#طوبى "جنة طوبى"
#جمان_فريد
#الجزء_السادس_والسبعين "تحالف الأخير"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]🚫
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدهان
وصلوا على الحبيب🌼
#الصلاة_على_النبي
¤إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا (56)¤
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"لم أُؤذي أحداً، لكن في ظل المُحافظة عليهم تأذيت"🍃
__________________________________________
"قرروها عمليه وضعها مايتحملش"
مطيره بقلق وغضب:تو شن بندعي عليك ياصفيه في عقابات الليل..برا ياجالي جعنك جالي..
"إيه والله..شن دايرة طوبى؟"
مطيره بضيق:يارويحتي قعدت دور في كصبرة...
"حسبنا الله ونعم الوكيل"
🍃وطوبى مقعمزة برا في الجنان تشوف لتليفونها المحطوط قدامها ع الطاوله ودموعها ينزلوا...
كلام صفيه قاعد يرن في وذانها مش قادره تتخطاه..
وفي نفس الوقت واجعها حسين وخايفه عليه..
قعدت تتخيل لو قاعدين يعذبوا فيه او قاعد ينضرب وينهان بسببها...
اللي تخيلاته ماقدرتش تتحمله..
غمضت عيونها بشده وغمت وجهها بإيديها وهي ترشف..
بعدين حولت وحده فيه وقعدت تفرك في التانيه بجبهتها وهي تشوف للتليفون..
وفي لحظه..خدت التليفون وقعدت تكتب في رقم الجالي اللي كانت حافظاته...
وين جت بتتصل بيه..
جت بين عيونها هلبه مواقف..
تفكرت لما كان مش في وعيه مرة وطلع السلاح من دولابه..
بعدين تفكرت اللي جاها هددها بيه..
واخر شي اللي دار فيها في المصحه..
خافت..خافت هلبه...عجزت وماقدرتش..
نزلت التليفون للطاوله وهي تشوفله وتبكي بعجز وتقول..
/ياربي ساعدني..رفعت عيونها وبكل توسل قالت...
"يارب.."
🍃🍃🍃🍃🍃
شاده واحد من ذراعه رافعه لمكتب مدير المركز...
وصل فيه فتح الباب ودخله...
هو وين خش تفاجأ...
لما شاف الجالي مقعمز مقابل المكتب ع اليمين..
وع اليسار مقعمز..مختار..
مدير المركز اشر بيده وهو يقول؛اقرب..
قدم حسين كم خطوه وع وجهه ملامح الامتعاض مع المفاجأة..
المدير قال؛صاحب الشكوى جي في هالوقت يتنازل عن الشكوى متاعه لكن عنده شرط..
شاف المدير للجالي وقاله..
/قول شرط باش مهندس..
الجالي؛توقع ع تعهد انك ماتتعرضليش نهائي..
شاف حسين للجالي بحده..
والجالي يشوفله بنظرات مكر...
مختار؛حسين..ولد عمي..
غير حسين نظره لمختار..
وقف مختار وجاه وحط يده ع كتفه وقال..
/وقع ع تعهد ياحسين وبعد نطلعوا نتفاهموا..
حسين؛انت اللي كلمته؟
الجالي:كان ماجاش هو وادخل في الموضوع ماخليتكش تطلع من هني لين نشعفك..
مختار:جالي اهدا اهدا..وارجوك ماتزيدش تكبرها حني تفاهمنا ع شي خلينا مكملين فيه الله يرحم والديك..
الجالي هز راسه وقال..
/تمام..تمام...
مختار:وقع ياحسين..
مدير المركز خدي ورقه وزاحها القدام بعدين خدي بيرو وحطه عليها..
حسين قعد يشوف للورقه وهو يتفكر في المعامله السيئه اللي جاته من الجماعه اللي شاده المركز كان تعدي لفظي فقط لكن مهين للغايه..
وهو خاف يرد عليهم... خاف من ردهم عليه..ومن يخاف احيانا يسلم...
قدم خطوة وخدي البيرو..حول الغطا وطبس بيوقع..
مدير المركز قعد يشوفله بنظرات التكبر واهانه لأن عنده كره كبير لاصحاب توجه حسين..
اما الجالي ومختار تبادلوا بين بعضهم النظرات..
بعدين غير مختار نظره لحسين وهو يشوفله كيف يحط في البيرو بعد ماوقع..
وقف ع حيله وقال بتهكم..
/شن مازال تبوا تاني!؟
مدير المركز؛مش حني اللي نبوا ياافندي وعموما مش مشكله تو نعطيك نصيحه مش طلب..ابعد عن المشاكل وتصرفات المردف هادي ماتنساش انت ضابط في الجيش..
مختار رفع يده بس يسكته:خلاص لوسمحت لوسمحت..شاف لولد عمه وقال..
/هيا ياحسين..
وقبل ليمشي حسين رمق الضابط اللي قدامه بنظرات حاده..
بعدين شاف للجالي بنفس النظرات...ومشي مع ولد عمه..
طلع حسين الاول بعدين مختار اللي قبل ليسكر الباب شاف للضابط وقال..
/شكرا..
حط الضابط يده ع راسه وهو مبتسم..
طلع مختار وسكر الباب..
الجالي:بارك الله فيك ياافندي .
:بعيونا نخدموا المهدي شنيبه واي حد يخصه...
🍃برا..
حسين؛كيف عرفت..
مختار وهو يشوف القدام؛مدير المركز هدا تربطني بيه علاقة شغل هو اللي اتصل بيا وبلغني..
حسين قعد ساكت وهو يمشي..ومختار يسرقله في النظر..
طلعوا من المركز..
شد مختار ذراع حسين وقاله..
/ولد عمي خودها مني نصيحه..مادخلش روحك في المشاكل هادي ممكن تخسرك هلبه ع الفاضي تخيل لو في الاخير تصافوا وتراضوا وولوا لبعض زي قبل واحسن انت شن كسبت !؟ قولي؟.
قعد حسين ساكت وهو يمرر في نظرات الضيق ع الشارع..
مختار:بالك تحساب لان بيني وبينهم مشاكل مانوقفش مع اختي مستحيل! وحتى توا اني واقف معاها ونبيها تختار الاصلح ليها وللعيل.اللي جاي تختار اللي مايخليهاش تندم بعدين..واي حد يخش في موضوع زي هدا يخش بالخير ياحسين ويخمد نار الشيطان مش يعاونه ع الخراب!
قعد حسين محتفظ بصمته..
طبطب مختار ع ذراعه وقال..
/تمام...نروح بيك؟
حسين؛تو ناخد تاكسي ولاندبر لروحي..
مختار:براحتك..تصبح ع خير...
ومشي بإتجاه سيارته..
بس وقف في نص الطريق لما سمع حسين قال..
"بارك الله فيك"
ابتسم ع جنب بعدين التفتله وهز راسه..
ولف ورجع كمل طريقه للسيارة...
ع طلعة الجالي اللي مشي لسيارته طول..
ركبها وشغلها وهو يشوف لحسين بنظرات مكر مع ابتسامة نصر..
وحسين يشوفله بإمتعاض ودمه يغلي من الغيظ والغضب..
شاف الجالي القدام وتحرك بسيارته..
مختار وهو يشوف لحسين قال للسواق..
/تحرك..
وتحرك بالسيارة طول..
بعد مامشي..
قعد حسين يمشي ع رجليه لين تباعد عن المركز..
بعدين قعد اشر لللسيارات اللي تفوت لين وقفله واحد وصله للمنطقه اللي يسكن فيها...
🍃🍃🍃🍃🍃
"خيرهم عطلوا هكي!"
نبيله؛عمليه هادي رؤوف بتاخد وقتها..
قعمز عبد الرؤوف والقلق مسيطر عليه بعدين ناض مرة تانيه ومشي بعيد عنهم..وقعد يمشي ويجي من التوتر..
شافت نبيله لفردوس لقتها قاعده تقرا في القرآن من مصحف صغير جاباته معاها..
بعدين تنهدت وقالت..
/يارب..
شويه شافت دكتورة غرفه جايه وع وجهها ابتسامه مبشره..
وين شافها عبد الرؤوف جي يجري..
وفردوس سكرت المصحف وناضت..
ونبيله قدمتلها..
وين وصل عبد الرؤوف قال بلهفة خوف..
/بشري دكتورة بالله عليك!
ضحكت وقالت..
/جابتلك زوز عساسيل الله يبارك عليهم..
ابتسموا نبيله وفردوس..
وهو ابتسم شويه بعدين اختفت ابتسامته وقال..
/امهم شني حالها!؟
الدكتورة؛تعبت شويه بس ماتخافش عليها امورها كلها تمام..
عبد الرؤوف:نقدر نخشلها؟
الدكتورة؛خل يحولوها الجناح متاعها بعدين برا شوفها..
ابتسم بفرح وقال..
/الزردة متاعك كبيره يادكتورة..
ضحكوا نبيله وفردوس..
والدكتورة قالت بضحكه؛بارك الله فيك..مبارك عليكم ماجاكم ويتربوا في عز المولى ان شاء الله وتشوفوهم من حملة كتاب الله..
كلهم قالوا:آمين..
ومشت الدكتوره من حداهم..
نبيله بإبتسامة فرح:الحمد لله ع سلامة غرفه ومبارك ماجاكم..
قدملها وباس راسها بعدين قال..
/مبارك عليك حتى انتي..
فردوس بإبتسامه:
/مبارك عليك ياعبد الرؤوف..
رد عليها بإبتسامه وهو يقول..
/الله يبارك فيك..
فردوس وهي مبتسمه؛خل نكلم عمتي ونبشرهم...
🍃وفي الحوش..
بنزينة المولد وانطفي وقعدوا في الظلام الا من ضي شمعه ملتمات حواليها وهما يخمموا..
وطوبى شاده المسبحه وتستغفر بحركة الشفايف..
ويجي لمطيره اتصال..
كلهم شافولها بلهفه..
وهي بلهفه فتحت الخط وردت وهي تقول..
/هاه شن صار؟..بدت ع وجهها ابتسامة فرح وهي تقول..
الحمد لله..الحمد لله ياربي..
وع وجوه البنات بدت ابتسامة فرح..
مطيره؛وغرفه شن حالها؟......باهي الحمد لله الحمد لله رب العالمين..باهي سكري خل نقوللهم....بالسلامه..
وسكرت وهي تقول..
/جو تويمه يابنات وغريفه حالها باهي..
بأصوات متقطعه قالوا بفرح..
"الحمد لله..الحمد لله...ياعمري"
مطيره بإبتسامه؛عقبالك طويبه..
ابتسمت وهي تقول:ع خير يارب..
وقعدوا حداها يتوقعوا في اشكالهم ولمن يشبهوا وشن بيصير فيهم بيقعدوا في الحضانه فترة ولايقعدوا ويطلعوا معاها..
وهي مش قادره تنسجم معاهم..مشكلة حسين خلت فرحتها ناقصه..
🍃وفي حوش جدها..
في الجنان..
كانوا اميمه مقعمزين يهدرزوا..
اميمه بحزن؛هي هكي امي لما توصل الحكايه فينا حني معاش تعرف حد..
عبد المطلب:امك زمان كانت مراة عاقله هلبه وين تصير مشاكل بين نساوين الشارع يحضروها هي بش تصلح بيناتهم..
اميمه؛اللي مرت بيه طبيعي جدا يغيرها ويخليها هكي..
عبد المطلب؛فاهم تبي تقولي اني السبب باهي اني السبب لكن نبي تفكري في حاجه هي اللي صار فيها مني غيرها..لمن انتي شني؟
تعبوا عيونها باالدموع وهي تشوفله..
عبد المطلب:تعرفي في طيحتي هادي تخيلت نهايتي في دار الرعايه..انتي بالذات مااستنيت منك شي واللي صار العكس مرة وحده..
نزلت عيونها ودموعها قعدوا ينزلوا..
عبد المطلب:عارف روحي مانستاهلش ربي يعطيني بنت زيك لكن شورها امي..ماغضبتش عليا..
قالها بنبره مخنوقه ومسح دموعه قبل لينزلوا..
واميمه تشوفله بحزن بعدين قالت..
"بابا"
شافلها ولأول مرة بسمع هالكلمه ويحسها..
من سنين طويله اميمه بطلت تناديه "بابا"
وماكانش فارق معاه نهائي..بس هالمرة حس انه ملك الدنيا ومافيها لما سمعها..
اميمه كملت تقول والدموع في عيونها..
/تقعد بوي مهما صار عمري مانخليك..
غير عيونها عنها وهو شاد دموعه وماردش عليها.
وهي تشوفله بإبتسامة حزن..
غير الموضوع لما قال...
/من بيمشي يجيب بوي غدوة من المطار..
اميمه بضيق؛مرواحه ساهل اني نفكر فيه لما يعرف اللي صار في غيابه شن يدير..موتة عمي لطفي الله يرحمه هدت حيله..معاش عنده حيل يتحمل شي..
عبد المطلب:انتي تقولي هكي ..بوي ونعرفه حيل ديما شديد وواقف...
فجأه..
دق باب الحوش..
الزوز شافوله بإستغراب..
رجع دق مرة تانيه عبد المطلب قال..
/من!؟
"حسين"
اندهشت وناضت ومشت طول للباب بش نفتحه...
🍃🍃🍃🍃🍃🍃
"ياربي! والله قريب زغرطت واخيرا"
مطيره ناضت بسرعه وهي تقول:خل نمشي نولع الغساله..
طوبى؛راجي ربع ساعه نشوفوا وضعه..
مطيره من برا..
"باهي باهي"
اريج:ولعي المكيف الاء..
الاء:استانستي نوضي افتحيه بروحك.
ناضت اريج وهي تقول..
/مبردك..
وطوبى تمرر في نظرها بيناتهم وهي يدوب مبتسمه..
فجأة..
رن تليفون مطيره..
خداته وشافاته لقت اميمه تتصل..
الاء:مني!؟
فتحت طوبى الخط وقالت..
/ايوه اميمه
"طوبى"
طوبى:ايه..صار جديد!؟
"ايه الحمد لله حسين روح توا"
طوبى بفرحه؛بالله عليك! توا توا عندكم هو..
بنات اختها قعدوا يشوفولها بإستغراب..
"ايه توا خش علينا"
طوبى بتساؤل قلق:باهي كيف صار بالزبط؟
"نجيكم ونتلاقوا في الجنان"
طوبى:غرفه جابت..
"الله!مش مازال ؟!"
طوبى بضيق:انفعلت هلبه..
اميمه ردت عليها بنبرة ضيق وهي تقول..
"قيصريه؟"
طوبى:اكيد..
"باهي الحمد لله ع سلامتها"
طوبى:الله يسلمك..
"شويه وجايتكم"
طوبى:تمام..
وسكرت وهي تقول..
/حسين روح..
اريج بإستغراب؛ كيف مش مابوش يطلعوه!؟
آلاء:بالك هداكا تنازل؟!
طوبى:وعلاش يشكي من الاول كان بيتنازل!؟
ع خشة مطيره وهي تقول..
/ولعت عليهم..نوضوا يابنات سكروا الحوش كله وولعوا المكيفات..
طوبى؛اتصلت اميمه توا وقالت حسين روح..
مطيره بإندهاش:كيف صار!؟
طوبى بشي من القلق:توا اميمه تجي اميمه وتحكيلنا..
~~~~~~~~~
اميمه؛قال مختار خبره واحد يخدم في المركز وهو شوره كلم الجالي وخلاه يتنازل في نفس الليله..
مطيره:تنازل لله في الله!
اميمه بضيق:قال خلوه يوقع ع تعهد معاش يتعرض للجالي..
آلاء:خايفتكم تقولوا هو اللي مدبرها حتى هادي!؟
طوبى قعدت تشوف لآلاء..
واميمه قالت؛مالاش علاقه بالقصه واضحه..
مطيره:هو جاته لعنده بش يستعرض علينا لكن مش مشكله المهم حسين طلع..
قعدت ساكته آلاء وهي مضايقه..
واريج وهي تشوف لطوبى قالت..
/شني بيبو؟
طوبى وهي عاقده حواجبها بإستغراب..
/المهم حسين روح..
مطيره:وتوا عاد روحي لخوك سلم بنتي وشدوه وعقلوه وقولوله يخطا طوبى مش ضامنين المرة التانيه شن دير مرات تهد علينا بكلاشن..
اميمه بضيق:هي كانت موجوعه ع اللي صار في حسين وقبلها كانت متعاركه هي وياه لأنه يبي يفسخ..
طوبى:وامك حاطه في بالها انه من تحتي اني ولا!؟ بحزم كملت..بالله عليك اميمه ارجوك وصلي لخوك وين يشوفني يغير طريقه ومايخطيش عتبة الحوش هدا مرة تانيه مادام اني فيه..
ماحد قدر يعقب ع قرارها لأن الحوش حوشها والكلمه كلمتها هي فيه..
واميمه شافت ان هدا الأصلح ليها ولخوها ووافقتها عليه..
🍃🍃🍃🍃🍃
"بطريقه"
غرفه وهي مبتسمه بتعب؛معاش في بطريقه خلاص..
طبس باس راسها بعدين قال..
/ايه صح تو بتولي دبه..
غرفه بإنزعاج؛ماضحكنيش..
ضحك بعدين قال؛تعبانه هلبه؟
غرفه:شويه مش هلبه..البنج بهدلي رجعت لين قريب روحي طلعت والجرح زايدالهم..
عبد الرؤوف شد يدها وباسها بعدين قال..
/معليشي معليشي مش بلاش تحت رجليكم الجنه..
غرفه؛ايه حقه..شفتهم
بإبتسامه قال..
/الله يبارك عليكم جلاميد لبوهم..
غرفه بضحكه وجع:معاش ضحكني..
عبد الرؤوف؛شن يضحك فيك يادبه!؟
غرفه بإبتسامه؛تفكرت المبروك..
عبد الرؤوف وهو يشوف لعيونها:اللي تحبيه وبتهبلي عليه..
غرفه وهي تبادل فيه نظرات الحب؛واللي نموت فيه..
ابتسم ورجع باس راسها بعدين قال..
/خل نطلع بش يخشولك اختي واختك تاخدوا راحتكم..
غرفه:كان فيها كيف جيبهم نشوفهم..
هو قال بإبتسامه قال؛حاضر...
ومشي وطلع يدها بصعوبه لأنها كانت شاده فيها..
بعدين حطت يدها ع قلبها وغمضت عيونها وهي مبتسمه...
🍃🍃🍃🍃🍃
وتعدي ساعات هالليله الطويله ويجي اليوم اللي بعده..
الجو كان احسن من اليوم اللي قبله..
واجواء الفرح اللي خشت لحوش الواعر خلت هاليوم مميز بزياده بالنسبه ليهم...
لموا بعضهم في سيارة آلاء ورفعتهم للعياده اللي راقده فيها غرفه...
لما شافوا التوأم حسوا بفرحه ليهم وقت عليها..
بس لما خشوا لجناح غرفه تغير الوضع تماما..
طوبى وهي تمسح في دموعها..
/خلاص غرفه مش باهي ليك..
غرفه وهي تبكي وتتوجع..
/ماتخيلتش نجيب وسدرة مش معاي..وبوي مش حاضر..كنت مستنيه هاليوم ع خاطر بوي كنت نبيه يشوف صغاري..
قعدوا يبكوا..
ونبيله عيونها دمعوا..
طوبى وهي تحاول تشد روحها..
/قضاء الله وقدره ياغرفه والحمد لله ع كل حال..المهم توا انتي صحيحه وصغارك صحيحين هدا اللي كان يبيه بوي الله يرحمه وهدا اللي تتمناه سدره..صدقيني ياغرفه حاسه سدرة حتربي صغارنا معانا وغدوة تقولي طوبى قالت..
كلهم بأصوات متقطعه قالوا..
/يارب..
طبست طوبى ع اختها وقعدت تمسح في دموعها وهي تقول..
/خلاص ماترعشيش روحك راك نافس وبترضعي..
وغرفه تشوفلها وهي تتفكر في سدره..ابتسمت وهزت راسها بعدين قالت..
/حاضر...
ونيبله عيونها ع طوبى وهي تشوفلها بإبتسامة أسف..
🍃🍃🍃🍃🍃
"وكيف يطلعه هكي! مفروض شعفه هالكلب"
خديجه:خلاه يوقع تعهد يام..
مغليه بغضب:تعهد شني هدا! مفروض رباه ووراه حجمه المتخلف هدا..بعدين هو علاش حارق روحه هكي بش تطلق بنت عمه من ولدي!؟
خديجه برفعة حاجب:الله اعلم يام مانقدرش نفتيلك ..
مغليه:شكلها نجاة يومها ماتلقحش من فراغ اشبح شن شايفه..اتصلي بيها قوليلها تجي توا..
خديجه؛في عملها ولا؟
مغليه؛لااليوم قالت جوري مش ماشيه للعمل كلميها..
خديجه؛باهي...
مغليه بعصبيه:كان يطلع اللي في بالي حق ياطوبى الواعر نخليك تشوفي مني احرف من اللي درتيه فينا..
#تحالف
#طوبى
.....يتبع....
