# طوبى "شارع القهوة"
#جمان_فريد
#الجزء_السابع "فارقتك"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
شبح ليوسف اللي كان يسمع وهو مصدوم...
شويه ومشي يجري يوسف وفتح الباب الفاصل بين المطحن وحوش عمه..
وهو يسمع في عياط سدرة وبكي طوبى..
خش عليهم يجري لقي امه خاشه تجري من باب الحوش القدامي وهي تقول:يالطيف يالطيف!
وخشوا الزوز لوسط الحوش..
وشافوا وردة طايحه وسدرة تخص فيها وتعيط ع طول حسها وهي تقول"يما"
خبطت صفيه ع صدرها وقالت؛ووك عليا وردة..
وجتها تجري قعمزت حداها..
وقعدت تفيق فيها وتخبط ع وجهها وهي تقول:وردة..ورده...
وبدوا دموعها ينزلوا..
وسدرة من العياط لين صوتها انبح..
يوسف جي لطوبى رفعها لما شاف وجهها مستزرق من البكي طلع من حداهم ودموعه ينزلوا غصب عنه...
سمع باب الحوش يدق بقوة..
مشاله طول فتحه..
خشت تجري مغليه وهي مفجوعه وتقول:خيرها وردة خيرها..
ومشت خشت للحوش جري..
المهدي قدم وهو مفجوع قال ليوسف:شن يوسف..
يوسف وهو مش قادر يشد دموعه؛خالتي وردة توفت..
انصدم المهدي بقوة وقال:لا حول ولاقوة الابالله!
ع جية الجارات يجروا..
ومنهم عائشه وفايزة اللي خشوا يشوفوا صاحبتهم..
وين خشوا لوسط الحوش لقوا صفيه ومغليه يبكوا بالعبره..
وسدرة فجأة سكتت وقعدت زي المصدومه تشبح في الفراغ وخلاص..
مشولها الزوز وحضوها مع بعض وهي مازال ع حالها...
دموعها وقفوا ومعاش نزلوا من عيونها...
🌱اتصلوا بالإسعاف...
جو وتأكدوا المسعفين انها فارقت الحياة ..
ورفعوها طول..وطلعوا وراهم المهدي ويوسف...
علي الواعر ودموعه في عيونه وهو يدور في الجنان:حد يطق في لطفي حد يجيبه...
كان عارف ان ولده حينهار انهيار تام..
ولده وعارف قداش متعلق برفيقته..
وعارف ان فراقها ليه بمثابة فراق الروح...
وللأسف لطفي وقتها كان خارج طرابلس بش يتم بعض الامور اللي تخص الخدمه لاهي ومايندري على شي..
غافل مسكين...
🌱🌱🌱🌱
وتعبى الحوش بالناس واصوات البكاء والنحيب في كل ركن من اركان الحوش اللي راحت نوارته وضيه...
خشت عليهم مطيره مفجوعه بعد وصلها الخبر..
خشت وهي تقول بعدم تصديق:لالا ماتقولوش هالناس كلها جايه في عزي وردة!!؟ لالالا كذب كذب وردة ياكبدي وردة وردة ماتت...
وقعدت تخبط ع رجليها وتقول:كيف بس كيف كيف وردة تموت ياناس...كيف تموت مراة زي الملايكه كيف..
مراة عمري ماحسبتها كنه..كانت وخيتي حرمني ربي من الذريه قالتلي خودي يامطيره صغاري صغارك....
ياما بكيت ومسحت دموعي..ياما ضاقت بيا وفرجتها عليها كان محترمتني ومقدرتني وحاطتني ع راسها..تي كيف تموت كيف..
قعمزت ع ركابها ودموعها زي السيل وتعيط وهي مش مستوعبه.
والكل يتفرح عليها ويبكي عارفين علاقتها بنساوين خوتها بالذات وردة..
زي ماقالت هي كان خوات مش حمي وكنه..
سدرة كانت تشوفلها والدموع محبوسات في محجر عيونها..
مش مستوعبه ان العياط هدا ولمة الناس هادي وبكاهم على أمها...!
🌱برا في بداية الشارع..
خشت سيارة مصطفى..
فردوس بخوف:غير قول يامصطفى جدي صارتله حاجه..
مصطفى قعد ساكت ويبلع في ريقه..
فردوس وهي ترعش:يارب مش بوي يارب..
اول ماوصلوا قرب الباب خدي منها آلاء وقال بألم:عمتي وردة توفت..
فردوس بفجعه عيطت وقالت:لا..
فتحت الباب ونزلت تجري من السيارة وخشت للحوش وهي تعيط وتنادي؛يما...يما..
يما وصلت في وسط الحوش لقت النساوين يبكوا..
وعمتها مطيرة تندب..
حركت راسها يمين ويسار رفضا..
ومشت تجري لدار النوم فتحتها وهي دور وتنادي:يما..
بعدين مشت تجري للكوجينه وقعدت دور وتنادي بعياط:يما..
وبعدين مشت خشت للحمام وهي تعيط وتقول:وين امي وين..
مشت تجري وخشت لوسط الحوش شافت سدرة مقعمزة مصدومه قدمتلها وهي تقول؛وين امي ياسدره وين امي وين..
وصلت فيها وقعدت تهز فيها وتعيط وتقول ؛وين امي تكلمي تكلمي...
سدرة وهي في نفس الحاله قالت بصوت بارد..
ماتت...
فردوس صرخت بأعلى صوتها وهي تقول؛لالالا لا ياربي لا..
وبدت تخبط ع وجهها لين جتها صفيه شدتها..
وهي تبكي وتعيط :امي امي امي..
من النار اللي فيها قعدت تنقز وتعيط وصفيه تحاول تشدها وهي تبكي بالعبرة..
وضمتها بكل قوة..
وفردوس تعيط؛يما...يما...حي علينا كيف بيصير فينا من بعدك حي علينا..
ومطيره مقعمزه تبكي بعبرتها...
في دار سدرة..
كانت فايزة مرقده طوبى ومقعمزة حداها وهي تبكي وتسمع في العياط برا خطر عليها بوها وزادت حزن ونكد..
🌻فهالوقت..
روحوا خديجه ونسرين....
شافوا قدام حوش عيت الواعر وسمعوا العياط..
نسرين بخوف:زعمه منو
خديجه بإستغراب:بالك جدهم..
ومشوا الزوز يجروا لحوش الواعر..
وخشوا داخل..
سمعوا عياط فردوس وهي تقول..
"يما"
نسرين بصدمه؛نهار احرش!
وخشت تجري...
ووراها خديجه وهي مصدومه...
🌻اكثر وضع كان مخيف ومثير للآستغراب هو وضع سدرة..
هي تبان مصدومه بقوة والدموع ينزلوا منها مرة ومرة يجفوا..
ممكن لأن امها ماتت قدام عيونها!؟..
اولما رفعوها قدامها وهي جثة هامده المنظر كان قوي عليها!...
او ممكن كله مع بعضه...شي خلاها وقفت عياط فجأة وقعدت في حالة الصدمه..
وحالة الصدمه هادي كانت عامه ع شارع القهوة كله اللي كان يحب وردة ويعزها..
مراة ماشافوش منها الا كل خير راحت وهي في عز شبابها..
وخلت وراها بنات صغار..
منهم غرفه اللي روحت من المدرسه مع اميمه وشافت الخيمه..
ومافهمت شي..
وين خشت للحوش سمعت اختها فردوس تقول وهي تنوح..
"اااه يما مشيتي وخليتينا يما ظلمت دنيتنا يما حياتنا ظلمت"
هي مش صغيره وفاهمه معنى الموت والعزي وعرفت ان امها ماتت..
خشت عليهم وع وجهها ملامح البكاء وهي تقول:ماما ماتت!
جتها مطيره وحضنتها بقوة وقعدت تبكي..
وغرفه قعدت تبكي معاها...
🌻وفي دار سدرة..
عائشه بدموع؛يابنات مخوفتني سدرة..
نسرين وهي تبكي:حتى اني...
فايزة ودموعها ينزلوا؛خاشه حالة صدمه ناضت وقالت..لازم نطلعوها منها ونخلوها تطلع الكمده..
غطت طوبى كويس..وناضت ومشت طلعت والبنات طلعوا وراها...
مشولها يدوروا فيها لقوها في الكوجينه مع النساوين اللي يعولوا..
كانت تتحرك بلاهدف وكأنها تبي تشغل روحها وخلاص..
جوها البنات وقعدوا يكلموا فيها..
نسرين؛سدرة سدرة اشبحيلنا هني..
عائشه؛سدرة تسمعي فينا..
وهي تتحرك بعيد عنهم والنساوين يشوفولهم..
شدتها فايزة وقالت وهي تبكي:سدرة ماديريش في روحك هكي ابكي ياسدرة طلعي اللي كامديته ياسدرة ابكي بالله عليك..
عائشه وهي تبكي:الدموع الرحمه قال رسول الله...ارحمي روحك ياسدرة وابكي..
مررت نظرها عليهم بملامحها الجامده..
واللي الكوجينه كلهم يشبحولها...
نسرين خافت من نظرتها...
وخوفها كان في محله...بعد ماطاحت سدرة من طولها بين ايديهم..
عيطوا الاربعه بصوت عالي:سدرة!..
🌱وع قد ماحاولوا فيها بس يفيقوها مافاقتش...
طلعت تجري فايزة من الحوش وقعدت تنادي في راجلها..
جاها طول وقال:خيرك!
فايزة تبكي:سدرة اغمى عليها يااحمد نبوك ترفعها للمستشفى..
احمد؛باهي باهي طلعوها..
وطول مشي لسيارته ركب وسخنها..
ولبسوا سدرة كبوط طويل ع حوايجها وشاربه...
وتساعدوا عليها النساوين وهمايرفعوا فيها لين وصلوها سيارة احمد..
احمد نزل يجري فتح الباب..
وهما دخلوها وفايزة ركبت معاها...
وطلع بيها يجري..
مطيرة وهي تبكي:كان الشامس قاعد راهو هو اللي رفعها.
صفيه وهي تبكي؛كلهم في المستشفى ..
مطيرة؛ياناري ع لطفي ياناري اللي مازال مايعلم بشي..
"مطيره"..
قدمت لبوها ومعاها صفيه؛نعم بوي..
علي الواعر؛خيرها سدره..
مطيره ببكي:اغمى عليها يابوي..
علي بألم:ااخ يارب الصبر يارب لطفك غير وينه خوك بس...
مطيرة ببكي؛ماحد عارف وينه..
🌱🌱🌱🌱
وصل احمد للمستشفى..
وخش يجري يقول: نبوا باريلا...
طلعوله بالباريلا طول..
وتساعدوا ع سدرة ورفعوها وحطوها عليها..
وخشوا بيها يجروا ووراها فايزة وأحمد..
في الممر شافها اياد جاها يجري وهو يقول مفجوع؛خيرها!؟
فايزة ببكي:صار فيها هكي من الصدمه خالتي وردة توفت اليوم..
انصدم اياد بقوة وقاعد ماشي مع المسعفين وهما مدخلينها لقسم الاسعاف..
وقعد معاهم داخل..
وفايزة وأحمد قعدوا يراجو برا...
🌱🌱🌱🌱🌱🌱
قبل المغرب بشويه..
روح لطفي..
وهو خاش بسيارته للشارع شاف الخيمه منصوبه قدام الحوش..
الراجل قريب وقف..
قدم بالسيارة لين وقف بيها حدا المطحن..
نزل لقي محمد والشيخ جويده وعبد المطلب وخوت ورده والشامس راجل مطيرة....
قدملهم وهو مستغرب وخايف .
بصوت مرتعش قال:شن في!؟
الشيخ جويده؛عظم الله اجرك في المرحومه زوجتك...
الراجل حس الدنيا وقفت حواليه الزمان وقف..
كل شي في داخله وقف..
حتى الاحساس معاش حس بشي...
محمد؛ماقدرناش نوصلوا فيك ولاعرفنا وينك وانجبرنا حني وخوك وخوت المرحومه ندفنوها بعد صلاة العصر..
جويده؛اكرام الميت دفنه مايجيش تراجي اكثر من هكي...
واحد من خوتها؛سامحنا يالطفي لكن ماقدرناش نوصلوا فيك بأي شكل...
الراجل واقف يسمع وهو يمرر في نظره عليهم..
مش مستوعب هادم شن يقولوا!؟..
مرتك ماتت...وبعدين قالوا راهو دفناها من غير علمك وانت مش موجود!؟
باهي هو اللي خل يصدق الاولى بس يقبل التانيه..!
عبدالمطلب:لطفي!..
حط لطفي يده ع جبهته وقعد يحك فيها بعدين قال نزلها وقال بصوت مخنوق:كيف ماتت؟!
قعد يحكيله عبد المطلب ع اللي عرفه من مرته..
والراجل قاعد من الداخل ينهار شيئا فشيئا...
وقلبه يتمزق تمزيق...
عبد المطلب:ماعرفناش وينك ولا انت مسيب خبر عند حد..
بلع ريقه ومرر نظره حواليها..
الجالي كان واقف يتفرج ع الموقف ولاحظ وجه لطفي كيف وولى شاحب..
خش يجري للخيمه..
جابله كرسي وقاله:قعمز عمي لطفي..
الرجاله حواليه:قعمز قعمز..
لطفي يدوب وخر خطوة وقعمز بهده وهو مازال مش مستوعب..
"جي لطفي"
عبدالمطلب:اهوا يابوي..
طلع علي وجي لولده حط يده ع كفه وطبس عليه وباس على راسه وقاله؛شد حيلك ياولدي..
هو شبح لخوه وقاله؛ارفعني للمقبرة..
عبدالمطلب قاله:باهي هي نوض...
وناض لطفي ومشي مع خوه..
علي:الحقوهم بالميه...
شويه ومشي حسين يجري لعمه بطاسه ميه..
خداها لطفي وهو مقعمز في سيارة عبد المطلب..
شرب منها ومدها لحسين وقال لعبد المطلب تحرك...
🌱واتجه بيه عبد المطلب للمقبرة..
وين وصلوا غادي ونزلوا..
مشوا مع بعض بإتجاه قبر وردة..
عبدالمطلب وهو يأشر بصبعه؛هداكا هو جديد واضح..
مشي لطفي بإتجاه القبر بخطوات ثقيله وكل مايقرب منه يحس روحه تنزع منه نزع...
وصل فيه...وقعمز ع ركابه..
بدت ع وجهه ملامح البكاء بس مابكاش..
رفع ايديه وبدي يدعيلها....
وهو يدعي دموعه غلبوه وقعد يبكي بصمت..
بعد كمل دعاء نزل ايديه وحط وحده فيهم ع تراب قبرها وقال:عرفتك مش حتتحملي عرفتك وقاعد حاسب حساب هاليوم وحسيته بيجي بس قعدت نقول وسواس..خوف زايد..وياريته طلع هكي ياوردة ياريته..مانيش مسامحه ليوم الدين غاضب عليه دنيا واخرة اللي تسبب في موتك اللي تسبب حتى في موتي واني حي مش مسامحه لين نموت ياوردة..مش مسامحه لين نموت...لين نموت..وقعد يبكي..
وخوه يشوفله من بعيد وواجعه حاله...
🌱🌱🌱🌱🌱
فتحت عيونها شويه شويه...
شافت اضويه بيضا..وسقف غريب...
غيرت عيونها بالشويه شافت وجهه مازبطتاش في الاول لين قاللها..
اياد؛سدرة تسمعي فيا..
سدرة غمضت عيونها وفتحتهم وقالت؛امي..
وطاحوا من عيونها الدموع..
اياد قلبه وجعه عليها لكن قال:لاحالك باهي ورجعت لوعيك خوفتينا عليك..
سدرة غيرت عيونها عنه وقالت:من جابني هني..؟!
اياد؛لحظه بس..
ومشي طلع من حداها..
وهي رجعت شافت للسقف وتفكرت كل شي صار ودموعها ينزلوا ورا بعض..
ع خشة فايزة عليها بعد ماحولت الستار ورجعت سكراته وهي تقول:سدرة..
سدرة؛روحوا بيا..
فايزة:باهي غير زيدي تريحي شويه بس..
ناضت وهي تحاول تقعمز وتقول:لانبي نروح...طوبى قاعده بروحها .
فايزة:بالشويه عليك ياسدرة..الحوش مليان ياسدرة طوبى مش بروحها..
ناضت ونزلت رجليها وهي تقول:لاامي وصتني عليها قالت طوبى امانه عندك..
جتها فايزة وقعدت تساعد فيها وقالت:غير بالشويه ياسدرة..
ناضت وقفت ومشت حولت الستار وطلعت وفايزة شادتها..
شافها اياد جاها بسرعه..
اياد؛وين ماشيه؟
سدرة:بنروح خلاص.
اياد؛مازال تاعبه راهو..
سدرة؛لالا مافيا شي..
ومشت فاتت من قدامه ومعاها فايزه ..
وهو لحقها...
طلعوا لقوا احمد ويوسف يراجو برا..
جي يوسف لسدره وشدها وهو يقول:هاه شن حالك توا..
هزت راسها وقالت؛كويسه كويسه..روحوا بيا ..
يوسف؛حاضر..هي امشي..
ومشوا مع بعض وفايزة واحمد وراهم واياد لحقهم..
فهالوقت...
المهدي جي للمستشفى بعد ماسمع من نسرين اللي صار مع سدرة..
نزل من السيارة..
شاف يوسف طالع بيها وجنبه اياد يكلم فيه ووراهم احمد وفايزة...
اياد؛ردي بالك سدرة شدي حيلك وقوي روحك...ماليك تو منسندين عليك انتي..
شبحتله شويه بعدين هزت راسها وقالت؛صح..
يوسف:بارك الله فيك دكتور. .
اياد؛هذا واجبي..
يوسف التفت لأحمد وقال:بارك الله فيك ياأحمد..
احمد:شن تقول ياراجل جيران رانا..هي تعالي فايزة..
فايزة وهي تشبح لسدرة بحزن؛هيا..
مشوا ركبوا سيارتهم..
ويوسف ركب سدرة للسيارة..
وبعدين ركب هو واياد واقف يشوف فيهم..
وتحرك طول يوسف وهو يحي في الدكتور بيده واياد ردله التحيه...
وبعده احمد كذلك اللي تبادلوا التحيه بيناتهم..
وهو قاعد واقف وعيونه ع سيارة يوسف اللي فاتت جنب سيارة المهدي..
اللي كان مقعمز في السيارة وهو حاط صبعه السبابه في فمه ويعض فيه بغيظ..
بعدين ضرب الدومان ومشي تحرك وراهم...
🌱🌱🌱🌱🌱
"هاه ياماما هاه هاه يابنتي هاه"
صفيه ودموعها في عيونها:مابتش تسكت..
مطيره وهي ضامه طوبى وتمشي بيها وتجي قالت بدموع؛شي مابت تسكت ع قد مادرتلها واضح البنيه حاسه بميمتها ياناري عليها..
شويه دق باب الروشن..
مشت صفيه وفتحاته..
حسين وهو مضايق؛نخش نشدها يام بالك تسكت عندي..
مطيره:خش وليدي خش..
مشي حسين فتح باب الكوجينه وخش جي لعمتها وخداها منها ..
طوبى طول لفت عليه ايديها وحطت راسها ع كتفه وهدت بكي..
مطيرة وهي ترشف:سبحان الله!..
حسين؛جيبي بطانيه خل نغطيها ترا..
مطيره؛هي شويه..ومشت طلعت..
حسين؛قطعت قلبي مسكينه قعدت من غير ام وهي صغيرة هكي..
صفيه ودموعها ينزلوا:ربي يجبر خاطرها بوخياتها يارب..
حسين تنهد وقعد ساكت..
وعمته جاته بالبطانيه..
حطاتها عليها..
وهو قعد يمشي ويجي بيها في الكوجينه..
لين خداها النوم ورقدت..
بعدين عطاها لعمتها دخلها للدار...
حسين:وغرفه شن صاير فيها؟
صفيه؛قاعده عند خالتك مغليه مابتش تخليها سكتت عندها هي..
حسين بألم؛يوجعوا القلب هلبه..
تنهدت صفيه بألم..
شويه وطلع حسين وهي مشت طلعت للنساوين..
🌱روحت سدرة وخشت للحوش طول..
لاقتها فردوس..
ضموا بعضهم وقعدوا يبكوا الزوز بالعبره....
وبكوا معاهم الناس مرة التانيه...
بعدين تباعدت سدرة وقالت ببكي:وين بوي..
فردوس ببكي؛في الخيمه مع رجاله...
سدرة؛وشن حاله...
فردوس:داير روحه صابر..
مطيره؛انت كويسه بنتي ماتحسي في شي
سدرة؛كويسه كويسه...شافت غرفه راقده ع رجل مغليه قالت..طوبى وين..
عائشه؛راقدة في دارك..
مشت من حداهم طول لدارها وخشتلها..
لقتها راقده ع سريرها بهدوء..
قربت منها وهي تتأمل في وجهها البريء وتتفكر في و صية امها..
رقدت حداها وخدتها في حضنها وقعدت تبكي بصمت..
صاحباتها كانوا واقفات في الباب يشوفولها بحزن..
بعدين طلعوا وسكروا الباب...
🍀🍀🍀🍀
وقاعد ينفرط عقد الايام..ويمشي يوم ووراه يوم..
لين عدى اسبوع ع وفاة وردة..
خواتها اللي كانوا زي الغريبات في العزي روحوا من بعد السبوع طول..
ايه في هكي في الحياة في خوات وكأنهم مش خوات..
وخالات وكأنهم مش خالات زي وجودهم زي عدمه..
ومافي حد عابي عليهم ولامهتم لوجودهم..
لأنهم خدوا ع قلتهم...
عكس الجيران اللي من لما خش رمضان وكل يوم الفطور ع وحده...
اول يوم فطروا معاهم كلهم..
وساير الايام يجوهم بعد الفطور..
مطيره ماروحتش لحوشها بكل ماقدرتش تخلي خوها وصغاره في هالشهر المبارك اللي خش عليهم وهما فاقدين امهم روح الحياة وطعمتها الحلوة..
اللي بعد ماراحت ولت كلها مرار...
لطفي داير روحه صابر قدامهم بش يقويهم..
لكن وين يخلى بنفسه يبكي عليها بكاء الطفل الصغير ع امه..
اما سدرة فكانت محاوطه خواتها الصغار بالاهتمام بالذات طوبى...وفردوس كانت تعاون فيها رغم ان عندها ماتعاني حتى هي...
وقعدوا كلهم يحاولوا يسندوا بعض بش يعدوا هالمحنه الصعبه اللي ماتعديش بالساهل...
🌻في منتصف ايام شهر رمضان....
طلعت فايزة من جناحها بش بتمشي لحوش الواعر..
"وين ماشيه"
فايزة وقفت وقالت لعزوزتها:لحوش عمي لطفي..
ام احمد؛ليك قريب شهر وانتي ماشيه جايه خلاص شدي حوشك وقعمزي..
فايزة:خديت اذن احمد..
ام احمد؛الحوش هدا حوشي مش حوش احمد بنتي حكمي اني اللي يمشي هني حتى على احمد نفسه ..خشي سلم بنتي وغيري حوايجك وبري للكوجينه الماعين يراجو فيك ماهو مايجيش تاكلي وتلحسي يدك وتنوضي..
فايزة بلعتها وسكتت ع خاطر راجلها ماتبيش المشاكل..
هزت راسها وقالت؛حاضر..
ومشت خشت لجناحها..
ام احمد؛لازم من العين الحمرا بش تتحشمي ع وجهك!..
ومشت طول لدار المعيشه..
بنتها:قعمزتيها يام..
ام احمد؛وخليتها تغسل الماعين..
:احسن مادرتي..
ام احمد؛مالا شنو ياحنه تبي تاكل تقعمز تحساب روحها قاعده في فندق...
وفايزة وهي ماشيه الكوجينه سمعت كلامهم وكعادتها طنشت وقاعده تستحمل غصب عنها ع الأقل ع خاطر احمد..
🌻🌻🌻🌻🌻
في مربوعه حوش لطفي..
كانوا رجالة الشارع مقعمزين بعد ماروحوا من التروايح..
وكلامهم كله عن السياسه بس طبعا في حدود مايقدروش يحكوا في كل شي..
ولطفي مقعمز معاهم ومش معاهم وكان حاس روحه تاعب غير يساير مسايرة..
فهالتقعميزة كان موجود اياد اللي مانزلش المهدي عيونه من عليه..
خصوصا وانه في الفترة الاخيره ولى قريب للعيله هلبه..
وحتى كم مرة تعب الحاج علي وهو اللي يفحص فيه ويجيبله في الأدويه...
وامه كذلك شبه يوميا كل ليله في حوش الواعر ومعاها حفيدها..
الولد لما يجي غادي يفوت اللعب مع الصغار..
ويقعد مقعمز يتفرج ع سدرة وخلاص يراقب فيها بالحركه..
بالذات كيف راده بالها من طوبى...
الحاجه هاله؛روح حبيبي العب مع الصبيان..
مطيره؛شكله متحشم..
سدرة شبحتله وقالت؛نوض اطلع معاي..
مهند ناض وهو فرحان..
وهي ناضت وقالت؛عيونكم ع طوبى..
ومشت ومعاها مهند وطلعت بيه للجنان وقالت:سرت كبوطك..
مهند سرت كبوطه..هي كملت عليه لين غطت رقبته وقالت:صقع
ضحك..
سدرة يدوب ابتسمت وقالت؛هي برا..
مشي مهند يجري..
وهي قعدت معاها بعيونها اللي تعبوا دموع..
حاله من حالها هي وخواتها فاقد امه ويبي الحن والحب..
مسحت دمعتها اللي طاحت وولت خشت داخل..
لقت طوبى تلعب مع اريج بالألعاب والزوز يبانوا متفاهمات..
يدوب ابتسمت وقعمزت حدا صاحباتها..
نسرين:شكلها مش جايه فايزة اليوم..
عائشه:فايزة توا مراة متزوجه مش ديما بتجي..
سدرة:عندك حق....
🌱في المربوعه..
ناض لطفي بيمشي يوصيهم ع شاهي..
وين ناض حس الدنيا لفت بيه انسند ع الحيط..
كلهم باصوات متقطعه..لطفي..لطفي خيرك..عمي لطفي..
ناضله اياد وجاه وقال:حسيت بدوخه.
لطفي:من بكري نحس في روحي مش مزبوط..
اياد:ضغطك هابط واضحه..
ترا تمدد عمي لطفي..
اللي حواليهم؛ارقد وقيم رجليك..
تمدد لطفي..
واياد خدي مخاد المربوعه وحطهم فوق بعض ورفع رجلين لطفي وحطهم عليهم..
بعدين:خل نجيب جهاز قياس الضغط من السيارة ونجي..
ومشي بسرعه طلع والمهدي قريب ينفجر..
علي؛ماتاكلش ياولدي وهامل روحك..
جويده؛لنفسك عليك حق..ووراك عيلة يالطفي رد بالك..
هو قعد ساكت وماقدر يرد ع حد..
ع خشة اياد بجهاز القياس..
قعمز جنبه وقاسله الضغط وقال:هابط شويه..ممكن تو تحسن بعد رفعت رجليك...لازم يوصوا عليك العيله..
علي؛مايقدر عليه كان سدرة .
لطفي:لالا مانبي حد يقوللها مش ناقصه..
محمد شنيبه:لالا لازم تعرف كان ماردتش هي بالها عليك من بيرد باله..
هز راسه وقال:صدقت من مازال بيرد باله..
الموجودين تأثروا...
إياد:تو نوصيها شن دريلك وشن تعطيك..
مسح المهدي ع لحيته بقوة خايف يفقد اعصابه وينوض يضربه قدامه الحاضرين..
يوسف:انت قولي واني تو نوصللها..
واخيرا جي من برد ع المهدي شويه..
اياد بإبتسامه؛تمام..
~~~~~~~
سدرة ودموعها ينزلوا:معقوله يابوي هكي ربي يهديك!؟ لطفي وهو مقعمز ع سريره:ع قداش بتبدي انتي..
سدرة؛نبد ع الشارع كله اني انت مادورش..
ضحك في وسط حزنه..
هي جاته حط يدها ع كتفه وشدت عليه وقالت:انسند عليا وبيي ومادور شي..انت ديما تقول فيها بنتك بمية راجل..نتحمل نتحمل هلبه راني..
لطفي طبطب ع يدها وقال؛ربي يحفظك يابوي..ويرحم امك اللي عرفت تربي..
سدرة:اللهم ارحمها واجعلها منعمه في الجنه يارب..
🍀🍀🍀🍀🍀
وبعد ماعدى شهرين ع العزي...
الناس ولت معاش تجي واللي هدا شد حوشه ورجعت الحياة لطبيعتها..
ومن بعد العيد فردوس معاش جت بعد اللي صار فيه..
وكأنه عزي امهم انقام من اول وجديد وتعبوا هلبه..
وقلوبهم تقطعت ع غرفه وطوبى بالذات...
اطفال وجاهم عليهم العيد وهما فاقدين اهم انسانه في الوجود..
ممكن طوبى مازال مش فاهمه بس حاسه..
لكن غرفه فاهمه وحاسه وياما صار فيها ....
ايييه..يبوا هلبه بش يتخطوا هالوجع هلبه....
يعني لطفي..
معاش لطفي الاول... ولى قليل الكلام كثير العمل بش يشغل نفسه وينسى..
وسدرة لغت من تفكيرها كل مخطط يخص حياتها..
وسخرتها تسخير تام لبوها وخواتها..
وكانت مرت عمها تعاون فيها مرة مرة...
ومطيرة تجيهم بين فتره والتانيه..لكن لماتهم معاش ولت ليها بنه بعد غياب وردة خلاص..
🌻من جهة تانيه..
كانت المهدي عايش في حالة من العذاب مايعلم بيها كان الله...
يبي يقدم في موضوعها بس توا مش وقته...
مازال جرحهم جديد مافي حد حيقبل ينفتح هالموضوع توا...فأنجبر يسكت ويصبر ويتحمل في روحه..
زي مامتحمله فايزة وقاعده تبلع وتمشي..
بس التنازل زياده ع اللزوم يخلي الطرف اللي نتنازلوله يتمادى هلبه...
ام احمد؛لاياماما بري عايني شوفي روحك..ليك شهور متزوجه.
فايزة:عادي ياعمتي في اللي يقعدوا بالسنه..
ام احمد؛وكان عدت السنه وماصار شي !؟..
فايزة سكتت هي مضايقه...
ام احمد؛اجري ع عمرك ياماما ماتقعديش باش كان فيك شي يبان من الاول..
فايزة برضوخ؛حاضر..
🌻وبعدين ناضت وخشت قعمزت في جناحها وهي تبكي..
مش مصدقه روحها وين وصلت وكيف بدت تتقبل الاهانات وتبلع وتمشي عادي..
وفي نفس الوقت ماتقدرش تشكي لأحمد لأنها عارفه ان المشاكل حتبدا وممكن تخسر احمد لأنه فالنهايه زيه زي أي راجل حيوقف مع ماليه في الاخر..
مجبورة تسكت وتتحمل لأن ماعندها من يسندها ولايوقف معاها وياخدلها حقها..
هي امها اللي هي امها معاش سألت عليها ولادورتها..
مسكينه يافايزة..
وهي في عز تفكيرها ودموعها يجروا ع خدها..
خش عليها احمد..
طول مسحت دموعها..
احمد وهو مبتسم؛هاه حبيبي شن جوه..
ابتسمت وقالت؛الحمد لله..
عقد حواجبه وقال؛خيرهم عيونك باكيه؟
فايزة رشفت وقالت؛خطر عليا بوي..
احمد شد يدها وقال:الله يرحمه..هي توا غيريلي جوك جايبلك مفاجآة..
فايزة بإستغراب؛مفاجآة؟
احمد بضحكه؛ايه حصلتلك تعيين..
فايزة بدهشه؛تبصر..
احمد بضحكه:لا والله نحكي جد ومن غدوة ان شاء الله تبدي..
خفت ملامح السعاده ع وجهها وقالت:باهي اعطي علم لعمتي..
احمد بإستغراب:علاش!؟
فايزة؛هكي وخلاص..
احمد؛مش شايف انها لازم تعرف واني.من البدايه قلت نبيها تخدم..
فايزة ابتسمت:باهي قوللهم هكي..
احمد؛شن في فايزة..
فايزة وهي تحاول تخفي ارتباكها:لابس نبيك تعطيهم علم ضروري يعرفوا..
احمد؛باهي مدام شديتي في الموضوع هكي تو نقول..
فايزة؛ايه وعندي طلب تاني..
احمد؛امر.
فايزة؛نبيك ترفعني لدكتورة نساء نبي نعرف علاش ماصارش حمل لتوا..
احمد؛مازال الوقت حبيبي ماسكرناش سنه حني..
فايزة؛معليشي ع خاطري نساير نبي نمشي نطمن بس..
ابتسم وقال:حاضر..مادام هدا يريحك حاضر..
فايزة ابتسمت وقالت من وسط قلبها؛نحبك نحبك هلبه..
احمد بضحكه؛واني نموت فيك...
🌻وفي حوش صاحبتها نسرين..
نسرين؛زيد شويه تانيه..
طاهر بضحكه؛خلاص هداكا هو امي توا تنشغل..
مغليه؛عندك حق ولدي ..
ناض وقال؛بارك الله فيك خالتي..هيا ماتبوا شي..
نسرين؛نبي نتفقوا نهار نفضي روحي من العمل وترفعني نشوف هدوكا الجماعه..
ضحك وقال؛باهي..
هي تصبحوا على خير..
وناضوا وراه مغليه ونسرين يسقدوا فيه..
في الدور التاني..
دار الولاد...
نضال؛كم التاريخ اليوم ..
عمر:20\\000
نضال قعد يكتب في التاريخ في الكراسه..
الجالي؛شن الفين متاعك هادي حني بدينا نأرخوا بوفاة الرسول.
عمر:ننسى فيه..
سمى الجالي التاريخ الصح لنضال وصلحه ..
عمر:ديما بيقعد يجينا هدا..
الجالي؛امك ياسيدس تعزم فيه..
عمر حط يده ع رقبته وقال:مانزلش من هني..
الجالي؛ولا اني طايقه دايرلي فيها روحه الطيب الباهي اللي مافيش منه وهو تلقاه من داخل كاره شبح وجوهنا..
عمر؛حتى اني هكي ديما نحس فيه مايحبناش..
الجالي؛يجي ع خاطر الفلوس بس وين يجي المهدي يمدله..
عمر:صح..
نضال؛حقه عمر ولاد الشارع بيديروا مباراة غدوة.
عمر؛قداش ليا عليهم..امتى..
نضال؛العشيه..
وقعدوا يهدرزوا نضال وعمر ع المباراة..
والجالي مقعمز يقرا...خلاص توا خش الثانوي ولازم يثني ركابه...لانه ناوي الهندسه...
وبس حسين اللي من عمره كانت رغبته مختلفه عكسه تماما..
عكس شخصيته حسين خش الثانويه العسكريه لأنه كان ناوي يخش الجيش..
انسان لطيف وحساس زيه اختار حاجه بعيده عنه كل البعد...
🌻حسين وهو يلعب في طوبى:من زمان هكي نبي..العسكري ديما ليه هيبه ولو كبرت في الجيش وخديت رتب نولي زي هالكابوات..
فهمت سدرة اللي كانت تسمع فيه انه بسبب الحرمان اللي عاشوه مع بوهم...
طوبى:حسين حسين..شد..
وحدفت الكورة وهو شدها بعدين حدفها ماقدرتش تشدها..
ضربت رجلها بالارض وقالت؛مش بالقويه..
سدرة بحده؛شن الحركات هادي عيب حسين اكبر منك..
حسين بإستغراب:خيرك سدرة شن دارت هي!؟
سدرة؛قولي اسفه.
طوبى وهي زعلانه قالت بلغة طفوليه بلذغه في السين؛اسفه..
حسين وهو متفاجئ:مش من جدك سدرة..!
سدرة وهي تفرط في البازلياء بشي من العصبيه:ماتدخلوش في تربييتي ليها..
حسين طارتله منها وقال:باهي اني اسف.
وناض ومشي ومن حداها..
وطوبى بعيونها معاه..
سدرة؛تعالي هني..
قربت طوبى لسدرة ..
سدرة:معاش ديري هكي مرة تانيه نزعل منك..
طوبى ضمتها وقالت:نحبك .
ابتسمت وقالت:حتى اني..هي بري خودي الكورة وخشي تفرجي ع الرسوم مع غرفه..
طوبى:باهي..
ومشت خشت داخل..
وسدرة معاها بعيونها اللي يلمعوا بالدموع...
🌻🌻🌻🌻🌻
تاني يوم ..
في حوش عائشه..
فايزة؛سمعت نقاشهم صوت كان عالي وخشلي بعدها وقالي قولي الحق في حد يضايق فيك هني..قتله لا..
نسرين؛ياعبيطه وعلاش تقولي لا..
عائشه:شن تبيها دير مشاكل بينه وبين اهله ويحطوها في روسهم بعدين!؟
سدرة؛كلامها مزبوط عائشه احسن مادرتي فايزة..
نسرين:مالا راجو واسمعوا شن مازال يصير القدام..
فايزة بقلق:ماتخوفنيش!
عائشه:مادوريهاش..باهي ومشيتي عاينتي..
فايزة بضيق:ايه طلعت عندي مشكله الدكتورة وصفتلي دواء قالتلي تمشي عليه عام بعدين بإذن الله تحملي..
سدرة؛اهي جت في صالحك عرفتي ان عندك مشكله..
فايزة؛ايه..
نسرين؛شن امورك تمام اول يوم خدمه..
فايزة؛استريحت للحق..
نسرين؛حتى اني مافيش احلى من انك تخدمب ويقعد راتبك في يدك وماتحتاجي حد..
تنهدت عائشه وقالت؛سعدودكم..اني خديت الشهاده غير هكي وخلاص قالولي مافيش خدمه راجي لين تتزوجي كان بي راجلك يخدمك باهي كان هدا قعمزي في الحوش المراة ماليها الا حوشها..
سدرة تنهدت بحسرة وقالت:واني شكلها بندسها في الدولاب وخلاص..
نسرين ركزت عليها..
عائشه؛علاش!؟
سدرة وعيونها معبيات دموع:شن علاش ياعائشه من بيه الحوش من بيهم خواتي من بيه بوي اللي كل يوم صحته لتالي خلاص معاش نقدر نخليهم..
نسرين؛سدرة..والمهدي.!؟
كلهم شبحوا لسدرة..
وسدرة شبحت لنسرين شويه بعدين انهارت بالبكي وغطت ايديها بوجهها والبنات جو حواليها وقعدوا يهدوا فيهم وقلوبهم موجوعه ع حالها..
🍀يومها روحت نسرين من حوش عائشه وهي تفكر في حال خوها لما يعرف سدرة ع شن ناويه..
وجعها خوها زي ماوجعتها صاحبتها النصيب معارضهم وجاي ضدهم...
🍀🍀🍀🍀🍀
ومرت الشهور....
وسكرت وردة بالزبط سبعه شهور متوفيه...
الحياة في شارع القهوة فهالسبعه الشهور ماتغير فيها شي زي ماهي...
لعند ماجي اليوم اللي مشي فيه المهدي لمطحن عمه لطفي بش يذكره بكلمته اللي عطهاله..
لطفي:واني قاعد عندها ياولدي وبالعكس مادا بيا تتزوج مانبيهاش تربط مصير مستقبلها بينا..
المهدي من داخل كان فرحان ع الآخر بس خلى روحه عادي قدام لطفي وقال:باهي كيف يصير توا ياعمي..
لطفي:اليوم بإذن الله نفتح معاها الموضوع ونرد عليك قريب..
ابتسم المهدي نص ابتسامه وقال:ان شاء الله..
~~~~~~
سدرة:لالامانبيش..
لطفي؛وعلاش!؟ فيه شي مش عاجبك؟!
سدرة؛بوي لاهو ولاغيره يابوي اني فكرة الزواج مطلعتها من دماغي..
لطفي؛كيف!!؟
دموعها نزلوا وهي تقول:بوي امي في اخر لحظاتها وصتني ع طوبى قالتلي طوبى امانتي عندك راضيه عليك كان حافظتي عليها..كيف تبيني نربي اختي واني متزوجه مش حنقدر يابوي مش حنوفق مش حنلايم..بوي اني نبي نعيش حياتي ليكم وبس خلاص قرار وخديته ومعاش نولي فيه..
لطفي شبحلها هلبه بعدين قال:امك وصاتك؟!
سدرة شبحتله شويه بعدين قالت:ايه..
هو قعد يشبح لبنته وهو ساكت وهي تشوفله..
بعدين هز راسه وقال:خلاص اللي تبيه يصير...
🌱بس للأسف مش هدا اللي تبيه سدرة مجبورة عليه جبر
دهست قلبها دهس ورضت تعيش طول عمرها متعذبه بس تنفد وصية امها..
بس مابتش تفارق حبيبها فراق بارد..
هديكا ليله سهرت تكتبله في رساله بدموع عيونها وماكلمتها الا بعد ماماتت الف موته..
واليوم تاني راجت نسرين تروح من خدمتها وبعتتها معاها...
☘☘☘☘☘☘☘☘
(نسير في الحياة ع خطوط اقدارنا ولانستطيع تغير ماكتب علينا...احبك حقا..احبك جدا..ولكني لن اكون لك يوما ولن تكون لي..طرقنا متوازيه..لن تلتقي ابدا مهما فعلنا...
مهدي ادركت تماما مع قصتنا...ان الحب شي والنصيب شيء اخر..صدقت حقا انه ليس كل مايتمناه المرء يدركه..
صدقني..لم ولن احب غيرك في حياتي نذرت لك قلبي للأبد واتمنى من الله ان تجد من تعوضك عني فأنت تستحق الأفضل من سدرة....اسعدك ربي ووفقك ياعزيز قلبي)
بنظرات غاضبه مليانه بدموعه كمكم الورقه ونادى بصوت عالي:نسرين...
لحظات وخشت نسرين تجري..
نسرين بخوف: نعم..
شبحلها بنظرات مخيفه والدموع في عيونه:قوليلها غدوة تجي لجردينه***** غدوة...وخبط بيده ع الطاوله وقال..ولا مايصيرش طيب...
~~~~~
سدرة:يبي يسمعها مني يبيها وجه لوجه يصعب فيها عليا وعليه...
نسرين ودموعها في عيونها؛انتي بري وقولي اللي عندك وخليه هو يقول اللي عنده مرات يقنعك ياسدرة..
ابتسمت تهكما ودموعها نزلوا...مسحتهم ورشفت..
بعدين هزت راسها بالموافقه...
🌱ويامطول ساعات هداكا اليوم عدت عليهم سنين..
حتى النوم جفاهم...فرقة حالهم نوم شني اللي مازال بيعرفوه...
وطلع عليهم اليوم التاني..
وجي موعد اللقاء..
حطت سدرة غرفه وطوبى في حوش مرت عمها..
وخدت اذن من بوها ع اساس ماشيه بتاخد حاجات من سوق قريب..
ركبت افيكو...واتجه لمكان اللقاء..
وهو كان سابقها غادي بوقت..
مقعمز ع مقعد طويل..فارد ذراعه ع المسند متاعه ويشبح في الفراغ ورجله تهز بعصبيه..
هي نزلت من الافيكو بعد وصلها...
ومشت بطريقها للجردينه...
وقفت في مكانه لما شافاته حست قلبه ينخلع خلع...
خدت نفس وقدمتله..
خطوة وراها خطوة..
لين وصلت فيه وقالت:السلام عليكم..
رفع عيونه وقعد يشبح لعيونها من غير مايرد..
هي كانت شاده روحها بقوة ماتبيش تبكي..
بملامح باردة ونبرة ابرد:خير شن تبي؟
ناض وقف قدامها وقال:نبي نعرف حاجه وحده بس سؤال وجاوبيني عليه بصراحه..انتي حبتيني حق يابنت الناس!؟
سدرة؛ومازال تسأل فهالسؤال الغبي!
المهدي بإنفعال:باهي علاش ديري فيا علاش علاش تحرقي فيا وتعذبي فيا قوليلي اللي يحب حد يدير فيه اللي ديريلي فيه !؟
سدرة وهي تقاوم في دموعها:مهدي افهم اني توا خلاص معاش نقدر نعيش لحد غير عيلتي يامهدي كلهم توا متكيين عليها..خواتي صغار محتاجيني يامهدي بوي محتاجني مهدي..بعد موت امي معاش في الا اني يامهدي..
المهدي بنظرات رجاء:اني مستعد نتكفل بيهم معاك مش حنمنعك عنهم بكل من الصبح بري وروحي في الليل باتي مرة مرة عادي ياسدرة والله ماعندي مشكله حبيبتي اقسم بالله..صدقيني حنسندكم كلكم..
نزلوا دموعها وقالت؛مش حتقدر والله ماتقدر .
المهدي بإنفعال:تي من قالك مانقدرش من قالك ولاشايفتيني مش قدها!؟
سدرة بوجع؛يامهدي مش هكي..انت مش فاهمني مش عارف شي..اني نادرة حياتي لخواتي وصيتي امي مش حنفرط فيها وصية امي فوق كل شي يامهدي..
تغيرت ملامح مهدي للحده الممزوجه للتهكم؛اقسم بالله عمرك ماحبتيني السنين هادوا كلهم كنت تكذبي عليا وخلاص وتمشي واني الغبي الحمار مصدقك وقاعده ندير في المستحيل بش تولي معاي..تعرفي كيف..انت اكبر غلطه غلطتها في حياتي غلطه ومش حنسامح روحي عليها بكل..
سدرة وهي مصدومه:لا والله انت اللي اكبر غلطه غلطها في حياتي..والله ماتستاهل يامهدي والله ماتستاهله قلب سدرة يامهدي اني توا بس تأكدت علاش ربي دار هدا كله بش يحميني من مصيبه كبيره كنت حنطيح فيها لو خديت واحد زيك انت...نعطيك وعد من اليوم نمسحك من قلبي مسح وكأنك ماكنت وحننسى شن كنت بالنسبه ليا يوم من اليوم لأنك ماتستاهلش..
ولفت ومشت بسرعه وهي تبكي بصمت وهي شاده عابيتها خايفه طيح..
وهو معاها بعيونه اللي نظراتهم كلها صدمه يعني خلاص...
خلاص من اليوم سدرة والمهدي حقيقة وواقعا انتهوا..
انتهوا للأبد..!
☘☘☘☘
مقعمزة في الافيكو تبكي بألم حاسه روحها بتطلع وقلبها معصور من الألم..كانت متمنياته يكون فراق جميل..
نهايه محترمه يحفظوا بيها الود والاحترام لبعض..
وهو في السيارة..
كان يسوق وهو يعظ في صبعه بغيظ..
ودموعه تنزل غصب عنه مش بإراداته....
ودمعة المهدي ماتنزلش بالساهل...لأنها دمعة راجل تنزل عالغالي بس...
وهو اليوم فقد اغلى مايملك وحس روحه من بعدها ولا حاجه...
~~~~~~~~~
مغليه بخوف:حي عليا عليا كان مايدير في روحه حاجه!
خديجه وهي تسمع في صوت التكسير؛عطيك مايسحن كبدك ياسدرة كيف ماسحنتيه..
نسرين بألم؛اسكتي..
خديجه بصوت عالي:وانتي ليك عين ومازال دافعي عنها ياكلبه مش واجعك خوك..
مغليه:لا اني معاش نقدر نتحمل..
ركبت فوق وبناتها وراها..
وصلت في داره وقفت قدامها وقالت:والله نخطبلك تاج راسها والله ناخدلك اللي خير منها مليون مرة..
"خلوني في حالي"
وخبط الباب بحاجه هما انفجعوا..
مغليه ودموعها ينزلوا؛حسبي الله ونعم الوكيل فيك ياسدرة..
ومشت نزلت والبنات وراها..
☘وسدرة في الحوش تبكي بروحها تبكي بالعبره..
تبكي وتبكي ع الف وجع ووجع..
وجع فراق امها...
وجع فراق حبيبها...واوجاع تانيه مكتومه وواعرة...
تبكي ومش لاقيه لمن تشكي..
تبكي بكي موت...وهلبه يعرفوا شن هو البكي الموت..
🍀🍀🍀🍀🍀
ومر من هداكا اليوم اسبوع..
تعيس وكله كآبة....بس مكبوته..
يتخيل الواحد يعيش تعيس وحزين بس مجبور يكبت هالمشاعر ويظهر عكسه ع خاطر الناس اللي يحبهم..
وهادي كانت سدرة..
اما المهدي طول هالأسبوع..
كان منعزل وبعيد عن الحوش..وعن كل الناس...
وبعد اسبوع روح للحوش وهو واخد قرار...
في الصاله...
هو وامه وخديجه مقعمزين..
مغليه:نخطبلك احسن بنت فيك ياطرابلس بنت عيله وبنت عز تحمد ربها اللي انت وليت من نصيبها..
خديجه رفعت حاجبها وقالت؛من رايي يام ناخدوله وحده نعرفوها كيف كيف متربيه قدامها وعارفين اخلاقها وعيلتها كويس كويس..
المهدي وهو يشوف في الفراغ؛ديروا ماتحبوا..
خديجه؛ماتبيش تعرفها من هي؟
المهدي:مش فارق معاي..
مغليه؛من هي..
شبحت للمهدي وهي رافعه حاجبها وقالت:عائشه..عائشه بنت الشيخ جويده..
مغليه انصدمت..
وهو شبح لخديجه هلبه بعدين رفع حاجبه وقال:هي وماتمشوش لغيرها ومن غدوة بروا تكلموا في الموضوع...
وناض من مكانه ومشي طلع من حداهم..
امها بصدمه:لشن تبي توصلي!؟
خديجه؛نحرقها كيف ماحرقت قلب خوي...
مغليه قعدت تشوفلها شويه وقالت:بيني وبينك عائشه احسن وحده لخوك المهدي ماتمشيش مع المهدي الا عيشه..
خديجه بضحكه؛اهو اتنين في واحد..
مغليه:وكان قالت لا ع خاطر صاحبتها..
خديجه؛الموضوع لازم يوصل بوها وبوها تعرفيه مايصدق يناسبنا وهي مسكينه ماعندهاش كلمة مع بوها يقوللها موتي تموت..
هزت مغليه راسها وقالت:خلاص...نعتبروا الموضوع تم...
#فارقتك
#طوبى
....يتبع....
