#طوبى "أقحوان وفلة وياسمينه" #جمان_فريد #الجزء_الثالث_والثلاثين" شعور" لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 ☕☕☕☕☕☕☕☕☕☕☕☕☕☕☕☕☕ جابت نجاه بعمليه قيصيريه ولد.. فالوقت اللي فيه ام راجلها وبوه وخوته يبكوا عليه بعد موته.. المهدي شنيبه البكي اللي بكاه ع طاهر ماباكشي ع المهدي لما جابوا نبأ موته المزعوم.. الرجاله قعدوا يوصفوا في بكاه ع ولده بأنه بكي نساوين.. خواته تقطعت قلبوهم عليه بالذات نسرين. نسرين توقعوها تموت وراه..كان اقربلها واحد في خوتها وديما خوها هدا واجعها وحاسه انه مهما اختلط بيهم يقعد وحيد.. اما مغليه حتى هي وجعها طاهر... بس اللي صار اول يوم العزي واللي داراته لطفيه ام طاهر خلاها للحظه تندم انها قرباته منهم.. لطفيه شتمت وسبت فيها هي ومحمد واتهمتهم انهم حاولوا يبعدوا ولدها عنها...لين انجبروا خواتها اللي جابوها يطلعوها من الحوش بكل... وخوته الاولاد.. تأثروا كلهم بوفاته.. بس اكثرهم المهدي والجالي.. الجالي اللي تقرب منه هلبه السنين الاخيره..وكان ستر ليه وغطا عن هلبه حاجات..وفي نفس الوقت قعد يتفكر كيف كان معاه زمان..ضميره يوجعه هلبه.. اهو اللي اتهمه في يوم انه يخطط ياخد كل شي..مات وخلا كل شي..حتى في ورث بوه ماعنداش حق.. يعني زي ماجي ع هالدنيا زي ماخلاها... ☘بس وجع الضمير عند بعض الناس يكون مؤقت حاله عابرة وتعدي مع الوقت☘ 🍃🍃🍃🍃🍃🍃 تالث يوم العزاء.. في الطريق.. نجاه وهي شاده ولدها الرضيع في حضنها وتتكلم وهي معصبه:كان خليتوني نموت فيها الشقه خير..تو اني في حكم المطلقه وهو سبله ويدور فيها.. صابرين مقعمزه جنبها وتشوفلها بحزن.. ومراد وهو يسوق يسمع فيها ومش قادر يتكلم.. شبحت نجاة لصابرين وقالت؛اسمعي لهديكا الخربه ماترفعنيش خوتك ومرت بوك الحقراء مانبيش نشوفهم.. نزلوا دموع صابرين.. ضيقت نجاه عيونها وهي تقول:ماتقوليليش خيرك انتي ساكته اغلب الوقت وتبكي بالدرقه ماتحسابنيش غافله عنك..فتحت عيونها ع وسعهم وقالت..حمزة وجوري ماتقوليش خداهم مني! صابرين قلبت وجهها عنه وشبحت للروشن.. نجاه:اشبحيلي هني تكلمي صغاري مش عند مروة صح!؟ وصابرين مش قادره تتكلم تبكي وخلاص.. شبحت نجاه لمراد وقالت وهي بتنجن؛تكلم انت يامراد! مراد بضيق:غير صلي ع النبي واستهدي بالله.. نجاه كيف جت بتكلم ركزت ع الطريق.. لقاته خاش شارع القهوة.. هني عصبيتها وغضبها وانفعالها انطفوا مرة وحده... ووين بانت عليها الخيمه اللي قدام حوش شيابينها حست الدنيا كلها وقفت... ☘داخل.. كانوا موجود محمد وولاده مع الجيران والمعزين في الخيمه.. وفي الحوش كان زحمه بالنساوين.. كانوا يطيبوا ليوم الفرق... كان الجو هادي تماما... بس هالهدوء ماأستمرش..لما كسره صوت عياط نجاه.. بأعلى صوتها تعيط وتنادي.. "طاهر" كلهم انفجعوا لما سمعوها..بس قلوبهم انوجعت في نفس الوقت.. كانت اخر من يعلم... في الجنان تخبط وتعيط وتقول.. "طاهر" طلعولها النساوين يجروا.. ونسرين وعائشه ومعاهم مغليه يحاولوا يهدوها وهما ينهضوا وكانوا يبكوا معاها.. وهي تعيط وتقول؛طاهر....كيف يخليني بروحي..كيف بندير بعده كيف بنعيش من غيره ياربي...علاش اني علاش علاش اني ديما منكوبه دون عبادك ياربي علاش.. نسرين وهي تبكي:راك نافس يانجاه.. نجاه وهي تعيط:خليني ان شاء الله نموت...وووه عليا ياربي..قولي كذب يانسرين قولي كذب هدا خوك حبيبك مايهونش عليك تقولي انه ميت! ونسرين تبكي ومش قادره تتكلم.. عائشه وهي تبكي:الصبر يانجاة الصبر.. نجاه وهي تبكي:صبرتي انتي لما قالولك المهدي مات! معاش عرفت شن تقول عائشه.. ومغليه تشوفلها وهي تبكي وتمسح في دموعها بمحرمتها.. والنساوين يتفرجوا وهما موجوعات عليها. وزادو لما طلعوا الصغار وهما يقولوا "ماما" نجاه وهي تبكي:تعالوا ياماما تعالوا.. وقعمزت ع ركابها وضمتهم في حضنها وهي تبكي بالعبرة.. فايزة وبناتها وهما يشوفوا فيهم تفكروا رواحهم.. وقعدوا يبكوا بالصوت.. اما سدرة تقطع قلبها عليهم.. وطوبى برغم عدم تقبلها لنجاه من غير اي سبب.. بس وجعوها صغار طاهر هلبه... اما اختها صابرين كانت شاده العيل وتشوفلها وقريب تموت بالبكي ع حال اختها... وعند الرجاله.. رجع محمد شنيبه يبكي مرة.. وولاده تأثروا ع الآخر..والجيران يحاولوا يهدوه.. لطفي من جهه نسيبه الصيد من جهه حامد راجل نسرين من جهه.. وعلي الواعر مقعمز وهو شاد عكوزه يشبح في الفراغ والموقف واجعه ع الآخر.. ☘مافي اصعب من ان الوالدين يجربوا فقدان ضناهم ويدفنوهم وهما اللي تمنوا انهم يندفنوا قبلهم..☘ ☘تعبت هلبه نجاه لهدا دخلوها لجناحها وقعدوا يعانوا فيها نسرين وعائشه.. اما ولد الطاهر الرضيع خداته خديجه من صابرين بالغصب وقعد عندها هي تعاني فيه... ☘☘☘☘☘☘ الساعه 5:00عصرا.. درس بسيارته السودا العاليه قدام مدخل شارع القهوة وقال. عبد الرؤوف؛هيا انزلي.. ابتسمت نبيله ونزلت من السيارة.. نزل حتى هو وسكر السيارة كويس.. بعدين جاها وقال: هي خشي لشارع حبيبتك.. ضحكت وقعدت تمشي.. خشت وهو معاها.. قعدت تمرر في نظرها ع الشارع وحياشه.. كان مميز فيه شي مايشبهش الشوارع اللي في طرابلس.. ركزت ع محل المواد العذائيه.. بعدين ع المكانيكي.. شافت لمحل التارزي.. بعدين للحياش اللي تجي بعدهم.. لين قربت من مطحن جنه.. اللي شافه عبد الرؤوف ناض عليه جرح قلبه.. نبيله:مغري للخنبه.. عبد الرؤوف:اخنبي ووكلي روحك لروحك.. ضحكت نبيله بعدين شبحت للجهة التانيه اختفت ضحكتها وين شافت الخيمه وقالت؛ان شاء الله عرس. عبد الرؤوف:للأسف عزي.. نبيله بأسف:الله يرحم ميتهم ويغفرله ويرحم امي ويغفرلها.. عبد الرؤوف:آمين..هي كملي.. هزت راسها ومشت بعدين قالت:المطحن اللي جنب الخيمه هدا المطحن التاني.. عبد الرؤوف:ايه..قهوتهم حاجه صح.. نبيله:باهي وينه الحوش؟ عبد الرؤوف؛هاك قريب توصليه جنب الحوش هدا.. نبيله؛اها.. كان الحوش اللي خداه عبد الرؤوف متكون من طابقين في جنب حوش الصيد بالزبط.. وصلوا فيه...فتح عبد الرؤوف الباب وقال:هي خشي برجلك اليمين وسمي بالله.. ابتسمت ودارت زي ماقال وخشت.. وهو خش وراها وقبل يسكر الباب شبح جهة حوش الواعر.. تنهد بعدين سكر الباب.. ☘☘☘☘ "حالها يقطع القلب مسكينه كيف بدير مع تلاته صغار وهي ماعندها حد" :قصدك حوش شنيبه بيخلوا صغارهم!؟ :زعمه يردها واحد من الولاد؟ :مافيش غير هكي يالمهدي يالجالي.. :الجالي صغير عليها والمهدي متزوج زعمه تجي ع بنت عتيقه؟ :ياما منهم متزوجين وردوا ارامل خوتهم.. :عندك حق.. ☘وناس بدت تحكي في مصير نجاة من توا.. ووضع نجاة حاليا حساس جدا ماعليهاش عده وقعادها في حوش شنيبه مايجوزش حتى وان كانت بصغارها.. لهدا مافيش الا فكرة وحده تحوم في العقول توا فكرة الردان اللي مش وارده بكل عند عيلة شنيبه.. ☘☘☘☘ طالعات الزوز من حوش العزي وهما يهدرزوا.. غرفه:نقطر تقطير من الرطوبه.. طوبى؛والمشكله مانقدروش نقعمزوا عيب.. غرفه؛خاطر ع بالي معاش نولي.. طوبى:لالا غرفه مايجيش هو هاليوم وبعدين شدي رجلك..اصلا ورانا قرايه معاش نقدروا نمشوا.. غرفه؛صح.. وهما ماشيات.. طلعوا نبيله وعبد الرؤوف من الحوش.. عبد الرؤوف وهو يشوف لأخته:الاسبوع نجيبله الاثاث والسبوع الجاي نسكنوا.. نبيله وهي تشوف لغرفه وطوبى قالت بإبتسامه؛ياريت في اقرب وقت ارتحت هلبه للشارع كل شي فيه حلو حتى بناتهم..بالك نزوجك منهم.. وقدمت لغرفه وطوبى.. وهو شبح وين ماشيه قال في نفسه"كويس بكل." قعد واقف في مكانه.. ونبيله قصت الطريق وهي تنادي:صبايا..صبايا.. وقفوا الزوز في الباب والتفتولها.. جتهم وهي مبتسمه قالت:السلام عليكم.. الزوز اعجبوا بيها وبشكلها وبلبسها تبان راقيه ولطيفه.. ردوا عليها وهما مبتسمات؛وعليكم السلام.. نبيله وهي مبتسمه:نعرفكم بروحي اني نبيله بن موسى بنولي جارتكم قريب..ويقولوا جار قبل الدار قلت نتعرفوا..وضحكت.. غرفه بإبتسامه؛اهلا بيك في شارعنا.. طوبى بإبتسامه؛كان خشتيه صعب تطلع منه..مافيش حد حول من هني الا هو متحسر.. نبيله بضحكه:اووو دعايه لشارعكم هادي..خلاص خديناه الحوش والاسبوع الجاي بنسكنوا.. غرفه؛اما حوش خديتوا ؟ التفتت نبيله واشرت بسبابتها ع الحوش وقالت؛هداكا.. غرفه وين شبحت للحوش..عيونها جو ع عبد الرؤوف.. كان لابس اسود ونظارات وطاقيه سودا.. واقف وحاط ايديه ورا ظهره ويمرر في نظره ع الشارع.. حست روحها شايفاته قبل بس مش متفكره.. نبيله شبحتلهم وهي مبتسمه وقالت؛اللي واقف قدامه خوي الصغير.. طوبى بإبتسامه؛ان شاء الله عتبة خير عليكم وترتاحوا فيه.. وغرفه مازال تشوف لعبدالرؤوف هو شبحلها بعدين غير عيونه وداير روحه مش مهتم لشي.. نبيله؛قداش ليكم تسكنوا هني؟ غرفه شبحتلها لما سمعت سؤالها وردت هي وطوبى مع بعض:اووووهه..وهما يحركوا في ايديهم حركة دائريه من الخلف للأمام.. ضحكت وقالت؛شكلكم اقدم ناس هني.. غرفه:هلبه.. طوبى؛حني وجيراننا هادم... شويه قدم عبد الرؤوف حول نظاراته وقال لأخته:هيا.. غرفه لما شافاته اندهشت.. هو نفس امر الكتيبه اللي جو لحسين.. وهو ماباش يشبح جيهتها بكل.. نبيله:هي شويه بس..شن اسمائكم صبايا.. غرفه وهي تشوفلها قالت؛غرفه.. هو شبحلها بحده..شبحتله..طول غير عيونه عنها.. طوبى:اني طوبى.. نبيله:الله محلاها اسمائكم من سماكم.. الزوز قالوا؛بابا.. نبيله بإبتسامه؛تعرفوا معانيهم ولا؟ غرفه بضحكه؛اكيد..اني تسميت ع اعلى مقام في الفردوس الاعلى والمقام هدا للصابرين.. عبد الرؤوف وهو يسمع فيها قال في نفسه"بيخشوها اللي عايشين معاك" نبيله بإبتسامه؛حلو.. طوبى:اما اني اسم شجرة في الجنه مظلله عليه كلها وريحتها واصله لكل مقام من مقامات الجنه.. نبيله؛ماشاء الله عليكم ربي يحفظكم..هي فرصه سعيده ولنا لقاءات هلبه بإذن الله.. الزوز قالوا؛ان شاء الله.. مشت نبيله وهي تقول؛السلام عليكم.. وهما ردوا عليها السلام.. وعيون غرفه ع عبد الرؤوف اللي لبس نظاراته وسبق اخته .. طوبى:خشت خاطري.. غرفه:تعرفي خوها من يكون؟ طوبى بإستغراب؛مني.. ضحكت غرفه وقالت؛تعالي خشي تو نقولك فتحت غرفه الباب وخشت.. وطوبى خشت بعدها وقالت:لكن لاحظتي كانت تكلم فيا تقول طفلات.. غرفه وهي تضحك:لاحظت.. وسكرت الباب.. ☘نبيله:طعمات طعامه وجميلات جمال الله يبارك..شن رايك فيهم؟ عبد الرؤوف:شن دخلي بيهم..وفتحلها باب السيارة .. قبل تركب قالتله؛حتتزوج هني تبي ولاماتبيش.. وركبت السيارة.. هو سكر الباب ومشي بيركب وهو اخر رواق كل ماشي زي ماهو مخططله بالزبط... ☘☘☘☘☘ عدت ليلة فرق السو.. والناس روحت.. وقعدوا بس الجيران يعولوا لين كملوا... واللي هدا بدي يروح.. روحوا خوات سدرة قبلهم هي وعمتها.. ولحقوا هما بعدهم.. لما جو طالعين... شافت سدرة المهدي واقف بعيد شويه عن المطحن متاعهم يتكلم بالتليفون..حست بشعور ضايقها.. وكان هالإحساس في محله.. المهدي:احسن قرار خديته يامختار صدقني.. "لكن بنعرف اخبارهم منك ومانقدرش نعطيك وعد اني مش معاودها" المهدي قعد ساكت وهو مضايق.. "ع العموم في حال صار اي شي بلغني طول يامهدي" هز المهدي راسه وقال؛ان شاء الله..ان شاء الله.. "عظم الله اجرك مرة تانيه" المهدي:اجرنا واجرك..السلام عليكم... "وعليكم السلام" سكر المهدي..وشبح لحوش الواعر.. شاف سدرة ومطيره خاشات للحوش..تنهد.. بعدين ولى لحوشهم... ☘☘☘☘☘☘ في دار الجالي.. كان عمر مقعمز ع الكرسي وهو يقول بألم؛قاعد لتوا مش مستوعب..حس بحاجه هني..واشر ع صدره..كاتمه ع نفسي..كيف طاهر هكي راح...ع غفله هكي.. الجالي بحزن:قبل ليمشي للمهمه متاع الخدمه قالي كان عطلت جيب لحمزة الايباد متاعه من محل التصليح المقابل الشركه..قاعده وجهه بين عيوني وهو يوصي فيا.. ومسح دمعته قبل لتنزل.. عمر:اسمع مانبوش نحسسوا صغاره بغياب بوهم بكل.. الجالي:من غير ماتقول ياعمر..بس..اني اكثر شي قاهرني ومكرهني في نفسي كيف كنت معاه زمان كيف كان تفكيري فيه.. عمر:خلاص كله نسيتوه من سنين وعلاقتكم ببعض في السنين الاخيره كانت كويسه.. الجالي:بعد شني؟..بعد ماوجعته ياعمر! عمر:كلنا وجعناه وهو نسي كل شي وتفكر اننا خوته بس..الله يرحمه ويغفرله.. الجالي بحزن:اللهم آمين.. اما نضال فكان مع محمد ولد المهدي لوطا شادين حمزة يغيروله في جوه.. والبنت والطفل الرضيع مع عماتهم مابوش يطلقوهم... وامهم قاعده راقده ماتندري ع شي ... اختها صابرين روحت ماقدرتش تقعد معاها روحت وخلت عقلها عندها... اما عقل مغليه في مكان تاني.. في دارها هي وراجلها.. محمد شنيبه:اللي تلمحي عليه فاهمه رأيي ماغيرتاش الردان ممنوع عندنا..لايمكن نظلم كنتي ولانظلم ولادي كل واحد فيهم ليه الحق انه يتزوج زواج طبيعي وهو اللي يختار بروحه.. مغليه؛ايوه هو هدا..وهي مش حنقصروا معاها والصغار صغارها تقعد في شقتها معززة مكرمه اللي تبيه يوصلها وكان جاها نصيبها الصغار مرجوعهم لهني ماعندهم وين يمشوا.. هز محمد راسه وقال بحزن:هو هدا.. 🍀🍀🍀🍀🍀 وتقعد نجاه في حوش اهل طاهر تلاته ايام بس.. هي طلبت بعدهم انها تروح لشقتها لأنها مش متحمله اي مكان يفكرها بطاهر من كثر ماكانت مش متقبله فقدانه.. روحت بيها صابرين اللي كان راجلها يجيب فيه ويرفع بدون ماينزل من السيارة ولايخلي حد يشوفه.. رفعهم للمصحه اللي جابت فيها نجاه بش تغير ع الجرح متاع العمليه...وبعدين روح بيهم للشقه... وخلا صابرين مجبور تقعد مع اختها في الشقه.. ☘☘☘☘ وترجع الحياة طبيعيه من اول وجديد.. وسكان شارع القهوة انشغلوا بالجيران الجدد اللي جايين يسكنوا في الحوش المجاور لحوش الصيد.. عواطف ونجاح وهما يراقبوا في الاثات اللي يخش.. عواطف؛قالوا مليشاوي كبير.. نجاح؛ايه سمعت..يستر الله كان مايقلبها حرب ونقعدوا يومك وتاليك في الرعايش.. عواطف؛ايه صح ربي يستر..لكن خاطري نعرف قداش دفع لحوش الصادق بش طلعوا فكرة المحوال محولينها من روسهم بكل.. نجاح؛شن نسيتي انه مليشاوي اكيد هددهم.. عواطف:ايه صح صح. 🌻وفي حوش الواعر... مطيرة؛لاالا اليوم هدرزت ع مغليه وقالت مش رادها حد ماعندناش في الدوة هادي.. فردوس؛ايه من قبل قايلين الدوه هادي.. سدرة:كنت خايفه ع عيشه الحق.. صفيه؛بس نقوللكم حاجه وان شاء الله ربي يسامحني مرت الطاهر نحس فيها مش ساهله مظني ترضى تطلع منهم.. فردوس؛ماتقوليش هكي يامرت عمي مش كان قعدت من غير راجل تفكري فيها هكي .. ☘فردوس كانت متحسسه هلبه اتجاه الموضوع هدا خصوصا ان سلفاتها كلهم تجنبوها بعد اللي صار في راجلها خوف انها تنزل عليهم ضرة...لانها تعتبر طلعت من ذمة راجلها بعد اختفائه المده هادي كلها..☘ هما قعدوا يشبحولها بضيق.. وناصرتها فايزة لما قالت:مع الاسف الفكرة هادي واخدينها ع الارمله بصفه عامه كان قعدت من غير راجل يديروها بترمي شباكهاع غيره خوته ولاغيرهم.. صفيه؛سامحوني كان فهمتوني غلط..بس اني نقصد المراة هادي بحد ذاتها.. سدرة؛خلاص غيروا السيرة يكون احسن.. مطيرة؛احسن حاجه.. ☘وفي دار البنات.. آلاء:هو نفسه هو نفسه! غرفه بضحكه؛هو بشحمه ولحمه.. اريج؛خويله مش من جدك بيعجبك مليشاوي توا! غرفه وهي تضحك:نحكوا عادي يابنتي خيرك خديتيها جديات طوبى؛ايوه ردي بالك تقلبيها جديات.. غرفه؛ووواك منكم الواحد معاش يهدرز معاكم بكل.. ع خشت صفاء ومروة وحده بسفرة نسكافيه والتانيه بصحن حلو.. طوبى بإبتسامه؛سلمهم ياربي..عطيتوا للي في الصاله.. قعمزوا الزوز وقالوا؛ايه.. واللي هادي خدت فنجان وقطعه حلو وغيروا الموضوع وقعدوا يهدرزوا في حاجات تانيه... 🍀🍀🍀🍀 وجي اليوم اللي سكن فيه عبد الرؤوف مع نبيله في شارع القهوة... واول حاجه فاجئت نبيله في هاليوم.. نبيله وهي واقفه في الباب:تفضلي حبيبتي.. صفاء؛هدا غداكم من حوش عمي لطفي.. نبيله ضحكت وقالت؛غير علاش هالتعب.. صفاء:تعبكم راحه.. خدت نبيله السفره وقالت؛وينه حوش الواعر.. صفاء التفتت وقالت؛اللي بابهم اسود في الذهبي.. ابتسمت نبيله وزبطاته حوش غرفه وطوبى قالت:سلميلي عليهم وقوليلهم شكرا.. صفاء:يوصل.. نبيله:صحيتي ياحلوة.. صفاء بإبتسامه؛سلمك.. خشت نبيله وسكرت الباب.. وصفاء مشت بإتجاه حوشهم.. وهي ماشيه شافت اياد واقف ع محمد شنيبه يكلم فيه.. ساوت وشاحها وهي مبتسمه خجلا وقعدت تشبحله لين خشت للحوش وماسكرتش الحوش قبل لتلقي عليه نظره المشاعر فيها كانت غريبه.. اياد؛انتي امشي ع الدوا اللي قتلك عليه وماتغيراش بكل.. محمد؛ان شاء الله دكتور.. اياد؛شد حيلك ياحاج.. تنهد محمد وقال:الشده في الله.. اياد هز راسه وقال؛ونعم بالله.. محمد؛صحيت دكتور السلام عليكم..ومشي لحوشه.. اياد؛وعليكم السلام..بعدين مشي لسيارته.. ع خطمة سيارة يوسف.. كان يتكلم بالتليفون كلكس لإياد وحياه واياد رد التحيه.. يوسف؛اقبال راهو بكر امي ومن حقها تفرح بيا.. "تمام ماقلت شي بس اني نبيك تعطيني وقت راهو تفركست هلبه ووضعي مش واضح قدام اهلي". يوسف؛معناها في حد يعبيلك في راسك انتي.. "يعبييلي في راسي!" يوسف:اسمعي اقبال سكري توا خير ماعنديش بال للنقاش.. وسكر عليها..وهو مش طايقها..وفي نفس الوقت كان مضايق ع الآخر.. وبين عيونه ريما في اخر لقاء جمعهم 《ريما وهي تبكي:واني اللي كنت نحسابك تراجي فيا...ماخليت مادرت ماخليت من كلمت بش نوصل فيك يايوسف ع قد ماجتني فرص كلها رفضتها ع خاطرك..خاتمك..رفعت يدها وقالت..شفته خاتمك ماحولتاش من يدي بكل بكل ع قد ماسمعت ع قد ماقالولي بس يأسوني من قصتنا...اني بجديات مصدومه ومقهورة منك..خلتيني نندم يايوسف اللي صدقت انك تحبني حق...ياريتيني سمعت كلام ياريت》 غمض عيونه بشده وهو مضايق بعدين فتحهم.. ونزل من السيارة بش يفتح الباب.. ☘☘☘☘☘☘ "رفعهم؟" صابرين؛ايه.. هزت نجاة راسها وجت بتخش دارها وتحبس روحها فيها.. صابرين؛نجاة خليك قعمزي معانا شويه.. خشت نجاة وسكرت عليها الباب.. ع طلعة مروة اختهم من الكوجينه بسفره قهوة قالت بحزن:مش عارفه لامتى هالحال حتى ولدها فاتته بكل مسكين.. صابرين تنهدت وهي تشبح في الفراغ وتفكر.. ☘☘☘☘☘☘ "اووف شن هدا شن هدا" خشت عليها امها وهي تقول؛خيرك؟! آلاء وهي دور في دولابها قالت:شي.. فردوس شبحت لحوايجها اللي ملوحات ع السرير قالت؛خيرك دايره في حوايجك هكي!؟ آلاء بنتورة:خليني بالله عليك واطلعي.. فردوس قعدت تشبحلها بضيق..بعدين مشت طلعت وخلتها.. آلاء وهي قريب تبكي؛الدبش كله قديم لبسته وعاودته ألف مرة...بشن نمشي للكورس توا بشني.. قعدت تشبح للدولاب ودموعها في عيونها.. بعدين خدت لبسه وطلعتها بش تلبسها. لبست وهي معصبه ع الاخر.. ومع هدا مكيجت وبخت عطرها وخدت شنطتها وطلعت.. فردوس شدتها وهي ماشيه وقالت؛خودي هادم.. هي شبحت للي فيد امها كانوا عشرين جني.. ابتسمت بتهكم وقالت؛خليهم عندك.. ومشت وخلتها لبست في رجليها وطلعت من الحوش وخبطت الباب بقوة... وفردوس تشوف للباب وهي مضايقه وقلبها موجوع.. ☘☘☘☘☘☘ "اريج جيبي" اريج:تفضل دكتور.. وقعدت واقفه جنب الدكتور وهو يدير في عملية التنظيف لأسنان وحده من الحالات.. بعدين مشت عقمت معدات تانيه الدكتور محتاجهم.. الدكتور:اريج... جاته بيهم طول.. هو ابتسم وقال للحاله اللي عنده؛عندي ممرضه يحسدوني عليها.. ابتسمت اريج.. والحاله اللي كانت مراة حاولت تبتسم.. بعد شويه كمل شغله عليها.. حطت اريج المرايه قدام المراة وهي مبتسمه قالت؛شوفي.. :عطيك الصحه الدكتور...الجلسه الجايه ان شاء الله نجي نقلع ضرس العقل ونرتاح منه.. اريج:مافيش منه فايده هو مش عارفه علاش موجود.. ضحكوا الدكتور والمراة... وشويه وسقدتها بعدين دخلت اللي بعدها... وقعدت تخدم لين انتهي الدوام... الدكتور:معليشي اريج لازم تجي غدوة يوم مفتوح... اريج؛من امتى دكتور لان الصبح عندي محاضرات.. الدكتور:تكملي المحاضرات تعالي.. اريج؛حاضر..السلام عليكم دكتور.. الدكتور:وعليكم السلام... ومشت اريج طلعت من العياده للسيارة طول.. في الطريق شافت مخبز يديروا فيه خبزة الفرن.. تفكرت مرة لما امها شمت ريحتها جايه من حوش الجيران وقالت خاطرها فيها.. درست قدامه ونزلت خدت منه تلاته فردات.. بعدين كملت طريقها لمكان الكورس اللي فيه اختها.. رنت عليها.. طلعت طول وركبت جنبها وهي ساكته.. تحركت اريج وهي تقول:خيرك مسكته.. آلاء:شي.. اريج:معاش شفتي وليد. آلاء بإنزعاج؛بالله اسكتي.. اريج؛باهي خيرك هكي قالبه وجهك! آلاء بعصبيه مكتومه:شي شي قتلك شي..اسكتي خلاص.. اريج:باهي باهي هدي راهو يطقلك عرق..متخلفه.. وآلاء ضمت شنطتها بعصبيه وقعدت ساكته.. ☘☘☘☘☘ وفي شارع القهوة.. في قهوة الزعيم.. كانوا مقعمزين المهدي وعبد الرؤوف مع بعض يهدرزوا.. ونضال يراقب فيهم.. عبد الرؤوف وهو يشرب في القهوة؛امم..ياسيدي اني كنت قائد في كتيبه تابعه للدوله..وسيبتها توا بس المهدي؛وعلاش سيبتها توا ماتبيش تخش حرب سرت؟ عبد الرؤوف:لا مش هكي القرار هدا خديته بسبب العيله معاش يبوني نقعد فيهم يعني خوف عليا وخوف من المشاكل اللي تجي من وراهم.. المهدي:مفروض من زمان مخليهم.. عبد الرؤوف:عندك حق..بس حتى هو حب السلطه يازعيم.. المهدي ابتسم ع جنب ورشف من القهوة.. عبد الرؤوف:لكن انت الباين لتوا عندك علاقات قويه بيهم وبالجماعه اللي شادين الدوله..بما انك خشيت في موضوع ولد الواعر.. المهدي:المعروف هو اللي خلا هالعلاقات قاعده لتوا.. عبد الرؤوف؛اها.. المهدي:شن اللي خلاكم تسيبوا سوق الجمعه؟ تنهد وقال:بعد وفاة امي اختي كرهت الحوش والمنطقه كلها وليها فترة تزن..نبي نحولوا..نبي نحولوا..هيا نحولوا..واني وقتها مالقتيش مكان يستاهل نسيبوا سوق الجمعه ع خاطره.. لين ربك..رفع سبابته فوق..بعد نزلها ع الطاوله وقال..جابني هني..وابتسم .. المهدي:ياسيدي اهلا وسهلا بيك وان شاء الله تكونوا مرتاحين بيناتنا.. عبد الرؤوف:لاهو الباين هكي من اول يوم بعتوا غدانا...شبح لحوش لطفي وقال..عيلة الواعر.. شبح المهدي للحوش وتنهد بإبتسامه.. انفتح الباب فجأه.. هما ركزوا معاه.. طلعت منه غرفه... غير المهدي عيونه.. وعبد الرؤوف قعد يشرب في قهوته ويسرق في النظر.. شافها مشت لحوش سدرة فتحت الباب وخشتلها.. عبد الرؤوف؛الصفه هادي كلها لعيت الواعر؟ المهدي:ايه اللي في النص حوش الشيباني الكبير ساكن فيه مع ولده الكبير.. ع يمينه حوش ولده التاني لطفي الواعر.. عبد الرؤوف:واللي ع اليسار.. المهدي:حوش بنت لطفي.. عبد الرؤوف:اللي كان واخدها ايهاب الفاندي.. شبحله المهدي وقال؛تعرفهم معناها..ضحك وقال..غبي حتى اني اكيد بتكون لام معلومات ع الشارع كله. ضحك عبد الرؤوف وقال:مش لهالدرجه..بس لما كنا نتحروا عن حسين شملنا العيله معاه.. المهدي هز راسه وشرب باقي القهوة.. وعبد الرؤوف عيونه ع حوش سدرة.. ☘في داخله.. في المعمل تحديدا.. مطيرة؛غدوة في طلبيه والله مانفضى بكل.. غرفه:كان هدا خلاص غدوة نغيب ونضمه معاها هالحصله هادي تخطر عليها خطاير مش عارفه كيف.. مطيرة:ياحمارة عادة امك من زمان وين يخش شني ولاصيف تقلب الحوش كله وتغير الفرش. غرفه؛باهي خلاص خلاص.. ومشت طلعت من حداهم.. مطيره؛خزي بايره.. وصفيه حداها تسمع وتضحك.. ☘طلعت غرفه من الحوش قابلها عبد الرؤوف بيخش لحوشهم.. قعدت تشبحله..وهو يدوب شبحلها بعدين فتح الباب بيخش.. هي شدت ابتسامتها ومشت لحوشهم.. وهو قبل يسكر الحوش شافها كيف ماشيه ولمح الابتسامه ع وجهها.. بعدين سكر الباب.. ☘وخشت غرفه للحوش وهي هايمه بفكرها مع عبد الرؤوف اللي قاعد اعجابها بيه يزيد يوم عن يوم.. في الوقت اللي خشت فيه. كانت سدرة تتكلم بالتليفون في المربوعه.. سدرة؛لا والله العلاقه بيناتهم كانت سطحيه تي هما ماليه بروحهم فيسع نسوه وعاشوا حياتهم عادي.. "باهي خيره ياسدرة نبي نفهم متغير هلبه هلبه معامتله موليه مش حلوة بكل ياسدرة" سدرة:معليشي تحمليه هو غير زي اللي ضايق من القصه اللي تصير معاه وين يجي بيدير عرس تصيرله حاجه يعني يفكر انه منحوس هكي يعني فهمتي عليا. "اني ماليش ذنب في هدا كله ياسدرة مفروض يقدرني ويقدر الظرف اللي نحطيت فيه" سدرة؛عندك حق عندك حق..حاضر يابيلا تو نكلمه ونتفاهم معاه.. "سامحيني سدرة وجعتلك راسك بس مالقتيش قدامي غير هكي وان شاء الله مانزيدش الطين بله" سدرة؛لالا ماتخافيش تو نعرف كيف ندوي معاه ماتخممي في شي بإذن الله كل شي يمشي زي ماتبي.. "يارب..هي بالسلامه" سدرة؛بالسلامه..سكرت وهي تقول..شن في وراك يايوسف..! ☘☘☘☘☘ "شن العشي يام؟" فردوس:شربه. اريج؛ومع خبيزة الفرن اطلع طول.. ضحكت فردوس.. اريج؛شن تبي ندير معاك؟ فردوس:شي..بس تعالي هني قوليلي اختك خيرها.. اريج:حالة اختي هادي مش جديده عليك يام.. فردوس:لاهالايام زايده..بكري لقيتها مطلعه حوايجها كلهم ملوحتهم ع السرير..شكلها تبي دبش جديد.. اريج؛تبي عينها وعين عينها..عندها حوايج يلبسوا شارع هالطماعه هادي. فردوس تنهدت بضيق وقعدت ساكته.. اريج؛مادوريهاش يام.. فجأة .. هرب الضي.. فردوس:اهرب هريبهم واضرب ضريبهم.. فتحت اريج الفلاش وقالت؛وين لمبات الشحن.. فردوس:في المربوعه حطيتهم يشحنوا. اريج:باهي..ومشت طلعت من حدا امها.. "هيا افتحوا اللامبه بنكتب الواجب.." اريج وهي تقلد في صوت خوها:بااهي بااهي.. وخشت للمربوعه.. طلعت اللامبات الزوز.. وحده رفعتها لأمها في الكوجينه.. والتانيه حطتها في وسطت الحوش لخوها.. بعدين مشت خشت ع اختها وقالت؛خير بلاك انتي! آلاء وهي شاده تليفونها؛خيرني! اريج؛امي قالت شكلها تبي دبش.. قلبت عيونها وقالت؛مانبي شي.. اريج؛اسمعي يابنت ارحمي امك مش ناقصه راهو.. الاء؛وواك..انت امتى كلمتها ولاجيت من ركنها ولاقلت نبي؟ وبعدين امي مش خصيصه بنت عز وماليها يلعبوا بالفلوس غير هي معيشه روحها في الفقر.. اريج وهي تشوفلها بإزدراء:الدوة معاك ضياع وقت.. وناضت ومشت طلعت من حداها وخبطت الدار بقوة.. الاء قلبت عيونها وقالت؛فقريه.. ☘شويه وحطت فردوس العشي.. وقعمزت بيه مع اريج ومعتز في الصاله.. وكسروا فيها خبزة الفرن وبدوا ياكلوا.. فردوس؛اطلعي اقلي دحيه ولاديري طن ياآلاء.. شويه طلعت آلاء من دارها وهي لابسه حجاب ومشت للباب. عرفوها ماشيه تاخد طلبيه عشي.. تنهدت امها وقعدت تاكل. اريج؛بعدين تجي تقولي عطيني فلوس.. لحظات وخشت وفاتت من حداهم وخشت الدار.. معتز:نجي معاك آلاء.. "تعالى" سيب العشي ومشي للدار وراها. جت فردوس بتسيب العشي.. لكن اريج:والله ماك نايضه وبتكمليه معاي.. هزت راسها ع خاطر بنتها وكملت ماكله وفي داخلها غصة.. واريج تاكل وهي تسحن ع اختها ... ☘☘☘☘☘ "اعتقد البنت من حقها تعرف شن صاير معاك بنت ناس ماتعاملهاش هكي" يوسف؛سدرة نطلب منك طلب اطلعي من الموضوع تمام! سدرة ضيقت عيونها وقالت؛يوسف عطيني من الاخير وقولي شن في.. هو بعصبيه قال:ايييه علينا عاد..ولف بيمشي ويخليها.. شداته وجت قدامه وقالت:يوسف ماتحشمنيش مع الناس.. هو جبد يده منها ومشي وخلاها وهو معصب.. سدرة:ياحليلي اني بيحشمني هدا بيحشمني.. ع طلعة طوبى... طوبى بقلق؛خيره هو شن اللي قلبه هالقلبه.. سدرة؛ياريت نعرف ياطوبى ياريت نعرف..اني الغالطه اللي سعيت في الموضوع...سعيت فيه بش نخرب بينا وبينهم بس.. طوبى بخوف:لاان شاء الله مافيش خراب ياربي.. ~~~~~~~ يوسف بعصبيه؛موضوع بيني وبينك دخلي فيه الناس التانيه علاش.. "انت ماعطتنيش فرصه معاك يايوسف" يوسف:تمشي تشكي من لأختي وتحطيني معاها في موقف بايخ..هدا من توا هكي مالا بعدين كيف! بدت تبكي وهي تقول.. "خيرك يايوسف تغيرت هكي ماكنتش هكي بكل" يوسف بنرفزة؛هالموزيقا االلي شدتيها ومعاش طلقتيها..اسمعي حني قاعدين ع البر واني الحال هدا التحريش والنكد مايمشيش معاي..خلي كل واحد يمشي في طريقه خير.. هي بصدمه قالت.. "يوسف!" يوسف:لايوسف لاغنته...خلاص.. وسكر عليها ولوح التليفون ع السرير ومشي للحمام.. ☘☘☘☘ اللي داره يوسف ماعداش ع خير.. فسخ الخطبه للمرة التانيه وبهالطريقه وبدون اسباب تذكر قلب عليه الكل.. حتى ان خوت اقبال تعاركوا معاه كيف رخي بأختهم هكي بعد ماوصلوا لأخر الطريق قبل الزواج... وعيلتها خدوا موقف من العيله كامله.. سدرة وهي محرجه؛والله ماعارفه شن نقولك ياسعاد.. "ماعندك ماتقولي ياسدرة الغلطه غلطتك انتي انتي اللي قعدتي تشكري وتمجدي فيه وهو مايستاهلش..كسرة قلب اختي في رقبتك حتى انتي ياسدرة اللي ضيعتوا سنين عمرها ع الفاضي" وسكرت عليها.. سدرة من الغضب ولت معاش تشوف قدامها.. مشت طول طلعت لحوش جدها.. مطيرة؛اشبح شن حطتلها سعاد لسانها واعر.. غرفه:صدق المثل اللي يقول..خش في جنازة ولاتخش في جوازة طوبى:اني بس كان نعرف شن اللي غيره هكي في ان في وراه شي.. مطيرة وغرفه قعدوا يشبحوا لطوبى ويفكروا في كلامها.. ~~~~~~ سدرة؛حشمني ولدكم حشمني حطني في موقف زي الزفت.. صفيه وهي تبكي؛ماني عارفه خير بلاه تقول ساحرينه.. حسين بضيق؛لاساحرينه لاشي يام.. شبحوله.. سدرة؛مال خيره! حسين تنهد وقال؛خطيبته الاولى روحت من برا.. غمضت اميمه عيونها بأسف ومسحت ع جبهتها.. سدرة ؛سامحوني فيها..بس طلع مش راجل... ومشت طلعت من حداهم.. اميمه:شن جابها هادي توا!؟ صفيه وهي ترشف:بخت خوك الاحرف.. حسين؛لابخت لاشي يام ولدك غلط لما خطب بنت الناس بش ينسى هديكا.. صفيه:عليك كشايف وحشايم وخلاص.. ~~~~~~ سدرة وهي تبكي:بسببه هو خربت علاقتنا بحوش الفاندي..اني اللي درتها بيدي اني.. لطفي بضيق:الله غالب يابنتي هدا اللي صار توا.. سدرة مسحت دموعها وقالت؛معاش نبي نعرفه ايوه معاش نبي نعرفه.. ومشت خشت للحوش.. وبوها يشوفلها وهو يحرك في راسه يمين ويسار بأسف... ☘☘☘☘☘☘ اليوم الثاني.. الساعه الخامسه والنصف عصرا.. مشت نسرين لحوش نجاة بش تشوفها هي والصغار.. وكانت مامخليه ماجايبه معاها.. وين خشت عليها لقتها قاعده بروحها.. نجاه؛اختي روحت تشوف حوشها وراجلها وغدوة موليه.. نسرين؛باهي انتي خيرك ماتجبيش الصغار وتجي لحوشنا تباتي نهارين تلاته..بوي مضايق هلبه لأنك معاش جيتي.. نجاة:اهو نبعتله في الصغار يشوف فيهم. نسرين؛هو يبيك معاهم يبيك انتي تجي وتجيبهم مش تبعتيهم مع عمر ولانضال..قاعده منا وفينا راك يانجاه.. تنهدت وقعدت ساكته.. نسرين؛حاولي تطلعي من حالتك هادي ع خاطر صغارك الله غالب هدا امر الله وحزنك عليك مش حيرده.. قعدت تبكي وهي تقول؛لتوا مش مستوعبه.. دمعت نسرين وهي تقول؛ولااني..بس الله غالب شن بنقول.. خدت نفس نجاه ومسحت دموعها بعدين قالت؛اني بس عندي طلب واحد نسرين بإنتباه؛ شن هو؟! نجاة؛نبي نولي للخدمه.. نسرين؛علاش مصروفك انتي والصغار يوصل كل شهر.. نجاه؛نبي الخدمه لروحي يانسرين كان نقعد في الحوش اكثر من هكي يركبني مرض.. نسرين؛باهي حقك حبيبتي حقك..كيف نقدر نساعدك ؟ نجاه رشفت وقالت؛اني زمان كنت نخدم في الشركه اللي مديرها الجالي توا..نبي نبعت معاك ملفي للجالي يشوفه بالك يقدر يردني.. نسرين؛حاضر جيبيه واني اليوم نرفعهوله.. نجاة؛حاضر..وناضت مشت لدار النوم.. نسرين شبحت لصغار بإبتسامة شفقه وقالت:شن جو القرايه حمزة.. حمزة:كويسه.. ☘☘☘☘☘☘ حطت سفرة العشي وقالت.. نبيله؛نفكر ناخد سفرة بكلاوة وندير زياره لحوش الواعر نتعرف عليهم اكثر.. عبد الرؤوف:وعلاش هما مايجوش.. نبيله:جوني ولامشيتلهم زي بعضه. عبد الرؤوف:وخيره باقي الجيران هما اللي جوك؟ نبيله:عادي ياودي عادي..وبعدين هما اول من ودنا ياعبدالرؤوف.. سكت وقعد ياكل.. نبيله:هاه شن قلت.. عبد الرؤوف:بري.. نبيله بضحكه:بنمشي بشورك ومن غيره اني ع سفرة البكلاوة.. شبحله ع جنب... نبيله:الدنيا غاليه واختك مفلسه والقضيه الجديده مازال ماخديتش اتعابها. هز راسه وقال؛تمام..مادوري شي.. نبيله بضحكه:يعيش عبروف يعيش.. وهو ياكل بدون مايدير اي تعبير ع وجهه.. وهي تضحك عليه... ☘☘☘☘☘ دقت باب الدار.. جاها صوته وهو يقول.. "تفضل" فتحت الباب وخشت وهي تقول؛فاضي.. الجالي؛تعالي.. مشتله نسرين وقعمزت مقابلاته ع المكتب وقالت؛شن جو الخدمه.. الجالي؛ماشيه.. نسرين؛امم..اليوم كنت عند نجاه.. قعد يشبحلها وهو ساكت.. نسرين:حالها يوجع القلب..خاشه حالة كآبه حتى ولدها طاهر مخلياته لأختها.. رفع حواجبه ونزلهم وهو يقول:لاحول ولاقوة الابالله.. نسرين بحزن؛والصغار حالهم يوجع اكثر منها يشوفوا في امهك كيف حالتها وتزيد تتأزم نفسيتهم.. الجالي يسمع بصمت.. نسرين؛قالت بش تطلع من الحاله هادي تبي تخدم..حطت الملف ع الطاوله وقالت..هي كانت تخدم في الشركه متاعكم وطاهر بعد الزواج بطلها..وتوا تبي تولي وقالت شوفي الجالي بالك يلقالي مكان غادي.. الجالي تنهد وقال:لعيون صغار خوي حاضر تو نردها للخدمه.. نسرين بإبتسامه؛عارفه انك ماتتقبلهاش بس قلبك يقعد ابيض وفيه خير للناس كلها.. ابتسم وقعد ساكت.. هي ناضت وقالت؛ماتبي شي.. الجالي؛قهوة.. نسرين؛من عيوني.. ومشت طلعت من الدار وسكرت الباب.. هو تنهد..وشبح للملف.. خداه وفتحه ويدوب شافه..بعدين سكره وحطه ع تركينه وكمل شغله ع اللاب توب... ☘نسرين بلغت نجاة ع اللي صار بخصوص الخدمه وقالتلها لازم تمشي غدوة.. وهي بعدها اتصلت بصابرين بش تخلي الصغار عندها ووصتها ع مدرسه حمزة.. ☘تاني يوم الصبح.. طلعت من الحوش وهي لابسه سروال جينز ازرق عليه بلوزه طرفين من داخل بيضا ومن برا سودا ووشاح ابيض مخربش بالاسود ومادارتش ع وجهها اكثر من كريم مرطب.. فطرت صغارها ولبستهم ووتت حاجاتهم وطلعت هي وياهم لحوش اختها حطتهم عندها.. بعدين توجهت للشركه.. لما خشتلها.. كانت حاسه وكأنه في ثقل كبير ع صدرها.. تفكرت ايامها فيها مع الطاهر كلها..كانت حدمع بس شدت دمعتها بقوة وماخلتهاش تنزل.. تلاقت هي وموظفين تعرفهم.. سلموا عليها وعزوها...بعدين كملت طريقها لمكتب الاداره.. وهني الثقل زاد.. بتخدم عند الجالي اللي لاطيقه ولايطيقها... وكانت خايفه منه يحصل فيها فرصه ويتفنن في اهانتها.. وصلت لمكتبه وقالت في نفسها.. "ماتبانيش ضعيفه ماتبينيش خوفك خليك اقوى منه" خدت نفس.. بعدين مشت دقت الباب اللي كان مفتوح.. هو قام عيونه وشافها... هي بجديه تامه؛السلام عليكم.. هو فرد ظهره ع الكرسي وقال:تفضلي.. هي خشت ومشت لين وصلت في المكتب.. الجالي:قعمزي.. قعمزت.. الجالي:امس نسرين جابتلي ملفك وقالت تبي تولي لخدمه..واني ماعنديش مشكله..اساسا في مكان شاغر وكان من نصيبك.. هي هزت راسها بصمت.. الجالي:لكن...لازم تعرفي انتي هني ماليكش بيا اي علاقه مافيش بينا اي صله لانعرفك لاتعرفيني..محاباة عندي مافيش زيك زي اي موظفه هني تبي تثبتي نفسك اثبتي نفسك بشغلك وبس.. هي استفزها كلامه هلبه..رفعت حاجبها وقالت:اسأل الموظفين القدم عن المهندسه نجاة المعلول حيقولولك انها تقدر تثبت نفسها لدرجة تحولك من مكانك وتقعمز فيه.. هو ضيق عيونه وابتسم وهو يشوفلها وقال:ع هكي مفروض نندم اللي عطيتك فرصه.. نجاه:لاماتندمش مش بالي شي توا كل همي اني نطلع من الحاله اللي اني فيها وبس.. قعد يشبحلها وهو ساكت.. وهي تشوفله.. نظراته اربكتها بس حاولت تقعد متحديه للاخر.. ميل راسه شويه و هو مازال مضيق عيونه وقال:شن حال الصغار؟ نجاة؛الحمد لله..تشوف فيهم اكيد لما يجوا يحكوا عنك هلبه هما.. ابتسم وقال:شن يقولوا؟ نجاه:يلعب معانا يجيبلنا يحكيلنا... هز راسه وهو يشوف للمكتب بعدين شبحلها وقال:امتى تبي تبدي.. نجاة؛من توا.. ضحك نص ضحكه بعدين شبح للباب.. ونادى...ميسون.. ونجاه تشبحله ودمها محروق من هزوته.. خشت السكرتيره.. الجالي:ارفعي الباش مهندسه لمكتبها.. :حاضر..تفضلي باش مهندسه.. ناضت نجاه ومشت طلعت مع السكرتيره وهو بعد ماكان بعيونه معاهم.. شبح لدرج مكتبه.. فتحه وطلع منه ملف نجاه... فتحه..وقعد يشبح لصورتها.. ملامحها كانت تبان لئيمه بس في نفس الوقت جميله.. ابتسم ابتسامه جانبيه بعدين سكر الملف ورده لمكانه.. ورجع لهي بشغله.. ☘☘☘☘☘☘ في حوش صابرين ... نجاه؛سامحيني قلقت راحتكم.. صابرين؛بالعكس مونسيني.مراد يطلع من الصبح ويروح المغرب .. نجاة؛هو اللي روح بحمزة.. صابرين؛لااني ماكانش فاضي.. نجاة هزت راسها وقعدت ساكته.. صابرين؛شن كان جو اول يوم خدمه.. نجاه مسحت ع وجهها وقالت؛-باهي اللي طلعت وخدمت نفسيتي تحسنت هلبه.. صابرين؛وهداكا الصامت.. ضحكت نجاه.. صابرين:خيرك تضحكي.. نجاة؛طول اليوم وهو يستفز فيا بس اني حرقتله دمه مزبوط..شادلي هديكا الضحكه..وقلدتها..ضحكت وقالت مبرده.. صابرين بضحكه:اول مرة تحكي عنه من غير ماتسبي.. نجاة:ممكن لانه كان شبه عادي معاي..اكيد موصياته نسرين.. صابرين؛ايه وباهي..انتي اكيد ماتبيش تطلعي من العيله.. نجاة:مش بيدي طلعت غصب عني.. صابرين؛لاياماما ماتنسيش صغارك هادم اقوى رابط.. نجاة؛حولي الموضوع هداكا من راسك مستحيل وانتي تعرفي.. صابرين؛انتي خليه ممكن..المهدي انسب واحد ليك يرعاك ويرعى صغارك وهو اكثر من كان يحب طاهر في خوته اكيد مش حيتحمل يقعدوا بعاد عليه.. نجاه قعدت تسمع في كلامها وتفكر فيه.. صابرين؛خشيله من باب صغار خوه..ومن باب انك مراة قاعده بروحك في شقه والدنيا تخوف..نجاة ياوخيتي خوتك طيور الشر صدقوني مش حيخلوك في حالك. نجاة؛علاش شن سامعه!؟ صابرين؛مرت بوك تتصل وتلقح وكيف قاعده بروحها وشيابينها شن يقولوا..واضح مش حيخلوك في حالك.. نجاه قعدت ساكته وهي خايفه.. صابرين؛لازم تتحركي وديري حل..في النهايه المهدي مايحبش مرته وماعنداش مشكله ياخد التانيه والتالته.. والكلام بدي يخش لعقل نجاة وبدت تفكر فعلا كيف طيح المهدي.... (مش مسامحه اي وحده تقرا وماتتفاعلش)
#شعور #طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
