(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الثامن_والثلاثين"طوق الفل2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
جابوا العشي ووزعوه المعازيم..
كان نظام صواني وكل شي شغل بيت ماطلبوش من برا..
تلاقوا وطيبوه في حوش لطفي..
مطيرة الرز..
اريج دارت السلايط ونوع حار.
وباقي انواع الحار دارتهم طوبى وعاونتهم فيها سدرة..
الحلو بس هو اللي خدوه من برا..
عواطف:عجبني العشي..
نجاح؛ايه كله الصراحه زعمه من اما معمل خدوه؟
والطاوله اللي حداهم..
كانت طاوله مغليه وبناتها ونجاه..
نجاة:عشاهم حلو..
خديجه؛اللي ناكله مستحيل ننساه في حاجات ناكل فيهم متأكده ان طوبى دايرتهم..
نسرين:قصدك داروه في الحوش..
خديجه:ع اقل حاجتين..اشرت ع فمها وهي تاكل وتتبنن..نفسها بالزبط..ماكله طوبى فيها بنت تقعد في فمك ماتتحولش..
ونجاة تسمع وهي تشوف لصونية العشي بنظرات غيره..
ع جية طوبى بصونيه وحكة مشروب ووراها آلاء واريج وقعمزوا الثلاثه ع طاوله مقابله طاوله عيت شنيبه
رمت طوبى كندرتها وقال:رجليا يارجليا معاش نحس بيكم..
اريج:مش منهم من بكري وانتي دوري..
آلاء:خسارة روفي فاتها جونا كله..
طوبى:اكيد قلبها هني..بس توا توا بعتلها عشي مع معتز..
ونجاة تسمع فيها شن تقول وتشبحلها وتفصل فيها تفصيل ونار الغيره تاكل في قلبها...
☘وبرا..
معتز مشي لحوش خالته غرفه ومعاه العشي..
فتحله عبد الرؤوف ودخله..
معتز؛سامحني والله مانقدر نقعد مازال بنرفع ليوسا..
عبد الرؤوف:يوسا النجيري اللي يخدم في الورشه؟
معتز؛ايه..
عبد الرؤوف ابتسم وقال:تمام توكل يابطل..وصحيت هلبه..
معتز:سلمك..
طلع معتز من الحوش...
وعبد الرؤوف خدي حافظة العشي وخش بيها داخل..
مشي للكوجينه وفتحها..
كان فيها زوز حوافظ سلفر مغطيات وحكاك مشروب..
خداهم الزوز وحطهم في سفرة..
خدي نفس ورفع السفرة وتوجه للباب الفاصل..
☘ركب للشقه..
وين وصل فيها قعد يدق في الباب برجليه..
شويه وانفتح..
كان وجهها زعلان لما شافت السفرة عيونها لمعوا بالفرح..
بس فيسع تفكرت اللي صار ورجعت وجهها زي ماكان..
هو ماباش يكملها خش وسكر الباب برجله..
بعدين رفع حاجبه وقعد يمشي بإتجاه الديار..
هي قعدت تلحق فيه..
لقاته خش دار النوم..
غرفه بهمس وضيق:جعانه جعانه..
فجأة طلع من دار النوم وخش للدار اللي هي قاعده فيها..
استغربت..
قدمت كم خطوة ووقفت حدا الباب ومدت راسها وهي تشوفله..
لقاته قعمز وبادي ياكل...
عبد الرؤوف وهو ياكل اعجابا بالماكله قعد يقول:اممم..تي شن هدا..شن هدا..بصوت عالي...شن هدا..
ورجع ياكل..
وغرفه تبلع في ريقها وتقول في نفسها"والله ماوقت كرامه ياغرفه بعدين انتي غالطه ياحمارة هادي حركه تلوح في وجهه شلاكتك تلويح!؟ والله ماتتحشمي وتستاهلي مكثر"
وشويه وقالت؛ميااوو..
هو كان حيضحك بس شد روحه بكل قوة..
مع هدا بانت في عيونه لما شافها وقال:تعالي..
خشت طول وهي بطير من الفرحه..
وفتحت الحافظه وخدت كاشيك وطاحت فيها..
وعبد الرؤوف يتفرج..
غرفه وهي تاكل:امم..طوبى هادي..
عبد الرؤوف ضيق عيونه وقال:ذقت حاجه زي هادي قبل..
فنصت غرفه عيونها..
عبد الرؤوف؛نفس البنه للماكله متاع غدي نهارتها ولا؟.
هي ضحكت وقالت؛اكيد اختي بنة ماكلتها زي بنة ماكلتي..
عبدالرؤوف بعدم تصديق:امممم..باهي ياحنه مدام هكي وانتي حالك ولى باهي حتى قبل بتمشي للبيانات والعراس معناها تقدري طيبي..
غرفه"يانهاري الاحرش!"
عبد الرؤوف:من غدوة بتولي للكوجينه..
ابتسمت غرفه بتوتر وقالت:حاضر..
وقعدوا ياكلوا هما الزوز بصمت بعدين عبد الرؤوف قال...
عبد الرؤوف:تو انتم عندكم مازال اخ ولا..
وجه غرفه تغير وتباطئت الماكله وهزت راسها ايجابا..
عبد الرؤوف:تعرفي وينه..
غرفه وعيونها في الصونيه؛مانحبش نتكلم عليه..
عبد الرؤوف:علاش..
غرفه؛هكي...
عبد الرؤوف شبحلها شويه بعدين؛عندك علم ان السنه اللي فاتت روح للبلاد وجي هني..
شبحتله غرفه بصدمه..
عبد الرؤوف:وخش حوشكم..
غرفه بصدمه:اما صار؟!
عبد الرؤوف:شهر عشرة العام اللي فات..
قعدت تشبح في الفراغ وهي تفكر ومش مستوعبه..
عبد الرؤوف:خيرك!
غرفه؛لمن جي ومن شافه؟.
عبد الرؤوف:هادي مانعرفهاش..
غرفه انسدت نفسها وسيبت الماكله بكل..
عبد الرؤوف قعد يشوفلها قال:كملي عشاك..
غرفه والدمعه في عينها قالت بصوت خانقاته العبرة:معاش نبي..
ووخرت قعمزت ع المندر..
عبد الرؤوف وهو يشوفلها؛خلاص ماصار شي انسي اللي قلته وتعالي تعشي..
غرفه معاش قدرت تشد روحها دموعها طاحوا ورا بعض..
عبد الرؤوف قلبه وجعه قال بإستياء:اففف..
وهي حطت رسغي ايديها ع عيونها وقعدت تبكي
☘تفكرت اللي صار في امه بعد سفره..وتفكرت موت امها..وحست بروحها محتاجه وجوده هلبه في الوقت الحالي كانت تغير من العلاقه اللي بين نبيله وعبد الرؤوف..
وكانت تتخيل لو كان هو موجود كيف حيكون شكل علاقتها بيه وشن كان ممكن يتغير في حياتهم...
ولما انجابت سيرته..وعرفت ان روح وجي لشارعهم وحوشهم مشاعرها جاشت وماقدرتش تكتمها ولاتتجاهلها..
وهي تبكي..ماحستش الا وهي وسط احتواء كل حنيه..
حنان يعادل حنان الاب والام والخوت مع بعض..
حنية الزوج المحب..
مش يقول الزوج الحنين رزق..!
وعبد الرؤوف زي ماقالت اخته قلبه قلب طفل..
وحنيته مافيش زيها وهي تعرف هالشي كويس..
احتوائه الحنون ليها خلاها تنهار بالبكي بدون ماتقول كلمه..
تبكي وهو يمسح ع شعرها بدون مايقول اي كلمة فيها مواساة...
☘☘☘☘☘
"هي تحسيها موسوسه ابصر كيف"
طوبى وهي تاكل:امم..في هلبه هكي تلقيهم طول الوقت يفكروا ودماغهم مايهداش..
اريج:والله صح والخدمه معاها توتر..بس صابرة وساكته الله غالب..
آلاء؛انتي كان تحصلي مصحة ولامستشفى خاص خيرلك..
اريج:من وين ياحسرة..
طوبى:خسارة لو دكتور اياد قاعد في الشارع راهو ساعدك..
الاء بفضول:معاش سمعتوا عنهم شي .
طوبى:نهائي..قالوا حتى غير ارقامه..
الاء:لهالدرجه!
سكتت طوبى وهي مضايقه..
وعيون نجاة وهي تاكل عليها..
وخديجه كذلك بعدين قالت؛طوبى..
شبحولها البنات وطوبى معاهم اللي ابتسمت وقالت:نعم؟
خديجه؛طوبى من اما معمل العشي..
اريج بضحكه:معمل عيت الواعر.
خديجه شبحت للي معاها في الطاوله وقالت؛مش قلتلكم..
نجاه حطت الشوكه في الصونيه..
وخدت حكة المشروب وقعدت تشرب وهي تشوف لطوبى بنظرات حاده..
خديجه شبحتلها وقالت؛ترا شن درتي انتي طوبى..
طوبى بإبتسامه:الكباب والبوريك والبركان..
خديجه:قسما بالله اول ماكليت من الكباب قلتلهم طوبى طعمة ماكلتك في فمي...
ابتسمت طوبى بخجل واحراج..
مغليه بإبتسامه؛عطيك الصحه بنتي.
طوبى:سلمك خالتي..
نسرين بضحكه وهي ترقص في حواجبها:يابخت اللي بتجي كنتهم..
خديجه؛ياسعدهم وياهناهم..
وطوبى تضحك وهي تقول:حرجتوني ..
مغليه؛طوبى..
نجاة قعدت تشبح لمغليه ودقات قلبها تسارعت من الخوف
طوبى:نعم..
مغليه؛ماعندكش مشكله تنخطبي توا ولاتتزوجي؟
خديجه كانت تراجي في الاجابه..
طوبى:ايه عادي يعني..مازال سنه ونكمل كليه..
خديجه ابتسمت وقالت؛ربي يقوي سعدك..
طوبى:تسلمي ابله خديجه..
واريج والاء يشوفولهم وحسوا انهم يلمحوا لشي..
وطوبى وهي بتغير عيونها عنهم جو في عيون نجاه..
ابتسمتلها نجاه..
ردت طوبى بإبتسامه مجامله بعدين طول غيرت عيونها عنها وقعدت تهدرز مع بنات اختها...
خديجه؛طوبى يام ماتطلعش من الشارع ايوه..
نسرين بضحكه:حطتيها في راسك..
خديجه:البنت تجنن مافيهاش عيب واحد..تشبحي في اللي مقعمزين هني كلهم عيونهم بياكلوها وكلهم يتمنوها كنه..
مغليه:الحق حتى اني خشت راسي ومانبيش نخسرها حتى هي..
نسرين:ع النصيب يام..
مغليه تنهدت وقالت؛ايه ع النصيب..
خديجه؛وان شاء الله ربي يجعل نصيبها عندنا..
وشبحت لنجاة..
لقتها تشبحلها بنظرات غريبه..
بعدين شربت من المشروب..
وخديجه ابتسمتلها وشربت حتى هي..
☘☘☘☘☘☘
صفيه بإبتسامه؛البسوا حجابكم خطيبها بيخش..
لبسوا الحاضرات حجابهم..
واميمه كانت مقعمزة ع الكوشه وهي لابسه القفطان اللي جابوه..
كان انيق وهي زادته حلاوة...
تستنى في حبيب عمرها بشوق اليوم ولى راجلها..
وبتلبس دبلة منه...
شويه وطل عمر ومعاه خديجه...
وتعالت الزغاريد..
هو لما جو عيونه ع اميمه معاش شاف شي معاها..
لقي روحه ماشيلها طول بدون اراده..
هي ناضت وقفت..
هي مدت يدها بتصافحه..
وهو بدون مايحس بروحها ضمها..
هي انصدمت..وعيلتها انصدمت..وعيلته انصدمت..
وشارع القهوة كله اللي كان في الخيمه انصدم..
اميمه وهي قريب تتبخر من الخجل؛عمر شني هدا!؟
هو استاقظ لروحه ووخر وقال بضحكه:اسف..
واميمه حكت مقدمه انفها وهي محرجه ونزلت راسها لوطا..
سدرة:عيلة مختشه..
ضحكت فردوس بكتمان..
.....
آلاء:الحركه متاعه تهبل..
اريج؛خفة عقل هادي..
وطوبى تضحك...
.....
مغليه؛اركبيله عطيه يلبسها ويطلع فيسع قبل ليدير العار..
ضحكت نسرين وركبتله بالدبله والتعليقه...
وشغلوا اغنيه تناسب الموقف..
نسرين؛تريس ع روحك..
اميمه ابتسمت بإحراج...
وعمر خدي الدبله وهو يضحك بإحراج وقال لأميمه؛هاتي يدك..
مدت اميمه يدها..
وجت اريج وقعدت تصور فيهم..
وهو يلبس فيها الدبله..
بعد لبسها رفع يدها وقبلها....
فنصت فيه وهي تضحك..
عمر:فوتي..
والناس يعلقوا عليه ويضحكوا..
نسرين؛هي لبسها التعليقه واطلع..
قعد يضحك واميمه تضحك معاه..
وبدي يلبس فيها بالحاجه..
مطيرة وهي تحرك صوابع ايديها من الخلف للأمام بسرعه؛حيه حيه حي كان يسمع بوي..
سدرة؛ تي اني قريب نمشيله نطلعه من رقبته..
وصفيه حاطه يدها ع فهما وتضحك..
ولبس عمر اميمه التعليقه..
بعدين خدتلهم اريج لقطات..
هما الزوز مع بعض..بعدين معاهم امه وخواته..
بعدين مع امها وبنات عمها وعمتها ..
وبعدها جابوا التورته اللي جايبينها معاهم عيلة العريس..
كانوا حاطينها ع طاوله كروسه..
نزلولها عمر واميمه وقصوها مع بعض...
وكلوا بعض..وشربوا بعض العصير..
واريج تصور في كل لقطه..
اما مغليه..
خدت طوبى ع تركينه ونجاة شافتلهم..
طوبى؛نعم خالتي..
مغليه:بكري لما سألتك ع الخطوبه توا قلتي ماعندكش مانع..واني يابنتي الحق مانكذبش عليك عاجبتيني هلبه هلبه ونبيك تولي كنتي..
طوبى تفاجئت..
مغليه:شن رايك في الجالي!؟
طوبى وهي متفاجئه ع الآخر:الجالي!
مغليه بإبتسامه؛ايه..
طوبى وهي محرجه؛بصراحه مش عارفه شن بنقولك..بس هكي نحس في الجالي زي خوي الكبير..
مغليه:طبيعي ماهو صغار شارع واحد..بس بعد يخطبك تتغير نظرتك ليه..
طوبى وهي محرجه؛مش عارفه شن نقولك..
مغليه حستها زي اللي مش متقبله الموضوع رضت عادي وماضايقتش منها اساسا تشوف فيها صغيره عليه بس خديجه وكلامها المستمر عليها شجعها تكلمها..
مغليه بإبتسامه:ع راحتك بنتي مش مشكله..
ابتسمت طوبى وقالت؛تسلمي خالتي..
طبطبت مغليه ع ظهرها ومشت لولدها وكنتها..
وطوبى خدت نفس ومشت وراها..
وعيون نجاة تلحق فيها...
☘☘☘
وطلع عمر...
وبعده بشويه جت ريمة عروس يوسف جايبها راجلها.
وكانوا معاه هي وامها واختها..
دخلوها وهما يزغردوا واستقبلوها نساوين عيت الواعر..
عواطف:قنينه..
نجاح؛ايه بس شوفي خالتي صفيه جوها انقلب 180درجه..
عواطف ركزت عليها وقالت:ايه صح..
نجمه:مش عاجبها كيف ولدها رخي بخطيبته وولالها ..
عواطف:الصراحه عندها الحق شكلها هادي وحده مش هوينه تطلع هي لايده عليه وواخدته منها..
نجاح:وهو ماصدق عاد...
عواطف بإزدراء:كلهم كلاب زي بعضهم..
.......
مغليه؛مش عارفه كيف حسيتهم زي لموهم لمان..
خديجه؛واضحه يام الولد واخدها من غير علم ماليه..
نجاة قعدت تشبح لخديجه بنظرات فيها خوف..
نسرين:حتى اني ماخشتش راسي القصه اللي ألفوها ع قراية الفاتحه..
مغليه:والله والله لو يديرها واحد من خوته نغضب عليه دنيا وآخره..
بلعت نجاة ريقها وشبحت للعرايس..
خديجه:حشاهم خوتي مايديروهاش..
نسرين:كلا نضال مانضمنه..
مغليه:لاهداكا متوقعه منه كل شي مرفوع من عليه القلم بكل..
ضحكوا بناتها..
ونجاه عيونها ع ريمه وهي تتخيل في روحها فمكانها..
قالت في نفسها"كلكم حترضوا تكرهوا ولاتحبوا.."
غيرت عيونها عن العرايس وشافت طوبى وهي خاشه للحوش وكانت تتكلم بالتليفون..ورجع شعور الغيره تحرك بقوة مرة تانيه...
☘شويه وقالولهم يطلعوا...
جابولهم عباياتهم..لبسوهم..وقبل مايطلعوا شتوا العيلتين ع العرايس والعرسان..
وبعدها خلاص بيطلعوا..
في الفم كانت في زحمه والموجودات باديين يروحوا..
طلعوا عيلة شنيبه ونجاة اخرهم لأنها كانت دور ع تليفونها لين لقاته..
وهي طالعه شافت طوبى جايه بس هي ماشافتهاش..
نزلت برنوص ع وجهها شويه..
وفي وسط هديكا الزحمه..
وين قربت منها طوبى بتخش..
مدت رجلها..
وطوبى كانت تمشي وهي مش مركزه..
عثرت في رجل نجاة...
وطاحت طيحه قويه ع وجهها..
طول نجاه مشت بسرعه وسط الزحمه..
اما طوبى بعد طاحت..
اريج والاء:طوبى..!
شبحتها اميمه ناضت ونزلت من الكوشه..
وسدرة اللي ماكانتش تشوف فيها شبحتهم كيف مشولها يجروا ناضت تجري حتى هي..
اريج وهي مفجوعه؛طوبى طوبى!
الاء:بيبو تسمعي فيا..
اميمه بخوف:طوبى!
سدرة وهي جايه تجري قعمزت ع ركابها جنبها وقعدت تنوض فيها؛طوبى بنتي طوبى..
طوبى وهي تتألم وشبه دايخه؛نسمع فيكم..
قعدت تحاول تنوض..
والناس واقفين يشبحولها..
ع جية مطيرة وفردوس يجروا وين شافوا الناس ملتمه..
شافوا طوبى طايحه..
مطيرة بخوف:طوبى! خيرها!
سدرة بقلق شديد؛كيف طحتي!
طوبى وهي خلاص بدوخ:مش عارفه عترت في حاجه..
اريج؛طوبى طوبى..وقعدت تخبط ع وجهها..
سدرة:حي عليا حي!..
عواطف:ضغطها هابط..
وسعوا شويه بالله خلوها تاخد نفس..
وخروا عنها..
وقعدت اريج شادتها تمروح عليها..
جتها عواطف وقالت؛ترا بالله شديها كويس اريج..
وطبست خدت رجلين طوبى رفعت فوق..
واريج ساوت راسها بحيث تكون الوضعيه صحيحه..
وفعلا بدي اللون يرجع لوجه طوبى.
وفتحت عيونها..
سدرة ودموعها تنزل:طوبى..
طوبى بتعب:تسمع فيك ياعيوني..
سدرة:انتي عيوني ياروحي ياوخيتي..
كلهم تأثروا هلبه..
مطيرة:عوينه وجت فيها بنتي ياناري..
نجمه:ايه والله العيون عليها..
عواطف:هاه طوبى شن جو..
طوبى هزت راسها وقالت:الحمد لله..
شويه ونزلت عواطف رجليها طوبى..
وجتها سدرة طول قعدت تقعمز فيها مع اريج...
ضمتها لحضنها وهي تقول:جيبوا عصير جيبوا..
الاء:هي شويه بس..
وخشت تجري داخل..
وبدت سدرة تمسح ع راسها بعدين قعدت تقرا عليها..
☘☘☘☘☘
فتحت عيونها..
الدنيا الظلام..
قعدت تحرك في عيونها في المكان شافت ضي كان من شاشة تليفونه..
يدوب شبحت وجهه من الضي..
غرفه:رؤوف..
هو فز قلبه وشبحلها وقال:نعم!؟
غرفه؛ماتطلعش من هني مانبيش نقعد بروحي..
عقد حواجبه وقال:حاضر حاضر..ولي ارقدي..
غرفه وهي بين اليقظه والمنام؛مش تخليني زي امي ومختار ماتخلنيش بالله عليك..وبدي صوتها يخفت لين اختفي..لأنها رجعت رقدت..
قلبه يزيد يوجع فيه عليها..ينسى في وجعه ويحس بيها هي..
واضح ان في هلبه خفايا عن حياة غرفه هو مش عارفها..
ناض من مكانه..
خدي مخدي..
وجي خداها ع الارض..حطها ورقد وهو يشوفلها كيف راقده ع الفراش..
ملامح وجهها كانت حزينه..
وهو يشوفلها قعد يفكر وياما خطرت ع باله هلبه اسئله..
وتليفون يرن وهو حاطه ع الصامت بش مايزعجش نومها..
☘نبيله؛شكله رقد..لكن ماعنده وين يهرب الصباح رباح..
☘☘☘☘☘
وفي حوش شنيبه..
تحديدا في صالتهم..
كانت مغليه مع بناتها ونجاة وعائشه نزلت من شقتها تسأل فيهم ع الاجواء..
عائشه وهي تضحك:يللا ربي يهنيهم ويكمل ع خير..
كلهم قالوا:اللهم آمين..
نجاة:الله يبارك ع حوش الواعر هادم فالحين في كل شي..
خديجه:بالذات الزين.
نجاة:وكله عند سدرة..الصراحه خواتها مش بحلاوتها..الله يبارك الناس تكبر وهي تصغر توجعك كيف وحده زيها من غير والعايبه واختها متزوجات وبصغارهم..
خديجه وعائشه قعدوا يشبحولها بنظرات اللي حس ان الكلام عليه..
مغليه؛نصيبات يابنتي نصيبات..
نجاة؛صدقتي عمتي..
"يام.."
مغليه؛خش خش ياعريس.
هما ابتسموا..
خش عمر وبعده نضال والزوز قالوا :السلام عليكم..
كلهم ردوا السلام..
عمر شبح لنجاة وقال:طبعا وخيتي نجاة اني قلت قبل لوصار من موضوعي بنجيبلك هديه..
قدملها ومدلها عليه مجوهرات صغيره وقال:تفضلي.
ضحكت نجاة وقالت:انتي وخيي عمر يعني لما نساعدك اكيد مانراجيش في مقابل..
عمر:مقابل شني! هادي هديه..ماتفكريش ترديها عليا..
هي ابتسمت وقالت:تسلم بارك الله فيك وان شاء الله ربي يكمل ع خير ويهنيك..وخدتها منه..
وكلهم كانوا يشبحولهم ومافي حد مبتسم اخطا نسرين ومغليه..
مغليه؛ترا افتحيها خل نشوفوا شن جابلك..
ضحكت نجاه وفتحت الباكو وطلعت منه خاتم ذهب ابيض وقال:الله..يجنن..شكرا شكرا عمر..
عمر:باهي الحمد لله اللي عجبك..
وهي لبساته في اليد اللي لابسه فيها الحديده..
ركز عليها نضال..
وكذلك خديجه...اللي حافظه ذهب نجاة حفظ..الحديده جديده وغاليه هلبه..
ونضال وهو يركز فيها..
واخيرا..عقله جابله هو وين شاف زيها بالزبط وياريته ماذكره..
ذكره وصدمه وخلاه مش مستوعب..
نضال في نفسه"طلع من دماغك القطاف هدا،مستحيل مايديرهاش الجالي تي هو يكره اصلها!"
خديجه؛بحبحي ياحنه بحبحي مدامك في حوش محمدشنيبه..
نجاة شبحتلها وابتسمت ابتسامه عريضه من فوق نفسها..
مغليه بإبتسامه؛ ربي يهنينا كلنا يارب ويديم لمتنا..
كلهم قالوا بأصوات متقطعه:آمين..
☘☘☘☘☘
تاني يوم
الساعه8:30صباحا..
جت اشعة الشمس ع وجهه..فيقاته..
فتح عيونه شويه..بعدين دف مخدته بعد شويه عنها ورجع بيرقد..
تبثوا عيونه عليها لقاها فايقه وتشبحله..
هو حط راسه ع المخده وربع ايديه وقال:خيرك تشبحيلي هكي..
غرفه ودموعها في عيونها؛اسفه..
هو بلع ريقه..وحس بشعور ع ماكان حلو بس مؤذي في نفس الوقت..
عبد الرؤوف:على شني..
غرفه بدموع؛ع كل شعور حقير خليتك تحسه ع قد ماوجعتك ع قد ماآذيتك اسفه..عارفتها كلمه تافهه ماتقدر تغير شي ولاتقدر دير شي ولاحترد اللي راح منك السنين اللي فاتوا..
نزلوا دموعها وكملت تقول..بس مانقدرش ع غيرها..مانقدرش نرجع بالزمان لتالي ونغير شي من اللي فات..مانقدرش ع اكثر من اني نعترف بذنبي ونتأسف بس..
عبد الرؤوف:ومادامك عارفه ان مافيش منها فايده علاش تقولي فيها..
غرفه؛حسيت روحي نبي نقولها وقلتها معاش نبي نكابر عليها اني غلطتك وغلطي كبير ولانتأسف نفع ولامانفعش..
قعد يشبحلها وهو ساكت..
وهي تشوفله بصمت..
والحديث كانت بلغة العيون .
غرفه تبيه ينسى الماضي ويفتح صفحع جديده..
وهو مش قادر يصدقها ولايأمن فيها..
عبدالرؤوف؛ربي عاطيك وجه زي الملايكه يخلي اللي يشوفه مايشكش لحظه ان ورا هالوجه في شيطان رجيم..
المؤمن لايلدغ من جحره مرتين ياغرفه...معاش يغروني وجهك ولادموعك ولاأي شي يبان ع وجهك..
ماتعبيش روحك وتحاولي تصلحي اللي فسدتيه معاش يتصلح خلاص..
وعطاها بالظهر غمض عيونه بشده وهوحاس بضيق شديد لأن اللي قاله عكس رغبته تماما..
شايف انه مازال عليها..مازال ماتعلمتش درسها كما يجب..
اما هي فكانت تعبانه ومحبطه وماعندهاش حيل حتى للبكي..
عطاته بالظهر حتى هي وغمضت عيونها ورجعت رقدت وهي حاسه بحزن كبير..
☘☘☘☘☘
"تبوا رب مازال"
سدرة؛مانبوا شي تعالي افطري..
جت طوبى وهي تضحك وتقول:والله حالي باهي ياسديرة..
سدرة:العشيه بنرفعك للمصحه يشوفولك ركبتك..
اميمه؛من باب الاحتياط.
مطيره:عطيه فقصه في عيونه اللي شافها وماقالش ماشاء الله والله يبارك..
وطوبى تاكل في العصيده وتضحك..
☘☘☘☘☘
وجت عشية يوم الخميس..
ورفعت سدرة طوبى للمصحه اللي يخدم فيها الدكتور اياد..
طوبى:حي سدرة دكتور اياد.
طول سدرة شافت وين ماتشبح اختها بعدين قالت:تعالي..
ومشوا ناحيته...
☘فهالوقت..
الساكن الأول لحوش اياد استقر واخيرا في الحوش..
بعد ماحط شناطيه في الحوش...
مشي طلع للقهوة...
وهو ماشي شاف فايزة طالعه بأمها من الحوش..
ركبتها السيارة وهي ركبت بعدين تحركت طول..
هو وقف في مكانه وقال:الله يرحمك ياأحمد..
"هي اركبوا السيارة بهدوء ماتخلونيش نضربكم قدام الناس"
شبح يساره..
وعيونه يجو عليها..
ماعرفهاش..مراة انيقة وجميله وطالعه من حوش شنيبه...
خديجه لا..خديجه مش هكي شكلها....
قعد يشوفلها كيف تمشي جهة السواق.. لين وصلت فيها وركبت..
لبست نظراتها وتحركت..
وفاتت من قدامه...وهو بدت ع وجهه ملامح ابتسامه ببنت جيرانه اللي كان زمان مسمينها "بنور"...
#طوق_الفل
#طوبى
....يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
