(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخمسون"الماجده5"
《معظم أحداث هذه الرواية حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
وتعدي ليلة هاليوم الصعب...
وتبدل خيوط السواد بخيوط البياض..
ويحل الفجر..
وطوبى مقعمزة ع مصلاها وهي سرحانه تراجي امتى يحل وقت صلاة الفجر المشرع للمرأة في البيت..
بعد عشرين دقيقة من الآذان..
حاولت تقضيهم في الذكر..
بس الهواجس اللي في عقلها غلبتها..
خلتها تفكر فيها ومش قادر تركز ع أي شي تاني غيرها..
بين عيونها اللي صار بين نجاة والجالي من كلام وتصرفات..
واكثر مشهد قعد بين عيونها..
غيرة الجالي ع نجاة..
كيف انتبه بإن في حد ضايقها بس هي ماكانش منتبه عليها..
ردة فعله...
وهي كيف حطت ايديها عليه بش تهديه..
معقوله العلاقه بينهم كسلف ومرت خوه ماكانش فيها حدود
نهائي!؟
شغلهم مع بعض...
تعرف حتى حالة النفسيه وطباعه...
العلاقه مش طبيعيه بكل...
🍀هم كم لقطه شافتهم اوقعت في قلبها الشك..
وحدس المراة قوي ويقدر يحس بالحاجات هادي ولو بعلامه وحده...🍀
قطع عليها تفكيرها بهالهواجس..
صوت الآذان..
تنهدت وقالت:أعوذ بالله من الشيطان الرجيم..
بعدين ناضت وقفت..
حطت نظرها محل السجود..
ورفعت ايديها لمستوى كتافها..
وقالت:الله أكبر...
قالتها بحزن...
🍃واختها قالتها بجهد...
تجاهد جهاد بش تصلي تقاوم في مقاومه قويه بش تقدر تصلي..
الحاجه الوحيده اللي قاعده محافظه عليها بعد ماسيبت مرغمة قراية القرآن..والأذكار..
التعب اللي تحس فيه وقت الصلاة لايوصف..
المسحور غالبا اول حاجه يسيبها الصلاة..
بس قلبها اللي كان يحب الصلاة لدرجة التعلق مازال قاعد يقاوم بش يحافظ عليها..
من المجاهده تقعد تبكي..
من الوساوس الكفريه اللي تحاصرها محاصرة اول ماتبدا تكبير...
من خوفها هالمقاومه تنتهي وتلقى روحها مسيبتها..
كملت الصلاة..
مسحت دموعها بقوة..
وفيسع ناضت حولت الملايه والصلايه...
وكأنها تبي تتخلص منهم..
حطتهم في مكانهم..وقعدت دور ع الدار وضم فيها..
جو عيونها ع شيشة مية الرقية اللي خلتها عائشه..
قربت منها وخدتها..
قعدت تشوفلها شويه..بعدين خدتها ومشت طلعت من الدار..
وكأن في حد يقود فيها..
خشت للكوجينه وطلعت منها للجنان..
ومشت صبت مية الرقيه تحت شجرة الفل..
طلعت منها تنهيده راحه..
طلعت من صدرها بس ماكانتش ليها..
لفت ومشت خشت داخل ولوحت الشيشه في جردل القمامه متاع الكوجينه..
بعدين مشت بتطلع قابلتها عمتها..
مطيرة:ها شن حالك توا؟
هزت راسها وقالت؛كويسه..كنتي عند جدي؟
مطيرة بضيق:ايه خليته رقد وجيت..تعب من اللي صار امس حتى للجامع ماقدرش يمشي..
سدرة بحزن:عرفوا هو وبوي اللي صارلي!؟
تنهدت بألم وقالت؛ايه..بوك قريب هبل امس.
وجعها قلبها ع الآخر بعدين قالت:مرت عمي قاعده راقده؟
مطيره؛ايه..واميمه معاها...
حركت راسها يمين ويسار أسفا بعدين مشت للدار..
ومطيرة خشت للكوجينه دير قهوة وهي مضايقه ع الآخر..
☘☘☘☘☘
ومن قهوة الجنه..
لقهوة الزعيم اللي طيب فيها عائشه وهي تراجي في المهدي والولاد امتى يروحوا من الجامع..
سمعت باب الشقه انفتح..
وسمعت معاه هدرزة محمد ويزن...
قربت اصواتهم لين خشوا عليها للكوجينه..
محمد:وهم والله وهم..
يزن :الوهم عندك انت..
امهم شبحتلهم وقالت:جدالات عقيمه ع الكورة..
يدوب ابتسم المهدي ومشي قعمز ع الكرسي..
محمد؛فوتي يام وهيا جيبي القهوة وصبيله حليب.
يزن رفع حاجبه وهو يشوف لخوه..
ومحمد قعمز مقابل بوه وهويشوف لخوه وع وجهه ابتسامة استفزاز..
عائشه:الفايده في الحليب..
محمد بضحكه:مالا شنو هدا علاش غنوا..
يااطفال ياحلوين اشربوا الحليب.
عائشه:كلمه تانيه تطلع من الكوجينه ولاتاخد قهوة ولاحليب..
سكت محمد وهو شاد ضحكته..
يزن تنهد بتهكم وقال:الطول طوله بالحيل والعقل ماعطاه طسيشة..
ومشي طلع من الكوجينه..
وخلا امه تضحك وهي تقول:تستاهل...
محمد:اني نبي نعرف منين يجيب في الامثال؟.
عائشه وهي تصب في القهوة:حناك مغليه..
محمد بضحكه:صح مصنع امثال حناي..
وشبح لبوه..
لقاه سرحان ومش معاهم بكل..
خفت ضحكته وغير عيونه لأمه..
لقاها جابت لبوه القهوة ..
حطتها قدامه وهي تقول:مهدي..مهدي..
استاقظ وشبحلها..
عائشه وعيونها معبيات دموع:القهوة..
نزل عيونه للفنجان وهز راسه بإيجاب..
مشت بتجيب لمحمد فنجانه..
ومحمد بعيونه معاها لين جاته حطت قدامه الفنجان وهو مركز في عيونها اللي عبوهم الدموع..
مشت من قدامه هو شبح لبوه لقاه
يرشف من القهوة وهو يفكر..
خدي فنجانه رشف منه وهو يشبح لبوه بحزن ممزوج بضيق..
🍃نفس شعور طوبى..
وين خش عليها الجالي ولقاها مقعمزة ورا مكتبه وتقرا..
ابتسم وقال:صباح الورد مرة تانيه..
هي شبحتله ابتسمت بتصنع وقالت:صباح الخير..
قدملها..وصل فيها وحط يده ع شعرها وهو يقول:عندك قراية اليوم؟
طوبى:ايه بس متأخر..تو نقول لسدرة توصلني..
الجالي:تمام..تنوضي ديرلي قهوة؟
هزت راسها وقالت؛حاضر..
وناضت من مكانها وجت بتمشي..
هو حط يده ع الطاوله واعترض طريقها..
شبحتله بإستغراب..
الجالي؛مش عاجبني جوك اليوم سامعه حاجه؟
استغربت سؤاله وقالت:لا..
الجالي:مالا خيره وجهك هكي زي الحزينه؟
ابتسمت وقالت:لامش حزينه عاديه...
هو شبحلها شويه بعدين هز راسه بإيجاب ووخر..
وهي مشت من قدامه..
تبعها بعيونه لين طلعت بعدين قال:ماتبيش تحكي عندها الحق..شن بتحكي عن العار اللي صار!..
حرك راسه يمين ويسار ومشي بيطلع حوايجه المكويات من الدولاب..
☘☘☘☘☘
"شن حالك توا بنتي؟"
سدرة:الحمد لله وبيي حالي باهي..
لطفي بقلق:شن حسيتي امس؟
سدرة بضيق؛نفسيتي تعبت من العار اللي صار امس..
الناس كلها شهدت كيف راجل من عيلة الواعر يضرب مرته في الشارع ويخنب فيها هي وبنتهم..عار مابعده عار يابوي..
لطفي سكت وهو منكسف ومضايق ع الآخر..
سدرة:ماعرفوش الولاد؟
لطفي:مابلغت حد..شن بنقوللهم..المسكين حسين طلبوه في الخدمه يمشي لسرت وبيقعد فيها ثلاته ايام..
ويوسف مانقدر نخبره بشي..كان خبرت شن بنقول!؟ خزي وكشفة قدام الناس..
سدرة بألم وضيق:حسبنا الله ونعم الوكيل..
ع جية مطيره وهي تقول:لطفي بتفطر حدا بوي ولاهني؟
لطفي:ديرله فطور معاي تو نفطر غصب عنه..
مطيرة هزت راسها وهي مضايقه ومشت من حداهم..
سدرة شبحت لبوها وقالت؛وينه توا؟
شبحلها شويه بعدين قال: مشي لحوش ليه هو كان مأجره لناس لزهم عقاب الليل وخشله..
سدرة:لاحول ولاقوة الابالله..
لطفي؛يخبر فيه جاره قال صارت مشكله ودوشه وجاب من طلعوهم غصب عنهم..يعني العار اللي دار هني كمل عقابه غادي..
سدرة بإزدراء:شن هالمخلوق!..
بوه تنهد وقال:الله غالب هدا هو من يوم يومه وربايه جداي ليه زادت فسداته .
سدرة:شن بنقول عليها جداكم هادي في دار الحق توا..بس اني نبي نعرف كيف انخنبوا فلوسه؟
لطفي:الحوش مافيشي اثر فركسه ولاتكسير بيبان..وكأن اللي خداهم من اهل الحوش نفسهم..
شبحت لبوها شويه وقالت:ع شني تلمح بوي؟
لطفي:مانلمح لشي بس نبي تفسير للحاجه هادي!؟
خشت مطيرة بالسفرة وهي تقول:اهو الفطور..
ناض وخداه وهو يقول:يستر الله وخلاص...
ومشي بالسفرة وطلع من حداهم..
مطيرة قعمزت وهي تسأل في سدرة:شن قالك؟...
☘☘☘☘☘
وفي حوش تاني في شارع القهوة..
كانوا يحكوا ع نفس الحادثه..اللي ولت حديث الساعه..
الصيد:الحاج علي ماجاش لصلاة الفجر اليوم..
نجمه:مابعده مسكين اللي قعد عايش بعد العار اللي صار امس..
الصيد:اني لوكان عندي ولد زي عبد المطلب راني قداش ليا متبري منه..
☘بعيد عليهم من الصاله للكوجينه..
كانوا بناتهم يفطروا ويحكوا في نفس القصه..
نجاح:باهي ياذكيه بعد ماتخنبهم شن بدير بيهم؟
عواطف:ماسمعتيش عبد المطلب شن قال امس..قال اميمه عاونتها مرات خنبتهم ع خاطرها..
نجاح:وعلاش يعني؟
عواطف:عايشه في عيلة شنيبه يابنتي العز والفلوس تبي تجاريهم..
نجاح:خترفه كلامك مايخشش الراس..
عواطف:والله انتي اللي موليه هبله ودرويشه..
وقعدت تاكل..
عكرشت نجاح وجهها وهي تشوفلها بعدين ولت تاكل حتى هي..
وبعد صمت دام لدقيقه قالت وحده فيهم..
نجاح؛عواطف..
عواطف وهي تاكل:امم..
نجاح بقلق:الفترة الاخيره ماتحلميش في احلام غريبه..
طلقت عواطف الخبزه ووخرت ع كرسيها وقال بقلق:ايه ياوخيتي من لما بديت نطبق في هداكا البرنامج..مرة نحلم بكلاب تجري وراي..
نجاح:نفس الشي..
عواطف:ومرات قطاطيس..
نجاح:حتى اني..
عواطف:ومرات نحلم بروحي بنطيح من فوق كل ليله نوض مفزوعه..الحق الحق يانجاح سيبته هالبرنامج نحس في تأثيره بالعكس والله نفسيتي تعبت من لما بديت فيه..
نجاح قعدت ساكته وهي تفكر بقلق..
عواطف:مش ناقصين بلي حني..
وولت تاكل مرة تانيه..
وخلت اختها تفكر في كلامها..
فجأة حست بألم جديد في نفس المكان..
حطت يدها عليه وهي تتوجع بدون وسط...
لحظات وراح الألم وولت تاكل مرة تانيه..
🍃وفي الحوش اللي في جنبهم..
خشت كنة عيلة شنيبه بسفرة القهوة للكوجينه وهي تقول:صباح الخير..
التفتت نسرين اللي كانت دير في الفطور لقتها في قمة الأناقه ويبان جوها عادي..استغربت وهي تقول:صباح النور
حطت طوبى السفرة وقالت:خلي ندير للجالي سندويتش ع السريع..
نسرين:طوبى..
طوبى وهي تقص في الخبزة:نعم؟
نسرين:كأنك مش عارفه شي عن اللي صار امس؟!
حطت اللي في يدها وشبحت لنسرين بملامح وجه قلقه بدون ماتتكلم..
نسرين:عمك مطلب شن دار لمرته!
طوبى بخوف:شن دار؟
☘وفوق..
في جناحها هي وراجلها اللي كان يتكلم بالتليفون..
الجالي:باهي الحمد لله..
"اخطم شوفه بعدين"
الجالي وهو يشوف للمرايه ويساوي في شعره:تونشوف..
"ماتنساش الاجازة"
الجالي:Ok..ماتبي شي..
"شوفتك بس"
ضحك وقال:سلام ياشفشة..
ضحكت وقالت.
"نحبك"
الجالي:واني..سلام...
وسكر عليها..
وحط التليفون ع الزيانه..
بعدين خدي من ع الكرسي جاكيته ولبسه..وقعد يمسح عليه..
بعدها خدي الدبله والخاتم لبسهم..
وخدي العطر بيحط منه ركز ع الشيشه لقاها قريب تفضى ضحك وقال:كملتاه عليا الشفشه التانيه..وقعد يبخ في العطر..
بعدين رده لمكانه..
ومشي خدي شنطته وطلع من الدار...
☘وين نزل من فوق..
شاف طوبى طالعه بسرعه من الكوجينه ووراها نسرين..
نسرين:طوبى ياطوبى..
وطوبى ماتسمع في شي بعد اللي حكاته نسرين..
اكثر جمله قعدت تتكرر ع مسامعها..
《سدرة فجأة قعدت تعيط ع طول رقبتها انصدمت فيها مافهمتش شن صارها》
فتحت باب الحوش والجالي ينادي فيها:طوبى..
ولاعبراته..
لما قربت توصل للباب الخارجي..
سرع خطواته ولحق عليها شدها..
طوبى وهي مصدومه وخايفه:حول بنشوف اختي حول..
الجالي:باهي نمشي اني وياك..
طوبى وهي ترعش:هيا هيا..!
الجالي شبح لنسرين وقال:جيبي مانلبسوا في رجلينا..
شبحت طوبى لرجليها لقتهم حافيات..
نسرين بضيق:وينهم..
الجالي: حدا المدخل..
خشت نسرين بسرعه..
طوبى شبحت للجالي وقالت:كنت تعرف!؟
الجالي:والله اليوم الفجر..
طوبى غمضت عيونها ومسحت بإيديها ع وجهها..
هو خداها لقبه..وباس ع راسها وقعد يطبطب ع ظهرها..
ع طلعة نسرين وهي تقول:اهما!؟
وخرت طوبى والجالي شاف لنسرين وقال:ايه..
جتهم بيهم ..
الجالي خداهم..
حط قدام طوبى كندرتها..
وهو لبس كندرته..
لبست طوبى وطول فتحت الباب وطلعت..
الجالي:طوبى استني..
وطلع وراها..
بسرعه قصت الطريق وهي تجري..
وعبد القيوم في سيارته شغلها بش بيطلع..
شافها وهي تجري..
لحق عليها الجالي وحط يده ع ظهرها ومشي بيها لحوش بوها..
عبد القيوم ماقدرش يحول عيونه عنهم وهما يمشوا لين وصلوا للباب..
طوبى كانت عاطيه بظهرها ووجود الجالي جنبها مدرق وجهها تماما..
🍃قعدت دق طوبى ع الباب بقوة..
الجالي:طوبى اهدي..
طوبى مابتش ترد عليه رجعت دق بقوة من جديد.
لين انفتح الباب..
وكانت مطيره اللي فتحاته.
طوبى خشت طول وهي تقول:سدرة وين..وينها سدرة..
الجالي خش وراها وسكر الباب وهو مركز مع حالتها..
ومطيره وراها وهي تقول؛مافيها شي سدرة ياطوبى..
طوبى:كيف مافيها شي قالوا امس كانت تعيط..
ع طلعة سدرة وهي مستغربه:شن في..
لاقت طوبى جايتها بسرعه وضمتها بقوة وهي تقول؛ياعمري..
سدرة قعدت تشبح لعمتها بضيق..
بعدين حطت ايديها ع ظهر طوبى وهي تقول:طوبى..
بعدت طوبى وهي شادتها قالت بقلق شديد:شن صارلك امس!.
سدرة؛ماصارلي شي يابنت خيرك..كان نعرف اللي وصلك الدوة شن قالك بس..
وخدتها وهي تقول..تعالي معاي تعالي..
ومشوا خشوا داخل..
مطيرة تنهدت بألم..بعدين تفكرت الجالي..
لفت ومشتله وقالت:خش ولدي خش..
الجالي:لا والله مافيها كيف وراي خدمه..
مطيرة؛اشرب قهوة باهي..
الجالي:شارب خالتي صحيتي..مانوصيكمش ع طوبى..
مطيره:بنتنا هادي..
الجالي ابتسم وقال؛وتوا ولت بنتي..
ابتسمت مطيره من كثر ماعجبتها كلمته وقالت:ربي يحفظك ولدي..
الجالي؛ويحفظك خالتي..هي السلام عليكم..
مطيرة:وعليكم السلام..
ومشت وراه سقداته...
وبعد طلع ولت بسرعه خشت داخل...
هو لما طلع مرر نظره ع الشارع..
ثبتوا عيونه ع التارقي اللي كان قاعد واقف بسيارته..
رفع الجالي يده وحياه وهو مبتسم ابتسامه صفرا..
ردها عبد القيوم وملامح وجهه متجهمه..
بعدين حرك السيارة..ولف بيها ومشي..
الجالي بإزدراء:غير من حاسب روحه عقاب تارقي متخلف..
ومشي طول للحوش...
☘☘☘☘☘☘
"هدا اللي صار"
طوبى بوجع:ياروحي ع مرت عمي واميمه..
سدرة:العار لاحقنا كلنا ياطوبى..
طوبى:اني نفكر في حوش شنيبه خديجه وعمتي من غير شي مش طايقين اميمه ويعاملوا فيها معامله خيي..
مطيره:تي غير نسمع بيهم قالولها شي ولادارولها شي نهارهم اللي يدوروا فيه..
ع جية اميمه وهي تقول:صباح الخير..
ناضت طوبى وجتها حضنتها..
واميمه ضمتها وقالت:شن يقولوا غادي..
بعدت طوبى وقالت؛اني ماسمعتش كان توا..امس ولد طاهر مرض رفعناه اني والجالي عيناه روحنا في الليل..
..ماذكرتش سيرة نجاة قصدا مش طايقه تنطق اسمها...
اميمه هزت راسها وهي ساكته..
وكل وحده فيهم قعمزت في مكان.
طوبى:وينها خالتي صفيه..
اميمه:ماتبيش تنوض..وكأنها تبي تقعد راقده بش تهرب..
مطيره:زي جدك..
اميمه بقلق:تعبان جدي؟
مطيرة؛نفسيته صفر..
ناضت اميمه وقالت:خل نمشيله..
ومشت طلعت من حداهم..
وعيونهم معاها بعدين قالت طوبى بألم:لاحول ولاقوة الابالله..
☘اميمه وهي ماشيه لجدها..
وين طلعت من الباب الفاصل..
رن تليفونها..
طلعاته من جيب الماليه لقت عمر يتصل..
عيونها غرقوا بالدموع وقالت؛اكيد سمع..
فتحت الخط وردت عليه...
اميمه:صباح الخير عمر..
"صباح الورد ياحب عمر"..
عرفت انه مايندري على شي لذلك استغلت الفرصه وقررت تحكيله اللي صار قبل ليحكيله حد تاني ويزيد دوة من عنده..
وهي تتكلم..
كان جدها يسمع فيها وهو واقف في الجنان جنب الحيط..
قعد يشوفلها كيف تحكيله..
تحكيله وهي خايفه..
خايفه مايصدقهاش..
ولو كانت خايفه منه..معناها مش حاسه بالأمان معاه...
☘☘☘☘
في الطريق..
كان الجالي يكلم في نجاة مكالمه هاتفيه..
"مافطرتش"
الجالي:لافطرت ع نكد كامل الدسم..
ضحكت وقالت
"لعبتك وحده منكده واضح عليها"
الجالي:باهي جايك توا نبي ناخدك نفطروا برا شن رايك..
"ماتبيش سؤال حبيبي..علي ماوصلت نكون واتيه..باي"
ضحك وسكر...
وزاد السرعه...
🍃اميمه وهي تبكي:نفسيتي تعبانه هلبه..
"خلاص حبيبي خلاص..اني الليله مروح"
اميمه بفرح؛مروح؟
"ايه ياعمري مروح سادك بكي ومعاش تفكري في شي ولايهمك شي"
رشفت اميمه وقالت؛ربي مايحرمني منك..
"ولامنك ياقلبي..هي سلام.."
اميمه:سلام..وسكرت..
بعدين خدت نفس..ومسحت دموعها..
ولفت بتمشي تخش لحوش..
تفاجئت لما لقت جدها واقف يشوفلها..
قدملها وهو يمشي بعكوزه لين وصل فيها وقالت:وكان اللي صار بيخليه يغير معاملته ناخدك منه والله معاد يكسبك ولايستاهل يكسبك.
اميمه:بالعكس جدي وجعه اللي صار اكثر مني..
علي:اني قلت وكان ياأميمه..رفع سبابته في وجهها وقال..ونقولك مش مسامحك يااميمه لو تصير معاك حاجه فيها ذل ومهانه ليك وتقعدي عندهم..
شدت يده ونزلتها وهي تقول:معاش تخمم فيا جدي من ناحية عمر صدقتي اللي في بالك عنه مش صح..خمم فيا من اللي دار فينا بوي ياجدي...
علي؛خلاص بوك هدا حكم ع روحه يخلي مصيره زي مصير ولد خوه..مني مش حيورث قرش واحد..ولانبيه يحضرلي جنازة ولايوقفلي ع قبر...
اميمه شافت الدموع في عيونه شد يده بإيديها الزوز وقالت؛تعالى معاي للكوجينه نديرلك فليه..
هو بلع ريقه وهز راسه..
وكأنه كان يشد في دموع القهرة...
واميمه حست بيه خداته للكوجينه وهي شاده في يده..
☘☘☘☘☘☘
في تركينه مستخطيه..
كان مدرس الجالي سيارته..
يفطر فيها هو ونجاة ويهدرزوا..
نجاة بضحكه:عليك عيله طحت فيها..
الجالي قعد ياكل وهو ساكت..
نجاة:وااك مش راضي فيهم..
الجالي وهو ياكل:هي ماتجيبش في سيرتك ع فكره..
وشبحلها..
نجاة ضحكت بسخريه:هيهيهيهيه.
وهو قلد ضحكتها..
نجاة ؛جالي معاش تستفزني..
هو ضحك وشبح القدام وقعد ياكل..
نجاة:جالي..
الجالي:هممم..
نجاة:نبي العدل..
هو بلع لقمته من غير مايكمل لقمته وشبحلها وقال:شن تبي!؟
نجاة:العدل ياعيوني العدل..انت توا راجل زوز لازم تعدل بينهم في كل شي...خير ماتجي يوم القيامه وانت مشقوق ومايل ماتهونش عليا بيبي..
رفع حواجبه متعجبا وشبح القدام..
نجاة؛طبعا مش حنعجزك ونقولك يوم عندي ويوم عندها..بس في النهار تقعد عندي والليل عندها هي..ولما نجي نبات في حوش ماليك وتكون هي غادي..في النهار معاها وفي الليل عندي..وكان تبيتها كم يوم في حوش ماليها تبدا احسن واحد..
ايه ومش هدا بس.
شبحلها وهو مازال متعجب..
نجاة:اللي تجيبهولها جيبلي منه..وين ماطلعها طلعني..
ونعفيك من مسألة السفر..بش تعرف قداش اني طيبه ونحبك جلجولي..
الجالي:تدوي منك جد انتي!..
تبدلوا ملامح للجديه وفي عيونها نظرات تهديد وهي تقول:وجد الجد ياجالي..ياإما قسما بالله نطلع اللي هناك وعليا وعلى اعدائي..
دام النظر ليها للحظات...بعدين غير عيونه عنها وحط باقي الفطور في الكيسه وحطها تركينه وشغل السيارة.
وهي ولت تاكل براحه..عارفه انها رضخ لتهديدها حتى لو ماردش عليها ومابينش..
ردها للعمارة ...بعدين توجه للشركه...
☘☘☘☘☘
ويوسف..
حط ريما قدام العياده اللي تخدم فيها...
قبل لتنزل قاللها:امتى نجيك..
ريما؛الساعه 2..
يوسف شبح القدام وقال:تمام...
شبحتله بنظرة فيها شي من الحزن بعدين قالت:سلام..
يوسف:سلام..
ومشت طول خشت للعياده..
وهو تحرك بالسيارة...
🍀بعد نص بالزبط...
جت سيارة ..طلعتلها تجري..
ركبت فيها وطلعت بيها طول..
تيام؛هاه الامور كلها تمام..
ريما ودموعها في عيونها:ايه..امتى الرحله..
تيام:بعد ساعه..
ريما:شن صار في الفلوس..
تيام؛هدوكا بعتوا جماعه ليهم هني دبروا موضوع تحويل الفلوس..
ريما:يعني خلاص خدوهم وبيطلقوا بابا..
تيام:ايه خلاص..
ريما بفرح:الحمد لله ياربي..وفجأة تبدلت ملامح وجهها للبكاء..وبدت تبكي..
تيام:ريماخيرنا عاد!؟
ريما وهي تبكي:عمري ماتخيلت روحي ندير حاجه زي هادي..
لما جيت هني تمنيت لو يوسف لزني وقالي معاش نعرفك..
تيام:وبوي يموت هادي!..
ريما ببكي:انت مش فاهم اللي اني حاس بيه..صح معاش نحبه زي قبل ومشاعري تجاهه منتهيه من زمان بس والله ماهان عليا بالذات بعد اللي داره ع خاطري..
تيام:مجبورة انتي مجبورة وبعدين درتي فيه خير وخديتي بثاره من بوه اللي ياما حكالك ع البلي اللي داره فيهم..
ريما:ربي ياخده ويريحهم منه المريض هدا..
تيام:ربي يلعنهم كلهم عيلة معفنه نسيتي شن دار فيك لما سيبك ومافيش حد منهم عبرنا ولادورنا..
هي سكتت وقعدت تفكر في كلامه..
تيام:مافيهم حد يستاهل الشقفه..
ريما اقنعت ريما نفسها بكلامه بش تسكت وجع الضمير..
وطول مسحت دموعها وشغلت الراديو..
علي صوته بأغنيه سوريه..
قعد خوها يغني وهي تغني معاه وكملوا طريقهم وهما في قمة الروقان..
☘وخلوا وراهم مراة مدمرة تماما تبلع في حسرتها وقهرتها وبنتها قاعده عايشه حالة خوف من توابع الزلزال اللي صار..
وعبد المطلب اللي محروق ع فلوسه وقريب ينجن..
☘☘☘☘☘
"حي غبارة سودا حي عليك فضايح"
خديجه برفعة حاجب:اتهم حتى كنتك المصون بالخنبه وقال متعاونه مع امها..
مغليه؛هدا اللي كنت خايفه منه..وشكله طلع حق..
خديجه:شكلها كان تقعد شاده شقتها خير..
مغليه؛وخوك! تقعد بعدين تجبد في فلوسه.!!
خديجه بقلق؛اي صح اللي عندها زي المرض النفسي اكيد عمر مش حيسلم!؟نقولك حاجه وقضيه بطريقه غير مباشرة لو تجيبيهاله طول مش حيرضى فيها ومرات تكون ردة فعله قويه..
مغليه:لالا تريحي من الناحيه هادي اللي درته مع عيشه مش حنعاوده مع هادي..لكن توا نبي نفوتوا اللي صار ع خاطر نضال خوك..نخطبوله بنية فردوس وبعدين يصير خير.
خديجه:وشن رايك فيها انتي؟
مغليه:اريج!..بنيه زي العسل خشت خاطري وحتى بوك عجباته وقال اللي زيها تصلحله..
تنهدت خديجه وقالت؛ان شاء الله تطلع باهيه زي خالتها..
مغليه:إن شاء الله...
☘☘☘☘☘
"ياسستر..سستر"
اريج ابتسمت ووقفت بعدين التفتت وهي تشوفله بجديه:تفضل خوي..
نضال وهو مبتسم ع جنب:اني اللي بوي راقد في الجناح اخر الممر اللي وراي..شكرلي فيك هلبه الحق وقالي وكان تاخدها ياولدي تهنيني عليك..
اريج؛علاش لاباس مريض؟
نضال؛وحالتي خطيره ماينفعنيش كان الزواج حتى امي هكي قالت..وايدت كلام بوي عليك قالت شكلها بنيه ماشاء الله عليها..وانت ماشاء الله عليك طالعين ع بعض من غادي..
رفعت حواجبها وقالت؛السلطانه الأم شكرتني اني!؟
نضال بضحكه:السلطانه الام!؟
اريج؛فوت....وخلينا في الجد امتى بتجوا تخطبوا..
نضال بضحكه؛مستعجله خايفه نريح منك...
اريج:ايه والله عريس لئطه ملك زمانك بسلامتك..اني واقفت عليك بش نكسب فيك اجر..
ضحك وقال:خلاص ان شاء الله بعد يطلع بوي من المستشفى يطبوا عليكم العيله في قايله من هالقوايل..
اريج؛لابالله قولي امتى بيجوا قبلها بوقت..
نضال؛علاش..
بدت ع وجهها ملامح الضيق بس حاولت تخفيها وهي تقول؛بش يكونوا عماتي حاضرات..
☘وفي الحقيقه تبي يكونوا متجهزين قبلها تبي كل شي يكون ع الأصول ويديرولهم مايشرفهم قدامهم☘
نضال بإبتسامه؛باهي عطيني رقمك بش نقولك..
اريج؛عندك الماسنجر..
نضال؛خطي مش مفهوم..
اريج وهي مبتسمه ببلاده مصطنعه؛نفهم فيه اني..
ضحك وقال؛باهي اقبل الطلب اللي ليه عام معلق..
اريج؛قصدك انت باعتلي طلب ماشفتاش من كثر الطلبات..
نضال؛وانتي علاش فاتحه الطلبات اقبلي وسكري جدهم بكل..
اريج وهي رافعه حواجبها بتعجب؛تي غير خل يصير منك بعدين تأمر..
نضال؛وغير صورة البروفايل متاعك مستفزة للشلاتيت.
اريج بضحكه؛هدا علاش نحبها نحب المستفزين اللي زي Bugs Bunny
نضال برفعة حاجب؛ هدا اعتراف مغلف لاني بو المستفزين وانتي ادرى..
اريج بإمتعاض؛ثقة تفرس!
نضال:وغيري اسمك ملفت للإنتباه شن روجه التاجوري هادي.!؟
اريج؛وشن تبي نغير تاني حضرتك عيلتي ولاحوشنا!؟
نضال؛لاهادم بتغيريهم ان شاء الله الصيف الجاي...
اريج؛بعد التخرج بعد التخرج..رفع سبابتها وقالت..شرطي الوحيد..
رفع سبابته تقليدا ليها وقال:معناها بنقرا الفاتحه..رجائي الوحيد..
نزلت يدها وقالت؛بش تحكم وتطلق حضرتك..
نضال؛بش يعرفوا انك لراجل واحد بس..
غيرت عيونها وهي شاده ابتسامة الخجل..
هو بإبتسامه قال؛ديل يافستق..
هزت راسها ولفت ومشت وخلاته..
هو حط ايديه في جيوبه وقعد معاها بعيونه نظراته كلها حب..وع وجهه ابتسامه من نفس النوع..
والقلب يدق بقووة...
بعدين تنهد ولف ومشي لجناح بوه..
☘هي كانت تمشي..
من اللي حساته انها طايره بالمشاعر اللي تحس بيها..
لين وصلت في المصعد..خشتله..
نزلها لوطا ومشت طول لقسم الأسنان..
اول ماخشت..لقاها الدكتور وهو يقول؛ترا تعالي شويه..
اريج مشتله..
فتح باب الحجره متاعه وقال:خشي..
اريج؛اسفه معاش نخدم في الخلع خلاص..
؛علاش اريج هدا كله لإني طلبتك للزواج؟
اريج؛تصحيح..لانك طلبتني للزواج وانت متزوج..
هو انصدم..قعد يشبحلها ومش قادر يتكلم..
اريج:تحسابني هبله يادكتور ولاندور في راجل بش تفكر اني ممكن نوافق عليك وانت بوضعك هدا..
؛مانبيهاش مانحبهاش خديتها غصب عني..
اريج:مادام مش قادر تاخد قرارات بروحك كيف تفكر تتزوج التانيه!؟
قعد يشوفلها بعجز وغضب في نفس الوقت..
اريج؛دكتور اني انخطبت ياريت معاش تكلمني ولاتجي جيهتي لأن خطيبي واحد مايرحمش.
ولفت ومشت خشت لحجرة الدكتورة اللي تخدم عندها وهي تقول؛اغفرلي ياربي عرم الكذب اللي كذبته..
"قلتي حاجه اريج"
شبحتلها وابتسمت بإرتباك وقالت:قلت السلام عليكم ورحمة الله وبركاته..
☘☘☘☘☘
في مدرسة للتعليم الأساسي في المنطقه اللي فيها شارع القهوة..
مقعمزة في فصل شاده حصة احتياط..
والطالبات قدامها اللي شاده كتاب وتقرا ..واللي تكتب في واجب واللي تهدرز بهدوء مع زميلتها..
هي كانت شاده تليفونها وخاشه ع الفيس..
وتشوف نعليقات ع بوست نزلاته في قروب اسمه..
"معجزات سورة البقرة"
حكت فيه عن البرنامج اللي ماشيه عليه واللي قاعد يصير معاها..بالذات الاحلام اللي شاغلتها..
اغلب العضوات معلقات.
ان النفس الشي قاعد يصير معاهم..
بس في تعليق كان من شيخة راقيه قالت..
(الاحلام اللي حلمتيها دل على انو عندك تعطيل في حياتك..استمري ع اللي ماشيه عليه لانه علاج وقاعده تتجاوبي معه ديري بالك تتركي مهما يصير معك بحياتك..ديري بالك)
الكلام خوفها..طول كتبت رد.
(شن هو التعطيل؟)
راجتها هلبه ترد عليها بس ماردتش..
طلعت من الفيس..وقعدت تمرر في نظرها ع الطالبات وهي تفكر بقلق..
☘☘☘☘☘
الساعه 1:30ظهرا..
فتحت صابرين باب الشقه وخشت بعد ماكانت تقضي في مشاوير ليها ولأختها..
سكرت الباب..
ورمت اللي في رجليها وقعدت تمشي وهي دور ع نجاة..
لين لقتها في الدار مقعمزة تصبغ في شعرها..
صابرين جتها وحطت قدامها الكيسه وقالت؛وصلت الصغار ومشت تلاقيت اني والبنيه..قالتلي عطوه طريحه قريب قتلوه وخلوه محسوب ع الرجاله حسبة الكاكاويه ع المكسرات...
ضحكت نجاه..
صابرين؛وقالتلي بيفوتوا هالايام وبعدين بيخلوه يمشي للمحكمه يطلق ويحط المؤخر وعين تضحك وعين تبكي..
نجاة:صحه ليك..
صابرين بإبتسامه؛وجبتلك اللي تبيه..
نجاه وهي تغلف في شعرها بالكيسه قالت؛ترا طلعيها وريهالي..
صابرين طلعت علبة المجوهرات من الكيسه..
وفتحت وطلعت منها السلسال وشداته وهي توري في اختها التعليقه قالت؛شني!؟
نجاة بإبتسامه؛صحه ليهم جابوها احلى من اني نبيها..
صابرين؛لكن غاليه نار.
نجاه؛سلم رويجلي وجيبه..
ضحكت وقالت؛بتمشي بيها اليوم..
نجاة:لا اليوم وغدوة مش ماشيه بنمشي الخميس ع طلعة عمي وانتي معاها..
صابرين بضحكه؛تؤبريني..خاطري نسحن هديكا سحن قبل وقوع الكارثه..
نجاة وهي مبتسمه ع جنب وتشوف للسلسال؛هدا علاش بنرفعك اني..
وخداته منها وقعدت تشوفله عن قرب وبتمعن...
☘☘☘☘☘
الساعه2:00بعد الظهر...
درس سيارتخ قدام العياده..
اتصل بمرته ردت البداله..
"الرقم المطلوب مقفل"
يوسف:ايااح..علاش مش شاحناته؟
نزل من السيارة..
ومشي خش للعياده..
سأل عنها في القسم اللي تخدم فيه..
:لا استاذ دكتورة ريما ماجتش اليوم.
هو قعد يشبحلها بعدم استيعاب..
كيف ماجتش وهو بروحه حطها قدام العياده الصبح..!
الممرضه حست انه مكذبها نادت زميلها وقالت؛شفتي دكتورة ريما اليوم؟
؛دكتورة ريما ماجتش اليوم..
هو قال؛تمام تمام...ومشي من حداهم وهما يشبحوله بعدم فهم...
وهو بسرعه طلع من العياده..
لما ركب السيارة قال؛بالك صارت حاجه خلتها تروح..!
وتحرك طول باتجاه حوشه..
والقلق ياكل فيه..
وبعد ماقطع مسافه لاباس بيها وصل للحوش..
خشله..
درس سيارته..
ونزل منها يجري وخش داخل الحوش..
يوسف؛ريما..ريما...
وقعد يمشي ويدور وينادي ومافيش من يرد عليه..
خش دار النوم..قام تليفونه وعاود اتصل بيها وهو يوزع في نظره ع الدار..
لعند ماتبتوا ع ورقه مطبقه ومحطوطه ع الزيانه..
والبداله تقول..
"الرقم المطلوب مقفل"
للحظه حس انه بيموت..
نزل يده ..وغير عيونه عن الورقه وشبح للجهة متاعها من الدولاب..
وقف قدامها..
حط يده ع الباب وجبدها للخلف..
لقاه فاضي الا من حاجات بسيطه..
لمت حوايجها في وقت متاخر من الليل..
وطلعت الشنطه لخوها اللي جاها في هداكا الوقت..
ولأنها عارفه ان يوسف مش حينفتح دولابها خلال المده المتبقيه ليها معاه دارت هكي...
وهو يشوف للدولاب كيف فاضي..
قعد يتفكر في تصرفاته وتعاملها معاه..
وكأنها كانت تجامل فيه مجامله طول هالشهور..
ولما يتكلم عن موضوع الصغار تغيره...
كان في داخله احساس يقول ان في شي مش مريح فيها..
بس هو تجاهل هالاحساس حبا فيها..
التفت وشاف للورقه ودموعها طاحوا من عيونه..
مشي للزيانه وهو حاس بثقل رهيب في رجليه..
وصل فيها..وقعمز ع كرسيها بهده..
بعدين مد اللي كانت ترجف للورقه..
خداها وفتحها..
وبدي يقرا فيها بعيون اللي تنهر منهم دموع الصدمه..
(يوسف..
مش حنطلب منك تسامحني..بس نبيك تعذرني درت اللي درته مجبرة ع خاطر بابا اللي تورط مع جماعة مافيابدين كبير..خطفوه وعذبوه..
خلونا نديروا المستحيل بش نلموا المبلغ اللي عطونا مهلة 7شهور بش يتسدد..اني وخوتي كل حد فينا جاب جزء من المبلغ بطريقه او بأخرى..واني هادي كانت طريقتي يايوسف..
مش حنعتذر..بس بنقولك حاجه وحده..
تمنيت لو كنت سكرت بابك في وجهي لما جيتك لكن للاسف كان مكتوب عليا نعيش بعذاب الضمير طول عمري..
ياريتك سكرت بابك في وجهي يايوسف ياريت)
نزلت قطرات دموعه ع كلمة..ياريت...
وقال بصوت مخنوق وهو غارق في حالة الصدمه...
"ياريت"
🍀🍀🍀🍀🍀🍀🍀🍀🍀🍀🍀🍀🍀🍀🍀🍀🍀
بعد مرور يوم....
الخميس...
الساعه 12:00قبل الظهر..
خشت نجاة بسيارتها لشارع القهوة..
ومعاها صابرين والصغار..
نجاة؛الجو حلو اليوم..
صابرين وهي حاطه معاذ في حجرها؛ايه.....
وصلت لحوش شيابينها..
ودرست قدامه..
وتفوت جنبهم سيارة عاليه فارهه.
شبحولها الزوز..
ونزلوا من السيارة وهما يشبحولها..
الصغار مشوا يجروا للحوش وامهم لحقتهم وهي تقول:راجو شويه.
وصابرين وهي رافعه معاذ في حضنها قعدوا عيونها ع السيارة اللي درست قدام حوش عبد الرؤوف..
انفتح باب السواق..
ونزل منها صاحبها.
صابرين لما شافاته..انبهرت بيه..
بلبسه بشخصيته..
بوسامته..
هو مرر نظره الحياش اللي جنب حوش عبد الرؤوف..
لين جو عيونه عليها..
قعد يشوفلها كيف تشبحله..
وهي ماحاولتش عيونها عنه..
اختها بعد مادخلت صغارها للحوش ولت طلعت تشوف اختها علاش قعدت برا..
لقتها واقفه تشبح لحاجه..
شبحت وين ماتشبح شافاته..رفعت حواجبها..بعدين ابتسمت وشافت لأختها..
اللي رسمت ع وجهها ابتسامه وهي تشوفله..
وهو ابتسم ابتسامه جانبيه..
بعدين غير عيونه عنها ومش وقف ع باب حوش عبد الرؤوف..
وهي مشت بولداختها بش تخش ع وجهها مازالت قاعده الابتسامه..
وصلت في نجاة اللي قالتلها؛زعمه من يطلع..
ضحكت صابرين وخشت داخل ونجاه لحقتها وهي تضحك وسكرت الباب..
#الماجده
#طوبى
....يتبع.....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
