#طوبى "جنة طوبى"
#جمان_فريد
#الجزء_السادس_والسبعين "تحالف"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#ليلة_الجمعة
¤إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا (56)¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃قم ضع يدك بيدي
قم غايتك هي غايتي🍃
_________________________________________
الساعه 2:00بعد الظهر
بالقرب من صالة الانتظار في مصحة القدس..
المحجوب واقف ع الجالي وهو يسمعله ويشوف فيه كيف يتكلم بغضب وهدوء في نفس الوقت وهو يحرك في ايديه..
الجالي:طوبى مرتي ع ذمتي شرعا وقانونا وانت رجل قانون وتعرف كويس ان مافي حد يقدر يمنعني نشوف مرتي وندوي معاها..
المحجوب:هي ماطلبتش تشوفك..
الجالي؛نعم! هي بالطلبه!؟ اني مش عارف انتم شن مشكلتكم معاش بديتوا تستوعبوا علاقتي بيها ولاكيف للمرة المليون نقول طوبى مرتي واني راجلها نخش نشوفها ونطمن عليها من غير ماتطلب.! اساسا من جابها هني!؟ اني..برغم انها طلبت مساعدة عبد الرؤوف وهادي غلطة كبيره منها لأنها قاعده ع ذمة راجل ومع هذا مشيتلها نجري قبله خشيت وسط المعمعه والخطر وطلعتها من المدرسه وماكان في شي هامني غيرها هي والعيل..لو عندك شك في كلامي برا اسأل الناس اللي شهدت وتو يقولولك..وابتسم تهكما وقال..
المشكله ياسيادة المستشار انك حطيت من يحميها مني من البنادم اللي رمي روحه في النار ع خاطرها قولي وقتها وين كانوا جماعتك!؟
المحجوب وهو رافع حاجبه ويتكلم من فوق نفسه..
/عبد الرؤوف قالي انك تبي تدوي معاه في الموضوع وتوصلوا لحل امنت عليها مادامك عنده...
ضحك ضحكة سخريه خفيفه وهو يمرر في نظره يمنيه..
المحجوب كمل يقول..
/ع العموم واضح انك ماتبيش تتفاهم ولاتوصل لحل..
شبحله وقال..
/اني نبي نرد مرتي..نبي نحافظ ع حياتي نبي نرجع استقرارنا اللي انسلب مني سلب..
المحجوب:هي ماتبيش..
الجالي:لما نقعمز معاها بروحنا بدون تدخل اطراف تانيه صدقني حيتغير موقفها..
المحجوب بتهكم؛اكيد تحت التهديد بالسلاح زي مادرت قدام كليتها يومها..
بدت ع وجهه ملامح الصدمه المصطنعه وهو يقول..
/كيف!؟ عاود عاود!!.تهديد بالسلاح وقدام كليتها!!..
ضحك بدهشه مصطنعه وقال..
/لااا..وخبط كفوفه ببعض وهو يقول..بعد هكي باااع معاش خليتوا خلاص..!
نزل ايديه وركز في المحجوب وهو يقول...
/لهالدرجه وصلت بيكم لهني معقوله! والله ماقادر لتوا نستوعب حجم الافتراء والبهتان اللي جاني!!؟ نهدد بسلاح بسلاح!! شن تشوف فيا قدامك مليشاوي ولامن جماعة المردف والمافيا!!؟ سيادة المستشار برا اسأل عن الجالي شنيبه بش تعرف شن تصدق وشن تكذب من اللي تسمعه..
عيب والله عيب حتى في حق تخصصك!
انت راجل قانون مفروض تكون عادل وفي اي قضيه او مشكلة تنعرض عليك تسمع من الطرفين..مش لأنهم عيلتك وهي بنت اختك لازم يكونوا صادقين وكل اللي يقولوه حقيقه واقعه!! مش اني اللي بنعلمك الحاجات هادي!
المحجوب قعد يشوفله بنظرات كبر وازدراء وهو ساكت..
الجالي هز راسه وقال:مع ذلك..اني مازال شاري وحنرد مرتي.. وبنتي بإذن الله حتتربى بيني وبينها والشيطان يندحر وناوي الشر شره يولي عليه...
بنمشي توا مانبيش ندير مشاكل بس قبل مانمشي بنقولك حاجه مهمه...
ابتسم مكرا وقال...
/ماتسيئس استخدام صلاحياتك ياسيادة المستشار...
ولف ومشي والمحجوب معاه بعيونه وهو يشوفله ببغض...
🍃🍃🍃🍃🍃🍃
وع وسائل التواصل..
انتشر اللي صار للمدرسه في صفحات وقروبات بمقاطع الفيديو..
المقال اللي نزل قبل الفترة ع المدرسه يمدح ويشكر فيها وفي القائمين عليها..
ماانتشرش زي ماانتشرت هالمشكله اللي كانت اشبه بالفضيحه..
فوق هكي..
عدد كبير من اولياء الامور شنوا هجوم لفظي ع المدرسه وقرروا تكون هالسنه اخر سنة لصغارهم فيها..
ومن جهة تانيه الكايدين ماشيين في تنفيذ مكيدتهم..
وقدموا تقرير في المدرسه..
مليان تهم..
بالتسيب...
والاستغلال..
تسريب اسئلة الامتحانات لبعض الطلبه..
الكوادر التعليميه اللي فيها ماعندهمش مؤهلات عاليه تسمحلهم يمارسوا مهنة التدريس..
اغلب هالتهم ماتخليش مدرسة خاصه تتسكر..
بس لما يكون تقرير زي هدا مدعوم اللي انقال عليه مايصيرش...يصير...
🍃🍃🍃🍃🍃
حالة طوبى النفسيه كانت صعبه في هداكا اليوم..
صارلها زي ماصار يوم وفاة بوها..
صمت..عدم تعبير حتى بالدموع..
راقده ع السرير وعيونها للروشن...
كان يمر قدامها شريط ذكريات..يتم ويرجع يتعاود..
شغل سدرة ع تأسيس المدرسه..
يوم الإفتتاح..
خدمتها فيها اللي كانت بكل شغف وتفاني واخلاص لين خلتها وحده من اهم المدارس الخاصه في المدينه...
جهد سنين راح في ساعه..
ومافي حد ليه ذنب في اللي صار غيرها هي..
🍃وفي هداكا اليوم قعدوا معاها اميمه ومطيرة اللي ع قد ماداروا ماقدروش يطلعوها من حالتها..
🍃🍃🍃🍃🍃
"نحس في روحي باهي"
عبد الرؤوف؛خليك في مطراحك ماطلعش هبالي عليك من غير شي طايرتلي منك..
اسكندر:تهور هدا..لاقدر الله كان نزلت لوطا شويه راك تحت الارض توا مش فوقها..
عبد القيوم؛الأعمار بيد الله..
عبد الرؤوف؛لاعاد مايجيش تلوح روحك للموت وتقول الأعمار بيد الله.
عبد القيوم؛خلاص اللي صار صار..المهم توا شن بصير في المدرسه ع الفيس مش معقبين جهد فسس البلاد كلها داروه فيها..
عبد الرؤوف وهو يفكر:صح..هدا اللي خلاني نشك..
عبد القيوم؛قصدك في حد كان يراجي في هالفرصه !؟
عبد الرؤوف:هدا اللي باين...شوف اني سألت ودورت وعرفت ان في مشكلة قبل صايرة بين نسيبتي وبين وحده كانت نائبة مديره في المدرسه ونسيبني لزتها..
اسكندر؛علاش!؟
عبد الرؤوف:ع حسب ماوصلني ان المراة هادي ماكانتش دايرة طيب وكانت تخدم من تحت لتحت بش طيح المدرسه ولما كشفتها نسيبتي طلعتها بالحمرا..
عبد القيوم:انتقام قصدك؟
عبد الرؤوف؛مش متأكد مجرد شك..المراة هادي توا ماسكه ادارة مدرسة تانيه ومافيش حواليها شبهه..لكن عقلي قالي.. ان ليها يد في الهجمه اللي صايرة ع المدرسه..
قعد عبد القيوم يفكر في صمت..
واسكندر قال:ومرات مش هي مرات في منافسين يبوها تتسكر ويحولوها من طريقهم بش يمشي سوقهم..
تنهد عبد الرؤوف وقال..
/وارد..
عبد القيوم بضيق..
/لاحول ولاقوة الابالله..من وين يلقوها ولامن وين..في عز مصيبتهم نزلت عليهم مصيبه اخرى لاع بال لاع خاطر..
عبد الرؤوف بألم؛يبلي ويعين ياجاري يبلي ويعين.
عبدالقيوم تنهد بضيق وقال؛ ونعم بالله...
واسكندر يسمع فيهم وع وجهه باديه ملامح الكدر..
~~~~~~~~~
سميره بوجع؛ياروحي عليها هالمراة ياروحي عليها فوق البلاوي اللي هي فيها تحصل هالرعشه مسكينه..
اسكندر بتساؤل؛خيرها هي شن صاير معاها؟
سميره بحزن؛يارويحتي طاحت في راجل معفن وعيلة اعفن داروها في البطيط...طالبه الطلاق توا والمعفن راجلها مسكر راسه مايبيش يطلق...
اسكندر ضيق عيونه وقال؛تقريبا خوه واخد وحده تانيه من عيلتها ولا؟
سميره؛ايه كان قاري فيها فاتحه وبعد اللي صار في خالتها رفعت عليه قضيه واطلقت..
توسعوا عيون اسكندر من المفاجأة ع الآخر..
سميره بحسرة:نقولوا هادي جتها في الريش لكن هديكا مسكينه بدير من هداكا المعفن صغار حتى كان طلقها بيقعد مربوط فيها بهالعيل..
وسميره تدوي واسكندر مش معاها بكل..
قعد عند كلامها ع اريج وسرح بتفكير فيها اخر لقاء جمع بينها وبينه واللي عرف فيه ان ع ذمة راجل تاني..
او كانت ع ذمة راجل تاني...
🍃🍃🍃🍃🍃🍃
"نتصل بيه مايردش عليا برا دير عليه دوره وشوفه"
نضال بضيق؛حاضر..ندوش قبل..
ومشي ركب الدروج وخلا امه في حالة قلق ع ولدها..
🍃وصل في داره وخشلها...
سكر الباب..وشاف للروشن..
بعدين قعد يمشي في اتجاهه بخطوات متثاقله لين وصل فيه..
وقعد واقف وراه وعيونه اللي كانت نظراتهم نظرات وجع ع الحوش اللي قاعد قلبه فيه...
🍃🍃🍃🍃🍃
"مكياج فايزة الخويلدي بروحه مش زي الارتستات متاعات الزيت"
فوزيه؛هدا علاش نبيها تمكيجني نهار الكسوة ويوم الحفله..
بنت راجلها الكبيره ميساء:حتى اني ماما معاك..
اختها جيداء؛خسارة اني حجزت عند وحده تانيه..
فوزيه؛تي غير اصبري انتي وياها لين ندوي مع المراة قبل..
شافت للباب وقعدت تنادي..نسوكه...يانوسه..
ميساء بصوت عالي؛فرخة مناسك ياهم تعالي..
فوزيه بإستنكار:شن هم هادي معاش تقوليه الكلام هدا!..
ميساء:منها هي البلي..
ضحت جيداء وفوزيه تفنص في ميساء..
ع خشة مناسك وهي تقول..
/نقرا ياناس نقرا اعتقوني لوجه الله..
فوزيه؛تي باهي فهمنا اعطيني رقم فايزة الخويلدي وبري..
مناسك تنهدت وقالت..
/سجلي هي..
ميساء:عطاك ربي في هالارقام اللي تحفظي فيهم..
فوزيه؛قل اعوذ برب الفلق..خلي اختك في حالها..
ضحكوا البنات وميساء قالت بضحكه..
/تي غير شن قلنا ماما!؟
وقعدت مناسك تسمي في الرقم وفوزيه سجلاته..
طلعت مناسك..
وفوزيه اتصلت بفايزة...
نادى لين فصل وماردتش..
فوزيه:شكلها مش فاضيه..
جيداء:لازم تحجزي توا ماما معاش في وقت..
فوزيه؛تو نزيد نشوفها هاليومين ونرد عليكم..
🍃🍃🍃🍃🍃🍃
وفايزة في هالوقت قاعده في حوش الواعر مشغوله معاهم واقفه جنبهم زي ماكانت ديما معاهم في الشده قبل الفرح..
هما عيلتها وهي بنتهم..
🍃🍃🍃🍃🍃
الساعه 10:46ليلا..
في حوش الصيد..
تحديدا في دار عواطف..
كانت دير في مكالمه..
وكلامها كان بصوت منخفض..
عواطف:خلاص غدوة نتلاقوا ونتفاهموا..
"تعرفي مش عارف كيف بنقدر نرقد بنقعد طول الليل واني مشتاق لجية اليوم التاني بش نشوفك"
ابتسمت بخجل وقالت؛حتى اني..
"تعرفي ياعواطف..مرتاحلك هلبه هلبه فوق ماتتصوري ومتخيل حياتي معاك حتكون حلوة لدرجة مانتصورهاش..توقعيها مني غدوة بعد نشوفك نمشي لحوش ماليك طول"
عواطف كانت فرحانه بكلامه طايرة بيه..
وهي تسمع فيه تخايلت حياتها معاه كيف حتكون..
ياقداش تأملت عواطف..وحست ان هدا عوضها عن
خيبتها السابقه..ومكافئتها ع صبرها طول السنين اللي فاتوا..
ابتسمت بخجل وقالتله؛مرات تغير لما تشوفني..
"مستحيل..اني حبيت شخصيتك ياعواطف اخر همي شكلك برغم اني متأكد انك حتطلعي جميله وتخطفي عقلي من اول نظره"
عواطف؛عقلك بس!؟
"كانك ع قلبي خطفتيه من زمان"
قعدت تضحك وفي داخلها شعور حلو ملي قلبها وخلاه يدق بقوة...
🍃🍃🍃🍃🍃
في المصحه..
تكييف الحجره اللي قاعده فيها طوبى خلا مطيره تريح في نوم عميق غصب عنها...
وتقعد طوبى فايقه من النار اللي قاعده تاكل في قلبها بعد اللي صار معاها في هاليوم..
حاطه السماعات في وذانها وتسمع في سورة آل عمران بصوت احمد العجمي..
ودموعها ينزلوا...
وصل في الآية 139..
لما سمعتها طوبى قعدت تبكي بكتمان...
¤ولاتهنوا ولاتحزنوا وانتم الأعلون ان كنتم مؤمنين¤
ومتابع قراية الآيات وكل آية تخش لقلبها وكأنه الله سبحانه وتعالى يخاطب فيها هي تحديدا..
لين وصل لآية
¤ أم حسبتم ان تدخلوا الجنة ولما يعلم الله الذين جاهدوا منكم ويعلم الصابرين"
هني هدت بكي..ورفعت التليفون ورجعت للآيه139..
وقعدت تسمع فيها بهدوء بس دموعها قعدوا ينزلوا...
لعند ماختم القارئ السورة بآية...
¤ياأيها الذين ءامنوا اصبروا وصابروا ورابطوا واتقوا الله لعلكم تفلحون¤
سكرت الصوت...
بعدين غمضت عيونها وقعدت تدعي بصوت مسموع ليها هي بس..
/يارب..لااعتراض ع حكمك وقضائك اللي قدرت عليا اني راضيه بيه لأن واثقة فيك ياربي ماتقدر عليا كان اللي فيه خيره ليا مهما كان صعب..اغفرلي لو بان مني اعتراض لو تمللت وقل صبري اغفرلي..وساعدني وكون معاي...وماتخليني نخذل حد عابي عليا ياربي..ياربي اني عمري ماخذلت بوي وهو حي ماتخلنيش نخذله وهو ميت ياربي..
وخنقتها العبرة وقعدت تبكي بصمت وبألم..
وماهدتش لين رجعت فتحت قرآن من تليفونها وقعدت تسمع فيه لين خداها النوم..
🍃وبرا الحجرة اللي كانت جاية ناحيتها اميمه وحسين معاها..
حسين؛اني لوطا تبوا شي كلميني طول..
اميمه؛حاضر..تصبح ع خير..
حسين؛قدامك كل خير..
مشت اميمه خشت الحجره وسكرتها.
وهو بعد خشت مشي بيطلع من العياده..
🍃طلع..ومشي ركب سيارته وفتح التكييف والراديو ع قناة جايبه برنامج سياسي قعد يسمع فيه..
فجأه..
جاته مكالمه..طول قام تليفونه..
ولما شاف المتصل استغرب..
فتح الخط ورد..
حسين؛خيرك متصله توا؟
"خليني نسلم قبل السلام عليكم"
حسين؛وعليكم السلام..بس كلام في وقت زي هدا قتلك معاش نبي..
"معاش حصلتك بكل "
حسين؛اكيد عندك علم باللي صار..
"ايه اكيد وجعتني طوبى ربي يفرج عليها"
حسين:آمين..
"احكيلي شن صار بالزبط"
حسين:اللي صار كاتبينه ع الفيس ماعندي مانزيد عليه وبعدين اني مانبيش نتفكر اللي صار بكل..عمري ماحسيت روحي عاجز زي اليوم بنت عمي في وسط الخطر ومش قادر نديرلها شي.
"بالعكس درت اللي عليك وزياده"
حسين؛لا والله مادرت حاجه بالذات لهالمسكينه وكان قاعدين في عزنا الاول وربي ماخليت كلب ولد قلب يضرها بشبحة..
حسناء ماعجبهاش الكلام من ناحيتين..
حساته قاصد يستفزها لأن في بينهم خلاف توجهات..
وفي نفس الوقت طريقة كلامه ع طوبى ضايقتها..
ومع هذا سايراته وقالت..
"قدر الله وماشاء فعل ربي يفرج عليها.."
حسين؛كلموا امي انتي وامك مش تنسي حاجه كبيره اللي صارت راهو..
"ان شاء الله إن شاء الله"
حسين:خلاص سكري وبري ارقدي..
"مازال بكري ع النوم شن رايك نهدرزوا ماسنجر.."
حسين ؛ماعنديش خلوق للكتيبه..
"باهي خلينا نهدرزوا لين ياخدك النوم"
حسين بنرفزة؛انتي خيرك شن جاك!؟
"مش قصدي شي نبي نغيرلك جوك بس حسين خيرك"
هو بإنزعاج:بري ارقدي بري..
بصوت حزين ردت..
"اني اسفه لإني نبي نريح نفسيتك ونخفف عليك اسفه هلبه.."
حسين بإنزعاج: بالله عليك فكيني من الجو الزايد مش ناقصك..
وسكر عليها....ولوح التليفون ع الكرسي اللي جنبه..
بعدين غير الراديو ع قناة للقرآن زاد الصوت ونزل الكرسي متاعه وغمض عيونه وهو يسمع..
🍃🍃🍃🍃🍃
وطلعت شمس تاني يوم..
اليوم من اوله كان جوه دافي معناها وسط واخره حيكون حارق..
طوبى كانت حالتها احسن من اليوم اللي قبله بعض..
وولت تكلم عادي بس كلمات محدوده...
🍃مطيره؛عاطيه الناس موعد مانقدرش نعطل فيه..
طوبى بصوت مبحوح؛ولايهمك عمتي بري مربوحه..
جتها مطيره وباستها من خدها وهي تقول..
/ربي مايحرمني من هالوجيه..
يدوب ردت عليها بإبتسامة...
تباعدت مطيره وقالت..
/بالسلامه توا..
طوبى واميمه وردوا..
"بالسلامه...في أمان الله.."
ومشت طلعت مطيره من الحجرة..
طوبى شافت لأميمه وقالت؛بري اخدمي خدمتك ماتعطليش روحك..
اميمه هزت راسها وقالت؛تمام..الساعه 12 ان شاء الله يديرولك خروج..
طوبى:ان شاء الله..
اميمه قعدت تشوف لملامح الكآبه الباديه ع وجه طوبى بعدين قالت..
/كلميني طول كان تبي حاجه..
طوبى هزت راسها وهي ساكته..
مشت اميمه طلعت وسكرت الباب..
وقعدت طوبى بروحها...
قامت تليفونها واتصلت بأبلة زينب ومازال ابله زينب ماتبيش ترد..
اتصلوا بعدها صاحباتها بش يطمنوا عليها..
هدرزوا عليها شويه..
وبعد مانهت مكالماتها معاهم..
اتصلت بزينب مرة تانيه ماردتش..
اضطرت تتصل بعاتكه اللي تخدم اداريه في المدرسه وردت عليها طول..
🍃"في مكتب المراقبه لأنها النائبه متاعك استدعوها في مكانك"
طوبى ودموعها في عيونها..
/قولي الحق عاتكه الوضع صعب!؟
احتفظت عاتكة بصمتها..
طوبى وهي تمسح في دموعها..
/قولي ياعاتكه ماتخافيش مش حيصيرلي شي اكثر من اللي صار
"والله ماعارفه شن نقولك لكن الوضع مايطمنش"
غمضت طوبى عيونها بألم..بعدين هزت راسها وقالت..
/قدر الله وماشاء فعل..قدر الله وماشاء فعل..السلام عليكم..
وسكرت وقعدت تبكي بصمت وألم....
وبعد لحظات هدت بكي وحطت سماعات في وذانها.
شغلت القرآن وقعدت تسمع فيه..
فجأه..وبدت جنه تتحرك..
ارتسمت ع وجهها ابتسامه خفيفه لطيفه وسط ملامحه التعيسه ..
قعدت تمسح ع بطنها بحنان وهي تقرا في الآيات اللي تسمع فيها...
🍃🍃🍃🍃
الساعه 11:30صباحا..
خش الجالي للمصحه وهو يتبختر ويقول..
"ياأرض اشتدي مافيش عليك حد قدي"
ومشي بآتجاة حجرة طوبى..
لين وصل فيها..
دق الباب..بعدين فتح الباب وخش..
لقي طوبى متكي ع السرير ولافه وجهها للروشن وهي تبكي بصمت..
ابتسم تهكما ومشالها حول السماعات وخلاها تنتفض من الفجعه..
طوبى بفجعه؛كيف خشيتي هني انت!؟
حط ايديه في نصه وقال..
/راجلك ياقلبي اني اللي دافع حق الحجرة هادي نخش زي مانبي مايقدر حد يمنعني..
طوبى بغضب ودموعها في عيونها..
/امشي اقلب وجهك اطلع..
هو قال؛مش طالع الا ورجلك ع رجلي تبي ولاماتبيش سادك ماتسيبتي..
طوبى بحده:لو فيها موتي مانروحك معاك..يااخي دير كرامه وخلي عندك دم معاش نبيك كارهاتك عايفاتك كارهه اليوم اللي لم بيني وبينك..
الجالي بلامبالاة ورفض تصديق اللي سمعه منها...
/قولي اللي بتقوليه كل من ورا قلبك غيرتك مخلياتك تقولي المراة اللي تحب راجلها حق اللي تغار عليه...
طوبى عكرشت وجهها بأزدراء وهي تشوفله..
الجالي.
/عاذرتك شن مادرتي عاذرتك وشن ماقلتي عاذرك..
وهي توا نوضي وتي روحك بش نروحوا..وجاها وهو يقول..
/تو نساعدك..
مجرد ماقرب منها هي بقوة حط يدها ع وجهها ودفاته وهي تقول بغضب..
/برا غادي ياحقير..
هو قعد واقف وعيونه يشوفولها بغضب بعدين قال..
/زيدي ياطوبى زيدي..زيدي نزلي سخط ربي عليك مش سادك اللي جاك!!؟ قولي..ماسألتيش روحك علاش صار هكي في مدرسة اختك..المدرسه اللي فضلتيها عليا وخلاتك ادرقي عليا الحمل ع خاطرها..
شوفي ربك كيف شن دارلك فيها شوفي..اهي توا بتتسكر بكل..نيتي الطيبه معاك واستغفالك ليا ربي حاسبك عليهم امس..ومازال ياطوبى مازال ياما جايك..
كلامه عن المدرسه قهرها اكثر ماهي مقهوة وخلاها تبكي غصب عنها..
هو لما شافها تبكي قعد يقول..
/ريتي ريتي..هدا اللي مايحبش حساب ربي لما يظلم عباده ولو استمريتي ع اللي ديري فيه مازال ياما تشوفي انتي وماليك...
طوبى وهي تبكي..
/حسبي الله ونعم الوكيل فيك حسبي الله ونعم الوكيل..
الجالي قدملها وهو يقول بإنفعال..
/ علاش تتحسبي فيا شن درتلك اني شن ريتي مني قولي!؟ ضربتك..حرمتك..حبستك..قيدتك..شن درتلك قولي..تكلمي..
قهرتيني يابنت الناس قهرتيني لكن مخليك لربي واهوا قاعد ياخد في الحق شويه شويه..عمره ماحد جي عليا وظلمني ياطوبى وسلم..
حطت ايديها ع وذانها وهي تبكي..
قربلها وشد ايديها وهو يحول فيهم عن وذانها ويقول..
/استاقظي لروحك وحطي عقلك في راسك وروحي معاي واني نعطيك وحده ننسى كل شي ونفتحوا صفحه جديده..
تجيبي بنتنا ونديريلها احلى اسبوع ونخلي الدنيا تدوي بيه..
طوبى ببكي ووجع؛حول ولا والله نفتري عليك حق و نعيط نلم عليك الدنيا ونقول مهبول ويبي يقتلني..
زاد شد ع ايديها بقوة..
طوبى بألم؛لاالا حرام عليك ايديا..لاايديها ااه..
حط وحده من ايديه ع فمها بش يسكرها وتانيه شاد بيها بقوة وحده من ايديها..
وهي مغمضه عيونها من الألم وتبكي..
وهو يشوفلها بغل..
ويتفكر في كل شي صارله مع عيلته بسببها..
وكل حركه فيها اهانه شافها من عيلتها بسببها..
والموقف اللي داراته يوم جاها للكليه وهددها...
🍃برا..
اميمه وهي جايه مع حسين للحجره قالت:خليك هني شويه..
ومشت للحجرة وصلت في الباب فتحاته..
وتشوف اللي فجعها وخلاها تنادي بصوت عالي..
"حسين"
الجالي طول طلق طوبى ووخر عنها وهو يشوف لاميمه بنظرات خوفتها..
ع جية حسين وهو يقول بفجعه..
/شن في..
جو عيونه ع طوبى وهي شاده يدها اللي توجع فيها وهي تبكي..
الجالي بوقاحه:كيف تخشوا ع راجل ومعاه مرته هكي امشوا اطلعوا اقلبوا وجوهكم ..
حسين بغضب شديد خشله وهو يقول..
/تعالى جاي تعالي..
ويشده من ياقه قميصه ويجبده ويطلعه برا..
ويلحقه..
اميمه سكرت باب الحجره وجت لطوبى وهي خايفه وتقول..
/شن دارلك الحقير شن دار..
وطوبى منهارة وتبكي وخلاص..
اميمه بألم؛خلاص ياقلبي خلاص..
وقعمزت جنبها وضمتها وقعدت تبكي بصمت ماقدرتش تتحمل الحاله اللي شافتها عليها..
🍃برا..
لولا الناس اللي حزت بين الجالي وحسين كان حسين قتله لامحاله..
جاهم امن المصحه وطلعهم الزوز منها...
وبرا المصحه قعدوا يتوعدوا في بعض والامن قاعد بيناتهم..
الجالي ركب سيارته وتحرك طول وهو يحرق في العجل..
وحسين قعد يراجي في اميمه طوبى وغضبه قاعد ماسكتش..
🍃داروا لطوبى ورقة الخروج برغم ان الدكتورة بعد اللي صارلها شافت انها من الافضل تقعد يوم تاني..
لكن طوبى اصرت تطلع في الحوش حتكون بأمان ومأمن من الوحش اللي يكون راجلها....
🍃طول الطريق وهي تبكي وتتحسب..
وحسين يتوعد ويحلف..
واميمه مش قادرة تطلع من حالة الخوف اللي صابتها لما شافت الجالي شن كان داير لطوبى..
🍃والجالي بعد اللي صار..
روح طول للفيلا...
خدي دواه...بعدين خش للحمام ودار دوش بارد وهو يتفكر في اللي داره فيه حسين..
قعد يمسح ع وجهه وشعرع بقوة من الغيظ والغل وهو يقول..
"كله منها..كله منها"
🍃طلع من الحمام..
وهو لابس الديشمبر..
وقف قدام مراية دولابه وهو يشوف لشكله ويتفكر فيها لما قالت..
《 لو فيها موتي مانروحك معاك..يااخي دير كرامه وخلي عندك دم معاش نبيك كارهاتك عايفاتك كارهه اليوم اللي لم بيني وبينك..》
غمض عيونه وهو يحاول يتمالك غضبه..
بعدين فتحتهم..وفتح باب الدولاب وطلع منه ملابس..
لبسهم..
بعدين مشي طلع من الدار..ونزل للدور الاول وخش للكوجينه بش يشرب ميه...
فجأه..
سمع جرس الانترفون..
استغرب..
مشي طلع من الكوجينه..
وتوجه للإنترفون..
خدي السماعه ورد وهو يقول..
"مني"
لارد..
شويه سمع صوت دق ع باب الفيلا..
قال مرة تانيه..مني!!رد ياهوو..
لارد..
زاد استغرب اكثر..
سكر الانترفون..
ومشي فتح باب الفيلا الدخلاني..
وتوجه للخارجي..
وصل فيه..وهو متوجس..
فتح الباب بحذر...
لعند مابان عليه اللي واقف وراه..
لما شافه..
اندهش..ودب في قلبه الرعب..
وهو يشوفله بإبتسامه واسعه بعدين قال بنبرة منغمه..
"السلام عليكم"
#تحالف
#طوبى
....يتبع....
