#طوبى "جنة طوبى"
#جمان_فريد
#الجزء_الحادي_والستين"رسايل_وداع☆"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🍃 فللهِ قلبٌ بالفراق مروعٌ
حزينٌ، وجفنٌ بالدُّموعِ شريقُ.🍃
☘☘☘☘☘☘☘☘☘☘
مقعمزة ع سريرها في دار النوم...
بين ايديها تليفونها تراجي منه في اتصال وهي في قمة القلق..
قامت عيونها شافت للروشن..لقت الظلام بادي يحل..
زاد شعور الخوف في قلبها..
شافت لتليفونها وعاودت اتصلت بيه للمرة السادسه..
وللمرة السادسه مايردش عليها..
نزلت التليفون وبخوف قالت؛ياربي خيره مايردش!؟
وبدت تكتب في رساله ولما كملتها بعتتها..
🍃وهو كان واقف في ممر المصحه الموجودين نجاه وولدها..
يشوف لصابرين ومروة خواتها كيف مقعمزات يبكوا..
وكله خوف...
خوف ع نجاه وع حمزة...وع نفسه...
شويه وشافوا الدكتور اللي خش يدير عمليه لنجاة جاي..
ناضوله خواته ومشوله..
وهو بسرعه توجهله..
وصلوا فيه مع بعض وقالوا..
"شن صار..شن صارفيهم"
الدكتور:اهدوا شويه ياجماعه اهدوا..بالنسبه للولد الاصابه القويه جاته في ذراعه الايمن داروله العمليه ونجحت لكن قعد العلاج الفيزيائي..
الجالي بخوف؛كيف قصدك صارتله اعاقه؟
الدكتور؛مانبوش نقولوا اعاقه..مشكله ومع العلاج تنحل..
صابرين ببكي؛واختي يادكتور؟
شافوله مروة والجالي بخوف..
الدكتور عقد حواجبه وقال:الاصابه جتها في بطنها تحديدا منطقه الحزام وهي كانت حامل..
قاطعه الجالي وقال وفي عيونه دموع:راح العيل..
الدكتور:للأسف..وللأسف اكثر ان الرحم تضرر بشكل كبير واضطرينا نستأصلوه...
شهقت صابرين بصدمه وحطت يدها ع فمها..
ومروة قالت بصدمه؛حيي عليا!!!...
اما الجالي انصدم بقوة...
الدكتور:قولوا الحمد لله اللي جت ع هكي وماصارش فقد في الأرواح..
الثلاته ماردوش بولا كلمه حالة الصدمه اللي هما فيها ربطت ألسنتهم..
الدكتور هز راسه وقال:الحمد ع سلامتهم..
ومشي وخلاهم...
خلاهم مش مستوعبين الكلام اللي قاله..ويفكروا فيها لما تعرف باللي صار فيها كيف حتكون ردة فعلها..!
شافت صابرين للجالي...
وفي عقلها يتردد كلام سمعاته من كم يوم من مختار...
《ولإن البنادم هدا شخصية مريضة يدير اي شي بش يخلص من خصومه ومنافسيه》
تبدلت ملامح وجهها للحقد واندفعت ناحيته وهي تقول؛انت اللي درتها ولا انت..وضرباته ع صدره..
شدتها مروة وهي تقول:صابرين خيرك!؟
هو عقد حواجبه بغضب وقال؛خير بلاك انتي هبلتي!!
صابرين بغضب ودموعها تنزل:انت ياكلب انت..انت اللي درتها بش تفتك منها يامريض يامجرم..
فنص عيونه وقدملها وهو يقول:تعرفي كان ماتسكتيش نرقدك جنبها..
مروة شبحتله بصدمه من فوق لتحت..
وصابرين قالت؛سمعتيه سمعتي هو اللي دارها..
كور قبضة يده وجي بيرفعها عليها بس تراجع في اخر لحظه..
هز راسه وهو يشوفلها بغضب بعدين مشي وخلاهم..
وهما الزوز يشوفوله بكره..
صابرين ببكي:هو اللي دارها يامروة هو..
ومروة تشوف للجالي بكره وخوف وتتسائل هل معقوله توصل بالجالي لهني ويديرها بش يخلص من كل شي يربطه بنجاة!...
🍃اما هو فكان عنده ماهو اهم من اللي صار توا..
كان يبي يكتم موضوع الحمل ويدير كل شي بش مايطلعش لأهله...
وفعلا...دار كل اللي يقدر عليه وقدر يتكتم عليه تماما...
🍃🍃🍃🍃
وحل الليل...
وطوبى راقده ع جنبها الايمن وهي متكمشه في بعضها وفي يدها التليفون..
غلبها النوم وهي تردد في #تاج_الذكر من الخوف..
فجأة..
رن تليفونها..
فاقت مفجوعه..
شافت المتصل لقاته هو..
طول ردت..
طوبى بلهفة خوف وصوت ناعس:وينك جالي!؟
بصوت نبرته حزينه قال..
"نجاة دارت حادث وهي مروحه بحمزة من المدرسه واني في المصحه توا مع العيله"
ناضت قعمزت وهي تقول بفجعه؛لاحول ولاقوة الا بالله!.. شن صار فيهم..
"هي وضعها صعب شويه وحمزة ذراعه اليسار صارتله فيها مشكله"
دمعوا عيونها ع حمزة وقالت؛ياروحي..
"اسمعي طوبى كلمي حد من ماليك يجيبك لحوش العيله"
هي هزت راسها وقالت؛حاضر تو نقولي لعمتي تجيني مع حسين..
"تمام..سلام توا"
هي قالت؛جالي..
"نعم"
بنبرة حزن قالت:اقرا قرآن ..
هو فهم انها لاحظت نبره الرعشه في صوته وقال..
"حاضر"
طوبى:سلام..
"سلام"...
سكرت عليه واتصلت بعمتها وهي تقول باسف؛لاحول ولاقوة الا بالله ربي يلطف بيهم...ايوه عمتي السلام عليكم..
🍃وبلغت طوبى عمتها باللي صار وطلبت منها تجيها هي وحسين...
بعدين فيسع ناضت دارت ع الفيلا كلها...
ع الميه..ع الضي..وع الغاز في الكوجينه..
وضمت اللي يبي الضم..
بعدها وتت روحها...
ووتت شنطه فيها حوايج ليها وللجالي..
ووين جت بتحط شحن تليفونها في الشنطه..
شافت الظرف..طلعاته وقعدت تشوفله وهي تفكر...
بعدين حطت الشنطه ع الكرسي..
ومشت لدار الملابس..
في الخزانه..كان في بالطو جديد بغلافه مالبستاش نهائي..
نزلت السوسته متاع الغلاف..وحطت الظرف في للجيب الدخلاني للبالطوا وسكرت عليه بالزر متاعه..
بعدين رفعت سوستة الغلاف ومشت طلعت من دار الملابس..
سمعت تليفونها يرن..
خدت شنطه الحوايج وشنطه اليد والتليفون..
ردت ع المكالمه وهي طالعه..
طوبى:وصلتوا؟.....شويه وجايه...
🍃🍃🍃🍃🍃
طلعت من الحوش لقت حسين نازل وواقف ع السيارة..
وين شافها شاده الشنطه..
جاها طول وقال؛هاتي..
مدتها..
هو خداها وفتحلها الباب الخلفي حط الشنطه داخل وشدلها الباب..
هي مشت ركبت طول..
سكر الباب ومشي بيركب..
طوبى:عمتي شن حالك اليوم..
مطيره؛الحمد لله بنتي...
ركب حسين..
مطيره؛كيف صار في نجاة ووليدها؟
شغل حسين السيارة وتحرك..
طوبى بحزن؛اللي حكيتهولك مانعرفش غيره..
مطيرة بأسف؛ياروحي الوليد وجعني قزيزين..
طوبى بحزن؛ربي يشفيه ويشفي امه مساكين مالهمش غيرها...
مطيره؛امين ربي مايحرمهم منها ياروحي..
🍃🍃🍃🍃
وفي المصحه..
زادوا ع الموجودين..
راجل مروة...ومحمد شنيبه ونضال..
محمد ونضال والجالي..خشوا شافوا حمزة في حجرته..
حالته وجعت قلوب عمامه..وقطعت قلب جده عليه اللي قعد يدمع ويمسح في دموعه وهو يتفكر في طاهر...
🍃اما صابرين ومروة خشوا لمدة تلاته دقايق فقط شافوا اختهم..
وضعها كان صعب جدا قطع قلوبهم عليها..
وياما بكوا هما الزوز لين طلعوهم...
🍃🍃🍃🍃🍃🍃
"بوه وخوه في المصحه توا.."
وهو شاد الكاس ومضيق عيونه قال:اممم..
"وزي ماقتلك استاذ تكتم ع هديكا المعلومه"
مختار:متوقع..المهم اللي نبيه صار...اي شي اي شي مهما كان تافه يصير تبلغني طول..
"حاضر"..
وسكر عليه..بعدين شرب الكاس وحطه ع الطاوله..
وناض وقف..اتصل بصابرين..
دار حركه بأنفه ورشف..وحط التليفون ع وذنه وسمع..
"ايوه حبيبي"
مختار:يااحلى ايوه ياعسل قلبي توحشتك برشه تحفونتي..
هي قعدت تبكي بصمت..
هو قال متصنع الاستغراب؛خيره صوتك صابرينه؟
"دارها الحق.ير..دارها"
مختار:مني اللي دارها وشن دار؟! اهدي وفهميني بالشويه عليك صابرين..
🍃وبدت تحكيله اللي صار بالتفصيل..
مختار:الصراحه وجعني الوليد راح في جرة غباء امه..
"ماتتشمتش فيها مختار"
مختار:ماتشمتش ياعيوني..لكن اختك حرقتلي دمي يومها اني نبهتها وهي مابتش تسمع لين ضيعت ولدها معاها..
"قصدك اكيد هو اللي دايرها!؟"
مختار:اممم..هو اني مانقدرش نأكدلك مجرد توقع بس
"مختار قولي بالله عليك انت شن تعرف عن حادث طاهر"
مختار:صابرينه ياقلبي قتلك قبل الموضوع هدا مانقدر ندوي فيه..المهم توا ياعيوني اي شي تحتاجوه اني موجود تبوا فلوس البطاقه عندك اسحبي قد ماتبي..تمام..
"شكرا ياروحي"
تنهد بحزن مصطنع وقال؛ياريت نقدر نكون جنبك توا..
"ياريت"
مختار:معليش حياتي..نخليك توا عندي موعد مهم بعده نكلمكOk
"تمام حبيبي..باي"
مختار؛تشاو..
وسكر وهو يرفع في حواجبه وينزل فيهم بعدين مشي طلع من دار الصالون...
🍃🍃🍃🍃🍃
وفي حوش محمد شنيبه..
في الصاله..
كانت طوبى موجوده مع حمواتها وعزوزتها والبنات الصغار في الصاله...
فهاليوم كانت طلعة نسرين من المستشفى وكانوا يبوا يلتموا ع طلعتها بش يغيرولها جوها..
لكن قدر الله وصار هالحادث اللي زادها على مابيها..
طوبى وهي تشوفلها بشفقه ع حالها؛نسرين خشي استريحي..
خديجه والدموع في عيونها؛ايه خديجه بري للدار تريحي شويه راك اليوم بس طلعتي..
رشفت نسرين ومسحت دمعتها وهي تقول؛فرقة راحتي..
مغليه؛ولد خوك مافيه شي الحمد لله وحتى نجاه حالها مش خطير بري سلم بنتي لدارك ارقدي..
تنهدت وقعدت ساكته وماناضتش..
سدرة وهي تمرر عليها في نظرهم قالت بحزن:اكيده جوري تبكي هلبه توا كان تعرف..
شبحولها..
شافت سدرة لطوبى وقالت؛خايفه ابله نجاة تموت حتى هي ويقعدوا ايتام من بوهم وامهم..
كلهم تأثروا بكلامها..
وطوبى دمعتها نزلت وهي تقول؛لالا بإذن الله مايصيرلها شي هي توا كويسه حبيبتي..
سدرة؛يارب..
مسحت طوبى ع ظفيرة سدره وهي تشوفلها بإبتسامه..
ناضت نسرين وقالت؛ماشيه للدار..
ومشت بالشويه عليها وطلعت من الصاله وعيونهم معاها...
بعدين طوبى شبحتلهم وقالت؛نديروا عشي؟
مغليه؛شوفي الصغويره اني ماخاطري في شي..
خديجه ناضت وهي تقول:نوضي راما..
مغليه؛اقعدي خيرك؟
خديجه؛لايام محي قريب يروح ويبي عشي وحوسة..
هزت راسها وقالت؛ع راحتك..
خديجه؛هي تصبحوا ع خير..
ردوا؛قدامك كل خير..
وراما كذلك حيتهم وطلعت مع امها...
بعدين طوبى قالت لعزوزتها؛ندير عشي للاولاد وسدرة..
مغليه؛وعمك مادوريشي يروح ياخد حليب وتمر..
طوبى:باهي..شافت لسدره وقالت؛تنوضي معاي..
سدرة؛باهي..
وناضوا الزوز ومشوا طلعوا من الصاله..
ومغليه خدت الريموت وحطت ع قناة ليبيا الرسميه بش تتفرج ع برنامجها المفضل...
🍃وطوبى دارت عشي خفيف لصغار المهدي..
تعشوا وقعدوا في المربوعه يراجو في جدودهم وعمامهم يروحوا..
اما سدرة ركبت مع طوبى لجناحها...
☘طوبى فتحت الاضويه الخافته وقالت:نحبه الضي الخافت..
ابتسمت سدرة..
طوبى:قعمزي سوسو..
مشت سدرة قعمزت ع الكنبه الوحيده في الجناح..
طوبى:كأنه الجو بادي ينضغط..
ومشت لباب الفيرندا وفتحاته..
فاحت عليها روايح حلوة...روايح ورود متداخله..
التفتت لسدرة وهي تقول بإبتسامه؛تشمي في ريحه الورد..
سدرة بإبتسامه؛ايه..
مشتلها طوبى قعمزت جنبها وقالت:شن جو القرايه..
سدرة؛كويس..ايه حقه اني ماقلت لحد من صحباتي اللي صار معاي عمتي خديجه قالت ماتقولي لحد هادي حاجه خاصه..
طوبى:صح عندها حق مش كل شي ينقال خصوصياتك ماطلعيها لحد..
سدرة هزت راسها وهي ساكته..
طوبى:داروا تطبيقات وانتي غايبه؟
سدرة:ايه لكن قالوا ابلاتي بيعاودولي بروحي..
طوبى:كويس..
سدرة؛كلمتني ماما بكري وقالت بتمشي للعمره..
ابتسمت وقالت؛الله يبارك..
سدرة بضيق:استاحشتها هلبه..هلبه..
مسحت طوبى ع ظفيرتها وقالت؛ماقالتش امتى بتروح؟
سدرة؛بعد العمره..
طوبى بفرح:خلاص معناها بتروح قريب..
ابتسمت سدرة وقالت؛ايه هدا علاش ماقلتلهاش اللي صار معاي نراجي لين تروح احسن ولا؟.
طوبى بإبتسامه؛ايه احسن...
سدرة:ايه بنقولك شفت رسمتك متاع القلب قالتلي عليها تاله شفتها في المعمل تقول قلب حقاني..
ضحكت طوبى..
وسدرة كملت تقول:عندي واجبات فيهم رسم في العلوم والجغرافيا ترسميلي؟
طوبى؛من عيوني..
سدرة؛عادي توا؟
طوبى:عادي مكسده ماعندي ماندير..
سدرة ناضت وهي تقول؛شويه وجايه..
ومشت طلعت من الدار وطوبى معاها بعيونها..
فجأة رن تليفونها..
التفتت للزيانه تشوفله..بعدين ناضت خداته..
شافت المتصل وردت طول..
طوبى:السلام عليكم ابله نجاح..
" وعليكم السلام بنتي شن حالك"
طوبى؛الحمد لله شن حالك انتي وحال العيله..
"ياربي لك الحمد في خير ونعمه"
طوبى:دوم ان شاء الله..
"يدوم هناك..طوبى بنقولك المحلات اللي بعتيلي اسمائهم تو نمشيلهم نهار السبت ان شاء الله"
طوبى:ان شاء الله..
"خديتي المقاسات ولا"
طوبى:ايه تو نبعتهملك نسيت مابعتهمش بكري..
"تمام..صحيتي طوبى حبيبتي"
طوبى بإستغراب؛سلمك لكن ع شني؟
"شركتيني معاكم في الاجر جبر خاطر وادخال السرور ع قلب مسلم ربي يكتب اجرنا واجرك يارب"
طوبى بإبتسامه ودموعها في عيونها؛آمين..
"ربي يفتح عليك ويحفظك ويردلك اللي عرفت تربيك احسن تربيه صدقوا اللي قالوا الام اللي تربي"
نزلت دمعه مسحتها وهي تقول:آمين يارب..بارك الله فيك..
"فيك بارك الله بنتي..تصبحي ع خير"
طوبى؛قدامك كل خير..
وسكرت...وهي ترشف وتمسح في دموعها..
ع خشة سدرة شافتها تبكي قالت:علاش تبكي!..
ابتسمت طوبى وقالت؛مافي شي حبيبتي تفكرت سدرة اختي..
سدرة قعمزت حداها وشنطتها في يدها وهي تشوفلها بحزن..
طوبى وهي تمسح في دموعها؛طلعي الكراسات متاعك ترا
سدرة؛باهي لكن قبلها سكري الفيرندا صقعت..
طوبى؛حاضر..
وناضت ومشت للباب..
وين وقفت عليه بتجبده .
انفتح باب فيرندا الجار قدامهم..
هي شافتله تلقائيا..
وهو شافلها كذلك تلقائيا ..
بدت ع وجهه ملامح الامتعاض..عقد حواجبه وجبد الباب بقوة وسكره..
هي ارتبكت وانحرجت..
وسكرت الباب بعدين نزلت السيرانتي..
وسمعت السيرانتي متاعه ينزل ..
طوبى وهي مضايقه قالت في نفسها"عليك ردة فعل..كله من عبير ومن تصرفاتها الطايشة"..
🍃اما هو..
طلع من الدار وسكرها وقعد شاد ع مقبض بابها بقوة وهو مغمض عيونه وانفاسه متسارعه وفي داخله يدعي..
"ابرأ من حولي وقوتي..وألجأ لحولك وقوتك...
ابرأ من حولي وقوتي..وألجأ لحولك وقوتك..."
فتح عيونه..بعدين مشي طول للحمام بش يتوضا ويصلي...
🍃🍃🍃🍃🍃
"اني والله العيله عجبوني ناس متواضعه ومحترمين هلبه"
فردوس:تحسيهم عاجبهم الموضوع..
مطيره؛هكي الباين..والحق اني قلت عن حسين كل شي حتى عيوبه..قلت انه واعر وعصبي شويه مريت عمك انقمصت مني لكت فتتها ماعدلتش عليها..
فردوس بضحكه؛عطيك الهني..
مطيره؛هادي شهاده قدام ربي يابنتي والبنيه لازم تعرف بش تشوف روحها تقدر ولالا..
فردوس؛هو عصاب وواعر صح..لكن عقله كبير وحنين هلبه وعاطينا الحريه ومش مقيد حد..
مطيره؛لكن وين ينوض عليه البوري ياكبدي يده والكف والله قريب قلتها لكن خفت من مرت عمك تقيم عليا الحد..
فردوس بضحكه؛حقه تخافي منها..
مطيره:نخاف من عينها..خوفي من جدك بس..
قعدت تضحك فردوس..
ع خشة لطفي قال:السلام عليكم..
هما ردوا؛وعليكم السلام..
قعمز حدا فردوس اللي قريب طارت من الفرحه وشبح لمطيره وقال؛هاه شن تخبرينا ع مشية اليوم..
مطيره؛تو نعاودلك ياسيدي قداش عندي لطفي اني..
ضحكت فردوس..
وهو ابتسم وقعد يسمع في اخته..
🍃وفي الحوش اللي فجنبهم..
حسين:علاش حامقه يام اللي داراته عمتي صح البنت لازم تعرف..
صفيه:ع اساس مش عارفه ماهو اختك حكتلها ع طباعك..
اميمه؛عمتي ماتعرفش اني حكيت..
حسين؛مش انتي قلتي اميمه حكتلها معناها مافيش مشكله..
صفيه؛حكتها للبنت مش لماليها مرات يردوك ..
حسين؛في ستين داهيه..
اميمه فنصت..
صفيه؛ماصدقت انت عاد..
هو قال؛اللي مايبيني مانلوحش روحي عليه..
وناض ومشي طلع من حداهم..
صفيه بصوت واطي؛صدقتك..
اميمه؛يام فكينا بالله عليك خلي الموضوع يمشي ماصدقنا قال باهي..
صفيه:باهي اني بنسكت ونشوف شن يصير فيكم..
اميمه ضحكت وحركت راسها يمين ويسار...
🍃🍃🍃🍃🍃🍃
وروحوا محمد شنيبه ونضال...
والجالي قاعد بايت تحت المصحه...
🍃في دار مغليه ومحمد...
مغليه؛بيقعد بايت غادي الليل كله؟
محمد؛مرات يحتاجوا شي ولاتصير حاجه فجأة لازم يقعد معاهم راجل..
مغليه سكتت وهي مش راضيه...
☘وفي جناح الجالي وطوبى..
كانت مقعمزة ع السرير وجنبها سدره راقده...
وهي تتكلم بالتليفون..
"ماتندريش شن يصير فجأة"
هي قالت؛صح مزبوط..بس قولي شن حالتها نجاة بالزبط..
"والله شن بنقولك..المسكينه خشت في بطنها حديده دارت مشكله في الرحم حولوه..
طوبى بصدمه ووجع؛لالا!؟.
"هدا اللي صار"
هي قالت بوجع؛ياربي مصعبها..ربي يكون معاها لما تعرف..لاحول ولاقوة الا بالله...
"قدر الله وماشاء فعل"
طوبى بضيق؛وحمزة باهي حق زي ماقتلي بكري ؟.
"ايه زي ماقتلك قبل..يده مش حترجع طبيعيه الا بعد علاج طويل وجلسات علاج طبيعي"
هي قالت بوجع؛ياروحي مسكين ياقلبي..
"يللا الحمد لله اللي جت هكي"
طوبى:صح الحمد لله..هي مالا مانعطلش عليك كان ماقدرتش ترقد وتبي تهدرز اني سهرانه..
"تمام...تصبحي ع خير حبي".
هي قالت؛وانت من اهله..رد بالك ع روحك..سلام..
"حتى انتي..سلام"..
وسكرت...
وقعدت تشبح للتليفون وهي تفكر بأسف ووجع في اللي عرفاته..
ويقودها التفكير من هني للرساله اللي لقتها ع الباب...
قعدت ساعات وهي تفكر..
من وين جتها..وشن قصده بكلامه...وشن غرضه من ورا اللي داره؟!
ولأن طوبى صاير معاه موضوع في المدرسه فيه تلاعب وخيانه قاعده دور وراه وتجمع في الادله..
خطر ع بالها ان في حد تاني يعرف اللي صاير ويبي ينبهها...
حصرت طوبى تفكيرها في القصه هادي بس..مابتش تفكر في اي احتمال تاني غيرها..بتاتا...
وجاها النوم هديكا الليله في وقت متأخر هلبه..
رقدت...
🍃وراجلها سهران ع راحة مرته اللي هي ضرتها...
قاعد يفكر في اللي قالوه الشرطه بخصوص الحادث انه بفعل فاعل..
آرقه التفكير في هديكا الليله والخوف قعد مسيطر عليه..
وجاه احساس قوي ان في حد غير اللي يعرفهم عنده علم بزواجه هو ونجاه...
🍃🍃🍃
وآذن الفجر..
ومشي الجالي يصلي في جامع قريب من المصحه..
وصابرين اللي باتت جنب اختها...
مشت خشت للحمام ...
بعد ماطلعت...شافت اختها لقتها فايقه وتشبح جهة الروشن..
جتها بسرعه وهي تقول:نجوته حبيبتي..
شبحتلها وقالت بصوت متعب:حمزة..
صابرين:حاله باهي حبيبتي مافيه شي..
نجاه:احلفي..
صابرين:والله العظيم كويس يانجاه..
نزلوا دموعها وهي تقول؛وينه؟
صابرين مسحت دموعها قبل لتنزل وقالت؛في حجرة تانيه حبيبتي هو يده انصابت بس خفيفه حبيبتي والباقي والله باهي صدقيني..
نجاه بنبرة باكيه؛راح ولا؟
شافت صابرين لبطن اختها بعدين هزت راسها وقالت؛ قولي الحمد لله حبيبتي اللي جت ع هكي..
غمضت نجاة عيونها وقعدت تبكي بصمت..
قعمزت صابرين حداها وقعدت تقول:قولي الحمد لله نجاة كان مرات يصير فيكم اكثر من هكي..
فتحت عيونها وسألتها بنبرة مبحوحه؛الجالي..جي؟
هزت صابرين راسها وهي ساكته..
نجاه؛لما عرف..شن قال؟
غيرت صابرين عيونها وقالت:ماقال شي..تلقيه ماصدق..
عقدت حواجبها وقالت؛شن قصدك؟
شبحتلها وقعدت ساكته..
ونجاه من نظرة عيونها فهمت قصدها..غيرت عيونها عنها وقالت؛لالا اللي في بالك...في بالك..مش صح..
صابرين بقلق؛باهي خلاص حبيبتي انسي توا صار اللي صار..
شبحتلها وقالت؛نبي الجالي يجي توا..
دق باب الغرفه..
شافوله..
صابرين؛تفضل..
انفتح الباب وخش الجالي شافها فايقه سكر الباب وقال؛نجاة حبيبتي..
قلبت صابرين عيونها وناضت ومشت طلعت..
وهو جي لنجاه قعمز حداها وشد يدها وقال:هاه حبيبي شن تحسي روحك توا؟
هي ودموعها ينزلوا زي السيل؛راح ياجالي..
حط يده ع راسها وقال:المهم انتم كويسين حبيبتي..
نجاه بصوت مخنوق؛حمزة كويس قول الحق..
الجالي:اقسم بالله العظيم كويس والله..
غمضت عيونها وقعدت تبكي وبدي ع وجهها ملامح الوجع لين حطت يدها ع بطنها..
مسح دموعها اللي كانوا ع حافة عيونه وقال؛خلاص ياقلبي خلاص..وقعد يمسح ع يدها ويقول..خلاص ياروحي..
ناض باس جبينها وحط جبينه عليه وقعد شاد يدها بقوة وهو يقول؛خلاص خلاص..
🍃🍃🍃🍃
وفي حوش اهله..
كانت طوبى دير في الفطور للعيله...
بعد ماجهزت الفطور...
التموا كلهم في الكوجينه وقعدوا يفطروا..
محمد شنيبه؛اتفقت اني وراجل اختها تمشيلهم العشيه تجيب الصغار من غادي..
نضال هز راسه وقال؛حاضر..
مغليه؛تبيها تطلع من غادي هني؟
محمد شنيبه؛ايه..
قعدت تاكل بدون ماتعلق..
نسرين؛امتى يطلعوا هما؟
نضال؛حمزة يبي اسبوع وهي اربعه ايام..
نسرين بوجع؛ياروحي حبيبي..
شافتلها بنظرات استغراب غير واضحه..
محمد المهدي:ان شاء الله مايصير ليده شي..
جده رد يقول؛نرفعه لاخر الدنيا بش يعالجوها وتولي زي ماكانت..
شافتله مغليه وهي تاكل..
طوبى قالت؛ربي يشفيه..
كلهم قالوا:آمين..
محمد شنيبه شافلها وقال؛كلمك الجالي؟
طوبى:اتصلت بيه ماردش شكله قاعد راقد..
شافتلها نسرين وهس تحط في الخبزة في فمها وقعدت تمضغ بالسيف..
ناض محمد شنيبه من مكانه وقال؛تو نكلمه اني..
ومشي طلع من حداهم..
ناض نضال ولحقه...وشويه وناضوا محمد ويزن وطلعوا حتى هما..
مغليه قالت؛الغدي كسكسي طوبى..
طوبى هزت راسها وقالت؛حاضر..
ناضت نسرين ومشت طلعت من الكوجينه بصمت..
بعدين ناضت مغليه خدت دواها ومشت طلعت...
وقعدوا طوبى وسدرة في الكوجينه يتساعدوا عليها وهما يهدرزوا مع بعض..
🍃🍃🍃🍃🍃🍃🍃
وبعيد عنهم...
في ألمانيا...
واقف قدام المستشفى وهو حاط ايديه في البالطو متاعه..
والثلوج زي قطع الصوف المتناتره قاعده طيح حواليه..
وهو سرحان..
مهموم وخايف..وقلبه مقبوض...
فجأة..رن تليفونه..
طلعه من جيبه ورد طول..
المهدي:نجيك؟......تمام..
سكر...ومشي خش طول للمستشفى...
~~~~~~~~
طالع بيها من المستشفى وهو يقول؛كان سمعتي الكلام وقعدتي اسبوع تاني..
عائشه؛العمره كلها يومين يامهدي نديروا ونولوا ناخد اخر جرعه ونروحوا بإذن الله..
هو تنهد وقال؛اللي يريحك نديره..
وصلوا للسياره..
ركبها وبعدين هو مشي ركب...
وتحرك بيها للشقه اللي قاعدين فيها...
🍃🍃🍃🍃🍃
الساعه 2:30بعد الظهر...
قبلها الجالي روح للفيلا وماروحش ع حوش بوه..
تجهز لصلاة الجمعه ومشي صلى في الجامع القريب ع الفيلا..
بعدين ولى للمصحه...
بدون مايعطي خبر لطوبى..
اللي قاعده تراجي فيه بعد ماغدت العيله وغسلت الماعين..
لين خش عليها يزن وقال:خالتي طوبى..
التفتت وشبحتله وهي تقول:نعم؟
هو قال:قالك عمي نضال عمي الجالي بيروح بعد المغرب..
هي حست بشي من الضيق لأنه ماخبرهاش بروحه وحتى اتصالاتها مايردش عليهم..
لكن ردت ع يزن بهزة راس وقال:تمام..
يزن مشي طلع...
وهي ضمت ضمت الغدي ودساته في الكوشه...
بعدين طلعت ومشت ركبت لجناحها...
🍃🍃🍃🍃🍃
وفي المصحه..
الجالي مقعمز حدا ولد خوه في حجرته ويحاول يقويه ويشجعه...
الجالي:تاخد وقتها حبيبي وتو تولي زي قبل..
حمزة بضيق؛والمدرسه؟
الجالي؛عادي تمشي للمدرسه وتقرا عادي لكن بعد مايولي حالك باهي وترد بالك عليها..تمام يازعيم..
حمزة:تمام..
الجالي شد يده وقاله؛خليك راجل..
ابتسم حمزة وقال:حاضر..
وعمه قعد يشوفله بإبتسامه تخفي الحزن اللي كان يحس بيه وقتها...
🍃وقعد غادي لين آذن المغرب..
وجي نضال بدل عليه...
روح لحوش بوه...واستقبلاته خديجه ودخلاته الدار وكانت معاهم نسرين..
خديجه؛نجاه كانت حامل ولا؟
هو انصدم وشاف لنسرين اللي كانت منزله راسها وبادي ع وجهها ملامح الضيق..
خديجه؛نسرين تعرف..
زاد انصدم..
خديجه؛اشبجلي هني هديكا كانت حامل ولا؟
عقد حواجبه وقال؛ايه..وفي من دبرلها الحادث..
الزوز شبحوله بصدمه...
هز راسه وقال؛ايه لاعبين بفرينوات السيارة..وقعد يشوف لخديجه بحده..
خديجه بخوف:خيرك تشبحلي هكي!! اللي فكرت فيه حوله من راسك مستحيل..
الجالي بإنفعال:مالا منو قوليلي منو؟..وعيونه دمعوا..
نسرين قعدت مركزه عليه لاحظت انه متألم باين في وجهه..
خديجه؛هادي مانديرهاش تلك مستحيل..
قدملها وهو يفنص فيها ويقول؛باهي من غيرك يعرف وكاره نجاة ومايبيهاش قولي!!؟
هي قالت؛اسألها هي الهانم ملبزتها مع هلبه ناس..
هو قال:شن قصدك!؟
ناضت نسرين ومشتلهم وهي تقول؛وطوا صواتكم امي وطوبى تو يسمعوكم..
هو قال؛طوبى قاعده!؟
نسرين؛ايه ماتحركتش بكل من هني من امس لليوم وهي تجري وتتصل بحضرة جنابك وماتردش عليها
هو حس بضيق شديد
نسرين ودموعها في عيونها:علاش طوبى علاش..علاش من البنات كلهم مااخترتوا الا هي ديروا فيها هكي يالجالي والله حرام البنيه مسكينه حاطاتك في عيونها وقايمتنا فوق راسها تخلونا نستغفلوا فيها علاش..
خديجه فنصت فيها وقالت؛وطي صوتك..
نسرين بصوت منخفض:مقطعه قلبي ياخديجه معقوله ماوجعتكش..تي فوقها واجعتها نجاه وتدعيلها وتقول ربي يصبرها ويكون معاها..ماتعرفش ان هي احوج منها لهالدعوة..
الجالي اشر عليها بيده وقال:انتي من امتى تعرفي؟!
نسرين بتهكم:من بداية زواجكم ياباش مهندس..اسمع جالي نجاة اني اكثر وحده نعرفها خايفه علي طوبى منها عارفه شن حديرلها توا..ارجوك بالله عليك طلقها..
الجال بغضب مكتوم؛قلتها لأختك قبل الف مرة وبنقولهالك انتي توا نجاه مش مطلقها..
غمضت خديجه عيونها بغضب..
ونسرين قالت؛اني قصدي طوبى..
وكأنها وجهتله صفعه باللي قالاته..عقلع تلقائي رفض الفكره رفض قاطع حرك راسه بالرفض من غير مايتكلم..
نسرين؛طوبى هكي ولاهكي حتخسرها اخسرها خسارة صغيره يالجالي الخسارة الكبيره بتولي علينا كلنا راهو..
خديجه شبحتله وقالت؛الخسارة الكبيره..لو صار وعرفت طوبى مانقدرش نتوقع شن ممكن يصير لأني كنت واثقه انك حطلق نجاه وطلعها من حياتك بعد تاخد طوبى لكن طلعت غالطه هلبه..وبديت نخاف هلبه من الخسارة الكبيره اللي حكت عليها اختك..هدا علاش حتى اني نقولك طلق طوبى بهدوء يالجالي واني مستعده نساعدك في زواجك نجاه..
هو قعد يشبحلها بعدم استيعاب..
خديجه؛والله مستعده نساعدك المهم تنهي حالة الرعب اللث عايشين فيها ساد اني تعبت..
نسرين؛حتى اني تو نساعدك سلم وخيي بالله عليك اسمع الكلام..
هو مرر نظره عليهم هما الزوز...
بعدين مشي طلع من الدار بدون ماينطق بحرف..
نسرين شافت لخديجه وقالت؛تدوي من جدك ولا؟
خديجه شافتلها بضيق وقالت؛تعبت خلاص مافيش فايده مهما ندير قاعد متمسك وشفتي اللي صار في حمزة الولد مازال يبي علاج ويبي من يجري بيه واكيد امه مش حتسيبه يطلع برا البلاد من غيرها..
نسرين بضيق؛ياريتك من الاول ساعدتيه ياخديجه قبل لتحطوا ذنب هالبنيه في رقبتكم شن ذنبها ياروحي تروح لحوش ماليها مطلقه وتزيدهم ع مابيهم..ياعمري قاعده صغيره مستقبلها دمر..
خديجه؛معاش تبالغي..تو تلقى غيرها مادامها قاعده بطولها ومادارتش صغار..
نسرين بحزن؛واني هدا علاش قتله يطلقها...
🍃وهو ركب للجناح وعقله مش عليه..
وصل في الباب وقعد واقف قدامه وهو يسمع في كلام خواته اللي قاعد يتردد ع مسامعه..
فجأة..
انفتح الباب..
"جالي روحت"
رفع عيونه فيها...وقعد يشوف لعيونها...
وماقدرش يتكلم..
هي قالت بقلق؛خيرك وجهك هكي!؟ صايره حاجه!؟
غير عيونه وخش وهو يقول؛اكثر من هكي..
هي سكرت الباب وقالت؛قدر الله وماشاء فعل وباهي اللي جت ع هكي..
التفت عليها وقال بإنفعال؛علاش كنتي تبي يصير اكثر من هكي!..
هي بصدمه:كيف!؟
هو قعد يشبحلها بنظرات منفعله ..
وهي قدمتله وقالت بشي من الهدوء:جالي..خش خود للحمام خود دوش سخون واني تو نطلعلك حوايجك ونديرلك بابونج بش ترقد مرتاح..
هو قال بنفس الانفعال واشر بيده عليها:مانبي شي..شي..بري لحوش اماليك واقعدي عندهم اني مش حنفضى بكل الايام الجايه..
طوبى وهي مستغربه ومش فاهمه شي:كيف نقعد غادي في ظروف زي هادي مايجيش..
هو قال بتهكم وانفعال؛ع اساس يعني..تي ماهو بالعراك تجي هني توا بتطلعي صاحبة واجب!
هي بعدم استيعاب:جالي خيرك!؟
رد عليها يقول بإنزعاج؛بالله ماتنفخليش راسي تشبحي في الوضع قدامك وتقولي خيرك..بري بري لحوش ماليك بالله عليك اني مش طايق روحي..
ومشي خش للحمام وسكره عليه بقوة .
وخلاها مش مستوعبه شي من اللي صار..
قعدت واقفه تفكر وتحاول دورله مبررات...
بعدين مشت طلعت شنطه ليها من الدولاب طلعت منها الدبش اللي جايباته وهي مازال تتفكر في كلامه وتبررله في نفس الوقت..
تقول..نفسيته تعبانه...واللي صار اثر عليه..
واكيد بدون ارادته..المرض هو السبب...
وقررت تخليه ع راحته لين يروق...لازم تسايره..
الحياة الزوجيه هكي تبي...
وهالمبررات كانت بمثابة المخدر اللي خداته طوبى وخلاها تنسى كل شي..
قبل لتطلع..وتتله حوايجه وحطتهم ع السرير...
بعدين نزلت للكوجينه دارتله مق بابونج..
وولت ركبت للجناح وحطاته ع الزيانه..
بعدين لبست بالطوها وخدت الشنطه اللي فيها حوايجها ومشت طلعت من الجناح وسكرت الباب..
🍃هو شويه وطلع...
كان لابس الديشمبر وينشف في شعره بالفوطه..
شاف للسرير لقي توته مطبقه محطوطه عليه...
بدت ع وجهه ملامح الألم..
غير عيونه عنهم ومشي للزيانه بيحط الفوطه ع الكرسي..
شاف مق البابونج..
غمض عيونه بشده من الأسف...بعدين فتحتهم ونزلت من عينه اليسار دمعه وهو يشوف للمق ويتفكر في كلام نسرين..
《 علاش طوبى علاش..علاش من البنات كلهم مااخترتوا الا هي ديروا فيها هكي يالجالي والله حرام البنيه مسكينه حاطاتك في عيونها وقايمتنا فوق راسها تخلونا نستغفلوا فيها علاش..》
خيط بيده ظهر الكرسي بعصبيه وبعدين مشي للسرير بش يلبس حوايجه وهو في قمة الضيق...
🍃🍃🍃🍃🍃
وطوبى طلعت من حوشهم بروحها..
ومشت لحوش اهلها..
وين جت قاصه الطريق...
بانت ع محمد المهدي اللي كان واقف في القهوة..
وفي القهوة نفسها كان مقعمز عبد القيوم..
شافها وهي تقص في الطريق بروحها وفي يدها الشنطه..
غير عيونه عنها وشاف لسيارة الجالي المدرسه قدام الباب بدت ع وجهه ملامح الازدراء..
وعيونك ياربيع اللي مقعمز حداه عليه...
غير عبد القيوم عيونه لمحمد المهدي وين شافه طلع بسرعه من القهوة ومشالها..
لحق عليها وقال:مرت عمي جيبي الشنطه..
هي شافاته ابتسمت وقالت؛خود..
خداها وقص معاها الطريق وهو يقول:علاش ماقلتيش بتمشي راهو وصلتك؟
طوبى بإبتسامه؛عادي مش اول مرة الباب في الباب..
هو قال؛مهما كان معاش تمشي بروحك لمانبدا قاعد قوليلي..
هي بضحكه قالت؛باهي..
ووصلها لحوش لطفي الواعر...
بعد ماخشتله هو مشي وولى للقهوة..
وعيون عبد القيوم تشوفله وهو مبتسم بعدين قال:العيل هذى راجل..
ربيع بإبتسامه؛هكي كان المهدي في صغره..
شافله وقال؛ليه وحشه هالمهدي طول واجد..
ربيع:ايه لكن بكري سمعت نضال يقول بيمشي يدير عمره مع عياله ويروح هني طول..
عبد القيوم؛يردوا طيبين ان شاء الله..
ربيع؛ان شاء الله..نبي نفتح معاه هو موضوعي..
عبد القيوم؛اصبر شوي لين يطلعوا من اللي هما فيه..
ربيع تنهد بضيق وقال؛مش عارف لأمتى بنصبر..
غير عبدالقيوم عيونه في الفراغ بعدين قال..
لين ربك يفرجها..
🍃🍃🍃🍃🍃
الساعه 9:00ليلا..
كانت طوبى مقعمزة في الجنان ع الطاوله..
تشم في روايح الفل والياسمين ومسك الليل اللي تفوح في هداكا المكان...
كل ماتتنفس هالروايح الحلوة..تسترخي ونفسيتها ترتاح..
وشويه لقت روحها..
تردد في تاج الذكر اللي ولت مدمنه عليه..
برغم الهم اللي حاسه روحها غارقه فيه..
وين تردد..
لاإله إلا الله وحده لاشريك له..له الملك وله الحمد وهو على كل شي قدير..
ترتاح..راحه عجيبه وكأنها ماصايبها شي ولامس قلبها حزن في حياتها..
سكتت..
لما سمعتهم في الكوجينه يحكوا ع فضانيه حسين اللي حتندار يوم الأحد..
"كلمت خوتي وقالوا بيجوا"
"باهي كويس..معناها بوي ولطفي وخوتك التلاته خير وبركه"
"ايه اني قتلهم مش جايين هلبه"
ارتسمت ع وجهها ابتسامه...بعدين ربعت ايديها وشافت يمينها..
ويبان عليها حسين واقف يكلم في خالها المحجوب..
شويه وخش المحجوب..
وحسين جاها...
وين قرب منها..وقف ع الطاوله وقال؛شن جو؟
طوبى بإبتسامه؛الحمد لله..مبارك عليك وربي يتمم ع خير..
هو ابتسم غصب وقال:آمين..
طوبى:ترا قعمز حسين شويه بنسألك ع حاجه..
هو طول قعمز وقال؛اسألي..
هي ضيقت عيونها وقالت؛التارقي صاحبك ولا؟
هو بإستغراب قال؛ايه علاش؟
هي قالت؛اكيد حاكيلك ع البنت اللي يبيها..
هز راسه وقال؛ايه...علاش تسألي في الاسئله هادي..
هي تنهدت وقالت:البنيه صاحبتي وتقرا معاي..
هو تفاجئ هلبه..
طوبى:حكتلي ع تارقي جي خطبها وردوه ماكنتش نحسابه نفس جارنا..لعند ماشافاته عندي في المدرسه قالت هو نفسه..
هو قال بتعجب؛سبحان الله..!
طوبى؛ريت قداش الدنيا الصغيره!..المهم نبي نعرف هو قاعد حاطها في باله ولاخلاص..
حسين؛علاش هي غيرت رايها؟
طوبى؛فرضنا هكي..
حسين:قوليلها تنسى اني نعرفه مستحيل مازال يرجع يطلبها ولايفكر فيها..
طوبى؛علاش!؟
حسين بعصبيه؛شن علاش؟! رداته من غير سبب ولاخل نقولك كلنا عارفين السبب تتوقعي واحد زيه مازال يرضاها علي روحه ياخد واحده محت.قره اصله!؟
طوبى؛ماتبالغش حسين شن محت.قرة اصله هادي!؟
هو قال؛رداته ع خاطر تارقي ولالا؟
طوبى؛باهي هي توا غيرت نظرها في الموضوع..
هو قال:واني قتلك قوليلها تنسى عبد القيوم ونعرفه كويس كرامته فوق كل شي..
طوبى في نفسها..
"مالقيت مع من ندوي"
هزت راسها وسكتت..
ع طلعة مطيره شافاته وقالت؛عريسنا هني؟.
ابتسم مجامله وهو يشوفلها..
مطيره؛هي نوضوا خشوا مدايرين سهريه وجو هيا..
طوبى ناضت وهي مبتسمه..
وهو قال؛سهريه دربوكه قصدك..
ضحكت طوبى وهي خاشه..
ومطيره بضحكه قالت؛يعطيهالك دربوكه شني..سهرية هدرزة..
ناض وقال؛لالا اني في عيوني النوم بنرقد غدوة عندي طلعة بكري لمصراته..
هي قالت؛كان هكي برا تصبح ع خير..
هو قال:قدامك كل خير..
ومشي وهو رافع معاه ضيق مش راضي يفارقه من لما قرر يخطب حسناء..وكان كله خوف تنظلم معاه البنت..
🍃ماظلم الجالي مرته طوبى...
وظلم خوه المهدي مرته عائشه....
وقاعد توا يعاني عذاب الضمير والشعور بالذنب اللي قاعد يشتد يوم بعد يوم...
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
وسافر بيها للسعوديه..
وحقق حلمها..ورغبتها انها تزور بيت الله الحرام...
بس في اليوم الاول طلبت منه تمشي للمدينه وتصلي صلواتها كلها في المسجد النبوي...
#رسايل_وداع
#طوبى
....يتبع....
