#طوبى "جنة طوبى"
#جمان_فريد
#الجزء_الحادي_والسبعين"روزناما"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#دعاء_ذي_النون
ْدعاء ذي النون وهو في بطن الحوت،
قال النبي ﷺ:
دعوة ذي النون وهو في بطن الحوت:
لا إله إلا أنت سبحانك إني كنت من الظالمين، فإنه لم يدع بها رجل مسلم في شيء قط إلا استجاب الله له.
الالباني في صحيح الترغيب والترهيب ١
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 قلوبهم سوداء.... كسواد حظي الذي جمعني بهم!🍃
_________________________________________
•••••••قبل ساعة•••••••
كان محمد شنيبه مقعمز في محل مواد البناء اللي عنده..
يراجع فالحسابات...
فجأه..
قطع عليه صوت نسيبه لما قال..
"السلام عليكم"
رفع راسه وشاف بعدين ناضله وهو يقول..
/اوووو حاج لطفي..اهلا اهلا وسهلا...
رحب بيه وهو يصافح فيه..
بس كان ترحيب بارد بعض الشي..
وكان هدا نفسه حال لطفي..
طلقوا ايدين بعض وقال محمد للطفي:تفضل قعمز..
قعمز لطفي وقال:يزيد فضلك..
محمد؛كيف حالك وحال الحاج علي..
لطفي هز راسه وهو يقول:الحمد لله الحمد لله...
محمد:الحمد لله..شاهي ولاقهوة لكن الزعيم راهو مش جنه..
وضحك..
لطفي تنهد وقال:شاربهم الزوز وشارب ماأثقل منهم..
محمد استغرب كلامه وقال..
/خير ان شاء الله صاير شي جديد؟..
لطفي:لامش جديد قديم..ونبيك تخش فيه ياحاج محمد..
زاد استغرب وهو يقول..
/كان نقدر علي حاجه مانقصرش..
لطفي:لاتقدر ان شاء الله تقدر..لأن مصيبه كان ماتقدرش ع ولدك..
هو قال..
/من ولدي؟
لطفي:الجالي..خليه يطلق بنتي بالهادي الله ويفكنا من الخشوش في سريب المحاكم..
الامور خشت في بعضها عن محمد شنيبه مااستوعب شي من اللي سمعه ورد ع لطفي يقول..
/طلاق شني ومحاكم شني يالطفي شن تقول!؟
لطفي:كيف!!؟ قصدك انت ماعندكش علم!..
محمد بصدمه:بشني وضح..!
لطفي:كيف ماعندكش علم كان اهل بيتك يعرفوا بنتي ليها فوق الشهر عندي طالبه الطلاق..!
محمد وهو مصدوم ع الاخر..
/لاحول ولاقوة الا بالله..!علاش!؟
لطفي شبحله شويه بعدين قال بغضب..
/ولدك مش مزبوط واخلاقه ماتنفعش مداير سريب مع وحده والعياذ بالله بالحرام ووصلت بيه الدناءة انها يدنس الحوش اللي قاعده فيه بنتي بأفعاله المسخه..
محمد شنيبه بتوتر وعدم استيعاب..
/غير صل ع النبي ياراجل..انت تدوي ع الجالي راك!؟
لطفي ابتسم تهكما وقال..
/ايه الجالي اللي كنت نشوف فيه راجل محترم وعاقل ومأمن ع بنتي معاه..اللي كنت نقول غير خوته الجالي..طلع ازفتهم كلهم..
محمد شنيبه قعد يشوفله بصدمه ومش قادر يرد..
لطفي:شوف ياحاج محمد اني لما عطيتكم بنتي فضلتكم ع الغريب قلت جيراني عمر وبينا مي وملح وكنا زي العيله الوحده..عطيتكم وانت مطمن مافكرتش للحظه انكم تطعنوني في ظهري وتوجعوني في اغلي ماعندي..
محمد:غير وسع بالك يالطفي غير نفهموا اللي صاير قبل..وبعدين مني اللي طعنك في ظهرك قولي!؟ الكلام هدا كبير هلبه..
لطفي بقوة؛ عارف روحي شن نقول وانت فاهم قصدي كويس..ولدك مش مزبوط وماينفعش ومستحيل بعد اللي عرفته وبعد اللي داره مازال نرضى بنتي تقعد ع ذمته..اني لتوا قاعد مراعي حق الجيره ومانبيهاش تنتهي بينا وبينكم مانلقوش بعدها مانقابلوا بعض بيه..قوله يطلقها ويعطيها حقوقها كامله..وراهو مش طمع في الفلوس وانت عارف كويس..لانه حقها حق اللي داره فيها ولدك..
محمد بتوتر كبير:خيرك جاي مشحون هكي يالطفي الامور هادي مايجيش تتعامل معاها بآنفعال وعصاب لازم تتبين ياراجل راهو هدا طلاق وفي عيل في النص.
لطفي:شن تقول يامحمد!؟ كان انت مش شايف شي وماتندري علي شي اني قداش ليا نشوف وساكت وفوتت هلبه بش المركب تمشي..لكن ولدك معاش خلا فيها خلاص..
قبل العيد نبي ورقة الطلاق توصل..
وناض وهو يقوله..ونصيحه اخيره مني ياحاج محمد معاش تغفل ع اللي يصير في حوشك لين تسمعه من برا وتقعد أخر من يعلم...
ومشي من قدامه..
ومحمد معاه بعيونه ومازال في حالة صدمه...
وكلامه الاخير اللي احرجه بيه خلاه يحس بغضب شديد ع اللي حطه في هالموقف..
🌿🌿🌿🌿🌿🌿🌿🌿🌿🌿
وبغضبه هذا خش حوشه وهو ينادي فيه بطريقة افزعتهم كلهم...
خش عليهم الصاله..
وانظارهم عليه كلها فجعه..
الجالي بفزع:شن في!؟
هو شاف سدرة وراها قال...
/راما وسدرة اطلعوا برا..
خديجه بخوف:نوضي بنتي نوضي..نوضي سدره..
ناضوا راما وسدره وهما خايفات ومشوا طول طلعوا من الصاله..
والجالي عيونه ع بوه اللي كان يشبحلهم وبادي ع وجه ملامح غضب شديد..
مشي سكر الباب بقوة...
مغليه بخوف:شن في يامحمد خيرك!؟
شبح محمد للجالي بغضب وقدمله وهو يقول..
/انت شن داير بش خليت بنت لطفي تطلب الطلاق؟
انصدم بقوة..
مش هو بس..
كلهم...
صدمتهم هما خديجه عمر والجالي صاحب الشأن كانت من معرفة محمد شنيبه بالموضوع رغم التكتم..
اما محمد المهدي اللي صدمه اللي مدرق طلع وبان بسرعه...
لكن صدمه مغليه بروحها لانها ماعندهاش علم بولا حاجه..
الجالي قعد ساكت وهو يشوف لبوه مش قادر يرد..
وزاد بصمته غضب بوه اللي قال..
/تكلم..شن داير ياتافه..شن داير!؟ في جرتك سمعت كلام اول مرة في حياتي نسمعه طلعتني طرطور مانعرف شي والميه تمشي من تحت رجليا واني غافل..غافل عن حوشي وع اللي صاير فيه..
مغليه بصدمه؛شن داير يامحمد شن سامع انت!؟
محمد بغضب وهو يشوفلها..
/ولدك اللي لايستحي لايتحشم ولايعرف يقدر النعمه اللي ربي عاطيهاله..مراة زي الورده زي النسمه بنت اصول ولامرة ريت منها حاجه توجع..رغم اننا غافلناها وهو عارف في شني لاحاسبت لالامت لاعاتبت خلتني قدامها صغير..مراة محترمه زي هادي تلبز من وراها ياتافه دير مادار حامد لأختك ياوسخ..
مغليه وهي مصدومه؛ع من تدوي انت ع مني!؟ راك تدوي ع الجالي مش عمر ولانضال هدا الجالي خيرة خوته يامحمد!معقوله تصدق فيه هالكذب معقوله تصدق في ولدك الجالي!؟
عمر وخديجه وهما في حالة ذعر احتفظوا بصمتهم..
ومحمد المهدي كان يشوف لعمه بعدم رضا...
بعدين سمع جده رد ع جدته وهو يقول..
/وعلاش مانصدقش فيه!؟ ناسيه المصيبه اللي دارها قبل ناسيه! هديكا ربي سترها علينا..لكن هادي جتني في جيراني في الشارع اللي نسكن فيه شن يدسها..
هني الجالي انفعل بقوة وقال..
/افتراء اقسم بالله افتراء..ان شاء الله نموت فمكاني كان درت حاجه من اللي قلتها توا..لكن انت ديما هكي ديما ماعندكش فينا ثقه بكل اللي تسمعها علينا تجينا بيها تجري وتقعد تسب وتعيط وتقول في كلام زي السم..مفروض بعد اللي سمعته جيت طول سألتني فهمت مني...
تي حتى ربي قال...اذا جاءكم فاسق بنبأ فتبينوا...!
مغليه ودموعها ينزلوا؛هالفرخه اللي اسمها طوبى مش زي ماانت عارفها راهو هادي لفعه من تحت تبن وياما دايره حتى اسأل خديجه عنها...
وهني انفتح باب الصاله وخش المهدي وهو مستغرب ومفزوع..
سكر الباب وقال..
/خيركم شن في صواتكم سمعتها في الجنان!
الجالي بإنفعال:تعالى اسمع بوك شن يقول تعال..
المهدي وقف حدا بوه وقال؛شن في شن صاير!؟
مسح محمد شنيبه.بيده ع جبهته بتوتر وشي من التعب وقال..
/بكري جاني لطفي الواعر..
وبدي يحكي للمهدي ع الحديث اللي دار بينهم..
الجالي وهو يسمع كأنه كان يتلقى في صفعة قويه..
وحس روحه مضحكه اللي قدر يخدعه لطفي الواعر بهالسهوله..
خديجه وهي تسمع كانت تشوف للجالي وعيونها متوسعات بصدمه..
اللي داره لطفي.ماكانوش حاسبينله حساب..
غيرت عيونها لأمها.لما سمعتها قالت..
/شن هدا كيف صدقته التفتفيت هدا انت؟! واضح قطاف نساوين وهو جاك يعاودلك فيه لقاك تصدق بسرعه..
الجالي بقهر مصطنع؛ااخ يابوي ااخ..
محمد شنيبه:اسمعوا جاي مافيش دخان من غير نار ولطفي نعرفه كويس مش متاع قطاف حتى في مشكله بنت خوه مع الضايل هدا الوحيد اللي كان يتكلم بعقل ..
نزل عمر راسه وهو مضايق..
وبوه مكمل يقول:لكن اليوم جاني واحد تاني يدوي وهو متعفلق ومتأكد من كلامه...
المهدي وهو يشوف للجالي..
/شن يقول لطفي الواعر ياجالي!
الجالي:حتى انت صدقت طول !
المهدي؛جالي..لطفي الواعر جارنا من عمر..عمرنا مارينا عليه تصرف يعيبه ولايقلل منه الراجل ديما عقلاني وحكيم ومش متاع قطاف زايد..
مغليه بتهكم؛طبعا مالاشني بتوقف معاه بالك ماتوقف مع خوك..
محمد المهدي ضايقه كلام حناه..
واغضب بوه اللي قال..
/يام ماتقعديش تلبزي ارجوك!..
مغليه؛ايوه هو هدا اقعد عيط عليا ع خاطرهم..
غمض المهدي عيونه بنفاذ صبر وهو يقول..
/لاإله إلاالله محمد رسول الله
محمد شنيبه؛مش وقت الدوة الزايده هادي خلينا في المصيبه اللي جابها خيرة خوته ع روسنا..مش سادتني فضيحه الضايل هدا اللي قاعدين لتوا يدووا بيها الناس تزيدني انت ياباش مهندس..!
الجالي خبط بإيديه ع راسه وقال..
/تي كذب قتلك كذب..ورب العزه مافي منه كلامهم اقسم بالله..تي هادم عيله مش عارف حتى شن نقول عليهم امس كنت عنده وتفاهمت معاه ومايبنيش نطلع الموضوع و قالي خليها تهدا وبعدين تعالى روح بيها!
محمد شنيبه:امس!؟
الجالي:اقسم بالله العلي العظيم امس اهوا قدامك ولدالمهدي اسأله امس طلعت قدامك لحوش الواعر ولا؟
توجهت الانظار لمحمد المهدي..
هو هز راسه تأكيدا لكلام عمه وكان مضايق لأبعد حد..
اشر الجالي عليه وهو يشوف لبوه قال..
/اهو اللي ماعنده شاهد كذاب..
مغليه؛تو هدا شن يقولوله بالله عليكم!؟ تي شن هالعيله المعفنه اللي طحنا فيهم..
محمد شنيبه وهو مش فاهم شي..
/باهي كان هكي شن قلبه هالقلبه!؟
مغليه:قتلك من الاول قطاف نساوين وحاجه تانيه قلت قالك ع حقوقها ويبوا حقها كامل ومش عارفه شنو مش بعيد دايرينها تجارة ويبوا المؤخر راهم 10 الاف مش شويه..
محمد شنيبه؛معقوله!
المهدي؛شن تقولي يام ربي يهديك..
الجالي:وعلاش مستبعدها انت كل شي نتوقعه منهم الناس هادم!..كان هدا شن اللي يخليها.تنقلب عليا.هكي فجأه وترميني بإفتراء كبير زي هدا!؟..راهو نقولهالكم وهادي اول مرة نقولها..بنتهم قاعده معاي بالسيف عليها ع قد مادرتلها مانفعش معاها...
امه تشوفله وهو يتكلم بالم قالت؛ عمرك ماقصرت معاها،ديما تكركر وتجيب وتسفر ومعيشها في عز عمرها ماتحلم بيه..كان معاش تبيه وتبي تطلق تقولها طول علاش هالافلام والكذب وتشويه السمعه حسبي الله ونعم الوكيل فيهم كلهم عيلة ماتخافش ربي والطلاق عندهم زي السلام عليكم..
🍃ووسط هالنقاش المحتدم خديجه تسمع بصمت وماتبيش تدخل نهائي ماتبيش تكون فالصورة هالمرة...🍃
شبحت لبوها بتوتر وغضب بعد مافكر شويه قال..
/كان هكي..يطلقها والله ماهم رايين قرش وفوقها نرفع عليهم قضية...
المهدي:بوي صل ع النبي..
محمد شنيبه:عليه الصلاة والسلام..مانفوتهالاش الحركه اللي دارها جايني المحل يتسهوك عليا ويدوي بهزوة نوريه الهزوة شن شكلها..
الجالي؛بوي مادخلش روحك في الموضوع..الموضوع يخصني واني تو نتصرف فيه بمعرفتي
محمد شنيبه:ابدا...اني اللي نتفاهم معاه واحد زي هدا ونوريه حجمه
المهدي:بوي بوي استهدي بالله وزيد فكر فيها راهو مش في صالحنا تكبير المواضيع كان مافيش بيناتهم تفاهم كل حد يمشي ع حاله وفضت خلاص..
الجالي:ماتقررش عني اني اللي نقرر نطلق ولانخلي..
المهدي؛تو انت قلت المراة قاعده معاك بالسيف ولا!؟
الجالي:نقول اللي نقوله ارجوكم حياتي الشخصيه مانبي حد يخش فيها..
المهدي:طلعت من يدك خلاص مدام وصلت في الكبار من توا قول كان اللي قاله الراجل في منه ولالا؟
الجالي:تو انت شن تبي بالزبط تبي اطلعني غالط
بالسيف ولا شنو!؟
المهدي:نبيك تخلينا ع بينه بش نعرفوا نتصرفوا..
محمد شنيبه؛والله وبالله يالجالي لو طلع كلامهم حق والله معاد نعرفك..
الجالي بعد ماحس روحه بيطلع منها رجع تحت حصارهم مرة تانيه والضغط هالمرة كان اقوى بعد تهديد بوه الوضع توا يطلب ردة فعل قويه جدا بش يجي الموضوع لصالحه...
بإنفعال شديد قال..
/تي خلاص عاد خلاص وصلتوها لخالقها..راني مريت بشي وتحملت شي مايتحمله حد..بعد ماتعرف ان مرتك مدرقه عليك حملها وماتعرفش الا وهي في الخامس شن تحس يامهدي تكلم..
كل من في الصاله اول مرة يسمع هالمعلومه اللي صدمتهم بقوة..
هني خديجه كردة فعل تلقائيا قالت..
/نهار احرف!؟
دمعوا عيونه وهو يقول..
/لا وامتى قالتها بعد مالعبت لعبتها وشدت حوش اماليها..متخليين انتم حالتي وقتها متخيل يامهدي! حركة زي هادي شن معناها قولي واضح مخططه للطلاق ليها وقت غير مالقتش الحجه اللي تطلبه بيها..
خديجه بصدمه؛قداش مرة سألناها ونكرت قبل..
مغليه؛ اني كذبت عليا كذب..!
خديجه؛لا وقالت الجالي قالي ماتقوليش..!
الجالي بإبتسامه ألم مصطنعه..
/اسمعوا بالله اسمعوا..وحسوا براجل مرته مش طايقاته لهالدرجه!..
مغليه بدموع؛الله لايربحها خلتني نصدقها انها راضيه ومرتاحه وهي تخطط من تحت لتحت هالعقرب...
خديجه؛لالا الموضوع فيه شي زي ماقلتي يام..يومها تلاقيت مع صاحبتي محاميه قالتلي توا النساوين بدوا يرفعوا في قضايا الطلاق ع خاطر المؤخر والنفقات يكذبوا عليهم ويرموا فيهم بالافتراءات بش يثبتوا الضرر وتحكملهم المحكمه بالطلاق مع الحقوق..
مغليه بغضب:سحيقه ليهم وليها..مش هي اللي طالبه الطلاق ولا قوللها مانيش مطلق لين تتنازلي عن حقوقك..
الجالي؛واني والله ماني مطلقها وكان تبي تقعد في حوش بوها تقعد معلقه لاطول سمي لاوطا مش الجالي اللي يندار فيه هكي..
المهدي وهو مش مستوعب:لاحول ولاقوة الابالله..ا
اما بوه بعد ماسمع حوارهم كله انتابه شعور بالغضب والاستفزاز بالذات وهو يتفكر في كلام لطفي ليه وقال...
/صار هكي يالطفي ياولد علي..والله ماهي بايته فيا..
وطلع تليفونه من جيبه وهو يقول..
/كان ماوريتاش هو وبنته معاش ينادوني محمد شنيبه..
المهدي:شن بدير..شد تليفونه وقاله..بوي فوت الموضوع راهو هكي ولاهكي مش لصالحنا..شاف للجالي وقال..مش في صالحك بكل تسكير الراس انت فاهم شن نحكي ولا!؟
محمد شنيبه؛كان قدروا يثبتوا حاجه يواجهوا بيها..
ارتسمت ع وجه الجالي ملامح ابتسامه نصر خفيفه..
غير عيونه لخديجه..
لقاها تشوفله بنفس الابتسامه وهي تغمض في عيونها وتفتح فيهم..
وعمر يشوف للجالي بأسف وضيق..
لكن..
محمد المهدي كان عايش في حاله صراع بين ضميره وبين خوفه..
قعد يشوف لجده اللي كان لاهي بتليفونه يدور في رقم وسمعه وهو يقول..
/ويقول نبيها تطلق في رمضان ..ويهدد فيا..ونبي حقها ع اللي عاشاته مع ولدك...تي باهي باهي..
مغليه مسحت ع وجهها وقالت..
/ااه ياربي هالناس زي الكابوس غير شن خلطنا عليهم..بعدين بإزدراء قالت..خزي خزي هالبلعوطه خزي..
"مش كذابه"
كلهم شبحوله...
كان يمرر في نظره عليهم وفي عيونه باينه الحده وهو يقول..
/مش كذابه ياحناي طوبى ماكذبتش..
كلهم قعدوا يشبحوله بصدمه..
وبوه قاله:علاش قلت هكي!؟
محمد؛لان امي رحمة الله عليها في الرساله اللي خالتهالي وصتني عليها وقالت بالحرف الواحد خليك مع طوبى لو ظلموها اوقف معاها حتى في وجه عمك..
المهدي بصدمه؛هي هكي كاتبه!؟
محمد ودموعه في عيونه؛ايه هي هكي كاتبه ومستعد نجيبها الرساله ونخليكم تقروا برواحكم..
مغليه؛اللطف ياربي هادي خيرها!؟ حتى وهي بتموت قاعده ناقمه..
المهدي التفت لأمه وهو يشوفلها بحده..
اما محمد انفجر غضبه وقال..
/اني شفت بعيوني ياحناي شفت بعيوني
جده قعد يشوفله وهو مصدوم
والجالي حس وقتها ان الموت جاه
ومحمد متابع يقول
/شفتها مرة نازله من فوق وهو نزل وراها وشفتها مرة تانيه طالعه من دار الكوي وهو طلع وراها..
ومجرد ماكمل كلامه يقدمله الجالي وينزل ع وجهه بصفعه صوتها صدح في الصاله...
وخلت عمته وحناه يشهقوا بصدمه..
بس بعدها صرخوا الزوز لما شافوا المهدي رد الصفعه اللي نزلت وجه ولده بأقوى منها ع وجه خوه..
مغليه بدت ترعش وهي تقول..
/حي عليا بيجوا لبعضهم حي..
عمر طول خدي وطلعه من الصاله..
ومحمد طلع معاه من غير وعي الصفعه ماوجعتاش ولااهتملها كان مقهور ع امه اللي انذكرت بسوء..وع طوبى اللي باين عليها حتشوف ايام اصعب من اللي شافتهم امه..
🍃وصلوا في الجنان..
وعمر وقفه وقال؛ع مني كنت تدوي!؟
محمد المهدي وهو يشوف لعمه بحده وعيونه مليانات دموع..
/نجاة..
عمر سكت وهو مصدوم ..
محمد المهدي؛ليا وقت شاك وساكت وبعد ماقريت وصية امي تأكدت حتى هي اشبح شن شايفه..
عمر قعد يشبح لمحمد وهو يفكر بعدين قال..
/رد بالك تقول لجدك ..
محمد المهدي..
/لا بنقول هادي بتسكن هني بعدين مهما دسيت بيطلع..
عمر وهو يحاول اقناعه..
/تعرف لوجدك يعرف تصير كارثه الموضوع كبير هلبه يامحمد..
قاله؛عارفه كبير هلبه هذا علاش تكلمت كان ماتكلمتش بيزيدوا يظلموا طوبى واني نساعدهم كان قعدت ساكت..
🍃وداخل..
بعد ماطلع عمر محمد...
جده جي واقف بين ولاده وهو يهزب فيهم ويقول بإنفعال وغضب..
/زيدوا زيدوا..زيدوا ع البلي بلي..ماجبتش عاقل واحد كل واحد فيكم عمايله احرف من التاني يرزيني فيكم كلكم..
والمهدي والجالي يسمعوا فيه وهما يتبادلوا في النظرات الحاده بين بعضهم...
مغليه وهي ترعش قعدت تشبه لخديجه وتسال فيها بعيونها..
وخديجه كلها خوف مش قادره ترد عليها بأي شكل..
بعد ماكمل بوها كلامه شاف للجالي بغضب بعدين شده من ذراعه وقال؛تعالى جاي..
ومشي بيه وطلعه من الصاله وهو ينادي في حفيده..
وهما طلعوا وراه..
مغليه تندب..وخديجه حاطه يدها ع صدرها وقلبها يدق بقوة من الخوف..
🍃وصل صوت الجد لحفيده في الجنان..
وعمه قاله بتوتر؛محمد الجالي عمك يامحمد..
محمد المهدي؛ان شاء الله بوي..
عمر شده من ذراعه بقوة وهو يقوله بنظرات توسل..
/عمك مريض يامحمد مريض مايتحملش اللي بيديره فيه جدك كان عرف..
محمد المهدي بإستغراب؛مريض!
ع طلعة جده وهو شاد عمه ومعاهم حناه وعمته وبوه..
محمد قعد يشبح للجالي اللي كان باين في وجهه الضيق مع الغضب بس في عيونه فيه خوف..
غير نظره لجده لما قاله..
/محمد توا تقول من هي اللي تكلمت عليها..
غير نظره لعمه اللي قعد يقول لجده..
/راك قاعد تغلط هلبه يابوي..
محمد شنيبه بغضب؛سكر فمك انت..وانت تكلم من تكون..
من عيلتي من عيلة حناك بنت مني تكلم!؟
عمر شد ع يد محمد بقوة وهو يشوف للجالي..
والحركه هادي جت في عيون المهدي..
وخديجه ومغليه يشوفوا لمحمد بخوف شديد..
جده بصوت عالي قال..
/تكلم عاد..
محمد المهدي بضيق شديد:مانعرفهاش بالشكل المرتين اللي شفتهم فيها شكلها مش واضح..
رخي عمر يد محمد المهدي..
والجالي قعد يشوف لولد خوه بإمتعاض شديد..
محمد شنيبه غير نظره للجالي..
/بتقول انت ولالا..
الجالي جبد ذراعه من يد بوه وهو يقول:ماعندي شي لأني مادرت شي غلط وربي شاهد ويابوي اليوم هدا اللي صغرتني فيه قدامهم وصدقت فيه كلام البرانيه عني للمرة التانيه مش ناسيه زي مانسيت الاول..
قاله بسخريه؛تهدد فيا انت ولاشنو!؟ تهدد في بوك..
الجالي قعد يشوفله بعتاب وهو ساكت..
هز محمد شنيبه راسه وقال..
/كان هكي هي معناها تطلع توا من الحوش ومعاش نبيك تحط رجلك فيه لين طلق بنت لطفي..
مغليه حست روحها بتفقد وعيها..
وخديجه دموعها بدوا ينزلوا..
الجالي:معناها معاش بنحط فيه رجلي بكل..
ومشي بيطلع..
ومغليه تنادي:جالي لا..ولدي..
راجلها بغضب؛سكري فمك وخشي داخل الناس يسمعوا فيك..
مغليه ببكي:حسبي الله ونعم الوكيل حسبي الله ونعم الوكيل جعنك تلقيه ياطوبى وتلقيه جعنك تلقيه في هالايام المباركه..وشبحت لحفيدها وقالت..وانت رد بالك تحط رجلك في الحوش مرة تانيه..
انصدم محمد..
والمهدي قال؛راك تلزي فيا انتي..
مغليه بعصبيه؛لانبيه لانبيك..
راجلها قال؛الحوش حوشك هو!؟
مغليه؛خلاص يخشوا هما اني نطلع..
ومشت خشت داخل وهي تتحسب وبنتها خديجه وراها..
🍃وهي خاشه داخل..
شافت سدرة واقفه.مع راما في الممر والزوز خايفات..
وين جو عيون مغليه ع سدره..
تفكرت عائشه وكلام محمد ع رسالتها...وفي نفس الوقت اسمها اللي فكرها ببنت عيلة الواعر العيله اللي ولت العدو الاول بالنسبه ليها..نست انها حفيدتها القريبه لقلبها وتحبها حب كبير...
عماها الحقد وخلاها تجي للبنت وتجبدها من يدها وتقعد تجر فيها..
سدره وهي ترعش بخوف؛خيرك ياحنينه شن درت..
خديجه وهي تلحق فيها:يام خلي البنت شن دخلها..
مغليه بغضب:ضمي فمك انتي مادخلكش..
ووصلت في الباب وطلعتها وهي تقول..
/بري الحقي بوك وخوك..
موقف وين شافه محمد المهدي حسه بكره شديد اتجاه حناه فوق صدمته فيها..
اما المهدي اللي جاته بنته وضمتها وهي محاوطه وسطه وتبكي..
جمده الموقف في مكانه..
عمر؛يام شن ديري!؟
محمد شنيبه؛هبلتي انتي هبلتي!..
مغليه ببكي وحقد..
/مادام مارحمتش ولدي مانيش راحمة حد...
ومشت خشت داخل...
محمد شنيبه وهو مذهول..
/امك خيرها لشن تبي توصل تبيني نرمي عليها اليمين وهي فهالعمر!
خديجه وهي تبكي..
/لا بوي بالله عليك مش ناقصه الحكايه..
"رد بالك تكلمها ولاتعاتبها"
وجهوا نظرهم للمهدي وهو يتكلم..
المهدي ولمعة الدموع.باينه في عيونه قال تهكما..
/واجعها ولدها ماتلومهاش...
غير نظره لولده وقاله؛خود اختك واركبوا للشقه..
خديجه بحزن؛خلي سدرة تروح معاي..
راما:ترقد معاي في داري خالو..
محمد جي لأخته خداها وهو يقول..
/بارك الله فيكم مانبوا خد يصخف علينا..
ومشي وهو وياها بإتجاه دروج الشقه ..
دموعه نزلوا.غصب عنه..
قعد يمسح فيهم وهو يرشف..
شدت اخته يده بقوة..
هو ضمها ليه وصلوا للدروج وركبوا فوق..
🍃خديجه بحزن:وخيي بالله اعذر امك تعرفها انت قداش تحبك لكن الجالي وضعه خاص مش غابي فيه..
بوها قال بنرفزة :لاخاص لاعام..اقعدوا كل مايدير حاجه ديروا وضعه الخاص سبله تبرروله بيها..
المهدي:لو طلع غالط في بنت الواعر بعد اللي دارته معاه اني ناخدلها حقها منه اني...
ومشي وهو يأشر ع نفسه ويقول..اني...
قعدوا معاه بعيونهم لين درق...
بعدين محمد شنيبه مسح بيده ع وجهه وقال..
/حسبي الله ونعم الوكيل...الواحد يجيب صغار يعاونوه عقاب عمره واني جبتهم بش يقصروا ايامي في الدنيا..
عمر عرف ان بوه ناوي يدير تحديد الكل..انسحب ومشي طلع من الحوش...
ضحك بوه نص ضحكه بتهكم..
خديجه بضيق:بوي..
شبحلها .
خديجه؛صدقني الجالي مادار شي غلط هي بنت الواعر فبركت قصة في راسها تبي تطلق وخلاص..
محمد شنيبه شبح لراما وقال:خشي شوفي حناك بنتي..
راما فهمت عليه وقالت؛حاضر..
ومشت خشت داخل...
هو بعد خشت قال لخديجه..
/مانيش عيل نمص في صبعي ياخديجه كان تبي تطلق حق مش محتاجه تفتري عليه وانتي عارفه كويس..
سكتت خديجه وهي مضايقه..
هو تنهد وقال:الله غالب مافيش قدامي غير اني نستر عملته وخلاص وكان انتي تعرفي من هي هادي اللي ماتستحي قوليلي عليها واني نتصرف..
خديجه بضيق؛زيي زيكم يابوي عرفت من محمد..
شبحلها بعدم تصديق بعدين هز راسه وقال..
/باهي باهي..
ومشي بيطلع..
خديجه:وين ماشي؟
هو قال:لحوش عمتك نوسع خاطري اللي ضيقتوه بخوارقكم..
وفتح الباب وطلع وجبده بقوة وراه..
هي بعد طلع تنهدت بغضب وقالت..
/تو يبانلهم..
وخشت وسكرت الباب بقوة...
🍃🍃🍃🍃🍃
ولطفي الواعر في هالوقت..
خش لحوشه من الباب الفاصل بينه وبين حوش بوه...
مشي شاف الميه في "الفاسكيه" وين واصله...
لقاها ناقصه هلبه..مشي شغل البير بش يعبيه...
بعدين خش للحوش من باب الكوجينه الخارجي وهو يقول..
/شرموله احسن حاجه..
مطيره؛جايكم رمضان تاكلوا لين يطلع من عيونكم..
لطفي بضحكه؛وانا قلت حاجه..قالها باللهجه المصريه..
ومطيره تشرمل وهي تضحك..
بعدين تنهد وقال:طوبى وين؟
شبحتله وقالت؛مقعمزه في دارها قالت غدوة امتحان..سبحان الله بنتك هادي غريبه..
لطفي:علاش؟
مطيره:لما روحت بيها بكت لين طاح جهدها وتوا مقعمزة تقرا عادي ولاكأنه صارت حاجه..
ابتسم لطفي وهز راسه وهو ساكت..
مطيره:وين رفعتها؟
هو قال:مشوار..
تنهدت وقالت؛براحتك..
لطفي:هيا سقدي بالعشي بنتعشا ونرقد..
مطيره:قعمز قعمز خل نحطلك..
هو جبد الكرسي وقعمز وقعد يراقب فيها شن دير وعقله مرى مرة يسرح بالتفكير..
🍃وطوبى..
في دارهم بروحها..
قدامها شيت مفتوح وكراسة كشكول..
تشوف للشيت وهي تمسح بيدها ع بطنها...
ع خشة اريج كانت جايه من الحمام بعد مادوشت وهي تقول بتذمر..
/يييه ع الصيف وقرف الصيف دوشي تلاته مرات في اليوم وان شاء الله..استغفر الله وخلاص..
نزلت راسها وقعدت تنشف في شعرها بالفوطه بعدين رفعاته فوق وهي تقول..
/مازال لين يبدا سريب هروب الضي ورمضان جاي وووه ياربي..المشكله الفصل الوحيد اللي تحسيه طويل ويتمغط..
طوبى بضحكه وهي تمسح ع بطنها..
/استاكي..
اريج:مانقدرش كان مافضفضتش نطربق..
طوبى:تزيدي تسخني ياهبله..
اريج:ايه صح عندك حق..قعدت تساوي في شعرها وهي تقول..خيرك تمسحي ع بطنك تحسي في حاجه؟
طوبى بإبتسامه:لالانمسح ع جنونه..
اريج بضحكه استغراب:قصدك تحس بيك؟
طوبى وهي مبتسمه من قلبها وسط ملامح وجهها الباهته.
/ايه...
اريج؛ياعمري...
طوبى:تعرفي روجه الشعوراللي تحسيه وانتي في داخلك بني ادم منك انتي روح مع روحك قاعد يكبر فيك ومشاركك كل شي غريب هلبه وحلو ويوجع في نفس الوقت..
اريج:علاش يوجع؟
بملامح حزن:الجنين يحس بمشاعر امه كلها...
اريج قعدت تشوفلها بضيق وهي ساكته..
ضحكت طوبى فجأه ودموعها في عيونه وهي تقول..
/يللا يانكديه خلاص ساد نكد فوتي فوتي انسي خلاص..
قعمزت اريج مقابلتها وقالت؛
/ايه فوتي وخل نحكيلك شن صار اليوم في العياده..
وقعدت تحكي اريج ع حاله جتهم العياده دارت مواقف مضحكه..
واسلوب اريج الفكاهي زاد من كوميدية الموقف وخلا طوبى تضحك من جدها وتنسى للحظات كل شي...
🍃🍃🍃🍃🍃
"شن قالك ترا"
نجاح:قال المعلومات اللي قالهم ع نفسه كلها صح والناس تشكر فيه هلبه..
"جديات نجوحه"
نجاح:والله زي ماقتلك..بس عواطف قصة الضرة مش مريحتني..
"اني ماعنديش معاها مشكله"
نجاح؛باهي استخرتي..
"ايه ايه ومستريحه للموضوع"
نجاح:ربي يقدملك اللي فيه الخير..
"آمين يارب..صحيتي نجوحه وبالله اشكريلي عبد الحفيظ"
نجاح بإبتسامه؛يوصل..
"تصبحي ع خير"
نجاح:قدامك كل خير..
سكرت نجاح وهي تشوف لتليفونها بعدم راحه..
ع خشة عبد الحفيظ للدار وهو يقول..
/كنتي تكلمي في اختك؟
هزت راسها بإيجاب..
عبد الحفيظ قعمز ع الكرسي وقال..
/انتي شن مخوفك راهو الموضوع عادي وهلبه في نفس الوضع وعايشين حياتهم وامورهم تمام..
هي قالت:عارفه بس ماكنتش نبي لأختي هكي صعب المراة تقبل غيرها تشاركها في راجلها..
عبد الحفيظ؛نصيب في النهايه يانجاح ومرات يكون هدا نصيب اختك ماتوقفيش فيه..
تنهدت وقالت؛ربي يقربلها الخير ويصرف عنها كل شر سادها ماعاشت قبل..
عبد الحفيظ بضيق:ان شاء الله يكون عوضها في هدا..
نجاح برجاء:يارب
🍃🍃🍃🍃🍃🍃🍃
ومصعب هالليله وهي تعدي ع المهدي وصغاره..
باتت سدره في حضنه ودمعتها ع خدها..
ودمعته هو نزلت غصبا ع خاطرها وخاطر خوتها..
قداش حس بالفراغ اللي خلاته عائشه في حياتهم..
هديكا الليله بالذات كانت محتاج لوجودها هلبه..كان محتاج طبطتها وكلامها المريح..
وقداش تمنى لو كان مكانها هو اللي راح وهي اللي قعدت صغارهم محتاجينها هي اكثر منهم...
🍃ومحمد ماقدرش يرقد غمضه حركة حناه لاخته قاعده بين عيونه وقاهراته قهر ولانه يزن حساس هلبه ماباش يحكوله عليها خلوه يلهى بقرايته وبرروله بكي اخته بمبررات اقنعاته وخلت عقله مع قرايته وبس..
🍃وحناهم مارقدتش الا بعد ماقري عليها راجلها اللي قعد متمسك بموقفه تجاه ولده الجالي...
لين يطلق طوبى...
🍃وهادي من المستحيلات عند الجالي..
اللي كل مايزيد يتأكد ان طوبى نوت الاستغناء عنه نهائي يجنن جنونه وعقله يرفض رفض تام استيعاب هالنتيجه..
🍃🍃🍃🍃🍃
تاني يوم...
الثلاثاء..
15مايو...سنة2018..
طلعت طوبى من باب الكوجينه الخارجي للجنان بعد ماجهزت نفسها بش تمشي الكليه دير امتحانها..
وين طلعت لقت غرفه مقعمزه تحت شجرة الياسمين..
تمسح ع بطنها وتتكلم..
مشتلها وقفت عليها وقالت..
/شن ديري؟
غرفه؛نهدرز ع وليداتي..
طوبى بضحكه:ياعمري صباح الخير ياخويله..
غرفه؛قالولك صباح الجمال والكريستال
ضحكت طوبى..
غرفه؛هدرزي حتى انتي ع بنتك تسمعك توا راهو..
طوبى:نهدرز عليها ونسمح عليها ونسمع فيها قرآن ونقروا اني وياها..
غرفه:اياااه ماشاء الله..
طوبى؛قعدت ندير زيك نخش ع اليوتيوب ونتعلم..
ابتسمت غرفه وقعدت تمسح ع بطنها..
طوبى:نقولك حاجه غرفه..
غرفه؛قولي حاجات..
طوبى:قبل ماكنتش نقدر نتخيلك تولي ام كويسه..بس توا حبيت امومتك هلبه..
غرفه بإبتسامه حسره؛كلام رؤوف...تعرفي اني حريصه بزايد ع خاطره هو نبيه لما يطلع يعرف ان كنت قد المسؤوليه وينعبا عليا..
طوبى:كويس انك بديتي ترضي..
غرفه بألم؛غصب عني لازم نرضى ماعندي غير هكي بش نرتاح..لكن في بالي ديما نفكر علاش حني هكي حياتنا..علاش ماطولش فرحتنا علاش راحتنا ديما قصيره علاش لازم تقعدوا مغصوصين وين تضحكوا من وعيت ع الدنيا وحني من مصيبه لمصيبه..وهالعام هدا هالعام اسود عام في حياتي من اوله مصايب ورا مصايب ولتوا ماطلعناش من ولاوحده فيهم...شن بنقول بس ان شاء الله مايأخذنيش لكن والله تعبت..
طوبى بضيق:عندك حق..تعبنا هلبه في حياتنا..لكن ديما نفكر ان في ناس غيرنا يتمنوا لوكانت حياتنا حياتهم ومصايبنا مصايبهم..في ناس ياغرفه مازال تعاني اكثر منا بوين عندهم مآسي بكل معنى الكلمه..الحمد لله ع حالنا هدا..وبعدين في الاخير راهي دنيا اسمها منها فيها..
غرفه بدموع؛معاك بس الواحد خاطره يرتاح يفرح من قلبه..
طوبى:كله يفوت ياغرفه كله يفوت وتو يجينا وقت ونفرحوا من قلوبنا..
غرفه من قلبها..
/يارب يارحيم..
طوبى:يارب..
"طوبى"
طوبى:خلاص بنمشي ادعيلي..
ومشت وهي تسمع في اختها تدعيلها..
"ربي يفتح عليك"
وصلت في السيارة وركبت جنب بوها
وهو طول طلع بالسيارة من الحوش..
🍃لما طلع..
شاف التارقي كيف بيركب سيارته..
طوبى قعدت تشوفله بنظرات ملئهم الحزن والضيق..
بوها ضرب منبه السياره..
هو سمعه وشافلهم..
جو عيونه في عيونها وطول غيروهم عن بعض..
هو رفع يده ورد التحيه للطفي..
ولطفي بعدين زاد السرعه وكمل طريقه..
ركب عبد القيوم السيارة وسكر الباب وهو يقول..
/لاإله إلا الله...الصبر الصبر بس هذى مانبي يارب...
وشغل السياره وتحرك طول...
🍃🍃🍃🍃🍃
وبعد طول مسافه...
وصل لطفي بطوبى للكليه...
طوبى:بترفعني عبير للمدرسه وبعدين بتروح بيا..
لطفي:باهي كان صارت حاجه كلميني طول..
طوبى؛حاضر..في امان الله..
لطفي:مع السلامه..
نزلت طوبى من السيارة وخشت للكليه..
ولطفي تحرك طول...
🍃🍃🍃🍃🍃
"هي هادي مش زي اللي فوق راهو"
مروة؛ايه صح طريقة الحل مش زي بعضها..
مناسك وهي تشوف للكتاب؛ترا نشوف غيرها بش تثبت المعلومه..
وقعدوا يدوروا ع مسائل تانيه يحلوها...
شويه تنهدت مناسك وقالت؛مضايقه..
مروة؛حسيتك جوك من الصبح مش حلو..
ضربتها ع يدها وقالت؛وخيرك ماسألتنيش وخلتيني نفضفض..
مروة بضحكه:اهو سألتك..
تنهدت وقالت؛امي عازمتنا اول يوم رمضان..
مروة؛حق..باهي كويس..
مناسك؛شن هو الكويس ياهمي مانبيش نمشي..
مروة:مهما كان تقعد امك..
مناسك بضيق:مش حاستها بكل ومش هاين عليا نخلي فيزو اول يوم بروحها مش متعودين..
مروة:هو يوم واحد ويمشي..
مناسك؛شن يفوته استغفر الله مالقت الا اول يوم تعزم فيه خلتني نتمنى رمضان مايجيش..
مروة؛استغفر الله..
مناسك بضحكه؛خوي قال بنمشي بش نحرق دمها..
مروة؛مااتفهه قوليله قعمز وهني روحك..
مناسك بضحكه تعجب؛خيرك دافعي عنها انتي؟
مروة؛مش ندافع عنها لكن هادي امكم..
مناسك؛فرقة حالها .
مروة بيأس؛ع راحتك..لكن مدام عزمتكم بروا وخلاص بلا خوك البارد هدا..
مناسك بضحكه؛من ناحية بارد فهو بارد حق وكلمته واتيه ولسانه ماينقدرش عليه ومدرهلي كبدي ومكرهني في عيشتي..
مروة؛علاش!؟
مناسك:مقيدني في كل شي ديري هكي ماديريش هكي هاتي تليفونك نشوفه ترا احكيلي شن صار في المدرسه اعطيني اسماء صاحباتك نسأل عليهم..
مروة بضحكه؛هدا شني اللطف..
مناسك؛هذا الشكاك خوان مصاحب نص بنات طرابلس ويحسابني بنولي زيهم..
مروة؛مبرده..هدا الخاطب..
مناسك؛لالا حشاه مازن العاقل هدا الصغير سي مالك..
مروة بضحكه؛لكن والله فيها جو الحياة لما يبدوا عندك خوت ولاد..
مناسك بملل؛ايه فيها جو انما ايه ماتوديه لعدوك..
فجأة رن جرس الاستراحه..
مناسك؛هي نوضي نوضي ننزلوا قلبي انغم من الفصل والله لولا الكساد في الحوش ماجيت ..
مروة؛اني غدوة مش جايه..
مناسك:حتى اني لكن خلي بينا الو باهي..
مروة؛باهي..
مناسك؛تي هيا نوضي معاش قادره نتنفس..
ضحكت مروة وناضت ومشوا مع بعض طلعوا من الفصل...
🍃🍃🍃🍃🍃
الساعه 12:30قبل الظهر..
طالعه طوبى من قاعة الامتحان ةاتصلت بعبير بش تعرف مكانها..
طوبى:السلام عليكم عبير وينك؟
"وعليكم السلام؛نستنى فيك بر في السياره القدام شويه"
طوبى:كنتي برا؟
"ايه تعالي وتو نحكيلك"
طوبى:تمام...
سكرت منها ومشت كملت طريقها لين طلعت من الكليه...
وهي ماشيه..
فجأه..تلقاه واقف قدامها..
جمدت في مكانها..
هو بإبتسامة ماكره؛شني خفتي!؟
طوبى بلعت ريقها وهي تشوفله بحده بعدين جت بتمشي هو اعترض طريقها وقالت؛ردي بالك تتحركي قبل نكمل كلامي..
وبعد جاكيته عن خصره وخلاها تشوف المسدس..
ارتعدت من الخوف وقعدت تشبحله بخوف وغضب في نفس الوقت..
رجع درقه وساوا نظاراته ع عيونه وقال..
/بوك يحساب روحه ذكي بالحركه اللي دارها امس ع اساس بيفضح اللي هناك قدام العيله لكن للاسف ليه طبعا اللي يبيه ماصارش منه..
طوبى مافهمتش قصده وقعدت تفكر بتساؤل..شن دار بوها..
الجالي:المهم توا ياغرامي..اول يوم في رمضان بنفطروا مع بعض في حوشنا تمام..وتاني يوم بنسافروا لتركيا ونكملوا رمضان غادي والعيد حتى هو ومرات هااه مرات نمددوا ونديروا اقامه...فوتي روحك حلوتي واستعدي نفسيا..
طوبى بحده:حول من طريقي..
الجالي هز راسه وقال..
/ok..ok..نخليك توا تروحي بروحك بس يوم غدوة قبل السحور بنجي نروح بيك..تمام..عشقي..؟
طوبى قعدت تشوفله وهي تفكر في الحاله اللي وصللها وضعه كل ماله قاعد يتأزم وهي خوفها زاد..
غيرت عيونها عنه لشي لفت انتباهها هو مالاحظش وجوده..
ردت طول عيونها ليه..
الجالي:نسمع منك كلمة تمام نخليك تمشي..
هي غيرت عيونها عنه واستجمعت شجاعتها ومشت من حداه..
هو طول لحقها وقعد يقول..
/طوبى..طوبى..
بعدين سكت وهو يمرر في نظره حواليه..
اما هي كانت ماشيه ومركزه بنظرها ع شي واحد ركز عليه الجالي بعدين وحاول يظاهر انه يمشي عادي في الطريق..
هي التفتت بالشويه لقاته وراها..
وهو وخر جاكيته وراها المسدس مرة تانيه وعيونه يراقبوا في شي تاني..وفيسع درقه...
هي لفت وجهها عنه وسرعت خطواتها شويه..
وهو قعد مركز عليها..
🍃وبعيد عليهم شويه عبير تشوف فيهم وهي مستغربه في وضعهم
فجأه...
شافت طوبى وقفت حدا سيارة كتيبه مسلحه واقفين عليها جماعه يهدرزوا وقالت بفزع..
/بالله عليكم شوفوا هدا لاحقني يهدد فيا..
هو انصعق قعد واقف في مكانه مش مستوعب هي شن دارت..
واللي استنجدت بيهم مشوله طول واحد فيهم يقوله..
/تعالى هني تعالى..
هي لفت بسرعه وقعدت تمشي بسرعه وخوف الدنيا كلها تجمع في قلبها..
اما هو انصاب بالذعر لما شافهم جايينه..
وخر خطوه بعدين لف وطلع يجري بأقصى سرعه...
وهما يجروا وراه...
طوبى وين قربت توصل لسيارة عبير التفتت شافاته وهو هارب يجري وهما وراه..
رغم كرهها ليه حست بشي وجعها بس تجاهلت هالاحساس لما تفكرت اللي داره فيها..
ولفت طول ومشت ركبت السيارة..
عبير وهي مصدومه؛شن اللي صار توا!!
طوبى بلعت ريقها من الخوف وهي تقول؛تحركي تحركي بسرعه للحوش طول..
عبير هزت راسها وهي قلقه بعدبن شغلت السيارة وتحركت..
🍃اما هو..
قدر يوصل لسيارته وركبتها وتحرك طول قبل ليوصلوا فيه..
كان يجري بالسيارة..
وهلبه مشاهد تجي بين عيونه..
مشاهد مختلطه..منها القديم ايام الاعتقال والخطف ومنها مشهد طوبى وهي تستنجد بيهم منه..
شدت الدومان بإيديه الزوز وصرخ صرخة غضب مخيفه...
🍃قدر يوصل للفيلا..
ولما وصلها..نزل من سيارته وخش يجري..
ركب فوق ومشي لدار المرسم متاعها..
وهو داهش قعد يتفكر في اللي صار كله..
مشي طول لحاجاتها وقعد يكسر ويخبط فيهم
ماخلا شي ع حاله وهو يعيط بغيظ ودموعه ينزلوا...
مرة يجي بين عيونه شي من الماضي ومرة من الموقف اللي صار قبل شويه وغضب تستعر ناره...
وصل في دولاب دار جبده وطيحه ع الارض..
ومع هذا غيظه ماراحش..
مشي طلع من المرسم لدار النوم وهي يقول..
/خاينه..خاينه كذابه..خاينه..
ومشي لحجرة الملابس خش عليها وجبد حوايجها كلهم
وحطهم في صندوق..
ومشي طلع لروشن يفتح ع الجنان لوحهم منه..
بعدين مشي لم بقايا حاجتها اللي في المرسم و لوحهم حتى هما..
حتى لوحاتها..
لعند ماوصل في اللوحه اللي رسمتهاله..
قعد يشوفلها بنظرات غضب والم في نفس الوقت..
وتفكر المناسبه اللي هداته فيها اللوحه..
طلعت منه ضرخة غيظ بس مع الم هالمرة..
بعدين طلع من الدار ودموعه تنزل...
🍃وفي الفيلا المقابله..
جميله:سهرياتنا في رمضان كلهم هني
قريبتها اللي جايه تزور فيها:جنانك مشرح وديكوره يجنن بس لو ديرله اضافات تمشي مع جو رمضان..
جميله:منيه قالتلي نفس الكلام..
بدت ع وجه المراة ملامح ازدراء وهي تقول..
/شن هالريحه؟
جميله:اللي هو مولع نار..اني مش عارفه شن هالنار اللي يولعوا فيها الصيف.
:ربي يهدي من خلق وخلاص..
جميله بعدم تحمل؛ووك عليا الريحه غبقت تعالي خشي تعالي..
وخشوا الزوز داخل الحوش...
🍃ولمصدر الريحه في الفيلا المقابله..
كان الجالي واقف يتفرج ع اثار طوبى وهي تنحرق قدامه مشهد يشفي الغليل بالنسبه ليه...
بلع الحبه متاع دواه وفتح شيشه الميه وشرب منها وهو يتفرج...
لعند مارن تليفونه..
طلعه من جيبه وشاف المتصل..
كان رقم دولي..
تباعد عن النار مسافه..
بعدين غمض عيونه وخدي نفس بعدين طلعه..
فتح عيونه..وفتح الخط ورد بإبتسامه..
/السلام عليكم ورحمه الله بركاته.....يامرحبا يامرحبا......الحمد لله شن اموركم واحوالكم.......لامافيش مشكله خلاص نحجز لرحله غدوة......تمام تمام....وعليكم السلام...وسكر...بعدين التفت للنار ومشالها وهو يقول..
"موليلك ياطوبى موليلك والله ماني مخليك لو شن يصير"
#روزناما
#طوبى
....يتبع....
