني...
انت ياقنين..ياعاجبني...ياللي بأسلوبك غالبني..
نقعد طول حياتي شاقي...
طول حياتي تبكي عيني..هكي ياغالي تخليني
فيك انت وش ينسيني..زيك ماضنيت نلاقي....
وصاح بصوت عالي...
زيك ماضنيت نلاقي...
وفاق شارع القهوة كله ع صوته....
#رسايل_غرام
#طوبى
....يتبع.....
