(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثالث_والثلاثين" شعور3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
طالع من مكتبه وماشي لمكتب موظف تاني وفي يده مخطط..
وهو ماشي..
فات من قدام مكتب نجاه..
وقف وقعد يشوفلها كيف لاهيه في الشغل ومنغمسه فيه..
قعد مركز عليها..
ع اصرارها في إثبات نفسها..كل شي فيها كان يشع طموح
كانت مراة تتسحق الاعجاب في نظره..
ووللحظه وين تفكر انها كانت مرت خوه..
استخسرها فيه هلبه..مراة زي هادي مش لطاهر..
وتمنى لو كان في عمره وقتها وعرفها قبل راهو مافوتهاش بكل..هادي المراة اللي يتمناها الجالي..
الجريئة..القويه..الطموحه..المتحديه..والجميله..
جمال مختلف مايشبهش جمال اي بنت او مراة عرفهم من قبل..
وهو سرحان فيها..
هي كانت تبي تريح رقبتها..
رفعتها فوق وقعدت تحرك فيها بعدين حولت عيونها عن المخطط وشبحت لجدار الزجاجي..
انصدمت وقعدت تشبحله..وهو يشوفلها..
بعدين خبط كتفه مرتين بالمخطط ومشي..
وهي قعدت جامده في مكانها..وقلبها ولاقال نهدا..
تفكرت الحركه اللي دارها..
شبحت كتفها لقت الجاكيت نازل شويه..
برغم انها كانت لابسه تحته ماليه صوف بس وهي نزلاته شويه لأنها سخنت..
بس حتى الحركه هادي فرحتها كلها تبان حركات غيرة واضحه..
لكن في داخلها قالت..
"ماهو طبيعي ماتنسيش انك ام صغار خوه يعني طبيعي اللي يدير فيه كله حيديروه حتى خوته..بعدين تعالي هني انتي مش طبيعيه رسمي هبلتي هدا الجالي يانجاة مايطيقكش بكل والله اعلم مرات ناويلك ع اهانه كبيرة..ردي بالك يانجاة تولي غبيه وتمشي ورا شعور مراهق غبي اعقلي"
تنهدت بعدين عقدت حواجبها ورجعت لهت بالتصميم..
☘☘☘☘☘
"مفهوم...كلو تمام..مافيش حاجه هكي ولاهكي"
وهما يجاوبوا ويضحكوا..تمام..مفهوم..
نضال:اللي بعدين يتفكر حاجه يجي لمكتبي في اخر القسم في الدغاريق الله غالب قاعد معيد..
ضحكوا..
وهو ابتسم وقعد يلم في حاجاته..
والطلبه قعدوا يطلعوا ماعدا اريج كانت تتمرخى..
وهو كان حاس بيها لهدا قعد يتمرخي حتى هو..
:مش نايضه..
اريج:بري تو نلحقك..
ضحكت صاحبتها وقالت:تمام..
ومشت طلعت والقاعه فضت..
ناضت اريج ومشتله طول وقفت قدام وقعدت تقوله وهي تأشر بسبابته عليه:اخر مرة ديرني مضحكه مش كان داروك استاذ مانقدرش نرد عليك لانقدر ونقدر..
شبحلها وقال بإبتسامه مستفزة؛زي شني مثلا..
قعدت تأشر بإبهامها للخلف وهي مضيقه عيونها ونقول:نهدرز عليك وع الماضي متاعك وع عمايلك وع كل شي كل شي وتشوف ع من يضحكوا اكثر..
نضال:والله كان تبي تقعدي تنزلي في هالماده طول عمرك ديريها..
اريج:بنسقطها..
نضال؛اسقطيها سنتين القدام واسقطي معاها مواد بعدين لأنهم فرقوني ع سنين الاقتصاد كلها...طبعا زي مامتعرفيش لإنك ماتعرفي شي اصلا..اني الاول ع الكليه كلها وليا عام نعطي واثبتي نفسي زادو عطوني مواد يعني..
قعد يغني وهو يرقص في حواجبه..
وراك والزمن طويل مش حسيبك مستحيل..
اريج من كثر مااستفزها وغاظها كانت تبي تعطيه كف بس للأسف ماتقدرش استاذها في النهايه امر واقع وانحطت فيه..
بس لازم تفش غلها لازم..
رفعت يدها وخبطت بيها الطاوله متاعه بقوة..
هو رمش عيونه من قوة الخبطه وقعد يضحك..
وهي مش طلعت وقعدت تتحسس في يدها..
اريج: ووه يدي مشت ارزيني فيه..
وهو طلع وراها وكان داير روحه شخصية وهيبه لازم منه الجو هدا بش يفرض احترامه..
☘☘☘☘☘
وأريج بعد طلعت من المحاضرة مشت طول لكلية خالتها تبي تشكيلها..
🌻في كلية التربيه...
طوبى وهي تضحك بدهشه:نضال استاذ ياربي مش قادرة نتخيل..!
اريج؛شوفي بالله شوفي هالمنظر المقلب استاذ اصلا بعد 2011 توقعي كل شي..
طوبى بضحكه؛سبحان الله يجي في طريقك وين ماتمشي..
اريج؛ماهو من حظي الجميل..يارب صبرني ونزل عليا العقل لين نتخرج ياربي..ماهو بيقري حتى في السنوات الجايه..
طوبى بضحكه:شوفي انتي طالعتيلي في البخت وهو طالعلك في البخت..
اريج ضيقت عيونها وقالت:لشن تلمحي بيبو هاتي من الآخر!
طوبى رفعت كتافها ونزلتهم وقالت:شي..
اريج قلبت عيونها وشبحت القدام وقالت:دمي محروق ونفسيتي زيرو اعزميني ع حاجه حاجتين تلاته..
طوبى بضحكه:ياريته غير طالع عليك ياعمي اني كسرة خبزة تبان فيا..
اريج:قل اعوذ برب الفلق..
طوبى:مش معيانه اني ياجحيشه..
ع جية بنت وقفت عليهم وقالت:السلام عليكم..
وجه طوبى تغير وولت ملامحها جديه وردا هي واريج:وعليكم السلام.
:شنجوك طوبى اليوم..
طوبى:الحمد لله...
؛هاه شن صار معاك طوبى..
طوبى:قتلت قبل حبيبتي علاقات مانديرش ولاعندي ع التعارف وقوليله ياريت معاش يلحقني مرة تانيه لأنه بيجيب لروحه مشاكل..
:تمام تو نقولك اللي قلتيه..بس انتي الخاسرة راهو..
طوبى:خاسرة خاسرة الله غالب..
البنت مشت طول..
واريج سألت طوبى:هادي خيرها!؟
طوبى:باعتها واحد تكلمني ع اساس يبيني نكلمه...
اريج؛قنين ولاشين..
ضحكت طوبى وقالت؛تعالي نفطرك ياهايشه تعالي.. وخدتها ومشوا مع بعض للكافتيريا..
☘☘☘☘☘☘
الساعه 1:00ظهرا..
خشوا صفاء ومروة للشارع مروحات من المدرسه..
ووراهم محمد وواحد من ولاد الشارع..
صفاء عيونها كانوا ع حوش الدكتور ليها فترة ماشافتاش..
تنهدت وشبحت القدام وهي مضايقه..
محمد:صفاء كانك ملخصه حاجه في النحو عطيني نصوره ونردهولك..
التفتت وقالت:راجي شويه..
مشت وقفت في تركينه ونزلت شنطتها وفتحتها وقعدت دور..
ومحمد واقف بعيد شويه هو وصاحبه ومرة مرة يشوف لمروة كيف واقفه تشبح لأختها..
غيرت عيونها وشبحتله..
ابتسم ابتسامه خفيفه..وهي ردتها بكل براءة مافي فعقلها اي شي..
شويه سمعوا باب حوش الواعر انفتح وطلع منه اياد ووراه سدرة..
صفاء قعدت تشبحلهم وخلاص..
اياد بإبتسامه:ياسدرة ربي يهديك وضع طبيعي راجل عنده الضغط بتصيرله الحاجات هادي..انتي غير ديري اللي قتلك عليه بس..
سدرة بضيق:ان شاء الله..
اياد:سدرة فكري حتى في صحتك انتي مش باهي ليك الاعصاب والتوتر والقلق الزايد..
تنهدت وقالت؛نحاول والله نحاول..
اياد؛لا مش نحاول..معاش تتوتري وتفكري هلبه..
سدرة هزت راسها وقالت؛ان شاء الله..سامحنا دكتور..
اياد؛شن سامحنا هادي نقعدوا نعاودوا في نفس الدوة ديما حني!..
ابتسمت وقال:بارك الله فيك..بالسلامه..
اياد؛سلام..
سكرت سدرة الباب..
هو لف بيمشي لحوشه..
شافهم ابتسم وقال؛اهلا اهلا..
محمد؛كيف حالك دكتور..
اياد:الحمد لله..شن اموركم انتم وشن جو القرايه..
محمد؛تمام ماشيه..
جت صفاء لمحمد مدتله الملخص وهي معصبه..
خداه..
ومشت خدت شنطتها وفاتت من جنب اياد من غير ماتسلم عليه..
هو استغرب فيها تبعها بعيونه وهو يشوف فيها ويشوف لأختها اللي لحقتها كيف خشوا للحوش..
رجع اياد شاف لمحمد وقال؛خيرهم؟
محمد؛مش عارف..دكتور بنسألك خيره جدي لطفي!؟
اياد؛تعب عادي من الضغط مافي شي خطير..
محمد:إن شاء الله لاباس..هي نستأذن دكتور..
وقالوا هو والولد اللي معاه..السلام عليكم..
اياد ابتسم وقال؛وعليكم السلام..
ومشي لحوشه تلاقى هو ويوسا..
يوسا:دكتور راسي صداع تفجر..
اياد بإبتسامه؛تو نشوفلك بنادول تعالى..
مشوا الزوز..
ع خشة سيارة نجاة للشارع..فاتت من جنبهم ومشت لحوش شنيبه..
درست السيارة فم الباب ونزلت وخشت للحوش..
~~~~~~~
مغليه؛عابيين بيك بتقعدي للسبت..
نجاة؛صابرين تبينا نجوا نباتوا عندها اني ومروة ماقدرتش نردها..
مغليه:مانقدرش نضغط عليك براحتك..
نجاة:بارك الله فيكم هي بالسلامه..
مغليه؛بالسلامه..
ومشت نجاة بصغارها وحاجاتهم ومغليه سقدتهم لفم الباب..
ركبت سيارتها هي وصغارها..
وتحركت طول لحوش صابرين ..بسرعه وكأنها هاربه..
لامش كأنها هي هاربه فعلا..
☘☘☘☘☘
"بش مهندس البش مهندسه طلعت من مكتبها بعد نهاية الدوام"
الجالي قعد يحرك عيونه قدامه وهو يفكر بعدين هز راسه ورجع يشوف في شغله..
وحس روحه يبي يروح طول حتى هو..
كمل الشغل اللي عنده ومشي روح..
وطول الطريق وهو يسوق بسرعه كأنه في شي يجري وراه..
وصل للحوش..
وخشله..
واول حاجه دارها..قعد يدور ع حس صغار طاهر فيه..
مغليه:بكري اليوم؟
الجالي وهو يحاول يدير روحه عادي:تمينا خدمه بكري.
عقد حواجبه وقال..الحوش هادي.
مغليه:ايه نجاه بكري جت وروحت بصغارها..
الجالي شبح لأمه شويه بعدين قال:أحسن..
ومشي ركب الدروج..
مغليه:ماني عارفه شن دارتله بش كارهها هكي..!
☘☘☘☘☘☘
"عابيه عليك تروحي من عندهم الاحد"
نجاة بضيق:احد شني ياصابرين بس..
صابرين؛علاش شفتي منهم حاجه خلاتك تروحي!؟
نجاه:لالا نهائي..
صابرين؛باهي خيرك ياغبيه روحتي انتي مفروض تقعدي مقيمه غادي..
نجاة بإنزعاج:تؤ..
صابرين؛لالا ماتقنعنيش في حد قايلك حاجه..الجالي..
قلبها انتفض وين ذكرت اسمها بعدين قالت بشي من الانفعال:لا ياصابرين لا قتلك لا والله لا..
صابرين وهي متفاجئه:باهي هدي هدي خيرك..اني نبي نعرف بس..خليتك مقتنعه بفكرة ردة المهدي ليك وناويه عليها..
نجاة حركت راسها بالرفض وقالت؛مانبيش..
صابرين:شن هو اللي ماتبيشي..
نجاة؛مانبيش توا لاالمهدي ولاغيره اني مراة راجلها ميت ليه شهر ونص بس محلي ننساه.
صابرين؛واني قتلك بري حبي المهدي!؟ اني نبيك تفكري في روحك وفي صغارك قبل ليفوت الفوت وتلقي خوتك مدرسين في شقتك ودوري شن يطلعهم..
نجاة:والله مايقدروا يجوا جنبها تحسابيني شويه ياصابرين اختك وتعرفيني نخلي كتيبه تخفيهم في ليله من غير ضي قمر..اني نبي نحمي روحي بروحي ونعيش لصغاري وتمت..
صابرين:لااا انتي الحبسه اللي حبسهالك طاهر خلاتك ساذجه ومعاش تعرفي تتصرفي..
نجاه دموعها بدوا ينزلوا وهي نقول:تبيني نروح صابرين تو نروح
صابرين شدتها وقالت:انتي شن صايرلك يامراه فهاليومين حالك متشقلب قلبه وحده..
قعدت نجاه تبكي بصمت.
وصابرين شاده ايديها وتشوفلها بقلق..
بعدين شبحت لصابرين وقالت بنبرة باكيه؛في حب هكي وين يجيك..تحسي روحك ماحبتيش قبل بكل؟
صابرين:الحق اني ماجربتش الحب بش نقولك مريت بحالات زي اعجاب زي حالة اعجابي بالمهدي فترة وعدت ع حالها..
نجاه:باهي شن كنتي تحسي وقتها..تحسي بقلبك بيوقف لما يشوفه.. جسمك يرعش...تحسي لو كان قدامك معاش تبيه يبعد عن عيونك..يعني وين تجي تغمضي عيونك تفكري فيه هو..
صابرين:حيلك حيلك..شن هدا كله..لا طبعا مش لهالدرجه ايه صح كنت نحس بمشاعر لما نشوفه لكن مايصيرش فيا هدا كله..
اللي تحكي عليه انتي هدا حستيه مع طاهر المفروض.
حركت راسها بالنفي وهي تبكي بدون صوت.
صابرين؛هدا حب نجاه كيف ماحستيشي مع طاهر بكل!؟
نجاه غيرت عيونها عنها وقعدت تشبح للروشن..
وصابرين تشوفلها وتفكر بعدين قالت..
"الجالي"
نطت وشبحتلها..
صابرين بصدمه:في يومين صار فيك هدا كله!؟
نجاة ببكي:يومين بس بس ياصابرين مش عارفه شن بيصير فيا القدام..
صابرين:الجالي اللي كنتي تدعي عليه بالموت!
نجاة ببكي:ليا وقت ياصابرين معاش احتكيت بيه..وين عرفته عن قرب صدمني..شدني ليه بقوة مش عارفه كيف!
صابرين:علاش تبكي هكي!؟
نجاةببكي:خايفه..
صابرين؛من شني..
نجاة؛خايفه من مشاعري هادي خايفه نتعلق بيه ياصابرين..تو مع طاهر ماخفتش لأنه كان يحبني اكثر ما اني نحبه..بس هدا...مش عارفه...نحسه مستحيل يشبحلي ولايعبرني ممكن يقربني منه بش يذلني بس او يديرلي حاجه تخلي اهله ياخدوا مني الصغار ويطلعوني منهم..مستحيل واحد زيه يفكر فيا..فوق هكي فرق السن وهو ماشاء الله عليه اكيد وين يتزوج ياخدها صغيره..وقعدت تبكي
صابرين وهي مصدومه في اختها؛مش نجاة بكل انتي مش نجاة..مصدومه فيك هلبه شن خلاك هكي ضعيفه وضايعه..لاالا عندك حق راجلك كيف ميت طبيعي مشاعرك بتتلخبط من الفقد طبيعي..
نجاه وهي تبكي:تقولي هكي..
صابرين؛ايه..مافيش غير هكي..نوضي نوضي خود دوش سخون وبعدين ارقدي تو تنوضي وحده تانيه..
نجاه:ومروة؟
صابرين:بايتين عندي الليله ومراد مهناش تو نسهروا للصبح غير نوضي ديري اللي قتلك عليه..
مسحت نجاة دموعها بعدين شبحت لأختها ضمتها..
وصابرين ضمتها بقوة وقعدت تمسح ع ظهرها..
شويه وتباعدوا عن بعض..
ناضت نجاه ومشت وصابرين معاها بعيونها وهي تشوفلها بقلق...
☘☘☘☘☘
الساعه 5:00عصرا..
مدايرة مغليه العاله..
وملتمين حواليها شيبانيها بناتها وولادها وكنتها عائشه..
مغليه:مانقدرش نشد فيها هي ماتبيش تقعد..
محمد:شدي فيها مرة تانيه المراة متحشمه حاسه روحها خلاص طلعت من العيله ومعاش ليها حسسيها بالعكس راهو يتيمه ماعندها حد وخوتها اوسخ خلق الله يلقوها بروحها يستفردوا بيها
الجالي يسمع فيه ويحس بصدره يضيق هلبه..
المهدي:غير يفكر واحد فيهم يجي جيهتها..هادي ام صغارنا ليها علينا حق الحمايه..
محمد:هو هدا اللي نقصده..
مغليه؛حاضر تو الاسبوع الجاي ان شاء الله نقوللها تجي ونحلف عليها تبات..
محمد؛هادي مغليه اللي نعرفها..
شبحوله نضال ومحمد المهدي وعمر بربع عين..
خديجه:باهي غيروا الموضوع وقولي يام عزمتي جارتنا الجديده..
محمد شنبيه ركز معاها..
ونضال ومحمد وعمر ركزوا معاه هو..
مغليه:وعلاش تجي بعزومه اني مشتيلها من غير عزومه وقلت تفضلي وهي رفعت سفرة بكلاوة ومشت بيها لحوش الواعر اللي ماجوهاش..
نسرين:سدرة قالتلي لامت عليهم ع خاطر ماجوهاش..
خديجه؛المهم يام عمتي عزمتها وجت ليلتها تعشت عندنا مراة تهبل تهبل ودمها خفيف..
نضال بهمس:زيدي ياخديجه زيدي خربي ع امك..
عمر بهمس؛تخصصها هدا تحساب روحها تعمر وهي دمر..
وولد خوهم يسمع فيهم وهو مركز مع جده..
نسرين؛حتى سدرة قالت خشت خاطري..
والمهدي يشبح لنسرين يراجيها امتي تتكلم بش تقول سدرة قالت وسدرة فعلت..
مغليه:اني ماحبيتش منها الحركه اللي دارتها الحق..
محمد شنيبه؛المراة اكيد متحشمه يامغليه اعزميها وخلاص عاد انتي صاحبة الواجب وكبيرة الشارع..
مغليه تنهدت وقالت؛خلاص تو نعزمها السبوع الجاي..
محمد شنيبه:هدا الصح..
نضال بصوت منخفض:اعمل ايه وياك حماده ماتبي تسيبها هالعاده..
عمر ومحمد المهدي بيضحكوا خلاص..
عمر شاد نص وجهه بيده ومحمد قالب وجهه للجهة التانيه..
والمهدي والجالي ركزوا عليهم..
شبك نضال صوابع ايديه في بعض وحطهم ع رجليه وقال بصوت عالي:كبيرة الشارع..
كلهم شبحوله.
محمد؛خير بلاك تحساب روحك قاعد في صحرا..
نضال:سامحنا ياحاج غير قاعد نوقظ في امي بش تفيق..اا قصدي بش تسمعني..
عمر وهو خلاص مش قادر يشد ضحكته:ياعن شكلك بكل..
ومحمد ولد المهدي ناض وطلع من حداهم..
والجالي والمهدي مازال مركزين..
اما النساوين هدا وين ركزوا وحسوا ان في حاجه..
مغليه:خيرك شن تبي..
كيف جي بيدوي نضال..
خشوا السدرات الزوز بنات المهدي ونسرين وايديهم معبيات شكولاته..
نسرين:هدا شنو..
بنتها قالت:من مراة هني تشبه المروات اللي في المسلسلات ماما..
سدرة المهدي:قاعده تفرق ع الصغار في الشكلاطه وبعتت معانا هادم..
خديجه؛نبيله سدرة المهدي..
سدرة:ايه صح..
محمد شنيبه؛ترا هاتي طرف جدو لاتقولوا سكر لاشي طرف ماداير شي..
نضال بصوت عالي:كبيرة الشارع..
هني عمر انفجر بالضحك ومشي طلع من الصاله..
والجالي ناض طلع وراه يبي يفهم شن في..
محمد؛خيرك انت في شن خاطرك..
المهدي:خاطره في ايام زمان شكله..
ناض نضال وقال؛ماخاطري في شي هاني طالع لقهوتي نشوف الزباين..و ياغافلين ليكم الله..
ومشي طلع من حداهم..
مغليه؛ديما نقول فيها الولد هدا لما جبته الاكسجين كان ناقص ع دماغه..
ضحكوا بناتها...
محمد شنيبه كلي طرف الشكولاته وقال:ربي يهديه وخلاص..
☘برا..
الجالي:هدا اللي مازال!؟
عمر:تعرف بوك عينه زايغه لكن مايدير شي بالذات بعد هالعمر..
نضال؛ياودي ماتستبعد حاجه ع حد..ومشي بيطلع
الجالي:ريح روحك انت وياه وتحشموا حركاتكم تافهه قدامه..
عمر:من هالمتخلف هدا..وأشر عليه..
حرك الجالي راسه يمين ويسار وولى داخل..
محمد المهدي بضحكه:لكن جديات منظر جدي كارثه وحناي خسارتها معاش زي زمان مايفوتها شي..
عمر ضحك وقال:تعال نطلعوا للقهوة تعال..
ومشوا الزوز طلعوا من الحوش..
☘☘☘☘☘
وفي حوش الواعر..
آلاء؛رعشتنا عليك جديده حبيبي..
لطفي بإبتسامه؛لاالحمد لله حالي باهي توا..
فردوس؛الله يربحك وبي رد بالك ع روحك معاش تهمل صحتك..
لطفي:حتى انتي وجهك مش عاجبني..
اريج؛عاركها ياجدو عاركها ماتاكلش بكل.
لطفي:عاطيك قلة السماح كان تهملي روحك يابنتي..
فردوس بإبتسامه باهته؛حاضر يابوي اللي تبيه نديره..
☘في الكوجينه..
جهزت طوبى طاسه الكركديه ومشت طلعت بيها من الكوجينه لبوها..
واميمه في الكوجينه واقفه ع غرفه..
اميمه؛نفتح معاها الموضوع ولالا..
غرفه؛جسي النبض بس..بش ماترفضش طول ونتجبري تقولي لخوك بعدين والله اعلم شن يدير..
اميمه رفعت حاجبها وقالت:يعني انتي ماتحاوليش تبعدي طوبى عن طريقك..
ضحكت وقالت؛كان بندير هكي علاش جايه تكلمي فيا!؟
اميمه قعدت تشبحلها وهي ساكته..
غرفه؛اطمني حسين معاش فيه تميزه زي زمان بش تخليني نفكر فيه..
وقلبت عيونها ومشت طلعت من الكوجينه..
اميمه:ع اساس انتي فيك حاجه مميزة! استغفر الله وخلاص..ياربي استرها معاي وماينكسرش قلب خوي يارب..
☘☘☘☘☘
وفي الحوش اللي في جنب حوش جدهم..
دقت الباب ع بنتها بعدين فتحاته..
لقتها تقرا..
فايزة:صفو هيا كان بتمشي معانا لحوش جدو لطفي..
صفاء بدون ماتشوفلها:مانبيش ماما..
فايزة:علاش بنتي راهو كلنا ماشيين وبنسهروا غادي..
صفاء:نبي نقرا ماما معليشي..
فايزة شبحتلها شويه بعدين قالت:صايرة معاك حاجه؟
صفاء؛لا ماما مافي شي ماتشغليش بالك القرايه موترتني شويه..
فايزة:خلاص مالا بنقعد مش ماشيه..
صفاء شبحتلها وقالت:لاياماما بري غير جوك هدا يوم عطلتك مش حنرتاح كان قعدتي ماما..
تنهدت فايزة وقالت:اللي يريحك..تبي اي حاجه اتصلي طول..
صفاء هزت راسها وهي ساكته..
طلعت فايزة وسكرت الباب..
بعدين مشت لمروة وقالت؛خليك مع اختك بنرفع معاي تاله ومش معطله..
مروة:حاضر ماما..
مشت فايزة خدت تاله وطلعوا هما الزوز لحوش لطفي وعقلها قاعد عند بنتها وصلت في الباب بدقه..
انفتح وطلعوا قدامها طوبى وآلاء واريج لابسات وبيطلعوا..
فايزة؛وين؟
طوبى:بنشروا حنة شعر الليله كلنا بنحنوا شعرنا..
فايزة بضحكه:حمله شورها..
اريج ؛قادتها بيبو..
خشت فايزة مع تاله وقالت بضحكه؛بروا..
طوبى:وين صفاء ومروة..
فايزة؛صفاء تبي تقرا خليت مروة معاها..
طوبى:اها..تمام نتلاقوا بعدين..
وطلعت وطلعوا وراها بنات اختها وسكرت اريج الباب..
ومشوا التلاته بإتجاه العطريه..ونضال يشوفهم..
نضال:ماشي شويه وجاي..
ومشي طلع قعد يتبع فيهم..
وهما ماشيات يهدرزوا..
لين وصلوا في العطريه وخشولها..
قعد واقف يستنى لين طلعوا طول درق..
وهما الثلاته ماشيات..
واريج تقول:تخيلوا هداكا القرد معيد في الجامعه ااه ياليبيا ياما فيك من عجايب..
طوبى:ماتهزيش ع المنظر من برا..
آلاء:صح يعني وارد نضال يطلع اهم من هكي توقعي منك كل شي..
اريج:عبيطات رانا في ليبيا كل شي بالواسطه واللي زيه واخدها واسطه من غير كلام..
نضال وهو ماشي وراهم قال في نفسه..
"ياويلك مني ياشمطاء ياويلك"
آلاء:شن رايكم نمشوا للمحل ناخدوا منه شيبسات وجو لليل..
طوبى:الى الامام..
ومشوا الثلاثه للمحل..
وخشوا تلاقوا مع يوسا داخل يشري في حكاك طن للعشي..
شافاته طوبى وجعها القايله نفس الشي لما روحت من الجامعه لقاته واخد طن..
خدوا حاجاتهم بعدين طلعوا..
لقوا نضال في وجوههم.
عكرشت اريج وجهها..
وهو قال:ايوه يوسا شن جو صديق..
يوسا:جميل وصقع..
نضال؛ايه صقع..صقع عليك يايوسا صقع..
اريج؛بدي بالبرادة..
والاء وطوبى شادين ضحكتهم..
نضال؛يوسا.
يوسا:نعم..
نضال بصوت عالي:انت شمطاء كبير يايوسا شمطاء كبير..
يوسا:شمطاء!
اريج:والله ماني ساكتتها...
فنصوا فيها الزوز..
هي وقفت والتفتت وقالت:يوسا..
شبحلها نضال برفعة حاجب..
اريج:انت سعدان كبير يايوسا سعدان كبير..
ولفت وقالت:امشوا...
ومشوا وهما يضحكوا بكتمان..
يوسا:سعدان!
نضال بصوت مسموع لنفسه بس:تو نوريك شن شكله السعدان ياغوريلا.
ومشي وخلا ع راس يوسا ألف علامة استفهام..
يوسا:شمطاء..سعدان..!!؟ اسأل مهند وهو يجاوب بعدين..
ومشي لداره.
☘☘☘☘☘☘
الساعه 10:00ليلا..
كان مقعمز في داره يتفرج ع فيلم عن طريق اللاب توب.
كان يحكي عن قصة حب..لأول مرة ينزل هالنوع من الافلام..
لقي روحه تلقائيا يدور عليهم..
بعد ماكان يحب يتابع افلام الآكشن بس.. في واحد من المشاهد البطله كانت تبكي..
وكانوا عيونها يشبهوا لعيون شاغلينه هلبه من يومين فاتوا..
وقف الفيلم..
بعدين قام تليفونه..حط ع رقمها اللي خداه زيه زي اي رقم لموظف عنده..
قعد يشبحله هلبه..بعدين اتصل...
حط التليفون ع وذنه..
والخط ينادي ينادي ينادي لين فصل..
نزل التليفون ورده لمكانه وهو مضايق ع الآخر..
بعدين شبح للاب توب وفتح الفيلم وكمله وهو متوتر..
☘وهي في هداكا الوقت مخليه هاتفها في الشنطه ماتندريش عليه..
وطالعه برا في جنان حوش اختها دايرين شوا وبيتزا ع الحطب ويهدرزوا ويضحكوا والصغار حداهم يلعبوا..
☘☘☘☘☘
"غرفه روجه الو عمتو مرت عمو خلاص معاش تبوها"
كلهم بأصوات متقطعه:خلاص..ارفعيها..
طوبى:تمام..خل نرفعها لسدرة..
☘وفي دار المعيشه..
سدرة مقعمزة مع فايزة ويهدرزوا..
فايزة بقلق:البنت في سن صعبه واني بسبب الخدمه بعيده عليها مش عارفه شن صاير معاها..بس كل شي يقول انها تحب ياسدرة..
سدرة؛باهي شن رايك نمشيلها نهار نهدرز معاها ونفهم منها وبنقوللها الموضوع بيقعد بيني وبينك مش حيطلع مني..
فايزة؛عادي ياوخيتي انتي زي اميمتها المهم طمنيني مش لازم تحكيلي..
سدرة تنهدت وقالت؛باهي..اه صدق اللي قال هم البنات للممات شوفي بوي كيف مهموم علينا اني وفردوس بالذات فردوس واللي صار فيها..ويخمم في غرفه وطوبى.
طوبى ااه ياطوبى همي اني هادي همي الكبير مش حنرتاح في حياتي لين نزوجها لراجل مقوم يستاهلها ويحطها في عيونه غير هكي حنقعد مع كل نفس ناخده نخمم فيها..
🍃وطوبى سمعت هالكلام..
اللي وجع قلبها وعبى عيونها دموع ماقدرتش تشدهم..
خدت سفرة الحنه ومشت بيها للكوجينه طول..
قعدت تبكي غادي بصمت للحظات..بعدين مسحت دموعها ومشت طلعت من الكوجينه..
☘☘☘☘
"يمشي ودره وسيل حدرة"
نسرين بضيق:مرات نقول خلاص يانسرين وصلت لأخرها نلقى روحي بعدين عاديه وكأن ماصار شي..
خديجه:الله غالب كل واحد ليه نصيب في حاجه زينه ولاشينه لازم يرضى بيها..
نسرين؛شن جوه محي..
خديجه؛عادي زي قبل مش ملاحظاته الفترة الاخيره يطفطف عليا هلبه..نراجي في الطلب اللي يبيه مني ولتوا مقالاش..
نسرين بضحكه؛بالك ربي هداه..
خديجه؛مرات رغم اني نستبعد..
تنهدت نسرين وقعدوا ساكتات شويه بعدين..
نسرين بضحكه:صار هكي داروا عواصف واجتياج قدام المراة..
خديجه:ايه العار..يخشوا ويطلعوا قدامها ويخبطوا في البيبان ولاقالوا نسلموا عليها يعني كان متعاركات مع بعض المراة شن دخلها!
نسرين؛مسكينات الحظ بالهون ونفسياتهم زادت دمرت..
خديجه:والله مادمروا كان امهم مسكينه..
نسرين؛مافي حد مرتاح..
خديجه؛عليك نور مافي حد مرتاح..
☘☘☘☘
"هيا ماما جوري ارقدي جنب بنات خالتك.."
مروة:هني جويره هني..
ورقدت جوري جنب بنات مروه وهي معاهم..
بعدين جت صابرين واتكت حداهم..
ونجاه كان ليها فراش بروحها مع ولدها الرضيع..
وحمزة راقد مع ولاد خالته في الدار التانيه..
نجاة:نور حبيبتي قبل تقعمزي جيبي شنطتي ع الشماعه..
جابت البنت الشطنه وقالت:خودي خويله..
خدت منها وهي تقول:سلمها..
فتحتها وطلعت التليفون..
ضوت الشاشه وشافت مكالمه فائته ورساله..
فتحت المكالمه لقتها من رقم غريب..
فتحت الرساله..
(وينك ردي..الجالي)
هي قعدت ترجف مع بعضها وقلبها يرف..
ووجهها ولى احمر..
صابرين ركزت عليها.
قامت نجاة عيونها المعبيات دموع لقتها تشوفلها..
وصابرين تشبحلها وكأنها تحفز فيها بش تقوى..
هي طول حذفت الرساله والمكالمه ودار التليفون صامت ورداته للشنطه ورقدت..
🍀🍀🍀🍀
ويمروا يومين..
ونجاة عايشه احلى جو مع خواتها..
حتى طلعوا لوحده من الجرادين واستمتعوا بوقتهم..
بس برغم هكي نجاه كانت حاسه انها مخليه حاجه مهمه هلبه..
اما الجالي مشي حتى لشقتها بيشوفها هي والصغار..
مالقي حد..
زاد ضايق هلبه...
وضيق هدا خلاه يمشي لصديقه المقرب حكيم ويحكيله..
☘حكيم:اللي صار انها كانت بعيده وماتعرفهاش كويس ووقتها وضعها يختلف يعني كانت مرت خوك وهدا اكبر رادع عليه يمنعك تفكر فيها حتى مجرد التفكير...
بعدين الموقف اللي خديته من خوك في البدايه خلاك تشملها معاه..بعدها لما تحسنت علاقتك بخوك ولت عندك عاديه ومافيش بينكم لاخير لاشر..وتوا وضعها يخليك تتعاطف معاها وانت من التعاطف لقيت روحك في عالم تاني..
الجالي بضيق:كيف عالم تاني يعني؟
حكيم؛شكلك ياصاحبي طحت في الفخ اللي كنت خايف منه..
الجالي قعد ساكت وهو مضايق..
حكيم:بس يعني وسامحيني فيها حلك نسيت خوك؟
الجالي:هدا اللي واجعني..لكن هو مات خلاص مافيش حاجه اسمها خيانه لشخص ميت..سواء كان ميت ليه شهر ولاعشره سنين..
حكيم:باهي كيف بدير توا وانت عارف قوانين بوك وامك..
الجالي:مانبيش نفكر في شي بكل..من كثر ماعاجبني اللي عايشه انت شاهد عليا عمري ماعشته..دفنت روحي في القرايه والخدمه..ونست قلبي بكل..وتوا هو فكرني بيه..
اقسم بالله بديت نحس بيه من اللحظه اللي قالتلي فيها اسأل عن المهندسه نجاة المعلول..حسيت فيها شي يشبهني مش عارف كيف..
حكيم بإبتسامه:اني والله اللي عاجبني في الموضوع كله انك واخيراجيت تشكي من مشاعرك..
الجالي:متشمت حضرتك..
حكيم بضحكه:شويتين..
الجالي ضحك نص ضحكه بعديت خدي طاسة الشاهي وشربها في مرة...
☘☘☘☘☘
اليوم اللي بعده...
مشي للشركه وهو متشوق يشوفها..
في البركيدجو لقي سيارتها..
حس بفرحه كبيره ملاته..
مشي طول خش للشركه..
ورجليه رفعوه لمكتبها..
واقف ولا الجدار الشفاف..
لقاها مقعمزة ع التصميم وترسم...
هالمرة لبسها كان فاتح شويه..
لابسه ارزق ودايره وزينه لعيونها فقط...
انسحب بدون ماتحس بيه ومشي لمكتبه وهو حاش بنشاط غير عادي...
ماباش هداكا اليوم لايستدعيها ولايمشيلها ولايتلاقى هو وياها...
حب يشوفها شن بدير لو تجاهلها...
☘ومن جهة تانيه..
ومع شخص آخر اليوم بيبدا بالتنفيذ الفعلي للخطه متاعه...
مبروك...او عبد الرؤوف...
مشي مع نبيله لحوش الواعر..
قاللها اهو ندير نظرة شرعيه بالمرة..
وهدا كله وغرفه ماتندري على حاجه...
☘في الصاله..
كان فيها مطيرة وسدرة ونبيله بس يهدرزوا..
نبيله بإبتسامه؛عارفه اني فاجئتكم هلبه بس هدا اللي صار..
سدرة بإبتسامه؛شوفي بش نكون معاك صريحه وواضحه مانقدروا نوعدوكم بشي..
نبيله:مش مشكله قسمه ونصيب في النهايه..
مطيرة:هي هادي..خل نستأذنك نمشي نعطيها علم..
نبيله:تفضلي..
ومشت مطيرة لدار البنات..
خشت عليهم..لقت طوبى تقرا..
وغرفه:لاهيه بتليفونها..
خشت سكرت الباب..
مطيره؛نوضي يابايرة انتي تحركي البسي وساوي روحك..
غرفه بملل:مني هالمرة !؟
مطيره:نبيله جايه تخطبك لخوها..
طوبى قعمزت ع حيلها وشبحت لغرفه وهي مندهشه..
وغرفه سهمت في عمتها وبان منظرها ابله قدام عمتها..
مطيره:خيرك تنحتي هكي هيا سقدي روحك وراك مقابله شرعيه راهو..
زادت انصدمت..
وطوبى ابتسمت بدهشه..
مطيره بنفاد صبر:تي نوضي..
هي لوحت تليفونها ومشت تجري للدولاب بطلع احلى حاجه عندها..
ابتسمت مطيرة وطلعت من حداهم..
غرفه:طوبى اللي قالاته صح ماتتخيلش..
طوبى بضحكه:صح صح..ناضت وقالت..حولي خل نختار اني..
غرفه وهي متوتره ومازال مش مستوعبه:ياربي مش قتلكم قلت..معجب بيا بس انتم مش مصدقات..
وطوبى تسمع فيها وتضحك..
بعدين ركبتلها لبسة حلوة..
وحطتلها مكياج خفيف وحلو..
ومشت طلعت غرفه لنبيله وسلمت عليها..
اعجبت بمظهرها هلبه وارتاحت لأنها احسنت الاختيار لخوها..
نبيله؛ماتخافيش منه هدرزي معاه عادي اسأليه اي سؤال يخطر ع بالك..
هزت راسها وهي مبتسمه..
وسدرة تشوف فيها كيف تبان فرحانه بس هي كانت مش مرتاحه لكونه مليشاوي سابق..
~~~~~~~
عبد الرؤوف:مادور شي ياعمي مادور شوي..هو يمثل بإيديه..صفحة وسكرناها للأبد..
لطفي:وهدا احسن شي ديره ياولدي صدقني لنفسك قبل اي حد..
ابتسم مجامله وهز راسه بإيجاب..
دق باب المربوعه طول عبد الرؤوف شبحله..
اما لطفي ناض طلع...
لحظات..
وخشت غرفه..
كانت لابسه عبايه حلوة بالمرة عليها وشاح قنين والوجه نظيف الا من كريم تبييض..
هو لما شافها خاشه...ناض مكانه..
للحظه نسي كل شي..كل شي..
ومعاش تفكر غير حبه ليها لهالإنسانه رغم سوئها والشر اللي داراته فيه..
اما هي لما شافت نظرة عيونه وقتها..
حست انها مارة عليها شايفه زيهم بس وين مش عارفه..
غرفه؛السلام عليكم .
هو هني رجع لسابق عهده شبحلها بكبر وقال:وعليكم السلام..
قعمز وحط مرافقه ع ركابه وشبك صوابعه في بعض وهو يشوفلها بنظرة حقد واضحكه..
امها هي فكانت مشبكه صوابعها في بعض وتشبح لوطا بخجل..
هو قال بنبره غريبه وتشديد ع الحروف...
غرفه...
قامت عيونها وشبحتله..
ابتسم ع جنب وقال:اهلا وسهلا..يا..غرفه..
غرفه ضحكت بخجل وقالت:اهلا بيك..عبد الرؤوف..
قعد يشوفلها مطولا...
وهي ركزت في نظرات عيونه هلبه بعدين قالت..
"حاسه روحي نعرفك من قبل"
هو ابتسم بثقه وقال..
"مزبوط..ومن زمان هلبه..كان ناسيه تو نفكرك"
(مش مسامحه..والله مامسامحاتك انت يلي تقرا وتستخسر لايك)
#شعور3
#طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
