#طوبى "جنة طوبى"
#جمان_فريد
#الجزء_الحادي_والسبعين"روزناما"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#دعاء_ذي_النون
ْدعاء ذي النون وهو في بطن الحوت،
قال النبي ﷺ:
دعوة ذي النون وهو في بطن الحوت:
لا إله إلا أنت سبحانك إني كنت من الظالمين، فإنه لم يدع بها رجل مسلم في شيء قط إلا استجاب الله له.
الالباني في صحيح الترغيب والترهيب ١٨٢٦
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 سيأتي على قلبك فترة أثقل من الجبال، ليست لِتكتئب، بل"لتسجُد وتقترِب"🍃
_________________________________________
"الاخ طالب يشوفك استاذ"
هو شافلها وقال:ولي لمكتبك
هزت السكرتيرة راسها تنفيذا للأمر ومشت..
هو غير نظره ليه وكان يحاول يخفي..
توتره..وخوفه..
وبمكابرة قال:تفضل..
قدم كم خطوه خش بيهم داخل بعدين وقف..
ومختار سكر الباب..
بلع ريقه..بعدين التفتله وقال..
/تفضل قعمز..
لف بجسمه كله ليه وهو يشوفله بنظرات امتعاض..
/مش جاي نقعمز..
قعد يشوفله وهو ساكت..
اشرله ع نفسه بإيديه وهو يقول..
/هاني جيتك برجليا..مش هدا اللي تبيه!؟
عقد حواجبه وهو يشوفله ومازال محتفظ بصمته ويسمع فيه وهو مكمل يقول بإنفعال متصاعد..
/اهو قدامك مافي شي يمنعك عني..خود تارك مني اني..
بتحبسني احبس..بتع ذبني ع.ذب بتق.تلني اق.تل
واني مسامحك والله مسامحك..رفع ايديه وهو يقول..
/ياربي اني مسامحه دنيا وآخره شن مادار فيا
بدوا الدموع يملوا عيونه..وقلبه تتسارع نبضاته..
نزل ايديه وهو يقوله..
/دير فيا ماتبي فش غلك فيا..خود ثارك مني..كان في حد ظالمك في حياتك اني..اني مش حد تاني..مش خواتك
خواتك مادخلهمش في النص..خواتك ماليهم ذنب فشي مادارولك شي اني اللي درت كل شي..دير فيا اللي يخطر على بالك المهم خلي خواتك في حالهم...
حس وكأن في يد اخترقت صدره وشدت ع قلبه وقعدت تعصر فيه وهو يسمع في بوه شن يقول..
لطفي بألم..
/كان ماتبيش تكونلهم سند يتكوا عليه..ماتكونش الريح اللي تهدهم..خليك في حالك وخليهم في حالهم عيش حياتك اللي تمنيتها وهاك وصلتها وخليهم هما يعيشوا حياتهم مستورات مرتاحات...نسألك بالله ماتكونش انت ومصايب الدنيا عليهم..
ومازال يسمع بصمت ظاهري عكس اللي قاعد يصير في داخله..
لطفي برجاء؛تربح هالطلب هدا بس مانبيش منك غيره..لانبي فلوس ولانبي عز ولانبي جاه..مانبي منك شي غير انك تخلي خواتك في حالهم وربي يسعدك ويبعدك..
رفع حاجبه وابتسم ساخرا وهو يقول..
/يابخته ولد عيت بن موسى بنسيب زيك..سترته ومابيتش سمعته تتشوه قدام الناس وقاعد تتنازل وتترجى ع خاطره ..في الوقت اللي فيه آباء يكبروا في اخطاء صغارهم ويطلعوها ع الملأ ويتبروا منهم بعد مايشهدروا بيهم..!
لطفي كان يسمع فيه ويشوفله بإبتسامة خيبه خفيفه وعيونه يلمعوا بالدموع...
ضيق مختار عيونه وقاله ؛وبعدين لحظه لحظه..توا جيت عطيتني هالمحاضرة ع اساس شني!.؟
ع اساس اني قاعد نضر في بناويتك ولاشنو..فتح عيونه ع وسعهم بدهشه مصطنعه وهو يقول..قصدك انت فاهم ان اني ورا اللي صار لنسيبك؟!..ضحك نص ضحكه ساخره وقال..
مفروض مانستغربش انت هكي من زمان اي مصيبه تصير في حياتك وراها مختار..كل مصايب الدنيا وراها مختار..الكوارث الطبيعيه سببها مختار..رفع سبابته فوق وهويقول..حتى ثقب الاوزون داره مختار..
نزل لطفي راسه شويه وغمض عيونه بإحباط..
هو بتعالي وكبر قال:راجل بنتك مجرم كبير ياما داير غير هادي بس اللي طلعت ع السطح.شوف روحك يااب يامثالي كيف لوحت بناتك بإيديك للنار وحده عطيتها لمليشاوي مصيره معروف..والتانيه..غمض عيونه وهز راسه وهو يقول..
بلاش التانيه..فتح عيونه وشافله وهو يقوله...الخلاصه ياحاج لطفي..بناتك مافي حد ضرهم غيرك انت وذنبهم مش حيكون في رقبة حد تاني غيرك..زي ذنبي اني اللي حيقعد في رقبتك وهاك قاعد تدفع في ثمنه..
رفع لطفي عيونه في مختار وهو يشوفله بنظرات حسره عميقه..
نظرات خلت مختار يحس بكتمه مفاجئه جاته ع صدره...
شويه قال لطفي..
/نقولك حاجه اول مرة نقولها في حياتي لحد..ع قد مادرت وع قد ماقاعد دير توا قعدت نصارع في نفسي..تعرف ع شني..ع حاجه وحده..مانبيش نطلع من الدنيا..واني غاضب عليك...
"ماتخلنيش نطلع منها واني غاضب عليك"
قاله الجمله الاخيره ومشي طول للباب فتحه وطلع وهو هارب بدموعه اللي غلبوه ومسحهم بسرعه...
وهو ماشي جي بين عيونه مشهد لايمكن تنساه ذاكرته..
صار يوم وفاة ورده ...
كلام قالاته ورده في صبح هداكا اليوم للطفي وهي تبكي بألم شديد..
《مانيش مسامحته يالطفي مانيش مسامحته..
:صلي ع النبي وفكينا من سيرته ع الصبح..
:لطفي..لطفي ولدي هدا اللي ياما حاميت عليه ودافعت عنه ماجاني من وراه كان القهرة والوجع..خلا قلبي يقسى عليه كيف ما قلبه هو قاسي علينا ولامرة رحمنا..اني غاضبه عليه..
:استهدي بالله ياورده خليه لربه هو يتولاه..
:لالا..اني غاضبه عليه لين نموت..لين نموت يالطفي ماني مسامحته...وكان جاك في يوم قوله ان امك ماتت وهي غاضبه عليك..
:موت شنو يامراة تعوذي من الشيطان ومعاش تذكري الموت بكل..
:اني قداش ليا ميته يا لطفي من هداكا اليوم واني ميته》
🍃وصل في سيارته..وركبها..
خدي نفس عميق وطلعه بحرقه...
بعدين قال..
"إنا لله وإنا إليه راجعون"
وشغل السيارة وتحرك...
🍃ولكنك ارتضيتَ لي الأذى ، و أنا الذي كنتُ أحسبكَ
أرقُّ على قلبي مني....جبران خليل جبران🍃
☘☘☘☘☘☘
"شكرا خالتي عواطف"
عواطف بضحكه؛نجيه ياربي..عفوا حبيبي..
ع جية نجاح بسفرة ضيافه لأختها..
خدتها منها عواطف وقالت؛قعمزي..
اوس شاف لنجاح وقال؛عادي نجاح ننزل توا؟
نجاح:عادي لكن لعب في الشارع لا..
هو قال؛حاضر..
ومشي من حداهم يجري بالهديه اللي جابتهاله عواطف..
عواطف بإبتسامه؛نجيه ياربي ينزرط زرط الله يبارك..
نجاح بإبتسامه؛ايه والله زي العسل نسيمه ياعواطف..
عواطف وهي مبتسمه قالت:ربي يحفظه..
نجاح:آمين..
عواطف خدت فنجان القهوة ومعاه قطعة حلو وقالت..
/من ريحتها قهوة جنة ولا؟
نجاح؛معاش نشربوا في غيرها ..
عواطف:فوتيها انتي مش باهيه ليك..
نجاح؛ايه بديت نسيب فيها..
رشفت عواطف من القهوة بعدين قالت..
/بنكلمك في موضوع..
نجاح؛والله عرفتك في وراك حاجه احكي..
تنهدت وقالت؛هو موضوع..
نجاح؛موضوع زواج ولا؟
عواطف:ايه موضوع زواج مالا شنو!..المهم هو واحد مرة جاب حاله للمستشفى شوره شافني وعجبته وقعد يجي هلبه..لعند مافتح معاي الزواج..
نجاح بريبه غير ظاهره؛شن قالك؟
عواطف:قالي ان حالته الماديه مرتاحه ومقتدر وتقدري تسألي عليا بش تتأكدي..
نجاح؛خليك مادياته ع جنب وقوليلي قداش عمره؟! وعزري ولالا؟
عواطف؛عزري شني متاعك هادي!؟ متزوج..
نجاح:قصدك بتجي ع ضرة!؟
عواطف؛وين المشكله لااني اول ولااخر وحده وبعدين قالي كل وحده فينا في حوشها وهو حيعدل بيناتنا..
نجاح بضيق:بتخشي ع حاجه صعبه ياعواطف..
عواطف بضيق:مش اصعب من عيشتي مع خوتك ونساوينهم اللي دايرني ملطشه..
نجاح بضيق؛حاشاك..لكن اني خايفه عليك ياعواطف..
عواطف؛خايفه يطلع زي هداكا الحقير..باهي حتى اني خايفه منه..هدا علاش نبيك تقولي لراجلك يسأل عليه كويس..
نجاح وهي تفكر:باهي..عطيني اسمه..
عواطف:الشارف الرحيبي قال عنده طانطات يخدم عليهم هو وخوته..يسكن في *******
نجاح:الشارف الرحيبي...باهي تو نقوله يشوف الموضوع..
عواطف؛بالله خليها في اقرب وقت عششلي في المستشفى وهو قريب كل يوم جاي يبي يعرف الرد..
نجاح وهي تحاول قلقها؛ان شاء الله..إن شاء الله خير..
عواطف تنهدت وقالت؛يارب...
🍃🍃🍃🍃🍃
درس سيارته قريب من المطحن..
نزل من السيارة ومشي بيخش المطحن وهو حامل ع ظهره اثقال همومه اللي كل مالها تزيد ماتنقصش..
اطلق السلام ع الشباب اللي يخدموا عنده بعدين قعمز ع الكرسي...
مرر نظره ع المطحن وقال:شن الامور ماشيه تمام؟
:ميه ميه ياحاج..
هز راسه بصمت..بعدين ركز نظره في الفراغ وسرح بتفكيره..
《 شوف روحك يااب يامثالي كيف لوحت بناتك بإيديك للنار وحده عطيتها لمليشاوي مصيره معروف..والتانيه..بلاش التانيه..》
التانيه وفي الحقيقه هي اكثر وحده باله مشغول عليها وكان حاس ان في شي كبير صاير معاها..بس كان يراجي فيها هي تجي تحكيله...
لكن..
في من اللي ماعنداش صبر ومايقدر يراجي..
الانتظار مش في صالحه..
"عمي لطفي"
استاقظ لطفي من سرحانه وشاف للباب..
لقي سيارة الجالي مدرسه قدام المطحن وهو يأشر بيده يحي فيه ويقول..
"كيف حالك"
لطفي ناض وطلعله وهو يقول..
/الحمد لله..كيف حالك انت..
وتصافحوا والجالي يقول..
/الحمد لله ع كل حال..
طلق لطفي يده وربع ايديه وقاله..
/إن شاء الله خير!؟
الجالي؛نقدر ناخد من وقتك شويه..
هز لطفي راسه بعدين قال..
/تفضل خش..
الجالي:لا انت تفضل معاي لطفي خل نهدرزوا في مكان هادي ..
لطفي مرر نظره ع الشارع بعدين التفت لجماعة المطحن وقالت..
/زي العاده بعد المغرب سكروا..
:حاضر ياحاج..
ومشي لطفي ركبت سيارة الجالي..
وبعد ماركب الجالي تحرك طول...
واحد من عمال المطحن قعد معاهم بعيونه لين درقت السيارة بعدين قال..
/شهادة لله المخلوق هدا مانزلي من هني..
واشر ع رقبته..
:شفته كيف قعد يكلم فيه وهو مقعمز في السيارة كان الحاج قعد مقعمز وماطلعلاش..
شويه حرك نظره في المكان االلي كان مقعمز فيه لطفي وقال..
/الحاج نسي هاتفه..
:حطه غادي لين نكملوا..
ومشي العامل التاني حط التليفون ع واحد من الرفوف بعدين خش عليهم زبون انشغلوا معاه...
🍃🍃🍃🍃🍃
ويدرس الجالي سيارته في مكان مستخطي..
قاله لطفي:خير ياولدي شن في؟
تنهد الجالي وهو يشوف القدام تنهيده مبالغ فيها ع اساس انها تنهيده ضيق بعدين قال..
/مجبور نحكي والله مجبور مافيش حل تاني خلاص استنفدت كل الحلول..
شاف للطفي وكمل يقول..
/يعلم الله ياعمي بقيمة وقدر بنتك عندي..ويعلم الله قداش دللتها وداريتها وعاملتها كأنها بنتي مش زوجتي..لكن مش عارف دلالي ليها فسدها ولاهي هكي من الاول..
لطفي:خش في الموضوع طول من غير مقدمات..
هز الجالي راسه وقال وهو يتكلم بطريقه اقناع مع تعابير وجه ونبرة صوت مصطنعه..
/بنتك ياعمي مش عارف كيف ندير فيها سايرت راعيت ع قد مادرت معاها شي شي..شكاكه للمليون تعبتني هلبه لين دارتلي مشاكل في الخدمه وتوا بتكملها مع ماليا..
حطت راسها براس ارملة خوي طاهر الله يرحمه معاش تبيني ندور حتى الصغار في جرة غيرتها..وياريته عندها مبرر مافيش بكل وهي عارفه ان المراة هادي زي اختي خديجه بالزبط عندي وفوق هكي هي قريب تولي مرت خوي المهدي يعني هي تبي ديرلي مشاكل حتى مع خوي القدام!!؟..
تي مش هني المشكله..المشكله بنتك طالبه الطلاق ع خاطر اوهام موجوده في عقلها هي بس!؟ تبي تشتت العيل وتشردها من قبل لتجي!؟..قصدي ياعمي بنتك وسامحني فيها قليلة عقل..ومتعبه هلبه..وسامحني في هادي ماتحترم في حد..خواتي يتصلوا بيها ماتردش عليهم..ياودي حول خواتي ع جنب..امي امي..مراة كبيره تتصل بيها ماتردش عليها!؟ معقوله!؟..هدا تصرف وحده متربيه!؟راهو مع العلم ماليا مايعرفوش اللي بيني وبينها لتوا قاعد نرقعلها وندافع عليها ونبررلها هدا كله ع خاطر حاجه وحده بس..مانبيش نشوه صورتها في نظرهم..اني اللي مخوخمني انها ماكانتش هكي في البدايه..معاش عرفت في الاول كان تمثيل بعد طلع الحق ولافي من لعبلها بدماغها وقاعد يوجه فيها بش يخليها تخرب حوشها بيدها...حط ايديه ع جانبي راسه وقال..تعبت معاها والله تعبت..وصلتني لنتيجه انها نادمه ومعاش تبيني وشورها توا استاقظت لفرق العمر ومعاش عاجبها..ولاشني مش عارف..مش عارف..
وتنهد بمبالغه..ونزل دمعه بعدين مسحها طول..
وشبح للطفي وقاله..خيرك ساكت ياعمي تكلم..راضي ع حال بنتك هدا؟.
لطفي شبح القدام وقال..
/هي ماحكت شي..ولافي مرة حسستني ان في بينكم مشاكل..لهدا خليني نسمع منها بعدين نقولك تجي تقعمز انت وياها وتتناقشوا قدرتوا تتفاهموا وتتصافوا خير وبركه..ماقدرتوش كل شي قسمه ونصيب..
الجالي صدمه رد فعل لطفي وزاد خوفه اكثر وخلاه يكمل شغل اسطورياته وهو يقول...
/اني مانبيش نخسرها مهما دارت ومهما كان وضعها معاي ولامع غيري مرتي نبيها ونبي بنتي تتربى بيناتنا..اني ياعمي لطفي كلمتك لأني عارفك قداش تأثر عليها وهي ماتقدرش تردك حاول معاها كلمها عقلها وقوللها راجلك شاريك مهما شاف منك ومهما درتي مايقدرش يرخي بيك..
لطفي هز راسه وقال:إن شاء الله خير..ان شاء الله خير..
ترا بالله نزلني بداية الطريق خل ناخد تاكسي..
الجالي بتوتر:وعلاش التاكسي اني نوصلك وين ماتبي..
لطفي:لابارك الله فيك..مشواري بعيد قدم بيا القدام قدم..
الجالي ماباش يلح عليه لأنه لاحظه حاد في اسلوبه معاه..
حده قاله..حاضر...
وقدم بالسيارة لبداية الطريق..
لطفي قبل لينزل قال؛راجي مني اتصال..
بعدين نزل من السياره ومشي وخلا الجالي مرتبك ومتوتر ع الاخر..بعدين تحرك بالسيارة...
🍃🍃🍃🍃🍃
وتمر الساعات..
ولبعد آذان العشاء لطفي مابانش..
🍃مطيره بقلق؛لاكلمني ولاكلم وحده من البنات..
علي بقلق:مايردش ع تليفونه يخبط لين يفصل..
مطيره ماتبيش بوها ينشغل هلبه قالتله..
/تلقاه مشغول في حاجه..
علي:حتى كان مشغول يرد عليا..
ع طلعة طوبى للجنان وهي جايتهم تقول بقلق..
/شن صار؟
علي:مايردش يابنتي ع قد ماخبطت..
طوبى بخوف:ياربي وين مشي؟
مطيره؛يستر الله صاحب الستر..
وعلي قاعد يتصل ويعاود..
طوبى وهي تشوفلها بقلق قالت..
/بالك قال للولاد اللي يخدموا في المطحن وين ماشي..
علي:ايه مزبوط صح..قعد يدور في الارقام ع رقم واحد فيهم لين لقاه..
واتصل بيه طول..
شويه طلعت فردوس وهي تقول..
/شن صار..
علي اشرلها تسكت وقال..
/هاه ياعبد الله وينك انت؟
"في المدينه ياحاج علي خير في حاجه"
علي:لاغير بننشدك ع عمك لطفي قاللكم وين ماشي؟
"لاماقالش والله"
علي بضيق:لاحول ولاقوة الا بالله..
البنات خافوا..
علي؛حتى هاتفه مايدرش عليه وسيارته مخليها هني..
"ايه حقه جاه نسيبه ولد شنيبه خداه معاه في سيارته والحاج لطفي طلع ونسي تليفونه قاعد في المطحن راهو"
وجه علي نظره لطوبى وقال؛باهي باهي بارك الله فيك..
وسكر طول..
مطيره؛شن قالك؟
علي؛قال الجالي جي خداه بسيارته..
انصدموا الثلاثه وقلب طوبى انقبض..
علي:اتصلي براجلك اعرفي منه بوك وين؟
مطيره:خلاص مادام معاه ماعندها علاش متصله..
علي:اني نبي نعرف وينه انتي شن دخلك؟
سكتت مطيره وهي تشوف لطوبى بضيق..
نفس نظرات فردوس ليها..
جدها:هيا تحركي كلمي راجلك..
طوبى وهي تساير في جدها قالت..
/حاضر تو نكلمه..ومشت خشت طول من باب الكوجينه..
ولحقتها فردوس..
ومطيره معاهم بعيونها وهي قلقه ومعصبه في نفس الوقت..
🍃داخل..
طوبى وهي ماشيه لدار المعيشه ومعاها فردوس كانت تقول بخوف..
/النذل شن يبي فيه..شن يبي فيه..!
وخشت للدار ووراها فردوس وهي تقول بقلق..
/زعمه شن قاله الواطي هدا!؟
غرفه واريج وآلاء قعدوا يشبحولهم بتوتر..
واريج قالت؛ع من تدوي يام؟
فردوس:ع الحقير اللي ينقاله الجالي طلع جاي لجدك المطحن وواخده معاه في السيارة..
آلاء:حييه!
غرفه بخوف:اشبح شن قايله هالواطي!
طوبى وهي تمشي وتجي بتوتر وغضب..
/ ع أساس يبي يتغدا بيا قبل لنتعشى بيه..
فردوس:اشبح شن مقرياته خديجه يقوله..
اريج بكره:الله ياخدهم كلهم..
بدت طوبى تقرض في اصابعها من التوتر وهي تمشي وتجي ودموعها بدوا ينزلوا..
غرفه وهي تشوفلها؛طوبى قعمزي مش باهي ليك المشي والجي هكي..
حطت يدها ع رقبتها وقالت بنبرة مخنوقه..
/خايفه..
فردوس:علاش تخافي!؟ بالك تحسابي بوي بيصدق كلامه عليك..
طوبى بألم:عارفاته مايصدقاش لكن خايفه يقوله كلام يوجعه ولايهنيه..
غرفه؛ولد شنيبه واخته خديجه يدير كل شي..
طوبى لما سمعتها شن قالت انوجعت وضايقت هلبه وعبرت ع اللي حساته بإنفعال لما قعدت تخبط في راسه بالجنب براحة يدها وهي تقول..
/كله مني..كله مني..
كلهم انصدموا فيها وصاحوا عليها يقول..
"طوبى..شن دير..بطلي..خالتي!"
وجتها فردوس شدت يدها وعيونها تعبوا دموع ألم علي حالها وهي تقول..
/علاش تقولي هكي علاش شن ذنبك انتي!؟
بلعت ريقها وعبراتها وقالت وهي تشوف لاختها بخوف وألم..
/باهي وينه بابا وين اختفي!؟
ردت عليها وهي تشوفلها بألم..
/مرات اشبح وين ماشي لواحد من صحابه ولابالك عنده شريكه هدا..
فجأه رن تليفون غرفه..
قاماته وشافت المتصل وهما بحداها قاعدين يتناقشوا..
فتحت الخط وقالت..
/ايوه نبيله..
سكتوا وقعدوا يشبحولها..
"ايوه غرفه كيف حالك؟"
غرفه:الحمد لله شن حالك انتي؟
"الحمد لله..بنقولك غرفه بوك عندنا من المغرب"
شافتلهم غرفه وهي تقول..
/بوي عندكم؟!
"يعني مش قايللكم ؟"
غرفه؛لالا..
"امم..هو ليه توا فوق الساعه مع خالك في مكتبه حسيت ان في شي وقلت في بالي اكيد عرف بموضوع طوبى"
غرفه وهي تمرر في نظرها عليهم قالت..
/قبل ليجيكم كان مع الجالي..
"اها..يعني هو اللي سبق"
غرفه:زي ماقالت طوبى بيتغدا بيها قبل لتتعشى بيه..
وطوبى تسمع وتشوف لغرفه بتوتر ودموعها مازال ينزلوا..
"تصرف متوقع من واحد زيه خصوصا انه رافض الطلاق..بس في حاجه استغربتلها"
غرفه:شن هي؟!
"قبل خمسه دقايق بالزبط جي التارقي وتوا معاهم في المكتب"
غرفه بإستغراب؛التارقي!؟
بدت ع وجوههم كلهم ملامح الاستغراب وعدم الفهم..
بالذات طوبى..
~~~~~~
ضام ايديه لبعض وهو يشوفله ويقول...
لطفي:عاشرتك شهور وشفت منك مايخليني نحس اني معاشرك عمر ومواقفك معاي خير دليل..درت معاي اللي ماداراش ولدي اللي من صلبي..ويعلم ربي قداش نعزك ونحترمك وعندي فيك ثقه فوق الحدود..
عبد القيوم وهو يسمع فيه ويشوفله تلقائيا حس بالخوف..
ملامح وجه لطفي وطريقته في الكلام مايطمنوش..
لطفي:ياولدي الدنيا فيها حياة وموت واني نبي نطمن ع حق بناتي وماليا..نبي نوصيك واهو قدام عمك المحجوب..ردبالك رزق الدنيا يخليك تجور عليهم ولاتتخلى عنهم راني حاسبك
ولدي دير بناتي وخياتك وماليا ماليك..
عبد القيوم وهو عاقد حواجبه بقلق قال..
/الطريقه اللي تحكي بيها..تخوف..
لطفي؛ندوي عادي ياولدي نبي نضمن حقهم بس..نبيك تعاهدني قدام عمك المحجوب انك تتقي الله فيهم..
عبد القيوم؛نعاهدك والله مانضرهم ولانخليهم ولانخليك وعينك حيه ان شاء الله وتشوف..
ابتسم لطفي وهز راسه بإيجاب بعدين تنهد وقال..
نبيك في خدمه وسامحني ثقلت عليك..
عبد القيوم؛توا كنت ولدك!..
ابتسم وقال؛ولدي..واعز..ومش خافي عليك شي من المشاكل اللي حني فيها..اكثر شي شاغلني توا هو حال بنتي الصغيره..
حاول ع قد مايقدر مايخلي شي يبان عليه من اللي قاعد يصير بداخله..
ولطفي مكمل يقول..
/صايره معاها مشاكل ليها مدة والباين اخرها فراق بينها وبين ولد شنيبه..
🍃صدمه..صدمه قويه..تأثيرها غريب جدا...
لاعرف يزعل...لاعرف يفرح..
احاسيس ومشاعر تخلطت وولى مش فاهم نفسه هو شن كان وضعه وقتها وبشن حس!..
قعد يسمع في لطفي شن يقول وقلبه يرجف..
لطفي:بنتي هادي الوحيده..اللي لو غابت عيني مش حتلقى شي تنسند عليه..واني نبي نديرلها شي تلقاه بعدين ونبيك تكون ع درايه بيه..
غير عبد القيوم نظره للمحجوب وهو قلق ع الآخر..
والمحجوب يشوفله بنظره غريبه باينه فيها لمعة الدموع...
🍃🍃🍃🍃🍃
وفي حوش شنيبه..
تحديدا المربوعه اللي داخل الحوش..
كانوا الولاد مقعمزين مع بوهم يتفرجوا ع الأخبار..
ومحمد شنيبه كانوا عيونه في التلفزيون لكن عقله في عالم تاني..غير نظره للمهدي لقاه سرحان..
شويه قال:مهدي..
نبرة الصوت اللي كلم بيها المهدي خلا انظار ولاده تتوجهله..
المهدي:نعم..
تنهد بوه وقال:اسمعني شن بنقول لين نكمل كلامي بعدين رد..
عقد حواجبه وهو يهز في راسه بإيجاب.
والجالي يمرر في نظره بينهم..
محمد شنيبه:عائشه الله يرحمها سكرت شهرين متوفيه..وانت وصغارك حالكم مش عاجبني نحس فيكم كل حد في تركينه وسدرة زي اللي هبت اكثر بعد تزوجت عمتها نسرين قعدت بروحها واللي في سنها تبي ام معاها تعلمها وتوجهها وتعلمها الصح من الغلط..امك ماتعبا عليها ماتقدرش تتعامل معاها..وحتى انت تبي مراة ترد بالها عليك انت راجل مريض قلب و وتبي اهتمام..
المهدي قعد يسمع في بوه وهو يراجي فيه يكمل كلامه مايبيش يقص عليه.
وخوته عمر ونضال عرفوا شن ورا هالمقدمات..
بس مش عارفين من اللي مقصوده..
الجالي بس يعرفها وهو كذلك كان يسمع بتركيز..
محمد شنبيه؛اكيد فهمت شن قصدي من كلامي.
المهدي:ندوي؟
بوه هز راسه بموافقه..
المهدي:قبل كل شي في حد شكي مني ولامن صغاري؟
محمد؛اكيد لا امك وخواتك يخدموكم بعيونهم لكن في النهايه ليهم حياتهم وامك ماتعباش عليها..
المهدي:شوف بوي اني مقدر انك فتحت معاي الموضوع هدا من خوفك عليا وع صغاري وتبي من وراه مصلحتي ومصلحتهم..لكن سامحني زواج مرة تانيه مش حنتزوج وبالنسبه لصغاري ولادي الزوز معتمدين ع رواحهم ومش متعبين حد..وسدرة نشوف فيها مرتاحه قرايتها كويسه نفسيتها كويسه وهي متعلقه بأمي وامي متعلقه بيها وكل مرة تمشي لوحده من عماتها وحتى طوبى مرت الجالي تحبها هلبه ومتعوده عليها..
عمر ونضال شبحوا للجالي اللي كان مشبك ايديه الزوز وحاطهم اسفل بطنه ورجليه ممدودات وهو يشوفلهم ويسمعلهم وداير روحه خالي قضيه..
والمهدي مكمل يقول..
/بدال الام عندها اربعه الله يبارك..ماعندي علاش نكدرها ونوجع قلبها بمرت البو..
محمد قال:ولو ياولدي ولو صدقني بعدين اللي هدا بيلهى بحياته عنها ومش حيتفكروها كان بعد وين..من الاخير ولدي..
المهدي:هات من الاخير ياحاج..
محمد؛اني نبيك تربي صغار خوك مع صغارك وتلم شملهم وتخليهم كلهم يتربوا قدام عيني..
عمر ونضال انصدموا لما فهموا قصد بوهم وشبحوا طول للجالي اللي لقوه يشوف لبوه وهو يتكلم..
المهدي بعدم استيعاب:من صغار خوي!؟
محمد:صغار طاهر من غيرهم؟!
رفع المهدي حواجبه وقال..
/اها..هي هكي القصه..
بوه قال:قصة شني!؟
المهدي:نجاة..هي اللي دخلت في راسك الموضوع ولا؟
محمد بإنزعاج:كيف دخلت في راسي الموضوع تشوف فيا عيل قدامك!؟
المهدي:حاشاك مش هدا قصدي...
محمد بألم؛خوك هدا ظلمته وهو حي مانبيش نظلمه وهو ميت في صغاره نبيهم يتربوا قدامي ع عيني فوسطكم ومانبيهم يحتاجوا لحد..
المهدي:مش مخليينهم محتاجين حد..
محمد؛ياولدي افهمني مرت خوك ماعندها حد في الدنيا مراة بروحها في وقتنا هدا صعب عليها تربي صغار تبي معاها راجل ياولدي والراجل هدا لازم مايكونش غريب بش يتقي الله في صغارنا..
المهدي؛من قال طيح في راجل مش كويس اهو نسرين ربي رزقها بربيع اللي شرط عليها ماتخشش حوشه من غير ولدها..
محمد؛وشن يضمتي نجاه تاخد راجل زي ربيع؟! قولي..
سكت المهدي ماعرفش بشن يرد..
هني ادخل الجالي وقال..
/مهدي..
شبحوله كلهم..
الجالي:فكر في الموضوع من الناحيه اللي يشوفلها بوي صغار خوك يتامى يبوا اب قبل اي شي ومافيش زي عمهم ياخد هالمكانه..صغارك جربوا اليتم وحسوا بيه اكيد حيتفهموا ويرضوا صدقني..
نضال وعمر قعدوا مسهمين فيه وكأنهم خدوا ضربه ع رووسهم..
محمد؛يسلم فمك..هدا قصدي يامهدي..
الجالي:وبعدين وسامحني بوي في اللي بنقوله توا.
بعدين يامهدي خير من مشيها وجيها ع الحوش هكي..
هز محمد راسه موافقه ع كلام الجالي وهو ساكت..
المهدي غير نظره للتلفزيون وهو ساكت..
الجالي؛تعرف غير مش فيها خراب عليا راني خديتها اني ع خاطر الصغار...
نضال وعمر قاعدين في حالة صدمه وهو قاعد يصدم فيهم اكثر واكثر..
محمد؛مهدي..
المهدي غير نظره لبوه وقال..
/سامحني بوي مانقدرش..
الجالي غير نظره للتلفزيون وهو يحرك في راسه يمين ويسار بأسف مصطنع..
قرب نضال من وذن عمر وقاله..
/فاهم حاجه؟
عمر وهو يشوف للجالي حرك راسه بالنفي..
محمد بعد ماسمع رد مهدي تنهد وقال..
/مالا مافيش قدامي كان حل واحد..
شبحله الجالي وخوته معاه..
محمد؛نعطيها الشقه اللي عطيتها لعمر يتزوج فيها تقعد فيها..
انصدموا ولاده..
عمر:كيف!؟
محمد؛ماعندك مادير بيها وكانك تبي حق اللي صرفته عليها نعطيك فوقهم..
عمر:اني قصدي كيف تجي تسكن هني!؟ وين نمشوا اني ونضال!؟
محمد:اهو حوشكم وداركم موجوده..
نضال؛بوي مايجيش راهو غلط في غلط.
محمد؛ياما منهم دايرين نفس الشي لانا اول ولا اخر ناس يديروا هكي..وبعدين مش انت اللي تعلمني الغلط من الصح..
نضال بضيق:مش قصدي لكن والله مايجي يابوي..
عمر:توا الجالي كان يدوي ع مشيها وجييها راهو من الاساس غلط وسامحيني معليشي .
بوه وهو يشبحله قال؛خلاص خودها انت..
عمر بتلقائيه وانفعال:لااا..لالالا..
والجالي يشوفله وهو يمسح ع لحيته ويعاود بتوتر..
محمد بحده؛خلاص غم فمك انت وياه وخلوني ندير مانبي..
المهدي:ناخدولها حوش في الشارع..
محمد؛قلت هني في وسط سور حوشي..
سكتوا الولاد وهما يشوفوا لبوهم..
بين المصدوم وبين المستسلم وبين اللي مش هامه شي غير انه ينفذ بجلده..
محمد بحزم؛هدا اخر كلام عندي.. وناض وهو يشبح لعمر وقاله..فضي الشقه قبل رمضان..
ومشي طلع من حداهم..
عمر بعصبيه؛بوكم خرف..
المهدي بحده؛ضم فمك ياحي.وان..
عمر بضيق:عاجبك انت عاجبك اللي قاله؟
المهدي:مش عاجبني لكن ماعندي مانديرله
نضال رفع حاجبه وقال للجالي
/شن قولك انت؟
الجالي شافله وقال بلامبالاه:اني داير فيلا ع حالي نشدها عمر:شكلي بنجيك ونقعد معاك .
فنص فيه الجالي..
والمهدي قال بتهكم؛بالله عليك!
استاقظ عمر لروحه شن قال وقال..
/شن يفدد ياراجل يطلع الواحد من عقله..
نضال؛كان سكر راسه اني بنطلع من الحوش..
عمر:خلاص نأجروا ونسكنوا مع بعض..
نضال:هو هدا..
المهدي تنهد وقال؛لاحول ولاقوة الا بالله..
الجالي؛كان درت اللي يبيه راهو مافكرش بكل..
المهدي:ونقعد طول عمري عايش ع كيف هدا وهداكا؟
الجالي:وشن فيها كان تنازلت ع خاطر صغار خوك!؟
المهدي:صغار خوي صغاري مانخليهمش حق عليا نرعاهم لكن مش بالطريقه هادي!! اني اصلا مش متقبل فكرة اني ناخد مراة كانت لخوي..
عمر ونضال غيروا نظرهم للجالي.
لاحظوا ان وجهه تغير لونه وهو يقول..
/لاعيب لاحرام..
المهدي:عارف لكن ما نقبلهاش ومش فرض عليا بش نديره غصب عني..
الجالي رفع يده وحركها بلامبالاة بعدين قال..
/ديروا اللي يريحكم اني مادخلي بحد..
بعدين ناض وهو يقول..
/مروح..
لف ومشي بيطلع وهو يحي فيهم بحركة اليد...
وطلع من حداهم..
🍃ومن الحوش كله..
ركب سيارته وتحرك بيطلع من الشارع...
لما وصل في نهايته خشت سيارة لطفي..
هو لما شافه ارتبك وعطاه المجال بش يفوت..
ولطفي خش طول بالسيارة بدون مايشوفله ولايعبره..
هو زاد ضايق وتحرك بسيارته وطلع من الشارع...
وشويه وتجي سيارة التارقي وتخش..
🍃كان مضايق وقلق...
وصل للحوش...شاف لطفي خاش بالسيارة لحوشه..
غير نظره عنه وخش بسيارته لحوش المهدي..
درسها..وركب الدروج..
وصل في شقته وخشلها...ومشي طول للكوجينه..
جي للثلاجه وفتحها وطلع شيشة ميه ومشي قعمز ع الكرسي وهو يفكر...
يفكر في اللي قاعد يصير معاه..
بعد اخر لقاء ليه مع طوبى عاش في حالة صراع عذباته هلبه.
غصب عنه قعد يفكر فيها..وقلبه زاد حب ليها اكثر من قبل..
خاف ع نفسه هلبه وخاف عليها حتى هي...
الانسان لما يتحكم فيه قلبه حيتصرف تصرفات بعيده عن العقل وحتما حتكون عواقبها وخيمه..
وهو بشر مش معصوم من الغلط..ممكن يجروه هوى نفسه والشيطان ويطيح في مستنقع الحرام..
لهذا اختار انه يبعد ع قد مايقدر..
بس يقدر الله ويصير شي يمنعه من الابتعاد..
ويلقى روحه في امتحان اكبر من اللي فات ..
كيف حيتعامل معاه!؟...
فتح الشيشه وقعد يشرب شويه شويه..بعدين سكرها ورمي نظره للأرض وقال..
/ياربي ساعدني في هالاختبار اللي حطتيني فيه...
صعب واجد..!
🍃🍃🍃🍃🍃🍃
"وين طوبى"
مطيره بقلق:في الدار..نحطلك تتعشي؟
لطفي بحده؛قوليلها تجيني المربوعه اللي برا..
ومشي طلع وخلاها..
مطيره بخوف؛ياستير ياربي...ومشت طول لدار المعيشه..
خشت عليهم وهي تقول..
/طوبى بوك يبيك في المربوعه اللي برا..
خدت نفس عميق وطلعاته..بعدين ناضت ومشت طلعت من حداهم وهما معاها بنظراتهم اللي كلها خوف..
🍃هي قعدت طول طريقها للمربوعه تردد في الحوقله وتفكر في ردة فعل بوها..كان متوقعه انه حيعاتبها ويعاركها حتى العراك ع سكاتها طول هالمده..
وصلت للمربوعه وخشت...
شافاته مقعمز ويبان سرحان..
مشت وقفت مقابلاته وقالت بتوتر..
/نعم بابا..
لطفي؛قعمزي.
قعمزت طوبى وهي تشوفله بقلق وحزن..
لطفي؛احكي شن صاير بينك وبين الجالي بالزبط..
دمعوا عيونها وهي تشوف لملامح وجه بوها اللي كان باين فيهم التعب رغم ملامح الغضب الباديه عليهم..
بعدين بدت تحكيله...
🍃🍃🍃🍃🍃
حطه في سريره وهو يشوفله بإبتسامه حب ويقول بهمس..
"كويست بنبينو بنبينو كويستا سي"
بعدين التفت شاف نسرين مشغوله بتليفونها..
خفت ابتسامته ومشالها خداه منها .
نسرين:خيرك!
ربيع قعمز حداها وقال..
/معاش نبيك تكلمي حد..
نسرين بضيق؛حاسه ان في شي صاير معاهم..
ربيع قرب منها وخداها لقلبه وقال..
/ماصايرلهم شي مستاحشينك بس..
نسرين ودموعها ينزلوا؛حتى اني مستاحشتهم..
ربيع قعد يمسح ع شعرها وهو ساكت..
نسرين:ياريت نقدر نشوفهم...
ربيع؛خلاص نانسي توا معاش تفكري في شي ارقدي بس..
شدت فيه وقعدت ساكته وهي تبكي..
وهو يمسح ع شعرها وعقله يفكر في حاجات مش مريحه...
🍃🍃🍃🍃🍃
" والله يابابا ماهكي..عقلي مش صغير بش نفكر هكي..
عارفاته من الاول يخدم في مكان في الوان واشكال ولامرة والله ولامرة سألته عنهم ولالمحت ولاحطيت الحاجه هادي في بالي اصلا..بابا اني شفت منه تصرفات وتغاظيت عنها تصرفات ماينكستش عليها بكل ومشيتها وقلت يامراة كبري عقلك وماتخليش الوسواس والوهم يخربوا عليك..وياريتهم كانوا وسواس ووهم"
لطفي وهو يشوفلها بحزن؛قلتي في من بعتلك رسايل؟.
نزلت راسها ودموعها يتقاطروا وهي تقول..
/ايه زوز في ورق ووحده ع التليفون..
وناضت مشتله وهي تحط ع الرساله..
وصلت فيه ومدتله التليفون..
وهو خداه وقري الرساله..
الموقف كان ثقيل جدا ومحرج هلبه بس لاسامح الله اللي حطها فيه..
لطفي وهو يشوف في الرساله قال..
/وانتي بعدين تأكدتي بروحك..
طوبى رشفت وقالت:ايه..وفي عندي جارتي عندها كاميرات مراقبه الكاميرا صورتهم وهما خاشين وهما طالعين..
لطفي هز راسه ومد التليفون لبنته..
طوبى بحزن:بابا..والله مادرت حاجه تقصر رقبتك ولاتحشمك والله العظيم..
شد يدها وقال:عارفك يابنتي عارف..
ناض وقف وهو يقوللها..بري خشي بري..
طوبى بألم؛والله مادرقت عليك الا من خوفي عليك بابا..
مسح ع شعرها وهو مبتسم قال...
/زيهم بالزبط..امك واختك يتحملوا في ارواحهم ويسكتوا ع وجعهم بش مايوجعونيش...
طوبى ابتسمت بألم...
وهو كامل يقول؛بري ارتاحي بنتي بري مادام بوك حي ماتنضاميش بعون الله..
طوبى بنبرة باكيه..
"ربي يطول في عمرك ومايحرمني منك.".
#روزناما
#طوبى.
...يتبع...
