طوبى "شارع القهوة"
#جمان_فريد
#الجزء_الثالث "افراح شارع القهوة"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها ..
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
وين يقرب موعد فرح في حوش...
تلقوا اكثر من حامل همه ويخمم فيه كبيرة العيله..
سواء ام...ولاأخت كبيره...
الأم بالذات...تقعد تسهر الليالي وهي تفكر وتخمم..
كيف بدير شن بتاخد..من وين بتصرف..
باهي كان نقصت هادي كيف ندير..
باهي كان فسدت هادي كيف يصير..
باهي كان وكان وكان....
وفي الاخير ترفع عيونها للمولى وتقول..
"يارب تمم ع خير وماتخليني نتحشم قدام حد"
وهدا كان حال وردة..
اللي قعدت طول ليلها ساهره وهي تخمم في اول عرس ليهم عرس بنتها الكبيرة..
ماتبيش بنتها تطلع من الحوش وهي مش راضيه ولاتحس روحها ناقصه دون البنات..
آذن عليها الفجر وهي تفكر...
تعوذت من الشيطان..وناضت توضت وصلت...
وقعدت تدعي لربي في كل سجده يسترها معاها ويكمل ع خير...
ولطفي راجلها قبل يمشي للجامع قعد واقف يشوفلها كيف ساجده وطولت في السجود..عرفها منهمه بهم تاني غير هم ولدها مختار..
تنهد من قلبه تنهيده ضيق..ومشي بيطلع من الحوش...
🌻بعد كملت وردة صلاتها...
فتحت الراديو....
وطيبت قهوتها وقعمزتها ع الجنان ع شلته "مندار خفيف"
قدام الكوجينه..وقعدت تشرب في القهوة..
ومازال عقلها يفكر وماباش يبطل تفكير ويريحها...
شويه وناضت سدرة ووتت روحها للمدرسه...
وين طلعت للكوجينه تفطر مع امها..
لاحظتها مهمومه وساكته...
حطت طاسة الحليب والشاهي وقالت:يما..
شبحتلها امها..
سدرة:تتسهل إن شاء الله وربي يفرج من عنده..
ابتسمت وردة بإطمئنان ابتسامة مصطنعه بش تريح بنتها..
سدرة؛اكيد يام الاحباب والاصحاب بيعاونوا ونديروه بإذن الله عرس كامل ماناقصاته حاجه ونبتتوا لفردوس احسن بتات..
وردة؛مشكله فردوس مش اي شي يعجبها وماتحط كان ع الغالي وخوه...قداش منه بوكم...اهو العيد جاي بيفكر حتى في حق الخروف..
سدرة؛صدقيني تنحل والله تنحل وربك كريم يام..انتي بس سلميها لله وتو تشوفي كيف تتيسر..
هزت راسها وقالت؛ان شاء الله يابنتي ان شاء الله..
🌻وطلعت سدرة من الحوش وهي مضايقه ع خاطر امها وبوها..وراقيتلها من فردوس وانانيتها مش مقدرة الظروف ولامدورة بوها وامها المهم حاجتها تاخدها واللي تبيه ديره..
وهي ماشيه تلاقت مع المهدي جاي من محل في اخر الشارع..
شبحتله بنظرة وحده مضايقه والحزن باين في عيونها..
وهو قعد يشوفلها وحس بوجع في قلبه..
فاتت من حداه وكملت طريقها وهو وقف في مكانه وقعد يتبع فيها بعيونه ويتسائل خيرها..!؟
مشي طول للحوش لقي نسرين طالعه تجري لأنها عطلت..
شدها وقال:تعالي هني خيرها سدرة صايرة معاها حاجه!؟
نسرين بإستغراب:لامافي شي لاامس كان جوها عادي..
المهدي:توا شفتها وجهها ماعجبنيش اعرفيلي خيرها بعدين نروح نلقى عندك الدوة كلها..
هزت راسها وقالت؛حاضر..
طلقها..
وهي مشت تجري...
وراها بمسافه فايزة تمشي بسرعه...
قعدت تنادي فيها؛نسرين ..نسرين..
وقفت نسرين والتفتت..
جتها فايزة تجري وقالت:صباح الخير..
نسرين بضحكه؛صباح الخيرات شرادة تمت المقاطعه..
فايزة بضحكه؛ايه تمت تعرفيني اني مانقدرش ع بعدهم ياروحاتي..
ضحكت نسرين..
وقعدوا الزوز يجروا لين وصلوا للمدرسه..
🌻🌻🌻🌻
في المدرسه...
وهما مقعمزين في الفصل ومقاعدهم ورا بعض..
كانوا عائشه وسدرة متلفتات لنسرين وفايزة ويهدرزوا..
عائشه:والله حتى اني قعدت نبكي فايزة ماتعودتش ماتنقارش اني وياك ونقولك ديري هكي وماديريش هكي..
فايزة؛ريتوا شن استاحشت نكدها..
ضحكوا البنات..
عائشه بضحكه؛المهم ولينا وزي ماقلتي في المدرسه نقعدوا مع بعض وبرا منها نديروا رواحنا مانعرفوش بعض..
ابتسمت فايزة..
نسرين شبحت لسدرة اللي لقتها سرحانه ويدوب مبتسمه قالت؛سديرة..
سدرة؛هممم..
نسرين؛المهدي بكري قالي شافك ووجهك ماعجباش..
سدرة ابتسمت بحب وقال:ياروحي يفهم فيا من نظرة..
ابتسموا البنات..
نسرين:باهي خيرك ؟
تنهدت من قلبها وقالت؛نخمم في عرس فردوس اختي وتعرفوها وعينها واسعه نبي ونبي ونبي وين نقوللها قدري الظروف تقولي مادخليش..
فايزة؛فردوس باهيه صح لكن طبعا هدا مخرب عليها..
سدرة؛امي مسكينه تخمم ومش عارفه شن دير فوق هكي خاشين ع عيد..
عائشه؛تتلايم ان شاء الله وتتيسر..
سدرة؛يارب...تعرفوا خطر في بالب نصرف الذهب اللي عندي..
فايزة؛وخيرها هي ماتصرفاش ذهبها كلكم عندكم ذهب مش غير انتي؟!
سدرة؛تبي ترفعه معاها يافايزة..
فايزة؛وبعدين تقول زيدوني تاكم ولاتعليقه ولا؟
سدرة؛من غير كلام هادي..
نسرين؛ربي يهديها فردوس...
عائشه؛صدقيني كله حيمشي ياسدرة ربي يرزق من حيث لايحتسب عبده..
سدرة من وسط قلبها:يارب...
🌱🌱🌱🌱🌱
"شن تقولي انتي يامراة؟!"
وردة؛غير صل ع النبي واسمعني وافهم مني يالطفي..اني هدا ذهب ذهبي واني حره فيه ندير فيه مانبي نصرفه نلبسه هدا مالي..
لطفي:ايه مالك لكن تصرفيه بعد مااني نموت..
شدت يدها وقالت:بعيد السو..خير هكي يالطفي كل شي تاخد فيه بحساسيه!؟ فردوس بنتي زي ماهي بنتك بتصرف ع عرسها من مالك واني بنصرف ع عرسها من ماالي..مانبيهاش تطلع من حوش بوها مكسورة ولانحس بروحها ناقصه..وهدا اول عرس مادابينا يكون احسن عرس يالطفي..
قعد يشوفلها وهو يقول:هالبنت هادي كان بتستمر هكي بتعب حتى الراجل..
وردة:ادعي وقول ربي يهديها ويغير حالها للأحسن..
شد ع يدها وقال؛ندعي ونقول ان شاء الله ماتغيبي عيني بلاك مانسوا شي..
ضحكت وطبطب ع كتفه وقال؛بيا وبلاي تسوا احسن شي..
وهو يشوفلها بإبتسامة حب...
🌱🌱🌱🌱🌱
بعد نهاية الدوام..
روحوا البنات متفرقات...
الوحيده فايزة اللي مشت لمحل يبيع في اكسسورات نسائيه
تبي تشري توكات..
وهي تختار وتاخد...وفجأة سمعت حد وراها يقول...
"شعرك حرام تشوف الف عين وتمتع بيه يافايزة.."
انصدمت والتفتت..
احمد دار روحه يشوف في البضاعه:حرام الف عين تقعد تشبح لشعرك وجسمك ووجهك وهو معبي مكياج وتتمتع بيه..ربي منين خلقك حلوة خلقك حلوة لنفسك ولراجل واحد بس يقدرك ويحطك في عيونه مش بس يشوفك بيهم..
فايزة تسمع فيه كيف يتكلم بنبرة هاديه وحلوة..
قعدت تشوفله ولاول مرة تلاحظه وتركز ع ملامحه الهاديه برغم انه كان عاطي ع الجنب..
احمد؛فايزة والله نحبك وعاجبتيني بكل شي فيك بس لو تحافظي ع روحك يافايزة ع خاطرك انتي قبل..
وهي مازال تشوفله وخلاص وتحت تأثير كلامه الحلو واللي يخش القلب طول..
خدي توكه ع هيئة وردة ومشي للراجل اللي يبيع وسأله عن السعر..وبعد جاوبه خداها..
وحطها قدامها...ومشي طلع...
وهي شافت للتوكه هلبه بعدين خدتها وعيونها تعبوا دموع...
🌱🌱🌱🌱🌱
"وياسيدي هادي كل القصه"
المهدي هز راسه وقعد ساكت وهو يفكر..
مغليه؛ع اساس حني بنخلوهم اكيد بنوقفوا معاهم هدا حالنا في شارع القهوة من زمان..
المهدي:اسمعي يام..بعد يفض عرس فردوس نبيك تخطبيلي سدرة..
خشت خديجه وطاحت في وذنها كلمته..
وولعت فيها النار..يعني حتى سدرة بتتزوج قبلها!
مغليه:انت غير تخرج هالعام وبعون الله نخطبهالك طول..
المهدي:خلاص معاش قعد شي ع التخرج بداية الصيف ان شاء الله..
مغليه؛ربي يفتحها عليك وينجحك..
خديجه؛ماتقولوش بوي وين مختفي الايام هادي اغلب وقته في الحوش..
مغليه؛بوك عنده مشروع بيفتحه وقاعد يتفاهم فيه مع جماعه..
خديجه؛متأكده يام!.
المهدي بإنزعاج:ترا ضمي فمك واطلعي برا...
خديجه؛وشن قلت اني!..
المهدي:قتلك اطلعي برا ومعاش تناقشي..
مشت طلعت وهي معصبه..
وهو قال؛تبخ سمها بعدين تقول لاكنت نبصر لاماقلت شي..
مغليه؛خلاص هدي روحك وماتعدلش عليها..
نسرين:نديرلكم قهوة..
المهدي؛ديري من قهوة حوش الواعر..
نسرين بإبتسامه:حاضر..ومشت طلعت من الصاله..
مغليه؛راهو قهوتهم خير من قهوتنا بهلبه ردوا بالكم ياكلوا عليكم السوق..
المهدي؛يام صحاب القهوة والقهوة متاعنا مازال اشهر بوين من متاعهم هما..
مغليه؛ايه بعلامة ماطلبتها هي..
ابتسم ع جنب وقال:حتى انتي يام..تو شن بنرد عليك بس.
ضحكت مغليه..
🌱🌱🌱🌱🌱
وسدرة فهالوقت كانت في المطحن ترحي في القهوة وكياس البن بحداها..مغمضه عيونها وتشم في الريحه وهي متكيفه معاها..
فجأه انفتح الباب وخش عليها بوها..
لطفي بإبتسامه:سدرة..
استاقظت وفتحت عيونها وشبحتله وقالت:نعم بوي؟
لطفي:طالعين اني وامك واختك وعمتك مطيره للسوق اختك غرفه في الحوش بروحها..
سدرة؛هي شويه نكمل هادي بش الولاد يجوا يعبوها ونطلع..
لطفي:وشدي قرايتك..
ابتسمت وقالت:حاضر بوي...
راجاته لين يطلع..
طفت الماكينه ومشت طلعت من المطحن للحوش..
وخشت من باب الكوجينه..
مشت تجري لدارها..
فتحت دولابها ..طلعت حكة ذهب فيها اسوارة وخاتم وسلسال...
خدت الاسوارة..مشت طلعت تجري...
لقت عمتها واقفه ع المرايه جبدتها ع تركينه..
مطيره:خير دعوتك..
مدتلها الاسوارة وقالت؛خودي عمتي اصرفوها واشرولها شن تبي.
مطيره:لالالا مانقدرش..
سدرة برجاء:بالله عليك عمتي خودي اني عارفه حينقص عليكم فلوس وتقعد فردوس تنتور عليكم ومرات تتعارك مع بوي وتنقلب نكد..خودي بالله..
تنهدت مطيره بضيق وخدتها وقالت؛اخر مرة تصرفي حاجتك ع غيرك انتي اولى بيهم..
سدرة؛مازال سريبي اني..المهم يمشي كل شي ع خير ومن غير مشاكل..
مطيره:ربي يقوي سعدك يابنتي ويعطيك ع قيس نيتك..
"هيا عمتي"
مطيره؛عمية ان شاء الله هالفرخه الطماعه..
ومشت بسرعه..وسدرة تضحك..
بعدين تنهدت وقعدت تنادي:غرفه ياغرفه..تعالي معاي للمطحن...
🌱وكملت سدرة شغلها في المطحن..
وجو ولاد عمها بدوا يعبوا في القهوة في كياس بش يبدوا يبيعوا..
روحت للحوش..
وقعمزت تقرا وحداها غرفه تكتب في واجباتها..
فجأة رن التليفون في المربوعه...
حطت كتابها ع تركينه وناضت ومشت للمربوعه..
وصلت فيها وخشتلها..
وجت للتليفون وقامت السماعه وقالت:آيوه...
"سدرة"..
توسعوا عيونها ع الآخر بصدمه..
"الو سدرة ردي عليا"..
ارتخوا عيونها وارتسمت ع وجهها ملامح الجمود وقالت ببنبرة صارمه؛شن تبي متصل.
"سدرة بالله عليك ماديريش زي يابوي ياسدرة..اقسم بالله اني نادم نادم اشد الندم ع اللي صار ونبي نولي لكن نبي بوي يسامحني قبلها"
سدرة؛تعرف لو كنت مكانه مزقت ورقتك من كتيب العائله تبريت منك بعد العمله ووطيت راسه في التراب..تعرف شن درت في بوك يابني انت..قصرت رقبه خليته مش قادر يقيم عيونه في ناس امنوه على فلوسهم لو خنبت فلوسه هو كانت هينه..لكن اني خنبت فلوس وفلوس ناس حطوهم عنده امانه خليتهم يخونوه ومايخلوا مايقولوله...لو انك ولدي كنت قتلتك مش غير نتبرا منك وننكرك....
"بوي هو اللي جبرني ندير هكي"
سدرة بصرامه؛بوي ماجبرك ع شي انت اللي طينتك فاسده ديما بفعايلك السود محشمنا...نقولك حاجه احسن شي درته في حياتك انك خديت وجهك وريحتنا من مصايبك..
"قصدك حتى امي مرتاحه واني بعيد عنها..."
سدرة وهي تحرك في سبابتها جنب وجهها:امي بالذات ماتجيبش سيرتها ع لسانك...كانك تعرف شن معنى كلمة ام راك مادرتش اللي درته..
"سدرة سدرة..اني نبي نصلح غلطي ياسدرة نبي نروح ونبي بوي يسامحني ويخليتي نولي"
سدرة؛تصدق وانت تبكي توا ماحركتش فيا شعره ولاقدرت نصدقك خوي ونعرفك عمرك ماكنت صادق ..
"قلبك اسود "
سدرة؛عليك انت ايه اسود..وعمره ماحيبياض من ناحيتك..
وسكرت في وجهه الخط..
وانهارت بالبكي وقلبها يتقطع تقطيع..
يقعد خوها الكبير وتحبه..بس اخطاءه بالنسبه ليها لاتغتفر ومافيش مجال للصفح عنه بعد اللي دار فيهم...
🌱🌱🌱🌱🌱
وقبل المغرب..
روحوا العيله من السوق وهما يكركروا في الاكياس..
وبدت فردوس توري في سدرة شن خدت وهي فرحانه..
سدرة؛خلاص كملتي..
فردوس:شن خلاص متاعك مازال بنمشي لمحل في عراده يبيع في فساتين سهره بناخد واحد...ومازال المكياج حتى هو..
شبحت سدرة لعمتها ومطيره تشوف لفردوس ينظره عدم رضا..
~~~~~~~
مطيرة:انجبرت نصرفها وقلتلهم مني وامك ماركزتش وبحقها خدينالها حاجه..ماتحطش في عينها كان ع الغالي وبس.. والله قريب لطيتها كف قدام الناس..
سدرة قعدت ساكته ودموعها في عيونها..
مطيرة لاحظتها وقالت؛خيرك سديره حاسه في حاجه تانيه..
تنهدت وقالت؛لاشي هدا هو كل همي توا..
مطيره؛تمشي تمشي بنتي ونديرولها ان شاء الله احسن عرس..
سدرة: ان شاء الله....
🌱🌱🌱🌱🌱
تاني يوم..
الصبح...
طلعت فايزة من دارها وهي بتمشي للمدرسه..
خشت للكوجينه بش تفطر قالت:صباح الخير..
امها بإبتسامه؛صباح النور..
وبوها لماشافها تفاجئ وقال:صباح النور...شن اللي غيرك هكي..
فايزة وهي تساوي فالشاربه المحطوطه حط:اقتنعت هكي خير..
ابتسم صبري وقال:الحمد لله..السترة باهيه يابنتي السترة باهيه..
مشتده؛هي قعمزي افطري بنيتي..
صبري:اهو حتى امك ربي هداها وولت تتكلم بحنيه..
ضحكت فايزة وقعمزت..
ومشتده قالت؛بنفوتها اليوم مانيش معكرة مزاجي..
وصبري وفايزة يضحكوا عليها...
🌱ومن فرحة مشتده وصبري بحجاب فايزة..
لفرحة شخص كان هو السبب الاقوى والوحيد اللي خلاها تاخد هالقرار..
وين طلعت من الحوش وفاتت من قدام الدكان..
هو كان طالع منه للسيارة اللي جايبه الخبزة..
احمد وهو لاهي مع صاحب السيارة:هي نزل ياخوي..
شويه وسمع خطواتها التفت وشافها..
بانت عليه ملامح الدهشه اللي تخللتها ابتسامة فرح واضحه..
وقلبه يرفرف من فرحته..
هي مابتش تشبحله بس كانت تمشي وهي مبتسمه..
وهو يتبع فيها بعيونه..ومن الفرحة قريب يطير...
"ياخوي نزلتها كلها.."
التفتله وضحك بعدين قال:دقيقه بس..وطلع من جيبه فلوس وعطاه وقاله..الباقي ليك..
الشاب؛بارك الله فيك..وركب السيارة..
وتوكل....
واحمد مازال مش مستوعب اللي صار..
تجاوب فايزة معاه هذا يعني انها حست بيه..وبدت تفتحله في قلبها...
خش للدكان وهو يضحك..ومرة يمسح ع شعره ومرة يحط ايديه في جيوبه..ومش عارفه كيف يعبر عن فرحته...
🌻أما صاحباتها..
"شرادة"..
فايزة بضحكه:طالعه عليا..
عائشه بفرح؛يهبل وانتي تهبلي...وضمتها من فرحتها..
ونسرين وسدرة يضحكوا .
سدرة:باهي اللي اتسيقمتي..
فايزة؛اسكتي انتي..
سدرة:نكست عينك ماتسكتنيش نسكت بروحي..
وقعدوا يضحكوا عليهم البنات...
🌱هو حجاب فايزة ماكانش حجاب بمعنى الكلمه..بس هادي البدايه ومع الوقت يتعدل...🌱
🍀🍀🍀🍀🍀
وتعدي ايام...وتجي ايام...
وعيلة الواعر يجروا ع قدم وساق ويوتوا للعرس..
والعيد الكبيرة خلاص قريب يخش وهدا الناس كلها تويتله..
🌻صفيه بضيق:تسبلي بخروف العيد..
وردة؛مش مشكله...اني وياك نمشوا للخياطه اللي في اول الشارع تخيطلها احلى قفطان.
صفيه:وحق القماش من وين بنجيبه؟
وردة؛هديه مني ليها..
صفيه:لانهاري انتي عندك موال طويل عريض..
وردة؛مالا والله ياصفيه ماك ردتيه عليا..
صفيه بإحراج؛علاش هكي ياوخيتي اني جيت نشكيلك مانبي منك شي..
وردة:انتي وخيتي وهادي بنية عم بنياتي يعني اختهم مافيش فرق بينها وبينهم..
صفيه ابتسمت وعيونها معبيات دموع؛ربي يعطيك ع قيس نيتك..
وردة بإبتسامه؛وانتي شن بديري..
صفيه؛خديت من قريبة ليا كم لبسه نمشي بيهم روحي..
وردة هزت راسها وقالت؛كويس..
🌻ومن الجنان لداخل الحوش....
فردوس؛شوفي الطاكم اللي خداه بوي..
سدرة ؛يطول في عمره ياربي ومايغيبه..
فردوس بإبتسامه؛آمين..
غرفه؛وامتى اني تشرولي قفطان؟ سدرة:غدوة ياهمي بنطلع ناخد اني وياك..
غرفه؛نبيه زي الفيلو..
سدرة:الوي ياليلى ياعلوي!...
فردوس بضحكه؛عادي خودولها مايطلع كان عليها هالعسل..
وغرفه مبتسمه بفرح وهي تشوف لفردوس...
🌻وكملوا شري كل شي يحتاجوه...
حتى من طواسي الشاهي...والعصير...الكواشيك
سخاخين الشاهي الكبار...بكارج القهوة الكبار
وجاب لطفي بضاعه كامله من سبيزة من الجمعيه...
وبضاعة فطور...ايام حكة الطن الكبيرة...وحكاك السردينه..
وحكاك حليب الكورنيش...وغيرها من البضاعه اللي كانت تتوفر في الجمعيه آنذاك
وخلاص معاش قعد ع عيد الاضحى كان اسبوع.
واسبوع اللي بعد اسبوع العيد مباشرة العرس
فالأسبوع اللي قبل عيد الاضحى..
🌻كانوا يتلاقوا الجيران والاقارب ويديروا في حلاوات العرس ويبرموا في الكسكسي..
مع هدزرة...وشتاوات واغاني....وجو فرح بإمتياز في وسط كله حب وحميميه..
خش بعد هالاسبوع اسبوع عيد الأضحى..
المهدي؛شد ياجالي من غادي شد..
الجالي شد الخروف من رجليه..
وبدي محمد يذ.بح بعد ماسما بالله وكبر...
🌻في الكوجينه..
مغليه؛بسرعه خديجه طلعي صونيه البرمه بش يحطوا فيها المعاليق..
خديجه خدت الصونيه وطلعت طول..
وفايزة في الكوجينه تاكل في الفطيره وتشرب في الشاهي..
كيف بدت تفطر هدا وين ناضت..
زي فردوس..
اللي مابتش تطلع للجنان بكل خايفه ع بشرتها من الشمس..
ومقعمزة تفطر ع اقل من مهلها..
ع عكس سدرة..
اللي كانت تعاون في بوها ع الذبح..
ايه سدرة بنت 17سنه...اللي مفروض تشوف منظر الدم يغمى عليها او تنقرف..
ليها عامين تخش مع بوها في كل شي ليه علاقه بذ.بح الأضحيه..
برغم رفض لهالشي بس ماقدرش يغلب اصرارها..
وكأنه تبي تعوض مكان خوها اللي تخلى عنه بإرادته...
🌱وفي حوش عبدالمطلب..
"هيا ماما نبي كبده"
صفيه وهي تقلي في المعلاق:هي قريب يطيب بنتي...
خش حسين وهو يقول:هيا يام بوي يعيط يبي قلايه..
صفيه:من امتى مايعيطش بوك ديما يعيط..
~~~~~~
وردة:ماما غرفه كولي بالشويه مش هاربه الماكله..
غرفه وهي تاكل؛باهي..
وردة؛ماتبي شي تاني لطفي..
لطفي وهو مقعمز يشوط؛حركي فردوس بس..
وردة بضحكه؛داخل حاصله في الدوارة..
لطفي قعد يضحك..
وورده مشت خشت داخل..
شافت فردوس وهي تغسل في البطن وتقول:يام حرف صرف حشا هالعيد..عروسه وحاصله في العفن..
وسدرة مقعمزة ع الارض تقرض في خضرة العصبان وهي تسمع فيها وتضحك..
~~~~~~~
"حي ع امه خدي اللحمه من قدامي"
نضال:عينك مش ليك هي محطوطه هكي وخلاص اللي يجي ياخد..
عمر ضربه بوني وقاله؛متاعي حطيت عليها عيني..
نضال وهو يفنص ؛والله نقتلك ..
وبدوا يضاربوا...
ع طلعة نسرين شافتهم باركين ع بعض ويخبطوا في بعض:خير بلاك انت وياه...تي حولوا ع بعض..يماااا.
جت مغليه تجري شهقت وقالت:تي حولوا ع بعض يابهايم..
وهما شي ولابوا يطلقوا بعض..
مغليه؛يامهدي...
طول بعدوا عن بعض وهما داهشين..
ع جية المهدي وفي يده الشيته كان يقطع في لحم مع بوه..
المهدي:شن في..
شافوا الشيته قريب ماتوا في لحظتها.
مغليه:هالبهايم كانوا يضاربوا قريب قتلوا بعض..
عمر:خدي لحمتي..
نضال؛لحمتك وذنك..
المهدي وهو يحرك في يده:تعالى انت وياه تعالى..
مشوله زي الرجاله الطيبين ووقفوا قدامه..
ضرب كل واحد فيهم ع قفاه وقال:قدامي..
مشوا الزوز قدامه وهو وراهم..
مغليه:امتى يكبروا ويريحوني من دوشتهم..
ومشت خشت داخل..
ونسرين مشت خدت الصونيه ولحقت امها...
🌻🌻🌻🌻
"انتي بتغسلي الدوارة"
عواطف؛عينك..العام اللي فات اني غسلتها..
نجاح؛في رمضان اني غسلت الدوارة يافالحه ولانسيتي..
عواطف؛شن دخل رمضان في العيد!
نجاح؛كلهم دواوير ياماما..
عواطف؛اني مادخليش ماني حاطه يدي في شي..
ومشت بتخليها..
جبدتها من كمها وقالت؛بتغسليها انتي يعني تغسيلها...
عواطف؛والله ماغاسلتها باهي..
نجاح عطتها كف وقالت؛تغسليها غصب عنك..
عواطف:حي ع امك حي!..
وبدوا يضاربوا هما الزوز..
ع خشة امهم للكوجينه..كانت برا ماسمعتش عراكهم..
وين شافتهم يترايشوا..
خدت عصاة المكنسه وبدت تخبط فيهم..
وهما مكرشات في بعضهم ويخوا في ضرباتها في نفسها الوقت..
لين جو ع دولاب الكوجينه طيحت نجاح عواطف وقعدت تضرب...
نجمه؛تي تعالوا ياولاد لهالهايجات تعالوا...
وشويه ويخشوا خوتهم الولاد يفكوهم عن بعض..
وكل وحده فيهم مشت في تركينه ونجمه حصلت في البطون بروحها..
تغسل وتقول؛يارب ابعتلهم رجاله يرفعوهم من ع شبح وجهي ياربي...
🌻🌻🌻🌻🌻
ومرت اجواء العيد في كل حوش بجوهم وطقوسهم الخاصه اللي تعودوا عليها..
في اللي مر عليه بسلام...وفيه اللي بالنكد والمشاكل..
حالات مايخلاش منها اي حوش ليبي في مناسبه زي هادي...
🌱🌱🌱🌱🌱
وبعد عدوا ايام العيد...
وطلعوا من حوسته.... وخشوا في حوسة العرس...
اللي كانت من اهم عاداته وتقاليديه في طرابلس....
المستاذنات...
🌻يوم الاربعاء في الليل...
كان وسط حوش لطفي معبي بالاقارب المقربين والجيران القراب...
عيت شنيبه..عيت الخويلدي..عيت الهادي...وعيت الصيد اللي هما نجمه وبناتها...
ومعاهم زوز نساوين برانيه هما هادم يكونوا المستاذنات...
وتبدا سهريه المستاذنات...
فايزة شاده الدربوكه ودربك...
والنساوين يبدوا يغنوا...
...على اول ماتبدينا...ع محمد صلينا....
...على أول مانبدا ونقول...بالصلاة على الرسول...
في من فرحان من جده ويصفق بقلب..
وفي من بالسيف جاي ويدوب يصفق غير قدام الناس..
زي خديجه وعواطف ونجاح اللي عيونهم على فردوس اللي كانت لابسه لبسة بسيطه وقنينه ومقعمزة في وسط الناس ورافعه خشمها..حتى هي عروسه وتزوجت صغيره...
مطيرة وهي تصفق:
...وياالله كملها علينا ياالله بالفرح بدينا...
وهما يردوا وراها....
صفيه؛
ويامولاي علينا كمل ماهي بإيد اللي يتجمل.
وهما يردوا وراها...
نسرين:
مبروك العرسه ياريمه..
وسعة بال ويد وسقيما...
ونشط الجو ..وكل وحده تحط شتاوة احلى من التانيه...
لين شاشوا الحاضرات واولهم مطيرة اللي ناضت ترقص..
وردة؛
ياسعد اللي عند عمه...ترقص لين العرس تمه...
زغردت سدرة...
والباقي يردوا ورا امها..
صفيه..
ان شاء الله نطلع زي عمتها...ماوالي يسمع سيتها..
وردوا وراها والبنات يزغردوا..
ومطيرة شايشه...
شويه وجت لوردة بتنوضها..
وردة؛لالا...مانعرفهش.
مطيره؛نوضي فكيني من الطروح..
سدرة؛نوضي يام..
فايزة:
اجعنك ماتغيبي يالأم...
الحوش علينا مايظلم...
وقعدوا يردوا وراها..
مغليه؛هيا نوضي ياوردة..
ناضت وردة وهي مستسلمه وقعدت ترقص فيها حماتها وهي ترقص معاها..
سدرة..
امي يامغلاك عليا..
جعنك كيف الشمس قويه..
وقعدوا يزغردوا ويردوا وراها...
ووردة ترقص وهي متحشمه...
سدرة..
اللي ربتني لين وعيت
جعنها نوارة هالبيت..
وفردوس ترد ورا اختها وهي تشوف لأمها بإبتسامه حب وعيونها تعبوا دموع....
وكانت هالسهريه من احلى السهريات اللي تمر ع شارع القهوة اللي وقت ماصارش فيه عراس..
بعد تمت السهريه...
روحوا الجيران...وقعدوا الاقارب والمستاذنات بايتات معاهم في الحوش
🌻ثاني يوم الخميس..
الصبح...
فاقوا اهل الحوش وبدوا يعولوا ع الفطور..
والمستاذنات يبدوا بالزغاريد...
شويه وحطولهم فطورهم هما وباقي العيله..
وحتى الجيران المقربين جو الصبح بش يفطروا معاهم..
...وبعد الفطور...
مطيرة؛وردة...
ابتسمت وردة وناضت وفي يدها محرمه...
طرحتها في نص وسط الحوش...وحطت فلوس..
وبدوا الاقارب والجارات بالوحده تنوض وتحط ماكتب الله في هديكا المحرمه...
وبعد ماتموا حطان الفلوس..
ناضت وحده من المستاذنات ولمت المحرمه وناضت..
وخدت فراشيتها ولبستها ..
مطيرة؛هي تعالي..
ومشت طلعتها برا لسيارة يوسف اللي كان يراجي برا...
مطيره؛وسيفه شن جو..
يوسف بإبتسامه؛مليح شن جوك انتي عمتي..
مطيرة:الحمد لله..
ركبت المراة من الخلف وقالت:السلام عليكم..
رد يوسف؛وعليكم السلام..
مطيره:هيا انطلق..
ضحك وشغل السيارة وتحرك...
وقعدوا يدور بالمستاذنه ع حياش الشارع والشارع اللي وراهم..
وهي تنزل قدام كل حوش..
اللي تخشله يعرفها مستاذنه جاية تعزم على عرس...يبدوا النساوين يزغردوا..
ويضيفوها...وين تجي مروحه يقعدوا يزغردوا ويبخوا فيها بالصنه...ويحطولها فلوس في هديكا المحرمه..
وطبعا يوسف تشحور تشحويرة ماصارتش ع ماكملوا المعازيم...
وبعدين روح بالمستاذنه لحوش لطفي...
وتجي للي معاها من مستاذنات ويتقاسموا الفلوس اللي فالمحرمه...
وطبعا بيقعدوا المستاذنات في حوش اهل العرس الاسبوع كله وهما اللي يعولوا مع صحاب العرس...
🌱🌱🌱🌱🌱
ويبدا اسبوع العرس...
وفي اول ايامه يبدوا ينصبوا الخيم...
قدام حوش لطفي خيمة النساوين..
وقدام حوش عبدالمطلب خيمة الرجاله...
🌻في جنان الحوش..
كانت سدرة تكنس فيه وضم ....
قطع عليها شغلها باب الحوش اللي دق...
مشتله ووقفت وراه وقالت:منو..
"افتحي"
ابتسمت وقلبها يدق بقوة..بعدين فتحت الباب وقعدت واقفه وراه لأنها مش لابسه حجاب..
المهدي ؛شن ماتبيش تشبحي وجهي!؟
سدرة؛مش لابسه حاجه ع راسي .
المهدي:باهي شن حالك..
سدرة؛من ربي في خيار خيري والحمد لله..
المهدي رفع حاجبه؛ومن العبد..
سدرة؛هو عارف روحه شن داير..
المهدي:ماهو منك ومن عنادك ماتبيش تسمعي الكلمه ودايرة روحك شخصيه ومايتحكم فيا حد.
سدرة؛ايه مايحكم فيا حد كان لطفي الواعر بس..
المهدي هز راسه؛تي غير يتم عرس اختك بس..
شدت ضحكتها وقالت؛ماقلتش شن تبي..
المهدي؛مش جاي بش نشوف وجهك مش مستاحشه تريحي..خشي ناديلي بوك..
سدرة وهي شاده ضحكتها بقوة:باهي.
وردت الباب ومشت وهي تضحك بدون صوت..
لين وصلت في روشن المربوعه..
لقت بوها مقعمز يحسب..
سدرة؛بوي..
رفع راسه وشاف للروشن؛نعم..
سدرة:المهدي يبيك..
ناض وهو يقول؛المهدي ..
طلع من المربوعه ومشي للباب..وهي مشت خشت للمربوعه ووقفت في الروشن وردت البرسيانه وهي تشوف من فتحاته..
بوها فتح الباب بان عليها المهدي..
لابس سوريه زرقا نص كم وسروال جينز ازرق غامق..
ومغطي عيونه بنظارات سود..
ابتسمت وقعدت تغني بهمس..
صلح صلوحي..نبيه بروحي..فوق العمارة..لابس نظارة...
🌻قدام الباب..
لطفي؛تي شن تقول يامهدي ياولدي!
المهدي:والله مانك رادهم عليا بالله مني الخيم والبوطي قريب يجي في الطريق..
لطفي:الله يسامحك ياولدي والله مايجي مايجيش..
المهدي:لايجي ونص ياعمي لطفي اني حاسب روحي ولدك..
لطفي ابتسم وقال؛ماعندي مانقول غير ربي يحفظك ويعوضك..
المهدي:مش خسارة فيكم جيراني واهلي ووالله مافي حاجه من قيمتكم..
لطفي بإبتسامه؛كبر مقدارك..
~~~~~~~
نسرين؛ريتي خوي ريتي والله مافي زيه زويز..
سدرة ؛وحتى اني كان في عارفه ان فيه زيه زويز ماحبيتاش..
عائشه بضحكه؛باهي هيا سقدي انتي وياها خل نطلعوا الفراشات للخيمه..
فايزة؛قولي سديرة خيرهم بنات خالاتك مايتحركوش بكل..
سدرة تهكما؛محنيات..
نسرين؛مبردههم..
ومشوا الاربعه مع بعض وقعدوا يطلعوا في المنادير للخيمه..
وفرشوها كلهم برواحهم....
بعدين خشوا يعولوا مع النساوين الكبار ع الغدي..
برا في شارع القهوة..
اللي غيرت ريحته بصلة الكسكسي باللحم الوطني...
كان صاحب البوطي جاي بالبوطي لحوش العرس....
اللي تلاقوا عليه الشباب والصغار الصغيرين...
طبعا مشي كل النهار في العواله والجري..
تغداية تريس ونساوين...
والشاهي والحلوات...
سفرة خاشه وسفرة طالعه..
وغسل ماعين.....
الى جانب دوشة الصغار ولعبهم...
بالذات ع البوطي اللي خدي الشيشمه متاعه يوسف وريح وارتاح...
برغم انه كان كله تعب بس يمشي بجوه ومافي حد يشكي ولايمل..
وطبعا مافي حد مرتاح قد فردوس اللي طول عمرها فالراحه..عروسه عاد...
🌻🌻🌻🌻🌻🌻
وعدا النهار وليل الليل..
والخيمتين تعبوا رجالة والنساوين..
كانت اول سهريه تكون عاده بين جيرات الشارع والاقارب..
لهدا اللبس فيها يكون بسيط وفي من نساوين يعولوا..
زي ام العروسه وسلفتها وحماتها وجارتها مغليه قاعدين بحوايج العواله...
وبدوا سهريتهم الناشطه...
مطيرة..
حني وادينا وادي حنه...ياسعد اللي يغرف منه...
وهما يردوا وراها..
صفيه..
حني وادينا بالتجريب...شعيره مافيه الشنشيب..
صاحت مطيره بصوت عالي..
وهما يردوا ورا صفيه..
سدرة
حني بذرتنا كعب الطيب..
ياسعد اللي نديروه نسيب..
زغردوا فايزة ونسرين وعائشه..
ومغليه تشوف لسدرة وهي مبتسمه بعدين غنت..
الله يبارك ياعليك بنات..
وين مايمشن مشكورات...
اغلب النساوين في الخيمة زغردوا لأنهم فاهمين قصد مغليه...
وسدرة ابتسمت بخجل والعيون عليها...
وامها تشوفلها بإبتسامه...
مطيرة...
حتى اللي جاورنا كاسب
يابال اللي جانا يناسب..
وهما يردوا وراها...
مشتده..
ياوريده سلمك ربايه..ماهي فالشارع صبايه..
قعدوا يزغردوا ويردوا وراها...
عتيقه..
هي زينه والزين لهلها...مبرك عمره اللي حصلها...
وقعدوا يرودوا وراها...
نجمه
سلم اميمتها الربايه...فيها عين تقول مرايه..
وقعدوا يردوا وراها..
وبناتها يدوب يردوا ويصفقوا وكان يلقوا ينوضوا..
وردة...
عيني سلم جيرانها...اللي علو من شانها...
قعدوا يزغردوا..ويردوا وراها..
شويه شبحوا مطيرة وصفيه وورده مغليه لبعض..
وكأنهم عطوا لبعض اشارة...
وكانت كل وحده فيهم مقعمزة في جهه...
قعدوا يقدموا لنص الخيمه في وقت واحد وهما مقعمزات ورجليهم ممدوات..ويصفقوا بايديهم..
ومغليه تغني..
ياسلم جيران الجلوة ذهب صافي وميه حلوة.
صفيه..
ياربي نجي جاراتي نلقاهم ساعة حاجاتي...
مطيرة..
الجيرة والعشرة القويه ..ديما حاجاتي مقضيه..
وردة..
جيراني جيران الساس بلاهم مانديروش عراس..
والموجودات يتفرجوا عليهم كيف يقدموا لبعضهم لين تلاقوا في النص..ورجليهم تلاقت مع بعض...
وغنوا مع بعض...
سلم جيران اللايده...
اللي جيرتهم فايده..
وزغردوا في الاخير مع بعض
ووقفوا فايزة ونسرين دربوكه...
وتم الشوط...
#افراح_شارع_القهوة
#طوبى
.....يتبع.....
