# طوبى "شارع القهوة"
#جمان_فريد
#الجزء_العشرين"20ابريل3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
....بعد يومين.....
"هالنهار تمنيته طلبت العالي ولقيته
هالنهار عليه ندور هالنهار ربيع منور..
هالنهار علينا طل هالنهار ربيع وفل"
هالأبيات كانوا يرددوا فيها اهل طاهر ومعاهم اهل نجاة..
وهما جايبين بيان نجاة...
صابرين كانت تشوف في سوابيت بيان اختها وهي بطير من الفرح...وقعدت تحلم ببيان يجيها زيه..
قامت عيونها وشبحت لعائشه وبنتها في يدها..
وقعدت تتخيل في المهدي وكانت حاسه بغيرة..ورغبة شديده انها تتقرب من المهدي وطيحه في شباكها بس مش عارفه كيف توصله...
واختها نجاه كانت في اسعد لحظاتها فرحانه بطير..
بس كانت دايرة روحها عاديه قدام الموجودات...
نسرين كانت فرحانه بيهم وتغني من قلبها..
بس خديجه من فوق نفسها..مش عاجبينها وشايفه ان طاهر هلبه ع عيلة زي هادي مش مستواهم..
حركات خديجه كانت واضحه ومبينه عدم تقبلها..
مروة اخت نجاة الكبيرة لاحظتها وضايقت هلبه..
وصابرين ملاحظه من يوم اللمه وحاقده عليها..
اما نجاة فكانت متجاهلتها حاليا ماتبيش تفسد ع روحها فرحتها..
بعد ماغيرت نجاة القفطان..
خش طاهر ولبسها الدبله وهي قعدت قدامه عادي من غير حجاب والكل كان مصدوم في الموقف..
واللي زادهم صدمه..انه بعد لبسها سلمت عليه بالخد...
وجتهم المصورة وقعدت تاخدلهم في لقطات يديروها العرسان..مش المخطوبين!
كلهم كانوا مستغربين في طاهر..كيف مسيطرة عليه نجاة هالسيطرة ومخلياته معاش يعرف الصح من الغلط...
لدرجة انه دار بيان وامه مش فيه وكان مبسوط ع الآخر..
☘☘☘☘☘☘
حولت عائشه خراصها من وذانها وهي تقول:بجديات شي يخليك تستغرب مهدي...
المهدي وهو شاد سدرة يلاعب فيها:والله شن بنقولك كلمته اكثر من مرة ع امه وهو قعد مسكر راسه..
عائشه التفتت وقالت:باهي ع العرس كيف بيصير..
المهدي:من هني للعرس تفرج ان شاء الله..
عائشه :إن شاء الله...مهدي بالله عليك حطها وخليها ترقد..
باس المهدي راس سدرة وحطها ع السرير واتكا وقال:هاه خليناها..
هي شبحتله بطرف عينها بعدين خدت حوايجها ومشت للحمام..
بعد ماسمع الباب تسكر..
رجع قرب من سدرة وقعد يشوفلها كيف باديه ترقد..
عيونه تعبوا دموع...قامهم وشبح للتقويم المعلق ع الحيط...
اليوم كان اخر يوم في شهر النوار...
معناها مازال 9ايام بس...
☘☘☘☘☘☘☘
الاول من شهر الربيع...شهر 3..
نزلوا عبدالقيوم وصحابه في واحد من فنادق العاصمة..
اللي كلهم اول مرة يجوها...
طرابلس بالنسبه ليهم كانت مختلفه..مختلفه هلبه عن اي مدينه مشولها في ليبيا.
وكانوا متشوقين يطلعوا يدهورا فيها ويتعرفوا ع معالمها...
🌻🌻🌻🌻🌻
"سدرة"
سدرة وهي راكبه ع السلوم تقض في الستارات:نعم..
طوبى وهي مصدومه:توا خشيت للدار بناخد القفطان اللي خديناه لأميمه للبيان لقيته مقطع..
سدرة شبحتلها وهي تفنص وقالت:شنو!؟
ونزلت من السلوم..
ومشت للدار ولحقتها طوبى...
خشوا الزوز..
وسدرة لقت الدولاب مفتوح القفطان برا..قاماته لقاته مقطع من لوطا..
سدرة وهي مصدومه:من دار هكي!؟
طوبى تعرف من دار هكي لكن قعدت ساكته..
سدرة شبحتلها شويه بعدين قعدت تنادي:غرفه..انتي يللي اسمك غرفه..
ناضت غرفه من قدام التلفزيون وهي متنرفزة..
وصلت في الدار وقالت:خيرك!.ولما شافت القفطان قالت..حي خيره هكي!!؟
سدرة:قصدك انتي ماتعرفيش خيره هكي!؟
غرفه:شن بيعرفني اني اول مرة نشوفه اصلا..
طوبى قعدت تشوفلها بحده وهي ساكته..
غرفه:مرات خش فار للدولاب وقرمطه..
سدرة قعدت تشبحلها شويه بعدين قالت:بري انتلفي بري..
غرفه؛علاش تكلمي فيا هكي شن درت!؟
سدرة غمضت عيونها بعصبيه وقالت:قتلك بري!
هي لفت ومشت..
وهي ماشيه ابتسمت بمكر وقالت:وروني شن بتلبس سندريلا في البيان ..
ومشت قعمزت قدام التلفزيون تكمل باقي مسلسلها..
☘سدرة؛هي والله هي قفطان بهداكا الحساب...مش عارفه كيف بدير اميمه توا...
طوبى قعدت تفكر بعدين قالت:تخليني نمشي غادي سدرة..
سدرة:وشن بديري ماشيه!؟
طوبى:بنتختخ حسين يرفعنا للسوق..
سدرة:باهي بري جربي حظك وان شاء الله يقول باهي مولي صعب الفترة الاخيره..
طوبى ابتسمت وقالت:نقدر عليه..
ومشت طلعت وسدرة تشوفلها بإبتسامه..
🌻🌻🌻🌻🌻
"مني مازال ماجددش وصينش في وقتنا هدا قولي"
مصطفى:الحوش مصين احسن صيانه من اربعه سنين فاتوا مافي حاجه فسدت ولاعندنا رطوبه ولاشي...شن لزومها الصيانه تاني توا فهميني..
فردوس وهي حامقه:وخيرها مرت خوك ليهم عامين مصينين حوشهم وتوا بيعاودوا صيانه ويغيروا الاثاث..
مصطفى:تو بتجيبي حالة خوي لحالتي اني!!؟ وبعدين اني الف مرة قلت قبل معاش تقارنيني بحد..
فردوس بدت تبكي وهي تقول:ماهو اني ديما هكي ماعنديش حظ!..
مصطفى:بارك الله فيك يافردوس! عمري ماقصرت معاك ولامع صغاري..لما يكون عندي اللي تطلبيه تلقيه..عمري ماحرمتكم من حاجه..اني ع خاطرك بش نرضيك خدمت صبح وعشيه...حتى صغاري معاش بديت نشوف فيهم هدا كله علاش ع خاطرك انتي بش نرضيك انتي..
فردوس وهي تبكي:هدا واجبك يابابا ماتتمنش عليا بيه..اللي دير فيه كله في وجهك في النهايه وين بيشوفوا الناس حوشك وشكل مرتك وصغارك ولبسهم كله في وجهك يايشكروا يايذموا..اني قاعده نبيض في وجهك قدام الناس مانبي شي لروحي...
مصطفي بهدوء:باهي اني توا قتلك ماعنديش..
فردوس ضحكت نص ضحكه متهكمه وطلعت وخلتله الدار..
هو غمض عيونه بإستسلام وتأفف بضيق..
وهالنقاش تعودوا يسمعوه الصغار..
اريح وآلاء وخوهم الصغير معتز اللي مازال مش واعي بس الصوت العالي يوتر فيه..
اما الكبيرات الواعيات كانوا يتأثروا هلبه بمشاكل بوهم وامهم ونفسياتهم تتعب...
☘☘☘☘☘☘☘
"كبرتها يااحمد كبرتها"
احمد وهو مقعمز ع السرير ويهز في رجله بعصبيه:كبيره بروحها يافايزة كبيرة بروحها..اني ياما شفت ودرت روحي اعمى بش نحافظ ع علاقتي بعيلتي..لكن هما مش دايرين كرامه لمرتي ويهينوا في بناتي ديما ويخلوا فيهم منبوذات قصدا..علاش هكي علاش..علاش هالكريهه اني خوهم..اني ولدها امي هادي اللي تعامل في بناتي ازفت معامله معقوله هكي معقوله!
فايزة بضيق:هما كارهيني اني هدا علاش كرهوهم حتى هما..
احمد:علاش شن دايرتيلهم انتي وليتي خدامه تمسحي تحت رجليهم..ومش عاجبهم...لكن تعرفي كله منك انتي..انتي قد مايجي يجي منك يافايزة..
فايزة ودموعها ينزلوا:يشهد عليا ربي مانبي كان الخير..
احمد:وشوفي نيتك الباهيه وين وصلاتك..
وناض ومشي وطلع من حداها..وخلاها تبكي ع قلة حظها فهالدنيا...
🌻🌻🌻🌻🌻
"مرة تفرجت على برنامج فيه دكتورة نفسيه قالت..التغيير يحسن من نفسية المراة لما تغير شكلها ولبسها للأحسن حيرجع هدا على نفسيتها"
اميمه مقعمزة قدام طوبى وتسمع فيها وهي عاقدة حواجبها ومبتسمه ومتفاجئه كيف بنيه في عمر طوبى تعرف حاجات هي ماتعرفهاش..
طوبى وهي حاطه صبعها ع فمها قالت:اممم..شعرك يبي القص...
اميمه:-قص!؟
طوبى؛ايه...قربت منها شداته وقالت..شوفي كيف تاعب..
اميمه شبحت لشعرها بضيق..
طوبى وخرت وقالت:قصيه وابدي اهتمي بيه واشريله الزيوت ميمو..وجهك حلو ولون بشرتك يجنن بس يبوا اهتمام اعرفي نوع بشرتك وخودي كريمات ع هالاساس..
اميمه وهي مندهشه:من وين تعرفي هدا كله!!؟
طوبى بضحكه:من التلفزيون..اني مانحبش نتفرج ع مسلسلات الحق..تلقيني ديما نتفرج ع برامج الصحه والجمال..
اميمه بضحكه:في عمرك نتفرج ع سبيستون..
طوبى بضحكه؛ايه قاعده نتفرج ع الرسوم مانفوتش من هزيم الرعد ولاحلقه..
قعدت تضحك اميمه..
طوبى هدت ضحك بعدين قالت بإبتسامه:ميمو بتحضري بيان سدرة ولا وقتها امتحاناتك يتموا...
خفتت ابتسامة اميمه وقعدت ساكته..
طوبى:قصدك مش حاضرتيه!؟
شبحتلها اميمه وقالت:مش عارفه حاسه روحي قاعده هكي مش قادرة..
طوبى:حي عليك تزعل منك سدرة هلبه هلبه..
اميمه بضيق:هو الحق اني ماعنديش قفطان حلو وسمعت ان بيان سدرة كبير يعني يبي قفطان وجو هكي..حكت جبهتها وقالت..وخوتي الفترة هادي مش فاضيين يوسف لاهي بحوشه وحسين تحسيه اشبح كيف باله معاش واسع زي زمان والحق نتحشم نطلع معاه للسوق..
طوبى ابتسمت ورفعت حواجبها وقالت:نطلع معاكم؟
ضحكت اميمه وقالت:تطلعي معانا!؟
طوبى:ايه..وحسين خليه عليا اني نتختخه..
اميمه ابتسمت وقالت؛باهي بري جربي حظك..
طوبى:وينه هو؟
اميمه:في المربوعه..
طوبى هزت راسها وهي مبتسمه بحماس وقالت:راجي شويه..
لبست حجابها كويس..
وناضت ومشت طلعت من الدار واميمه تشبحلها بإبتسامه حلوة..
🌻طلعت طوبى ومشت بإتجاه المربوعه..
وقفت ع جنب الباب وقعدت تنادي:حسين..
في المربوعه.
كان حسين مقعمز مع جده وبوه يتفرجوا ع الاخبار.
علي:طوبى..
ابتسم حسين وقال:خشي طوبى خشي..
هي بينت راسها تبي تشوف كان قاعد بروحه مش حتخش.
لين بان عليها جدها..
علي بضحكه:تبي تشوف كان قاعد بروحك ولالاكان هدا مش خاشه..رباية سدرة...
ضحكت طوبى بخجل ومشت لجدها وباست ع راسه وقالت:شن حالك جدي..
علي :الحمد لله الحمد لله..
وحسين يشوفلها بإبتسامه...
طوبى شبحت لعمها وقالت:شن حالك عمي..
عبد المطلب وهو يشوفلها بإبتسامه:الحمد لله بنتي..بوك قاعد ماروحش..
طوبى:كلم سدرة وقال؛بيروح بعد المغرب..
هز عبد المطلب راسه وهو ساكت..
علي:سدرة في المطحن؟
طوبى:خليتها بتمشيله...
عبد المطلب:صحة ليها مشية خدمة المطحن صح واللي يخدموا تحتها دايريلها الف حساب..
علي:حتى سدرة الواعر..
ابتسمت طوبى..
حسين:ايه ابلة طوبى شن تبي..
طوبى:ترفعنا للسوق اني وميمو..
عبد المطلب:وعلاش؟
طوبى:بتشري حاجات..
علي:بروا بروا ارفعهم ياحسين..
حسين؛حاضر..
علي:قولي لأميمه تاخد ماتبي فلوس..
طوبى يإبتسامه:باهي..خل نمشي نقوللها توتي روحها..
ومشت تجري وهي فرحانه..
وحسين ناض طلع وراها...
حسين؛طوبى طوبى...
وقفت وشبحتله وهي تقول؛نعم..
حسين:الطلعه ليكم الزوز ولأميمه بس..
طوبى:لا لميمو بس هي تحشمت تكلمك..
حسين حرك راسه يمين ويسار وقال:ربي يهديها مش عارف لأمتى بتقعد هكي.
طوبى:طبيعتها..
رفع حاجبه اليسار وقال بضحكه:كان نعرف منين تجيبي فيه هالكلام!؟
طوبى :انت قاعد تشوف فيا صغيرة بس..
ولفت ومشت بسرعه لدار اميمه..
حسين تنهد وقال وهويشوفلها:للاسف مازلتي صغيره...
🌻وخشت طوبى لأميمه وقالتلها توتي روحها..
بعدين هي روحت للحوش وبدلت حوايجها وطلعت بدون ماغرفه تحس بيها اللي كانت هايمه مع التلفزيون...
☘وهما طالعين من الحوش..
عيون العاشق الولهان شافتهم وهو شاد روشن دار ويراقب في حوش حبيبته..
طول ناض خدي مفاتيحه وتليفونه وطلع يجري من الدار...
وين طلع من الحوش..
سيارتهم كيف تحركت..
طول جري..ركب سيارته وشغلها وتحرك وراهم..
☘☘☘☘☘☘
في الطريق..
طوبى:حسين..
حسين بإبتسامه:نعم .
طوبى:ترفعنا للملاهي بعد السوق خاطري فيهم..
ابتسمت اميمه..
وحسين ضحك وقال:حاضر من عيوني..
طوبى بإبتسامه فرح؛شكرا..
ضحك وقال:العفو...بعدين قال..اكيد حتى اميمه خاطرها فيهم..
ضحكت اميمه وقالت:ايه..معاش مشيت من لما كنت في عمر طوبى لما رفعنا عمو لطفي كلنا..
سكت حسين وهو مضايق..
وطوبى قعدت تشوف لأميمه بإبتسامه اسف...
ووراهم عمر يتبع فيهم بالسيارة وين مايمشوا..
وصلوا للسوق...
نزلوا طوبى واميمه ونزل معاهم حسين وقعد يمشي وراهم لكن بعيد عنهم بش يخليهم ع راحتهم..
خشوا لمحل ملابس مناسبات..
قعدوا يدهوروا فيه ماعجبهم شي طلعوا..
ومشوا لغيره..
وحسين وراهم وعمر يتبع فيهم من بعيد..
وقعدوا يدوروا ويدوروا..لين لقوا محل فيه حاجه عجبتهم..
طوبى؛ليك من غادي مفصل تفصيل عليك..
كانت اميمه تشوف للفستان..
اللي كان طوله لتحت الركبه لونه احمر ربع كم..بس من فوق كان كله مطرز بخزز لونه اشهب..كان حلو هلبه هلبه..
وحيغلبه قالب اميمه الجميل..
طوبى:شن رايك..
اميمه بإبتسامه؛عجبني..
جاهم الشاب اللي يبيع وهو يشوف لاميمه بإعجاب:نزله ياابله
اميمه هزت راسها بإيجاب..
نزله وهو يقول:ليك من عند غادي
عقدت اميمه حواجبها وطوبى شبحتلها..
الشاب مده لاميمه خداته بدون ماتشبحله وشافت الرقم وقالت:مقاسي ..خلاص بناخده..
الشاب بإبتسامه؛هاتيه ترا..
مدتله القفطان خداه وقال:تفضلي ياابله..
ومشت هي وطوبى للكاصه...طلعت اميمه التزدان وقعدت تراجي فيه..
هو جاها مد الكيسه..
وهي طلعت الفلوس عدتهم بعدين عطاته حق القفطان ودست باقي الفلوس والتزدان..
وخدت الكيسه وخدت يد طوبى ومشت طلعت.
والشاب معاها بعيونه وهو مبتسم..
حسين:هاه شن خديتوا..
كيف جت بترد اميمه طوبى قالت:مازال في حاجات تانيه وسع بالك معانا سونه..
ضحك وقال:باهي خودوا راحتكم..
ضحكوا الزوز ومشوا وقعدوا يدوروا في المحلات..
ركبت اميمه ع القفطان صندل حلو بالمرة كان اختيار طوبى حتى هو..
بعدين خشوا لمحلات اللبس عادي..
وقعدت طوبى تفترح ع اميمه في لبس طلعه نازك تاخده..
واميمه كانت منذهله في طوبى هلبه ع صغر سنها تعرف حاجات هي اللي تخطت سن المراهقه ماتعرف عنهم شي!
خدت كذا لبسه متاع طلعه...
وزادت عبايه تانيه وكم وشاح حلوات..وشرت حذاء وسبيدرو..
طوبى:قداش قعد عندك..
اميمه:خمسين حني بس..
طوبى:يسدوا..
اميمه:لشني..
طوبى:غير تعالي..
ومشوا لحسين...
حسين:راكم تقولوا مازال..
اميمه بضحكه:اسأل طوبى..
طوبى بضحكه:مازال بس في مكان تاني..
حسين بضحكه؛وين!؟
طوبى :في السيارة نقول..
ضحك حسين وقال:هيا قدامي..
مشوا هما الزوز وهما محملات بالاكياس..
وعيون عمر تراقب فيهم من بعيد..
كان يشوف في ملامح السعاده والضحكه اللي ع وجه اميمه..
وقلبه فرحان..وهويبتسم معاها وخلاص..
شافهم راكبين السيارة..طول مشي ركب سيارته..
تحركوا لحقهم طول..
~~~~~~
في الطريق..
كانت طوبى تشوف يمين ويسار ودور لين قابلها ماتبي..
طوبى:وقف هني حسين..
حسين؛وين!؟
طوبى:قدام المزين هدا..
اميمه:مزين!؟
طوبى:ايه..شن قلنا بكري..
درس حسين قدامه وقال:سدرة بيانها نهار الميلود ولااني غالط؟!
ضحكت وقالت:لامش غالط بس اميمه بتخش بدير حاجه هع السريع وتطلع..
حسين تحشم يسأل وقال:باهي انزلوا بسرعه وماتعطلوش..
اميمه:حاضر..
نزلوا الزوز..
بعد نزلوا حسين قال:صبيه في ثوب طفله..وضحك..
طوبى:قصة الشعر ماتاخدش هلبه بالذات شعرك انتي مش طويل هلبه ومش كثيف هلبه..
اميمه هزت راسها وقالت؛تمام..
وخشت هي وطوبى للمزين...
وقالوا للمزينه شن يبوا...
المزينه وهي تشوف لشعر اميمه؛ليبيه انتي..
ضحكت اميمه وقالت:ايه...
طوبى بإبتسامه:ابا عن جد..
المزينه؛اختها انتي..
اميمه بإبتسامه؛اختي وبنت عمي..
ابتسمت طوبى وهي تشوف لأميمه..
المزينه؛ماشاء الله ربي يحفظكم..
الزوز قالوا:تسلمي..
وبدت المزينه تقص في شعر اميمه لوين ماتبي هي..
بعد ماكملت...
طوبى:الله طلعت عليك.تجنن القصة..
اميمه وهي تحرك في شعرها وتشوف لروحها بإبتسامه:حتى اني عجبتني...
☘وبرا..
عمر مقعمز في السيارة يشوف للمزين وهو يفكر زعمه شن بتغير في شكلها..كان يتمناها مادير شي..وتقعد زي ماهي..
شويه وشافهم طلعوا..
كانت اميمه طالعه بنفسيه حلوة باينه ع وجهها وهو يشوفلها تبتسم يبتسم معاها وخلاص...
ركبوا السيارة..
وحسين قال؛دهشتينا ياطوبى..
طوبى:كله لعيون ميمو مش خساره فيها..
اميمه بإبتسامه؛تسلمي حبيبتي والله عسل يابيبو..
طوبى بضحكه:انتي العسل..وعموما حسين افندي خلاص معاش نبي الملاهي..
ضحك حسين وقال:عارفتيني بنرفعك بنرفعك ماديرشي الجو هدا..
ضحكت طوبى وهي تعض ع شاربها .
وهو طول تحرك بإتجاه الملاهي..
وعمر وراهم بالسيارة ....
☘☘☘☘☘☘☘
"طرابلس هذي عالم بروحها"
عبد الله:والله صدقت..مختلفه واجد حتى بنغازي مش كيفها..
عبد القيوم:حتى هي العاصمه..
كانوا يدوروا في مدينه العاب عامه..
ويشوفوا فيهم صغار كبار يلعبوا..
صحابه كانت عيونهم في البنات..
بس هو كان مش عاجبه الجو..
الاجواء هادي ماتروقش لعبد القيوم...
عبد القيوم يجب طلعة البر..والصحرا...
عنده اصحاب غير هادم يطلع معاهم غادي..يكونوا نفسهم صحاب واحد من عمامه عوده يمشي غادي من خش 15 سنه..
وعبد القيوم تعود ع الجو هدا وانسجم معاه وماكانتش عنده قابليه لغيره..
☘فهالوقت..
وصل حسين بسيارته لنفس المكان..
ونزل مع اميمه وطوبى..
حسين:تريسوا ع ارواحكم..
اميمه بإرتباك:باهي..
ومشوا مع بعض خشوا داخل..
اميمه عيونها لمعوا برغبه انها تركب كل لعبة شافتها..
وطوبى عيونها جو ع الدراجيح مشتلهم طول..
واميمه مشت وراها وحسين وراهم...
ركبوا الزوز الدراجيح وقعد يدف بيهم حسين هما الزوز..
مرة اخته مرة بنت عمه...
والزوز كانوا يضحكوا من قلوبهم ومستمتعات ع الاخر...
ومن بعيد عيون عمر تراقب في اميمه...
وكل ماله يزيد يغرق فيها اكثر واكثر....
🌻لعبوا قريب في كل الالعاب..
لين وصلوا في لعبه كانت في خاطر اميمه..
لكن طوبى..
طوبى:لانخاف منهم هادم اللي يلودوا..
اميمه برجاء:نبي نركب حسين..
حسين رفع حاجبه اليسار وقال؛حتى اني خاطري فيها..
ضحكوا ..
وقالت اميمه:ايه اركب معاي مش ديما جديات اطلع من جو العسكري شويه استاحشنا حسين ايام زمان..
وطوبى تشوفله وهي مبتسمه..
هو هز راسه وقال بإبتسامه:هيا..
ومشي ومشت معاه اميمه..
وركبوا اللعبه...
ولحظات وبدت تتحرك بيهم....
كانوا مستمتعين هلبه..حسوا رواحهم رجعوا اطفال..
بالذات اميمه اللي عاشت طفوله محرومه من كل شي عاشوه اقرانها..
كانت مرة تضحك مرة تعيط..
وحسين يعيط عليها ويقول:اسكتي..
وطوبى تتفرج عليهم وهي تضحك...
وفي عز انسجامها معاهم سمعت صوت عيل يبكي..
قعدت دور ع الصوت..
لقتها بنت صغيرة في عمر ثلاث سنوات..
وجعتها..ومشتلها طول وقالت؛خيرك حبيبتي تبكي!؟
ومسحت ع شعرها..
البنيه وهي تبكي قعدت تقول:بابا..ماما...
طوبى مررت نظرها قدامها وقالت:شكلها رايحه..
والبنت تعيط وتقول بابا وماما..
طوبى شبحتلها وتنهدت بضيق بعدين خدت من يدها وقالت:تعالي معاي ندوروا بابا وماما..
ومشت طوبى مع البنت وقعدت دور..
بدون ماتعطي علم لحسين واميمه..
وقعدت طوبى تأشر ع الناس وتسأل في البنت وتقول..
"هادم بابا وماما"
والبنت وهي تبكي تقول"لا"
لين وصلوا في مكان وقفوا فيه..
قالت طوبى:نرفعها للي شادين المكان وخلاص...
والبنيه تعيط وتقول "نبي ماما"
وصوتها وصل لواحد..
مقعمز ع كرسي وعاطي بالظهر ليهم كان سرحان وكأنه مش في المكان..
وين سمع صوت بكي الطفله رجع عقله للمكان والتفت شبح لمصدر الصوت..
شاف البنت الصغيرة تبكي..
ووحده متحجبه تبان صغيره واقفه عليها تسكت فيها..
هو قعد يشبح في البنت تعيط وتقولي ..
"نبي بابا..نبي ماما"
عقله طول قاله ان في شي مش طبيعي والباين ان اللي معاها خاطفتها...
ناض من مكانه ومشي ناحيتهم وهو عاقد حواجبه..
طوبى:باهي حبيبتي باهي والله نلقوهم..
"السلام عليكم"..
طوبى ماسمعتش قعدت مركزه مع البنت وهي تقول؛سلامتك ياحبيبتي مش عارفه كيف متحملين عياطك بوك وامك..
"خير شن في خيرها البنت"
التفتت طوبى وقالت بشي من قلة الحيله:رايحه من بوها وامها من بكري ندور معاها ومالقيناهمش..
هي تتكلم ومرة تشوفله ومرة توزع نظرها ع المكان..
وهو واقف يشوفلها وهو متفاجئ ع الآخر..
وكانت باينه ع وجهه علامات المفاجئه..
هي نفسها..نفس البنيه اللي ريتها مرة وحده من شهور وماطلعتش من عقلي..
عيونها قعدوا محفورات حفر في ذاكرتي...
ومرات حتى في الحلم تزورني...
هي نفسها..ايه...بس كبرت شوي..
لبسها تغير...لبست حجاب...وزادت حلاوة...
طوبى:معليشي تسمع فيا شن نقول ولامن عياطها ماتسمع في شي..
هو بدت ع وجهه ابتسامه وحواجبه انعقدوا وطبس ع البنيه وقال:ترا تعالي ياسمحه..
طوبى هني خافت وشكت فيه وقالت؛معليشي انت مني..
شبحلها وقال:انا...انا واحد كيفي كيف هالموجودين هنى..
طوبى قعدت تشبحله بريبه..
ضحك وقال:ماتخافي نبي نساعدك بس بش تلقي باتها وامها..
ورفع البنت فوق وقال:اهاااا...
البنت سكتت وقعدت تمسح في دموعها وهي تشوفله..
طوبى:اها تبي هكي انتي..
شبح عبد القيوم لطوبى وابتسم بعدين قال:هي نعدوا نشوفوا وين هلها..
طوبى هزت راسها وقالت؛باهي..
وقعدوا يمشوا مع بعض وطوبى تقول؛اكيد هما يدوروا عليها..
عبدالقيوم قعد يشوفلها وهومبتسم بعدين قال:شن اسمك؟
طوبى شبحتله وقعدت ساكته..
شبح القدام وقال:تمام حتى انا مش قايل شن اسمي..
طوبى؛ماسألتكش..
قعد يضحك..
وهي تشوفله بتعجب..
هو هدا ضحك وقال:انتي مع من جايه!؟
طوبي: مع بنت عمي وولد عمي..
عبدالقيوم:زمانهم حتى هما يدوروا عليك تو..
طوبى:لا مش صغيره بش يدوروا عليا..
شبحلها بإبتسامه وهو رافع حاجبه اليسار وقال:مرات انتي رحتى وماتقدري ترديلهم..
طوبى:ترديلهم قصدك نويللهم..لاالا نقدر قتلك مش صغيرة اني..
ضحكت ضحكه خفيفه..
شبح للبنيه لقاها ساكته...
قاللها...
كم تهوسيد هولان... اد تاتديودم توفيم تيهوساي
بشين اوكساض ايتبليسد وهاستنتنيد
"انتي سمحة واجد واللي معاك اسمح منك..ردي بالك تزعلي وتقوليها لها...
شبحتله طوبى بآستغراب وكانت تبي تسأله شن قال وبأي لغة تكلم بس ماقدرتش..
وهو كان عارف ان الفضول ضربها تعرف شن قال
شبحلها بطرف عينه.. ابتسم وهو ساكت..
بعدين شبح القدام..
لقي زوز راجل ومراة ماشيين ويدوروا ويسألوا في الناس..
عبدالقيوم:اهم هلها..
شبحت طوبى وين مايشبح قالت:كيف عرفت.
البنيه:بابا..ماما..
عبدالقيوم بضحكه:بحتي فيهم يدوروا وامها يبان عليها باكيه..
والبنيه تنادي بابا ماما..
سمعوها وقعدوا يدوروا لين شافوها..
الام جت تجري والاب لحقها.
وهما قدمولهم...
لين وصلت الام وهي تقول:بنتي..
نزل عبدالقيوم البنيه وعطاها لأمها..
جي الاب وقال:انتم لقتيوها..
عبدالقيوم شبح لطوبى وقال:السمحه هذي لقتها قبلي..
طوبى حست بالخجل لما سمعاته شن قال وردت تقول:دورنا عليكم هلبه بعدين هو ساعدني ودور معاي لين لقيناكم..
ام البنت:بارك الله فيك حبيبتي بارك الله فيكم خوي..
الاب مد يده لعبدالقيوم وقال:بارك الله فيك.
صافحه عبدالقيوم وقال؛فيك بارك الله..هضا واجبنا..
هز الراجل راسه وقال لمرته:هي..تصبحوا ع خير..
عبد القيوم وطوبى:قدامكم كل خير..وانتم من اهله..
ومشوا الزوز ببنتهم..
بعدين طوبى قالت:خل نمشي حتى اني اكيد يدوروا عليا..
ولفت ومشت بسرعه...
وهو معاها بعيونه اللي فيهم لمعه حلوة وبإبتسامه قال:
كم يحفظ مسينغ
"ربي يحفظك"
"عبدو"
التفت وشاف صحابه متجمعين وعبد الله قال:هيا..
هز راسه وهو مبتسم ومشالهم..
☘اما طوبى وهي ماشيه بتولي وين ماخلت اميمه وحسين..
سمعت صوت اميمه تنادي فيها:طوبى..
تبعت الصوت وهي دور فيه لين شافتها..
لقتها مع حسين وباين انهم كانوا يدوروا فيها بقلق.
وصلوا فيها..
وكيف جت بتحكي..
تحس بشي تقيل خبط خدها بقوة حست خدها ولعت فيه النار..
سمعت صوت شهقه اميمه..
بعدين سمعت صوت حسين يقول بغضب:وين مشيتي وين كيف تخلينا وتمشي!!؟
هي شدت خدها بيدها وقعدت تشبحله بحده وعيونها معبيات دموع..
حسين بغضب:نكلم فيك ردي...
اميمه جت لطوبى خدتها من يدها التانيه وقالت:خلاص حسين خل نطلعوا للسيارة..
حسين:مش قبل ماتقول وين كانت..
فنصت فيه اميمه وقالت:حسين خلاص..
حسين وهو مازال معصب:بروا قدامي.
خدت اميمه طوبى ومشوا هما الزوز..
وطوبى مازال حاطه يدها ع خدها وماتبيش تحوله بكل وقعدت شادة دموعها بقوة عجيبه..
واميمه تشبحلها بقلق.
وحسين ماشي وراهم وهو معصب..
من خوفه الشديد...لما نزلوا من اللعبه ومالقوهاش قريب انجن وقعد يدور عليها مع اخته زي المهبول.
ولما لقوها..ماقدرش يعبر عن خوفه عليها الا بهالطريقه..
من بعيد عمر شاف الموقف وقال..
عمر:حي عليه من السيدة الشعشبونه..
ومشي ركب سيارة ولحقهم..
~~~~~~~~
وطول الطريق..
وحسين يهزب في طوبى..
ومايبيش يسكت بكل..
واميمه تشبحله بضيق وحزن..
تشوف في خوها كيف قاعد يتصرف غلط وبدال مايقرب طوبى منه قاعد يبعد فيها..
هي من غير شي ولت متباعده عليه لان طباعه تغيرت وولت تخاف منه..
يابال بعد موقف اليوم واللي داره..
وطوبى طول الطريق ساكته ولاكلمه..
وهدا اللي زاد جننه..ع قد ماسألها مابتش تجاوبه..
لين وصل بيها قدام حوشهم وقال بعصبيه:انزلي..
طول فتحت الباب ونزلت..
واميمه تشبحلها بحزن..وهو طول قدم بالسيارة لحوشهم..
وقفت طوبى قدام الباب وقعدت دق عليه بقوة..
لين فتحتلها غرفه..
دفتها وخشت تجري..
سكرت غرفه الباب ولحقتها وهي تقول:طوبى..طوبى خيرك!
فاتت تجري طوبى من قدام الكوجينه..
شافتها سدرة طلعت منها وهي تقول:طوبى!
خشت طوبى للدار وسكرت عليها الباب..
ع جية غرفه قالت:خشت تبكي راهو..
قدمت سدرة لباب الدار فتحاته وخشت..
كانت طوبى مقعمزة ع سريرها تبكي..
وين خشت عليها مسحت دموعها ومشت لدولابها وهي تحول في وشاحها..
سدرة:شفتك تبكي..خيرك..
طوبى بصوت متأثر بالبكاء:شي..
غرفه ركزت ع خدها وقالت:في حد ضاربك!؟
فنصت سدرة وهي تشوف لوجه اختها بان عليها خدها..
معلم عليه كيف لين دارلها خدوش ع وجهها..
سدرة بصدمه:من ضربك!!؟
طوبى قعدت تبكي وهي طلع في حوايجها..
سدرة:طوبى نكلم فيك!!
طوبى وهي تبكي:علاش مختار خلانا علاش...كان معانا راهو ماقدر حد يوصل فيا..
سدرة معاش تحملت وقالت بانفعال شديد:قولي من ضربك..
وطوبى تبكي بدون ماتتكلم خايفه من المشاكل..
خايفه بوها يعرف وياخد موقف من عيلة خوه...
غرفه:هي كانت طالعه مع مني!؟
سدرة التفتت شبحت لغرفه..بعدين ولت شبحت لطوبى وقالت:حسين...
زادت طوبى في البكي..
غرفه وهي مش قادرة تتحكم في ملامح وجهها اللي بانت فيهم الفرحه:حسين!..
سدرة بنظرات غضب مليانات دموع:يحسابك سايبه وماوراك حد!..تو نوريه طوبى من وراها..
ولفت ومشت بتطلع من الدار..
جتها طوبى تجري شدتها وقالت:كله مني اني رحت منهم في الملاهي..
جبدت سدرة يدها وقالت: يجيني يقولي اني نحاسبك مش هو اني..من هو بش يمد عليك كيف يتجرأ ويديرها...
لكن هدا يحسابك روحه وصل خلاص كان ولى عسكري في جيش خميس القذافي معاش يقدر حد يرده..
ومشت وهي كتله غضب مشتعله بإتجاه حوش عمها...
غرفه:كان صارت حاجة بين العيلتين بسببك انتي ياهم..
ومشت من حداها وهي معصبه..
وخلتها تبكي وقلبها موجوع ع الآخر....
☘☘☘☘☘☘☘☘
وفي مكان تاني..
تحديدا قدام البحر...
كانوا عبد القيوم وصحابه مقعمزين قدامه ويهدرزوا وهما يشربوا في القهوة..
وهو كان بروحه...يشبح للبحر وهو سرحان...
سرحان في لون البحر...برغم ان الدنيا ظلمت..
بس لون البحر هو هو في عيونه...لون عيونها الغريب..
قعد يتفكر في الموقف اللي صار..
يتفكر في كلامها وحركاتها..
تارة يشوفها طفله بعمرها الحقيقي..
وتارة تبان شابه في العشرين...
ابتسم وبدي يغني بصوت منخفض...
نك ليغ الزمن...ايلان ايويتيان
نماغي ترهى
هيغ اكالين...اي ميديوان...
عبد الله؛علي صوتك ياعبادي عارفني نحبها الاغنيه هذي وبصوتك...
عبد القيوم ضحك وهز راسه وبدي يغني..
نك ليغ الزمن...ايلان ايويتيان
نك ليغ الزمن...ايلان ايويتيان
نماغي ترهى
هيغ اكالين...اي ميديوان...
" انا منذ زمن بعيد..ومنذ سنين
ابحث عن الحب..
في بلادي..يااصحابي"
الولاد انسجموا وهما يسمعوا فيه...
وهو كمل يغني..
اوليهن ايملن..."قلبي ابيض"
آيسان ترهى..."يعرف الحب"
اوليهن ايملن...
آيسان ترهى...
يسان سيمغار.."يعرف التعظيم.."
ناوا يرهى..."للشي الذي يريده.."
جير تميديوين..."بين الحبيبات.."
هاكد يتمى..."حتى الاخوه..."
وقعد يغني ومعاه عبد الله والشباب يصفقوا..
نك ليغ الزمن...ايلان ايويتيان
نك ليغ الزمن...ايلان ايويتيان
نماغي ترهى
هيغ اكالين...اي ميديوان...
#عشرين_ابريل
#طوبى
...يتبع...
