# طوبى "شارع القهوة"
#جمان_فريد
#الجزء_الثالث_والعشرين"الناس أجناس"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"شن صار معاك بوي"
الشامس وهو يعاند في دراجة ولده الكبير اللي يبلغ من العمر عشر سنوات:اهو خلاص امورها تمام خودها هي..
لم العدة وناض بالشنطة متاعهم..
وولده جي خدي الدراجه وهو يقول؛صحيت بوي .
ومشي بيها وطلع من الحوش..
الشامس تنهد ولف وخش للحوش..
تلقاته مرته وكانت حامقه..
ناديه؛بدل ماتجيبله وحده جديده..
الشامس وهو ماشي يحط شنطة العدة مكانها وهي وراه:واخدهاله الصيف اللي فات .
ناديه:وتقول فيها عادي ليها عام..وانت قدرك كل عام تشريله وحده..
الشامس:شن قالولك عندي بنك!!؟
ناديه تهكما:لاياناري عليك ماعندك شي علينا حني بش..اما مطيرة ماتاخدلها ماتاخدلها حوشها اللي هي فيه تصين فيه وتجدد وحني حوشنا ليه خمسة سنين ع حاله..
حط شنطة العده في مكانها وقال؛نفس الدسكه..
ناديه:طبعا كلامي مش حيعجبك طقينا في الللا مطيرة بنت الحاج علي الواعر..
ناض وقف قدامها وقال:ردي بالك راك قاعده تكرهي فيا فيك..
ناديه بحده؛انت رد بالك راك قاعد تستفز فيا هلبه..
قعد يشبحلها لحظات وهو ساكت..بعدين مشي فات من حداها..
هي لحقاته طول وقعدت تقول:علي وعلى اعدائي ياالشامس ياسر منها هالعيشه هادي فديت..
خش دار النوم خشت وراه..
لقاته فتح دولابه وقعد يدور في حاجه..
ناديه؛نكلم فيك كلمني..
التفت وجاها وفي يده ربطتين فلوس..2000 دينار..
وقتها ياما يديروا...
الشامس:خودي واسكتي..
هي خدتهم ولوحتهم ع الارض وقالت؛اني نبي كرامتي نبي يندارلي قدر زيي زيها نبيها تعرف خلاص لازم تعرف..
الشامس كان يحاول يتمالك نفسه لكن ماقدرش..
شدها من ذراعها ولواها بقوة..
ناديه وهي تتوجع:ااه يدي يدي..يتكسرها..
الشامس بغضب؛ونكسر رقبتك كان درتيها وخلتيها تعرف ورب العزة ياناديه نشردك بالله نشردك وتعرفي خوك كويس لو وليتيله مطلقه شن يدير فيك..
نزلوا دموع ناديه...
طلقها ومشي طبس ع الفلوس خداهم..
هي جبدتهم من بيدها التانيه وقالت ببكي:هات جاي..
شبحلها بحده..بعدين مشي للدولاب سكره وطلع من حداها..
وخلاها تبكي...
🌻🌻🌻🌻🌻🌻
خش عليهم لقاهم في الصاله مقعمزات هما وعمتهم يديروا في المحشي..
لطفي:عطيكم الصحه..
كلهم بأصوات متقطعه وابتساماتهم ع وجوههم:الله يسلمك..
قعمز حداهم وقال بضحكه:حتى طوبى دير في محشي..
طوبى:شن تحسابني بابا صغيره!؟ الشهر الجاي نسكر 12 سنه راهو..
سدرة:الشهر اللي بعد الجاي..
طوبى بضحكه:زي بعضه .
غرفه:تبي تكبر روحها بالسيف..
طوبى شبحتلها ودارت عيونها حوله وابتسمت بعبط تهكما ع غرفه..
سدرة ومطيرة قعدوا يضحكوا..
وغرفه تضحك بسخريه..
ولطفي يشبحلهم ويدوب يبتسم..
طوبى بعدين التفتت لبوها وقالت:هاه شوف لفتي للبراك..
لطفي:ماشاء الله...زي لفة امك الله يرحمها..
مطيره:والله حتى اني قلتها..سبحان الله..
ابتسمت طوبى وعيونها تعبوا دموع..وسدرة تشوفلها..
لطفي هز راسه بإبتسامة حزن بعدين قال:مش عارف كيف يجي البذنجال محشي..
مطيرة:لايجي يجي..اني حببتني فيه اخت صاحب الشامس ميلود..
وجه لطفي تغير وهو يسمع فيها وحاول يخفي ارتباكه لما قال:اها..
سدرة:خاطري نتعرف عليها..
مطيرة:تهبل ياسدرة وجوها مش عادي لكن خسارتها لتوا قاعدة من غير زواج .
سدرة:مواليد كم..
مطيرة:76
سكتوا شويه وهما يشتغلوا بعدين قال بوهم..
لطفي:سمعتوا بخالتك هاله ياسدرة..
سدرة بحزن:ايه سمعت بكيت عليها الصبح بكي..قداش وجعتني...
مطيرة بحزن:الله يرحمها..ولدها مازال بيولي هني ولاخلاص
لطفي:مروح الاسبوع الجاي ان شاء الله..
مطيرة:بالله بننشدكم هو مواليد كم؟
سدرة:70..
مطيرة قعدت ساكته وهي تفكر..
وخوها يشوفلها بضيق وشبه عرف في شن تفكر..
☘ايه لطفي عارف ان نسيبه متزوج ع اخته وطول هالسنين كان يحاول ع قد مايقدر يدير روحه عادي قدامها...
بس شن اللي خلاه يرضى ويسكت..مع العلم ان اللي ماشي في عقل مطيرة والعيله كلها ان الشامس هو اللي مايجيبش في صغار ومطيرة قعدت معاه لأنها تحبه!!!
ع العموم...حاليا اكثر شي خايف منه من زمان لتوا لو مطيرة علمت شن حيكون موقفها منه...!
☘☘☘☘☘
وايه ع الخوت...
بين اللي خايف ع زعل اخته وضميره مش مريحه وديما يأنب فيه عليها...
وبين اللي مش حاسها بكل ولاكأنه اخته دمه ولحمه وعرضه...
••فايزة وهي تبكي بإنفعال تقول:نقوللكم بنقعد في الشارع اني وبناتي عندكم عادي!!
خوها الكبير: وشن تبينا نديروا نمشوا نقتلوهم ع خاطرك!
خوها التاني:حقهم الشرعي مايقدر حد يمنعهم عنه..
فايزة:قلتولي حقهم الشرعي!؟
خوها الثالث:تبي تنكريها ولاكيف..انتي من حظك الزفت ماجوك كان البنات..وراجلك ماشغلش دماغه كان هذا راهو كتب كل شي بإسمك ولابإسم بناته..وهما توا ليهم كل الحق في اللي داروه مايقدر حد يلومهم ماداروش حرام..
فايزة تشبحلهم وهي مصدومه..بدل مايوقفوا معاها وقفوا معاهم ضدها هي..وطلعوها محقوقه..! وامها كالعاده سلبيه جدا تجاهها ماتقدرش تعارض ولادها ولاطلعهم غالطين..
هي مسحت دموعها بعنف وقالت؛خلاص مادام الحكايه هكي..قدمت لخوها الكبير وقالت..حتى اني نبي حقي من ورث بوي..
خوته شبحوله وامها زادت خافت..
اماهو حاول يخفي ارتباكه لما قال: ريتوها ريتوا!..معاش في لااحترام لاحشم واقفه قدامي وحاطه عينها في عيني وتقولي نبي حقي..
فايزة وهي متعجبه:علاش طلبت عيب ولاحرام حقي..واني توا بامس الحاجه ليه..مدام ماتبوش توقفوا معاي..وولاواحد فيكم مرته ترضى تستقبلني في حوشها..نبي نأجر مكان نسكن فيه اني وبناتي...
هو قال:ماشاء الله تبي تأجري وتسكني بروحك!..
فايزة؛اللي يسمع يصدق..لينا شهر نساوين قاعدين برواحنا مافيش واحد فيهم جي وبات معانا ليله...اسمع ماتلفش بيا ودور حقي نبيه في يدي غدوة يوصلني..
خوها بكبر العصاة قال؛انتي هكي!! تمام ماليكش حق عندي..
فايزة بتحدي؛ناخده بالقانون..
عطاها كف بكل قوته..لين حست فايزة ان خدها انشرك..
وهو يقول بغضب؛من يومك قليلة ربايه ومش محترمه حد..
فايزة وهي تشبحله بغضب مخيف عيطت بأعلى صوتها وقالت:اطلعوا..امشوا اطلعوا معاش نبي نشوفكم..اطلعوا..
وحسبي الله ونعم الوكيل فيكم دنيا وآخره..
مشتده؛ماتتحسبيش ع خوتك..
فايزة خلاص معاش قادرة تتحمل امها اكثر من هكي..
عيطت عليها حتى هي وقالت؛بري معاهم حتى انتي بري معاش نبي حد معاش نبيكم..نبي نقعد بروحي اني وبناتي..
:خشي يام جيبي حوايجك وهيا..
مشتده؛الحق مش فيك الحق فيا اللي قعدت معاك..عقابها تعيطي عليا وتلزيني..
فايزة مشت بإندفاع للدار خشتلها وخدت شنطه امه وطلعتها ومشت خدت حوايجها من الحبل وحاجات تانيه ليها حطتهم في الساكو ومشت بيهم بسرعه لين جتهم..
حطت الساكو قدام خوها وقالت:اطلعوا مانبي نشوف منكم حد اطلعوا..وحقي ياخده ربي اليوم وغدوة ان شاء الله..
هو خدي شنطة امه وقال؛هيا يام..
مشتده قعدت تمسح ع ذقنها وهي تقول:كان ربحتي هدا وجهي..
فايزة:انتي اللي كان ربحتي هدا وجهي تحسابيه مخليك عنده محبه فيك..ولاعايشه معاه عيشه بشر..معاش تضحكي ع روحك اخرتك دار الوفاء..
مشتده قلبها قبضها من كلام فايزة لانها اصابت كبد الحقيقه اللي تهرب منها مشتده من حبها لولادها..
جاها ولدها الكبير شدها من يدها وقال؛هيا يام قبل لنقتلها..
مشي ومعاه امه..وخوته..
وكلهم طلعوا من الشقه..
هي مشت طول سكرت وراهم الباب بقوة..
وقعدت تقول ببكي..
"حسبي الله ونعم الوكيل...حسبي الله ونعم الوكيل"
☘نعم المولى ونعم النصير ولو بعد حين يافايزة☘
🌻🌻🌻🌻🌻
الساعه 11:00ليلا.
فتحت الباب وخشت عليهم وكأنها مقتحمه..
واحد كان مقعمز يلعب ع اللاب متاعه..
والتاني يقرا ع اللاب توب متاعه..
نضال:يام بالله عليك لا!
وقفت مغليه قدام المكيف طفاته بالجهاز..
وعمر يشبحلها..
بعدين مشت وفتحت الروشن وقالت؛الجو برودة مش لازم ترقدوا تحت المكيف الليله..
ومشت طلعت من حداهم وفي يدها الجهاز...
نضال:والله الواحد كره عيشته بالله..كله في جرة المهدي هو يدير عملته في روحه وحني ناكلوها في جرته..
عمر شبح لنضال شويه..بعدين شبح للروشن..
ناض باللاب توب متاعه وقعمز ع الكرسي ورجع يقرا..
نضال شبحله شويه..بعدين بدي يغني..
الجارة الاولى غلاها..الجارة الاولى غلاها..الجارة الاولى من قلبي شن بيحوله غلاها..
شبحله عمر..
وهو دار روحه يشبح للاب توب وشاد ضحكته..
عمر شبحله شويه بطرف عينه بعدين غيرهم عنه وشبح لحوش مطلب الواعر..تنهد من قلبه ورجع شاف للاب توب...
☘☘☘☘☘☘
وزاد سواد الليل حلكه...
والعيون بدت ترقد...
بس في عيون هي والنوم اعداء...
عيون فايزة اللي ولوا حمر ويحرقوا فيها من البكي..
ضامة بنياتها ليها..
بناتها اللي وين خشت عليهم.الدار بعد طلعوا حناهم وخوالهم لقتهم حاضنات بعض وهما خايفات ويبكوا...
ياااه يااحمد لوتندري شن صار فيهم من بعدك..
بس رب الوجود يعرف ويشوف في كل شي ومش حيخليهم..
☘وعيون تانيه الشك حارمها النوم..
مخليها لوغفيت شويه ترجع تفيق وهي مفزوعه..
عيون خديجه...
اللي ناضت وشافت راجلها مالقتاش جنبها..
نزلت من السرير ومشت طلعت من الدار وقعدت دور عليه وهي تمشي بهدوء..
لين سمعت صوته يتكلم وكان جاي من المربوعه...
مشت تبعت الصوت لين وصلت في المربوعه..
وقفت جنب بابها وقعدت تسمع...
محي الدين وهو يتكلم في التليفون:تحسابيني مانقدرش نوصل فيك........................اسمعي حبيبتي اقسم بالله حبيتك من قلبي والله مستعده ندير ع خاطرك كل شي حتى اللي عندي مستعد نطلقها...
خديجه فتحت عيونها ع وسعهم بصدمه وحطت يدها ع صدرها حست بنفسها ضاق...
محي الدين:لاا بالله عليك ماديريش فيا هكي!!!......الو..صابرين...
خديجه ماركزتش ع الاسم ..من صدمتها عقلها قعد يردد في جملة "اللي عندي مستعد نطلقها"..
لفت ومشت تجري ع روس صوابعها..
لين وصلت في الدار مشت خشت سريرها ورقدت وغطت روحها وهي تبكي بصمت وبصدمه...
وهو خش بعدها للدار رقد ع السرير وعطاها بالظهر وعقله وقلبه مع صابرين...
🌻وفي من قلبه وعقله مع حاجه تانيه تانيه خالص..مطيرة النوم من عينه..
نضال؛مش عارف الواحد كيف بيرقد في جو زي هدا..
قعد يشبح لعمر كيف راقد بالنوم هو متغطي..
قال..هدا متعود من نار الحب اللي ديما والعه فيه..
ومشي طلع من الدار..
ونزل من الدروج..
وتوجه لدار المعيشه جبد منها مندار ومخده ومشي طلع للجنان..
قعد يدور في مكان يفرش فيه لين لقاه..
حط المندار والمخدة..
وحول شبشبه ورقد وهو يقول:الله! مافيش احلى من هوا ربي..
غمض عيونه وبدي يرقد..
فجأة فتحهم وقال:هذا شنو؟!
ناض قعمز شبح لذراعه لقي نمله كبيرة شابطه فيها..
حدفها بيده وهو يقول؛ان شاء الله ربي يسامحني..
ورجع رقد مرة تانيه..
وخداه النوم شويه..وبدي فيه الناموس..
وبدي يتحارب هو وياه ويقول:الله يسامحك يام وخلاص..
ورجع خش النمل ع الخط...
وقعد يتعارك معاهم فوق الساعه وفي الاخير قال:الله غدوة لما ناخده الجهاز وياقاتل يامقتول...
وبعد صراعات مريرة رقد....
☘بعد اربعه ساعات بالزبط..
حس حاجه تخربش في خشمه..
قعد يحول فيها وهو راقد..
بعدين فتح عيونه..
لقي وجوه صغيرة مطبسه عليه..
وبنت اخته خديجه واخده ريشه حمامه وتلعب ع خشمه..
لما شافوه فاق كلهم ضحكوا وقالوا بصوت واحد..
صباح الخير..خالو..عمو..
غمض عيونه وفاتهم ورقد ع جنبه..
هما شبحوا لبعض بنظرات شقاوة..
بعدين شبحولها وطاحوا عليه كلهم..
وهو يعيط؛تي لاا..لااا ياحووش لاياهبد...اااه..زودوا لجنونكم زودوا...
ومافكهم عنه كان المهدي..
المهدي؛خير دعوتك راقد هني!؟
نضال وهو ينفجر:والله في واحد ديما راقد تحت االمكيف مرض منه ورقد في المستشفى..مشي امه من بعدها حرمت ع خوته يرقدوا تحت المكيف..
رفع المهدي حواجبه وهو يسمع فيه متعجبا..
وهو كمل يقول:وتوا بنخش ناخده جهاز المكيف بناخده...
ومشي خش داخل..
والمهدي حرك راسه يمين ويسار وهو يضحك..
بعدين شبح للصغار لقاهم ماشيين يلعبوا حدا الغرس..
عيط عليهم وقال؛هني انت وياها هني..واشرلهم وين يجوا يلهبوا وهما طول وخروا ع الغرس ومشوا وين ماقاللهم..
☘☘☘☘☘
فهالوقت وصل مصطفى بمرته وصغاره لحوش نساباته..
نزلوا البنات وفي ايديهم حافظات..
وخده فيها كيكه وفطيرة..والتانيه مبطن وفركسي..
وخشوا كلهم للحوش..
استقبل لطفي نسيبه ومشوا للمربوعه..
اما طوبى جت تجري لبنات اختها سلمت عليهم وع اختها وخدت معتز في حضنها..
طوبى:ماشاء الله كبر وسمن..
اريج؛ديما وهو يرص...
فردوس:حرام عليك..
اريج:قلت الحق..
ضحكت طوبى..
الاء بإبتسامه:جبنا معاها هدا البشكوطي بيبو..
طوبى:الله!..بعدين نديروا كاكاونا ونطلعوا نقعمزوا قدام الحوش شن رايكم..
فردوس:تخليك سدرة!؟
طوبى:ايه قلتلها..
وخشوا للكوجينه وفردوس قالت:السلام عليكم..الله الله ع الروايح الله..
غرفه:قطاطيسي جيتوا...
ومشت فردوس تسلم ع عمتها واختها سدرة..
وغرفه جت لبنات اختها سلمت عليهم وخدت معتز من طوبى وقعدت تبوس فيه وتلعب..
بعدين مشت سلمت ع اختها..
سدرة بعد ماسلمت ع البنات خدت منهم الحافظات وقالت:شن دايره..
فردوس؛افتحي وشوفي..ورفعت مغطى الكسكاس وخدت طرف براكه..كلت منه وقالت:شن البذنجال هدا..
سدرة:عمتك ياحنه..
مطيره:زي العسل تو بعدين نذوقكم وانتم احكموا..
سدرة وهي تاكل في الفركاسي:الله يامراة انتي كيف ديري هكي مش عارفه...
ضحكت فردوس وهي تاكل...
ع خشة صفيه ووراها اميمه..وهما حاملات في ايديهم..
صفيه طنجرة عصبان..
واميمه في يدها طاجين بسوسه..
مطيرة:اهلا بالكنه الباهيه وبنت الخو العسل..
ضحكوا..
وغرفه تشبح لأميمه شن لابسه وكيف طالعه وقربب تموت من الغيرة...
☘☘☘☘☘☘
بعد الغدي...
في حوش شنيبه..
كانوا خديجه ونسرين يغسلوا في ماعين الغدي اللي طيباته عائشه..
خديجه كانت طول الوقت سرحانه..
ونسرين لاحظتها..
نسرين؛خديجه..خديج..
خديجه وهي تمصمص:نعم
نسرين؛خيرك نحس فيك مش ع بعضك من بكري..
تنهدت خديجه بعدين حطت اللي فإيديها وقالت؛تكملي الباقي عادي..نبي نمشي نكلم المهدي..
نسرين؛تمام لكن بتحكيلي بعدين...
خديجه هزت راسها وقالت:باهي باهي..
ومشت طلعت من الكوجينه ونسرين تخمم فيها..
....وصلت للمربوعه سمعتهم يهدرزوا قعدت تنادي..
خديجه:مهدي..يامهدي...
عائشه وهي ضم في الصاله سمعتها..وخافت لتكون بتقوله حاجه عليها..
شويه وطلع المهدي وقال:نعم..
خديجه بحزن:نبيك شويه..
هو ركز ع وجهها وقال؛خيرك!
خديجه وهي بتبكي خلاص:بالله عليك تعالى لدار الضيوف..
ومشت..
والمهدي وهو في قمة القلق عليها لحقها طول..
☘☘☘☘☘
الساعه 4:30قبل العصر..
مقعمزين حدا عالة الشاهي اللي دير فيها صفيه وهي تهدرز وهما يسمعولها..
صفيه:اشبح كيف بيديروا برواحهم زوز تريس..
سدرة:ربي يهديه اياد ويتزوج..
فردوس:تحسيها رزينه توا بعد ولده ولى راجل ماشاء الله..
غرفه؛حتى اني معاك..
مطيرة؛وشن بيقعد راهب !؟ لازم يتزوج...الحق عندي ليه في بالي وحده الله يبارك عليها..
سدرة:زبطتها هديكا اللي حكيتي عليه امس شن سماها؟
مطيرة:ناديه..ناديه..
سدرة:ايوه ناديه..
صفيه:خلوه يحزن ع امه وبعدين اخطبوله...
ضحكوا..
مطيرة:صدقتي.
صفيه:خطرتوا عليا عليا مغليه اللي تبي تزوج فايزة حتى هي..
غرفه:بلعاني ع خاطر الاشاعات التي طلعت عليها هي والجالي..
سدرة؛ناس اعوذ بالله منهم يكرهوا الخير لغيرهم وعقولهم متخلفه..الراجل مسكين واجعينه البنيات وهو معروف قداش يحب الصغار..
مطيرة:ايه ريته يومها كيف نزل من سيارته وخش للمحل خدي لصغار الشارع اللي يلعبوا كلهم جيلاطي..
صفيه:العين توا بتنفتح ع فايزة لأنها ارمله..ياما بتشوف وياما تسمع..
مطيرة:مرات هدا علاش تتزوج خير..
سدرة قعدت ساكته وهي تفكر في كلامهم بضيق..
مطيرة:كلا مغليه هادي داكه خشمها في كل شي وكل شويه تقول..اني كبيرة الشارع غير ماقالهالها بس..
صفيه؛مسحات الجوخ..
سدرة:ايه حقه ريتها هديكا المده خاشة لحوشكم هي وخديجه وكل بنجي ننشدك ننسى..علاش؟
اميمه قعدت تشبح لغرفه..
صفيه؛ياحنه تخطب في اميمه لولدها عمر..
غرفه شبحت لأميمه بصدمه..
وسدرة ومطيرة وفردوس مع بعضهم قالوا:شنو!؟
طوبى قعد تغير في نظرها بين غرفه واميمه اللي كانوا يشبحوا لبعض..
وشافت اميمه كيف بعدين رفعت حاجبها وغيرت عيونها عنها...
صفيه:اللي سمعتوه..
سدرة بصدمه:وانتم شن قلتوا..
صفيه؛واضحه..ردتهم اميمه..
سدرة ابتسمت بأعجاب وقالت:صحة ليك!؟
مطيرة:شن قلتيلهم؟
اميمه؛قلتلهم ولدكم ماعنده شي لاشي لاحوش مش مكون نفسه يعني..ع اي اساس جايين يخطبوله..
غرفه وهي رافعه حاجبها:لكن عمر عنده شقة فوق حوش ماليه..
صفيه بضحكه قالت:لما قالولها عليها قالتلهم..اه يعني دايرهاله عمي محمد!..
سدرة ناضت ومشتلها وقالت:هاتي ايدك..
ضحكت ومدت يدها..ضربتها سدرة بكفها وقالت..بنت الواعر حق..
مطيرة:مسحتي ع كبدي يابنت لكن مايطلع منك..
صفيه:تي قتلك حطتلهم هالكلمات وهي هاديه هكي وبذوق عرفتوا كيف..يعني طيرتهالهم بالرسمي..
فردوس:ضربه قاضية لعمر المتعجرف حرام مانحبله وجه..
اميمه من داخل ضايقها كلام فردوس بس دارت روحها عاديه..
وغرفه تشبحلها وهي مقهورة ع الاخر..لقت بدل ماضيع اميمه وتكسرها...خلتها تقوى وخلت عمر اللي هو عمر يحبها...
☘☘☘☘☘
الساعه 6:30بعد العصر..
طلعت طوبى من الكوجينه وهي شاده سفرة فيها مقات وبكرج كاكاو..
وصونيه فيها بسكويت قديم...اللي ع هيئة وجوه حيوانات وحده من جيهاته فيهم شكولاته..طوبى كانت تحبه هلبه هي وآلاء..
طوبى:روجه فرشي المفرش برا.
اريج؛باهي..
فتحت الباب وطلعت فرشت قدام باب الحوش المفرش..
وطلعوا وراها اختها وخالتها وقعمزوا وفي نصهم حطوا السفرة..
وقعدوا يتفرجوا ع ولاد الشارع اللي يلعبوا برا بالدراجات..والبنات اللي يلعبوا في نقيزة..
وقدام المطحن متاع عيلة شنيبه المهدي كان يبخبخ..
شبحهم ابتسم وقال:اعزموا حتى بالكذب..
ضحكوا البنات..
وطوبى صبت كاكاو في في مق..وخدت صونيه البسكويت فضت منه في السفرة وناضت بيهم للمهدي..
المهدي ضحك وقال:ياودي نبصر عليكم..
ابتسمت طوبى وقصت الطريق ووصلت فيه وقالت:تفضل عمو مهدي.
خدي منها وقال:مش رادك...صحيتي..
طوبى:سلمك..لاباس عليك قالوا كنت مريض..
المهدي:لا الحمد لله حالي باهي..
طوبى:دوم ان شاء الله..وين محمد ويزن؟
المهدي:يلعبوا داخل مع صغار خالاتهم.
طوبى ابتسمت وقالت:ربي يحفظهم..سلملي عليهم..
المهدي:يوصل..
لفت طوبى ومشت قصت الطريق وولت قعمزت حدا بنات اختها.
اريج:في شن بتشربي..
طوبى:مش لازم اصلا اني نبي البشكوطي بس..وقعدت تاكل..
سكتوا وهما يتفرجوا ع الشارع واللي يفوت من حداهم يناشبهم يعطوا شويه لين تم عليهم..
الاء:زعمه يبيعوا فيه هني..
طوبى:اكيد..
الاء:عندي فلوس ماشيه نشريه وجايه..
وناضت مشت للمحل..
اريج:الدراجه تسهف..
طوبى:انتي عاد ماعندكش معاهم الروح..
ناضت ونادت واحد من الولاد..
التفتوا عليها..
قدمت وقالت:ترا شويه..
جوها بدراجاتهم..
اريج؛واحد فيكم يعطيني وحده تجيرا..
طوبى ضحكت..
:تعرفي انتي..
اريج:انتي عطيتي متاعك وشوف..
:باهي..وعطاها دراجاته..
🌻وفي حوش شنيبه..
كان نضال لابس ومتانق وطالع من الحوش..
بس هالمرة من غير مايغني..
كان معصب ع الآخر...ناقص نوم..وجوه ملخبط..
امه وخواته ومرت خوه كانوا مفرشات في الجنان مدايرين العاله..
مغليه:رسول الله بيني وبينكم...العبوا بعيد خيرلكم..
جملة تنقال للآن ولايجوز ان تقال..لكن النساوين الكبار اللي مش مدركين معناها تعودوا يقولوها..
خديجه:ماما محمد برا بالكورة غادي..
ونسرين تتفرج وخلاص..
ع طلعة نضال فات من حداهم وهو متعفلق..
نسرين بضحكه:تي غير تعالى اشرب شاهي كول بسبوسه..
فتح الباب وقال بدون مايشوفلها:خليلي منها..
وطلع وسكر الباب..
مغليه:ان شاء الله تكلب..
ضحكوا بناتها وكنتها..
☘طلع نضال بيمشي لسيارته ..
شافاته اريج وهي تلعب بالدراجه قالت للاولاد:شوفوا هادي..
ومشت جهه نضال..
وتخش بينه وبين سيارته..
هو انفجع ووخر يحساب اشبح شن جاه..
حاجه فاتت بسرعه البرق وشعرها يطير..
وطوبى والاء ميتات بالضحك..
هو ركز عليها زبطها..
نضال:قسما بالله زي شحرورة السحارة هديكا اللي طير ع المكنسه..
هي لفت ورجعت وجاته بيها مندفعه..
نضال:لالالا حي ع امك ..وخر بسرعه
عطاها طريق..وهي فاتت طول..
الولاد كانوا صغار اكبر واحد فيهم يقرا رابع..
يشبحولها وهما منبهرين في امكانياتها في سواقة الدراجه..
نضال:تعرفي غير بنكبر عقلي كان هدا ركبت السيارة ووريتك الاستعراض شن شكله..
لفت من جديد ورجعتله ووقفت قريبه عليه بالدراجه..
شبحت لاختها وخالتها وقالت:تسمعوا في صوت غريب..اني نسمع فيه بش ماعرفتش من وين جاي..
شبحت القدام لقت واحد من الجيران مولع سيارة ليه اكل عليها الدهر وشرب..صوتها تاعب..
شبحتلها وابتسمت واشرت عليها بعدين قالت:عرفته توا..
ورجعت تسوق في الدراجه مرة تانيه..
نضال لف ومشي ركب السيارة وشغلها وجاها بيها..
هو كان قصده يخوفها لااكثر بس وهي تسوق خافت من السيارة ارتبكت وفقدت السيطرة وطاحت هي ودراجه ع التراب..
جوها طوبى والاء يجروا وهما يقولوا:اريج..
ونضال حول نظاراته نزل يجري.
والمهدي جاهم من المطحن وهو يقول لخوه بعصبيه:وين عيونك وين.
جوها الزوز هي بين ايدين طوبى والاء والزوز ينوضوا فيهاوهي تقول ميته..
نضال وهو خايف:تي غير نوضي بالله عليك..قسما بالله مامسيتك بيها السيارة بالله..
المهدي قعد يضرب فيها ع خدودها وهويقول؛اريج اريج..
والبنت شي لاحياة لمن تنادي..
آلاء بدت تبكي وقالت؛حي اختي ماتت!..
نخصتها طوبى اللي كانت بتموت من الخوف:اسكتي ترا..
نضال:بالله العظيم ماقربتها..
ع جية صاحب الدراجه قعد واقف يشبحلها وقال:هذا علاش بوي يقولي ماتلعبش في الطريق تو تضربك سيارة..
نضال:شن تقول انت والله ماضربتها بالله ياناس!؟
فهالوقت سدرة طالعة بدير عليهم طلة شافت الموقف طلعت تجري وهي خايفه وقالت:خيرها اريج..
المهدي ناض وقف..
الولد؛ضربها نضال بالسيارة..
سدرة:نهارك احرف مغبر!
نضال:والله ماضربتها..قعد يدور في رشاده لين لقي وحده خداها بيحدف بيها الولد وهو يقول..الله ماضربتها..
الولد هرب وهو حدفها..
سدرة طبست ع اريج وقعدت تخبط فيها ع وجهها وتقول:اريج ياماما اريج نوضي...حي عليا!..
المهدي عقد حواجبه وقال:مافيها شي دايخه شويه بس..
سدرة وهي بتبكي:هو هدا انت ديروا عملتكم وتقولوا مادرنا شي ومافي شي .
نضال:نترزا في سيارتي ياسدرة كان مستها..
سدرة:لالا البنت تبي مستشفى..
فجأة البنت شهقت شهقه قويه..
كلهم قعدوا يشبحولها وعيونهم مفنصات..
بعدين فتحت عيونها وقعدت تتنفس بسرعه وتقول:شن صار شن صار...ضربتني سيارة!!؟وبدت تبكي..
الاء:حبيبتي ...
نضال:لا والله ماضرباتك..
المهدي:اريج بنتي..مافيك شي غير خفتي شويه بس..
ناضت اريج وهي تبكي قعمزت وقالت:عمو مهدي شد خوك بالله عليك..
سدرة التفتت ع نضال وقالت:نلقاك تشبحلها حتى الشبح مرة تانيه مخطرك اسود..
نضال خاف من سدرة ماقدرش يرد عليها ناض وقف..
وهي جت لبنت اختها ونوضتها:هي بنتي بالشويه عليك..ان شاء الله ماانكسرتيش..
ناضت مع خالتها وهي تقول:شكلها رجلي التوت لوطا..
ومشوا الزوز بيخشوا..
المهدي:كويس كويس بكل استمر..
ولف ومشي للمطحن وهو معصب لاني خدي ع راسه من سدرة كم كلمه وماقدرش يرد عليها..
ونضال بعيونه معاه بعدين رجع شاف لأريج..
خشت مع خالتها..
التفتت اريج شبحتله بنظره خاطفه ماكرة ورقصت حاجبها اليسار..
بعدين التفتت القدام وكملت طريقها مع خالتها..
نضال غمض عيونه بشده وهو يحاول يتمالك اعصابه اللي كانت حتنفلت خلاص..
وطوبى تقيم في السفرة وهي تشوفله وشادة ضحكتها..
فتح عيونه ولبس النظارات..
شويه سمع صوت كلاكس..
لقي سيارة واحد من الجيران يأشرله يحول سيارته..
هز راسه ومازال اعصابه راكبه ومشي ركب السيارة وقال؛تو نوريها تو تشوف تو تحصل هالشمطاء هادي..
وحرك سيارته ومشي والراجل وراه...
خشت الاء بالشرشاف..
وطوبى وهي تضحك جت بتخش للحوش نداها المهدي..
المهدي:طوبى..
التفتت..
جاها بالمق والصونيه وقال:بارك الله فيك..
طوبى:صحتين..ومدت السفره..حطهم فيها...
وابتسم وقال:سلمك..ربي يحفظك..
طوبى:تسلم..
لف ومشي..
وهي خشت للحوش وسكرت الباب...
~~~~~~~~~
طوبى بضحكه؛تعرفي امتى زبطتك لما شهقتي هديكا الشهقه..
اريج بضحكه:لما سمعت خالتي قالت مستشفى تخيلت اليبرة..يامامي..
قعدت تضحك طوبى بعدين قالت:لكن خوفتيه مسكين لين وجهه ولى اصفر..
اريج بشماته:يستاهل هدا شويه من اللي كان يديرلي فيه زمان قداش تسهوك عليا ودار فيا مقالب وخلا الصغار يضحكوا عليا والله ماناسيتله حاجه..
طوبى بضحكه؛واك قلبك مليان..
اريج وهي مضيقه عيونها بمكر:هلبه...
☘☘☘☘☘☘
وبعد صلاة العشاء...
كانت فردوس توتي في روحها وصغارها للمرواح..
وبرا..
بوها مع راجلها في السيارة يهدرزوا..
مصطفى؛اني والله ياعمي ع قد ماصار ماشكيت وماجيتك توا وكلمتك الا لأني خلاص عجزت معاها..توصل بيها انه ماطيبش غدي وعشي ع خاطر حديده ولاخاتم ولا مش عارف شني عند مش عارف من هي تبي زيه...قسما بالله ياعمي ماعندي والله ماعندي عليا دين وقرض وشي مايعلم بيه الا ربي وهي مش رايفه بالحال بكل..
لطفي بضيق وغضب مكتوم؛ماتحلفش ياولدي صادق صادق..فردوس خليها عليا اني تو نتفاهم معاها..
مصطفى؛ياريت ياعمي لإني والله خلاص.. وصلت حدها عندي..
ع طلعة البنات وهي معاهم قايمه ولدها في غمرها...
مصطفى:سامحني ياعمي بالله..
لطفي:ولايهمك..تصبح ع خير..
مصطفى:قدامك كل خير..
وين جي لطفي بيخش الحوش..
البنات؛تصبح ع خير جدو..
لطفي يدوب ابتسم وقال؛تصبحوا على خير ياجدو..
فردوس؛تصبح ع خير بوي..
لطفي بدون مايشوفلها:خير..
ومشي خش داخل..
هي ماركزتش هلبه..ركبت السيارة وهي ساكته..
ومصطفى ساكت...متقاطعين..
وبناتهم يمرروا في نظرهم عليهم...
تحرك مصطفى بالسيارة..
وتجي بعده سيارة الشامس..
شافه لطفي طلعله...
وداخل..
مطيرة؛عمكم الشامس اتصل بيا شكله جي وين حصته يابنات..
سدرة وهي تحط الدبش في الغساله:في الكوشه ياعمتي..
خشت مطيرة للكوجينه فتحت الكوشه وطلعت حصة راجلها من كل شي..
ومشت بيها وهي تقول:هي تصبحوا ع خير يابنات..
"تصبحي ع خير عميمه"
ومشت بسرعه مطيرة طلعت من الحوش لبست في رجليها وبعدين مشت طلعت برا ..
مطيرة؛هي تصبح ع خير وخيي وان شاء الله حوشك ديما عامر..
لطفي؛تسلمي يامطيرة..تصبحي ع خير..
ركبت السيارة..
ولطفي مشي خش داخل وسكر الباب..
مطيره؛كيف حالك ياشامس..
الشامس؛سبوع كامل غايبه عني كيف بيكون.حالي..
ضحكت وقالت؛بش تعرف قيمتي..
الشامس:عارفها والله عارفها من غير ماتغيبي..
مطيرة بضحكه؛حتى انت في ديما في بالي خليتلك حصتك من كل شي..
الشامس ابتسم وتحرك بالسيارة..
مطيرة؛انت اليوم وين تغديت؟
الشامس:عندك ميلود..
مطيرة؛اها مشيت الزاويه..شن دارت نديوة غدي..
الشامس؛مقلوبه باذنجال..
مطيرة بضحكه:ياحبها للبذنجال حببتني فيه حتى اني اليوم درت مع المحشي بذنجال كلوه مع البنات وعجبهم..
الشامس:صحتين..
مطيره:سلمك..خليلتلك منه حتى هو..
هز راسه وقعد ساكت..
بس في داخله كلام ياكلام...
☘☘☘☘☘☘
وفي منطقة بعيده عنهم شويه..
وين ماتسكن فايزة..
اللي عشت بناتها وحطتهم في اسرتهم بش يرقدوا..
وهي اليوم كله ماخشتلها حاجه في فم..
طلعت من حداهم ومشت توضت بتصلي العشاء..
توضت..بعدين طلعت..لبست ملايه وخشت دار المعيشه بش تصلي..
بعد سته دقايق بالزبط..
رن تليفونها..
كان يرن ويرن..وصوته يصدح في الشقه ومافي حد جاه لين فصل..
بعدين رن مرة تانيه..
هني صفاء ناضت مخلوعه ع صوته وقالت؛نقال ماما!
نزلت من سريرها ومشت طلعت من الدار تبع في صوته لين لقاته في الصاله محطوط في الشحن..
حولاته من الشحن وشافت المتصل لقتها..
"سديرة "
فتحت الخط وردت..
صفاء:الو خالتي سدرة..
"صفو شن جو حبيبتي"
صفااء؛الحمد لله..
"وين ماما"
صفاء؛شويه نشوفها وين..
خشت البنت لدار المعيشه لقت امها طايحه ع الصلايه وهي لابسه المصليه..
صفاء بخوف:ماما!
"خيرها!؟'
جتها صفاء قعدت تهز فيها وتقول؛ماما ماما نوضي..
"تي خيرها ياصفاء"
صفاء وهي مصدومه ودموعها ينزلوا...
"حتى ماما ماتت ياخالتي سدرة"
#الناس_أجناس
#طوبى
...يتبع...
