#طوبى "جنة طوبى"
#جمان_فريد
#الجزء_التاسع_والستين"عابي على ربي"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#سورة_الفاتحه
عَنْ أَبِي سَعِيدِ بْنِ المُعَلَّى رَضِيَ اللَّهُ عَنْهُ، قَالَ: قَالَ لِيَ النَّبِيُّ صَلَّى اللهُ عَلَيْهِ وَسَلَّمَ: أَلاَ أُعَلِّمُكَ أَعْظَمَ سُورَةٍ فِي القُرْآنِ قَبْلَ أَنْ أَخْرُجَ مِنَ المَسْجِدِ. فَذَهَبَ النَّبِيُّ صَلَّى اللهُ عَلَيْهِ وَسَلَّمَ لِيَخْرُجَ مِنَ المَسْجِدِ فَذَكَّرْتُهُ، فَقَالَ: ( الحَمْدُ لِلَّهِ رَبِّ العَالَمِينَ). هِيَ السَّبْعُ المَثَانِي، وَالقُرْآنُ العَظِيمُ الَّذِي أُوتِيتُهُ ) رَوَاه البُخَارِي
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 أهذهِ ضحكةٌ على وجهك أم نورٌ على قَلبي؟🍃
___________________________________________
"وينها هي!؟"
"مقعمزة حدا الرايه من بكري وهي تبكي"
اسماء مشت طول وين ماقالتلها صاحبتها..
وصل في المكان اللي مقعمزة فيه راما..
لقتها غامه وجهها وتبكي..
قعمزت جنبها وهي تسأل بإستغراب:راما خيرك تبكي ع صبح ربي!؟
حولت راما ايديها وقالت وهي تبكي..
/مروة اشبح شن صارلها يااسما..
اسماء بفضول:خيرها!؟
راما وهي تبكي..
/مانعرفش..قبل ليجيني الباص بشويه..سمعنا عياط بابا طلع يجري بش يعرف من وين جاي..وماما اتصلت بخالتي بش تسألها وقالتلها مروة بنت فايزة ينوضوا فيها الصبح مابتش تنوض..
اسماء وهي مندهشه؛قصدك ماتت؟!
راما وهي تبكي..
/لالا ان شاء الله لا ياربي لا..قتلك ياأسما اني مانبيش نضرها علاش ديري هكي!؟
شدت اسماء راما من ذراعها بقوة وهي تقول..
/وطي صوتك بتفضحي بينا..بعدين انتي مادخلكش الفرخه هادي وصلت فيا واني وريتها حجمها بس..طلقت راما وهي تقول..كانت ماتت هدا حد عمرها اني وانتي مادخلناش..
راما وقفت بكي لكن عباراتها ماوقفتش قعدت تشوف لأسماء بخوف..
واسماء قالتلها؛نوضي اغسلي وجهك وماتجبيش لروحك الشبهه..
وناضت من حداها ومشت وخلتها بعد ماملت قلبها بالخوف..
🍃وفي مصحة القدس
كانوا فايزة ومعاها اميمه وصفاء يراجوا حد يجيهم يطمنهم ع مروة..
فايزة مقعمزة ع كراسي الانتظار وهي رافعه ايديها وتدعي وتتوسل والدموع ينزلوا من عيونها وهما مسكرات..
وصفاء حاطه راسها بين ايديها وهي تشوف في الفراغ بنظرات صدمه وخوف..
واميمه تمشي وتجي في الممر وهي تستنى ع نار..
ع جية الدكتورة هناء اللي كانت مسؤوله عن حالة مروة..
لما شافتها اميمه مشتلها طول وهي تقول
/شني دكتورة؟
فزوا صفاء وامها وقدموا للدكتورة وهما ملهوفات بخوف..
فايزة بخوف:بالله طمنيني بالله عليك..
د.هناء:اطمني يامدام بنتك حالها باهي حاليا..
تنفسوا الصعداء..
وفايزة غمضت عيونها بشده وهي تقول..
/الحمد لله ياربي الحمد لله..
هناء وهي تمرر في نظرها عليهم..
/درنالها غسيل معده وحطيناها تحت المراقبه بش نطمنوا اكثر..
صفاء:دكتورة بالله عليك مادرقيش علينا اختي كويسه حق..
وقلب فايزة بيوقف من الخوف..
هناء:والله كويسه والحمد لله ربي نجاها..تبوا تتأكدوا نقول للممرضه ترفعكم للحجرة اللي هي فيها تشوفوها من الشباك..
هزت فايزة وهي تقول بلهفه؛ايه ايه نبي نشوفها..
التفتت هناء للممرضه وقالت..
/فاطمه وصليهم..
؛حاضر دكتورة..شبحتلهم وقالت..تعالوا معاي..
ومشت وهما وراها..
واميمه وهي واقفه مربعه ايديها قعدت معاهم بعيونها وهي تردد..
/الحمد لله..الحمد لله..
التفتت هناء لأميمه شبحتلها شويه بعدين قدمتلها وقالت..
/انتي من قروب الدكتور خالد صح؟
اميمه شبحتلها بعدين هزت راسها وقالت..
/ايه..لكن هادم جيراني اني جبتهم..
هناء ابتسمت ابتسامه ازعجت اميمه بعدين مشت وخلتها بدون ماتقول كلمه..
واميمه قعدت معاها بعيونها وهي تشوفلها بتعجب بعدها حركت راسها يمين ويسار ومشت قعمزت ع الكراسي..
طلعت تليفونها من جيب التجيلي متاعها..
واتصلت بطوبى بش طمن العيله..
🍃وهما يستنوا في الحوش والخوف مسيطر عليهم كلهم بإستثناء..
وتاله بيناتهم..خاشه في حضن طوبى وشاده فيها وطوبى تقرا عليها...
علي وهو يشوفلهم بقلق:خيرهم لتوا مااتصل منهم حد..
لطفي وعيونه ع تاله:بنمشي نشوفهم بروحي جيبلي مفاتيحي يامطيره..
مطيرة بضيق:حاضر...
وكيف جت بتمشي رن تليفون طوبى..
كلهم وجهوا انظارهم ليها..
وهي فتحت الخط وردت بلهفه وقلق..
/هاه اميمه!
"الحمد لله دارولها غسيل معده وحالها باهي توا"
طوبى براحه:الحمدلله..مررت نظرها عليهم وقالت..حالها باهي..
كلهم باصوات متقطعه قالوا..
"الحمد لله"
طوبى:فايزة وصفاء شن حالهم؟
"مشوا يشوفوا فيها"
طوبى هزت راسها وقالت..
/الحمد لله قدر ولطف..
"ايه الحمد لله..طوبى بنسكر توا عندي خدمه كان صار جديد تو نخبركم"
طوبى:تمام تمام..سلام..
"سلام"
سكرت طوبى وهي تقول..
/الحمد لله اللي رأف بحال هالمسكينه المصايب جتها في جرة بعض..
لطفي؛الحمد لله على كل حال..
طوبى هزت راسها وهي تقول..
/الحمد لله..
لطفي:بنمشيلهم نشوف بالك يحتاجوا شي..ومشي يجيب المفاتيح من داخل...
علي:بري ياصفيه نوضي ولدك خير مانمشي نخبطه بالزقيه اللي مايتحشم هدا..
صفيه وهي محرجه؛حاضر ياعمي..
ومشت طول طلعت من حداهم..
علي:مش عارف الولد هدا شن يجيه مرات..
مطيره؛سهر البارح قريب للفجر وهو يصلح في السيارة..
فردوس:صح ياجدي كان يعاند فيها هلبه..
علي:قتله يدبر في غيرها خلاص معاش تنفع..
مطيره؛من وين يابوي ع عينك الحال..
علي:هو اللي ماييبش يتحرك عابي ع خدمته في الدوله ومايبيش يدير خدمه ع روحه الفلوس اللي كانوا عنده طربقهم ع الدوة الفاضيه..
طوبى بشي من الرجاء:جدي معليشي غير السيرة مرات خالتي تجي توا وتسمعك..
علي:حاضر تو نسكت لأنه مش وقته مش خوف منها تسمع..خل تسمع..
ع طلعة لطفي وهو يقول..
/اني ماشي ماتبوا شي؟
مطيره:سلامتك وخيي...
لطفي:السلام عليكم..
ومشي طلع..وهما ردوا عليه السلام..
بعدين طوبى شافت لتاله اللي كانت شاده فيها قالتلها..
/تاله حبيبتي سمعتي مروة كويسه مافيها شي..
تاله ودموعها في عيونها..
/نبي نمشيلها.
اريج تنهدت وقالت..
/ع موعد الزيارة نرفعك تشوفيها حبيبتي باهي؟
تاله بصوت يدوب طالع..
/باهي..
غرفه:دخلوها للدار خلوها ترقد وترتاح شويه..
طوبى:هي تنوضي معاي تاله..
تاله؛باهي..
وناضت طوبى بالشويه عليها وتاله معاها..
خدتها من يدها ومشت طلعت بيها من الصاله..
علي تنهد بحسره وقال..
/لاحول ولاقوة الابالله..
ومشي طلع من حداهم..
مطيره لحقاته وهي تقول..
/بوي خش للمربوعه تو نجيبلك تفطر..
طلع علي من الحوش وهو يقول..
/ماخاطري فشي..
فردوس بضيق؛الرعشه تسكر النيه..
مطيره بحزن:صدقتي..
آلاء ناضت وهي تقول..
/بنمشي نوتي روحي ..
فردوس؛بلاش منها الجامعه كان ماعندك شي..
طلعت من حداهم الاء وهي تقول..
لاوين عندي امتحان..
شبحت لأريج وقالت..
/وانتي ماعندك شي؟
اريج؛لا اليوم ماعنديش..
🍃وفي من عنده اعمال عطلها ع خاطر مروة..
زي اشرف وعبد القيوم والمهدي اللي لحقوهم في المصحه وقعدوا في الاستقبال بش يطمنوا عليها ويكونوا في خدمتهم لو احتاجوا أي شي..
جاهم اياد وطمنهم ع حال مروة...
اياد:اني موجود ياجماعه اللي عنده شغل مايعطلش روحه..
ناض عبد القيوم وهو يقول..
/عندنا اجتماع في الشركه ضروري نحضر..شاف للمهدي وقال..كلمني كان صارت حاجه..
هز المهدي راسه وهو ساكت..
عبد القيوم:السلام عليكم..ومشي..
اياد شاف للمهدي وأشرف بعدين قال..
/نجيب قهوة..
المهدي:ياريت ..
ناض اشرف وهو يقول:تو نمشي نجيب..
اياد؛لاخليك مرتاح اني ماشي..
اشرف وهو ماشي:لالا بارك الله فيك..
اياد لحق بعيونه وقال بإبتسامه..
/ع راحتك...
بعدين رد نظره للمهدي..
لقاه يشوفله بنظرات حاده بعدين غير عيونه
عنه..
اياد ابتسم ع جنب ولف ومشي وخلاه..
غمض المهدي عيونه وحط يده تحت ذقنه وحرك رقبته ع جنب بعدين فتح عيونه وقعد يمرر في نظره قدامه..
☘☘☘☘☘
الساعه 12:00ظهرا ..
في مكتبه..
كان مقعمز وراه لكن عاطيه بالظهر..
بين ايديه تليفونه..يتفرج ع صور افتتاح المطحن..
مالحقش يشوف البث المباشر بسبب اشغاله..
او بالأحرى ماكانش يبي يشوفه..
منع نفسه هلبه ان يشوف أي شي ليه علاقه بالإفتتاح بس ماقدرش..
يمرر في الصور صورة صورة لعند ماوقف عند صورة لبوه وفي جنبه جده والزوز كانوا مبتسمين..
قعد يتمعن فيها بنظرات حاده مليانه دموع..
وطيف ذكري مؤلمة من الماضي قاعد يحوم حواليه..
🔺️قبل اكثر من عشرين عاما..
"وفيها ايه يامختار لو اشتغلت مع اهلك وبنيت مستقبلك معاهم"
مختار بتعجب:شن تقولي انتي!؟ تتكلمي وكأنك مش عارفتيني!..
هي قالت:اللي انت عايزه مجرد احلام الواقع حاجه تانيه خالص..
مختار بصدمه:كيف!؟
هي قالت بضيق وشي من الانفعال:ايوه يامختار هي دي الحقيقه مش حفضل اسايرك واضحك ع نفسي وعليك..حكون معاك صريحه ولأول مرة..مختار انت شخص حالم بس ماعندكش الهمه والعزم اللي يخلوك تحقق احلامك اول ماحتتحط في مواجهه مع الحياة حتستسلم لأنك مابتحبش تحارب وتتعب..ايوه يامختار هي دي الحقيقه اللي كان مفروض اصارحك بيها من البدايه وصارحتك بيها دلوقتي من خوفي عليك..خايفه تسافر وتمرمطك الغربه ودمرك وبدون مبالغه يامختار؛لأني عارفاك اكتر ماانت عارف نفسك مش حتقدر تعمل حاجه لوحدك صدقني..
هو بنظرات كلها خيبه غرقتها الدموع قال بنبرة حزن...
/يعني هدا رايك فيا !؟
هي بألم قالت..
/مش رأيي هي دي الحقيقه ولإني بحبك مش عايزاك تخسر نفسك وتمشي وتسيبنا انا واهلك وكل الناس اللي قلبها عليك..مختار حبيبي اسمعني..اشتغل مع ابوك مين عارف يمكن يكبر شغلكم وتعمل معجزات تخليك في مكان انت نفسك ماكنتش تحلم بيه..
هو بتهكم قال..
/هذا كله بنديره من مطحن بن؟!
ابتسمت بأسف وقالت..
/عارف ايه مشكلتك الوحيده..ان نظرتك لبعض الامور قاصرة جدا مش تبص الا تحت رجليك..
ضحك بسخريه وقال..
/انهزامي..نظرتي قاصره..مانعرفش نتصرف.. ركز بنظره ع عيونها وقال...اني طلعت ماننفعش بكل في نظرك يامارييت!
هي بنظرات كلها حزن قالت..
/انا بحبك وده كفايه..ومستعده اتنازل عن حاجات كثير المهم اكون معاك..انا قبل كده قلتلك اني مستعده اتنازل عن ديني عشان نتجوز بس ومقابل التضحيه الكبيره دي انا عايزة اشوف منك شيء يطمني...
هو بنبرة حزن قال..
/معناها ولامرة اطمنتي وانتي معاي!؟
نزلت راسها وهي في قمة الضيق والحزن..
رفع حاجبه وقال بكبرياء مصطنع..
/مش لازم تقولي الكلام هدا بش توصلي للحاجه هادي من الاول قلتي معاش نبيك وكل حد يمشي في طريقه..
رفعت عيونها فيه وهي مصدومه..
وهو كمل يقول..
/مانخليكش تقعدي معاي بالإجبار مش شايفه ان ليك معاي مستقبل ومعاش تبيني بري في حالك وخليني نمشي في حالي..
ومشي وخلاها..وخلا قلبه وكل شعوره معاها خلا كله معاها وماقعدش منه شي ليه..
🔺️في الوقت الحاضر..
نزل تليفونك وهو يشد عليه بقوة..
بعدين لف بالكرسي بسرعه وخدي كاس المسكر و شربه كله في مرة وقعدت يمنع في نفسه بقوة انه ينزل دموعه ع ذكراها..
ذكرى "مارييت" حب حياته اللي شايف انها اول من خذله وتخلى عنه...
🍃🍃🍃🍃🍃
الخذلان والتخلي..
التمسك والوفاء..
هدا كان عنوان علاقة نسرين بفايزة..
نسرين اللي قاعدة تحضر في نفسها للدخول في حياة جديده بعد يوم واحد فقط..سيبت كل اللي عندها ومشت لصاحبتها بش توقف معاها..قالتلها قال..مالينا الا بعض..
☘فايزة ودموعها في عيونها..
/نحساب روحي نموت يانسرين بتصرفاتي الغبيه قريب خسرت بنتي..
نسرين:قولي الحمد لله قدر ولطف ونجالك بنتك في الجديد تعرفي كيف تتصرفي معاها..
فايزة؛لا في الجديد كل شي بيتغير خلاص اللي مريت بيه اليومين اللي فاتوا خلاني نغير طريقة تفكيري في هلبه حاجات...
نسرين:اهم شي تحولي فكرة انك تزوجيهم من راسك..
سكتت فايزة وهي تشوف لوجه مروة بحزن..
تنهدت نسرين وقالت:مالا اني مروحه توا وبعدين تو نوليلك..
فايزة؛لالا حبيبتي مش لازم تجي الهي بروحك غدوة فاتحتك راهو..
نسرين بضيق:تمنيت تكوني معاي لكن فيها خيره..
فايزة بإبتسامه؛ربي يهنيك ويسعدك وان شاء الله زواجة الدهر..
ابتسمت نسرين وقالت؛آمين..
🍃وفي هالوقت..
كانت صفاء نازله للكافتيريا بتاخد قهوة وحاجه حلوة ليها ولأمها..
وين وصلت في الكافتيريا وجت بتخش..
"صفاء"
وقفت والتفتت..وصابتها الدهشه..
اشرف؛شن تبي من داخل..
صفاء وهي متفاجئه؛قصدك قاعد هني من بكري ماروحتش؟
اشرف:تبيني نروح ونخليكم بروحكم!؟
يدوب ابتسمت صفاء وهي تقول..
/شكرا..
ارتسمت ع ملامح وجه ملامح ابتسامه خفيفه وقال..
/شن حالها اختك؟
صفاء؛طلعوها من العنايه لحجرة عاديه..
اشرف:باهي الحمد لله ع سلامتها..
صفاء:الله يسلمك..
اشرف؛ماقلتيش شن تبي من داخل؟
صفاء مدتله الفلوس وقالت..
/قهوة واي حاجه حلوة..
هو قال:تمام..وخش طول داخل..
ابتسمت صفاء ونزلت يدها اللي فيها الفلوس..
