#طوبى "جنة طوبى"
#جمان_فريد
#الجزء_الرابع_والسبعين"تحول3"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
¤رب اشرح لي صدري○ويسر لي أمري○واحلل عقدة من لساني¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 لم تكن خيبة فقط ..
إنما كانت صفعة جعلتني أحذر للأبد 🍃
________________________________________
في اخر الممر جنب باب الحوش الاكياس اللي جابتهم كانوا محطوطات...
ومن قدام الحوش لدار المعيشه...
كانت مقعمزة ومعاها مطيره بس..
مطيره:شن جابك؟
مغليه؛نبي ندوي مع كنايني برواحنا..
مطيره برفعة حاجب؛كناينك؟
مغليه؛قاعدات في ذمة ولادي معناها قاعدات كنايني..
مطيره:وهما مايبوش يقعدوا كناينك قالوهالك الزوز لما انلزيتي من العزي ولما وصلتكم ورقة الدعوة..
مغليه؛ناديهم يامطيره وماعليكش في الباقي بيني اني وياهم يلزوني يتفاهموا معاي حاجه تخصني اني وكنايني..
مطيره كانت تتمالك في نفسها بقوة ماتبيش دير تصرف يولي عليهم بالذات وان مغليه جايتهم في حوشهم..
ناضت وهي تشوفلها بإمتعاض بعدين مشت طلعت من الدار...
🍃خشت للصاله اللي كانوا فيهم كلهم..
مطيره؛طوبى واريج قالت تبيكم ياكناينها..
فردوس:شن تبي هادي!..
ناضت طوبى بعدين قالت:وين المشكله خل نمشولها ونعطوها اللي تبيه..نوضي اريج..
هزت اريج راسها وناضت..
مشت طوبى طلعت من الصاله واريج وراها..
وهما بعيونهم...
وصلت طوبى في الدار قالت؛خشي اريج..
خشت اريج للدار وطوبى خشت وراها وهي تجبد في الباب لين سكراته وعيونها ع مغليه وهي تشوفلها بكره..
ومغليه تشوفلهم الزوز بإبتسامه..
مشت اريج قعمزت ع الجنب وطوبى قعمزت في صدر الدار مقابله مغليه..
قعدت مغليه تشوفلها وهي تبادلها في النظرات بعدين قالت..
/شن حالك وحال العيل..
طوبى:الحمد لله في خيار خيرنا..
هزت راسها بعدين شافت لأريج وقالت؛وانتي ياأريج شن حالك؟
اريج بدون مانشوفلها قالت بصوت يدوب طالع..
/الحمد لله..
هي تنهدت وقالت ونظرها موزع عليهم؛بعد اللي صار كله تنازلت وجيتكم لأني رايده الخير ومانبيش الشر..والطلاق يابنياتي شر عليكم انتم اكثر من ولادي انتم اللي بتخسروا مش هما..هما رجاله مايعورهم شي غدوة ياخدوا اللي اصغر واحلى منكم ومافي حد يردهم لكن انتم اللي بتاكلوها بتقعدي انتي مطلقه وفي رقبتك عيل من مازال بيدورك ولايعدل عليك..ولاانتي وحده اطلقت قبل لتتزوج غير الدوة اللي بتطلع عليك كان جاك حد بعدين ياارمل يامطلق يامتزوج وتقعدي مربيه لصغار غيرك في احسن حال في اللي توا ياخدها بش يعيش بيها ايام وبعدين يطلقها وتقعد مطلقه مرة ومرتين ومستقبلها يدمر..والرجاله اللي هما ولادي يعيشوا حياتهم وماواصله فيهم حاجه عندكم باهي هكي!
اريج شافت لطوبى وهي مبتسمه بسخريه..
وطوبى بنظرات تعجب ساخره كانت تشوف لمغليه بعد كملت كلامها قالت:كملتي كلامك؟
مغليه حطت ايديها ع بعض وهي تحاول تحافظ ع هدوئها..
/هاتي ماعندك..
طوبى برفعة حاجب:امم يعني معترفه باللي داره ولدك..
مغليه:معترفه بشني وشن دار ولدي؟
طوبى:انتي عارفه ع شن نحكي كويس وجيتك هني بعد اللي صار ع قولتك تثبت كلامي لو كنتي عارفه ان الحق معاكم ماجيتيش هني بكل..
اريج قعدت تشبح لمغليه وهي مبتسمه بتهكم..
مغليه حاولت تبان عاديه وواثقه من نفسها في ردها ع طوبى..
/جيت هني بعد لزتك ليا يامحترمه لأني مانبيش الخراب ليكم انتم قبل ولادي جيت نبي نكسر الشر ونبيكم تتعوذوا من الشيطان وتولوا ع اللي ديروا فيه لأني نبي مصلحتكم اكثر من مصلحة ولادي..كلام تاني غير هدا مافيش ومانيش عارفه انتي ع شن ترمي بالزبط..
طوبى:هو اني مش حنتوقع منك غير انك تنكري حديري كل شي بش تحافظي ع شكلكم وسمعتكم قدام الناس والاهم من هدا كله تكونوا انتم ع حق طول الخط..
مغليه؛تكلمي بصراحه ومعاش تلمحي..
طوبى:اني صريحه وواضحه..انتم ضحكتوا عليا وغيشتوني وغشيتوا ماليا في حاجه اني مشيتها وسكتت عنها وكنت معاكم بنت أصل لكن طلعت غالطه هلبه كان من وقتها قربعتها ع روسكم راهو ماوصلش بيا الحال لهني..
مغليه وهي تسمع فيها شن تقول قعدت تشوفلها بإبتسامه متهكمه ومضيقه عيونها بطريقه مستفزة..
وطوبى تجاهلت استفزازها وكملت تقول:اللي عرفت ولده دايره بعدين عندي عليه شهود طبعا الشهود هادم اني حنخليهم يشهدوا قدامك وقدام الحاج محمد ع فضايح ولدك ووقتها مافيش داعي نحكيلك شن بيصير..
بلعت مغليه ريقها لما تخيلت اللي بيصير وقالت..
/برغم اني مستعده نحلف ان ولدي مايديرش العيب لكن بنسايرك ونمشي معاك في كلامك..من الراجل اللي مايغلطش كلهم يغلطوا لكن المراة الفالحه هي اللي تعرف كيف تتعامل مع راجلها وتخليه معاش يعاود الغلط متاعه مرة تانيه..المراة الفالحه تقدر تخلي راجلها مايشوفش لغيرها ويحلف براسها مايحنث مش تمشي وتخليهاله تحساب روحها بتربح حاجه واالله مافي خاسر غيرها وهو بدال الوحده يمشي يجيب اربعه..
طوبى:هديكا اللي ماتقدرش تعيش من غير راجل اللي رابطه حياتها في راجل مش مهم كويس عافن المهم تحت ظل راجل المراة اللي من غير كرامه..اما حني بنات الواعر وتعرفينا كويس عزة نفسنا وكرامتنا فوق كل شي..
قالت كلامها الاخير وهي تحرك في سبابتها للأعلى..
مغليه بإستهزاء؛بالله اسكتي سلم بنتي الدلال والعز اللي ريتيه مع الجالي ماراته مراة...
طوبى بتهكم:اني نحكي ع الكرامه دلال ولدك وعزه ع قولتك مايشيرهالي..كان في نساوين يرضوا ع رواحهم اللي تبيني انتي نرضاه ع نفسي بري خوديله منهم..
مغليه:العناد ياطوبى وتكبير الراس مش حتحصلي من وراه شي يابنتي صدقيني مافي حيتبهدل غيرك في النهايه..
طوبى:راضيه بيها البهدله اللي تخلصني منكم ارحم مليون مرة اني نقعد ع ذمة واحد زي ولدك وكنة لعيلة زيكم اللي حتى بنت خوك ماسلمتش منكم..
مغليه هني وصلت عندها حدها ناضت وهي تقول..
/غير ردي بالك تنسيه هاليوم..وشافت لأريج وهي تقول..ولدي يستاهل اللي تسوا مية من امثالك وغدوة تتفكري كلامي وانتي تقرض في صوابعك ندم..
اريج؛قرضتهم لما رضيت نكون منكم..
هزت مغليه راسها وهي تقول..
/باهي باهي.حني وياكم والزمان طويل..
ومشت بتطلع وطوبى ناضت ومشت وراها وهي تقول..
/كان ماخليتوش ولدكم يطلق بسرعه اني اللي نخليكم تقرضوا صوابعكم ندم..
وقفت طوبى قدام الصاله واللي فيها كلهم طلعوا وقعدوا يشوفوا في مغليه وهي طالعه تبكبك من الغضب..
سمعوا باب الحوش الخارجي تسكر بقوة..
مطيره قالت؛شن جايه تبي هالعنقروفه..
اريج؛واضح خايفه هدا علاش جت ع اساس تبي تهدي النفوس..
طوبى:كلامها كلام وحده تبي تهدي النفوس! اني في حياتي ماريت ناس جبارة زي هالناس فوق غلطهم عينهم قويه بيطلعوا اللي قدامهم غالط بالسيف وهما ياناري عليهم..
سالمين؛ماهيش ساهله الوليه هذي..
مطيره؛حية من تحت تبن من يوم يومها...
فردوس:عطيها مايهدها...
آلاء وهي تشوف للحاجات اللي جابتهم قالت..
/قعد اللي جاباته..
طوبى وهي تشوفله قالت..تو نصدقوه..
🍃وفي حوش شنيبه...
كانت خديجه جايه لحوش ماليها مستاحشة امها وتبي تشوفها وع اعتبار هالليالي من رمضان ليالي قدر ماقدرتش تشد رجلها عن حوش اهلها فيهم..
وين جت مالقت حد في الحوش..حطت في بالها ان امها طالعه دور ع الجيران بالعطايا متاعها ع العيد..
قعمزت في الصاله ع التلفزيون وقعدت تراجي فيها...
🍃ونضال كان في الحوش وهي ماتعرفش..
كان في هاللحظه ناوي يطلع..وهو نازال من الدروج جو عيونه ع الباب لما سمعه ينفتح..
شاف امه خاشه وهي تبكي..
خاف..نزل يجري وهو يقول..خيرك يام؟
خشت مغليه للصاله لاقتها خديجه وهي مفجوعه قالت..
/يام تبكي!؟
مغليه بإنفعال:حولي من قدامي حولي خليتي اللي يسوا واللي مايسواش يطق فيا..
وقعمزت ع الكرسي وغطت عيونها بيدها وهي تبكي..
نضال:يام وين كنتي!؟
مغليه تبكي بدون ماترد..
هو عقد حواجبه بغضب وقال؛كنتي عندهم ولا؟!
خديجه بإنفعال:علاش ماشيه علاش!؟
مغليه حولت يدها وقعدت تقول وهي تبكي ومنفعله..
/ع خاطر خوتك اللي كل واحد فيهم حاله مشتت نبي نرقع عمايلكم السود الغبر..خليتوني ملطشه خليتوني ملطشه للفرخات.. الشنعب طوبى ماخلت ماقالتلي فتحت فمها عليا معاش سكراته ولا التانيه اللي قعدت تتسهوك عليا واخرتي يلزوني هالحقيرات اللي مالقوش من يربيهم ويعلمهم كيف يحترموا مراة في عمري...اللي صار معاي اليوم عمري ماصارلي في حياتي اني مغليه الجالي عقاب عمري نقعد ملطشه للفرخات..
نضال يسمع فيها ونار الغضب مستعره في داخله.
وخديجه اللي وجعتها حالة امها زادت حقدت ع طوبى اكثر من قبل..
ضمت امها وقعدت تبوس في راسها وتهدي فيها وهي تقول.
/والله ماهي فايته هكي يام والله لما ندمهم ع اللي داروه معاك بالله..
🍃اما نضال اللي كان الغضب عامي عيونه..
مشي طلع من حداهم للجنان..
طلع تليفونه من جيب سرواله وحط ع رقم اريج وقعد يتصل بيها..
🍃واريج في دار البنات طلع في حوايج بش تخش الحمام..
لما جاها اتصاله..سيبت اللي في يدها ومشت خدت تليفونها من فوق السرير لقت رقم غريب يتصل بيها...
قعدت تشوفله لين فصل..بعدين عاود مرة تانيه..
بعد تردد فتحت الخط وحطاته ع وذنها..
ويجيها صوته الغاضب بس هالمرة كان يخوف بمعنى الكلمه وهو يقول..
"ماشاء الله عليك يامحترمه يامتربيه..هكي تربيتي تعاملي الكبار مراة اكبر من امك طولي لسانك عليها يامحترمه!
لكن تعرفي كيف باهي اللي صار هكي كويس اللي صار هكي بش ربي طلع الحق وخلاني نعرف اني غلطت غلطه عمري لما حطيت في ذمتي وحده ماعندهاش كبير مافيش راجل كان فوق راسها رباها وعلمها كيف تكون مراة تعرفي اني توا نبيه الطلاق اكثر منك مايشرفنيش وحده زيك تكون ع ذمتي"
وسكر عليها الخط..
وهي حست روحها وكأنها طاحت في حفرة غريقه مظلمه مالهاش نهايه..
سمعت صوت كسر قوي...كان قلبها المتصدع توا ولا مكسور لأجزاء مجزئه..
ضببت الرؤيه قدام عيونها من الدموع اللي غرقوهم..
نزلت التليفون وقعمزت بهدة ع السرير ومازال كلامه يتردد ع مسامعها...
قعدت لحظات وهي ع هالحاله مش مستوعبه اللي صار وقعدت تتخايل في روحها تحلم وحتفيق من الحلم في اي لحظه..
بس للأسف هي واعيه واللي صار كله كان واقعي وحقيقي بعيد عن عالم الاحلام والكوابيس..
ناضت وحطت التليفون ع السرير ومشت خدت حوايجها وطلعت من الدارللحمام وهي شاده بكاها بكل قوة..
لعند ماخشت للحمام وسكرت عليها الباب وانهدت بالبكي بس بصوت مكتوم..
🍃وهو لما نهي المكالمه خش بوه للحوش..
محمد شنيبه:باهي اللي لقيتك تعرف حوش مروة اخت نجاة ولا؟
هز راسه وهو يقول؛ايه..
محمد شنيبه:برا روح بيهم خلاص هداكا هو..
بدون ادنى معارضه قال؛حاضر..
ومشي طلع من حدا بوه..
ومحمد شنيبه خش للحوش داخل..
سمع صوت بكي مغليه جاي من الصاله..
صابه القلق وخش عليهم الصاله طول وهو يقول..
"خيركم شن في!؟"
🍃🍃🍃🍃🍃🍃
"بالك بتقولك ولدي صفته ونعته!"
طوبى:وكل شويه تقول انتم الخاسرات مش حتلقوا حد يشبح فيكم..
سالمين بإزدراء؛عقليه متخلفه..اللي يحقها قبل كيف تحكي وكيف تتصرف مايقولش هي نفسها اللي كانت هنا من بدري..
فردوس؛هو هدا ياخالتي سالمين اللي يعرفهم يشوف فيهم حاجه كبيره ويخافوا ربي ولما يعاشرهم يطلع البلي كله..
سالمين؛غريبه والله كيف في ناس يقدروا يمثلوا كيفهم ومايبانوش ع حقيقتهم سنين طويله..يعني انتم جيران عمر معقوله مالاحظتوش عليهم شي قبل!؟
مطيره؛كلنا في الشارع نعرفوا طبع مغليه المتعجرف لكن في نفس الوقت كنا نعرفوا انها طيبه وفزاعه..
فردوس؛كذب عليك ياخالتي سالمين هما تلقيهم عيلة وحده في بعضهم مايعرفوش بعض صح الا بعد العشرة وقتنا هدا ياخالتي سالمين وقت المظاهر الخداعه..
سالمين هزت راسها وهي تقول؛صدقتي يابنتي وقت المظاهر الخداعه..
طوبى؛هدا علاش الواحد القدام معاش يتعامل مع حد بحسن نيه لازم ديما يفترض سوء النيه ويكون فاطن كويس ومعاش يعطي الأمان لحد..
سالمين؛لابنتي كان خليت خربت مش كل ناس كيف بعضها..
طوبى؛الحاجه هادي معاش تنعرف الا بالعشرة ياخالتي وقت العشرة تبان الناس..
مطيره؛صدقتي يابنية خوي..
وسالمين تشوف لطوبى بحزن ..
🍃🍃🍃🍃🍃
"علاش ماشيه اها قولي!؟ اساساع مني رديتي الشيرة قبل لتمشي"
مغليه بضيق ودموعها في عيونها..
/من قهرتي ع ولادي ياحاج عاجبك حالهم عاجبك..ريت نضال شن صار فيه الايام اللي فاتوا؟
محمد شنيبه بعصبيه:شن صار فيه ماصايرله شي هي باعاته هو يبيعيها وتمت علاش تنزلي في روحك وتمشيلهم وتخلي الفرخات ياخدوا فيك حصه..
سكتت مغليه وهي تبكي بصمت..
خديجه بغضب:قليلات الادب والربايه..
محمد شنيبه؛مش يبوا الطلاق خل ياخدوه وكان مازال في حد شبح في هالنماذج الخاربه..
خديجه؛عيلة هبوطيه ستيرسو متاعهم في ايد نساوينهم ..
محمد:من الاول واضح حكم النساوين في العيله هادي غير حني كنا ع نيتنا..الله يرحم عيشه بنت جويده ع قد ماصار بينكم وبينها لاعمرهل قللت من قيمة حد ولاطلعت اللي يصير معاها للناس..فرق بين السمي والوطى حتى هي رباية شيوخ..
خديجه ومغليه مع بعض قالوا؛الله يرحمها..
بعدين مغليه قالت؛شن مالا المهدي مش مروح بكل؟
هو قال:لاقبل العيد بيومين بيكون هني..
هزت مغليه راسها وهي ساكته..
وهو قال؛خلاص نوضي توضي وصلي ركعتين واقري قرآن..
هي قالت؛حاضر..
هو مشي طلع وكان يردد في الحوقله..
وهما قعدوا معاه بعيونهم لين طلع بعدين مغليه قالت..
/المصيبه طوبى قالت في شهود ع خوك بتخليهم يشهدوا قدام بوك..
خديجه؛كذابه ماعندها شي تخوف فيك وخلاص..
مغليه بقلق:زعمه! حي ياخديجه كان يطلع عندها حق بوك بعدين العبيتر يتبرا منه بكل ع اللي داره من وراه..
خديجه؛صدقيني ماعندها شي يام كان عندها راهو قداش ليها جايبتهم بش تفتك..
تنهدت مغليه بقلق وهي تقول..
/الله يسامحك ياولدي ع اللي درته فينا..وحتى انتي الله يسامحك ياخديجه علاش خلتيني غافله هكي..
خديجه؛خفت عليك يام لو تعرفي حاجه زي هادي ماتتحمليش..عارفاتك يام تجاملي في نجاة مجامله ع خاطر بوي لكن ماترضيش بيها مراة لواحد من ولادك ..
مغليه؛ولايمكن نقبل اني حتى لما وافقت بوك يش يخطبها للمهدي كنت عارفاته بيقول لا...
خديجه؛المهم يام توا قعادها معانا هني في صالحنا بش كانت تكلمت عليها بنت الواعر نقولوا للناس كيف نسكنوها حدانا كانها ماتنفعش..
مغليه؛خل نسبقوا ونقولوا جايه بتتزوج لكن الحاج شد فيها تقعد ع صغارها وتجي تسكن هني ..سكتت شويه بعدين قالت..لكن لماينشدوا ع اللي خلاها تلزنا يومها!؟
خديجه:نفسيتها التعبانه خل تقلب علينا حني وراجلها هالحاله كانت تجيها من قبل هدا علاش حني سايرناها ومابيناش نكثروا معاها دوة..
مغليه قعدت ساكته وهي تفكر..
خديجه:المثل ييقول تغدا بعدوك قبل ليتعشى بيك يام..وبعدين هي ناويه تفضح اللي هناك ولا خلاص العين بالعين والسن بالسن والبادي اظلم..
هزت مغليه راسها بإقتناع وهي تقول..
/والبادي أظلم...
🍃🍃🍃🍃🍃🍃
تاني يوم..
الساعه 1:30ظهرا..
روح نضال من الجامعه..وخش طول للحوش وهو ينادي ع امه...
ردت عليه وجاه صوتها من الكوجينه..
خشلها وهويقول:عطيك الصحه يام..
مغليه بإبتسامه؛سلمك وليدي..
جي جنبها وحاوط كتافها بذراعه وهو يقول:
/ماتكثريش اليوم يام..الرشده ساده الحاجات تانيه موصي عليهم ..
مغليه؛وعلاش تبزعق في فلوسك عندنا كل شي..
نضال؛لااليوم نبي نبزعق وتي روحك قبل المغرب بساعه طالعين للبحر اني وانتي وخديجه وصغارها ونسرين حتى هي..
مغليه؛بحر؟
نضال؛ايه يام من الفطور للسحور ع البحر تغييرة جو ياسرك من حبسة الحوش..
مغليه؛مانقولش لا لكن نجاة وصغويرتها لازم يمشوا معانا..
سكت شويه بعدين قال؛خلاص خبريها حتى هي ع خاطر الصغار المهم قبل المغرب بساعه..
مغليه بإبتسامه؛حاضر وليدي حاضر..
باس راس امه ومشي طلع من حداها وهي تدعيله...
"ربي يجبر بخاطرك"
🍃وقبل المغرب بساعه.
في سيارة العيله الكبيره ركبوا مغليه وبناتها ونجاه ومعاهم راما ومحمد خوها...
وتحرك بيهم نضال طول للبحر...
نسرين كانت مغصوبه ع المشيه..مشالها نضال لحوشها وحطها في الامر الواقع قدام ربيع مالقتش قدامها غير انها تمشي وخلاص...
وطول الطريق كانوا عيونها ع نجاة وخديجه اللي مابطلوش هدرزة مع بعض وكانت متعجبه لحالهم هلبه ومش مستوعبه كيف ولوا الزوز متقاربات هكي في فترة قصيره..
🍃وصلوا للبحر..
وخدوا عشه وفرشوا وحطوا فطروهم واذن عليهم المغرب وفطروا وسط اجواء حلوة..
كلها وثقتها نجاة بالصور وقعدت تنزل ستوريات وبوستات...
واول من شافهم فايزة اللي قاعده ضايفه نسرين وخديجه..
فردوس؛شوفي الحقارة لوين توصل شوفي!
آلاء:انتي شوفي من في التاق شكله هو اللي رافعهم..
فايزة؛نضال..عايش حياته ومش مدور حد..
طوبى وهي تخيط ازرار فستان صيفي تلبس فيه فالحوش قالت..
/تمثيل كله مع بعضه تمثيل يبوا يورونا ويوروا الناس هانا عيله وحده وماعندنا شي خايفين منه وفي نفس الوقت السيد نضال قاعد يبرد ع روحه لااكثر..
غرفه؛واضحه..امس جت هني علاش كان مش هو بعد ماوصلاته ورقة الدعوة قريب خش في عقله وطلع..
فردوس؛ان شاء الله يقعد يقطع ويريش تفي عليهم كلهم فورما وحده ك.لاب..
آلاء بقرف:خسارة ماتعاطفت معاه التافه هدا..
ابتسمت طوبى تهكما وهي تخيط..
ع خشة سالمين ومعاها صفيه بسفرة فيها صونيه مثروده وسفرة فيها شيشة لبن وطواسي..
سالمين؛وهذي المثروده ياغرفه اقربي..
شويه رن تليفون غرفه فتحت الخط وردت..
/ايوه رؤوف تخش تلقاهم قدامك طول......باهي سلام..
وسكرت..بعدين خدت كاشيك وبدت تاكل وهما حواليها ياكلوا ماعدا طوبى..
سالمين؛اقربي ياطوبى..
طوبى؛لالا والله مانقدر عندي القداد..
سالمين؛خايفتها تقعد في خاطرك..
طوبى:لالامش في خاطري خالتي..
سالمين؛ع راحتك..
وقعدوا ياكلوا..وطوبى رجعت انشغلت بالخياطه ومن داخلها مضايقه..حست وكأنها المثروده مظهر للفرح واي شي يدل ع الفرح في الوقت هدا يزيد وجعها ع بوها...
🍃🍃🍃🍃🍃🍃
ع البحر..
نسرين حدا امها ونضال ومحمد وراما اللي مقعمزين ع الشط ويهدرزوا..
وعيونها ع نجاة وخديجه اللي كانوا واقفات ع الشط بعيد عنهم بشويه..
نجاة؛زي ماقلتي جو تخويف مش اكثر..بس نبي نسألك ع حاجه..
خديجه؛اسألي..
نجاة؛طوبى زمان كانت عندها علاقه حب بحد..
خديجه؛ع مانعرف لا..
نجاة؛باهي تعرفي حد كان يبيها قبل..
خديجه وهي تفكر؛والله كل اللي نعرفه زمان هلبه ولد عمها حسين كان حاط عينه عليها وبعدين فاتها..
نجاه؛متأكده؟
خديجه قعدت تشوفلها بإستغراب؛شن قصدك!؟
نجاه؛شن بنقولك..قبل بكل خشيت ع ايميلها ع الفيس قعدت ندور فيه طبعا شفت الناس اللي يتفاعلولها لقيته هو اكثر من يتفاعل لفترة طويله مافيش منشور تنزله مايديرش عليه لايك ويعلق..لعند ماتزوجت خوك بعدين خلاص..
خديجه وهي تفكر:تبي تقولي ان كان في بينهم شي؟
نجاة؛واحتمال ماكانش يعني مستمر
خديجه؛وضحي قصدك اكثر..
تنهدت نجاة وقالت:ولد عمها مهتم بيها هلبه هو اللي يرفع فيها ويجيب ولاحظت ان معاملته ليها خاصه..
خديجه وهي تفكر:حتى مرة طرفت لودني انه دفع مصاريف قعادها في العياده قريب تلاته ليالي..
نجاه؛غريب ولا!؟ يعني هي عندها من يدفعلها هالمصاريف علاش هو يحط هالمبلغ ع مراة براجلها؟!
خديجه قعدت مركزه بنظرها ع البحر وهي تفكر..
نجاة:اصلا ولامرة حسيت انها حبت الجالي..
شبحتلها خديجه وقالت؛نستبعد ع طوبى دير حاجه زي هادي اني وانتي عارفين كويس شن اللي خلاها تطلب الطلاق..لكن..حاجه زي هادي تنحط ع تركينه مرات نحتاجوها بعدين..العين العين والسن بالسن والبادي اظلم..
نجاه ابتسمت بمكر وهي تمرر في نظرها ع صغارها اللي يلعبوا حداهم..
🍃🍃🍃🍃🍃
وبعد السحور...روح بيهم ...
وين خشوا لشارع القهوة..
شافوت حسين واقف مع عبد الرؤوف واسكندر قدام حوش لطفي الواعر..
نجاة وخديجه قعدوا يشبحوا لحسين من تحت لتحت..
اما نضال فكانت لاسكندر نصيب من نظراته الحاده المليانه غيره...
نزل محمد ولد خديجه كمل بروحه لحوش جده الصيد بعدين
خش بالسيارة للقراج..
نزلوا منها...وطلعوا من القراج وهو اخرهم..
وهما ماشين في طريقهم..
وقفت خديجه لما قالت؛هدا شنو؟
امها ونجاه وراما شافوا وين ماتشبح..
لقوا بوكسات كبار محطوطات حدا الباب..
نضال قدم يشوفهم..
بلع ريقه ومد يده لأصغر بوكس فيهم..
رفع غطاه...شاف الكندره الكعب اللي مابتش تلبسها ليلة البيان..
حس وكأنه في يد اخترقت صدره وجبدت قلبه من مكانه..
عطاها..وفتح بوكس كبير..لقي فيه الفستان الكبير اللي هما جابوه في البيان..وتفكر لما قعدت ترقص بيه معاه...
دموعه عبوا عيونه..غطاه...بعدين مشي فتح غيرهم..
لقاها لامه فيه هداه كله لبس اكسسورات ذهب..غطاه وفتح واحد تاني لقي فيه الاحذيه اللي واخدهولها واغلبها رياضيه النوع اللي تحبه..
بس شاف حاجه غريبه وسطهم..ظرف..
مد يده وخداه كان ثقيل..فتحه لقي فيه فلوس مبلغ وقدره..
ومعاه ورقه..طلعها وفتحها وقعد يقرا فيها..
(فلوسك كاملات صرفت منهم شويه ورديتهولك من عندي معاش عندي ليك شي خلاص)
حدف الظرف ع الأرض..
بعدين التفت وشبح لنجاة بنظرة حقد واضحه..
هي خافت منها..
بعدين غير عيونه عنها ومشي خش للحوش بسرعه..
مغليه بألم؛لاحول ولاقوة الا بالله نكد عليهم اي والله..
ومشت حتى هي وخشت للحوش..
خديجه بضيق قالت لنجاه؛روحوا لشقتكم..
نجاه:تمام..وشدت ولدها اللي رافعاته في حضنها كويس وقالت..هيا حمزة جوري..
ومشوا الزوز وراها..
راما:هادم الحاجات ردتهم اريج ولا؟
خديجه؛ايه..تعالي نخشوا نشوفوا حناك بعدين نروحوا..
ومشوا الزوز خشوا للحوش...
🍀🍀🍀🍀🍀
وتعدي اواخر ايام الشهر المبارك..
ويجي اخر يوم..
مع المسويات قبل المغرب بساعه..
كانت طوبى فوق السطح مع عمتها مطيره يدوروا في بساط مناسب يفرشوا بيه المربوعه في مكان بساطها الاول اللي قعد مفرش شهر كامل والزحمه والحوشه كلها فوقه..
طوبى؛هدا اقرب شي للجلسه..
مطيره؛ايه صح الالوان زي بعضها..
ومشت قدمت للسياج اللي يطل ع حوش عبد المطلب..
شافت حسين يعاند في السياره قالتله..
/ربي يرزقك بخير منها ..
حسين؛شن ديري فوق!؟
مطيره؛تعالى نبيك..
هز راسه وقال؛شويه وجاي..
🍃ولحظات وحسين كان فوق السطوح..
شاف طوبى اللي كانت واقفه بروحها وقتها وعمتها لداخل قاللها؛شن ركبك فوق انتي؟
طوبى:ركبت نشوف مع عمتي في بساط باهي يتفرش في المربوعه بتزحم طول بعد صلاة العيد..
حسين؛صح..تمنيت لو جدي روح قبل العيد..
طوبى ودموعها في عيونها؛بالعكس هكي خير..اني كان نلقى وين نمشي والله مانقعد..
حسين؛خلاص شدي حيلك وخليك قويه زي مانعرفك..
هزت راسها بصمت والحزن في وجهها وهو يشوفلها بضيق..
🍃وعدسة كاميرا تليفون نجاة خدتلهم كم صورة مع بعض وهما واقفين فوق السطح..بعد ماطلعت مطيره نزلت التليفون وقالت بسخريه..
/ياروحي ع عصافير العشق الممنوع..
تنهدت تهكما..بعدين حولت من ع الشباك...
🍃وطوبى نزلت من فوق السطوح...
وبعدين نزلوا بعدها حسين وهو رافع البساط ومطيره وراه...
🍃🍃🍃🍃🍃
يامصعب ليلة العيد هالعام عليهم...
والاصعب منه فجر يوم العيد اللي كان للطفي الواعر فيه هلبه ذكريات..
في كل ركن ومكان ذكرى...
في كل ساعه ولحظه ذكرى...
بعد ماصلت الفجر...تخيلاته طوبى وهو فايت من قدام الصاله بعد مالبس العربي..تخيلاته شبحلها بإبتسامه حلوة وقعد واقف يراجي فيها تنوض تعيد عليه..
للحظه كانت حتنوض بس سرعان مااختفي طيفه وخلاها تنهار بالبكي وتبكيهم كلهم معاها...
🍃بعد صلاة العيد..
تعبا مربوعة الحوش وكانوا فيها الجيران كلهم..
والكوجينه وقتها زي خلية النحل كلهم يعولوا فيها ع الضيافه ماعدا غرفه وطوبى اللي خلوهم يرتاحوا...
والحوسه تمت ع الظهر...
بعدها نص منهم طاح رقد...والنص التاني قعد يعول ع الغدي..
🍃وفي حوش شنيبه..
المهدي روح بصغاره ومعاهم العمه كامله..
وهالعام التموا في حوش اخ محمد شنيبه اللي يكبره بعام في طرابلس وعيدوا غادي..في غياب الجالي..
وقعدت مغليه متحاصرة بالتلقيح من حمواتها وسلفاتها اللي ماكانوش طايقين وجودها معاهم..
🍃وهدا اول عيد لنسرين مع عيلة الباني كانت الاجواء حلوة غادي..برغم من اللوم والعتب اللي جي لنسرين في البدايه بس بعدين زي مانقولوا مشت الامور..
وخديجه..
محسسه عيلة زوجها وكأنها اول مرة تحمل..مبالغه في تعبها ووحمها وماصدقت حصلت فرصه فيهم بش يخدموا برواحهم وهي تقعد ماده رجليها ومرتاحه...
اما نجاة فعيدت في حوش اختها مروة مع خواتها والصغار مخليتهم عند جدتهم لطفيه اللي طلبت يباتوا عندها من ليلة العيد...
🍀🍀🍀🍀🍀
ويعدي اليوم الاول...
والتاني ..والثالث...
والرابع....
وتنتهي اجازة العيد...
ويوم 20 يونيو..من سنة 2018
موعد جلسة دعوة الطلاق بين نضال واريج..
كانت اريج في القاعه ومعاها نبيله يستنوا في دورهم..
نبيله كانت تراقب في اريج..كان باين ع وجهها الحزن..
وفي عيونها تعاسة واضحه..وكانت تبان مرتبكه وخايفه...
وهو يخش..كان جاي بروحه..قاعد بنظاراته السود..
شعره الكثيف..لحيته اللي مغطيه نص وجهه..
كان لابس قميص ابيض ع سروال زيتي غامق..
قعمز يستنى وعيونه من ورا النظارات عليها..
نبيله شافاته..بس اريج لا لأنها كانت سرحانه..
استاقظت من سرحانها وقالت..
/عطلوا وهو لتوا..وسكتت لما جو عيونها عليه...
فهديكا اللحظه تحركت مشاعر اريج بشكل رهيب كانت مشتاقتله هلبه..وقلبها ملهوف عليه..كان خاطرها تمشي تعانقه..
كل البرود والتجاهل اللي كانت تحس بيه الفترة اللي فاتت راح في لحظه..
نبيله وهي تشوفلها كيف تشبحله حست ان اريج حتتراجع..
وهو مازال مركز بنظره عليها وكان متمني لو يقدر ياخدها ويهرب بيها لأبعد مكان في الارض..
فجأه..
ينادوا عليها وعليه...
نبيله وهي تشوف لأريج؛شن أريج؟
اريج وهي قاعده تشوفله...
عقلها ذكرها بكلام مفروض تنسى اسمها ولا تنساه..
《 لكن تعرفي كيف باهي اللي صار هكي كويس اللي صار هكي بش ربي طلع الحق وخلاني نعرف اني غلطت غلطه عمري لما حطيت في ذمتي وحده ماعندهاش كبير مافيش راجل كان فوق راسها رباها وعلمها كيف تكون مراة تعرفي اني توا نبيه الطلاق اكثر منك مايشرفنيش وحده زيك تكون ع ذمتي》
تبخرت المشاعر الحلوة كلها وخدت مكانها مشاعر الكره..
ناضت ومشت مع نبيله وهو ناض بعدهم غصب عنه ومشي وراهم...
بعد ماخشوا ع القاضي وقف كل حد منهم في مكانه..
ونبيله مع اريج..
صار في البدايه كلام بين القاضي ونبيله..
بعدين القاضي سأل أريج..
/علاش طالبه الطلاق ياأريج..
اريج:معاش في بينا تفاهم بينا بكل..
القاضي:عطيني سبب مقنع..
اريج:معاملته ليا ماتنفعش ومايحترمش فيا وكذا رماني بتهم في شرفي..
نضال قعد يشوفلها وهو مصدوم..
القاضي وجهله سؤال وقاله..
/صحيح اللي ادعت بيه عليك اريج يانضال..
قعد يشوفلها بألم..
وهي مركزه بنظرها ع القاضي..
تنهد بعدين قال؛صح..
مرر القاضي نظره عليهم بعدين قال..
/يعني مافيش كيف يكون في مجال للصلح نهائيا..
الزوز مع بعض قالوا..
/ايه..
القاضي:معناها يانضال انت تبي طلق..
نضال وهو يشوف للقاضي قالها بالغصب..
/ايه نبي نطلق..
القاضي:خلاص مادام الزوز متفقين ع الطلاق..نضال ارمي عليها اليمين..
اريج حست قلبها بيطلع من مكانه..
وهو حس بروحه هي اللي بتطلع منه قبل لينطقها..
ونبيله تمرر ف نظرها عليهم بينهم بأسف...
هو بلع ريقه وقال...
"انتي طالق"
انهار كل شي فيها من داخل عكس ظاهرها اللي كان يبان متماسك..
مابتش تشوفله نهائي..
وهو يشوفلها...
ونبيله مازال توزع في نظراتها اللي كلها عليهم..
شويه القاضي نادى نضال..
بعد ماجاه طلب منه يوقع...
خدي نضال البير ووقع ويدع ترجف...
بعدين وخر .
نادى بعدين ع اريج اللي كانت تتصنع في القوة واللامبالاة ووقعت عادي جدا..
بعد ماتموا الاجراءات كامله..
طلعوا من المحكمه...
🍃برا..
نضال وهو ماشي لسيارته وقف لما سمع نبيله ناداته.
التفت شافلها وهي قدمتله..
نبيله:معليشي من فضلك اي صور ليها عندك امسحها..
هو شاف لأريج لقاها تشوف للطريق..
حس بروحه مخنوق...البنت الحلوة اللي دمها عسل هادي اللي كانت ليه وملكه يوم من الايام..توا تحرمت عليه ومعاش عندها بيه أي صله.
غير نظره لنبيله وقال:قوليلها طمن بالها ماخليت شي من قبل مانطلعها من ذمتي..
نبيله هزت راسها بعدين مشت لأريج وخدتها معاها لسيارتها..
وهو طول مشي لسيارتها..
شغلها بعدين تحرك طول...
🍃وهو يسوق تعمدت ذاكرته تمرر شريط ذكرياته معاها..
كلها كانت حلوه..كل ذكرى احلى من التانيه..
والاجمل تفاصيل اريج العفويه...ضحكتها غضبها..زعلها رضاها..مقالبها..غيرتها...حركات وجهها ليه في المحاضرة وهو يحاضر كانت تتقصد ضحكه..
هدرزتهم فيديو كيف كانت طبيعيه ع الاخر بدون رتوش...
اريج كانت النص الثاني لنضال وكأنها مخلوقه ليه بش تكمله
بس علاش النصيب هكي دار فيهم ولا كله من افعال البشر؟!
بكي نضال بكي بحسره ع حب عمره اللي ضيعوه من بين ايديه في لحظه..
🍃اما هي ركبت سيارة نبيله وكانت تظاهر بالبرود واللامبالاه...
اريج:عندك مستكه..
نبيله:شوفي في الدرج..
فتحت اريج درج السيارة وطلعت من العلكه..
كلت وحده وقعدت تمضغ فيها بإنفعال..
تحركت نبيله وهي تراجي في ردة فعل اريج..
اريج وهي تمضغ؛الجو نو اليوم والضي يجيبه ربي..المشكله المولد في جو زي هدا مانقدروش نولعوه يطربق طول..
سيارتك مانتمنى نطلع منها...الجو فيها يرقد خل بنرقد احسن
واتكت ع الكرسي..وغمضت عيونها..
"بستاشيو نحبك"
بدت ع وجهها ملامح البكاء وهي مغمضه عيونها وقعدت تبكي..
ونبيله بعد سمعتها تبكي تنهدت بحزن...
🍃خُذني إليكَ إذا أردتَ بقاءَنا
أمّا الفُراقَ فلا أقولُ لِإمنَعَك؟
وأنا الذي لاشيءَ مني أوجَعك
حسبي بإِنّكَ إن أردتَ تكلّمًا
أسكَتُّ صرخاتِ العتابِ لإسمعَك
أُبقيكَ في عيني كأنّكَ واقفٌ
في طرفها حتى أخافُ لأدمَعَك🍃
#تحول
#طوبى
....يتبع...
