# طوبى "شارع القهوة"
#جمان_فريد
#الجزء_الخامس_عشر"ياغربتي في عيونك"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
مقعمز في الفروسيه...
والسحاب يتراكم في سماها...وبدي تضرب في بعضها..
برقت...وبعد ارعدت...
وقلبه كان يرعد زي رعد السحاب ويمكن اقوى..
كيف بيتحمل فكرة انها ولت لغيره..وهو اللي عمره ماكان لغيرها...
معاه حق..الزواج شي...والحب شي تاني.....
الزواج حتى وان كان ليه قدسية عظيمه..لكن بدون مشاعر يولي مجرد علاقة عاديه روتينيه وخلاص..
امر واقع وانحط فيه صاحبه ولازم يعيشه..
ممكن اللي قلوبهم خاليه يكون عادي عندهم ومايتعبوش..
بس اللي قلوبهم معلقه بناس تانيه..الحياة هادي بالنسبه ليه حجيم مستعر..
بالذات لو قعد المحبوب مقابل العين..وكل يوم يغدو ويروح قدام محبوبه شن بينسيه..شن بيطفي نار القلب ولايهديها!؟
المهدي صح دارها بيده...بس كله كان ردة فعل لإحساسه انه يعشق سدرة اكثر ماهي تعشقه..
لأحساسه انه في اخر اهتمامتها..بينما هي اولى اهتماماته...
المهدي كان مستعد ع خاطرها يدير كل شي..
بس لما شافها مسلمه فيه..كرامته وكبريائه وجعوه..وانتقملهم..
بس بتهور واندفاع بدون تفكير...وهذا عيب المهدي الكبير المغطي ع كل ميزاته...
ندم..واعترف انه ظلم....
بس بعد اللي عرفه اليوم..شعور الندم والظلم تلاشوا..
وحس انه مظلوم ومضحوك ع قلبه..
ومع هذا...لايمكن...ومستحيل يسلم في حب حياته بالساهل مش حيتحمل يعيش ويشوفها مع غيره..
بالذات وانه جاه احساس قوي انها ممكن تميله..
لالالا...شي زي هذا فوق طاقة وقدرة تحمل المهدي فوق بهلبه..!
المطر تصب..تصب بغزارة وهو قاعد تحتها ويفكر شن يقدر يدير كيف ممكن يتصرف!؟...
ناض من مكانه وقعد يمشي لين طلع من الفروسيه وجي لسيارته..ركبها وتحرك..
🌻🌻🌻🌻🌻
"امتى موعدك"
نسرين وهي تمشط في شعرها:اخر الشهر..
حامد:بتجيبي في نفس المصحه..
نسرين؛اكيد صغاري كلهم جبتهم فيها..
التفت حامد وشبحلها وقال:فيك حيل تمشي معاي لعرس واحد صاحبي...
التفتت وقالت:ايه نقدر نمشي عادي..
حامد؛توقعتك..تنشطي وين نتكلم ع سفرة ولاعرس..
نسرين؛مافيش احلا من الهياجه..
حامد؛ياريت صغارك ياخدوا شويه من حماسك هذا..
شبحت للمرايه وكملت مشط شعرها بلامبالاة...
هو تنهد بعدين قال؛العشيه نطلعك تاخدي ماتلبسي للعرس..
ابتسمت وقالت:باهي..
حامد:شعرك معاش تصبغيه ولى ماينفعش اول ماخديتك ماكانش هكي..
نسرين:تو نهتم بيه..
تنهد وقال:إن شاء الله..
فجأة رن تليفونها..
خداته من ع الزيانه وشافت المتصل وجهها انخطف لونه..
فتحت الخط وردت..
نسرين:ايوه مهدي..
راجلها قعد يشبحلها..
"اطلعي برا نبيك"
نسرين:علاش شن فيه!؟
سكر عليها بدون مايرد..
ناضت وهي خايفه..لمت شعرها ومشت بتاخد عباية ووشاح من ع الشماعه .
حامد:خير صايرة حاجه..
نسرين بإستعجال:مش عارفه..
حامد وهو مستغرب:باهي بالشويه عليك...
طلعت من الدار وهو يشوفلها بإستغراب..
☘طلعت نسرين تجري برا الحوش..
فتحت الباب الخارجي..
لقت سيارة المهدي فم الباب..
مشتله ركبت جنبه وقالت؛خيرك مانزلتش حامد قاعد؟
شبحله وهو لابس نظارات:عندك علم ان سدرة انخطبت!
قعدت تشوفله وهي ساكته..
هز راسه وقال:كلكم عارفين من امس صح!
قعدت ساكته كذلك ومابتش تتكلم..
شبح القدام وقال؛وانتم امس جيتوا لعايشه تخبروا فيها..
شبحت نسرين القدام وقالت؛نصيبات..
خبط بيده الدومان وقال بغضب:معاش تقولوا الكلمه هادي معاش نبي نسمعها..
نسرين برغم خوفها قالت بتحدي وهي تشوفله:لا بنقولها يامهدي ولازم تسمعها وتقتنع بيها..ارضى بنصيبك يامهدي واحمد ربك ع نعمه اللي عندك..مراة كويسه وقايماتك..صغار زي الفرح والسعد..لوح الماضي ورا وخليك فالحاضر..اهي سدرة تو بتشوف نصيبها فكرت حتى هي في الحاضر ورمت الماضي ورا ظهرها دير زيها يامهدي خليك زيها...
بلع ريقه وقعد ساكت..كلام اخته منطقي وعقلاني بس القلب رافضه ومش مقتنع بيه..
مش مقتنع ان سدرة مش نصيبه..مش مقتنع ان قصته هو وياها خلاص تمت..!
نسرين:بالله عليك ارحم روحك واللي حواليك بالله عليك انساها وطلعها من حياتك..
المهدي:انزلي..
نسرين؛مهدي!
المهدي؛انزلي..
تنهدت بضيق..وفتحت الباب ونزلت...
وهو طول مشي بالسيارة..
تبعتها بعيونها لين ادرقت..
بعدين لفت وخشت لحوشها..
تلقاها راجلها وهو يقول:ان شاء الله مش صايرة حاجه..
نسرين حركت راسها بالنفي وقالت:مافي شي ..
ومشت خشت للحوش..
وهو اللي مااقتنعش بكلامها مشي خش وراها..
🌻🌻🌻🌻🌻🌻
"خديجه فرقي السلاطه"
خديجه:باهي..
نجاح حطت يدها في نصها وقالت:خيرك دايرة اللحم صغير!
خديجه:ماهو مافيش هلبه..
عواطف؛كيف مافيش هلبه..خديت امس 5كيلو..
خديجه:وينه والله ماريته..
جتها نجاح جبدتها من ذراعها وفتحت الفريز واشرتلها عليه وقالت:هذا شنو!؟
خديجه بإرتباك:الحق شفته لكن خفت نستعمله ماعرفتش من فيكم جايباته!..
نجاح:أسألي مرة تانيه..
خديجه هزت راسها وقالت:باهي..
طلقتها عواطف وسكرت وسكرت الفريز وقالت:بري كملي شغلك..
"زودي ياعواطف الصغار كسروا التحفه متاعك"
خديجه خبطت خدها..
عواطف بصوت عالي:نهارهم الاسود..!
ومشت خدت المكنسه من ورا الباب وطلعت تجري..
نجاح:عمتهم تضربهم وتضرب عليهم كملي شغلك كملي..
سكتت خديجه وهي بتتفجر وقعدت توتي في سفر الغدي وهي تسمع في عياط صغارها ومش قادرة دير شي..
☘سنين وهي تعاني معاهم..كان تحساب روحها بتقدرهم بس بعدين اكتشفت ان عواطف ونجاح مايقدر عليهم حد كان ربي..☘
🌻🌻🌻🌻🌻🌻
الساعه 5:30عصرا..
الزوز واقفات ع المرايه يمكيجوا ويهدرزوا..
نجاة:امه مش متقبلتها وحده حرفه صرفه..
صابرين:المهم مرت بوه مش امه...
نجاه كملت وشبحت لأختها وقالت؛شن رايك..
صابرين شبحتلها وقالت:ترا لفي..
قعدت نجاة دور..
صابرين وهو تشد ع الميم:قمر..
نجاة لفتلها وقالت بضحكه:من يومي.
صابرين بضحكه:نجيلي الواثق من روحه..
ضحكت نجاه ومشت طلعت من حداها للكوجينه..
خشت ع مروة لقتها كملت تجهيز ضيافه..
نجاة؛شن كملتي!؟
مروة شبحتلها وابتسمت وقالت:ايه..شن هالحلاوة يابنت..
نجاة:مش غريب عليا..
ضحكت مروة وقالت:من قال طاهر اللي كان يقرا معاي في الجامعه يولي نسيبي..
نجاه بضحكه:ياااه ردتيني سنين لتالي..تتفكري اول مرة شافني فيها شن دار..
مروة:كان جريء هلبه مايعرفش يدرق...
نجاه:ولتوا قاعد جريء..بس غيور هلبه..قالي بعد الزواج نو خدمة..
مروة:عنده حق اللي عنده وحده بجمالك لازم يدسها..
ضحكت نجاة وقالت:ان شاء الله ربي يصبرني..
☘☘☘☘☘☘☘
طلعت من دار نومها وهي بكامل بأناقتها..
وهي ماشية ناحية الباب شدتها كنتها وقالت.
عائشه:عمتي مااتصلش بيك المهدي..
مغليه:بكري كلمتنس نسرين وقالت كان عندي.
عائشه:ماقاليش بيمشي غادي!
مغليه:ضروري كل مشاويره يقولك عليهم..حلوة حتى هادي!
عائشه:مش قصدي ياعمتي اني بس انشغلت عليه تعودت عليه مايفوتش وجبة الغدي...
مغليه:عادي تصير مرة ويغير نظامه ماتقعديش دققي ع كل شي انتي..
ومشت من حداها..
تنهدت عائشه بضيق ومشت للصاله..
اما مغليه..
بعد ماطلعت لبست كندرتها...ومشت بأتجاه الباب فتحاته..
لقت سيارة طاهر برا...
شافت امه راكبه القدام ..تجاهلتها..ومشت ركبت من الخلف وقالت:السلام عليكم..
ردوا الزوز السلام..
وطاهر قال:كيف حالك خالتي.
مغليه:الحمد لله في خيار الخير..كيف حالك انت..
طاهر:الحمد لله..
وام طاهر...لطفيه...كانت تشبح لحوش محمد ومغليه بنظرات قهر..
تحرك طاهر...
وقعد مرة مرة يهدرز...شويه ع امه...وشويه ع مرت بوه..
وماجاش كلام..بين امه ومرت بوه بكل...
لين وصلوا لحوش اهل نجاة..
لطفيه:شن هدا!!؟ ان شاء الله هدا حوشهم!؟
طاهر:يام!
لطفيه تمالكت اعصابها ونزلت..
ونزلت مغليه بعدها..
وفي ايديهم حاجات واخدهم طاهر..
قعدت لطفيه دق ع باب الحوش وهي مشمئزة..
ومغليه تقلب في عيونها ع الشارع كان يبان شعبي هلبه ومبهدل..
فجاة انفتح الباب واللي فتحاته صابرين وقالت:تفضلوا تفضلوا..
خشوا الزوز..
سلمت عليهم صابرين..وين جت بتسكر الباب شافت طاهر..
حياته بحركة اليد وهو ردلها التحيه..
سكرت الباب..
وجتهم خدت منهم الحاجات وهي تقول:تفضلوا تفضلوا..
مغليه عجبها زين صابرين..بس ماعجبهاش لبسها..
كان ضيق وجريء..
خشوا الزوز للحوش..
شموا ريحة الوشق والمعطر..
ولاحظوا انه نظيف..هني الزوز ارتاحوا بعض الشيء..
تلقتهم مروة وهي ترحب ترحيب حار وخدتهم دخلتهم الصاله..
برغم ان كل شي كان قديم هلبه..بس النظافه والترتيب برزوا اكثر..
قعمزتهم مروة وقعمزت معاهم وبدت تهدرز معاهم..
لطفيه كانت تهدرز من فوق لفوق..
لكن مغليه كانت منطلقة وتتكلم بأسلوب حلو...
~~~~~~~~~
صابرين:مرت بوه طرف لكن امه شينه مش عارفه بوه وين كان عقله لما خداها عليها..
نجاة:نزوة يابنتي..طلقها بسرعه..
صابرين:عنده الحق فوق ماانها شينه كزمه ومهربده..عكس مرت بوه انيقة هلبه والعز باين فيها..
نجاة:شوقتيني نطلع نشوفهم..
صابرين:راجي لين ينادوا عليك..وطلعت من حداها وهي تضحك..
ونجاة سرحت وهي تفكر...
🌻بعد الضيافه..نادت مروة ع نجاة..
لحظات...وخشت عليهم..
ماقدروش يخفوا انبهارهم بيها..كانت جدا جميله..
بس القفطان اللي كانت لابساته كان جريء ومش لمناسبه زي هادي..
نجاة كانت متحشمه وهي تسلم..
لاحظت ام طاهر جافه معاها..لكن مغليه سلمت عليها سلام كويس وقعدت تشكر فيها..
مشت قعمزت حدا اختها..
وهما يتفحصوا فيها..
لطفيه:تعرفي ان طاهر معاش يبيك تخدمي بعد الزواج..
نجاة:ايه..
مغليه:ماعندك ماديري بيها الخدمه حتعيشي احلا عيشة..
صابرين شبحت لاختها وابتسمت بفرح..
ونجاة كانت تزغرد من الفرحه في داخلها..
لطفيه:ان شاء الله تكوني فالحه وقد المسؤوليه..
مروة:مش صغيرة نجاة ماشاء الله تعرف كل شي..
مغليه:ربي يحفظها..مواليد كم انتي يانجاه..
نجاة:81..
مغليه:بطول عمرك..نحسابك نديدة نسرين نسرين بنتي مواليد 79..
ابتسمت نجاة مجامله.
لطفيه:باهي باهي ان شاء الله خير..
مروة اشرت لنجاة تنوض..
نجاة:عن اذنكم ..وناضت طلعت من حداهم..
وبدي ع وجهها ملامح الغضب من أم طاهر. 🌻🌻🌻🌻🌻🌻
مغليه:عليك بنات هما تشوفي وحده تنسي التانيه لكن تحسهم مش عارفه كيف..جو الاحياء الشعبيه هديكا عرفتيهم.
خديجه:ايه عرفتهم..ياودي هو حر كان مقتنع بيها..
مغليه:لكن امه مش حتريحهم
خديجه؛ماصار بيناتكم شي!؟.
مغليه:لالا...كل وحده في حالها..
خديجه:خفت الحق تصير بينكم حاجه لكن باهي مشت بسلام..خلينا توا في هم ولدك المهدي..لتوا ماروحش للحوش
مغليه:والله من بكري نخمم فيه ربك يستر..ان شاء الله ياخد وجهه اسبوع اسبوعين ويكون هدا حدها وخلاص
خديجه:ان شاء الله. .
فجأة..
سمعوا صوت الباب انفتح بقوة..
انخلعوا..
لحظات وخش المهدي وطول مشي ركب الدروج..
مغليه ناضت ولحقاته..
وخديجه وراها بس قعدت واففه في اخر الدروج..
ماوصلت مغليه فوق..
الاوالمهدي خاش لدراه القديمه ومسكر ع روحه..
مغليه بقلق؛ياحليلي هييه!..
لحظات وطلع وهو يلبس في فانيليا صوف..
نزلها لوطا..ونزل يجري..
امه لحقاته وهي تنادي عليه:مهدي يامهدي..
ومهدي وكأنه مايسمع في شي...مشي طول طلع من الحوش..
مغليه؛وين ماشي ياهمومي وشن بيدير!؟
خديجه بقلق:ربي يستر...
🌻🌻🌻🌻🌻
فهالوقت..
كانت سدرة طلع في كورات اللبنه من الفازو اللي دارتهم فيه وتقول:شفتيها كيف ولت..
طوبى وهي تشوف فيها شن دير:تسهف..
سدرة؛تو نحطها بعدين مع العشي..ابتسمت وقالت..تعلمتها من خالتي هاله ام الدكتور اياد ربي يشفيها..
طوبى شبحتلها وقالت:زعمه لما يروح الدكتور اياد ماينصدمش!؟
سدرة:في شني؟!
طوبى وخرت شعرها ورا وذنها وقالت:يعني لما يعرف انك انخبطتي..
ابتسمت ابتسامه باهته وهي تحرك في كرة اللبنه بالموس وتقول:هو فقد الامل قداش ليه..
طوبى:الوحيد اللي قعد عنده امل الفاندي..
ابتسمت سدرة بس هالمرة ابتسامه حلوة..
طوبى ابتسمت وين شافت ابتسامتها وقالت:تعرفي اني اكثر وحده فرحانه انك انخطبتي..
سدرة شبحتلها..
طوبى:سدرة...اني نعرف انك قعدتي ع خاطري..نعرف راهو..رديتي هلبه ناس واولهم المهدي لأن امي وصاتك عليا..
تعبوا عيون سدرة دموع..
طوبى:حسيت روحي سبب تعاستك..في حاجات عالقه في راسي قاعده نتفكر فيها..كيف كنتي تبكي..وكيف حزينه..ولقطات تانيه مشوشه..حطت صبعها ع راسها وقالت..مش متفكرتهم كويس بس كلهم كنتي فيهم تعيسه..
نزلت صبعها وقالت..وكله مني..
سدرة؛ياعمري علاش تقولي في كلام زي هدا..اصلا انتي احلى حاجة صارتلي في حياتي موت امي قهرني صح بس ربي رضاني بيك..اني وين يكون قلبي مغموم نقعد ندور ع وجهك بش نشوفه ونرتاح..
طوبى وعيونها تعبوا دموع؛مانحسش هكي..نحس لو كان ربي ماخلقنيش..راهو انتي توا مش هكي عايشه..راهو انتي توا مع المهدي ومرتاحه..
ضمت سدرة طوبى وقالت ودموعها ينزلوا:علاش تكبري بسرعه هكي ياطوبى علاش يابنتي!
طوبى وهي في حضن سدرة:نبي نكبر ع خاطرك بش انتي تشوفي حياتك..
سدرة زادت ضمتها وهي تقول في نفسها...
"قداش داسه في قلبك...ياااه ياسدرة طوبى كبرت وولت تفهم في كل شي"
ع خشة غرفه للكوجينه..
وقفت ع الباب وحطت يدها في نصها وقالت:ربي يحن علينا ونحصلوا من هالحب شويه..
بعدت سدرة عن طوبى وشبحت لغرفه وقالت:تعالي ياام لسان تعالي..
ضحكت غرفه ومشت لسدرة وخشت في حضنها وقالت:فرحانتلك هلبه..
ابتسمت سدرة وضمت خواتها الزوز..
وحده فرحانه اللي بتشوفها عروس...والتانيه تخمم فيها هل فعلا سعيده بإختيارها ولالا...
🌻🌻🌻🌻🌻
مقعمز في محل قطع الغيار يتكلم بالتليفون..
الفاندي:والله مافيها كيف لااليوم ولاغدوة ياغالي خليها بعد غدوة.................................اني نجيك بروحي لعندك.............
بعون الله...............
وهو يتكلم بالتليفون شاف لمدخل المحل...رفع حاجبه وين شاف من واقف قدامه بسيارته..فحاول ينهي المكالمة بسرعه..
الفاندي:خلاص بعد غدوة نكون عندك....تمام....في امان الله...
ونزل تليفونه وسكر..بعدين ناض حطه في الجيب الخلفي ومشي طلع برا...
وقف في الباب وقعد يشبح للسيارة الكامري السودا او بالأحرى يشبح للي فيها..
تنهد بعدين قدمله وطبس ع الروشن وقال:بشن نقدر تخدمك..
المهدي؛نبيك في اخر الشارع..
ابتسم الفاندي ع جنب..وشبح يساره لأخر الشارع...هز راسه ووخر عن السيارة .
ومشي..
والمهدي نزل من السيارة وسكر الباب بقوة..
ولحقه..
شافوا خوت ايهاب الوضع ماارتاحوش..
لحقوهم من بعيد لبعيد..
☘وصلوا الفاندي والمهدي في اخر الشارع..
ووقفوا مقابلين بعض..
الفاندي؛خير!
المهدي؛سدرة..فوتها..
ضحك الفاندي بسخريه وهو يحرك في راسه يمين ويسار..
قدمله المهدي لين جي قدامه وقال:قتلك فوتها..
الفاندي عض ع شاربه بعدين قال:برا العب قدام حوشكم..
وجي بيمشي..
شده المهدي من ذراعه..
جو خوته يجروا..
الفاندي بصوت عالي:خليكم مكانكم...
وقفوا خوته وهما يشوفولهم..
الفاندي جبد ذراعه ووقف قدامه وقال:شوف اني قاعد نكبر في عقلي معاك ونوسع في بالي...بالله برا في حالك..والهى بحوشك وصغارك وخلي بنت الناس في حالها..لانها من بعد غدوة...لونعرف انك قمت عيونك نطلعهم..السدرة توا ولت تخصني وياويله اللي يجي من يالاها..
وصلت عند المهدي لوين ووين وين قاله ولت تخصني..
الكلمه زادت ناره نار...خلت عقله معاش يستوعب شي..
شد الفاندي من حناكه بقوة وقال:تخصك قتلي اها!حلم ابليس عارفه..!؟
خوت الفاندي قعدوا ينادوا:ايهاب..
اشرلهم بيده يقعدوا في مكانهم..
بعدين حطها ع يد المهدي وبكل قوة نزلها وقاله:وراك عيلة وصغار مانبيش نريزهم فيك...ننصحك ولأخر مرة تخليك في حالك خيرلك..مازال ماتعرفنيش انت...
ودفه عنه بقوة وقاله..لو كنت مكانك كنت معاها راجل وخليتها تشوف حياتها...ع الاقل تتفكرني بحاجه وحده باهيه..
ولف ومشي وخلاه وهو يتحسس في حناكه..
بعدين لف وقاله وهو يمشي للخلف: اسمع الكلام....وماتفتحش على روحك باب جهنم..
ولف ومشي القدام لين وصل في خوته..
:شن موضوعه هدا..
الفاندي بلامبالاة؛مايستاهلش..
ومشي وخوته معاه..
والمهدي يشبحله وهو يشد ع قبضة يده بقوة من الغضب الشديد..وحرقة القلب...
🌻🌻🌻🌻🌻🌻
"اسلوبها وكلامها حسسوني اني ولاحاجه اقسم بالله انقهرت قدام خواتي"
صابرين مقعمزة وتشوف لاختها كيف تكلم في طاهر وهي مبتسمه برفعة حاجب..
نجاة؛والله لتوا خانقتني العبره..مرت بوك اللي فالعز من يومها عاملتنا خير منها.
صابرين اشرتلها بإبهامها اعجابا بالكلام اللي تقول فيه
"خلاص نجاة بالله عليك ماتغششي روحك..راهو الموضوع في كل الحالات تام المهم في هذا كله رأيي اني"
نجاة وهي تتبكى؛مش عارفه ياطاهر كان تشوف نصيبك في وحده غيري تكون من مستواك خير
صابرين عضت ع شاربها وهي تضحك بصمت...
"شن تفتفتي انتي والله ماواخد غيرك يانجاة اللي عجبه باهي اللي ماعجباش بسلامته..المهم عندي انتي ياعمري انتي بس"
شبحت نجاه لأختها وقالت بصوت مخنوق؛حاسه روحي مخنوقه..
صابرين بهمس وشفقه مصطنعه:ياروحي..
نجاه شدت ضحكتها بقوة
"نجاة هكي تخوفي فيا عليك..نجيك'
نجاة؛لالا خوتي قاعدين فكني منهم مرات يشوفوا سيارتي..انت خليني توا تو نروق..خليني نسكر ساعه وعاودلي..
"حاضر حبي حاضر..وبالله عليك ماتفكري في شي ارجوك"
نجاة رشفت وقالت؛حاضر..سلام..وسكرت..
صابرين بدت تضحك بصوت عالي..
نجاه وهي تمسح في دموعها وتضحك:ياروحي صخفني رعشته..
صابرين بضحكه؛مفروض امه اللي ترعش الجربه هادي..جاية ورافعه خشمها علينا وتتكلم بالسيف..تمشي جدري يرفعها هالمسردنه..
نجاة:ان شاء الله يمشيلها يقلبها ع راسها..
صابرين؛من غير ماتقولي..
☘وهذا اللي صار فعلا..
لطفيه؛كلمتها عادي اني..
طاهربحمق:يام نعرفك اني من البدايه الموضوع مش عاجبك وتشبحيله بالماديات..كان ماتبيش تكملي فيه ارتاحي تو نخلي خالتي مغليه تكمله..
لطفيه بعصبيه قعدت دف فيه برا الحوش وهي تقول؛برالها مغليه برالها..برالها ومعاش توريني وجهك ولاتجيني بكل..
طاهر بغضب:ماشيلها..وصدقني هالمرة معاش بنولي بكل..
مشت بسرعه فتحت الباب ولما جي طالع دفاته بقوة وسكرت عليه الباب وهي تتنفس بسرعه من الغل ودموعها قعدوا ينزلوا..
وطاهر نزل من عندها وقلبه محروق..
عمرها ماحسساته بحن وحب الام..كانت جافه معاه من كرهها في بوه واللي داره فيها...هذا علاش قاعد يهرب منها لغيرها..لأي قلب يشوفه حنين عليه اكثر منها هي..
🌻🌻🌻🌻🌻
فهالوقت..
روح خوه المهدي للحوش..
وقامت عاصفه هوجاء في الجنان..
اصيصات الغرس اللي دايرتهم امه..قعد يخبط فيهم برجليه ويكسر فيهم..
سمعت عائشه صوته وهو يضرب بغيظ طلعت من الروشن وقعدت تشبحله..
وامه واخته خديجه قعدت يتفرجوا من مرش الفيرندا المسكر وهما خايفات..
مغليه بوجع؛ياناري عليا ولدي..هالغيه السودا مادارت فيه ياريتنا ماعرفناهم ولاعرفونا..
خديجه بقلق:ربي يستر ان شاء الله مايديرش في روحه حاجه..
ع خاشة الجالي للحوش..
شافه شن يدير انصدم..
طول جاه وشده وهو يقول؛مهدي!
المهدي بصوت غاضب؛حول...حول...
والجالي يشد فيه بقوة وجاه عند وذنه وقال؛مرتك تشوف فيك...
وقف ورفع راسه وشبحلها..
لقاها تشوفله بألم..
هو فك روحه من خوه..بعدين نزل راسه وقدم لمحبس غرس اخير قعد وخبطه بكل قوة...
عائشه طول خشت داخل..
رفع راسها شافها خاشه..قال وهو داهش؛شن درت في عمري بس!..
جاه الجالي وشده وخداه وقعمزه ع الكرسي وقاله:استهدي بالله وصل ع النبي..
المهدي اتكا بمرافقه ع الطاوله وحط ايديه ع وجهه..
قعمو الجالي جنبه وقاله؛خلاص عاد ياسر..الصفحه هادي لازم تطويها...وتنسى..
المهدي؛الكلام ساهل..
الجالي؛التنفيذ مش مستحيل..ع الاقل ع خاطر صغارك يامهدي...شن ذنبهم..
نزل ايديه عن عيونه وشبح للجالي..
الجالي؛هادي الحاجه الوحيده اللي لازم تفكر فيها توا انك وليت اب..اي شي تاني مايسوا شي جنب الحاجه هادي..
غير عنه عيونه اللي قعدوا يلمعوا بالدموع..
تنهد الجالي وهو يشوفله..
وامه واخته يتفرجوا عليهم..
مغليه:باهي اللي روح الجالي..
خديجه؛ايه جي في وقته..
فجأة...
"مكتوب وصار الله غالب مكتوب صار مكتوب وصار الله غالب مكتوب وصار..مكتوب وصار الطير اللي ربيه طار"
مغليه التفتت وشبحت لنضال بغل..
وخديجه قعدت تشبحله بملل .
وفي الجنان المهدي التفت وهو يشبح للحوش..
والجالي قعد يغمض في عيونه بنفاد صبر...
..داخل..
نضال وهو مبتسم بإرتباك:خيركم..
مغليه؛مازال نسمعك تغني فيها مصيرك اسود..
نضال خاف يوقف عليه التمويل هز راسه وقال بضحكه ارتباك:حاضر..اني طالع..
نغليه؛تروح بعد الساعه12 تلقى الباب مسكر..
استغرب في امه وطلع من الحوش وهو يقول:راقيتلها الحاجه..
وين جي طالع برا انصدم في منظر الجنان..بعدين شبح للمهدي والجالي مقعمزين..
المهدي كان سرحان..
والجالي من واره ياشرله يطلع وهو ساكت..
هز راسه نضال بخوف..بعدين شبح للمهدي شويه ومشي فتح الباب بيطلع..
ع خشة عمر..
عمر؛وين ماشي..
نضال؛لقهوة ***** الولاد غادي كلهم..
عمر؛نص ساعه ولاحقكم..
نضال؛تمام..
مشي نضال وعمر خش سكر الباب..
وانصدم في منظر الجنان..
وزع نظره عليه بعدين شبح لخوته..
المهدي قاعد سرحان..شبح للجالي..
اشرله يخش وهو ساكت..
هز عمر راسه وهو مصدوم بعدين مشي خش داخل..
لاقى امه واخته..
عمر:خيره صاحبنا نايضه عليه الحاله!
خديجه:سدرة انخطبت..
عمر:احسن خل يلهى بعمره..
ومشي للدروج ..وامه واخته يشبحوله...
ركب عمر لداره هو ونضال..
خشلها ..حول ساعته وحط تليفونه ومفاتيح سيارته.
بعدين مشي لدولابه طلع حوايجه..
ومشي طلع الحمام..
دوش بعدين طلع ومشي خش الدار..
خدي الاستشوار من الدولاب وقعد يجفف في شعره..
بعدين قعد يمشط فيه..
بعدها فتح الدرج خدي منه ساعة تانيه لبسها..
ومشي لدولابه طلع من كبوط جلد...لبسه..
فجاة رن تليفونه..
مشاله وخداه من ع الكامدينو شاف المتصل ابتسم ورد..
وهو يساوي في شعره..
عمر:هاه حبي..
"شن جو حبيبي"
عمر:مليح...شن جوك انتي..وخدي مفاتيحه ومشي طلع من الدار..
🌻وفي حوش الجيران اللي مقابلهم..
كانت بنت الجيران مقعمزة في دارها..
طارحة شيتاتها وفيدها خطاط ملون تخط بيه ع سطور معينه...
غارقه في القرايه غرق..
قطع عليها صوت دقة الباب..
اميمه وهي لاهيه في الشيت:خش..
انفتح الباب وخش حسين لقي ارضيه الدار كلها شيتات..
وهي مادة رجل ورافعه ركبة التانيه وهي مثنيه ومطبسه ع الشيت وتخط..
ضحك وقال:ربي يعاون..
اميمه بضحكه؛تعالى قعمز..
جي قعمز جنبها وقال:مابعدك!
شبحتله وقالت؛قصدا هدا اصعب من الجيش!؟
حسين رفع حواجبه وقال؛بوييين!
ضحكت اميمه
ابتسم حسين وقال:ماشيه امورك في الجامعه
شبحتله وهي مبتسمه وهزت راسها بإيجاب .
حسين رفع حاجبه وقال؛مافي حد يضايق فيه..
حركت راسها بالنفي وقالت؛ابدا..
حسين:كان في حد ضايقك قولي..
اميمه بإبتسامه:مافي حد حيضايقني..
ابتسم وقال؛اكيد البنت المحترمه مايقربها حد..
ابتسمت مجامله وشبحت للشيت..
هو تنهد وطلع من جيبه فلوس وخدي يدها وحطهم فيها..
اميمه:لالا دس فلوسك انت اولى بيهم..
حسين؛خودي واسكتي..
اميمه؛حسين جدي دايرلي مصروف للجامعه لبس وقرايه وغيره راهو..
حسين:زيادة الخير خيرين..
اميمه؛لازم تفكر في مستقبلك ودير زي مادار يوسف لم القرش ع القرش واهو قريب يكمل حوشه.
ضحك وقال:اني مازال المشوار قدامي طويل ان شاء الله..
ضحكت اميمه لما فهمت قصده..
سكر يدها ع الفلوس وردها عندها وقال؛دسيهم تلقيهم.
اميمه؛ربي يعوض عليك ويباركلك في رزقك..
حسين؛ويبارك فيك ويوفقك..ناض وقال..نخليك تجاهدي..
ضحكت وهي تشوفله..
حسين:موفقه..
اميمه بإبتسامه:آمين..
مشي طلع حسين وسكر الباب..
وهي تنهدت ورجعت بتقرا...فجاة خطر عليها عمر..
ابتسمت..وخدت الشنطه وطلعت منها غلاف الكيت كات وقعدت تشبحله وهي تتفكر في اللي صار بينهم اليوم..
《 عمر:خسارة حظي مش حلو..
اميمه ابتسمت خجلا وقالت؛مرة تانيه..
عمر:اكيد مرة تانيه وتالته ورابعه..》
ضحكت بعدين دست غلاف الشكولاته ورجعت لهت بقرايتها...
🌻🌻🌻🌻🌻
الساعه 11:30ليلا..
طوبى:سوسو عطيني تليفونك نعدل المنبه ع الساعه 5 عندي اختبار بنوض نراجع بكري..
سدرة وهي متكيه؛هونا ع الطاوله..
مشت طوبى خداته من ع الطاوله فتحت الشاشه..
شافت صورة الخلفيه..صدام حسين..
ابتسمت وتفكرت يوم اعدامه كيف سدرة دارت عزي عليه وقعدت كم يوم ماتكلم في حد ولاتبي من يكلمها..
كانت تحبه هلبه..
خشت ع المنبه ضبطت الساعه بعدين مشت رقدت ع سريرها..
طوبى:سوسو..
سدرة؛طوبى ارقدي..
طوبى بضحكه؛بنرقد بس قبلها بنسألك شن بتلبسي غدوة .
سدرة وهي بترقد؛فيلو..
طوبى بضحكه؛حي ع المستعجله..
فتحت سدرة عيونها ع وسعهم وحدفت طوبى بالمخده اللي تحتها..
طوبى تلقتها وهي تضحك..
غرفه وهي شبه راقده:ارقدوا عاد خلونا نرقدوا..
حدفت طوبى المخده لسدرة وقالت بضحكه:تصبحوا ع خير..
خدت سدرة المخده حطتها تحت راسها ورقدت طول..
وطوبى قعدت تشبحلها بإبتسامة حزن..
☘الحزن كله اللي معبي قلب المهدي..
اللي اختار فهاليوم يرقد في داره..
مايبي يشوف حد ولايحتك بحد..بالذات عائشه لأنه مش ضامن نفسه...
مخليها هي في الشقه مع الصغار ماشي ليلها كله في البكي..
ماقدرتش ترقد غمضه...
🌻تاني يوم..
طلع من داره الصبح..ومشي منها لشقته..
خشلها..شم ريحة الفطور..
تنهد وسكر الباب..ومشي بإتجاه دار النوم..
لاقاته قالت:صباح الخير..
هو بدون مايشوفلها:صباح الخير..تبي تمشي اليوم لحوش ماليك ولا..
عائشه:ايه..
المهدي:خلاص بعد الفطور نرفعك..ومشي طول خش الحمام..
تنهدت من قلبها ولفت بتمشي الكوجينه...سمعاته يعطس..
قلبها رف من الخوف عليه وقالت؛اكيد خدي بردة..
ومشت بسرعه خشت الكوجينه ديرله حاجه..
هو بعد مادوش..طلع للدار بدل حوايجه وصلى..
بعدين طلع للكوجينه شاف الصغار مقعمزين حوالين الطاوله..
محمد:صباح الخير بوي..
جاهم طبس عليهم وباس روسهم وقال:صباح الورد..
وقعمز ع كرسيه..
محمد؛بوي وينك امس!؟
عائشه قعدت تسمع..
المهدي؛لهيت بالخدمه..
محمد؛قبل بنوريك النجوم اللي حصلتهم..
ناض المهدي وقال:هي تعالى وريني..
ناض محمد ومشي والمهدي وراه وعائشه التفتت تشبحلهم..
خشوا الزوز لدار الاولاد..قعمز مهدي ع الارض..وولده جي جنبه بالشنطه وطلع كراسته وقعد يوري..
المهدي ابتسم وقال:زعيم طالع لبوك..
ابتسم محمد..
المهدي شبحله شويه وقاله؛بعدين نبيك تمشي لحوش طوبى..
محمد بفرحه:حقه..
المهدي بإبتسامه:تمشي وتجيبها للحوش تقوللها بابا يبيك..
محمد؛باهي امتى..
المهدي:بعدين العشيه..
محمد:باهي..
المهدي:سر ماتقولش لحد تمام..
محمد مد يده وقال:شدها بوي..
شد المهدي يده وهو مبتسم..
محمد:وعد مانقول لحد..
خداه المهدي ضمه وباس راسه وقال؛هي نوض نفطروا..
ناض المهدي هو وولده ومشوا مع بعض للكوجينه..
خشوا وكل واحد فيهم قعمز ع كرسيه..
المهدي شاف قدامه طاسه فيها شي غريب قال:شن هدا؟
عائشه:زنجبيل وعسل وليم..حسيتك بتحصل بردة..
هو قال:لالا مافيا شي صحيتي..
وبدي يفطر وماباش ياخد من اللي داراته..
وهي تاكل بصمت...
بعد الفطور..
لمت حوايج ليها ولصغارها..ونزل هو وياهم..وطلعوا من الحوش..ركبوا كلهم السيارة وتوكل بيهم حطهم في حوش جويده..نزل شرب فنجان قهوة بعدين طلع من عندهم ومشي يشوف اشغاله...
🌻🌻🌻🌻🌻🌻
في كلية الطب..
جامعة الفاتح..
طلعت اميمه من المحاضرة وكالعاده حضرتها واقفه لأنها مالحقتش تحوز مكان..
لاحظت اليوم وجود البنت اللي ظنتها صديقة عمر كانت توري في صحاباتها تليفونها الجديد وتقول..
"حبيبي جابهولي"
اميمه قعدت تقول في عقلها لو عندها حبيب علاش تصادق في الاولاد!
وهو يعني مايغارش عليها لأن عندها اصدقاء ولاد!؟
معقوله الانفتاح وصل عندنا لهالحد!!؟
وفي عز تفكيرها في الموضوع هدا..
عترت في درجه جت طايحه ع ركبتها..
وبدت تسمع في الاصوات حواليها..
"ياساتر..بسم الله"
هي كانت متمنيه الارض تنشق وتبلعها الموقف كان سخيف هلبه..
ناضت بالسيف وقعدت تنفض في جلابيتها وهي محرجه ووجها محمر للغايه من الخجل..
قامت عيونها بتشوف كان في حد يشبحلها جو عيونها في عيون صاحبة عمر وصاحباتها وهما يشبحولها ويضحكوا بكتمان..
هي زادت انحرجت وقالت في نفسها..
"اكيد حتحكي لعمر"
ومشي جوها باقي الوقت معكر..الموقف اللي صار ضايقها هلبه وضحك صاحبة عمر عليها ضايقها اكثر..
قعدت طول الساعات اللي كانت فيهم فاضيه مقعمزة في مكان واحد ماناضتش بكل..
وشغلت نفسها بالقرايه..
لعند ماازعجوها زوز ..ولد وبنت مقعمزين وراها يتغزلوا في بعض ويقولوا في كلام وقح..
لمت حاجاتها وناضت وهي معصبه..
وقعدت تمشي وهي مركزة ع خطواتها كويس..
بس نست تشوف قدامها..
لعند ماانخطبت في حد..
اميمه وهي تضحك بإنزعاج:اسفه..
حول عمر نظاراته وقال:ديما تمشي بلاعيون..
اميمه بإحراج وهي مبتسمه:مانعرفش نمشي فالزحمه..نرتبك..
قعد مركز ع وجهها كيف بدي يولي احمر..
اميمه:بس توا كنت نمشي واني معصبه هذا علاش ماشفتش قدامي..
عمر بضحكه:وانتي معصبه..من شني!؟
عقدت حواجبها وقالت:الجامعه مليانه قليلين ادب تقول قاعدين في مسلسل تركي..دارت ملامح قرف بوجعها وقالت..تقززت من بعض الناس..
هو قعد مركز ع ملامح وجهها كيف يتغيروا في اللحظه اكثر من مرة..
من الخجل..للعصبيه..للإشمئزاز ..وبعدين ضحك والعيون صغروا..
اميمه بضحكه:بتقول هادي من وين جايه..بنقولك مش متعوده ع الحاجات هادي...وحكت جبهتها..ورجعت ضحكت..
لاحظ انها بدت منطلقه معاه في الدوة عكس المرتين اللي فاتوا..
عمر:لاعادي عارفك اصلا..مش متاع طلوع وخشوش..
اميمه بإبتسامه؛صح..
عمر:باهي شن رايك نقعمزوا في مكان..
اميمه حكت خدها وقالت:باهي..
مشي وهي مشت وراه وكانت متحشمه وتساوي في وشاحها..
عمر:هني..
اميمه هزت راسها بالموافقه..
عمر:قعمزي..
قعمزت اميمه...هو قعمز جنبها بالزبط..
هي اضايقت وبعدت عنه شويه..
هو قعد يشوفلها وهي تشوف القدام..
ملامح وجهها وهي تشبح ع جنب كانوا يبانوا جميلات هلبه..بالذات رموشها الطوال الصفر..كانت ترمش فيهم وحده ورا التانيه ولون عيونها المحير مولي مختلف..
كان ازرق بكري..وتوا ولى اخضر..
عمر:اميمه انتي بالعاده شن ديري في يومك..
شبحتله وابتسمت..
كانت نظرة عيونها حلوة وابتسامتها احلى...وين بدت تتكلم زادت حلاوة..
اميمه:عادي يعني..نقرا اغلب الوقت..وكان فضيت نقعمز ع ماكينة الخياطه متاع امي نقعد نخيط هكي..
عمر:امك عندها ماكينة خياطه..
اميمه:ايه دارتها من اربعه سنين..هي دارتها واني قعدت نتعلم عليها..نتفكر قلت لسدرة تشريلي مجلة تعلم التفصيل والخياطه جابتلي وتعلمت .
عمر:اها يعني تفصلي وتخيطي..
اميمه هزت راسها وهي مبتسمه..
عمر:وشن تاني..
اميمه:عطيني الجنان خديت من جدي الحاجه عادي يعني نحب نهتم بالغرس والشجر نحب الحاجات هادي هلبه..يعني اكثر حاجة نتمناها اني بعدين يعني في المستقبل..ضحكت وقالت..ندير حوش فيه جنان كبير كله مزروع..ضحكت وقالت وهي تحك في جبهتها..عارفه تو بتقول في خاطرك اهتماماتك اهتمام عزايز بس اني يعني هكي..نحب هكي..
ورفعت كتافها ونزلتهم..
هو قعد يشبحلها وهوساكت...
عقدت حواجبها بإستغراب وقالت:خيرك!؟
عمر:غريبه هلبه..
اميمه:شن هي!؟
عمر:انتي..
اميمه بضحكه:ممكن..وحكت جبهتها..باهي احكيلي عنك انت كيف يفوت يومك وشن تحب دير..
هو شبح القدام...وحس في داخله بإحراج..
شن بيقوللها..نطلع نهيج..ندير في مواعيد غراميه!
لقي روحها انسان فاضي ولاحاجه قدامها..
حس بضيق شديد..لانه حس ان اميمه مرتفعه هلبه عنه وهو في القاع...
اميمه؛عمر..
نطقت اسمه بطريقة مختلفه ..
بالعربيه الفصحي عكس ماينطقوا فيها كل اللي حواليه بالعاميه اللي افقدت الاسم جماله ورونقه..
واللي زاد جمل اسمه في نظره هديكا اللحظه نبرة صوت اميمه..
شبحلها شويه بعدين قال:شي..ولاشي..هكي يعني زي هالشباب عادي..
اميمه ابتسمت وقالت؛باهي ماعندكش طموح..قصدي انت خاش كلية الطيران اكيد حاط في بالك تولي كابتن ليه اسم وتطلع وتخدم في مطارات برا البلاد..
شن بيجاوبها!؟
هو خاش كلية الطيران طواقه مش اكثر يعني ماعنداش فيها هداكا الطموح اللي قالت عليه..
عمر ضايق..ضايق هلبه..حس ان التقعميزة والهدرزة مع اميمه كبيرة عليه..مش قدها..
شبح لساعته وناض بعدين قال؛عندي محاضرات..سلام..
ومشي وخلاها..
وهي مستغربه هلبه...ناض وخلاها فجأة..
يعني هي قالت حاجه غلط ولاضايقاته في الكلام!؟
اضايقت هلبه من روحها..
وقعدت تفكر شويه وبعدين..
قامت تليفونها....واتصلت بالصديقه الصدوقه..
طولت ع مادرت في الاخير..
اميمه بتوتر:ايوه غرفه..
وبدت تحكيلها في اللي صار بالتفصيل..
"وووك عليك هدرزة ثقيله دم...ممله..مللتيه يابنتي حس روحه مقعمز مع امه"
اميمه بضيق:يعني في شن مفروض نحكي معاه!؟
"مواضيع خفيفه لطيفه وضحك..لكن ياحسرة منين بتجيم الخفه واللطافه!؟..ماتزعليش مني ميمو بس انتي يعني دمك ثقيل شويه..اللي يقعمز يهدرز معاك يستثقل دمك"
اميمه عيونها تعبوا دموع وقالت:لهالدرجه!
"واكثر ومن غير زعل..خودي الكلام اللي يبكيك مش اللي يضحكك واني لاني نحبك ديما صريحه معاك"
سكتت اميمه وهي حاسه بضيق شديد في صدرها..
"الو اميمه"
بلعت ريقها وقالت؛معاك..
"مش مشكله توا نتلاقوا بعدين في حوشنا ونهدرزوا"
اميمه تنحنحت وقالت؛باهي..سلام..
"سلام"
سكرت اميمه وقعدت تشوف لتليفونها..
وقعدت تفكر في كلام غرفه..وبعدين جي بين عيونها عمر وهو يهدرز ع صاحبته كيف اغلب الوقت يمشي في الضحك ويقعد مرات مقعمز معاها بالساعات..
اما هي ماكملش معاها عشرة دقايق وناض..
《 ماتزعليش مني ميمو بس انتي يعني دمك ثقيل شويه..اللي يقعمز يهدرز معاك يستثقل دمك》
طاحت من عينها دمعه طول مسحتها...وحطت تليفونها في الشنطه وناضت بتمشي للمدرج بكري بالك تقدر تحوز مقعد..
وتقول لنفسها..لعلها تفلح فهالحاجه هادي في حياتها لو بتفشل في غيرها..
🌻🌻🌻🌻🌻🌻
الساعه 6:00مساءا..
"امتى بيجوا عيلة الشاميه المغرب اذن"
فردوس بضحكه: ع جية خلاص..
مطيرة؛عيينا وحني نراجو..
ع جية غرفه قالت؛جو جو...
مطيرة؛من قالك؟
غرفه؛توا كلمتني اقبال..
مطيرة؛هيا فردوس هي..ومشت طلعت وفردوس لحقتها..
وفي دار البنات..
كانت فايزة واقفه ع سدرة تمكيج فيها...وطوبى واريج واقفين يراقبوا..
طوبى:ديريلها ظل من لون القفطان...
سدرة رفعت حواجبها وشبحت لطوبى..
طوبى تخزرطت وقالت؛مجرد اقتراح..
فايزة بضحكه؛خلي البنت ...عندها الحق راحت عليا هادي..
سدرة؛اسمعي فكيني من المبالغه..
طوبى؛لا كله لتوا سمبل.
رجعت شبحت سدرة لطوبى نفس الشبحه..
طوبى بخوف؛مجرد رأي..
فايزة بضحكه:خلي البنت حرام عليك ماقالت شي..
سدرة؛اسكتي بكل..
طوبى باحراج وخوف:حاضر..
اريج:تعالي نطلعوا..
سدرة؛ايه احسن خوديها واطلعوا..
طلعت طوبى مع اريج وهي مضايقه...
فايزة بضحكه:خيرك معاها..
سدرة؛شن خيرني معاها قاعده مافقصتش من الدحيه وتحكي في المكياج..
فايزة؛خليها تتعلم تلقوها وتلقى عمرها بعدين..
سدرة؛لاتقعد ديريلي في المدرسه وشدي العار بعدين كان تشدي..
فايزة؛عليك تفكير..
سدرة؛الوقت هدا مش زي وقتنا حني زمان وقت يخوف يافايزة تربية البنات فيه صعبه..
فايزة :من هالناحيه صدقتي..ربي يعينا ع تربيتهم..هي كملتلك..شوفي روحك في المرايه..
ناضت سدرة ووقفت ع المراية..
شافت شكلها..اعجبت بيه..ابتسمت..ابتسامه خاليه من المشاعر..
ع خشة غرفه وهي تقول:عبوا الصاله ماشاء الله قريب قعمزنا في العتبه..
ضحكت سدرة وقالت؛قالي بيجوكم قبيله..
شبحولها الزوز وهما متفاجآت قالوا؛-قالك!!؟
هي سكتت مرة وحده لما عرفت روحها قالت شي مفروض ماينقالش.. فايزة؛حيي اسرار من ورانا..
سدرة شدت جبهتها وقالت:تو نحكي بعدين..خلاص اطلعوا توا..
فايزة؛بتحكي بعدين لامفر..
سدرة بضحكه؛باهي اطلعي..
طلعوا فايزة وغرفه من الدار وهما يشبحوا لسدرة شبحات خبيثه مع ابتسامه وهي تعجب عليهم وتضحك..
سكروا الباب من هني..
اختفت ضحكتها من هني..
ولت قعمزت ع الكرسي..
ضمت ايديها لبعض وسرحت في ماضي بعيد..
تبي اليوم تطلع منه وتسكر بابه للأبد..
تحركوا عيونها لدولابها..
ناضت ومشتله..
فتحاته...وطلعت منه صندوق...فتحاته..
وطلعت منه مظروف..كانت فيها رسايل المهدي كلهم..
غرقوا عيونها بالدموع..
خدت نفس وطلعاته..بعدين مشت لباب الدار فتحاته ونادت..
"طوبى"
لحظات وجتها طوبى تجري..
سدرة:خشي..
خشت طوبى .
سكرت سدرة الباب وقالت؛نبيك توا تمشي لحوش شنيبه تعطي هادي لنسرين..
طوبى شبحت للمظروف وقالت:باهي..
سدرة؛نسرين قالتلي بتجي لحوش ماليها بعد العصر تمشي تلقيها..سقدي روحك..
طوبى:شويه بس..
مشت خدت وشاح من هالشماعه..لبساته وساواته كويس.
وجت بتطلع قالتلها سدرة:من يدك ليد نسرين بس..
طوبى:حاضر...
ومشت بسرعه..
سدرة سكرت الباب..وغمضت عيونها ورجعت خدت نفس وطلعاته ...
☘طلعت طوبى من الحوش ومشت باتجاه حوش شنيبه..
"شن جو طوبى"
طوبى بإبتسامه:تمام عمو صالح..
"اوووطوبى عاش من شافك"
طوبى بإبتسامه:تعيش وتشوف عمو محي..
محي الدين:جاية هني .
طوبى:ايه..
هز راسه ومشي لسيارته..
وهي وصلت في الباب وبدت دق..
فتحلها نضال..
نضال؛الشمس من وين زرقت..
ضحكت طوبى وقالت:ابله نسرين هني..
نضال:ايه هني خشي ياحنه..
خشت طوبى وهي تضحك..
نضال:ايه حقه شن جو الدريه
طوبى:عندنا..
نضال:ياريتك جبتيها معاك حصلت عليها جو..
طوبى:كان قدرت تتحمل لسانها..
نضال:لا والله مانقدر لسانها اطول منها..هي طالع توا ماتبي شي..
طوبى بضحكه؛سلامتك..
نضال ضحك وقال:ربي يحفظك..
وطلع وسكر الباب..
طوبى جت بتكمل لداخل...
طلع الجالي..
عقد حواجبه وقال:تي مني تي مني عندنا مني
طوبى تضحك وخلاص..
الجالي:شن جو ياطوبى..
طوبى بإبتسامه:تمام..شن جوك انت..
الجالي:بشوفتك حلو...خشي..
طوبى:ايه هاني خاشه بس انت شدتيني..
ضحك الجالي وطوبى ضحكت معاه..
الجالي بضحكه؛ربي يحفظك..ماتبي شي..
طوبى بإبتسامه:سلامتك..
ومشي الجالي طلع من الحوش ..
وطوبى ماشيه بتكمل طريقها..
طلعلها محمد وقال بإندهاش مع فرحه:طوبى!
طوبى بضحكه:ميدو..
جاها وقال؛جيت بنجيكم..
طوبى:الله !
محمد:ايه..ماهو بنقولك تجينا بابا يبيك..
طوبى وهي متفاجئه:بوك!
محمد:ايه..اقعدي هني..شويه ونجي..
ومشي محمد..
وطوبى قعدت واقفه في مكانها وهي متوترة وتشوف اللي في يدها..
ع جية المهدي..
المهدي:طوبى..
قامت عيونها وشبحتله..
فات من حداها وقال:ترا تعالي شويه..
هي تبعاته ومع ولده..
تباعدوا شويه..وقف المهدي قدام طوبى وقال:شن حالك طوبى..
طوبى وهي تشوفله بنظرات توتر:الحمد لله...خير عمو مهدي في شن تبيني؟
المهدي بلع ريقه وقال؛جوكم؟
هي هزت راسها بإيجاب..
المهدي طبس عليها شويه وقال:فرحانه اختك..
طوبى مابتش دير اي ردة فعل..
المهدي شاف لعيونها وعرف الاجابه..غيرهم عنها وشبح اللي في يدها...حس قلبه تمزق...
طوبى شافاته وين يشوف قالت:بنعطيهم لابله نسرين هكي قالت سدرة..
المهدي شبحلها شويه بعدين قال:طوبى عطيني رقم سدرة..
طوبى بضيق:عمو مهدي علاش ديما دير لاختي في المشاكل!؟
وجعه كلام طوبى عليه...
طوبى بضيق شديد:هي فرحانه توا معاش نبيها تبكي سادها اللي بكاته حرام عليك..
المهدي الدموع غرقوا عيونه وقال:مرة وحده بس..اول واخر مرة عندكلام نبي نقوله..كلام اخير..
طوبى:مانقدرش..
المهدي برجاء:قتلك اول واخر مرة..
وجعها طوبى المهدي..وجعها كيف راجل زيه قاعد يترجى فيها..
طوبى:توعدني اني ماديرلهاش مشاكل..
غمض عيونه وقال:اقسم بالله مادايرلها حاجه ضرها..
تنهدت طوبى وقالت؛باهي..
طلع المهدي تليفونه وقال:هي ملي..
وبدت طوبى تمل في الرقم..ومحمد بعيد عنهم شويه لاهي بالدراجه متاعه..
المهدي ابتسم وقال:تعرفي انك الحاجه الوحيده اللي وقفت بيني وبينها..
ضايقت طوبى..
المهدي:لكن شكلك كبرتي هلبه بش اختك فكرت توا تشوف حياتها...لوكنت نعرف كنت استنيت 11سنه من غير مانمل المهم في النهايه تكون ليا..
وطوبى البنيه الصغيره تسمع في كلام زي هدا...يزيد يوجع قلبها ويزعلها ..
المهدي تنهد وخدي منه المظروف..
طوبى:لا قالت نعطيه لابله نسرين!
المهدي:وبعدين نسرين تعطيهمولي..هادم الرسايل متاعي اللي كنت نبعتلهم فيها..
طوبى قعدت تشبحله بحزن بعدين قالت؛ارجوك عمو مهدي زي ماوعدتني بالله عليك..
هز راسه وهو مبتسم بألم..
طوبى لفت ومشت طلعت من الحوش..
والمهدي قعد معاها بعيونه لين طلعت..
☘روحت طوبى للحوش وهي مضايقه ع الآخر..
لكن وين خشت..
لقت سدرة خاشه ع اهل الفاندي..
اللي وين شافوها كلهم بأصوات متقطعه قالوا:ماشاء الله..الله يبارك..
ابتسمت طوبى ونست الحزن اللي كانت عايشاته قبل شويه..
🌻ومشت جية الخطبه من احلى مايكون..
وسدرة كانت مرتاحه ع الاخر وحبت عمات وخالات الفاندي هلبه..
~~~~~~~~
مطيرة:عليك عيله شهلوليه ودمهم عسل قداش خشوا خاطري..
فردوس:خالاته اضحكي بس..
صفيه؛حتى اني عجبني جوهم..
اميمه بإبتسامه:حبتيهم سدرة..
ابتسمت سدرة وقالت؛هلبه..
مطيرة:حتى هما عيلة الشاميه..
سدرة:راهو يسمعك حد يصدق انهم عيلة الفاندي متاعين الشاميه..
مطيرة:اسكتي اسكتي طايحه نخرط ع جارتي ونقوللهم عيت الفاندي متاع الشاميه خطبوا بنت خوي.
قعدوا يضحكوا..
فجاة رن تليفون سدرة
طوبى شبحتلها بخوف..
سدرة شافت المتصل كان رقم غريب...
قالت في عقلها زعمه الفاندي..لان خواته قالولها بيعطوه الرقم..
هي طلعت من حداهم وهما مازال يهدرزوا..وطوبى بس اللي لحقتها بعيونها .
خشت سدرة الدار وسكرت الباب..
وفتحت الخط لكن ماردتش.
"قل لي بربك أي عدل ان ترى
شوقي ومنك البعد قد اعياني
وهجرت قلبا غارقا في عشقه..
وتركتني في التيه والاشجان..
وتظل تمضي لابالي بالهوى..
آه فياللهجر كم اظناني..
خذ ماتشأ مني ولكن اعطني
حبا وبعض العطف والتحنان.
اتراك تدري ياسطور حكايتي
وعلمت ماقد ضمة وجداني..
قل لي بربك هل عدلت بقصتي؟
إن الهوى والحب هد كياني..
تنهد بعمق وقال:بري مربوحه...وان شاء الله اللي اني ماقدرتش نديره معاك يديره هو..ان شاء الله يقدر يمسح دموعك ويداوي جروحك...ويمسحني من تفكيرك وقلبك.
ان شاء الله تنسيني وتعيشي من بعدي مرتاحه..
لكن لازم تعرف...
لين نموت مش ناسيك..
لين نموت حتقعدي في قلبي..
لين نموت ماني مخلي غيرك ياخد مكان..
لين نموت حنقعد نحبك..ياسدرة المنتهى....
وسكر عليها..
وهي قعدت جامده في مكانها..
مصدومه...وقلبها يوجع فيها...يوجع فيها هلبه..
والدموع سيل...ينزلوا ورا بعض...
هديكا الليله انقلبت راحة سدرة لعذاب..
رقدت ودموعها ع خدها وكلامه يرن في وذنها مش قادرة تنساه...
لكن مع مرور ايام هالاسبوع قعدت تتناسى فيه شويه شويه لما انشغلت مع عيلتها بيوم الفضانيه..
وجي يوم الفضانيه...
كانت فضانيه كبيره..تعبت فيها مربوعة حوش لطفي..
كان المهدي هداكا اليوم مقعمز في المطحن وعيونه ع حوش الواعر اللي مدرسين قدامه السيارات..
فجاة..
سمع اصوات الزغاريد..حس قلبه انخلع من مكانه..
غمض عيونه بشده وهو يسمع فيهم..
شويه وسمع صوت دربوكه وغني..
فتح عيونه وقعد يشبح للحوش..
وقلبه يتقطع تقطيع....
"يامبروك ع علي غاليتي..حطيتك وين تهنيتي"
يسمع في الاغاني اللي كانت كلماتهم واضحه هلبه..والنار تاكل في صدره..
"هو صقر وهي ريمه..ان شاء الله بعشرة عمره ديما"
ناض مكانه وخش داخل..وشغل المطحن..
وقعد يشوفله ودموعه ينزلوا وهو يمسح فيهم بقوة..
والليله اللي فاتت ع سدرة وهي فرحانه فيها ومرتاحه..
فاتت ع المهدي عذاب في عذاب...تمنى معاه الموت...
#يتبع_تكملة
